ចូរ«ធ្វើល្អដល់មនុស្សទាំងអស់»ចុះ!
១ «ផ្សព្វផ្សាយព្រះបន្ទូលរបស់ព្រះឲ្យបានពេញលេញ» និងចូរ‹ធ្វើការល្អជាបរិបូរ›ចុះ! នេះជាប្រធានអត្ថបទក្នុងសន្លឹកបន្ថែមនៃកិច្ចបំរើព្រះរាជាណាចក្រយើងសំរាប់ខែកុម្ភៈនិងខែមីនា ឆ្នាំ២០០២។ (កូល. ១:២៥, ព.ថ.; ១ធី. ៦:១៨) អត្ថបទទាំងនោះបានលើកទឹកចិត្តយើងឲ្យខិតខំជាបន្ថែម ដើម្បីជួយមនុស្សដែលមានចំណាប់អារម្មណ៍ឲ្យចូលរួមពិធីបុណ្យរំឭក ព្រមទាំងជួយបងប្អូនឥតសកម្មឲ្យមានទំនាក់ទំនងជាមួយក្រុមជំនុំសាជាថ្មីឡើងវិញ ហើយដើម្បីជួយកូនៗនិងសិស្សព្រះគម្ពីររបស់យើងដែលមានលក្ខណៈគ្រប់គ្រាន់ឲ្យចាប់ផ្ដើមផ្សព្វផ្សាយដំណឹងល្អ។ យើងច្បាស់ជាមានលទ្ធផលល្អខ្លះ ដែលមកពីការប្រឹងប្រែងរបស់យើងហើយ មែនទេ? ដូច្នេះ ‹កាលណាយើងមានឱកាស នោះចូរឲ្យយើងបន្តធ្វើការល្អដល់មនុស្សទាំងអស់ចុះ!›។—កា. ៦:១០
២ អញ្ជើញពួកគេឲ្យចូលរួមម្ដងទៀត: នៅប្រទេសកម្ពុជានាឆ្នាំកិច្ចបំរើ២០០១ មនុស្សជាង៣០០នាក់ដែលមិនមែនជាអ្នកផ្សាយដំណឹងល្អនោះ បានចូលរួមពិធីបុណ្យរំឭកដែរ។ ដោយសារវត្តមានរបស់ពួកគេបញ្ជាក់ថា គេមានចំណាប់អារម្មណ៍ខ្លះៗដែរ ដូច្នេះតើយើងត្រូវធ្វើដូចម្ដេចទៀតដើម្បីជំរុញទឹកចិត្តអស់អ្នកដែល«សមទទួលជីវិតជារៀងរហូត» ឲ្យក្លាយជា«អ្នកជឿ»? (កិច្ច. ១៣:៤៨, ព.ថ.) សូមលើកទឹកចិត្តគេឲ្យបន្តមកកិច្ចប្រជុំក្រុមជំនុំឲ្យបានឆាប់បំផុត។
៣ សូមអញ្ជើញអ្នកចាប់អារម្មណ៍ចូលរួមការសិក្សាសៀវភៅតាមក្រុមជំនុំ ដើម្បីរួមការពិគ្រោះដ៏គួរឲ្យចាប់អារម្មណ៍ក្នុងសៀវភៅស្តើងរបៀបទទួលបានជីវិតដ៏គាប់ចិត្ត។ បើគេជាញាតិមិត្តរបស់អ្នក ហើយអ្នកត្រូវបានកំណត់ឲ្យថ្លែងសុន្ទរកថាក្នុងសាលាកិច្ចបំរើព្រះធិបតេយ្យឆាប់ៗនោះ អ្នកអាចអញ្ជើញអ្នកនោះឲ្យមកស្ដាប់សុន្ទរកថារបស់អ្នក។ សូមជំរាបគាត់ជានិច្ចអំពីប្រធានសុន្ទរកថាសាធារណៈដែលត្រូវថ្លែងនាសប្ដាហ៍ខាងមុខ។ (គួរមានកម្មវិធីសំរាប់សុន្ទរកថាសាធារណៈដាក់លើក្ដារពត៌មាន) សូមរិះរកឱកាសបណ្ដុះឲ្យអ្នកនោះមានចិត្តប្រាថ្នាចង់ថ្វាយបង្គំព្រះយេហូវ៉ា។ បើគាត់ពុំមានអ្នកណាក្នុងក្រុមជំនុំកំពុងតែសិក្សាព្រះគម្ពីរជាមួយគាត់ទេ អ្នកក៏អាចសុំសិក្សាព្រះគម្ពីរជាមួយគាត់បានដែរ។
៤ ចូរបន្តលើកទឹកចិត្តបងប្អូនឥតសកម្ម: មនុស្សប៉ុន្មាននាក់ដែលចូលរួមពិធីបុណ្យរំឭក គឺជាមនុស្សដែលបានធ្វើការឧទ្ទិសថ្វាយខ្លួនចំពោះព្រះយេហូវ៉ារួចទៅហើយ។ ក៏ប៉ុន្តែ ក្រោយៗមកពួកគេបានឈប់មានសកម្មភាពក្នុងកិច្ចការផ្សព្វផ្សាយដំណឹងល្អ។ តែប៉ុលបានដាស់តឿនយើងឲ្យ‹ធ្វើការល្អដល់ពួកអ្នកជឿជាដើម›។ (កា. ៦:១០) ហេតុនេះហើយយើងគួរយកចិត្តទុកដាក់ជាចំបងចំពោះបងប្អូនដ៏ឥតសកម្ម។
៥ បងប្អូនខ្លះប្រហែលជាមានសកម្មភាពសាជាថ្មីរួចទៅហើយក្នុងកិច្ចបំរើផ្សាយ ដោយសារការលើកទឹកចិត្តដែលគេបានទទួលពីពួកអ្នកចាស់ទុំនិងបងប្អូនឯទៀតដែរ។ បើពួកអ្នកចាស់ទុំប្រគល់ភារកិច្ចឲ្យអ្នក ជួយអ្នកផ្សាយម្នាក់ឲ្យមានសកម្មភាពឡើងវិញ សូមឲ្យយើងចាំជានិច្ចថា សេចក្ដីស្រឡាញ់របស់អ្នកចំពោះព្រះយេហូវ៉ានិងកិច្ចបំរើផ្សាយនេះ នឹងជួយពង្រឹងឲ្យអ្នកដែលទទួលជំនួយនោះមានទំនុកចិត្តកាន់តែខ្លាំងឡើងទៅលើសមត្ថភាពរបស់ខ្លួន។ សូមជួយបង្ហាញដល់គាត់នូវលក្ខណៈផ្សេងៗនៃកិច្ចការផ្សាយរបស់អ្នក ដើម្បីឲ្យគាត់អាចមានអំណរពេលធ្វើការផ្សព្វផ្សាយនេះ ព្រមទាំងតស៊ូជាបន្ត ហើយទទួលបានប្រសិទ្ធិពរដែលមកពីព្រះយេហូវ៉ា។
៦ ចូរជួយអ្នកផ្សាយថ្មីឲ្យចាប់ផ្ដើមយ៉ាងល្អ: បងស្រីម្នាក់ដែលជាអ្នកចាប់អារម្មណ៍ថ្មីៗគាត់ទទួលស្គាល់ថា ខ្លួនបានរកឃើញអង្គការពិតរបស់ព្រះហើយ នោះគាត់ចង់ចូលរួមកិច្ចបំរើផ្សាយភ្លាមៗ។ ក្រោយពីបងស្រីរៀនអំពីតម្រូវការនានារួចហើយនោះ គាត់មានប្រសាសន៍ថា៖ «មកចាប់ផ្ដើមចុះ!»។ បើសិស្សព្រះគម្ពីរម្នាក់របស់អ្នកបានទទួលការយល់ព្រមហើយឲ្យចាប់ផ្ដើមចូលរួមកិច្ចបំរើផ្សាយ សូមជួយឲ្យគាត់មានស្មារតីចង់«ចាប់ផ្ដើមចុះ!»។ បើធ្វើដូច្នេះនឹងជួយអ្នកផ្សាយថ្មីឲ្យចាក់ឫសមាំ។ សូមជួយឲ្យគាត់បង្កើតទំលាប់រៀបចំនិងចូលរួមកិច្ចបំរើផ្សាយជារៀងរាល់សប្ដាហ៍កុំខាន។
៧ បើអ្នកផ្សាយថ្មីដែលមិនទាន់ទទួលបុណ្យជ្រមុជទឹកនោះជាកូនរបស់អ្នក សូមជួយឲ្យគេជឿនទៅមុខស្របទៅតាមអាយុនិងសមត្ថភាពរបស់គេ។ បើកូនទទួលជំនួយពីមាតាបិតា នោះគេប្រហែលជាអាចសន្ទនាជាមួយអ្នកដទៃ ឬអានព្រះគម្ពីរ និងស្នើផ្ដល់ឧបករណ៍ផ្សាយផ្សេងៗ បែបយ៉ាងណាដែលអ្នកនឹកស្មានមិនដល់។ ពេលផ្សព្វផ្សាយនោះ បើកូនជួបអ្នកណាម្នាក់ដែលមានចំណាប់អារម្មណ៍ សូមបង្ហាត់បង្រៀនកូនឲ្យចេះត្រឡប់ទៅជួបអ្នកចាប់អារម្មណ៍នោះ។
៨ ពង្រីកកិច្ចបំរើផ្សាយរបស់អ្នក: តើកាលៈទេសៈក្នុងជីវិតរបស់អ្នកអនុញ្ញាតឲ្យអ្នកចំរើនម៉ោងផ្សាយបានទេ សូម្បីតែនៅខែបន្ទាប់ពីពិធីបុណ្យរំឭកក៏ដោយនោះ? តើអ្នកអាចបន្ថែមមួយឬពីរម៉ោងលើសពីធម្មតាបានទេ ក្នុងកិច្ចបំរើផ្សាយប្រចាំសប្ដាហ៍របស់អ្នក? តើអ្នកមើលប្រក្រតិទិនឲ្យដឹងពីខែណានៅខាងមុខ ដែលអ្នកអាចធ្វើជាអ្នកត្រួសត្រាយជំនួយម្ដងទៀតបានទេ? ឬក៏តើអ្នកអាចរៀបចំកាលៈទេសៈក្នុងជីវិត ដើម្បីចុះឈ្មោះជាអ្នកបំរើពេញពេលវិញ? ការប្រឹងប្រែងរបស់យើងក្នុងកិច្ចបំរើផ្សាយនេះ ប្រហែលជាអាចជួយមនុស្សណាម្នាក់ឲ្យទទួលស្គាល់នេះជាសេចក្ដីពិត! (កិច្ច. ៨:២៦-៣៩) ពេលសម្លឹងមើលទៅមុខទៀត ចូរឲ្យយើង«ដេញតាមការល្អជាដរាប ដល់គ្នាទៅវិញទៅមក ហើយដល់មនុស្សផងទាំងឡាយដែរ»។—១ថែ. ៥:១៥
[ប្រអប់នៅទំព័រ៣]
ចូរបន្តជួយ:
□✔ ពួកអ្នកដែលបានចូលរួមពិធីបុណ្យរំឭក
□✔ ពួកអ្នកផ្សាយដែលមានសកម្មភាពសាជាថ្មីម្ដងទៀត
□✔ ពួកអ្នកផ្សាយថ្មីដែលមិនទាន់ទទួលបុណ្យជ្រមុជទឹក