«Հաւատք՝ Աստուծոյ Խօսքին Վրայ» Եհովայի Վկաներու 1997–Ի Նահանգային Համաժողով

¹ «Քու սրահներուդ մէջ մէկ օրը ուրիշ տեղի հազարէն աղէկ է»։ (Սաղմ. 84։10) Երբ սաղմոսերգուն պաշտամունք կը մատուցանէր Եհովայի տաճարին մէջ, ան ամենակալ Աստուծոյ ներկայութիւնը կը զգար։ Երբ ազգը տարեկան տօնախմբութեանց համար կը հաւաքուէր ու ճշմարիտ երկրպագուները Երուսաղէմ կը խուժէին, Իսրայելացիները հաճելի ընկերակցութիւն կը վայելէին, մինչ տաճարի գաւիթին մէջ կը հաւաքուէին։ Այս կերպով անոնք կը յիշէին իրենց ազգային միութիւնը, որպէս Եհովայի օրհնութիւնն ու հաճութիւնը ունեցող միակ ազգը երկրի վրայ։ Ամէն տարի, պատեհութիւնը ունինք միութեան եւ ուրախութեան նմանօրինակ զգացումներ բաժնեկցելու մեր հազարաւոր եղբայրներուն ու քոյրերուն հետ։ Մեր օրերուն, Եհովայի կերպերէն մէկն է նահանգային տարեկան համաժողովներով իր ժողովուրդը համախմբել, որպէսզի սորվին եւ ընկերակցութիւն վայելեն։

² Տօներու ընթացքին, Երուսաղէմի մէջ ու անոր շուրջ ապրող Եհովայի ժողովուրդին հսկայ բազմութեան հոգ տանիլը կազմակերպութիւն կը պահանջէր։ Հաւանաբար, կարգապահութեան եւ խաղաղութիւնը պահպանելու համար հարկ ըլլար ուղղութիւններ տալ բնակութեան, ժողովի ժամերու եւ ուրիշ կարգադրութիւններու մասին։ Քանի որ այս հարցերը ճշմարիտ պաշտամունքին հետ կապ ունէին, Իսրայելացիները ուրախութեամբ կը հետեւէին այս ցուցմունքներուն։—Սաղմ. 42։4. 122։1

³ Հարիւրաւոր եղբայրներ արդէն իսկ տասնեակ հազարաւոր ժամեր տրամադրած են համաժողովի գրասենեակները կազմակերպելու, պանդոկի անձնակազմերու հետ տեսակցելու եւ անոնց հետ համաձայնելու, գրեթէ 70 քաղաքներու մէջ համաժողովի վայրերու անձնակազմերուն հետ աշխատակցելու, Յանձնարարուած Վարձու Սենեակներու Ցանկեր պատրաստելու եւ ուղարկելու, եւայլն։ Այս եղբայրները Ընկերութեան՝ Նահանգային Համաժողովի Գրասենեակին հետ սերտօրէն կ’աշխատին, դասաւորելու համար համաժողովի մը գործընթացին յարակից եղող բազմաթիւ մանրամասնութիւնները։ Թերեւս անհատապէս չենք տեսներ թէ նահանգային տարեկան մեր համաժողովները որքա՛ն ժամանակ, ջանք եւ ծախս կը պահանջեն, սակայն վստահաբար բոլորս ալ կը գնահատենք իւրաքանչիւր հաւատարիմ եղբօր ցուցաբերած անձնազոհ հոգին. այդպէս չէ՞։

⁴ Մինչ՝ «Հաւատք՝ Աստուծոյ Խօսքին Վրայ» 1997–ի Նահանգային մեր Համաժողովին պատրաստութիւնները կը շարունակուին, մի քանի կէտեր ունինք զորս ձեր ազնիւ ուշադրութեան ու լուրջ նկատառութեան կը յանձնենք։ Ձեր համագործակցութիւնը ցոյց պիտի տայ ձեր անձնական գնահատութիւնը ձեզի համար եղած այդ բոլոր կարգադրութիւններուն հանդէպ։ Թէեւ այս հարցերէն ոմանք նախապէս նկատի առնուած են, սակայն կարեւոր է որ իւրաքանչիւրս յստակօրէն տեսնենք համաժողովի կարգադրութիւններուն թիկունք կանգնելու համար Եհովայի առջեւ մեր ունեցած պատասխանատուութիւնը։

⁵ Իջեւանը Ե՛րբ Ապահովել. Դեկտեմբեր 30–ով սկսող Ծառայութեան Ժողովին, Ընկերութեան ուղղութիւնն է որ նահանգային ձեր համաժողովի նշանակումի նամակը ժողովքին կարդացուի։ Այդ գիշեր ժողովէն ետք ձեր նահանգային համաժողովին համար՝ Իջեւանի տեղական Գրասենեակին կողմէ ղրկուած՝ Յանձնարարուած Վարձու Սենեակներուն Ցանկը պիտի դրուի ժողովքի ցուցատախտակին վրայ։ Երէցները նահանգային համաժողովի նշանակումը եւ Յանձնարարուած Վարձու Սենեակներուն Ցանկը շատ գաղտնի պիտի պահեն մինչեւ Ծառայութեան այս Ժողովին ժամը։ Այս Ծառայութեան Ժողովին, նահանգային համաժողովի նշանակումի նամակը կարդացուելէն առաջ, ո՛չ երէցները, ո՛չ ալ ուրիշներ պանդոկի սենեակներ պէտք է ապահովեն։

⁶ Որպէսզի ամէն ոք կարենայ սենեակ մը ձեռք ձգել, Ընկերութիւնը՝ Իջեւանի Գրասենեակին ցուցմունքներ տուած է, որ գալիք համաժողովին համար մատչելի բոլոր պանդոկները, Յանձնարարուած Վարձու Սենեակներուն առաջին Ցանկին վրայ դնէ։ Միմիայն երբ այս պանդոկները լեցուին, նորերը պիտի աւելցուին յաջորդ ցանկերուն վրայ։ Երբեմն, եղբայրներ սպասած են մինչեւ երկրորդ կամ երրորդ Յանձնարարուած Վարձու Սենեակներուն Ցանկին, իրենց պանդոկի վերապահումները ընելու համար։ Այս ձգձգումին պատճառը կրնայ ըլլալ դիտմամբ ուշացումը կամ ալ թերեւս կ’ակնկալեն որ իրենց նախընտրած մէկ պանդոկը գտնել, հետագայ ցանկի մը վրայ։ Վերջին վայրկեանին սենեակ ապահովելը Իջեւանի Գրասենեակին երկու խնդիր կը յարուցանէ։ Առաջինը, Իջեւանի Գրասենեակին համար կարելի չէ որոշել որ ե՛րբ յաւելեալ սենեակներու կարիքը պիտի ըլլայ։ Երկրորդ, քանի որ Դիտարանի համաժողովներու բոլոր վերապահումները պէտք է ստացուին որոշուած թուականէն առաջ, կրնայ ըլլալ որ իրենց վերապահումները ընելու համար շատ երկար ժամանակ սպասողներուն մատչելի սենեակներ չմնան։ Ուստի, կը խնդրենք որ ձեր վերապահումները ընէք Յունուար ամսուան ընթացքին, Յանձնարարուած Վարձու Սենեակներուն առաջին Ցանկէն։

⁷ Եթէ ձեր ընտրած պանդոկը լեցուն է, ուրիշի մը հեռաձայնեցէք, մինչեւ որ տեղ մը ապահովէք։ Եթէ ցանկին վրայ եղած բոլոր պանդոկներուն հեռաձայնելէ ետք մատչելի սենեակներ չգտնուին, ձեր ժողովքի քարտուղարը տեղեակ պահեցէք եւ ան Իջեւանի Գրասենեակին հետ կապ պիտի պահէ, հեռաձայնելով Յանձնարարուած Վարձու Սենեակներուն իւրաքանչիւր Ցանկին վերը յիշուած թիւերէն մէկուն։ Իջեւանի Գրասենեակին մէջ ծառայող եղբայրները պանդոկներուն հետ պիտի համագործակցին յաւելեալ սենեակներ ապահովելու համար։ Այն ատեն նոր ցանկ մը պիտի ուղարկուի ձեր ժողովքին։ Հաճեցէք նոր ցանկը սպասել պանդոկի ձեր վերապահումները ընելու համար։ Երբ կանխաւ կ’ապահովէք, միշտ պանդոկէն խնդրեցէք որ ձեր վերապահումը վաւերացնող թիւ մը տայ։ Երբ պանդոկ ժամանէք, ձեր վերապահումը վաւերացնող այս թիւը այդ տեղի պաշտօնեային տուէք։

⁸ Եթէ Յանձնարարուած Վարձու Սենեակներուն Ցանկը մասնայատուկ բան մը չնշէ, պէտք է ծրագրէք որ առաւելագոյնը չորս չափահասներ ըլլան մէկ սենեակի մէջ։ Կարգ մը պանդոկներ Իջեւանի Գրասենեակին տեղեկացուցին թէ՝ հինգ, վեց եւ երբեմն եօթը չափահասներ միեւնոյն սենեակին մէջ պառկած են։ Հրդեհի եւ ապահովութեան օրէնքներուն պատճառաւ, ասիկա ոչ միայն վտանգաւոր՝ այլեւ շատ քաղաքներու մէջ օրէնքին դէմ է։ Անիկա նաեւ անարդար պահանջ մը կը դնէ պանդոկին ու անոր անձնակազմին վրայ, յաւելեալ անձեռոցներու, սաւաններու, եւայլն։ Հետեւաբար, երբ սենեակ մը ապահովելու ձեր կարիքը նկատի կ’առնէք, պանդոկի սենեակին մէջ արտօնուած առաւելագոյն թիւը մի անցնիք։

⁹ Պանդոկներուն Կանխավճար Ղրկել. Իւրաքանչիւր պանդոկի հետ Ընկերութեան համաձայնագիրը կ’ըսէ թէ մեր պատուիրակները իրենց սենեակները պիտի ապահովեն կանխավճարով մը։ Այս համաձայնագիրը կը շարունակէ ըսել. «Վերապահութիւնները կ’երաշխաւորուին երբ կանխավճար մը կը ստացուի»։ Ուստի սենեակի մը վերապահութիւնը երաշխաւորելու համար պանդոկը ձեր կանխավճարը պէտք է ստանայ։ Անցեալ տարի երբ կարգ մը եղբայրներ իրենց պանդոկները հասան, տեղեկացան որ իրենց վերապահութիւնը ջնջուած էր, համաժողովէն քանի մը շաբաթ առաջ։ Առանց կանխավճարի, պանդոկը իրաւունք ունի ձեր սենեակը ուրիշի մը տալու, եւ իջեւանելու մեր կարգադրութեան մէկ ՊԱՀԱՆՋՆ է մէկ գիշերուան կանխավճարը ընել։ Իւրաքանչիւր ապահովուած սենեակի համար, մէկ գիշերուան կանխավճար պահանջուած է, վերապահութիւնը ընելէն ետք տասը օրուան ընթացքին։

¹⁰ Չենք քաջալերեր որ թղթատարական միջոցաւ թղթադրամ ուղարկէք։ Անիկա կրնայ գողցուիլ, եւ որեւէ փաստ չկայ որ ձեր դրամը ստացուած է։ Եթէ վճարագիր մը ղրկէք, ձեր վերապահութիւնը վաւերացնող թիւը անոր վրան դրէք, ապա պանդոկին հետ կապ պահեցէք երկու շաբաթ ետք, հաստատելու համար որ ձեր կանխավճարը ստացած են։ Եթէ ձեր կանխավճարին համար վարկաքարտի մը թիւը տալու ըլլաք, պէտք է պանդոկի պաշտօնեային տեղեկացնէք որ կանխավճարը անմիջապէս ձեր վարկաքարտէն գանձեն։

¹¹ Պանդոկի Վերապահումներ Փոխել Կամ Մէկէ Աւելի Պանդոկներու մէջ Վերապահումներ Ընել. Նահանգային համաժողովէն առաջ, Իջեւանի Գրասենեակը իւրաքանչիւր պանդոկի հետ կապի մէջ կը մտնէ գիտնալու թէ մեր պատուիրակներուն կողմէ քանի՛ սենեակներ վերապահուած են։ Ամէն երկու կամ երեք շաբաթը անգամ մը ասիկա ընելը թոյլ կու տայ Իջեւանի Գրասենեակին, որոշելու թէ համաժողովին համար բաւարար սենեակներ ապահովուած են թէ ոչ։ Անցեալ տարի կարգ մը քաղաքներու մէջ, մինչ համաժողովի ժամանակը կը մօտենար, շատեր իրենց վերապահումները ջնջած էին բազմաթիւ վերապահումներ ստացած պանդոկներէն, եւ կամ պատուիրակներ բոլորովին չէին ներկայացած։ Այս եղբայրները ու քոյրերը ո՞ւր գացին։

¹² Ակներեւաբար, նոր վերապահումներ կատարուած էին համաժողովի վայրին աւելի մօտիկ պանդոկներու հետ ու նախկին վերապահումները անտեսուած էին։ Այս պատճառաւ, պանդոկներէն ոմանք նուազագոյնը երկու գիշերուան համար կանխավճար կը պահանջեն. թէ ոչ անոնք պիտի մերժեն Դիտարանի համաժողովներուն համար սենեակներ ապահովել։ Քանի որ ասիկա խնդիրներ կը յարուցանէ թէ՛ պանդոկներուն եւ թէ Իջեւանի Գրասենեակին, կը խնդրենք որ կանխաւ ապահովելէ ետք, ձեր վերապահումը մէկ պանդոկէն միւսը չփոխէք, նոյնիսկ եթէ աւելի մօտիկ կամ աւելի բաղձալի հատ մը երեւնայ հետագայ ցանկի մը վրայ։ (Մատթ. 5։37. բաղդատել՝ Սաղմոս 15։4։) Այդ պանդոկը ցանկին վրայ աւելցուած է, քանի որ կան եղբայրներ եւ քոյրեր որոնք տակաւին սենեակներու կարիք ունին։ Անիկա աւելցուած չէ որպէսզի անհատներ արդէն իսկ իրենց ապահոված սենեակները փոխեն աւելի լաւի մը հետ։ Եթէ նոյնիսկ ձեր ապահոված պանդոկը 5 վայրկեան կամ 25 վայրկեան հեռու է համաժողովի վայրէն, տակաւին հոգեւորապէս պիտի կերակրուիք ու ձեր եղբայրներուն ու քոյրերուն ընկերակցութիւնը պիտի վայելէք, այդպէս չէ՞։ Մեր նպատակակէտն է՝ նուազեցնել Իջեւանի Գրասենեակին ամէն տարի ղրկած ցանկերուն թիւը ու դիւրացնել իջեւանելու կարգադրութիւնները։ Ասիկա կրնանք իրագործել միայն եթէ ամէնքը համագործակցին Ա. Տիմոթէոս 6։8–ի մէջ յիշուած սկզբունքին հետ. «Հապա կերակուր ու հանդերձ ունենալով՝ անոնցմով բաւականանանք»։

¹³ Նոյնպէս կարեւոր է որ համաժողովի ընթացքին միայն ձեզի պէտք եղած սենեակները վերապահէք։ Թէեւ փափաքելի կրնայ ըլլալ որ աւելի մեծ խումբ մը միեւնոյն պանդոկին մէջ կենայ, սակայն ասիկա անհրաժեշտութիւն մը չէ։ Հաճեցէք ուրիշ պատուիրակներու համար սենեակներ չվերապահել, բացի եթէ նախապէս ասոր նկատմամբ համաձայնած՝ ու որոշուած անուններ ներկայացուցած էք։ Այս սովորութիւնը համաժողովին համար վերապահուած սենեակներուն թիւը կ’աւելցնէ ու կը դժուարացնէ որ ուրիշ պատուիրակներ առաջին ցանկէն վերապահումներ ընեն։ Իւրաքանչիւր սենեակ պէտք է վերապահուի անոր մէջ իջեւանող անհատներէն մէկուն անունով։

¹⁴ Անշուշտ, եթէ պանդոկի մը հետ խնդիր մը ունենաք համաժողովի ժամանակամիջոցին, հաճեցէք հարցը համաժողովի տեղւոյն Իջեւանի Գրասենեակին ուշադրութեան յանձնել։ Համաժողովէն առաջ կամ ետք եթէ որեւէ դժուարութեան հանդիպիք, կրնաք Իջեւանի Գրասենեակին տեղեակ պահել, գործածելով Յանձնարարուած Վարձու Սենեակներու Ցանկին հասցէն եւ հեռաձայնի թիւը։ Ձեր ունեցած դժուարութիւնը մանրամասն նկարագրեցէք, մէջը ըլլալով հարցը լուծելու համար ձեր առած քայլերը, որպէսզի եղբայրները կարենան օգնել ձեզի։

¹⁵ Ընկերութեան Յանձնարարուած Վարձու Սենեակներու Ցանկին Վրայ Չեղող Պանդոկներ Գործածել. Ընկերութիւնը կը ջանայ նահանգային համաժողովներ սարքել հոն՝ ուր աւելի յարմար է մեր եղբայրներուն ու քոյրերուն համար։ 1996–ին, 11 յաւելեալ վայրերու մէջ նահանգային համաժողովներ տեղի ունեցան։ Այս քաղաքներէն ոմանք 20 տարիէ ի վեր Դիտարանի նահանգային համաժողով մը չէին ունեցած։ Որպէս արդիւնք, Ընկերութիւնը բազմաթիւ երախտագիտութեան նամակներ ստացաւ։

¹⁶ Թէեւ մեր համաժողովի վայրերուն յարմարութիւնը կը թոյլատրէ որ բազմաթիւ եղբայրներ ամէն օր տուն վերադառնան, տակաւին պանդոկի սենեակները անհրաժեշտութիւն մը կը մնան։ Անցեալ տարի, 1,076 պանդոկներ գործածուեցան 65 տարբեր քաղաքներու մէջ տեղի ունեցած 198 նահանգային համաժողովներու համար։ Համաժողովի իւրաքանչիւր քաղաքի մէջ, տեղացի եղբայրներու խումբ մը տեղական բազմաթիւ պանդոկներու հետ շփման մէջ մտաւ, ջանալով կարելի եղած լաւագոյն գիները ձեռք ձգել համաժողովի պատուիրակներուն համար։ Ամիսներ բանակցելէ ետք, այն պանդոկները որոնք համաձայնեցան համաժողովի սենեակներու գիներուն շուրջ, Յանձնարարուած Վարձու Սենեակներու Ցանկին վրայ դրուեցան։

¹⁷ Իւրաքանչիւր քաղաքի մէջ, այս եղբայրները շփման մէջ կու գան բազմաթիւ պանդոկներու հետ, որոնք կը մերժեն Դիտարանի համաժողովին հետ գործակցիլ։ Հասկնալի է որ կարգ մը պանդոկներ ուրիշ յաճախորդներու պատճառով չեն ակնկալեր միշտ ազատ սենեակներ ունենալ։ Սակայն, տրուած բազմաթիւ պատճառներէն յաճախ յիշուածը հետեւեալն էր. «Ինչո՞ւ գինը սակարկել։ Ձեր պատուիրակները այս համաժողովին մեր քով իջեւանեցին աւելի բարձր սակեր վճարելով, կ’ակնկալենք յաջորդ տարի ալ տեսնել զանոնք»։ Քանի որ պանդոկներուն նպատակն է դրամ շահիլ, դժուար է անոնցմէ խնդրել որ աւելի նուազ սակեր ընդունին քան ինչ որ արդէն կը ստանան մեր պատուիրակներէն։

¹⁸ Ամէն տարի, մեր եղբայրներուն կոչ կ’ընենք որ վերապահումներ ընեն միմիայն Ընկերութեան Յանձնարարուած Վարձու Սենեակներու Ցանկին վրայ եղած պանդոկներուն մէջ։ Այս ուղղութեան անսալով քանի մը բաներ կ’իրագործուին.

¹⁹ Մեր եղբայրներուն ու քոյրերուն դրամի խնայողութիւն կ’ըլլայ, որոնց մեծամասնութիւնը սահմանափակ եկամուտ մը ունի. Երբ պանդոկներ կը համագործակցին Ընկերութեան կարգադրութեանց հետ, սենեակի սակերը աւելի նուազ կ’ըլլան մեր եղբայրներուն համար։ Այս յաւելեալ գումարները փոխանակ պանդոկներուն երթալու, կրնան աւելի լաւ բաներու համար գործածուիլ՝ մեր եղբայրներուն ու քոյրերուն ընտանիքներուն, ինչպէս նաեւ, երկրածաւալ գործին նպաստելու համար։ Նոյնիսկ եթէ անհատապէս ի վիճակի ենք աւելի սուղ պանդոկ մը իջեւանելու, պէտք է նեցուկ կանգնինք Իջեւանի Գրասենեակին ջանքերուն, գործածելով միմիայն Յանձնարարուած Վարձու Սենեակներու Ցանկին վրայ եղած պանդոկները։ Ասիկա Ա. Յովհաննու 3։17–ի մէջ նկարագրուած եւ Ա. Կորնթացիս 10։24–ի սկզբունքին ետին գտնուող՝ ուրիշներով հետաքրքրուած ըլլալու հոգին է։

²⁰ Ընկերութեան կարգադրութեան հետ համագործակցող պանդոկները կ’օգտուին. Քանի որ Ընկերութիւնը Յանձնարարուած Վարձու Սենեակներու Ցանկին վրայ եղած պանդոկներուն հետ պայմանագրութիւն մը ստորագրած է, հետեւաբար անոնց խոստացած ենք որ իրենց հետ պիտի աշխատինք։ Այս կերպով անոնք կը շարունակեն յօժարիլ ապագային ալ մեր հետ գործակցիլ։

²¹ Պիտի մղէ որ ուրիշ պանդոկներ իջեւանի կարգադրութեան հետ գործակցին. Երբ Յանձնարարուած Վարձու Սենեակներու Ցանկին վրայ չեղող պանդոկներ գործածուին ու սուղ սակեր վճարուին, այդ պանդոկները Ընկերութեան կարգադրութեան հետ գործակցելու պիտի չմղուին։ Ժամանակի ընթացքին, նոյնիսկ այն պանդոկները որ նախապէս Ընկերութեան կարգադրութեան հետ կը համագործակցէին յաճախ կը մերժեն ասիկա ընել, երբ կը տեղեկանան որ մեր եղբայրները պատրաստ են բարձր սակեր վճարել։ Սակայն, եթէ պատուիրակները միայն Յանձնարարուած Վարձու Սենեակներու Ցանկին վրայ եղած պանդոկները գործածեն, ուրիշ պանդոկներ՝ հետագային մեր հետ համագործակցելու արժէքը կրնան տեսնել։

²² Ընկերութեան ուղղութիւններուն հնազանդութիւն ցոյց կու տանք. Այս վերջին կէտը մեր գլխաւոր մտահոգութիւններէն մէկը պէտք է ըլլայ։ Եբրայեցիս 13։17–ն կ’ըսէ. «Ձեր առաջնորդներուն մտիկ ըրէ՛ք ու անոնց հնազանդեցէ՛ք, վասն զի անոնք ձեր հոգիներուն համար կը հսկեն, որպէս թէ հաշիւ պիտի տան. որպէս զի խնդութիւնով ընեն այն գործը եւ ոչ թէ հառաչելով, վասն զի այն ձեզի օգտակար չէ»։ Մինչ մեր եղբայրները բազմաթիւ կարգադրութիւններ կ’ընեն մեր նահանգային համաժողովին համար, կ’ուզենք որ անոնք զգան թէ մենք լիովին զօրավիգ կը կանգնինք իրենց։ Քանի որ այս հարցով մեր համագործակցութիւնը կը խնդրուի ամէն տարի միայն երկու կամ երեք օրուան համար, ասիկա ընտիր կերպ մըն է անոնց ջանքերուն նեցուկ կանգնելու։ Եթէ նոյնիսկ անձնապէս տարբեր բան մը կը նախընտրէիք, մեր եղբայրներուն ու աշխարհի կողմէ նկատուած մեր լաւ օրինակը, սիրալիր, միացեալ ու աջակցող հոգի մը պիտի քաջալերէ։—Փիլ. 2։1–4

²³ Մասնայատուկ Կարիքներ. Ընկերութեան՝ Մասնայատուկ Կարիքներու Համար Իջեւանի Խնդրագիրը կը յիշէ Մասնայատուկ Կարիքներու համար պատճէն մը ներկայացնելու որակումները. «Եթէ ժողովքին մէջ օրինակելի էք ու մասնայատուկ կարիքներ ունիք, որոնք կարելի չեն տեղական ժողովքին կողմէ հոգացուիլ, կրնաք իջեւանի կարգադրութիւն խնդրել Համաժողովի Իջեւանի Գրասենեակին միջոցաւ»։ Այս կարգադրութիւնը միայն օրինակելի հրատարակիչներու համար է, մէջը ըլլալով իրենց լաւ վարք ունեցող զաւակները, որոնք Ժողովքին Ծառայութեան Յանձնախումբին կողմէ ընդունուած են։ Մասնայատուկ կարիքներ ունեցողները մեր եղբայրներն ու քոյրերն են եւ կը փափաքինք անոնց օգնութիւն ընծայել։

²⁴ Տարեցները, ֆիզիքապէս անկարողները, լման ժամանակով ծառայողները կամ ուրիշներ թերեւս օգնութեան կարիքը ունենան համաժողովի ներկայ գտնուելու համար։ Ազգականներ, երէցներ ու ժողովքին մէջ ուրիշներ որոնք տեղեակ են անոնց յատուկ պարագաներէն, սիրալիր կերպով կրնան անհրաժեշտ եղող կարգադրութիւնները ընել, ընտանեկան եւ ժողովքային պատասխանատուութիւնը համաժողովը կազմակերպողներուն վրայ չդնելով։ (Բաղդատել՝ Ա. Տիմոթէոս 5։4։) Մասնայատուկ Կարիքներու Համար Իջեւանի Խնդրագիր մը ներկայացնելէ առաջ, ուշադրութեամբ կարդացէք այս խնդրագրին վարը յիշուած տեղեկութիւնը։ Այս խնդրագիրները Իջեւանի Գրասենեակին պէտք է ղրկուին կարելի եղածին չափ շուտով։

²⁵ Ուրիշ Համաժողով մը Յաճախել. Իւրաքանչիւր ժողովք նշանակուած է ամենամօտ նահանգային համաժողովին։ Իւրաքանչիւր համաժողովին նշանակուած հրատարակիչներուն հիման վրայ, Ընկերութիւնը մօտաւորապէս կը հաշուէ ներկաներու թիւը, որպէսզի անոնց համար բաւարար նստարաններ, սենեակներ, գրականութիւն եւ հարկ եղած ուրիշ բաներ հայթայթէ։ Եթէ ստիպուած էք ուրիշ համաժողով մը յաճախել, թերեւս կարիքը ունենաք ուրիշ բաներու կողքին, իջեւանելու եւ կառատունի տոմսակներու նկատմամբ տեղեկութիւն ստանալ։ Եթէ պարագան այս է, պէտք է ժողովքի քարտուղարէն խնդրէք որ ձեզի տայ ձեր յաճախելիք համաժողովին կեդրոնատեղիին հասցէն։ Ասիկա կրնաք գտնել Մասնայատուկ Կարիքներու Համար Իջեւանելու Խնդրագրին ետեւը։ Երբ Յանձնարարուած Վարձու Սենեակներու ընթացիկ Ցանկը կամ որեւէ յաւելեալ տեղեկութիւն խնդրէք որու կարիքը ունիք, չմոռնաք ձեր նամակի պահարանին վրայ նամակադրոշմ մը ու ձեր անձնական հասցէն դնելու։ Եթէ այդ քաղաքին մէջ մէկէ աւելի համաժողովներ կան, չմոռնաք յիշել ձեր յաճախելիք համաժողովին թուականը։

²⁶ Եզրափակում. Ամէն տարի նահանգային համաժողովէն ետք Ընկերութեան ստացած նամակները յաւելեալ ապացոյց են որ մեր եղբայրներն ու քոյրերը իրենց համար եղած կարգադրութիւնները կը գնահատեն։ Իջեւանելու կարգադրութեան նկատմամբ, անցեալ տարի Օհայոյի մէջ նահանգային համաժողովի մը ներկայ եղող քոյր մը գրեց. «[Պանդոկի] սակը բացառիկ էր—անոնց սովորական սակը մէկ գիշերուան համար 79 տոլար էր։ Հազիւ թէ մեր անձերը ծանօթացուցինք որպէս Դիտարանի համաժողովի համար եկած Եհովայի Վկաներ, անոնք մեր ցանկին վրայ եղած սակը պահանջեցին։ Եհովայի շնորհակալ եղանք այսպիսի կարգադրութեան մը համար։ Եհովա միշտ կը հոգայ իր ժողովուրդին։ Իր տեսանելի կազմակերպութեան միջոցաւ, միշտ մեզի զգացնել կու տայ որ մենք մասնայատուկ ենք։ Մեր ընտանիքին համար հոյակապ փորձառութիւն մըն էր նահանգային համաժողովին ներկայ ըլլալ։ Ատիկա գործնական կամ կարելի պիտի չըլլար առանց ձեր աջակցութեան»։ Մեր քրոջ նման, մենք ալ Եհովայի երախտապարտ չե՞նք այս կերպերով մեզի օգնելուն համար։

²⁷ Մեր բոլորին յստակ է որ Եհովա թիկունք կը կանգնի տարեկան համաժողովներու կարգադրութեան։ Քանի որ նահանգային համաժողովներու ճամբորդող բազմաթիւ եղբայրներ սենեակներու պահանջք ունին, վստահ կրնանք ըլլալ որ Եհովա յարմար կերպով պիտի հայթայթէ այս կարիքները։ Քանի որ այս հարցերը մեր ճշմարիտ պաշտամունքին հետ առնչուած են, ուրախութեամբ պէտք է հետեւինք տրուած ցուցմունքներուն։ Երբ փաստենք որ «քիչ բանի մէջ հաւատարիմ» ենք, ասիկա որակելի կը դարձնէ մեզ որ Եհովան սիրողներուն սպասող հոյակապ օրհնութիւնները ստանանք։—Ղուկ. 16։10

²⁸ Եսայեայ 33։20 կ’ըսէ. «Մեր տօնախմբութիւններու քաղաքին՝ Սիօնին՝ նայէ՛»։ Միայն կրնանք երեւակայել Երուսաղէմ խռնուող այն ուրախ ամբոխները, որոնք յօժարակամօրէն կ’ընդառաջէին Եհովայի «ուրախութիւն ըրէ» պատուէրին։ (Բ. Օր. 16։15) Մեր նահանգային տարեկան համաժողովները թոյլ կու տան որ թէ՛ աստուածային ուղղութիւն ստանանք եւ թէ մեր եղբայրներուն ու քոյրերուն ջերմ ընկերակցութիւնը վայելենք։ Կը մաղթենք որ Եհովա օրհնէ ձեր ջանքերը, մինչ կը պատրաստուիք ներկայ գտնուիլ «Հաւատք՝ Աստուծոյ Խօսքին Վրայ» բնաբանով 1997–ի նահանգային համաժողովներու շարքին։

[Շրջանակ՝ էջ 3]

Պանդոկի Ձեր Վերապահումները Ընել

1. Պանդոկ հեռաձայնեցէք սովորական գործի ժամերուն։

2. Վերապահումներ ընող պաշտօնեայէն ձեր վերապահումը վաւերացնող թիւ մը խնդրեցէք։

3. Ձեր կանխավճարումը ըրէք։ Ձեր վճարագրին վրայ վերապահումը հաստատող թիւը գրեցէք։ Թղթադրամ ՄԻ՛ ղրկէք։

4. Եթէ չէքով կամ վճարագրով վճարէք, երկու շաբաթ ետք պանդոկին հետ կապ պահեցէք ստուգելու համար թէ ձեր կանխավճարը ստացած են։

[Շրջանակ՝ էջ 5]

Ընելիքներ

◼ Ձեր վերապահումները Յունուարի ընթացքին ԸՐէ՛Ք։

◼ Ձեր անձը ՆԵՐԿԱՅԱՑՈՒՑԷՔ որպէս Եհովայի Վկայ կամ Դիտարանի համաժողովի պատուիրակ մը։

◼ Վերապահումը ընելէն անմիջապէս ետք, ձեր կանխավճարումը ԸՐԷ՛Ք։

◼ Միմիայն ձեր անհատական գործածութեան համար սենեակներ ՎԵՐԱՊԱՀԵՑԷ՛Ք։

◼ Ձեր առաջին վերապահումը ՊԱՀԵՑԷ՛Ք։

[Շրջանակ՝ էջ 6]

Յայտագրին Ժամերը

Ուրբաթ եւ Շաբաթ

9։30 կ.ա. – 4։50 կ.ե.

Կիրակի

9։30 կ.ա. – 3։50 կ.ե.