Jeremáyà
30 Ọ̀rọ̀ tí Jèhófà bá Jeremáyà sọ nìyí, ó ní: 2 “Ohun tí Jèhófà Ọlọ́run Ísírẹ́lì sọ nìyí, ‘Kọ gbogbo ọ̀rọ̀ tí mo sọ fún ọ sínú ìwé kan. 3 Nítorí, “wò ó! ọjọ́ ń bọ̀,” ni Jèhófà wí, “tí màá kó àwọn èèyàn mi, Ísírẹ́lì àti Júdà, tó wà lóko ẹrú jọ,”+ ni Jèhófà wí, “màá mú wọn pa dà wá sí ilẹ̀ tí mo fún àwọn baba ńlá wọn, yóò sì pa dà jẹ́ tiwọn.”’”+
4 Ọ̀rọ̀ tí Jèhófà sọ fún Ísírẹ́lì àti Júdà nìyí.
5 Ohun tí Jèhófà sọ nìyí:
“A ti gbọ́ ìró àwọn tí jìnnìjìnnì bá;
Ẹ̀rù ló wà, kò sí àlàáfíà.
6 Ẹ jọ̀wọ́, ẹ bá mi béèrè bóyá ọkùnrin lè bímọ.
Kí wá nìdí tí gbogbo ọ̀dọ́kùnrin tí mo rí fi ń fọwọ́ ti ikùn*
Bí obìnrin tó ń rọbí?+
Kí nìdí tí gbogbo ojú sì fi funfun?
7 Ó mà ṣe o! Nítorí ọjọ́ burúkú* ni ọjọ́ yẹn máa jẹ́.+
Kò sí irú rẹ̀,
Àkókò wàhálà ni fún Jékọ́bù.
Ṣùgbọ́n a ó gbà á là.”
8 “Ní ọjọ́ yẹn,” ni Jèhófà Ọlọ́run àwọn ọmọ ogun wí, “màá ṣẹ́ àjàgà kúrò ní ọrùn wọn, màá sì já ọ̀já* wọn sí méjì; àwọn àjèjì* ò sì ní fi wọ́n* ṣe ẹrú mọ́. 9 Wọ́n á máa sin Jèhófà Ọlọ́run wọn àti Dáfídì ọba wọn, ẹni tí màá gbé dìde fún wọn.”+
10 “Ní tìrẹ, ìwọ Jékọ́bù ìránṣẹ́ mi, má fòyà,” ni Jèhófà wí,
“Má sì jẹ́ kí ẹ̀rù bà ọ́, ìwọ Ísírẹ́lì.+
Nítorí màá gbà ọ́ láti ibi tó jìnnà réré
Àti àwọn ọmọ rẹ láti oko ẹrú tí wọ́n wà.+
Jékọ́bù á pa dà, ara rẹ̀ á balẹ̀, kò ní rí ìyọlẹ́nu,
Ẹnì kankan ò sì ní dẹ́rù bà wọ́n.”+
11 “Nítorí mo wà pẹ̀lú rẹ,” ni Jèhófà wí, “láti gbà ọ́.
Ṣùgbọ́n màá pa gbogbo àwọn orílẹ̀-èdè tí mo tú ọ ká sí àárín wọn run;+
Àmọ́ ní tìrẹ, mi ò ní pa ọ́ run.+
12 Nítorí ohun tí Jèhófà sọ nìyí:
“Kò sí ìwòsàn fún àárẹ̀ tó ń ṣe ọ́.+
Ọgbẹ́ rẹ kò ṣeé wò sàn.
13 Kò sí ẹni tó máa gba ẹjọ́ rẹ rò,
Egbò rẹ kò ṣeé wò sàn.
Kò sí ìwòsàn fún ọ.
14 Gbogbo àwọn olólùfẹ́ rẹ àtàtà ti gbàgbé rẹ.+
Wọn kò wá ọ mọ́.
Nítorí mo nà ọ́ bí ìgbà tí ọ̀tá ẹni bá nani,+
Pẹ̀lú ìyà tí ìkà èèyàn fi ń jẹni,
Nítorí o ti jẹ ẹ̀bi lé ẹ̀bi, ẹ̀ṣẹ̀ rẹ sì ti pọ̀.+
15 Kí nìdí tí o fi ń ké nítorí àárẹ̀ tó ń ṣe ọ́?
Ìrora rẹ kò ṣeé wò sàn!
Nítorí o ti jẹ ẹ̀bi lé ẹ̀bi, ẹ̀ṣẹ̀ rẹ sì ti pọ̀+
Ni mo fi ṣe èyí sí ọ.
16 Nítorí náà, gbogbo àwọn tó ń pa àwọn èèyàn rẹ run ni a ó pa run,+
Gbogbo àwọn ọ̀tá rẹ á sì lọ sí oko ẹrú.+
Àwọn tó ń fi ogun kó ọ ni a ó fi ogun kó,
Àwọn tó ń kó ọ lẹ́rù ni màá sì jẹ́ kí wọ́n kó lẹ́rù lọ.”+
17 “Ṣùgbọ́n màá mú ọ lára dá, màá sì wo ọgbẹ́ rẹ sàn,”+ ni Jèhófà wí,
“Bí wọ́n tiẹ̀ pè ọ́ ní ẹni ìtanù:
‘Síónì, tí ẹnikẹ́ni kò fẹ́.’”+
18 Ohun tí Jèhófà sọ nìyí:
“Wò ó, màá kó àwọn tó lọ sí oko ẹrú láti àgọ́ Jékọ́bù jọ,+
Máa sì ṣojú àánú sí àwọn àgọ́ ìjọsìn rẹ̀.
Wọ́n á tún ìlú náà kọ́ sórí òkìtì rẹ̀,+
Ibi tó sì yẹ ni wọ́n á kọ́ ilé gogoro rẹ̀ tó láàbò sí.
19 Ìdúpẹ́ àti ohùn ẹ̀rín á ti ọ̀dọ̀ wọn wá.+
20 Àwọn ọmọ rẹ̀ á dà bíi ti ìgbà àtijọ́,
Àpéjọ rẹ̀ á sì fìdí múlẹ̀ gbọn-in gbọn-in níwájú mi.+
Màá sì fìyà jẹ gbogbo àwọn tó ń ni ín lára.+
21 Láti ọ̀dọ̀ rẹ̀ ni olórí rẹ̀ ti máa wá,
Láti àárín rẹ̀ sì ni alákòóso ti máa jáde wá.
Màá mú kí ó sún mọ́ tòsí, á sì wá bá mi.”
“Bí bẹ́ẹ̀ kọ́, ta ló tó bẹ́ẹ̀* láti wá bá mi?” ni Jèhófà wí.
22 “Ẹ ó di èèyàn mi,+ màá sì di Ọlọ́run yín.”+
23 Wò ó! Ìjì Jèhófà máa fi ìbínú tú jáde,+
Ìjì líle tó ń gbá nǹkan lọ, tó sì ń tú jáde sórí àwọn ẹni burúkú.
24 Ìbínú Jèhófà tó ń jó bí iná kò ní dáwọ́ dúró
Títí á fi ṣe ohun tó wà lọ́kàn rẹ̀, tí á sì mú èrò rẹ̀ ṣẹ.+
Ní àkókò òpin, ọ̀rọ̀ yìí á yé yín.+