សាលាកិច្ចបម្រើផ្សាយឆ្នាំ២០១៥ ជួយយើងឲ្យបង្កើនសមត្ថភាពបង្រៀន
១ ដាវីឌដែលជាអ្នកតែងទំនុកតម្កើងបានសរសេរថា៖ «ឱព្រះយេហូវ៉ា ជាថ្មដា ហើយជាអ្នកប្រោសលោះនៃទូលបង្គំអើយ! សូមឲ្យពាក្យសំដីដែលចេញមកពីមាត់ទូលបង្គំ នឹងការរំពឹងគិតក្នុងចិត្តរបស់ទូលបង្គំ បានគួរគាប់នៅព្រះនេត្រទ្រង់»។ (ទំនុក. ១៩:១៤) យើងក៏ចង់ឲ្យពាក្យសម្ដីរបស់យើងជាទីគាប់ចិត្តដល់ព្រះយេហូវ៉ាដែរ ដោយសារយើងចាត់ទុកការថ្លែងប្រាប់សេចក្ដីពិតក្នុងក្រុមជំនុំនិងក្នុងកិច្ចបម្រើផ្សាយថាជាឯកសិទ្ធិដ៏មានតម្លៃ។ ព្រះយេហូវ៉ាបង្ហាត់បង្រៀនយើងឲ្យបំពេញកិច្ចបម្រើផ្សាយដោយប្រើវិធីជាច្រើន ហើយវិធីមួយគឺតាមរយៈសាលាកិច្ចបម្រើផ្សាយ។ នៅទូទាំងពិភពលោក ការបង្ហាត់បង្រៀននេះមានជារៀងរាល់សប្ដាហ៍នៅជាង១១១.០០០ក្រុមជំនុំ។ ទោះជាបងប្អូនប្រុសស្រីទូទាំងផែនដីមកពីមជ្ឈដ្ឋានខុសៗគ្នាក្ដី តែសាលានេះជួយពួកគាត់ឲ្យមានគុណសម្បត្ដិគ្រប់គ្រាន់ដើម្បីធ្វើជាអ្នកផ្សាយដំណឹងល្អ ឲ្យមានភាពប៉ិនប្រសប់ ឲ្យមានចិត្តក្លាហាន និងឲ្យមានសមត្ថភាពក្នុងការបង្រៀនដោយបញ្ជាក់ហេតុផលដែលធ្វើឲ្យគេជឿជាក់។—សកម្ម. ១៩:៨; កូឡ. ៤:៦
២ ក្នុងកម្មវិធីសាលាសម្រាប់ឆ្នាំ២០១៥ នឹងរួមបញ្ចូលប្រធានបទនៃសេចក្ដីបង្រៀនបឋមៗពីគម្ពីរ ពីសៀវភៅស្តើងដំណឹងល្អ និងពីសៀវភៅសូមស្ដាប់គ្រូដ៏ល្អប្រសើរផងដែរ។ បន្ថែមទៅទៀត គោលសំខាន់ៗពីអំណានគម្ពីរនិងសុន្ទរកថាទី១ ក៏មានការផ្លាស់ប្ដូររយៈពេលសម្រាប់ថ្លែងដែរ។ ការផ្លាស់ប្ដូរការណែនាំសម្រាប់ផ្នែកផ្សេងៗក្នុងសាលានេះមានដូចខាងក្រោម។
៣ គោលសំខាន់ៗពីអំណានគម្ពីរ: បងប្រុសដែលបានទទួលសុន្ទរកថានេះ គាត់នឹងត្រូវថ្លែងក្នុងរយៈពេលពីរនាទី ដើម្បីលើកយកចំណុចមួយដ៏គួរឲ្យចាប់អារម្មណ៍និងដែលមានប្រយោជន៍ពីអំណានគម្ពីរប្រចាំសប្ដាហ៍។ ទោះជាមានរយៈពេលកំណត់ក្ដី តែបើគាត់រៀបចំល្អ នោះបងប្អូនក្នុងក្រុមជំនុំនឹងទទួលប្រយោជន៍ពីចំណុចដែលគាត់បានលើកឡើង។ បន្ទាប់មក នៅសល់៦នាទីទៀត ដើម្បីទុកឲ្យបងប្អូនរួមចំណែកឆ្លើយ។ បងប្អូនម្នាក់ៗអាចឆ្លើយក្នុងរយៈពេល៣០វិនាទី ឬខ្លីជាងនូវចំណុចដ៏ល្អណាមួយដែលពួកគាត់បានរៀនពីអំណានគម្ពីរប្រចាំសប្ដាហ៍។ ដើម្បីឲ្យឆ្លើយល្អក្នុងរយៈពេល៣០វិនាទី នោះតម្រូវឲ្យមានការរៀបចំល្អនិងចេះទប់ចិត្តមិននិយាយវែងពេក។ ប៉ុន្តែការធ្វើដូច្នោះគឺជាការបង្ហាត់បង្រៀនល្អសម្រាប់យើង។ ម្យ៉ាងទៀត នេះក៏ទុកពេលឲ្យបងប្អូនឯទៀតឆ្លើយនូវអ្វីដែលគាត់បានស្រាវជ្រាវផ្ទាល់ខ្លួនដែរ។
៤ សុន្ទរកថាទី១: រយៈពេលសម្រាប់អំណានគម្ពីរបានត្រូវកាត់បន្ថយមកត្រឹមបីនាទី ឬខ្លីជាង ហើយអ្នកអាននឹងអានតិចជាងមុន។ បងប្អូនដែលបានទទួលសុន្ទរកថានោះគួរហាត់អានឲ្យបានច្រើនដង ដោយអានឲ្យឮៗ ហើយអានពាក្យយ៉ាងត្រឹមត្រូវនិងច្បាស់ៗ ព្រមទាំងអានឲ្យបានស្ទាត់ ដើម្បីឲ្យអ្នកស្ដាប់យល់គំនិតនិងអារម្មណ៍នៃអំណាននោះ។ រាស្ត្ររបស់ព្រះយេហូវ៉ាទាំងអស់គួរព្យាយាមអានឲ្យបានល្អ ដោយសារការអានមានតួនាទីសំខាន់ក្នុងការគោរពប្រណិប័តន៍របស់យើង។ យើងពិតជាសប្បាយចិត្តណាស់ដែលកូនៗជាច្រើនចេះអានយ៉ាងល្អ! យើងក៏សូមសរសើរឪពុកម្ដាយដែលបង្ហាញសេចក្ដីស្រឡាញ់ ដោយខំព្យាយាមជួយបង្រៀនកូនរបស់ខ្លួនឲ្យចេះអានបានល្អ។
៥ សុន្ទរកថាទី២: សុន្ទរកថានេះនឹងត្រូវថ្លែងក្នុងរយៈពេលប្រាំនាទី ដោយបងប្អូនស្រី។ ពួកគាត់នឹងថ្លែងតាមប្រធានបទដែលពួកគាត់បានទទួល។ បើសុន្ទរកថាមានមូលដ្ឋានពីសៀវភៅស្តើងដំណឹងល្អ ឬបើគ្មានប្រភពឯកសារយោងទេ អ្នកថ្លែងគួរជ្រើសរើសលំដាប់រៀបចំដែលទាក់ទងនឹងកិច្ចបម្រើផ្សាយដែលបង្ហាញអំពីស្ថានភាពពិតប្រាកដ និងដែលមានប្រយោជន៍សម្រាប់តំបន់ផ្សាយ។ បើសុន្ទរកថាមានមូលដ្ឋានពីសៀវភៅសូមស្ដាប់គ្រូដ៏ល្អប្រសើរ អ្នកថ្លែងគួរថ្លែងតាមរបៀបដែលជួយសិស្សគម្ពីរឲ្យរីកចម្រើនក្នុងការគោរពប្រណិប័តន៍ព្រះ។ អ្នកថ្លែងក៏អាចលើកបញ្ជាក់បទគម្ពីរបន្ថែមដែលទាក់ទងនឹងប្រធានបទនោះដែរ។ អ្នកត្រួតពិនិត្យសាលាជាអ្នកជ្រើសរើសអ្នកជំនួយសម្រាប់អ្នកថ្លែង។
៦ សុន្ទរកថាទី៣: សុន្ទរកថានេះនឹងត្រូវថ្លែងក្នុងរយៈពេលប្រាំនាទី ដោយបងប្រុសឬបងស្រីក៏បាន។ ពេលបងប្អូនស្រីថ្លែងសុន្ទរកថានេះគួរថ្លែងតាមការណែនាំដូចសុន្ទរកថាទី២ដែរ។ ពេលបងប្អូនប្រុសថ្លែងសុន្ទរកថានេះ បើប្រភពព័ត៌មានមកពីសៀវភៅសូមស្ដាប់គ្រូដ៏ល្អប្រសើរ នោះគាត់គួរថ្លែងដោយគិតអំពីបងប្អូន។ សិស្សគួរថ្លែងនិងជ្រើសរើសបទគម្ពីរដែលស្របតាមប្រធានបទ ព្រមទាំងប្រាប់អំពីមេរៀនដែលបានរៀនពីប្រធានបទនោះ។
៧ ការណែនាំថ្មីក្នុងសុន្ទរកថាទី៣សម្រាប់បងប្អូនប្រុស: បើសុន្ទរកថាមានមូលដ្ឋានពីសៀវភៅស្តើងដំណឹងល្អ ឬគ្មានប្រភពឯកសារយោងទេ នោះអ្នកថ្លែងគួរធ្វើការសម្ដែងវិញ ដោយសម្ដែងជាការគោរពប្រណិប័តន៍ក្នុងក្រុមគ្រួសារ ឬក្នុងកិច្ចបម្រើផ្សាយ។ ជាធម្មតាអ្នកត្រួតពិនិត្យសាលានឹងជ្រើសរើសអ្នកជំនួយនិងលំដាប់រៀបចំឲ្យអ្នកថ្លែង។ អ្នកជំនួយសុន្ទរកថា គួរជាសមាជិកនៃក្រុមគ្រួសាររបស់អ្នកថ្លែង ឬក៏ជាបងប្អូនប្រុសក្នុងក្រុមជំនុំ។ អ្នកថ្លែងក៏អាចលើកបញ្ជាក់គោលការណ៍គម្ពីរបន្ថែមដែលទាក់ទងនឹងប្រធានបទក្នុងការសម្ដែងនោះដែរ។ ម្ដងម្កាលអ្នកចាស់ទុំនឹងត្រូវសុំឲ្យថ្លែងសុន្ទរកថានេះ។ ប៉ុន្តែ អ្នកចាស់ទុំអាចជ្រើសរើសអ្នកជំនួយនិងលំដាប់រៀបចំដោយខ្លួនឯងបាន។ ពិតជានឹងលើកទឹកចិត្តបងប្អូនក្នុងក្រុមជំនុំណាស់ បើពួកគាត់ឃើញអ្នកចាស់ទុំធ្វើការសម្ដែងនូវរបៀបដែលគាត់បង្រៀនសមាជិកក្រុមគ្រួសារ ឬបងប្អូនប្រុសណាម្នាក់។
៨ ឱវាទ: ក្រោយពីសុន្ទរកថានីមួយៗ អ្នកត្រួតពិនិត្យសាលានឹងចំណាយពេលពីរនាទីសម្រាប់សិស្សម្នាក់ៗ ដើម្បីសរសើរនិងជូនឱវាទដែលមានមូលដ្ឋានពីកូនសៀវភៅវិធីបង្កើនសមត្ថភាពនិយាយនិងបង្រៀន។ ពេលអ្នកត្រួតពិនិត្យសាលាសុំសិស្សដែលមានសុន្ទរកថាឲ្យឡើងថ្លែង នោះគាត់នឹងមិនប្រាប់អំពីចំណុចហាត់រៀនដែលសិស្សនោះកំពុងធ្វើតាមទេ។ ប៉ុន្តែ បន្ទាប់ពីសិស្សម្នាក់ៗថ្លែងចប់ហើយ អ្នកត្រួតពិនិត្យគួរសរសើរសិស្សយ៉ាងស្មោះ ហើយប្រាប់អំពីចំណុចហាត់រៀនដែលសិស្សកំពុងធ្វើតាម។ អ្នកត្រួតពិនិត្យនឹងប្រាប់យ៉ាងចំៗនូវចំណុចដែលសិស្សធ្វើបានល្អ ឬគាត់ពន្យល់ដោយចិត្តសប្បុរសនូវមូលហេតុដែលសិស្សគួរហាត់រៀនចំណុចនោះម្ដងទៀតនៅសុន្ទរកថាលើកក្រោយ។
៩ សិស្សអាចមើលឱវាទសម្រាប់ការហាត់និយាយពីកូនសៀវភៅរបស់គាត់ផ្ទាល់ គឺកូនសៀវភៅវិធីបង្កើនសមត្ថភាព ទំព័រ៨និង៩។ ក្រោយពីសិស្សថ្លែងសុន្ទរកថាចប់ហើយ អ្នកត្រួតពិនិត្យសាលានឹងសរសេរកំណត់ក្នុងកូនសៀវភៅឬក្រដាសឱវាទរបស់សិស្ស។ អ្នកត្រួតពិនិត្យសាលាក៏អាចសរសើរនិងជូនយោបល់ថែមទៀតដល់សិស្ស បន្ទាប់ពីកិច្ចប្រជុំចប់ ឬនៅពេលផ្សេងទៀតក៏បាន។ សិស្សម្នាក់ៗគួរចាត់ទុកឱវាទដែលគាត់បានទទួលនៅសាលាកិច្ចបម្រើផ្សាយ គឺជាឱកាសដែលជួយគាត់ឲ្យជឿនទៅមុខក្នុងការបម្រើព្រះ។—១ធី. ៤:១៥
១០ បើសិស្សថ្លែងលើសម៉ោង អ្នកត្រួតពិនិត្យសាលាឬអ្នកជូនឱវាទរងគួរធ្វើសញ្ញាដល់សិស្ស ដូចជាចុចកណ្ដឹងជាដើម ដើម្បីឲ្យសិស្សដឹងថាហួសម៉ោងហើយ។ សិស្សគួរដឹងសញ្ញានោះ ហើយនិយាយបញ្ចប់ឃ្លា រួចត្រឡប់មកកន្លែងអង្គុយវិញ (សូមមើលកូនសៀវភៅវិធីបង្កើនសមត្ថភាព ទំ. ៨៤ វ. ២៤)។
១១ អស់អ្នកដែលមានគុណសម្បត្ដិគ្រប់គ្រាន់ បានត្រូវលើកទឹកចិត្តឲ្យចុះឈ្មោះក្នុងសាលាកិច្ចបម្រើផ្សាយ។ ការអប់រំដែលសាលានេះបានផ្ដល់ឲ្យ នឹងជួយរាស្ត្ររបស់ព្រះយេហូវ៉ាឲ្យផ្សព្វផ្សាយនិងបង្រៀនដំណឹងល្អអំពីរាជាណាចក្រដោយភាពជឿជាក់ ដោយភាពថ្លៃថ្នូរ និងដោយសេចក្ដីស្រឡាញ់។ ព្រះយេហូវ៉ាច្បាស់ជាសប្បាយចិត្តណាស់ ដោយបានទទួលសេចក្ដីសរសើរពីអស់អ្នកដែលកំពុងទទួលប្រយោជន៍យ៉ាងច្រើនពីសាលាកិច្ចបម្រើផ្សាយ!—ទំនុក. ១៤៨:១២, ១៣; អេ. ៥០:៤
[រូបភាពនៅទំព័រ៤]
ចូរជឿនទៅមុខដោយទទួលនិងធ្វើតាមឱវាទ