ចូរគោរពប្រណិប័តន៍ព្រះដោយចិត្តអំណរនៅឯមហាសន្និបាតប្រចាំតំបន់
១ យ៉ូសែប ម៉ារៀ កូនៗរបស់ពួកគាត់ និងអ្នកឯទៀតបានធ្វើដំណើរទៅក្រុងយេរូសាឡិមដើម្បីចូលរួមបុណ្យប្រចាំឆ្នាំជាទៀងទាត់។ ពេលនោះ ពួកគាត់និងអ្នកឯទៀតដែលគោរពប្រណិប័តន៍ព្រះមិនបានគិតអំពីបញ្ហាផ្ទាល់ខ្លួនទេ តែពួកគេបានផ្ចង់អារម្មណ៍ទៅលើអ្វីដែលសំខាន់ចំពោះចំណងមិត្តភាពរបស់ពួកគេជាមួយនឹងព្រះវិញ។ បុណ្យទាំងនោះផ្ដល់ឱកាសដើម្បីរំពឹងគិតនិងនិយាយអំពីគុណធម៌របស់ព្រះយេហូវ៉ា ហើយដើម្បីពិចារណាអំពីច្បាប់របស់លោក។ ស្រដៀងគ្នាដែរ មហាសន្និបាតប្រចាំតំបន់ខាងមុខនេះនឹងផ្ដល់ឱកាសឲ្យយើងមានអំណរក្នុងការគោរពប្រណិប័តន៍ព្រះយេហូវ៉ា។
២ ត្រូវរៀបចំទុកជាមុន: ការធ្វើដំណើរពីក្រុងណាសារ៉ែតទៅទីក្រុងយេរូសាឡិម តម្រូវឲ្យក្រុមគ្រួសាររបស់លោកយេស៊ូដើរប្រហែល១០០គីឡូម៉ែត្រទៅ ១០០គីឡូម៉ែត្រមក។ ទោះជាយើងមិនដឹងថាលោកយេស៊ូមានបងប្អូនប៉ុន្មាននាក់ក៏ដោយ តែយើងអាចស្រមៃគិតអំពីការខំព្យាយាមរៀបចំរបស់យ៉ូសែបនិងម៉ារៀ។ តើអ្នកបានធ្វើការរៀបចំដ៏ចាំបាច់ដើម្បីចូលរួមមហាសន្និបាតប្រចាំតំបន់ទាំងបីថ្ងៃនៅពេលខាងមុខនេះទេ? នេះប្រហែលជាតម្រូវឲ្យយើងយកថ្ងៃឈប់សម្រាកពីការងារ សុំច្បាប់ពីនិយោជក ឬសុំច្បាប់ឲ្យកូនរបស់អ្នក។ បើអ្នកត្រូវការស្នាក់នៅសណ្ឋាគារ តើអ្នកបានកក់បន្ទប់ហើយឬនៅ? បើមានបងប្អូនណាម្នាក់ក្នុងក្រុមជំនុំត្រូវការជំនួយជាពិសេសដើម្បីចូលរួមមហាសន្និបាត តើអ្នកអាចទៅរកគាត់មុនហើយផ្ដល់ជំនួយឬទេ?—១យ៉ូន. ៣:១៧, ១៨
៣ ការសេពគប់ដែលលើកទឹកចិត្ត: បុណ្យរបស់សាសន៍យូដាបានផ្ដល់ឱកាសដ៏ល្អដើម្បីទទួលការលើកទឹកចិត្តពីការសេពគប់ជាមួយនឹងអ្នកឯទៀតដែលគោរពព្រះ! ក្រុមគ្រួសាររបស់លោកយេស៊ូច្បាស់ជាបានទន្ទឹងចាំឱកាសនេះដើម្បីចំណាយពេលជាមួយនឹងមិត្តភក្ដិចាស់។ ម្យ៉ាងទៀត នៅក្រុងយេរូសាឡិមនិងនៅតាមផ្លូវ ពួកគាត់បានជួបជនជាតិយូដានិងអ្នកដូរសាសនាមកកាន់សាសនាយូដាជាច្រើននាក់ ហើយនោះផ្ដល់ឱកាសឲ្យពួកគាត់បានមិត្តភក្ដិថ្មីដែរ។
៤ ហេតុអ្វីបានជាអ្នកបម្រើស្មោះត្រង់ហើយចេះពិចារណារៀបចំឲ្យយើងជួបជុំគ្នាស្ដាប់សុន្ទរកថានៅឯមហាសន្និបាតប្រចាំតំបន់ ជាជាងយកព័ត៌មាននោះមកសរសេរជាអត្ថបទ? គឺដើម្បីឲ្យយើងមានឱកាសលើកទឹកចិត្តគ្នាទៅវិញទៅមក។ (ហេ. ១០:២៤, ២៥) ដូច្នេះហើយ សូមរៀបចំដើម្បីអាចមកមហាសន្និបាតទាំងបីថ្ងៃនោះ ឲ្យបានមុនម៉ោង ដើម្បីរីករាយសេពគប់ជាមួយនឹងបងប្អូនឯទៀតមុនកម្មវិធីចាប់ផ្ដើម ដោយអធិការីប្រាប់អំពីបទភ្លេង ដែលឲ្យយើងដឹងថាដល់ម៉ោងទៅឯកន្លែងអង្គុយហើយ។ ជាជាងចាកចេញនៅពេលថ្ងៃត្រង់ដើម្បីទៅបរិភោគខាងក្រៅ យើងបានត្រូវលើកទឹកចិត្តឲ្យយកម្ហូបបន្ដិចបន្តួចមកជាមួយ ហើយបរិភោគនៅកន្លែងមហាសន្និបាតនោះ ដើម្បីយើងអាចជួបនិងនិយាយជាមួយនឹងបងប្អូនឯទៀត។ យើងទាំងអស់គ្នាគួរតែឲ្យតម្លៃចំពោះអំណោយដែលព្រះយេហូវ៉ាបានផ្ដល់ឲ្យ ពោលគឺការរួមគ្នាដោយសាមគ្គីភាពជាបងប្អូនគ្រិស្តសាសនិក។—មីកា ២:១២
៥ ជាពេលដើម្បីរៀន: តាំងពីលោកយេស៊ូនៅក្មេង លោកបានឆ្លៀតយកឱកាសដើម្បីរៀនអំពីបិតារបស់លោកនៅស្ថានសួគ៌ ពេលដែលទៅចូលរួមបុណ្យទាំងនោះ។ (លូក. ២:៤១-៤៩) តើអ្វីនឹងជួយយើងនិងក្រុមគ្រួសាររបស់យើងឲ្យទទួលប្រយោជន៍យ៉ាងពេញលេញពីផ្នែកផ្សេងៗនៃកម្មវិធីមហាសន្និបាត? ក្នុងអំឡុងកម្មវិធីនោះ សូមនៅកន្លែងអង្គុយហើយជៀសវាងពីការនិយាយគ្នាដោយមិនចាំបាច់។ កុំឲ្យទូរស័ព្ទដៃឬឧបករណ៍អេឡិចត្រូនិកផ្សេងទៀតរំខានដល់អ្នកឬអ្នកឯទៀត។ សូមផ្ចង់អារម្មណ៍មើលអ្នកថ្លែង ហើយកត់កំណត់ខ្លីៗ។ សូមអង្គុយជាក្រុមគ្រួសារដើម្បីដឹងថាកូនរបស់អ្នកក៏កំពុងស្ដាប់ដែរ។ នៅពេលល្ងាច សូមឆ្លៀតពេលដើម្បីពិភាក្សាជាមួយគ្នាអំពីចំណុចផ្សេងៗដែលអ្នកចូលចិត្ត។
៦ ការស្លៀកពាក់និងតុបតែងខ្លួន: អ្នកធ្វើដំណើរជួញដូរដែលជាជនជាតិបរទេសស្រួលសម្គាល់ក្រុមគ្រួសាររបស់លោកយេស៊ូនិងជនជាតិយូដាឯទៀតដែលគោរពប្រណិប័តន៍ព្រះយេហូវ៉ា ពេលដែលធ្វើដំណើរទៅនិងមកពីពិធីបុណ្យនោះ ដោយសារពួកគេទាំងអស់គ្នាមានរំយោលនៅជាយអាវនិងខ្សែពណ៌ផ្ទៃមេឃជាប់នឹងរំយោលនោះ។ (ជន. ១៥:៣៧-៤១) ទោះជាគ្រិស្តសាសនិកពិតមិនពាក់ខោអាវពិសេសក៏ដោយ ក៏យើងមានឈ្មោះជាមនុស្សស្អាតបាត ដែលស្លៀកពាក់សមរម្យ និងមានរបៀបរៀបរយ។ យើងគួរយកចិត្តទុកដាក់ជាពិសេសចំពោះអាការក្រៅរបស់យើងពេលធ្វើដំណើរទៅនិងមកពីមហាសន្និបាត ហើយពេលយើងនៅក្នុងក្រុងដែលមានមហាសន្និបាតដែរ។ ទោះជាយើងប្ដូរខោអាវក្រោយកម្មវិធីចប់ក៏ដោយ ក៏យើងគួរស្លៀកពាក់តាមរបៀបដែលនាំឲ្យមនុស្សសរសើរតម្កើងព្រះយេហូវ៉ា ហើយពាក់នាមប័ណ្ណមហាសន្និបាតដែរ។ ដោយស្លៀកពាក់ដូច្នេះ មនុស្សនឹងមើលមកយើងឃើញថាយើងខុសប្លែកពីអ្នកដែលមិនមែនជាសាក្សីព្រះយេហូវ៉ា ហើយពួកគេនឹងស្ងើចសរសើរយើង។
៧ ត្រូវការអ្នកស្ម័គ្រចិត្ត: ដើម្បីឲ្យមហាសន្និបាតដំណើរការយ៉ាងល្អ ត្រូវការជាចាំបាច់នូវបងប្អូនជាច្រើនដើម្បីជួយធ្វើកិច្ចការផ្សេងៗ។ តើអ្នកអាចស្ម័គ្រចិត្តជួយឬទេ? (ទំនុក. ១១០:៣) កិច្ចការដែលយើងធ្វើនៅឯមហាសន្និបាតគឺជាផ្នែកមួយនៃកិច្ចបម្រើពិសិដ្ឋ ហើយក៏ផ្ដល់សក្ខីភាពដែលបញ្ជាក់យ៉ាងច្បាស់អំពីយើងដែរ។ អ្នកចាត់ចែងកន្លែងមហាសន្និបាតមួយបាននឹកអស្ចារ្យក្នុងចិត្តចំពោះពួកអ្នកស្ម័គ្រចិត្តដែលបានជួយសម្អាតអគារនោះ រហូតដល់គាត់សរសេរថា៖ «ខ្ញុំចង់អរគុណអ្នកសម្រាប់រៀបចំកម្មវិធីដ៏ល្អបំផុតដែលខ្ញុំធ្លាប់ឃើញ។ ខ្ញុំតែងតែឮគេថាសាក្សីព្រះយេហូវ៉ាជាមនុស្សពិសេសដែលមានកេរ្ដិ៍ឈ្មោះតាំងពីយូរហើយថាជាអ្នកដែលសម្អាតសាលឲ្យស្អាតលើសដើម។ អ្នកនិងអង្គការរបស់អ្នកបានធ្វើឲ្យសាលនេះក្លាយជាកន្លែងដែលល្អជាងសម្រាប់សហគមន៍យើង ហើយបានសម្រេចការនេះតាមរយៈមនុស្សមួយក្រុមដែលមានចិត្តល្អរកប្រៀបផ្ទឹមគ្មាន»។
៨ ឱកាសដើម្បីផ្សព្វផ្សាយ: មនុស្សដែលនៅក្នុងក្រុងដែលមានមហាសន្និបាតនឹងកត់សម្គាល់ថាយើងស្លៀកពាក់សម្អិតសម្អាងខ្លួនស្អាតបាតហើយពាក់នាមប័ណ្ណ។ នេះប្រហែលជាធ្វើឲ្យពួកគេចាប់អារម្មណ៍ ហើយផ្ដល់ឱកាសឲ្យយើងប្រាប់ពួកគេអំពីមហាសន្និបាត។ ក្រោយកម្មវិធីមហាសន្និបាត ក្មេងប្រុសម្នាក់អាយុបួនឆ្នាំបានយកសៀវភៅដែលបានចេញថ្មីនៅមហាសន្និបាត ទៅភោជនីយដ្ឋានហើយបង្ហាញដល់អ្នករត់តុនៅទីនោះ។ នេះបានផ្ដល់ឱកាសឲ្យឪពុកម្ដាយក្មេងប្រុសនោះអញ្ជើញអ្នករត់តុឲ្យទៅចូលរួមមហាសន្និបាត។
៩ នៅសម័យបុរាណ ពួកយូដាដែលចង់រៀនថែមទៀតអំពីព្រះយេហូវ៉ាបានទន្ទឹងរង់ចាំបុណ្យផ្សេងៗដែលជាគ្រាដ៏សប្បាយសម្រាប់ពួកគេ។ (ចោ. ១៦:១៥) ក្រុមគ្រួសាររបស់លោកយេស៊ូបានពេញចិត្តលះបង់អ្វីៗក៏ដោយដើម្បីចូលរួមហើយទទួលប្រយោជន៍យ៉ាងពេញលេញពីបុណ្យទាំងនោះ។ យើងក៏ឲ្យតម្លៃចំពោះមហាសន្និបាតប្រចាំតំបន់របស់យើងដែរ ដោយមានទស្សនៈថានេះជាអំណោយដែលមកពីបិតាស្ថានសួគ៌ដែលស្រឡាញ់យើង។ (យ៉ា. ១:១៧) ឥឡូវនេះជាពេលដែលយើងគួររៀបចំទុកជាមុនសម្រាប់ឱកាសដែលមានតែម្ដងក្នុងមួយឆ្នាំ ជាគ្រាសម្រាប់គោរពប្រណិប័តន៍ព្រះដោយអំណរ!
[សំណួរសម្រាប់អត្ថបទសិក្សា]
១. តើបុណ្យផ្សេងៗរបស់សាសន៍អ៊ីស្រាអែលនិងមហាសន្និបាតប្រចាំតំបន់នៅសព្វថ្ងៃនេះស្រដៀងគ្នាយ៉ាងណា?
២. តើយើងគួរធ្វើអ្វីខ្លះដើម្បីរៀបចំចូលរួមមហាសន្និបាតប្រចាំតំបន់ខាងមុខនេះ?
៣. តើបុណ្យរបស់សាសន៍យូដាបានផ្ដល់ឱកាសដ៏ល្អដើម្បីទទួលការលើកទឹកចិត្តយ៉ាងដូចម្ដេច?
៤. តើយើងអាចបង្ហាញថាយើងឲ្យតម្លៃចំពោះការរួមគ្នាដោយសាមគ្គីភាពជាបងប្អូនគ្រិស្តសាសនិកយ៉ាងដូចម្ដេច?
៥. តើអ្វីនឹងជួយយើងឲ្យទទួលប្រយោជន៍យ៉ាងពេញលេញពីកម្មវិធីមហាសន្និបាត?
៦. ស្តីអំពីការស្លៀកពាក់និងតុបតែងខ្លួន តើយើងគួរចងចាំអ្វីខ្លះ?
៧. ហេតុអ្វីយើងគួរពិចារណាអំពីលទ្ធភាពរបស់យើង ដើម្បីធ្វើកិច្ចការស្ម័គ្រចិត្តនៅឯមហាសន្និបាត?
៨. នៅក្នុងក្រុងដែលមានមហាសន្និបាត តើយើងនឹងមានឱកាសអ្វីខ្លះដើម្បីផ្សព្វផ្សាយ?
៩. ស្តីអំពីឱកាសដែលយើងអាចរៀនអំពីព្រះយេហូវ៉ា តើយើងអាចយកតម្រាប់តាមចិត្តគំនិតរបស់ក្រុមគ្រួសារលោកយេស៊ូយ៉ាងដូចម្ដេច?
[ប្រអប់នៅទំព័រ៦, ៧]
សេចក្ដីរំលឹកអំពីមហាសន្និបាតប្រចាំតំបន់
◼ កម្មវិធី: កម្មវិធីទាំងបីថ្ងៃនឹងចាប់ផ្ដើមនៅម៉ោង៨:២០ព្រឹក។ ទ្វារនឹងបើកនៅម៉ោង៧:២០ព្រឹក។ ពេលបទភ្លេងសម្រាប់បើកកម្មវិធីបានត្រូវប្រកាស យើងទាំងអស់គ្នាគួរតែនៅកន្លែងអង្គុយរៀងខ្លួន ដើម្បីឲ្យកម្មវិធីចាប់ផ្ដើមដោយថ្លៃថ្នូរ។ នៅថ្ងៃសុក្រនិងថ្ងៃសៅរ៍កម្មវិធីនឹងចប់ នៅម៉ោង៣:៥៥ល្ងាច ហើយថ្ងៃអាទិត្យ នៅម៉ោង២:៤០ល្ងាច។
◼ ការចតឡាននិងម៉ូតូ: នៅកន្លែងមហាសន្និបាត យើងនឹងចាត់ចែងឲ្យមានកន្លែងចតឡាននិងម៉ូតូដោយមិនគិតថ្លៃសម្រាប់អ្នកដែលចូលរួម។
◼ ការទុកកន្លែងអង្គុយ: អ្នកអាចទុកកន្លែងអង្គុយសម្រាប់តែអ្នកដែលធ្វើដំណើរជាមួយនឹងអ្នកឬរស់នៅផ្ទះជាមួយអ្នក ព្រមទាំងអ្នកដែលកំពុងរៀនគម្ពីរជាមួយនឹងអ្នក។—១កូ. ១៣:៥
◼ អាហារថ្ងៃត្រង់: សូមយកម្ហូបអាហារពេលថ្ងៃត្រង់ទៅជាមួយ ជាជាងចេញពីកន្លែងមហាសន្និបាតទៅទិញអាហារខាងក្រៅនៅពេលឈប់សម្រាកថ្ងៃត្រង់។ អ្នកអាចយកធុងទឹកកកតូចមួយដែលអាចដាក់ក្រោមកៅអីបាន។ ធុងទឹកកកធំៗនិងវត្ថុដែលធ្វើពីកែវបានត្រូវហាមយកចូលក្នុងកន្លែងមហាសន្និបាត។
◼ វិភាគទាន: នៅឯសាលប្រជុំឬនៅមហាសន្និបាត យើងអាចបង្ហាញថាយើងមានចិត្តកតញ្ញូសម្រាប់ការរៀបចំមហាសន្និបាត ដោយធ្វើវិភាគទានស្ម័គ្រពីចិត្តដើម្បីគាំទ្រកិច្ចការទូទាំងពិភពលោក។ វិភាគទានដែលជាសែកឬមូលប្បទានប័ត្រត្រូវសរសេរថាបើកប្រាក់ឲ្យ«Watch Tower»។
◼ គ្រោះថ្នាក់និងការសង្គ្រោះបន្ទាន់: បើអ្នកឃើញថាមានគ្រោះថ្នាក់នៅកន្លែងមហាសន្និបាត សូមប្រាប់បងប្រុសជាឆ្មាំដែលនៅជិតនោះ ហើយគាត់នឹងផ្ដល់ដំណឹងដល់ផ្នែកខាងសង្គ្រោះបន្ទាន់ ដើម្បីឲ្យបុគ្គលិកខាងសង្គ្រោះបន្ទាន់របស់យើងអាចវិភាគមើលថាស្ថានភាពនោះធ្ងន់ធ្ងរប៉ុណ្ណា រួចអាចផ្ដល់ជំនួយ។
◼ ស្បែកជើង: រៀងរាល់ឆ្នាំ មានមនុស្សមួយចំនួនរបួសដោយសារគ្រោះថ្នាក់ទាក់ទងនឹងស្បែកជើង។ ជាការល្អបំផុត បើជ្រើសរើសពាក់ស្បែកជើងសមរម្យ ហើយល្មមនឹងជើងដែលស្រួលដើរឡើងចុះជណ្ដើរ និងនៅកន្លែងឥដ្ឋក្រឡាដែលមានប្រហោងតូចៗជាដើម។
◼ សម្រាប់មនុស្សអន់ត្រចៀក: កម្មវិធីនឹងត្រូវចាក់ផ្សាយតាមប៉ុស្តិ៍វិទ្យុFM។ ដើម្បីអាចស្ដាប់បាន អ្នកត្រូវការកូនវិទ្យុប្រើថ្មនិងកាសសម្រាប់ស្ដាប់។
◼ ការថតសំឡេង: ម៉ាស៊ីនថតសំឡេងគ្រប់ធុនមិនគួរតភ្ជាប់ជាមួយប្រព័ន្ធសំឡេងនិងអគ្គិសនីនៃកន្លែងមហាសន្និបាតទេ ហើយអាចប្រើបានឲ្យតែមិនរំខានដល់អ្នកឯទៀត។
◼ រទេះកូនក្មេងនិងប៉ៅអ៊ី: រទេះកូនក្មេងនិងប៉ៅអ៊ីមិនគួរយកទៅសាលមហាសន្និបាតទេ។ ក៏ប៉ុន្តែ កៅអីពិសេសសម្រាប់កូនក្មេងដែលអាចចងភ្ជាប់ជាមួយនឹងកៅអីដែលនៅក្បែរឪពុកម្ដាយអាចត្រូវប្រើបាន។
◼ ទឹកអប់: មហាសន្និបាតភាគច្រើនត្រូវធ្វើឡើងនៅកន្លែងបិទជិតដែលមានម៉ាស៊ីនស្រូបខ្យល់ចេញចូល។ ដូច្នេះ បើយើងប្រើទឹកអប់ដែលមានក្លិនខ្លាំង យើងអាចបង្ហាញសេចក្ដីស្រឡាញ់ដោយប្រើទឹកអប់តែបន្ដិចបន្តួចប៉ុណ្ណោះ។ នោះដោយសារទឹកអប់ដែលមានក្លិនខ្លាំងអាចបណ្ដាលឲ្យមានប្រតិកម្ម ដល់អ្នកដែលមានបញ្ហាខាងផ្លូវដង្ហើមឬបញ្ហាផ្សេងទៀតដែលពាក់ព័ន្ធនឹងនេះ។—១កូ. ១០:២៤
◼ ក្រដាសសូមរកជួប: ក្រដាសសូមរកជួប (S-43) គួរប្រើដើម្បីផ្ដល់ព័ត៌មានស្តីអំពីអ្នកដែលបានបង្ហាញចំណាប់អារម្មណ៍ដោយសារយើងបានផ្សព្វផ្សាយក្រៅផ្លូវការក្នុងអំឡុងពេលមានមហាសន្និបាត។ អ្នកផ្សាយគួរយកក្រដាសសូមរកជួបនេះមួយឬពីរសន្លឹកមកជាមួយនៅឯមហាសន្និបាត។ ក្រដាសសូមរកជួបដែលបានបំពេញរួចហើយ អាចជូនដល់អ្នកទទួលខុសត្រូវខាងសៀវភៅ ឬដល់លេខាធិការនៃក្រុមជំនុំរបស់អ្នក ពេលត្រឡប់ទៅក្រុមជំនុំវិញក៏បាន (សូមមើលកិច្ចបម្រើព្រះ ខែវិច្ឆិកា ឆ្នាំ២០០៩ ទំព័រ៤)។
◼ នៅភោជនីយដ្ឋាន: ចូរនាំឲ្យមានការសរសើរដល់នាមរបស់ព្រះយេហូវ៉ា ដោយប្រព្រឹត្តល្អនៅឯភោជនីយដ្ឋាន។
◼ សណ្ឋាគារ: (១) សូមកុំកក់ចំនួនបន្ទប់លើសពីសេចក្ដីត្រូវការរបស់អ្នក ហើយកុំឲ្យចំនួនអ្នកស្នាក់នៅក្នុងបន្ទប់លើសចំនួនដែលសណ្ឋាគារអនុញ្ញាត។ (២) បើអ្នកពិតជាមិនត្រូវការបន្ទប់ដែលបានកក់នោះទេ សូមជូនដំណឹងដល់សណ្ឋាគារភ្លាមៗ។ (៣) សូមយករទេះដាក់អីវ៉ាន់នៅពេលដែលអ្នករៀបចំអីវ៉ាន់រួចហើយតែប៉ុណ្ណោះ ហើយទុករទេះនោះវិញភ្លាមៗដើម្បីឲ្យអ្នកឯទៀតអាចប្រើបាន។ (៤) កុំចម្អិនអាហារក្នុងបន្ទប់បើវិន័យសណ្ឋាគារមិនអនុញ្ញាត។ (៥) សូមទុកលុយទឹកតែបន្ដិចបន្តួចឲ្យអ្នកបោសសម្អាតបន្ទប់រាល់ថ្ងៃ។ (៦) យើងមិនគួរយកច្រើនហួសហេតុពេកនូវរបស់ដែលសណ្ឋាគារឲ្យដោយឥតគិតថ្លៃ ដូចជាអាហារពេលព្រឹក កាហ្វេ និងទឹកកកសម្រាប់ភ្ញៀវក្នុងពេលដែលស្នាក់នៅសណ្ឋាគារនោះឡើយ។ (៧) សូមបង្ហាញផលដែលបង្កើតដោយសកម្មពលរបស់ព្រះ រាល់ពេលដែលទាក់ទងនឹងបុគ្គលិកសណ្ឋាគារ។ ពួកគេត្រូវថែរក្សាភ្ញៀវជាច្រើន ដូច្នេះពួកគេនឹងមានចិត្តដឹងគុណចំពោះចិត្តសប្បុរស អត់ធ្មត់ និងគំនិតសមហេតុផលរបស់យើង។ (៨) តម្លៃដែលបង្ហាញក្នុងបញ្ជីណែនាំអំពីកន្លែងស្នាក់នៅ (Recommended Lodging List) គឺជាតម្លៃពេញសម្រាប់ស្នាក់នៅមួយថ្ងៃ ប៉ុន្តែមិនរួមបញ្ចូលតម្លៃពន្ធនោះទេ។ បើគេគិតថ្លៃលើសតម្លៃ ឬគេគិតតម្លៃអ្វីដែលអ្នកមិនបានសុំឬប្រើ សូមកុំបង់ថ្លៃទាំងនោះ ហើយប្រាប់បងប្អូនដែលទទួលខុសត្រូវខាងចាត់ចែងបន្ទប់ នៅឯមហាសន្និបាតភ្លាមៗ។ (៩) បើអ្នកមានបញ្ហាដែលទាក់ទងនឹងបន្ទប់នៅសណ្ឋាគារ សូមទាក់ទងបងប្អូនដែលទទួលខុសត្រូវខាងចាត់ចែងបន្ទប់ ក្នុងអំឡុងពេលមហាសន្និបាតដើម្បីពួកគេអាចជួយអ្នកបាន។
◼ កិច្ចបម្រើស្ម័គ្រចិត្ត: យើងនឹងទទួលអំណរកាន់តែខ្លាំងឡើងពីការចូលរួមមហាសន្និបាត បើយើងស្ម័គ្រចិត្តជួយធ្វើកិច្ចការផ្សេងៗដែលចាំបាច់នៅឯមហាសន្និបាតនោះ។ (សកម្ម. ២០:៣៥) អ្នកដែលមានបំណងចង់ជួយកិច្ចការនេះសូមប្រាប់បងប្អូនដែលទទួលខុសត្រូវខាងផ្នែកកិច្ចការស្ម័គ្រចិត្តនៅឯមហាសន្និបាត។ កូនក្មេងដែលមានអាយុក្រោម១៦ឆ្នាំអាចជួយធ្វើកិច្ចការនេះបានបើមានឪពុកម្ដាយឬអាណាព្យាបាលជួយមើលការខុសត្រូវ ឬអ្នកពេញវ័យណាម្នាក់ដែលឪពុកម្ដាយឬអាណាព្យាបាលបានអនុញ្ញាតឲ្យជួយមើលការខុសត្រូវ។