Minn Kmandant Militari għal ‘Suldat taʼ Kristu’

kif rakkontata minn Mark Lewis

“L-​għodwa t-​tajba, Maestà.” “Wara nofsinhar it-​tajjeb, Eċċellenza.” “Il-​lejla t-​tajba Prim Ministru.” Dawn huma xi modi kif kont insellem bħala pilota u Fizzjal Kmandant taʼ l-​iskwadra VIP tal-​Forza taʼ l-​Ajru Rjali taʼ l-​Awstralja. Kont inkarigat biex inwassal Kapijiet taʼ l-​Istat u dinjitarji tal-​gvern maʼ l-​Awstralja kollha u madwar id-​dinja. Madankollu, issa qed nagħmel xi ħaġa bil-​wisq iktar premjanti. Ħalli nispjega.

TWILIDT fl-​1951 f’Perth, fl-​Awstralja tal-​Punent. Missieri kien fil-​militar. Fl-​età taʼ 15-il sena, isseħibt maʼ klabb tat-​titjir bi glajder. Minn dakinhar bdiet il-​ħajra li nsuq l-​ajruplani, xi ħaġa li tant nieħu gost nagħmel.

Ftit wara, il-​ġenituri tiegħi sseparaw, u l-​familja tagħna sfaxxat fix-​xejn. Il-​fizzjal kmandant taʼ l-​iskwadra taʼ l-​ajruplani tal-​ġlied tal-​Forza taʼ l-​Ajru u l-​familja tiegħu b’qalb tajba stidnuni biex immur noqgħod għandhom sakemm nispiċċa l-​iskola sekondarja. L-​influwenza tiegħu qanqlitni biex insir uffiċjal kadett fl-​Akkademja tal-​Forza taʼ l-​Ajru Rjali taʼ l-​Awstralja.

Iggradwajt u Sirt Pilota

Madwar sitt snin wara, iggradwajt bħala uffiċjal tal-​Forza taʼ l-​Ajru b’lawrja fix-​xjenza u ngħatajt midalja taʼ pilota. L-​ewwel xogħol tiegħi kien jinvolvi li nsuq ajruplani li kienet tuża l-​Forza taʼ l-​Ajru biex tittrasporta tagħmir, provvisti, u nies madwar l-​Awstralja, il-​Paċifiku tan-​Nofsinhar, u l-​Asja tax-​Xlokk. Spiss konna ntiru qalb muntanji għoljin u f’widien fil-​fond fejn konna ninżlu fuq runways miksijin bil-​ħaxix. Kien xogħol perikoluż. L-​iskwadra tagħna tilfet diversi ajruplani u xi nies kapaċi matul dawk is-​snin. Madankollu, il-​missjonijiet tagħna għenu lil uħud li kienu jgħixu f’reġjuni iżolati. Ittrasportajna materjal għall-​bini taʼ pontijiet, buldowżers żgħar biex ikunu jistgħu jinbnew it-​toroq, provvisti taʼ l-​ikel waqt emerġenzi, u gruppi fil-​qasam mediku. Ittrasportajna wkoll nies morda u mweġġgħin f’sitwazzjonijiet t’emerġenza.

Fl-1978, ikkwalifikajt biex ngħallem studenti jsuqu l-​ajruplan u rġajt mort l-​Akkademja tal-​Forza taʼ l-​Ajru sabiex ningħaqad maʼ l-​istaff taʼ l-​għalliema. Hawnhekk erġajt iltqajt maʼ Diane, armla żagħżugħa li kellha tifla taʼ tliet snin. Ir-​raġel taʼ Diane kien fl-​istess klassi miegħi fl-​Akkademja imma iktar tard miet f’aċċident taʼ l-​ajru. Meta tlabtha tiżżewwiġni, hi qaltli li riedet taħsibha ftit l-​ewwel. Ma kinitx ċerta jekk riditx terġaʼ tiżżewweġ pilota.

Sadanittant, aċċettajt l-​inkarigu għal sena bħala assistent (Aide-de-Camp) għall-​Ġeneral-Gvernatur taʼ l-​Awstralja. Il-​ħajja fir-​residenza tal-​Ġeneral-Gvernatur, f’Canberra, għenitni nifhem xi tfisser il-​ħajja politika u kif din kienet tinvolvi sħubija mill-​qrib maʼ l-​awtoritajiet ċivili, militari, u reliġjużi. Meta l-​inkarigu li kelli spiċċa, erġajt bdejt ngħallem studenti jsuqu l-​ajruplan. Jien u Diane żżewwiġna ftit wara, fl-​1980.

Fl-1982, aċċettajt li mmur nistudja għal sentejn mal-​Forza taʼ l-​Ajru taʼ l-​Istati Uniti bħala uffiċjal li jieħu ħsieb is-​sigurtà tal-​kumpanija taʼ l-​ajruplani u bħala investigatur taʼ l-​aċċidenti taʼ l-​ajruplani. Dan sar fuq arranġament li student mill-​Istati Uniti jintbagħat jistudja l-​Awstralja. Dan ix-​xogħol irrikjeda li nivvjaġġa madwar l-​Istati Uniti u saħansitra sa l-​Irlanda taʼ Fuq. Kelli ninvestiga aċċidenti taʼ l-​ajruplani u nevalwa l-​mod kif inhu disinjat ajruplan u l-​operazzjonijiet tat-​titjiriet bl-​iskop li titjieb is-​sigurtà.

Lura l-​Awstralja

Wara li mort lura l-​Awstralja, il-​familja tagħna żdiedet għal erbgħa meta twieldet it-​tifla tagħna Kerry. Minħabba li kelli ħafna xogħol, Diane kellha tagħmilha kemm t’omm u kemm taʼ missier għat-​tfal tagħna, u l-​ħajja tal-​familja batiet. Tliet snin wara, irċivejt l-​ewwel ħatra tiegħi bħala kmandant—fl-​iskwadra VIP tal-​Forza taʼ l-​Ajru li semmejt qabel. Meta faqqgħet il-​Gwerra tal-​Golf Persjan fl-​1991, l-​iskwadra tiegħi appoġġat l-​operazzjoni tal-​ĠM u mbagħad oħrajn fil-​Pakistan, fl-​Afganistan, fl-​Afrika, u f’Iżrael.

Fl-1992, ilħaqt uffiċjal militari li jassisti l-​Kap tal-​Forza tad-​Difiża. Minħabba li kont l-​assistent persunali taʼ l-​iktar kmandant militari b’pożizzjoni għolja fl-​Awstralja sirt naf iktar mill-​qrib ir-​relazzjoni li hemm bejn il-​militar, il-​politika, u l-​ĠM. Wasalt għall-​konklużjoni li l-​ĠM kienet difettuża f’ħafna modi. Madankollu, kien jidher li kienet l-​unika tama għal dinja aħjar. Imbagħad ċerti affarijiet li seħħew fil-​familja tiegħi ġegħluni nerġaʼ nevalwa l-​opinjoni tiegħi.

Il-​Mistoqsijiet taʼ Diane Jitwieġbu

Wara li miet l-​ewwel raġel tagħha, Diane, li kienet Kattolika Rumana, fittxet it-​tweġibiet għall-​mistoqsijiet tagħha, imma kien kollu għal xejn. Iżda l-​affarijiet komplew jiggravaw meta t-​tifla l-​kbira tagħna Renee bdiet tinteressa ruħha fl-​okkult. Waqt li kienet għand ħabiba tagħha, Diane nnotat ħarġa taʼ l-​Awake! li kienet qed tħabbar li kien se joħroġ artiklu fuq is-​Sataniżmu.a Qatt ma kienet rat l-​Awake! qabel. Waqt li kienet sejra lura d-​dar hi bdiet taħseb, ‘Kif se nikseb din il-​ħarġa?’

Tlett ijiem wara ġew għandna x-​Xhieda taʼ Ġeħova u Diane kisbet ir-​rivista li xtaqet. Iktar tard, hi aċċettat studju tal-​Bibbja u mbagħad bdiet tattendi l-​laqgħat Kristjani. Kont ferħan għaliha li bdiet tistudja u saħansitra attendejt xi laqgħat magħha, imma ma kontx inħoss il-​bżonn li ninvolvi ruħi. Ma kontx inqis lili nnifsi bħala bniedem reliġjuż. Kont nemmen b’Alla imma rajt wisq ipokrisija biex nieħu r-​reliġjon bis-​serjetà. Per eżempju, ma stajtx nifhem għala l-​kappillani tal-​militar kienu jippridkaw l-​imħabba u l-​paċi imma fl-​istess ħin jappoġġaw il-​gwerra.

Diane kienet tħalli xi kopji tat-​Torri taʼ l-​Għassa u l-​Awake! jiġru mad-​dar apposta biex jien naqrahom. Kont naqra xi wħud minnhom imbagħad kont noqgħod attent li nerġaʼ npoġġihom eżatt fil-​post fejn kienu. Ma kontx irridha taħseb li forsi bdejt ninteressa xi ftit ruħi. Hekk kif l-​għarfien tiegħi dwar il-​Bibbja kiber, kien hemm żewġ skritturi li kienu jġegħluni nitħasseb. Waħda minnhom kienet Rivelazzjoni 19:17, 18, li titkellem dwar għasafar li kienu se jieklu l-​laħam tal-​“kmandanti militari.” L-​oħra kienet Rivelazzjoni 17:3, li ssemmi “bhima salvaġġa lewn l-​iskarlat.” Ix-​Xhieda jqisu lil din il-​bhima bħala s-​simbolu tal-​ĠM, idea li kienet l-​oppost taʼ dak li kont naħseb jien dwar din l-​organizzazzjoni internazzjonali.b Imma pprovajt ninjora l-​mistoqsijiet tiegħi.

Fl-1993, Diane stidnitni nattendi għall-​magħmudija tagħha. It-​talba tagħha ma stennejthiex. Jien staqsejtha: “Li kieku kellek tagħżel, lil min kont tagħżel lil Ġeħova jew lili?” Hi qaltli: “Lil Ġeħova. Imma m’għandix għalfejn nagħżel. Jien lit-​tnejn li intom irridkom f’ħajti.” Dak il-​ħin irrealizzajt li kelli nitgħallem iktar dwar din il-​persuna l-​oħra f’ħajjitha. Anzjan Kristjan mill-​kongregazzjoni lokali offra li jistudja l-​Bibbja miegħi, u jien aċċettajt.

Bdejt ninteressa ħafna ruħi fil-​profeziji tal-​Bibbja, speċjalment meta kienu relatati maʼ l-​istorja militari u politika. Per eżempju, matul it-​taħriġ tiegħi fil-​Forza taʼ l-​Ajru, kont studjajt il-​kisbiet militari tal-​Griegi tal-​qedem. Issa kont qed nitgħallem li ħafna minn dik l-​istorja kienet imniżżla bil-​quddiem sekli qabel f’Danjel kapitlu 8. Din il-​profezija, u oħrajn, bil-​mod il-​mod ikkonvinċewni li l-​Bibbja hija ispirata minn Alla.

Imbagħad eżaminajt mill-​ġdid l-​opinjoni li kelli dwar il-​ĠM. Kont naf li l-​militar ma setax isolvi l-​problemi taʼ l-​umanità, li l-​paċi vera ma setgħetx tiġi mit-​theddida tal-​gwerra, u li l-​ĠM ma setgħetx issolvi il-​firdiet politiċi, reliġjużi, u etniċi li jikkaġunaw il-​gwerer. Bdejt nara li Alla biss setaʼ jsolvi l-​problemi taʼ l-​umanità. Tabilħaqq, kien jidher li diġà qed jagħmel dan fost il-​fratellanza globali tax-​Xhieda taʼ Ġeħova. (Salm 133:1; Isaija 2:2-4) Kont nistaqsi lili nnifsi: ‘Imma nistaʼ jien nitlaq il-​karriera militari tiegħi biex naqdi lil Alla?’

Il-​Waqfa Tiegħi għall-​Verità tal-​Bibbja

Fl-​1994 meta attendejt konvenzjoni distrettwali tax-​Xhieda taʼ Ġeħova f’Sydney rajt li kien wasal iż-​żmien biex nieħu deċiżjoni. Il-​programm inkluda drama Biblika li ġibdet l-​attenzjoni lejn l-​għażla li kellu l-​ġens qadim taʼ Iżrael jekk jaqdix lil Ġeħova jew lil Bagħal, alla tal-​Kangħanin. Elija, il-​profeta taʼ Ġeħova, poġġa din l-​isfida quddiem l-​Iżraelin: “Kemm se ddumu titlajjaw minn naħa għal oħra? Jekk il-​Mulej hu Alla, morru warajh; inkella morru wara Bagħal, jekk inhu hu.” (1 Slaten 18:21) Dan il-​kliem effettwani bil-​kbir. Bħall-​Iżraelin, jien kont għadni ma ħadtx deċiżjoni. Kelli bżonn nagħżel: Kont jien se naqdi lil Ġeħova jew kont se nkompli l-​karriera militari tiegħi?

Hekk kif kont qed insuq lura lejn id-​dar dakinhar fil-​għaxija, għedt lil Diane li kont se nitlaq mill-​Forza taʼ l-​Ajru u se nsir wieħed mix-​Xhieda taʼ Ġeħova. Hi baqgħet mistagħġba li ħadt deċiżjoni f’daqqa waħda imma verament appoġġatni. Ftit tal-​jiem wara d-​deċiżjoni tiegħi kienet għadha ma nbidlitx, u għalhekk tfajt ir-​riżenja tiegħi.

Dak iż-​żmien, kont il-​Fizzjal Kmandant tal-​Korp taʼ l-​Uffiċjali Kadetti fl-​Akkademja tal-​Forza tad-​Difiża taʼ l-​Awstralja f’Canberra, il-​belt kapitali tal-​pajjiż. Kont nieħu ħsieb it-​taħriġ militari u akkademiku taʼ xi 1,300 uffiċjal kadett taʼ l-​Armata, tal-​Flotta, u tal-​Forza taʼ l-​Ajru u l-​istaff. Fl-​aħħar ġurnata tas-​sena akkademika, jien għedt lill-​ġemgħa taʼ 400 kadett li kienu waslu biex jiggradwaw u lill-​istaff, li kont se nitlaq mill-​militar sabiex inkun nistaʼ mmur minn dar għal dar ngħallem lin-​nies il-​Bibbja bħala ministru Kristjan volontier. Din l-​aħbar wasslet għal diversi diskussjonijiet interessanti.

Insir Ministru Full-Time

L-​għada li bdiet tgħodd ir-​riżenja tiegħi bdejt ix-​xogħol taʼ l-​ippridkar. Tliet xhur wara, f’April taʼ l-​1995, tgħammidt. Imbagħad, maʼ l-​ewwel opportunità, bdejt naqdi bħala pijunier regulari, u dan kien ifisser li nqattaʼ l-​ħin kollu tiegħi fil-​ministeru pubbliku.

Il-bidla minn kmandant militari għal ‘suldat taʼ Kristu’ kienet tirrikjedi ħafna aġġustamenti. (2 Timotju 2:3) Wieħed mill-​ewwel inkarigi tiegħi kien li nieħu ħsieb il-​mikrofoni waqt il-​laqgħat. Minflok ma nagħti l-​ordnijiet, ridt nitgħallem nistaqsi biex issir xi ħaġa. Il-​konsiderazzjoni u l-​imħabba saru iktar importanti mill-​effiċjenza, għalkemm xorta għadha diffiċli biex nibbilanċja dawn il-​kwalitajiet. U minħabba li naqas id-​dħul finanzjarju, il-​familja tagħna kellha tissimplifika l-​ħajja.

Verament kont nieħu pjaċir fix-​xogħol taʼ l-​ippridkar u hekk għadni nħossni sa llum. Darba minnhom waqt li kont qed nippriedka mat-​tifla tagħna Kerry, li dak iż-​żmien kellha disaʼ snin, tlabtha tinnota r-​reazzjonijiet taʼ l-​inkwilini. Malajr innotajna li ħafna nies ma kinux interessati imma li xi wħud minnhom kienu dħulin u saħansitra interessati. Kien inkuraġġanti għat-​tnejn li aħna. It-​tifla l-​oħra tagħna studjat il-​Bibbja għal xi żmien imma għażlet li ma taqdix lil Ġeħova għalissa.

Jien u Diane inkuraġġejna lil Kerry biex tirsisti għall-​ministeru full-time. Reċentement, kelli l-​pjaċir li nattendi l-​Iskola tas-​Servizz taʼ Pijunier magħha. Kienet l-​ewwel darba għaliha u t-​tieni darba għalija. Kemm hi xi ħaġa taʼ ferħ li nara lilha u ’l żgħażagħ oħrajn jimxu ’l quddiem spiritwalment u jirsistu fil-​ministeru Kristjan!—Salm 110:3, Saydon.

Abbundanza taʼ Barkiet

Meta nħares lura, nara similaritajiet u kuntrasti bejn li taqdi fil-​militar u li tkun suldat taʼ Kristu. Iż-​żewġ irwoli jirrikjedu lealtà, ubbidjenza, integrità, dixxiplina fuqna nfusna, u sagrifiċċju persunali. Imma filwaqt li fil-​militar ħafna għandhom mnejn ikunu lesti li jmutu għal pajjiżhom u għal ħbiebhom, il-​Kristjani veri hu mistenni minnhom li jħobbu lill-​għedewwa tagħhom. (Mattew 5:43-48) U filwaqt li l-​eroj militari jistgħu jirċievu xi midalja għal att wieħed taʼ kuraġġ, il-​Kristjani veri jaqilgħu l-​approvazzjoni t’Alla billi jistabru fis-​servizz leali tagħhom—li għandu mnejn ifisser li juru kuraġġ waqt oppożizzjoni, twaqqigħ għaċ-​ċajt, u sfidi oħrajn sena wara l-​oħra. (Ebrej 10:36-39) Sħabi l-​Kristjani huma l-​aħjar nies li naf.

B’kuntrast mat-​tislim li semmejt fil-​bidu taʼ l-​istorja tiegħi, il-​mod kif insellem illum huwa “L-​Għodwa t-​Tajba Oħti,” “Il-​Lejla t-​Tajba Ħija.” Kemm huwa taʼ ferħ li taqdi fil-​ministeru Kristjan maʼ nies li jħobbu verament lil Alla! Imma l-​akbar unur hu li naqdi lill-​Iktar Għoli Ġeħova nnifsu! Ma nistax naħseb f’mod iktar premjanti kif inqattaʼ ħajti!

[Noti taʼ taħt]

[Kumment f’paġna 14]

Filwaqt li ħafna fil-​militar għandhom mnejn ikunu lesti li jmutu għal pajjiżhom u ħbiebhom, huwa meħtieġ mill-​Kristjani veri li jħobbu saħansitra lill-​għedewwa tagħhom

[Stampa f’paġna 12, 13]

Insuq ajruplan tal-​Forza taʼ l-​Ajru VIP fuq il-​Bini tal-​Parlament, f’Canberra

[Stampa f’paġna 15]

Id-​drama Biblika, fil-​konvenzjoni distrettwali taʼ l-​1994 f’Sydney, l-​Awstralja

[Stampa f’paġna 15]

Maʼ Kerry fl-​Iskola tas-​Servizz taʼ Pijunier

[Stampa f’paġna 15]

Maʼ Diane u Kerry illum