Sẹro Riẹ
Iroro-Ejẹ Edhere Usiuwoma Ota
Epanọ A rẹ Rọ Uko-Obeva Nana Ruiruo
Ibuobu ọ idhere usiuwoma ota obotọ na e roma via evaọ ivitha ọ Odibọgba Uvie Mai nọ e vrẹ no. Daoma rehọ ibuobu rai epanọ whọ gwọlọ ro ruiruo evaọ iruo isẹri- ise ra, re whọ ruẹ iyẹrẹ nọ who ti wo. Sẹro uko obeva nana, re whọ hai rovie kpohọ iẹe evaọ okenọ whọ tẹ be ruẹrẹ oma kpahe kẹ odibọgba na.
Whọ sae kpare isiuru ohwo kpahe Ẹme Ọghẹnẹ otẹrọnọ who ru ẹme ra kpẹkpẹe. Nọ ugogo onọ jọ, re who se uyo okpẹkpẹ ọ Ikereakere na. Whọ sae dawo idhere nana:
“Nọ who bi roro kpahe obaro na, who wo iroro ẹruore manikọ erọ avro? [Kuvẹ kẹ uyo.] Ebaibol na ọ ruẹaro kpahe eware ozighi nọ ma be ruẹ nẹnẹ na gbe oware nọ u ti noi ze.”—2 Tim. 3:1, 2, 5; Itẹ 2:21, 22.
“Ahwo a wo ọdawẹ kpahe ẹruorote oma gaga nẹnẹ. Kọ whọ riẹ nọ Ọghẹnẹ ọ y’eyaa nnọ o ti ku ebẹbẹ ẹyao kpobi họ bẹdẹ bẹdẹ?”—Aiz. 33:24; Evia. 21:3, 4.
“Kọ whọ riẹ nọ Ebaibol na ọ ruẹaro nnọ evaọ ekuhọriẹ egọmeti ọvuọvo o ti su akpọ na soso?”—Dan. 2:44; Mat. 6:9, 10.
“Ẹvẹ who roro nnọ eware e rẹ jọ otẹrọnọ Jesu Kristi o su otọakpọ na?”—Ol. 72:7, 8.
“Ahwo buobu a be ruẹ uye ọ omohẹriẹ fiki ọzae hayo aye nọ a rrọ, oghẹrẹ egagọ rai, hayo uyẹ rai. Ẹvẹ who roro nọ Ọghẹnẹ o rri omagbẹre utioye na?”—Iruẹru 10:34, 35.
“Ma riẹ nọ Jesu Kristi o ru iruo igbunu buobu evaọ edẹ riẹ. Otẹrọnọ o lọhọ re whọ yare iẹ nnọ o ru iruo igbunu ofa jọ, ovẹ whọ rẹ yare?”—Ol. 72:12-14, 16.
“O bẹ ahwo buobu no re a yo kpahe ebẹbẹ. A gwọlọ yo kpahe ifue. Rekọ diẹse ma jẹ sai duku uvi ifue kẹ ebẹbẹ mai?”—2 Tim. 3:16, 17.
“Kọ whọ riẹ Uvie nọ whọ be hae lẹ kẹ evaọ Olẹ Olori na?”—Evia. 11:15.
Eme nọ A rẹ rọ Kpare Ẹmeọta
Uhie enọ nọ e rrọ obotọ na, enọ a si no izoẹme nọ e rrọ omobe ọ Epanọ A ro Muhọ Jẹ Ruabọhọ Ebaibol E rọ Jiroro na ze, i dhesẹ inọmba ọ ẹwẹ-obe nọ a rẹ jọ duku uyo ovuovo evaọ obe na:
Fikieme Ọghẹnẹ ọ rọ kẹ uye-oruẹ uvẹ? (4)
Fikieme emuemu o je bu tenẹ? (4)
Kọ iroro egbagba jọ e riẹ nọ a rẹ rọ rọwo Ọghẹnẹ? (2-3)
Kọ ẹjiroro jọ ọ riẹ nọ a re ro fievahọ Ọghẹnẹ? (2-3)
Ẹvẹ ma sai ro yeri-kugbe ebẹbẹ uzuazọ uviuwou ziezi? (5)
Ẹvẹ ma sai ro ru uzuazọ uviuwou kparobọ? (5)
Kọ Ebaibol na ghinọ ẹme Ọghẹnẹ? (2-3)
Kọ uzuazọ orọ uvi evawere o lọhọ? (6)
Eme họ ẹjiroro uzuazọ ohwo-akpọ? (6)
Oghẹrẹ akpọ vẹ who roro nọ emọ mai e te rẹriẹ aro ku nọ a tẹ rro ze no (6)
Eme Uvie Ọghẹnẹ u ti rugba? (5)
Kọ esuo Ọghẹnẹ ọ were omai vi ọrọ ohwo-akpọ (5)
Kọ whọ rọwo nnọ ma rrọ edẹ urere na? (3)
Kọ who roro nnọ ma te ruẹ uvi udhedhẹ ẹdẹjọ evaọ otọakpọ na? (4)
Kọ uwhu họ ukuhọ riẹ kpobi? Hayo kọ oware ofa jọ o riẹ nọ a te whu no? (5)
Didi uyero iwhowhu na e rrọ? (5)
Fikieme ma jẹ be who je whu? (5)
Kọ akpọ nọ ọ kare ethube ọ te jọ ẹdẹjọ? (3)
Fikieme Isẹri Jihova a je bi dhe ẹnyẹnyaze? (7)
Iroro-Ejẹ Epanọ A re ro Fi Ibroshọ Gwọlọ na họ Ada
“Ababọ avro whọ rẹ rọwo nnọ ahwo buobu a rọwo Ọghẹnẹ. Ahwo kpobi nọ a rọwo riẹ a rọwo nnọ Ọghẹnẹ ọ gwọlọ oware jọ mi omai. Oware nọ ahwo a sae jọ rọwokugbe he họ, Eme Ọghẹnẹ ọ gwọlọ mi omai? Who ve fi ibroshọ Gwọlọ na họ ada, rovie kpohọ uwuhrẹ 1, re wha wuhrẹ iẹe.
Avọ ebẹbẹ buobu nọ e rrọ uzuazọ uviuwou nẹnẹ na, kọ who roro kpahe oware nọ o rrọ usiavẹ ewo evawere uviuwou no ẹdẹjọ?” Nọ ọ tẹ kuyo no, ru ei vevẹ nnọ evaọ Ebaibol na, Ọghẹnẹ o dhesẹ uzedhe usiavẹ evawere uviuwou. Se Aizaya 48:17. Who ve rovie kpohọ uwuhrẹ avọ 8 evaọ ibroshọ Gwọlọ na, jẹ riobọhọ awọ Ebaibol jọ nọ a fodẹ na nọ e rrọ ọkpọvio nọ a re fievahọ kẹ omomọvo uviuwou na. Se enọ nọ e rrọ emuhọ uwuhrẹ na. Nọ ohwo na sọ ọ gwọlọ se iyo na.
“Uwuhrẹ okẹkẹe kpahe igogo iwuhrẹ Ebaibol na o rrọ ibroshọ nana. Evaọ ẹwẹ-obe ọvuọvo whọ te ruẹ iyo kẹ enọ nọ e kẹ ahwo idhọvẹ evaọ ikpe udhusoi buobu no. Wọhọ oriruo, Eme họ ẹjiroro Ọghẹnẹ kẹ otọakpọ na?” Rovie kpohọ uwuhrẹ avọ 5, re who se enọ nọ e rrọ emuhọ uwuhrẹ na. Nọ ọnọ o wo uwou na re o dhesẹ onọ nọ o mai si ei urru, who ve se edhe-ẹme hayo idhe-eme nọ a rẹ jọ ruẹ uyo na, se ikereakere nọ i fo. Dhesẹ nnọ a rẹ sai duku iyo nọ e rẹ v’eva rọkẹ enọ edekọ na lọlọhọ wọhọ epaọ onọ wha kuyo riẹ no na. Jiroro kẹe nnọ whọ te wariẹ zihe re wha ta kpahe onọ ofa.
“Eme who roro nọ o be wha ozighi nọ ọ rrọ isukulu ẹgbede kpobi na ze? Kọ ababọ uwuhrẹ ọsẹ gbe oni o be whae ze? Hayo kọ o sae jọ oware ofa, wọhọ iruo Ẹdhọ?” Kuvẹ kẹ uyo. Otẹrọnọ ohwo na ọ ta nnọ iruo Ẹdhọ e be whae ze, se Eviavia 12:9, 12. Fodẹ abọ nọ Ẹdhọ o wo evaọ ẹwhaharo ozighi evaọ akpọ na. Who ve rovie ibroshọ Gwọlọ na kpohọ uwuhrẹ avọ 4, re whọ nọ ohwo na sọ o roro no ẹdẹjọ kpahe obonọ Ẹdhọ o no ze. Se jẹ ta kpahe idhe-ẹme ivẹ ọsosuọ na. Otẹrọnọ ohwo na o yo nnọ “ababọ uwuhrẹ ọsẹ gbe oni” o be wha ozighi ze evaọ isukulu, se 2 Timoti 3:1-3 jẹ riobọhọ iruemu nọ e rrọ vevẹ inọ eye e be wha ẹbẹbẹ nana ze. Who ve rovie ibroshọ Gwọlọ na kpohọ uwuhrẹ avọ 8, se edhe-ẹme avọ 5, re whọ ta ẹme na haro.
“Kọ who roro nọ o rrọ oware iroro re a rẹro nnọ Ọnọma na ọ rẹ k’omai eriariẹ nọ ma gwọlọ re ma bọ uzuazọ uviuwou obokparọ?” Ọ tẹ kuyo no, dhesẹ ibroshọ Gwọlọ na kẹe. Rovie kpohọ uwuhrẹ avọ 8, re whọ ta kẹe nnọ ehri-izi nọ i no Ebaibol ze e rrọ eva riẹ rọkẹ omomọvo uviuwou na. Ta nọ whọ gwọlọ dhesẹ epanọ a rẹ rehọ ibroshọ na ruiruo kugbe Ebaibol na re a ruẹsi wo erere nọ ọ mae rro.
“Avọ ise-abọ buobu nọ ma rẹriẹ ovao dhe evaọ uzuazọ ọgbọna na, kọ who roro nnọ olẹ o rẹ sae k’omai uvi obufihọ? [Kuvẹ kẹ uyo.] Ibuobu e rẹ ta nnọ olẹ o rẹ kẹ ẹgba obeva. [Se Ahwo Filipai 4:6, 7.] Dede na, ẹsejọhọ ohwo ọ sai roro nnọ a bi yo elẹ riẹ hẹ. [Rovie ibroshọ Gwọlọ na kpohọ uwuhrẹ avọ 7.] Ibroshọ nana o dhesẹ epanọ olẹ o sae rọ kẹ omai erere nọ ọ mae rro.”
“Ma be t’ẹme kẹ erivẹ mai kpahe oware nọ o soriẹ nọ egagọ sa-sa i je bu akpọ na tere. Ghele na, Ebaibol ọvuọvo ọ riẹ. Evaọ iroro ra, fikieme ereghe egagọ nana ọ jẹ riẹ? [Kuvẹ kẹ uyo. Rovie ibroshọ Gwọlọ na kpohọ uwuhrẹ avọ 13, re who se enọ emuhọ na.] Whọ te ruẹ iyo nọ e rẹ v’eva kẹ enọ eyena ẹkwoma ese uwuhrẹ nana.”
Nọ who te fi Uwou-Eroro gbe Awake! họ ada kẹ ohwo no, nọe sọ whọ sai se edhe-ẹme ọkpẹkpẹe jọ kẹe. Ọ tẹ kuvẹ nọ who ru ere, rovie ibroshọ Gwọlọ na kpohọ uwuhrẹ avọ 5. Riobọhọ enọ nọ a nọ fihọ emuhọ uwuhrẹ na, re whọ ta kẹe nnọ ọ kezọ kẹ uyo onọ ọsosuọ na nọ who bi se edhe-ẹme emuhọ na. Nọ who te se edhe-ẹme na no, nọ onọ na re ọ kpahe fihọ iẹe. Fi ibroshọ na họ ada kẹe, yọ otẹrọnọ ọ rehọ e riẹ, ru ọruẹrẹfihotọ re who zihe re ọ ruẹse kpahe fihọ enọ ivẹ nọ e kẹle riẹ na.
Iroro-Ejẹ nọ A re ro Fi Obe ọ Eriariẹ na Họ Ada
Avọ Ebaibol nọ ọ rrọ owhẹ obọ, rehọ enẹ muhọ: “Ma bi se ikereakere jọ kugbe ohwo kpobi nọ ọ rrọ iyẹrẹ rai na nẹnẹ. O ta nọ . . . ” Se Jọn 17:3, re whọ nọe nọ: “Kọ who muẹrohọ oware nọ a y’eyaa nọ ma re wo otẹrọnọ ma wo eriariẹ nọ i fo na? [Kuvẹ kẹ uyo.] Diẹse ohwo ọ rẹ jọ duku eriariẹ itieye na?” Nọ ọ tẹ kuyo no, dhesẹ obe Eriariẹ na kẹe, re whọ ta nọ: “Obe onana o riobọhọ eriariẹ nọ i re su kpohọ uzuazọ ibẹdẹ bẹdẹ. U ru onana ẹkwoma enọ nọ e mae rrọ ahwo eva kpahe Ebaibol na nọ o kẹ iyo rai.” Dhesẹ uhie eware nọ e riẹ eva na, re whọ nọ ohwo na sọ o roro kpahe izoẹme na jọ no ẹdẹjọ.
“Kọ who roro no ẹdẹjọ sọ Ọghẹnẹ o ghine wo ọdawẹ kpahe ẹdhoguo okienyẹ gbe uye-oruẹ nọ ma be ruẹ wariẹ omai họ hayo nọ e be tubẹ via kẹ omai na? [Kuvẹ kẹ uyo.] Ebaibol na ọ k’omai imuẹro nnọ Ọghẹnẹ o you omai gbe nnọ o re fiobọhọ k’omai evaọ etoke uye.” Se eria jọ no Olezi 72:12-17 ze. Rovie obe Eriariẹ na kpohọ uzou avọ 8, re who dhesẹ nnọ o kẹ uyo nọ o rẹ v’eva kpahe onọ jọ nọ ima ahwo buobu a nọ no, Eme Ọghẹnẹ ọ jẹ kẹ uye-oruẹ uvẹ? O tẹ lọhọ, ta kpahe eria Ikereakere jọ nọ a ta kpahe evaọ edhe-ẹme avọ 3 rite 5 na, hayo ru ere evaọ etoke ozihebro na.
“Iyoyou mai i whu siọ ibuobu mai ba no. Kọ who roro no ẹdẹjọ sọ ma te wariẹ rue rae? [Kuvẹ kẹ uyo.] Jesu o dhesẹ nnọ a rẹ sai siwi iyoyou mai no uwhu ze. [Se Jọn 11:11, 25, 44.] Dede nọ onana o romavia ikpe udhusoi nọ i kpemu no, o k’imuẹro oware nọ Ọghẹnẹ ọ y’eyaa nnọ o ti ru k’omai.” Rovie obe Eriariẹ na kpohọ uwoho nọ o rrọ ẹwẹ-obe avọ 85 na, re who se ẹme nọ a kere fihọ ehru uwoho na. Who ve je dhesẹ uwoho nọ o rrọ ẹwẹ-obe avọ 86 na, re whọ t’ẹme kpahe iẹe. Fi otọhotọ họ kẹ iweze n’etha ẹkwoma ẹnọ inọ: “Kọ o te were owhẹ re whọ riẹ oware nọ o soriẹ nọ ahwo-akpọ a jẹ be rro kpako je whu?” Zihe re wha ta kpahe uzou avọ 6 na.
“Kọ who roro kpahe oware nọ ahwo-akpọ a jẹ gwọlọ uzuazọ uthethei no ẹdẹjọ?” Nọ ọ tẹ kuyo no, rovie obe Eriariẹ na kpohọ uzou avọ 6, re who se edhe-ẹme avọ 3. Roro kpahe ikereakere nọ a fodẹ na. Dhunu te enọ ivẹ nọ e rrọ oka edhe-ẹme na, re whọ nọ ohwo na sọ o te were iẹe re ọ riẹ iyo na. Otẹrọnọ uyo riẹ u kiehọ, wha vẹ ta kpahe idhe-eme jọ nọ e kẹle riẹ na.
“Ma be nọ ahwo sọ a rọwo ẹme nana . . . ” Se Emuhọ 1:1, re whọ nọ inọ: “Kọ whọ rọwo kugbe ẹme ọyena?” Otẹrọnọ ohwo na ọ rọwo kugbei, whọ vẹ ta inọ: “Mẹ rọwo riẹ re. Rekọ who roro nnọ otẹrọnọ Ọghẹnẹ ọ ma eware kpobi, ọye họ ohwo nọ ọ wha emuemu ze re?” Nọ who te yere ohwo na kẹ uyo riẹ no, se Ọtausiuwoma Na 7:29. Rovie obe Eriariẹ na kpohọ uzou avọ 8, re who se edhe-ẹme avọ 2. Otẹrọnọ ọ rọwo kugbe Emuhọ 1:1 họ, tuduhọ iẹe awọ re ọ kiẹ imuẹro nọ i dhesẹ nọ Ọnọma ọ rrọ riwi.—Rri ibroshọ na Kọ Ọghẹnẹ Ọ Be Ghinẹ Daezọ Mai? ẹwẹ-obe avọ 4-9.
“Kọ whọ rọwo nnọ epanọ emamọ uruemu u bi kie kpo gaga nẹnẹ na, ma gwọlọ ọkpọvio nọ a re fievahọ evaọ uzuazọ? [Kuvẹ kẹ uyo.] Dede nọ oye họ obe nọ o mae kpako kpaobọ, Ebaibol na ọ kẹ obọdẹ ithubro kpahe ẹrria uzuazọ ọgbọna gbe uzuazọ uviuwou.” Who ve rovie kpohọ uzou avọ 2 evaọ obe Eriariẹ na, je se edhe-ẹme avọ 10 gbe uhie ẹme ọsosuọ orọ edhe-ẹme avọ 11 na, kugbe 2 Timoti 3:16, 17.
Kọ whọ gwọlọ riẹ oware nọ obaro na o te wha se omai gbe otọakpọ na? [Kuvẹ kẹ uyo.] Ebaibol na o dhesẹ obaro na evaọ ẹme ọvo jọ—Aparadase! Etẹe Ọghẹnẹ o fi imava-orọo ọsosuọ na họ evaọ okenọ ọ ma ai. Muẹrohọ edhesẹ nana ọrọ epanọ o jọ.” Rovie obe Eriariẹ na kpohọ ẹwẹ-obe avọ 8, je se edhe-ẹme avọ 9, eva otọ uzoẹme-osese na “Uzuazọ Evaọ Aparadase.” Kẹsena whọ vẹ ta kpahe eme nọ e rrọ edhe-ẹme avọ 10 na, je se ikere nọ a fodẹ na, Aizaya 55:10, 11. Ta kẹe nọ wha te jọ edhe-ẹme avọ 11-16 t’ẹme na haro okiofa kpahe epanọ uzuazọ o te jọ evaọ Aparadase nọ a ti zihe ze na.
Who te Zihe Bru ahwo nọ who fi emagazini ọ Uwou-Eroro gbe Awake! na họ ada kẹ, whọ sae ta nnọ:
“Oke ẹdẹ nọ mẹ nyaze, o were omẹ nọ mẹ rọ nya siọ emagazini Uwou-Eroro na ba k’owhẹ. Ẹsejọhọ who muẹrohọ nnọ uzoẹme emagazini na soso họ Uwou-Eroro Na Nọ U Bi Whowho Uvie Jihova. Nẹnẹ na mẹ gwọlọ dhesẹ oware nọ Uvie nana o rrọ gbe oware nọ u ti ru k’owhẹ avọ uviuwou ra.” Who ve rovie ibroshọ Gwọlọ na kpohọ uwuhrẹ avọ 6 re who se jẹ t’ẹme kpahe iẹe te epanọ ohwo na o wo uvẹ te.
“Me weze bru owhẹ ze kẹle na yọ mẹ nya siọ emagazini Uwou-Eroro gbe Awake! na ba k’owhẹ. Emagazini enana i re ru ahwo wo adhẹẹ kẹ Ebaibol na gbe ọkpọvio uruemu nọ o kẹ. Fikinọ me roro nọ o r’oja kẹ ohwo kpobi re o wo otoriẹ Ẹme Ọghẹnẹ, me zihe ze re me dhesẹ oware jọ k’owhẹ nọ u ti fiobọhọ k’owhẹ ru ere.” Dhesẹ ibroshọ Gwọlọ na hayo obe ọ Eriariẹ na, re whọ ta kẹe kpahe obe-uwuhrẹ Ebaibol.
Okenọ who te bi fi obe ọ ewẹ-obe 192 jọ nọ u lehie no h’ada, whọ sae dawo edhere ẹmeọta nana:
“A bi fi ẹgba họ ẹgwọlọ emamọ ewuhrẹ nẹnẹ gaga. Evaọ ẹjiroro ra, didi oghẹrẹ ewuhrẹ u fo nọ ohwo o le re o wo imuẹro evawere nọ e mae rro jẹ ruẹ ewoma evaọ uzuazọ? [Kuvẹ kẹ uyo. Who ve se Itẹ 9:10, 11.] A kere obe onana [fodẹ uzoẹme obe nọ who bi fihọ ada na] no Ebaibol ze. O riobọ kpohọ ehri eriariẹ ọvuọvo nọ o sai su kpohọ uzuazọ ebẹdẹ bẹdẹ.” Dhesẹ uzedhe oriruo jọ evaọ obe na re whọ tuduhọ ohwo na awọ nnọ o sei.
Ebe Efa
Kpahe ebe gbe ibroshọ efa, kiẹ uvitha Odibọgba Uvie Mai nọ i kpemu no kpahe edhere ẹmeọta nọ a jiroro rai.
Edhere ọ Emuhọ Ovavo
Re who mu uwuhrẹ Ebaibol họ, daoma rehọ idhere ẹmeọta ovavo nana ro ruiruo:
“Kọ whọ riẹ nnọ evaọ umutho iminiti jọ ọvo, whọ sai duku uyo kẹ onọ Ebaibol jọ nọ u w’uzou? Wọhọ oriruo, . . . ” Whọ vẹ nọ onọ jọ nọ o romavia evaọ emuhọ uwuhrẹ jọ evaọ ibroshọ Gwọlọ na onọ who roro nọ u ti si ohwo na urru.
“Mẹ wẹriẹ re me dhesẹ omaa uwuhrẹ Ebaibol ọvọvẹ mai k’owhẹ. Oware wọhọ iminiti isoi ọvo o rẹ rehọ re me dhesẹ iẹe k’owhẹ. Kọ who wo uvẹ iminiti isoi?” Uyo riẹ o tẹ rrọ E, rehọ uwuhrẹ 1 evaọ ibroshọ Gwọlọ na ro dhesẹ uwuhrẹ na, se ikereakere ọvo hayo ivẹ jọ ọvo. Kẹsena whọ vẹ nọ inọ: “Oke vẹ who ti wo oware wọhọ iminiti 15 re ma ro wuhrẹ uwuhrẹ ofa?”
“Ahwo buobu a wo Ebaibol, rekọ a riẹ hẹ inọ iyo enọ nọ i w’uzou kpahe obaro na nọ mai kpobi ma wo na e rrọ eva riẹ. Ẹkwoma efihiruo ọ okwakwa obufihọ uwuhrẹ onana [ibroshọ Gwọlọ na hayo obe ọ Eriariẹ na] evaọ oware wọhọ auwa ọvo evaọ ẹkpoka, whọ sai wo ugogo otoriẹ Ebaibol na evaọ umutho emerae jọ ọvo. Eva e te were omẹ re me dhesẹ epanọ omaa na o rrọ k’owhẹ.”
“Mẹ nyaze re me ru uwuhrẹ Ebaibol ọvọvẹ kugbe owhẹ. Uvẹ o tẹ riẹ, mẹ gwọlọ rehọ iminiti kakao jọ ro dhesẹ k’owhẹ epanọ ahwo evaọ ekwotọ 200 a bi ro wuhrẹ Ebaibol na kugbe evaọ obọ iwou wọhọ ekru uviuwou. Ma rẹ sae rehọ izoẹme enana jọ ruiruo wọhọ ehri ẹmeọta. [Dhesẹ oria eme nọ e rrọ eva obe Eriariẹ na.] Ọvẹ ọ mai si owhẹ urru?” Hẹrẹ re ohwo na ọ salọ ọjọ. Rovie kpohọ uzou nọ ọ salọ na, re who mu uwuhrẹ na họ evaọ edhe-ẹme ọsosuọ na.
“Me bi ru iwuhrẹ Ebaibol ọvọvẹ kugbe ahwo yọ me wo uvẹ kẹ emọ-iwuhrẹ efa. Obe onana ma bi ro wuhrẹ Ebaibol na. [Dhesẹ obe Eriariẹ na.] Uwuhrẹ na u re kri te umutho emerae jọ ọvo yọ o rẹ k’iyo kẹ enọ wọhọ: Fikieme Ọghẹnẹ ọ jẹ k’uvẹ kẹ uye-oruẹ? Fikieme ma jẹ be rro kpako je whu? Eme ọ rẹ via kẹ iyoyou mai nọ i whu no? Gbe ẹvẹ ma rẹ sai ro si kẹle Ọghẹnẹ? Kọ mẹ sai dhesẹ epanọ ma re ru uwuhrẹ na k’owhẹ?”
Otẹrọnọ who duku emamọ edhere ẹmeọta jọ nọ o rẹ bọ isiuru no, ruabọhọ iẹe! Who re nwene iei kiehọ obe nọ a bi fihọ ada evaọ amara na ọvo.