ការរៀបចំជាមុន នោះនាំឲ្យមានអំណរ
១ ការរួមចំណែកក្នុងកិច្ចផ្សព្វផ្សាយនាំឲ្យយើងមានអំណរខ្លាំង។ (ទំនុកដំកើង ៨៩:១៥, ១៦) ពិតមែនហើយ ការរៀបចំគឺជាលក្ខណៈសំខាន់មួយក្នុងការមានសមត្ថភាពពិសោធន៍អំណរនោះឲ្យពេញលេញ។ បើសិនជាយើងរៀបចំល្អ យើងនឹងបានសម្រេចច្រើនឡើង ហើយបើសិនជាយើងបានសម្រេចច្រើនឡើង នោះយើងក៏រឹតតែមានអំណរច្រើនឡើងដែរ។
២ ប្រើឧបករណ៍ដែលបានត្រូវផ្ដល់ឲ្យ: ចាប់ផ្ដើមរៀបចំ ដោយអាននិងពិនិត្យមើលពត៌មានក្នុងឯកសារកិច្ចបំរើព្រះរាជាណាចក្រយើង។ ជារឿយៗ ឯកសារនោះផ្ដល់ឲ្យវិធីនិយាយសម្ដែងដែលបានត្រូវរៀបចំបានល្អ ហើយបានត្រូវគ្រោងឡើងដើម្បីជួយអ្នកជូនសារព្រះរាជាណាចក្រ តាមរបៀបស្រួលនិងដែលមានប្រសិទ្ធិភាព។ អ្នកក៏នឹងរកឃើញឧទាហរណ៍ពីរបៀបដោះស្រាយជំទាស់ធម្មតា។ គំនិតជាក់លាក់ត្រូវផ្ដល់ឲ្យ អំពីរបៀបធ្វើការត្រឡប់ទៅជួបដែលមានប្រសិទ្ធិភាព ដោយមានគោលបំណងផ្ដើមការសិក្សាព្រះគម្ពីរ។ អ្នកមានសេរីភាពកែឆ្នៃយោបល់ទាំងនេះដើម្បីឲ្យអ្នកប្រើយ៉ាងស្រួល។ បន្ថែមទៅទៀត ក្នុងភាសាខ្លះ យើងមានសៀវភៅការវែកញែក ដែលផ្ដល់ឲ្យយោបល់ផ្សេងៗជាច្រើនពីពាក្យលំនាំព្រមទាំងពាក្យតបឆ្លើយ ចំពោះសំដីដែលរារាំងការសន្ទនា ហើយដូច្នេះជួយយើងមានប្រសិទ្ធិភាពកាន់តែច្រើនក្នុងស្ថានភាពជាច្រើនដែលយើងប្រឈម។
៣ មើលក្នុងប្រកាសនវត្ថុណាដែលអ្នកចង់ផ្ដល់ ហើយជ្រើសរើសចំណុចមួយឬពីរដ៏ចាប់អារម្មណ៍ដែលអ្នកអាចបង្ហាញម្ចាស់ផ្ទះ។ ពត៌មានដែលធ្វើឲ្យគិតពិចារណា ដែលយើងបានឮផ្សាយឬក៏បានអាន នោះប្រហែលជាអាចឲ្យយើងមានពាក្យផ្ដើមដើម្បីសន្ទនា។ ត្រៀមសំរាប់ការជំទាស់ធម្មតាដែលអ្នកប្រហែលជានឹងប្រឈម ហើយរៀបចំគំនិតពីរបីអំពីរបៀបដែលយើងប្រហែលជាអាចតបឆ្លើយ។ ក្រោយនោះ ឆ្លៀតយកពីរបីនាទីដើម្បីហាត់និយាយអ្វីដែលអ្នកនឹងនិយាយពេលជួបគេនៅផ្ទះ។
៤ ចូលរួមប្រជុំអប់រំកិច្ចបំរើទាំងអស់: ស្ដាប់ដោយយកចិត្តទុកដាក់ក្នុងរយៈពេលប្រជុំអប់រំកិច្ចបំរើ នៅពេលដែលយោបល់ពីឯកសារកិច្ចបំរើព្រះរាជាណាចក្រយើងត្រូវពិគ្រោះ សើរើ ហើយសម្ដែង។ កត់សម្គាល់នូវគំនិតណាដែលអ្នកគិតថាអាចត្រូវបញ្ចូលក្នុងវិធីនិយាយសម្ដែងរបស់អ្នក។ នឹកចាំពីស្ថានភាពខ្លះៗដែលអ្នកធ្លាប់ប្រឈមក្នុងកិច្ចបំរើ ហើយគិតពីរបៀបដែលអ្នកអាចផ្សព្វផ្សាយដោយមានប្រសិទ្ធិភាពកាន់តែច្រើន។ និយាយអំពីរឿងទាំងនេះមុនកិច្ចប្រជុំ និងក្រោយកិច្ចប្រជុំជាមួយអ្នកផ្សាយដទៃទៀត។
៥ អ្នកអាចប្រាកដថា បើសិនជាអ្នក«បានរៀបចំ សំរាប់ការល្អគ្រប់ជំពូក» នោះអ្នកនឹងទទួលរង្វាន់ជាអំណរកាន់តែច្រើនឡើង ហើយការជោគជ័យក្នុងការជួយអ្នកដទៃរកផ្លូវទៅដល់ជីវិត។—ធីម៉ូថេទី២ ២:២១