សូមត្រឡប់ទៅជួបពួកអ្នកចាប់អារម្មណ៍ ដោយប្រើដំណឹងល្អព្រះរាជាណាចក្រ
១ កំឡុងសប្ដាហ៍ពីរបីមុននេះ យើងមានឯកសិទ្ធិដ៏រីករាយនៃការចែកចាយដំណឹងល្អព្រះរាជាណាចក្រលេខ៣៥ ដែលមានចំណងជើង «តើមនុស្សទាំងអស់នឹងស្រឡាញ់គ្នាទៅវិញទៅមកទេ»? អ្នកផ្សាយគ្រប់កន្លែងខំខ្នះខ្នែង ក្នុងការទៅជួបមនុស្សឲ្យបានច្រើនដោយប្រើដំណឹងល្អព្រះរាជាណាចក្រ។ (ម៉ាថាយ ១០:១១) ថ្វីបើប្រតិបត្ដិការផ្សាយនេះនឹងត្រូវបញ្ចប់ថ្ងៃអាទិត្យទី១៦ ខែវិច្ឆិកាក៏ដោយ ប្រសិនបើនៅមានតំបន់ដែលត្រូវផ្សាយ នោះអ្នកចាស់ទុំអាចសុំអ្នកឲ្យបន្តចែកចាយក្រដាសដំណឹងល្អព្រះរាជាណាចក្រលេខ៣៥ ឲ្យតែនៅមានក្នុងក្រុមជំនុំ។
២ សារនៃដំណឹងល្អព្រះរាជាណាចក្រនេះ បានធ្វើឲ្យមនុស្សជាច្រើនចាប់អារម្មណ៍។ ពួកគេឃើញថា មនុស្សទូទៅបាត់បង់ការស្រឡាញ់តាមធម្មតា ដូច្នេះហើយបានជាគេឆ្ងល់អំពីអនាគត។ (ធីម៉ូថេទី២ ៣:៣) យើងចង់ត្រឡប់ទៅជួបពួកអ្នកដែលចាប់អារម្មណ៍។
៣ ដំណឹងល្អព្រះរាជាណាចក្រមានលទ្ធផល: ក្នុងកំឡុងប្រតិបត្ដិការផ្សាយប្រកាសដំណឹងល្អព្រះរាជាណាចក្រ១៩៩៥ បងស្រីម្នាក់ដែលបានទទួលដំណឹងល្អព្រះរាជាណាចក្រ បានមកកិច្ចប្រជុំនៅសាលព្រះរាជាណាចក្រ ពីព្រោះគាត់ចង់រៀនអំពីជំនឿរបស់ស្មរបន្ទាល់ព្រះយេហូវ៉ាថែមទៀត។ ក្នុងកិច្ចប្រជុំនោះ គាត់បានយល់ព្រមសិក្សាព្រះគម្ពីរ ហើយតាំងពីនោះមក គាត់មិនដែលខានទៅប្រជុំឡើយ។ មិនយូរប៉ុន្មាន គាត់បានសរសេរទៅអតីតសាសនារបស់គាត់ ដើម្បីផ្ដាច់ភាពជាសមាជិករបស់គាត់!
៤ មកដល់ឥឡូវនេះ មនុស្សរាប់រយនាក់នៅតាមតំបន់បានអានសារក្នុងដំណឹងល្អព្រះរាជាណាចក្រលេខ៣៥។ ប៉ុន្តែ តើគេតបឆ្លើយយ៉ាងណាដែរដល់សារនេះ? ថ្វីបើពួកគេមានចិត្តអស្ចារ្យនូវអ្វីៗដែលគេអានក៏ដោយ តែមានភាគច្រើនមិនធ្វើអ្វីសោះ ទាល់តែមានពួកស្មរបន្ទាល់ណាម្នាក់ត្រឡប់ទៅជួបគេម្ដងទៀត។ តើអ្នកមានគម្រោងការណ៍ត្រឡប់ទៅជួបវិញទេ? ការខ្វល់ខ្វាយដ៏ស្រឡាញ់ចំពោះមនុស្សគ្នីគ្នានឹងជំរុញឲ្យយើងត្រឡប់ទៅជួបវិញ។ ហើយយើងគួរត្រឡប់ទៅជួបពួកអ្នកដែលចាប់អារម្មណ៍នឹងដំណឹងល្អព្រះរាជាណាចក្រ។
៥ តើអ្នកនឹងនិយាយអ្វីពេលដែលអ្នកត្រឡប់ទៅជួបវិញ? អ្នកប្រហែលនិយាយអំពីសារក្នុងដំណឹងល្អព្រះរាជាណាចក្រ ដែលមានដ៏ចំពេល ហើយសួរសំនួរដ៏គួរឲ្យចាប់អារម្មណ៍។ សូមខំប្រឹងស្ដាប់កាលដែលម្ចាស់ផ្ទះកំពុងតែនិយាយ ដើម្បីឲ្យអ្នកអាចដឹងនូវអ្វីដែលគាត់ខ្វល់ខ្វាយ។ រួចហើយពន្យល់នូវចំណុចសមគួរក្នុងសៀវភៅស្តើងតម្រូវ ដែលបានផ្សាយជាមួយដំណឹងល្អព្រះរាជាណាចក្រ។ ប្រសិនបើអ្នកមានការជោគជ័យ យកឱកាសចាប់ផ្ដើមការសិក្សាព្រះគម្ពីរភ្លាម។
៦ នេះជារបៀបនិយាយខ្លះៗ ដែលអ្នកអាចសាកល្បងពេលត្រឡប់ទៅជួបពួកអ្នកដែលចាប់អារម្មណ៍នឹង«ដំណឹងល្អព្រះរាជាណាចក្រ»លេខ ៣៥:
▪ «អ្នកប្រហែលនឹកចាំនូវដំណឹងដែលខ្ញុំបានឲ្យដល់អ្នកថ្មីៗនេះ។ សារនេះស្តីអំពីចំណុចដ៏សំខាន់ៗ ដែលធ្វើឲ្យមនុស្សបែកបាក់គ្នាសព្វថ្ងៃនេះ—គឺការខ្វះខាតនៃសេចក្ដីស្រឡាញ់សំរាប់អ្នកដទៃ»។ សូមបង្ហាញភស្តុតាងនៅទំព័រ២នៃដំណឹងល្អព្រះរាជាណាចក្រ ក្រោមចំណងជើង «សេចក្ដីស្រឡាញ់នៃអ្នកជិតខាងរសាយទៅ»។ រួចហើយសួរថា «តើអ្នកគិតថា គឺជាគោលបំណងរបស់ព្រះដើម្បីឲ្យមនុស្សជាតិរស់នៅតាមរបៀបនេះឬ»? សូមអនុញ្ញាតឲ្យគាត់ឆ្លើយ។ បើកទៅមេរៀនទី៥ក្នុងសៀវភៅស្តើងតម្រូវ ហើយសាកល្បងចាប់ផ្ដើមការសិក្សាព្រះគម្ពីរ។
▪ «ពេលដែលយើងបានជួបមុនដំបូង ខ្ញុំបានផ្ដល់ពត៌មានអំពី ‹តើមនុស្សទាំងអស់នឹងស្រឡាញ់គ្នាទៅវិញទៅមកទេ›? តើអ្នកគិតថា អាចមានពិភពលោកបែបនេះទេ»? អនុញ្ញាតឲ្យឆ្លើយ។ បើកទៅមេរៀនទី៦ក្នុងសៀវភៅស្តើងតម្រូវ ហើយអានវគ្គទី៦។ បន្ទាប់មកសូមអានសេចក្ដីសន្យារបស់ព្រះនៅមីកា ៤:៣, ៤។ ប្រសិនបើម្ចាស់ផ្ទះចាប់អារម្មណ៍ នោះផ្ដល់សៀវភៅស្តើងនិងការសិក្សា។
▪ «ពេលដែលខ្ញុំបានជួបអ្នកពីលើកមុន ខ្ញុំបានឲ្យពត៌មានដែលមានចំណងជើង ‹តើមនុស្សទាំងអស់នឹងស្រឡាញ់គ្នាទៅវិញទៅមកទេ›? សារនេះផ្ដល់ការសិក្សាព្រះគម្ពីរដោយឥតគិតថ្លៃ។ ខ្ញុំបានត្រឡប់មកជួបវិញ ដើម្បីបង្ហាញអ្នកនូវជំនួយការសិក្សាដែលយើងប្រើ។ [បង្ហាញសៀវភៅរស់នៅជានិរន្តរ៍] សៀវភៅនេះពន្យល់យ៉ាងច្បាស់ នៅពេលដែលមនុស្សទាំងអស់នឹងស្រឡាញ់គ្នាទៅវិញទៅមក ហើយឆ្លើយសំនួរផ្សេងៗទៀតដែលអ្នកប្រហែលជាឆ្ងល់៖ ហេតុអ្វីបានជាយើងទៅជាចាស់ជរាហើយស្លាប់នោះ? ហេតុអ្វីបានជាព្រះបណ្ដាលឲ្យមានអំពើទុក្ខវេទនា? តើអ្វីបានកើតឡើងដល់ពួកស្លាប់ជាទីស្រឡាញ់របស់យើង? តើអាចឲ្យខ្ញុំបង្ហាញមេរៀនសំរាប់អ្នកបានទេ»? ប្រសិនបើអ្នកម្ចាស់ផ្ទះមិនព្រមទេ សូមសួរគាត់បើគាត់ចង់អានសៀវភៅខ្លួនគាត់។ ប្រសិនបើគាត់ចង់ ឲ្យសៀវភៅមួយក្បាលទៅគាត់ ហើយពន្យល់ថាការសិក្សាព្រះគម្ពីរទូទាំងពិភពលោក គឺគាំទ្រដោយវិភាគទានស្ម័គ្រចិត្ត។ កំណត់ពេលត្រឡប់ទៅជួបវិញ។
៧ កាលដែលផ្សាយដំណឹងល្អព្រះរាជាណាចក្រ លេខ៣៥ក្នុងតំបន់បានសព្វគ្រប់ហើយ យើងអាចប្រើសៀវភៅរស់នៅជានិរន្តរ៍ កំឡុងថ្ងៃដែលនៅសល់។ របៀបនិយាយដ៏ច្រើនសំរាប់សៀវភៅនេះអាចរកឃើញក្នុងកិច្ចបំរើព្រះរាជាណាចក្រយើងពីលើកមុន។
៨ ការចែកចាយដ៏ពិសេសនៃដំណឹងល្អព្រះរាជាណាចក្រ គួរជំរុញឲ្យយើងទាំងអស់គ្នាខំប្រឹងផ្សាយរឹតតែខ្លាំងឡើង។ ដោយមានជំនួយពីព្រះយេហូវ៉ា យើងអាចទុកចិត្តថា ប្រតិបត្ដិការផ្សាយនេះនឹងបានជោគជ័យ ជួយមនុស្សឲ្យឃើញគោលបំណងរបស់ព្រះ ដែលថាមនុស្សទាំងអស់ឲ្យចេះស្រឡាញ់គ្នាទៅវិញទៅមក។ សូមឲ្យព្រះយេហូវ៉ាបន្តផ្ដល់ពរដល់ការខំប្រឹងរបស់យើង កាលដែលយើងត្រឡប់ទៅជួបពួកអ្នកចាប់អារម្មណ៍ក្នុងសារដំណឹងល្អព្រះរាជាណាចក្រ។