អត្ថបទសិក្សា ៤៩
តើព្រះយេហូវ៉ានឹងតបឆ្លើយសេចក្ដីអធិដ្ឋានរបស់ខ្ញុំឬទេ?
«ពេលដែលអ្នករាល់គ្នាហៅរកខ្ញុំនិងអធិដ្ឋានមកខ្ញុំ ខ្ញុំនឹងស្ដាប់អ្នករាល់គ្នា»។—យេ. ២៩:១២
ចម្រៀងលេខ៤១ សូមលោកស្ដាប់ខ្ញុំអធិដ្ឋាន
សេចក្ដីសង្ខេបa
១-២. ហេតុអ្វីយើងប្រហែលជាមានអារម្មណ៍ថាព្រះយេហូវ៉ាមិនតបឆ្លើយសេចក្ដីអធិដ្ឋានរបស់យើង?
«អ្នកនឹងមានអំណរក្រៃលែងដោយសារព្រះយេហូវ៉ា ហើយលោកនឹងផ្ដល់ឲ្យអ្នកតាមដែលចិត្តអ្នកប្រាថ្នា»។ (ចសព. ៣៧:៤) នេះជាសេចក្ដីសន្យាដ៏អស្ចារ្យ! ប៉ុន្តែ តើយើងគួររំពឹងថាព្រះយេហូវ៉ានឹងឲ្យយើងភ្លាមៗនូវអ្វីទាំងអស់ដែលយើងសុំឬទេ? ហេតុអ្វីយើងសួរសំណួរនេះ? សូមគិតអំពីស្ថានភាពបន្តបន្ទាប់នេះ។ បងស្រីនៅលីវម្នាក់អធិដ្ឋានអំពីការចូលសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ។ ប៉ុន្តែច្រើនឆ្នាំបានកន្លងទៅ គាត់នៅតែមិនទទួលការអញ្ជើញឡើយ។ បងប្រុសវ័យក្មេងម្នាក់សុំព្រះយេហូវ៉ាធ្វើឲ្យគាត់ជាពីជំងឺធ្ងន់ធ្ងរម្យ៉ាង ដើម្បីគាត់អាចបម្រើក្នុងក្រុមជំនុំឲ្យបានច្រើនជាង។ ប៉ុន្តែ សុខភាពរបស់គាត់មិនបានល្អប្រសើរទេ។ ឪពុកម្ដាយគ្រិស្តសាសនិកអធិដ្ឋានឲ្យកូនរបស់ពួកគេនៅជាប់ក្នុងសេចក្ដីពិត។ ប៉ុន្តែកូនរបស់ពួកគេសម្រេចចិត្តឈប់បម្រើព្រះយេហូវ៉ា។
២ អ្នកក៏ប្រហែលជាបានសុំអ្វីមួយពីព្រះយេហូវ៉ាដែរ ប៉ុន្តែមិនទទួលទេ។ ជាលទ្ធផល អ្នកប្រហែលជាសន្និដ្ឋានថាព្រះយេហូវ៉ាតបឆ្លើយសេចក្ដីអធិដ្ឋានរបស់អ្នកខ្លះ ប៉ុន្តែមិនតបឆ្លើយសេចក្ដីអធិដ្ឋានរបស់អ្នក។ ឬអ្នកប្រហែលជាមានអារម្មណ៍ថាខ្លួនទំនងជាបានធ្វើអ្វីខុស។ បងស្រីម្នាក់ឈ្មោះចានអ៊ិសbមានអារម្មណ៍បែបនេះ។ គាត់និងប្ដីរបស់គាត់បានអធិដ្ឋានអំពីការចង់បម្រើនៅបេតអែល។ គាត់និយាយថា៖ «ខ្ញុំជឿជាក់ថាឆាប់ៗយើងនឹងបានបម្រើនៅបេតអែល»។ ក៏ប៉ុន្តែពីមួយខែទៅមួយខែ ពីមួយឆ្នាំទៅមួយឆ្នាំ ប្ដីប្រពន្ធនោះមិនទាន់បានទទួលការអញ្ជើញនៅឡើយទេ។ បងចានអ៊ិសនិយាយថា៖ «ខ្ញុំមានអារម្មណ៍ក្រៀមក្រំ ហើយច្របូកច្របល់។ ខ្ញុំឆ្ងល់ថាខ្ញុំបានធ្វើអ្វី បានជាព្រះយេហូវ៉ាខកចិត្តនឹងខ្ញុំ។ ខ្ញុំបានអធិដ្ឋានយ៉ាងច្រើនអំពីការបម្រើនៅបេតអែល។ ប៉ុន្តែម៉េចបានជាលោកមិនតបឆ្លើយសេចក្ដីអធិដ្ឋានរបស់ខ្ញុំ?»។
៣. តើយើងនឹងពិចារណាអ្វីខ្លះក្នុងអត្ថបទនេះ?
៣ ជួនកាល យើងប្រហែលជាឆ្ងល់ថាតើព្រះយេហូវ៉ាស្ដាប់សេចក្ដីអធិដ្ឋានរបស់យើងឬយ៉ាងណា។ សូម្បីតែបុរសខ្លះដែលជាអ្នកស្មោះត្រង់នៅសម័យបុរាណ ក៏ធ្លាប់ឆ្ងល់ដូច្នេះដែរ។ (យ៉ូប ៣០:២០; ចសព. ២២:២; ហាប. ១:២) តើអ្វីអាចធ្វើឲ្យអ្នកជឿជាក់ថាព្រះយេហូវ៉ានឹងតបឆ្លើយសេចក្ដីអធិដ្ឋានរបស់អ្នក? (ចសព. ៦៥:២) ដើម្បីឆ្លើយសំណួរនេះ យើងនឹងរកមើលចម្លើយចំពោះសំណួរបន្តបន្ទាប់នេះជាមុនសិន៖ (១) តើយើងអាចរំពឹងយ៉ាងណាពីព្រះយេហូវ៉ា? (២) តើព្រះយេហូវ៉ាតម្រូវអ្វីពីយើង? (៣) ហេតុអ្វីយើងប្រហែលជាត្រូវផ្លាស់ប្ដូរសំណូមពរខ្លះរបស់យើង?
តើយើងអាចរំពឹងយ៉ាងណាពីព្រះយេហូវ៉ា?
៤. យោងទៅតាមយេរេមា ២៩:១២ តើព្រះយេហូវ៉ាសន្យាថាលោកនឹងធ្វើអ្វី?
៤ ព្រះយេហូវ៉ាសន្យាថាលោកនឹងស្ដាប់សេចក្ដីអធិដ្ឋានរបស់យើង។ (សូមអាន យេរេមា ២៩:១២) ព្រះរបស់យើងស្រឡាញ់ពួកអ្នកគោរពប្រណិប័តន៍ដ៏ស្មោះត្រង់របស់លោក ដូច្នេះលោកនឹងមិនព្រងើយកន្តើយចំពោះសេចក្ដីអធិដ្ឋានរបស់ពួកគេទេ។ (ចសព. ១០:១៧; ៣៧:២៨) ប៉ុន្តែ នេះមិនមានន័យថាលោកនឹងធ្វើតាមសំណូមពរទាំងអស់របស់យើងឡើយ។ យើងប្រហែលជាត្រូវរង់ចាំរហូតដល់ពិភពលោកថ្មី ទើបយើងអាចទទួលតាមសំណូមពរខ្លះរបស់យើង។
៥. តើព្រះយេហូវ៉ាពិចារណាអ្វីពេលស្ដាប់សេចក្ដីអធិដ្ឋានរបស់យើង? សូមពន្យល់។
៥ ព្រះយេហូវ៉ាគិតអំពីរបៀបដែលសំណូមពររបស់យើងជាប់ទាក់ទងនឹងគោលបំណងរបស់លោក។ (អេ. ៥៥:៨, ៩) ផ្នែកមួយនៃគោលបំណងនោះរួមមានការធ្វើឲ្យផែនដីពោរពេញទៅដោយមនុស្សដែលស្ដាប់បង្គាប់លោកជាអ្នកគ្រប់គ្រងដោយស្ម័គ្រពីចិត្ត។ ប៉ុន្តែ សាថានអះអាងថាមនុស្សនឹងសប្បាយជាងបើពួកគេគ្រប់គ្រងខ្លួនឯង។ (ដក. ៣:១-៥) ដើម្បីបង្ហាញថាការអះអាងរបស់មេកំណាចគឺជាការកុហក ព្រះយេហូវ៉ាបានអនុញ្ញាតឲ្យមនុស្សគ្រប់គ្រងខ្លួនឯង។ ប៉ុន្តែការគ្រប់គ្រងរបស់មនុស្សបាននាំមកនូវបញ្ហាជាច្រើនដែលយើងមាននៅសព្វថ្ងៃនេះ។ (អទ. ៨:៩) យើងយល់ថាព្រះយេហូវ៉ានឹងមិនបំបាត់បញ្ហាទាំងអស់នោះនៅឥឡូវនេះទេ។ បើលោកធ្វើដូច្នេះ អ្នកខ្លះប្រហែលជាគិតថាមនុស្សគ្រប់គ្រងបានល្អ គឺថាការគ្រប់គ្រងរបស់មនុស្សអាចដោះស្រាយបញ្ហារបស់មនុស្សជាតិបាន។
៦. ហេតុអ្វីយើងត្រូវជឿជាក់ថាព្រះយេហូវ៉ានឹងតែងតែងធ្វើអ្វីដែលប្រកបដោយសេចក្ដីស្រឡាញ់និងយុត្តិធម៌?
៦ ព្រះយេហូវ៉ាប្រហែលជានឹងតបឆ្លើយសំណូមពរស្រដៀងគ្នាតាមរបៀបផ្សេងៗ។ ជាឧទាហរណ៍ ពេលស្ដេចហេសេគាបានធ្លាក់ខ្លួនឈឺធ្ងន់ គាត់បានអង្វរសុំព្រះយេហូវ៉ាឲ្យជួយគាត់ជាសះស្បើយ។ ព្រះយេហូវ៉ាបានធ្វើឲ្យគាត់ជាសះស្បើយមែន។ (២បស. ២០:១-៦) ផ្ទុយទៅវិញ ពេលសាវ័កប៉ូលបានអង្វរព្រះយេហូវ៉ាឲ្យដក«បន្លាមួយក្នុងសាច់ឈាម»ដែលប្រហែលជាបញ្ហាសុខភាព ព្រះយេហូវ៉ាមិនបានបំបាត់ចោលបញ្ហានោះទេ។ (២កូ. ១២:៧-៩) សូមគិតផងដែរអំពីគំរូរបស់សាវ័កពីរនាក់គឺយ៉ាកុបនិងពេត្រុស។ ស្ដេចហេរ៉ូឌចង់សម្លាប់ពួកគាត់ទាំងពីរ។ ក្រុមជំនុំបានអធិដ្ឋានឲ្យពេត្រុស ហើយទំនងជាអធិដ្ឋានឲ្យយ៉ាកុបផងដែរ។ ប៉ុន្តែយ៉ាកុបបានត្រូវគេសម្លាប់ ចំណែកឯពេត្រុសវិញ គាត់បានត្រូវសង្គ្រោះដោយអព្ភូតហេតុ។ (សកម្ម. ១២:១-១១) យើងប្រហែលជាឆ្ងល់ថា ‹ហេតុអ្វីព្រះយេហូវ៉ាសង្គ្រោះពេត្រុស តែមិនសង្គ្រោះយ៉ាកុបផង?›។ គម្ពីរមិនបានចែងទេ។c យើងអាចប្រាកដថាផ្លូវរបស់ព្រះយេហូវ៉ាគឺ«សុទ្ធតែយុត្តិធម៌»។ (បច. ៣២:៤) ម្យ៉ាងទៀត យើងដឹងថាទាំងពេត្រុសទាំងយ៉ាកុប បានទទួលការពេញចិត្តពីព្រះយេហូវ៉ា។ (បប. ២១:១៤) ជួនកាល យើងប្រហែលជាទទួលលទ្ធផលដែលយើងមិនបានរំពឹងទុក។ ប៉ុន្តែដោយសារយើងទុកចិត្តថាការតបឆ្លើយរបស់ព្រះយេហូវ៉ាចំពោះសេចក្ដីអធិដ្ឋានរបស់យើងនឹងតែងតែប្រកបដោយសេចក្ដីស្រឡាញ់និងយុត្តិធម៌ យើងនឹងមិនសង្ស័យអំពីរបៀបដែលលោកជ្រើសរើសដើម្បីតបឆ្លើយសេចក្ដីអធិដ្ឋានរបស់យើងឡើយ។—យ៉ូប ៣៣:១៣
៧. តើយើងព្យាយាមជៀសវាងពីអ្វី ហើយហេតុអ្វី?
៧ យើងព្យាយាមជៀសវាងពីការប្រៀបធៀបស្ថានភាពរបស់យើងទៅនឹងស្ថានភាពរបស់អ្នកឯទៀត។ ជាឧទាហរណ៍ យើងប្រហែលជាសុំព្រះយេហូវ៉ាឲ្យជួយយើងយ៉ាងជាក់លាក់ ប៉ុន្តែយើងមិនបានទទួលតាមសំណូមពររបស់យើងទេ។ ក្រោយមក យើងដឹងថាអ្នកផ្សេងបានធ្វើសំណូមពរស្រដៀងនឹងយើង ហើយមើលទៅព្រះយេហូវ៉ាបានតបឆ្លើយគាត់។ បងស្រីម្នាក់ឈ្មោះអាណាមានបទពិសោធន៍នេះ។ គាត់បានអធិដ្ឋានសុំឲ្យប្ដីគាត់ម៉ាធីយូជាពីជំងឺមហារីក។ នៅពេលដំណាលគ្នានោះ បងស្រីគ្រិស្តសាសនិកវ័យចាស់ពីរនាក់ក៏មានជំងឺមហារីកដែរ។ បងអាណាបានអធិដ្ឋានអស់ពីចិត្តឲ្យបងម៉ាធីយូនិងបងស្រីពីរនាក់នោះ។ បងស្រីទាំងនោះបានជាសះស្បើយ ប៉ុន្តែបងម៉ាធីយូបានស្លាប់។ ដំបូង បងអាណាបានឆ្ងល់ថា តើបងស្រីទាំងពីរនោះជាសះស្បើយ ដោយសារព្រះយេហូវ៉ាបានជួយពួកគាត់ឬយ៉ាងណា។ បើដូច្នេះ ហេតុអ្វីលោកមិនតបឆ្លើយសេចក្ដីអធិដ្ឋានរបស់គាត់ដែលសុំឲ្យប្ដីគាត់ជាសះស្បើយ? តាមពិត យើងមិនដឹងថាបងស្រីពីរនាក់នោះបានជាសះស្បើយដោយសារមូលហេតុអ្វីទេ។ អ្វីដែលយើងដឹងគឺថាព្រះយេហូវ៉ានឹងបំបាត់ចោលទុក្ខវេទនាទាំងអស់ ហើយលោកចង់ប្រោសមិត្តជាទីស្រឡាញ់របស់លោកដែលបានស្លាប់ឲ្យរស់ឡើងវិញ។—យ៉ូប ១៤:១៥
៨. (ក) យោងទៅតាមអេសាយ ៤៣:២ តើព្រះយេហូវ៉ាគាំទ្រយើងយ៉ាងដូចម្ដេច? (ខ) តើការអធិដ្ឋានអាចជួយយើងយ៉ាងដូចម្ដេចពេលយើងរងទុក្ខលំបាក? (សូមមើលវីដេអូសេចក្ដីអធិដ្ឋានជួយយើងឲ្យស៊ូទ្រាំ)
៨ ព្រះយេហូវ៉ានឹងតែងតែគាំទ្រយើង។ ក្នុងនាមជាបិតាដែលស្រឡាញ់យើង ព្រះយេហូវ៉ាមិនចង់ឃើញយើងឈឺចាប់ទេ។ (អេ. ៦៣:៩) ទោះជាយ៉ាងនោះក៏ដោយ លោកមិនការពារយើងពីទុក្ខលំបាកទាំងអស់ដែលអាចប្រៀបដូចជាទន្លេឬភ្លើងទេ។ (សូមអាន អេសាយ ៤៣:២) ប៉ុន្តែ លោកសន្យាថាលោកនឹងជួយយើងឲ្យ«ឆ្លងកាត់»ទុក្ខលំបាកទាំងនោះ។ ម្យ៉ាងទៀត មិនថាយើងមានទុក្ខលំបាកអ្វីនៅឥឡូវនេះក្ដី លោកនឹងធ្វើឲ្យប្រាកដថាយើងតែងតែអាចរក្សាចំណងមិត្តភាពជាមួយលោកឲ្យរឹងមាំ។ ព្រះយេហូវ៉ាក៏ឲ្យយើងនូវឫទ្ធានុភាពបរិសុទ្ធដ៏ខ្លាំងក្លារបស់លោកដើម្បីជួយយើងឲ្យស៊ូទ្រាំ។ (លូក. ១១:១៣; ភី. ៤:១៣) ជាលទ្ធផល យើងអាចមានទំនុកចិត្តថាយើងនឹងតែងតែមានអ្វីដែលយើងត្រូវការដើម្បីស៊ូទ្រាំ ហើយរក្សាភាពស្មោះត្រង់ចំពោះលោក។d
តើព្រះយេហូវ៉ាតម្រូវអ្វីពីយើង?
៩. ស្របទៅតាមយ៉ាកុប ១:៦, ៧ ហេតុអ្វីយើងត្រូវទុកចិត្តថាព្រះយេហូវ៉ានឹងជួយយើង?
៩ ព្រះយេហូវ៉ាតម្រូវឲ្យយើងទុកចិត្តលោក។ (ហេ. ១១:៦) ជួនកាល យើងប្រហែលជាមានអារម្មណ៍ថាបញ្ហារបស់យើងគឺហួសពីសមត្ថភាពរបស់យើង។ យើងប្រហែលជាថែមទាំងចាប់ផ្ដើមសង្ស័យថា តើព្រះយេហូវ៉ានឹងជួយយើងឬក៏យ៉ាងណា។ ប៉ុន្តែ គម្ពីរពង្រឹងទំនុកចិត្តយើងថាដោយឫទ្ធានុភាពរបស់ព្រះ យើងអាច«លោតរំលងកំពែងបាន»។ (ចសព. ១៨:២៩) ដូច្នេះជាជាងបន្តមានការសង្ស័យ យើងគួរអធិដ្ឋានដោយមានជំនឿនិងការទុកចិត្តទាំងស្រុងថាព្រះយេហូវ៉ានឹងតបឆ្លើយសេចក្ដីអធិដ្ឋានរបស់យើង។—សូមអាន យ៉ាកុប ១:៦, ៧
១០. សូមលើកឧទាហរណ៍អំពីរបៀបដែលយើងអាចធ្វើតាមសេចក្ដីអធិដ្ឋានរបស់យើង។
១០ ព្រះយេហូវ៉ាតម្រូវឲ្យយើងប្រព្រឹត្តតាមសេចក្ដីអធិដ្ឋានរបស់យើង។ ជាឧទាហរណ៍ បងប្រុសម្នាក់ប្រហែលជាសុំព្រះយេហូវ៉ាឲ្យជួយគាត់សុំច្បាប់ការងារ ដើម្បីគាត់អាចចូលរួមមហាសន្និបាតតាមភូមិភាគ។ តើព្រះយេហូវ៉ាប្រហែលជានឹងតបឆ្លើយសេចក្ដីអធិដ្ឋាននោះតាមរបៀបណា? លោកប្រហែលជាផ្ដល់ចិត្តក្លាហានដែលបងប្រុសនោះត្រូវការដើម្បីសុំថៅកែរបស់គាត់។ ប៉ុន្តែ បងប្រុសនោះនឹងនៅតែត្រូវទៅជួបថៅកែនោះដើម្បីសុំច្បាប់។ គាត់ប្រហែលជាត្រូវសុំម្ដងហើយម្ដងទៀត។ គាត់ប្រហែលជាថែមទាំងចង់ស្នើសុំបុគ្គលិកផ្សេងឲ្យធ្វើការជំនួសគាត់។ ម្យ៉ាងទៀតបើចាំបាច់ គាត់ប្រហែលជាសុខចិត្តសុំឲ្យកាត់ប្រាក់ខែ។
១១. ហេតុអ្វីយើងគួរអធិដ្ឋានម្ដងហើយម្ដងទៀតអំពីកង្វល់របស់យើង?
១១ ព្រះយេហូវ៉ាតម្រូវឲ្យយើងអធិដ្ឋានម្ដងហើយម្ដងទៀតអំពីកង្វល់របស់យើង។ (១ថែ. ៥:១៧) លោកយេស៊ូបង្ហាញថាសំណូមពរខ្លះរបស់យើងនឹងមិនបានត្រូវទទួលចម្លើយភ្លាមៗទេ។ (លូក. ១១:៩) ដូច្នេះ សូមកុំឈប់ព្យាយាមឡើយ! សូមអធិដ្ឋានយ៉ាងអស់ពីចិត្តម្ដងហើយម្ដងទៀត។ (លូក. ១៨:១-៧) ពេលយើងបន្តអធិដ្ឋានអំពីរឿងណាមួយ យើងបង្ហាញព្រះយេហូវ៉ាថាសំណូមពរអំពីរឿងនោះគឺពិតជាសំខាន់ចំពោះយើង។ យើងក៏បង្ហាញជំនឿរបស់យើងលើសមត្ថភាពរបស់លោកឲ្យជួយយើង។
ហេតុអ្វីយើងប្រហែលជាត្រូវផ្លាស់ប្ដូរសំណូមពរខ្លះរបស់យើង?
១២. (ក) ស្ដីអំពីសំណូមពររបស់យើង តើយើងគួរសួរខ្លួននូវសំណួរអ្វី ហើយហេតុអ្វី? (ខ) តើតាមរបៀបណាយើងអាចធ្វើឲ្យប្រាកដថាសេចក្ដីអធិដ្ឋានរបស់យើងបង្ហាញថាយើងគោរពព្រះយេហូវ៉ា? (សូមមើលប្រអប់ដែលមានចំណងជើងថា «តើសំណូមពររបស់ខ្ញុំបង្ហាញថាខ្ញុំគោរពព្រះយេហូវ៉ាឬទេ?»)
១២ បើយើងមិនទាន់ទទួលបានអ្វីដែលយើងបានសុំក្នុងការអធិដ្ឋាន យើងអាចសួរខ្លួននូវសំណួរបី។ សំណួរទី១គឺ ‹តើខ្ញុំកំពុងអធិដ្ឋានអំពីអ្វីត្រឹមត្រូវឬទេ?›។ យើងច្រើនតែគិតថាយើងស្គាល់អ្វីដែលល្អបំផុតសម្រាប់ខ្លួន។ ប៉ុន្តែ យើងប្រហែលជាសុំអ្វីដែលមិនផ្ដល់ប្រយោជន៍យូរអង្វែងដល់យើងទេ។ បើយើងអធិដ្ឋានអំពីបញ្ហាណាមួយ ប្រហែលជាមានវិធីដោះស្រាយល្អជាងអ្វីដែលយើងបានសុំ។ ម្យ៉ាងទៀត សំណូមពរខ្លះរបស់យើងប្រហែលជាមិនស្របតាមបំណងប្រាថ្នារបស់ព្រះយេហូវ៉ាឡើយ។ (១យ៉ូន. ៥:១៤) ជាឧទាហរណ៍ សូមគិតអំពីឪពុកម្ដាយដែលបានត្រូវលើកឡើងនៅខាងលើ។ ពួកគាត់បានអធិដ្ឋានសុំព្រះយេហូវ៉ាឲ្យកូនរបស់ពួកគាត់នៅជាប់នឹងសេចក្ដីពិត។ នេះស្ដាប់ទៅជាសំណូមពរសមត្រឹមត្រូវ។ ក៏ប៉ុន្តែ ព្រះយេហូវ៉ាមិនបង្ខំបុគ្គលណាម្នាក់ឲ្យបម្រើលោកទេ។ លោកចង់ឲ្យយើងទាំងអស់គ្នា រួមទាំងកូនៗ សម្រេចចិត្តគោរពប្រណិប័តន៍លោក។ (បច. ១០:១២, ១៣; ៣០:១៩, ២០) ដូច្នេះ ឪពុកម្ដាយអាចអធិដ្ឋានសុំព្រះយេហូវ៉ាបែបនេះវិញ គឺជួយឲ្យពួកគេមានឥទ្ធិពលទៅលើចិត្តរបស់កូនដើម្បីជំរុញចិត្តកូនឲ្យស្រឡាញ់ព្រះយេហូវ៉ានិងទៅជាមិត្តរបស់លោក។—សុភ. ២២:៦; អេភ. ៦:៤
១៣. យោងទៅតាមហេប្រឺ ៤:១៦ តើព្រះយេហូវ៉ានឹងជួយយើងនៅពេលណា? សូមពន្យល់។
១៣ សំណួរទី២គឺថា ‹តើឥឡូវគឺជាពេលដែលព្រះយេហូវ៉ានឹងតបឆ្លើយសំណូមពររបស់ខ្ញុំឬ?›។ យើងប្រហែលជាមានអារម្មណ៍ថា យើងត្រូវទទួលចម្លើយភ្លាមៗចំពោះសេចក្ដីអធិដ្ឋានរបស់យើង។ ប៉ុន្តែ ព្រះយេហូវ៉ាពិតជាស្គាល់ពេលដ៏ល្អបំផុតដើម្បីជួយ។ (សូមអាន ហេប្រឺ ៤:១៦) ពេលយើងមិនទទួលអ្វីដែលយើងសុំភ្លាមៗ យើងប្រហែលជាគិតថាចម្លើយរបស់ព្រះយេហូវ៉ាគឺ‹ទេ›។ ប៉ុន្តែចម្លើយរបស់លោកអាចជា‹មិនទាន់ដល់ពេល›។ ជាឧទាហរណ៍ សូមគិតម្ដងទៀតអំពីបងប្រុសវ័យក្មេងដែលបានអធិដ្ឋានសុំឲ្យជាពីជំងឺ។ បើព្រះយេហូវ៉ាបានធ្វើអព្ភូតហេតុឲ្យគាត់ជាសះស្បើយ សាថានអាចចោទប្រកាន់ថាបងប្រុសនោះបន្តបម្រើព្រះយេហូវ៉ា ដោយសារតែគាត់បានជាសះស្បើយ។ (យ៉ូប ១:៩-១១; ២:៤) បន្ថែមទៅទៀត ព្រះយេហូវ៉ាបានកំណត់ពេលរួចហើយ ដើម្បីធ្វើឲ្យលែងមានជំងឺទាំងអស់ទៀត។ (អេ. ៣៣:២៤; បប. ២១:៣, ៤) ទម្រាំដល់ពេលនោះ យើងមិនអាចរំពឹងថាព្រះយេហូវ៉ានឹងធ្វើអព្ភូតហេតុដើម្បីឲ្យយើងជាពីជំងឺទេ។ ដូច្នេះ បងប្រុសនោះអាចសុំព្រះយេហូវ៉ាឲ្យផ្ដល់កម្លាំងនិងសេចក្ដីសុខសាន្តក្នុងចិត្តដើម្បីស៊ូទ្រាំនឹងជំងឺ ហើយបន្តបម្រើព្រះយេហូវ៉ាយ៉ាងស្មោះត្រង់។—ចសព. ២៩:១១
១៤. តើអ្នករៀនអ្វីពីបទពិសោធន៍របស់បងចានអ៊ិស?
១៤ សូមគិតអំពីបងចានអ៊ិសដែលបានអធិដ្ឋានអំពីការចង់បម្រើនៅបេតអែល។ ប្រាំឆ្នាំបានកន្លងផុតទៅ ទើបគាត់បានយល់អំពីរបៀបដែលព្រះយេហូវ៉ាបានតបឆ្លើយសេចក្ដីអធិដ្ឋានរបស់គាត់។ គាត់និយាយថា៖ «ព្រះយេហូវ៉ាបានប្រើពេលវេលានោះដើម្បីបង្រៀនខ្ញុំនិងដុសខាត់ខ្ញុំ។ ខ្ញុំត្រូវរៀនទុកចិត្តព្រះយេហូវ៉ាថែមទៀត។ ខ្ញុំត្រូវធ្វើឲ្យទម្លាប់សិក្សាផ្ទាល់ខ្លួនរបស់ខ្ញុំកាន់តែប្រសើរឡើង។ ម្យ៉ាងទៀត ខ្ញុំត្រូវរៀនឲ្យចេះមានអំណរ មិនថាខ្ញុំបម្រើព្រះយេហូវ៉ានៅកន្លែងណាក៏ដោយ»។ ក្រោយមក បងចានអ៊ិសនិងប្ដីរបស់គាត់បានត្រូវអញ្ជើញឲ្យបម្រើក្នុងកិច្ចការត្រួតពិនិត្យមណ្ឌល។ ពេលគិតអំពីពេលវេលាកន្លងមក បងចានអ៊ិសនិយាយថា៖ «ព្រះយេហូវ៉ាបានតបឆ្លើយសេចក្ដីអធិដ្ឋានរបស់ខ្ញុំមែន តែតាមរបៀបដែលខ្ញុំមិននឹកស្មាន។ គឺអស់មួយរយៈពេល ទើបខ្ញុំឃើញថាការតបឆ្លើយរបស់ព្រះយេហូវ៉ាគឺល្អប្រពៃ តែខ្ញុំសប្បាយចិត្តដែលខ្ញុំអាចឃើញអំពីសេចក្ដីស្រឡាញ់និងចិត្តសប្បុរសរបស់លោក»។
បើអ្នកមានអារម្មណ៍ថាអ្នកមិនទទួលចម្លើយពីព្រះយេហូវ៉ា សូមរកមើលថាមានអ្វីផ្សេងទៀតដែលអ្នកអាចអធិដ្ឋាន (សូមមើលវគ្គ១៥)f
១៥. ហេតុអ្វីយើងប្រហែលជាត្រូវធ្វើសំណូមពរមិនសូវចំៗ? (សូមមើលរូបភាពផងដែរ)
១៥ សំណួរទី៣គឺថា ‹តើខ្ញុំគួរអធិដ្ឋានសម្រាប់អ្វីផ្សេងទៀតឬទេ?›។ ទោះជាគឺល្អឲ្យអធិដ្ឋានជាក់លាក់ក្ដី យើងប្រហែលជាអាចស្វែងយល់អំពីបំណងប្រាថ្នារបស់ព្រះយេហូវ៉ាចំពោះយើងដោយធ្វើសំណូមពរមិនសូវចំៗ។ សូមគិតអំពីឧទាហរណ៍របស់បងស្រីនៅលីវម្នាក់ដែលបានអធិដ្ឋានអំពីការចូលសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ។ គាត់ចង់ចូលសាលានោះដើម្បីគាត់អាចបម្រើនៅកន្លែងដែលមានសេចក្ដីត្រូវការច្រើនជាង។ ដូច្នេះ ពេលគាត់បន្តអធិដ្ឋានឲ្យចូលសាលានោះ គាត់ក៏អាចសុំព្រះយេហូវ៉ាជួយគាត់ឲ្យស្វែងរកឱកាសផ្សេងទៀតដើម្បីបង្កើនកិច្ចបម្រើផ្សាយរបស់គាត់។ (សកម្ម. ១៦:៩, ១០) បន្ទាប់មក គាត់អាចធ្វើតាមសេចក្ដីអធិដ្ឋាននោះដោយសួរអ្នកត្រួតពិនិត្យប្រចាំមណ្ឌលរបស់គាត់ថា តើក្រុមជំនុំនៅជិតៗត្រូវការអ្នកត្រួសត្រាយច្រើនជាងឬទេ? ឬគាត់អាចសរសេរសំបុត្រទៅការិយាល័យសាខាដើម្បីសួរអំពីកន្លែងណាដែលត្រូវការអ្នកផ្សព្វផ្សាយអំពីរាជាណាចក្រច្រើនជាង។e
១៦. តើយើងអាចជឿជាក់អំពីអ្វី?
១៦ ដូចដែលយើងបានរៀន យើងអាចជឿជាក់ថាព្រះយេហូវ៉ានឹងតបឆ្លើយសេចក្ដីអធិដ្ឋានរបស់យើងតាមរបៀបដែលប្រកបដោយសេចក្ដីស្រឡាញ់និងយុត្តិធម៌។ (ចសព. ៤:៣; អេ. ៣០:១៨) ជួនកាល ចម្លើយដែលយើងទទួលចំពោះសេចក្ដីអធិដ្ឋានរបស់យើងគឺខុសពីអ្វីដែលយើងនឹកស្មាន។ ប៉ុន្តែព្រះយេហូវ៉ានឹងមិនព្រងើយកន្តើយចំពោះសេចក្ដីអធិដ្ឋានរបស់យើងឡើយ។ លោកស្រឡាញ់យើងខ្លាំងណាស់។ លោកនឹងមិនបោះបង់ចោលយើងទេ។ (ចសព. ៩:១០) ដូច្នេះ សូមបន្ត«ទុកចិត្តលោកគ្រប់ពេលវេលា»ដោយអធិដ្ឋានយ៉ាងអស់ពីចិត្ត។—ចសព. ៦២:៨
ចម្រៀងលេខ៤៣ សេចក្ដីអធិដ្ឋានថ្លែងអំណរគុណ
a អត្ថបទនេះនឹងពន្យល់អំពីមូលហេតុដែលយើងអាចជឿជាក់ថា ព្រះយេហូវ៉ានឹងតែងតែតបឆ្លើយសេចក្ដីអធិដ្ឋានរបស់យើងតាមរបៀបយុត្តិធម៌និងដែលប្រកបដោយសេចក្ដីស្រឡាញ់។
b ឈ្មោះខ្លះបានត្រូវផ្លាស់ប្ដូរ។
c សូមមើលអត្ថបទដែលមានចំណងជើងថា «តើអ្នកទុកចិត្តថាព្រះយេហូវ៉ាតែងតែធ្វើអ្វីដែលត្រឹមត្រូវឬទេ?» ក្នុងទស្សនាវដ្ដីប៉មយាម ខែកុម្ភៈ ឆ្នាំ២០២២ វ.៣-៦។
d ដើម្បីបានព័ត៌មានថែមទៀតអំពីរបៀបដែលព្រះយេហូវ៉ាជួយយើងឲ្យស៊ូទ្រាំនឹងទុក្ខលំបាក សូមមើលវីដេអូសេចក្ដីអធិដ្ឋានជួយយើងឲ្យស៊ូទ្រាំ ក្នុងគេហទំព័រjw.org/km។
e ដើម្បីទទួលការណែនាំអំពីរបៀបដែលអ្នកអាចបម្រើនៅតំបន់ក្រោមការមើលថែនៃការិយាល័យសាខាផ្សេង សូមមើលសៀវភៅអង្គការមួយដើម្បីធ្វើតាមបំណងប្រាថ្នាព្រះយេហូវ៉ា ជំ.១០ វ.៦-៩។
f ការពណ៌នាអំពីរូបភាព៖ បងស្រីពីរនាក់អធិដ្ឋានមុនដាក់ពាក្យសុំចូលសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ។ ក្រោយមក បងស្រីម្នាក់បានត្រូវអញ្ជើញ ប៉ុន្តែបងស្រីម្នាក់ទៀតមិនបានត្រូវអញ្ជើញទេ។ ជាជាងខកចិត្តជាខ្លាំង បងស្រីដែលមិនបានត្រូវអញ្ជើញ អធិដ្ឋានសុំព្រះយេហូវ៉ាជួយគាត់ឲ្យរកឃើញឱកាសផ្សេងទៀត ដើម្បីបង្កើនកិច្ចបម្រើផ្សាយរបស់គាត់។ ក្រោយមក គាត់សរសេរសំបុត្រទៅការិយាល័យសាខាដើម្បីប្រាប់ថាគាត់សុខចិត្តទៅបម្រើនៅកន្លែងដែលមានសេចក្ដីត្រូវការច្រើនជាង។