„Fericime sile codola cai încăren penghi integritatea”

1, 2. a) So cărde chichiva guvernea caște așen contra le slujitorenghe le Iehovasche, tha so cărde cadala? b) Sostar daisaras te avas fericime chiar vi cana sam persecutime? (Dichen vi i imaginea pa i coperta.)

AGHIES, amari buchi sili așadi sau le phrala ci daștin te predichin libero ande mai but sar 30 thema. Ande chichiva anda cadala, le autorități chiar phandade amare phralen. So cărde von nasul? Von ci cărde chanci nasul, andel iacha le Iehovasche. Sea so cărde sas te citisaren hai te sichion mai but buchia andai Biblia, te phenen vi averenghe ande so pachian von hai te chiden-pe ande iech than penghe phralența ando pachiamos. Sa cadea, von ci camle te șion-pe andi politica. Chiar cana nachle prin bari opoziția, cadal slujitori loialo le Devlesche încărde penghi integritateab hai cadea sicade chichi de but iubin le Iehovas. Cadaia cărdea-le te aven zurales voime.

² Daștil-pe că vi tu dichlean poze ande save si chichiva anda cadal Martori tromane hai dichlean că lengo mui asal. Von sile cadea de voime anda codoia că jianen că o ilo le Iehovasco bariol cana dichel lenghi integritatea. (1 Cron. 29:17a) O Isus phendea: „Fericime sile codola persecutime anda o ciacimos . . . Bucurin-tume hai aven zurales voime, anda codoia că tumaro pochinimos si baro”. (Mat. 5:10-12)

IECH EXEMPLO ANDA AMENDE

3. So cărde le apostoli anda o iechto secolo cana sas-le persecutime hai sostar? (Faptele 4:19, 20)

³ Amare phrala hai pheia nachen prin sa codo pharimos prin savo nachle le apostoli ando iechto secolo, cana sas-le persecutime anda codoia că predichinas anda o Isus. Mai butivar, le judecători anda i bari curtea le iudeienghi „phendea lenghe te na mai den duma ando anav le Isusosco”. (Fap. 4:18; 5:27, 28, 40) So cărde le apostoli? (Citisar Faptele 4:19, 20.) Von jiangle că iech autoritatea mai bari ‘poruncisardea lenghe te predichin le poporosche hai te șion iech lași mărturia’ anda o Cristos. (Fap. 10:42) Cadea că, codola cai dine duma ande lengo anav, o Petru hai o Ioan, phende pherde tromai că von avenas te așunen mai but le Devlestar sar codole judecătorendar hai phende că ci va așavena-pe te den duma mai dur anda o Isus. Sas sar cana von pușle-le: „Si tumen o tromai te phenen că tumari porunca si mai bari sar i porunca le Devleschi?”.

4. Cadea sar sicavel-pe andel Faptele 5:27-29, so lașio exemplo mechle amenghe le apostoli hai sar daisaras te las-ame pala leste?

⁴ Le apostoli ‘așunde mai but le Devlestar sar stăpânitorii sar le manușendar’. De atunci, sea le ciace creștini len-pe pala lengo lașio exemplo. (Citisar Faptele 5:27-29.) Pala so sas-le marde anda codoia că von încărde penghi integritatea, le apostoli găle avri anda i bari le evreienghi „bucurime că sas lenghe dini cadai pachiv te aven cărde lajiavestar anda [le Isusosco] anav” hai predichisarde mai dur! (Fap. 5:40-42)

5. Ca so pușimata trebul te arachas răspunso?

⁵ O modo sar phirade-pe le apostoli daștilas te vazdel chichiva pușimata. Sar exemplo, sar daștinas le apostoli te așunen mai but le Devlestar sar le manușendar hai, ande sa codo timpo, te încăren i porunca te aven supuso ca „le autorități mai bare”? (Rom. 13:1) Sar daisaras amen aghies ‘te așunas catar le guvernea hai autorități’, cadea sar phendea amenghe o apostolo Pavel, hai, cu sea cadala, te așias vi integri le Develsche, amaro mai baro Conducătorii? (Tit 3:1)

LE AUTORITĂȚI MAI BARE

6. a) So si ‘le autorități mai bare’ anda o verseto anda Romani 13:1 hai sar trebul te phiravas-ame caring lende? b) Savo si o ciacimos anda sea le conducători pa-i phuv?

⁶ Citisar Romani 13:1. Ande cado verseto, ‘le autorități mai bare’ si le conducători pa-i phuv cai silen zuralimos hai controlo opral le manușa. Le creștini trebun te așunen catar cadala autorități hai te aven lenghe supuso. Von încăren i ordinea mașcar le manușa, len sama ca le manușa te cheren so phenel i legea hai, poiechdata, chiar aven andi apărarea le slujitorenghi le Devlesche. (Rev. 12:16) Cadea că, amen trebulas te pochinas lenghe le taxe, le impozitea hai te das-le i dar hai i pachiv cai manghen-la. (Rom. 13:7) Cu sea cadala, cadale guvernen silen autoritatea numai anda codoia că o Iehova mechel-len. O Isus sicadea claro cado ciacimos cana sas-lo angla o guvernatoro romano Ponțiu Pilat. Cana o Pilat phendea că sas-les autoritatea te mechel andi viața le Isusos sau te condamnil-les co merimos, o Isus phendea lesche: „Ci avelas-tu niciech autoritatea opral mande dacă ci avileas tuche dini de opral”. (Ioan 19:11) Cadea sar i autoritatea cai sas le Pilatos sas limitato, i autoritatea sea le conducătorenghi hai manușenghi politico de aghies sili sa cadea.

7. Cana ci trebulas te așunas catar le conducători pa-i phuv hai so trebulas te na bâstren von?

⁷ Le creștini supunin-pe ca le guvernea ori chichivar lenghe legi ci aven contra le legi le Devlesche. Ci daisaras te așunas le manușendar dacă cadala manghen amendar te cheras vareso so o Del phenel că si nasul sau dacă ci mechen-ame te cheras vareso cai o Del manghel amendar. Sar exemplo, von daștinas te manghen catar le tărne te jian andi armata.c Daștinas te interzicin i Biblia – Traducerea lumii noi hai amare publicații bazome pi Biblia. Daștinas te așaven amari predicarea hai te na mai mechen-ame te chidas-ame ande iech than. Dacă von folosin ande iech modo nasul penghi autoritatea, sar exemplo, persecutin codolen cai sile continuatori le Cristososche, von va trebuna te den socoteala angla o Del. Chanci anda sea so cheren von ci si garado angla le iacha le Iehovasche! (Ecl. 5:8)

8. Savi si i diferența mașcar i autoritatea le guvernenghi pa-i phuv hai i autoritatea le Iehovaschi?

⁸ I expresia ‘le autorități mai bare’ sicavel că le guvernen pa-i phuv silen mai baro zuralimos sar le manușen opral save rail. Tha, cu sea cadala, cadaia ci însemnol că len silen o mai baro zuralimos sau autoritatea. Numai o Iehova si Codo O Mai Baro, cai si opral le savore hai siles o mai baro zuralimos, hai cadaia sicavel-pe butivar andi Biblia. (Dan. 7:18, 22, 25, 27).

CODO O MAI BARO

9. So dichlea o profeto Daniel andel viziuni?

⁹ O profeto Daniel dichlea mai but viziuni cai sicade claro că le Iehovas siles zuralimos opral sea le coaver autorități. Mai anglal, o Daniel dichlea ștar bare fiare, cai sicaven le zuralimata mondialo andal puraimata hai de aghies: o Babilono, i Medo-Persia, i Grecia hai i Roma, hai vi o zuralimos cai avilea anda late, o Zuralimos Mondialo Anglo-Americano. (Dan. 7:1-3, 17) Pala codoia, o Daniel dichlea le Devles Iehova, cai beșelas pe iech trono sar iech judecătorii andi bar cerisco. (Dan. 7:9, 10) So dichlea cado profeto loialo mai dur si iech avertismento anda le conducători de aghies.

10. Cadea sar sicavel-pe ando Daniel 7:13, 14, 27, casche del o Iehova i autoritatea opral i phuv hai so sicavel cadaia anda Leste?

¹⁰ Citisar Daniel 7:13, 14, 27. O Del lel i autoritatea cai si aghies le guvernen pa-i phuv hai del-la codolenghe cai meritin-la mai but hai sile mai zurale. Casche va avela te del-la? O Daniel dichel „varecas sar iech șiav le manușesco”, mai exacto le Isus Cristosos, hai vi codolen „sfinți Codolesche O Mai Baro”, le 144 000 cai va raina „anda sea o timpo hai veșnico”. (Dan. 7:18) Cadea că, o Iehova si O Mai Baro opral savore anda codoia că numai les siles i autoritatea te cherel cadai buchi.

11. So aver vareso cai scriisardea o Daniel sicavel că le Iehovas siles autoritatea opral le națiuni?

¹¹ So dichlea o Daniel andi viziunea sicavel iech ciacimos cai phendea-les mai anglal, hai cado si că o Del „del tele regi hai șiol regi”. Sa cadea, o Daniel mai phendea: „Codova O Mai Baro rail opral o regato le manușengo . . . [hai] del-les casche camel vo”. (Dan. 2:19-21; 4:17) Sas situații cana o Iehova ‘dea tele pa trono regi hai șiutea aver regi’? Da, cadea sar va avela te dichas mai dur.

12. Den iech exemplo cai sicavel sar dea tele o Iehova le regi pa lengo trono andel puraimata. (Dich i imaginea.)

¹² Ando timpo, o Iehova sicadea că les siles i mai bari autoritatea. Mai dur, va avela te dichas trin exemplea. O faraono anda Egipto încărdea ando phandaimos le poporos le Iehovasco hai ci camlea mai butivar te mechel-le avri. Tha o Del încaladea-le anda o Egipto hai o Del tasadea le faraonos andi Marea Loli. (Ex. 14:26-28; Ps. 136:15) O Belșațar, o rege le Babilonosco, dea iech bari meseli hai, ando timpo cadalaco, vo „vazdea-pe contra o Rai le cerurengo”. Ando than te del pachiv le Devlesche, vo ‘dea pachiv le devlenghe anda rup hai sumnacai’. (Dan. 5:22, 23) Tha o Del peradea cadale conducătores baricano. „Chiar ande codoi riat”, o Belșațar sas-lo mudardo hai lesco regato sas-lo dino ca le mezi hai perși. (Dan. 5:28, 30, 31) Iech aver exemplo si o Irod Agripa I, o rege anda Palestina, cai mudardea le apostolos Iacov, pala codoia phandadea le apostolos Petru, hai camlea te mudarel vi cadales. Tha o Iehova așadea lesco plano: „O îngero le Iehovasco dea-les dab”, hai vo mulea. (Fap. 12:1-5, 21-23)

13. Den iech exemplo cai sicavel sar o Iehova peradea mai but națiuni chidine ande iech than.

¹³ O Iehova sicadea că silo O Mai baro vi cana mai but națiuni chidine-pe ande iech than contra lesco poporo. Vo mardea-pe anda le israeliți hai ajutisardea-le te biruin le 31 regi canaaniți cai chidine-pe ande iech than, caște len tela pengo zuralimos bare thana anda o Them Promiso. (Ios. 11:4-6, 20; 12:1, 7, 24) Aver data, o Iehova ajutisardea le israelițen te maren cu sea le reges Ben-Hadad hai le coaver 32 regen sirieni cai marde-pe contra lenghe. (1 Regi 20:1, 26-29)

14, 15. a) So phende le regi Nebucadnețar hai Darius anda i suveranitatea le Iehovaschi? b) So phendea o psalmisto anda o Iehova hai anda lesco poporo?

¹⁴ Si vi aver exemplea cai sicaven că o Iehova si Codo O Mai Baro opral savore. Cana o Nebucadnețar, o rege le Babilonosco, așardea-pe pesche zuralimaia hai pesca ‘gloriaia lesche bariamschi’, ando than ca, pherdo umilința, te anel pachiv le Devlesche, o Iehova cărdea-les te avel dilo. Pala so avilea goghiate, o Nebucadnețar „așardea Codoles Preasfânto” hai phendea că „o raimos [le Iehovasco] si iech raimos veșnico”. Vo mai phendea: „Chonic ci daștil te așavel-les”. (Dan. 4:30, 33-35, n.s.) Sa cadea, pala so o pachiamos le Danielosco sas-lo zumado, hai o Iehova încaladea-les anda i hâv pherdi lei, o rege Darius phendea că: „Le manușa te izdran daratar angla o Del le Danielosco. Că vo si o Del jiuvindo hai vo așel veșnico. Lesco Regato ci va avela distrugime niciechdata hai leschi suveranitatea si anda sea o timpo”. (Dan. 6:7-10, 19-22, 26, n.s., 27)

¹⁵ Sa cadea, o psalmisto phendea: „O Iehova cărdea te perel o sfato le națiunengo, vo rimosardea le planuri le națiunenghe”. Vo mai phendea: „Fericime si i națiunea saveaco Del si o Iehova, o poporo cas alosardea te avel lesco”. (Ps. 33:10, 12) Si ciaces, si amen sea le motivea te așias integri le Iehovasche!

O PALUTNO MARIMOS

16. So pachiamos trebul te avel-ame ande soste priveal „o baro necazo” hai sostar? (Dich i imaginea.)

¹⁶ Ji acana, dichleam so cărdea o Iehova andel puraimata. Tha so daisaras te ajucăras-ame te cherel vo ando viitorii? Daisaras te pachias ciaces că vo va salvila pesche slujitoren loialo ando ‘baro necazo’, cai pașiol cadea de sigo. (Mat. 24:21; Dan. 12:1) Vo va ferila pesche poporos cana o Gog anda Magog, iech coaliția anda națiuni, va astarela iech baro ataco, pe sea i phuv, contra le slujitori le Iehovasche. Chiar cana ande cadai coaliția va avena sea le 193 state membre andai Organizația Națiunilor Unite, von ci va daștina te așen contra Codo cai si O Mai Baro hai lesche armate andal ceruri. O Iehova promitil amenghe: „Va avela te vazdav-ma, va avela te sfințosarav-ma hai va avela te cherav-ma prinjiando tela le iacha bute națiunenghe; hai von va jianena că me som o Iehova”. (Ezec. 38:14-16, 23; Ps. 46:10)

17. So viitorii phenel i Biblia că ajucărel sea le regen pa-i phuv hai codolen cai încăren penghi integritatea caring o Iehova?

¹⁷ O ataco cai va cherela-les o Gog va astarela o Armaghedono, o palutno marimos le Iehovasco, cana vo va chosela sea „le regen pa sea i phuv”. (Rev. 16:14, 16; 19:19-21) I Biblia promitil că „numai codola orta va beșena pi phuv hai numai codola cai încăren penghi integritatea va așena pe late”. (Prov. 2:21, n.s.)

TE ÎNCĂRAS AMARI INTEGRITATEA

18. So sas-le gata te cheren but ciace creștini hai sostar? (Daniel 3:28)

¹⁸ Andel bărșa cai nachle, sas but creștini ciace cai sas-le gata te hasaren penghi libertatea hai chiar viața anda codoia că iubisarde le Iehovas, lengo Suverano. Von sas-le hotărâme ande pengo ilo te încăren penghi integritatea ji co sfârșito. Len sas-len sa codoi atitudinea cai sas le trine tărnen evrei cai sas-le salvime anda o thabardo bov anda codoia că așile loialo Codolesche cai si O Mai Baro opral savore. (Citisar Daniel 3:28.)

19. Pe ce baza va avela te judechil o Iehova pesche poporos hai so trebul te cheras amen încă de acanara?

¹⁹ Andel cuvintea cai aven o David scriisardea chichi de importanto si te așias integri caring o Del: „O Iehova va phenela i cris contra le popoarea. Judechisar-ma, o, Iehova, pala mânro ortomos hai pala mânri integritatea!”. (Ps. 7:8) Ande iech aver psalmo, o David scriisardea: „I integritatea hai o ortomos te feril-ma”. (Ps. 25:21) Daisaras te avas ciaces fericime cana așias zurale ando pachiamos hai încăras ca amari loialitatea caring o Iehova bi te cheras vareso nasul ande lesche iacha, indiferento prin so zumaimata nachas. Cadea, va avela te simțosaras ando ilo sa cadea sar o psalmisto cai scriisardea: „Fericime sile codola cai încăren penghi integritatea . . ., cai phiren pala i legea le Iehovaschi”. (Ps. 119:1, n.s.)