Namambo Abantu Babena Kuya Nakuvujilako Mazubo a Bufumu Avula Abena Kukebewa
1 Kala keene ngauzhi wa Yehoba waambijile jimo’mba “bya buneme [byabamumikoka yonse] bakebileta.” (Ha. 2:7) Kyakine tubena kumona kiyukilo kyalufunjisho lwa Lesa byolubena kukwasha mabumba nemabumba kufunda bukine nekwikala kebapopweshi ba Yehoba. Byokibena kusangajikapo kumvwa’mba bantu 8,012 babatizwe muno mu Zambia monkatu mumwaka wamwingilo wa 2001! Pakuba’mba tutwajijile nakukwasha bano bonse bakatataka, twafwainwa ‘kulanguluka pabintu bitumwekela’ kumona kuba’mba tubena kukwasha mwingilo wa Lesa papelela bulume bwetu. (Esakanyaiko na Hagai 1:5.) Lubaji lwetu lwanema lotwingila kutundaikilamo mwingilo wa Lesa lwatwajijila kwikala bukwasho bwakukwasha kushimika mazubo anengela akupopwelamo mabumba akatataka abena kutota Yehoba.
2 Mali a Sosaiti Akushimikilamo Mazubo a Bufumu muno mu Zambia aingila kukila pamyaka isatu. Mumwaka wamwingilo wa 2001, Mazubo a Bufumu 118 ashimikilwe. Kabiji kibena kusangajika bingi pakumona basapwishi byobabena kupana bukwasho bwamali akubwezhapo paano mali abena kutambulwa-tambulwa. Bipwilo bibena kukongola ano mali bibena kubwezha nkongole kuba’mba ano mali abupe obetupa atwajijile kwingijishiwa mumwaka nemwaka mukushimika Mazubo a Bufumu akatataka.
3 Bukwasho Bubena Kubiwa na Bantungi Bampunzha ba Mazubo a Bufumu: Mabumba 16 abantungi Bampunzha ba Mazubo a Bufumu mu Zambia abena kukwasha kushimika Mazubo a Bufumu akatataka nekuwamisha akala. Akwasha kumona pabena kukebewa kushimika Nzubo ya Bufumu yakatataka nangwa kampe kuwamishatu ijipo nekubulañana byafwainwa kubiwa, mpunzha saka ikyangye kupotwa kufika nekimye Nzubo ya Bufumu kyoipwa kushimikwa. Bipwilo byonse pakipwilo pakipwilo biji najibumba jobyatongwelwa.
4 Bamingilo bavula bepana kwingilako mwingilo wakuwamisha Mazubo a Bufumu nekushimika akatataka. Bano bamingilo bepana kwingila mingilo nabiji kupota mpunzha, kulama mapepala apainwapo mpunzha, kumona mapulani moyafwainwa kushimikilwa nekunengezha mutanchi wabipe byakupota. Kabiji bakwasha nekupota bipe byawama pamutengo wafwainwa, kupwisha kwingila mwingilo mutanshi payoyo mpunzha apa bino nekutangijila mwingilo mwine wakushimika. Kwipana kwabo kwauno mutundu kwakwingila bintu bya Bufumu kusanchilwa bingi kabiji kuleta mapesho avula a Yehoba.—Mana. 11:25.
5 Bakulumpe mukipwilo bafwainwa kumonañana nakapitao utangijila Jibumba ja Bantungi umvwe kipwilo kyabo kibena kukeba kuwamisha Nzubo ya Bufumu nangwa kushimika yakatataka. Mamboka? Bakapitao baano mapunzha baji namizhilo yakulondela yakonsha kukwasha bipwilo kimye kitanshi kyobabena kulanguluka kuba byobyo. Kusala mpunzha pakushimikila kwavwangamo bintu byavula kununga pamutengo wakwiipotelamo. Bintu bikwabo byakonsha kunungako nemutengo mwine wakupotelamo yoyo mpunzha, nabiji kubaya kwamwingilo, kufumyapo bintu byakonsha kukozhañana, nangwa biji nabulembe nangwa byabula kufwainwane. Umvwe kipwilo kibena kukeba bukwasho bwamali kumusampi, bakapitao ba Mabumba a Bantungi ba Mazubo a Bufumu Mumpunzha baji namapepala a Byakulomba Mali a Kushimikila Nzubo ya Bufumu kabiji akonsha kukwasha bakulumpe mukipwilo byakwianemba.
6 Ofweshi yamusampi yapana mapulani mwakushimikila Mazubo a Bufumu ku Mabumba a Bantungi ba Mazubo a Bufumu Mumpunzha. Kwingijisha ano mapulani akushimikilamo kukepeshako mitengo kabiji nekipwilo bekishimikila kishimikwa kyawama kyaesakana nayewo mutundu wasalwa kushimikilamo.
7 Mapepala panembwa mali onse atailwepo nebyoaingijishiwe afwainwa kusungwa bulongo. Balongo babena kwingijila pamo na Bantungi ba Mazubo a Bufumu Mumpunzha bakwasha bipwilo kunemba mapepala Abya Kulomba Mali a Kushimikila Nzubo ya Bufumu. Umvwe mwingilo wapwa, Bantungi Bampunzha batuma mabulañano onse ku Musampi pakuba’mba bapitulukemo bulongo mubibelengelo byonse nenkongole byoikalipilwa. Kabiji nabo bashalapo napepala imo panembwa bibelengelo byonse byamali ataiwa pamwingilo yense mutuntulu.
8 Bantu Bakumya Bingi: Kwingila kwamupashi wa Yehoba mubalongo bengila mwingilo wakushimika Mazubo a Bufumu kebusapwishi kubantu. Bipe byakushimikila nzubo imo byapotelwe kukampanyi kamo kabiji panyuma yabyobyo mukulumpe wakampanyi wanembele’mba: “Nkyangye kumonapo bantu byonka byonakuminye pakumona Bakamonyi bakwa Yehoba kimye kyobashimikilenga. Kyajinga kyalusekelo bingi kabiji kyakukumya pakumona kino kintu kabiji nasangalele bingi pakwingilako pacheche. Anweba nebantu benu mwafwainwa kutakaikwa kabiji naketekela namba mukengilangatu bulongo mingilo yenu kulutwe nalwendo.”
9 Pakutunga kukwabo, muntu umo waimejilengako kampanyi kamo kabusulu watuminwe pabimye bimo pamoba asatu kuya nakutanwa pampunzha pajinga mwingilo wakushimika. Waambile’mba: “Nasangalele bingi pakwingila nenu kumpelo yamulungu. Byonalangulukanga pa Bakamonyi bakwa Yehoba byaaluka! Nanchi kechi musapwilatu kunzubo nenzubo konkane. Jajinga jishuko jakwiya nakwingila nenu. Onkao mambo, kukakumyane inge mwammona naiya nakupwila kwenu.”
10 Kimye mwingilo umo wakutunga byoapwile, kineme umo wanembele’mba: “Natundaikilwe bingi pakumona bantu bavula bepana kwingijila pamo kushimika nzubo mukimyetu kicheche. Kekishimikwa kyanengela bingi. Bangikazhi baambilengapo pabyomwikishimikile mukimye kicheche. Ino Nzubo ya Bufumu yakatataka yasangajika bingi bantu mukimasa-masa kyetu, kabiji twasekela bingi pakwiimona pamo nekipwilo kyenu.”
11 Bamwingilo Nebakwabo Babena Kukebewa: Bantungi ba Mazubo a Bufumu Mumpunzha bengijisha bantu baji mubyonka bipwilo bikapwilanga muoo Mazubo a Bufumu akatataka nangwa obawamisha. Kabiji bengijila pamo nenabalongo bakwabo bakonkako, kikatakata bakulumpe nebankwasho mukipwilo kwibafunjisha byakwingila mingilo ijipo. Panyuma yakuyuka mingilo ikebewa Kushimikilamo Nzubo ya Bufumu, bano banabalume bakoma kumupashi kufuma popo bakonsha kuya nakukwasha mwingilo wakushimika Mazubo a Bufumu akwabo akuyoyo mpunzha. Onkao mambo, aba baji mubyobyo bipwilo biji namwingilo Wakushimika Nzubo ya Bufumu bafwainwa kwikala namuchima wakwipana nekwingijila pamo, kechi kulanguluka’mba jibumba jabantungi neboba babena kwingila najo bobonka bafwainwatu kwingila uno mwingilo wakushimika Nzubo yabo ya Bufumu ne. (Ne. 4:6b) Panyuma yakufunda uno mwingilo, balongo bafwainwa kutundaikwa nabutemwe nekuya nakukwasha kushimika Mazubo a Bufumu abipwilo bikwabo bibena kukeba kushimika Nzubo yakatataka nangwa kuwamisha ijipo.—Ne. 5:19; Fili. 2:3, 4.
12 Basapwishi babatizwa bayuka mingilo ibena kukebewa kabiji babula kaneneno mukipwilo, balombwa kwipana kukwasha muuno mwingilo mukatampe. Bonse bayuka mingilo nebabula kuyuka babena kukebewa. Bano balongo bakonsha kutambula mapepala akunemba kumukulumpe utangijila nangwa munembeshi mukipwilo kyabo nekunembapo mwingilo yebayuka nangwa mingilotu ikwabo, nabiji kunengezha kajo, byakwivimbila, kusunga bipe, mwingilo wamaakaunti, nebyakutambula mapepala amizhilo. (Umvwe kipwilo kibena kukeba mapepala avula akwipuzhizhapo uno mwingilo, kyakonsha kuoda kimye kyokibena kuoda mabuku kumusampi.) Kwingila mujino jishinda kimwesha kuba’mba twatemwa bingi bakwetu—balongo betu babwina Kilishitu.—Mat. 7:12; 22:39; Yoa. 13:35.
13 Bepana Kukwasha Basanchilwa Bingi: Kanatu baingilako uno mwingilo Wakushimika Nzubo ya Bufumu, bamo popobayuka kuba’mba nanchi uno mwingilo wabaya bingi. Panyuma yakupwisha kushimika Nzubo ya Bufumu imo, bakulumpe mukipwilo banembele’mba: “Mikambizho yawama yotwatambwilenga kubalongo bamu Bantungi Bampunzha itukwashishe bingi. Umvwe twalanguluka pabyobetutundaikilenga kupichila mukwitutangijila nekwingijila pamo nabene basendwe, kafwako kyotwakonsha kubapone tuvulukatu 1 Petelo 5:2, 3, potutanga mambo a kulama jitanga ‘kwakubula kwijikanjikizha ne, poso na muchima wakifyele, monka mwayila muchima wa Lesa; kechi namambo amali ne, poso na muchima yense; nangwa kwibobila bunkambo abo bobemupa kwibalela ne, poso mwialula anwe bene ke bakumwenako jitanga.’ Bano balongo kyakine kebakumwenako bawama bingi bepana mukwingijila Yehoba. Kimye kyamwingilo wakushimika, pajinga bimye bimo byakukankalwa kubala, balongo baishilenga kufuma mumapunzha mwalepa-lepa kwiya nakwingila, kupana byakwingijisha nebyakwingilako byabo, kubikapo nebipe bikwabo, kwitukwasha kushimika ino Nzubo yetu ya Bufumu yakatataka. Bumpanyi bwabano balongo kimwesho kikatampe kyakumwesha’mba ‘batemwa balongo,’ kabiji kino byokibena kwitukoseshapo netuwa!—1 Pe. 2:17.”
14 Muchima wakwipana nekubambakana kwabalongo umweka byonka byanembele jibumba jimo’mba: “Byokyajingapo kyalusekelo pakumona mabumba abantu bamilaka yapusana-pusana bonse kwingijila pamo mukupopwela Yehoba!” Ee kine, byonka byaamba byambo biji mu Salamo 133:1, 3 amba: “Talai, byo kyawama ne byo kitutokela ku muchima kana balongo ne balongo baikala pamo na muchima umotu!” Mukulumpe umo mukipwilo wingila pamo nabantungi bampunzha wanembele’mba kejishuko jikatampe bingi kwingijila balongo betu bakwabo. Waambile’mba “bipwilo bikoseshiwa bingi pakumona balongo bafuma mwalepa-lepa kwiya nakwibakwashako mumwingilo wabo wakwingijila Yehoba... . Kine, twalenga bwanabwankazhi!”
15 Pakusanchila mwingilo umo waingijiwe pa Nzubo ya Bufumu yakipwilo kimo, utangijila mukipwilo wanembele’mba: “Umvwe twajingatu atwe bene bunke, uno mwingilo inge kechi twamukonshane mambo mukipwilo kyetu mwavula balongo bakikulumpe. Onkao mambo, twimusanchila bingi anweba nebalongo baji nobe anweba boba butemwe bwa Yehoba kabiji babula kukeba kwibumvwatu, bino bakeba nekwibumwesha. Anweba balongo betu: ‘Twajijilai nakwingila mwingilo wawama byonkabye.’ Balongo bavula babena kumwenamo bingi mumingilo yenu kabiji kwakubula nangwa kuzhinaukane ubena kulengela Tata wetu Yehoba kusangalala.” Jibumba jikwabo jabakulumpe mukipwilo janembele’mba: “Twayuka mwingilo mukatampe bavula yebaingila. (File. 21) Bantu babula Bakamonyi mumpunzha baambile’mba ‘Yehoba muji nanji!’”
16 Bupe Bwamali Bunakutwajijila Nakukwasha: Bupe bupanyiwa kukipao kya Mali a Sosaiti Akushimikilamo Mazubo a Bufumu bwakwasha bingi bipwilo kunyumakwe kabiji twaketekela namba bukatwajijila nakukwasha nekulutwe nalwendo. Nanchi Yehoba mwine kechi yempanyi wakila nenyi? (Yako. 1:17) Nangwa kyakuba bulume nemashuko akupainamo mali apusana-pusana, umvwe twatanchika bulongo byakupotapota byetu, twakonsha kwikalako nakajali papelela bulume bwetu kakukwasha mwingilo wakushimika. Bumpanyi bwauno mutundu buletela bingi Yehoba lusekelo, nekukosesha pakatampe balongo betu.
17 Lelo jino “Jibumba jikatampe” jibena kutambwila mambo a Bufumu. “Bya buneme” bibena kukungulukila kunzubo ya Yehoba yakumupashi ne aye ubena ‘kuyuzha nzubo yanji na lukumo.’ (Lum. 7:9; Ha. 2:7) Byonka byajinga Bayudea bamumoba akwa Hagai, twayai tutepo muchima pamwingilo wa Lesa, kukwasha papelela bulume bwetu kushimika Mazubo a Bufumu abena kukebewa. Nangwa kyakuba Mazubo a Bufumu awama avula ashimikwa mumyaka yapitapo, bantu bakivujilakotu. Kutwajijila kwetu nakupanako mali kukipao kya Mali a Sosaiti Akutungila Mazubo a Bufumu kejishinda jimo jawama jakwingijilamo mwingilo wa Lesa.