Kuwonjezera Luso Lathu mu Utumiki—Kulalikira M’gawo Lamalonda

N’chifukwa Chiyani Kuchita Zimenezi N’kofunika? Popeza anthu ambiri amakhala masana onse ali kumalo amene amachitira malonda, njira yabwino yowapezera anthu amenewa ndi kupita kumalo a malonda komweko. Tikamalalikira m’gawo lamalonda, timapeza anthu ambiri oti n’kuwalalikira ndipo anthuwo amatilandira mwaulemu poganiza kuti tikufuna kuwagula malonda. Choncho kulalikira m’gawo lamalonda kukhoza kukhala kosangalatsa ndiponso kungakhale ndi zotsatira zabwino. Komabe kuti tilalikire bwino m’gawo lotereli, tiyenera kuchita zinthu mozindikira komanso tiyenera kuvala ndi kudzikongoletsa moyenera. (2 Akor. 6:3) Choncho woyang’anira utumiki ayenera kuonetsetsa kuti gawo lamalonda limapitidwa kawirikawiri komanso kuti ofalitsa amene amapita m’gawolo ndi oyenerera.

Kodi Tingachite Bwanji Zimenezi?

Konzekerani ulaliki wachidule. Kutenga nthawi yaitali tikulalikira munthu wogulitsa malonda, kungachititse kuti ulendo wina asadzalole kuti timulalikirenso.
Muzilalikira nthawi imene ogulitsa malonda sakhala otanganidwa kwambiri. Mwachitsanzo, mungalalikire pa nthawi imene angoyamba kumene kugulitsa malonda awo, makasitomala asanachuluke.
Ngati mukulalikira m’mashopu, mungachite bwino kuyamba mwalankhula kaye ndi bwana wa pamalopo. Khalani wansangala. Mwina munganene kuti: “Tikucheza mwachidule ndi anthu kumalo awo antchito popeza zimakhala zovuta kuwapeza pakhomo.” Mulalikireni bwanayo mwachidule kenako m’patseni kapepala, magazini kapena chinthu china. Kuti asaganize kuti cholinga chathu n’kuchita malonda, ndi bwino kusatchula za chopereka pokhapokha ngati wafunsa.
Ngati bwanayo ndi wochezeka, pemphani chilolezo kuti mulankhulenso ndi anthu ena ogwira ntchito m’shopumo. Ngati n’zotheka, mungapemphe kuti musiye timapepala, magazini, timabuku ndi zina pamalo amene anthuwo amakhala pa nthawi yopuma.
Muzichita zinthu mozindikira. Mwachitsanzo, ngati munthu akulankhula ndi kasitomala kapena ngati watanganidwa ndi zinthu zina, mungachite bwino kumudikira kaye.

Tayesani Kuchita Izi Mwezi Uno:

Pa kulambira kwanu kwa pabanja, konzekerani ndi kuyeserera zimene munganene mwachidule polalikira, ngati mutapemphedwa kuti mukalalikire m’gawo lamalonda.