ចូរយើងបង្ហាញថាយើងដឹងគុណ ពិធីរំលឹកនឹងត្រូវធ្វើឡើងនៅថ្ងៃទី១៧ ខែមេសា
១. តើអ្នកតែងទំនុកតម្កើងមានអារម្មណ៍យ៉ាងណា? ហេតុអ្វីបានជាសមត្រឹមត្រូវដែលយើងមានអារម្មណ៍បែបនោះជាពិសេសក្នុងអំឡុងខែមីនា មេសានិងឧសភា?
១ ដោយសារព្រះយេហូវ៉ាបានបង្ហាញសេចក្ដីមេត្ដាករុណាជាច្រើនចំពោះអ្នកតែងទំនុកតម្កើងហើយបានសង្គ្រោះគាត់ច្រើនដង នោះបានជំរុញគាត់ឲ្យសួរថា៖ «តើត្រូវឲ្យខ្ញុំយកអ្វីតបស្នងព្រះយេហូវ៉ា ចំពោះព្រះគុណដែលទ្រង់បានផ្ដល់មកខ្ញុំទាំងប៉ុន្មាន?»។ (ទំនុក. ១១៦:១២) សព្វថ្ងៃនេះ មានមូលហេតុច្រើនជាងនោះទៅទៀតដែលអ្នកបម្រើព្រះដឹងគុណលោក។ ច្រើនសតវត្សរ៍បន្ទាប់ពីព្រះយេហូវ៉ាបានដឹកនាំឲ្យសរសេរពាក្យទាំងនេះ នោះលោកបានឲ្យអំណោយដ៏វិសេសវិសាលបំផុតដល់មនុស្សជាតិ ពោលគឺថ្លៃលោះ។ កាលដែលយើងរៀបចំធ្វើពិធីរំលឹកមរណភាពរបស់គ្រិស្តនៅថ្ងៃទី១៧ ខែមេសា យើងមានមូលហេតុត្រឹមត្រូវដើម្បីបង្ហាញថាយើងចេះដឹងគុណ។—កូឡ. ៣:១៥
២. តើយើងទទួលពរអ្វីខ្លះពីថ្លៃលោះ?
២ ពរដែលយើងទទួលពីថ្លៃលោះ: «ការខុសឆ្គងរបស់យើងបានត្រូវអភ័យទោស»តាមរយៈថ្លៃលោះ។ (កូឡ. ១:១៣, ១៤) នេះផ្ដល់លទ្ធភាពឲ្យយើងគោរពប្រណិប័តន៍ព្រះយេហូវ៉ាដោយមានសមត្ថភាពវិនិច្ឆ័យដែលមិនផ្ដន្ទាទោស។ (ហេ. ៩:១៣, ១៤) យើងអាចនិយាយដោយក្លាហានជាមួយនឹងព្រះយេហូវ៉ា ពេលយើងអធិដ្ឋានទៅលោក។ (ហេ. ៤:១៤-១៦) ពួកអ្នកដែលបង្ហាញជំនឿលើថ្លៃលោះមានសេចក្ដីសង្ឃឹមដ៏អស្ចារ្យ គឺពួកគេអាចទទួលជីវិតដែលគ្មានទីបញ្ចប់!—យ៉ូន. ៣:១៦
៣. តើតាមរបៀបណាដែលយើងអាចបង្ហាញថាយើងដឹងគុណព្រះយេហូវ៉ាចំពោះថ្លៃលោះ?
៣ របៀបដែលយើងបង្ហាញការដឹងគុណ: របៀបម្យ៉ាងដែលយើងបង្ហាញការដឹងគុណដ៏ជ្រាលជ្រៅ គឺជារៀងរាល់ថ្ងៃយើងអានអំណានគម្ពីរសម្រាប់ពិធីរំលឹក ហើយរំពឹងគិតអំពីអំណាននោះ។ សៀវភៅតើព្រះគម្ពីរពិតជាបង្រៀនយ៉ាងណា? ទំព័រ៥២-៦៣និងទំព័រ២៣៦-២៣៨ អាចជួយយើងធ្វើដូច្នេះ។ យើងក៏អាចជម្រាបព្រះយេហូវ៉ាដែរតាមរយៈការអធិដ្ឋានអស់ពីចិត្តថា យើងចាត់ទុកថ្លៃលោះជាអ្វីដែលមានតម្លៃវិសេសណាស់។ (១ថែ. ៥:១៧, ១៨) វត្តមានរបស់យើងនៅពិធីរំលឹកតាមបង្គាប់របស់លោកយេស៊ូ បង្ហាញថាយើងចេះដឹងគុណ។ (១កូ. ១១:២៤, ២៥) ម្យ៉ាងទៀត យើងអាចយកតម្រាប់តាមសេចក្ដីស្រឡាញ់ដ៏ធំធេងរបស់ព្រះយេហូវ៉ា ហើយអញ្ជើញមនុស្សឲ្យបានច្រើនបំផុតឲ្យចូលរួមជាមួយនឹងយើង។—អេ. ៥៥:១-៣
៤. តើយើងគួរតាំងចិត្តយ៉ាងណា?
៤ អ្នកបម្រើរបស់ព្រះយេហូវ៉ា ដែលមានចិត្តកតញ្ញូនឹងមិនចាត់ទុកពិធីរំលឹកថាគ្រាន់តែជាកិច្ចប្រជុំមួយទៀតប៉ុណ្ណោះទេ តែជាកិច្ចប្រជុំដែលសំខាន់ជាងគេបំផុតក្នុងមួយឆ្នាំ! កាលដែលពិធីរំលឹកជិតមកដល់ សូមឲ្យយើងតាំងចិត្តដូចអ្នកតែងទំនុកតម្កើងដែលបានសរសេរថា៖ «ព្រលឹងអញអើយ! ចូរសរសើរដល់ព្រះយេហូវ៉ាចុះ ហើយកុំឲ្យភ្លេចបណ្ដាព្រះគុណណាមួយរបស់ទ្រង់ឡើយ»។—ទំនុក. ១០៣:២