OBE AVỌ IVẸ IRUẸRU-IVIE

1 Solomọn ọmọzae Devidi o te je dhe ẹgẹga evaọ uvie riẹ, yọ Jihova Ọghẹnẹ riẹ ọ jọ kugbei, o te ru ei kpehru gaga.+

2 Solomọn ọ tẹ vuẹ se Izrẹl soso, iletu itu ahwo idu na avọ erọ itu ahwo udhusoi na, ibruoziẹ na, gbe isu ahwo Izrẹl kpobi, enọ i wuzou inuwou abọ-ọsẹ re a nyabru ei ze. 3 Kẹsena Solomọn avọ ogbotu na soso a tẹ nya kpobọ oria ukpehru nọ o jọ Gibiọn,+ keme etẹe uwou-udhu omakugbe Ọghẹnẹ uzẹme na o jọ, uwou-udhu nọ Mosis odibo Jihova ọ bọ evaọ obọ udhude na. 4 Rekọ Devidi ọ wọ etehe ọvọ Ọghẹnẹ uzẹme na no obọ Kiriat-jierim ze+ no vẹre fihọ oria nọ ọ ruẹrẹhọ kẹe; Devidi ọ bọ uwou-udhu kẹe evaọ Jerusalẹm.+ 5 Yọ a fi agbada-idhe ekọpa+ nọ Bẹzalẹl+ ọmọzae Yurae ọmọzae Họr o ru na họ aro uwou-udhu Jihova na; Solomọn avọ ogbotu na a jẹ hae lẹ evaọ aro riẹ.* 6 Solomọn ọ tẹ jọ etẹe dhe idhe evaọ aro Jihova, o dhe idhe emahọ odu ọvo (1,000) evaọ agbada-idhe ekọpa+ nọ ọ jọ aro uwou-udhu omakugbe na.

7 Evaọ aso yena, Ọghẹnẹ ọ tẹ romavia kẹ Solomọn, ọ tẹ ta kẹe nọ: “Yare oware nọ whọ gwọlọ nọ mẹ kẹ owhẹ.”+ 8 Solomọn ọ tẹ ta kẹ Ọghẹnẹ nọ: “Who dhesẹ uyoyou ulogbo nọ o rẹ hiẹ hẹ kẹ Devidi+ ọsẹ mẹ no, yọ whọ rehọ omẹ mu ovie no evaọ ẹta riẹ.+ 9 Enẹna, O Jihova Ọghẹnẹ, jọ eyaa nọ whọ ya kẹ Devidi ọsẹ mẹ u rugba,+ keme whọ rehọ omẹ mu ovie kẹ ahwo nọ a rrọ buobu wọhọ uwẹkpẹ otọakpọ na.+ 10 Enẹna, kẹ omẹ areghẹ gbe eriariẹ+ nọ me re ro su ahwo nana,* keme ono ọ rẹ sai bruoziẹ ahwo ra nana nọ a rrọ buobu na?”+

11 Ọghẹnẹ ọ tẹ ta kẹ Solomọn nọ: “Fikinọ onana họ ẹgwọlọ udu ra na, yọ whọ yare ekwakwa-efe, efe, gbe orro hayo uwhu* ahwo nọ a bi mukpahe owhẹ hẹ na, whọ gbẹ jẹ yare uzuazọ uthethei hi* na, rekọ whọ tẹ yare areghẹ gbe eriariẹ nọ who re ro bruoziẹ ahwo mẹ nọ mẹ rehọ owhẹ mu ovie kẹ na,+ 12 mẹ te kẹ owhẹ areghẹ gbe eriariẹ; mẹ te jẹ kẹ owhẹ ekwakwa-efe gbe efe gbe orro, utionọ ovie ọvo nọ ọ kake rehọ owhẹ su no o wo ho, gbe onọ ovie ọvo nọ o ti su nọ u te no owhẹ no o ti wo ho.”+

13 Solomọn o te no aro uwou-udhu omakugbe na nọ o jọ oria ukpehru na evaọ Gibiọn+ ziọ Jerusalẹm; o te je su Izrẹl. 14 Solomọn ọ ruabọhọ je koko ekẹkẹ gbe enyenya* họ; o wo ekẹkẹ odu ọvo gbe egba ene (1,400) gbe enyenya* idu ikpegbivẹ (12,000),+ o te fi ai họ ikpewho ekẹkẹ+ na je fi ae họ kẹle ovie na evaọ Jerusalẹm.+ 15 Ovie na o ru nọ isiliva gbe igoru e rọ jọ buobu evaọ Jerusalẹm wọhọ itho nọ e jọ eva riẹ,+ o te je ru nọ ire sida e rọ jọ buobu wọhọ ire sikamọ nọ e rrọ Shefila* na.+ 16 Obọ Ijipti a jẹ dẹ enyenya Solomọn no ze,+ yọ unuigho ovona utu ethueki ovie na a jẹ hae rọ dẹ owa enyenya oke kpobi.*+ 17 Ewẹ isiliva egba ezeza (600) a jẹ hae rọ dẹ akẹkẹ ọvuọvo no obọ Ijipti ze, yọ ewẹ isiliva udhuhrẹ-gbikpe (150) a jẹ dẹ anyenya ọvo; a vẹ wariẹ zẹ ae kẹ ivie ahwo Hit gbe ivie Siria kpobi.

2 Solomọn ọ tẹ ta nọ a bọ uwou kẹ odẹ Jihova+ jẹ bọ uwou* uvie riẹ.+ 2 Solomọn o te koko ezae idu udhosa-gbikpe (70,000) họ re a jọ iruiruo gheghe,* ezae idu udhone (80,000) re a jọ enọ i re bru itho evaọ igbehru,+ gbe ezae idu esa gbe egba ezeza (3,600) re a jọ esẹro kẹ ae.+ 3 U no ere no, Solomọn o vi uwou se Haeram+ ovie Taya, inọ: “Ru epanọ who ru kẹ Devidi ọsẹ mẹ na kẹ omẹ, nọ who ro vi ire sida sei re ọ rọ bọ uwou* nọ ọ rẹ rria.+ 4 Whaọ mẹ be bọ uwou kẹ odẹ Jihova Ọghẹnẹ mẹ, re me ru ei ọrẹri kẹe, re mẹ jọ aro riẹ mahe insẹnse nọ i re gbo ore awere,+ jegbe onọ o te jọ rọkẹ ebrẹdi nọ a re fihọ ehru ohwohwo* kẹse kẹse na,+ gbe idhe emahọ te ohiohiẹ te owọwọ+ na, evaọ Edijala,+ evaọ ehaa ọvẹre ọkpokpọ,+ gbe evaọ etoke ehaa+ Jihova Ọghẹnẹ mai sa-sa. Onana yọ uzi nọ o rẹ jọ ribri rọkẹ Izrẹl. 5 Uwou nọ mẹ be bọ na o te jọ ruaro, keme Ọghẹnẹ mai ọ rro vi eghẹnẹ efa kpobi. 6 Kọ ono o te epanọ ọ sae rọ bọ uwou kẹe? Keme idhiwu na gbe odhiwu idhiwu na e rẹ sae gbae he,+ kọ ono họ omẹ nọ mẹ rẹ rọ bọ uwou kẹe, ajokpanọ o rẹ jọ oria nọ a rẹ jọ ru idheidhe kuye iwiri evaọ aro riẹ? 7 Enẹna vi ọwena se omẹ, ọnọ o wo onaa nọ ọ rẹ rehọ igoru, isiliva, ekọpa,+ ayọno, iwhulu ogorurẹ, ehọ ewawae, gbe olulu iburu ro ru eware, jẹ riẹ epanọ a rẹ kare oware fihọ oma oware. Ọ te jọ evaọ Juda gbe evaọ Jerusalẹm lele ewena mẹ nọ i wo onaa ru iruo, enọ Devidi ọsẹ mẹ ọ ruẹrẹhọ na.+ 8 Who re je vi ire sida, junipa,+ gbe algọm+ no obọ Lebanọn se omẹ, keme mẹ riẹ nọ idibo ra e riẹ kpahe oghẹrẹ nọ a re ro bru ire Lebanọn+ ziezi. Idibo mẹ i ti lele idibo ra ru iruo+ 9 re a ruẹrẹ ite-ire buobu họ kẹ omẹ, keme uwou nọ mẹ be te bọ na o te jọ ruaro gaga. 10 Whaọ rri! mẹ te kẹ idibo ra+ nọ i re bru ire na emu, mẹ te kẹ ae: owawọ kọr* iwhiti idu udhe (20,000), owawọ kọr ebali idu udhe (20,000), ebate* enwaene idu udhe (20,000), gbe ebate ewhri idu udhe (20,000).”

11 Fikiere Haeram ovie Taya o te vi ileta nana se Solomọn, inọ: “Fikinọ Jihova o you ahwo riẹ, ọ tẹ rehọ owhẹ mu ovie rai.” 12 Kẹsena Haeram ọ tẹ ta nọ: “Jọ ujiro u te Jihova Ọghẹnẹ Izrẹl, ọnọ ọ ma idhiwu gbe otọakpọ na, keme ọ kẹ Devidi ọmọzae nọ o wo areghẹ,+ nọ a kẹ orimuo gbe otoriẹ,+ ọnọ ọ te bọ uwou kẹ Jihova jẹ bọ uwou kẹ uvie riẹ. 13 Whaọ me bi vi ọwena nọ o wo onaa ze, Haeram-ebae,+ ọnọ o wo otoriẹ, 14 ọnọ oni riẹ ọ rrọ ohwo orua Dan, rekọ ọsẹ riẹ yọ ohwo Taya; ọ riẹ epanọ a rẹ rehọ igoru, isiliva, ekọpa, ayọno, itho, ite-ire, iwhulu ogorurẹ, olulu iburu, ehọ iwowoma, gbe ehọ ewawae+ ro ru eware ziezi. Ọ rẹ sae kare oghẹrẹ oware kpobi fihọ oma oware jẹ sae drọ oware onaa kpobi nọ a kẹ riẹ.+ O ti ru iruo kugbe ewena ra nọ i wo onaa gbe erọ olori mẹ Devidi ọsẹ ra. 15 Enẹna jọ olori mẹ o vi iwhiti, ebali, ewhri, gbe enwaene nọ ọ ya eyaa nọ ọ te kẹ idibo riẹ na ze.+ 16 Ma vẹ te jọ Lebanọn bru ire,+ te epanọ whọ gwọlọ bu te kpobi, ma te gba ite-ire na kugbe, ma vẹ jọ abade na voro ai kpobọ Jọpa;+ whọ vẹ wọ ae kpobọ Jerusalẹm.”+

17 Kẹsena Solomọn o te kele ezae kpobi nọ e jọ erara evaọ ẹkwotọ Izrẹl,+ wọhọ epanọ Devidi ọsẹ riẹ o ru,+ ezae idu udhuhrẹ gbe ikpegbesa gbe egba ezeza (153,600) a ruẹ. 18 Ọ tẹ jọ usu rai fi idu udhosa-gbikpe (70,000) họ re a jọ iruiruo gheghe,* idu udhone (80,000) re a jọ enọ i re bru itho+ evaọ igbehru, gbe idu esa gbe egba ezeza (3,600) re a jọ esẹro nọ i re dhe iruo kẹ ahwo na.+

3 Solomọn o te mu uwou Jihova+ họ ẹbọ fihọ Ugbehru Moraya+ evaọ Jerusalẹm, oria nọ Jihova ọ jọ romavia kẹ Devidi ọsẹ riẹ,+ evaọ oria nọ Devidi ọ ruẹrẹ kpahe evaọ oria Ọnan+ ohwo Jebus na nọ a rẹ jọ si ibi no igbe ekakọ. 2 O mu rie họ ẹbọ evaọ ẹdẹ avọ ivẹ amara avọ ivẹ, evaọ ukpe avọ ene esuo riẹ. 3 Otọhotọ uwou Ọghẹnẹ uzẹme na nọ Solomọn ọ wọ họ u theri te ikiubiti udhosa, o kẹre te ikiubiti udhe,+ onọ a rehọ owawọ anwae rọ ma.* 4 Ọmọgwa nọ ọ jọ aro uwou na u theri te ikiubiti udhe, avọ okẹkẹe uwou na ẹrẹrẹe, yọ u kpehru te ikiubiti udhozeza (120);* ọ rehọ emamọ igoru tamu* obeva riẹ soso.+ 5 Ọ rehọ ire junipa rọ hwa uwou ulogbo na, ọ tẹ rehọ emamọ igoru ruru iei,+ kẹsena ọ tẹ rehọ iwoho iriẹ+ gbe egbregba rọ whẹ erru họ iẹe.+ 6 U no ere no, ọ rehọ itho eghaghae iwowoma ro ruru oma uwou na soso;+ yọ obọ Paveyẹm a rehọ igoru+ nọ o ro ru uwou na no ze. 7 Ọ rehọ igoru+ ruru oma uwou na soso, koyehọ, ire ehru uwou na, inuwou na, igbẹhẹ riẹ, gbe ethẹ riẹ; yọ ọ kare iwoho chẹrub fihọ igbẹhẹ na.+

8 O te ti ru ubrukpẹ* Ọrẹri Erẹri na;+ uthethei riẹ avọ okẹkẹe uwou na ẹrẹrẹe, ikiubiti udhe, yọ okẹkẹe riẹ o jọ ikiubiti udhe. Ọ rehọ etalẹnte* egba ezeza (600) emamọ igoru ro ruru oma riẹ.+ 9 Igoru nọ a ro ru ibubẹ na e gbẹdẹ te shẹkẹl* udhuvẹ-gbikpe; yọ ọ rehọ igoru ruru ibriwou obehru na.

10 Kẹsena ọ tẹ kare iwoho chẹrub ivẹ fihọ ubrukpẹ* Ọrẹri Erẹri na, ọ tẹ rehọ igoru tamu* oma rai soso.+ 11 Nọ a te ku uthethei ibekpe chẹrub ivẹ na+ kugbe, i theri te ikiubiti udhe; ubekpe ọvo chẹrub ọsosuọ na u theri te ikiubiti isoi, yọ u duhọ ugbẹhẹ uwou na, ubekpe ọdekọ riẹ u theri te ikiubiti isoi, yọ u duhọ ubekpe chẹrub avọ ivẹ na jọ. 12 Ubekpe ọvo chẹrub ọdekọ na u theri te ikiubiti isoi, yọ u duhọ abọdekọ ugbẹhẹ uwou na, ubekpe ọdekọ riẹ u theri te ikiubiti isoi, yọ u duhọ ubekpe chẹrub ọsosuọ na jọ. 13 Ibekpe chẹrub ivẹ nana e rriẹ fihọ te ikiubiti udhe; a rọ awọ rai dikihẹ, yọ a rẹriẹ ovao rri obeva.*

14 O te je ru ekọtini+ nọ a rehọ olulu iburu, iwhulu ogorurẹ, ohọ ọwawae, gbe ohọ owowoma ro ru, yọ o ru iwoho chẹrub fihọ iẹe.+

15 Kẹsena o te ru ipila ivẹ+ fihọ aro uwou na, i theri te ikiubiti ọgbagbisoi, yọ uzou nọ o jọ ehru upila ọvuọvo o jọ ikiubiti isoi.+ 16 O ru egbregba nọ e wọhọ ifiare, o te fi ai họ ehru ipila na, o te ru pọmegranet udhusoi (100), ọ tẹ jẹ ae họ egbregba na. 17 Ọ tẹ rehọ ipila na vi aro etẹmpol na, ọjọ ọ rrọ obọze,* ọdekọ ọ tẹ rrọ ẹkpẹlobọ;* o te se ọnọ ọ rrọ obọze na Jekin,* ọnọ ọ rrọ ẹkpẹlobọ kọ Boaz.*

4 Kẹsena o te ru agbada-idhe ekọpa+ na, u theri te ikiubiti udhe, o kẹre te ikiubiti udhe, u kpehru te ikiubiti ikpe.

2 Ọ ghra ekọpa ro ru Abade*+ na. O jọ gheghelie, unu riẹ o kẹre te ikiubiti ikpe, u kpehru te ikiubiti isoi, yọ ufi nọ u theri te ikiubiti ọgba oye o sae nyae wariẹ.+ 3 Eware erru nọ a ru wọhọ imikoko+ e jọ obotọ riẹ wariẹ họ, imikoko ikpe e jọ oria nọ u theri te ikiubiti ovo, ere e jọ wariẹ oma Abade na soso họ. Imikoko na e jọ ihie ivẹ nọ a ru kugbe wọhọ oware ovo. 4 Abade na ọ jọ ehru iruẹ ikpegbivẹ,+ esa i rri ofẹ ẹkpẹlobọ ovatha-ọre, esa i rri ofẹ ukiediwo-ọre, esa i rri ofẹ obọze ovatha-ọre, esa i te rri ofẹ ovatha-ọre; Abade na ọ jọ ehru rai, yọ obemu rai kpobi o rri obọ udevie Abade na. 5 Okpa riẹ u te okẹkẹe iziabọ ene;* a ru igbenu riẹ wọhọ igbenu egho, wọhọ ododo nọ o rovie fihọ. Ebate* ame idu esa (3,000) e rẹ vọ othẹ-ame ologbo na.

6 U no ere no, o ru idhe ikpe rọkẹ eware ewozẹ, yọ o fi isoi họ ofẹ obọze, o te fi isoi họ ofẹ ẹkpẹlobọ.+ A jẹ hae jọ eva rai wozẹ eware nọ a ro dhe idhe emahọ.+ Rekọ Abade na o jọ rọkẹ izerẹ na nọ a rẹ rọ wozẹ abọ gbe awọ.+

7 Kẹsena o te ru ekpọ-edada ikpẹ ikpe erọ igoru,+ wọhọ epanọ a fodẹ nọ o rẹ jọ,+ o te fi ai họ evaọ etẹmpol na, isoi e jọ obọze, isoi e tẹ jọ ẹkpẹlobọ.+

8 O te je ku emẹjẹ ikpe, o te fi ai họ evaọ etẹmpol na, isoi e jọ obọze, isoi e tẹ jọ ẹkpẹlobọ;+ yọ o ru imidhe ikokodo igoru udhusoi (100).

9 Kẹsena ọ tẹ bọ ighẹ+ izerẹ na+ gbe ighẹ ologbo*+ na, je ru ethẹ nọ a fihọ inuethẹ ighẹ na, yọ ọ rehọ ekọpa tamu* oma ethẹ rai soso. 10 O fi Abade na họ ofẹ obọze, evaọ ofẹ obọze ovatha-ọre.+

11 Haeram o te je ru ibokiti, eshọvẹle, gbe imidhe ikokodo na.+

Ere Haeram o ro ku iruo nọ o ru kẹ Solomọn ovie na họ evaọ uwou Ọghẹnẹ uzẹme na. Eware nọ o ru ena:+ 12 ipila ivẹ+ gbe izou nọ e wọhọ omodhe okokodo nọ o ru fihọ ehru ipila ivẹ na; eware ivẹ nọ e wọhọ ẹriri+ nọ o ru re a ro ruru izou ivẹ nọ e wọhọ omodhe okokodo nọ e jọ ehru ipila na; 13 pọmegranet egba ene (400)+ nọ o fihọ eware ivẹ nọ e wọhọ ẹriri na, o ru pọmegranet na fihọ ihie ivẹ wariẹ eware nọ e wọhọ ẹriri na ọvuọvo họ, re i ruru izou ivẹ nọ e wọhọ omodhe okokodo nọ e jọ ehru ipila ivẹ na;+ 14 ighelie-eware ikpe* na gbe idhe ikpe nọ o ru fihọ ehru ighelie-eware na;+ 15 Abade na gbe iruẹ ikpegbivẹ nọ e rrọ otọ riẹ;+ 16 gbe ibokiti na, eshọvẹle na, efọko na,+ gbe ekwakwa rai kpobi nọ Haeram-ebiv+ ọ rehọ ekọpa enwranwra ru kẹ Solomọn ovie na rọkẹ uwou Jihova. 17 Ovie na o ru eware nana evaọ ubrotọ Jọdan evaọ oria ọviẹ ọlala nọ ọ rrọ udevie Sọkọt+ avọ Zẹreda. 18 Solomọn o ru ekwakwa nana kpobi buobu gaga; a riẹ epanọ ekọpa na e gbẹdẹ te he.+

19 Solomọn o ru ekwakwa kpobi+ nọ e te jọ uwou Ọghẹnẹ uzẹme na: agbada-idhe igoru na;+ emẹjẹ na+ avọ ebrẹdi udhesẹ na nọ e rrọ ehru rai;+ 20 ekpọ-edada ikpẹ na avọ ikpẹ rai nọ ọ rọ emamọ igoru ru,+ re e hai lo evaọ aro ubrukpẹ nọ o mae rrọ obeva na wọhọ epanọ o gwọlọ; 21 gbe idodo na, ikpẹ na, gbe eware nọ a re ro kru uwhiki na, enọ a rehọ igoru ru, igoru nọ e mai woma; 22 ifurie-erae* na, imidhe ikokodo na, igho na, gbe imidhe erae na, enọ a rehọ emamọ igoru ru; gbe unuẹthẹ uwou na, ethẹ obeva riẹ nọ a rẹ rọ ruọ Ọrẹri Erẹri na,+ jegbe ethẹ uwou etẹmpol na, enọ a rehọ igoru ru.+

5 Ere Solomọn o ro ku iruo kpobi nọ u fo nọ o re ru evaọ uwou Jihova+ họ. Kẹsena Solomọn ọ tẹ rehọ eware nọ Devidi ọsẹ riẹ o ru họ ọrẹri na ziọ eva uwou na,+ o te fi isiliva na, igoru na, gbe ekwakwa na kpobi họ eria ekwakwa-aghae uwou Ọghẹnẹ uzẹme na.+ 2 Evaọ oke yena, Solomọn o te koko ekpako Izrẹl họ, enọ i wuzou erua na kpobi gbe enọ i wuzou inuwou abọ ọsẹ evaọ erua Izrẹl. A nyaziọ Jerusalẹm re a wọ etehe ọvọ Jihova no Okpẹwho Devidi ze,+ koyehọ Zayọn.+ 3 Ezae Izrẹl kpobi i te kokohọ aro ovie na evaọ oke ehaa* nọ a re ru evaọ amara avọ ihrẹ.+

4 Ere ekpako Izrẹl kpobi a rọ nyaze, ahwo Livae na a tẹ wọ etehe ọvọ na.+ 5 A wọ etehe ọvọ na, uwou-udhu omakugbe na,+ gbe ekwakwa ọrẹri kpobi nọ e jọ uwou-udhu na ze. Izerẹ na gbe ahwo Livae* na họ enọ e wọ rai ze. 6 Solomọn ovie na avọ ogbotu ahwo Izrẹl na soso nọ a se kokohọ bru ei ze na a tẹ jọ aro etehe ọvọ na. A tẹ jẹ rehọ igodẹ gbe iruẹ buobu dhe idhe,+ i bu te epanọ a sai ro kele ai hayo riẹ unu rai hi. 7 Kẹsena izerẹ na e tẹ wọ etehe ọvọ Jihova na ziọ oria nọ a ruẹrẹhọ kẹe, koyehọ ubrukpẹ nọ o mae rrọ obeva na, Ọrẹri Erẹri na, evaọ otọ ibekpe chẹrub ivẹ na.+ 8 Ere ibekpe chẹrub ivẹ na e rọ rriẹ fihọ evaọ ehru oria nọ etehe ọvọ na ọ rrọ, u te ru nọ chẹrub ivẹ na i ro ruru etehe ọvọ na avọ ekpọ riẹ+ evaọ obehru. 9 Ekpọ na e jọ thethei gaga te epanọ a jẹ rọ ruẹ ẹroro ekpọ na evaọ oria Ọrẹri nọ o rrọ aro ubrukpẹ nọ o mae rrọ obeva na, rekọ a jẹ ruẹ e rai evaọ obọ otafe he. Yọ e gbẹ rrọ etẹe rite ẹdẹ inẹnẹ na. 10 Oware ovo o jọ eva etehe ọvọ na ha, ajokpaọ ewẹ-itho ekpakpala ivẹ nọ Mosis o fihọ eva riẹ evaọ Horẹb,+ okenọ Jihova ọ re ọvọ+ kugbe ahwo Izrẹl nọ a je no Ijipti ze.+

11 Okenọ izerẹ na i no eva oria ọrẹri na ze, (keme izerẹ kpobi nọ e jariẹ i ru omarai fo no vẹre,+ ghelọ itu nọ a rrọ kẹhẹ),+ 12 yọ ahwo Livae kpobi nọ a rrọ eso-ile+ nọ e jọ utu Esaf,+ Himan,+ Jedutọn,+ gbe utu emezae rai avọ imoni rai a ku iwu ehọ iwowoma họ, a kru igogo, ekpata-ifi, gbe ekpata; a dikihẹ ofẹ ovatha-ọre agbada-idhe na, yọ izerẹ udhozeza (120) e jọ kugbe ai je kporo egba.+ 13 Okenọ ikporo-egba na avọ eso-ile na e nwani mu Jihova họ ejiri je bi yere iei evaọ unu ovo, yọ edo egba na, igogo na, gbe ekwakwa ikporakporo efa i bi do nọ a bi jiri Jihova na, yọ a be ta nọ, “keme ọ rrọ wowoma; uyoyou riẹ nọ o rẹ hiẹ hẹ o rẹ jọ bẹdẹ bẹdẹ,”+ ẹgho ọ tẹ vọ uwou na soso, uwou Jihova na.+ 14 Izerẹ na e sai dikihẹ re a ru iruo rai hi fiki ẹgho na, keme oruaro Jihova o vọ uwou Ọghẹnẹ uzẹme na soso.+

6 Evaọ oke yena Solomọn ọ tẹ ta nọ: “Jihova ọ ta nọ ọ te rria eva ẹgho ọlala na.+ 2 Enẹna, mẹ bọ uwou ulogbo kẹ owhẹ no, oria nọ a ruẹrẹhọ kẹ owhẹ no re whọ rria bẹdẹ bẹdẹ.”+

3 Kẹsena ovie na o te kuomarẹriẹ, o te mu ẹro eghale họ ẹlẹ kẹ ukoko ahwo Izrẹl na soso, yọ ukoko ahwo Izrẹl na soso a dikihẹ.+ 4 Ọ ta nọ: “Jọ ujiro u te Jihova Ọghẹnẹ Izrẹl, ọnọ ọ rehọ unu obọriẹ ya eyaa kẹ Devidi ọsẹ mẹ, ọ tẹ rehọ abọ obọriẹ ru eyaa na gba, ọ ta nọ, 5 ‘No anwọ ẹdẹ nọ mẹ rọ rehọ ahwo mẹ Izrẹl no ẹkwotọ Ijipti ze, mẹ re salọ okpẹwho ọvo evaọ erua Izrẹl kpobi hi nọ a rẹ bọ uwou fihọ re odẹ mẹ o jọ etẹe,+ yọ mẹ re salọ ọzae ọvo gbe he re ọ jọ osu kẹ ahwo mẹ Izrẹl. 6 Rekọ mẹ salọ Jerusalẹm+ re odẹ mẹ o jọ etẹe, yọ mẹ salọ Devidi no re o su ahwo mẹ Izrẹl.’+ 7 Yọ Devidi ọsẹ mẹ ọ jọ udu riẹ wo isiuru nọ ọ rẹ bọ uwou kẹ odẹ Jihova Ọghẹnẹ Izrẹl.+ 8 Rekọ Jihova ọ ta kẹ Devidi ọsẹ mẹ nọ, ‘Whọ jọ udu ra wo isiuru nọ whọ rẹ bọ uwou kẹ odẹ mẹ, whọ riẹ ru nọ who ro wo isiuru nana evaọ udu ra. 9 Rekọ whọ te bọ uwou na ha, ukpoye ọmọzae obọra nọ a ti yẹ kẹ owhẹ* họ ọnọ ọ te bọ uwou na kẹ odẹ mẹ.’+ 10 Jihova o ru eyaa nọ ọ ya na gba no, keme mẹ rehọ ẹta Devidi ọsẹ mẹ no, mẹ tẹ keria agbara-uvie Izrẹl+ nwane wọhọ epanọ Jihova ọ ya.+ Mẹ tẹ jẹ bọ uwou na kẹ odẹ Jihova Ọghẹnẹ Izrẹl no, 11 yọ mẹ wọ Etehe nọ ọvọ+ nọ Jihova ọ re kugbe ahwo Izrẹl ọ rrọ eva na fihọ etẹe no.”

12 Kẹsena o te dikihẹ aro agbada-idhe Jihova evaọ aro ukoko ahwo Izrẹl soso, ọ tẹ rriẹ abọ riẹ fihọ.+ 13 (Keme Solomọn ọ rehọ ekọpa ru ukpehru-ẹmeọta jọ, ọ tẹ wọe fihọ udevie ighẹ*+ na. U theri te ikiubiti* isoi, o kẹre te ikiubiti isoi, yọ u kpehru te ikiubiti esa; yọ ehru riẹ o dikihẹ.) O te kigwẹ evaọ aro ukoko ahwo Izrẹl na soso, ọ tẹ rriẹ abọ riẹ rri obọ idhiwu na,+ 14 ọ tẹ ta nọ: “O Jihova Ọghẹnẹ Izrẹl, Ọghẹnẹ ọvo nọ ọ wọhọ owhẹ evaọ obọ idhiwu na hayo evaọ otọakpọ na ọ rrọ họ, whẹ họ ọnọ o bi koko ọvọ na je bi dhesẹ uyoyou nọ o rẹ hiẹ hẹ kẹ idibo ra nọ e be rọ udu rai kpobi nya evaọ aro ra.+ 15 Who ru eyaa nọ whọ ya kẹ odibo ra Devidi ọsẹ mẹ gba no.+ Unu obọra whọ rọ ya eyaa na, yọ whọ rehọ obọ obọra ru eyaa na gba no nẹnẹ na.+ 16 Whaọ enẹna, O Jihova Ọghẹnẹ Izrẹl, ru eyaa nọ whọ ya kẹ odibo ra Devidi ọsẹ mẹ gba, onọ whọ ya nọ: ‘Ohwo nọ ọ rẹ keria agbara-uvie Izrẹl evaọ aro mẹ o ti no uyẹ ra vievie he otẹrọnọ emezae ra i te muẹrohọ oghẹrẹ nọ a bi yeri uzuazọ rai jẹ nya lele uzi mẹ,+ nwane wọhọ epanọ whọ nya evaọ aro mẹ na.’+ 17 Whaọ enẹna, O Jihova Ọghẹnẹ Izrẹl, jọ eyaa nọ whọ ya kẹ Devidi odibo ra na u rugba.

18 “Kọ Ọghẹnẹ ọ rẹ ginẹ rria kugbe ohwo-akpọ evaọ otọakpọ na?+ Rri! Idhiwu na, ẹhẹ, odhiwu idhiwu na ọ rẹ sae gba owhẹ hẹ;+ kabikọ uwou nana nọ mẹ bọ na!+ 19 Enẹna, gaviezọ kẹ olẹ odibo ra gbe ayare riẹ kẹ aruoriwo, O Jihova Ọghẹnẹ mẹ, jẹ gaviezọ kẹ ubo nọ odibo ra o bi bo kẹ obufihọ, gbe olẹ nọ ọ be lẹ evaọ aro ra na. 20 Jọ ibiaro ra i rovie fihọ rri uwou nana te aso te uvo, jọ i rri oria nọ whọ ta kpahe nọ who ti fi odẹ ra+ họ na, re whọ gaviezọ kẹ olẹ nọ odibo ra ọ rẹriẹ ovao ku oria nana be lẹ. 21 Gaviezọ kẹ ayare nọ odibo ra ọ be yare kẹ obufihọ gbe ayare ahwo ra Izrẹl okenọ a tẹ rẹriẹ ovao ku oria nana be lẹ,+ yọ ajọ whọ jọ obọ idhiwu nọ whọ be rria yo olẹ na;+ ẹhẹ, ajọ who yo olẹ na re whọ rọvrẹ rai.+

22 “Otẹrọnọ ohwo jọ o te ru ọrivẹ riẹ thọ, a je ru ei duwu iyei fihọ uzou,* nọ ọ jẹ ziọ aro agbada-idhe ra evaọ uwou nana avọ epanọ o ro duwu iyei fihọ uzou na,+ 23 ajọ who yo evaọ obọ idhiwu na, who ve ru oware jọ je bruoziẹ idibo ra ẹkwoma ohwo omuomu na nọ whọ rẹ hwosa zihe kẹ, whọ vẹ rehọ oware nọ o ru na ziọ uzou obọriẹ,+ gbe ẹkwoma ohwo nọ o kiẹrẹe na nọ who re bruoziẹ kẹ inọ ọ rease,* whọ vẹ hwosa kẹe wọhọ epaọ ẹrẹreokie riẹ.+

24 “Yọ otẹrọnọ ọwegrẹ o fi ahwo ra Izrẹl kparobọ fikinọ a ruabọhọ jẹ raha uzi ra,+ nọ a je zihe bru owhẹ ze jẹ kẹ odẹ ra+ orro jẹ jọ aro ra lẹ+ kẹ aruoriwo evaọ uwou nana,+ 25 ajọ who yo evaọ obọ idhiwu na+ re whọ rehọ uzioraha ahwo ra Izrẹl rọvrẹ rai, whọ vẹ rehọ ai zihe ziọ ẹkwotọ nọ whọ kẹ rai gbe esẹ-esẹ rai.+

26 “Nọ idhiwu na i te wuhu di, nọ oso ọ gbẹ be rrọ họ+ fikinọ a ruabọhọ jẹ raha uzi ra,+ nọ a jẹ rẹriẹ ovao ku uwou nana lẹ jẹ kẹ odẹ ra orro, nọ a je kurẹriẹ no uzioraha rai fikinọ who hrẹ rai kpotọ,*+ 27 ajọ who yo evaọ obọ idhiwu na re whọ rehọ uzioraha idibo ra, ahwo ra Izrẹl rọvrẹ rai, keme who ti wuhrẹ ai kpahe emamọ edhere nọ u fo nọ a rẹ nya;+ who ve ru oso rrọ+ fihọ ẹkwotọ ra nọ whọ rehọ kẹ ahwo ra nọ a rọ reuku na.

28 “Otẹrọnọ ohọo u bi mu evaọ ẹkwotọ na,+ hayo okpẹyao nọ o re vo,+ hayo ẹrrorro ọgaga nọ o re kpe ekakọ, izuzu,+ ebaka-ẹkpẹ nọ e rẹ jọ usu ovo buobu, hayo ebaka-ẹkpẹ nọ e rẹ re oware muotọ*+ e rrọ ẹkwotọ na; hayo otẹrọnọ ewegrẹ rai a ko rai họ okpẹwho jọ evaọ usu ikpewho ẹkwotọ na*+ hayo otẹrọnọ oghẹrẹ uye ofa jọ hayo ẹyao jọ kpobi o te du lahwe,+ 29 nọ ohwo jọ hayo ahwo Izrẹl kpobi a tẹ lẹ olẹ jọ kpobi,+ hayo yare nọ who wo aruoriwo+ kẹ ae (keme ohwo kpobi ọ riẹ ọvuọ uye riẹ gbe ọvuọ edada riẹ)+ evaọ okenọ a rriẹ abọ rai rri uwou nana,+ 30 ajọ who yo evaọ obọ idhiwu na, oria nọ whọ be rria,+ re whọ rọvrẹ rai;+ whọ vẹ hwosa kẹ omomọvo wọhọ epanọ iruẹru riẹ kpobi e rrọ, keme whọ riẹ udu riẹ (whẹ ọvo whọ ginẹ riẹ udu ohwo-akpọ),+ 31 re a ruẹse dhozọ ra ẹkwoma idhere ra nọ a rẹ jọ nya evaọ edẹ kpobi nọ a te rria ẹkwotọ nọ whọ rọ kẹ esẹ-esẹ mai na.

32 “Ofariẹ, rọ kpahe ohwo orẹwho ọfa nọ ọ rrọ usu ahwo ra Izrẹl he, nọ o no ẹkwotọ ugbothabọ ze fiki odẹ ulogbo ra*+ gbe obọ ogaga ra gbe ugbobọ ra nọ whọ rriẹ, nọ ọ jẹ nyaze te rẹriẹ ovao ku uwou nana lẹ,+ 33 ajọ whọ gaviezọ evaọ obọ idhiwu na, oria nọ whọ be rria, re who ru oware kpobi nọ ohwo orẹwho ọfa na ọ yare owhẹ, re ahwo otọakpọ na kpobi a ruẹse riẹ odẹ ra+ jẹ dhozọ ra, wọhọ epanọ ahwo ra Izrẹl a bi ru, a vẹ riẹ nọ a rehọ odẹ ra se uwou nana nọ mẹ bọ na.

34 “Otẹrọnọ ahwo ra a tẹ nyai lele ewegrẹ rai fi ẹmo evaọ edhere nọ whọ ta kẹ ae nọ a nya,+ nọ a jẹ rọ ovao rri okpẹwho nana nọ whọ salọ na lẹ+ se owhẹ jẹ rọ ovao rri uwou nọ mẹ bọ kẹ odẹ ra na,+ 35 ajọ whọ jọ obọ idhiwu na yo olẹ rai gbe ayare rai kẹ aruoriwo, who ve bruoziẹ kẹ ae.+

36 “Otẹrọnọ a raha uzi ra (keme ohwo ọvo ọ rrọ họ nọ ọ rẹ raha uzi hi),+ nọ eva rai e jẹ be dha owhẹ gaga, who je siobọno ai kẹ ọwegrẹ, nọ enọ i mu rai e jẹ wha ai kpohọ igbo evaọ ẹkwotọ ugbothabọ hayo ekẹloma,+ 37 nọ aro rai o je te otọ no evaọ ẹkwotọ nọ a mu rai kpohọ na, nọ a je zihe bru owhẹ ze jẹ lẹ owhẹ nọ who wo aruoriwo kẹ ae evaọ ẹkwotọ nọ a jọ rrọ igbo na, be ta nọ, ‘Ma raha uzi je ru thọ no; ma ru umuomu no,’+ 38 a jẹ rehọ udu rai kpobi+ gbe uzuazọ* rai kpobi zihe bru owhẹ ze evaọ ẹkwotọ nọ a jọ rrọ igbo+ nọ a mu rai kpohọ na, a jẹ rọ ovao rri ẹkwotọ rai nọ whọ kẹ esẹ-esẹ rai lẹ se owhẹ jẹ rọ ovao rri okpẹwho nọ whọ salọ na+ gbe uwou nọ mẹ bọ kẹ odẹ ra na, 39 whọ vẹ jọ obọ idhiwu na, oria nọ whọ be rria yo olẹ rai gbe ayare rai kẹ aruoriwo, who ve bruoziẹ kẹ ae+ jẹ rọvrẹ ahwo ra nọ a raha uzi ra.

40 “Enẹna, O Ọghẹnẹ mẹ, ivie jọ ibiaro ra i rovie fihọ, re whọ jẹ gaviezọ kẹ olẹ nọ a lẹ evaọ* oria nana.+ 41 Whaọ enẹna, O Jihova Ọghẹnẹ, kpohọ oria eriosehọ ra,+ whẹ avọ etehe ọvọ ẹgba ra. O Jihova Ọghẹnẹ, jọ izerẹ ra e rehọ esiwo gọ ẹgọ, re ahwo ra nọ a be romakpotọ a ghọghọ fiki ewoma ra.+ 42 O Jihova Ọghẹnẹ, whọ siọ ọnọ who wholo na ha.*+ Jọ whọ kareghẹhọ uyoyou ra nọ o rẹ hiẹ hẹ nọ who wo kẹ Devidi odibo ra.”+

7 Nọ Solomọn ọ nwane lẹ kuhọ no,+ erae i te no obọ idhiwu na ze,+ e tẹ mahe idhe emahọ na gbe oghẹrẹ idhe efa nọ a dhe na no, oruaro Jihova o tẹ vọ uwou na.+ 2 Izerẹ na e sae ruọ eva uwou Jihova na ha fikinọ oruaro Jihova o vọ uwou Jihova na soso.+ 3 Ahwo Izrẹl na kpobi a je rri ọvo okenọ erae na e rọ nyaze yọ oruaro Jihova o jọ uwou na, a te kigwẹ guzou rai kpotọ evaọ otọ nọ a rọ itho ru na, je kiẹzẹ vovao tuotọ bi yere Jihova, “keme ọ rrọ wowoma; uyoyou riẹ nọ o rẹ hiẹ hẹ o rẹ jọ bẹdẹ bẹdẹ.”

4 Kẹsena ovie na avọ ahwo na kpobi a te dhe idhe evaọ aro Jihova.+ 5 Solomọn ovie na ọ tẹ rehọ iruẹ idu udhegbivẹ (22,000) avọ igodẹ idu udhozeza (120,000) ro dhe idhe. Ere ovie na avọ ahwo na kpobi a rọ rehọ uwou Ọghẹnẹ uzẹme na mudhe.+ 6 Yọ izerẹ na i dikihẹ ọvuọ oria iruo rai, ere ọvona ahwo Livae nọ a kru ekwakwa ikporakporo nọ a ro kporo ole kẹ Jihova+ a dikihẹ re. (Devidi ovie na o ru ekwakwa ikporakporo nana re a rehọ ae kẹ Jihova uyere—“keme uyoyou riẹ nọ o rẹ hiẹ hẹ o rẹ jọ bẹdẹ bẹdẹ”—evaọ okenọ Devidi ọ tẹ be rehọ ae* jiri Ọghẹnẹ.) Izerẹ na i je kporo egba na do gaga+ evaọ aro rai, yọ ahwo Izrẹl na kpobi a dikihẹ.

7 Kẹsena Solomọn o te ru udevie ighẹ nọ o jọ aro uwou Jihova na họ ọrẹri, keme etẹe o gwọlọ nọ ọ rẹ jọ dhe idhe emahọ+ na, gbe iwhri ekẹ erao idhe ọriẹyeri na, keme agbada-idhe ekọpa+ nọ Solomọn o ru na o sae gba idhe emahọ na, idhe ibi ekakọ+ na, gbe iwhri+ ekẹ erao na ha. 8 Evaọ oke yena, Solomọn avọ ahwo Izrẹl kpobi a rehọ edẹ ihrẹ ru ehaa na,+ ogbotu ahwo buobu nọ a no obọ Libo-hemat* rite obọ Uto* Ijipti ze.+ 9 Rekọ evaọ ẹdẹ avọ eree* a te ru okokohọ urirẹ,+ keme edẹ ihrẹ a rọ rehọ agbada-idhe na mudhe, a tẹ rehọ edẹ ihrẹ ru ehaa na. 10 Kẹsena evaọ ẹdẹ avọ udhegbesa amara avọ ihrẹ na, o te siobọno ahwo na kpohọ ọvuọ iwou rai yọ a be ghọghọ+ jẹ be wereva fiki ewoma nọ Jihova o ru kẹ Devidi gbe Solomọn gbe Izrẹl ahwo riẹ.+

11 Ere Solomọn ọ rọ bọ uwou Jihova gbe uwou* ovie na re;+ yọ oware kpobi nọ o ruọ Solomọn udu nọ o re ru evaọ uwou Jihova na gbe uwou obọriẹ o ru rie gbẹsinẹdẹ.+ 12 Kẹsena Jihova ọ tẹ romavia kẹ Solomọn+ evaọ aso, ọ tẹ ta kẹe nọ: “Me yo olẹ ra no, yọ mẹ salọ oria nana kẹ omamẹ no re o jọ uwou idheidhe.+ 13 Nọ me te wuhu idhiwu na di, nọ oso ọ gbẹ be rrọ họ, gbe okenọ mẹ tẹ ta kẹ ebaka na nọ a re eware otọ na no, hayo otẹrọnọ me vi okpẹyao nọ o re vo ruọ udevie ahwo mẹ, 14 otẹrọnọ ahwo mẹ nọ a rehọ odẹ mẹ se+ na a rehọ oma rai kpotọ,+ a jẹ lẹ, gwọlọ ovao mẹ je kurẹriẹ no idhere imuomu rai,+ mẹ vẹ te jọ obọ idhiwu na yo, mẹ vẹ rehọ uzioraha rai rọvrẹ rai je siwi ẹkwotọ rai.+ 15 Enẹna ibiaro mẹ i ti rovie fihọ yọ mẹ te gaviezọ kẹ olẹ nọ a jọ oria nana lẹ.+ 16 Whaọ enẹna, mẹ salọ uwou nana no je ru ei ọrẹri no re odẹ mẹ o jariẹ bẹdẹ bẹdẹ,+ yọ ibiaro mẹ gbe udu mẹ e te jọ etẹe ẹsikpobi.+

17 “Rọkẹ owhẹ, otẹrọnọ whọ tẹ nya evaọ aro mẹ wọhọ epanọ Devidi ọsẹ ra ọ nya ẹkwoma oware kpobi nọ mẹ ta kẹ owhẹ nọ who re ru, who je koko izi mẹ je ru lele iziẹibro mẹ,+ 18 me ve ti ru agbara-uvie esuo ra dikihẹ,+ nwane wọhọ epanọ mẹ re ọvọ kugbe Devidi ọsẹ ra,+ inọ, ‘Ohwo nọ o re su Izrẹl o ti no uyẹ ra vievie he.’+ 19 Rekọ otẹrọnọ whọ siọ omẹ ba je gbabọkẹ izi mẹ gbe ijaje mẹ nọ me jie kẹ owhẹ na, who je mu eghẹnẹ efa họ ẹgọ je bi guzou kpotọ kẹ ae,+ 20 me ti vi* Izrẹl no ẹkwotọ mẹ nọ mẹ kẹ rai na,+ yọ me ti gbolo uwou nana nọ me ru họ ọrẹri kẹ odẹ mẹ no na kufiẹ no aro mẹ, me ve ti ru ei fihọ oware nọ a re ro jijehwẹ* gbe oware nọ a re ro se ẹkoko evaọ udevie ahwo na kpobi.+ 21 Uwou nana o vẹ te raha kuotọ. Ohwo kpobi nọ ọ be nya etẹe vrẹ o ti rri rie avọ igbunu,+ ọ vẹ te ta nọ, ‘Fikieme Jihova o ro ru ẹkwotọ nana avọ uwou nana enẹ?’+ 22 Kẹsena a vẹ te ta nọ, ‘Fikinọ a nyasiọ Jihova Ọghẹnẹ esẹ-esẹ rai ba,+ ọnọ ọ rehọ e rai no ẹkwotọ Ijipti ze,+ a tẹ nyabru eghẹnẹ efa, a te je guzou kpotọ kẹ ae jẹ gọ ae.+ Oyejabọ nọ ọ rọ rehọ okpẹtu nana kpobi te ai na.’”+

8 Nọ ikpe udhe nọ Solomọn ọ rọ bọ uwou Jihova avọ uwou* obọriẹ na e gba no,+ 2 Solomọn ọ tẹ wariẹ bọ ikpewho nọ Haeram+ ọ kẹ riẹ, o te fi ahwo Izrẹl* họ eva rai re a rria ae. 3 U no ere no, Solomọn o kpobọ Hemat-zoba, o te fi ei kparobọ. 4 Kẹsena ọ tẹ ma igbẹhẹ wariẹ* Tadmọ nọ ọ rrọ udhude na gbe ikpewho kpobi nọ a rẹ jọ sẹro eware+ nọ ọ bọ fihọ Hemat+ no vẹre. 5 Ọ tẹ jẹ bọ Bẹt-horọn Obehru+ avọ Bẹt-horọn Obotọ,+ ikpewho nọ a ma igbẹhẹ wariẹ họ, avọ ethẹ gbe ekpọ nọ a rọ kare ethẹ na, 6 gbe Bealat,+ jegbe ikpewho kpobi nọ Solomọn ọ rẹ jọ sẹro eware, ikpewho ekẹkẹ+ na kpobi, ikpewho rọkẹ edhẹ-enyenya na, gbe oware kpobi nọ Solomọn ọ gwọlọ nọ ọ rẹ bọ fihọ Jerusalẹm, Lebanọn, gbe evaọ ẹkwotọ kpobi nọ o jọ otọ esuo riẹ.

7 Ahwo kpobi nọ a kiọkọ evaọ usu ahwo Hit, ahwo Amọ, ahwo Pẹriz, ahwo Hiv, gbe ahwo Jebus,+ nọ a jọ ahwo Izrẹl he,+ 8 ahwo uyẹ rai nọ a kiọkọ ẹkwotọ na, koyehọ, enọ ahwo Izrẹl a raha no ho,+ Solomọn o fi rai họ rọkẹ iruo ọgbahọ rite ẹdẹ inẹnẹ na.+ 9 Rekọ Solomọn ọ rehọ ohwo Izrẹl ọvo ru ọrigbo nọ o re ru iruo riẹ hẹ,+ keme ae a jọ egbaẹmo riẹ, enọ i wuzou iletu riẹ, gbe enọ i wuzou ahwo nọ a rẹ dhẹ ekẹkẹ riẹ gbe edhẹ-enyenya riẹ.+ 10 Solomọn ovie na o wo ilori erọ ethabọ isu egba ivẹ gbe udhuvẹ-gbikpe (250), enọ i wuzou ahwo na.+

11 Solomọn ọ tẹ jẹ rehọ ọmọtẹ Fẹro+ no obọ Okpẹwho Devidi ze ziọ uwou nọ ọ bọ kẹe,+ keme ọ ta nọ: “Dede nọ aye mẹ ọ rrọ, u fo re ọ rria uwou Devidi ovie Izrẹl he, keme eria nọ a wọ etehe ọvọ Jihova fihọ no yọ eria ọrẹri.”+

12 Kẹsena Solomọn o te dhe idhe emahọ+ kẹ Jihova evaọ ehru agbada-idhe+ Jihova nọ ọ bọ fihọ aro ọmọgwa+ na. 13 Wọhọ epaọ ujaje nọ Mosis ọ kẹ, o dhe idhe lele epanọ a ruẹrẹ fihọ nọ a re ru kẹdẹ kẹdẹ, idhe rọkẹ Edijala,+ ehaa ọvẹre ọkpokpọ+ na, gbe ehaa nọ a fihọ nọ a re ru isiasa ẹgbukpe+ na, koyehọ, Ehaa Ebrẹdi nọ Ọ Kare Ẹvi+ na, Ehaa Ekpoka+ na, gbe Ehaa Iwou-Owhre+ na.* 14 Ofariẹ, o fi itu izerẹ+ na họ iruo rai wọhọ epaọ uzi nọ Devidi ọsẹ riẹ o fihọ, o te je fi ahwo Livae na họ oria iruo rai re a kẹ ujiro+ jẹ gbodibo evaọ aro izerẹ na wọhọ epanọ a ruẹrẹ fihọ nọ a re ru kẹdẹ kẹdẹ, o te je fi irou-unuẹthẹ* na họ itu-itu rai re a rou inuethẹ sa-sa+ na, keme ere Devidi ohwo Ọghẹnẹ uzẹme na o jie uzi. 15 A nyasiọ ujaje ovie na ba ha, onọ ọ kẹ izerẹ na gbe ahwo Livae na kpahe oware kpobi hayo kpahe iwou nọ a rẹ jọ sẹro* eware na. 16 Ere Solomọn ọ rọ ruẹrẹ iruo riẹ kpobi họ kpatiẹ ziezi,* no ẹdẹ nọ a rọ wọ otọhotọ uwou Jihova na họ+ rite ẹdẹ nọ a rọ bọe re. Ere a rọ bọ uwou Jihova na re.+

17 Oke yena Solomọn o ro kpobọ Iziọn-giba+ gbe Ilọt+ evaọ akotọ abade nọ ọ jọ ẹkwotọ Edọm.+ 18 Haeram+ ọ rehọ ẹkwoma idibo obọriẹ vi ekọ ilogbo gbe enọ e riẹ ekọ ebio ziezi ro sei. A lele idibo Solomọn kpobọ Ofaya,+ a tẹ wha etalẹnte* igoru+ egba ene gbe udhuvẹ-gbikpe (450) no obei ze ro se Solomọn ovie na.+

9 Nọ ovie-aye Shiba+ o yo usi oruaro Solomọn, ọ tẹ nyaze Jerusalẹm re ọ rehọ enọ egaga* dawo Solomọn. Idibo buobu i lele i rie, avọ ekamẹle nọ e wha ewhri balsam gbe igoru buobu+ avọ itho eghaghae. Ọ tẹ ruọ eva bru Solomọn, ọ tẹ ta oware kpobi nọ o jọ udu riẹ kẹe.+ 2 Solomọn ọ tẹ za enọ riẹ kpobi kẹe. Oware ovo o jariẹ hẹ nọ o jọ bẹbẹ kẹ Solomọn* nọ ọ sai ru vẹ kẹe he.

3 Nọ ovie-aye Shiba na ọ ruẹ areghẹ Solomọn,+ uwou nọ ọ bọ,+ 4 emu nọ ọ rẹ jọ emẹjẹ riẹ,+ oghẹrẹ nọ idibo riẹ e rẹ keria, oghẹrẹ nọ idibo riẹ e rẹ rọ wọ emu fihọ emẹjẹ gbe ẹgọ rai, ewọ-egho riẹ gbe ẹgọ rai, gbe idhe emahọ nọ o re dhe kẹse kẹse evaọ uwou Jihova,+ o te whu dikihẹ kpoko.* 5 Fikiere ọ tẹ ta kẹ ovie na nọ: “Usi nọ me yo evaọ obọ orẹwho mẹ kpahe eware nọ who ru* gbe areghẹ ra uzẹme. 6 Rekọ mẹ rọwo usi na ha bẹsenọ mẹ rọ nyaze jẹ rehọ ibiaro obọmẹ ruẹ eware na.+ Whaọ, rri, kpakọ amabọ jọ gheghe ọrọ areghẹ ologbo+ ra a vuẹ omẹ. Whọ rro vi epanọ me yo na thethabọ.+ 7 Eva e be were ahwo ra, yọ eva e be were idibo ra nọ i bi dikihẹ aro ra kẹse kẹse be kezọ kẹ eme areghẹ ra! 8 Jọ ujiro u te Jihova Ọghẹnẹ ra, ọnọ o wo isiuru kpahe owhẹ nọ o ro fi owhẹ họ agbara-uvie riẹ re whọ jọ ovie kẹ Jihova Ọghẹnẹ ra. Fikinọ Ọghẹnẹ ra o you Izrẹl,+ ọ tẹ rehọ owhẹ mu ovie Izrẹl re who bru uvioziẹ je su avọ ẹrẹreokie, re ọ ruẹsi ru ei jọ bẹdẹ bẹdẹ.”

9 Kẹsena ọ tẹ kẹ ovie na etalẹnte* igoru+ udhozeza (120) gbe ewhri balsam buobu avọ itho eghaghae. Ohwo ọvo ọ gbẹ rehọ ewhri balsam nọ o bu te ọrọ ovie-aye Shiba na se Solomọn ovie na ofa ha.+

10 Ofariẹ, idibo Haeram avọ idibo Solomọn nọ e wọ igoru no obọ Ofaya+ ze, e wọ ite-ire algọm avọ itho eghaghae+ ze re. 11 Ovie na ọ rehọ ire algọm na ru istẹpo fihọ uwou Jihova+ gbe uwou* ovie+ na, ọ tẹ jẹ rehọ ai ru ekpata gbe ekpata-ifi rọkẹ eso-ile+ na. A re jọ ẹkwotọ Juda ruẹ ire nọ e wọhọ e rai ẹdẹvo ho.

12 Solomọn ovie na ọ tẹ jẹ kẹ ovie-aye Shiba na oware kpobi nọ o were riẹ nọ ọ yare, eware nọ ọ kẹ aye na i bu vi* enọ ọ wha se ovie na. Kẹsena ovie-aye na o te kpo, tei te idibo riẹ a te zihe kpobọ orẹwho riẹ.+

13 Igoru nọ i te Solomọn obọ evaọ ukpe ọvo e gbẹdẹ te etalẹnte igoru egba ezeza gbe udhosa-gbezeza (666),+ 14 a du fodẹ enọ egba-ihreki nọ i re no oria ruọ oria na gbe ethueki na gbe ivie ahwo Arab na kpobi gbe eba ẹkwotọ na nọ e jẹ rehọ igoru avọ isiliva se Solomọn a rehọ ze he.+

15 Solomọn ovie na ọ rehọ igoru nọ a gua oware ofa kugbe ro ru ejese ilogbo egba ivẹ (200)+ [igoru nọ a gua oware ofa kugbe nọ e gbẹdẹ te shẹkẹl* egba ezeza (600) a ro ru ojese ovuovo],+ 16 ọ tẹ jẹ rehọ igoru nọ a gua oware ofa kugbe ro ru ejese esese* egba esa (300) (igoru nọ e gbẹdẹ te emaina* esa a ro ru ojese osese ovuovo). Kẹsena ovie na o te fi ai họ Uwou Owhawho Lebanọn+ na.

17 Ovie na ọ tẹ jẹ rehọ akọ-eni ku agbara-uvie, ọ tẹ rehọ emamọ igoru tamu* oma riẹ soso.+ 18 Istẹpo ezeza a rẹ rọ gadiẹ ruọ agbara-uvie na, yọ a rọ igoru ru akpala nọ a rẹ rọ awọ kpahe kugbe agbara-uvie na, agbara na o te je wo oria nọ a rẹ rọ abọ kpahe evaọ tofẹ tofẹ, yọ ikpohrokpo+ ivẹ i dikihẹ akotọ abọ agbara na. 19 Ikpohrokpo+ ikpegbivẹ i dikihẹ istẹpo ezeza na, ọvuọvo ọ jọ oka avọ oka istẹpo na. A re te jọ uvie ofa ru oware nọ o wọhọ e riẹ hẹ. 20 Igoru a ro ru eware kpobi nọ Solomọn ovie na ọ jẹ rọ da ame, yọ emamọ igoru a ro ru ekwakwa kpobi nọ e jọ Uwou Owhawho Lebanọn na. A rehọ isiliva ru oware ovo ho, keme evaọ oke Solomọn a rri isiliva fihọ oware ovo ho.+ 21 Keme idibo Haeram+ e jẹ hai lele ekọ ilogbo ovie na kpohọ Tashish.+ Ẹsiẹvo evaọ ikpe esa, ekọ ilogbo Tashish e rẹ fa igoru, isiliva, akọ-ini,+ ikpee,* gbe evra nọ a re se pikọk ze.

22 Fikiere Solomọn ovie na o fe je wo areghẹ vi ivie efa kpobi nọ e jọ otọakpọ na.+ 23 Ivie otọakpọ na soso e jẹ gwọlọ epanọ a rẹ rọ ruẹ* Solomọn re a yo eme areghẹ nọ Ọghẹnẹ uzẹme na o fihọ udu riẹ.+ 24 Ae omomọvo ọ jẹ hae wha okẹ sei—ekwakwa isiliva, ekwakwa igoru, iwu,+ ẹgọ-ẹmo, ewhri balsam, enyenya, gbe isi,* enẹ a je ru kukpe kukpe. 25 Solomọn o wo ibriwou-erao idu ene (4,000) rọkẹ enyenya gbe ekẹkẹ riẹ gbe enyenya* idu ikpegbivẹ (12,000),+ yọ o fi rai họ ikpewho ekẹkẹ na je fi ae họ kẹle ovie na evaọ Jerusalẹm.+ 26 O je su ivie kpobi nọ e jọ umuo Ethẹ* na vrẹ rite obọ ẹkwotọ ahwo Filistia je rite obọ uwhru Ijipti.+ 27 Ovie na o ru nọ isiliva e rọ jọ buobu evaọ Jerusalẹm wọhọ itho nọ e jọ eva riẹ, o te je ru nọ ire sida e rọ jọ buobu wọhọ ire sikamọ nọ e rrọ Shefila* na.+ 28 A jẹ hae rehọ enyenya no obọ Ijipti gbe ekwotọ efa kpobi ze ro se Solomọn.+

29 Rọ kpahe iku uzuazọ Solomọn nọ i kiọkọ,+ no emuhọ rite ekuhọ, kọ a gbe kere ai fihọ usu eme Netan+ ọruẹaro na, evaọ eruẹaruẹ Ahaejah+ ohwo Shailo na, gbe evaọ okerefihotọ eruẹaruẹ nọ Idọ+ ọruẹ-ude na ọ ruẹ kpahe Jeroboam+ ọmọzae Nibat? 30 Ikpe udhuvẹ Solomọn ọ jọ Jerusalẹm su Izrẹl soso. 31 Kẹsena Solomọn o te whu wọhọ* esẹ-esẹ riẹ. A te ki ei fihọ Okpẹwho Devidi ọsẹ riẹ;+ Rehoboam ọmọzae riẹ o te zihe ruọ ovie evaọ ẹta riẹ.+

10 Rehoboam o te kpobọ Shẹkẹm,+ keme Izrẹl soso a nyaziọ Shẹkẹm re a rehọ iẹe mu ovie.+ 2 Nọ Jeroboam+ ọmọzae Nibat ọ nwani yo kpahe iẹe (oke yena ọ gbẹ jọ obọ Ijipti keme ọ dhẹ fiki Solomọn ovie na),+ Jeroboam o te zihe no obọ Ijipti ze. 3 A tẹ vuẹ sei nọ ọ nyaze, Jeroboam avọ Izrẹl soso a tẹ nyabru Rehoboam ze, a tẹ ta nọ: 4 “Ọsẹ ra o ru owhowha mai gbẹgbẹdẹ.+ Rekọ otẹrọnọ who te ru iruo egaga nọ ọsẹ ra ọ kẹ omai na lọhọ je ru owhowha ogbẹgbẹdẹ* nọ ọ wọ họ omai na vori, ma te gbodibo kẹ owhẹ.”

5 Rehoboam ọ tẹ ta kẹ ae nọ: “Wha zihe bru omẹ ze nọ edẹ esa e tẹ vrẹ no.” Fikiere ahwo na a tẹ nyavrẹ.+ 6 Rehoboam ovie na ọ tẹ gba ẹgwae kugbe ekpako na, enọ e jọ otọ Solomọn ọsẹ riẹ ru iruo okenọ ọ jọ uzuazọ, ọ tẹ nọ ae nọ: “Ohrẹ vẹ wha rẹ sae kẹ kpahe epanọ mẹ rẹ za kẹ ahwo nana?” 7 A tẹ kẹe uyo nọ: “Otẹrọnọ who te ru emamọ eware kẹ ahwo nana je ru eva were ae, whọ jẹ kẹ ae emamọ uyo, a te jọ idibo ra ẹsikpobi.”

8 Rekọ ọ siọ ohrẹ nọ ekpako na e kẹ riẹ, ọ tẹ gba ẹgwae kugbe emoha nọ a gbẹ rro no otọ ze, enọ e rrọ idibo riẹ enẹna.+ 9 Ọ nọ rai nọ: “Ohrẹ vẹ wha rẹ sae kẹ kpahe epanọ ma rẹ za kẹ ahwo nana, enọ e ta kẹ omẹ nọ, ‘Ru owhowha nọ ọsẹ ra ọ wọ họ omai na vori’?” 10 Emoha nọ a gbẹ rro no otọ ze na e tẹ ta kẹe nọ: “Enẹ whọ rẹ ta kẹ ahwo na, enọ e ta kẹ owhẹ nọ, ‘Ọsẹ ra o ru owhowha mai gbẹdẹ, rekọ ru ei vori kẹ omai’ na; whọ rẹ ta kẹ ae nọ, ‘Uziobọ-oka mẹ o te gbodo vi eku ọsẹ mẹ. 11 Ọsẹ mẹ ọ wọ owhowha ogbẹgbẹdẹ họ owhai, rekọ me ti fiba owhowha rai na. Eviaviẹ gheghe ọsẹ mẹ ọ rọ fa owhai, rekọ mẹ te rehọ eviaviẹ inwe fa owhai.’”

12 Jeroboam avọ ahwo na kpobi a tẹ nyabru Rehoboam ze evaọ ẹdẹ avọ esa, nwane wọhọ epanọ ovie na ọ ta inọ: “Wha zihe bru omẹ ze evaọ ẹdẹ avọ esa.”+ 13 Rekọ ovie na ọ tẹ kpahe ẹme ọgaga kẹ ae. Ere Rehoboam ovie na ọ rọ siọ ohrẹ ekpako na. 14 Ohrẹ nọ emoha na e kẹ riẹ o lele rọ kẹ ae uyo inọ: “Me ti ru owhowha rai gbẹdẹ vi epanọ o rrọ na, me ve ti je fibae. Eviaviẹ gheghe ọsẹ mẹ ọ rọ fa owhai, rekọ mẹ te rehọ eviaviẹ inwe fa owhai.” 15 Fikiere ovie na ọ gaviezọ kẹ ahwo na ha, keme Ọghẹnẹ uzẹme na họ ọnọ o ru eware na via enẹ,+ re ẹme nọ Jihova ọ rehọ Ahaejah+ ohwo Shailo na ta kẹ Jeroboam ọmọzae Nibat ọ ruẹsi rugba.

16 Rọkẹ Izrẹl soso, fikinọ ovie na ọ rọwo kezọ kẹ ae he, ahwo na a tẹ kpahe kẹ ovie na nọ: “Usu vẹ ma wo kugbe Devidi? Ma wo ukuoriọ ovo evaọ ọmọzae Jẹsi hi. Whai omomọvo wha zihe bru eghẹnẹ rai, O Izrẹl! Enẹna tẹrovi uwou obọra, O Devidi.”+ Fikiere Izrẹl soso a te zihe kpobọ iwou* rai.+

17 Rekọ Rehoboam o gbe je su ahwo Izrẹl nọ a jẹ rria ikpewho Juda.+

18 Kẹsena Rehoboam ovie na o te vi Hedoram+ uwou, ọnọ o wuzou ahwo nọ a fihọ rọkẹ iruo ọgbahọ, rekọ ahwo Izrẹl a tẹ rehọ itho fi ei kpe. Rehoboam ovie na ọ tẹ rọ udugaga ruọ akẹkẹ riẹ re ọ dhẹ kpobọ Jerusalẹm.+ 19 Yọ ahwo Izrẹl a be kpareso uwou Devidi rite ẹdẹ inẹnẹ na.

11 Nọ Rehoboam o te Jerusalẹm, ọ tẹ nwani koko uwou Juda gbe Bẹnjamin+ họ, egbaẹmo idu udhuzii (180,000) nọ a wuhrẹ* kẹ ẹmo, re a họre Izrẹl, re a ruẹsi zihe uvie na se Rehoboam.+ 2 Kẹsena ẹme Jihova o te bru Shimaya+ ohwo Ọghẹnẹ uzẹme na ze, inọ: 3 “Ta kẹ Rehoboam ọmọzae Solomọn ovie Juda gbe ahwo Izrẹl kpobi nọ a rrọ Juda gbe Bẹnjamin nọ, 4 ‘Enẹ Jihova ọ ta: “Wha du nyae họre inievo rai vievie he. Jọ ohwo kpobi o zihe kpobọ uwou riẹ, keme mẹ họ ọnọ o ru nọ oware nana o rọ via enẹ.”’”+ Fikiere a te ru lele ẹme Jihova, a te zihe kpo, a gbẹ nyae họre Jeroboam ho.

5 Rehoboam ọ jẹ rria Jerusalẹm, yọ ọ bọ ikpewho nọ a di ogba wariẹ họ* fihọ Juda. 6 Ọ ma igbẹhẹ wariẹ Bẹtlẹhẹm,+ Itam, Tekoa,+ 7 Bẹt-zọr, Sokọ,+ Adọlam,+ 8 Gat,+ Marishah, Zif,+ 9 Adoreyẹm, Lekish,+ Azika,+ 10 Zora, Aijalọn,+ gbe Hebrọn,+ ikpewho nọ a di ogba wariẹ họ* nọ e jọ ẹkwotọ Juda gbe Bẹnjamin. 11 U no ere no, o ru eria nọ a di ogba wariẹ họ* na fihọ gaga, o te fi iletu họ eva rai, ọ tẹ jẹ kẹ ae emu gbe ewhri gbe udi, 12 ọ tẹ jẹ kẹ ikpewho sa-sa na kpobi ejese ilogbo avọ izuẹ; o ru ikpewho na fihọ gaga ziezi. Yọ orua Juda avọ Bẹnjamin e gbẹ jọ otọ riẹ.

13 Izerẹ na avọ ahwo Livae nọ e jọ Izrẹl soso a jọ abọ Rehoboam, a no ekwotọ rai kpobi bru ei ze. 14 Ahwo Livae na a nyasiọ etọ rai nọ erao e rẹ jọ re ẹbe gbe ukuoriọ rai ba,+ a tẹ ziọ Juda gbe Jerusalẹm, keme Jeroboam avọ emezae riẹ a si rai no iruo izerẹ nọ a jọ kẹ Jihova.+ 15 Kẹsena Jeroboam ọ tẹ rehọ izerẹ obọriẹ mu rọkẹ eria ikpehru+ na jẹ rọkẹ idhivẹri nọ e wọhọ ẹwe na*+ jẹ rọkẹ emọ-iruẹ nọ o ru na.+ 16 Yọ ahwo erua Izrẹl kpobi nọ a fi udu rai họ nọ a rẹ gwọlọ Jihova Ọghẹnẹ Izrẹl a lele i rai kpobọ Jerusalẹm re a dhe idhe kẹ Jihova Ọghẹnẹ esẹ-esẹ rai.+ 17 Ikpe esa a ru esuo uvie Juda dikihẹ gaga jẹ tha Rehoboam ọmọzae Solomọn uke, keme a nya evaọ idhere Devidi avọ Solomọn evaọ ikpe esa.

18 Kẹsena Rehoboam ọ tẹ rehọ Mehalat ọmọtẹ Jerimọt ọmọzae Devidi, ọnọ ọ jọ ọmọtẹ Abẹhel ọmọtẹ Ẹlayab+ ọmọzae Jẹsi. 19 Nọ oke o be nya na o te yẹ emezae kẹe: Jiẹsh, Shẹmaraya, gbe Zeham. 20 U noi no, ọ tẹ rehọ Meaka ọmọ-uruọmọ* Absalọm.+ Nọ oke o be nya na o te yẹ Abaejah,+ Atae, Zaeza, gbe Shilomit kẹe. 21 Rehoboam o you Meaka ọmọ-uruọmọ Absalọm vi eyae riẹ edekọ kpobi gbe ese+ riẹ kpobi, keme o wo eyae ikpegberee avọ ese udhosa, o te yẹ emezae udhegberee gbe emetẹ udhosa. 22 Fikiere Rehoboam ọ tẹ rehọ Abaejah ọmọzae Meaka mu ọnọ o wuzou gbe osu evaọ udevie inievo-emezae riẹ, keme o wo rie họ iroro nọ ọ te rehọ iẹe mu ovie. 23 Rekọ, ọ rehọ areghẹ* ru oware jọ, ọ rehọ emezae riẹ jọ kpohọ ibrotọ Juda avọ Bẹnjamin soso, kpohọ ikpewho nọ a di ogba wariẹ họ,*+ ọ tẹ kẹ ae emu buobu je wo eyae buobu kẹ ae.

12 Nọ esuo uvie Rehoboam ọ nwani dikihẹ ga ziezi no,+ nọ o wo ogaga ziezi no, o te gbabọkẹ Uzi Jihova,+ yọ ere ahwo Izrẹl kpobi nọ a jọ kugbei a ru re. 2 Evaọ ukpe avọ isoi Rehoboam ovie na, Shaeshak+ ovie Ijipti ọ tẹ wọ ohọre ziọ Jerusalẹm, keme a raha uzi Jihova. 3 Shaeshak o wo ekẹkẹ odu ọvo gbe egba ivẹ (1,200), edhẹ-enyenya idu udhosa (60,000), gbe egbaẹmo buobu nọ i wo unu hu nọ i lele i rie no obọ Ijipti ze, koyehọ, ahwo Libia, ahwo Sokiyẹm, gbe ahwo Ẹtiopia.+ 4 O fi ikpewho Juda nọ a di ogba wariẹ họ* kparobọ, ukuhọ riẹ o te te Jerusalẹm.

5 Shimaya+ ọruẹaro na ọ tẹ nyabru Rehoboam avọ ikpahwo-esuo Juda ze, enọ i kokohọ Jerusalẹm fiki Shaeshak, ọ tẹ ta kẹ ae nọ: “Enẹ Jihova ọ ta, ‘Wha nyasiọ omẹ ba no, fikiere mẹ nyasiọ owhai ba+ no re rọkẹ Shaeshak.’” 6 Fikiere, ikpahwo-esuo Izrẹl gbe ovie na a te hrẹ omarai kpotọ+ jẹ ta nọ: “Jihova o kiẹrẹe.” 7 Nọ Jihova ọ ruẹ nọ a hrẹ omarai kpotọ no, ẹme Jihova o te bru Shimaya ze, inọ: “A hrẹ omarai kpotọ no. Mẹ te gbẹ raha ai hi,+ yọ uviemenẹ me ti siwi ai. Mẹ te gbẹ rehọ ẹkwoma Shaeshak ku ofu mẹ ku Jerusalẹm ho. 8 Rekọ a ti zihe ruọ idibo riẹ, re a riẹ ohẹriẹ nọ o riẹ nọ a tẹ be gbodibo kẹ omẹ avọ okenọ a tẹ be gbodibo kẹ ivie ekwotọ efa.”*

9 Fikiere Shaeshak ovie Ijipti ọ tẹ wọ ohọre ziọ Jerusalẹm. Ọ tẹ kwa ekwakwa-aghae nọ e jọ uwou Jihova+ gbe ekwakwa-aghae nọ e jọ uwou* ovie na rehọ. Oware kpobi ọ kwa, te ejese igoru nọ Solomọn o ru.+ 10 Fikiere Rehoboam ovie na o te ru ejese ekọpa ro nwene ae, o te mu ae họ iletu iroiro* na obọ, enọ i re rou* unuighẹ uwou ovie na. 11 Oke kpobi nọ ovie na ọ nyaziọ uwou Jihova, iroiro na e vẹ ruọ eva te wọ ae, kẹsena a ve zihe ai kpohọ ubruwou iroiro na. 12 Fikinọ ovie na o hrẹ omariẹ kpotọ, Jihova ọ tẹ siọ ofu ba emu kẹe,+ ọ gbẹ raha ae muotọ họ.+ Ofariẹ, a jọ oma ahwo Juda ruẹ eware iwoma jọ.+

13 Rehoboam ovie na o ru ọkwa riẹ dowọ muotọ evaọ Jerusalẹm, o te gbe je su; ikpe udhuvẹ-gbọvo Rehoboam ọ jọ okenọ o zihe ruọ ovie, yọ ikpe ikpegbihrẹ o su evaọ Jerusalẹm, okpẹwho nọ Jihova ọ salọ evaọ erua Izrẹl kpobi nọ o fi odẹ riẹ họ. Odẹ oni ovie na họ Neama ohwo Ammọn.+ 14 Rekọ Rehoboam o ru oware nọ u yoma, keme ọ gba riẹ mu evaọ udu riẹ hẹ inọ ọ rẹ gwọlọ Jihova.+

15 Rọ kpahe iku uzuazọ Rehoboam, no emuhọ rite ekuhọ, kọ a gbe kere ai fihọ usu eme Shimaya+ ọruẹaro na gbe erọ Idọ+ ọruẹ-ude na evaọ okerefihotọ othotha uyẹ na? Kẹse kẹse Rehoboam avọ Jeroboam a je fi ẹmo.+ 16 Kẹsena Rehoboam o te whu wọhọ* esẹ-esẹ riẹ, a te ki ei fihọ Okpẹwho Devidi;+ Abaejah+ ọmọzae riẹ o te zihe ruọ ovie evaọ ẹta riẹ.

13 Evaọ ukpe avọ ikpegberee Jeroboam ovie na, Abaejah o te zihe ruọ ovie Juda.+ 2 Ikpe esa o su evaọ Jerusalẹm. Odẹ oni riẹ Maekaya+ ọmọtẹ Yuraẹl ohwo Gibiah.+ Yọ ẹmo ọ jọ udevie Abaejah avọ Jeroboam.+

3 Abaejah o te kpohọ ẹmo avọ ogbaẹmo nọ u wo egbaẹmo egaga idu egba ene (400,000) nọ a wuhrẹ* kẹ ẹmo.+ Jeroboam avọ egbaẹmo egaga idu egba eree (800,000) nọ a wuhrẹ* kẹ ẹmo a te dhe uhie ẹmo họ re a họre iẹe. 4 Abaejah o te dikihẹ Ugbehru Zẹmareyẹm, onọ o rrọ ubrotọ igbehru Ifremu, ọ tẹ ta nọ: “O Jeroboam avọ Izrẹl soso, wha gaviezọ kẹ omẹ. 5 Kọ wha gbẹ riẹ nọ Jihova Ọghẹnẹ Izrẹl ọ kẹ Devidi uvie nọ o re ro su Izrẹl bẹdẹ bẹdẹ,+ tei te emezae riẹ,+ ẹkwoma ọvọ uwhei?*+ 6 Rekọ Jeroboam+ ọmọzae Nibat, odibo Solomọn ọmọzae Devidi, ọ tẹ kparoma, ọ tẹ wọso olori riẹ.+ 7 Ezae nọ i wo okọ họ, ifogori gheghe i te je su ruọ abọ riẹ. A tẹ ga obọ vi Rehoboam ọmọzae Solomọn evaọ okenọ Rehoboam ọ gbẹ maha yọ ọ re gudu hu, ọ gbẹ sae dadamu kẹ ae he.

8 “Enẹna, wha bi roro nọ wha sae dadamu kẹ uvie Jihova nọ o rrọ obọ emezae Devidi fikinọ wha rrọ buobu, wha te je wo emọ-iruẹ igoru nọ Jeroboam o ru re e jọ eghẹnẹ kẹ owhai.+ 9 Kọ ogbẹrọnọ whai wha le izerẹ Jihova,+ ahwo uyẹ Erọn, gbe ahwo Livae na no, wha tẹ rehọ izerẹ obọrai mu wọhọ ahwo erẹwho edekọ?+ Ohwo kpobi nọ ọ nyaze* avọ eruẹ gbe igbo ihrẹ ọ sai zihe ruọ ozerẹ kẹ eware nọ e rrọ eghẹnẹ hẹ. 10 Rọkẹ omai, Jihova họ Ọghẹnẹ mai,+ ma re nyase iẹe ba ha; izerẹ mai, ahwo uyẹ Erọn a be gbodibo kẹ Jihova, yọ ahwo Livae a bi fiobọhọ evaọ iruo na. 11 A bi ru idhe emahọ kuye iwiri kẹ Jihova kohiohiẹ kohiohiẹ gbe kowọwọ kowọwọ+ avọ insẹnse nọ i re gbo ore awere,+ yọ ebrẹdi nọ a re fihọ ehru ohwohwo+ na* e rrọ ehru emẹjẹ igoru, yọ a be rehọ ikpẹ nọ e rrọ ọkpọ-edada ukpẹ igoru+ na tu kowọwọ kowọwọ,+ keme ma bi ru iruo nọ o gwọlọ nọ ma re ru kẹ Jihova Ọghẹnẹ mai; rekọ wha nyase iẹe ba no. 12 Enẹna rri! Ọghẹnẹ uzẹme na ọ rrọ kugbe omai, bi su omai, avọ izerẹ riẹ gbe egba nọ a re kporo ro se ahwo na, nọ a ti kporo ro se use ẹmo bru owhẹ ze. O whai ezae Izrẹl, wha họre Jihova Ọghẹnẹ esẹ-esẹ rai hi, keme wha te kparobọ họ.”+

13 Rekọ Jeroboam o te vi egbaẹmo nyai dhere re a no obemu ahwo Juda ze, onọ u ru nọ egbaẹmo riẹ e rọ jọ aro ahwo Juda yọ egbaẹmo nọ i dhere na e rrọ obemu rai. 14 Nọ ezae Juda i kuomarẹriẹ, a tẹ ruẹ nọ te obemu te obaro a te jọ fi ẹmo na. Fikiere a te mu Jihova họ ebo se,+ yọ izerẹ na i bi kporo egba na do ruarua. 15 Ezae Juda i te bo ubo ẹmo, nọ ezae Juda i bo ubo ẹmo na, Ọghẹnẹ uzẹme na o te fi Jeroboam avọ Izrẹl soso kparobọ evaọ aro Abaejah avọ Juda. 16 Ahwo Izrẹl na a tẹ dhẹ kẹ ahwo Juda, Ọghẹnẹ ọ tẹ rehọ ae họ obọ rai. 17 Abaejah avọ ahwo riẹ a kpe rai gaga, ere a ro kpe ahwo Izrẹl na kuku otọ, a kpe ezae idu egba isoi (500,000) nọ a wuhrẹ* kẹ ẹmo. 18 Ere a ro hrẹ ezae Izrẹl kpotọ evaọ oke yena, rekọ ezae Juda e ga obọ vi ai fikinọ a rẹroso* Jihova Ọghẹnẹ esẹ-esẹ rai.+ 19 Abaejah o te gbe je le Jeroboam, ọ tẹ rehọ ikpewho mi ei, Bẹtẹl+ avọ ewho esese riẹ,* Jẹshana avọ ewho esese riẹ, gbe Ifren+ avọ ewho esese riẹ. 20 Jeroboam ọ gbẹ wariẹ wo ogaga esuo riẹ vievie he evaọ oke Abaejah; kẹsena Jihova ọ tẹ tehe iẹe kpe, o te whu.+

21 Rekọ Abaejah o te je dhe ẹgẹga. Nọ oke o be nya na, ọ tẹ rehọ eyae ikpegbene,+ o te yẹ emezae udhegbivẹ gbe emetẹ ikpegbezeza. 22 Yọ iku uzuazọ Abaejah nọ i kiọkọ, iruẹru riẹ gbe eme riẹ, a kere i rai fihọ usu eme nọ Idọ ọruẹaro na o kere.*+

14 Kẹsena Abaejah o te whu wọhọ* esẹ-esẹ riẹ, a te ki ei fihọ Okpẹwho Devidi;+ Asa ọmọzae riẹ o te zihe ruọ ovie evaọ ẹta riẹ. Evaọ edẹ riẹ, ẹkwotọ na o wo omofọwẹ ikpe ikpe.

2 Asa o ru oware nọ u woma je kiehọ evaọ aro Jihova Ọghẹnẹ riẹ. 3 O si egbada-idhe erẹwho efa+ jegbe eria ikpehru na no, o kporo ipila ọrẹri+ na je ko ekpọ ọrẹri*+ na fihọ otọ. 4 Ofariẹ, ọ vuẹ ahwo Juda inọ a gwọlọ Jihova Ọghẹnẹ esẹ-esẹ rai, re a je koko Uzi na gbe ujaje na. 5 Ere o ro si eria ikpehru na gbe egbada insẹnse+ na no ikpewho Juda kpobi, yọ evaọ otọ esuo riẹ, uvie na o jọ ababọ ukpokpoma. 6 Ọ bọ ikpewho nọ a di ogba wariẹ họ* fihọ Juda,+ keme ukpokpoma o jọ ẹkwotọ na ha, yọ ohwo ọvo ọ wọ ẹmo bru ei ze evaọ etoke ikpe nana ha, keme Jihova ọ kẹ riẹ omofọwẹ.+ 7 Ọ ta kẹ ahwo Juda nọ: “Joma bọ ikpewho nana re ma ma igbẹhẹ gbe iwou ikpehru wariẹ ae họ,+ je fi inuethẹ* gbe ekpọ nọ a rẹ rọ kare ẹthẹ na họ ae. Keme ẹkwotọ na ọ gbẹ rrọ obọ mai, fikinọ ma kiẹ gwọlọ Jihova Ọghẹnẹ mai. Ma kiẹ gwọlọ iẹe no, yọ ọ kẹ omai ufuoma no evaọ ofẹ kpobi.” Fikiere a ru iruo ebabọ rai re gbẹsinẹdẹ.+

8 Asa ọ jọ ogbaẹmo riẹ wo ezae Juda nọ i bu te idu egba esa (300,000) nọ i wo ejese ilogbo gbe izuẹ. Yọ ọ jọ Bẹnjamin wo egbaẹmo egaga idu egba ivẹ gbe udhone (280,000) nọ e wha ejese esese* avọ ize nọ a kru.*+

9 Nọ u te oke jọ, Zira ohwo Ẹtiopia na ọ tẹ wọ ẹmo bru ae ze, avọ egbaẹmo ima ọvo (1,000,000) gbe ekẹkẹ egba esa (300).+ Nọ o te Marishah,+ 10 Asa ọ tẹ wọ lahwe bru ei, a te dhe uhie ẹmo họ evaọ Ukiekpotọ Zẹfata nọ o jọ Marishah. 11 Asa o te bo se Jihova Ọghẹnẹ riẹ,+ ọ ta nọ: “O Jihova, o rrọ ẹbẹbẹ kẹ owhẹ hẹ sọ ahwo nọ who bi fiobọhọ kẹ a rrọ buobu hayo a wo ogaga ha.+ Fiobọhọ kẹ omai, O Jihova Ọghẹnẹ mai, keme whẹ ma be rẹroso,*+ yọ odẹ ra ma rọ wọ bru ogbotu nana ze na.+ O Jihova, whẹ họ Ọghẹnẹ mai. Whọ kuvẹ re ohwo-akpọ gheghe o fi owhẹ kparobọ họ.”+

12 Fikiere Jihova o te fi ahwo Ẹtiopia na kparobọ evaọ aro Asa gbe aro Juda, ahwo Ẹtiopia na a tẹ dhẹ.+ 13 Asa avọ ahwo nọ a jọ kugbei a te le ai rite ugbo obọ Gira,+ ahwo Ẹtiopia na a te je whu fihọ otọ bẹsenọ ọvuọvo rai ọ rọ zọ họ, keme Jihova avọ ogbaẹmo riẹ a raha e rai muotọ. Kẹsena a tẹ kwa egbo-ẹmo buobu gaga rehọ. 14 Nọ u no ere no, a raha ikpewho kpobi nọ e wariẹ Gira họ, keme idudu Jihova e whẹ ruọ ae oma; a tẹ kwa eware rehọ evaọ ikpewho na kpobi, keme eware buobu e jọ ikpewho na nọ a rẹ kwa rehọ. 15 A tẹ jẹ vẹruọ iwou-udhu ahwo nọ a wo erao, a te mu ithuru erao gbe ekamẹle buobu rehọ, kẹsena a te zihe kpobọ Jerusalẹm.

15 Whaọ ẹzi Ọghẹnẹ ọ tẹ ruọ Azaraya ọmọzae Odẹd oma. 2 Fikiere ọ tẹ nyabru Asa, ọ tẹ ta kẹe nọ: “O Asa avọ ahwo Juda gbe Bẹnjamin kpobi, wha gaviezọ kẹ omẹ! Jihova ọ te jọ kugbe owhai otẹrọnọ wha tẹ daji abọ riẹ;+ yọ otẹrọnọ wha tẹ kiẹ gwọlọ iẹe, o ti ru re wha ruẹ e riẹ,+ rekọ otẹrọnọ wha tẹ nyasiọ iẹe ba, ọ te nyasiọ owhai ba.+ 3 Evaọ oke lelehie* Izrẹl ọ jọ ababọ Ọghẹnẹ uzẹme na, ababọ ozerẹ nọ o re wuhrẹ ahwo, gbe ababọ uzi.+ 4 Rekọ nọ a zihe bru Jihova Ọghẹnẹ Izrẹl ze evaọ oke uye rai jẹ kiẹ gwọlọ iẹe, o te ru re a ruẹ e riẹ.+ 5 Evaọ oke yena, ohwo ọvo ọ jẹ sai kpohọ erẹ omakọkọ họ,* keme ozighi ọgaga ọ jọ udevie ahwo kpobi nọ a jẹ rria ekwotọ na. 6 Orẹwho o jẹ raha orẹwho, yọ okpẹwho o jẹ raha okpẹwho, keme Ọghẹnẹ ọ kẹ rai uvẹ nọ oghẹrẹ uye sa-sa o rọ wha ozighi fihọ udevie rai.+ 7 Rekọ rọkẹ owhai, wha kru oma ga, udu u no owhai awọ họ,*+ keme a te hwosa iruẹru rai kẹ owhai.”

8 Nọ Asa ọ nwani yo eme nana gbe eruẹaruẹ Odẹd ọruẹaro na, o te kru udu ga, o te si emedhọ etọtọ na no ẹkwotọ Juda+ avọ Bẹnjamin kpobi no, gbe ikpewho nọ o fi kparobọ evaọ ubrotọ igbehru Ifremu, ọ tẹ wariẹ bọ agbada-idhe Jihova nọ ọ jọ aro ọmọgwa uwou Jihova na.+ 9 O te koko Juda gbe Bẹnjamin soso họ, te erara nọ e jẹ rria kugbe ae nọ i no Ifremu gbe Manasẹ gbe Simiọn+ ze, keme ahwo buobu a dhẹ no Izrẹl ruọ abọ riẹ okenọ a ruẹ nọ Jihova Ọghẹnẹ riẹ ọ rrọ kugbei. 10 Ere a ro kokohọ Jerusalẹm evaọ amara avọ esa ọrọ ukpe avọ ikpegbisoi esuo Asa. 11 Evaọ ẹdẹ yena, a jọ usu egbo-ẹmo nọ a kwa kpozi na rehọ iruẹ egba ihrẹ (700) gbe igodẹ idu ihrẹ (7,000) dhe idhe kẹ Jihova. 12 U te no ere no, a re ọvọ inọ a rẹ rehọ udu rai kpobi gbe uzuazọ* rai kpobi kiẹ gwọlọ Jihova Ọghẹnẹ esẹ-esẹ rai.+ 13 A re kpe ohwo kpobi nọ ọ kiẹ gwọlọ Jihova Ọghẹnẹ Izrẹl he no, ọ tẹ make rrọ ọmaha hayo ọkpako,* ọzae hayo aye.+ 14 Fikiere a tẹ rọ urru oruarua duwu iyei kẹ Jihova avọ edo oghọghọ, yọ a bi kporo egba gbe enware. 15 Ahwo Juda kpobi a tẹ ghọghọ fiki iyei nọ a duwu na, keme udu rai kpobi a ro duwu iyei na, a tẹ jẹ rọ ọwhọ gwọlọ iẹe, ọyomariẹ o te ru re a ruẹ e riẹ,+ Jihova ọ tẹ ruabọhọ jẹ kẹ ae omofọwẹ evaọ ofẹ kpobi.+

16 Asa ovie na o tube si Meaka+ oni-ologbo riẹ no ọkwa oni ovie nọ ọ jọ, keme o ru ẹmẹdhọ ọtọtọ jọ nọ a rẹ rọ gọ ọkpọ ọrẹri*+ na. Asa ọ gbẹre ẹmẹdhọ ọtọtọ riẹ na fihọ otọ, ọ tẹ guọghọ iẹe ehehẹhẹ, ọ tẹ mahe iẹe evaọ Ukiekpotọ Kidrọn.+ 17 Rekọ eria ikpehru na e gbẹ jọ+ Izrẹl.+ Ghele na, udu Asa kpobi o jọ kugbe* Ọghẹnẹ evaọ edẹ uzuazọ riẹ* kpobi.+ 18 Ọ rehọ eware nọ ọyomariẹ avọ ọsẹ riẹ a ru họ ọrẹri no ziọ uwou Ọghẹnẹ uzẹme na—isiliva, igoru, gbe ekwakwa sa-sa.+ 19 A fi ẹmo evaọ ẹkwotọ na ha bẹsenọ ukpe avọ ọgbagbisoi esuo Asa u ro te.+

16 Evaọ ukpe avọ ọgbagbezeza esuo Asa, Beasha+ ovie Izrẹl ọ tẹ wọ ohọre ziọ Juda, o te mu Rema+ họ ẹbọ,* re ohwo ọvo o gbe no obọ Asa ovie Juda+ vrẹ hayo ruọ eva bru ei hi.* 2 Fikiere Asa ọ tẹ kwa isiliva gbe igoru evaọ eria ekwakwa-aghae uwou Jihova+ gbe uwou* ovie na, o te vi ai ro se Bẹn-hedad ovie Siria,+ ọnọ ọ jẹ rria Damaskọs, jẹ ta nọ: 3 “Mẹ avọ owhẹ gbe ọsẹ mẹ avọ ọsẹ ra a ru ọtamuo* jọ. Me bi vi isiliva gbe igoru se owhẹ. Nyaze re whọ raha ọtamuo nọ whẹ avọ Beasha ovie Izrẹl wha ru,* re o kuomarẹriẹ nyasiọ omẹ ba.”

4 Bẹn-hedad ọ gaviezọ kẹ Asa ovie na, o te vi iletu egbaẹmo riẹ nyae họre ikpewho Izrẹl, a te fi Aijọn,+ Dan,+ Ebẹl-meyẹm, gbe eria kpobi nọ a rẹ jọ sẹro eware evaọ ikpewho Naftalae+ kparobọ. 5 Nọ Beasha o yo kpahe iẹe, ọ tẹ nwane siọ Rema ba ẹbọ* jẹ kpairoro vrẹ iruo na. 6 Asa ovie na ọ tẹ rehọ ahwo Juda kpobi, a tẹ wọ itho gbe ite-ire Rema+ nọ Beasha ọ jẹ rọ bọe na rehọ,+ ọ tẹ rehọ ae bọ* Giba+ gbe Mizpa.+

7 Evaọ oke yena, Hanenae+ ọruẹ-ude na ọ tẹ nyabru Asa ovie Juda ze, ọ tẹ ta kẹe nọ: “Fikinọ ovie Siria whọ rẹroso,* whọ gbẹ rẹroso* Jihova Ọghẹnẹ ra ha na, ogbaẹmo ovie Siria o va owhẹ abọ no.+ 8 Kọ ahwo Ẹtiopia avọ ahwo Libia a gbẹ jọ ogbaẹmo nọ u bu gaga avọ ekẹkẹ gbe edhẹ-enyenya buobu? Rekọ fikinọ whọ rẹroso Jihova, ọ rehọ e rai họ owhẹ obọ.+ 9 Keme ibiaro Jihova i bi rri kpenẹ avọ enẹ evaọ otọakpọ na soso+ re o dhesẹ ẹgba riẹ fiki* ahwo nọ a rehọ udu rai kpobi kẹe.+ Oware ugheghẹ who ru evaọ ẹme nana; no umuo enẹna vrẹ ahwo a ti fi owhẹ ẹmo.”+

10 Rekọ eva ọruẹ-ude na e tẹ dha Asa, o te fi ei họ uwou-odi* keme eva riẹ e dha riẹ gaga fiki ẹme nana. Evaọ oke ovo yena, Asa o te mu oja họ egbe kẹ amọfa evaọ udevie ahwo na. 11 Whaọ iku uzuazọ Asa, no emuhọ rite ekuhọ, a kere i rai fihọ Obe Ivie Juda avọ erọ Izrẹl.+

12 Evaọ ukpe avọ ọgbagbizii esuo Asa, awọ o te mu Asa họ ẹda te epanọ ọ jẹ rọ mọ gaga; yọ makọ evaọ ẹyao na, ọ nyabru Jihova ha, rekọ enọ i re siwi ahwo ọ nyabru. 13 Kẹsena Asa o te whu wọhọ* esẹ-esẹ riẹ;+ o whu evaọ ukpe avọ udhuvẹ-gbọvo esuo riẹ. 14 A te ki ei fihọ uki ulogbo nọ ọ tọ kẹ omariẹ evaọ Okpẹwho Devidi,+ yọ a wọ riẹ fihọ ehwa nọ a fi ewhri balsam họ avọ oghoghẹrẹ eware nọ i re gbo ore awere nọ a gua kugbe zihe ruọ obọdẹ udẹ.+ Ofariẹ, a koko ebruerae ologbo họ rọ kẹe evaọ oke ukio na.*

17 Jehoshafat+ ọmọzae riẹ o te zihe ruọ ovie evaọ ẹta riẹ, o te ru ọkwa riẹ evaọ Izrẹl dowọ muotọ. 2 O fi egbaẹmo họ ikpewho Juda kpobi nọ a di ogba wariẹ họ* je fi itu isoja họ ẹkwotọ Juda gbe ikpewho Ifremu nọ Asa ọsẹ riẹ o fi kparobọ.+ 3 Jihova ọ gbẹ jọ kugbe Jehoshafat keme ọ nya evaọ idhere nọ Devidi+ ọsẹ-esẹ riẹ ọ nya evaọ okenọ u kpemu, ọ dhẹ lele edhọ Bale he. 4 Keme ọ kiẹ gwọlọ Ọghẹnẹ ọsẹ riẹ,+ o te lele* ujaje riẹ orọnikọ iruemu ahwo Izrẹl he.+ 5 Jihova o ru uvie na dikihẹ gaga evaọ obọ riẹ;+ yọ ahwo Juda kpobi a gbẹ jẹ rehọ ekẹ se Jehoshafat, o te wo ekwakwa efe buobu gbe oruaro gaga.+ 6 Ọ jẹ nya evaọ idhere Jihova ududu, o tube si eria ikpehru+ na gbe ekpọ ọrẹri* na no Juda dede.+

7 Evaọ ukpe avọ esa esuo riẹ, o te vi uwou se ikpahwo-esuo riẹ, koyehọ, Bẹn-hel, Obedaya, Zẹkaraya, Nẹtanẹl, gbe Maekaya, inọ a nyaze re a wuhrẹ ahwo evaọ ikpewho Juda. 8 Ahwo Livae a jọ kugbe ae, ae họ: Shimaya, Nẹtanaya, Zebadaya, Asahẹl, Shemiramọt, Jehonatan, Adonaejah, Tobaejah, gbe Tob-adonaejah, yọ Ẹlishama avọ Jehoram izerẹ+ na a jọ kugbe ai. 9 A te mu ahwo họ ewuhrẹ evaọ Juda, yọ a jẹ wha obe Uzi Jihova+ lele oma, a nya ikpewho kpobi nọ e rrọ Juda wariẹ yọ a bi wuhrẹ ahwo na.

10 Idudu Jihova e tẹ whẹ ruọ ekwotọ-ivie kpobi nọ e wariẹ Juda họ, a gbẹ họre Jehoshafat he. 11 Ahwo Filistia a rehọ ekẹ gbe igho rọ hwa azọhọ kẹ Jehoshafat. Ahwo Arab a jọ ithuru erao rai rehọ igbo idu ihrẹ gbe egba ihrẹ (7,700) jegbe ikri idu ihrẹ gbe egba ihrẹ (7,700) ro sei.

12 Jehoshafat o te je dhe ẹruẹro,+ ọ tẹ ruabọhọ jẹ bọ eria nọ a di ogba wariẹ họ*+ gbe ikpewho nọ a rẹ jọ sẹro eware+ evaọ Juda. 13 O ru iruo ebabọ buobu evaọ ikpewho Juda, yọ ọ jọ Jerusalẹm wo isoja, egbaẹmo egaga. 14 A ghale e rai fihọ itu-itu lele inuwou abọ ọsẹ rai: evaọ orua Juda, a wo iletu itu ahwo idu, Adnah họ ọnọ o wuzou, yọ egbaẹmo egaga+ idu egba esa (300,000) e jọ kugbei. 15 Jehohenan oletu na ọ jọ otọ riẹ, yọ egbaẹmo idu egba ivẹ gbe udhone (280,000) e jọ kugbei. 16 Amasaya ọmọzae Zikrae ọ tẹ jẹ jọ otọ riẹ re, ọnọ ọ fialoma via kẹ iruo Jihova, yọ egbaẹmo egaga idu egba ivẹ (200,000) e jọ kugbei. 17 Evaọ orua Bẹnjamin,+ Eliada nọ ọ jọ ọgbaẹmo ọgaga, yọ ezae idu egba ivẹ (200,000) nọ i wo uze avọ ojese+ e jọ kugbei. 18 Jehozabad ọ jọ otọ riẹ, yọ ezae idu udhuzii (180,000) nọ a ruẹrẹ kpahe kẹ ogbaẹmo na e jọ kugbei. 19 Ahwo nana a jẹ gbodibo kẹ ovie na kugbe ahwo nọ ovie na o fihọ ikpewho nọ a di ogba wariẹ họ* evaọ Juda soso.+

18 Jehoshafat o wo ekwakwa efe buobu gbe oruaro gaga,+ rekọ ọ jọ ọgọ Ehab.+ 2 Fikiere nọ ikpe jọ e vrẹ no, ọ tẹ nyabru Ehab evaọ obọ Sameria,+ Ehab ọ tẹ rehọ igodẹ gbe iruẹ buobu dhe idhe fiki riẹ avọ ahwo nọ a jọ kugbei. Ọ tẹ tẹzẹ iẹe re ọ nyae họre Remọt-giliad.+ 3 Ehab ovie Izrẹl ọ tẹ ta kẹ Jehoshafat ovie Juda nọ: “Kọ who ti lele omẹ kpobọ Remọt-giliad?” Jehoshafat ọ tẹ kẹe uyo nọ: “Mẹ avọ owhẹ ọvona, ahwo mẹ avọ ahwo ra yọ ahwo ọvona, ma te tha owhẹ uke evaọ ẹmo na.”

4 Rekọ Jehoshafat ọ tẹ ta kẹ ovie Izrẹl nọ: “Ivie, kake nekpẹ ẹme Jihova.”+ 5 Fikiere ovie Izrẹl o te koko eruẹaro na họ, ezae egba ene (400), ọ tẹ nọ ae nọ: “Kọ ma wọ ẹmo kpobọ Remọt-giliad, manikọ mẹ seba?” A tẹ ta nọ: “Nya, Ọghẹnẹ uzẹme na ọ te rehọ iẹe họ obọ ovie na.”

6 Kẹsena Jehoshafat ọ tẹ ta nọ: “Kọ uvumọ ọruẹaro Jihova ọ rrọ obonẹ?+ Joma jọ obọ riẹ nekpẹ re.”+ 7 Fikiere ovie Izrẹl ọ tẹ ta kẹ Jehoshafat nọ: “Ọzae jọ ọ gbẹ riẹ+ nọ ma rẹ sae jọ obọ riẹ nekpẹ mi Jihova; rekọ me mukpahe iẹe, keme ọ rẹ ruẹaro eware iwoma kpahe omẹ hẹ, rekọ eware iyoma ọvo ẹsikpobi.+ Odẹ riẹ Maekaya ọmọzae Imlah.” Rekọ Jehoshafat ọ tẹ ta nọ: “Jọ ovie na ọ ta ẹme otiọye he.”

8 Fikiere ovie Izrẹl o te se oruiruo jọ evaọ ighẹ ovie na, ọ tẹ ta kẹe nọ: “Rehọ Maekaya ọmọzae Imlah ze vẹrẹ vẹrẹ.”+ 9 Whaọ ovie Izrẹl avọ Jehoshafat ovie Juda a ku iwu ovie họ keria ọvuọ agbara-uvie riẹ; yọ a keria oria nọ a rẹ jọ si ibi no igbe ekakọ, onọ o jọ obọ unuẹthẹ Sameria, yọ eruẹaro na kpobi a be ruẹaro evaọ aro rai. 10 Kẹsena Zẹdikaya ọmọzae Kẹneana o te ru izei ayọno jọ kẹ omariẹ, ọ tẹ ta nọ: “Enẹ Jihova ọ ta, ‘Izei nana who ti ro duwu* ahwo Siria bẹsenọ who ti ro kpe ai muotọ.’” 11 Oghẹrẹ ovona eruẹaro edekọ na kpobi e jẹ ta, inọ: “Nya kpobọ Remọt-giliad, who ti fi kparobọ;+ Jihova ọ te rehọ iẹe họ obọ ovie na.”

12 Fikiere ọnyukọ nọ a vi nyai se Maekaya na ọ tẹ ta kẹe nọ: “Rri! Emamọ ẹme ọvo eruẹaro na kpobi a be ta kẹ ovie na. Ivie, jọ ẹme ra ọ jọ wọhọ ẹme rai,+ re whọ ta emamọ ẹme.”+ 13 Rekọ Maekaya ọ tẹ ta nọ: “Nọ Jihova ọ rrọ uzuazọ na, ẹme kpobi nọ Ọghẹnẹ mẹ ọ ta mẹ te ta.”+ 14 Kẹsena ọ tẹ ruọ eva bru ovie na ze, ovie na ọ tẹ nọe nọ: “Maekaya, kọ ma wọ ẹmo kpobọ Remọt-giliad, manikọ mẹ seba?” Ọ tẹ nwane kẹ uyo nọ: “Nya, who ti fi kparobọ; a te rehọ iẹe họ obọ rai.” 15 Nọ ọ ta ere no, ovie na ọ tẹ ta kẹe nọ: “Brẹse me re ru owhẹ duwu iyei inọ uzẹme ọvo whọ rẹ ta kẹ omẹ evaọ odẹ Jihova?” 16 Fikiere ọ tẹ ta nọ: “Mẹ ruẹ ahwo Izrẹl kpobi nọ a vaha fihọ igbehru na wọhọ igodẹ nọ i wo othuru-igodẹ hẹ.+ Jihova ọ ta nọ: ‘Enana i wo olori hi. Jọ ohwo kpobi o zihe kpohọ ọvuọ uwou riẹ dhedhẹ.’”

17 Kẹsena ovie Izrẹl ọ tẹ ta kẹ Jehoshafat nọ: “Kọ mẹ gbẹ vuẹ owhẹ nọ ‘Ọ rẹ ruẹaro eware iwoma kpahe omẹ hẹ, eware iyoma ọvo’?”+

18 Kẹsena Maekaya ọ tẹ ta nọ: “Fikiere, yo ẹme nọ Jihova ọ ta: Mẹ ruẹ Jihova nọ ọ keria agbara-uvie riẹ,+ yọ ogbaẹmo obọ idhiwu na kpobi+ i dikihẹ obọze riẹ gbe ẹkpẹlobọ riẹ.+ 19 Kẹsena Jihova ọ tẹ ta nọ, ‘Ono ọ te viẹ Ehab ovie Izrẹl họ re o kpobọ Remọt-giliad, ọ vẹ jọ obei whu?’ Ọjọ ọ be ta oware jọ, yọ ọfa ọ be ta oware ofa. 20 Kẹsena ẹzi*+ jọ ọ tẹ nya lahwe je dikihẹ aro Jihova, ọ tẹ ta nọ, ‘Mẹ te viẹe họ.’ Jihova ọ tẹ nọe nọ, ‘Oghẹrẹ vẹ who ti ro ru ei?’ 21 Ọ tẹ kẹ uyo nọ, ‘Mẹ te nya, me ve zihe ruọ ẹzi eviẹhọ evaọ unu eruẹaro riẹ kpobi.’ Ọghẹnẹ ọ tẹ ta nọ, ‘Whọ te viẹe họ, yọ u te no ere no, whọ te kparobọ. Nya, re who ru ere.’ 22 Whaọ enẹna Jihova o fi ẹzi eviẹhọ họ unu eruẹaro ra nana no,+ rekọ Jihova ọ ta riẹ no nọ okpẹtu o ti te owhẹ.”

23 Zẹdikaya+ ọmọzae Kẹneana ọ tẹ nya kẹle Maekaya,+ ọ tẹ tehe iẹe abovao,+ ọ tẹ ta nọ: “Oghẹrẹ vẹ ẹzi Jihova o ro no omẹ oma te ta ẹme kẹ owhẹ?”+ 24 Maekaya ọ tẹ kẹ uyo nọ: “Rri! Whọ te riẹ oghẹrẹ na evaọ ẹdẹ nọ whọ te nyai dhere ubrukpẹ nọ o mae rrọ obeva na.” 25 Kẹsena ovie Izrẹl ọ tẹ ta nọ: “Wha kru Maekaya re wha rehọ iẹe se Amọn oletu okpẹwho na avọ Joash ọmọzae ovie na. 26 Wha ta kẹ ae nọ, ‘Enẹ ovie na ọ ta: “Wha fi ohwo nana họ uwou-odi,+ re wha rọ umutho ebrẹdi gbe ame kuọ ẹe bẹsenọ me re zihe ze dhedhẹ.”’” 27 Rekọ Maekaya ọ tẹ ta nọ: “Otẹrọnọ who te zihe ze dhedhẹ, kiyọ Jihova ọ ta ẹme kẹ omẹ hẹ.”+ O te fibae nọ: “Wha muẹrohọ, whai ahwo na kpobi.”

28 Fikiere ovie Izrẹl avọ Jehoshafat ovie Juda a te kpobọ Remọt-giliad.+ 29 Ovie Izrẹl ọ tẹ ta kẹ Jehoshafat nọ: “Me ti ru re a siọ omẹ ba evuhu, mẹ vẹ ruọ ẹmo na, rekọ who re ku iwu ovie ra họ.” Fikiere ovie Izrẹl o te ru re a se iẹe ba evuhu, a tẹ ruọ ẹmo na. 30 Whaọ ovie Siria ọ ta kẹ iletu ekẹkẹ riẹ nọ: “Wha lele uvumọ ohwo họre he, te ọsese hayo ologbo, ajokpaọ ovie Izrẹl ọvo.” 31 Nọ iletu ekẹkẹ na e nwane ruẹ Jehoshafat, a tẹ ta kẹ omarai nọ: “Ovie Izrẹl ọna.” Fikiere a tẹ rẹriẹ ovao dhei re a họre iẹe; Jehoshafat o te muhọ ebo kẹ obufihọ,+ Jihova o te fiobọhọ kẹe, Ọghẹnẹ ọ tẹ nwani ru ai kuomarẹriẹ se iẹe ba. 32 Nọ iletu ekẹkẹ na e ruẹ nọ ovie Izrẹl ọye he, a tẹ nwani kuomarẹriẹ se iẹe ba.

33 Rekọ ọzae jọ o te mu sa ose riẹ,* u te kie ovie Izrẹl evaọ eria nọ a jọ zuẹ ewu-ẹmo riẹ. Fikiere ovie na ọ tẹ ta kẹ ọnọ ọ jẹ dhẹ akẹkẹ riẹ nọ: “Kuomarẹriẹ re whọ wọ omẹ no ẹmo* na keme a nwa omẹ oma gaga no.”+ 34 Ẹmo na ọ jọ gaga evaọ ẹdẹ yena soso, a te kru ovie Izrẹl na dikihẹ evaọ akẹkẹ na, yọ ọ rẹriẹ ovao ku ahwo Siria na rite owọwọ; o te whu nọ ọre o kiediwi no.+

19 Kẹsena Jehoshafat ovie Juda o te zihe kpobọ uwou* obọriẹ evaọ obọ Jerusalẹm omakọkọ.*+ 2 Jehu+ ọmọzae Hanenae+ ọruẹ-ude na ọ tẹ nyabru Jehoshafat ovie na, ọ tẹ ta kẹe nọ: “Kọ ahwo omuomu who re fiobọhọ kẹ,+ kọ enọ i mukpahe Jihova who re you?+ Fiki onana, Jihova o bi mu ofu ọgaga kẹ owhẹ. 3 Ghele na, u wo eware iwoma jọ nọ ọ jọ oma ra ruẹ,+ keme who si ekpọ ọrẹri* na no ẹkwotọ na, yọ whọ ruẹrẹ udu ra họ* re whọ kiẹ gwọlọ Ọghẹnẹ uzẹme na.”+

4 Jehoshafat ọ tẹ gbẹ jẹ rria Jerusalẹm, ọ tẹ wariẹ nyabru ahwo na, no Biẹ-shiba rite obọ ubrotọ igbehru Ifremu,+ re o ru ai zihe bru Jihova Ọghẹnẹ esẹ-esẹ rai ze.+ 5 Ọ tẹ jẹ rehọ ibruoziẹ mu evaọ ẹkwotọ na soso, evaọ ikpewho Juda kpobi nọ a di ogba wariẹ họ,* no okpẹwho ruọ okpẹwho.+ 6 Ọ ta kẹ ibruoziẹ na nọ: “Wha muẹrohotọ evaọ oware nọ wha bi ru, keme orọnikọ ohwo-akpọ wha bi guẹdhọ rọkẹ hẹ rekọ rọkẹ Jihova, yọ ọ rrọ kugbe owhai okenọ wha te bi bruoziẹ.+ 7 Enẹna, jọ wha wo ozodhẹ Jihova.+ Wha yọroma kpahe oware nọ wha bi ru, keme Jihova Ọghẹnẹ mai o re kienyẹ ohwo ho,+ o wo ọriẹwẹ hẹ,+ ọ rẹ re udi hi.”+

8 Jehoshafat ọ tẹ jẹ jọ Jerusalẹm rehọ ahwo Livae jọ gbe izerẹ na jegbe ahwo jọ nọ a wuzou inuwou abọ ọsẹ evaọ Izrẹl mu re a jọ ibruoziẹ kẹ Jihova, re a je guẹdhọ ahwo nọ a be rria Jerusalẹm.+ 9 O jie uzi kẹ ae nọ: “Enẹ wha re ru iruo rai evaọ ozodhẹ Jihova, avọ ọtẹruo gbe udu rai kpobi: 10 Oke kpobi nọ imoni rai nọ e be rria ikpewho rai a tẹ wọ ẹdhọ ze, onọ u kiekpahe azẹ-okpe+ hayo avro kpahe uzi jọ, ujaje jọ, izi, hayo iziẹibro, wha rẹ vẹvẹ ae unu re a gbẹ jọ aro Jihova reabe he; o gbẹ rrọ ere he o ve ti mu ofu ọgaga kẹ owhai gbe imoni rai. Enẹ wha re ru, re wha gbẹ reabe he. 11 Whaọ Amaraya olori izerẹ na nọ o wuzou rai evaọ ẹme kpobi nọ o kiekpahe Jihova+ ọ rrọ etenẹ. Zebadaya ọmọzae Ishmẹl họ osu uwou Juda evaọ ẹme kpobi nọ o kiekpahe ovie na. Yọ ahwo Livae na a te jọ esẹro rọkẹ owhai. Wha kru oma ga re wha ru iruo, yọ ajọ Jihova ọ jọ kugbe enọ i bi ru oware uwoma.”*+

20 Nọ oyena o vrẹ no, ahwo Moab+ gbe ahwo Ammọn+ jegbe ahwo Amonim* jọ a tẹ wọ ẹmo bru Jehoshafat ze. 2 A tẹ vuẹ Jehoshafat nọ: “Ogbotu ahwo buobu a wọ ẹmo no obọ ubrotọ abade* na bru owhẹ ze, no obọ Edọm+ ze, yọ a rrọ Hazazọn-tama, koyehọ, Ẹn-gẹdi.”+ 3 Fiki oyena ozọ u te mu Jehoshafat, ọ tẹ gbaemu* nọ ọ rẹ kiẹ gwọlọ Jihova.+ Fikiere o te whowho kẹ Juda soso nọ a siọ emuọriọ ba. 4 Ahwo Juda a te kokohọ re a nekpẹ mi Jihova;+ ikpewho Juda kpobi a no ze te nekpẹ mi Jihova.

5 Kẹsena Jehoshafat ọ tẹ kpama dikihẹ evaọ udevie ogbotu ahwo Juda gbe Jerusalẹm evaọ aro ighẹ ọkpokpọ nọ ọ rrọ uwou Jihova na, 6 ọ tẹ ta nọ:

“O Jihova Ọghẹnẹ esẹ-esẹ mai, ogbẹrọnọ whẹ họ Ọghẹnẹ evaọ obọ idhiwu na;+ kọ ogbẹrọnọ whẹ họ ọnọ o bi su ekwotọ-ivie erẹwho na kpobi?+ Obọ ra ogaga gbe ẹgba e rrọ, yọ ohwo ọvo ọ sae za owhẹ dhe he.+ 7 O Ọghẹnẹ mai, ogbẹrọnọ whẹ who le ahwo nọ a jẹ rria ẹkwotọ nana no kẹ ahwo ra Izrẹl, whọ tẹ rehọ iẹe kẹ emọ* ogbẹnyusu ra Abraham+ re o jọ ukuoriọ rai ribri? 8 A te mu ei họ ẹria, a tẹ bọ oria aruẹri fihọ etẹe rọkẹ odẹ ra,+ a tẹ ta nọ, 9 ‘Otẹrọnọ ọgbọdọ, ẹdhoguo obrukpe, okpẹyao nọ o re vo, hayo ohọo e wha okpẹtu se omai, joma dikihẹ aro uwou nana gbe aro ra (keme odẹ ra o rrọ uwou nana),+ re ma bo se owhẹ kẹ obufihọ evaọ uye mai, yọ ajọ who yo je siwi omai.’+ 10 Whaọ obọnana, ezae Ammọn, Moab, gbe erọ ubrotọ igbehru Siya+ e wọ ze no, enọ whọ kẹ Izrẹl uvẹ nọ a họre he okenọ a je no ẹkwotọ Ijipti ze. A te kuomarẹriẹ se ae ba, a gbẹ raha ae he.+ 11 Enẹna rri epanọ a be rọ hwa zihe kẹ omai, a nyaze ti le omai no ẹkwotọ nọ whọ rọ kẹ omai re ma rọ reuku+ na. 12 O Ọghẹnẹ mai, kọ who gbe bruoziẹ kpe ai?+ Keme ma wo ogaga nọ ma rẹ rọ họre ogbotu obuobu nana nọ ọ be wọ ohọre bru omai ze na ha; ma riẹ oware nọ ma re ru hu,+ rekọ ibiaro mai e tọvi owhẹ.”+

13 Evaọ oke yena, ahwo Juda kpobi a dikihẹ aro Jihova avọ eyae rai, emọ* rai, te emọ esese rai.

14 Kẹsena evaọ udevie ogbotu na, ẹzi Jihova ọ tẹ ruọ oma Jehazaẹl ọmọzae Zẹkaraya ọmọzae Benaya ọmọzae Jeayẹl ọmọzae Matanaya ohwo Livae nọ ọ rrọ ohwo uyẹ Esaf. 15 Ọ tẹ ta nọ: “Wha gaviezọ, whai ahwo Juda kpobi gbe enọ e be rria Jerusalẹm gbe Jehoshafat ovie na! Enẹ Jihova ọ ta kẹ owhai, ‘Jọ ozọ u mu owhai hi hayo wha guegue fiki ogbotu obuobu nana ha, keme ẹmo na ọrai hi rekọ ọrọ Ọghẹnẹ.+ 16 Wha wọ bru ai odẹnotha. Orọ emedhere Ziz a te rọ wọ ze, yọ wha te ruẹ e rai evaọ obọ oka ukiekpotọ* nọ o kẹle udhude Jeruẹl na. 17 U ti du gwọlọ nọ wha rẹ họre evaọ ẹmo nana ha. Wha dikihẹ ẹta rai, wha mudhe oria ovo,+ re wha ruẹ esiwo Jihova fiki rai.*+ O Juda gbe Jerusalẹm, jọ ozọ u mu owhai hi hayo wha guegue he.+ Wha wọ bru ai odẹnotha, Jihova ọ te jọ kugbe owhai.’”+

18 Ẹsiẹvo na Jehoshafat o te kigwẹ vovao tuotọ, Juda soso gbe ahwo nọ a be rria Jerusalẹm a te kigwẹ evaọ aro Jihova re a gọ Jihova. 19 Kẹsena ahwo Livae nọ a rrọ ahwo uyẹ Kohat+ gbe ahwo uyẹ Kora a tẹ kparoma re a rehọ urru oruarua jiri Jihova Ọghẹnẹ Izrẹl.+

20 A tẹ riọ kpama evaọ irioke okiokiọ riẹ, a te kpobọ udhude Tekoa.+ Epanọ a jẹ rọ nya na, Jehoshafat ọ tẹ kpama, ọ tẹ ta nọ: “Wha gaviezọ kẹ omẹ, O Juda gbe ahwo nọ a be rria Jerusalẹm! Wha fi ẹrọwọ họ Jihova Ọghẹnẹ rai re wha ruẹsi dikihẹ gaga.* Wha fi ẹrọwọ họ eruẹaro riẹ,+ wha ti fi kparobọ.”

21 Nọ o lele ahwo na gba ẹgwae no, ọ tẹ rehọ ezae jọ mu re a so ile+ kẹ Jihova jẹ kẹe ujiro. A tẹ whẹ ẹgọ ọrẹri họ oma jẹ kobaro kẹ egbaẹmo na, yọ a be so nọ: “Wha yere Jihova, keme uyoyou riẹ nọ o rẹ hiẹ hẹ o rẹ jọ bẹdẹ bẹdẹ.”+

22 Okenọ a rọ oghọghọ mu ile ujiro họ ẹso no, Jihova o te bru ebe họ enu hẹrẹ ezae Ammọn, Moab, gbe erọ ubrotọ igbehru Siya na, enọ e jẹ wọ ẹmo ziọ Juda na, a te duwu omoma rai kpe fihọ otọ.+ 23 Ahwo Ammọn gbe ahwo Moab na a tẹ rẹriẹ ovao dhe ahwo nọ a be rria ubrotọ igbehru Siya+ na re a kpe ae jẹ raha ae muotọ; nọ a kpe ahwo nọ a be rria Siya na re no, a te fiobọhọ kpe ohwohwo.+

24 Rekọ nọ ahwo Juda a te uwou-eroro nọ o rrọ udhude na,+ nọ a je rri kpohọ obonọ ogbotu na a rrọ, a tẹ ruẹ iri rai nọ e vọ otọ;+ ohwo ọvo ọ zọ họ. 25 Fikiere Jehoshafat avọ ahwo riẹ a tẹ nyaze re a jọ oma rai kwa egbo-ẹmo rehọ, a jọ udevie rai ruẹ eware buobu, iwu, gbe ekwakwa aghae, enọ a ba no oma ahwo na rehọ kẹ omarai bẹsenọ a gbẹ jẹ sae kwa ha.+ Edẹ esa a rọ kwa egbo-ẹmo na, keme i bu gaga. 26 Evaọ ẹdẹ avọ ene a te kokohọ Ukiekpotọ* Bẹraka, keme etẹe a jọ jiri* Jihova. Oyejabọ nọ a ro se odẹ oria yena Ukiekpotọ Bẹraka*+—rite inẹnẹ na.

27 Kẹsena ezae Juda avọ Jerusalẹm kpobi, avọ Jehoshafat nọ ọ kobaro kẹ ae, a te zihe kpobọ Jerusalẹm avọ oghọghọ, keme Jihova o ru rai wo oghọghọ fiki ewegrẹ rai nọ o fi kparobọ.+ 28 Ere a rọ ziọ Jerusalẹm avọ ekpata-ifi, ekpata,+ gbe egba+ nọ a bi kporo, a te kpobọ uwou Jihova.+ 29 Idudu Ọghẹnẹ e tẹ whẹ ruọ ekwotọ-ivie kpobi nọ e rrọ erẹwho na oma nọ a yo nọ Jihova ọ họre ewegrẹ Izrẹl.+ 30 Fikiere ukpokpoma o jọ uvie Jehoshafat he, yọ Ọghẹnẹ riẹ ọ ruabọhọ jẹ kẹe omofọwẹ evaọ ofẹ kpobi.+

31 Jehoshafat ọ tẹ ruabọhọ je su Juda. Ikpe ọgbagbisoi ọ jọ okenọ o zihe ruọ ovie, yọ ikpe udhegbisoi o su evaọ Jerusalẹm. Odẹ oni riẹ Azuba, ọmọtẹ Shilhae.+ 32 Ọ ruabọhọ jẹ nya evaọ edhere Asa+ ọsẹ riẹ. O reghe noi hi, yọ o ru oware nọ u kiehọ evaọ aro Jihova.+ 33 Rekọ eria ikpehru na e gbẹ jariẹ,+ yọ ahwo na a re ruẹrẹ udu rai họ re a kiẹ gwọlọ Ọghẹnẹ esẹ-esẹ rai ghele he.+

34 Rọ kpahe iku uzuazọ Jehoshafat nọ i kiọkọ, no emuhọ rite ekuhọ, a kere i rai fihọ usu eme Jehu+ ọmọzae Hanenae,+ enọ a kere fihọ Obe Ivie Izrẹl. 35 Nọ onana o vrẹ no, Jehoshafat ovie Juda o te mu usu kugbe Ehazaya ovie Izrẹl, ọnọ o je ru eware imuomu.+ 36 Fikiere o te ru ei fihọ ọrivẹ riẹ nọ a gbe je ku ekọ ilogbo nọ i re kpobọ Tashish,+ yọ a je ku ekọ ilogbo na evaọ Iziọn-giba.+ 37 Rekọ Ẹli-iza ọmọzae Dọd-avahu ohwo Marisha ọ tẹ ruẹaro kpahe Jehoshafat, inọ: “Fikinọ who mu usu kugbe Ehazaya na, Jihova ọ te raha iruo ra no.”+ Fikiere ekọ ilogbo na i te zue,+ e gbẹ sai kpobọ Tashish hi.

21 Kẹsena Jehoshafat o te whu wọhọ* esẹ-esẹ riẹ, a te ki ei kugbe esẹ-esẹ riẹ evaọ Okpẹwho Devidi; Jehoram ọmọzae riẹ o te zihe ruọ ovie evaọ ẹta riẹ.+ 2 Emezae Jehoshafat nọ e rrọ inievo-emezae Jehoram họ, Azaraya, Jehayẹl, Zẹkaraya, Azaraya, Maekẹl, gbe Shẹfataya; enana kpobi yọ emezae Jehoshafat ovie Izrẹl. 3 Ọsẹ rai ọ rehọ isiliva avọ igoru, gbe eware eghaghae kẹ ae ekẹ buobu, jegbe ikpewho nọ a di ogba wariẹ họ* evaọ Juda;+ rekọ ọ tẹ rehọ uvie na kẹ Jehoram,+ keme ọye họ ọmọ ọsosuọ.

4 Nọ Jehoram o mu uvie ọsẹ riẹ họ esu no, ọ tẹ rehọ ọgbọdọ kpe inievo-emezae riẹ kpobi no,+ gbe ikpahwo-esuo Izrẹl jọ re o ru ọkwa riẹ dowọ muotọ. 5 Ikpe ọgbagbivẹ Jehoram ọ jọ nọ o zihe ruọ ovie, yọ ikpe eree o su evaọ Jerusalẹm.+ 6 Ọ nya evaọ edhere ivie Izrẹl,+ nwane wọhọ epanọ ahwo uwou Ehab a ru, keme ọmọtẹ Ehab ọ jọ aye riẹ;+ yọ ọ ruabọhọ je ru oware nọ u yoma evaọ aro Jihova. 7 Rekọ Jihova ọ gwọlọ nọ ọ rẹ raha uwou Devidi no ho fiki ọvọ nọ ọ re kugbe Devidi,+ nọ orọnọ ọ ya eyaa nọ ọ te kẹe avọ emezae riẹ ukpẹ ẹsikpobi na.+

8 Evaọ edẹ riẹ, Edọm ọ kpareso Juda,+ ọ tẹ rehọ ovie obọriẹ mu.+ 9 Fikiere Jehoram avọ iletu riẹ a tẹ fa vrẹ avọ ekẹkẹ riẹ kpobi, ọ tẹ kparoma evaọ aso, o te fi ahwo Edọm na kparobọ, enọ e wariẹ e riẹ avọ iletu ekẹkẹ na họ. 10 Rekọ Edọm ọ gbẹ be kpareso Juda rite inẹnẹ na. Libna+ ọ kpareso ẹe re evaọ oke yena, keme ọ nyasiọ Jihova Ọghẹnẹ esẹ-esẹ riẹ ba.+ 11 Ọ bọ eria ikpehru+ fihọ ehru igbehru Juda re, re o ru ahwo nọ a be rria Jerusalẹm bru igberẹ kugbe eghẹnẹ efa,* o te su Juda thọ.

12 Uwhremu na, Elaejah+ ọruẹaro na o te kere ovuẹ jọ ro sei, inọ: “Enẹ Jihova Ọghẹnẹ Devidi ọsẹ-esẹ ra ọ ta, ‘Whọ nya evaọ idhere Jehoshafat+ ọsẹ ra ha, hayo evaọ idhere Asa+ ovie Juda ha. 13 Rekọ whọ be nya evaọ edhere ivie Izrẹl+ je bi ru Juda gbe ahwo nọ a be rria Jerusalẹm bru igberẹ kugbe eghẹnẹ efa,*+ wọhọ epaọ igberẹ-ibro uwou Ehab,+ yọ who tube kpe inievo-emezae obọra dede,+ ahwo uwou ọsẹ ra, enọ i woma vi owhẹ. 14 Fikiere, Jihova ọ be rehọ uye ulogbo te ahwo ra, emezae ra, eyae ra, gbe eware kpobi nọ who wo. 15 Yọ whọ te mọ oghoghẹrẹ eyao buobu, te ẹyao nọ ọ te jọ ivu ra, bẹsenọ ivu ra i ti ro furu ze fiki ẹyao na, no ẹdẹ te ẹdẹ.’”

16 Kẹsena Jihova o te ru+ re ahwo Filistia*+ gbe ahwo Arab+ nọ a kẹle ahwo Ẹtiopia a wọso Jehoram. 17 Fikiere a tẹ wọ ohọre ziọ Juda, a tẹ rọ ogaga ruọ eva, a tẹ kwa eware kpobi nọ e jọ uwou* ovie+ na rehọ, te emezae riẹ gbe eyae riẹ; ọmọzae ọvo nọ o kiọkọ kẹe họ Jehoahaz*+ ọmọzae ọmaha riẹ. 18 Nọ enana kpobi e vrẹ no, Jihova ọ tẹ kẹe ẹyao jọ evaọ ivu riẹ nọ a rẹ sai siwi kpo ho.+ 19 Uwhremu na, nọ ikpe ivẹ soso e vrẹ no, ivu riẹ i te furu ze fiki ẹyao na, o te whu nọ ẹyao na ọ jẹ lahiẹe gaga; yọ ahwo riẹ a mahe erae rọ kẹe ọghọ họ wọhọ epanọ a mahe rọkẹ esẹ-esẹ riẹ.+ 20 Ikpe ọgbagbivẹ ọ jọ nọ o zihe ruọ ovie, yọ ikpe eree o su evaọ Jerusalẹm. O da ohwo ọvo ho okenọ o whu. A te ki ei fihọ Okpẹwho Devidi,+ rekọ orọnikọ eria nọ a re ki ivie fihọ họ.+

22 Kẹsena ahwo nọ a be rria Jerusalẹm a tẹ rehọ Ehazaya ọmọzae ọmaha riẹ mu ovie evaọ ẹta riẹ, keme egbaẹmo nọ i lele ahwo Arab ziọ evuẹ na i kpe emọ ekpako na kpobi no.+ Ere Ehazaya ọmọzae Jehoram o ro muhọ esuo wọhọ ovie Juda.+ 2 Ikpe udhegbivẹ Ehazaya ọ jọ okenọ o zihe ruọ ovie, yọ ukpe ọvo o su evaọ Jerusalẹm. Odẹ oni riẹ Atalaya+ ọmọ-uruọmọ* Omri.+

3 Ọyomariẹ ọ nya evaọ idhere ahwo uwou Ehab,+ keme oni riẹ họ ọnọ ọ jẹ kẹe ohrẹ nọ o re ro ru umuomu. 4 Ọ ruabọhọ je ru oware nọ u yoma evaọ aro Jihova, wọhọ ahwo uwou Ehab, keme ae họ enọ e jọ ekiroro* riẹ nọ ọsẹ riẹ o whu no, onọ o wha ọraha sei. 5 O lele ohrẹ rai, o te kuomagbe Jehoram ọmọzae Ehab ovie Izrẹl wọ ẹmo bru Hazaẹl+ ovie Siria evaọ obọ Remọt-giliad,+ obei enọ e rẹ sa ose e jọ nwa Jehoram oma. 6 O te zihe kpobọ Jezrẹl+ re o siwi oma nọ a nwa riẹ evaọ obọ Rema okenọ o je lele Hazaẹl ovie Siria+ fi ẹmo.

Ehazaya* ọmọzae Jehoram+ ovie Juda o te kpobọ Jezrẹl re ọ nyae ruẹ Jehoram+ ọmọzae Ehab, keme a nwa riẹ oma.*+ 7 Rekọ Ọghẹnẹ ọ tẹ wha ọraha se Ehazaya okenọ ọ nyabru Jehoram; nọ ọ nyaze, o te lele Jehoram nyai zere Jehu+ ọmọ-uruọmọ* Nimshae, ọnọ Jihova o wholo re o kpe ahwo uwou Ehab no.*+ 8 Okenọ Jehu o mu ahwo uwou Ehab họ ekpe no wọhọ epaọ oziẹ Ọghẹnẹ, ọ tẹ ruẹ ikpahwo-esuo Juda gbe emezae inievo Ehazaya, egbodibo Ehazaya, o te kpe ai no.+ 9 Kẹsena ọ tẹ jẹ gwọlọ Ehazaya; a tẹ jọ oria nọ o dhere evaọ Sameria mu ei, a tẹ rehọ iẹe bru Jehu. Kẹsena a te kpei no je ki ei,+ keme a ta nọ: “Ọmọ-uruọmọ* Jehoshafat ọ rrọ, ọnọ ọ rehọ udu riẹ kpobi kiẹ gwọlọ Jihova.”+ Ohwo ọvo ọ gbẹ jọ uwou Ehazaya nọ o wo ogaga nọ o re ro su uvie na ha.

10 Nọ Atalaya,+ oni Ehazaya ọ ruẹ nọ ọmọzae riẹ o whu no, ọ tẹ kparoma, o te kpe uyẹ uvie* orọ uwou Juda soso no.+ 11 Rekọ Jehoshabiyat ọmọtẹ ovie na ọ tẹ wọ Jehoash+ ọmọzae Ehazaya, ọ tẹ hwariẹe no udevie emezae ovie na nọ a gwọlọ kpe na, o te fi ọmọzae na avọ ohwo nọ ọ jẹ yọrọ iẹe họ obọ ubrukpẹ obeva jọ. Jehoshabiyat ọmọtẹ Jehoram+ ovie na (aye Jehoyada+ ozerẹ na, ọ tẹ jẹ rrọ oniọvo-ọmọtẹ Ehazaya) ọ tẹ rọ ere ko ẹe dhere Atalaya, fikiere o gbe kpei hi.+ 12 Ọ jọ kugbe ai ikpe ezeza evaọ uwou Ọghẹnẹ uzẹme na nọ a si rie no họ, yọ Atalaya o bi su ẹkwotọ na.

23 Evaọ ukpe avọ ihrẹ, Jehoyada ọ tẹ gbaudu ru oware jọ je ru ọtamuo* kugbe iletu itu ahwo udhusoi+ na, koyehọ, Azaraya ọmọzae Jeroham, Ishmẹl ọmọzae Jehohenan, Azaraya ọmọzae Obẹd, Measaya ọmọzae Adaya, gbe Ẹlishefat ọmọzae Zikrae. 2 Kẹsena a tẹ nya Juda soso duwu, a te koko ahwo Livae+ nọ a rrọ ikpewho Juda kpobi họ jegbe enọ i wuzou inuwou abọ ọsẹ evaọ Izrẹl. Nọ a nyaze Jerusalẹm, 3 ogbotu na soso a tẹ re ọvọ+ kugbe ovie na evaọ uwou Ọghẹnẹ uzẹme na. Nọ a ru ere no, Jehoyada ọ tẹ ta kẹ ae nọ:

“Rri! Ọmọzae ovie na o ti su nwane wọhọ epanọ Jihova ọ ya eyaa kpahe emezae Devidi.+ 4 Oware nọ wha re ru ona: Wha rẹ ghale izerẹ na avọ ahwo Livae nọ e te jọ iruo+ evaọ Ẹdijala na kpohọ abasa, abọvo ọ rẹ jọ iriẹthẹ;+ 5 abọvo ọfa ọ rẹ jọ obọ uwou* ovie na,+ abọvo nọ o kiọkọ ọ vẹ jọ obọ Unuẹthẹ Otọhotọ na, yọ ahwo na kpobi a rẹ jọ evaọ ighẹ sa-sa nọ e rrọ uwou Jihova na.+ 6 Wha kẹ ohwo ọvo uvẹ ruọ eva uwou Jihova na ha ajokpaọ izerẹ na avọ ahwo Livae na ọvo, enọ e be gbodibo na.+ Ahwo nana a rẹ sae ruọ eva fikinọ a rrọ utu ọrẹri, rekọ ahwo nọ a kiọkọ na kpobi a re koko ujaje Jihova na, a rẹ jọ obọ otafe. 7 Ahwo Livae na a rẹ wariẹ ovie na họ hrọ evaọ ofẹ kpobi, yọ ọvuọ ekwakwa ẹmo riẹ o re kru họ obọ. Ohwo kpobi nọ ọ be nyaruọ uwou na a re kpei no. Wha rẹ jọ kugbe ovie na evaọ oria kpobi nọ ọ be nya.”*

8 Epanọ Jehoyada ozerẹ na ọ ta kẹ ahwo Livae na gbe Juda soso, ere a ru dẹẹ. Fikiere omomọvo rai ọ tẹ rehọ ahwo riẹ nọ a jọ iruo evaọ Ẹdijala na, kugbe enọ e jọ iruo ho evaọ Ẹdijala+ na, keme Jehoyada ozerẹ na o ri siobọno itu+ nọ e jọ iruo na kpo ho. 9 Kẹsena Jehoyada ozerẹ na ọ tẹ kẹ iletu itu ahwo udhusoi+ na izuẹ gbe ejese esese* avọ ejese igheghelie Devidi ovie na,+ enọ e jọ uwou Ọghẹnẹ uzẹme na.+ 10 O te fi ahwo na kpobi họ ọvuọ oria riẹ, yọ ọvuọ okwakwa ẹmo riẹ o kru họ obọ, a dikihẹ no obọze uwou na ze rite ẹkpẹlobọ uwou na, akotọ agbada-idhe na gbe akotọ uwou na, aikpobi a wariẹ ovie na họ. 11 Kẹsena a tẹ rehọ ọmọzae ovie na+ lahwe, a te fi etu-uvie* na gbe Obe Uzi*+ na họ iẹe uzou, a tẹ rehọ iẹe mu ovie, Jehoyada avọ emezae riẹ a te wholo iei. A tẹ ta nọ: “Jọ ovie na ọ rria tọ!”+

12 Nọ Atalaya o yo edo ahwo nọ a be dhẹ ohrẹ je bi jiri ovie na, ọ tẹ nwane nyabru ahwo na ziọ obọ uwou Jihova.+ 13 Ọ tẹ ruẹ ovie na nọ o dikihẹ etẹe kẹle upila riẹ evaọ obọ unuwou na. Ikpahwo-esuo+ na avọ ikporo-egba na e jọ kugbe ovie na, yọ ahwo ẹkwotọ na kpobi a be ghọghọ+ je bi kporo egba, yọ eso-ile na nọ i kru ekwakwa ikporakporo e kobaro evaọ* ẹsuọ ile ujiro na. Nọ Atalaya ọ ruẹ onana, ọ tẹ bẹre iwu riẹ, o te bo nọ: “Nọ ẹgwae omuomu! Nọ ẹgwae omuomu!” 14 Rekọ Jehoyada ozerẹ na ọ tẹ rehọ iletu itu ahwo udhusoi na lahwe, enọ a ro mu nọ i wuzou ogbaẹmo na, ọ tẹ ta kẹ ae nọ: “Wha si ei no udevie egbaẹmo na no, yọ otẹrọnọ ohwo jọ o bi lele iei, wha rehọ ọgbọdọ kpei no!” Keme ozerẹ na ọ ta no vẹre nọ: “Wha kpei evaọ uwou Jihova ha.” 15 Fikiere a te kru ei, nọ o te obọ aro Unuẹthẹ Anyenya nọ o rrọ uwou* ovie na, a tẹ nwane jọ etẹe kpei no.

16 Kẹsena Jehoyada omariẹ avọ ahwo na kpobi gbe ovie na a tẹ re ọvọ inọ a te gbẹ jọ ahwo Jihova.+ 17 Nọ oyena o vrẹ no, ahwo na kpobi a tẹ nyaziọ uwou* Bale, a te zurie iei fihọ otọ,+ a tẹ guọghọ egbada-idhe riẹ gbe emema riẹ,+ a te kpe Mattan ozerẹ Bale+ evaọ aro egbada-idhe na. 18 Kẹsena Jehoyada o te fi izerẹ na gbe ahwo Livae na họ re a sẹro uwou Jihova na, enọ Devidi o fihọ itu-itu re a rẹrote uwou Jihova je dhe idhe emahọ kẹ Jihova+ wọhọ epanọ a kere fihọ Uzi Mosis,+ avọ oghọghọ gbe ile, wọhọ epanọ Devidi ọ ta nọ a ru.* 19 O te je fi irou-unuẹthẹ*+ họ kẹle inuethẹ uwou Jihova na, re ohwo ọvo nọ ọ fo ho evaọ oghẹrẹ jọ kpobi ọ gbẹ ruọ eva ha. 20 Ọ tẹ rehọ iletu itu ahwo udhusoi+ na, ikpahwo na, isu ahwo na, gbe ahwo ẹkwotọ na kpobi ro su ovie na no uwou Jihova. A tẹ nya orọ unuẹthẹ obehru na ruọ uwou* ovie na, a tẹ rọ ovie na keria agbara-uvie+ ọrọ uvie na.+ 21 Fikiere ahwo ẹkwotọ na kpobi a tẹ jẹ ghọghọ, okpẹwho na o tẹ jọ dhedhẹ, keme a rọ ọgbọdọ kpe Atalaya no.

24 Ikpe ihrẹ Jehoash ọ jọ okenọ o zihe ruọ ovie,+ yọ ikpe udhuvẹ o su evaọ Jerusalẹm. Odẹ oni riẹ Zibiah, ohwo Biẹ-shiba.+ 2 Jehoash ọ ruabọhọ je ru oware nọ u kiehọ evaọ aro Jihova evaọ edẹ Jehoyada ozerẹ+ na kpobi. 3 Jehoyada o wo eyae ivẹ kẹe, o te yẹ emezae gbe emetẹ.

4 Nọ oke yena o vrẹ no, Jehoash ọ tẹ jọ udu riẹ wo isiuru inọ ọ rẹ ruẹrẹ uwou Jihova.+ 5 Fikiere o te koko izerẹ na avọ ahwo Livae na họ, ọ tẹ ta kẹ ae nọ: “Wha nyaruọ ikpewho Juda re wha mi Izrẹl soso igho nọ a rẹ rọ ruẹrẹ uwou Ọghẹnẹ rai+ no ukpe te ukpe; yọ wha re ru oware nana vẹrẹ vẹrẹ.” Rekọ ahwo Livae na a ru ere vẹrẹ vẹrẹ hẹ.+ 6 Fikiere ovie na o te se Jehoyada olori izerẹ na, ọ tẹ ta kẹe nọ:+ “Fikieme whọ gbẹ re ta kẹ ahwo Livae na re a jọ Juda gbe Jerusalẹm mi osa-uzou ọrẹri nọ Mosis+ odibo Jihova o jie uzi riẹ na ha, koyehọ osa-uzou ọrẹri nọ ukoko ahwo Izrẹl a rẹ hwa fiki uwou-udhu Isẹri+ na? 7 Keme emezae Atalaya+ aye omuomu na, a bẹre ethẹ uwou Ọghẹnẹ uzẹme na+ ruọ eva, yọ a rehọ eware ọrẹri kpobi nọ e jọ uwou Jihova rọ gọ edhọ Bale no.” 8 Kẹsena a te ku etehe+ jọ, a te fi ei họ otafe evaọ obọ unuẹthẹ uwou Jihova+ na wọhọ epanọ ovie na ọ ta. 9 Nọ oyena o vrẹ no, a te woro uzi evaọ Juda gbe Jerusalẹm soso inọ a rehọ osa-uzou ọrẹri+ na se Jihova, onọ Mosis odibo Ọghẹnẹ uzẹme na ọ jọ obọ udhude na ta kẹ ahwo Izrẹl nọ a hae hwa na. 10 Ikpahwo-esuo na kpobi gbe ahwo na kpobi a tẹ ghọghọ,+ a tẹ jẹ rehọ azọhọ ze nọ a je fihọ etehe na bẹsenọ ọ rọ vọ.*

11 Oke kpobi nọ ahwo Livae na a tẹ wọ etehe na ruọ eva re a rehọ iẹe kẹ ovie na, a jẹ ruẹ nọ igho buobu e rrọ etehe na, okere-obe ovie na avọ ethabọ olori izerẹ na a vẹ nyaze ti ku igho na no,+ kẹsena a vẹ wọe zihe fihọ oria nọ ọ jọ. Ere a je ru no ẹdẹ te ẹdẹ, a te koko igho buobu họ. 12 Kẹsena ovie na avọ Jehoyada a vẹ rehọ igho na kẹ enọ e be rẹrote iruo uwou Jihova na, a vẹ haya enọ i re bru itho gbe ewena re a ruẹrẹ uwou Jihova+ na, jegbe enọ e rẹ rehọ ayọno gbe ekọpa ru iruo re a ruẹrẹ uwou Jihova. 13 Enọ e jẹ rẹrote iruo na i te ru nọ iruo na i ro muhọ, iruo aruẹrẹ na e tẹ jẹ nyaharo nọ a be rẹrote iruo na, a tẹ ruẹrẹ uwou Ọghẹnẹ uzẹme na fihọ epanọ u fo nọ o rẹ jọ je ru ei ga ziezi. 14 Nọ a nwani ru iruo na re no, a tẹ rehọ igho nọ i kiọkọ ze kẹ ovie na avọ Jehoyada, a tẹ rehọ ai ru ekwakwa rọkẹ uwou Jihova, ekwakwa rọkẹ odibọgba jẹ rọkẹ idheidhe, jegbe igho-ame gbe ekwakwa igoru avọ erọ isiliva.+ Yọ a je dhe idhe emahọ+ evaọ uwou Jihova kẹse kẹse evaọ edẹ Jehoyada kpobi.

15 Nọ Jehoyada ọ kpako je yeri uzuazọ nọ o da riẹ ẹro no,* o te whu; ikpe udhozeza-gbikpe (130) ọ jọ okenọ o whu. 16 A te ki ei fihọ Okpẹwho Devidi kugbe ivie na,+ keme o ru oware uwoma evaọ Izrẹl+ kpahe Ọghẹnẹ uzẹme na avọ uwou Riẹ.

17 Nọ Jehoyada o whu no, ikpahwo-esuo Juda e tẹ nyaze, a te guzou kpotọ kẹ ovie na, ovie na ọ tẹ gaviezọ kẹ ae. 18 A te gbabọkẹ uwou Jihova Ọghẹnẹ esẹ-esẹ rai, a te mu ekpọ ọrẹri* na avọ emedhọ na họ ẹgọ, o tẹ whae ze nọ Ọghẹnẹ o ro mu ofu kẹ* Juda avọ Jerusalẹm fiki abe-ọriọ rai. 19 Jihova ọ ruabọhọ je vi eruẹaro bru ai re a zihe bru ei ze, yọ a jẹ vẹvẹ ae unu,* rekọ a rọwo gaviezọ họ.+

20 Ẹzi Ọghẹnẹ ọ tẹ ruọ oma* Zẹkaraya ọmọzae Jehoyada+ ozerẹ na, o te dikihẹ kpehru vi ahwo na, ọ tẹ ta kẹ ae nọ: “Enẹ Ọghẹnẹ uzẹme na ọ ta, ‘Fikieme wha be rọ raha ijaje Jihova? Eware e te riẹ nya kẹ owhai hi! Fikinọ wha nyasiọ Jihova ba no na, ọyomariẹ ọ te nyasiọ owhai ba re.’”+ 21 Rekọ a tẹ lẹlẹ gba ẹgwae omuomu kpahe iẹe,+ a tẹ rọ itho fi ei kpe evaọ ighẹ nọ o rrọ uwou Jihova+ wọhọ epanọ ovie na ọ ta kẹ ae. 22 Jehoash ovie na ọ kareghẹhọ uyoyou nọ o rẹ hiẹ hẹ nọ Jehoyada ọsẹ riẹ* o dhesẹ kẹe he, o te kpe ọmọzae riẹ, ọnọ ọ ta evaọ okenọ o je whu inọ: “Jọ Jihova o bruoziẹ na jẹ hwosa kẹ owhẹ.”+

23 Evaọ obọ emuhọ ukpe na,* ogbaẹmo Siria o tẹ wọ ohọre bru Jehoash ze, a tẹ vẹruọ Juda avọ Jerusalẹm.+ A te kpe ikpahwo-esuo ahwo na kpobi no,+ a te vi eware rai nọ a kwa rehọ ro se ovie Damaskọs. 24 Keme dede nọ unu egbaẹmo Siria nọ e wọ ẹmo ze o jọ kakao, Jihova ọ rehọ ogbaẹmo nọ u bu gaga+ họ obọ rai, fikinọ ahwo na a nyasiọ Jihova Ọghẹnẹ esẹ-esẹ rai ba no; ere a* rọ kẹ Jehoash uye. 25 Yọ okenọ a nyase iẹe ba no (keme a nyase iẹe ba avọ oma nọ a nwa riẹ gaga*), idibo obọriẹ e tẹ lẹlẹ gba ẹgwae omuomu kpahe iẹe keme o kpe azẹ emezae* Jehoyada+ ozerẹ na. A te kpei evaọ ehwa obọriẹ.+ Ere o ro whu, a te ki ei fihọ Okpẹwho Devidi,+ rekọ a ki rie fihọ eria nọ a re ki ivie fihọ họ.+

26 Ahwo nana họ enọ e lẹlẹ gba ẹgwae omuomu+ na kpahe iẹe: Zebad ọmọzae Shimiat aye Ammọn na gbe Jehozabad ọmọzae Shimrit aye Moab na. 27 Iku kpahe emezae riẹ gbe iziẹibro buobu nọ a whowho kpahe iẹe+ gbe uwou Ọghẹnẹ uzẹme na nọ ọ ruẹrẹ,*+ a kere eware nana kpobi fihọ usu eme nọ a kere* fihọ Obe Ivie na. Amazaya ọmọzae riẹ o te zihe ruọ ovie evaọ ẹta riẹ.

25 Ikpe udhegbisoi Amazaya ọ jọ okenọ o zihe ruọ ovie, yọ ikpe udhegbizii o su evaọ Jerusalẹm. Odẹ oni riẹ Jehoadan, ohwo Jerusalẹm.+ 2 Ọ ruabọhọ je ru oware nọ u kiehọ evaọ aro Jihova, rekọ ọ rehọ udu riẹ kpobi ru ere he. 3 Nọ uvie na o nwani dikihẹ kothi no evaọ obọ riẹ, o te kpe idibo riẹ nọ i kpe ọsẹ riẹ ovie na.+ 4 Rekọ o kpe emezae rai hi, keme o ru lele oware nọ a kere fihọ Uzi na, evaọ obe Mosis, onọ Jihova ọ jọ jie uzi nọ: “Esẹ i re whu fiki emezae rai hi, yọ emezae i re whu fiki esẹ rai hi; rekọ omomọvo o re whu fiki uzioraha obọriẹ.”+

5 Amazaya o te koko ahwo Juda họ, o te ru ai dikihẹ ọvuọ inuwou abọ ọsẹ rai avọ iletu itu ahwo idu gbe iletu itu ahwo udhusoi na nọ i wuzou rai. A dikihẹ kẹ Juda gbe Bẹnjamin soso.+ O te kere ai fihotọ no umuo ikpe udhe kpohọ ehru,+ ọ tẹ ruẹ nọ a bu te egbaẹmo idu egba esa (300,000) nọ a wuhrẹ* re e jọ ogbaẹmo na, enọ e rẹ sai fi ozuẹ je kru ojese ologbo. 6 U no ere no, ọ rọ etalẹnte* isiliva udhusoi (100) haya egbaẹmo egaga idu ẹgba ọvo (100,000) no obọ Izrẹl ze. 7 Rekọ ohwo Ọghẹnẹ uzẹme na jọ ọ tẹ nyabru ei ze, ọ tẹ ta nọ: “O ovie, whọ kuvẹ re ogbaẹmo Izrẹl u lele owhẹ nya ha, keme Jihova ọ rrọ kugbe Izrẹl he,+ ọ rrọ kugbe ahwo orua Ifremu na ọvuọvo ho. 8 Rekọ whẹ ọvo ọ nya, jowọ, je wo udu evaọ ẹmo na. O gbẹ rrọ ere he, Ọghẹnẹ uzẹme na ọ sai ru owhẹ kie evaọ aro ọwegrẹ, keme Ọghẹnẹ o wo ogaga nọ o re ro fiobọhọ kẹ ohwo+ je ru ohwo kie.” 9 Fikiere Amazaya ọ tẹ nọ ohwo Ọghẹnẹ uzẹme na nọ: “Kẹvẹ kpahe etalẹnte udhusoi (100) nọ mẹ kẹ egbaẹmo Izrẹl no na?” Ohwo Ọghẹnẹ uzẹme na ọ tẹ kẹ uyo nọ: “Jihova o wo edhere nọ ọ sae rọ kẹ owhẹ bu vi ere.”+ 10 Fikiere Amazaya ọ tẹ ta kẹ egbaẹmo nọ i no obọ Ifremu bru ei ze na nọ a kpo, o te siobọno ai kpobọ ẹwho rai. Rekọ eva ahwo Juda e tẹ dha ae gaga, a te zihe kpobọ ẹwho rai avọ ofu.

11 Kẹsena Amazaya o te kru udu ga, o te su egbaẹmo obọriẹ kpobọ Ukiekpotọ Uwhei,+ o te kpe ezae Siya idu ikpe (10,000) fihọ otọ.+ 12 Ezae Juda i te mu ahwo idu ikpe (10,000) ọkpokpọ. A tẹ rehọ ae ziọ obọ ehru ugbehru-utho na, a tẹ jọ obọ ehru ugbehru-utho na gbolo ai fihọ otọ, aikpobi a tẹ bẹre ehehẹhẹ. 13 Rekọ ahwo nọ a jọ ogbaẹmo nọ Amazaya ọ ta kẹ nọ a zihe kpo inọ a lele iei kpohọ ẹmo na ha na,+ a tẹ jẹ họre ahwo evaọ ikpewho Juda, no Sameria+ rite obọ Bẹt-horọn;+ a jọ obei kpe ahwo idu esa (3,000) jẹ kwa egbo-ẹmo buobu rehọ.

14 Rekọ nọ Amazaya o zihe no obonọ ọ jọ kpe ahwo Edọm na ze no, ọ tẹ rehọ eghẹnẹ ahwo Siya ze, ọ tẹ rehọ ai vi kẹ omariẹ re e jọ eghẹnẹ,+ o te mu uzou họ ego kpotọ kẹ ae je bi ru iwiri idhe kuye kẹ ae. 15 Fikiere Jihova o te mu ofu kẹ Amazaya gaga, o te vi ọruẹaro jọ bru ei nọ ọ ta kẹe nọ: “Fikieme who bi ro lele eghẹnẹ ahwo na nọ e sai siwi ahwo obọrai no obọ ra ha na?”+ 16 Epanọ ọ jẹ rọ ta ẹme na kẹe na, ovie na ọ tẹ ta nọ: “Kọ ma rọ owhẹ mu ọkiroro* ovie na?+ U te no!+ Fikieme a re ro kpe owhẹ?” Ọruẹaro na o te fibo, rekọ o fibae nọ: “Mẹ riẹ nọ Ọghẹnẹ ọ jiroro no inọ ọ te raha owhẹ fiki oware nana nọ who ru na, whọ gbẹ jẹ gaviezọ kẹ ohrẹ mẹ hẹ.”+

17 Nọ Amazaya ovie Juda o lele ekiroro* riẹ gba ẹgwae no, o te vi uwou se Jehoash ọmọzae Jehoahaz ọmọzae Jehu ovie Izrẹl, inọ: “Nyaze re ma họre ohwohwo evaọ ẹmo.”*+ 18 Jehoash ovie Izrẹl o te vi uwou nana se Amazaya ovie Juda, inọ: “Odhigbo obọ Lebanọn o vi uwou se ure sida obọ Lebanọn inọ, ‘Rehọ ọmọtẹ ra kẹ ọmọzae mẹ re ọ jọ aye riẹ.’ Rekọ arao ojihẹ Lebanọn jọ nọ ọ jẹ nyavrẹ o te thihi odhigbo na nyaotọ. 19 Whọ ta nọ, ‘Rri! Me* fi Edọm kparobọ no.’+ Fikiere who te bi fu uke, be gwọlọ nọ a kẹ owhẹ orro. Rekọ enẹna daji obọ uwou* ra. Fikieme who re ro si okpẹtu ze re who kie, jẹ rọ ere ru Juda lele owhẹ kie?”

20 Rekọ Amazaya ọ kezọ họ+ keme Ọghẹnẹ uzẹme na họ ọnọ o ru re o via enẹ re ọ rehọ ae họ obọ ọwegrẹ na,+ fikinọ a lele eghẹnẹ Edọm.+ 21 Fikiere Jehoash ovie Izrẹl ọ tẹ wọ nya, tei te Amazaya ovie Juda a te mu ohwohwo họ ẹhọre evaọ ẹmo evaọ Bẹt-shimẹsh+ ọrọ Juda. 22 Izrẹl o te fi Juda kparobọ, fikiere ahwo na a tẹ dhẹ kpohọ ọvuọ uwou* riẹ. 23 Jehoash ovie Izrẹl o te mu Amazaya ovie Juda, ọmọzae Jehoash ọmọzae Jehoahaz* evaọ Bẹt-shimẹsh. Kẹsena ọ tẹ rehọ iẹe ziọ Jerusalẹm, o te kporo oria jọ fihọ otọ evaọ ugbẹhẹ Jerusalẹm, no Unuẹthẹ Ifremu+ ze rite Unuẹthẹ Ubienẹ na,+ u te ikiubiti egba ene (400).* 24 Ọ kwa igoru kpobi gbe isiliva gbe ekwakwa kpobi nọ e jọ kugbe Obẹd-idọm* evaọ uwou Ọghẹnẹ uzẹme na gbe eria ekwakwa-aghae uwou* ovie na,+ o te je mu ahwo. Kẹsena o te zihe kpobọ Sameria.

25 Amazaya+ ọmọzae Jehoash ovie Juda ọ rria ikpe ikpegbisoi nọ Jehoash+ ọmọzae Jehoahaz ovie Izrẹl o whu no.+ 26 Rọ kpahe iku uzuazọ Amazaya nọ i kiọkọ, no emuhọ rite ekuhọ, kọ a gbe kere ai fihọ Obe Ivie Juda gbe erọ Izrẹl? 27 Nọ Amazaya ọ siọ Jihova ba elele no, a tẹ lẹlẹ gba ẹgwae omuomu+ kpahe iẹe evaọ Jerusalẹm, ọ tẹ dhẹ kpobọ Lekish, rekọ a te vi ahwo rọ tuae kpobọ Lekish, a tẹ jọ obei kpei. 28 Fikiere a tẹ rọ enyenya wọe zihe ze, a te ki ei kugbe esẹ-esẹ riẹ evaọ okpẹwho Juda.

26 Kẹsena ahwo Juda kpobi a tẹ rehọ Uzaya,+ ọnọ ọ jọ ikpe ikpegbezeza, a tẹ rehọ iẹe mu ovie evaọ ẹta Amazaya+ ọsẹ riẹ. 2 Ọ wariẹ bọ Ilọt,+ ọ tẹ rehọ iẹe zihe ziọ otọ Juda okenọ ovie na* o whu no wọhọ* esẹ-esẹ riẹ.+ 3 Ikpe ikpegbezeza Uzaya+ ọ jọ nọ o zihe ruọ ovie, yọ ikpe udhuvẹ gbe ikpegbivẹ o su evaọ Jerusalẹm. Odẹ oni riẹ Jekolaya ohwo Jerusalẹm.+ 4 Ọ ruabọhọ je ru oware nọ u kiehọ evaọ aro Jihova, nwane wọhọ epanọ Amazaya ọsẹ riẹ o ru.+ 5 Yọ ọ ruabọhọ jẹ kiẹ gwọlọ Ọghẹnẹ evaọ etoke Zẹkaraya, ọnọ o wuhrẹ i rie re ọ dhozọ Ọghẹnẹ uzẹme na. Evaọ etoke nọ ọ jẹ rọ kiẹ gwọlọ Jihova na, Ọghẹnẹ uzẹme na o ru nọ eware i ro woma kẹe.+

6 Ọ wọ nyai lele ahwo Filistia fi ẹmo,+ o te kporo ugbẹhẹ Gat,+ ugbẹhẹ Jabnẹ,+ gbe ugbẹhẹ Ashdọd+ ruọ eva. Kẹsena ọ tẹ bọ ikpewho fihọ ẹkwotọ Ashdọd gbe udevie ahwo Filistia. 7 Ọghẹnẹ uzẹme na o te gbe je fiobọhọ kẹe họre ahwo Filistia na, gbe ahwo Arebia+ nọ a jẹ rria Gọrbale, jegbe ahwo Mẹyunẹm. 8 Ahwo Ammọn+ a te mu azọhọ họ ẹhwa kẹ Uzaya. Odẹ riẹ u te ti do te ugbo obọ Ijipti, keme ogaga riẹ o tẹ te thesiwa. 9 Ofariẹ, Uzaya ọ bọ iwou ikpehru+ evaọ Jerusalẹm kẹle Unuẹthẹ Ubienẹ+ na, Unuẹthẹ Ukiekpotọ+ na, gbe Odẹẹ-Ugbẹhẹ na, yọ o di ogba wariẹ ae họ.* 10 U no ere no, ọ bọ iwou ikpehru+ fihọ udhude na jẹ tọ* egọdọ-ame* buobu (keme o wo erao buobu); o te je ru ere fihọ Shefila* na gbe otọ opraprara* na. O wo ewhẹrẹ gbe eruẹrẹ-ọgbọ evaọ igbehru na gbe evaọ Kamẹl, keme iruo ẹwọ e were riẹ gaga.

11 Ofariẹ, Uzaya o wo ogbaẹmo nọ o ruẹrẹ oma kpahe kẹ ẹmo. A jẹ hae wọ nyai fi ẹmo, yọ a ruẹrẹ e rai fihọ itu sa-sa. Jeayẹl okere-obe+ na gbe Measaya nọ ọ jọ ethabọ osu họ enọ i kele i rai je kere odẹ rai fihotọ,+ yọ aimava na a jọ otọ Hananaya, omọvo ikpahwo-esuo ovie na. 12 Unu ahwo nọ a wuzou inuwou abọ ọsẹ nọ egbaẹmo egaga nana e jọ otọ rai o jọ idu ivẹ gbe egba ezeza (2,600). 13 Egbaẹmo nọ e jọ otọ rai i bu te ezae idu egba esa gbe ihrẹ gbe egba isoi (307,500) nọ e ruẹrẹ oma kpahe kẹ ẹmo, ogbaẹmo ogaga nọ o rẹ tha ovie na uke họre ọwegrẹ.+ 14 Uzaya ọ kẹ egbaẹmo na kpobi ejese, izuẹ,+ itu-egaga, iwu-ẹmo,+ ize, gbe ibitho nọ a re fihọ udeme.+ 15 U te no ere no, ọ jọ Jerusalẹm ku ijini ẹmo, enọ ewena i ru; a wọ rai fihọ ehru iwou ikpehru+ na gbe ibienẹ igbẹhẹ na, yọ a rẹ sae rehọ ae sa ese gbe itho ilogbo. Fikiere odẹ riẹ u te do ruọ oria kpobi,* keme a je fiobọhọ kẹe gaga, ọ tẹ te jọ gaga.

16 Rekọ, nọ ọ nwane ga no, omorro o tẹ ruọ udu riẹ, onọ o wha okpẹtu sei, o te ru oware nọ o wọso Jihova Ọghẹnẹ riẹ ẹkwoma etẹmpol Jihova nọ ọ ruọ eva re ọ mahe insẹnse evaọ agbada-idhe insẹnse.+ 17 Azaraya ozerẹ na avọ izerẹ Jihova udhone efa nọ e gudu e tẹ nwane ruọ eva lele iei. 18 A tẹ za Uzaya ovie na họ, a tẹ ta kẹe nọ: “U fo ho Uzaya, re whọ mahe insẹnse kẹ Jihova!+ Izerẹ na ọvo họ enọ e rẹ mahe insẹnse, keme uyẹ Erọn a no ze,+ enọ a ru fo no. Nya no aruẹri na no, keme oware nọ o wọso Ọghẹnẹ who ru na, yọ who ti wo orro ọvo no obọ Jihova Ọghẹnẹ ze evaọ onana ha.”

19 Rekọ ofu o te mu Uzaya gaga avọ epanọ o ro kru omodhe insẹnse họ obọ re ọ mahe insẹnse na;+ yọ epanọ ofu o je ro mu ei kẹ izerẹ na, oti+ o tẹ va no aruezo riẹ ze evaọ iraro izerẹ na evaọ uwou Jihova kẹle agbada-idhe insẹnse na. 20 Nọ Azaraya olori izerẹ na avọ izerẹ na kpobi a rri rie, a tẹ ruẹ nọ oti ọ va noi aruezo ze! Fikiere a te gele iei no etẹe ovovẹrẹ, ọyomariẹ o te je siawọ vrẹ, keme Jihova ọ rehọ oti tehe iẹe no.

21 Uzaya ovie na ọ tẹ jọ ọmoti bọo ẹdẹ uwhu riẹ, yọ ọ jẹ rria uwou jọ sa wọhọ ọmoti,+ keme a gbẹ kẹe uvẹ re ọ ruọ eva uwou Jihova ha. Jotam ọmọzae riẹ ọ jọ ọnọ o wuzou uwou* ovie na, o je bruoziẹ ahwo ẹkwotọ na.+

22 Yọ iku uzuazọ Uzaya nọ i kiọkọ, no emuhọ rite ekuhọ, Aizaya ọruẹaro+ na ọmọzae Emọz o kere i rai fihotọ. 23 Kẹsena Uzaya o te whu wọhọ* esẹ-esẹ riẹ, a te ki ei kugbe esẹ-esẹ riẹ, rekọ evaọ otọ nọ a re ki ahwo fihọ nọ o rrọ rọkẹ ivie na a ki rie fihọ, keme a ta nọ: “Ọmoti ọ rrọ.” Jotam+ ọmọzae riẹ o te zihe ruọ ovie evaọ ẹta riẹ.

27 Ikpe udhegbisoi Jotam+ ọ jọ okenọ o zihe ruọ ovie, yọ ikpe ikpegbezeza o su evaọ Jerusalẹm. Odẹ oni riẹ Jerusha, ọmọtẹ Zedọk.+ 2 Ọ ruabọhọ je ru oware nọ u kiehọ evaọ aro Jihova, nwane wọhọ epanọ Uzaya ọsẹ riẹ o ru,+ rekọ o duwu ruọ eva etẹmpol Jihova ha.+ Rekọ ahwo na a gbe je ru eware nọ e rẹ wha ọraha se ai. 3 Ọ bọ unuẹthẹ obehru uwou Jihova,+ yọ ọ jọ ugbẹhẹ Ofẹl+ ru iruo gaga. 4 Ọ tẹ jẹ bọ ikpewho+ fihọ ubrotọ igbehru Juda,+ yọ ọ bọ eria nọ a di ogba wariẹ họ*+ gbe iwou ikpehru+ fihọ eria nọ ire e vọ na. 5 O lele ovie ahwo Ammọn fi ẹmo,+ ukuhọ riẹ o te fi ai kparobọ, u te ru nọ ahwo Ammọn a rọ kẹe etalẹnte* isiliva udhusoi (100), owawọ kọr* idu ikpe (10,000) orọ iwhiti, gbe owawọ kọr idu ikpe (10,000) orọ ebali evaọ ukpe yena. Ahwo Ammọn a hwa eware nana kẹe re evaọ ukpe avọ ivẹ gbe ukpe avọ esa.+ 6 Fikiere Jotam o te je dhe ẹgẹga, keme ọ gba riẹ mu* nọ ọ rẹ nya evaọ idhere Jihova Ọghẹnẹ riẹ.

7 Rọ kpahe iku uzuazọ Jotam nọ i kiọkọ, emo kpobi nọ o fi gbe idhere riẹ, a kere i rai fihọ Obe Ivie Izrẹl gbe erọ Juda.+ 8 Ikpe udhegbisoi ọ jọ okenọ o zihe ruọ ovie, yọ ikpe ikpegbezeza o su evaọ Jerusalẹm.+ 9 Kẹsena Jotam o te whu wọhọ* esẹ-esẹ riẹ, a te ki ei fihọ Okpẹwho Devidi.+ Ehaz ọmọzae riẹ o te zihe ruọ ovie evaọ ẹta riẹ.+

28 Ikpe udhe Ehaz+ ọ jọ okenọ o zihe ruọ ovie, yọ ikpe ikpegbezeza o su evaọ Jerusalẹm. O ru oware nọ u kiehọ evaọ aro Jihova ha wọhọ epanọ Devidi ọsẹ-esẹ riẹ o ru.+ 2 Ukpoye, ọ nya evaọ edhere ivie Izrẹl,+ yọ o tube ru emema ayọno*+ erọ edhọ Bale. 3 Ofariẹ, o ru iwiri idhe kuye evaọ Ukiekpotọ Ọmọzae Hinọm,* ọ tẹ mahe emezae riẹ evaọ erae,+ wọhọ epaọ iruemu etọtọ erẹwho+ nọ Jihova o le no kẹ ahwo Izrẹl. 4 Yọ ọ jẹ hai dhe idhe je ru iwiri idhe kuye evaọ eria ikpehru+ na, evaọ ikpehru na, gbe evaọ otọ ure ulogbo kpobi.+

5 Fikiere Jihova Ọghẹnẹ riẹ ọ tẹ rehọ iẹe họ obọ ovie Siria,+ u te ru nọ a ro fi ei kparobọ je mu ahwo buobu, a tẹ rehọ ae ziọ obọ Damaskọs.+ Ọ tẹ jẹ rehọ iẹe họ obọ ovie Izrẹl, ọnọ o kpe ahwo riẹ buobu. 6 Keme Pika+ ọmọzae Rẹmalaya ọ jọ Juda kpe ahwo idu udhozeza (120,000) evaọ ẹdẹ ọvo, aikpobi ezae nọ e gudu, fikinọ a nyasiọ Jihova Ọghẹnẹ esẹ-esẹ rai ba.+ 7 Yọ Zikrae, ọgbaẹmo nọ ọ rrọ ohwo orua Ifremu o kpe Measaya ọmọzae ovie na gbe Azraekam, ọnọ o wuzou ighẹ ovie na,* gbe Ẹlkena, ọnọ ọ rọ kẹle ovie na. 8 Ofariẹ, ahwo Izrẹl na a mu imoni rai nọ i bu te idu egba ivẹ (200,000)—te eyae, te emezae, te emetẹ; a tẹ jẹ kwa egbo-ẹmo buobu, a tẹ wha egbo-ẹmo na kpobọ Sameria.+

9 Rekọ ọruẹaro Jihova jọ nọ a re se Odẹd ọ jọ obei. Ọ tẹ nyai zere ogbaẹmo nọ o jẹ nyaziọ Sameria na, ọ tẹ ta kẹ ae nọ: “Rri! Fikinọ Jihova Ọghẹnẹ esẹ-esẹ rai ọ jẹ dha eva kẹ Juda ọ rọ rehọ ae họ obọ rai,+ wha tẹ rọ ofu ọgaga kpe ae, onọ u do te obọ idhiwu na no. 10 Yọ enẹna wha be gwọlọ ru ahwo Juda gbe Jerusalẹm zihe ruọ idibo emezae gbe erọ emetẹ rai.+ Kọ whai omarai, wha gbẹ reabe evaọ aro Jihova Ọghẹnẹ rai re? 11 Wha gaviezọ kẹ omẹ obọnana re wha zihe ahwo nọ wha mu rehọ mi imoni rai na, keme Jihova o bi mu ofu ọgaga kẹ owhai.”

12 Fikiere enọ i wuzou ahwo orua Ifremu na jọ, Azaraya ọmọzae Jehohenan, Bẹrekaya ọmọzae Mẹshilẹmọt, Jehezkaya ọmọzae Shalọm, gbe Amesa ọmọzae Hadlae, a tẹ nyae za ahwo nọ a bi no ẹmo ze na họ, 13 a tẹ ta kẹ ae nọ: “Wha rehọ ahwo nọ wha mu na ziọ obonẹ hẹ, keme u ti ru omai reabe evaọ aro Jihova. Oware nọ wha be gwọlọ ru na u ti fiba izieraha mai gbe abe nọ ma re, keme ma reabe gaga no yọ Ọghẹnẹ o bi mu ofu kẹ Izrẹl gaga.” 14 Fikiere egbaẹmo na e tẹ rehọ ahwo nọ a mu na gbe eware nọ a kwa na+ kẹ ikpahwo-esuo na avọ ogbotu ahwo na kpobi. 15 Kẹsena ezae nọ a fodẹ edẹ rai e tẹ kparoma, a tẹ rehọ ahwo nọ a mu na, a tẹ jọ egbo-ẹmo na rehọ iwu kẹ ahwo kpobi nọ a jọ ẹbẹba evaọ usu rai. Ere a rọ kẹ ai iwu kuhọ, jẹ kẹ ae eviẹ, emu gbe udi, gbe udẹ nọ a re ro wholo oma rai. U no ere no, a tẹ rehọ eketekete wọ enọ oma rai o ga ha, a tẹ rehọ ahwo nọ a mu na bru imoni rai evaọ Jẹriko, okpẹwho iriẹ na. Kẹsena a te zihe kpobọ Sameria.

16 Evaọ oke yena, Ehaz ovie na ọ tẹ ta kẹ ivie Asiria nọ a fiobọhọ kẹe.+ 17 Ahwo Edọm a tẹ wariẹ wọ ze jẹ họre Juda, a te mu ahwo rehọ. 18 Ahwo Filistia+ a tẹ jẹ wọ ohọre kpohọ ikpewho nọ e rrọ Shefila*+ gbe Negẹb* Juda, a te fi Bẹt-shimẹsh,+ Aijalọn,+ Gẹdirọt, Sokọ avọ ewho esese riẹ,* Timnah+ avọ ewho esese riẹ, gbe Gimzọ avọ ewho esese riẹ kparobọ; a te mu ai họ ẹria. 19 Jihova o hrẹ Juda kpotọ fiki Ehaz ovie Izrẹl, keme o ru Juda gbeku vrẹta, onọ o wha riẹ ze nọ a rọ ghẹmeeyo gaga kẹ Jihova.

20 Ukuhọ riẹ, Tilgat-pilniza+ ovie Asiria ọ tẹ wọ ohọre bru ei ze, ọ tẹ wha idhọvẹ sei+ viukpenọ o re fiobọhọ kẹe. 21 Keme Ehaz ọ kwa eware kpobi nọ e jọ uwou Jihova gbe uwou* ovie na+ gbe iwou ikpahwo-esuo na, ọ tẹ rehọ ae kẹ ovie Asiria okẹ; rekọ onana u fiobọhọ kẹe vievie he. 22 Yọ evaọ oke nọ idhọvẹ e rọ jọ Ehaz ovie na oma ọ mae tubẹ rọ raha izi Jihova. 23 O te mu idhe họ edhe kẹ eghẹnẹ Damaskọs+ nọ i fi rie kparobọ,+ ọ tẹ ta nọ: “Fikinọ eghẹnẹ ivie Siria i bi fiobọhọ kẹ ae na, me ti dhe idhe kẹ ae re e ruẹsi fiobọhọ kẹ omẹ.”+ Rekọ i te ru ei avọ Izrẹl soso zoruẹ. 24 Ofariẹ, Ehaz ọ kwa ekwakwa uwou Ọghẹnẹ uzẹme na; ọ tẹ gbẹre ekwakwa uwou Ọghẹnẹ uzẹme na ibribro,+ kare ethẹ uwou Jihova na,+ jẹ rehọ egbada-idhe vi kẹ omariẹ evaọ ibienẹ Jerusalẹm kpobi. 25 Ọ tẹ jẹ bọ eria ikpehru nọ a rẹ jọ ru iwiri idhe kuye kẹ eghẹnẹ efa+ fihọ ikpewho Juda kpobi, o te ru eva dha Jihova Ọghẹnẹ esẹ-esẹ riẹ.

26 Rọ kpahe iku uzuazọ riẹ nọ i kiọkọ, eware kpobi nọ o ru no emuhọ rite ekuhọ, a kere i rai fihọ Obe Ivie Juda gbe erọ Izrẹl.+ 27 Kẹsena Ehaz o te whu wọhọ* esẹ-esẹ riẹ, a te ki ei fihọ okpẹwho na, evaọ Jerusalẹm, keme a wọ riẹ ziọ eria nọ a re ki ivie Izrẹl fihọ họ.+ Hẹzikaya ọmọzae riẹ o te zihe ruọ ovie evaọ ẹta riẹ.

29 Ikpe udhegbisoi Hẹzikaya+ ọ jọ nọ o zihe ruọ ovie, yọ ikpe udhegbizii o su evaọ Jerusalẹm. Odẹ oni riẹ Abaejah, ọmọtẹ Zẹkaraya.+ 2 Ọ ruabọhọ je ru oware nọ u kiehọ evaọ aro Jihova,+ nwane wọhọ epanọ Devidi ọsẹ-esẹ riẹ o ru.+ 3 Evaọ ukpe ọsosuọ esuo riẹ, evaọ amara ọsosuọ, o te rovie ethẹ uwou Jihova na jẹ ruẹrẹ ae.+ 4 Kẹsena ọ tẹ rehọ izerẹ na avọ ahwo Livae na ze, o te koko ae họ afe nọ ọ rrọ ofẹ ovatha-ọre. 5 Ọ ta kẹ ae nọ: “Wha gaviezọ kẹ omẹ, whai ahwo Livae. Enẹna wha ru omarai fo+ je ru uwou Jihova Ọghẹnẹ esẹ-esẹ rai fo, re wha si oware nọ o fo ho no oria ọrẹri na no.+ 6 Keme esẹ mai e ghẹmeeyo je ru oware nọ u yoma evaọ aro Jihova Ọghẹnẹ mai.+ A nyasiọ iẹe ba, a te ku ovao rai fiẹ siọ uwou-udhu Jihova ba je kiukeku ei.+ 7 A tẹ jẹ kare ethẹ ọmọgwa+ na je furie ikpẹ na no.+ A siọ insẹnse ba ẹmahe+ jẹ siọ idhe emahọ ba edhe+ kẹ Ọghẹnẹ Izrẹl evaọ oria ọrẹri na. 8 Fikiere, Jihova o te mu ofu ọgaga kẹ Juda gbe Jerusalẹm,+ o te ru ai fihọ oware idudu avọ igbunu gbe oware nọ a rẹ rọ fiki riẹ fiunu,* wọhọ epanọ wha be rọ ibiaro obọrai ruẹ na.+ 9 Yọ fiki onana, a rehọ ọgbọdọ kpe esẹ-esẹ mai,+ a mu emezae mai, emetẹ mai, gbe eyae mai kpohọ igbo.+ 10 Enẹna, o rrọ isiuru udu mẹ re mẹ re ọvọ kugbe Jihova Ọghẹnẹ Izrẹl,+ re ọ ruẹse siọ ofu ọgaga nọ o bi mu kẹ omai na ba. 11 Emezae mẹ, oke nana yọ oke nọ a rẹ rọ rehọ abọ mu oma ha,* keme Jihova ọ salọ owhai no re wha dikihẹ aro riẹ, re wha jọ egbodibo riẹ,+ je ru idheidhe riẹ kuye iwiri.”+

12 Nọ ọ ta ere no, ahwo Livae na a tẹ kparoma: Evaọ uyẹ Kohat,+ Mehat ọmọzae Amesae avọ Joẹl ọmọzae Azaraya; evaọ uyẹ Mẹrarae,+ Kish ọmọzae Abdae avọ Azaraya ọmọzae Jehalẹlẹl; evaọ uyẹ Gẹshọn,+ Joah ọmọzae Zimma avọ Idẹn ọmọzae Joah; 13 evaọ emezae Ẹlizefan, Shimrae avọ Jeuẹl; evaọ emezae Esaf,+ Zẹkaraya avọ Matanaya; 14 evaọ emezae Himan,+ Jehayẹl avọ Shimia; evaọ emezae Jedutọn,+ Shimaya avọ Uziẹl. 15 A te koko imoni rai họ je ru omarai fo, a tẹ nyaze re a ru uwou Jihova fihọ fuafo+ wọhọ epaọ ẹme Jihova nọ ovie na ọ ta. 16 Izerẹ na e tẹ ruọ eva uwou Jihova na re a ru orufuọ na, a tẹ kwa eware igbegbe kpobi nọ a ruẹ evaọ etẹmpol Jihova na lahwe, a tẹ rehọ ae kpobọ ighẹ+ nọ o rrọ uwou Jihova na. Ahwo Livae na a tẹ jọ etẹe rehọ ae, a tẹ wọ ae ruọ otafe kpobọ Ukiekpotọ Kidrọn.+ 17 Ere a ro mu orufuọ na họ evaọ ẹdẹ ọsosuọ amara ọsosuọ na, a te ru te ọmọgwa Jihova+ na evaọ ẹdẹ avọ eree amara na. Edẹ eree a ro ru uwou Jihova na fo, yọ a ku iruo na họ evaọ ẹdẹ avọ ikpegbezeza amara ọsosuọ na.

18 Nọ a ru ere no, a tẹ ruọ eva bru Hẹzikaya ovie na, a tẹ ta nọ: “Ma ru uwou Jihova na soso fo no, je ru agbada-idhe idhe emahọ+ na avọ ekwakwa riẹ kpobi+ gbe emẹjẹ ebrẹdi nọ a re fihọ ehru ohwohwo na*+ avọ ekwakwa riẹ kpobi fo no. 19 Yọ ekwakwa kpobi nọ Ehaz ovie na o gbolo fihọ akotọ evaọ etoke esuo riẹ nọ ọ rọ nyasiọ Ọghẹnẹ ba+ na, ma ruẹrẹ e rai họ no je ru ai fo no,+ e rrọ aro agbada-idhe Jihova na.”

20 Hẹzikaya ovie na ọ tẹ kpama evaọ irioke, o te koko ikpahwo-esuo okpẹwho na họ, a te kpobọ uwou Jihova. 21 A rehọ iruẹ ihrẹ, igbo ihrẹ, imigodẹ ezae ihrẹ, gbe ikri ihrẹ ze re a ro dhe idhe uzioraha fiki uvie na, aruẹri na, gbe fiki Juda.+ Fikiere ọ tẹ ta kẹ izerẹ na, ahwo uyẹ Erọn na re a rehọ ae dhe idhe evaọ agbada-idhe Jihova na. 22 Kẹsena a te kpe iruẹ na,+ izerẹ na e tẹ rehọ azẹ na, a tẹ frẹ riẹ fihọ ehru agbada-idhe na;+ a te je kpe igbo na, a tẹ frẹ azẹ na fihọ ehru agbada-idhe na, a te kpe imigodẹ ezae na, a tẹ frẹ azẹ na fihọ ehru agbada-idhe na. 23 Kẹsena a tẹ rehọ ikri idhe uzioraha na ziọ aro ovie na avọ ogbotu na, a tẹ rọ abọ rai kpahe ae. 24 Izerẹ na i te kpe ae jẹ rehọ azẹ rai dhe idhe uzioraha evaọ agbada-idhe na, re a ru omavoro rọkẹ Izrẹl soso, keme ovie na ọ ta nọ a re dhe idhe emahọ na gbe idhe uzioraha na fiki Izrẹl soso.

25 Evaọ oke yena, ọ ta nọ ahwo Livae na a dikihẹ uwou Jihova na avọ igogo, ekpata-ifi, gbe ekpata,+ wọhọ epaọ ujaje Devidi+ gbe orọ Gad+ ọruẹ-ude ovie na gbe orọ Netan+ ọruẹaro na, keme Jihova họ ọnọ ọ rehọ ẹkwoma eruẹaro riẹ kẹ ujaje na. 26 Ere ahwo Livae na a ro dikihẹ avọ ekwakwa ikporakporo Devidi, yọ izerẹ na i kru egba na.+

27 Hẹzikaya ọ tẹ ta nọ a dhe idhe emahọ na evaọ ehru agbada-idhe na.+ Nọ a mu idhe emahọ na họ edhe no, a te mu ole họ ẹso kẹ Jihova, a te je mu egba na họ ekporo, be nya lele oghẹrẹ nọ a bi kporo ekwakwa ikporakporo Devidi ovie Izrẹl na. 28 Ogbotu na soso o te guzou kpotọ nọ a be so ole na yọ egba na i bi do na—enẹ a ru bẹsenọ a ro dhe idhe emahọ na re no. 29 Nọ a nwani dhe idhe na re no, ovie na avọ ahwo nọ a jọ kugbei kpobi a te kigwẹ je kiẹzẹ vovao tuotọ. 30 Kẹsena Hẹzikaya ovie na avọ ikpahwo-esuo na a tẹ ta kẹ ahwo Livae na re a rehọ eme ile Devidi+ gbe erọ Esaf+ ọruẹ-ude na jiri Jihova. Fikiere a tẹ kẹ ujiro avọ oghọghọ ulogbo, a te kigwẹ je kiẹzẹ vovao tuotọ.

31 Kẹsena Hẹzikaya ọ tẹ ta nọ: “Enẹna nọ a salọ owhai* kẹ Jihova no na, wha nyaze re wha rehọ eware nọ a re ro dhe idhe gbe ekẹ uyere-okẹ ziọ uwou Jihova.” Fikiere ogbotu na o te mu eware nọ a re ro dhe idhe gbe ekẹ uyere-okẹ họ ẹrehọ ze, yọ ohwo kpobi nọ o wo udu unevaze ọ rehọ eware idhe emahọ ze.+ 32 Idhe emahọ nọ ogbotu na ọ rehọ ze u bu te iruẹ udhosa-gbikpe, igbo udhusoi (100), imigodẹ ezae egba ivẹ (200)—enana kpobi yọ idhe emahọ kẹ Jihova+— 33 yọ ekẹ ọrẹri na i bu te iruẹ egba ezeza (600) gbe igodẹ idu esa (3,000). 34 Rekọ izerẹ e jariẹ bu tere he nọ i re ku ohọroma erao idhe emahọ na kpobi no, fikiere imoni rai, ahwo Livae na a te fiobọhọ kẹ ae+ bẹsenọ iruo na i ro re, jegbe bẹsenọ izerẹ na i ro ru omarai fo no,+ keme ahwo Livae na họ enọ o mae jọ oja* vi izerẹ na inọ a re ru omarai fo. 35 Ofariẹ, idhe emahọ+ buobu e jariẹ, jegbe iwhri ekẹ erao idhe ọriẹyeri+ na gbe idhe udi rọkẹ idhe emahọ+ na. Ere iruo uwou Jihova e rọ wariẹ muhọ.* 36 Fikiere Hẹzikaya gbe ahwo na kpobi a tẹ ghọghọ fiki oware nọ Ọghẹnẹ uzẹme na o ru kẹ ahwo na,+ keme idudhe eware nana kpobi e rọ via.

30 Hẹzikaya o te vi uwou se Izrẹl+ avọ Juda soso je tube kere ileta se ahwo Ifremu gbe Manasẹ,+ re a nyaze uwou Jihova evaọ Jerusalẹm re a ru ehaa Ọnyavrẹ na kẹ Jihova Ọghẹnẹ Izrẹl.+ 2 Rekọ, ovie na, ikpahwo-esuo riẹ, gbe ogbotu ahwo kpobi nọ a rrọ Jerusalẹm a tẹ jiroro nọ a re ru ehaa Ọnyavrẹ na evaọ amara avọ ivẹ,+ 3 keme a sai ru ei evaọ oke nọ a re ro ru ei hi+ fikinọ izerẹ nọ i ru omarai fo no+ i bu tere he, yọ ahwo na a kokohọ Jerusalẹm gbe he. 4 Ọruẹrẹfihotọ nana u kiehọ evaọ aro ovie na gbe ogbotu* na soso. 5 Fikiere a tẹ jiroro nọ a re woro uzi evaọ Izrẹl soso, no Biẹ-shiba rite Dan,+ inọ ahwo na a nyaze re a ru ehaa Ọnyavrẹ na kẹ Jihova Ọghẹnẹ Izrẹl evaọ Jerusalẹm, keme rite oke yena a ri kokohọ ru ehaa na wọhọ epanọ a kere fihotọ họ.+

6 Kẹsena ewhovuẹ* na e tẹ nya Izrẹl avọ Juda soso duwu avọ ileta nọ ovie na avọ ikpahwo-esuo riẹ a kere na, wọhọ epanọ ovie na ọ kẹ ujaje, yọ a be ta nọ: “Whai ahwo Izrẹl, wha zihe bru Jihova Ọghẹnẹ Abraham, Aiziki, gbe Izrẹl ze, re ọ ruẹsi zihe bru ikiọkotọ nọ e va ivie Asiria+ abọ. 7 Wha du jọ wọhọ esẹ-esẹ rai avọ inievo rai hi, enọ e nyasiọ Jihova Ọghẹnẹ esẹ-esẹ rai ba, onọ o wha riẹ ze nọ o ro ru ai fihọ oware idudu, nwane wọhọ epanọ wha be ruẹ na.+ 8 Wha du wo udu ogaga wọhọ esẹ-esẹ rai hi.+ Wha romakẹ Jihova re wha nyaze aruẹri+ riẹ nọ o ru fo bẹdẹ bẹdẹ no jẹ gọ Jihova Ọghẹnẹ rai, re ọ ruẹse siọ ofu ọgaga nọ o bi mu kẹ owhai na ba.+ 9 Keme nọ wha te zihe bru Jihova, enọ i mu imoni rai avọ emezae rai+ a ti wo ohrọ kẹ ae, a vẹ te kẹ ae uvẹ zihe ziọ ẹkwotọ nana,+ keme Jihova Ọghẹnẹ rai o wo ọdawẹ* avọ ohrọ-oriọ,+ yọ o ti ku ovao riẹ kufiẹ siọ owhai ba ha otẹrọnọ wha te zihe bru ei.”+

10 Fikiere ewhovuẹ* na i te no okpẹwho ruọ okpẹwho evaọ ẹkwotọ Ifremu gbe Manasẹ+ soso, je rite obọ Zẹbulọn dede, rekọ ahwo na a jẹ rehọ ae jijehwẹ, yọ a bi se ae ẹkoko.+ 11 Rekọ ahwo jọ evaọ orua Asha, Manasẹ, gbe Zẹbulọn a hrẹ omarai kpotọ a tẹ ziọ Jerusalẹm.+ 12 Obọ Ọghẹnẹ uzẹme na o tẹ jẹ jọ Juda re o ru ai jọ okugbe ọvo* nọ a re ro ru oware nọ ovie na avọ ikpahwo-esuo na a jie uzi riẹ wọhọ epaọ ẹme Jihova.

13 Ogbotu ahwo buobu a te kokohọ Jerusalẹm re a ru Ehaa Ebrẹdi nọ Ọ Kare Ẹvi+ na evaọ amara avọ ivẹ+ na; ahwo nọ a kokohọ a jọ buobu gaga. 14 A tẹ kparoma, a te si egbada-idhe nọ e jọ Jerusalẹm no,+ a te si egbada-idhe insẹnse+ na kpobi no, a te gbolo ai fihọ Ukiekpotọ Kidrọn. 15 Kẹsena a te kpe arao idhe Ọnyavrẹ na evaọ ẹdẹ avọ ikpegbene amara avọ ivẹ na. Oma o tẹ vuọ izerẹ na avọ ahwo Livae na, fikiere a te ru omarai fo jẹ rehọ idhe emahọ ziọ uwou Jihova. 16 A te dikihẹ ọvuọ oria riẹ nọ a rẹ jọ vẹre, wọhọ epaọ Uzi Mosis ohwo Ọghẹnẹ uzẹme na; kẹsena izerẹ na e tẹ frẹ azẹ+ nọ ahwo Livae na a wọ kẹ ae fihọ ehru agbada-idhe na. 17 Ahwo buobu a jọ ogbotu na nọ a ri ru omarai fo ho, yọ ahwo Livae na họ enọ i je kpe erao idhe Ọnyavrẹ na rọkẹ ahwo kpobi nọ a fo ho,+ re a ru ai fo kẹ Jihova. 18 Keme ahwo na buobu, maero enọ i no orua Ifremu, Manasẹ,+ Isaka, gbe Zẹbulọn ze a ri ru omarai fo ho, rekọ a re emu Ọnyavrẹ na ghele, onọ o wọso oware nọ a kere fihotọ. Rekọ Hẹzikaya ọ tẹ lẹ kẹ ae, inọ: “Jọ Jihova, ọnọ ọ rrọ wowoma na,+ ọ rọvrẹ 19 ohwo kpobi nọ ọ ruẹrẹ udu riẹ họ nọ ọ rẹ kiẹ gwọlọ Ọghẹnẹ uzẹme na,+ Jihova, Ọghẹnẹ esẹ-esẹ riẹ, dede nọ a ri ru ei fo ho wọhọ epanọ uzi ọrẹri nọ a rẹ jọ o gwọlọ.”+ 20 Jihova ọ tẹ gaviezọ kẹ Hẹzikaya, ọ tẹ rọvrẹ* ahwo na.

21 Fikiere ahwo Izrẹl nọ a jọ Jerusalẹm a te ru Ehaa Ebrẹdi nọ Ọ Kare Ẹvi+ na edẹ ihrẹ avọ oghọghọ ulogbo,+ yọ ahwo Livae na avọ izerẹ na a je jiri Jihova kẹdẹ kẹdẹ, je kporo ekwakwa ikporakporo rai ruarua kẹ Jihova.+ 22 Ofariẹ, Hẹzikaya ọ ta ẹme kẹ jẹ tuduhọ* ahwo Livae kpobi nọ a jẹ rọ areghẹ ru eware evaọ egagọ Jihova. Yọ a re emu evaọ etoke ehaa na soso evaọ edẹ ihrẹ,+ bi dhe idhe ọriẹyeri,+ je bi yere Jihova Ọghẹnẹ esẹ-esẹ rai.

23 Kẹsena ogbotu na kpobi a tẹ jiroro nọ a rẹ rọ edẹ ihrẹ efa ro ru ehaa na, fikiere a tẹ rọ edẹ ihrẹ efa ru ehaa na avọ oghọghọ.+ 24 Hẹzikaya ovie na ọ tẹ zọhọ iruẹ odu ọvo (1,000) gbe igodẹ idu ihrẹ (7,000) kẹ ogbotu na, ikpahwo-esuo na e tẹ zọhọ iruẹ odu ọvo (1,000) gbe igodẹ idu ikpe (10,000)+ kẹ ogbotu na; yọ izerẹ buobu i je ru omarai fo.+ 25 Ogbotu ahwo Juda na kpobi, izerẹ na, ahwo Livae na, ogbotu ahwo kpobi nọ a no Izrẹl ze,+ gbe erara+ nọ i no ẹkwotọ Izrẹl ze avọ enọ e be rria Juda a tẹ gbẹ jẹ ghọghọ. 26 Oghọghọ ulogbo o jọ Jerusalẹm, keme no oke Solomọn ọmọzae Devidi ovie Izrẹl ze, oware utiona ovo o re via evaọ Jerusalẹm ho.+ 27 Ukuhọ riẹ, izerẹ na nọ e rrọ ahwo Livae e tẹ kpama, a tẹ lẹ ẹro eghale kẹ ahwo na;+ Ọghẹnẹ o yo urru rai, yọ olẹ rai u te oria ọrẹri riẹ nọ ọ be rria, obọ idhiwu na.

31 Nọ a nwani ru eware nana kpobi no, ahwo Izrẹl kpobi nọ a jariẹ a tẹ nya kpohọ ikpewho Juda, a te kporo ipila ọrẹri+ na, ko ekpọ ọrẹri*+ na fihọ otọ, je kporo eria ikpehru+ na avọ egbada-idhe+ nọ e jọ Juda gbe Bẹnjamin soso fihọ otọ, jegbe enọ e jọ Ifremu avọ Manasẹ,+ bẹsenọ a rọ raha ai muotọ. Nọ a ru ere no, ahwo Izrẹl na kpobi a te zihe kpo, kpohọ ọvuọ okpẹwho riẹ nọ a jẹ rria.

2 Kẹsena Hẹzikaya o te fi izerẹ na họ itu rai+ je fi ahwo Livae na họ itu rai,+ o fi itu izerẹ na avọ ahwo Livae na ọvuọvo họ rọkẹ iruo rai,+ rọkẹ idhe emahọ na gbe idhe ọriẹyeri na, re a gbodibo jẹ kẹ uyere gbe ujiro evaọ inuethẹ ighẹ* uwou Jihova na.+ 3 A jọ eware obọ ovie na rehọ ejọ ze rọkẹ idhe emahọ+ na, te idhe ohiohiẹ te erọ owọwọ+ na, jegbe idhe emahọ nọ a re dhe evaọ Edijala+ na, ehaa ọvẹre ọkpokpọ+ na, gbe ehaa sa-sa+ na, wọhọ epanọ a kere fihọ Uzi Jihova.

4 Ofariẹ, o jie uzi kẹ ahwo nọ a jẹ rria Jerusalẹm re a kẹ izerẹ na gbe ahwo Livae+ na ẹkẹ nọ u fo nọ a rẹ kẹ ae, re a ruẹsi ru oware kpobi nọ o rrọ* uzi Jihova. 5 Nọ ọ nwani jie uzi na no, ahwo Izrẹl na a tẹ rehọ ibi ọsosuọ ekakọ, enwaene ọkpokpọ, ewhri,+ gbe ọnyọ buobu ze, jegbe eware kpobi nọ a jọ idhu vu;+ a rehọ abọvo abakpe ọrọ oware kpobi ze buobu.+ 6 Yọ ahwo Izrẹl gbe ahwo Juda nọ a jẹ rria ikpewho Juda a rehọ abọvo abakpe ọrọ iruẹ avọ igodẹ ze re, jegbe abọvo abakpe ọrọ eware ọrẹri+ nọ a rọ kẹ Jihova Ọghẹnẹ rai. A rehọ e rai ze, a te fi ae họ ekueko buobu. 7 Evaọ amara avọ esa+ a te mu eware nọ a zọhọ ze họ ekokohọ ekueko; evaọ amara avọ ihrẹ,+ a te koko ae họ re. 8 Nọ Hẹzikaya avọ ikpahwo-esuo na a nyaze jẹ ruẹ eware nọ a kokohọ ekueko na, a te jiri Jihova jẹ lẹ ẹro eghale kẹ ahwo riẹ Izrẹl.

9 Hẹzikaya ọ tẹ nọ izerẹ na avọ ahwo Livae na kpahe eware nọ a kokohọ ekueko na, 10 Azaraya olori izerẹ na nọ ọ rrọ ohwo unuwou Zedọk ọ tẹ ta kẹe nọ: “No anwọ oke nọ a ro mu eware họ ẹzọhọ ziọ uwou Jihova+ na, ahwo na a be re eva vọ, yọ i gbe kiọkọ buobu, keme Jihova ọ ghale ahwo riẹ no, ibuobu nana kpobi i te gbe kiọkọ.”+

11 Fikiere Hẹzikaya ọ tẹ ta kẹ ae nọ a jọ uwou Jihova ruẹrẹ ibriwou nọ a rẹ jọ sẹro eware*+ họ, a tẹ ruẹrẹ ae họ. 12 A tẹ gbẹ jẹ rehọ eware azọhọ na, abọvo abakpe+ na, gbe eware ọrẹri na ze ẹsikpobi; Kọnanaya ohwo Livae na a fihọ re ọ rẹrote eware nana kpobi, Shimia oniọvo riẹ ọ rọ kẹle iẹe. 13 Jehayẹl, Azazaya, Nehat, Asahẹl, Jerimọt, Jozebad, Iliọ, Ismakaya, Mehat, gbe Benaya họ enọ e jọ ethabọ Kọnanaya avọ Shimia oniọvo riẹ, wọhọ epanọ Hẹzikaya ovie na ọ ta, yọ Azaraya ọ jẹ rẹrote uwou Ọghẹnẹ uzẹme na. 14 Kore ọmọzae Imnah ohwo Livae na nọ ọ jọ orou-unuẹthẹ* evaọ ofẹ ovatha-ọre+ na ọ jọ ọnọ ọ jẹ rẹrote ekẹ unevaze+ Ọghẹnẹ uzẹme na, yọ ọ jẹ ghale eware nọ a zọhọ ze kẹ Jihova+ na gbe eware nọ e mae rrọ ọrẹri na.+ 15 Yọ ahwo nọ a jọ otọ riẹ họ, Idẹn, Menayamin, Jeshua, Shimaya, Amaraya, gbe Shẹkenaya, ikpewho izerẹ na+ a jọ, oria nọ a jẹ jọ ru iruo nọ e gwọlọ ahwo nọ a re fievahọ na, re a ghale emu kẹ imoni rai nọ e rrọ itu+ na ẹrẹrẹe, te ologbo te ọsese. 16 U te no oyena no, a jẹ ghale emu kẹ emezae nọ e rrọ umuo ikpe esa kpohọ ehru nọ a kere fihọ okerefihotọ othotha uyẹ na, enọ e rẹ nyaze kẹdẹ kẹdẹ ti ru iruo evaọ uwou Jihova je ru iruo nọ a kẹ itu rai.

17 A kere edẹ izerẹ na fihọ okerefihotọ othotha uyẹ na lele inuwou abọ ọsẹ rai,+ wọhọ epanọ a kere ahwo Livae nọ e jọ umuo ikpe udhe kpohọ ehru,+ lele iruo nọ a kẹ itu rai.+ 18 Ahwo nọ a kere fihọ okerefihotọ othotha uyẹ na re họ, emọ rai, eyae rai, emezae rai, gbe emetẹ rai kpobi, koyehọ ogbotu na soso—keme a ru omarai fo rọkẹ oware nọ o rrọ ọrẹri fiki iruo rai nọ e gwọlọ ahwo nọ a re fievahọ— 19 jegbe ahwo uyẹ Erọn, izerẹ nọ e jẹ rria etọ nọ erao e rẹ jọ re ẹbe nọ e wariẹ ikpewho rai họ.+ A jọ ikpewho na kpobi fodẹ edẹ ezae jọ nọ a salọ re a rehọ emu kẹ ọzae kpobi evaọ usu izerẹ na gbe ohwo kpobi nọ a kere odẹ riẹ fihọ okerefihotọ othotha uyẹ ahwo Livae na.

20 Hẹzikaya o ru onana evaọ Juda soso, yọ ọ ruabọhọ je ru oware nọ u woma je kiehọ evaọ aro Jihova Ọghẹnẹ riẹ, ọ nyase iẹe ba ha. 21 Yọ iruo kpobi nọ o ru re ọ kiẹ gwọlọ Ọghẹnẹ riẹ, te enọ i wobọ kugbe iruo uwou Ọghẹnẹ uzẹme na,+ hayo ekoko Uzi na gbe ujaje na, ọ rehọ udu riẹ kpobi ru ai, yọ eware e riẹ nya kẹe.

32 Nọ eware nana gbe iruẹru ọtẹruo+ nana e vrẹ no, Senakẹrib ovie Asiria ọ tẹ wọ ohọre ziọ Juda. O te ko ikpewho nọ a di ogba wariẹ* na họ, ọ gwọlọ nọ o re kporo ai ruọ eva re o fi ae kparobọ.+

2 Nọ Hẹzikaya ọ ruẹ nọ Senakẹrib ọ wọ ze no jẹ gwọlọ nọ o re lele Jerusalẹm fi ẹmo, 3 Hẹzikaya ọ tẹ jiroro nọ o re bru iyeri-ame nọ e rrọ otafe okpẹwho na+ dhe nọ o lele ikpahwo-esuo na avọ egbaẹmo na gba ẹgwae no, yọ a rọwo nọ a rẹ thae uke. 4 A te koko ahwo buobu họ, a te bru iyeri-ame kpobi gbe oko-ame nọ o je su nya ẹkwotọ na vrẹ dhe, be ta nọ: “Fikieme ivie Asiria a rẹ rọ nyaze a vẹ ruẹ ame buobu?”

5 U no ere no, ọ rọ udu dhe, ọ tẹ wariẹ ma ugbẹhẹ nọ u kporo fihọ otọ na kpobi jẹ bọ iwou ikpehru fihọ iẹe, ọ tẹ ma ugbẹhẹ ofa fihọ obọ otafe. Ọ tẹ jẹ ruẹrẹ Ukpehru*+ nọ o jọ Okpẹwho Devidi na, o te je ru ekwakwa ẹmo gbe ejese buobu. 6 Kẹsena ọ tẹ rehọ iletu egbaẹmo mu nọ i wuzou ahwo na, o te koko ahwo na họ oko-ore nọ o rrọ obọ unuẹthẹ okpẹwho na jẹ tuduhọ ae awọ,* ọ ta nọ: 7 “Wha wo udu je kru oma ga. Jọ ozọ u mu owhai hi hayo wha guegue he fiki ovie Asiria+ avọ ogbotu ahwo kpobi nọ a rrọ kugbei, keme ahwo nọ a rrọ kugbe omai a bu vi enọ e rrọ kugbei.+ 8 Ugbobọ ohwo-akpọ gheghe o rrọ kugbei,* rekọ Jihova Ọghẹnẹ mai ọ rrọ kugbe omai re o fiobọhọ kẹ omai je fi emo mai kẹ omai.”+ Eme nọ Hẹzikaya ovie Juda ọ ta na e tẹ bọ ahwo na ga.+

9 Nọ onana o vrẹ no, nọ Senakẹrib ovie Asiria ọ jọ obọ Lekish+ avọ egbaẹmo riẹ kpobi,* o te vi idibo riẹ kpobọ Jerusalẹm, bru Hẹzikaya ovie Juda avọ ahwo Judia kpobi nọ a rrọ Jerusalẹm,+ inọ:

10 “Enẹ Senakẹrib ovie Asiria ọ ta, ‘Eme wha rẹroso nọ wha gbẹ rọ daji Jerusalẹm nọ a ko họ no?+ 11 Kọ wha gbẹ riẹ nọ Hẹzikaya ọ be viẹ owhai họ jẹ be te rehọ ohọo gbe uruame kpe owhai no, nọ ọ be ta nọ: “Jihova Ọghẹnẹ mai o ti siwi omai no obọ ovie Asiria”?+ 12 Kọ ogbẹrọnọ Hẹzikaya nana ọvona o si eria ikpehru+ Ọghẹnẹ rai* avọ egbada-idhe+ Riẹ no, ọ tẹ ta kẹ Juda avọ Jerusalẹm nọ: “Evaọ aro agbada-idhe ọvuọvo wha rẹ jọ guzou kpotọ, yọ ehru riẹ wha rẹ jọ ru idheidhe rai kuye iwiri”?+ 13 Kọ wha gbẹ riẹ oware nọ mẹ avọ esẹ-esẹ mẹ ma ru ahwo kpobi nọ a rrọ ekwotọ na?+ Kọ eghẹnẹ erẹwho nọ e rrọ ekwotọ na e sai siwi ẹkwotọ rai no obọ mẹ?+ 14 Kọ ọghẹnẹ vẹ evaọ usu eghẹnẹ erẹwho nana kpobi nọ esẹ-esẹ mẹ e raha kufiẹ na ọ sai siwi ahwo riẹ no obọ mẹ, nọ Ọghẹnẹ rai ọ te sai ro siwi owhai no obọ mẹ?+ 15 Enẹna, wha jọ Hẹzikaya ọ viẹ owhai họ hayo su owhai thọ enẹ hẹ!+ Wha fievahọ iẹe he, keme ọghẹnẹ orẹwho hayo uvie ọvo ọ sai siwi ahwo riẹ no obọ mẹ hẹ je no obọ esẹ-esẹ mẹ hẹ. Kabikọ Ọghẹnẹ rai nọ o ti siwi owhai no obọ mẹ!’”+

16 Idibo riẹ e tubẹ mae ta eme iyoma kpahe Jihova Ọghẹnẹ uzẹme na jegbe Hẹzikaya odibo riẹ. 17 O te je kere ileta+ rọ la Jihova Ọghẹnẹ Izrẹl eka,+ jẹ poviẹ ẹe, inọ: “Wọhọ epanọ eghẹnẹ erẹwho nọ e rrọ ekwotọ na e sai siwi ahwo rai no obọ mẹ hẹ na,+ ere ọvona Ọghẹnẹ Hẹzikaya o ti siwi ahwo riẹ no obọ mẹ hẹ.” 18 A tẹ gbẹ jẹ rehọ ẹvẹrẹ ahwo Ju na woro kẹ ahwo Jerusalẹm nọ a jọ ehru ugbẹhẹ na ruarua, re a ru ozọ mu ai je guegue ai, re a ruẹsi fi okpẹwho na kparobọ.+ 19 A ta eme iyoma kpahe Ọghẹnẹ Jerusalẹm evaọ oghẹrẹ ovona nọ a ta kpahe eghẹnẹ ahwo otọakpọ na, enọ e rrọ iruo abọ ahwo. 20 Rekọ Hẹzikaya ovie na avọ Aizaya+ ọmọzae Emọz ọruẹaro na a ruabọhọ jẹ lẹ kpahe onana je bi bo se Ọghẹnẹ nọ ọ rrọ obọ idhiwu na kẹ obufihọ.+

21 Kẹsena Jihova o te vi ukọ-odhiwu ze, o te kpe ọgbaẹmo ọgaga+ kpobi, osu kpobi, gbe oletu kpobi nọ ọ jọ evuẹ ovie Asiria na no, onọ u ru nọ ovie na o ro zihe kpobọ ẹkwotọ riẹ avọ omovuọ. Uwhremu na ọ tẹ ruọ eva uwou* ọghẹnẹ riẹ, emezae obọriẹ jọ e tẹ jọ etẹe rehọ ọgbọdọ duwu iei kpe fihọ otọ.+ 22 Ere Jihova o ro siwi Hẹzikaya avọ ahwo nọ a be rria Jerusalẹm no obọ Senakẹrib ovie Asiria je no obọ amọfa kpobi, ọ tẹ kẹ ae omofọwẹ evaọ ofẹ kpobi. 23 Yọ ahwo buobu a rehọ ekẹ se Jihova evaọ Jerusalẹm, a tẹ jẹ rehọ emamọ eware se Hẹzikaya ovie Juda,+ erẹwho na kpobi e tẹ jẹ kẹe adhẹẹ gaga nọ oyena o vrẹ no.

24 Evaọ edẹ yena, ẹyao o te kie Hẹzikaya te epanọ o ro te uwhu no, ọ tẹ lẹ se Jihova,+ ọnọ ọ kẹ riẹ uyo, ọ tẹ jẹ kẹe oka.+ 25 Rekọ Hẹzikaya o ru oware nọ u dhesẹ nọ ewoma nọ a ru kẹe na o da riẹ ẹro ho, keme omorro o tẹ te ruọ udu riẹ, onọ o lẹliẹ Ọghẹnẹ dha eva kẹe avọ Juda gbe Jerusalẹm. 26 Rekọ Hẹzikaya o te hrẹ udu omorro riẹ kpotọ,+ tei te ahwo nọ a be rria Jerusalẹm, Jihova ọ gbẹ dha eva kẹ ae evaọ oke Hẹzikaya ha.+

27 Hẹzikaya o te ti wo efe buobu gbe oruaro gaga;+ ọ tẹ bọ iwou nọ a rẹ jọ sẹro* eware+ kẹ omariẹ nọ a re fi isiliva, igoru, itho eghaghae, ewhri balsam, ejese, gbe ekwakwa aghae na kpobi họ. 28 Ọ tẹ jẹ bọ eria nọ a rẹ jọ sẹro* eware rọkẹ ibi ekakọ gbe enwaene ọkpokpọ avọ ewhri, jegbe ibriwou-erao rọkẹ oghoghẹrẹ erao gbe ibriwou-erao rọkẹ ithuru erao na. 29 Ọ tẹ jẹ bọ ikpewho kẹ omariẹ, je wo erao buobu, ithuru erao buobu, gbe ewa erao buobu, keme Ọghẹnẹ ọ kẹ riẹ eware buobu gaga. 30 Hẹzikaya họ ohwo nọ o bru unu obehru ame+ Gaehọn+ dhe, ọ tẹ kpọ ame na ovavo kpohọ ofẹ ukiediwo-ọre Okpẹwho Devidi,+ yọ iruo kpobi nọ Hẹzikaya o ru e riẹ nya kẹe. 31 Rekọ nọ a vi etota ikpahwo-esuo Babilọn bru ei ze re a nọe kpahe oka+ nọ o romavia evaọ ẹkwotọ na,+ Ọghẹnẹ uzẹme na ọ kẹ riẹ uvẹ re ọye ọvo o ru eware, re ọ dawo iẹe,+ re ọ riẹ eware kpobi nọ e rrọ udu riẹ.+

32 Rọ kpahe iku uzuazọ Hẹzikaya nọ i kiọkọ gbe iruẹru riẹ nọ o ro dhesẹ uyoyou nọ o rẹ hiẹ hẹ,+ a kere i rai fihọ eruẹaruẹ Aizaya+ ọruẹaro na, ọmọzae Emọz, evaọ Obe Ivie Juda gbe erọ Izrẹl.+ 33 Kẹsena Hẹzikaya o te whu wọhọ* esẹ-esẹ riẹ, a te ki ei fihọ oria nọ a rẹ rọ gadiẹ kpohọ eria nọ a ki emezae Devidi fihọ;+ yọ Juda soso gbe ahwo nọ a be rria Jerusalẹm a kẹ riẹ ọghọ evaọ okenọ o whu. Manasẹ ọmọzae riẹ o te zihe ruọ ovie evaọ ẹta riẹ.

33 Ikpe ikpegbivẹ Manasẹ+ ọ jọ nọ o zihe ruọ ovie, yọ ikpe udhuvẹ gbe ikpegbisoi o su evaọ Jerusalẹm.+

2 O ru oware nọ u yoma evaọ aro Jihova, o je lele iruemu etọtọ erẹwho nọ Jihova o le no kẹ ahwo Izrẹl.+ 3 Ọ wariẹ bọ eria ikpehru nọ Hẹzikaya ọsẹ riẹ o kporo fihọ otọ no,+ ọ tẹ jẹ rehọ egbada-idhe vi kẹ edhọ Bale je ru ekpọ ọrẹri,* o je guzou kpotọ kẹ ogbaẹmo obọ idhiwu na kpobi, yọ ọ jẹ gọ ae.+ 4 Ọ tẹ jẹ bọ egbada-idhe fihọ uwou Jihova,+ onọ Jihova ọ ta kpahe nọ: “Evaọ Jerusalẹm odẹ mẹ o te jọ bẹdẹ bẹdẹ.”+ 5 Yọ ọ bọ egbada-idhe kẹ ogbaẹmo obọ idhiwu na kpobi evaọ ighẹ ivẹ nọ e rrọ uwou Jihova+ na. 6 Ọ mahe emezae obọriẹ evaọ erae*+ evaọ Ukiekpotọ Ọmọzae Hinọm;+ o je ru iruẹru emajiki,+ ọ jẹ kiotọ gwọlọ oka eware nọ e te jọ obaro via, ọ jẹ gbẹva, yọ ọ rehọ ahwo nọ a re lele izi ta ẹme gbe enọ e rẹ gbẹva+ mu. O ru eware buobu nọ i yoma evaọ aro Jihova, ro ru ei eva dha.

7 O fi ẹmema nọ ọ kare họ eva uwou Ọghẹnẹ uzẹme na,+ onọ Ọghẹnẹ ọ ta kẹ Devidi gbe Solomọn ọmọzae riẹ kpahe nọ: “Evaọ uwou nana gbe evaọ Jerusalẹm nọ mẹ salọ no erua Izrẹl kpobi ze na, me ti fi odẹ mẹ họ bẹdẹ bẹdẹ.+ 8 Yọ me gbe ti si awọ Izrẹl no ẹkwotọ nọ mẹ rọ kẹ esẹ-esẹ rai na ofa vievie he, thakpinọ a romatotọ ru oware kpobi nọ me jie uzi riẹ kẹ ae, Uzi na soso, ijaje na gbe izi oziẹobro nọ mẹ rọ ẹkwoma Mosis kẹ.” 9 Manasẹ ọ ruabọhọ je su Juda gbe ahwo nọ a be rria Jerusalẹm thọ, o te ru ai nọ a ro ru eware nọ i yoma vi erọ erẹwho nọ Jihova ọ raha no kẹ ahwo Izrẹl.+

10 Jihova ọ tẹ gbẹ jẹ ta ẹme kẹ Manasẹ avọ ahwo riẹ, rekọ a gaviezọ họ.+ 11 Fikiere Jihova ọ tẹ rehọ iletu ogbaẹmo ovie Asiria ze te rọ họre ae, a tẹ jẹ eghọlọ họ Manasẹ ro mu ei,* a tẹ rehọ egbregba ekọpa ivẹ rọ gbae, a tẹ rehọ iẹe kpobọ Babilọn. 12 Evaọ oke uye riẹ, ọ tẹ lẹ Jihova Ọghẹnẹ riẹ kẹ aruoriwo,* yọ o je hrẹ omariẹ kpotọ gaga evaọ aro Ọghẹnẹ esẹ-esẹ riẹ. 13 Ọ ruabọhọ jẹ lẹ se Ọghẹnẹ, ayare ọgaga riẹ o te duobọte Ọghẹnẹ, o te yo ayare riẹ kẹ aruoriwo. Ọghẹnẹ o te zihe iei ziọ uvie riẹ evaọ Jerusalẹm.+ Kẹsena Manasẹ ọ tẹ te riẹ nọ Jihova họ Ọghẹnẹ uzẹme na.+

14 Nọ onana o vrẹ no, ọ tẹ ma ugbẹhẹ otafe fihọ Okpẹwho Devidi+ evaọ ofẹ ukiediwo-ọre Gaehọn+ evaọ ukiekpotọ* na rite ugbo obọ Unuẹthẹ Iyei+ na, ọ ma riẹ wariẹ họ vrẹ rite obọ Ofẹl,+ yọ ọ ma riẹ kpehru gaga. Ofariẹ, ọ rehọ iletu ogbaẹmo mu evaọ ikpewho nọ a di ogba wariẹ họ* na kpobi evaọ Juda. 15 O te si eghẹnẹ erẹwho efa na gbe ẹmema ẹmẹdhọ na no uwou Jihova+ no, jegbe egbada-idhe kpobi nọ ọ bọ fihọ ehru ugbehru uwou Jihova+ gbe evaọ Jerusalẹm na, ọ tẹ ta nọ a gbolo ai fihọ otafe okpẹwho na. 16 Ọ tẹ jẹ ruẹrẹ agbada-idhe Jihova+ họ, o te mu idhe ọriẹyeri+ gbe idhe uyere-okẹ+ họ edhe evaọ ehru riẹ, ọ tẹ ta kẹ ahwo Juda re a gọ Jihova Ọghẹnẹ Izrẹl. 17 O make jọ ere na, ahwo na a gbe je dhe idhe evaọ eria ikpehru na, rekọ Jihova Ọghẹnẹ rai ọvo a je dhe idhe na kẹ.

18 Rọ kpahe iku uzuazọ Manasẹ nọ i kiọkọ, olẹ nọ ọ lẹ se Ọghẹnẹ riẹ, gbe eme eruẹ-ude nọ e rehọ odẹ Jihova Ọghẹnẹ Izrẹl ta ẹme kẹe, a kere i rai fihọ iku ivie Izrẹl. 19 Yọ olẹ riẹ+ gbe epanọ a ro ru oware nọ ọ yare rọ kẹe, izieraha riẹ kpobi avọ oghẹrẹ nọ ọ rọ nyasiọ Ọghẹnẹ ba,+ eria nọ ọ bọ eria ikpehru fihọ jẹ rehọ ekpọ ọrẹri*+ avọ emema nọ a kare ro vi taure o te ti hrẹ omariẹ kpotọ, a kere i rai fihọ usu eme eruẹ-ude riẹ. 20 Kẹsena Manasẹ o te whu wọhọ* esẹ-esẹ riẹ, a te ki ei fihọ uwou riẹ, Amọn ọmọzae riẹ o te zihe ruọ ovie evaọ ẹta riẹ.+

21 Ikpe udhegbivẹ Amọn+ ọ jọ nọ o zihe ruọ ovie, yọ ikpe ivẹ o su evaọ Jerusalẹm.+ 22 Ọ ruabọhọ je ru oware nọ u yoma evaọ aro Jihova, nwane wọhọ epanọ Manasẹ ọsẹ riẹ o ru;+ yọ Amọn o je dhe idhe kẹ emema nọ a kare kpobi nọ Manasẹ ọsẹ riẹ o ru,+ yọ ọ jẹ gọ ae. 23 Rekọ o hrẹ omariẹ kpotọ evaọ aro Jihova ha+ wọhọ epanọ Manasẹ ọsẹ riẹ o hrẹ omariẹ kpotọ;+ ukpoye, Amọn o ru abe-ọriọ riẹ je dhe ẹruẹro gaga. 24 Ukuhọ riẹ, idibo riẹ e tẹ lẹlẹ gba ẹgwae omuomu kpahe iẹe,+ a te kpei evaọ uwou obọriẹ. 25 Rekọ ahwo ẹkwotọ na a te kpe ahwo kpobi nọ a lẹlẹ gba ẹgwae omuomu kpahe Amọn ovie na,+ a tẹ rehọ Josaya+ ọmọzae riẹ mu ovie evaọ ẹta riẹ.

34 Ikpe eree Josaya+ ọ jọ nọ o zihe ruọ ovie, yọ ikpe ọgbagbọvo o su evaọ Jerusalẹm.+ 2 O ru oware nọ u kiehọ evaọ aro Jihova jẹ nya evaọ idhere Devidi ọsẹ-esẹ riẹ, yọ o kpohọ obọze hayo ẹkpẹlobọ họ.

3 Evaọ ukpe avọ eree esuo riẹ, nọ ọ gbẹ jọ ọmọzae, o te mu Ọghẹnẹ Devidi ọsẹ-esẹ riẹ họ ẹkiẹ gwọlọ;+ yọ evaọ ukpe avọ ikpegbivẹ, o te mu eria ikpehru+ na avọ ekpọ ọrẹri* na, emema nọ a kare na, gbe emema ayọno*+ na họ esino Juda gbe Jerusalẹm.+ 4 U no ere no, a kporo egbada-idhe edhọ Bale fihọ otọ evaọ iraro riẹ, yọ ọ gbẹre egbada insẹnse nọ e jọ obehru rai fihọ otọ. Ọ tẹ jẹ gbẹre ekpọ ọrẹri* na, emema nọ a kare na, gbe emema ayọno* na ibribro, o te wuhu ai zihe ruọ ovu, ọ tẹ vravra ovu na fihọ ehru iki ahwo nọ a jẹ hai dhe idhe kẹ ae.+ 5 Ọ tẹ mahe igbenwa izerẹ na evaọ ehru egbada-idhe rai.+ Ere o ro ru Juda avọ Jerusalẹm fo.

6 Yọ evaọ ikpewho Manasẹ, Ifremu,+ Simiọn, je rite obọ ikpewho Naftalae, evaọ eria nọ e wariẹ e rai họ nọ a raha no, 7 o kporo egbada-idhe na fihọ otọ, ọ tẹ guọghọ ekpọ ọrẹri* na avọ emema nọ a kare na,+ o te wuhu ai zihe ruọ ovu; ọ tẹ gbẹre egbada insẹnse kpobi nọ e rrọ ẹkwotọ Izrẹl soso fihọ otọ,+ nọ o ru ere no, o te zihe kpobọ Jerusalẹm.

8 Evaọ ukpe avọ ikpegberee esuo riẹ, nọ o ru ẹkwotọ na avọ etẹmpol* na fo no, o te vi Shefan+ ọmọzae Azalaya, Measaya oletu okpẹwho na, gbe Joah ọmọzae Joahaz, ọnọ o re kere eware fihotọ na re a ruẹrẹ uwou Jihova Ọghẹnẹ riẹ.+ 9 A tẹ nyabru Hilkaya ozerẹ okpehru na ze, a tẹ kẹe igho nọ a rehọ ziọ uwou Ọghẹnẹ na, enọ ahwo Livae nọ a rrọ iriẹthẹ a mi no obọ Manasẹ, Ifremu, gbe ahwo Izrẹl nọ a kiọkọ ze,+ je no obọ Juda, Bẹnjamin, gbe ahwo nọ a be rria Jerusalẹm ze. 10 Kẹsena a tẹ rehọ igho na kẹ enọ a ro mu re a rẹrote iruo nọ a be jọ uwou Jihova ru na. Enọ e be jọ uwou Jihova ru iruo na e tẹ rehọ igho na rọ ruẹrẹ uwou na. 11 A rehọ igho na kẹ ewena na avọ ebebabọ na re a dẹ itho nọ a bru gbe ire nọ a rẹ rọ zuẹ eria, re a jẹ rehọ ire bọ iwou nọ ivie Juda e kuvẹ re e raha kuotọ na.+

12 Yọ ezae na e romatotọ ru iruo na avọ oruọzewọ.+ A rehọ ahwo Livae na, Jehat avọ Obedaya ahwo unuwou Mẹrarae+ gbe Zẹkaraya avọ Mẹshulam ahwo unuwou Kohat+ mu enọ i wuzou rai re a jọ esẹro rai. Yọ ahwo Livae, enọ aikpobi a rrọ ikporo-ile nọ e riẹ ekporo ziezi,+ 13 a jọ enọ i wuzou iruiruo gheghe* na, yọ a jọ esẹro ahwo kpobi nọ a je ru iruo na evaọ oghẹrẹ iruo kpobi; yọ ahwo Livae na jọ a jọ ikere-obe, enọ i wuzou, gbe irou-unuẹthẹ.*+

14 Okenọ a jẹ tọlọ igho nọ a rehọ ze uwou Jihova na lahwe,+ Hilkaya ozerẹ na ọ tẹ ruẹ obe Uzi Jihova+ nọ ọ rehọ ẹkwoma* Mosis kẹ.+ 15 Fikiere Hilkaya ọ tẹ ta kẹ Shefan okere-obe na nọ: “Mẹ ruẹ obe Uzi na no evaọ uwou Jihova.” Hilkaya ọ tẹ rehọ obe na kẹ Shefan. 16 Kẹsena Shefan ọ tẹ rehọ obe na se ovie na, ọ tẹ ta kẹe nọ: “Idibo ra i bi ru oware kpobi nọ a kẹ rai nọ a ru. 17 A ku igho nọ a jọ uwou Jihova ruẹ na lahwe no, yọ a rehọ e rai kẹ ezae nọ a ro mu na gbe enọ i bi ru iruo na no.” 18 Shefan okere-obe na ọ tẹ jẹ vuẹ ovie na nọ: “U wo obe jọ nọ Hilkaya ozerẹ na ọ kẹ omẹ.”+ Kẹsena Shefan o te mu obe na họ ese evaọ aro ovie na.+

19 Nọ ovie na ọ nwani yo eme Uzi na, ọ tẹ bẹre iwu riẹ.+ 20 Kẹsena ovie na ọ tẹ ta ẹme nana kẹ Hilkaya, Ahaekam+ ọmọzae Shefan, Abdọn ọmọzae Maeka, Shefan okere-obe na, gbe Asaya odibo ovie na: 21 “Wha nya, re wha nekpẹ mi Jihova rọkẹ omẹ, jẹ rọkẹ ahwo nọ a kiọkọ evaọ Izrẹl gbe Juda kpahe eme obe nọ a ruẹ na; keme ofu nọ Jihova o ti mu kẹ omai ọ te jọ gaga fikinọ esẹ-esẹ mai i ru lele ẹme Jihova ha, a gbe je koko oware kpobi nọ a kere fihọ obe nana ha.”+

22 Fikiere Hilkaya avọ ahwo nọ ovie na o vi a tẹ nyabru Họlda ọruẹaro-aye+ na. Ọ jọ aye Shalọm ọmọzae Tikva ọmọzae Hahas, ọnọ ọ jẹ rẹrote oria nọ a re fi iwu họ na, yọ aye na ọ jẹ rria Ete avọ Ivẹ Jerusalẹm; a tẹ jọ obei ta ẹme kẹe.+ 23 Ọ tẹ ta kẹ ae nọ: “Enẹ Jihova Ọghẹnẹ Izrẹl ọ ta, ‘Wha ta kẹ ọzae nọ o vi owhai bru omẹ ze na nọ: 24 “Enẹ Jihova ọ ta, ‘Mẹ te rehọ okpẹtu te oria nana gbe ahwo nọ a be rriae,+ iye kpobi nọ a kere fihọ obe+ nọ a se evaọ aro ovie Juda na i ti te ai. 25 Fikinọ a nyasiọ omẹ ba no,+ a te bi ru idheidhe kuye iwiri kẹ eghẹnẹ efa re a rọ iruo abọ rai kpobi ru omẹ eva dha+ na, ofu ọgaga mẹ o ti hwẹ ku oria nana, yọ a te sai furie iei hi.’”+ 26 Rekọ enẹ wha rẹ ta kẹ ovie Juda nọ o vi owhai ze te nekpẹ mi Jihova na, “Enẹ Jihova Ọghẹnẹ Izrẹl ọ ta: ‘Rọ kpahe eme nọ who yo na,+ 27 fikinọ who ru udu ra lọlọhọ na, who te hrẹ omara kpotọ evaọ aro Ọghẹnẹ nọ who yo eme riẹ kpahe oria nana gbe ahwo nọ a be rriae na, who je hrẹ omara kpotọ evaọ aro mẹ jẹ bẹre iwu ra jẹ viẹ evaọ aro mẹ na, me yo olẹ ra no re,+ ere Jihova ọ ta. 28 Oyejabọ nọ me ti ro koko owhẹ họ bru esẹ-esẹ ra na,* a ve ti ki owhẹ fihọ uki ra dhedhẹ, yọ ibiaro ra e te ruẹ okpẹtu kpobi nọ mẹ te rehọ ziọ oria nana gbe ahwo nọ a be rriae na ha.’”’”+

Kẹsena a tẹ nyaze te vuẹ ovie na uyo na. 29 Fikiere ovie na o te vi uwou, o te se ekpako Juda gbe Jerusalẹm kpobi kokohọ.+ 30 Nọ oyena o vrẹ no, ovie na ọ tẹ nya kpobọ uwou Jihova avọ ezae Juda kpobi, ahwo nọ a be rria Jerusalẹm, izerẹ na, ahwo Livae na—ahwo na kpobi, te ilogbo te esese.* O te se eme kpobi nọ e rrọ obe ọvọ nọ a ruẹ evaọ uwou Jihova+ na kẹ ae re a yo. 31 Ovie na o te dikihẹ oria riẹ, ọ tẹ re ọvọ*+ evaọ aro Jihova inọ ọ te rọ udu riẹ kpobi gbe uzuazọ* riẹ kpobi+ lele Jihova je koko ijaje riẹ, ekareghẹhọ riẹ, gbe izi riẹ, ẹkwoma eme ọvọ na nọ a kere fihọ obe nana+ nọ o ti ru lele. 32 U no ere no, o ru ahwo kpobi nọ a jọ Jerusalẹm gbe Bẹnjamin rọwo fihọ ọvọ na. Yọ ahwo nọ a be rria Jerusalẹm a ru lele ọvọ Ọghẹnẹ, Ọghẹnẹ esẹ-esẹ rai.+ 33 Josaya o te si eware etọtọ* na kpobi no ekwotọ kpobi nọ e rrọ erọ ahwo Izrẹl no,+ o te ru ohwo kpobi evaọ Izrẹl jẹ gọ Jihova Ọghẹnẹ rai. Evaọ etoke uzuazọ riẹ kpobi,* a reghe siọ Jihova Ọghẹnẹ esẹ-esẹ rai ba ha.

35 Josaya o ru ehaa Ọnyavrẹ+ kẹ Jihova evaọ Jerusalẹm, a te kpe arao idhe Ọnyavrẹ na+ evaọ ẹdẹ avọ ikpegbene ọrọ amara ọsosuọ na.+ 2 O fi izerẹ na họ iruo rai jẹ tuduhọ ae awọ nọ a ru iruo nọ a kẹ rai evaọ uwou Jihova.+ 3 Kẹsena ọ tẹ ta kẹ ahwo Livae na, enọ i re wuhrẹ ahwo evaọ Izrẹl soso,+ enọ e jọ ọrẹri kẹ Jihova, inọ: “Wha wọ etehe ọvọ ọrẹri na fihọ eva uwou nọ Solomọn ọmọzae Devidi ovie Izrẹl ọ bọ na;+ wha te gbẹ wọe fihọ ikoko rai hi.+ Enẹna wha gbodibo kẹ Jihova Ọghẹnẹ rai avọ ahwo riẹ Izrẹl. 4 Wha ruẹrẹ omarai kpahe lele ọvuọ inuwou abọ ọsẹ rai evaọ itu rai wọhọ epanọ Devidi+ ovie Izrẹl avọ Solomọn ọmọzae riẹ a kere fihotọ.+ 5 Wha dikihẹ oria ọrẹri na itu-itu lele inuwou abọ ọsẹ imoni rai, ahwo nọ a kiọkọ na,* yọ wha re dikihẹ evaọ oghẹrẹ nọ unuwou ovuovo u re ro wo utu unuwou abọ ọsẹ ọrọ ahwo Livae nọ o rẹ gbodibo kẹ ae. 6 Wha kpe arao idhe Ọnyavrẹ+ na je ru omarai fo, wha vẹ ruẹrẹ eware kpahe kẹ imoni rai re a ru lele ẹme Jihova nọ ọ rehọ ẹkwoma Mosis ta.”

7 Josaya ọ zọhọ erao ze kẹ ahwo na, imigodẹ ezae avọ ikri, nọ a re ro dhe idhe Ọnyavrẹ na kẹ ahwo kpobi nọ a jariẹ, erao na i bu te idu ọgba (30,000), jegbe iruẹ idu esa (3,000). Evaọ eware obọ ovie na+ a jọ rehọ enana ze. 8 Ikpahwo-esuo riẹ e tẹ jẹ zọhọ eware ze ro ru unevaze kẹ ahwo na, izerẹ na, gbe ahwo Livae na. Hilkaya,+ Zẹkaraya, gbe Jehayẹl, enọ e rrọ isu uwou Ọghẹnẹ uzẹme na, a rehọ erao idhe Ọnyavrẹ idu ivẹ gbe egba ezeza (2,600) gbe iruẹ egba esa (300) rọ kẹ izerẹ na. 9 Kọnanaya avọ Shimaya gbe Nẹtanẹl inievo-emezae riẹ, jegbe Hashabaya, Jeayẹl, gbe Jozebad, enọ i wuzou ahwo Livae na, a zọhọ erao idhe Ọnyavrẹ idu isoi (5,000) gbe iruẹ egba isoi (500) rọ kẹ ahwo Livae na.

10 Nọ a ruẹrẹ eware kpahe kẹ ehaa na no, izerẹ na i te dikihẹ ọvuọ eria rai, ahwo Livae na a te dikihẹ ọvuọ itu rai,+ wọhọ epanọ ovie na ọ kẹ ujaje na. 11 A te kpe erao idhe Ọnyavrẹ+ na, izerẹ na e tẹ frẹ azẹ nọ a wọ kẹ ae fihọ ehru agbada-idhe na,+ yọ ahwo Livae na a je ku ohọrọ erao na no.+ 12 A ru ere no, a tẹ ruẹrẹ eware idhe emahọ na kpahe re a ruẹse ghale ae kẹ ahwo nọ a kiọkọ, enọ a fihọ itu-itu lele unuwou abọ ọsẹ, re a sae rehọ ae kẹ Jihova wọhọ epanọ a kere fihọ obe Mosis; a te je ru iruẹ na epọvo na. 13 A tẹ jọ erae there* arao idhe Ọnyavrẹ na wọhọ epanọ uruemu na o rrọ;+ a tẹ rehọ epọto, ebẹro, gbe iwho there eware nọ a rọ kẹ ekẹ ọrẹri na, nọ a ru ere no, a tẹ wọ ai se ahwo nọ a kiọkọ na kpobi vẹrẹ vẹrẹ. 14 Kẹsena a tẹ ruẹrẹ eware kpahe kẹ omarai jẹ rọkẹ izerẹ na, keme izerẹ na, ahwo uyẹ Erọn, a je dhe idhe emahọ na gbe ekẹ iwhri erao na rite okenọ oke u ro muhọ ekpo, fikiere ahwo Livae na a tẹ ruẹrẹ eware kpahe kẹ omarai jẹ rọkẹ izerẹ na, ahwo uyẹ Erọn.

15 Yọ eso-ile na, emezae Esaf+ e jọ eria rai wọhọ epaọ ujaje Devidi,+ Esaf,+ Himan, gbe Jedutọn+ ọruẹ-ude ovie na; yọ irou-unuẹthẹ* na e jọ inuethẹ sa-sa na.+ U du gwọlọ nọ a rẹ nyasiọ iruo rai ba ha keme inievo rai, ahwo Livae na a ruẹrẹ eware kpahe kẹ ae no. 16 Ere a rọ ruẹrẹ eware kpobi nọ Jihova ọ gwọlọ mi ai kpahe evaọ ẹdẹ yena nọ a ti ro ru ehaa Ọnyavrẹ+ na je ro dhe idhe emahọ na evaọ agbada-idhe Jihova, wọhọ epanọ Josaya ovie na ọ ta.+

17 Ahwo Izrẹl nọ a jariẹ evaọ oke yena a te ru ehaa Ọnyavrẹ na gbe Ehaa Ebrẹdi nọ Ọ Kare Ẹvi na evaọ edẹ ihrẹ.+ 18 A re jọ Izrẹl ru ehaa Ọnyavrẹ otiọna anwọ oke Samuẹle ọruẹaro na ha; yọ ovie ọvo evaọ usu ivie Izrẹl nọ i kiọkọ o ri ru ehaa Ọnyavrẹ nọ o wọhọ onọ Josaya,+ izerẹ na, ahwo Livae na, ahwo Juda avọ Izrẹl kpobi nọ a jariẹ, gbe ahwo nọ a be rria Jerusalẹm a ru na ha. 19 A ru ehaa Ọnyavrẹ nana evaọ ukpe avọ ikpegberee esuo Josaya.

20 Nọ enana kpobi e vrẹ no, nọ Josaya ọ ruẹrẹ etẹmpol* na họ no, Niko+ ovie Ijipti ọ tẹ wọ ẹmo ziọ Kakẹmish nọ o rrọ akotọ Ethẹ Yufretis. Josaya ọ tẹ wọ nya re ọ họre iẹe.+ 21 Fikiere o te vi enyukọ bru ei, inọ: “Ovẹ u te owhẹ evaọ onana, whẹ ovie Juda? Whẹ mẹ be nyaze te họre nẹnẹ hẹ, rekọ uwou ofa mẹ nyaze te họre, yọ Ọghẹnẹ ọ ta nọ me siawọ. Re u woma kẹ owhẹ, siọ Ọghẹnẹ ba ẹwọso, ọnọ ọ rrọ kugbe omẹ, o gbẹ rrọ ere he, ọ te wha ọraha se owhẹ.” 22 Rekọ Josaya o kuomarẹriẹ se iẹe ba ha, ukpoye o te ru epanọ a gbe ro vuhu iei hi+ re ọ họre iẹe, yọ ọ gaviezọ kẹ eme Niko ho, enọ i no unu Ọghẹnẹ ze. Fikiere ọ tẹ nyaze te họre evaọ Otọ Opraprara Mẹgido.+

23 Enọ e rẹ sa ose e tẹ sa Josaya ovie na, ovie na ọ tẹ ta kẹ idibo riẹ nọ: “Wha wọ omẹ no etenẹ, keme a nwa omẹ oma gaga no.” 24 Fikiere idibo riẹ e tẹ wọe no akẹkẹ riẹ, a tẹ wọe fihọ akẹkẹ ẹmo avọ ivẹ riẹ, a tẹ wọe ziọ Jerusalẹm. Ere o ro whu, a te ki ei fihọ uki esẹ-esẹ riẹ,+ ahwo Juda avọ Jerusalẹm kpobi a te weri Josaya. 25 Jerimaya+ ọ tẹ so ile uweri kpahe Josaya, yọ eso-ile ezae avọ erọ eyae+ na kpobi a gbẹ be so ile kpahe Josaya evaọ ile uweri rai rite ẹdẹ inẹnẹ na; a te jie uzi inọ a rẹ so ile na evaọ Izrẹl, yọ a kere i rai fihọ ebe ile uweri na.

26 Rọ kpahe iku Josaya nọ i kiọkọ gbe iruẹru riẹ nọ ọ jọ dhesẹ uyoyou nọ o rẹ hiẹ hẹ, nọ o ro koko eme nọ a kere fihọ Uzi Jihova, 27 gbe eware nọ o ru, no emuhọ rite ekuhọ, a kere i rai fihọ Obe Ivie Izrẹl gbe erọ Juda.+

36 Kẹsena ahwo ẹkwotọ na a tẹ rehọ Jehoahaz+ ọmọzae Josaya, a tẹ rehọ iẹe mu ovie evaọ Jerusalẹm evaọ ẹta ọsẹ riẹ.+ 2 Ikpe udhegbesa Jehoahaz ọ jọ nọ o zihe ruọ ovie, yọ emerae esa o su evaọ Jerusalẹm. 3 Rekọ ovie Ijipti o te si ei no ovie evaọ Jerusalẹm, o te ho ahwo ẹkwotọ na etalẹnte* isiliva udhusoi (100) gbe etalẹnte igoru+ ọvo. 4 Ofariẹ, ovie Ijipti ọ tẹ rehọ Elayakim oniọvo-ọmọzae Jehoahaz mu ovie Juda avọ Jerusalẹm, o te nwene odẹ riẹ kpohọ Jehoyakim; rekọ Niko+ ọ tẹ rehọ Jehoahaz oniọvo-ọmọzae riẹ kpobọ Ijipti.+

5 Ikpe udhegbisoi Jehoyakim+ ọ jọ nọ o zihe ruọ ovie, yọ ikpe ikpegbọvo o su evaọ Jerusalẹm. Ọ ruabọhọ je ru oware nọ u yoma evaọ aro Jihova Ọghẹnẹ riẹ.+ 6 Nebukadneza+ ovie Babilọn ọ tẹ wọ ohọre bru ei ze re ọ ruẹse rehọ egbregba ekọpa ivẹ gbae re a mu ei vrẹ kpobọ Babilọn.+ 7 Yọ Nebukadneza ọ kwa ekwakwa jọ nọ e jọ uwou Jihova kpobọ Babilọn, o te fi ae họ ighẹ riẹ evaọ obọ Babilọn.+ 8 Rọ kpahe iku uzuazọ Jehoyakim nọ i kiọkọ, eware etọtọ nọ o ru gbe eware iyoma kpobi nọ a ta nọ o ru, a kere i rai fihọ Obe Ivie Izrẹl gbe erọ Juda; Jehoyakin ọmọzae riẹ o te zihe ruọ ovie evaọ ẹta riẹ.+

9 Ikpe ikpegberee Jehoyakin+ ọ jọ nọ o zihe ruọ ovie, yọ emerae esa gbe edẹ ikpe o su evaọ Jerusalẹm; ọ ruabọhọ je ru oware nọ u yoma evaọ aro Jihova.+ 10 Evaọ emuhọ ukpe na,* Nebukadneza ovie na o te vi ahwo re a rehọ iẹe ze obọ Babilọn+ avọ ekwakwa aghae nọ e jọ uwou Jihova.+ Ọ tẹ rehọ Zẹdikaya oniọvo ọsẹ riẹ mu ovie Juda avọ Jerusalẹm.+

11 Ikpe udhegbọvo Zẹdikaya+ ọ jọ nọ o zihe ruọ ovie, yọ ikpe ikpegbọvo o su evaọ Jerusalẹm.+ 12 Ọ ruabọhọ je ru oware nọ u yoma evaọ aro Jihova Ọghẹnẹ riẹ. O hrẹ omariẹ kpotọ evaọ aro Jerimaya+ ọruẹaro na ha, ọnọ ọ ta ẹme nọ Jihova ọ kẹ riẹ udu nọ ọ ta. 13 Ọ tẹ jẹ wọso Nebukadneza+ ovie na, ọnọ ọ gba riẹ họ rehọ Ọghẹnẹ duwu iyei, o te gbe je veghe uzou* je wo udu ogaga, yọ ọ rọwo zihe bru Jihova Ọghẹnẹ Izrẹl he. 14 Enọ i wuzou izerẹ na kpobi jegbe ahwo na a nyasiọ Ọghẹnẹ ba thethabọ, a je ru eware etọtọ kpobi nọ erẹwho na i je ru, a te gbe uwou Jihova+ nọ o ru họ ọrẹri no ku evaọ Jerusalẹm.

15 Jihova Ọghẹnẹ esẹ-esẹ rai ọ ruabọhọ jẹ vẹvẹ ae unu ẹkwoma enyukọ riẹ, o je dhe unuovẹvẹ na ẹwẹwariẹ, keme ohrọ ahwo riẹ gbe oria nọ ọ be rria o jẹ re iẹe. 16 Rekọ a tẹ jẹ rehọ enyukọ Ọghẹnẹ uzẹme na jijehwẹ,+ a tẹ jẹ eme riẹ kufiẹ+ je se eruẹaro riẹ ẹkoko,+ bẹsenọ a rọ vrẹ enọ a re siwi no, ofu ọgaga Jihova o te bru ahwo riẹ ze.+

17 Fikiere ọ tẹ rehọ ovie ahwo Kaldia+ wọso ae, ọnọ ọ rehọ ọgbọdọ+ kpe izoge emezae rai evaọ uwou aruẹri rai;+ o wo ọdawẹ kẹ uzoge ọmọzae hayo ọmọtẹ-kọkọ họ, ọkpako hayo ọnọ oma o ga ha ha.+ Ọghẹnẹ ọ rehọ oware kpobi họ obọ riẹ.+ 18 Ọ kwa ekwakwa kpobi nọ e jọ uwou Ọghẹnẹ uzẹme na, te ologbo te ọsese, jegbe ekwakwa-aghae nọ e jọ uwou Jihova gbe ekwakwa-aghae ovie na avọ ikpahwo-esuo riẹ, ọ kwa oware kpobi ziọ obọ Babilọn.+ 19 Ọ mahe uwou Ọghẹnẹ uzẹme na,+ o kporo ugbẹhẹ Jerusalẹm fihọ otọ,+ ọ rehọ erae mahe iwou ikpehru riẹ nọ e rẹ bẹ ẹvẹruọ, jẹ raha oware kpobi nọ u wo aghare no.+ 20 O mu ahwo nọ a va ọgbọdọ abọ kpobọ Babilọn,+ a te zihe ruọ idibo kẹ ọyomariẹ+ avọ emezae riẹ rite okenọ uvie Pasia u ro muhọ esuo,+ 21 re ẹme Jihova nọ Jerimaya ọ ta o ruẹsi rugba,+ bẹsenọ ẹkwotọ na o rẹ hwosa edijala riẹ no.+ Evaọ edẹ kpobi nọ o rọ jọ ofofe na o je koko ẹdijala, re ikpe udhosa-gbikpe+ e gba.

22 Evaọ ukpe ọsosuọ Sairọs+ ovie Pasia, re ẹme Jihova nọ Jerimaya ọ ta+ o ruẹsi rugba, Jihova o te duobọte udu* Sairọs ovie Pasia re o woro ovuẹ jọ evaọ ẹkwotọ-uvie riẹ soso, onọ a kere fihotọ+ re, inọ: 23 “Enẹ Sairọs ovie Pasia ọ ta, ‘Jihova Ọghẹnẹ obọ idhiwu na ọ kẹ omẹ ekwotọ-ivie kpobi nọ e rrọ otọakpọ na no,+ yọ o vi omẹ nọ mẹ bọ uwou kẹe evaọ Jerusalẹm, onọ o rrọ Juda.+ Ohwo kpobi evaọ udevie rai nọ ọ rrọ omọvo ahwo riẹ, jọ Jihova Ọghẹnẹ riẹ ọ jọ kugbei, re ọ nya kpohọ obei.’”+