Amuzitantamuke Zilengwa Eezyi Ciindi Nomweendelezya Ciiyo ca Bbaibbele

Kwaamba zinji: Mutayeeyi kuti mweelede kwaapandulula makani oonse. Jesu wakabelesya mibuzyo kugwasya bantu kuyeeya alimwi akujana bwiinguzi buluzi. (Mt. 17:24-27) Mibuzyo ipa kuti ciiyo kacikkomanisya alimwi imugwasya kubona naa sikwiiya watumvwisya twaambo ntwaaiya akutusyoma. (be 253 munc. 3-4) Nomwabuzya mubuzyo, amukkazike moyo akulindila bwiinguzi. Ikuti sikwiiya wapa bwiinguzi butaluzi, muciindi cakumwaambila bwiinguzi buluzi, amumugwasye kujana bwiinguzi buluzi kwiinda mukubelesya mibuzyo aimwi. (be 238 munc. 1-2) Amwaambe twaambo tupya munzila njakonzya kutumvwisya sikwiiya.—be 230 munc. 4.

Kwaamba Twaambo Tutayandiki: Amweelebe muuya wakuyanda kwaamba zyoonse nzyomuzyi kujatikizya makani ngomubandika. (Joh. 16:12) Amubikkile maano kukaambo kakankaizyigwa mumuncali. (be 226 munc. 4-5) Bupanduluzi bunji, nokuba kuti inga kabukkomanisya, bulakonzya kuzimaazya twaambo tukankaizyigwa. (be 235 munc. 3) Kufwumbwa kuti kaambo kayandika wakamvwisya sikwiiya, amuzumanane mumuncali uutobela.

Kuyiila Buyo Kumanizya Cibalo: Makanze eesu ngakubasika amoyo basikwiiya, kutali kumanizya buyo cibalo. (Lk. 24:32) Amuzibelesye nguzu nzyolijisi Jwi lya Leza kwiinda kubikkila maano kumagwalo aali mucibalo. (2Kor. 10:4; Heb. 4:12; be 144 munc. 1-3) Amubelesye zikozyanyo zyuuba-uba. (be 245 munc. 2-4) Amubuzyibe buyumuyumu mbwajisi sikwiiya alimwi anzyasyoma, alimwi amucince ciiyo kweelana abukkale bwakwe. Amubuzye mibuzyo mbuli yakuti: “Ino mulimvwa buti kujatikizya nzyomwiiya?” “Ino eeci cituyiisya nzi kujatikizya Jehova?” “Mbubotu nzi mbomujana kwiinda mukutobela lulayo oolu?”—be 238 munc. 3-5; 259 munc. 1.