Te sicavas că sile cuci anda amende ‘le manușa sar daruri’

1. Save si chichiva daruri cai dea-len amenghe o Isus?

NICIECH manuș ci cărdea mai but caște ajutil averen sar o Isus. Cana sas-lo pi phuv, butivar cărdea miracolea caște ajutil le manușen. (Luca 9:12-17) Hai i mai bari buchi cai cărdea-la sas că dea peschi viața anda amende. (Ioan 15:13) De cana sas-lo uștiado andal mule, o Isus dea vi mai dur buhle vastesa. Cadea sar phendea, vo manglea le Iehovas te șiorel pe amende pesco spirito sfânto, caște sicavel amen hai te zuriarel amen . (Ioan 14:16, 17; 16:13) Hai prin le întruniri la congregațiache, vo del amen sea so trebul amenghe caște daisaras te sicavas le manușen pa sea i phuv andai Biblia hai te cheras discipoli. (Mat. 28:18-20)

2. Con si le ‘manușa sar daruri’ anda save del-pe duma ando Efeseni 4:7, 8?

² Si vi aver daruri cai o Isus dea-len amenghe. O apostolo Pavel scriisardea că, pala so o Isus vazdea-pe co cerii, vo dea „manușen sar daruri”. (Citisar Efeseni 4:7, 8.) O Pavel phendea că o Isus dea cadal daruri caște ajutin i congregația ande mai but buchia. (Ef. 1:22, 23; 4:11-13) Aghies, cadal ‘manușa sar daruri’ si le slujitori auxiliari, le phure de congregație hai le phrala cai vizitin le congregații.a Si ciaces, von sile imperfecți, cadea că, poiechdata, mai cheren vi greșeli. (Iac. 3:2) Cu sea cadala, amaro Rai Isus Cristos ajutil amen prin cadal cuci manușa.

3. Sar daisaras savore te ajutisaras le „manușen sar daruri”? Den iech exemplo.

³ O Isus dea „manușen sar daruri” caște zuriarel i congregația. (Ef. 4:12) Tha savore daisaras te ajutisaras-len te cheren cadai importanto buchi cai sas lenghe dini. Caște hachiaras mai mișto, te gândisaras amen: Cana vazdel-pe iech sala le Regatoschi, chichiva cheren buchi caște avel vazdini. Aver ajutin le phralen cai cheren buchi cana anen lenghe haben, le buchia cai trebun lenghe sau ajutin-len aver varesar. Sa cadea, prin so phenas hai so cheras, vi amen daisaras te ajutisaras le slujitoren auxiliari, le phuren hai le phralen cai vizitin le congregații te zuriaren i congregația. Te dichas sar ajutil amen i phari buchi cai cheren-la hai sar daisaras te sicavas lenghe hai le Isusosche – cai dea cadal „manușen sar daruri” – că sile cuci anda amende.

LE SLUJITORI AUXILIARI AJUTIN AVEREN

4. So buchia cărde le slujitori auxiliari ando iechto secolo caște „ajutin averen”?

⁴ Ando iechto secolo, chichiva phrala sas-le alosarde te slujin sar slujtori auxiliari. (1 Tim. 3:8) Cadaia însemnolas că von sas-le ‘codola cai ajutinas averen’, cadea sar scriisardea o Pavel. (1 Corinteni 12:28) Le slujitori auxiliari cherenas le buchia importanto cai trebunas cărde andi congregația. Cadea, le phuren sas-len mai but timpo caște sicaven le phralen hai te len sama lendar caște aven sasteveste spiritualo. Sar exemplo, le slujitori auxiliari daștil-pe că ajutisarde te aven scriime le copii andal Scripturi, sau daștil-pe că chinde le buchia cai trebunas caște cheren cadaia.

5. Save si chichiva buchia cai cheren-len le slujitori auxilari caște ajutin andi congregația?

⁵ Te gândisaras amen chichiva buchiande cai le slujitori auxiliari cheren-len ande chi congregația. (1 Pet. 4:10) Daștil-pe că von sas-le alosarde caște len sama catar le love cai sile dine le phralendar, catar le teritorii, catar i literatura, sau te așen co audio-video ando timpo la întrunireaco. Sa cadea, von daștin te aven o manuș de ordine sau te ajutin cana cheren-pe lașiarimata ca i sala le Regatoschi. Sea cadal buchia trebun te aven cărde caște jial mișto i congregația. (1 Cor. 14:40) Mai but, chichiva anda lende daștin te avel-len teme ca i întrunirea „I viața creștino hai i predicarea”, sau te încăren cuvântări publico. Iech slujitoro auxiliaro daștil vi te ajutil le phrales cai lel sama pe iech grupa. Poiechdata, iech slujitoro auxiliaro cai silo pregătime, daștil te jial ande iech than ieche phuresa caște zuriaren varecas andai congregația.

6. Sostar si cuci anda amende i phari buchi cai cheren-la le slujitori auxiliari?

⁶ Sar ajutil la congregația i buchi cai cheren-la le slujitori auxiliari? Iech phei cai bușiol Beberlyb, andai Bolivia, phenel: „Bucuriv man ciaces catar le întruniri anda codoia că le slujitori auxiliari cheren phari buchi anda amende. Cadea, daștiv te ghilabav, te dav răspunsuri, te așunav le cuvântări hai te sichioav anda le materialea video hai imagini. Von len sama te avas andi siguranța cana sam ca i întrunirea, tha len sama vi codolendar cai așunen hai dichen o programo chăral. Pala i întrunirea, von ajutin amen te cheras ujimos, len sama catar le love cai den-len le phrala hai len sama te avel amen sea o timpo le publicații cai trebun amenghe. Dichav cuci sea so cheren von anda amende”. I Leslie, cai trail andi Columbia hai laco rrom slujil sar phuro, phenel: „Mânre rromes siles nevoia catar le slujitori auxiliari, cai cheren but buchia. Dacă ci avenas von, mânre rromes avelas-les prea but buchia te cherel. Camav te mulțumiv lenghe anda sea o ilo că sile pherde bucuria hai camen te ajutin”. Siguro, vi tu diches le buchia sa cadea! (1 Tim. 3:13)

7. Sar daisaras te sicavas că si cuci anda amende so cheren le slujitori auxiliari? (Dich vi i imaginea.)

⁷ I recunoștința cai si amen anda le slujitori auxiliari ci trebul te avel numai ande amare ile. I Biblia phenel: „Sicaven recunoștința!”. (Col. 3:15) Te dichas sar o Kristof iech phuro andai Finlanda, sicavel că si cuci anda leste so cheren le slujitori auxiliari: „Bișialav lesche iech lilorro sau iech mesajo ande savo scriisarav iech verseto hai phenav lesche sar zuriardea man, sau sostar si cuci anda mande i buchi cai cherel-la”. O Pascal hai i Jael, cai train ande New Caledonia, manghen-pe butivar anda le slujitori auxiliari. O Pascal phenel: „Na de but timpo, astardeam te mangas amen but anda amare slujitori auxiliari, mulțumisaras le Iehovasche anda lende hai mangas le Iehovas te avel lența hai te ajutil-len”. O Iehova așunel le manglimata sar cadala hai sea i congregația țârdel miștimata. (2 Cor. 1:11)

LE PHURE DE CONGREGAȚIE „CHEREN PHARES BUCHI MAȘCAR TUMENDE”

8. Sostar scriisadea o Pavel că le phure anda o iechto secolo ‘cherenas phares buchi’? (1 Tesaloniceni 5:12, 13)

⁸ Le phure anda o iechto secolo cherenas phares buchi anda i congregația. (Citisar 1 Tesaloniceni 5:12, 13; 1 Tim. 5:17) Von trebunas ‘te sicaven o drom andi buchi le Devleschi’. Cadaia însemnol că von trebunas te încăren le teme ca le întruniri hai, sar corpo le phurengo, alosarenas so si mișto anda i congregația. Von ‘denas sfaturi’ pherde lașimos penghe phralenghe hai pheianghe, caște așen zurale ando pachiamos. (1 Tes. 2:11, 12; 2 Tim. 4:2) Sa cadea, von trebunas te len sama penga familiatar hai te încăren vi pengo pachiamos zuralo. (1 Tim. 3:2, 4; Tit 1:6-9)

9. Save si chichiva anda le buchia cai cheren-len le phure aghies?

⁹ Aghies, le phuren silen but buchia te cheren. Von jian te phenen i vestea lași averenghe. (2 Tim. 4:5) Hai sile iech lașio exemplo anda codoia că predichin la iagasa ande ile, len sama sar te avel cărdi i predicarea andel thana cai sas dine lenga congregațiache. Von sicaven amen vi sar te predichisaras hai te sicavas averen mișto. O Iehova mechlea-len andi congregația vi sar judecători. Von judechin orta, cadea sar camel o Del, hai sile pherde mila. Cana varecon andai congregația cherel iech păcato, le phure den penghi zor te ajutin-les te avel pale amal le Iehovasa. Cu sea cadala, von len sama te așel uji i congregația. (1 Cor. 5:12, 13; Gal. 6:1) Tha, i mai importanto buchi cai cheren-la si sar păstori. (1 Pet. 5:1-3) Von încăren teme biblico mișto pregătime, den penghi zor te prinjianen fiesaves andai congregația hai te cheren vizite caște zuriaren-len. Chichiva phure ajutin vi cana si vazdine sau lașiarde le săli le Regatosche, cana cherel-pe iech congreso hai cana slujin ando comiteto cai ajutil amen cana jias co spitalo sau si iech anda le phure cai jian te dichen hai te zuriaren le nasfale phralen. Tha len silen vi aver buchia te cheren. Le phure cheren phares buchi anda amende!

10. Sostar si cuci anda amende i phari buchi cai cheren-la le phure?

¹⁰ O Iehova phendea de mai anglal că cadal păstori va lena sama mișto amendar hai ‘ci va mai darasa sau amaro ilo ci va mai izdrala daratar’. (Ier. 23:4) I Johanna, iech phei andai Finlanda, dichlea că cadal dumes sile ciace cana lachi dei pelea zurales nasfali. Voi phenel: „Chiar cana si manghe pharo te pâtrav mânro ilo angla le coaver, iech phuro cas ci prinjiandemas-les mișto sas-les răbdarea manța, manglea-pe ande iech than manța hai cărdea man te jianav că o Iehova iubil man but. Ci mai anav manghe amintea so phendea manghe, tha anav manghe amintea că simțosardem man andi siguranța. Pachiav ciaces că o Iehova bișialdea-les caște ajutil man chiar cana trebulas”. Sar ajutisarde tut le phure anda chi congregația?

11. Sar daisaras te sicavas le phurenghe că si cuci so cheren anda amende? (Dich vi i imaginea.)

¹¹ O Iehova camel te sicavas anda ilo le phurenghe că sile cuci „anda le buchia cai cheren-len”. (1 Tes. 5:12, 13) I Henrietta, cai trail andi Finlanda, phenel: „Le phure camen te ajutin averen, tha cadaia ci însemnol că silen mai but timpo hai zuralimos sar le coaveren sau că na-i len pharimata andi viața. Poiechdata, phenav lenghe: «Jianes vareso? Tu san ciaces iech lașio phuro. Camlem numai te jianes cadaia»”. Iech phei andai Turcia cai bușiol Sera phenel: „Vi le phure trebun zuriarde caște daștin te cheren mai dur penghi buchi. Cadea că daisaras te scriisaras lenghe iech lilorro, te acharas-len te han ande iech than amența sau te jias lența andi predicarea”. Si vi ande chi congregația iech phuro casche cames te mulțumis anda i phari buchi cai cherel-la? Rode sar te sicaves lesche că si cuci so cherel. (1 Cor. 16:18)

LE PHRALA CAI VIZITIN LE CONGREGAȚII ZURIAREN AMEN

12. Savo sas aver grupo murșengo cai alosardea-les o Isus caște zuriaren i congregația anda o iechto secolo? (1 Tesaloniceni 2:7, 8)

¹² O Isus alosardea murșen cai ajutin le congregații vi aver varesar. Prin le phure anda o Ierusalimo, o Isus bișialdea le phralen – sar avelas le Pavelos, le Barnabas hai averen – caște jian te vizitin le congregații. (Fap. 11:22) Anda soste? Anda sa codoi buchi sostar sas alosarde vi le slujitori auxiliari hai le phure – te zuriaren le congregații. (Fap. 15:40, 41) Cadal murșa mechle but buchia palal caște daștin te cheren cadai buchi, hai chiar sas-le gata te den penghi viața caște daștin te sicaven hai te zuriaren averen. (Citisar 1 Tesaloniceni 2:7, 8.)

13. Save si chichiva buchia cai cheren-len le phrala cai vizitin le congregații?

¹³ Le phrala cai vizitin le congregații trebun te phiren but caște arăsăn le phralende. Chichiva anda lende cheren șăla kilometri mașcar le congregații. Ande fiesavo curco, le phrala cai vizitin le congregații încăren mai but teme, jian te zuriaren le phralen, încăren întruniri le pionierența, le phurența hai întruniri anda i predicarea. Von pregătin penghe cuvântări hai len sama sar te aven cărde le congresea hai le bare congresea. Sicaven ca le școli andal pionieri hai lașiaren te aven încărde le întruniri le pionierența andai circumscripția. Mai but, poiechdata, trebun te cheren sigo chichiva buchia cai dine-len lenghe i filiala.

14. Save si chichiva buchia cai cheren-len le phrala cai vizitin le congregații prin save arăsle te aven amenghe drago?

¹⁴ So miștimata si le phralen hai pheian anda i cuci buchi cai cheren-la le phrala cai vizitin le congregații? Anda le phrala cai vizitin le congregații, iech phral andai Turcia phenel: „Fiesavi vizita cai cheren-la zuriarel man te ajutisarav mai but le phralen hai pheian. Prinjiandem bute phralen cai vizitin le congregații, tha niciech anda lende ci cărdea man te pachiav că ci camel te del duma manța sau că silen prea but buchia te cheren caște așen amența”. I Johanna, anda savi deam duma mai anglal, sas andi predicarea ieche phralesa cai vizitil le congregații, tha von ci arachle chanicas chăre. Voi phenel: „Ci va avela te bâstrav niciechdata codo ghies. Chiar ande codo timpo, mânre dui pheia muchisaile ande aver than. Sas manghe zurales doro lendar. O phral cai vizitil le congregații zuriardea man pherdo iubirea hai ajutisardea man te hachiarav că, acana, daștil-pe că ci daisaras te beșas pașa amari familia sau amala. Tha, andi lumea nevi, va avela amen but timpo cana te așias lența”. But anda amende anas amenghe amintea le șucar buchia cai phende-len sau cărde-len le phrala cai vizitin le congregații anda amende hai arăsle te aven amenghe drago. (Fap. 20:37–21:1)

15. a) Cadea sar phenel-pe ando 3 Ioan 5-8, sar te sicavas că sile cuci anda amende le phrala cai vizitin le congregații? (Dich vi i imaginea.) b) Sostar trebulas te mulțumisaras le rromnianghe le phralenghe cai sile alosarde te cheren buchi andi congregația hai so daisaras te cheras anda lende? („Te na bâstras lenghe rromnian.”)

¹⁵ O apostolo Ioan zuriardea le phrales Gaius te sicavel ospitalitatea caring le phrala cai vizitinas lenghi congregația hai, ‘cana bișialelas-len po drom, te ajutil-len, cadea sar ciaiol le Devles’. (Citisar 3 Ioan 5-8.) Vi amen daisaras te cheras cadaia cana acharas le phrales cai vizitil le congregații te hal ande iech than amența. Mai but, daisaras vi te jias ca le întruniri andai predicarea ando curco cana o phral cai vizitil le congregații si amende. I Leslie, anda savi deam duma mai anglal, sicavel cadale phralenghe că sile cuci vi aver varesar. Voi phenel: „Mangav man le Iehovasche caște del lenghe so trebul-len. Me hai mânro rrom scriisaras lenghe lilorra ande save phenas lenghe chichi de but ajutisardea amen i vizita cai cărde-la”. Hai te na bâstras că le phrala cai vizitin le congregații silen vi len pharimata hai chinion, cadea sar amen. Poiechdata silen nasfalimata, daran anda le buchia cai va avena sau sile perade. Daștil-pe că che gule dumes sau iech țâno cadouo va avela o răspunso co manglimos le phralesco cai vizitil le congregații. (Prov. 12:25)

SI AMEN NEVOIA MAI BUTE PHRALENDAR CAI CAMEN TE CHEREN BUCHI ANDA O IEHOVA

16. Pala sar phenel-pe ando Proverbe 3:27, so daștin te pușen-pe le phrala?

¹⁶ Pe sea i phuv, si amen nevoia phralendar cai camen te cheren mai but anda o Iehova. Dacă san iech phral boldo „așel ande chio zuralimos te ajutisares”? (Citisar Proverbe 3:27.) Cames te aves iech slujitoro auxiliaro? Dacă san acana iech slujitoro auxiliaro, cames te ajutis hai te zuriares le phralen sar phuro?c Daștis te cheres paruimata ande chi viața caște cheres i Școala anda le Evanghelizatori? Cadai școala va sicavela tut hai va ajutila tut te aves folosime mai but le Isusostar. Dacă pachias că si prea pharo anda tute, mang tut le Iehovasche. Phen lesche te ajutil tut hai te del tut pesco spirito sfânto caște daștis te cheres mișto le buchia cai sas tuche dine. (Luca 11:13; Fap. 20:28)

17. So sicaven le ‘manușa sar daruri’ anda amaro Rege, o Isus Cristos?

¹⁷ ‘Le manușa sar daruri’ cai alosardea-len o Isus sicaven că vo si angla amende ande cadal palutne ghiesa. (Mat. 28:20) Si iech bari pachiv anda amende că si amen iech Rege pherdo iubirea cai del buhle vastesa hai lel sama amendar cana del amen phrala cai daștin te zuriaren amen hai te ajutin amen. Cadea că, te sicavas că si cuci anda amende i phari buchi cai cheren-la cadal phrala. Hai, o mai importanto, te na așavas amen te mulțumisaras le Iehovasche, castar avel „orisavi buchi lași hai orisavo daro perfecto”. (Iac. 1:17)