Բարի Լուրը Դրական Կեցուածքով Ներկայացնենք

¹ Բոլորս ալ կը փափաքինք մեր աշխատանքին մէջ ուրախութիւն ու յաջողութիւն գտնել, մանաւանդ աշակերտելու գործին մէջ։ Ի՞նչ բան այսպիսի գոհունակութիւն կը բերէ մեզի։ Անիկա կը սկսի դրական մտավիճակ մը պահպանելով մինչ զբաղած կը մնանք ուրիշներու օգնելու թանկարժէք գործին մէջ։ (Առ. 11։25) Բարի լուրը ներկայացնելու մեր կերպը պէտք է ցոյց տայ որ իրապէս կը հաւատանք մեր ըսածին։ Եթէ սրտանց խօսինք, այն ատեն մեր անկեղծութիւնը ու անձնական համոզումը յայտնի պիտի ըլլան։ (Ղուկ. 6։45) Մեր ներկայացումը փորձ ընելով, աւելի ինքնավստահ պիտի զգանք երբ թաղամասին մէջ գտնուող մարդոց խօսինք։ Ասիկա յատկապէս օգտակար պիտի ըլլայ Սեպտեմբեր ամսուան ընթացքին, երբ Կեանքը Ինչպէ՞ս Գոյացաւ—Բարեշրջութեա՞մբ թէ Ստեղծագործութեամբ գիրքը ներկայացնենք։ Հետեւեալ թելադրութիւնները կրնան օգնական ըլլալ բարի լուրը դրական կեցուածքով մը ներկայացնելու։

² Երբ «Ստեղծագործութիւն» գիրքը կը ներկայացնես, կրնաս առաջին հանդիպումին հետեւեալը ըսել.

◼ «Մեր դրացիներուն խօսելով, նկատած ենք որ ոմանք Աստուծոյ կը վստահին։ Ուրիշներ դժուար կը գտնեն անոր հաւատալը։ Դուն ի՞նչ կը խորհիս։ [Թոյլ տուր որ պատասխանէ։] Նկատի առ ինչպէ՛ս Աստուածաշունչը այս հարցին շուրջ կը պատճառաբանէ։ [Կարդա Հռովմայեցիս 1։20։] Կրնանք Աստուծոյ ‘մշտնջենաւոր զօրութեան ու աստուածութեան’ ապացոյցները տեսնել, նկատելով անոր ստեղծած բաները»։ Կարդա Ստեղծագործութիւն գրքին էջ 48–ի վերջին պարբերութիւնը, ապա ուշադրութեան յանձնէ ապրող բջիջին բարդ կազմուածքը։ Կամ գործածէ 147–րդ էջին 18–րդ պարբերութիւնը, ցոյց տալու համար ինչպէ՛ս ծառի մը սքանչելի շրջանային դրութիւնը Ստեղծիչի մը գործը ուշագրաւ կը դարձնէ։ Առաջարկէ գիրքը անհատին ձգել եթէ կ’ուզէ զայն կարդալ։ Եթէ յօժար է, գիրքը տեղաւորէ ու բացատրէ որ մեր աշխարհածաւալ գործին ի նպաստ տրուած նուիրատուութիւնները ուրախութեամբ կ’ընդունինք։

³ Երբ կը վերայցելես անոնց որոնց հետ Աստուծոյ Արարչութեան մասին խօսակցեցար, կրնաս հետեւեալը ըսել.

◼ «Անցեալ այցելութեան, խօսակցեցանք Աստուծոյ գոյութեան ապացոյցին մասին—իր հոյակապ ստեղծագործութիւնը։ Քեզի համար դժուա՞ր է հաւատալ որ Տիեզերքը Ստեղծողը նաեւ հետաքրքրուած է մեր ապագայով։ [Թոյլ տուր որ պատասխանէ։] Հետաքրքրական է նկատել որ ապագան արդէն իսկ որոշուած է Ստեղծիչին կողմէ»։ Կարդա Եսայեայ 46։9, 10։ Անհատին հետաքրքրութենէն կախեալ ըլլալով, գործածէ Ստեղծագործութիւն գրքին գլուխ 19–ին պատկերները ու անոնց խորագիրները, ուշագրաւ դարձնելու համար Աստուծոյ խոստացած իտէալ վիճակները։ Կարդա գլուխ 20–ին առաջին պարբերութիւնը, ապա Աստուածաշունչի ուսումնասիրութիւն մը առաջարկէ։ Եթէ ընդունուի, Գիտութիւն գրքով ուսումնասիրութիւնը սկսիր։

⁴ Կրնաս այս մօտեցումը փորձել, երբ «Ստեղծագործութիւն» գիրքը կը ներկայացնես.

◼ «Դրացիներուն հետ խօսակցելով, նկատած եմ որ մեծամասնութիւնը ապահով ընկերութեան մը ու խաղաղ աշխարհի մը կը տենչայ։ Ըստ կարծիքիդ, մարդը ինչո՞ւ չէ կրցած այսպիսի վիճակներ իրագործել։ [Թոյլ տուր որ պատասխանէ։] Կարգ մը առաջնորդներ թերեւս անկեղծ են ու որոշ բարիքներ կ’ընեն, սակայն նկատի առ ինչ որ Աստուածաշունչը իմաստութեամբ կը խրատէ»։ Կարդա Սաղմոս 146։3, 4. ապա հարցուր. «Մէկը կա՞յ որ կրնայ մարդկութեան կարիքներուն գոհացում տալ»։ Կարդա 5 եւ 6–րդ համարները։ Ցոյց տուր Ստեղծագործութիւն գրքին 251–րդ էջին պատկերը եւ ուշադրութիւն հրաւիրէ Աստուծոյ իշխանութեան օգուտներուն վրայ։ Գիրքը ներկայացուր եւ նուիրատուութեան մեր կարգադրութիւնը յիշէ։

⁵ Եթէ առաջին հանդիպումին Աստուծոյ իշխանութեան մասին խօսակցեցաք, վերայցելութեան ժամանակ կրնաս հետեւեալ թելադրութիւնը փորձել.

◼ «Երբ մի քանի օր առաջ հոս էի, նկատի առինք ինչպէ՛ս մարդը չէ կրցած երկրի վրայ իսկական խաղաղութիւն բերել։ Թերեւս կը յիշես որ բնորոշեցինք Աստուածաշունչին տուած պատճառը այս ձախողութեան։ [Դարձեալ կարդա Սաղմոս 146։3։] Նկատի առի՞ր թէ Աստուած ինչո՛ւ խրատ կու տայ որ մեր յոյսերը մարդոց վրայ չդնենք։ [Թոյլ տուր որ պատասխանէ։] Հաւանաբար կը համաձայնիս որ մնայուն լուծման որեւէ յոյս Աստուծմէ պէտք է գայ։ Այս վստահութեան պատճառը բացատրուած է Սաղմոս 146։10–ին մէջ։ [Կարդա։] Եթէ կ’ուզենք Աստուծոյ Թագաւորութեան հպատակը ըլլալ, ի՞նչ պէտք է ընենք»։ Բաց Ստեղծագործութիւն գրքին 250–րդ էջը, կարդա 13–րդ պարբերութիւնը եւ ուշագրաւ դարձուր Յովհաննու 17։3–ը։ Առաջարկէ ցոյց տալ ինչպէ՛ս, Աստուածաշունչի ուսումնասիրութեամբ մը, միլիոնաւոր անհատներ յաւիտենական կեանքի առաջնորդող գիտութիւնը ձեռք ձգեցին։ Եթէ տանտէրը թոյլ տայ, Գիտութիւն գիրքը ներկայացուր եւ ուսումնասիրութիւնը սկսիր։

⁶ Երբ վաճառատունէ վաճառատուն կը ծառայես, կրնաս «Ստեղծագործութիւն» գրքով այս հակիրճ մօտեցումը գործածել.

◼ «Այսօր համայնքի առեւտրականներուն մասնայատուկ ծառայութիւն մը կը մատուցանենք։ Բոլորս ալ մտահոգ ենք մեր շրջանին մէջ աւելցող ոճիրին ու բռնութեան նկատմամբ։ Կը խորհի՞ս որ ոեւէ անհատ այս խնդրին իսկական լուծում մը ունի։ [Թոյլ տուր որ պատասխանէ։] Աստուած լուծում մը ունի»։ Բաց Ստեղծագործութիւն գրքին 196–րդ էջը. կարդա ու մեկնաբանէ Առակաց 2։21, 22–ը, որ 19–րդ պարբերութեան մէջ յիշուած է։ Ցոյց տուր գլուխ 16–ին խորագիրը ու գիրքը ներկայացուր։ Բացատրէ որ թէեւ գրականութիւնը վճարումով չէ, սակայն մեր աշխարհածաւալ գործին համար պզտիկ նուիրատուութիւններ կ’ընդունինք։

⁷ Երբ կը վերայցելես առեւտրականի մը, որու «Ստեղծագործութիւն» գիրքը տուիր, կրնաս հետեւեալը ըսել.

◼ «Անցեալ այցելութեան, յիշեցի որ Աստուած միակ անձն է որ ոճիրի ու բռնութեան մնայուն լուծումը իրապէս ունի։ Իր խոստումին համաձայն, կրնանք վստահ ըլլալ որ խաղաղ երկիր մը պիտի հաստատուի։ Նկատի առ այն ընտրութիւնը որ իւրաքանչիւրիս առջեւ դրուած է»։ Կարդա Ստեղծագործութիւն գրքին 250–րդ էջին 11–րդ պարբերութիւնը, ի ներառեալ Սաղմոս 37։37, 38։ Էջ 251–ի պատկերին մասին մեկնաբանէ, ապա կարդա 14–րդ պարբերութեան առաջին նախադասութիւնը։ Առաջարկէ տան սուրբ գրային ձրի ուսումնասիրութիւն մը, զոր կարելի է վարել իրենց գործատեղին կամ տան մէջ։

⁸ Որպէս «Աստուծոյ գործակից»ներ, ամէն պատճառ ունինք դրական ըլլալու, երբ բարի լուրը կը ներկայացնենք։ (Ա. Կորն. 3։9) Այս մտավիճակը պահպանելով, Եհովայի առատ օրհնութիւնը պիտի վայելենք։