Hisqiʼel
21 Ammas dubbiin Yihowaa akkana jedhu gara koo ni dhufe: 2 “Yaa ilma namaa, fuula kee gara Yerusaalemitti naannessiitii iddoowwan qulqulluu irratti labsi, biyya Israaʼel irrattis raajii dubbadhu. 3 Biyya Israaʼeliin akkana jedhi: ‘Yihowaan akkana jedha: “Kunoo, ani si irratti kaʼeera; goraadee koo manʼee isaa keessaa luqqisee+ isa qajeelaa fi isa hamaa si keessaa nan balleessa. 4 Ani isa qajeelaa fi isa hamaa si keessaa waanan balleessuuf, kibba irraa jalqabee hamma kaabaatti foon* hundumaa irratti goraadeen koo manʼee isaa keessaa ni luqqifama. 5 Namoonni hundis goraadee koo manʼee isaa keessaa kan luqqise anuma Yihowaa taʼuu koo dhugumaan ni hubatu. Inni lammata gara manʼee isaatti hin deebiʼu.”’+
6 “Atis yaa ilma namaa, hollachaa* aadi; eeyyee, isaan duratti akka malee aadi.+ 7 Isaan, ‘Maaliif aadda?’ jedhanii yoo si gaafatan, ati immoo, ‘Oduu tokko dhagaʼeeni’ isaaniin jetta. Sababiin isaas, inni dhugumaan ni dhufa, garaan hundi sodaadhaan ni baqa, harki hundi lamshaaʼee ni rarraʼa, hafuurri hundi ni dadhaba, jilba hunda irras bishaan ni yaaʼa.*+ ‘Kunoo, inni dhugumaan ni dhufa; eeyyee, ni raawwatama’ jedha Yihowaan Gooftaa Ol Aanaan.”
8 Ammas dubbiin Yihowaa akkana jedhu gara koo ni dhufe: 9 “Yaa ilma namaa, raajii dubbadhu, akkana jedhi: ‘Yihowaan akkana jedha: “Goraadeen, eeyyee, goraadeen+ tokko qarameera, cululuqfameeras. 10 Inni namoota hedduu gorraʼuuf qarameera; akka bakakkaatti akka calaqqisuufis cululuqfameera.”’”
“Nuti gammaduu hin qabnuu ree?”
“‘Inni* akkuma muka hundumaa irratti godhutti, ulee mootii ilma kootii+ ni tuffataa?
11 “‘Inni akka cululuqfamuu fi harkatti akka qabamuuf kennameera. Inni nama ajjeesu sun akka isa qabatuuf goraadeen kun qarameera, cululuqfameeras.+
12 “‘Yaa ilma namaa, goraadeen sun saba koo irratti waan dhufeef iyyi, gadoodis;+ inni geggeessitoota Israaʼel hundumaa irratti dhufeera.+ Isaan saba koo wajjin goraadeedhaan ni ajjeefamu. Kanaafuu, gaddaan tafa kee rukuti. 13 Sababiin isaas, qorannaan geggeeffameera;+ maarree goraadeen sun ulee mootii yoo tuffate maaltu taʼa? Inni* ni bada’+ jedha Yihowaan Gooftaa Ol Aanaan.
14 “Yaa ilma namaa, raajii dubbadhu, harka kee walitti rurrukutiitii siʼa sadii, ‘Goraadee!’ jedhii dubbadhu. Isaanitti marsee kan jiru goraadee namoota ajjeesu, goraadee namoota hedduu gorraʼu sana dha.+ 15 Garaan isaanii sodaadhaan ni baqa;+ namoonni hedduunis karrawwan magaalaa isaanii irratti ni kukkufu; anis goraadeedhaan isaan nan gorraʼa. Eeyyee, inni akkuma bakakkaatti ni calaqqisa, gorraʼuufis cululuqfameera! 16 Gara mirgaatti humnaan kuti! Gara bitaattis sochoʼi! Gara qarri kee itti garagale hundumaa deemi! 17 Anis harka koo walitti rukutee dheekkamsa koo nan qabbaneessa.+ Kana kan dubbate ana Yihowaa dha.”
18 Ammas dubbiin Yihowaa akkana jedhu gara koo ni dhufe: 19 “Ati garuu yaa ilma namaa, daandiiwwan goraadeen mootii Baabilon irra dhufu lama irratti mallattoo godhi. Lamaan isaanii iyyuu biyyuma tokko irraa ni kaʼu; bakka daandiin gara magaalota lamaanitti geessu sun addaan itti baʼu irrattis mallattoon* tokko haa dhaabamu. 20 Daandii isa tokko goraadee Raabaa+ ishii kan Amoonotaa taate irratti dhufuuf mallattoo godhi; daandii isa kan biraa immoo goraadee Yerusaalem ishii dallaa dhagaa qabduu+ fi Yihudaa keessatti argamtu irratti dhufuuf mallattoo godhi. 21 Sababiin isaas, mootiin Baabilon bakka daandichi itti hiramu, jechuunis bakka daandiiwwan lamaan addaan itti baʼan irratti falfala raawwachuuf ni dhaabbata. Xiyyawwan sana ni sochoosa. Waaqolii tolfamoo isaa* ni mariisisa; tiruus ni qora. 22 Falfalli harka mirgaa isaa keessa jiru, meeshaa ittiin diigan dhaabuuf, isa gorraʼu sanaaf ajaja kennuuf, iyya waraanaa dhageessisuuf, meeshaa ittiin diigan karrawwan sana irratti dhaabuuf, biyyoo tuuluu fi dallaa ittisaa ijaaruuf gara Yerusaalemitti argisiise.+ 23 Haa taʼu malee, warra* kakaa isaaniif kakatanii turan sana duratti, kun falfala sobaa fakkaatee ni mulʼata.+ Inni garuu yakka isaanii ni yaadata, akkasumas isaan ni qaba.+
24 “Kanaafuu, Yihowaan Gooftaa Ol Aanaan akkana jedha: ‘Isin balleessaa keessan saaxiluudhaan, gocha keessan hundumaatiinis cubbuun keessan akka mulʼatu gochuudhaan yakki keessan akka yaadatamu gootaniittu. Egaa amma waan yaadatamtaniif, humnaan* ni fudhatamtu.’
25 “Haa taʼu malee, yaa geggeessaa Israaʼel isa akka malee madooftee fi hamaa taate nana,+ guyyaan kee, yeroon adaba dhumaa itti adabamtu gaʼeera. 26 Yihowaan Gooftaa Ol Aanaan akkana jedha: ‘Marata mataa of irraa fuudhi, gonfoos of irraa kaasi.+ Kun akka kanaan itti hin fufu.+ Isa gad deebiʼe ol kaasi,+ isa ol kaʼes gad deebisi.+ 27 Ani isa nan diiga, nan diiga, nan diiga. Hamma inni mirga seeraa qabu sun dhufutti,+ inni kan eenyuu iyyuu hin taʼu; anis isaaf nan kenna.’+
28 “Atis yaa ilma namaa, raajii dubbadhu, akkana jedhi: ‘Yihowaan Gooftaa Ol Aanaan Amoonotaa fi arrabsoo isaanii ilaalchisee akkana jedha. Gorraʼuudhaaf goraadeen, eeyyee, goraadeen tokko luqqifameera; inni nyaachuu fi akka bakakkaatti calaqqisuuf cululuqfameera. 29 Siin ilaalchisee mulʼanni sobaa fi falfalli sobaa yoo dubbatame iyyuu, ati warra ajjeefaman,* namoota hamoo guyyaan isaanii, jechuunis yeroon adaba dhumaa itti adabaman gaʼe irra ni tuulamta. 30 Manʼee isaatti deebisi. Ani bakka ati itti uumamte keessatti, biyya keessaa argamte keessatti si irratti nan murteessa. 31 Dheekkamsa koo si irratti nan dhangalaasa. Ibidda dheekkamsa kootii si irratti nan bobeessa; harka namoota gara jabeeyyii badiisa geessisuu irratti ogummaa qabaniittis dabarsee sin kenna.+ 32 Ati ibiddichaaf qoraan ni taata;+ dhiigni kee biyyattii keessatti ni dhangalaʼa; atis kana booda hin yaadatamtu; kana kan dubbate ana Yihowaa dha.’”