ចំណេះវិសេសពីបណ្ដាំរបស់ព្រះ | និក្ខមនំ ១០-១១

ម៉ូសេនិងអេរ៉ុនបង្ហាញចិត្តក្លាហានដ៏អស្ចារ្យ

១០:៣-៦, ២៤-២៦, ២៨; ១១:៤-៨

ម៉ូសេនិងអេរ៉ុនបានបង្ហាញចិត្តក្លាហាននិងចិត្តអង់អាចដ៏អស្ចារ្យ ពេលនិយាយទៅកាន់ផារ៉ូ ដែលនៅពេលនោះគឺជាបុគ្គលដែលមានអំណាចខ្លាំងបំផុតក្នុងពិភពលោក។ តើអ្វីបានជួយពួកគេឲ្យធ្វើដូច្នោះ? គម្ពីរចែងអំពីម៉ូសេថា៖ «ដោយសារជំនឿ គាត់ចេញពីស្រុកអេស៊ីប ប៉ុន្តែមិនមែនដោយខ្លាចសេចក្ដីក្រោធរបស់ស្ដេចទេ ព្រោះគាត់បន្តស៊ូទ្រាំយ៉ាងអត់ធ្មត់ ហាក់ដូចជាមើលឃើញលោកដែលមនុស្សមើលពុំឃើញ»។ (ហេ. ១១:២៧) ម៉ូសេនិងអេរ៉ុនមានជំនឿដ៏រឹងមាំទៅលើព្រះយេហូវ៉ា ហើយបានពឹងផ្អែកទៅលើលោក។

តើអ្នកអាចបង្ហាញជំនឿរបស់អ្នកដោយចិត្តក្លាហានទៅពួកអ្នកដែលមានអំណាចនៅក្នុងស្ថានភាពណាខ្លះ?

បណ្តុំរូបភាព: ស្តីអំពីស្ថានភាពដែលយើងអាចបង្ហាញចិត្តក្លាហាន។ ១. ក្មេងប្រុសម្នាក់កំពុងឈរស្ងៀមកាលដែលក្មេងៗឯទៀតឈរគោរពទង់ជាតិ។ ២. បងប្រុសម្នាក់កំពុងឈរនៅមុខតុលាការ។ ៣. ពេលផ្សព្វផ្សាយប្អូនប្រុសវ័យក្មេងម្នាក់កំពុងស្នើផ្តល់ខិត្តប័ណ្ណទៅម្ចាស់ផ្ទះកាលដែលប៉ូលិសកំពុងសង្កេតមើលនៅជិតៗនោះ។