‹សូមឲ្យបំណងប្រាថ្នារបស់ព្រះបានសម្រេច›
១. តើអ្វីជាប្រធានបទនៃកម្មវិធីសន្និបាតពិសេសរបស់យើងសម្រាប់ឆ្នាំកិច្ចបម្រើ២០១២? ហើយហេតុអ្វីជាការសមត្រឹមត្រូវដែលយើងពិចារណាអំពីប្រធានបទនេះ?
១ យើងបានត្រូវបង្កើតមកដោយសារបំណងប្រាថ្នារបស់ព្រះយេហូវ៉ា។ (បប. ៤:១១) ហេតុនេះ យើងមិនអាចសម្រេចគោលដៅនៃជីវិតរបស់យើងបានទេ បើយើងមិនរៀនអំពីបំណងប្រាថ្នារបស់ព្រះហើយមិនធ្វើតាមបំណងប្រាថ្នានោះ។ នេះមិនមែនងាយស្រួលដូចយើងនឹកស្មានទេ ពីព្រោះយើងត្រូវតយុទ្ធនឹងទំនោរចិត្តដែលចង់«ធ្វើអ្វីៗតាមបំណងប្រាថ្នារបស់រូបកាយ» ហើយ«ធ្វើតាមគំនិតរបស់យើង» ឬធ្វើ«តាមបំណងប្រាថ្នារបស់ពិភពលោកនេះ»។ (អេភ. ២:៣; ១ពេ. ៤:៣; ២ពេ. ២:១០) បើគ្មានជំនួយពីព្រះទេ យើងប្រហែលជាត្រូវមេកំណាច«ចាប់ . . . ទាំងរស់ដើម្បីឲ្យបំពេញបំណងប្រាថ្នារបស់វា»។ (២ធី. ២:២៦) កម្មវិធីសន្និបាតពិសេសរបស់យើងសម្រាប់ឆ្នាំកិច្ចបម្រើ២០១២នឹងជួយយើងម្នាក់ៗឲ្យប្រព្រឹត្តសមស្របតាមសំណូមពរទី៣ក្នុងចំណោមសំណូមពរសំខាន់ៗនៅក្នុងសេចក្ដីអធិដ្ឋានគំរូរបស់លោកយេស៊ូ ពោលគឺ«សូមឲ្យបំណងប្រាថ្នារបស់លោកបានសម្រេច»។—ម៉ាថ. ៦:៩, ១០
២. តើសំណួរអ្វីខ្លះដែលនឹងត្រូវឆ្លើយក្នុងអំឡុងពេលកម្មវិធីសន្និបាត?
២ សំណួរដែលនឹងត្រូវឆ្លើយនៅសន្និបាត: កាលដែលអ្នកស្ដាប់កម្មវិធីសន្និបាត សូមរកចម្លើយចំពោះសំណួរទាំងនេះ: ក្រៅពីស្ដាប់បណ្ដាំរបស់ព្រះ តើមានអ្វីទៀតសំខាន់ដែលយើងត្រូវធ្វើ? តើតាមរបៀបណាដែលយើងអាចបន្តយល់ថាព្រះមានបំណងប្រាថ្នាអ្វីសម្រាប់យើង? ហេតុអ្វីយើងត្រូវសុខចិត្តជួយមនុស្សគ្រប់ប្រភេទ? តើតាមរបៀបណាដែលយើងអាចមានជីវិតដ៏សប្បាយនិងគាប់ចិត្ត? ចំពោះមនុស្សវ័យក្មេង តើអ្នកត្រូវបញ្ជាក់ឲ្យព្រះយេហូវ៉ាឃើញអ្វី? តើការធ្វើតាមបំណងប្រាថ្នារបស់ព្រះនាំឲ្យមានពរអ្វីខ្លះ? ហេតុអ្វីគឺជាការបន្ទាន់ដែលយើងលើកទឹកចិត្តអ្នកឯទៀត?
៣. តើតាមរបៀបណាដែលយើងអាចទទួលប្រយោជន៍យ៉ាងពេញលេញពីកម្មវិធីសន្និបាតពិសេសនេះ?
៣ សូមធ្វើយ៉ាងណាដើម្បីឲ្យបានចូលរួមហើយស្ដាប់កម្មវិធីសន្និបាតដោយយកចិត្តទុកដាក់។ អ្នកតំណាងបេតអែលឬអ្នកធ្វើដំណើរត្រួតពិនិត្យទំនងជានឹងមកក្នុងនាមជាអ្នកថ្លែងដែលជាភ្ញៀវ។ មុននឹងក្រោយកម្មវិធី អ្នកអាចនិយាយជាមួយនឹងគាត់ បើគាត់រៀបការហើយអ្នកក៏អាចនិយាយជាមួយប្រពន្ធគាត់ដែរ។ ពេលដែលអ្នកត្រឡប់ទៅផ្ទះវិញ សូមកុំក្លាយទៅជា«អ្នកដែលឮរួចភ្លេចទៅវិញ» តែសូមមើលឡើងវិញជាមួយក្រុមគ្រួសារនូវកម្មវិធីសន្និបាត ហើយពិភាក្សាគ្នាអំពីរបៀបដែលអ្នកអាចប្រព្រឹត្តស្របតាមបំណងរបស់ព្រះឲ្យកាន់តែពេញលេញជាង។—យ៉ា. ១:២៥
៤. ហេតុអ្វីគឺជាការសំខាន់ដែលយើងចាត់ទុកការធ្វើតាមបំណងប្រាថ្នារបស់ព្រះជាអាទិភាពរបស់យើង?
៤ មិនយូរទៀតពួកអ្នកដែលកំពុងខំប្រឹងធ្វើតាមបំណងប្រាថ្នារបស់ខ្លួន ហើយមិនព្រមធ្វើតាមបំណងប្រាថ្នារបស់ព្រះយេហូវ៉ា នឹងត្រូវបំផ្លាញចោល។ (១យ៉ូន. ២:១៧) ហេតុនេះ យើងពិតជាអរគុណព្រះយេហូវ៉ាដែលបានរៀបចំព័ត៌មានដែលត្រូវពេលនេះដើម្បីជួយយើងឲ្យចាត់ទុកការធ្វើតាមបំណងប្រាថ្នារបស់ព្រះជាអាទិភាពរបស់យើង!