E Boloke
Ho Khanna Lithuto Tsa Bibele Tse Tsoelang Pele
Kenyelletso ena ke kakaretso ea lintlha tse khōlō tsa letoto la lihlooho tse buang ka ho khanna lithuto tsa Bibele tse tsoelang pele le ’nileng la hlaha Tšebeletsong ea Rōna ea ’Muso. Bohle ba khothalletsoa ho boloka kenyelletso ena le ho e hlahloba ha ba khanna lithuto tsa Bibele. Ho ekelletsa moo, lintlha tse ka har’a kenyelletso ena li ka ’na tsa totobatsoa libokeng tsa tšebeletso ea tšimo, ’me balebeli ba tšebeletso ba ka ’na ba e sebelisa e le motheo oa lipuo tseo ba fanang ka tsona ha ba etela lihlopha tsa thuto ea buka.
Karolo ea 1: Thuto ea Bibele ke Eng?
Haeba u e-ba le moqoqo oa kamehla oa Bibele o hlophisitsoeng, le hoja o le mokhutšoanyane, u sebelisa Bibele hammoho le e ’ngoe ea libuka tse khothalletsoang, u khanna thuto ea Bibele. Thuto eo e ka tlalehoa ha e se e khanniloe ka makhetlo a mabeli ka mor’a hore ho bontšoe kamoo thuto e khannoang kateng ’me ho totobetse hore e tla tsoela pele.—km-SU 7/04 leq. 1.
Libuka Tse Khothalletsoang
◼ Ke Eng Seo Molimo a se Hlokang ho Rōna?
◼ Tsebo e Isang Bophelong bo sa Feleng
◼ Rapela Molimo a le Mong Feela oa ’Nete
◼ U ka ba Motsoalle oa Molimo! e ka sebelisoa ho ithuta le batho ba sa rutehang hakaalo kapa ba sa tsebeng ho bala hantle.
Karolo ea 2: Ho Lokisetsa ho Khanna Thuto
Re lokela ho fetisa boitsebiso ka tsela e amang pelo ea seithuti. Sena se hloka hore re lokisetse hantle re nahanne ka seithuti.—km-SU 8/04 leq. 1.
Mokhoa oa ho Lokisetsa
◼ Hlahloba sehlooho, lihloohoana le litšoantšo tsa khaolo kapa thuto.
◼ Fumana likarabo tsa lipotso tse bukeng, u tšoaee feela mantsoe a sehlooho le lipolelo.
◼ Etsa qeto ea hore na ke mangolo afe a sa qotsoang a lokelang ho baloa thutong. Ngola lintlha tse khutšoanyane ka mahlakoreng a leqephe la buka.
◼ Lokisetsa tlhahlobo e khutšoanyane ea lintlha tse khōlō.
Etsa Hore Thuto e Tšoanele Seithuti
◼ Rapella seithuti le litlhoko tsa sona.
◼ Nahana esale pele ka lintlha tseo seithuti se ka ’nang sa thatafalloa ho li utloisisa kapa ho li amohela.
◼ Nahana: Ke eng eo ho hlokahalang hore se e utloisise kapa se sebeletse ho eona e le hore se ka hatela pele moeeng? Nka finyella pelo ea sona joang?
◼ Ha ho hlokahala, lokisetsa papiso, tlhaloso kapa letoto la lipotso tse ka thusang seithuti ho utloisisa ntlha e itseng kapa lengolo.
Karolo ea 3: Ho Sebelisa Mangolo Hamolemo
Re khanna lithuto tsa Bibele ka sepheo sa ho ‘etsa batho barutuoa’ ka ho ba thusa ho utloisisa le ho amohela lithuto tsa Lentsoe la Molimo le ho li sebelisa bophelong ba bona. (Mat. 28:19, 20; 1 Bathes. 2:13) Ka lebaka leo, thuto e lokela ho thehoa Mangolong.—km-SU 11/04 leq. 4.
Ruta Lentsoe la Molimo
◼ Bontša seithuti kamoo se ka fumanang litemana kateng Bibeleng ea sona.
◼ Phetla litemana tsa Bibele tse bontšang lebaka la seo re se lumelang ho ea ka Mangolo u be u li hlalose.
◼ Botsa lipotso. Ho e-na le ho hlalosetsa seithuti litemana tsa Bibele, e-re se u hlalosetse tsona.
◼ Nolofatsa thuto. Qoba ho hlalosa lintlha tsohle tsa lengolo le leng le le leng nakong ea thuto. Akarelletsa feela se hlokahalang ho hlakisa taba e tšohloang.
◼ Bontša kamoo taba e ka sebelisoang kateng. Thusa seithuti ho bona kamoo litemana tsa Bibele li sebetsang kateng ho sona.
Karolo ea 4: Ho Koetlisa Liithuti Hore li Lokisetse
Seithuti se lokisetsang esale pele, se tšoaeang likarabo, ’me se nahana kamoo se tla araba kateng ka mantsoe a sona, se hatela pele ka potlako moeeng. Kahoo, hang ha thuto e tsitsitse, lokisetsa sehlooho se itseng le seithuti ka morero oa ho se bontša kamoo thuto e lokisetsoang kateng. Ho liithuti tse ngata, ho ka ba molemo hore le lokisetse khaolo kapa thuto eohle hammoho.—km-SU 12/04 leq. 1.
Ho Tšoaea Likarabo le ho Ngola Lintlha
◼ Hlalosa mokhoa oa ho fumana likarabo tse tobileng tsa lipotso tse bukeng.
◼ Bontša seithuti buka ea hao e tšoailoeng mantsoe kapa lipolelo tsa sehlooho feela.
◼ Thusa seithuti ho bona hore lengolo ka leng le hlahang le tšehetsa ntlha e serapeng, ’me u se bontše kamoo se ka ngolang lintlha tse khutšoanyane ka lehlakoreng la leqephe la buka.
Ho Lekola le ho Hlahloba
◼ Bontša seithuti kamoo se ka hlahlobang ka bokhutšoanyane sehlooho sa khaolo, lihloohoana le litšoantšo pele se qala ho lokisetsa thuto ka ho feletseng.
◼ Khothalletsa seithuti hore se phethele tokisetso ea sona ka ho hlahloba lintlha tse khōlō.
Karolo ea 5: Ho Lekanyetsa Boitsebiso bo Lokelang ho Akaretsoa
Hore na ho ka ithutoa boitsebiso bo bokae ho tla itšetleha ka bokhoni le maemo a mosuoe le a seithuti.—km-SU 1/05 leq. 1.
Haha Tumelo e Matla
◼ U se ke ua sitisa seithuti ho fumana kutloisiso e hlakileng ea Lentsoe la Molimo hobane feela u habile ho qeta thuto kapele.
◼ Qeta nako leha e le efe e hlokahalang bakeng sa ho thusa seithuti ho utloisisa le ho amohela seo se ithutang sona.
◼ Etsa hore ho be le nako e lekaneng ea ho hlahloba mangolo a sehlooho ao lithuto li thehiloeng ho ’ona.
Qoba ho Hlahlathela ha U Khanna Thuto
◼ Haeba seithuti se tloaetse ho bua haholo ka litaba tsa sona, u ka ’na ua lokisetsa hore le buisane ka tsona ka mor’a thuto.
◼ U se ke ua bua lolololo nakong ea thuto. Fokotsa lintlha tse ka thōko le liphihlelo e le hore li se ke tsa sitisa seithuti ho fumana tsebo e nepahetseng ea lithuto tsa motheo tsa Bibele.
Karolo ea 6: Ha Seithuti se Botsa Potso
Hang ha thuto ea Bibele e se e tsitsitse, hangata ho molemo ho hlahloba lithuto tsa Bibele ka ho latellana ho e-na le ho tloboka lihlooho. Sena se thusa seithuti ho haha motheo oa tsebo e nepahetseng le ho hatela pele moeeng.—km-SU 2/05 leq. 8.
E-ba le Temoho
◼ Hangata lipotso tse amanang le thuto li ka arajoa ka eona nako eo.
◼ Lipotso tse sa amaneng le thuto kapa tse hlokang ho etsetsoa lipatlisiso li ka arajoa ka nako e ’ngoe. Ho ka ba molemo ho ngola lipotso tse joalo fatše.
◼ Haeba seithuti se thatafalloa ho amohela thuto e itseng, hlahloba boitsebiso bo eketsehileng bo buang ka ho pharaletseng ka taba eo.
◼ Haeba seithuti se ntse se sa kholiseha, behang taba eo molatsa ’me le tsoele pele ka thuto.
Ikokobetse
◼ Haeba u sa tsebe karabo ea potso, u se ke ua fana ka maikutlo a hao.
◼ Ruta seithuti hanyane ka hanyane kamoo se ka etsang lipatlisiso kateng.
Karolo ea 7: Ho Rapela Thutong
E le hore liithuti tsa Bibele li tsoele pele moeeng, ho hlokahala tlhohonolofatso ea Jehova. Ka lebaka leo, ho loketse ho rapela ha ho qaloa le ha ho phethoa thuto e tsitsitseng.—km-SU 3/05 leq. 4.
Tsela ea ho Kenyelletsa Thapelo
◼ Thapelo e ka etsoa lekhetlong la pele ha re ithuta le batho ba ratang bolumeli.
◼ Ho ba bang, ho ka ’na ha hlokahala hore re hlokomele hore na nako e loketseng ke efe ea ho rapela thutong.
◼ Ho ka sebelisoa Pesaleme ea 25:4, 5 le 1 Johanne 5:14 ho hlalosa hore na ke hobane’ng ha thapelo e etsoa.
◼ Ho ka sebelisoa Johanne 15:16 ho bontša hore re lokela ho rapela Jehova ka Jesu Kreste.
Se ka Akarelletsoang Thapelong
◼ Ho loketse ho lebisa thoriso ho Jehova joaloka Mohloli oa thuto.
◼ Bontša seithuti hore u se thahasella e le kannete.
◼ Bontša hore u ananela mokhatlo o hlophisitsoeng oo Jehova a o sebelisang.
◼ Kōpa hore Jehova a hlohonolofatse boiteko ba seithuti ba ho sebelisa seo se ithutang sona.
Karolo ea 8: Ho Lebisa Liithuti Mokhatlong o Hlophisitsoeng
Pakane ea rōna ha re khanna lithuto tsa Bibele hase feela ho ruta thuto ea motheo empa hape ke ho thusa liithuti ho ba karolo ea phutheho ea Bokreste. Sebelisa metsotso e seng mekae beke le beke nakong ea thuto bakeng sa ho bua ka ntlha e itseng mabapi le mokhatlo o hlophisitsoeng oa Jehova.—km-SU 4/05 leq. 8.
Liboka Tsa Phutheho
◼ Hlalosa seboka ka seng sa phutheho. Li memele ho tla libokeng thutong ea pele feela.
◼ Li bolelle lintlha tse ikhethang tse tšohliloeng libokeng.
◼ Tsosa thahasello ea tsona bakeng sa Sehopotso, likopano le ketelo ea molebeli oa potoloho.
◼ Sebelisa litšoantšo tse ka har’a lingoliloeng tsa rōna ho li thusa ho bona ka mahlo a kelello se etsahalang.
◼ Li khothalletse ho bala bukana ea Lipaki Tsa Jehova—Ke Bo-mang? Li Lumela Eng?
Sebelisa Livideo ho Hlaolela Kananelo
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Karolo ea 9: Ho Hlomella Liithuti ho Paka ka Mokhoa o sa Reroang
Ha liithuti tsa Bibele li qala ho bontša tumelo ho seo li ithutang sona, li susumelletseha hore li bue ka sona.—km-SU 5/05 leq. 1.
Li Khothalletse ho Paka
◼ Na ho na le metsoalle le beng ka tsona bao li ka ba memang hore ba be teng thutong?
◼ Na ho na le basebetsi-’moho, liithuti-’moho kapa metsoalle e meng e bontšitseng thahasello?
Li Koetlisetse ho Bolella ba Bang Seo li se Lumelang
◼ Ha le fihla lintlheng tse itseng nakong ea thuto, botsa seithuti u re, “U ne u tla sebelisa Bibele joang ho hlalosetsa beng ka uena ’nete ee?”
◼ Thusa seithuti ho utloisisa hore ho hlokahala se bontše tlhompho le mosa ha se buisana le ba bang ka Molimo le merero ea hae.
◼ Liithuti li ka sebelisa bukana ea Lipaki Tsa Jehova—Ke Bo-mang? Li Lumela Eng? ho thusa metsoalle le litho tsa malapa a tsona hore li utloisise litumelo le mesebetsi ea rōna e thehiloeng Bibeleng.
Karolo ea 10: Ho Koetlisa Liithuti Tšebeletsong ea Ntlo le Ntlo
Ha baholo ba etsa qeto ea hore seithuti sa Bibele sea tšoaneleha hore e ka ba mohoeletsi ea sa kolobetsoang, se ka kopanela le phutheho mosebetsing oa ho bolela phatlalatsa.—km-SU 6/05 leq. 1.
Ho Lokisetsa Hammoho
◼ Bontša mohoeletsi e mocha moo a ka fumanang linehelano tse fanoeng e le mohlala.
◼ Mo thuse ho khetha kenyelletso e bonolo e sebetsang tšimong ea phutheho.
◼ Mo khothalletse ho sebelisa Bibele tšebeletsong ea hae.
◼ Itlhakiseng hammoho. Mo bontše kamoo a ka sebetsanang ka masene le tsela eo batho ba tloaetseng ho arabela ka eona.
Ho Paka Hammoho
◼ Etsa hore seithuti se bone ha u fana ka nehelano eo le e lokiselitseng hammoho.
◼ Nahanela botho le bokhoni ba seithuti. Maemong a mang, ho ka ba molemo hore se fane ka karolo e itseng feela ea nehelano.
◼ Thusa mohoeletsi e mocha hore a be le kemiso ea kamehla ea ho kopanela tšebeletsong.
Karolo ea 11: Ho Thusa Liithuti ho Etsa Maeto a ho Boela
Leeto la ho boela le qala ho lokisetsoa hona leetong la pele. Khothalletsa seithuti hore se thahaselle ka tieo batho bao se buisanang le bona. Tsoela pele ho se koetlisa hore se khothalletse beng ba matlo ho ntša maikutlo a bona, hore se mamele litlhaloso tsa bona le ho hlokomela lintho tseo ba amehileng ka tsona.—km-SU 7/05 leq. 1.
Ho Lokisetsa Leeto la ho Boela
◼ Hlahlobang leeto la pele ’me u thuse seithuti ho khetha taba e tla ipiletsa ho mong’a ntlo.
◼ Lokisetsang nehelano e khutšoanyane e buellang temana e le ’ngoe ea Bibele hammoho le serapa se le seng bukeng.
◼ Lokisetsang potso e ka botsoang qetellong ea puisano.
Latella Thahasello ka Mafolofolo
◼ Khothalletsa seithuti ho khutlela kapele ho bohle ba bontšang thahasello.
◼ Thusa seithuti ho bona hore hoa hlokahala hore se phehelle ho finyella batho bao ho leng thata ho ba fumana.
◼ Bontša mohoeletsi e mocha kamoo a ka etsang litokisetso tsa ho etela motho hape, ’me u mo thuse ho utloisisa bohlokoa ba ho khutlela joalokaha a tšepisitse.
Karolo ea 12: Ho Thusa Liithuti ho Qalisa Lithuto Tsa Bibele le ho li Khanna
Ke habohlokoa hore u etsise Jesu ka ho beha mohlala o motle tšebeletsong ea hao. Ha seithuti sa hao se bona mohlala oo u o behang tšebeletsong, se tla utloisisa hore sepheo sa ho etsa maeto a ho boela ke ho qalisa lithuto tsa Bibele.—km-SU 8/05 leq. 1.
Ho Buella Thuto ea Bibele
◼ Hlalosetsa seithuti hore hangata ha ho hlokahale hore re hlalose tokisetso ea thuto ka ho qaqileng.
◼ Ka tloaelo ho molemo ho bontša kamoo thuto e khannoang kateng u sebelisa serapa se le seng kapa tse peli ka har’a sengoliloeng se ithutoang.
◼ Hlahlobang tlhahiso e ’ngoe ea ho qalisa lithuto tsa Bibele ’me le itlhakisetse eona.—km-SU 8/05 leq. 8; km-SU 1/02 leq. 6.
Ho Koetlisa Liithuti Hore e be Mesuoe
◼ Khothalletsa liithuti ho ngolisa Sekolong sa Tšebeletso sa Puso ea Molimo.
◼ Lokisetsa hore bahoeletsi ba bacha ba tsamaee le uena ha u e-ea lithutong tse ling tsa Bibele moo ba ka ’nang ba e-ba le karolo e itseng thutong.