Jeremáyà
22 Ohun tí Jèhófà sọ nìyí: “Lọ sí ilé* ọba Júdà, kí o sì jẹ́ iṣẹ́ yìí. 2 Kí o sọ pé, ‘Gbọ́ ọ̀rọ̀ Jèhófà, ìwọ ọba Júdà tí o jókòó sórí ìtẹ́ Dáfídì, ìwọ àti àwọn ìránṣẹ́ rẹ àti àwọn èèyàn rẹ, àwọn tó ń gba àwọn ẹnubodè yìí wọlé. 3 Ohun tí Jèhófà sọ nìyí: “Ẹ máa dá ẹjọ́ bó ṣe tọ́, kí ẹ sì máa ṣe òdodo. Ẹ gba ẹni tí àwọn oníjìbìtì jà lólè sílẹ̀. Ẹ má ṣe ni àjèjì èyíkéyìí lára, ẹ má ṣèkà sí ọmọ aláìníbaba* èyíkéyìí tàbí opó.+ Ẹ má sì ta ẹ̀jẹ̀ aláìṣẹ̀ sílẹ̀ ní ibí yìí.+ 4 Torí bí ẹ bá ṣe ohun tí mo sọ yìí tọkàntọkàn, nígbà náà àwọn ọba tó ń jókòó lórí ìtẹ́ Dáfídì+ máa gba àwọn ẹnubodè ilé yìí wọlé, àwọn àti àwọn ìránṣẹ́ wọn pẹ̀lú àwọn èèyàn wọn á gun kẹ̀kẹ́ ẹṣin àti àwọn ẹṣin.”’+
5 “‘Àmọ́ bí ẹ ò bá ṣe ohun tí mo sọ yìí, mo fi ara mi búra pé, ilé yìí máa di ahoro,’+ ni Jèhófà wí.
6 “Nítorí ohun tí Jèhófà sọ nípa ilé ọba Júdà nìyí,
‘Bíi Gílíádì lo rí sí mi,
Bí orí òkè Lẹ́bánónì.
Ṣùgbọ́n màá sọ ọ́ di aginjù;
Kò ní sí ọ̀kan nínú àwọn ìlú rẹ tó máa ṣeé gbé.+
Wọ́n á gé àwọn tó dára jù lọ lára igi kédárì rẹ lulẹ̀
Wọ́n á sì mú kí wọ́n ṣubú sínú iná.+
8 “‘Ọ̀pọ̀ orílẹ̀-èdè máa kọjá lẹ́gbẹ̀ẹ́ ìlú yìí, wọ́n á sì bi ara wọn pé: “Kí nìdí tí Jèhófà fi ṣe irú èyí sí ìlú ńlá yìí?”+ 9 Wọ́n á fèsì pé: “Torí pé wọ́n fi májẹ̀mú Jèhófà Ọlọ́run wọn sílẹ̀, wọ́n forí balẹ̀ fún àwọn ọlọ́run míì, wọ́n sì ń sìn wọ́n.”’+
10 Ẹ má sunkún nítorí ẹni tó ti kú,
Ẹ má sì ṣọ̀fọ̀ rẹ̀.
Kàkà bẹ́ẹ̀, ẹ máa sunkún pẹ̀rẹ̀pẹ̀rẹ̀ nítorí ẹni tó ń lọ,
Torí kò ní pa dà mọ́ láti rí ilẹ̀ tí wọ́n bí i sí.
11 “Èyí ni ohun tí Jèhófà sọ nípa Ṣálúmù*+ ọmọ Jòsáyà, ọba Júdà tó ń jọba nípò Jòsáyà bàbá rẹ̀,+ ẹni tó jáde kúrò ní ibí yìí: ‘Kò ní pa dà mọ́. 12 Nítorí ibi tí wọ́n mú un lọ ní ìgbèkùn ló máa kú sí, kò sì ní rí ilẹ̀ yìí mọ́.’+
13 Ẹni tó ń fi àìṣòdodo kọ́ ilé rẹ̀ ti gbé!
Tó ń fi àìṣẹ̀tọ́ kọ́ àwọn yàrá òkè rẹ̀,
Tó ń mú kí ọmọnìkejì rẹ̀ sìn ín láìgba nǹkan kan,
Tí kò sì fún un ní owó iṣẹ́ rẹ̀;+
14 Ẹni tó sọ pé, ‘Màá kọ́ ilé ńlá fún ara mi
Tí àwọn yàrá òkè rẹ̀ tóbi.
Màá ṣe àwọn fèrèsé* sí i
Màá fi igi kédárì bò ó, màá sì fi ọ̀dà tó pupa fòò kùn ún.’
15 Ṣé wàá máa ṣàkóso lọ torí pé àwọn igi kédárì tí ò ń lò pọ̀ ju ti àwọn míì lọ ni?
16 Ó gbèjà ẹ̀tọ́ àwọn tí ìyà ń jẹ àti àwọn aláìní,
Nǹkan sì lọ dáadáa.
‘Ǹjẹ́ kì í ṣe ohun tó fi hàn pé ẹnì kan mọ̀ mí nìyẹn?’ ni Jèhófà wí.
17 ‘Àmọ́ ojú rẹ àti ọkàn rẹ ò kúrò lórí bí o ṣe máa jẹ èrè tí kò tọ́,
Lórí bí o ṣe máa ta ẹ̀jẹ̀ aláìṣẹ̀ sílẹ̀
Àti lórí bí o ṣe máa lu jìbìtì àti bí o ṣe máa lọ́ni lọ́wọ́ gbà.’
18 “Nítorí náà, ohun tí Jèhófà sọ nípa Jèhóákímù+ ọmọ Jòsáyà, ọba Júdà nìyí,
‘Wọn kò ní ṣọ̀fọ̀ rẹ̀ pé:
“Áà, arákùnrin mi! Áà, arábìnrin mi!”
Wọn kò sì ní ṣọ̀fọ̀ rẹ̀ pé:
“Áà, ọ̀gá! Áà, kábíyèsí!”
19 Bí wọ́n ṣe ń sin kẹ́tẹ́kẹ́tẹ́ ni wọ́n máa sin ín,+
Wọ́n á wọ́ ọ kiri, wọ́n á sì gbé e sọ nù,
Sí ìta ẹnubodè Jerúsálẹ́mù.’+
20 Gòkè lọ sí Lẹ́bánónì kí o sì ké,
Gbé ohùn rẹ sókè ní Báṣánì,
Sì ké láti Ábárímù,+
Torí pé gbogbo àwọn olólùfẹ́ rẹ àtàtà ni wọ́n ti pa.+
21 Mo bá ọ sọ̀rọ̀ nígbà tí o rò pé kò séwu.
Àmọ́, o sọ pé, ‘Mi ò ní ṣègbọràn.’+
Bí o ṣe máa ń ṣe nìyẹn láti ìgbà èwe rẹ,
Nítorí ìwọ kò ṣègbọràn sí ohùn mi.+
Ìgbà yẹn ni ojú máa tì ọ́, wàá sì di ẹni ẹ̀tẹ́ nítorí gbogbo àjálù rẹ.
23 Ẹ̀yin tó ń gbé ní Lẹ́bánónì,+
Tí ìtẹ́ yín wà láàárín igi kédárì,+
Ẹ wo bí ẹ ó ti kérora tó nígbà tí ìrora bá dé bá yín,
24 “‘Bí mo ti wà láàyè,’ ni Jèhófà wí, ‘kódà bí Konáyà*+ ọmọ Jèhóákímù,+ ọba Júdà, bá tiẹ̀ jẹ́ òrùka èdìdì ní ọwọ́ ọ̀tún mi, ibẹ̀ ni màá ti yọ ọ́ kúrò! 25 Màá fi ọ́ lé ọwọ́ àwọn tó fẹ́ gba ẹ̀mí rẹ,* lé ọwọ́ àwọn tí ò ń bẹ̀rù, lé ọwọ́ Nebukadinésárì* ọba Bábílónì àti lé ọwọ́ àwọn ará Kálídíà.+ 26 Màá fi ẹ̀yin àti ìyá tó bí yín lọ́mọ sọ̀kò sí ilẹ̀ míì tí kì í ṣe ibi tí wọ́n bí yín sí, ibẹ̀ sì ni ẹ máa kú sí. 27 Wọn kò sì ní lè pa dà láé sí ilẹ̀ tí ọkàn wọn fẹ́.*+
28 Ṣé ọkùnrin yìí, Konáyà, jẹ́ ẹni ẹ̀sín, ìkòkò tó ti fọ́,
Ohun èlò tí ẹnikẹ́ni kò fẹ́?
Kí nìdí tí a fi wó òun pẹ̀lú àtọmọdọ́mọ rẹ̀ lulẹ̀
Tí a sì sọ wọ́n sí ilẹ̀ tí wọn kò mọ̀?’+
29 “Ìwọ ilẹ̀, ilẹ̀, ilẹ̀, gbọ́ ọ̀rọ̀ Jèhófà.
30 Ohun tí Jèhófà sọ nìyí: