បណ្ដាំរបស់ព្រះមានឫទ្ធានុភាព
១. តើសន្និបាតពិសេសសម្រាប់ឆ្នាំកិច្ចបម្រើ២០១៤មានប្រធានអ្វី?
១ ផ្ទុយពីស្នាដៃរបស់មនុស្សមិនល្អឥតខ្ចោះ គម្ពីរមានឫទ្ធានុភាពកែប្រែជីវិតយើង នាំឲ្យយើងមានចិត្តគំនិតនិងរបៀបរស់នៅស្របតាមបំណងប្រាថ្នារបស់ព្រះយេហូវ៉ា។ តើបណ្ដាំរបស់ព្រះមានឫទ្ធានុភាពខ្លាំងដល់កម្រិតណា? តើតាមរបៀបណាយើងអាចប្រើឫទ្ធានុភាពរបស់បណ្ដាំព្រះយ៉ាងពេញលេញក្នុងជីវិតរបស់យើង? ដើម្បីជួយអ្នកឯទៀត តើយើងអាចប្រើបណ្ដាំព្រះឲ្យមានប្រសិទ្ធភាពថែមទៀតតាមរបៀបណា? យើងមានទំនុកចិត្តថាបងប្អូនទាំងអស់គ្នានឹងពង្រឹងជំនឿឡើង ពេលដែលចំណុចទាំងនេះនឹងត្រូវពិចារណានៅកម្មវិធីសន្និបាតពិសេស ដែលបានរៀបចំសម្រាប់ឆ្នាំកិច្ចបម្រើ២០១៤។ កម្មវិធីនេះមានប្រធានថា «បណ្ដាំរបស់ព្រះមានឫទ្ធានុភាព» ដែលមានមូលដ្ឋានលើហេប្រឺ ៤:១២។
២. នៅពេលយើងស្ដាប់កម្មវិធីសន្និបាត តើយើងគួររកចម្លើយចំពោះសំណួរអ្វីខ្លះ?
២ ស្វែងរកចម្លើយចំពោះសំណួរទាំងនេះ: នៅពេលដែលអ្នកស្ដាប់កម្មវិធីសន្និបាត សូមកត់កំណត់អំពីចម្លើយនៃសំណួរដូចខាងក្រោម:
• ហេតុអ្វីយើងគួរមានទំនុកចិត្តទៅលើបណ្ដាំរបស់ព្រះយេហូវ៉ា? (ទំនុក. ២៩:៤)
• តើយើងអាចឲ្យឫទ្ធានុភាពនៃបណ្ដាំរបស់ព្រះមានឥទ្ធិពលមកលើជីវិតយើងយ៉ាងដូចម្ដេច? (ទំនុក. ៣៤:៨)
• តើអ្នកអាចសឲ្យឃើញឫទ្ធានុភាពនៃបណ្ដាំរបស់ព្រះក្នុងកិច្ចបម្រើផ្សាយរបស់អ្នកយ៉ាងដូចម្ដេច? (២ធី. ៣:១៦, ១៧)
• តើតាមរបៀបណាយើងអាចជៀសវាងពីការធ្លាក់ចូលក្រោមអំណាចនៃពិភពលោករបស់សាថាន? (១យ៉ូន. ៥:១៩)
• ជាយុវវ័យម្នាក់ តើតាមរបៀបណាអ្នកអាចជោគជ័យក្នុងកិច្ចបម្រើព្រះ? (យេ. ១៧:៧)
• តើតាមរបៀបណាយើងអាចមានកម្លាំងខ្លាំងក្លា ទោះជាយើងជាមនុស្សទន់ខ្សោយក្ដី? (២កូ. ១២:១០)
• តើយើងត្រូវការអ្វីជាចាំបាច់ដើម្បីបន្តកែតម្រង់ខ្លួន សូម្បីតែយើងមានទម្លាប់និងចិត្តគំនិតអាក្រក់តាំងពីយូរមកហើយក្ដី? (អេភ. ៤:២៣)
៣. ក្រៅពីការស្ដាប់កម្មវិធីសន្និបាត តើយើងអាចទទួលប្រយោជន៍អ្វីទៀតពីសន្និបាតពិសេស?
៣ យើងនឹងទទួលប្រយោជន៍ជាច្រើនពីការស្ដាប់ព័ត៌មានដ៏សំខាន់នេះ! បន្ថែមទៅទៀត ដូចសន្និបាតប្រចាំមណ្ឌលនិងមហាសន្និបាតប្រចាំតំបន់ដែរ សន្និបាតពិសេសនោះនឹងផ្ដល់ឱកាសឲ្យយើងបើកចិត្តឲ្យទូលាយ ហើយរីករាយនឹងការសេពគប់ជាមួយបងប្អូនប្រុសស្រីពីក្រុមជំនុំផ្សេងៗទៀត។ (ទំនុក. ១៣៣:១-៣; ២កូ. ៦:១១-១៣) ដូច្នេះសូមទុកពេលដើម្បីសេពគប់ជាមួយមិត្តភក្ដិចាស់ និងរកមិត្តភក្ដិថ្មី។ បើមានអ្នកថ្លែងដែលជាភ្ញៀវ ដូចជាអ្នកត្រួតពិនិត្យប្រចាំតំបន់ ឬបងប្រុសពីបេតអែលដែលបានត្រូវឲ្យមកចូលរួមនៅសន្និបាតពិសេសរបស់អ្នក សូមឆ្លៀតឱកាសដើម្បីស្វាគមន៍គាត់និងប្រពន្ធរបស់គាត់។ ពិតណាស់ យើងមានមូលហេតុជាច្រើនដើម្បីទន្ទឹងចាំថ្ងៃសន្និបាតពិសេសនោះមកដល់!