សូមទុក
គំរូអំពីពាក្យផ្សាយ
ចូរប្រើយោបល់ទាំងនេះជាជំនួយដើម្បីរៀបចំពាក្យផ្សាយ សំរាប់ជូនសៀវភៅដែលជាឧបករណ៍ផ្សាយសំរាប់ខែនិមួយៗ។
ចូរចូលទៅជិតព្រះយេហូវ៉ា
«មនុស្សជាច្រើនដែលជឿលើព្រះចង់មានភាពជិតស្និទ្ធជាងជាមួយនឹងទ្រង់។ តើអ្នកដឹងទេ? ព្រះអញ្ជើញយើងឲ្យចូលទៅជិតទ្រង់។ [សូមអាន យ៉ាកុប ៤:៨] សៀវភៅនេះត្រូវរៀបចំឡើងក្នុងបំណងជួយមនុស្សឲ្យចូលទៅជិតព្រះដោយប្រើព្រះគម្ពីរ»។ សូមអានវគ្គទី១ នៅទំព័រ១៦។
«សព្វថ្ងៃនេះមានអំពើអយុត្ដិធម៌ច្រើនណាស់ ដូចជាការពណ៌នានៅទីនេះ។ [សូមអាន សាស្ដា ៨:៩ខ] មនុស្សជាច្រើនឆ្ងល់ថាតើព្រះស្រឡាញ់យើងឬយ៉ាងណា? [សូមអានឃ្លាពីរនៅដើមវគ្គទី៤ នៅទំព័រ១១៩] ជំពូកនេះពន្យល់នូវមូលហេតុដែលព្រះបានអនុញ្ញាតឲ្យមានអំពើអយុត្ដិធម៌អស់មួយរយៈ»។
ចូរចាំយាមចុះ!
«មនុស្សជាច្រើនកំពុងបង្ហាញការព្រួយបារម្ភអំពីបញ្ហាលំបាកនិងព្រឹត្ដិការណ៍គួរឲ្យខ្លោចផ្សាដែលកើតឡើងជារឿយៗសព្វថ្ងៃនេះ។ [សូមលើកឡើងនូវឧទាហរណ៍មួយដែលគេដឹងទូទៅ] តើអ្នកបានដឹងទេថា ព្រឹត្ដិការណ៍ទាំងអស់នេះដែលមានទូទាំងពិភពលោក ជាផ្នែកនៃទីសម្គាល់មួយដែលជួយឲ្យដឹងថា រដ្ឋាភិបាលរបស់ព្រះជិតនឹងចាប់ផ្ដើមគ្រប់គ្រងលើផែនដីនោះ? [អនុញ្ញាតឲ្យឆ្លើយ រួចអានបទគម្ពីរមួយដែលសមស្របតាមឧទាហរណ៍ដែលអ្នកបានលើកឡើងនោះដូចនៅម៉ាថាយ ២៤:៣, ៧, ៨; លូកា ២១:៧, ១០, ១១; ឬធីម៉ូថេទី២ ៣:១-៥] សៀវភៅនេះប្រាប់មូលហេតុដ៏សំខាន់ដែលយើងត្រូវដឹងឥឡូវនេះអំពីអត្ថន័យនៃព្រឹត្ដិការណ៍ទាំងនេះ»។
«សព្វថ្ងៃនេះមនុស្សជាច្រើនតានតឹងចិត្តដោយសាររឿងគួរឲ្យតក់ស្លុតដែលកើតឡើងនៅជុំវិញ ឬដោយសារបានជួបនឹងរឿងខ្លោចផ្សាដោយខ្លួនឯងតែម្ដង។ មនុស្សខ្លះឆ្ងល់ថា តើហេតុអ្វីបានជាព្រះមិនធ្វើអន្តរាគមន៍កុំឲ្យរឿងបែបនេះកើតឡើង? ព្រះគម្ពីរជួយឲ្យយើងមានទំនុកចិត្តថា បន្ដិចទៀត ព្រះនឹងបំបាត់ចោលរាល់ហេតុដែលធ្វើឲ្យមនុស្សឈឺចាប់។ [ចូរអាន វិវរណៈ ១៤:៦,៧] សូមកត់សម្គាល់នូវអ្វីដែលនឹងកើតឡើងពេលដែលព្រះជំនុំជំរះនោះ។ [ចូរអាន ពេត្រុសទី២ ៣:១០, ១៣] សៀវភៅនេះផ្ដល់ពត៌មានថែមទៀតអំពីរឿងដ៏សំខាន់នេះ»។
ចំណេះដែលនាំទៅដល់ជីវិតអស់កល្បជានិច្ច
«បើមានគេអញ្ជើញអ្នកមករស់នៅកន្លែងមួយដែលមានទេសភាពស្អាតដូចក្នុងរូបនេះ តើអ្នកនឹងយល់ព្រមទេ? [សូមបង្ហាញរូបភាពនៅទំព័រ៤-៥ ហើយអនុញ្ញាតឲ្យឆ្លើយ] សូមកត់សម្គាល់នូវព្រះបន្ទូលរបស់ព្រះដែលចែងពីអ្វីដែលចាំបាច់ ដើម្បីអាចបានជីវិតជារៀងរហូតក្នុងស្ថានភាពបែបនេះ។ [សូមអាន យ៉ូហាន ១៧:៣] សៀវភៅនេះនឹងជួយឲ្យអ្នកបានចំណេះដែលនាំទៅឯជីវិតជារៀងរហូត»។ ណាត់ជួបថ្ងៃក្រោយដើម្បីពិភាក្សាវគ្គ១ដល់វគ្គ៥ក្នុងជំពូកទី១។
ចូរបង្ហាញរូបភាពនៅទំព័រ១៨៨-១៨៩ ហើយសួរសំនួរដែលមានស្រាប់ក្នុងរូបភាពនោះថា៖ «តើអ្នកសង្ឃឹមថាបានរស់នៅក្នុងសួនមនោរម្យឬទេ ពេលដែលចំណេះអំពីព្រះជ្រួតជ្រាបពេញផែនដីនោះ? [អនុញ្ញាតឲ្យឆ្លើយ រួចអាន អេសាយ ១១:៩] សៀវភៅនេះនឹងជួយអ្នករៀនអ្វីដែលព្រះគម្ពីរចែងអំពីសួនមនោរម្យ ហើយអ្វីដែលយើងត្រូវធ្វើដើម្បីរស់នៅក្នុងសួនមនោរម្យនោះ»។ ណាត់ជួបថ្ងៃក្រោយដើម្បីពិភាក្សាវគ្គ១១-១៦ក្នុងជំពូកទី១។
ព្រះគម្ពីរបន្ទូលនៃព្រះឬក៏ពាក្យសំដីនៃមនុស្ស?
«នៅសម័យយើងនេះ មនុស្សស្ទើរតែទាំងអស់មានបញ្ហាលំបាក។ មនុស្សជាច្រើនពឹងអ្នកប្រាជ្ញដើម្បីឲ្យបានឱវាទ។ មនុស្សខ្លះទៀតសុំយោបល់ពីគ្រូមន្តអាគម។ ចំណែកអ្នកវិញ តើអ្នកគិតថាយើងអាចបានឱវាទដែលមានប្រយោជន៍ពីណាមក? [អនុញ្ញាតឲ្យឆ្លើយ] ព្រះគម្ពីរប្រាប់ការណ៍ពិតមួយដែលយើងទាំងអស់គ្នាត្រូវដឹង។ [ចូរអាន ធីម៉ូថេទី២ ៣:១៦ រួចបើកទៅទំព័រ១៨៧ ហើយអានវគ្គ៩] សៀវភៅនេះនឹងជួយឲ្យអ្នកយល់មូលហេតុដែលការធ្វើតាមការណែនាំក្នុងព្រះគម្ពីរតែងផ្ដល់ប្រយោជន៍ល្អបំផុត»។
បុរសឧត្តមបំផុតដែលធ្លាប់រស់នៅ
«មនុស្សជាច្រើនធ្លាប់ឆ្ងល់ថា តើព្រះយេស៊ូជាមនុស្សដូចម្ដេចពេលទ្រង់គង់នៅផែនដី? តើព្រះយេស៊ូខុសគ្នាពីមនុស្សឯទៀតនៅសម័យនោះយ៉ាងណា? តើអ្នកគិតដូចម្ដេច? [អនុញ្ញាតឲ្យឆ្លើយ] សៀវភៅដែលគួរឲ្យចាប់អារម្មណ៍នេះមានចំណងជើងថា បុរសឧត្តមបំផុតដែលធ្លាប់រស់នៅ រៀបរាប់ព្រឹត្ដិការណ៍សំខាន់ៗក្នុងជីវិតរបស់ទ្រង់ ហើយជួយយើងយល់ថាទ្រង់ជាមនុស្សដូចម្ដេច។ ក្រោយអានសៀវភៅនេះហើយ មនុស្សខ្លះមានអារម្មណ៍មួយថា គឺហាក់ដូចជាពួកគេបានសំណេះសំណាលជាមួយនឹងព្រះយេស៊ូ បានរួមសុខទុក្ខជាមួយនឹងទ្រង់ ហើយបានមើលឃើញការប្រព្រឹត្តរបស់ទ្រង់ផ្ទាល់នឹងភ្នែក»។ បង្ហាញរូបភាពទីមួយក្នុងសៀវភៅនោះ ដែលមានទាំងចំណងជើងសៀវភៅ។ រួចមក បើកមើលសេចក្ដីផ្ដើម ហើយអានវគ្គទីពីរក្រោមចំណងជើងថា«ទទួលប្រយោជន៍ពីការរៀនអំពីទ្រង់»។ បើម្ចាស់ផ្ទះបង្ហាញចំណាប់អារម្មណ៍នោះ ចូរជូនសៀវភៅ។
«នៅពេលឮនាមព្រះយេស៊ូគ្រីស្ទ មនុស្សជាច្រើនគិតអំពីទ្រង់ជាបុរសដែលកំពុងតែឈឺចាប់និងជិតសោយទិវង្គត។ គំនិតរបស់ពួកគេគិតតែពីពេលទ្រង់ប្រសូតមកនិងពេលដែលទ្រង់សោយទិវង្គតនោះ។ ពួកគេច្រើនតែមិនចាប់អារម្មណ៍នឹងអ្វីៗដ៏ល្អប្រសើរដែលទ្រង់ធ្លាប់ធ្វើហើយមានបន្ទូលពេលមានជីវិតរស់នៅនោះទេ។ អ្វីដែលទ្រង់បានសម្រេចជាប់ទាក់ទងនឹងមនុស្សគ្រប់រូបដែលធ្លាប់រស់នៅផែនដី។ ហេតុនេះហើយជាការសំខាន់ដែលយើងរៀនឲ្យបានច្រើនបំផុតអំពីអ្វីល្អៗដែលទ្រង់បានធ្វើដើម្បីយើង»។ ចូរអាន យ៉ូហាន ១៧:៣។ រួចបើកទំព័រទីមួយនៃសេចក្ដីផ្ដើម ហើយអានវគ្គទី៤។
តើព្រះតម្រូវអ្វីពីយើង?
«តើអ្នកគិតថាព្រះមានបំណងព្រះហឫទ័យឲ្យយើងមានបញ្ហាលំបាកដូចយើងមានសព្វថ្ងៃនេះឬ? [អនុញ្ញាតឲ្យឆ្លើយ រួចអានម៉ាថាយ ៦:១០] តើអ្នកឆ្ងល់ទេថា រាជ្យឬរដ្ឋាភិបាលរបស់ព្រះជាអ្វី?» សូមបើកមេរៀនទី៦ហើយអានសំនួរទាំងប៉ុន្មានដែលមាននៅដើមមេរៀននោះ។ អាចចាប់ផ្ដើមពិភាក្សាមេរៀនឬក៏ណាត់ជួបថ្ងៃក្រោយដើម្បីពិភាក្សាមេរៀននោះ។
«ទោះជាសង្គមមនុស្សចេះតែជឿនលឿនយ៉ាងណាក៏ដោយ ក៏ជំងឺនិងសេចក្ដីស្លាប់នៅតែធ្វើឲ្យមនុស្សរងការឈឺចាប់និងកើតទុក្ខ។ តើអ្នកដឹងទេថា ព្រះយេស៊ូនឹងធ្វើអ្វីសំរាប់មនុស្សឈឺ មនុស្សចាស់ជរា និងសូម្បីតែមនុស្សស្លាប់នោះ?» អនុញ្ញាតឲ្យឆ្លើយ។ បើម្ចាស់ផ្ទះចង់ដឹងចម្លើយ បើកមេរៀនទី៥ ហើយអានសំនួរសំរាប់វគ្គ៥និង៦។ ពិភាក្សាអំពីវគ្គទាំងនោះឬក៏ណាត់ជួបថ្ងៃក្រោយដើម្បីពិភាក្សាវគ្គទាំងនោះ។
ចូរថ្វាយបង្គំព្រះពិតតែមួយ
«តើយើងអាចពឹងអ្វីដើម្បីបានជំនួយក្នុងការដោះស្រាយនូវបញ្ហាផ្សេងៗក្នុងជីវិត? [អនុញ្ញាតឲ្យឆ្លើយ រួចអានរ៉ូម ១៥:៤] សូមកត់សម្គាល់ថា បទគម្ពីររបស់ព្រះផ្ដល់ការណែនាំដែលសម្រាលទុក្ខ និងផ្ដល់សេចក្ដីសង្ឃឹម ដែលផ្ដល់កម្លាំងចិត្តឲ្យយើងស៊ូទ្រាំនឹងការលំបាក។ សៀវភៅនេះផ្ដល់យោបល់អំពីវិធីដែលយើងអាចទទួលនូវប្រយោជន៍ច្រើនបំផុតពីការអានព្រះគម្ពីរ»។ បញ្ជាក់ចំណុចបួនយ៉ាងដែលមាននៅទំព័រ៣០។
«ដោយសារមនុស្សជាតិចេះតែទាស់ទែងបែកបាក់គ្នានៅសព្វថ្ងៃនេះ អ្នកខ្លះគិតថា វិធីតែមួយគត់ដើម្បីឲ្យមានសន្ដិភាពពិភពលោក គឺត្រូវបង្កើតរដ្ឋាភិបាលពិភពលោកមួយ។ តើអ្នកគិតថាមនុស្សពិតជាអាចបង្កើតរដ្ឋាភិបាលបែបនេះមែនឬ? [អនុញ្ញាតឲ្យឆ្លើយ រួចអានដានីយ៉ែល ២:៤៤] សៀវភៅនេះពន្យល់ថានគរឬរដ្ឋាភិបាលរបស់ព្រះជាអ្វី ហើយអ្វីដែលរដ្ឋាភិបាលនោះនឹងសម្រេច។ សៀវភៅនេះក៏បញ្ជាក់នូវរបៀបយើងអាចទទួលប្រយោជន៍ពីការគ្រប់គ្រងនៃរដ្ឋាភិបាលនោះ»។ ចូរបង្ហាញរូបភាពនៅទំព័រ៩២-៩៣។