ចូរយកចិត្តទុកដាក់យ៉ាងស្មោះចំពោះអ្នកឯទៀត ដោយចេះសួរសំណួរនិងចេះស្ដាប់
១ មនុស្សភាគច្រើនចូលចិត្តបញ្ចេញទស្សនៈរបស់ខ្លួន ប៉ុន្តែមិនចូលចិត្តឲ្យគេស្តីប្រដៅឬជជីកសួរទេ។ ហេតុដូច្នេះ ដោយសារយើងជាគ្រីស្ទានដែលធ្វើកិច្ចបំរើផ្សាយ យើងត្រូវរៀនរបៀបសួរសំណួរដើម្បីឲ្យដឹងអំពីទស្សនៈរបស់គេដោយប៉ិនប្រសប់។—សុ. ២០:៥
២ សំណួររបស់យើងគួរលើកទឹកចិត្តពួកគេឲ្យបញ្ចេញទស្សនៈខ្លួន មិនមែនធ្វើឲ្យគេមានអារម្មណ៍មិនស្រួលនោះទេ។ ពេលផ្សព្វផ្សាយពីផ្ទះមួយទៅផ្ទះមួយ បងប្រុសម្នាក់សួរថា៖ «តើលោកអ្នកគិតថានឹងមានពេលមួយដែលមនុស្សប្រព្រឹត្តនឹងគ្នាទៅវិញទៅមកដោយសេចក្ដីថ្លៃថ្នូរនិងការគោរពឬទេ?» អាស្រ័យទៅលើចម្លើយ គាត់បន្តទៀតថា៖ «តើលោកអ្នកគិតថាគេត្រូវការអ្វីដើម្បីសំរេចការនេះ?» ឬ«តើហេតុអ្វីបានជាលោកអ្នកមានអារម្មណ៍យ៉ាងនេះ?»។ ពេលធ្វើបន្ទាល់ក្រៅផ្លូវការឬធ្វើបន្ទាល់នៅកន្លែងសាធារណៈ បងប្រុសម្នាក់ទៀតសួរសំណួរអ្នកដែលមានកូនថា៖ «ជាមាតាបិតា តើអ្វីដែលធ្វើឲ្យលោកអ្នកសប្បាយរីករាយបំផុតនោះ?» បន្ទាប់មកគាត់សួរថា៖ «តើអ្វីដែលជាកង្វល់កង្វាយដ៏ធំបំផុតរបស់លោកអ្នក?» សូមកត់សំគាល់ថាសំណួរទាំងនេះអនុញ្ញាតឲ្យគេបញ្ចេញទស្សនៈដោយមិនធ្វើឲ្យគេមានអារម្មណ៍មិនស្រួលឬខ្មាសអៀនឡើយ។ ដោយហេតុថាកាលៈទេសៈតែងខុសគ្នា យើងប្រហែលជាត្រូវកែប្រែប្រធានបទនិងរបៀបសួរសំណួរដើម្បីឲ្យស្របទៅតាមកាលៈទេសៈក្នុងតំបន់ផ្សាយរបស់យើង។
៣ ការសួរសំណួរដើម្បីឲ្យដឹងពីទស្សនៈរបស់គេ: ប្រសិនបើគេស្ម័គ្រចិត្តប្រាប់ពីគំនិតរបស់គេ សូមអត់ធ្មត់ស្ដាប់ដោយឥតកាត់សំដីដោយមិនចាំបាច់ឡើយ។ (យ៉ា. ១:១៩) សូមទទួលយោបល់គាត់ដោយពាក្យសំដីទន់ភ្លន់ផង។ (កូល. ៤:៦, ខ.ស.) អ្នកអាចនិយាយថា៖ «នោះគួរឲ្យចាប់អារម្មណ៍មែន! អរគុណដែលបានប្រាប់ខ្ញុំ»។ សូមសរសើរគាត់ដោយស្មោះបើសមគួរ។ សូមសួរដោយស្លូតនូវសំណួរបន្ថែមដើម្បីឲ្យដឹងថាគាត់មានគំនិតយ៉ាងណាហើយហេតុអ្វីបានជាគាត់មានអារម្មណ៍យ៉ាងនេះ។ សូមខំរកចំណុចដែលអ្នកទាំងពីរយល់ស្របគ្នា។ កាលណាអ្នកចង់ទាញអារម្មណ៍គាត់ទៅលើបទគម្ពីរណាមួយ អ្នកអាចនិយាយថា៖ «តើលោកអ្នកធ្លាប់បានគិតអំពីចំណុចនេះឬទេ?»។ កុំនិយាយម៉ឺងម៉ាត់ឬនិយាយដូចជាចង់ឈ្លោះប្រកែកនឹងគាត់នោះឡើយ។—២ធី. ២:២៤, ២៥
៤ របៀបដែលអ្នកឯទៀតឆ្លើយនឹងសំណួររបស់យើងប្រហែលច្រើនតែអាស្រ័យទៅលើរបៀបដែលយើងស្ដាប់។ បើយើងស្ដាប់ដោយស្មោះអស់ពីចិត្ត នោះគេអាចដឹងបាន។ អ្នកធ្វើដំណើរត្រួតពិនិត្យម្នាក់បានកត់សំគាល់ថា៖ «កាលណាអ្នកបង្ហាញថាអ្នកស្ម័គ្រចិត្តស្ដាប់ដោយអត់ធ្មត់នោះ នេះមានឥទ្ធិពលអាចទាក់ទាញចិត្តជាខ្លាំង ហើយក៏បង្ហាញថាអ្នកយកចិត្តទុកដាក់នឹងរូបគាត់ដោយមានភាពកក់ក្ដៅទៀតផង»។ បើយើងចេះស្ដាប់អ្នកឯទៀត នោះយើងផ្ដល់សេចក្ដីថ្លៃថ្នូរឲ្យគេ ហើយនេះអាចជំរុញចិត្តគេឲ្យស្ដាប់ដំណឹងល្អដែលយើងខិតខំផ្សព្វផ្សាយ។—រ៉ូម ១២:១០