Dogoatao

Baibel Stadi Namodia Karaia

Iseda Basileia Gaukara lalonai, Baibel stadi namodia karaia ena kahana idauidau amo ai abia hereva badadia, be inai udaia pepana lalonai ai atoa. Umui ai hagoadaia inai udaia pepana umui negea lasi, bona Baibel stadi umui karaia neganai, ena hereva haida umui itaia lou diba. Danu, inai udaia pepana lalonai idia noho hereva haida be haroro hebou ai umui herevalaia diba, bona haroro naria taudia be buka stadi grup idia vadivadi henia neganai, reana inai pepa ena hereva idia gaukaralaia diba.

Kahana 1: Baibel Stadi be Dahaka?

Bema hanaihanai ta ida Baibel oi herevalaia, ena be nega kwadogi sibona lalonai, to Baibel bona buka eiava magasin ta oi gaukaralaia neganai, unai be Baibel stadi ta oi karaia. Stadi dalana oi haheitalaia bona nega rua stadi oi karaia, bona oi diba momokani unai stadi do oi karaia noho neganai, unai stadi oi ripotilaia diba.​​—km 7/04 rau 1.

Umui Gaukaralaia Bukadia

◼ Dirava Ia Ura Dahaka Ita Karaia?

◼ Diba ese Mauri Dekenai Ita Ia Hakaua Lao

◼ Dirava Momokani Tamona Tomadiho Henia

◼ Dirava Ena Turana ai Oi Lao Diba! buklet oi gaukaralaia, diba bada lasi taudia eiava idia duahiduahi namonamo lasi taudia oi durua totona.

Kahana 2: Hegaegae Stadi Karaia Totona

Ita ese stiuden tauna ena kudouna ia hamarerea dalanai ia ita hadibaia be namo. Unai ena anina be stiuden tauna ita laloa bona ita hegaegae namonamo.​​—km 8/04 rau 1.

Hegaegae Dalana

◼ Nega sisina lalonai buka ena karoa eiava kahana ena hereva kwarana, hereva kwarana maragidia, bona laulau oi itadia.

◼ Buka lalonai idia noho henanadai edia haere oi tahua, hereva badadia sibona oi makaia.

◼ Stadi lalonai do oi duahia siridia oi abia hidi. Stadi bukana ai siri edia hereva kwadogidia oi torea.

◼ Hereva badadia edia riviu kwadogina hegaegaelaia.

Ta Ena Diba Hegeregerena Oi Hadibaia

◼ Stiuden bona ia abia be namo gaudia oi gurigurilaia.

◼ Stiuden do ia henia henanadai bona do ia auka ia laloparara eiava abia dae hereva badadia oi laloa guna.

◼ Inai oi laloa: Dahaka ia lalopararalaia eiava karaia be namo lauma dalanai ia tubu totona? Edena bamona ena kudouna lau hamarerea diba?

◼ Nega haida reana haheitalai ta, hereva ta ena anina, eiava henanadai haida oi hegaegaelaia diba stiuden tauna oi durua hereva ta eiava siri ta ia lalopararalaia totona.

Kahana 3: Baibel Gaukaralaia Namonamo

Baibel stadi ita karaia ena badina be ita ura taunimanima be ‘diba tahua taudia do ita halaoa.’ Anina be taunimanima ita durua Dirava ena Hereva idia lalopararalaia bona edia mauri lalonai idia badinaia totona. (Mat. 28:​19, 20; 1 Tes. 2:13) Unai dainai, stadi lalonai Baibel ita gaukaralaia momo be namo.​​—km 11/04 rau 4.

Baibel amo Hadibaia

◼ Stiuden taudia dekenai oi hahedinaraia, edena bamona idia ese edia Baibel lalonai siri ta idia davaria diba.

◼ Ita abia dae hereva edia badina idia hahedinaraia siridia ita duahia bona herevalaia.

◼ Henanadai gaukaralaia. Ena be ita ese stiuden dekenai Baibel siri edia anina ita herevalaia diba, to namona be stiuden ita noia siri ena anina ia herevalaia totona.

◼ Hereva momo gaukaralaia lasi. Namo lasi stadi lalonai idia noho siri ta ta edia anina maragimaragidia ita herevalaia. Namona be stadi ena point ia hahedinaraia siridia sibona oi kikilaia.

◼ Idia badinaia diba gaudia oi gwauraia. Stiuden tauna oi durua, unai amo ia laloparara edena dala ai Baibel sirina be mai anina bada ia dekenai.

Kahana 4: Stiuden Hadibaia Idia Hegaegae Totona

Iena stadi ia duahia guna, haere ia makaia, bona sibona ena hereva amo haere ia hegaegaelaia stiuden ta be lauma dalanai do ia goada ia lao haraga. Unai dainai, stadi ta oi hamatamaia neganai, namona be stiuden ida stadi ta umui hegaegaelaia hebou, unai amo hegaegae dalana oi hahedinaraia. Stiuden momo ia durua gauna be, idia ida karoa ta eiava kahana ta ibounai ita hegaegaelaia hebou.​​—km 12/04 rau 1.

Haere Makaia Bona Hereva Kwadogidia Torea

◼ Oi hahedinaraia, edena dala ai henanadai edia haere maorodia ia davaria diba.

◼ Emu buka lalonai haere ena point badadia oi makaia dalana be stiuden tauna dekenai oi hahedinaraia.

◼ Stiuden oi durua, unai amo ia laloparara siri ta ta ese paragraf lalonai ia noho point badana ia durua. Oi hahedinaraia edena dala ai ena stadi bukana ai hereva kwadogidia ia torea diba.

Tahua Guna Bona Riviu

◼ Stiuden tauna be ena buka ia do hegaegaelaia lasi neganai, oi hahedinaraia namona be nega kwadogina lalonai karoa ena hereva kwarana, hereva kwarana maragidia, bona laulau haida ia itaia.

◼ Stiuden oi hagoadaia ena hegaegae karana ia haorea neganai, namona be point badadia ia riviulaia.

Kahana 5: Paragraf Hida Do Umui Stadilaia Abia Hidi

Do idia stadilaia paragraf be hadibaia tauna bona stiuden edia goada bona noho dalana hegeregerena idia abia hidi be namo.​​—km 1/05 rau 7.

Abidadama Hagoadaia

◼ Namo lasi stadi ita karaia haragaharaga, bena stiuden tauna ese Dirava ena hereva ia lalopararalaia namonamo lasi.

◼ Nega oi atoa stiuden oi durua ia dibaia noho gauna ia lalopararalaia bona abia dae totona.

◼ Nega oi atoa hereva badadia bona unai hahediba herevadia idia hamomokania siridia umui herevalaia totona.

Gau Momo Herevalaia Lasi

◼ Bema stiuden be ena ura gaudia ia herevalaia momo, dala oi karaia diba stadi murinai unai gaudia umui herevalaia totona.

◼ Stadi lalonai gau momo herevalaia lasi. Stadi ia durua herevana eiava ekspiriens ita herevalaia momo lasi, unai amo stiuden ese Baibel ena hahediba hereva badadia dekenai diba maoromaoro do ia abia.

Kahana 6: Baibel Stiuden be Henanadai ta Ia Henia Neganai

Baibel stadi ta ita karaia neganai, namo lasi gau ta ita herevalaia murinai ma gau ta ita herevalaia, to namona be Baibel ena hahediba herevadia be dala namona ai ita herevalaia namonamo. Unai ese stiuden ia durua, diba maoromaoro ia abia hamatamaia totona, bena lauma dalanai do ia goada ia lao.​​—km 2/05 rau 6.

Laloparara Gaukaralaia

◼ Bema stiuden tauna be stadi gauna ta ia henanadailaia, maoromaoro haere ita henia diba.

◼ To bema henanadai be umui stadilaia gauna amo ia idau eiava haere maorona henia totona tahua karana do oi karaia, vadaeni stadi murinai eiava ma nega ta ai unai umui herevalaia be namo. Unai bamona henanadai oi torea diho.

◼ Bema stiuden ese Baibel ena hadibaia herevana ta ia abia dae haraga lasi, namona be unai hadibaia herevana idia herevalaia namonamo bukadia edia hereva oi tahua.

◼ Bema stiuden be unai hereva ia do abia dae lasi, reana umui rakatania, nega ma ta ai umui herevalaia, bona ena stadi oi karaia.

Oi Manau

◼ Bema henanadai ta ena haere oi diba lasi, sibona emu lalohadai oi gwauraia kava lasi.

◼ Stiuden oi hadibaia, edena bamona tahua karana ia karaia diba.

Kahana 7: Stadi Dekenai Guriguri Gwauraia

Baibel stiuden be lauma dalanai ia goada ia lao totona, Iehova ena heduru ia abia be namo. Unai dainai, guriguri amo stadi ita kehoa bona koua be maoro.​​—km 3/05 rau 3.

Guriguri Hamatamaia Dalana

◼ Nega momo tomadiho idia laloa bada taudia edia stadi ginigunana dekenai, guriguri oi gwauraia diba.

◼ Ma stiuden haida dekenai, guriguri ita hamatamaia ena nega maorona ita diba be namo.

◼ Reana Salamo 25:​4, 5 bona 1 Ioane 5:14 amo stiuden tauna ita durua guriguri ita gwauraia ena badina ia diba totona.

◼ Ioane 15:16 amo stiuden taudia ita hadibaia Iesu Keriso amo Iehova ita guriguri henia be namo.

Guriguri Lalonai Oi Gwauraia Gaudia

◼ Iehova amo hadibaia herevadia ita abia dainai, namona be Ia ita hanamoa.

◼ Ita hahedinaraia stiuden ita laloa bada.

◼ Iehova ese ena orea ia gaukaralaia dainai ita tanikiu henia.

◼ Iehova ita noia stiuden do ia durua ia dibaia noho gaudia ia badinaia totona.

Kahana 8: Stiuden Taudia Hakaua Mai Orea Dekenai

Baibel stadi ita karadia ena badina be, hahediba herevadia ita hadibaia sibona lasi, to danu, stiuden taudia ita durua Keristani kongrigeisen lalonai idia vareai totona. Wiki ta ta ena stadi ai, miniti haida lalonai Iehova ena orea ia herevalaia point ta oi herevalaia.​​—km 4/05 rau 8.

Kongrigeisen Heboudia

◼ Kongrigeisen hebou ta ta gwauraia hedinarai. Nega ginigunana stadi umui hamataia neganai, idia oi boiria hebou dekenai idia mai totona.

◼ Hebou ai idia gwauraia point namodia umui herevalaia hebou.

◼ Stiuden tauna oi durua, Memorial, hebouhebou badadia, bona sekit naria tauna ena vadivadi negana ia laloa bada.

◼ Iseda buka lalonai idia noho laulau amo idia oi durua, iseda hebou gabunai ita karaia gaudia idia itaia totona.

◼ Idia oi hagoadaia buklet ladana, Iehova Ena Witnes Taudia​—Idia be Daidia? Dahaka Idia Abia Dae? idia duahia totona.

Vidio Gaukaralaia Edia Laloa Bada Karana Habadaia Totona

◼ Jehovah’s Witnesses​​—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Kahana 9: Stiuden Taudia Hegaegaelaia Idia Haroro Totona

Baibel stiuden taudia be idia dibaia gaudia idia abidadama henia matamaia neganai, unai ese idia ia hagoadaia idia dibaia gaudia idia gwauraia totona.​​—km 5/05 rau 1.

Idia Oi Hagoadaia Idia Haroro Totona

◼ Edia turadia eiava ruma bese taudia idia noia diba stadi lalonai idia helai totona, a?

◼ Oi nanadaia bema ena gaukara turadia, sikuli turadia eiava ia diba taudia ma haida idia ura sivarai namona idia kamonai, eiava?

Oi Hadibadia Idia Abia Dae Gaudia Idia Herevalaia Totona

◼ Stadi ena kahana haida ai, stiuden oi nanadaia, “Baibel be edena dala ai do oi gaukaralaia oiemu ruma bese taudia dekenai hereva momokani oi herevalaia totona?”

◼ Gau badana be stiuden tauna oi hadibaia, ma haida dekenai Dirava bona ena ura ia herevalaia neganai, namona be hemataurai bona manau karana ia hahedinaraia.

◼ Stiuden tauna ese inai buklet, Iehova Ena Witnes Taudia​—Idia be Daidia? Dahaka Idia Abia Dae? ia gaukaralaia ena turadia bona ruma bese ia durudia, Baibel amo ita abia herevadia bona gaukara idia lalopararalaia totona.

Kahana 10: Ruma-Ta-Ruma-Ta Gaukara ai Stiuden Taudia Hadibaia

Elda taudia idia laloa Baibel stiuden be bapatiso lasi pablisa ai ia lao neganai, kongrigeisen taudia ia bamoa diba haroro gaukara totona.​​—km 6/05 rau 1.

Hegaegae Hebou

◼ Pablisa matamata oi hadibaia edeseniai kiki herevana ia davaria diba.

◼ Ia oi durua ena noho gabuna ai ia gaukaralaia diba kiki herevana ta ia abia hidi totona.

◼ Ia oi hagoadaia haroro ai Baibel ia gaukaralaia totona.

◼ Kiki herevana umui tohoa hebou. Stiuden tauna oi durua edena bamona teritori ai idia gwauraia momo herevadia ia haerelaia diba.

Haroro Hebou

◼ Ruma ginigunana umui karaia neganai, namona be umui hegaegaelaia kiki herevana be oi ese oi karaia guna, bona do ia itaia.

◼ Stiuden tauna ena kara bona diba oi laloa be namo. Nega haida, namona be ia dekenai kiki herevana ena kahana sibona oi henia.

◼ Namona be pablisa matamata oi durua sediual namona ia badinaia hanaihanai totona.

Kahana 11: Stiuden Durua Lou Henia Idia Karaia Totona

Nega ginigunana ai ta oi vadivadi henia neganai, lou henia dalana oi hegaegaelaia. Stiuden tauna oi hagoadaia ia hereva henia taudia ia laloa bada totona. Namona be stiuden tauna oi hadibaia ruma taudia dekenai henanadai ia henia totona, bona idia haere neganai ia kamonai, unai amo idia laloa bada gaudia do ia diba.​​—km 7/05 rau 1.

Lou Henia Karaia

◼ Vadivadi ginigunana ai umui herevalaia gaudia riviulaia, bona stiuden oi durua ruma tauna ena lalona ia veria herevana ta ia abia hidi totona.

◼ Stiuden tauna ida siri ta bona do umui stadilaia buklet ena paragraf ta hegaegaelaia.

◼ Stiuden ese ena herevahereva dokonai do ia gwauraia henanadai ta hegaegaelaia.

Kamonai Taudia Lou Henia Haraga

◼ Stiuden tauna hagoadaia, idia kamonai taudia ia lou henidia haraga.

◼ Stiuden tauna durua, ruma dekenai idia noho lasi taudia ia vadivadi henidia loulou totona.

◼ Pablisa matamta oi durua, lou henia do ia itaia negana ia abia hidi, bona ia gwauraia negana ai ia lou henia be gau badana.

Kahana 12: Stiuden Taudia Durua Baibel Stadi Idia Hamatamaia Bona Karaia Totona

Iesu bamona, oi haroro neganai, emu kara be mai anina bada. Haroro gaukara lalonai stiuden tauna ese emu haheitalai ia itaia neganai, do ia laloparara, lou henia ita karaia ena badina be Baibel stadi ita hamatamaia totona.​​—km 8/05 rau 1.

Baibel Stadi Hahedinaraia Dalana

◼ Bema hegeregere, stiuden tauna oi hadibaia, stadi karaia dalana be nega kwadogina sibona lalonai ia herevalaia.

◼ Nega momo, stadi buka amo paragraf ta eiava rua oi gaukaralaia diba stadi dalana oi haheitalaia totona.

◼ Baibel stadi hamatamaia ena heduru herevana ta umui riviulaia bona tohoa hebou.​​—km 8/05 rau 1; km 1/02 rau 6.

Stiuden Taudia Hadibaia Tisa ai Idia Lao Totona

◼ Stiuden taudia hagoadaia Tiokratik Haroro Sikuli Lalonai idia vareai totona.

◼ Bema hegeregere, stiuden tauna oi noia oi ida Baibel stadi ma haida umui itaia totona, unai amo ia be ma haida ia hadibaia danu.