Akʼa jnaʼbeytik sba te beetik yuʼun te Jehová
«Akʼbon kil te beetik awuʼun swenta ya jnaʼbat aba» (Éxodo 33:13).
1, 2. (1) ¿Bin la spas te Moisés kʼalal la yil te jtul egipcio winik yak smajel tul hebreo? (2) ¿Bin talelil la skʼan snop te Moisés yuʼun ya x-abatin ta stojol te Jehová?
TE MOISÉS la yichʼ chʼitesel ta sna te Faraón, te banti la yichʼ pʼijubtesel ta swenta te bin mukʼ skʼoplal ya yil te egipcioetik. Te Moisés snaʼoj te maba egipcio winik te jaʼ talem ta stsʼumbal te hebreoetik. Te kʼalal 40 yaʼbilal-a bajt yil te yermanotak jaʼ te snichʼnab te israeletik. Te kʼalal la yil te ay jtul egipcio winik yak ta smajel jtul hebreo maba lek la yil jaʼ yuʼun la smil te egipcio winik. La snop te jaʼ ya skoltay te lum yuʼun te Jehová sok la skuy te jaʼ yak ta tuuntesel yuʼun te Dios ta skoltayel te yermanotak (Hech. 7:21-25; Heb. 11:24, 25). Te kʼalal la snaʼ stojol te Faraón kʼan smil te Moisés, pero lokʼ ta anel (Éx. 2:11-15). Teme ya xtuuntesot yuʼun Jehová te Moisés ya skʼan te ay snopbey ta lek te beetik yuʼune ¿Jichbal yoʼtan te ya snope?(Sal. 25:9).
2 Te Moisés ay 40 jaʼbil te kʼejel bajt ta kuxinel, pero aʼtej ta jkanantuminchij. Maba ilin yuʼun manchukme maba ichʼot ta mukʼ yuʼun te yermanotak jaʼ la spas te bin ya skʼan yoʼtan te Dios. Manchukme bayal jaʼbil ma la yichʼ naʼel te bin la spas, pero la yakʼ sba ta tojobtesel yuʼun te Dios. Ta swenta te chʼul espíritu yuʼun te Dios ma jaʼuk ta swenta toybail, ta patil jich la stsʼibay: «Te winic Moisés mero peqʼuel yoʼtan ta winiquil, cʼax hich a te bin utʼil spisil winiquetic ayic ta bahlumilal» (Núm. 12:3). Te Jehová bayal bin-utʼil la stuuntes te Moisés. Te Jehová ya yakʼbotik bayal bendición teme ya kakʼtik ta ilel pekʼel oʼtanil (Sof. 2:3).
La yichʼ akʼbeyel yaʼtel
3, 4. (1) ¿Bin aʼtelil akʼbot te Moisés yuʼun te Jehová? (2) ¿Bin koltayel la yichʼ akʼbeyel te Moisés?
3 Ta jun buelta te Moisés kʼoponot yuʼun te Jehová ta swenta jtul chʼul abat nopol ta wits Horeb ta península yuʼun Sinaí. Jich la yalbey: «Ta melel, kiloj te swokol te lum kuʼun ta Egipto sok kaʼiyoj te yajkanik ta skaj te mosoinele. Jnaʼoj ta lek te swokolike. Jaʼ yuʼun ya xkoon bael ta skoltayel lokʼel ta skʼab te egipcioetik yuʼun ya kikʼ bael ta lekil kʼinal te mukʼnaxe te banti ya yakʼ bayal leche sok chab» (Éx. 3:2, 7, 8). Ta swenta te jich snopoj ya spas te Jehová la yakʼbey yaʼtel te Moisés, pero jaʼ jich te bitʼil ya skʼan stukele.
4 Te chʼul abat yuʼun te Jehová jich la yalxan: «Laʼme jiche, yame jtikunat bael ta stojol te faraone. Jaʼatme ya alokʼesbon tal ta Egipto te lum kuʼune, jaʼ te israeletike» Te Moisés ma la snaʼ bin la yal yuʼun. Maba chapal la yaʼiy sba, ta melel yuʼun-nix ma xjuʼ yuʼun ta stukel-a. Pero, te Jehová jich jamal la yalbey: «Joʼonme ya jokinat» (Éx. 3:10-12). Te Jehová la yakʼbey yuʼel te Moisés yuʼun ya spas milagroetik jich la yakʼ ta ilel te yuʼun-nix jaʼ tikunbil yuʼun-a te Diose. Jaʼ jokinot yuʼun te Aarón yuʼun jaʼ ya skʼases te kʼope sok jaʼnix te Jehová ya yal te bin ya yalik sok te bin ya spasik (Éx. 4:1-17). ¿Junbal yoʼtan ya skʼotes ta pasel te Moisés te aʼtelil akʼbote?
5. ¿Bin wokolil la sta te Moisés ta swenta te stalel te israeletike?
5 Ta sjajchibal te ancianoetik ta Israel la schʼuunbeyik te bin la yal te Moisés sok te Aarón (Éx. 4:29-31). Ta patil bael «te jkoltaywanejetik te jaʼik israeletik» jaʼ la yakʼbeyik smulin te Moisés sok te Aarón te ilayotik yuʼun te faraón sok te j-abatetik yuʼun (Éx. 5:19-21; 6:9). Te kʼalal lokʼik bael ta Egipto te israeletik jajchik ta xiwel, melel la yilik te yakik ta nutsel yuʼun te egipcioetik. Te kʼalal kʼotik ta mar Rojo jich la yilik te maʼyuk banti ya xbajtikix, jaʼ yuʼun la yakʼbeyik smulin te Moisés ¿Bin la apas te jaʼukate? Manchukme te israeletik maʼyuk sbarcoik, pero te Moisés la yal te yakuk sjach te scampamentoik, melel jich la yal ta mantal te Jehová. Te Jehová la xat te mar Rojo jich te israeletik kʼaxik bael ta takin lum (Éx. 14:1-22).
Te kolel ma jaʼuk te bin mukʼxan skʼoplal
6. ¿Bin mukʼ skʼoplal la yakʼ ta naʼel te Jehová kʼalal la yakʼbey yaʼtel te Moisés?
6 Te Jehová la yakʼ ta naʼel te mukʼ skʼoplal te sbiile kʼalal la yakʼbey yaʼtel te Moisés. Mukʼ skʼoplal te ya kichʼtik ta mukʼ te biilil-abi sok te machʼa yichʼoj te biilile. Te kʼalal te Moisés la sjojkʼoybey ta swenta te sbiile, te Jehová jich la yal: «JOʼON JICH YA XKʼOON TE BITʼIL YA SKʼAN KOʼTANE». Jaʼnix jich te Moisés jich ya skʼan yalbey te israeletik: «Te Jehová, te Dios yuʼun te antiguo ameʼ atatik, te Dios yuʼun te Abrahán, te Dios yuʼun Isaac sok te Dios yuʼun te Jacob la stikunon tal ta atojolik». Te Jehová jich la yalxan: «Jaʼme jich jbiil ta sbajtelkʼinal sok jaʼme jich ya kichʼ naʼbeyel jba ta kajalkaj tsʼumbaliletik» (Éx. 3:13-15). Te j-abatetik yuʼun ta swolol Balumilal ya snaʼik te sbiile, jaʼ Jehová (Is. 12:4, 5; 43:10-12).
7. ¿Bin la spas te Moisés ta schʼuunbeyel smantal te Dios manchukme kʼax tulan yoʼtan te faraón?
7 Te Moisés sok te Aarón la kʼasesbeyik skʼop te Jehová ta stojol te faraón. Pero, te faraón sok stoybail yoʼtan la yal: «¿Machʼa-a te Jehová swenta ya jchʼuunbey skʼop sok te ya kakʼ lokʼel te Israel? Maba ya jnaʼbey sba te Jehová sok maba ya kakʼ lokʼel te Israel» (Éx. 5:1, 2). Manchukme te faraón mero jpaslot sok tulan yoʼtan te Jehová la stikun te Moisés ta yalbeyel skʼop ta cheb oxeb buelta (Éx. 7:14-16, 20-23; 8:1, 2, 20). Te Moisés la yil te kʼax ilinem te faraone ¿Lekbal te ya xbajt skʼopon yan buelta? Te israeletike ya skʼan ya sta skolelik, pero te faraón ma xyakʼ lokʼel ¿Binwan la jpastik te teyuk ayotik-ae?
8. ¿Bin lek lokʼ-a ta swenta te bin la spas Jehová ta stojol te faraón sok bin ya skʼan ya yakʼ jnoptik-euk?
8 Te Moisés la skʼopon yan buelta te faraón jich la yalbey: «Jich la yal te Jehová te Dios yuʼun te hebreoetik: ‹Akʼa lokʼel te lum kuʼun yuʼun ya yichʼon ta mukʼ›». Jich la yalxan te Diose: «Te lajuk jkʼane, juʼ kuʼun sjachel jkʼab ta atojol sok ta stojol te lum awuʼun yuʼun ya kakʼbat castigo ta swenta jun chamel te ya xmilawan, jich maba kuxulatix te jichuke. Pero kakʼoj te ya xkuxinatxan ta swenta ini: yuʼun ya kakʼbat awil te kuʼel sok yuʼun ya yichʼ pukbeyel skʼoplal jbiil ta swolol balumilal» (Éx. 9:13-16). Ta swenta te castigo ya xbajt yakʼbey te faraón, te Jehová ya sjultesbey ta yoʼtan te machʼatik ya stoy sba ta stojol te yuʼun-nix ay yuʼel stukel-a. Tey ochem skʼoplal-a te Satanás «te ajwalil yuʼun te balumilale» te jich la sbiilintes te Jesús (Juan 14:30; Rom. 9:17-24). Jich bitʼil la yichʼ alel te sbiil te Jehová la yichʼ alel ta swolol Balumilal. Te bitʼil la snaʼ maliywanej te Jehová, te israeletik sok yantik ants winiketik te la skʼan yichʼik ta mukʼ te Jehová la sta skolelik (Éx. 9:20, 21; 12:37, 38). Jaʼto tal-abi te bitʼil yichʼoj alel sbiil te Jehová, bayal millón ta tul ants winiketik snopojik te smelelil kʼop
Jpam lum te tulan yoʼtane
9. ¿Bin-utʼil la yakʼ ta ilel te lum israel te ma xyichʼik ta mukʼ te Jehová?
9 Te hebreoetike snaʼojik-a bin sbiil te Diose sok te Moisés la stuuntes, pero ma spisiluk-ora la yichʼik ta mukʼ te machʼa yichʼoj te biilil-abi. Mato ayuk bayal kʼajkʼal kʼaxem-a kʼalal te Jehová la skoltay lokʼel te israeletik ta Egipto la yilik te wokol ta tael te jaʼe ¿Bin la spasik? jajchik ta wulwulkʼop ta stojol te Moisés, jaʼnix jich ta swenta te weʼelile. Te Moisés la yalbey ta jamal te ma jaʼuk yakik ta wulwulkʼop ta stojol ni jaʼuk ta stojol te Aarón, jaʼ ta stojol te Jehová (Éx. 15:22-24; 16:2-12). Ta wits Sinaí te Jehová la yakʼbey Ley te israeletike. Pero la skʼaxuntayik mantal sok la spasik slokʼomba jkojt kolel toro yuʼun ya yichʼik ta mukʼ, la yalik te jaʼ «kʼin ta stojol te Jehová» (Éx. 32:1-9).
10. ¿Bin yuʼun mukʼ skʼoplal ta yoʼtan te ancianoetik te bin la skʼan te Moisés ta Éxodo 33:13?
10 ¿Bin utʼil la skoltay Moisés te lum yuʼun Jehová te tulan yoʼtane? Te Moisés jich la yalbey te Jehová: «Teme lek ya awilone, awokoluk, akʼbon kil te beetik awuʼun swenta ya jnaʼbat aba sok swenta lekxan ya awilon» (Éx. 33:13). Ta jkʼajkʼaleltik te ancianoetik ya skanantayik te tuminchijetik yuʼun te Jehová te ayxan spekʼelil yoʼtanik bitʼil te israeletike. Jaʼnix jich ya skʼanik ta oración: «Aʼbon quil te behetic awuʼun, Jehová; aʼbon jnaʼ te behetic awuʼune» (Sal. 25:4). Kʼalal te ancianoetik ya snaʼik te beetik yuʼun te Jehová ya snaʼik bin-utʼil ya schajpanik te kʼopetik jich bitʼil ya skʼan te Jehová sok te bitʼil ya yal te skʼope.
Te bin ya skʼan te Jehová ta stojol te lum yuʼun
11. ¿Bintik mantaliletik la yal te Jehová ta stojol te Moisés sok bin yuʼun te ya xtuun kuʼuntike?
11 Ta wits Sinaí te Jehová la yal ta jamal te bin ya skʼan ta stojol te lum yuʼune sok ta patil te Moisés la yichʼ akʼbeyel chaʼpejch tonetik te banti yichʼoj tsʼibayel te Lajuneb Mantaliletik. Pero kʼalal ko tal ta wits sok la yil te israeletik te yakik ta yichʼel ta mukʼ te slokʼombail kolel toro te israeletik te Moisés kʼax bayal ilin ja yuʼun la schʼoj koel ta lum te chaʼpejch tonetik te jich wuy ta kʼaxel. Te Jehová la stsʼibay yan buelta te Lajuneb Mantaliletik ta yan chaʼpejch tonetik te jaʼnix schajpanoj te Moisés (Éx. 32:19; 34:1). Te mantaliletik ini jaʼ pajal sok te bin-utʼil ta nailal sok ya skʼan schʼuun spasel te Moisés. Te Jehová jamal la yal te bintik taleliletik ay yuʼun, jich ya yakʼbey yil te jichnix ya skʼan ya yakʼ ta ilel euk, melel jaʼ akʼbil yaʼtel yuʼun te Jehová. Te jchʼuunjeletik maba wentainbilikix yuʼun te Ley yuʼun Moisés, pero te bin la yal te Jehová ta stojol te Moisés maba jelonem sok yato xtuun kuʼuntik ta kʼajkʼal ini te bitʼil j-abatotik yuʼun te Jehová (Rom. 6:14; 13:8-10). Kiltik cheʼoxebuk.
12. ¿Bin-utʼil la yakʼik ta ilel te israeletik te jaʼnax ya yichʼik ta mukʼ te Jehová?
12 Jaʼnax ya kichʼtik ta mukʼ te Jehová. Te lum israel la yaʼiyik stojol kʼalal te Jehová la yal te jaʼnax ya skʼan ichʼel ta mukʼe (Éx. 20:2-5). Te israeletik ay bayal pruebaetik yuʼunik te bitʼil jaʼ smelelil Dios te Jehová (Deut. 4:33-35). Te Jehová jamal la yal te manchuk ya snopbeyik stalel te yantik nacionetik, te manchuk ya yichʼik ta mukʼ lokʼombaetik sok te manchuk ya spasik te espiritismo. Te kʼalal ya yichʼik ta mukʼ te Jehová ya skʼan te yuʼun-nix smelelil-a. Ya skʼan te kʼuxuk ta yoʼtanik te Jehová sok spisil skuxlejalik sok spisil yipik (Deut. 6:5, 6). Te kuxul oʼtanil-abi ya skʼan ya chiknaj ta ilel ta swenta te bin ya yalik, ta stalelik sok ta spisil te skuxlejalik (Lev. 20:27; 24:15, 16; 26:1). Jaʼnix jich te Jesús la ya te jaʼnax ya skʼan ya kichʼtik ta mukʼ te Jehová (Mar. 12:28-30; Luc. 4:8).
13. ¿Bin yuʼun te ya skʼan ya schʼuunik spasel spisil te mantaliletik yuʼun Dios te israeletik? (Eclesiastés 12:13).
13 Jchʼuuntik spisil te mantaliletik yuʼun te Jehová. Te lum Israel ya skʼan te ya xjul ta yoʼtanik te kʼalal la schʼuunik te chapbil kʼop la spasik sok te Jehová jaʼnix jich jamal la yalik te schʼuunik spasel spisil te bintik ya yal te Jehová. Ta jujun tul libre ayik ta spasel te bin ya skʼanik, pero ta swenta te mantaliletik akʼbotik yuʼun te Jehová ya skʼan ya schʼuunik spasel spisil. Teme jich ya spasike jich ya yakʼik ta ilel te kʼux ta yoʼtanik te Dios sok ya staik lekilal yuʼun sok te stsʼumbalike, melel spisil te bin ya xkʼanbotik te Jehová jaʼ ta swenta slekilalik (Éx. 19:5-8; Deut. 5:27-33; 11:22, 23).
14. ¿Bin-utʼil la yalbey Jehová te lum Israel te mukʼ skʼoplal te jaʼ nail ya yakʼ ta skuxlejalik te aʼteliletik yuʼun te Diose?
14 Jaʼuk nail ya kakʼ ta jkuxlejaltik te bintik yuʼun te Diose . Te israeletik ya skʼan te manchuk jaʼuk ya xbajt ta yoʼtanik sleel te bintik ya xtuun yuʼunik ta jujun kʼajkʼal, melel ya xjuʼ ya xchʼay ta yoʼtanik spasel te aʼteliletik yuʼun te Diose. Maba lek te jaʼnax ya xbajt ta yoʼtanik spasel te yaʼtelik ta jujun kʼajkʼal. Te Jehová la yakʼ jun kʼajkʼal ta jun semana yuʼun ya yichʼik ta mukʼ sok ya spasik te aʼtelil yuʼun Dios. Ta yorail-abi jaʼnax ya spasik aʼteliletik ta swenta yichʼel ta mukʼ te smelelil Diose (Éx.35:1-3; Núm. 15:32-36). Jaʼnix jich ta jujun jaʼbil ya skʼan te ya yakʼ stiempoik yuʼun ya xbajtik ta chʼul tsoblejetik (Lev. 23:4-44). Te kʼalal jich ya spasike ya xjuʼ ya scholbey sbaik tey-a te bin-utʼil yakʼoj ta ilel yuʼel te Jehová, ya xjuʼ ya sjultes ta yoʼtanik te mantaliletik yuʼun sok jich ya xjuʼ ya yalbeyik wokol ta swenta te slekil yoʼtane. Kʼalal ya yakʼik ta ilel te ya yichʼik ta mukʼ te Jehová te lum israel ya xchʼixan te skʼuxul yoʼtanik sok ya xiʼik xan te Diose sok jaʼnix jich ya yichʼik xan koltayel yuʼun ya xbeenik xan ta beetik yuʼun te Jehová (Deut. 10:12, 13). Te lekil mantaliletik te la yichʼik akʼbeyele jaʼnix jich ya xtuun kuʼuntik ta kʼajkʼal ini te bitʼil j-abatotik yuʼun te Diose (Heb. 10:24, 25).
Jnoptikxan ta lek te taleliletik yuʼun te Jehová
15. (1) ¿Bin-utʼil koltayot te Moisés te la snop ta lek te taleliletik yuʼun te Jehová? (2) ¿Bintik jojkʼoyeletik ya xjuʼ ya skoltayotik yuʼun ya xkʼot ta koʼtantik te taleliletik yuʼun te Jehová?
15 Kʼalal te Moisés la snop xan ta lek ta swenta te taleliletik yuʼun te Jehová koltayot yuʼun ya snaʼ ta lek swentainel te lume. Ta Éxodo 34:5-7 ya yal te Jehová kʼax bael ta stojol te Moisés sok jich la yal: «Jehová, Jehová, jaʼ jun Dios te ya snaʼbey yoʼbolil sba te yantik, te ay yutsil yoʼtan, te ma x-ilin ta ora, te ya yakʼ ta ilel kʼuxul oʼtanil te ma x-ijkitaywan sok te smelelil ya xkʼopoj, te ya yakʼbey yil skʼuxul yoʼtan te ma x-ijkitaywan bayal ta mil, te ya spasbey perdón te machʼa ay bin ma lek ya spas, te jkʼaxunkʼop sok te machʼa ya spas mulil, pero yananix yakʼbey castigo-a te machʼa ay smul sok ta swenta te smul te meʼil tatil yame xkʼot castigo ta stojol te yal snichʼnab, smamatak soknix te yoxkajal sok schankajal stsʼumbal». Jlokʼestik tiempo ta snopilanel ta koʼtantik ta swenta ini. Jojkʼoybey jbatik: ¿Bin ya skʼan ya yal te jujun taleliletik ini? ¿Bin-utʼil yakʼoj ta ilel te Jehová? ¿Bin-utʼil ya xjuʼ ya yakʼik ta ilel te machʼatik yichʼoj yaʼtelik ta congregación? ¿Bin-utʼil ya skoltayotik te taleliletik ini kʼalal ay bin ya jpastik? Kiltik cheb oxebuk ejemploetik.
16. ¿Bin-utʼil ya xkʼotxan ta koʼtantik ta lek te bitʼil ya snaʼbotik yoʼbolil bajtik te Dios sok bin yuʼun te mukʼ skʼoplal te jich ya jpastike?
16 Te «Jehová, jaʼ jun Dios te ya snaʼbey yoʼbolil sba te yantik, te ay yutsil yoʼtan» teme ay awuʼun te Libro Perspicacia para comprender las Escrituras, ¿bin yuʼun te maba ya akʼopon te banti ya yal «Misericordia»? Jaʼnix jich ya xjuʼ ya awilbeyxan skʼoplal ta Índice de las publicaciones Watch Tower o ta Watchtower Library.a Jletik te lista te banti ya yalbey skʼoplal te talelil ini yuʼun jich ya jtatik-a te textoetik yuʼun Biblia te ya yalbey skʼoplal. Kʼalal ya xkʼot ta koʼtantik te ya snaʼ yoʼbolil bajtik te Jehová ya jtatik ta ilel te maba tulan te castigo ya yakʼe sok te ya yakʼ ta ilel slekil yoʼtan. Ya xtijbot yoʼtan te Dios ini yuʼun ya skoltay-a te lum yuʼune. Jich la yakʼ ta ilel te Jehová kʼalal la yakʼbey te israeletik te bin ya xtuun yuʼun te sbakʼetalik sok te schʼuunel yoʼtanik kʼalal beenik bael ta lum kʼinal te albil skʼoplal te ya yichʼike (Deut. 1:30-33; 8:4). Ja nix jich la yakʼ ta ilel te ya snaʼtiklanbey yoʼbolil sbaik kʼalal la spasbey perdón te smulike jamal chikan ta ilel te la snaʼbey yoʼbolil sba te lum yuʼun te Jehová ta namey kʼinal. ¡Kʼaxemtoxan-a te ta jkʼajkʼaleltike te j-abatetik yuʼun te Dios ya skʼan te talel kʼaxel ya yakʼbey sba yilik te slekil yoʼtanike! (Mat. 9:13; 18:21-35).
17. ¿Te kʼalal ya xkʼot ta koʼtantik te yutsil yoʼtan te Jehová bin-utʼil ya skoltayotik yuʼun ya kakʼtik ta ilel te smelelil yichʼel ta mukʼ te Diose?
17 Te kʼalal ya snaʼ yoʼbolil jbatik te Jehová jaʼnix jich ya yakʼ ta ilel te yutsil yoʼtan. Teme ay adiccionario lea te kʼopil benévolo. Te kʼalal ya ata te bin ya skʼan ya yal paja sok te textoetik yuʼun Biblia te banti yichʼoj tal te kʼopil ini. Kʼalal te Biblia ya yalbey skʼoplal te yutsil yoʼtan te Jehová ya skʼan ya yal te ya yakʼ ta ilel skʼuxul yoʼtan ta stojol te j-abatetik yuʼun te ya kʼax swokolik (Éx. 22:26, 27). Te machʼatik ya xbajtik ta yan nación ay ya sta swokolik. Pero, te Jehová snojptesoj te j-abatetik yuʼun te ya skʼan ya yakʼ ta ilel yutsil yoʼtanik ta stojol te ants winiketik-abi sok jultesbot ta yoʼtanik te jich kʼot ta stojolik ta lum Egipto (Deut. 24:17-22). ¿Bin ya xjuʼ ay spasik te j-abatetik yuʼun Dios ta kʼajkʼal ini? Te yutsil oʼtanil ya yakʼ te jun-nax ayotik sok ya xtijbot yoʼtan yantik ants winiketik yuʼun ya xnoptsajik ta stojol te Jehová (Hech. 10:34, 35; Apoc. 7:9, 10).
18. ¿Bin ya yakʼ jnoptik kʼalal te Jehová la yalbey te israel te manchuk ya snopik te bin ya spasik te yantik nacionetik?
18 Te slekil yoʼtanik te israeletik ta stojol te ants winiketik te yan snacionik ya skʼan te maba ya spejkʼanbey skʼoplal te skʼuxul yoʼtanik ta stojol te Jehová sok te mantaliletik yuʼune. Jaʼ yuʼun te israeletik la yichʼik albeyel te manchuk ya snopbeyik stalel te nacionetik te ay ta sjoyobalik, jich bitʼil te costumbre yuʼunik ta swenta sreligionik sok te muliletik te spasik ta skuxlejalike (Éx. 34:11-16; Deut. 7:1-4). Jaʼnix jich ta kʼajkʼal ini, ya skʼan te jich ya jpastik euk ta skaj te jaʼ ya kichʼtik ta mukʼ te Jehová te jaʼ chʼul Dios jaʼnix jich te lumotik yuʼune ya skʼan te chʼultesbilukotik (1 Ped. 1:15, 16.
19. ¿Bin-utʼil ya skoltayotik te kʼalal ya xkʼot ta koʼtantik te bin yilel ya yil te Jehová te muliletike?
19 Swenta ya xkʼot ta yoʼtan te Moisés te beetik yuʼun te Jehová, jaʼnix albot te maba lek ya yil te muliletike, pero jaʼnix jich albot te maba ora ya x-iline. Te Jehová ya yakʼbey tiempo te ants winiketik yuʼun ya snopik te mantaliletik yuʼun sok yuʼun ya spas ta skuxlejalik. Te Jehová ya spasbey perdón te machʼatik ya spasik mulil teme ya sujtes yoʼtanik, pero jaʼnix jich ya yakʼbey castigo te machʼatik ya spasik tulan muliletik. Jamal la yalbey te Moisés ta swenta te bin ya spas te israeletik ya xjuʼ ya staik lekilal o wokolil te yal snichʼnabik. Snaʼel te beetik yuʼun te Jehová ya xkoltayot te j-abatetik yuʼune, yuʼun maba ya snopik te maʼyuk bin yak ta spasel te Diose sok te maba ya yakʼbeyik smulin te wokolil te ya staik ta skaj te ay bin maba lek ya spasike.
20. ¿Bin ya skoltayotik yuʼun lekuk ya kiltik te kermanotaktik sok te ants winiketik te ya jtatik ta scholel skʼop Dios? (Salmo 86:11)
20 Teme ya jkʼantik te ya jnoptikxan ta stojol te Jehová sok te mantaliletik yuʼune jpastik tulan te ya jkʼopontik te Biblia sok te ya jnopilan ta koʼtantik te bin ya jkʼopontike. Akʼa jnopbeytik skʼoplal te tʼujbil taleliletik yuʼun te Jehová. Jkʼanbeytik te Jehová ta swenta oración yuʼun ya yakʼ kiltik te bin-utʼil ya xjuʼ jkʼayintik ta lek te lekil taleliletik yuʼune sok bin-utʼil ya jpastikxan ta jkuxlejaltik te skʼanojel yoʼtane. Te kʼalal jich ya jpastike ya skoltayotik yuʼun maba ya jtatik wokolil, te lekuk ya kiltik te kermanotaktik sok te yakuk jkoltaytik yantik ants winiketik ta snaʼbeyel sba te Jehová sok te kʼuxuk ta yoʼtanik .
[Nota]
a Spisil te junetik ini jaʼ spasojik te testigoetik yuʼun Jehová.
¿Bin la jnoptik?
• ¿Bin yuʼun mukʼ skʼoplal la yil te Moisés te pekʼel oʼtanil sok bin yuʼun mukʼ skʼoplal ya skʼan ya kiltik euk?
• ¿Bin lek lokʼ-a te bitʼil te Moisés bayal buelta bajt yil te faraón ta yalbeyel te skʼop te Jehová?
• ¿Bintik mantalil la snop te Moisés te jaʼnix jich ya xtuun kuʼuntik ta kʼajkʼal ini?
• ¿Bin-utʼil ya xjuʼ jnoptikxan ta lek te taleliletik yuʼun te Jehová?
[Foto]
Te Moisés jamal la yal te skʼop te Jehová ta stojol te Faraón
[Foto]
Te Jehová la yalbey te Moisés te mantaliletik yuʼune
[Foto]
Akʼa jnopilan ta koʼtantik te mantaliletik yuʼun te Jehová