STÙDIO 6
Cossa che la Bìblia la ne insegna sora Geovà?
“Scrivi nte un libro tute le parole che mi te digo.” — GER. 30:2.
CÀNTICO 96 Un libro tanto pressioso
COSSA CHE NDAREMO IMPARAR?a
1. Parché che ghe demo tanto valor ala Bìblia?
NOANTRI ghe demo tanto valor ala Parola de Dio, la Bìblia! Geovà la dopera par darne consili che i ne giuta a dàrghene fora coi problemi ancoi e par darne una bela speransa par el futuro. Ma el pi importante l’è che, par meso dela Bìblia, podemo imparar sora le bele qualità de Geovà. Se ghe pensemo sora queste bele qualità, gavaremo ancora pi voia de esser so amighi. — Sal. 25:14.
2. De che maniere Geovà el se fà cognosser ale persone?
2 Geovà el vol che tute le persone lo cognossa. Nel passà, lu el ga parlà con lore par meso de àngeli, de vision e de quel che arquanti i se ga insognà. (Nùm. 12:6; Ati 10:3, 4) Ma, Geovà el ga scoliesto arquanti òmini par scriver do quel che ga sucedesto. Cossita, tuti i pol cognosserlo anca ancoi. (Ger. 30:2) Semo sicuri che la maniera che Dio el ga scoliesto par parlar con noantri la ze la meio che ghen’è parché tuto quel che lu el fà l’è perfeto. — Sal. 18:30.
3. Come che Geovà el ga tendesto dela so Parola fin ancoi? (Isaia 40:8)
3 Ledi Isaia 40:8.b La Bìblia la ze stata scrita in robe che se ga rovinà col tempo. Par quela, no se cata pi quel che i ga doperà par scriverla. Ma, fin ancoi, òmini e done fedeli i pol capir quel che Dio el vol. Come cossita? Geovà el ga doperà arquanti òmini par far còpie dela so Parola. Ancora che quei òmini i era imperfeti, lori i ga fato un bel laoro. Un studioso el ga dito che i libri che i ze stati scriti nel passà i ga cambià, ma la Bìblia la ze ancora compagna. Alora, anca se la Bìblia la ze stata scrita fà tanti ani in robe che se ga fato fora col tempo e che òmini imperfeti i la ga copiada, semo sicuri che la ze pròpio la Parola de Dio.
4. Cossa che ndaremo imparar in questo stùdio?
4 Tute le robe bele le vien de Geovà. (Tia. 1:17) Podemo dir che la Bìblia la ze una dele robe pi bele che Geovà el ne ga dato. Parché? Parché quando guadagnemo un presente, savemo che la persona che la ne ga dato ne cognosse tanto ben. La medèsima roba sucede cola Bìblia, parché la mostra che Geovà el ne cognosse e el sa de tuto quel che ne ocore. Quando studiemo la Bìblia, lo cognossemo ancora de pi. In questo stùdio, ndaremo imparar quel che la Bìblia la ne insegna sora tre qualità de Geovà, che le ze la sabedoria, la giustìssia e el amor.
LA BÌBLIA LA MOSTRA LA SABEDORIA DE DIO
5. Come che la Bìblia la mostra la sabedoria de Dio?
5 Geovà el sa che ghemo bisogno dela so sabedoria. Par quela, lu el ga metesto tanti bei consili nela so Parola. Questi consili i pol cambiar la vita dele persone e giutarle tanto. Quando Moisè el ga scrito i primi libri dela Bìblia, lu el ga dito ai israeliti che la Parola de Dio la podea giutarli a viver ben. (Deu. 32:47) Alora, se i metesse in pràtica quei consili, lori i gavaria una vita tanto pi felice. (Sal. 1:2, 3) Anca se la Bìblia la ze stata scrita tanto tempo indrio, ancora la ga el poder de cambiar la vita dele persone. Par esémpio, nel jw.org, ghen’è i artìcoli “La Bìblia la càmbia la vita dele persone”. Questi artìcoli i mostra la stòria de tante persone che le ga metesto in pràtica i consili dela Bìblia e le ze tanto pi felice. — 1 Tes. 2:13.
6. Parché che la Bìblia la ze difarente de tuti altri libri?
6 Ancoi le persone le lede tanti libri, ma col tempo, i consili de questi libri i deventa veci e i so scritori i more. Invesse, la Bìblia la ze tanto difarente. Parché? Parché la vien de Geovà, che l’è eterno, el Tuto Poderoso, e el ga pi sabedoria che tuti. I consili che ghen’è nela Bìblia i ze boni de giutar le persone fin ancoi. Alora, quando ledemo la Bìblia e ghe pensemo sora quel che imparemo, Geovà el dopera el so spìrito santo par giutarne a far quel che lu el vol. (Sal. 119:27; Mal. 3:16; Ebr. 4:12) Sicuro che, saver che Geovà el vol giutarne, ne fà voia de leder sempre la Bìblia!
Come che la Bìblia la ga giutà i servi de Dio nel passà a restar unidi? E come che la giuta i servi de Dio anca ancoi? (Varda i paràgrafi 7 e 8.)
7. Come che la Parola de Dio la ga giutà i servi de Geovà a esser unidi?
7 Noantri anca vedemo la sabedoria de Geovà nela Bìblia parché lu la ga doperada par giutar so servi a restar unidi. Par esémpio, quando i israeliti i ze ndati rento la Tera Prometesta, cada un l’è ndato par una banda e i gavea laori difarenti un del altro. Alora, saria tanto fàcile che lori no i se catesse pi, e no i fusse pi boni de incoraiarse. Par quela, Geovà el ghe ga dito che lori i gavea de riunirse par scoltar la Lege. (Deu. 31:10-13; Nee. 8:2, 8, 18) Sicuro che i israeliti i restea tanto contenti de ndar fin Gerusalen e catarse con altri milioni de servi de Geovà. Nela època dei primi dissìpoli de Gesù, ghen’era persone importante e siore nela congregassion, e persone poarete. Lori i era difarenti un del altro, ma i amea la Parola de Dio e i restea unidi par adorarlo. Cossita, i era boni de capir la Parola de Dio parché i la studiea insieme. — Ati 2:42; 8:30, 31.
8. Come che la Bìblia la ne giuta a restar unidi?
8 Par meso dela Bìblia, Dio el ne insegna tuto quel che ne ocore saver e el ne giuta a restar unidi. Tuto quel che imparemo vien dela Bìblia. Alora, noantri ndemo ale riunion, assemblee e congressi par leder la Bìblia, studiarla e imparar sora Geovà. Cossita, podemo dir che Geovà el dopera la so Parola par giutar i so servi a “adorarlo in union”. — Sof. 3:9.
9. Che qualità ghemo de bisogno par capir la Bìblia? (Luca 10:21)
9 Nantra roba che mostra la sabedoria de Geovà la ze la maniera che la Bìblia la ze stata scrita. Parché? Parché tuti i pol lederla, ma sol i ùmili i pol capirla. (Ledi Luca 10:21.c) Un studioso el ga dito che la Bìblia la ze el libro pi ledesto nel mondo, e che le persone lede con de pi atension. Ma sol quei che i ze ùmili i ze boni de capir i so consili e meterli in pràtica. — 2 Cor. 3:15, 16.
10. Come ancora la Bìblia la mostra la sabedoria de Geovà?
10 La Bìblia anca la mostra la sabedoria de Geovà parché la ze stata scrita par tute le persone, ma la pol giutar e dar consolo a cada un de noantri. Par quela che, quando te ledi la Bìblia, te vedi che Geovà el se preocupa tanto con ti. (Isa. 30:21) Te ga belche sucedesto de catar fora un versìcolo che l’era pròpio quel che te gavei de bisogno? Questo sucede anca con milioni de persone. Una roba de queste sol la pol suceder parché la Bìblia la ze stata scrita par Geovà, che l’è la persona con de pi sabedoria che ghen’è. — 2 Tim. 3:16, 17.
LA BÌBLIA LA MOSTRA LA GIUSTÌSSIA DE DIO
11. Come che Dio el ga mostrà giustìssia quando la Bìblia la ze stata scrita?
11 La giustìssia la ze nantra qualità de Geovà. (Deu. 32:4) Una persona giusta la trata tute le persone dela stessa maniera, e Geovà l’è pròpio cossita. (Ati 10:34, 35; Rom. 2:11) Podemo veder la giustìssia de Geovà quando ghe pensemo sora le léngue che le ze state doperade par scriver la Bìblia. I primi 39 libri i ze stati scriti in ebraico, che l’era la léngua che el pòpolo de Dio el parlea. Ma nel primo sècolo, le persone le parlea de pi el greco. Par quela, i altri 27 libri dela Bìblia i ze stati scriti in questa léngua. Alora, Geovà no’l ga mia fato che la so Parola la fusse scrita sol nte una léngua. Ma, come che ancoi quasi 8 bilioni de persone che le parla tante léngue le pol imparar sora Geovà?
12. Come che l’è drio suceder quel che l’è scrito in Daniel 12:4?
12 Nel libro de Daniel, Geovà el ga dito che tanti i ndaria saver dela verità, o sia, i ndaria capir la Bìblia. (Ledi Daniel 12:4.d) E l’è pròpio quel che vedemo ancoi in tuto el mondo. La Bìblia e altre publicassion che le giuta a capirla le ze state traduside e stampade in tante léngue. La Bìblia la ze el libro pi tradusio che ghen’è, e tute le persone le pol comprarla. Magari, arquante Bìblie le costa massa. Alora, el pòpolo de Dio el ga tradusio la Bìblia in de pi de 240 léngue, e le persone le pol gaverla sensa pagar gnente. Cossita, persone de tuto el mondo le ze drio imparar dele “bone notìssie del Regno” vanti del fin. (Mat. 24:14) Vedemo che el nostro Dio Geovà l’è giusto parché el vol che tute le persone lo cognossa par meso dela so Parola. Sicuro che Geovà el ama tanto a tute le persone.
LA BÌBLIA LA MOSTRA EL AMOR DE DIO
13. Parché che la Bìblia la mostra el amor de Geovà? (Gioani 21:25)
13 La Bìblia anca la mostra el amor de Geovà, che l’è la so pi granda qualità. (1 Gio. 4:8) Par meso dela Bìblia, Geovà el dise tuto quel che ghemo de far par esser so amighi, esser felici e viver par sempre. Ma, no la parla mia una mùcia de robe che fursi no sarìssino boni de capir. — Ledi Gioani 21:25.e
14. De che nantra maniera la Bìblia la mostra el amor de Geovà?
14 Varda nantra maniera che la Bìblia la ne giuta a capir el amor de Geovà. Invesse de esser una mùcia de lege che ne dise quel che podemo e no podemo far, Geovà el dopera la so Parola par insegnarne par meso de esempi del passà, de bele professie e de consili che i ne giuta tanto. Cossita, la Bìblia la ne giuta a amar a Geovà e a voler obedirlo de tuto el cuor.
Parché che ghemo de pensarghe sora la maniera che Geovà el ga tratà so servi nel passà? (Varda el paràgrafo 15.)
15. (a) Parché che la Bìblia la mostra che Geovà el ne vol tanto ben? (b) Sora che servi de Geovà del passà la toseta, el fradel e la sorela pi vècia i ze drio pensar? (Varda la ilustrassion. Génesi 39:1, 10-12; 2 Rè 5:1-3; Luca 2:25-38)
15 La Bìblia la mostra che Geovà el ne vol tanto ben parché la parla de persone che le se sentia compagno noantri se sentimo ancoi. (Tia. 5:17) Ma el pi importante l’è che, quando studiemo come Geovà el ga tratà so servi nel passà, vedemo che lu el ga tanta misericòrdia e amor. — Tia. 5:11.
16. Cossa che imparemo sora Geovà quando ledemo sora so servi del passà che i ga fato pecati? (Isaia 55:7)
16 La Bìblia la ne mostra el amor de Geovà anca de nantra maniera. Varda come lu el tratea i so servi del passà quando lori i fea sbali. I israeliti i ga pecà diverse volte, ma quando i se ga ciamà grami, Geovà li ga perdonadi. (Ledi Isaia 55:7.f) Nela època dei primi dissìpoli de Cristo, un omo el se gavea ciamà gramo dei so bruti pecati. Par quela, el apòstolo Paolo el ga dito che i fradei i gavea de perdonarlo e consolarlo. (2 Cor. 2:6, 7; 1 Cor. 5:1-5) Alora, quando ledemo nela Bìblia sora i servi de Dio che i ga pecà, imparemo che Geovà li ga perdonadi, li ga giutadi a cambiar e li ga acetadi come so amighi nantra volta. Cossita, podemo esser sicuri che, se noantri se ciamemo grami, Geovà el ndarà giutarne come el ga fato con quei servi del passà. — Tia. 4:8-10.
DAGHE VALOR ALA PAROLA DE DIO
17. Parché che la Bìblia la ze un bel presente de Geovà?
17 Parché che podemo dir che la Bìblia la ze un bel presente che Geovà el ne ga dato? Parché la ne insegna sora le so bele qualità, come la sabedoria, la giustìssia e el amor. E anca la mostra che Geovà el vol che deventemo so amighi.
18. Come che mostremo che ghe demo valor al bel presente che Geovà el ne ga dato?
18 No volemo mai desmentegarse che la Parola de Dio la ze pròpio un bel presente. (Tia. 1:17) Noantri ghe demo valor ala Bìblia quando la ledemo e pensemo sora quel che imparemo. Cossita, podemo esser sicuri che saremo benedidi se se sforsemo “de imparar sora Dio”. — Pro. 2:5.
CÀNTICO 98 La Bìblia, un presente che vien de Dio
a Podemo esser amighi de Geovà par meso dela so Parola. Ndemo veder cossa che la Bìblia la ne insegna sora la sabedoria, la giustìssia e el amor de Dio. Questo ne giutarà a darghe ancora de pi valor ala Parola de Dio e a vederla come un grando presente del nostro caro Pare, Geovà.
b (Isaia 40:8) La erba la se seca, el fior el resta fiapo, ma la parola del nostro Dio la resta par sempre.”
c (Luca 10:21) In quela ora, el spìrito santo lo ga fato restar pien de alegria. Alora el ga dito: “Mi te lodo davanti dele persone, Pare, Signor del cielo e dela tera, parché te ghè sconto queste robe dei sabi e dei studiadi e te le ghè mostrà a quei che i ze come i picinini. Sì, ò Pare, parché te ga piasesto a ti far cossita.
d (Daniel 12:4) “Ma ti, Daniel, tien in segreto queste parole e sara el libro fin el tempo del fin. Tanti i ndarà in serca, e ghen sarà tanto saver dela verità.”
e (Gioani 21:25) Gesù el ga fato tante altre robe. Se le fusse scrite con tuti i detali, credo che ghen saria tanti roli che nel mondo no ghen saria mia posto par meterli via.
f (Isaia 55:7) La persona rugna la ga de assar la so strada, e quel che el fà robe rugne, i so pensamenti. Lori i ga de tornar a Geovà e el gavarà misericòrdia. I ga de tornar al nostro Dio, parché li perdonarà del tuto.