ចូររក្សាឲ្យមានចរិយាល្អដែលសរសើរដល់ព្រះ
១ មិនថាយើងនៅកន្លែងណាក៏ដោយ ចរិយា សំលៀកបំពាក់ និងរបៀបដែលយើងសំអិតសំអាងខ្លួន គឺធ្វើបន្ទាល់អំពីយើងថែមទាំងព្រះដែលយើងថ្វាយបង្គំទៀតផង។ នេះគឺស្រួលកត់សម្គាល់ជាពិសេស ពេលដែលមានការជួបជុំរាស្ត្ររបស់ព្រះជាច្រើននាក់ ដែលនៅទីនោះមានមនុស្សជាច្រើនមើលមកយើង។ ពេលដែលយើងជាគំរូល្អ នោះនាមរបស់ព្រះយេហូវ៉ាទទួលនៅសេចក្ដីសរសើរ។ (ពេត្រុសទី១ ២:១២) ក៏ប៉ុន្តែ បើសិនជាមនុស្សតែពីរបីនាក់មានចរិយាមិនសមគួរឬក៏ធ្វើអំពើដែលមិនគិតជាមុន នោះអាចនាំមកនូវការត្មះតិដៀលដល់ព្រះនាមរបស់ព្រះនិងរាស្ត្ររបស់ទ្រង់។ (សាស្ដា ៩:១៨ខ) ដោយចាំជានិច្ចថា អ្នកក្រៅវិនិច្ឆ័យអង្គការយើងនិងព្រះដែលយើងថ្វាយបង្គំ ដោយមើលតាមចរិយាមារយាទរបស់យើង នោះគួរឲ្យយើងយកចិត្តទុកដាក់អំពីការ«ធ្វើទាំងអស់សំរាប់ចំរើនសិរីល្អដល់ព្រះ»។—កូរិនថូសទី១ ១០:៣១
២ ចរិយាល្អប្រសើរនៅឯសណ្ឋាគារ: ក្នុងករណីភាគច្រើន បុគ្គលិកសណ្ឋាគារកោតសរសើរនូវសណ្ដាប់ធ្នាប់ ការមានសុជីវធម៌ និងភាពស្អាតបាតរបស់ស្មរបន្ទាល់ព្រះយេហូវ៉ា។ ថៅកែម្នាក់បាននិយាយពីគ្រួសារស្មរបន្ទាល់ព្រះយេហូវ៉ាដែលបានស្នាក់នៅសណ្ឋាគាររបស់គាត់ថា៖ «កូនរបស់ស្មរបន្ទាល់ព្រះយេហូវ៉ាគឺជាកូនល្អបំផុតដែលខ្ញុំធ្លាប់ឃើញ! ពួកគេស្លៀកពាក់ដូចជាសុភាពនារីនិងសុភាពបុរស។ គេក៏ចេះគួរសមមានឥរិយាបថទន់ភ្លន់ និងមានសុជីវធម៌ ហើយគេមិនបានបង្កបញ្ហាណាមួយសោះ។ អ្នកគួរនឹងទទួលសេចក្ដីសរសើរដោយព្រោះក្មេងៗរបស់អ្នក។ យើងបានអរណាស់ ពេលដែលមានកូនៗរបស់អ្នកនៅទីនេះ»។ ពំនោលបែបនេះត្រូវនិយាយជាញឹកញាប់ ដោយព្រោះអ្នកដែលទាក់ទងនឹងយើងអាចឃើញសេចក្ដីស្រឡាញ់និងការគោរពដែលស្ថិតក្នុងចំណោមរាស្ត្ររបស់ព្រះយេហូវ៉ា។
៣ ម្យ៉ាងទៀត ការកត់សម្គាល់ពីបុគ្គលិកសណ្ឋាគារឯទៀតបានបញ្ជាក់ថា នៅមានបញ្ហាជាមួយអ្នកខ្លះដែលមិនយកចិត្តទុកដាក់ទៅលើចរិយារបស់ខ្លួនឬក៏ដែលធ្វើការរំលោភទៅលើសណ្ឋាគារ។ នេះបណ្ដាលឲ្យមានបញ្ហានឹងបង្កើតនូវការរិះគន់ដែលមិនគួរមានទេ។ ថៅកែខ្លះត្អូញត្អែរថា កូនក្មេងនិងពួក វ័យគឺឡូឡានិងគ្មានសណ្ដាប់ធ្នាប់ ដោយគ្មានការត្រួតពិនិត្យពីឪពុកម្ដាយរបស់គេ ពេលគេប្រើអាងហែលទឹកឬក៏គ្រឿងកំសាន្តផ្សេងទៀត។
៤ សណ្ឋាគារភាគច្រើនមានវិន័យដែលភ្ញៀវរបស់គេត្រូវតែគោរពតាម។ បងប្អូនខ្លះបានប្រព្រឹត្តខុសនឹងវិន័យនេះ ដែលសំដៅទៅទំហំសម្លេងឬក៏ការធ្វើម្ហូបក្នុងបន្ទប់របស់គេ។ ថៅកែសណ្ឋាគារប្រាប់យើងថា ការធ្វើម្ហូបក្នុងកន្លែងដែលគ្មានការអនុញ្ញាត គឺជាការរំលោភដែលកើតឡើងជាញឹកញយទៅលើកម្មសិទ្ធិរបស់គេ។ គឺមិនគ្រាន់តែបានមានការខូចខាតដល់បន្ទប់នោះទេ ក៏ប៉ុន្តែ ក្លិនដែលផ្ដុំក្នុងបន្ទប់បានធ្វើឲ្យគេគ្មានលទ្ធភាពជួលបន្ទប់នោះអស់ប៉ុន្មានថ្ងៃឬក៏ប៉ុន្មានអាទិត្យបន្ទាប់ពីនោះ។ គឺមិនត្រូវធ្វើទាល់តែសោះ លុះត្រាតែការធ្វើម្ហូបនោះត្រូវបញ្ជាក់ច្បាស់លាស់ថាមានការអនុញ្ញាត។
៥ ការខិតខំយ៉ាងខ្លាំងគួរត្រូវធ្វើ ដើម្បីស្ដាប់តាមអ្នកកាន់កាប់សណ្ឋាគារ។ ប្រាកដជាយើងមិនចង់ចាកចេញដោយបានបង្ខូចឈ្មោះរាស្ត្ររបស់ព្រះយេហូវ៉ា។ ជាគ្រីស្ទាន យើងត្រូវតែស្មោះត្រង់ជានិច្ច។ យើងមិនគួរយកកម្រាលឬក៏«វត្ថុអនុស្សាវរីយ៍ផ្សេងៗ»ឯទៀតពីសណ្ឋាគារទេ ព្រោះនេះជាការលួចតែម្ដង។ យើងក៏មិនគួរនិយាយមិនពិតត្រង់អំពីចំនួនមនុស្សដែលនឹងស្នាក់នៅក្នុងបន្ទប់របស់យើង ពេលដែលយើងកក់បន្ទប់ទុកឬក៏ពេលចុះឈ្មោះចូល។
៦ សុភាវធម៌សមគួរនៅតាមមហាសន្និបាត: ទោះបីយើងនៅកន្លែងណាក៏ដោយ កន្លែងនោះក្លាយជាសាលព្រះរាជាណាចក្រធំក្នុងកំឡុងមហាសន្និបាត។ សំលៀកបំពាក់និងការសំអិតសំអាងដ៏សមគួរ ត្រូវតែជាក់ស្តែងដូចពេលដែលយើងចូលរួមកិច្ចប្រជុំតាមក្រុមជំនុំតាមតំបន់របស់យើង។ ទាំងក្នុងកំឡុងនិងក្រោយកម្មវិធីមហាសន្និបាត បងប្អូនប្រុសស្រីត្រូវជៀសវាងការស្លៀកពាក់ដែលមិនសមគួរឬក៏តាមលោកីយ៍និយម ដែលបង្ហាញអំពីគំនិតលោកីយ៍ ថែមទាំងធ្វើឲ្យពិបាកសម្គាល់ថាយើងខុសគ្នាតាមរបៀបល្អពីលោកីយ៍នេះ។ បងប្អូនស្រីៗគួរប្រុងប្រយ័ត្នថា ម៉ូតនិងប្រវែងរបស់សំពត់និងរ៉ូបរបស់គេគឺសមគួរ។ (ធីម៉ូថេទី១ ២:៩, ១០) ទោះបីយើងកំពុងតែចូលរួមមហាសន្និបាត ស្នាក់នៅសណ្ឋាគារ បរិភោគតាមភោជនីយដ្ឋាន ឬក៏ទិញអីវ៉ាន់នៅហាង ចរិយារបស់យើងគួរបង្ហាញជានិច្ចថា យើងជាអ្នកបំរើព្រះ ទាំងជៀសវាងនូវអ្វីដែលអាចបង្អាក់បង្អន់ដល់ចិត្តរបស់គេ។—កូរិនថូសទី២ ៦:៣
៧ ពិធីបុណ្យជ្រមុជទឹកនឹងត្រូវធ្វើឡើងពេលព្រឹកថ្ងៃសៅរ៍នៅមហាសន្និបាត។ ទស្សនាវដ្ដីប៉មយាម ពីថ្ងៃទី១ ខែមេសា ឆ្នាំ១៩៩៥ ទំព័រទី៣០ (ជាភាសាអង់គ្លេស) បានពណ៌នាពីឥរិយាបថដែលយើងគួរសម្ដែងនៅពិធីនេះ។ អត្ថបទនោះចែងថា៖«យើងគួរចាត់ទុកថាពិធីបុណ្យជ្រមុជទឹកជាអ្វីដ៏សំខាន់ដោយការប្រព្រឹត្តរបស់យើង។ នេះមិនមែនជាពេលសំរាប់ការសម្រេចសម្ដែងពីអារម្មណ៍របស់យើង សំរាប់ការសប្បាយអ៊ូអែ ឬក៏សើចស្រែកឡូឡានោះទេ។ ក៏ប៉ុន្តែ នេះក៏មិនជាពេលសំរាប់បង្ហាញអារម្មណ៍ស្រងូតស្រងាត់ឬក៏ក្រៀមក្រំនោះដែរ»។ គឺមិនសមទាល់តែសោះ បើសិនជាអ្នកទទួលបុណ្យជ្រមុជទឹកនោះ ស្លៀកពាក់សំលៀកបំពាក់ងូតទឹកដ៏ប៉ផុតប៉ផើយលេចលើលេចក្រោម មិនថាប្រុសឬស្រី។ ដូច្នេះ ទាំងអស់គ្នាគួរសម្ដែងទាំងភាពសំខាន់និងអំណរពីពិធីបុណ្យជ្រមុជទឹកគ្រីស្ទាន។
៨ ពេត្រុសជួយរំឭក‹យើងរាល់គ្នាប្រព្រឹត្តបែបយ៉ាងណាវិញ ក្នុងកិរិយាបរិសុទ្ធ និងសេចក្ដីគោរពប្រតិបត្ដិ›។ (ពេត្រុសទី២ ៣:១១) សូមឲ្យពាក្យសំដីនិងការប្រព្រឹត្តរបស់យើងនៅឯមហាសន្និបាតតាមតំបន់ដែលមានប្រធានថា៖«អ្នកប្រព្រឹត្តតាមព្រះបន្ទូលរបស់ព្រះ» ជួយអ្នកពិនិត្យមើលដែលមានចិត្តស្មោះស ឲ្យស្គាល់ និងឲ្យថ្វាយបង្គំព្រះឧត្តុង្គឧត្តមរបស់យើង ដែលទ្រង់សមនឹងទទួលគ្រប់កិត្ដិយសនិងសិរីល្អ។—កូរិនថូសទី១ ១៤:២៤, ២៥