SEREMAIA
1 Ih mepwukat mahsen en Seremaia* nein Ilkaia, emen samworo nan Anadod+ nan sapwen Pensamin. 2 Siohwa ketin mahseniong Seremaia ni mwehin Sosaia+ nein Amon,+ nanmwarkien Suda, ni kaeisek siluhn sounpar en eh mwehi. 3 E pil ketin mahseniong ih ni mwehin Sehoiakim+ nein Sosaia, nanmwarkien Suda, lao lel kaimwiseklahn kaeisek ehun sounpar en mwehin Sedekaia+ nein Sosaia, nanmwarkien Suda, lao Serusalem kalipilipala ni kelimaun sounpwong.+
4 Siohwa ketin mahsanihong ie:
I wiahiong uhk ken wiahla soukohp men ong wehi kan.”
6 I ahpw sapeng patohwan: “Meid suwediong ie, Maing Kaun Wasa Lapalahpie Siohwa!
I sohte kin ese pato,+ pwe I me nohn pwulopwul.”+
7 Siohwa eri ketin mahsanihong ie:
“Ke dehr nda, ‘I me nohn pwulopwul.’
Pwe ke anahne kohla rehn irail koaros me I pahn kadaruhkalahng,
Oh ke anahne nda soahng koaros me I pahn kehkehlingkihong uhk.+
8 Ke dehr masak pwehki mwomwarail kan,+
Pwe ‘I pahn ieiang uhk pwehn doareiukala,’+ Siohwa me ketin mahmahsen.”
9 Siohwa eri ketin kapahla limeo oh ketin doahke eweiet.+ Oh Siohwa ketin mahsanihong ie: “I kihong nan ewomwen ei mahsen kan.+ 10 Kilang, rahnwet I idihiukada pohn tohnwehi kan oh wehi kan, pwehn usada oh karangkehdi, pwehn kamwomwala oh kauwehla, pwehn kauwada oh padokedi.”+
11 Siohwa ketin pwurehng mahsanihong ie: “Seremaia, dahme ke kilang?” Ngehi eri patohwan: “I kilang rahntuhke almond pwoat.”*
12 Siohwa eri ketin mahsanihong ie: “Me pwung me ke kilangen, pwe I kin mwasamwasahn pwe I en kapwaiada ei mahsen.”
13 Siohwa ahpw ketin mahsanihong ie keriapak, mahsanih: “Dahme ke kilang?” I ahpw sapeng patohwan: “I patopatohwan einpwoat ehu* me pwoapwoail,* oh ewen einpwoato peikla sang paliepeng.” 14 Siohwa eri ketin mahsanihong ie:
“Kahpwal pahn pwarada sang ni paliepeng
Kolahng tohn sahpwo pwon.+
15 Pwe Siohwa ketin mahsanih, ‘I pahn ekerpene peneinei en wehi kan koaros sang paliepeng,+
Oh irail pahn kohdo; emenemen nanmwarki pahn koasoanehdi mwoale
Ni ewen kelen Serusalem kan,+
Ni kehl kan me kapilpene
Oh ni kahnimw kan koaros en Suda.+
16 Oh I pahn lohkihong irail ei kadeik duwen arail suwed kan koaros,
Pwehki irail keseiehla,+
Oh irail kin wiahda meirong ediniei ong koht teikan+
Oh poaridiong dahme pehrail kan wiahda.’+
17 Ahpw ke pahn onopadahng mwekid,*
Oh ke pahn uhda oh padahkihong irail soahng koaros me I kehkehlingkihong uhk.
Ke dehpa masakirailda,+
Pwe I de kamasakuhkada mwohrail.
18 Pwe rahnwet I wiahiong uhk ken wiahla kahnimw kehl kehlail,
Uhr mete pwoat oh dihd prons, pwe ken pelianda sahpwo pwon,+
Nanmwarkien Suda kan oh nah lapalap akan,
Nah samworo kan oh aramas akan en sahpwo.+
19 Oh irail uhdahn pahn peiong uhk,
Ahpw irail sohte pahn kaloweiukedi,
Pwe ‘I pahn ieiang uhk pwehn doareiukala,’+ Siohwa me ketin mahmahsen.”
2 Siohwa ketin mahsanihong ie: 2 “Kohla oh lohkihong Serusalem,* ‘Iet me Siohwa ketin mahsanih:
“I uhdahn tamataman omw poadidi* ni omw pwulopwul,+
Limpoak me ke kasalehda ni omw inoun pwopwoudida,+
Duwen omw idawehniehdo nan sapwtehno,
Nan sahpw ehu me werentuhke sohte kamwarakdi ie.+
3 Israel me sarawi ong Siohwa,+ tepin wahnsahpw kan me e ketin dolungada.”’
‘Mehmen me kadallehla ih pahn pwukoahki dihp.
Kahpwal pahn kohdo pohrail,’ Siohwa me ketin mahmahsen.”+
4 Kumwail kadaudok en Seikop kan, rong mahsen en Siohwa,
Oh kumwail peneinei koaros en aramas en Israel kan.
5 Iet me Siohwa ketin mahsanih:
“Soangen sapwung dah me samamwail mehn mahs ako diarada rehi,+
Me kahrehda re dohweisang ie,
Oh irail idawehn dikedik soh katepe kei+ oh wiahla aramas soh katepe kei?+
6 Irail sohte idek, ‘Ia Siohwa,
Me ketin waikitaildo sang nan sapwen Isip,+
Me ketin kahluwai kitail nan sapwtehno,
Nan sahpw ehu me madekeng+ oh diren pwoahr kan,
Nan sahpw ehu me sohla keteu+ oh rotorot mosul,
Nan sahpw ehu me sohte me kin keid ie
Oh wasa me sohte aramas kin kousoan ie?’
7 I ahpw waikumwaildo nan sahpw ehu me pwelmwahu,*
Pwe kumwail en tungoale wah kan oh nsenamwahuki soahng mwahu kan.+
Ahpw kumwail kohdo oh kasaminehla sapweio;
Kumwail wiahkihla ei sohso mehkot kasaut.+
8 Samworo kan sohte idek, ‘Ia Siohwa?’+
Irail me ahneki pwukoa en padahngki Kosonned sehse ie,
Silepen sihpw kan uhwong ie,+
Soukohp kan wia kokohp ni eden Paal,+
Oh irail idawehn koht kan me sohte kak wahdo kamwahuparail.
9 Siohwa ketin mahsanih: ‘Eri I pahn pwurehng uhwong kumwail,+
Oh I pahn uhwong nein noumwail seri kan.’
10 ‘Ahpw kohla ni oaroahr* en Kittim+ oh kilang.
Ei, kadaralahng emen Kedar+ oh medewe ni keneinei;
Kilang ma mehkot me duwehte met wiawiher.
11 Mie pak me wehi ehu wiliankihdi eh koht kan soahng kan me kaidehn koht?
Ahpw nei aramas akan wiliankihdi ei lingan mehkot me sohte katepe.+
12 Nanleng, kangkakil met ni pwuriamwei;
Rerrerki masak kowahlap,’ Siohwa me ketin mahmahsen,
13 ‘Pwehki nei aramas akan wiadahr soahng suwed riau:
Irail keseielahr, utupen pilen komour,+
Oh weirada* pwoaren nahk pihl kan ong irail,
Pwoaren nahk pihl kan me ohlahr, me sohte kak koledi pihl.’
14 ‘Ia duwe, Israel ladu men de lidu men me ipwidi nan tohnimwen eh soumaso?
Eri dahme kahrehda e lohdi?
Re wiahkihla sapweo mehkot kamasepwehk ehu.
Eh kahnimw kan lulda, kahrehda sohla towe.
16 Aramas en Nohp*+ oh Dapanihs kan+ kin kangasang kadoken moangomwen.
17 Kaidehn kowe me wadohng met pohmw
Ni omw kesehla Siohwa omw Koht+
Erein eh ketin kakahluwaiuk nan ahlo?
19 Omw suwed pahn kapwunguhkala,
Oh omw salelepek pahn panawihiuk.
Ken ese oh pohnese uwen suwed oh katik en+
Omw kesehla Siohwa omw Koht;
Ke kasalehda omw sohte lemmwikin ie,’+ Kaun Wasa Lapalahpie, Siohwa kaunen karis en sounpei me ketin mahmahsen.
20 ‘Pwe mahso I pwalangpeseng omw mehn wisiko+
Oh kauwehla selipomw kan.
Ahpw ke nda: “I sohte pahn papah,”
Pwe pohn dohl ile koaros oh pahn tuhke losolos koaros+
Ke wie wonohn, netiki paliweromw.+
21 I padokuhkedi duwehte tuhkehn kreip me keieu mwahu,+ koaros werentuhke mwahu;
Eri, dahme ke wiahkihla pons sakanakan en tuhkehn kreip en nanwel mwohn silangi?’+
22 Kaun Wasa Lapalahpie Siohwa ketin mahsanih: ‘Mehnda ma ke pahn duhduhki alkalai* oh doadoahngki diren sohpw,
Dipomw pahn wiahte mwahi ehu mwohn silangi.’+
23 Ia duwen omw kak nda, ‘I sohte kasamineiehla.
I sohte idawehnla Paal kan’?
Kilang omw wiewia kan nan wahwo.
Medewe dahme ke wiadahro.
Ke rasehng kamel lih pwulopwul men me marahra,
Me kin tangatangseli mwahl,
24 Rasehng dongki en nanwel men me ahnla nan sapwtehn,
Me kin nedenedseli kisinieng ni eh inengda.
Ihs me kak kapweiekidi ih ni eh mwetida?
Irail me raparapahki ih sohte pahn pwangada.
Ni eh ahnsoun kowerek* irail pahn diar ih.
25 Ke dehr adasi
Oh kepinweromw en dehr madada.
Ahpw ke nda, ‘I sohte kak pwurala!+
26 Duwehte lipirap men eh namenekla ni eh kin dierekda,
Ih pil duwen mehn Israel kan ar namenekla,
Irail, arail nanmwarki kan oh lapalap akan,
Arail samworo kan oh soukohp akan.+
27 Irail ndaiong tuhke pwoat, ‘Kowe me semei,’+
Oh ong takai ehu, ‘Kowe me naitikihiehdi.’
Ahpw irail sohpeisang ie oh sohte sohpeiong ie.+
Oh ni ar ahnsou apwal re pahn nda,
‘Komw ketida oh doareikitala!’+
28 Eri, ia omw koht ko me ke pein wiahda?+
Ren uhda ma re kak doareiukala ni omw ahnsou apwal akan,
Pwe Suda, omw koht kan tohtohlahr duwehte tohtohn omw kahnimw kan.+
29 Siohwa ketin mahsanih: ‘Dahme kumwail kin kaulimehkin ie?
Dahme kumwail koaros kin uhkihong ie?’+
30 I kalokeier noumwail seri kan ahpw sohte katepe.+
Re sohte kin ale peneu;+
Pein noumwail kedlahs me kadallehla amwail soukohp akan,+
Rasehng laion lingeringer men.
31 Nei aramas akan, kumwail medemedewe mahsen en Siohwa.
I duwelahr sapwtehn ehu ong Israel
De sahpw ehu me uhdahn rotorot?
Dahme kahrehda irail pwukat, nei aramas akan, nda, ‘Se kohkohseli ni saledek.
Se sohla pahn kohdo rehmw’?+
32 Ia duwe, meipwon men kak manokehla eh mehn kapwat kan,
Lih kamwohd men kak manokehla pirapir en mwaremware kan?*
Ahpw pein nei aramas akan manokeielahr erein rahn tohto.+
33 Lih, ia uwen omw koahiek en wiahda elen omw pahn rapahki limpoak!
Ke kaiahnekinuhkada ahl suwed kan.+
34 Pil omw likou kan reikilahr ntahn aramas* semwehmwe soh dipe kan,+
Mendahki ei sohte kilang ar wehdpeseng imwomw;
Nta mi pohn omw likou kan koaros.+
35 Ahpw ke nda, ‘I mwakelekel.
Mehlel me eh engieng solahr mi rehi.’
Met I pahn kadeikuhkada
Pwehki ke nda, ‘I sohte dipada.’
36 Dahme kahrehda ke medewe me omw salelepek mehkot tikitik?
37 Pil ni kahrepe wet, ke pahn kohieila ni pehmw kan eh mi pohn moangomwen,+
Pwe Siohwa ketin soikalahr irail me ke kin koapworopworki;
Irail sohte pahn seweseiuk.”
3 Aramas akan idek: “Ma ohl emen mweisang eh pwoud oh liho kohkohsang ih oh pwoudikihda emen ohl tohrohr, ia duwe, e konehng ohlo en pwurala rehn liho?”
Sahpwo sou saminla douluhl?+
Siohwa ketin mahsanih: “Ke netiki paliweromw rehn ohl tohto,+
Eri, e konehng ken pwurodo rehi met?
2 Kilengdalahng pohn kadoken dohl kan oh kilang.
Mie wasakis me ke sohte angkehlaildi ie?
Ke mwomwohd ni keilen ahl akan awiawih irail,
Duwehte emen me kin kohkohseli* nan sapwtehn.
Ke usehlahte kasaminehkihla sahpwo
Omw tiahk en netiki paliweromw oh omw suwed kan.+
Ke sohte kin namenek duwehte lih pwopwoud men me kin netiki paliwere;
Ke sohte mwahn kin namenek.+
4 Ahpw met ke likweriong ie,
‘Semei, komwi me iengei sangete ni ei pwulopwul!+
5 Ia duwe, komw pahn engieng kohkohlahte,
De kadakadaur omwi engieng ahnsou koaros?’
Ih met me ke nda,
Ahpw ke usehlahte wiewia soahng suwed koaros me ke kak wia.”+
6 Ni mwehin Nanmwarki Sosaia,+ Siohwa ketin mahsanihong ie: “Ke kilangehr dahme Israel salelepek wiadahr? E kohdahla pohn nahna ile koaros oh kohla pahn tuhke losolos koaros pwehn netiki paliwere.+ 7 Pil mwurin eh wiahier mepwukat koaros, I kin ndaiong ih en pwurodo rehi,+ ahpw e sohte pwurodo; oh Suda kin kilikilang rie serepein widingano.+ 8 Ni ei kilang met, I mweisang Israel salelepek ni ei kihong kisinlikoun kamweid ehu,+ pwehki eh kamwahl.+ Ahpw Suda, rie serepein widingano sohte masepwehkada; e pil kohieila oh netiki paliwere.+ 9 E wiahki eh tiahk en netiki paliwere mehkot tikitik, oh e usehlahte kasaminehla sahpwo oh wia kamwahl sang ni eh kaudokiong takai kan oh tuhke kan.+ 10 Mendahki mepwukat koaros, Suda rie serepein widingano sohte pwurodo rehi ni mohngiong unsek, e mwomwehdahte me e pwurodo,’ Siohwa me ketin mahmahsen.”
11 Siohwa eri ketin mahsanihong ie: “Israel salelepek kasalehda me pein ih pwung sang Suda, me widingan.+ 12 Kohla oh lohkihong paliepeng mahsen pwukat:+
“‘“Israel soaloalopwoat, pwurodo,” Siohwa me ketin mahmahsen.’+ ‘“I sohte pahn kilengdiong uhk ni engieng,+ pwe I me loalopwoat,” Siohwa me ketin mahmahsen.’ ‘“I sohte pahn engieng kohkohlahte. 13 Ihte pohnese dipomw, pwe ke uhwongadahr Siohwa omw Koht. Ke kin pwakipwakihseli mehn liki kan* pahn tuhke losolos kan koaros, ahpw kumwail sohte kin peikiong kapitiei,” Siohwa me ketin mahmahsen.’”
14 “Pwurodo, kumwail seri soaloalopwoat kan,” Siohwa me ketin mahmahsen. “Pwe I wialahr uhdahn amwail soumas;* oh I pahn alei kumwail, emen sang kahnimw ehu oh riemen sang peneinei ehu, oh I pahn waikumwaildo Saion.+ 15 Oh I pahn kihong kumwail silepen sihpw kan me kin mwekid pahrekiong kupwurei,*+ oh re pahn kamwengehkin kumwail loalokong oh dehde mwahu. 16 Kumwail pahn tohtohla oh neitik nan sahpwo ni rahn ako,” Siohwa me ketin mahmahsen.+ “Irail sohla pahn nda, ‘Kohpwahn inou lap en Siohwa!’ Irail sohla pahn medemedewe de tamataman de loaleidki met, oh met sohte pahn pwuhreng wiawihda. 17 Ahnsowo irail pahn kahdaneki Serusalem mwoalen Siohwa;+ oh wehi koaros pahn pokonpene pwehn kapinga mwaren Siohwa nan Serusalem,+ oh irail sohla pahn keptakai oh idawehn ar mohngiong suwed.”
18 “Ni rahn ako ira pahn ehupene alu, aramas en Suda iangahki aramas en Israel,+ oh ira pahn ehupene kohdohsang sapwen paliepeng kohdo nan sahpw me I kihong samamwail mehn mahs ako nin duwen sohso ehu.+ 19 Oh I medewe, ‘Ia uwen ei perenki wiahkinuhkala nei pwutak* oh kihong uhk sahpw kaselelo, sohso me keieu kaselel nan wehi kan!’*+ I pil medewe me kumwail pahn ekerkin ie, ‘Semei!’ oh kumwail sohte pahn uhdihsang idawehn ie. 20 ‘Ahpw mehlel duwehte lih pwopwoud widing men me kohkohsang eh pwoud,* ih pil duwen kumwail mehn Israel kan amwail widingeiehdi,’+ Siohwa me ketin mahmahsen.”
21 Ngihl ehu pwarada pohn kadoken dohl kan,
Ngilen sengiseng oh pekipek en aramas en Israel kan,
Pwe irail kasapwungehla arail ahlo;
Irail manokelahr Siohwa arail Koht.+
22 “Pwurodo, kumwail seri soaloalopwoat kan.
I pahn kamwahwihala amwail irair soaloalopwoat.”+
“Iet kiht! Se patohdohr rehmwi,
Maing Siohwa, pwe komwi me at Koht.+
23 Dohl kan oh mwoarong pohn nahna kan uhdahn likamw ehu.+
Ahpw komour en Israel uhdahn mi rehn Siohwa at Koht.+
24 Ahpw soahng kanameneko* kihsangehr mehkoaros me samat mehn mahs ako koadoahkihada sangete ni at pwulopwul,+
Neirail pelin sihpw kan oh pelin kou kan,
Neirail pwutak kan oh serepein kan.
25 Eri sen wendi nan at namenek,
Oh at namenek en kipeikitedi,
Pwe se dipadahr ong Siohwa at Koht,+
Kiht oh samat mehn mahs ako, sangete ni at pwulopwul leledo rahnwet,+
Oh se sohte peikiong kapitien Siohwa at Koht.”
4 Siohwa ketin mahsanih: “Israel, ma ke pahn pwurodo,
Ma ke pahn pwurodo rehi
Oh ma ke pahn kihsang omw dikedik kasaut kan mwohn silangi,
Eri ke sohte pahn kohkohseli.+
2 Oh ma ke kahukihla,
‘Nin duwen Siohwa eh ketin ieias!’ ni mehlel, pwung pahrek, oh pwung,
Eri wehi kan pahn alehdi kapai ehu ong pein irail sang reh,
Oh irail pahn suweiki ih.”+
3 Pwe iet me Siohwa ketin mahsanihong aramas en Suda kan oh Serusalem:
“Dehkada amwail mwaht kan me saikinte deideida,
Oh dehr kamwakamwarak nanpwungen dihpw tekatek kan.+
4 Kumwail sirkumsaisihkumwailla ong Siohwa,
Oh sirkumsaisihala mohngiongimwail kan,+
Kumwail aramas en Suda oh tohn Serusalem kan,
Pwe ei engieng en dehr lulda duwehte kisiniei ehu
Oh lulda ni sohte emen eh pahn kakunla,
Pwehki amwail wiewia suwed kan.”+
5 Kumwail lohki met nan Suda, oh pakairki met nan Serusalem.
Kumwail wer oh peuk mehn pepeuk* nan sahpwo pwon.+
Kumwail likwer ni ngihl laud oh nda: “Kumwail kohpene,
Oh kitail tangalahng nan kahnimw kehl kehlail kan.+
6 Kauwada kilel ehu* uhlahng Saion.
Rapahki wasahn ruk, oh dehr kesikesihnente,”
Pwe I pahn wahdo kahpwal sang paliepeng,+ ohla laud ehu.
E kohieisangehr eh wasa pwehn wiahkihla sapwomw mehkot kamasepwehk ehu.
Omw kahnimw kan pahn tehnla, sohla towe.+
8 Eri, likawihada likoun nsensuwed,*+
Mwahiei* oh sengiseng,
Pwehki sapwellimen Siohwa engieng kowahlap saikinte sohrasang kitail.
9 Siohwa ketin mahsanih: “Ni rahno, nanmwarkio pahn nan kapehd* tikitikla,*+
Lapalap akan pil pahn nan kapehd tikitikla;*
Samworo kan pahn masepwehkada, oh soukohp kan pahn pwuriamweila.”+
10 Ngehi eri patohwan: “Maing, Kaun Wasa Lapalahpie Siohwa! Mehlel me komw uhdahn ketin pitihedi aramas pwukat+ oh Serusalem, oh mahsanih, ‘Kumwail pahn ahneki popohl,’+ ni kedlahs pwoat eh mi ni kepinwarat kan.”
11 Ni ahnsowo aramas pwukat oh Serusalem pahn rong met:
“Kisinieng karakar ehu sang dohl madekeng kan en sapwtehno
Pahn ipidohng pohn nei aramas akan;*
E sohte pahn kodohng katohrepeseng de kamwakel.
12 Kisinieng kehlailo kohsang wasa pwukat sang ni ei ruwes.
Eri met I pahn lohkihda kadeikparail.
13 Kilang! E pahn kohdo rasehng depwek en keteu kan,
Oh were kuruma kan rasehng kisinieng en melimel ehu.+
Nah oahs kan marahra sang ikel kan.+
Meid suwediong kitail, pwe kitail mwomwlahr!
14 Serusalem, kamwakelehsang suwed nan omw mohngiong, pwe ken pitila.+
Ia erein omw pahn kolokol madamadau suwed?
15 Pwe ngihl ehu me koasoia rohng kan sang Dan,+
Oh ngihlo lohkihda kahpwal kan sang nahnahn Epraim kan.
16 Pakairki met ong wehi kan;
Lohki met ong Serusalem.”
“Sounsilasil kan* kohkohdo sang sahpw doh ehu,
Oh irail pahn werkihda wer en mahwen ong kahnimw en Suda kan.
17 Irail kohdohsang pali koaros pwehn mahweniong ih* rasehng sounsilasil kan me kin sinsile mohs ehu,+
Pwehki e uhwongiehda,”+ Siohwa me ketin mahmahsen.
18 “Pein omw ahl akan oh wiewia kan pahn wisikdohng pohmw.+
Ia uwen katik en omw apwal akan,
Pwe e lelohngehr nan mohngiongomw!”
19 Ei pwunod,* ei pwunod!
I kehn medek laud nan mohngiongi.*
Mohngiongi wie lusulus loalei.
20 Ehu kahpwal mwurinte ehu kahpwal ahpw pakairda,
Pwe sahpwo pwon mwomwlahr.
Imwei impwal kan mwadangete ohla,
Ni ahnsoutehkis likoun imwei impwal kan ohla.+
22 “Pwe nei aramas akan me pweipwei;+
Irail sohte kin tehk ie.
Irail seri pweipwei kei, me sohte ahneki koahiek en wehwehki ire kan.
Irail uhdahn loalokong en wia me suwed,
Ahpw irail sehse wia me mwahu.”
23 I kilangada sahpwo, oh kilang! sohla towe oh tehnla.+
I kilengdalahng pahnlahng, oh sohte marain ehu mie.+
24 I kilangada nahna kan, oh kilang! re wie rerrer,
Oh dohl kan wie itihtikek.+
25 I kilangada, oh kilang! sohte aramas emen,
Oh menpihr en pahnlahng kan koaros pihrpesengier.+
26 I kilangada, oh kilang! mwahto wialahr sapwtehn ehu,
Oh eh kahnimw kan koaros ohlahr.+
Met wiawi pwehki Siohwa,
Pwehki sapwellime engieng kowahlap.
27 Pwe iet me Siohwa ketin mahsanih: “Sahpwo pwon pahn tehnla,+
Ahpw I sohte pahn kasohrehla douluhl.
29 Ni ar rong ngilen soundak oahs kan oh sounkesik ketieu kan,
Tohn kahnimwo pwon tangpeseng.+
Irail tangalahng nan wasa tuhkehn kan,
Oh irail daur paip kan.+
Kahnimw koaros lekdekla,
Oh sohte aramas emen me kousoan nan kahnimw pwukat.”
30 Met ke mwomwlahr, dahme ke pahn wia?
Ke kin likawihada likou weitahta,
Kapwatkihda mehn kapwat kohl kan,
Oh kalinganahkihda pwoaren mesomw kan litopw toantoal,
Ahpw sohte katepen omw kalinganaiukada,+
Pwe irail me kin inangihiuk keseiukalahr;
Met re raparapahki ren kihsang omw mour.+
31 Pwe I rongehr ngihl me duwehte ngilen lih emen me medek,*
Ingihngtik duwehte ingitik en lih emen me pahn neitikiehdi tepin nah seri,
Ngilen Saion* me mwopwlahr.
E kin nda ni eh kin kadangpeseng peh kan:+
“Meid suwediong ie, pwe I pwangadahr pwehki sounkam aramas ako!”
5 Kumwail aluseli nanial en Serusalem kan.
Kumwail kilengseli oh tehk.
Kumwail rapahki wasahn tuhpene kan en kahnimw wet pwehn kilang
Ma kumwail kak diar aramas emen me kin mwekid ni pwung pahrek,+
Me kin nantihong en lelepek,
I ahpw pahn mahkohng kahnimw wet.
2 Mehnda ma irail nda: “Nin duwen Siohwa eh ketin ieias!”
Irail pil pahn kahukihla dahme likamw.+
3 Maing Siohwa, silangomwi kan sou kin rapahki lelepek?+
Komw ketin kaloke irail, ahpw met sohte kamwakid irail.*
Komw ketin kauweirailla, ahpw re kahng ale peneu.+
4 Ahpw I ndaiong pein ngehi: “Mehlel me irail pwukat me tikitik.
Irail kin mwekid en pweipwei, pwe irail sehse elen Siohwa,
Kadeik en arail Koht.
5 I pahn kohla rehn me lapalap akan oh lokaiaiong irail,
Pwe irail uhdahn kin tehk elen Siohwa,
Kadeik en arail Koht.+
Ahpw irail koaros kauwelahr tuhkehn wisiko
Oh waikpesengier mehn pirapir kan.”
6 Ihme kahrehda laion men sang nanwelo kin peiong irail,
Kidien wel men sang nan sapwtehn kan kin kauweirailla,
Lepard men kin wonohn oh pepehd ni arail kahnimw kan.
E kin tehrpeseng koaros me kin kohieila sang wasao.
Pwe ar kauwehla kosonned kan me tohto;
Arail wiewia salelepek kan me tohto.+
7 Ia duwen ei kak mahkikihong uhk met?
Noumw seri kan keseielahr,
Oh re kin kahula ong emen me kaidehn Koht.+
I kin kaitarala ar anahn akan,
Ahpw re kin usehlahte kamwahl,
Oh irail kin pokonlahng ni imwen me kin netiki paliwere men.
8 Re duwehte oahs kan me ineng kehlail,
Emenemente kin inangih en emen eh pwoud.+
9 Siohwa ketin mahsanih: “I sou pahn kapwukoahkin irail mepwukat?
I sou pahn dupukohng soangen wehi wet?”+
10 “Kohdadohng eh mwetin kreip kan oh kauwehla,
Ahpw kumwail dehr kamwomwala douluhl.+
Kihsang eh rah kan me kohkohpeseng,
Pwe mepwukat kaidehn sapwellimen Siohwa.
11 Pwe wehin Israel oh wehin Suda
Kin uhdahn widingei ie,” Siohwa me ketin mahmahsen.+
Sohte kahpwal pahn lelohng kitail;
Kitail sohte pahn kilang kedlahs de lehk lapalap.’+
Ih met me pahn wiawihong irail!”
14 Kahrehda iet me Siohwa, Koht en kaunen karis en sounpei, ketin mahsanih:
“Pwehki aramas pwukat ndinda met,
Eri I pahn wiahiong ei mahsen kan en wia kisiniei nan ewomw,+
Oh aramas pwukat me tuwi,
Oh kisinieio pahn isikirailla.”+
15 Siohwa ketin mahsanih: “Mehn Israel kan, I pahn wadohng kumwail wehi ehu sang wasa doh.+
Wehi ehu me wereilahr.
16 Neirail kopwoun arep rasehng sousou ehu me sansara;
Irail koaros sounpei kei.
17 Irail pahn kadallehla dahme ke dolungada oh konomw pilawa.+
Irail pahn kadallehla noumw pwutak kan oh serepein kan.
Irail pahn kadallehla noumw pelin sihpw kan oh pelin kou kan.
Irail pahn kadallehla omw tuhkehn kreip kan oh tuhke pik kan.
Irail pahn kauwehkihla omw kahnimw kehl kehlail kan me ke kin likih, kedlahs.”
18 Siohwa ketin mahsanih: “Ahpw pil ni rahn ako, I sohte pahn kasohreikumwailla douluhl.+ 19 Oh ni ar idek, ‘Dahme kahrehda Siohwa atail Koht ketin wiahiong kitail mepwukat koaros?’ ke pahn sapengkin irail, ‘Duwehte amwail keseiehla pwe kumwail en papah koht en liki nan sapwamwailo, ih pil duwen amwail pahn papah mehn liki kan nan sahpw ehu me kaidehn sapwamwail.’”+
20 Lohki met nanpwungen kadaudok en Seikop kan,
Oh pakairki met nan Suda, nda:
21 “Rong met, kumwail aramas pweipwei oh salamalam kan:*+
22 Siohwa ketin mahsanih, ‘Kumwail sohte lemmwikin ie?
Kumwail sohte pahn rerrer mwohn silangi?
Ngehi me kihdi pihk en wia irepen sehd,
Koasoandi poatopoat ehu me sehd sohte kak kotehla.
Mendahki ilok kan kin pwungupwungudek, re sohte kak pweida;
Mendahki re kin ngiringirisek, re pil sohte kak kotehla pihko.+
23 Ahpw aramas pwukat ahneki mohngiong keptakai oh uhwong;
Irail sohpeilahr oh idawehnla pein ar ahl akan.+
24 Oh irail sohte kin nda nan ar mohngiong:
“Kitail en lemmwiki Siohwa atail Koht,
Me kin ketin kamwerehdi keteu ni ahnsawi,
Tepin ahnsoun keteu* oh ahnsoun keteu en mwuhr,*
Me kin ketin kolokol wihk en rahk kan me koasoandier ong kitail.”+
25 Pein amwail sapwung kan me irehdihsang mepwukat en kohdo;
Pein dipamwail kan me kihsang kumwail dahme mwahu.+
26 Pwe mie aramas suwed nanpwungen nei aramas akan.
Irail kin mwasamwasahnte, duwehte sounpoar menpihr kan ar kin karahkidi.
Irail wiahda lidip keper ehu.
Aramas me re kin lidipihedi.
27 Duwehte kehl ehu me diren menpihr kan,
Ih duwen imwarail kan ar direkihla widing.+
Ihme kahrehda irail kehlailla oh kepwehpwehla.
28 Irail mworouroula oh kil medendella;
Irail direkihla suwed.
Irail sohte kin peki pwung pahrek en me sepwoupwou kan,+
Pwe ren kak pweida;
Oh irail kin kahmahmkihla pwung pahrek en me semwehmwe.’”+
29 Siohwa ketin mahsanih: “I sou pahn kapwukoahkin irail mepwukat?
I sou pahn dupukohng soangen wehi wet?
30 Mehkot kapwuriamwei oh kamasepwehk wiawiher nan sahpwo:
31 Soukohp kan kin wia kokohp likamw kan,+
Oh samworo kan kin kaunda sang ni pein ar manaman.
Oh pein nei aramas akan kin perenki met.+
Ahpw dahme kumwail pahn wia ni ahnsou me imwio pahn kohdo?”
6 Kumwail nein Pensamin kan, tangalahng wasahn ruk, tangasang Serusalem.
Pwe kahpwal ehu pwarada sang paliepeng, kahpwal laud ehu.+
2 Saion* duwehte lih kaselel oh keneinei men.+
3 Silepen sihpw kan oh nair pelinmen kan pahn kohdo.
Irail pahn kauwada imwarail impwal kan kapilpene liho,+
Emenemen kin kamwenge pein nah pelinmen kan.+
4 “Onopada* pwehn mahweniong liho!
Uhda, oh kitail mahweniong ih nin souwas!”
“Meid suwediong kitail, pwe rahnwet pahn imwiseklahr,
Pwe mwetehn soutik kohkohpeseng!”
5 “Uhda, oh kitail mahwen nipwong
Oh kauwehla eh imwen doulik kehlail kan.”+
6 Pwe iet me Siohwa kaunen karis en sounpei ketin mahsanih:
“Lupukedi tuhke kan oh wiahda koasoakoasoak ehu pwehn mahweniong Serusalem.+
Ih kahnimw wet me uhdahn pahn pwukoahki;
Sohte mehkot ahpw ihte kalokolok me wiawi nan kahnimwo.+
7 Duwehte pwoaren nahk pihl ehu me wia utupen pihl lemwulemwur,
Ih pil duwen kahnimw wet eh wia utupen soahng suwed kan.
Rongen tiahk lemei oh kamwomwala kin wiawi nan kahnimwo;+
Soumwahu oh kalokolok kin kalapw wiawi mwohn silangi.
8 Serusalem, rong peneu, pwe ma soh, I pahn sautkinuhkala oh sohpeisang uhk;+
I pahn wiahiong uhk ken tehnla, sahpw ehu me sohte towe.”+
9 Iet me Siohwa kaunen karis en sounpei ketin mahsanih:
“Irail pahn kihsang douluhl mehn Israel kan me luhwehdi duwehte kreip kan me luhwehdi nan tuhkehn kreip ehu.
Pwuhreng kihirailpene duwehte emen me rikpene kreip kan sang nan tuhkehn kreip kan.”
10 “Ihs me I pahn koasoiong oh kehkehlikiong?
Ihs me pahn rong?
Kilang! Salengarail kan ponla,* kahrehda irail sohte kak rong kanahieng.+
Kilang! Mahsen en Siohwa wiahla mehkot me re kin mwamwahliki;+
Irail sohte kin perenki met.
11 Eri I direkilahr engieng en Siohwa,
Oh pwangahkidahr kolokol met loalei.”+
“Wudekihdiong met pohn serihn nanial,+
Pohn pwihnen mwahnakapw kan me pokonpene.
12 Imwarail kan pahn kohieng meteikan,
Iangahki arail mwaht kan oh arail pwoud kan.+
Pwe I pahn kapahla limeiet pohn tohn sahpwo,” Siohwa me ketin mahmahsen.
13 “Pwe sang me keieu tikitik lel me keieu lapalap, emenemen kin ale kamwahupe ni likamw;+
Sangete soukohp lel samworo, emenemen kin widing.+
14 Oh irail kin song en kamwahwihala ohlahn nei aramas akan ni ar sohte kanahieng oh nda,
‘Mie popohl! Mie popohl!’
Ni eh sohte popohl.+
15 Ia duwe, irail kin namenengki soahng kasaut kan me re wiadahr?
Irail sohte douluhl kin namenengki!
Re pil sehse ahneki pepehm en namenek!+
Eri irail pahn pwupwudi nanpwungen me pwupwudier kan.
Ni ei pahn wahdo kalokolok pohrail irail pahn dipekelekel,” Siohwa me ketin mahmahsen.
16 Iet me Siohwa ketin mahsanih:
“Kesihnen wasa me ahl akan kasangpeseng ie oh kilang.
Idek duwen ahl en mahs ako,
Idek ia wasa me ahl mwahwo kin mi ie, oh keid loale,+
Oh diar nsenamwahu ong pein kumwail.”
Ahpw irail nda: “Se sohte pahn keid loale.”+
Ahpw irail nda: “Se sohte pahn rong kanahieng.”+
18 “Eri, kumwail wehi kan, kumwail rong!
Oh kumwail aramas akan, kumwail ese
Dahme pahn wiawihong irail.
19 Sampah, rong!
I pahn wahdo kahpwal pohn aramas pwukat+
Pwehki wahn arail pilahn mwersuwed kan,
Pwe irail sohte rong kanahieng ei mahsen kan
Oh irail soikala ei kosonnedo.”*
20 “Mehnda rehi omw kin wahdo warpwohmwahu pwetepwet* sang Sipa
Oh ahlek pwohmwahu sang sahpw doh ehu?
I sohte kupwurki amwail meirong isihs kan me pwonte isihsla,
Oh amwail meirong kan sohte kin kapereniehda.”+
21 Eri, iet me Siohwa ketin mahsanih:
“I pahn wiahda mehn kadipekelekel kan ong aramas pwukat,
Oh irail pahn dipekelekelki mepwukat,
Pahpa kan oh pwutak kan,
Mehn mpe men oh ienge,
Oh irail koaros pahn sohrala.”+
22 Iet me Siohwa ketin mahsanih:
“Kilang! Pwihnen aramas ehu kohkohdo sang sahpw en paliepeng,
Oh wehi laud ehu pahn pwarada sang wasa me keieu doh kan nin sampah.+
23 Re pahn kol kesik ketieu oh ketieu.
Re me lemei oh re sohte pahn mahk.
Ngilarail kan pahn ngirisek duwehte sehd,
Oh re dake oahs kan.+
Re koasoansoandi ni ireken mahwen duwehte sounpei men me mahweniong uhk, Saion.”*
24 Kitail rongehr duwen pakairpen met.
25 Ke dehr kohieila nan mohso,
Oh ke dehr alu nanialo,
Pwe imwintihtio kolokol kedlahs pwoat;
Mie masak wasa koaros.
Mwahiei laud duwehte omw kin mwahieiki noumw iehros,+
Pwe sounkamwomwalao pahn mwadangete kodohng kitail.+
27 “I wiahiong uhk* ken duwehla sounkamwakele mete men nanpwungen nei aramas akan,
Me kin rapahki ni keneinei;
Ke anahne tehk oh kasawih ar ahl akan.
Irail duwehte prons oh mete;
Irail koaros mwersuwed.
29 Mehn irihr kan* roangalahr.
Sang nan kisinieio iei mete pwoat.
30 Aramas akan pahn ekerkin irail silper lekdekla,
Pwe Siohwa ketin soikiraillahr.”+
7 Iet me Siohwa ketin mahsanihong Seremaia: 2 “Kesihnen ni ewen kehl en tehnpesen Siohwa oh lohki mahsen wet wasao, ‘Rong mahsen en Siohwa, kumwail aramas en Suda koaros me kin pedolong ni ewen kehl pwukat pwehn poaridiong Siohwa. 3 Iet me Siohwa kaunen karis en sounpei, Koht en Israel ketin mahsanih: “Kamwahwihala elen amwail mour oh amwail wiewia kan, oh I pahn mweidohng kumwail en koukousoan wasaht.+ 4 Kumwail dehr likih lokaia likamw kan oh nda, ‘Tehnpesen Siohwa met,* tehnpesen Siohwa, tehnpesen Siohwa!’ + 5 Pwe ma kumwail uhdahn kamwahwihala elen amwail mour oh wiewia kan; ma kumwail uhdahn utung pwung pahrek nanpwungen aramas emen oh mehn mpe;+ 6 ma kumwail sohte kaloke mehn liki me kin kousoan rehmwail, me sepwoupwou kan, oh liohdi kan;+ ma kumwail sohte kakerehdi ntahn aramas soh dipe wasaht; oh ma kumwail sohte idawehn koht teikan pwehn kauweikumwailla;+ 7 eri I pahn mweidohng kumwail en koukousoan wasaht, sahpw me I kihong samamwail mehn mahs ako kohkohlahte.”’”
8 “Ahpw kumwail kin likih lokaia likamw kan+—met sohte douluhl pahn wahdo kamwahu. 9 Ia duwe, kumwail kak pirap,+ kemehla aramas, kamwahl, kahula ni likamw,+ wiahda meirong kan* ong Paal,+ oh idawehn koht kan me kumwail sehse, 10 oh kohdo oh uh mwohn silangi nan tehnpas wet me kin kolokol mwarei oh nda, ‘Kitail pahn poadoandoarla,’ mendahki amwail kin wia soahng kasaut pwukat koaros? 11 Kumwail wiahki tehnpas wet me kin kolokol mwarei dewen lipirap akan?+ Met I pein kilangehr,” Siohwa me ketin mahmahsen.
12 “‘Ahpw, kohla ni ei wasao nan Sailo,+ wasa me I tepin pilada ong mwarei,+ oh kilang dahme I wiahiong wasao pwehki suwed en nei aramas en Israel kan.’+ 13 Siohwa ketin mahsanih: ‘Ahpw kumwail usehlahte wiewia mepwukat koaros, oh mendahki ei kin pwurupwurehng* mahseniong kumwail, kumwail sohte kin rong.+ I kin malipei kumwail, ahpw kumwail sohte kin sapeng.+ 14 Eri, I pahn wiahiong tehnpas me kin kolokol mwarei,+ me kumwail kin likih,+ oh wiahiong wasaht me I kihong kumwail oh samamwail mehn mahs ako, duwehte me I wiahiong Sailo.+ 15 I pahn kasareikumwailsang mwohn silangi, duwehte ei kasarehla riamwail ko koaros, kadaudok en Epraim ko koaros.’+
16 “A kowe,* ke dehr kapakapki aramas pwukat. Ke dehr likwer de kapakap de peki rehi pwehki irail,+ pwe I sohte pahn karongeiuk.+ 17 Ke sohte kilang dahme re wiewia nan kahnimw en Suda kan oh nanial kan en Serusalem? 18 Seri kan kin wesei tuwi, pahpa kan kin saunda kisiniei, oh lih akan kin kapal pilawa pwehn wiahda keik en meirong kan ong Lih Nanmwarkien Nanleng,*+ oh irail kin wudekihdi meirong en wain kan ong koht teikan pwe ren kansensuwedih ie.+ 19 Siohwa ketin mahsanih: ‘Ahpw, ia duwe, ngehi me re kin kamedekih?* Kaidehn pein irail me re kin kamedekih, oh kanamenekihala pein irail?’+ 20 Kahrehda iet me Kaun Wasa Lapalahpie Siohwa ketin mahsanih, ‘Kilang! Ei engieng kowahlap pahn wudekdiong wasaht,+ pohn aramas oh mahn, pohn tuhkehn nansapw akan oh wahnsahpw akan; e pahn lulda oh sohte pahn kunla.’+
21 “Iet me Siohwa kaunen karis en sounpei, Koht en Israel, ketin mahsanih, ‘Kumwail doula, kapatahiong amwail meirong isihs kan ong amwail meirong teikan, oh tungoale uduk kan.+ 22 Pwe rahn me I kahluwahdo samamwail mehn mahs ako sang nan sapwen Isip, I sohte mahseniong irail de kehkehlingkihong irail duwen meirong isihs kan oh meirong teikan.+ 23 Ahpw I kihong irail kehkehlik wet: “Kumwail peikiong kapitiei, oh I pahn wiahla amwail Koht, oh kumwail pahn wiahla nei aramas.+ Kumwail pahn weid nan ahl koaros me I kehkehlingki, pwe kumwail en pweida mwahu.”’+ 24 Ahpw irail sohte rong de rong kanahieng;+ irail wiewiahte arail pilahn mwersuwed kan,* re keptakai oh ideidawehn ar mohngiong suwed,+ oh irail pwurala mwuri, kaidehn mwowe, 25 sangete rahn me samamwail mehn mahs ako kohieido sang nan sapwen Isip leledo rahnwet.+ Eri I kin usehlahte kadarewei rehmwail nei ladu kan koaros me wia soukohp kan, I kin pwurupwurehng kadarirailewei ehuehu rahn.*+ 26 Ahpw irail kahng rong ie, oh re sohte rong kanahieng.+ Re keptakai, oh arail mwekid kan suwedsang samarail mehn mahs ako!
27 “Ke pahn koasoiaiong irail mahsen pwukat koaros,+ ahpw re sohte pahn rong uhk; ke pahn likwerih irail, ahpw re sohte pahn sapeng uhk. 28 Oh ke pahn ndaiong irail, ‘Ih wehi wet me sohte peikiong kapitien Siohwa arail Koht oh kahng ale peneu. Lelepek sohralahr oh re sohla koasoia duwen met.’*+
29 “Sehkasang pitenmoangomwen* oh kesehla, oh koulki koulen kedepwidepw pwoat* pohn kadoken dohl kan, pwe Siohwa ketin soikalahr oh kesehlahr dih wet me kalingeringerihada ih. 30 Siohwa ketin mahsanih, ‘Pwe aramas en Suda kan wiadahr dahme suwed mwohn silangi.* Re kihdi arail dikedik kasaut kan nan tehnpas me kin kolokol mwarei, pwehn kasaminehla tehnpaso.+ 31 Re kauwadahr wasa ile kan en Doped, me mi nan Wahun Innom,*+ pwe ren isik neirail pwutak kan oh serepein kan nan kisiniei,+ mehkot me I sohte kehkehlingki oh sohte mwahn kupwukupwure.’*+
32 “Siohwa ketin mahsanih, ‘Kahrehda kilang! rahn akan pahn kohdo ahnsou me met sohla pahn adaneki Doped de Wahun Innom* ahpw Wahun Kamakamala. Irail pahn sarepedi me mehla kan nan Doped lao sohla wasa luhwe.+ 33 Oh paliweren aramas mehla pwukat pahn wiahla kenen menpihr en pahnlahng kan oh kenen mahn en sampah kan, sohte me pahn karawanirailla.+ 34 I pahn katokehdi ngilen peren oh ngilen nsenamwahu, ngilen ohl kamwohd oh ngilen lih kamwohd,+ nan kahnimw en Suda kan oh nanial kan en Serusalem, pwe sahpwo pahn tehnla.’”+
8 Siohwa ketin mahsanih: “Ni ahnsowo, tihn nanmwarkien Suda kan, tihn nah lapalap akan, tihn samworo kan, tihn soukohp akan oh tihn tohn Serusalem pahn senserdahsang nan arail sousou kan. 2 Irail pahn mwarahkpeseng pahn ketipin, maram oh usu kan koaros nanleng* me re poakohng oh papah, idawehn, rapahki oh poaridiong.+ Irail sohte pahn rikirikpene, de irail pil sohte pahn seridi. Irail pahn duwehla koiasi pohn pwehl.”+
3 Siohwa kaunen karis en sounpei ketin mahsanih: “Oh luhwen tohnwehi suwed wet me pitila pahn pilada mehla sang mour nan wasa koaros me I kamwarakirailpeseng.”
4 “Oh ke pahn ndaiong irail, ‘Iet me Siohwa ketin mahsanih:
“Ia duwe, irail pahn pwupwudi oh sohte pahn pwurehng pwourda?
Ma emen pahn pwurodo, meteio sou pil pahn pwurodo?
5 Dahme kahrehda aramas pwukat, Serusalem, kin usehlahte salelepek ong ie?
Re tengala ni widing;
Re kahng pwurodo.+
6 I kin tehk oh rongorong, ahpw re sohte koasoia dahme mehlel.
Sohte emen koluhkihla eh suwed oh idek, ‘Dahme I wiadahr?’+
Emenemen kin pwuralahng ahl me meteikan kin idawehn, rasehng oahs men me tangalahng mahwen.
7 Sidoahk me mi pahnlahng pil kin ese eh ahnsou kan;*
Mwuroi men oh kisin menpihr kan me adaneki suwipd* oh durahs* kin ese ahnsoun arail pwurala.*
Ahpw pein nei aramas akan sohte kin wehwehki ahnsou me Siohwa pahn ketin kadeikirailda.”’+
8 ‘Ia duwen amwail kak nda: “Se loalokong, oh se kolokol kosonned* en Siohwa”?
Pwe ni mehlel, sounnting kan* kin doadoahngki neirail pehn+ pwehn ntingihdihte soahng likamw kan.
9 Me loalokong kan nameneklahr.+
Irail masepwehkadahr oh pahn lohdi.
Kilang! Irail soikalahr mahsen en Siohwa,
Oh soangen erpit dah me re ahneki?
10 Eri I pahn kihla ar pwoud kan rehn ohl teikan,
Ar mwaht akan rehn aramas teikan;+
Pwe sang me keieu tikitik lel me keieu lapalap, emenemen kin ale kamwahupe ni likamw;+
Sangete soukohp lel samworo, emenemen kin widing.+
11 Oh irail kin song en kamwahwihala ohlahn nei aramas akan* ni ar sohte kanahieng oh nda,
“Mie popohl! Mie popohl!”
Ni eh sohte popohl.+
12 Ia duwe, irail kin namenengki soahng kasaut kan me re wiadahr?
Irail sohte douluhl kin namenengki!
Re pil sehse ahneki pepehm en namenek!+
Eri irail pahn pwupwudi nanpwungen me pwupwudier kan.
Ni ei pahn wahdo kalokolok pohrail irail pahn dipekelekel,’+ Siohwa me ketin mahmahsen.
13 Siohwa ketin mahsanih, ‘Ni ei pahn kihirailpene, I pahn kamwomwirailla.
Sohte kreip pahn luhwehdi nan tuhkehn kreip, sohte pik nan tuhke pik kan, oh tehntuhke kan pahn mengila.
Oh dahme I kihong irail pahn salongasang irail.’”
14 “Dahme kitail mwomwohdki wasaht?
Kitail kohpene oh pedolong nan kahnimw kehl kehlail kan+ oh mehla wasao.
Pwe Siohwa atail Koht pahn ketin kasohreikitailla,
Oh e ketikihong kitail pihl pwoisin pwe kitail en nim,+
Pwehki atail dipada ong Siohwa.
15 Mie koapworopwor ong popohl, ahpw sohte mehkot mwahu kohdo,
Mie koapworopwor ong ahnsoun kamwahwihala, ahpw masak me mie!+
16 Ngilen esingek en nah oahs kan peipeido sang Dan.
Sang ni ngilen nah oahs wol kan,
Sahpwo pwon rerada.
Irail kohlongodo oh kauwehla sahpwo oh mehkoaros loale,
Kahnimwo oh towe kan.”
17 Siohwa ketin mahsanih: “Pwe I pahn kadarewei serpent kan nanpwungamwail,
Sineik pwoisin kan me sohte kak kamandala,
Oh re uhdahn pahn ngalis kumwail.”
18 Ei pahtou sohte kak mwahula;
Ei mohngiong soumwahulahr.
19 Sang sahpw doh ehu mie ngilen peksawas ehu
Sang rehn nei aramas akan:*
“Siohwa sohte ketiket nan Saion?
De nanmwarkien Saion sohte ketiket wasao?”
“Dahme kahrehda irail kansensuwedihkin ie arail sansal perperda kan,
Ar koht en liki soh katepe kan?”
20 “Ahnsoun rahk nekier, ahnsoun karakar imwiseklahr,
Ahpw kitail sohte poadoandoarla!”
Masak koliehdier.
De sohte toahkte wasao?+
Dahme nei aramas akan* sohte mwahukihla?+
9 Ia uwen ei men moangeiet en wia pwarer en pihl,
Pwoaren mesei kat en wia utuhnpihl!+
Pwe I pahn kin sengisengki nin rahn oh nipwong
Nei aramas akan me kamakamalahr.
2 Ia uwen ei men en mie ei wasahn pweidi nan sapwtehno!
Pwe I pahn mweselsang nei aramas akan oh kohkohlahsang irail,
Pwe irail koaros kin kamwahl,+
Pwihnen aramas widing ehu.
3 Irail kin welik lowarail kan rasehng kesik ketieu pwoat;
Likamw me rekla nan sahpwo, kaidehn lelepek.+
Siohwa ketin mahsanih: “Irail kin wia me suwed mwurinte ehu,
Oh irail sohte kin tehk ie.”+
4 “Kumwail koaros, tehk kanahieng mehn mpamwail,
Oh kumwail dehr likih mehnda ma riamwail.
5 Emenemen kin pitih mehn mpe,
Oh sohte me kin koasoi mehlel.
Re kaiahnehki lowarail kan en koasoi likamw.+
Re pwangadahr wiewia dahme sapwung.
6 Ke koukousoan nanpwungen widing.
Nan ar widing kan re kahng eseiehla,” Siohwa me ketin mahmahsen.
7 Kahrehda iet me Siohwa kaunen karis en sounpei ketin mahsanih:
8 Lowarail iei arep keper pwoat me kin koasoi widing.
Aramas emen kin koasoia popohl sang nan ewe ong mehn mpe,
Ahpw loale e kin koasoakoasoane en rukihedi.”
9 Siohwa ketin mahsanih: “I sou pahn kapwukoahkin irail mepwukat?
I sou pahn dupukohng soangen wehi wet?+
10 I pahn sengisengki oh mwahieiki nahna kan
Oh koulki koulen kedepwidepw pwoat* duwen mohs kan en sapwtehn,
Pwe re luldahr kahrehda sohte aramas kin keid wasao,
Oh sohte ngilen pelinmen kan.
Menpihr en pahnlahng kan oh mahn akan tangpesengier; re solahr mie.+
11 I pahn wiahiong Serusalem ni koasoakoasoak en takai kan,+ pwoahr en kidien wel kan,+
Oh I pahn wiahiong kahnimw en Suda kan en tehnla, sohla towe.+
12 Ihs me loalokong pwe en kak wehwehki met?
Ihs me doauesen Siohwa mahseniong, pwe en kak lohkihda met?
Dahme kahrehda sahpwo ohla?
Dahme kahrehda e roangala duwehte sapwtehn,
Kahrehda sohte aramas kin keid wasao?”
13 Siohwa ketin sapeng mahsanih: “Pwehki ar soikala ei kosonned* me I kihong irail, oh pwehki irail sohte idawehn met oh peikiong kapitiei. 14 Ahpw, irail keptakaila oh idawehnla pein ar mohngiong,+ oh irail idawehnla sansal en Paal kan, duwehte me samarail ko padahkihong irail en wia.+ 15 Kahrehda iet me Siohwa kaunen karis en sounpei, Koht en Israel ketin mahsanih, ‘I pahn katungoalehki aramas pwukat tuhke sadik, oh I pahn kanimpilehkin irail pihl pwoisin.+ 16 I pahn kamwarakirailpeseng nan wehi kan me irail oh samarail ko sehse,+ oh I pahn kadarala kedlahs pwoat mwurirail lao I pahn kamwomwirailla.’+
17 Iet me Siohwa kaunen karis en sounpei ketin mahsanih:
‘Medemedewe dahme wiewiawi.
Ekerpene lih akan me kin koulki koulen kedepwidepw kan,*+
Oh ileklahng lih koahiek kan ren kohdo,
18 Pwe ren kak mwadang oh koulki koulen kedepwidepw pwoat ong kitail,
Pwe pilen masatail kan en keredi
Oh kilin masatail kan en dingidingki pihl.+
19 Pwe ngilen mwahieio peipeido sang Saion:+
“Kitail uhdahn mwomwlahr!
Ia uwen laud en atail namenek!
Pwe kitail kohkohsangehr sahpwo, oh irail kauwelahr imwatail kan.”+
20 Kumwail lih akan, rong mahsen en Siohwa.
Salengamwail kan en alehdi mahsen sang doauese.
21 Pwe mehla kohlongodohr nan atail wenihmwtok kan;
Mehla pedolongehr nan atail imwen doulik kehlail kan
Pwehn wahsang seri kan nanial akan
Oh mwahnakapw akan ni wasahn tuhpene kan.’+
22 Nda, ‘Iet me Siohwa ketin mahsanih:
“Paliweren aramas mehla kan pahn pwupwudi duwehte koiasi en mwaht,
Rasehng ireken krein* me ahpwtehn paldi me soundolung kan kin kihdi mwurirail,
Sohte me pahn rikirailpene.”’”+
23 Iet me Siohwa ketin mahsanih:
“Aramas loalokong en dehr suweiki eh erpit;+
Aramas kehlail en dehr suweiki duwen eh kehlail;
Oh aramas kepwehpwe en dehr suweiki eh kepwe kan.”+
24 Siohwa ketin mahsanih: “Ahpw mehmen me kin suwei a en suweiki duwen met:
Me e dehdehki oh ese ie,+
Me ngehi me Siohwa, me kin kasalehda limpoak loalopwoat, pwung pahrek, oh pwung nin sampah,+
Pwe ih mepwukat me I kin kupwurperenki.”+
25 Siohwa ketin mahsanih: “Kilang! Rahn akan pahn kohdo, oh I pahn kapwukoahki koaros me sirkumsaisla ahpw ni mehlel sohte sirkumsaisla,+ 26 me iei Isip+ oh Suda+ oh Edom+ oh mehn Ammon kan+ oh Mohap+ oh irail koaros me kin sehkasang pengepengen pitenmoangarail oh kousoan nan sapwtehn;+ pwe wehi koaros sohte sirkumsaisla, oh kadaudok en Israel koaros sohte sirkumsaisla ni mohngiong.”+
10 Mehn Israel kan, rong mahsen me Siohwa ketin mahsanihong kumwail. 2 Iet me Siohwa ketin mahsanih:
“Kumwail dehpa sukuhlki tiahk en wehi kan,+
Oh dehpa masak kilel kan en nanleng
Pwehki wehi kan kin masak mepwukat.+
3 Pwe tiahk en aramas akan sohte katepe.*
E duwehte tuhkehn nanwel pwoat me paldi,
Tohndoadoahk saman men parkihda met nah mehn doadoahk.+
5 Rasehng mehn kerewenmen nan mwetin kiuhri, re sohte kak lokaia;+
Re anahne wisikseli, pwe re sohte kak alu.+
Kumwail dehr masak irail, pwe re sohte kak kauweikumwailla,
De re pil sohte kak wiahiong kumwail mehkot mwahu.”+
6 Maing Siohwa, sohte emen me duwehte komwi.+
Komwi me lapalap, oh mwaromwi me lapalap oh manaman.
7 Maing Nanmwarkien wehi kan,+ ihs me sohte pahn lemmwikin komwi? Pwe komwi warohng met;
Pwehki nanpwungen me loalokong kan koaros en wehi kan oh nanpwungen arail wehi kan koaros,
Sohte douluhl emen me duwehte komwi.+
8 Irail koaros sohte ar madamadau oh pweipwei.+
Kaweid sang tuhke pwoat me sohte douluhl katepe.*+
9 Silper pileit kan pekedersang Tarsis+ oh kohl sang Upas,
Me tohndoadoahk saman men oh sounsukmete men kin doadoahngki pwehn kidimkihla tuhkeo.
Arail likou kan wiawihkihda dereht poh mei oh dereht ntahnmwel sang wunen sihpw.*
Mepwukat koaros wiawihda sang tohndoadoahk koahiek kan.
10 Ahpw Siohwa iei me uhdahn Koht.
Ih me Koht ieias+ oh Nanmwarki poatopoat.+
Pwehki sapwellime engieng sampah pahn rerada,+
Oh sohte wehi ehu pahn kakohng sapwellime kadeik.
11* Iet me kumwail pahn ndaiong irail:
“Koht kan me sohte wiahda nanleng oh sampah
Pahn sohrala sang sampah oh pahnlahng.”+
12 Ih me ketin wiahda sampah sang ni sapwellime manaman,
Ih me ketin koasoanehdi teng sahpw pwelmwahwo sang ni sapwellime erpit+
Oh me ketin katehlapahla nanleng sang ni sapwellime kupwurokong.+
13 Ni eh kin ketin wiahiong kapitie en kohda,
Pihl kan nanleng kin ngiringirisek,+
Oh e kin ketin kahrehiong depwek kan* en kohda sang ni imwin sampah.+
E kin ketin wiahda lioal en piripir nan* keteu,
Oh e kin ketikihdo kisinieng sang nan sapwellime imwen nahk kan.+
14 Aramas koaros kin mwekid en pweipwei oh soaloalokong.
Sounsukmete koaros pahn namenekla pwehki sansal perperda kan;+
Pwe ar sansal mete kan me likamw,
15 Sohte katepen mepwukat,* konehng ren wia mehn kepit.+
Ni arail rahnen kadeik eh pahn leledo, irail pahn sohrala.
16 Koht* en Seikop sohte duwehte mepwukat,
Pwe iei Ih me ketin wiahda mehkoaros,
Oh Israel me wia sokon me e ketin sohsohki.+
Siohwa kaunen karis en sounpei iei mware.+
17 Kowe lih* me imwintihti kan kapilpene,
Rikpene omw koaruk kan sang nan pwehl.
18 Pwe iet me Siohwa ketin mahsanih:
“I pahn kesehla tohn sahpwo ni ahnsou wet,+
Oh I pahn wiahiong irail en lelohng kahpwal.”
19 Meid suwediong ie pwehki ei ohla!+
Ei ohla sohte kak mwahula.
Oh I nda: “Mehlel me ei soumwahu met, oh I pahn dadaurete.
20 Imwei impwalo ohlahr, oh sahl en imwei impwal kan koaros mweipesengier.+
Nei seri kan kohkohlahsang ie oh solahr mie.+
Sohte me luhwehdi pwehn kihpeseng imwei impwalo de langahda likoun imwei impwal ko.
Ihme kahrehda irail sohte mwekid ni dehde mwahu,
Oh neirail pelinmen kan koaros mwarahkpeseng.”+
22 Rong! Pakair ehu! E kohkohdo!
Lapalahn mwoarong ehu sang sapwen paliepeng,+
Pwehn wiahiong kahnimw en Suda kan en tehnla, wiahla pwoahr en kidien wel kan.+
23 Maing Siohwa, I uhdahn ese me aramas sohte kak pein kaunda elen eh mour.
Aramas pil sohte kak pein kaweid eh kahk kan.+
24 Maing Siohwa, komw ketin kapwungiehla ni omwi pahn ketin kadeik ni pwung,
Ahpw kaidehn ni sapwellimomwi engieng,+ pwe komwi en dehr ketin kasohreiehla.+
25 Komw ketikihdiong omwi engieng pohn tohnwehi kan me kin pohnsehsei komwi+
Oh pohn peneinei kan me sohte kin likweriong mwaromwi.
Pwe irail kadallelahr Seikop,+
Ei, re kadallehla ih lao e sohrala,+
Oh re wiahiong uhdakeo en tehnla.+
11 Iet me Siohwa ketin mahsanihong Seremaia: 2 “Kumwail aramas akan, rong mahsen en inou lap wet!
“Koasoiaiong* aramas en Suda oh tohn Serusalem kan mepwukat 3 oh ndaiong irail, ‘Iet me Siohwa, Koht en Israel ketin mahsanih: “Aramas me sohte kin peikiong mahsen en inou lap wet en riahla,+ 4 inou lap me I kehkehlingkihong samamwail mehn mahs ako ni rahn me I kahluwairailsang nan sapwen Isip,+ sang wasahn kisiniei mwehl,*+ mahsanih, ‘Kumwail peikiong kapitiei, oh wia mehkoaros me I kehkehlingkihong kumwail; oh kumwail pahn wiahla nei aramas oh I pahn wiahla amwail Koht,+ 5 I ahpw pahn kapwaiada inou me I kahukihong samamwail mehn mahs ako, pwe I en kihong irail sahpw ehu me inenen pwelmwahu,*+ duwehte inowo eh manamante rahnwet.’”’”
Oh I sapeng patohwan: “Amen,* Maing Siohwa.”
6 Siohwa eri ketin mahsanihong ie: “Lohkihda mahsen pwukat koaros nan kahnimw en Suda kan oh nanial kan en Serusalem: ‘Rong mahsen en inou lap wet, oh kapwaiada mepwukat. 7 Pwe I kin panawih samamwail mehn mahs ako ni rahn me I kahluwairailsang nan sapwen Isip oh leledo rahnwet, I kin pwurupwurehng panawihekin irail:* “Kumwail peikiong kapitiei.”+ 8 Ahpw irail sohte rong de rong kanahieng; emenemen kin keptakai oh ideidawehn eh mohngiong suwed.+ Eri I wadohng pohrail mahsen koaros en inou lap wet me I kehkehlingkihong irail en wia oh re kahng kapwaiada.’”
9 Siohwa eri ketin mahsanihong ie: “Mie koasoandi mwersuwed ehu nanpwungen aramas en Suda oh tohn Serusalem kan. 10 Irail pwuralahngehr sapwung en samarail mehn mahs ako, me kahng peikiong ei mahsen kan.+ Irail pil idawehnlahr koht teikan oh papah irail.+ Aramas en wehin Israel oh Suda kan kauwelahr ei inou lap me I wiahiong samarail mehn mahs ako.+ 11 Kahrehda iet me Siohwa ketin mahsanih, ‘I pahn wahdo pohrail kahpwal ehu+ me re sohte pahn kak pitsang. Ni ar pahn likweriong ie peki sawas, I sohte pahn karonge irail.+ 12 Eri kahnimw en Suda kan oh tohn Serusalem kan pahn kohla rehn koht kan me re kin wiahiong meirong kan* oh peki sawas,+ ahpw koht pwukat sohte mwahn pahn doareirailla ni ar ahnsou apwal. 13 Pwe Suda, omw koht kan tohtohlahr duwehte tohtohn omw kahnimw kan, oh kumwail wiadahr pei sarawi tohto ong soahng kanameneko* me duwehte tohtohn ahl en Serusalem kan, pei sarawi kan ong wia meirong kan ong Paal.’+
14 A kowe,* ke dehr kapakapki aramas pwukat. Ke dehr likwer peki sawasparail de kapakapkin irail,+ pwe I sohte pahn karonge ni ar pahn likweriong ie pwehki ar apwal.
15 Pwuhng dah me I poakohngo ahneki pwe en mihmi nan tehnpesei
Ni me tohto ar wiadahr pilahn mwersuwed kan?
Ia duwe, meirong en uduk sarawi* me irail pahn kak soingkihla kahpwal ni eh pahn kohdiong pohmw?*
Ke pahn perenda ahnsowo?
16 Siohwa kin ketin kahdanekin uhk mahso tuhke olip losolos pwoat,
Me linganki wah kaselel.
Ni ngilen ngiringirisek laud ehu, e ketin isikadahr liho,
Oh re kauwelahr rah kan.
17 “Siohwa kaunen karis en sounpei, me ketin padokuhkedi,+ ketin lohkihda me kahpwal ehu pahn kohdiong pohmw pwehki suwed me aramas en wehin Israel oh Suda kan wiahda. Irail kin kansensuwedih ie sang ni ar wiahda meirong kan ong Paal.”+
18 Siohwa ketin kairehkin ie pwe I en kak ese;
Ni ahnsowo komw ketin kahrehiong ie I en kilang dahme re wiewia.
19 I rasehng sihmpwul nennen men me wisikdohng kamakamala.
I sehse me re pilipilahn en uhwong ie:+
“Kitail en kauwehla tuhkeo iangahki wah kan,
Oh kitail en kemehla ih sang nan sahpw en me momour kan,
Pwe edeo pahn manokonokla douluhl.”
20 Ahpw Siohwa kaunen karis en sounpei kin ketin kadeik ni pwung;
E kin ketin kasawih madamadau keieu loal kan* oh mohngiong.+
Mweidohng ie I en kilang omw pahn ikih irail,
Pwe I patohwanohngehr komwi ei repenpwung.
21 Kahrehda iet me Siohwa ketin mahsanihong aramas en Anadod kan+ me kin raparapahki en kihsang omw mour oh me kin nda: “Ke dehr wia kokohp ni mwaren Siohwa,+ ma soh ke pahn mehkihla peht kat”; 22 eri iet me Siohwa kaunen karis en sounpei ketin mahsanih: “I pahn kapwukoahkin irail. Mwahnakapw kan pahn mehkihla kedlahs,+ oh neirail pwutak kan oh serepein kan pahn mehkihla lehk lapalap.+ 23 Sohte emen irail pahn luhwehdi, pwehki I pahn wahdo kahpwal pohn aramas en Anadod kan+ ni pahr me I pahn kapwukoahkin irail.”
12 Maing Siohwa, komwi me pwung,+ ni ei kin kaulimiong komwi,
Ni ei kin koasoia duwen pwung pahrek rehmwi.
Ahpw dahme kahrehda me suwed kan kin pweida,+
Oh dahme kahrehda me widing kan sohte kin pwunod?
2 Komw ketin padokiraildi, oh irail kadarala kalewarail kan.
Re keirdahr oh wa.
Re kin kalapw koasoia komwi, ahpw ar madamadau keieu loal kan* dohsang komwi.+
3 Maing Siohwa, komw uhdahn ketin mwahngih ie,+ komw ketin mahsanih ie;
Komw ketin kasawiher ei mohngiong oh diarada me e kin miniminiong komwi.+
Pilirailda duwehte sihpw me pahn kamakamala,
Oh katohreirailla ong rahn en kamakamalao.
4 Ia erein sahpwo eh pahn mademadekeng
Oh dihpw en mohs koaros mengimengdi?+
Pwehki suwed en irail me kousoan loale,
Mahn akan oh menpihr kan sohrala.
Pwe irail nda: “E sohte ketin mwahngih dahme pahn wiawihong kitail.”
Mehnda ma ke sohte perki mehkot nan sahpw en popohl,
Ahpw dahme ke pahn wia ni omw pahn mi nanpwungen wasa tuhkehn kan ni keilen Sordan?
6 Pwe pil pein riomw kan, tohnimwen omw pahpao,
Kin widingeiuk.+
Irail kin ngihl laudiong uhk.
Ke dehr likih irail,
Mehnda ma irail koasoiaiong uhk soahng mwahu kan.
7 “I keselahr imweio;+ I keselahr ei sohso.+
I kihongehr me I poakohngo nan pehn eh imwintihti kan.+
8 Ei sohso duwelahr laion en nanwel men ong ie.
E weriweridohng ie.
Eri I kailongkihla.
9 Ong ngehi ei sohso duwehte menpihr men me soangsoangen poh* oh kin kang uduk;
Menpihr teikan me kin kang uduk kapilpene oh peiong met.+
Kohdo, pokonpene, kumwail mahn en nan mohs kan koaros,
Kohdo mwenge.+
Irail wekidohng sapwei sahpw kaselelo ong ni sapwtehn ehu.
11 E wiahla wasa tehn ehu.
Sahpwo pwon tehnla,
Ahpw sohte me nsenohki met.+
12 Sounkamwomwala kan keidido sang nan ahl koaros* en sapwtehno,
Pwe kedlahs en Siohwa kadallelahr aramas en sahpwet pwon.+
Sohte me ahneki popohl.
13 Re kamwarak wihd, ahpw re dolung dihpw tekatek kan.+
Re doadoahk laud, ahpw sohte katepe.
Re pahn namenengkihla wahn sapwarailo
Pwehki sapwellimen Siohwa engieng kowahlap.”
14 Iet me Siohwa ketin mahsanihong mehn mpei suwed koaros, me kin doahke sohso me I wiahiong nei aramas en Israel ren ahneki:+ “I pahn usirailda sang nan sapwarailo,+ oh I pahn usada wehin Suda sang nanpwungarail. 15 Ahpw mwurin ei pahn usirailda, I pahn pwurehng kasalehiong irail kadek kalahngan oh kapwurehdo emenemen irail ni eh sohso oh sapwe.”
16 “Oh ma irail uhdahn pahn sukuhlki elen mour en nei aramas akan oh kahukihla ni mwarei, ‘Nin duwen Siohwa eh ketin ieias!’ duwehte me re padahkihong nei aramas akan ren kahula ni eden Paal, eri re pahn pweida nanpwungen nei aramas akan. 17 Ahpw ma irail kahng peik, I pil pahn usada wehio, usada oh kauwehla,” Siohwa me ketin mahmahsen.+
13 Iet me Siohwa ketin mahsanihong ie: “Kohla oh pwainda kateng linen pwoat oh pirehiong ni lukopomwen, ahpw ke dehpa kaduhdi nan pihl.” 2 Ngehi eri pwainda katengo nin duwen me Siohwa ketin mahsanih oh pirehiong ni lukopeiet. 3 Siohwa eri ketin mahsanihong ie keriapak: 4 “Ale kateng me ke pwaindahn oh pirapirkien oh uhda, kohla ni Iupreitis, oh ekihla wasao nan pwoaren paipalap ehu.” 5 Ngehi eri kohla oh ekihla limwahn Iupreitis, duwehte me Siohwa ketin kehkehlingkihong ie.
6 Ahpw rahn tohto mwuri Siohwa ketin mahsanihong ie: “Uhda, kohla ni Iupreitis, oh ale kateng me I kehkehlingkihong uhk ken ekihla wasao.” 7 Ngehi eri kohla ni Iupreitis oh weirada katengo oh kihsang wasa me I ekihlao, oh I tehkada me katengo ohlahr; sohla douluhl katepe.
8 Siohwa ketin mahsanihong ie: 9 “Iet me Siohwa ketin mahsanih, ‘Pil ni soangen mwohmwohte I pahn kauwehla pohnmwahso en Suda oh pohnmwahso laud en Serusalem.+ 10 Aramas suwed pwukat me kahng peikiong ei mahsen,+ me keptakai oh kin idawehn ar mohngiong,+ oh idawehn koht teikan, oh papah oh poaridiong irail, pahn duwehla kateng wet me sohla douluhl katepe.’ 11 Siohwa ketin mahsanih, ‘Pwe duwehte kateng pwoat eh kin pirapiriong ni lukopen aramas men, ih pil duwen ei wiahiong tohn wehin Israel pwon oh tohn wehin Suda pwon ren tengediong ie, pwe ren wiahla nei aramas,+ ei ndand,+ ei kaping, oh mehkot kaselel. Ahpw re sohte peik.’+
12 “Oh ke pahn pil kihong irail rohng wet, ‘Iet me Siohwa, Koht en Israel ketin mahsanih: “Sah laud koaros pahn kin audaudkihda wain.”’ Oh irail pahn sapengkin uhk, ‘Se sou eseier me sah laud koaros pahn kin audaudkihda wain?’ 13 Eri ndaiong irail, ‘Iet me Siohwa ketin mahsanih: “I pahn audehkihda tohn sahpwet pwon wain lao re sakaula,+ nanmwarki kan me kin mwomwohd nan mwoalen Depit, samworo kan oh soukohp kan, oh tohn Serusalem koaros. 14 Oh I pahn sukirailpene, pahpa kan oh nair pwutak kan duwepenehte,” Siohwa me ketin mahmahsen.+ “I sohte pahn poakehla de pahtoukihla de kasalehiong irail kadek kalahngan; sohte mehkot pahn katokehdi ei pahn kauweirailla.”’+
15 Kumwail rong oh tehk kanahieng.
Dehr aklapalapala, pwe Siohwa me ketin mahmahsen.
16 Kalinganahda Siohwa amwail Koht
Mwohn eh pahn ketikihdo rotorot
Oh mwohn nehmwail kan ar dipekelekel pohn nahna kan nin soutik.
Kumwail pahn kasikasik marain,
Ahpw e pahn ketikihdo rotorot mosul;
E pahn ketin wekidohng marain ni rotorot mosul.+
17 Oh ma kumwail kahng rong,
I pahn sengiseng ni rir pwehki amwail pohnmwahso.
I pahn sengiseng kowahlap, oh pilen mesei pahn kerekeredi,+
Pwehki pelinmen en Siohwa+ wisiksangehr nin duwen me selidi kei.
18 Ndaiong nanmwarkio oh inen nanmwarkio,+ ‘Mwohndi wasa karakarahk ehu,
Pwe amwa nihn kaselelo pahn pwupwudihsang pohn moangamwa kan.’
19 Kahnimw en palieir kan ritidi,* sohte me pahn ritingada mepwukat.
Aramas en Suda koaros kalipilipalahr, irail wisiksangehr douluhl.+
20 Sarada oh kilang irail me kohkohdo sang paliepeng.+
Ia pelin sihpw me ke alehdi ko, noumw sihpw kaselel ko?+
21 Dahme ke pahn nda ni kalokepomw eh leledo
Sang rehn kompoakepahmw keren kan me ke wiahda sang nin tapio?+
Medek en neitik sou pahn lelohng uhk, rasehng medek en lih emen me pahn neitik?+
22 Oh ma ke pahn nda nan omw mohngiong, ‘Dahme kahrehda mepwukat lelohng ie?’+
Pwehki omw sapwung laud me omw likou kan teiteisang+
Oh patehn nehmw kan kehn medek laud.
23 Ia duwe, mehn Kus men* kak wekidala pohn kili, de lepard men kak wekidala eh mwahi kan?+
Ma ei, eri kumwail kak wia me mwahu,
Kumwail me kaiahnda wia me suwed.
24 Eri I pahn kamwarakirailpeseng rasehng reh meng me kisinieng en sapwtehn ipirpeseng.+
25 Ih met me pahn wiawihong uhk, pwais me I kihong uhk,” Siohwa me ketin mahmahsen.
“Pwehki ke manokeiehla+ oh ke likih likamw kan.+
26 Kahrehda, I pahn pahkada omw likou kan pohn mesomwen,
Oh omw namenek pahn sansalda,+
27 Omw wiewiahn kamwahl kan+ oh ineng kehlail kan,
Kanamenekpen omw netiki paliweromw.
Pohn dohl akan, nan mohs,
I kilangehr omw wiewia kasaut kan.+
Serusalem, meid suwediong uhk!
Ia erein omw pahn samsamin?”+
14 Iet mahsen me Siohwa ketin mahsanihong Seremaia me pid duwen eh pahn sohla keteu:+
2 Suda mwahiei,+ oh eh ewen kehl kan sosohrala.
Mepwukat mwomwohd nanpwel mworusala,
Oh ngilen sengiseng ehu kohkohda sang Serusalem.
3 Oh arail soumas kan kadarala neirail ladu kan* pwehn idipil.
Re kohla ni pwoahr en pihl kan* oh sohte diar pihl.
Re pwurodo sohte pilen nair sah kan.
Re namenekla oh nsensuwedla,
Oh re pwaindi moangarail kan.
4 Pwehki pwehlo pwalpeseng,
Pwe sohte keteu pohn sahpwo,+
Soumwet kan pwunodada oh pwaindi moangarail kan.
5 Pil tie lih en nan mohs kin kesehla wah me ahpwtehn ipwidi
Pwehki eh sohla dihpw.
6 Dongki lawalo kan kin kesihnen pohn kadoken dohl kan.
Re kin esiesingek kehlail duwehte kidien wel kan;
Masarail kan kin ediedla pwehki eh sohla dihpw.+
7 Mendahki pein at sapwung kan kin kedipei kiht,
Maing Siohwa, komw ketin mwekid pwehki mwaromwi.+
Pwe at wiewia salelepek kan me tohto,+
Oh se dipadahr ong komwi.
8 Koapworopwor en Israel, Sounkomour+ ni ahnsou apwal akan,
Dahme kahrehda komwi rasehng mehn keiru men nan sahpwet,
Rasehng sounseiloak men me kin uhdi pwehn ihte kommoal nipwong?
9 Dahme kahrehda komwi rasehng aramas men me pwuriamweila,
Rasehng aramas kehlail men me sohte kak doarehla nah aramas?
Komw dehr ketin likidmelieikitala.
10 Iet me Siohwa ketin mahsanih me pid duwen aramas pwukat: “Re mwahuki kohkohseli;+ re sohte irehdi nehrail kan.+ Eri Siohwa sohte ketin kupwurperenkin irail.+ E pahn ketin tamataman ar sapwung kan oh kapwukoahkin irail diparail kan.”+
11 Siohwa eri ketin mahsanihong ie: “Ke dehr kapakapki mehkot mwahu en kodohng aramas pwukat.+ 12 Ni ar kaisihsol, I sohte kin karonge ar pekipek kan,+ oh ni ar kin wiahda meirong isihs kan me pwonte isihsla oh meirong en krein kan, I sohte kin kupwurperenkihda mepwukat,+ pwe sang ni kedlahs, lehk lapalap, oh soumwahu lusulus, I pahn kasohreirailla.”+
13 Ngehi eri patohwan: “Maing Kaun Wasa Lapalahpie Siohwa! Soukohp akan ndaiong irail, ‘Kumwail sohte pahn kilang kedlahs, oh lehk lapalap sohte pahn kohdiong pohmwail, ahpw I pahn kihong kumwail popohl mehlel wasaht.’”+
14 Siohwa eri ketin mahsanihong ie: “Soukohp akan wiewia kokohp likamw ni mwarei.+ I sohte kadarirailla de kehkehlikiong irail de mahseniong irail.+ Kaudiahl likamw ehu oh kosetipw soh katepe ehu oh widing me ar mohngiong kinehda, iei mepwukat me re kin kohpada ong kumwail.+ 15 Kahrehda iet me Siohwa ketin mahsaniheki duwen soukohp akan me kin wiewia kokohp ni mwarei, mendahki ei sohte kadarirailla, oh me kin nda sohte kedlahs de lehk lapalap pahn pwarada nan sahpwet: ‘Sang ni kedlahs oh lehk lapalap soukohp pwuko pahn sohrala.+ 16 Oh aramas ako me re kin wiewia kokohp ong pahn lekdekla nanial akan en Serusalem pwehki lehk lapalap oh kedlahs, sohte me pahn sarepiraildi+—irail, arail pwoud kan, neirail pwutak kan, de neirail serepein kan—pwe I pahn wudekihdiong pohrail kahpwal me re warohng.’+
17 “Ke pahn koasoiaiong irail mahsen wet,
‘Pilen mesei kat en keredi nipwong oh nin rahn, ren dehr uhdi,+
Pwe nei aramas* meipwon kan mwutpene douluhl oh ohlahr,+
Ar ohla kan uhdahn laud.
18 Ma I kohieila nan mohso oh kilang,
I kin kilang irail me kamakamkihla kedlahs!+
Oh ma I kohlongodo nan kahnimwo,
I kin kilang soumwahu kan sang lehk lapalapo!+
Pwe soukohp oh samworo ko kohkohseli nan sahpw ehu me re sehse.’”+
19 Komw ketin soikala douluhl Suda, de komw ketin kalahdeki Saion?+
Dahme kahrehda komw ketin kalokei kiht, pwe sen sohte kak mwahula?+
Mie koapworopwor ong popohl, ahpw sohte mehkot mwahu kohdo,
Mie koapworopwor ong ahnsoun kamwahwihala, ahpw masak me mie!+
20 Maing Siohwa, se kin pohnese at suwed kan,
Oh sapwung en samat mehn mahs ako,
Pwe se dipadahr ong komwi.+
21 Pwehki mwaromwi, komw dehr ketin soingkitala;+
Komw dehr ketin mwamwahliki mwoalomwi lingan.
Komw ketin tamataman, oh komw dehr ketin kauwehla sapwellimomwi inou lap ong kiht.+
22 Ia duwe, dikedik soh katepe en wehi kan kak kamwerehdi keteu,
De pil nanleng kak pein kamwerehdi keteu?
Kaidehn komwi kelehpw me kak ketin wia met, Maing Siohwa at Koht?+
Oh se kin koapworopworkin komwi,
Pwe komwi kelehpw me ketin wiadahr mepwukat koaros.
15 Siohwa eri ketin mahsanihong ie: “Mehnda ma Moses oh Samuel kesikesihnen mwohn silangi,+ I sohte pahn poakehla aramas pwukat. Kasareirailla sang mwohn silangi. Ren kohkohla. 2 Oh ma irail ndaiong uhk, ‘Ia wasa se pahn kohla ie?’ ke pahn ndaiong irail, ‘Iet me Siohwa ketin mahsanihen:
“Ekei kumwail pahn mehkihla soumwahu keper!
Ekei kumwail pahn mehkihla kedlahs!+
Ekei kumwail pahn mehkihla lehk lapalap!
Oh ekei kumwail pahn selidi!”’+
3 “Siohwa ketin mahsanih, ‘Oh I pahn koasoanehdi kahpwal pahieu* pohrail,+ kedlahs en kemehla, kidi kan en wurahdekihsang, oh menpihr en pahnlahng kan oh mahn en sampah kan en kadallehla oh kauwehla.+ 4 Oh I pahn wiahkinirailla mehkot kamasepwehk ehu ong wehi koaros en sampah+ pwehki dahme Manase nein Esekaia, nanmwarkien Suda, wia nan Serusalem.+
5 Serusalem, ihs me pahn poakeiukala,
Ihs me pahn iang uhk nsensuwed,
Oh ihs me pahn uhdi pwehn idek ia iromw?’
6 Siohwa ketin mahsanih, ‘Ke keseielahr.+
Eri I pahn kapahwei limei oh kamwomwuhkala.+
I pwangahkidahr poakeiukala.*
7 Oh I pahn katohreirailkipeseng pwohk ehu ni ewen kehl kan en sahpwet.
I pahn adihasang neirail seri kan.+
I pahn kamwomwala nei aramas akan,
Pwehki ar kahng sohpeisang elen ar mour kan.+
8 Neirail liohdi kan pahn tohtohsang pihken oaroahr kan mwohn silangi.
I pahn wadohng irail sounkamwomwala men nin souwas, ong nohno kan oh mwahnakapw kan.
I pahn mwadangete wahdo pwunod oh masak pohrail.
9 Lih me naitikihada seri isimen luwetalahr;
E kin apwalki esingek.
Eh ketipino kihrlahr ni eh wie rarahnte,
Kahrehda saroh oh namenek.’*
‘Oh I pahn kihong me malaulau kan me luhwehdi
Kedlahs en ar imwintihti kan,’ Siohwa me ketin mahmahsen.”+
10 Ei nohno, meid suwediong ie pwehki omw naitikihiehdi,+
Aramas emen me kin kalapw lelohng akamai oh pei nan sahpwet pwon.
I sohte kamangaila mwohni de pil peki mwohni;
Ahpw irail koaros keriaiehla.
11 Siohwa ketin mahsanih: “I uhdahn pahn wiahiong uhk mehkot mwahu;
I uhdahn pahn seweseiuk ni ahnsou apwal,
Oh uhwong imwintihti ni ahnsou apwal.
12 Mie me kak kapisetikihpene mete,
Mete sang paliepeng, oh prons?
13 I pahn kihla omw* kepwe kan oh omw dipwisou kesempwal kan nin duwen dipwisou lohdi kei,+
Kaidehn ong pweipwei, ahpw pwehki dipomw kan koaros nan sapwomw pwon.
14 I pahn kihong omw imwintihti kan mepwukat
Pwe ren wahla nan sahpw ehu me ke sehse.+
Pwe kisiniei ehu luldahr sang ei engieng
Oh e luldahng kumwail.”+
15 Maing Siohwa, komwi me ketin mwahngih,
Komw ketin tamataman ie oh ketin tehk ie.
Komw ketin ikih irail me kin kaloke ie.+
Komw dehr ketin mweidohng ie I en sohrala* pwehki omwi sohte kin mwadang engiengda.
Komw ketin mwahngih me pwehki komwi me I kin mwamwahlla.+
16 Sapwellimomwi mahsen kan dierekdahr, oh I tungoalehla mepwukat;+
Oh sapwellimomwi mahsen wiahla peren oh nsenamwahu nan ei mohngiong,
Pwe I kin weuwa mwaromwi, Maing Siohwa, Koht kaunen karis en sounpei.
17 I sohte kin iang mwohd rehn me kin kouruhr mwahl akan oh pereperen.+
18 Dahme kahrehda ei medeket wereilahr oh ei ohla sohte kak mwahula?
E kahng mwahula.
Ia duwe, komw pahn ketin wiahla utuhnpihl me sohte kin kihda pihl
Me I sohte kak likih?
19 Kahrehda iet me Siohwa ketin mahsanih:
“Ma ke pahn pwurodo, eri I pahn kamwahwihiukala,
Oh ke pahn uh mwohn silangi.
Ma ke katohrehla dahme kesempwal sang dahme sohte katepe,
Ke pahn wiahla nei sounkair men.*
Irail pahn anahne sohpeiong uhk,
Ahpw ke sohte pahn sohpeiong irail.”
20 Siohwa ketin mahsanih: “I pahn wiahkinuhkada dihd prons kehlail ong aramas pwukat.+
Irail uhdahn pahn peiong uhk,
Ahpw irail sohte pahn kaloweiukedi,+
Pwe I pahn ieiang uhk pwehn doareiukala oh kapituhkala.
21 Oh I pahn kapituhkasang nan pehn me suwed
Oh kasaledekeiukala* sang nan pehn me lemei.”
16 Siohwa ketin pwurehng mahsanihong ie: 2 “Ke sohte pahn pwopwoudida, oh ke sohte pahn naineki pwutak kan oh serepein kan wasaht. 3 Pwe iet me Siohwa ketin mahsaniheki duwen pwutak kan oh serepein kan me ipwidi wasaht oh duwen arail nohno kan me naitikihiraildi oh duwen arail pahpa kan me kahrehiong irail en ipwidi nan sahpwet: 4 ‘Irail pahn mehkihla soumwahu keper kan,+ ahpw sohte me pahn mwahieikin irail de sarepiraildi; irail pahn duwehla koiasi pohn pwehl.+ Irail pahn mehkihla kedlahs oh lehk lapalap,+ oh paliwararail mehla kan pahn wiahla kenen menpihr en pahnlahng kan oh kenen mahn en sampah kan.’
5 Pwe iet me Siohwa ketin mahsanihen,
‘Ke dehr pedolong nan ihmw me kamadipw ong me mwahiei kan kin wiawi ie,
Oh ke dehr kohla mwahiei de poakehla.’+
Siohwa ketin mahsanih, ‘Pwe I kihsangehr ei popohl rehn aramas pwukat,
Iangahki ei limpoak loalopwoat oh kadek kalahngan.+
6 Koaros me lapalap oh me tikitik pahn mehla nan sahpwet.
Irail sohte pahn seridi,
Sohte me pahn mwahieikin irail,
De pil sohte me pahn leke paliwere de koimadla ong irail.*
7 Oh sohte me pahn kihda mwenge ong irail me mwahiei,
Pwehn kansenamwahwihirailla pwehki ar mehla kan;
De pil sohte me pahn kihong irail kep en kansenamwahu
Pwe ren nim pwehki ar pahtouki mehlahn ar pahpa de nohno.
8 Oh ke dehr pedolong nan ihmw me kamadipw wiawi ie
Pwehn iang mwohndi rehrail oh mwenge oh nim.’
9 “Pwe iet me Siohwa kaunen karis en sounpei, Koht en Israel ketin mahsanih, ‘Wasaht, ni amwail ahnsou oh mwohn masamwail kan, I pahn katokehdi ngilen peren oh nsenamwahu, ngilen ohl kamwohd oh ngilen lih kamwohd.’+
10 “Ni omw pahn ndaiong aramas pwukat mahsen pwukat koaros, irail pahn idek rehmw, ‘Dahme kahrehda Siohwa ketin mahsaniheki kahpwal laud pwukat koaros ong kitail? Sapwung dah oh dihp dah me kitail wiahiong Siohwa atail Koht?’+ 11 Ke pahn sapengkin irail, ‘Siohwa ketin mahsanih, “Pwehki samamwail mehn mahs ako keseiehla,+ oh irail usehlahte idawehn koht teikan oh papah irail oh poaridiong irail.+ Ahpw irail keseiehla, oh re sohte kapwaiada ei kosonnedo.+ 12 Oh amwail wiewia kan uhdahn suwedsang wiewiahn samamwail mehn mahs ako,+ oh emenemen kumwail kin idawehn eh mohngiong suwed oh keptakai oh sohte kin peikiong ie.+ 13 Eri I pahn keseikumwailsang nan sahpwet oh keseikumwaillahng nan sahpw ehu me kumwail oh samamwail mehn mahs ako sehse.+ Kumwail pahn anahne papah koht teikan wasao nin rahn oh nipwong,+ pwehki I sohte pahn kasalehiong kumwail kupwuramwahu.”’
14 “Siohwa ketin mahsanih, ‘Ahpw, rahn akan pahn kohdo ahnsou me irail sohla pahn nda: “Nin duwen Siohwa eh ketin ieias, me ketin kahluwahdo aramas en Israel kan sang nan sapwen Isip!”+ 15 ahpw re pahn nda: “Nin duwen Siohwa eh ketin ieias, me ketin kahluwahdo aramas en Israel kan sang nan sapwen paliepeng oh sang sahpw koaros me e ketin kamwarakirailpeseng ie!” oh I pahn kapwureiraildo nan sapwarail me I kihong samarail mehn mahs ako.’+
16 Siohwa ketin mahsanih, ‘I pahn ekerodo soused tohto,
Oh re pahn saikedi nei aramas akan.
Mwurin mwo I pahn ekerodo sounpwek mahn tohto,
Oh re pahn rapahki irail pohn nahna koaros oh dohl koaros
Oh sang nanpwungen paipalap akan.
17 Pwe silangi* mahmahsanih mehkoaros me re wiewia.*
Irail sohte kak ekihsang ie dahme re kin wia,
De pil ar sapwung kan sohte rirsang silangi.
18 Keieu, I pahn dupungkihong irail uwen laud en arail sapwung kan oh diparail kan,+
Pwe irail kasaminehkihla sapweio ar dikedik kasaut kan me sohte mour
Oh audehkihla ei sohso ar soahng kasaut kan.’”+
19 Maing Siohwa, ei kehl oh ei wasahn ruk kehlail,
Wasa me I pahn tenge ni ahnsoun apwal,+
Wehi kan pahn patohdo rehmwi sang ni imwin sampah,
Oh irail pahn nda: “Samat mehn mahs ako sohsohki likamw tohr,
Soahng soh katepe oh mwahl kan me sohte kamwahupe.”+
20 Ia duwe, aramas emen kak wiahda koht kan ong pein ih
Ni mepwukat ar kaidehn uhdahn koht kei?+
21 “Eri I pahn kahrehiong irail en ese,
Ni ahnsou wet I pahn kahrehiong irail en ese ei manaman oh ei roson,
Oh irail pahn anahne ese me mwarei iei Siohwa.”
17 “Dipen Suda ntingkihdi pehn mete pwoat.
E ntingkihdi mehn nting daimon ehu nan arail mohngiong
Oh ni koden arail pei sarawi kan,
2 Nindoken neirail seri kan ar tamataman arail pei sarawi kan oh arail tuhke sarawi kan*+
Limwahn tuhke losolos pwoat, pohn dohl ile kan,+
3 Pohn nahna kan ni sahpw patapato.
Omw kepwe kan, omw dipwisou kesempwal kan koaros, I pahn kihla nin duwen dipwisou lohdi kei+
—Ei, omw wasa ile kan pwehki dihp me ke wiadahr nan sapwomwo pwon.+
4 Pwehki kowe, ke pahn luhssang omw sohso me I kihong uhk.+
Oh I pahn wiahiong uhk ken papah omw imwintihti kan nan sahpw ehu me ke sehse,+
E pahn wie lullul kohkohlahte.”
5 Iet me Siohwa ketin mahsanih:
“Aramas emen* me kin likih aramas akan,+
Me kin koapworopworki kehl en aramas,+
Oh eh mohngiong sohpeisang Siohwa en riahla.
6 E pahn duwehla tuhke pwoat me kelehpw mi nan sapwtehn.
E sohte pahn kilang ahnsou me mehkot mwahu kohdo,
Ahpw e pahn kousoan wasa madekeng kan nan sapwtehn,
Nan sahpw soahl ehu me sohte me kak kousoan ie.
8 E pahn duwehla tuhke pwoat me poadidi limwahn pihl,
Me kalewe kan kin kohdi nan pihl.
E sohte pahn kehn karakar en ketipin,
Ahpw teh kan pahn kin losolos ahnsou koaros.+
Oh e sohte pahn pwunod ni pahr en sohla keteu,
De e pil sohte pahn uhdi wa.
9 Mohngiong kin widing sang soahng teikan koaros oh e keper.*+
Ihs me kak ese met?
10 Ngehi, Siohwa, me kin rapahki mohngiong,+
Oh kin kasawih madamadau keieu loal kan,*
Pwehn kihong emenemen nin duwen me konehng elen eh mour,
Nin duwen me konehng wahn eh wiewia kan.+
11 Duwehte menpihr lawalo men me kihpene kutohr kan me kaidehn ih me kutohrehdi,
Kepwe pwukat pahn sohrasang ih ni eh kehkehlailte,
Oh ni imwio e pahn sansalda me e salamalam.”
12 Mwoahl lingan ehu, me lapalap sang nin tapio,
Iei atail wasa sarawio.+
13 Maing Siohwa, koapworopwor en Israel,
Irail koaros me keseikomwihla pahn namenekla.
Irail me sohpeisangehr komwi* pahn sohrala duwehte nting kan nan pwelpar,+
Pwehki irail kesehla Siohwa, utupen pilen komour.+
14 Maing Siohwa, komw ketin kamwahwihiehla, oh I pahn mwahula.
Komw ketin doareiehla, oh I pahn poadoandoarla,+
Pwe komwi me I kin kapinga.
15 Kilang! Mie ekei me ndaiong ie:
“Ia mahsen en Siohwa?+
En pweida ahnsou wet!”
16 Ahpw ngehi, I sohte tangasang ei idawehn komwi nin duwen sounsilepen sihpw men,
De I pil sohte kasikasik rahnen kahpwal.
Komw uhdahn ketin mwahngih mehkoaros me kilin eweiet koasoia;
Koaros pweidahr mwohn silangomwi!
17 Komw dehr ketin wiahla mehn kamasak ehu ong ie.
Komwi me ei wasahn ruk ni rahnen kahpwal.
18 Irail me kin kaloke ie ren namenekla,+
Ahpw komw dehr ketin mweidohng ie I en namenekla.
Irail en masepwehkada,
Ahpw komw dehr ketin mweidohng ie I en masepwehkada.
19 Iet me Siohwa ketin mahsanihong ie: “Kohla oh kesihnenda ni ewen kehl en aramas, wasa me nanmwarkien Suda kan kin kohlongala oh kohieisang ie, oh ni ewen kehl koaros en Serusalem.+ 20 Ke pahn ndaiong irail, ‘Rong mahsen en Siohwa, kumwail nanmwarkien Suda kan, aramas en Suda koaros, oh tohn Serusalem koaros, me kin pedolong ni ewen kehl pwukat. 21 Iet me Siohwa ketin mahsanih: “Mwasamwasahn pein kumwail, oh dehr wa wisik ehu ni rahnen Sapad de wahlongodo ni ewen kelen Serusalem kan.+ 22 Kumwail sohte pahn wahiei wisik ehu sang nan imwamwail kan ni rahnen Sapad; oh kumwail sohte douluhl pahn wia doadoahk ehu.+ Wiahki rahnen Sapad rahn sarawi ehu, duwehte me I kehkehlingkihong samamwail mehn mahs ako.+ 23 Ahpw irail sohte rong de rong kanahieng, oh re keptakaila oh kahng* peik de ale peneu.”’+
24 “‘Siohwa ketin mahsanih: “Ahpw, ma kumwail uhdahn peikiong ie, oh kumwail sohte wahlongodo wisik ehu ni ewen kehl kan en kahnimw wet ni rahnen Sapad, oh kumwail wiahki rahnen Sapad rahn sarawi ehu ni amwail sohte wia doadoahk ehu rahno,+ 25 eri nanmwarki kan oh lapalap akan me kin mwohd ni mwoalen Depit+ pil pahn pedolong ni ewen kehl kan en kahnimw wet ni arail dake kuruma oh dake oahs kan, irail oh nair lapalap akan, aramas en Suda kan oh tohn Serusalem kan;+ oh kahnimw wet pahn mie towe kohkohlahte. 26 Oh aramas akan pahn kohdohsang kahnimw en Suda kan, sang wasa kan me kapilpene Serusalem, sang sapwen Pensamin,+ sang wasa karakarahk,+ sang wasa nahnahn kan, oh sang Nekep,* oh re pahn wahdo meirong isihs kan me pwonte isihsla,+ meirong teikan,+ meirong en krein kan,+ warpwohmwahu pwetepwet,* oh meirong en kapingkalahngan nan tehnpesen Siohwa.+
27 “‘“Ahpw ma kumwail sohte peikiong ie ni amwail sohte wiahki rahnen Sapad rahn sarawi ehu oh sohte wa wisik kan oh wahlongodo mepwukat ni ewen kelen Serusalem kan ni rahnen Sapad, I pahn isikada eh ewen kehl kan, oh kisinieio uhdahn pahn isikala imwen doulik kehlail kan en Serusalem+ oh sohte pahn kunla.”’”+
18 Iet me Siohwa ketin mahsanihong Seremaia: 2 “Uhda oh kohdihla ni imwen sounwia dahlo,+ oh wasao I pahn wiahiong uhk ken rong ei mahsen kan.”
3 Ngehi eri kohdihla ni imwen sounwia dahlo, oh e wie doadoahk pohn mehn kapir dahl ko. 4 Ahpw dahl me sounwia dahlo wiewiahkihda pwehl sapwungala. Eri sounwia dahlo pwurehng wiahiong ni ehu soangen dahl tohrohr, nin duwen me e mwahuki.*
5 Siohwa ketin mahsanihong ie: 6 “‘Mehn Israel kan, ia duwe, I sohte kak wiahiong kumwail duwehte me sounwia dahl menet kin wia?’ Siohwa me ketin mahmahsen. ‘Mehn Israel kan, kilang! Kumwail kin mihmi nin limeiet, duwehte pwehl nan pehn sounwia dahlo.+ 7 Ahnsou koaros me I pahn koasoia duwen usada oh karangkehdi oh kamwomwala tohnwehi ehu de wehi ehu,+ 8 oh tohnwehio kesehla eh wiewia suwed kan me I koasoia, I pahn pil wekidala ei lamalam duwen* kahpwal me I pahn wadohng pohrail.+ 9 Ahpw ahnsou koaros me I kin koasoia duwen kauwada oh padokedi tohnwehi ehu de wehi ehu, 10 oh tohnwehio kin wia dahme suwed mwohn silangi* oh sohte kin peikiong kapitiei, I pahn wekidala ei lamalam duwen* soahng mwahu me I pahn wiahiong irail.’
11 “Eri menlau ndaiong aramas en Suda kan oh tohn Serusalem kan, ‘Iet me Siohwa ketin mahsanihen: “I kaukaunop* kahpwal ehu oh medemedewe duwen ei pahn kaloke kumwail. Menlau, kumwail sohpeisang amwail wiewia suwed kan, oh kamwahwihala elen amwail mour oh amwail wiewia kan.”’”+
12 Ahpw irail nda: “Se sohla kak pwurala!+ Pwe se kin idawehn pein at lamalam kan, oh emenemen kiht pahn mwekid pahrekiong keptakai en eh mohngiong suwed.”+
13 Kahrehda iet me Siohwa ketin mahsanih:
“Menlau, pein idek rehmwail, nan wehi kan.
Ihs me rongehr mehkot me duwehte met?
Meipwon en Israel wiadahr mehkot me uhdahn suwed.+
14 Ia duwe, sinoh en Lepanon kak sohrasang pohn takai kan ni pangapang en Lepanon kan?
De pihl lemwulemwur kan me pwildohsang wasa doh pahn kak madada?
15 Ahpw nei aramas akan manokeielahr.+
Pwe re wiahda meirong kan* ong mehkot me sohte katepe,+
Oh re kin kadipekelekele aramas akan nan ar ahl akan, ahl en mahs akan,+
Pwe ren keid nan kisin ahl akan me mwangaingai oh sohte patapat,*
16 Kahrehda, sapwarailo pahn wiahla mehkot kamasepwehk ehu+
Oh mehkot me aramas en kin kuwaiki kohkohlahte.+
Koaros me kin keid limwahn wasao pahn kangkakil ni masak oh itik moangarail.+
17 Duwehte kisinieng en palimese, I pahn kamwarakirailpeseng mwohn imwintihti.
I pahn sohpeisang irail* ni rahnen arail apwal.”+
18 Oh irail nda: “Kohdo, kitail koasoanehdi pilahn en uhwong Seremaia,+ pwe kosonned* sohte pahn sohrasang atail samworo kan de kaweid sohte pahn sohrasang ohl loalokong kan de mahsen sohte pahn sohrasang soukohp kan. Kohdo oh kitail kedipa ih oh dehr rong dahme e kin nda.”
19 Maing Siohwa, komw ketin tehk ie,
Oh karonge dahme irail me kin pelian ie kin ndinda.
20 Ia duwe, suwed iei pweinen mwahu?
Pwe irail weiradahr pwoahr ehu pwe ren kihsang ei mour.*+
Komw ketin tamataman duwen ei uh mwohn silangomwi pwehn koasoia soahng mwahu kan duwen irail,
Pwehn katokehdi omwi engieng pahrail.
21 Eri komw ketin mweidala neirail seri kan ren mehkihla lehk lapalap,
Oh irail en mehkihla manaman en kedlahs.+
Arail pwoud kan en liohdihla oh neirail seri kan en mehla.+
Neirail ohl akan en mehkihla soumwahu keper,
Neirail mwahnakapw kan en kamakamkihla kedlahs nan mahwen.+
22 Ngilen weriwer ehu en peido sang imwarail kan
Ni omw mwadangete ketikidohng irail aramas loallap kan.
Pwe irail weiradahr pwoahr ehu pwe ren koliehdi
Oh kihdier lidip kan ong nehi kat.+
23 Ahpw Maing Siohwa,
Komw uhdahn ketin mwahngih arail pilahn mwersuwed kan koaros pwe ren kemeiehla.+
Komw dehr ketin pwaindi ar sapwung kan,
Oh komw dehr ketin irisasang diparail kan mwohn silangomwi.
19 Iet me Siohwa ketin mahsanih: “Kohla oh pwainda sah ehu me wiawihkihda pwehl sang sounwia dahl men.+ Kahrehda ekei ohl mah kan en tohnwehio oh ekei ohl mah kan en samworo kan, 2 oh kohieila ni Wahun Innom,*+ ni wasahn pedolong en Ewen Kelen Sah Ohla. Oh lohki wasao mahsen kan me I mahsanihong uhk. 3 Ke pahn nda, ‘Rong mahsen en Siohwa, kumwail nanmwarkien Suda kan oh tohn Serusalem kan. Iet me Siohwa kaunen karis en sounpei, Koht en Israel, ketin mahsanih:
“‘“I pahn wadohng wasaht kahpwal ehu, oh mehmen me rong duwen met pahn pwuriamweikihla.* 4 I pahn wia met pwehki re keseiehla+ oh kahrehiong ei sohte kak kasawihada wasaht.+ Wasaht irail kin wiahda meirong kan ong koht teikan, me irail oh samarail mehn mahs ako oh nanmwarkien Suda kan sohte kin ese, oh irail kadirehkihla wasaht ntahn aramas soh dipe kan.+ 5 Irail kauwada wasa ile kan ong Paal pwe ren isikala neirail seri kan nan kisiniei nin duwen meirong isihs me pwonte isihsla ong Paal,+ mehkot me I sohte kehkehlingki de mahsanih duwe oh sohte mwahn kupwukupwure.”’*+
6 “‘Siohwa ketin mahsanih: “Kahrehda kilang! rahn akan pahn kohdo ahnsou me wasaht sohla pahn adaneki Doped de Wahun Innom* ahpw Wahun Kamakamala.+ 7 I pahn kasapwungehla en Suda oh Serusalem koasoandi kan wasaht, oh I pahn wiahiong ren mehkihla kedlahs mwohn ar imwintihti kan me kin raparapahki en kihsang ar mour. Oh I pahn kihla kenen menpihr en pahnlahng kan oh mahn en sampah kan paliwararail mehla kan.+ 8 Oh I pahn wiahkihla kahnimw wet mehkot kamasepwehk ehu oh mehkot me aramas en kin kuwaiki. Koaros me pahn keid limwahn wasao pahn kangkakil ni masak oh kuwaiki eh kalokolok kan koaros.+ 9 Oh I pahn wiahiong irail en kangala uduk en neirail pwutak kan oh serepein kan, oh emenemen irail pahn kangala uduk en ienge kan, pwehki arail pwunod laud ni ahnsou me arail imwintihti kan oh irail me kin raparapahki en kihsang ar mour kapilirailpene.”’+
10 “Kowe eri kauwehla saho mwohn mesen ohl ako me iang uhk kohla, 11 oh ndaiong irail, ‘Iet me Siohwa kaunen karis en sounpei ketin mahsanih: “Ih met mwomwen ei pahn kauwehla aramas pwukat oh kahnimw wet, duwehte emen me kin kauwehla dahl me sounwia dahl men wiahda, kahrehda e sohte kak pwurehng kamwahula; oh irail pahn sarepedi me mehla kan nan Doped lao sohla wasahn sarepiraildi.”’+
12 “Siohwa ketin mahsanih: ‘Ih duwen met me I pahn wiahiong wasaht oh towe kan, pwehn wiahiong kahnimw wet en duwehla Doped. 13 Oh ihmw kan nan Serusalem oh tehnpesen nanmwarkien Suda kan pahn saminla duwehte wasaht, Doped,+ ei, ihmw koaros me irail kin wia meirong kan pohn imwarail kan ong karis en nanleng*+ koaros oh wasa me irail kin wudekihdi meirong en wain kan ong koht teikan.’”+
14 Ni ahnsou me Seremaia pwurodo sang Doped wasa me Siohwa ketin poaronehla en wia kokohp, e ahpw kesihnenda wasa me kelpene ni tehnpesen Siohwa oh ndaiong aramas ako koaros: 15 “Iet me Siohwa kaunen karis en sounpei, Koht en Israel ketin mahsanih, ‘I pahn wadohng kahnimw wet oh kisin kahnimw kan koaros me kapilpene kahpwal koaros me I mahsaniheki duwe, pwehki re keptakaila oh kahng* peikiong ei mahsen kan.’”+
20 Eri Pasuhr nein Immer, samworo men, me pil wia kaun lapalap nan tehnpesen Siohwa, ahpw wie rongorong ni Seremaia eh kohpada mepwukat. 2 Pasuhr eri wokih soukohp Seremaia oh salihedi nanpwungen lepin tuhke toutou kei*+ me mi ni Ewen Kehl Powe en Pensamin, me mi nan tehnpesen Siohwa. 3 Ahpw mandahn rahno ni ahnsou me Pasuhr lapwahda Seremaia sang ni lepin tuhke toutou ko, Seremaia ahpw ndaiong ih:
“Siohwa ketin kahdanekin uhk Kamasepwehk Wasa Koaros+ a kaidehn Pasuhr. 4 Pwe iet me Siohwa ketin mahsanih, ‘I pahn wiahkinuhkala mehkot kamasepwehk ehu ong pein kowe oh kompoakepahmw kan koaros, oh irail pahn mehkihla kedlahs en ar imwintihti kan ni mesomw kan ar kilikilang;+ oh I pahn kihong Suda pwon nan pehn nanmwarkien Papilon, oh e pahn kalipeirailla nan Papilon oh kemehkinirailla kedlahs.+ 5 Oh I pahn kihong nan pehn arail imwintihti kan mehkoaros me kesempwal nan kahnimw wet, kepwe koaros, soahng kesempwal kan koaros, oh dipwisou kesempwal kan koaros en nanmwarkien Suda kan.+ Oh irail pahn kulihasang oh adihasang mepwukat oh wahla Papilon.+ 6 A kowe, Pasuhr, oh koaros me kin kousoan nan imwomwo, kumwail pahn selidi. Ke pahn kohla Papilon oh mehla wasao, oh ke pahn seridi wasao rehn kompoakepahmw kan koaros, pwehki ke wiahda kokohp likamw ong irail.’”+
7 Komw ketin keteweiehdier, Maing Siohwa, ei, komw ketin keteweiehdier.
Komw ketin doadoahngki sapwellimomwi kehl ong ie oh komw ketin kaloweiehdi.+
I wiahla mehn kepit rahn ehu pwon;
Koaros kin kouruhrkin ie.+
8 Pwe ahnsou koaros me I kin koasoi, I kin anahne werki oh lohki,
“Tiahk lemei oh kamwomwala!”
Pwehki mahsen en Siohwa, I kin sarohdi oh mwamwahlla rahn ehu pwon.+
Ahpw nan mohngiongi sapwellime mahsen duwehla kisiniei ehu me lullul nan tih kat,
Oh I pwangahkidahr kolokol met loalei;
I sohla kak nennenla.+
10 Pwe I rongehr duwen koasoi suwed tohto;
Masak kapiliepene.+
“Kadeikada ih; kitail en kadeikada ih!”
Aramas koaros me mwomwen re men I en ahneki popohl kin mwasamwasahn ei pahn pwupwudi:+
“Mweinele e pahn wiahda sapwung pweipwei ehu,
Oh kitail kak kalowehdi oh dupukohng ih.”
11 Ahpw Siohwa ketin ieiang ie rasehng sounpei kamasepwehk men.+
Ihme kahrehda irail me kin kaloke ie pahn dipekelekel oh sohte pahn kaloweiehdi.+
Irail pahn namenekla douluhl, pwe irail sohte pahn pweida.
Arail namenek pahn poatopoat oh sohte pahn manokonokla.+
12 Ahpw Maing Siohwa kaunen karis en sounpei, komw kin ketin kasawih me pwung men;
Komw kin ketin mahsanih madamadau keieu loal kan* oh mohngiong.+
13 Kouliong Siohwa! Kapinga Siohwa!
Pwe e ketin doarelahr me semwehmwe men sang nan pehn sounwia me suwed kan.
14 Rahn me I ipwidi en riahla!
Kapai en dehr kohwong rahn me ei nohno naitikihiehdi!+
15 En riahla aramas me wahdo rohng mwahu rehn semeio oh nda:
“Kisin pwutak kis ipwidionguhkehr!”
Oh kaperenda ih kowahlap.
16 Aramaso en duwehla kahnimw kan me Siohwa ketin kamwomwala ni eh sohte ketin koluhkihla.
En rong ngilen weriwer nimenseng oh ngilen mahwen nin souwas.
17 Dahme kahrehda e sohte kemeiehla nan kapehden ineio,
Pwe ei nohno en wiahla ei wasahn seridi
Oh e sohte pahn neitik?+
18 Dahme kahrehda I anahne kohieisang nan kapehden inei
Pwe I en kilang kahpwal oh pahtou,
Pwe I en kaimwisekala ei mour ni namenek?+
21 Seremaia eri alehdi mahsen sang Siohwa ni ahnsou me Nanmwarki Sedekaia+ kadaralahng ih Pasuhr+ nein Malkaisa oh samworo Sepanaia+ nein Maaseaia, oh peki reh: 2 “Menlau peki rehn Siohwa ong kiht, pwehki Nanmwarki Nepukadnesar* en Papilon mahmahweniong kiht.+ Mweinele Siohwa pahn ketin wiahda ehu sapwellime wiewia kapwuriamwei kan ong kiht, pwe nanmwarkio en pweiekla sang kiht.”+
3 Seremaia eri ndaiong ira: “Iet me kumwa pahn ndaiong Sedekaia, 4 ‘Iet me Siohwa, Koht en Israel ketin mahsanih: “I pahn kasohpeiong* kumwail tehtehn mahwen kan me mi nan pehmwail kan, me kumwail pepeikihong nanmwarkien Papilon+ oh mehn Kaldia kan me mi likin kehlo kapilkumwailpene. Oh I pahn kihpene mepwukat* nanwerengen kahnimw wet. 5 Oh pein ngehi me pahn peiong kumwail+ sang nin limei roson oh manaman lapalap oh ni engieng kowahlap.+ 6 I pahn kemehla tohn kahnimw wet, aramas oh mahn akan. Irail pahn mehkihla soumwahu lusulus laud ehu.”’+
7 “‘Siohwa eri ketin mahsanih, “Mwurin mwo, I pahn kihong Nanmwarki Sedekaia en Suda oh nah ladu kan oh aramas akan en kahnimw wet—irail me pitsang soumwahu lusuluso, kedlahs, oh lehk lapalapo—nan pehn Nanmwarki Nepukadnesar* en Papilon, nan pehn ar imwintihti kan, nan pehn irail me kin raparapahki en kihsang ar mour.+ E pahn kemehkinirailla kedlahs. E sohte pahn poakeirailla de nsenohkin irail de kasalehiong irail kadek kalahngan.”’+
8 “Oh ke pahn ndaiong aramas pwukat, ‘Iet me Siohwa ketin mahsanih: “I pahn kihdiong mwohmwail ahl en mour oh ahl en mehla. 9 Irail me mihmi nan kahnimw wet pahn mehkihla kedlahs, lehk lapalap, oh soumwahu lusulus. Ahpw mehmen me kohieila oh pekimahk rehn mehn Kaldia kan me kapilkumwailpene pahn momourte, oh e pahn pitila.”’*+
10 “‘Siohwa ketin mahsanih, “Pwe I koasoanedier I en wadohng kahnimw wet* kahpwal ahpw kaidehn soahng mwahu kan.+ Kahnimw wet pahn kohieng nan pehn nanmwarkien Papilon,+ oh e pahn isikala.”+
11 “‘Ong tohn tehnpesen nanmwarkien Suda: Rong mahsen en Siohwa. 12 Kadaudok en Depit, iet me Siohwa ketin mahsanih:
“Utung pwung pahrek nimenseng koaros,
Oh doarehla aramas me sapwung wiawihong sang nan pehn me kin widing,+
Pwe ei engieng en dehr lulda rasehng kisiniei ehu+
Oh lullul ni eh sohte me pahn kakunla
Pwehki amwail wiewia suwed kan.”’+
13 ‘I kin uhwong uhk, tohn wahwo,*
Paip en wasa patapato,’ Siohwa me ketin mahmahsen.
‘A kumwail me nda: “Ihs me pahn kohdihdo uhwong kitail?
Oh ihs me pahn kohlongodo nan atail wasahn kousoan kan?”
14 I pahn kapwukoahkin kumwail
Nin duwen me konehng amwail wiewia kan,’+ Siohwa me ketin mahmahsen.
‘Oh I pahn isikada omw nanwelo,
Oh kisinieio pahn isikala mehkoaros me kapilpene.’”+
22 Iet me Siohwa ketin mahsanih: “Kohdihla ni tehnpesen nanmwarkien Suda, oh wahla rohng wet. 2 Ke pahn nda, ‘Nanmwarkien Suda me kin mwohd nan mwoalen Depit, rong mahsen en Siohwa, kowe oh noumw ladu kan oh noumw aramas akan, irail me kin pedolong ni ewen kehl pwukat. 3 Iet me Siohwa ketin mahsanih: “Utung pwung pahrek oh pwung. Doarehla aramas me sapwung wiawihong sang nan pehn me kin widing. Dehr wiakauwe mehn liki men oh dehr kamedekihala me sepwoupwou men de liohdi men.+ Oh dehr kakerehdi ntahn aramas soh dipe wasaht.+ 4 Pwe ma kumwail kanahieng kapwaiada mahsen wet, eri nanmwarki kan me kin mwohd nan mwoalen Depit+ pahn pedolong ni ewen kehl kan en tehnpas wet ni ar dake kuruma kan oh oahs kan, irail iangahki neirail ladu kan oh neirail aramas akan.”’+
5 “‘Ahpw ma kumwail sohte pahn peikiong mahsen pwukat, I kahukihla ni mwarei me tehnpas wet pahn tehnla,’+ Siohwa me ketin mahmahsen.”
6 “Pwe iet me Siohwa ketin mahsaniheki duwen tehnpesen nanmwarkien Suda,
‘Kowe duwehte Kilead ong ie,
Duwehte kadoken Lepanon.
Ahpw I pahn wiahkinuhkala sapwtehn ehu;
Sohte me pahn kousoan nan omw kahnimw kan.+
Irail pahn pelehdi omw tuhke sidar keieu mwahu kan
Oh keselahng nan kisiniei.+
8 “‘Oh tohnwehi tohto pahn keid limwahn kahnimw wet oh ndapene: “Dahme Siohwa ketin wiahkihda soahng wet ong kahnimw kalaimwun wet?”+ 9 Oh irail pahn sapengki: “Pwehki irail kesehla inou lap en Siohwa arail Koht oh poaridiong koht teikan oh papah irail.”’+
10 Kumwail dehr sengisengki me mehla men,
Oh dehr poakehla ih.
Ahpw, kumwail sengisengki kowahlap me pahn kohkohlao,
Pwe e sohla pahn pwurodo pwehn kilang sahpw me e ipwidi ie.
11 “Pwe iet me Siohwa ketin mahsaniheki duwen Sallum*+ nein Sosaia, nanmwarkien Suda me wiliandi semeo Sosaia kakaun+ oh me kohieisangehr wasaht: ‘E sohla pahn pwurodo wasaht. 12 Pwe e pahn mehla wasa me irail kalipehla ieo, oh e sohla pahn kilang sahpwet.’+
13 Meid suwediong me kauwada imwe ni eh sohte nsenohki pwung
Oh wiahda eh perehn powe kan ni wiewia sapahrek,
Me koadoadoahkih ienge men ni soh isepe,
Oh kahng kihong pweinen eh doadoahk;+
14 Me kin nda, ‘I pahn kauwada imwei ihmw laud ehu
Me perehn powe kan pahn tehlap.
I pahn kihong wenihmwtok kan
Oh kidimkihla tuhke sidar oh litopwiheki litopw weitahta.’
15 Ia duwe, ke pahn wie kakaunte pwehki ke siksang meteikan ni omw doadoahngki sidar?
16 E utung repenpwung en me lokolok men oh me semwehmwe men,
Eri met pweida mwahu.
‘Kaidehn ih met wehwehn en ese ie?’ Siohwa me ketin mahmahsen.
17 ‘Ahpw mesomw kan oh mohngiongomw kin koasoanehdihte en ale kamwahupomw ni likamw,
En kakerehdi ntahn aramas soh dipe,
Oh en widing oh kulih mehkot.’
18 “Kahrehda iet me Siohwa ketin mahsaniheki duwen Sehoiakim+ nein Sosaia, nanmwarkien Suda,
‘Irail sohte pahn mwahieiki ih:
“Riei pwutak! Riei serepein!”
Irail sohte pahn mwahieiki ih:
“Soumas! Eh roson lapalap!”
19 E pahn seridi duwehte seridi en dongki men,+
E pahn wurahdekieila oh lekdekla,
Likin ewen kelen Serusalem kan.’+
20 Kohdahla Lepanon oh wer,
Ngihl laudida nan Pasan,
Oh wersang Aparim,+
Pwe omw mwohnlimpoak koaros mwutpenehr.+
21 I koasoiong uhk ni omw sohte perki mehkot.
Ahpw ke nda, ‘I sohte pahn peik.’+
Ih met elen omw mour sangete ni omw pwulopwul,
Pwe ke sohte kin peikiong kapitiei.+
22 Kisinieng ehu pahn ipirala noumw silepen sihpw kan koaros,+
Oh omw mwohnlimpoak kan pahn selidi.
Eri ke pahn namenekla oh sarohdi pwehki omw kahpwal kan koaros.
23 Kowe me kin kousoan nan Lepanon,+
Wonohn nanpwungen sidar kan,+
Ia uwen omw pahn ingihngtik ni ahnsou me medek pahn lelohng uhk,
24 “Siohwa ketin mahsanih, ‘Nin duwen ei ieias, mehnda ma Konaia*+ nein Sehoiakim,+ nanmwarkien Suda, me wia rihng en sidamp nin limei palimaun, I pahn waikuhkasang wasao! 25 I pahn kihiukala nan pehn irail me raparapahki ren kihsang omw mour, nan pehn irail me ke kin masak, nan pehn Nanmwarki Nepukadnesar* en Papilon, oh nan pehn mehn Kaldia kan.+ 26 Oh I pahn keseiukala oh omw nohno me naitikihiukedi nan sahpw ehu me kumwail sohte ipwidi ie, oh kumwail pahn mehla wasao. 27 Oh irail sohte mwahn pahn pwurala nan sahpw me irail men pwuralahngo.+
28 Ia duwe, ohl menet Konaia ihte sah ehu me mwamwahlla oh ohla,
Dahl ehu me sohte me men naineki?
Dahme kahrehda ih oh kadaudoke kan lekdekla
Oh lekdekiong nan sahpw ehu me re sehse duwe?’+
29 Sampah,* sampah, sampah, rong mahsen en Siohwa.
30 Iet me Siohwa ketin mahsanih:
‘Ntingihedi ohl menet nin duwen emen me sohte nah seri,
Nin duwen ohl emen me sohte pahn pweida erein eh mour,*
Pwe sohte emen kadaudoke kan pahn pweida
Ni eh mwohd nan mwoalen Depit oh pwurehng kakaun nan Suda.’”+
23 Siohwa ketin mahsanih, “Meid suwediong silepen sihpw kan me kin kauwehla oh pwakihpeseng sihpw kan nan ei mohs!”+
2 Kahrehda iet me Siohwa, Koht en Israel ketin mahsanihong silepen sihpw kan me kin apwalih nei aramas akan: “Kumwail pwakihpesengier nei sihpw kan; kumwail kin kamwarakirailpeseng, oh kumwail sohte kin nsenohkin irail.”+
“Eri I sohte pahn nsenohkin kumwail pwehki amwail wiewia suwed kan,” Siohwa me ketin mahmahsen.
3 “Eri I pahn kapokonepene nei sihpw kan me luhwehdi sang sahpw koaros me I kamwarakirailpeseng ie,+ oh I pahn kapwureiraildo nan arail mohso,+ oh irail pahn kaparaparala oh tohtohla.+ 4 Oh I pahn idihada pohrail silepen sihpw kan me uhdahn pahn apwalih irail.+ Irail sohla pahn perki de masak mehkot, oh sohte me pahn salongala,” Siohwa me ketin mahmahsen.
5 Siohwa ketin mahsanih, “Kilang! Rahn akan pahn kohdo ahnsou me I pahn kawosehda pons* pwung ehu sang Depit.+ Oh nanmwarki men pahn kaunda+ oh kasalehda eh dehde oh utung pwung pahrek oh pwung nan sahpwo.+ 6 Nan eh mwehi Suda pahn poadoandoarla,+ oh Israel pahn kousoan ni eh sohte perki mehkot.+ Oh ih ahd wet me e pahn adaneki: Siohwa me Atail Pwung.”+
7 Siohwa ketin mahsanih: “Ahpw, rahn akan pahn kohdo ahnsou me irail sohla pahn nda: ‘Nin duwen Siohwa eh ketin ieias, me ketin kahluwahdo aramas en Israel kan sang nan sapwen Isip!’+ 8 ahpw re pahn nda: ‘Nin duwen Siohwa eh ketin ieias, me ketin wahieido oh kapwurehdo kadaudok en aramas en Israel kan sang nan sapwen paliepeng oh sang sahpw koaros me I kamwarakirailpeseng ie,’ oh irail pahn kousoan nan pein sapwarail.”+
9 Me pid duwen soukohp kan:
Mohngiongi ohlahr loaleiet.
Tih kat koaros wie rerrer.
I duwehte aramas emen me sakaulahr
Oh duwehte aramas emen me lohdi pahn wain,
Pwehki Siohwa oh sapwellime mahsen sarawi kan.
10 Pwe sahpwo direkilahr aramas akan me kin kamwahl;+
Sahpwo wie mwahmwahiei pwehki e riahla+
Oh mohs kan en sapwtehno mengilahr.+
Arail elen mour me suwed, oh irail kin doadoahngki suwed ar manaman.
11 Siohwa ketin mahsanih: “Soukohp akan oh samworo kan saminlahr.*+
I pil diaradahr ar wiewia suwed kan nan tehnpesei.”+
12 Siohwa ketin mahsanih: “Eri ar ahl akan pahn likekiris oh rotorot;+
Mie me pahn siken irail oh re pahn pwupwudi.
Pwe I pahn wadohng pohrail kahpwal
Nan pahr en kadeik.
13 Oh I kilangehr mehkot kasaut rehn soukohp en Sameria kan.+
Re kohpada ni eden Paal,
Oh re kasalongehla nei aramas en Israel kan.
14 Oh I kilangehr soahng suwed kan rehn soukohp en Serusalem kan.
Re kin wia kamwahl+ oh weweid ni likamw;+
Re kin kangoange* sounwia me suwed kan,
Oh re sohte kin sohpeisang ar wiewia suwed kan.
15 Kahrehda iet me Siohwa kaunen karis en sounpei ketin mahsanihong soukohp akan:
“I pahn katungoalehki irail tuhke sadik
Oh kihong irail pihl pwoisin pwe ren nim.+
Pwe soukohp en Serusalem kan kahrehiong aramas akan ren sohpeisang Koht nan sahpwo pwon.”
16 Iet me Siohwa kaunen karis en sounpei ketin mahsanih:
“Kumwail dehr rong mahsen en soukohp akan me kin wiewia kokohp ong kumwail.+
Re kin pitipitih kumwail.*
17 Re kin pwurupwurehng ndindaiong irail me kin mwamwahlikin ie,
‘Siohwa ketin mahsanih: “Kumwail pahn ahneki popohl.”’+
Oh re kin ndaiong koaros me kin idawehn ar mohngiong keptakai,
‘Sohte kahpwal pahn lelohng kumwail.’+
18 Pwe ihs me kin kesihnenda nanpwungen aramas akan me karanih Siohwa
Pwehn kilang oh rong sapwellime mahsen?
Ihs me kin tehk sapwellime mahsen pwehn rong?
19 Kilang, engieng en Siohwa pahn ipido ni kehlail duwehte melimel ehu;
Rasehng elipip kehlail ehu e pahn ipidohng pohn moangen me suwed kan.+
20 Sapwellimen Siohwa engieng sohte pahn meleileidi
Lao e ketin kapwaiada oh kanekehla dahme e ketin kupwurki.*
Ni kaimwiseklahn rahn akan kumwail uhdahn pahn wehwehkihla met.
21 I sohte kadarala soukohp kan, ahpw re tangala.
I sohte mahseniong irail, ahpw re kohpada.+
22 Ahpw ma irail kesihnenda nanpwungen aramas akan me karanih ie,
Re pahn wiahiong nei aramas akan ren rong ei mahsen kan
Oh re pahn kahrehiong irail en sohpeisang elen ar mour suwed kan oh ar wiewia suwed kan.”+
23 Siohwa ketin mahsanih: “Ia duwe, ngehi Koht emen ni ei ketikette wasa keren, a kaidehn Koht emen ni ei ketiket wasa doh?”
24 Siohwa ketin mahsanih: “Ia duwe, aramas emen kak rukula wasa rir ehu me I sohte kak kilang?”+
“I sou kak kilang mehkoaros nanleng oh sampah?”*+ Siohwa me ketin mahmahsen.
25 “I rongada soukohp akan me wiewia kokohp likamw akan ni mwarei, ndinda, ‘I ouramanda! I ouramanda!’+ 26 Ia erein met eh pahn wiewiawi nan mohngiong en soukohp akan, pwe ren wia kokohp likamw kan? Irail soukohp kei me kin koasoi likamw sang nan ar mohngiong.+ 27 Re kin song en wiahiong nei aramas akan ren manokehla mwarei sang ni ouraman kan me re kin ndaiong emenemen, duwehte samarail ko ar manokehla mwarei pwehki Paal.+ 28 Soukohp me ouramandao en koasoiahda ouramano, ahpw mehmen me ale ei mahsen en koasoia ei mahsen ni mehlel.”
“Ia duwen reh meng eh kak kapahrekiong krein?” Siohwa me ketin mahmahsen.
29 Siohwa ketin mahsanih: “Ei mahsen sou rasehng kisiniei ehu+ oh rasehng ama ehu me kin sukpeseng paipalap?”+
30 Siohwa ketin mahsanih: “Eri I kin uhwong soukohp akan me pirapahda ei mahsen kan sang emenemen.”+
31 Siohwa ketin mahsanih: “I kin uhwong soukohp akan, irail me kin doadoahngki lowarail kan pwe ren nda, ‘E ketin lohki!’”+
32 Siohwa ketin mahsanih: “I kin uhwong soukohp akan me kin koasoia ouraman likamw kan oh kasalongehla nei aramas akan pwehki ar likamw kan oh ar suwei kan.”+
“Ahpw I sohte kadarirailla de kehkehlikiong irail. Eri irail sohte douluhl pahn wia kamwahu ong aramas pwukat,”+ Siohwa me ketin mahmahsen.
33 “Oh ni aramas pwukat de soukohp men de samworo men ar idek rehmw, ‘Ia wisik toutou* en Siohwa?’ ke pahn sapengkin irail, ‘“Kumwail aramas akan me wisik toutou! Oh I pahn keseikumwailla,”+ Siohwa me ketin mahmahsen.’ 34 A me pid duwen soukohpo de samworo de aramaso me nda, ‘Iet wisik toutou* en Siohwa!’ I pahn sohpeiong aramaso oh tohnimwe. 35 Iet me emenemen kumwail kin ndaiong ienge oh rie, ‘Dahme Siohwa ketin sapengki? Oh dahme Siohwa ketin mahsanih?’ 36 Ahpw, kumwail sohla pahn koasoia wisik toutou* en Siohwa, pwe wisik toutowo* iei en emenemen lokaia, oh kumwail wekidalahr mahsen kan en Koht ieias, Siohwa kaunen karis en sounpei, atail Koht.
37 “Iet me ke pahn ndaiong soukohpo, ‘Pasapeng dah me Siohwa ketikihong uhk? Oh dahme Siohwa ketin mahsanih? 38 Oh ma kumwail kin ndinda, “Wisik toutou* en Siohwa!” iet me Siohwa ketin mahsanih: “Pwehki amwail ndinda, ‘Mahsen wet me wisik toutou* en Siohwa,’ mwurin ei ndaiong kumwail, ‘Kumwail dehr nda: “Wisik toutou* en Siohwa!”’ 39 kilang! I pahn pwengkumwailda oh keseikumwailla sang mwohi, kumwail oh kahnimw me I kihong kumwail oh samamwail mehn mahs ako. 40 Oh I pahn wiahiong kumwail en mwamwahlla kohkohlahte oh namenekla kohkohlahte, me sohte pahn manokonokla.”’”+
24 Siohwa eri ketin kasalehiong ie kopwoun pik riau me kohdi mwohn tehnpesen Siohwa, mwurin Nanmwarki Nepukadnesar* en Papilon eh kalipehla Sekonaia*+ nein Sehoiakim,+ nanmwarkien Suda, iangahki lapalap en Suda kan, tohndoadoahk saman kan, oh sounsukmete kan;* e wairailsang Serusalem kohla Papilon.+ 2 Ehu kopwowo audaudki pik kan me inenen kaselel, duwehte me kin mwadangete matala,* ahpw kopwou teio audaudki pik kan me uhdahn sakanakan, uwen ar sakanakan sohte me kak tungoale.
3 Siohwa eri ketin keinemwe rehi: “Seremaia, dahme ke kilang?” Ngehi eri patohwan: “Pik kei; pik mwahu kan me inenen kaselel, ahpw me sakanakan ko uhdahn sakanakan, uwen ar sakanakan sohte me kak tungoale.”+
4 Siohwa ketin mahsanihong ie: 5 “Iet me Siohwa, Koht en Israel ketin mahsanih, ‘Duwehte pik mwahu pwukat, eri I pahn wiahki irail me kalipilipasang Suda kan me mwahu, me I kadarala sang wasaht oh kadaralahng nan sapwen mehn Kaldia kan. 6 I pahn sinsile irail ong kamwahuparail, oh I pahn wiahiong irail en pwurodo nan sahpwet.+ I pahn kauirailda, oh I sohte pahn kauweirailla; I pahn padokiraildi, oh I sohte pahn usirailda.+ 7 Oh I pahn kihong irail mohngiong ehu me inengieng eseiehla, me ngehi me Siohwa.+ Irail pahn wiahla nei aramas, oh I pahn wiahla ar Koht,+ pwe irail pahn pwurodo rehi ni mohngiong unsek.+
8 “‘A me pid duwen pik sakanakan ko, me uwen ar sakanakan sohte me kak tungoale,+ iet me Siohwa ketin mahsanih: “Ih met me I pahn wiahki Nanmwarki Sedekaia+ en Suda, nah lapalap akan, me luhwehdi kan en Serusalem me mihmihte nan sahpwet, oh irail me koukousoan nan sapwen Isip.+ 9 I pahn wiahkinirailla mehkot kamasepwehk ehu oh kahpwal ong wehi koaros en sampah,+ kanamenek ehu, lepin kahs ehu, mehn kepit ehu, oh mehn keria ehu+ nan wasa koaros me I kamwarakirailpeseng ie.+ 10 Oh I pahn kadarohng irail kedlahs,+ lehk lapalap, oh soumwahu lusulus,+ lao re sohrasang nan sahpw me I kihong irail oh samarail mehn mahs ako.”’”
25 Mahsen me mahsendohng Seremaia duwen aramas en Suda koaros ni kapahieun sounpar en Sehoiakim+ nein Sosaia, nanmwarkien Suda, me iei keieun sounpar en Nanmwarki Nepukadnesar* en Papilon. 2 Iet me soukohp Seremaia koasoiahki duwen* aramas en Suda koaros oh tohn Serusalem koaros:
3 “Sang ni kaeisek siluhn sounpar en Sosaia+ nein Amon, nanmwarkien Suda, leledo rahnwet, sounpar 23 pwukat, Siohwa ketin mahseniong ie, oh I kin pwurupwurehng* koasoiong kumwail, ahpw kumwail sohte kin rong.+ 4 Oh Siohwa kin ketin kadarewei rehmwail sapwellime ladu kan koaros me wia soukohp kan, e kin ketin pwurupwurehng* kadarirailewei, ahpw kumwail sohte kin rong de rong kanahieng.+ 5 Irail kin nda, ‘Menlau, emenemen kumwail en sohpeisang amwail ahl suwed kan oh amwail wiewia suwed kan;+ eri kumwail ahpw pahn usehlahte koukousoan ahnsou werei nan sahpw me mahso Siohwa ketikihong kumwail oh samamwail mehn mahs ako. 6 Kumwail dehr kansensuwedihkin ie doadoahk en pehmwail kan ni amwail kin idawehn koht teikan oh papah irail oh poaridiong irail; ma kumwail wia met, I pahn wadohng kumwail kahpwal.’
7 “Siohwa ketin mahsanih, ‘Ahpw kumwail sohte kin rong ie. Kumwail kin kansensuwedihkin ie doadoahk en pehmwail kan, oh pein wadohng kumwail kahpwal.’+
8 “Kahrehda iet me Siohwa kaunen karis en sounpei ketin mahsanih: ‘“Pwehki kumwail sohte kin peikiong ei mahsen kan, 9 I pahn ekerodo peneinei koaros en paliepeng,”+ Siohwa me ketin mahmahsen, “I pahn ekerodo Nanmwarki Nepukadnesar* en Papilon, ei laduwo,+ oh I pahn wairaildo en uhwong sahpwet+ oh towe kan oh wehi pwukat koaros me kapilpene.+ I pahn kamwomwirailla oh wiahkinirailla mehkot kamasepwehk ehu oh mehkot me aramas en kin kuwaiki oh wasa tehn ehu kohkohlahte. 10 I pahn katokehdi ngilen peren oh ngilen nsenamwahu sang irail,+ ngilen ohl kamwohd oh ngilen lih kamwohd,+ ngilen mehn ngidar pilawa* oh lingen lamp. 11 Oh sahpwet pwon pahn tehnla oh pahn wiahla mehkot kamasepwehk ehu, oh wehi pwukat pahn anahne papah nanmwarkien Papilon erein sounpar 70.”’+
12 “Siohwa ketin mahsanih, ‘Ahpw ni ahnsou me e lel sounpar 70,+ I pahn kapwukoahki* nanmwarkien Papilon oh wehio ar sapwung kan,+ oh I pahn wiahkihla sapwen mehn Kaldia kan sahpw ehu me tehnla kohkohlahte.+ 13 I pahn kahrehiong ei mahsen koaros me I mahsaniheki duwen sahpwo en wiawi, mehkoaros me ntingdi nan pwuhk wet me Seremaia kohpadahr ong wehi koaros. 14 Pwe wehi tohto oh nanmwarki lapalap akan+ pahn wiahkinirailla lidu kei,+ oh I pahn dupungkihong irail nin duwen arail wiewia kan oh doadoahk en pehrail kan.’”+
15 Pwe iet me Siohwa, Koht en Israel ketin mahsanihong ie: “Ale kep en wain en engieng wet sang nin limei, oh wiahiong wehi koaros me I kadaruhkalahng ie ren nim. 16 Oh irail pahn nim oh wasawasasseli oh mwekid duwehte aramas sahliel pwehki kedlahs me I pahn kadarala nanpwungarail.”+
17 Ngehi eri ale kepo sang nin limen Siohwa oh wiahiong wehi koaros me Siohwa ketin kadarielahng ie ren nim:+ 18 tepida sang Serusalem oh kahnimw en Suda kan,+ eh nanmwarki kan oh nah lapalap akan, pwehn wiahkinirailla mohn kahnimw ehu, mehkot kamasepwehk ehu, mehkot me aramas en kin kuwaiki oh mehn keria ehu,+ duwehte me wiawi rahnwet; 19 mwuri Parao nanmwarkien Isip oh nah ladu kan, nah lapalap akan, oh nah aramas akan koaros,+ 20 oh mehn liki kan koaros me kousoan nanpwungarail; nanmwarki koaros en sapwen Us; nanmwarki koaros en sapwen mehn Pilisdia kan,+ Askelon,+ Kasa, Ekron oh irail kan me luhwehdi nan Asdod; 21 Edom,+ Mohap+ oh mehn Ammon kan;+ 22 nanmwarki koaros en Dair, nanmwarki koaros en Saidon,+ oh nanmwarki kan en dekehn nansed kan; 23 Dedan,+ Tima, Pus oh koaros me kin sehkasang pengepengen pitenmoangarail kan;+ 24 nanmwarki koaros en mehn Arepia kan+ oh nanmwarki koaros en soangsoangen aramas koaros me kin kousoan nan sapwtehn; 25 nanmwarki koaros en Simri, nanmwarki koaros en Elam,+ oh nanmwarki koaros en mehn Media kan;+ 26 oh nanmwarki koaros en paliepeng me keren oh doh, emente mwurin emen, oh wehi teikan koaros en sampah; oh nanmwarkien Sihsak*+ pahn nim mwurin irail koaros.
27 “Oh ke pahn ndaiong irail, ‘Iet me Siohwa kaunen karis en sounpei, Koht en Israel, ketin mahsanih: “Kumwail nim oh sakaula oh mwus oh pwupwudi pwe kumwail en sohte kak pwourda+ pwehki kedlahs me I pahn kadarewei nanpwungamwail.”’ 28 Oh ma irail kahng ale kepo sang nan pehmwen pwe ren nim, ndaiong irail, ‘Iet me Siohwa kaunen karis en sounpei ketin mahsanih: “Kumwail pahn anahne nim! 29 Pwe kilang! ma I pahn wahdo mahs kahpwal pohn kahnimw wet me kin kolokol mwarei,+ ia duwe, kumwail sohte pahn iang ale kalokolok?”’+
“‘Kumwail uhdahn pahn ale kalokolok, pwe I pahn kadarewei kedlahs pwoat ong tohnsampah pwon,’ Siohwa kaunen karis en sounpei me ketin mahmahsen.
30 “Oh ke pahn kohpada mahsen pwukat koaros ong irail oh ndaiong irail,
‘Sang wasa ile Siohwa pahn ketin wer rasehng laion men,
Oh sang sapwellime wasahn kousoan sarawio e pahn ketin wiahiong ren rong kapitie.
E pahn ketin ngiringirisek laud ong sapwellime wasahn kousoan meleileio.
Weriwer duwehte irail me tihtiak kreip kan,
E pahn ketin koulki koulen kana ong tohnsampah koaros.’
31 ‘Ngihl ehu pahn lella ni imwin sampah,
Pwe Siohwa ketin akupwungiong wehi kan.
E pahn ketin kadeikada aramas koaros.*+
Oh e pahn ketin kemehkihla me suwed kedlahs,’ Siohwa me ketin mahmahsen.
32 Iet me Siohwa kaunen karis en sounpei ketin mahsanih:
‘Kilang! Kahpwal ehu wie kohkohpeseng sang ehu wehi lel ehu wehi,+
Oh melimel laud ehu pahn sapwedekda sang wasa me keieu doh kan nin sampah.+
33 “‘Oh irail me Siohwa ketin kemehla rahno pahn mihmiseli sang ni imwin sampah lel ni imwi teio. Sohte me pahn mwahieikin irail, de pil kihirailpene de sarepiraildi. Irail pahn duwehla koiasi pohn pwehl.’
34 Mwahiei, kumwail silepen sihpw kan, wer!
Tapwurseli nan pwelpar, kumwail lapalap en pelin sihpw kan,
Pwehki ahnsoun amwail kamakamala oh kohpeseng leledohr,
Oh kumwail pahn pwupwudi duwehte dahl kesempwal ehu!
35 Sohte wasa silepen sihpw kan pahn tangala ie,
Oh lapalap en pelin sihpw kan sohte pahn pitila.
36 Rong! Ngilen weriwer en silepen sihpw kan
Oh mwahiei en lapalap en pelin sihpw kan,
Pwe Siohwa ketin kauwelahr arail mohso.
37 Oh sohla mehkot mour nan wasahn kousoan meleilei kan
Pwehki sapwellimen Siohwa engieng kowahlap.
38 Rasehng laion pwulopwul men,*+ e ketieisangehr nan dewe
Pwe sapwarailo wiahla mehkot kamasepwehk ehu
Pwehki kedlahs lemei
Oh pwehki sapwellime engieng kowahlap.”
26 Ni tepin mwehin Sehoiakim+ nein Sosaia, nanmwarkien Suda, mahsen wet kohsang rehn Siohwa: 2 “Iet me Siohwa ketin mahsanih, ‘Kesihnenda wasa me kelpene ni tehnpesen Siohwa oh koasoia duwen* aramas koaros en kahnimw en Suda kan me kin kohlongodohng kaudok* ni tehnpesen Siohwa. Ndaiong irail mehkoaros me I kehkehlingkihong uhk; ke dehpa kihsang mahsen ehute. 3 Mweinele irail pahn rong oh emenemen irail pahn sohpeisang eh ahl suwed, oh I pahn wekidala ei lamalam duwen* kahpwal me I koasoanehdi en wadohng pohrail pwehki ar wiewia suwed kan.+ 4 Ndaiong irail: “Iet me Siohwa ketin mahsanih, ‘Ma kumwail sohte pahn rong ie ni amwail idawehn ei kosonned* me I kihdi mwohmwail, 5 oh ma kumwail sohte rong mahsen en nei ladu kan, me iei, soukohp kan me I kin pwurupwurehng* kadarewei rehmwail,+ 6 eri I pahn wiahiong tehnpas wet en duwehla Sailo,+ oh I pahn wiahiong kahnimw wet nin duwen mehn keria ehu ong wehi koaros en sampah.’”’”+
7 Oh samworo ko oh soukohp ko oh aramas ako koaros ahpw rongada Seremaia eh koasoakoasoia mahsen pwukat nan tehnpesen Siohwa.+ 8 Eri ni Seremaia eh kaerala eh koasoia mehkoaros me Siohwa ketin kehkehlingkihong ih en koasoiaiong aramas ako koaros, samworo ko oh soukohp ko oh aramas ako koaros ahpw koledi ih oh nda: “Ke uhdahn pahn mehla. 9 Dahme ke wie kokohpki ni mwaren Siohwa, ndinda, ‘Tehnpas wet pahn duwehla Sailo, oh kahnimw wet pahn mwomwla oh sohla towe’?” Aramas ako koaros eri kapilpene Seremaia nan tehnpesen Siohwa.
10 Ni ahnsou me lapalap en Suda kan rongada mahsen pwukat, re ahpw kohdahdo sang ni tehnpesen nanmwarkio kohdo ni tehnpesen Siohwa oh mwohndi ni wasahn pedolong en ewen kehl kapw en tehnpesen Siohwa.+ 11 Samworo ko oh soukohp ko eri ndaiong lapalap ako oh aramas ako koaros: “Ohl menet warohng kalokepen kamakamala,+ pwehki e kohpadahr kahpwal ehu ong kahnimw wet duwehte me kumwail rongkiher salengamwail kan.”+
12 Seremaia eri ndaiong lapalap ako koaros oh aramas ako koaros: “Siohwa me ketin poaroneiehdo pwe I en wia kokohp ong tehnpas wet oh kahnimw wet ni mahsen koaros me kumwail rongehr.+ 13 Eri, kamwahwihala elen amwail mour oh amwail wiewia kan oh peikiong kapitien Siohwa amwail Koht, oh Siohwa pahn ketin wekidala kupwure duwen* kahpwal me e ketin mahsanihong kumwail.+ 14 A duwen ngehi, I milahr nan pehmwail kan. Kumwail wiahiong ie sohte lipilipil dahme mwomwen mwahu oh pwung nan masamwail kan. 15 Ihte kumwail en uhdahn ese me ma kumwail kemeiehla, kumwail oh kahnimw wet oh towe kan pahn pwukoahki ntahn aramas soh dipe men, pwe mehlel me Siohwa ketin poaroneiehdo pwe I en koasoia mahsen pwukat koaros ni amwail rongorong.”
16 Lapalap ako oh aramas ako koaros eri ndaiong samworo ko oh soukohp ko: “Ohl menet sohte warohng kalokepen kamakamala, pwe e koasoiong kitail ni mwaren Siohwa atail Koht.”
17 Oh pil, ekei ohl mah kan en sahpwo ahpw uhda oh tepida ndindaiong mwomwohdisohn aramas ako pwon: 18 “Maika+ en Moresed wiewia kokohp ni mwehin Nanmwarki Esekaia+ en Suda, oh e ndaiong aramas en Suda koaros, ‘Iet me Siohwa kaunen karis en sounpei ketin mahsanih:
“Saion pahn deipwelda rasehng mwaht ehu,
Serusalem pahn wiahla koasoakoasoak en mohn kahnimw,+
Oh nahnahn Tehnpaso pahn duwehla wasa ile kan en nanwel ehu.”’+
19 “Eri, ia duwe, Nanmwarki Esekaia en Suda oh Suda pwon kemehla ih? E sou kin lemmwiki Siohwa oh peki sapwellimen Siohwa kupwuramwahu, pwe Siohwa en ketin wekidala kupwure duwen* kahpwal me e ketin mahsanihong irail?+ Eri kitail nektehn wadohng pohtail kahpwal laud ehu.
20 “Oh pil mie ohl emen me wiewia kokohp ni mwaren Siohwa, Uraisa nein Semaia sang Kiriad-searim,+ me wia kokohp ong kahnimw wet oh sahpwet ni eh doadoahngki mahsen kan me duwehte en Seremaia mahsen kan. 21 Nanmwarki Sehoiakim+ oh nah ohl kehlail kan koaros oh lapalap akan koaros ahpw rongada eh mahsen ko, oh nanmwarkio rapahki en kemehla ih.+ Ni Uraisa eh rongada met, e ahpw masepwehkada oh tangala Isip. 22 Nanmwarki Sehoiakim eri kadarala Elnadan+ nein Akpor oh ohl teikan Isip. 23 Irail wahdo Uraisa sang Isip oh wahla rehn Nanmwarki Sehoiakim, me kemehkihla ih kedlahs+ oh kesehiong paliwar mehlao nan sousoun me semwehmwe kan.”
24 Ahpw Ahikam+ nein Sapan+ utung Seremaia, kahrehda e sohte pengpengla rehn aramas ako pwe en kamakamala.+
27 Ni tepin mwehin Sehoiakim nein Sosaia, nanmwarkien Suda, Siohwa ketin mahsanihong Seremaia: 2 “Iet me Siohwa ketin mahsanihong ie, ‘Wiahda noumw sahl oh tuhkehn wisik, oh kidahng mepwukat ni tepinweromw. 3 Kowe eri kadarala mepwukat rehn nanmwarkien Edom,+ nanmwarkien Mohap,+ nanmwarkien mehn Ammon kan,+ nanmwarkien Dair+ oh nanmwarkien Saidon+ sang ni pehn meninkeder kan me kohdo Serusalem rehn Nanmwarki Sedekaia en Suda. 4 Kihong irail kehkehlik wet ong arail soumas kan:
“‘“Iet me Siohwa kaunen karis en sounpei, Koht en Israel ketin mahsanih; iet me kumwail pahn ndaiong amwail soumas kan, 5 ‘Iei ngehi me wiahda sampah, aramas akan, oh mahn akan me mi pohn sampah sang ni ei roson lapalap oh nin limei kehlail; oh I kihongehr sohte lipilipil me I kupwurperenki.*+ 6 Oh met I kihongehr sahpw pwukat koaros nan pehn ei laduwo Nanmwarki Nepukadnesar+ en Papilon; I pil kihong ih mahn lawalo kan en nanwel pwe ren papah ih. 7 Wehi koaros pahn papah ih oh nah pwutak oh nein nah pwutak lao lel ahnsou me eh wehio pahn imwisekla,+ ni ahnsou me wehi tohto oh nanmwarki lapalap akan pahn wiahkihla ih neirail lidu.’+
8 “‘“‘Ma tohnwehi ehu de wehi ehu kahng papah Nanmwarki Nepukadnesar en Papilon oh kahng kihong tepinwere pahn mehn wisik en nanmwarkien Papilon, I pahn kalokehki wehio kedlahs,+ lehk lapalap oh soumwahu lusulus lao I kasohreirailla sang nan peh,’ Siohwa me ketin mahmahsen.
9 “‘“‘Eri, kumwail dehr rong noumwail soukohp kan, noumwail sounkosetipw kan, noumwail sounouraman kan, noumwail sounakmanaman kan, me kin ndinda: “Kumwail sohte pahn papah nanmwarkien Papilon.” 10 Pwe irail wiewia kokohp likamw ong kumwail, pwe kumwail en wisiksang nan sapwamwailo kohla wasa doh oh I pahn kamwarangkumwailpeseng oh kumwail pahn sohrala.
11 “‘“‘Ahpw wehi me kihdiong tepinwere pahn mehn wisik en nanmwarkien Papilon oh papah ih, I pahn mweidohng en mihmihte* nan sapwe pwehn apwalih oh kousoan loale,’ Siohwa me ketin mahmahsen.”’”
12 Ni ahlohte I pil ndaiong Nanmwarki Sedekaia+ en Suda: “Kumwail kihdiong tepinweramwail kan pahn mehn wisik en nanmwarkien Papilon oh papah ih oh nah aramas akan, oh kumwail ahpw pahn momour.+ 13 Ia kahrepen kowe oh noumw aramas akan en mehkihla kedlahs,+ lehk lapalap+ oh soumwahu lusulus,+ duwehte me Siohwa ketin mahsaniheki duwen wehi me sohte pahn papah nanmwarkien Papilon? 14 Kumwail dehr rong mahsen en soukohp ko me kin ndaiong kumwail, ‘Kumwail sohte pahn papah nanmwarkien Papilon,’+ pwehki re wiewia kokohp likamw ong kumwail.+
15 “Siohwa ketin mahsanih: ‘Pwe I sohte kadarirailewei, ahpw re wiewia kokohp likamw ni mwarei, me pahn kahrehda ei kamwarangkumwailpeseng oh kumwail pahn sohrala, kumwail oh soukohp kan me wie kokohp ong kumwail.’”+
16 Oh I ndaiong samworo kan oh aramas pwukat koaros: “Iet me Siohwa ketin mahsanih, ‘Kumwail dehr rong mahsen en noumwail soukohp kan me wie kokohp ong kumwail: “Kilang! Dipwisou kan en tehnpesen Siohwa pahn wisikdohsang Papilon ni ahnsou keren!”+ pwe re wiewia kokohp likamw ong kumwail.+ 17 Kumwail dehr rong irail. Papah nanmwarkien Papilon oh kumwail ahpw pahn momour.+ Ia kahrepen kahnimw wet en wiahla mohn kahnimw ehu? 18 Ahpw ma irail soukohp kei oh ma mahsen en Siohwa mi rehrail, menlau mweidohng irail ren peki rehn Siohwa kaunen karis en sounpei, pwe dipwisou kan me luhwehdi nan tehnpesen Siohwa, nan tehnpesen nanmwarkien Suda oh nan Serusalem en dehr wisikla Papilon.’
19 “Iet me Siohwa kaunen karis en sounpei ketin mahsaniheki duwen uhr ko,+ Sehd pronso,*+ kuruma ko,+ oh dipwisou ko me luhwehdi nan kahnimw wet, 20 me Nanmwarki Nepukadnesar en Papilon sohte wahsang ni ahnsou me e kalipehla Sekonaia nein Sehoiakim, nanmwarkien Suda, sang Serusalem kohla Papilon, iangahki nah lapalap akan koaros en Suda oh Serusalem;+ 21 ei, iet me Siohwa kaunen karis en sounpei, Koht en Israel, ketin mahsaniheki duwen dipwisou ko me luhwehdi nan tehnpesen Siohwa, nan tehnpesen nanmwarkien Suda, oh nan Serusalem: 22 ‘“Re pahn wisiklahng Papilon,+ oh irail pahn mihmi wasao lao lel rahn me I pahn sohpeiong irail,” Siohwa me ketin mahmahsen. “Eri I pahn wairaildo oh kapwureiraildo wasaht.”’”+
28 Nan pahrohte, ni tepin mwehin Nanmwarki Sedekaia+ en Suda, ni kapahieun sounpar, ni kelimaun sounpwong, soukohp Ananaiah nein Assur sang Kipeon+ ahpw ndaiong ie nan tehnpesen Siohwa mwohn samworo ko oh aramas ako koaros: 2 “Iet me Siohwa kaunen karis en sounpei, Koht en Israel ketin mahsanih, ‘I pahn kauwehla mehn wisik en nanmwarkien Papilon.+ 3 Mwohn sounpar* riau eh imwisekla I pahn kapwurehdo wasaht dipwisou koaros en tehnpesen Siohwa me Nanmwarki Nepukadnesar en Papilon wahsang wasaht oh wahla Papilon.’”+ 4 “Siohwa ketin mahsanih, ‘Oh I pahn kapwurehdo wasaht Sekonaia+ nein Sehoiakim,+ nanmwarkien Suda, oh mehn Suda koaros me kalipilipala Papilon,+ pwe I pahn kauwehla mehn wisik en nanmwarkien Papilon.’”
5 Soukohp Seremaia eri koasoiong soukohp Ananaiah mwohn samworo ko oh aramas ako koaros me kesikesihnen nan tehnpesen Siohwa. 6 Soukohp Seremaia eri nda: “Amen!* Siohwa en ketin wia met! Siohwa en ketin kapwaiada omw mahsen kan me komw kohpada ni eh pahn ketin kapwuredohng wasaht dipwisou kan en tehnpesen Siohwa oh aramas kalipilipala ko koaros sang Papilon! 7 Ahpw, menlau rong rohng wet me I ndindaiong nan salengomw kan oh nan salengen aramas akan koaros. 8 Mahso soukohp kan mwohi oh mwohmw kin kohpada duwen sahpw tohto oh wehi lapalap akan, duwen mahwen, kahpwal oh soumwahu lusulus. 9 Ma soukohp men kin kohpada duwen popohl oh mahsen en soukohpo kin pweida, eri e pahn sansal me Siohwa uhdahn ketin poaronehdo soukohpo.”
10 Soukohp Ananaiah eri kihsang tuhkehn wisiko ni tepinweren soukohp Seremaia oh kauwehla.+ 11 Ananaiah eri nda mwohn aramas ako koaros: “Iet me Siohwa ketin mahsanih, ‘Duwehte met I pahn kauwehla mehn wisik en Nanmwarki Nepukadnesar en Papilon sang ni tepinweren wehi koaros mwohn sounpar riau eh imwisekla.’”+ Soukohp Seremaia eri kohkohla.
12 Mwurin soukohp Ananaiah eh kauwehla tuhkehn wisiko sang ni tepinweren soukohp Seremaia, rohng wet sang Siohwa ahpw mahsendohng Seremaia: 13 “Kohla oh ndaiong Ananaiah, ‘Iet me Siohwa ketin mahsanih: “Ke kauwelahr mehn wisik tuhke,+ ahpw kaidehn mehn wisik tuhke me ke pahn wiahda ahpw mehn wisik mete.” 14 Pwe iet me Siohwa kaunen karis en sounpei, Koht en Israel ketin mahsanih: “I pahn kihong mehn wisik mete ni tepinweren wehi pwukat koaros, pwe ren papah Nanmwarki Nepukadnesar en Papilon, oh re anahne papah ih.+ I pil pahn kihong ih mahn lawalo kan en nan mohs.”’”+
15 Soukohp Seremaia eri ndaiong soukohp Ananaiah:+ “Ananaiah, menlau rong! Siohwa sohte ketin poaroneiukodo, ahpw ke kahrehiong aramas pwukat ren likih likamw ehu.+ 16 Kahrehda iet me Siohwa ketin mahsanih, ‘Kilang! I pahn kihiukasang nin sampah. Sounparet ke pahn mehla, pwe ke kangoange aramas akan ren uhwongada Siohwa.’”+
17 Soukohp Ananaiah eri mehla nan pahro, ni keisuhwen sounpwong.
29 Iet mahsen kan en kisinlikou me soukohp Seremaia kadarasang Serusalem kadaralahng ohl mah teikan rehn aramas ako me kalipilipala, samworo kan, soukohp kan oh aramas akan koaros, me Nepukadnesar kalipehsang Serusalem oh kalipelahng Papilon. 2 Met wiawi mwurin Nanmwarki Sekonaia,+ inen nanmwarkio,+ lapalap akan en tehnpaso, kaun akan en Suda oh Serusalem, oh tohndoadoahk saman kan oh sounsukmete kan* ar kohieisang nan Serusalem.+ 3 E kadarala kisinlikowo sang nan pehn Elasa nein Sapan+ oh Kemaraia nein Ilkaia, me Nanmwarki Sedekaia+ en Suda kadaralahng Papilon rehn Nanmwarki Nepukadnesar en Papilon. E koasoia:
4 “Iet me Siohwa kaunen karis en sounpei, Koht en Israel, ketin mahsanihong aramas koaros me kalipilipala, irail me e ketin kahrehiong ren kalipilipala sang Serusalem kolahng Papilon, 5 ‘Kumwail kauwada ihmw kan oh kousoan loale. Padokedi mwetuwel kan oh tungoale wah kan. 6 Kumwail pwopwoudida oh nainekihda pwutak kan oh serepein kan; ale en noumwail pwutak kan pwoud oh kihong noumwail serepein kan ren pwopwoudida, pwe irail en pil kak nainekihda pwutak kan oh serepein kan. Kumwail kaparaparala wasao a kaidehn malaulaula. 7 Oh rapahki popohl en kahnimw me I kalipeikumwailla ieo, oh kapakapki kahnimwo ong Siohwa, pwe ma kahnimwo popohl kumwail pahn ahneki popohl.+ 8 Pwe iet me Siohwa kaunen karis en sounpei, Koht en Israel ketin mahsanih: “Kumwail dehpa mweidohng noumwail soukohp kan oh sounkosetipw kan me mi nanpwungamwail ren pitihkumwaildi,+ oh dehr rong ouraman kan me re kin ouramankihda. 9 Pwe ‘re wiewia kokohp likamw ong kumwail ni mwarei. I sohte kadarirailewei,’+ Siohwa me ketin mahmahsen.”’”
10 “Pwe iet me Siohwa ketin mahsanih, ‘Ni ahnsou me sounpar 70 nan Papilon eh imwisekla, I pahn sohpeiong kumwail,+ oh I pahn kapwaiada ei inowo ni ei pahn kapwureikumwaildo wasaht.’+
11 “Siohwa ketin mahsanih: ‘I uhdahn mwahngih dahme I kupwurki ong kumwail, I kupwurki kihong kumwail popohl a kaidehn kahpwal,+ oh I kupwurki kihong kumwail koasoandi mwahu en ahnsou kohkohdo oh koapworopwor.+ 12 Oh kumwail pahn likwerih ie oh kohdo oh kapakap ong ie, oh I pahn karongei kumwail.’+
13 “‘Kumwail pahn rapahkin ie oh diar ie,+ pwe kumwail pahn rapahkin ie ni mohngiongimwail unsek.+ 14 Oh I pahn mweidohng kumwail en diar ie,’+ Siohwa me ketin mahmahsen. ‘Oh I pahn kihpene noumwail me selidi kan oh kihkumwailpene sang wehi koaros oh wasa koaros me I kamwarangkumwailpeseng ie,’+ Siohwa me ketin mahmahsen. ‘Oh I pahn kapwureikumwaildo wasa me I kahrehiong kumwail en kalipilipasang ie.’+
15 “Ahpw kumwail nda, ‘Siohwa ketin idihadahr soukohp kei ong kiht nan Papilon.’
16 “Pwe iet me Siohwa ketin mahsanihong nanmwarki me mwomwohd nan mwoalen Depit+ oh ong aramas koaros me koukousoan nan kahnimw wet, riamwail kan me sohte iang kumwail kalipilipala, 17 ‘Iet me Siohwa kaunen karis en sounpei ketin mahsanih: “I pahn kadarohng irail kedlahs, lehk lapalap oh soumwahu lusulus,+ oh I pahn wiahiong irail en duwehla pik mat* ehu me uhdahn sakanakan, uwen eh sakanakan sohte me kak tungoale.”’+
18 “‘Oh I pahn pwakihkin irail kedlahs,+ lehk lapalap oh soumwahu lusulus, oh I pahn wiahkinirailla mehkot kamasepwehk ehu ong wehi koaros en sampah,+ oh mehn keria ehu, oh mehkot kapwuriamwei ehu, mehkot me aramas en kin kuwaiki,+ oh kanamenek ehu nan wehi koaros me I kamwarakirailpeseng ie,+ 19 pwehki re sohte rong ei mahsen kan me I kadaralahng irail sang nei ladu soukohp kan,’ Siohwa me ketin mahmahsen, ‘I kin pwurupwurehng kadarirailewei.’*+
“‘Ahpw kumwail sohte kin rong,’+ Siohwa me ketin mahmahsen.
20 “Eri, kumwail rong mahsen en Siohwa, kumwail aramas koaros me kalipilipala, me I kadarala sang Serusalem kolahng Papilon. 21 Iet me Siohwa kaunen karis en sounpei, Koht en Israel ketin mahsanih, duwen Eihap nein Kolaia oh duwen Sedekaia nein Maaseaia, me wiewia kokohp likamw ong kumwail ni mwarei,+ ‘I pahn kihirahlla nan pehn Nanmwarki Nepukadnesar* en Papilon, oh e pahn kemeirahla mwohn masamwail kan. 22 Oh dahme wiawihong ira pahn wiahla mehn keria ehu me mehn Suda koaros me kalipilipala nan Papilon pahn kin nda: “Siohwa en ketin wiahiong uhk ken duwehla Sedekaia oh duwehla Eihap, me nanmwarkien Papilon isikala nan kisinieio!” 23 pwe ira wiadahr mwekid kanamenek nan Israel,+ ira kin kamwahl rehn en mehn mpara kan pwoud kan oh koasoakoasoia lokaia likamw kan ni mwarei me I sohte kehkehlingkihong ira.+
“‘“Ngehi me mwahngih, oh ngehi me sounkadehde,”+ Siohwa me ketin mahmahsen.’”
24 “Oh ong Semaia+ mehn Nehelam ke pahn nda, 25 ‘Iet me Siohwa kaunen karis en sounpei, Koht en Israel ketin mahsanih: “Pwehki ke kadarala kisinlikou kan ni edomw rehn aramas koaros me mi nan Serusalem, rehn samworo Sepanaia+ nein Maaseaia, oh rehn samworo koaros, nda, 26 ‘Siohwa ketin wiahiong uhk ken wiahla samworo a kaidehn samworo Sehoiada pwe ken wiahla sounapwalih tehnpesen Siohwa, ken pwukoahki aramas sahliel me kin wiewia mwomwen soukohp men oh ken salihedi nanpwungen lepin tuhke toutou kan;+ 27 eri, dahme ke sohte lipwoarehki Seremaia mehn Anadod,+ me mwomwen wiewia soukohp men ong kumwail?+ 28 Pwe e pil kadarodo rohng ehu rehtail nan Papilon, nda: “Met pahn werei! Kumwail kauwada ihmw kan oh kousoan loale. Padokedi mwetuwel kan oh tungoale wah kan,+—”’”’”
29 Ni samworo Sepanaia+ eh wadek kisinlikou wet ni soukohp Seremaia eh wie rongorong, 30 Siohwa ahpw ketin mahsanihong Seremaia: 31 “Kadarala rohng ehu rehn aramas koaros me kalipilipala, nda, ‘Iet me Siohwa ketin mahsaniheki duwen Semaia mehn Nehelam: “Pwehki Semaia wia kokohp ong kumwail, mendahki ei sohte kadarewei ih, oh e song en wiahiong kumwail en likih likamw kan,+ 32 kahrehda iet me Siohwa ketin mahsanih, ‘I pahn kaloke Semaia mehn Nehelam oh kadaudoke kan. Sohte emen kisehn eh peneinei pahn pitila nanpwungen aramas pwukat, oh e sohte pahn kilang soahng mwahu me I pahn wiahiong nei aramas akan,’ Siohwa me ketin mahmahsen, ‘pwe e kangoange aramas akan ren uhwongada Siohwa.’”’”
30 Siohwa ketin mahsanihong Seremaia: 2 “Iet me Siohwa, Koht en Israel ketin mahsanih, ‘Ntingihedi nan pwuhk ehu mahsen koaros me I mahsanihong uhk. 3 Pwe “kilang! rahn akan pahn kohdo,” Siohwa me ketin mahmahsen, “ahnsou me I pahn kihpene nei aramas akan me wie sensel, Israel oh Suda,”+ Siohwa me ketin mahmahsen, “oh I pahn kapwureiraildo nan sahpw me I kihong samarail mehn mahs ako, oh re pahn pwurehng sapwenikihla sahpwo.”’”+
4 Iet mahsen kan me Siohwa ketin mahsanihong Israel oh Suda.
5 Iet me Siohwa ketin mahsanih:
“Kumwail rongehr ngilen rerrer;
Mie masak, oh sohte popohl.
6 Menlau idek, ma ohl emen kak neitik.
Eri, dahme kahrehda I kilang ohl kehlail koaros kidahng pehrail kan pohn kapehdirail kan
Duwehte lih emen me pahn neitik?+
Dahme kahrehda masarail kan koaros poh reireiki?
7 Pwe rahno rahn kamasepwehk* ehu.+
Saikinte rahn ehu me duwehte rahno,
Ahnsou apwal ong Seikop.
Ahpw e pahn pitila sang met.”
8 Siohwa kaunen karis en sounpei ketin mahsanih: “Oh rahno, I pahn kauwehla mehn wisiko sang ni tepinweromw, oh I pahn lupukpeseng noumw sahl kan wiahda riau; oh mehn keiru kan* sohla pahn wiahkihla ih* neirail lidu. 9 Irail pahn papah Siohwa arail Koht oh Depit arail nanmwarki, me I pahn idihada ong irail.”+
10 Siohwa ketin mahsanih, “Oh kowe nei ladu Seikop, ke dehr masak,
Oh Israel, ke dehpa masepwehkada.+
Pwe I pahn doareiukala sang wasa doh
Oh kadaudokomw sang sahpw me re sensel ie.+
Seikop pahn pwurodo oh meleileidi oh sohte me pahn kedirapwa,
Sohte me pahn kamasak irail.”+
11 Siohwa ketin mahsanih, “Pwe I pahn ieiang uhk, pwehn doareiukala.
12 Pwe iet me Siohwa ketin mahsanih:
“Sohte mehn kamwahwihala omw ohla.+
Omw ohla sohte kak mwahula.
13 Sohte me pahn pere omw pwuhng,
Sohte mehkot pahn kamwahwihala omw kens.
Sohte mehkot pahn kamwahwihiukala.
14 Omw mwohnlimpoak koaros manokeiukalahr.+
Re solahr kin rapahkin uhk.
Pwe duwehte wowoki en imwintihti men I wokihiukehr+
Duwehte kalokolok en me lemei men,
Pwehki omw dihp laud oh dihp tohto kan.+
15 Ia kahrepen omw kaulimki omw ohla?
Omw medek sohte kak mwahula!
Pwehki omw dihp laud oh dihp tohto kan+
Me I wiahkihong uhk met.
16 Kahrehda mie me pahn kadallehla koaros me kin kadalleiukala,+
Oh omw imwintihti kan koaros pil pahn selidi.+
Irail me kin pirapaiuk pahn pirapala,
Oh I pahn kihla koaros me kin kulihiuk ren kulsang.”+
17 Siohwa ketin mahsanih, “Ahpw I pahn kapwurehiong uhk omw roson oh kamwahwihala omw ohla kan,+
Mendahki irail kin ekerkin uhk me lekdeklahr men:
‘Saion, me solahr me kin rapahki.’”+
18 Iet me Siohwa ketin mahsanih:
Kahnimwo pahn onohnsapahlda pohn eh dohlo,+
Oh imwen doulik kehlailo pahn kokouda uhdahn wasa me e kin mi ie.
19 Oh irail pahn kapingkalahngan oh kouruhr.+
I pahn katohtohweirailla, oh irail sohte pahn malaulau;+
I pahn wiahiong irail en tohtohla,*
Oh irail sohte pahn malaulaula.+
20 Nah seri kan pahn duwehla mahso,
Irail pahn wiahla aramas kehlail kei mwohn silangi.+
I pahn kaloke koaros me kin kaloke ih.+
21 Nah me lapalapo pahn wiahte emen kiseh,
Oh sang kadaudoke kan eh kaun pahn pwarada.
I pahn wiahiong ih en kohdo keren, oh e pahn kohdo rehi.”
“Pwe ma soh, ihs me kak kohdo mwohi?” Siohwa me ketin mahmahsen.
22 “Oh kumwail pahn wiahla nei aramas,+ oh I pahn wiahla amwail Koht.”+
23 Kilang, engieng en Siohwa pahn ipido ni kehlail duwehte melimel ehu;+
Duwehte tumwenieng me kin ipidohng pohn moangen me suwed kan.
24 Sapwellimen Siohwa engieng kowahlap sohte pahn meleileidi
Lao e ketin kapwaiada oh kanekehla dahme e ketin kupwurki.*+
Ni kaimwiseklahn rahn akan kumwail pahn wehwehkihla met.+
31 Siohwa ketin mahsanih, “Ahnsowo, I pahn wiahla Koht ong peneinei en Israel koaros, oh irail pahn wiahla nei aramas.”+
2 Iet me Siohwa ketin mahsanih:
“Aramas akan me pitsang kedlahs diar kupwuramwahu nan sapwtehn
Ni ahnsou me Israel alialulahng eh wasahn kommoal.”
3 Sang wasa doh Siohwa ketin pwarohng ie oh mahsanih:
“I kin poakohng uhk ni limpoak poatopoat.
Ihme kahrehda I kakerenihiukodo rehi ni limpoak loalopwoat.*+
4 Ahpw I pahn pwurehng oneiukada sapahl oh ke pahn onohnsapahlda.+
5 Ke pahn pwurehng padok mwetin kreip kan ni nahna kan en Sameria;+
Sounpoad kan pahn padokedi oh nsenamwahuki wah kan.+
6 Pwe rahno pahn leledo ni ahnsou me sounsilasil en nahnahn Epraim kan pahn likwerki:
‘Kumwail uhda, kitail kohdahla Saion, rehn Siohwa atail Koht.’”+
7 Pwe iet me Siohwa ketin mahsanih:
“Weriong Seikop ni peren.
Werki peren pwehki kumwail me tieng nanpwungen wehi kan.+
Lohki met; kapingki oh nda,
‘Maing Siohwa, komw ketin kapitala sapwellimomwi aramas akan, mehn Israel kan me luhwehdi.’+
8 I pahn kapwureiraildo sang sapwen paliepeng.+
I pahn kapokoneirailpene sang wasa me keieu doh kan nin sampah.+
E pahn mie me maskun oh dangepel nanpwungarail,+
Lih liseian oh me pahn neitik, koaros patpene.
Irail pahn pwurodo wasaht nin duwen mwomwohdiso laud ehu.+
9 Irail pahn sengiseng kohdo.+
I pahn kahre irail ni ar peki kupwuramwahu.
I pahn kahluwairaillahng ni piletik en pihl kan,+
Pohn ahl patapat ehu me sohte pahn kahrehda ren dipekelekel.
Pwe I wia Sahm men ong Israel, oh Epraim me nei mesenih.”+
10 Rong mahsen en Siohwa, kumwail wehi kan,
Oh lohki met nanpwungen deke doh kan:+
“Me ketin kamwarakpeseng mehn Israel kan pahn kapokoneirailpene.
E pahn ketin sinsile irail duwehte dahme silepen sihpw men kin wiahiong nah pelin sihpw kan.+
12 Irail pahn kohdo oh wer ni peren pohn kadoken Saion+
Oh linganla pwehki kamwahu en* Siohwa,
Krein oh wain kapw+ oh leh,
Oh sihpw pwulopwul oh kou pwulopwul kan.+
13 “Ni ahnsowo me meipwon kan pahn kahkahlek ni peren,
Pil iangahki mwahnakapw kan oh ohl mah kan.+
I pahn wekidohng arail mwahiei ong ni peren.+
I pahn kansenamwahwihirailla oh kihong irail peren a kaidehn ar pahtou.+
14 I pahn kihong samworo kan mwenge tohto,*
Oh nei aramas akan pahn nsenamwahukihla soahng mwahu kan me I pahn kihong irail,”+ Siohwa me ketin mahmahsen.
15 “Iet me Siohwa ketin mahsanih:
‘Ngihl ehu kohkohda sang nan Rama,+ mwahiei oh sengiseng laud:
Resel wie sengisengki nah pwutak kan.*+
E kahng nsenamwahula,
Pwehki nah pwutak kan solahr mie.’”+
16 Iet me Siohwa ketin mahsanih:
“‘Tokedihsang omw sengiseng oh dehier kakerehdi pilen mesomw,
Pwe mie keting ehu ong omw wiewia kan,’ Siohwa me ketin mahmahsen.
‘Irail pahn pwurodo sang nan sapwen imwintihti kan.’+
17 Siohwa ketin mahsanih, ‘Oh mie koapworopwor ong omw ahnsou kohkohdo.+
Noumw pwutak kan pahn pwurodo nan ar wasa.’”+
18 “I uhdahn rongehr Epraim eh wie ingihngtik,
‘Komw ketin kapwungielahr, oh I kopwungpwunglahr,
Rasehng koupwul men me saikinte kaiahnda.
Komw ketin kapwureiehwei, oh I uhdahn pahn pwurowei,
Pwe komwi me Siohwa ei Koht.
I namenekla oh sarohdi,+
Pwe I weuwa kanamenek en ei pwulopwul.’”
20 Siohwa ketin mahsanih: “Ia duwe, Epraim kaidehn nei pwutak kesempwal, seri kompoak men?+
Pwe ni ei I kin kalapw lipwoare ih, I kin tamatamante ih.+
Ihme kahrehda ei pepehm kan* uhdahn mwekidkihda ih.
Oh I uhdahn pahn poakehla ih.+
21 Padokada uhr takai kan ong pein kowe,
Oh kihda kilel kan.+
Tehk kanahieng ahlo, ahl me ke pahn keidwei ie.+
Meipwon en Israel, pwurodo, pwurodo ni omw kahnimw pwukat.
22 Ia erein omw pahn peikasal, kowe serepein salelepek?
Pwe Siohwa ketin kapikadahr mehkot kapw nin sampah:
Lih emen pahn ngoangki rapahki ohl emen.”
23 Iet me Siohwa kaunen karis en sounpei, Koht en Israel ketin mahsanih: “Irail pahn pwurehng koasoia mahsen pwukat nan sapwen Suda oh nan eh kahnimw kan ni ei pahn kapwurepene nair me selidi kan: ‘Siohwa en ketin kapaiaiuk, wasahn kousoan pwung,+ oh nahna sarawi.’+ 24 Oh aramas akan pahn kousoan nan Suda oh nan eh kahnimw kan koaros, soumwet kan oh irail me kin kahluwa pelinmen kan.+ 25 Pwe I pahn kansenamwahwihala me pwangadahr* oh kakehlahda emenemen* me luwetala.”+
26 Ngehi eri pirida oh pehdpeseng, oh I nsenamwahuki ei meiro.
27 Siohwa ketin mahsanih: “Kilang! Rahn akan pahn kohdo, ahnsou me I pahn katohtohwehkihla wehin Israel oh wehin Suda aramas akan oh pelinmen kan.”+
28 Siohwa ketin mahsanih: “Oh duwehte ei kin kilikilang irail pwe I en usada, pwe I en waikedi, pwe I en karangkehdi, pwe I en kauwehla, oh pwe I en kamedekihala,+ eri I pahn kilikilang irail pwe I en kauwada oh padokedi.+ 29 Rahn ako irail sohla pahn nda, ‘Sahm kan kangalahr kreip karer kan, ahpw ngihn seri kan me rerada.’*+ 30 Ahpw emenemen pahn mehla pwehki pein eh sapwung. Mehmen me kin kang kreip karer, pein ngih kan me pahn rerada.”
31 Siohwa ketin mahsanih: “Kilang! Rahn akan pahn kohdo, ahnsou me I pahn wiahda inou lap kapw ehu rehn wehin Israel oh wehin Suda.+ 32 E sohte pahn duwehte inou lap me I wiahda rehn samarail mehn mahs ako ni rahn me I kol pehrail kan pwehn kahluwairailsang nan sapwen Isip,+ ‘ei inou lap me irail kauwehla,+ mendahki ngehi me uhdahn ar soumas,’* Siohwa me ketin mahmahsen.”
33 Siohwa ketin mahsanih: “Pwe iet inou lap me I pahn wiahiong wehin Israel mwurin rahn ako, I pahn kihdi ei kosonned loalarail,+ oh I pahn ntingihediong nan ar mohngiong.+ Oh I pahn wiahla ar Koht, oh re pahn wiahla nei aramas.”+
34 Siohwa ketin mahsanih: “Oh re solahr pahn padahkihong emenemen mehn mparail oh riarail kan ni ar kin nda ‘Esehla Siohwa!’+ pwe irail koaros pahn eseiehla, sang me keieu tikitik lel me keieu lapalap+ nanpwungarail. Pwe I pahn mahkohng ar sapwung kan, oh solahr pahn tamataman diparail kan.”+
35 Iet me Siohwa,
Me kin ketikihda ketipin ong marain nin rahn,
Me kin ketin koasoanehdi kosonned kan* en maram oh usu kan ong marain nipwong,
Me kin ketin kamwakidada sehd oh wiahiong ilok kan en pwungupwungudek,
Me mware iei Siohwa kaunen karis en sounpei, ketin mahsanih:+
36 “‘Ma koasoandi pwukat sohte pahn pweida,’ Siohwa me ketin mahmahsen,
‘Eri ihte ahnsowo me kadaudok en Israel sohla pahn wia wehi ehu, me kin ahnsou koaros mi mwohn silangi.’”+
37 Iet me Siohwa ketin mahsanih: “‘Ma mie me kak sohngedi nanleng oh dawih poahsoan en sampah, eri ihte ahnsowo me I kak soikala kadaudok en Israel koaros pwehki soahng koaros me irail wiahda,’ Siohwa me ketin mahmahsen.”+
38 Siohwa ketin mahsanih: “Kilang! Rahn akan pahn kohdo, ahnsou me kahnimwo pahn kokouda+ ong Siohwa sang ni Imwen Doulik en Ananel+ lella ni Ewen Kelen Keimw.+ 39 Oh sahl en sosohngo+ pahn inenieila kohla ni dohlen Karep, oh e pahn wetlahng Koha. 40 Oh wahu* koaros, wasa me paliwar mehla kan oh pehs kan* kin lekdekla ie, oh mwaht koaros lella Wahun Kidron,+ kohla lel ni keimw en Ewen Kelen Oahs+ sallahng palimese, pahn wia mehkot sarawi ong Siohwa.+ Kahnimwo sohla pahn pwurehng usuhsda de kamwomwmwomwla.”
32 Siohwa ketin mahseniong Seremaia ni kaeisek en sounpar en Nanmwarki Sedekaia en Suda, me iei, ni kaeisek waluhn sounpar en Nepukadnesar.*+ 2 Ni ahnsowo nein nanmwarkien Papilon karis en sounpei kan kapikapil Serusalem, oh soukohp Seremaia wie sensel nan Wasa me Kelpene en Sounsilasil+ nan tehnpesen nanmwarkien Suda. 3 Pwe Nanmwarki Sedekaia en Suda me salihedi ih,+ nda. “Dahme kahrehda ke wia soangen kokohp wet? Ke nda, ‘Iet me Siohwa ketin mahsanih: “I pahn kihla kahnimw wet nan pehn nanmwarkien Papilon, oh e pahn kalowehdi,+ 4 oh Nanmwarki Sedekaia en Suda sohte pahn pitsang mehn Kaldia kan, pwe e uhdahn pahn kohieng nan pehn nanmwarkien Papilon, oh ira pahn tuhpene oh koasoipene.”’+ 5 Siohwa ketin mahsanih, ‘E pahn walahng Sedekaia Papilon, oh e pahn mihmi wasao lao I pahn sohpeiong ih. Mendahki omw kin pepeiong mehn Kaldia kan, ke sohte pahn pweida.’”+
6 Seremaia eri nda: “Siohwa ketin mahsanihong ie, 7 ‘Anamel nein Sallum, ohl me ke pahn pahpahkio* pahn kohdo rehmw oh nda: “Pwainda ahmw ei mwahto nan Anadod,+ pwehki kowe me ahneki pwuhng en tepin pwainda sapahl met.”’”+
8 Anamel nein ohl me I pahn pahpahkio ahpw kohdo rehi nan Wasa me Kelpene en Sounsilasil, duwehte me Siohwa ketin mahsanihero, oh e ndaiong ie: “Menlau pwainda ei mwahto nan Anadod, nan sapwen Pensamin, pwe kowe me ahneki pwuhng en ahnekihla mwahto oh pwainda sapahl. Pwainda ahmw.” Ngehi eri esehda me met iei mahsen en Siohwa.
9 Ngehi eri pwainda mwahto nan Anadod sang rehn Anamel nein ohl me I pahn pahpahkio. Ngehi eri tenekihda uwen mwohni+ ong ih, silper sekel* isuh oh mwohni silper eisek. 10 Ngehi eri kilelehdi met nan kisinlikou ehu,+ katengehkihdi sidamp, ekerodo sounkadehde kan,+ oh tenekih mwohni ko pohn mehn tenek. 11 Ngehi eri ale kisinlikoun pweinen mwahto, me sidampehro nin duwen kehkehlik oh kosonned kan, oh pil me sohte katengetengdio, 12 oh I kihong kisinlikoun pweinen mwahto rehn Paruk+ nein Neraia+ nein Mahseia mwohn Anamel nein ohl me I pahn pahpahkio, sounkadehde kan me sainihala kisinlikoun pweinen mwahto, oh mehn Suhs koaros me mwomwohd Wasa me Kelpene en Sounsilasil.+
13 Ngehi eri kehkehlikiong Paruk mwohrail, nda: 14 “Iet me Siohwa kaunen karis en sounpei, Koht en Israel ketin mahsanih, ‘Ale kisinlikou pwukat, kisinlikoun pweinen mwaht wet, me sidampehro oh kisinlikou teio me sohte katengtengdio, oh kihong mepwukat nan mehn deudeu me wiawihkihda pwehl, pwe ren mihmi ahnsou werei.’ 15 Pwe iet me Siohwa kaunen karis en sounpei, Koht en Israel ketin mahsanih, ‘Ihmw kan, mwaht akan oh mwetin kreip kan pahn pwurehng pweipweida nan sahpwet.’”+
16 Ngehi eri kapakapohng Siohwa mwurin ei kihong kisinlikoun pweinen mwahto rehn Paruk nein Neraia, patohwan: 17 “Maing Kaun Wasa Lapalahpie, Siohwa! Maing! Komwi me ketin wiahda nanleng oh sampah sang ni sapwellimomwi manaman lapalap+ oh sang nin limomwi roson. Sohte mehkot me nohn kapwuriamwei ong komwi. 18 Komwi kin ketin kasalehda limpoak loalopwoat ong aramas kid kan, ahpw komwi kin ketin dupungkihong sapwung en pahpa kan ong* neirail seri kan.+ Komwi me Koht mehlel, me lapalap oh roson, me mwarenki Siohwa kaunen karis en sounpei. 19 Kupwuromwi* kan me lapalap oh komw kin ketin mwekid ni manaman,+ silangomwi kan kin mahsanih en aramas akan ar wiewia kan koaros,+ pwehn katingiheki emenemen nin duwen elen eh mour oh nin duwen dahme e kin wia.+ 20 Komw ketin wiadahr kilel kan oh manaman kapwuriamwei kan nan sapwen Isip, me aramas kin ese leledo rahnwet, oh komw ketin kahrehiong aramas akan ren esehla mwaromwi nan Israel oh nanpwungen aramas akan koaros,+ duwehte me wiawi rahnwet. 21 Oh komw ketikihieisang sapwellimomwi aramas en Israel kan nan sapwen Isip, sang ni kilel kan, sang ni manaman kapwuriamwei kan, sang nin limomwi roson oh manaman lapalap oh sang ni wiewia kamasepwehk kan.+
22 “Kedekedeo komwi ahpw ketikihong irail sahpwet me komw ketin kahukihla en ketikihong samarail mehn mahs ako,+ sahpw ehu me inenen pwelmwahu.*+ 23 Oh re kohlongodo oh sapwenikihla sahpwet, ahpw re sohte peikiong kapitiomwi de kekeid nan sapwellimomwi kosonned. Irail sohte wia mehkot ehu me komw ketin kehkehlingkihong irail en wia, kahrehda komw ketin wiahiong kahpwal wet pwon en kohdiong pohrail.+ 24 Kilang! Aramas akan kodohr wiahda koasoakoasoak kan pwehn kalowehdi kahnimwo,+ oh pwehki kedlahs,+ lehk lapalap oh soumwahu lusulus,+ kahnimwo uhdahn pahn lohdi nan pehn mehn Kaldia kan me wie mahmahweniong; soahng koaros me komw ketin mahsaniher pweidahr, nin duwen me komw mahmahsanih ni ahnsou wet. 25 Ahpw Maing Kaun Wasa Lapalahpie Siohwa, komw ketin mahsanihongiehier, ‘Pwainkihda mwahto mwohni ong pein kowe oh ekerodo sounkadehde kan,’ mendahki kahnimwo uhdahn pahn kohieng nan pehn mehn Kaldia kan.”
26 Siohwa eri ketin mahsanihong Seremaia: 27 “Iet ngehi, Siohwa, Koht en aramas koaros.* Mie mehkot me nohn kapwuriamwei ong ie? 28 Eri iet me Siohwa ketin mahsanih, ‘I pahn kihla kahnimw wet rehn mehn Kaldia kan oh nan pehn Nanmwarki Nepukadnesar* en Papilon, oh e pahn kalowehdi.+ 29 Oh mehn Kaldia kan me mahmahweniong kahnimw wet pahn kohlongodo oh isikada kahnimw wet+ oh isikala ihmw kan me aramas akan kin wia meirong ong Paal pohn imwarail kan oh wudekihdi meirong en wain kan ong koht teikan pwehn kansensuwedih ie.’+
30 “Siohwa ketin mahsanih: ‘Pwe aramas en Israel oh Suda kan kin wiahte dahme suwed mwohn silangi,* sangete ni ar pwulopwul kohda;+ aramas en Israel kan kin usehlahte kansensuwedihkin ie doadoahk en pehrail kan. 31 Pwe sangete rahn me re kauwada kahnimw wet leledo rahnwet, e kin ihte kahrehiong ie I en engieng kowahlap,+ kahrehda e anahne kohsang mwohn silangi,+ 32 pwehki suwed koaros me aramas en Israel oh Suda kan wiadahr pwehn kansensuwedihkin ie—irail, arail nanmwarki kan,+ neirail lapalap akan,+ neirail samworo kan, neirail soukohp kan+ oh aramas en Suda kan oh tohn Serusalem kan. 33 Re kin usehlahte kasohpeidohng ie tihnsewarail kan, a kaidehn masarail kan;+ mendahki ei kin song en pwurupwurehng padahkih* irail, sohte emen irail kin rong pwehn ale peneu.+ 34 Oh irail kihdiong arail dikedik kasaut kan nan tehnpas me kin kolokol mwarei, pwehn kasaminehla tehnpaso.+ 35 Oh pil, irail kauwada wasa ile kan ong Paal nan Wahun Innom,*+ pwe ren meirongkihong Molek+ neirail pwutak kan oh serepein kan nan kisiniei,* mehkot me I sohte kehkehlingkihong irail+ oh sohte mwahn kupwukupwure* ren wia soahng kasaut wet, kahrehiong Suda en dipada.’
36 “Kahrehda iet me Siohwa, Koht en Israel ketin mahsaniheki duwen kahnimw wet me kumwail ndinda pahn kohieng nan pehn nanmwarkien Papilon sang ni kedlahs, lehk lapalap oh soumwahu lusulus, 37 ‘I pahn kihirailpene sang sahpw koaros me I kamwarakirailpeseng ie ni ei engieng kowahlap,+ oh I pahn kapwureiraildo wasaht oh mweidohng irail en kousoan ni ar sohte perki mehkot.+ 38 Oh irail pahn wiahla nei aramas, oh I pahn wiahla ar Koht.+ 39 Oh I pahn kihong irail mohngiong ehu+ oh ahl ehu pwe irail en ahnsou koaros lemmwikin ie, ong kamwahuparail oh kamwahupen kadaudokarail kan.+ 40 Oh I pahn wiahiong irail inou lap poatopoat ehu,+ me I sohte pahn tokedihsang wia me mwahu ong irail;+ oh I pahn kihdiong nan ar mohngiong ren lemmwikin ie, pwe ren dehr sohpeisang ie.+ 41 I pahn perenkinirailda oh wiahiong irail soahng mwahu kan,+ oh I pahn padokiraildi teng nan sahpwet,+ nan ei mohngiong unsek oh mour* unsek.’”
42 “Pwe iet me Siohwa ketin mahsanih, ‘Duwehte ei wadohng aramas pwukat kahpwal laud wet pwon, eri I pahn wadohng irail kamwahu koaros* me I inoukihong irail.+ 43 Oh mwaht akan pahn pwurehng pweipweida nan sahpwet,+ mendahki amwail ndinda: “Sahpwet wiahla wasa tehn ehu me sohte aramas oh mahn, oh e kohiengehr rehn mehn Kaldia kan.”’
44 “Siohwa ketin mahsanih: ‘Mwaht akan pahn pweipweikihda mwohni, kisinlikoun pweinen mwaht akan pahn kileldi oh katengehkihdi sidamp, oh sounkadehde kan pahn likwerdo. Met pahn wiawi nan sapwen Pensamin,+ wasa kan me kapil Serusalem, nan kahnimw en Suda kan,+ nan kahnimw en wasa nahnahn kan, nan kahnimw en wasa karakarahk kan+ oh nan kahnimw en palieir kan, pwehki I pahn kapwurehdo neirail me selidi kan.’”+
33 Siohwa ketin mahsanihong Seremaia keriapak, ni eh wie senselte nan Wasa me Kelpene en Sounsilasil:+ 2 “Iet me Siohwa Sounwiepen sampah, Siohwa me ketin wiahda oh koasoanehdi teng; Siohwa iei mware, me ketin mahsanih, 3 ‘Likwerih ie, oh I pahn sapeng uhk oh padahkihong uhk soahng laud oh me apwal en wehwehki kan me ke sehse duwe.’”+
4 “Pwe iet me Siohwa, Koht en Israel ketin mahsaniheki duwen ihmw kan en kahnimw wet oh tehnpesen nanmwarkien Suda kan me rengkidi pwehki koasoakoasoak kan oh kedlahs,+ 5 oh duwen irail me pahn kodohng peiong mehn Kaldia kan, audehkihla wasa pwukat paliwar mehla kan me I kemehla sang ni ei engieng kowahlap, irail me kahrehiong ei ekihsang kahnimw wet silangiet pwehki ar suwed kan: 6 ‘I pahn kamwahwihala oh kihong ih roson,+ oh I pahn kamwahwihirailla oh kasalehong irail popohl mwuledek oh mehlel.+ 7 Oh I pahn kapwurehdo mehn Suda kan me selidi oh mehn Israel kan me selidi,+ oh I pahn kakehlairailda duwehte me I wia nin tapio.+ 8 Oh I pahn kamwakeleirailda sang dihp koaros me irail wiahiong ie,+ oh I pahn mahkohng diparail kan koaros oh ar kauwehla kosonned kan koaros me re wiahiong ie.+ 9 Oh e pahn wiahla ei ndand, ei peren, ei kaping oh ei lingan mwohn wehi koaros en sampah me pahn rong soahng mwahu koaros me I kihong irail.+ Oh irail pahn masepwehkada oh rerrer+ pwehki soahng mwahu koaros oh popohl me I pahn kihong ih.’”+
10 “Iet me Siohwa ketin mahsanih: ‘Ih wasaht me kumwail pahn nda wasa tehn me sohte aramas de pelinmen kousoan ie, nan kahnimw en Suda kan oh nanial en Serusalem kan me tehnla, me sohte aramas de towe de pelinmen kan, aramas akan pahn pwurehng rong 11 ngilen peren oh ngilen nsenamwahu,+ ngilen ohl kamwohd oh ngilen lih kamwohd, ngilen irail me kin nda: “Kapingkalahngan ong Siohwa kaunen karis en sounpei, pwe Siohwa me kupwur mwahu;+ sapwellime limpoak loalopwoat me poatopoat!”’+
“‘Irail pahn wahdo meirong en kapingkalahngan kan nan tehnpesen Siohwa,+ pwe I pahn kapwurehdo irail tohn sahpwo me selidi, duwehte nin tapio,’ Siohwa me ketin mahmahsen.”
12 “Iet me Siohwa kaunen karis en sounpei ketin mahsanih: ‘Nan wasa tehn wet, me sohte aramas de pelinmen kan, oh nan eh kahnimw kan koaros, e pahn pwurehng miehla mohs kan ong sounsilepen sihpw kan pwehn kakommoalle neirail pelin sihpw kan.’+
13 “Siohwa ketin mahsanih: ‘Nan kahnimw en wasa nahnahn kan, nan kahnimw en wasa karakarahk kan, nan kahnimw en palieir kan, nan sapwen Pensamin, wasa kan me kapil Serusalem+ oh nan kahnimw en Suda kan,+ silepen sihpw kan pahn pwurehng wadek neirail sihpw kan.’”
14 “Siohwa ketin mahsanih: ‘Kilang! Rahn akan pahn kohdo, ahnsou me I pahn kapwaiada inou mwahu me I mahsaniheki duwen wehin Israel oh wehin Suda.+ 15 Ni rahn ako oh ni ahnsowo I pahn wiahiong pons* pwung ehu en wosada ong Depit,+ oh e pahn kopwung ni pwung pahrek oh pwung nan sahpwo.+ 16 Ni rahn ako Suda pahn poadoandoarla+ oh Serusalem pahn kousoan ni eh sohte perki mehkot.+ Oh iet me e pahn adaneki: Siohwa me Atail Pwung.’”+
17 “Pwe iet me Siohwa ketin mahsanih: ‘Ahnsou koaros e pahn mie ohl emen sang kadaudok en Depit me pahn mwohd nan mwoalen Israel,+ 18 oh pil e pahn mie emen samworo mehn Lipai me pahn uh mwohn silangi pwehn wiahda meirong isihs kan me pwonte isihsla, pwehn isik meirong en krein kan oh wiahda meirong teikan.’”
19 Oh Siohwa ketin pwurehng mahsanihong Seremaia: 20 “Iet me Siohwa ketin mahsanih, ‘Ma kumwail kak kauwehla ei inou lap ong nin rahn oh ei inou lap ong nipwong, pwehn kauhdi rahn oh nipwong pwe ira en dehr leledo ni ahnsou me konehng,+ 21 eri ihte ahnsowo me ei inou lap rehn ei ladu Depit kak ohla,+ pwe en sohte naineki pwutak men me pahn kakaun nin duwen nanmwarki men pohn mwoale,+ oh pil ei inou lap rehn samworo mehn Lipai kan, nei sounpapah kan.+ 22 Duwehte karis en nanleng* ar sohte kak wadawadedi oh pihken oaroahr kan ar sohte kak sosohngdi, eri I pahn katohtowehla kadaudok en ei ladu Depit oh mehn Lipai kan me wie papah ie.’”
23 Oh Siohwa ketin pwurehng mahsanihong Seremaia: 24 “Ke sohte tehk dahme aramas pwukat ndinda, ‘Siohwa pahn ketin soikala peneinei riauo me e ketin pilada’? Oh irail wie mwamwahliki pein nei aramas akan, oh irail sohla wiahkin irail wehi ehu.
25 “Iet me Siohwa ketin mahsanih: ‘Duwehte ei wiadahr ei inou lap ong nin rahn oh nipwong,+ kosonned kan* en nanleng oh sampah,+ 26 eri I sohte mwahn pahn soikala kadaudok en Seikop oh kadaudok en ei ladu Depit, oh I pahn ale kaun akan me pahn kaunda kadaudok en Eipraam, Aisek oh Seikop sang kadaudok en Depit. Pwe I pahn kapwurepene nair me selidi kan+ oh poakeirailla.’”+
34 Ni ahnsou me Nanmwarki Nepukadnesar* en Papilon oh nah karis en sounpei kan koaros oh wehi koaros nin sampah me mi pahn eh kaunda oh aramas koaros wie mahmahweniong Serusalem oh eh kahnimw kan koaros, Siohwa ketin mahsanihong Seremaia:+
2 “Iet me Siohwa, Koht en Israel ketin mahsanih, ‘Kohla oh koasoiong Nanmwarki Sedekaia+ en Suda oh ndaiong ih: “Iet me Siohwa ketin mahsanih, ‘I pahn kihla kahnimw wet nan pehn nanmwarkien Papilon, oh e pahn isikala.+ 3 Oh ke sohte pahn pitsang nan peho, pwe ke uhdahn pahn kolokoldi oh pengpengla reh.+ Oh ke pahn tuhwong nanmwarkien Papilon, oh e pahn koasoiong uhk, oh ke pahn kohla Papilon.’+ 4 Ahpw, rong mahsen en Siohwa, Nanmwarki Sedekaia en Suda, ‘Iet me Siohwa ketin mahsaniheki duwen kowe: “Ke sohte pahn mehkihla kedlahs. 5 Ke pahn mehla ni popohl,+ oh irail pahn isik mehn kapwohtik kan ni ahnsou me ke pahn seridi duwehte me re wiahiong semomw ko, nanmwarki kan me kohdo mwohmw, oh re pahn mwahieikin uhk nda, ‘At nanmwarki!’ pwehki ‘I mahsaniher mahseno,’ Siohwa me ketin mahmahsen.”’”’”
6 Soukohp Seremaia eri koasoia mahsen pwukat koaros ong Nanmwarki Sedekaia en Suda nan Serusalem, 7 nindoken nein nanmwarkien Papilon karis en sounpei kan ar mahmahweniong Serusalem oh kahnimw koaros nan Suda me luhwehdi,+ me iei Lakis+ oh Aseka;+ pwe ihte kahnimw kehl kehlail kat me luhwehdi nanpwungen kahnimw en Suda kan.
8 Siohwa ketin mahsanihong Seremaia mwurin Nanmwarki Sedekaia eh wiahda inou lap ehu rehn aramas koaros nan Serusalem pwehn lohkihong irail saledek,+ 9 me koaros en kasaledekala nair lidu mehn Ipru kan, ohl oh lih, pwe sohte me pahn kolokol ienge mehn Suhs men nin duwen nah lidu. 10 Lapalap ako koaros oh aramas ako koaros ahpw peik. Irail iang inou lapo me koaros en kasaledekala nair lidu ohl oh lih kan oh dehr wie kolokol irail nin duwen lidu kei. Irail eri peik oh kasaledekihirailla. 11 Ahpw, mwuhr irail kapwurehdo ohl oh lih lidu kan me irail kasaledekihalahr, oh irail pwurehng idingohng irail en wia lidu. 12 Siohwa eri ketin mahsanihong Seremaia:
13 “Iet me Siohwa, Koht en Israel ketin mahsanih, ‘I wiahda inou lap ehu rehn samamwail mehn mahs ako+ ni rahn me I kahluwairailsang nan sapwen Isip, sang wasa me irail wia lidu ie,*+ mahsanih: 14 “Ni kaimwiseklahn sounpar isuh, emenemen kumwail pahn kasaledekala rie mehn Ipru me netila ong uhk oh me papahkin uhk sounpar weneu; ke anahne kasaledekala ih.”+ Ahpw samamwail mehn mahs ako sohte rong de rong ie kanahieng. 15 Oh me keren,* pein kumwail wekidala amwail lamalam oh wia dahme pwung mwohn silangi* ni amwail lohkihda saledek ong iengamwail kan, oh kumwail wiahda inou lap ehu mwohn silangi nan tehnpas me kin kolokol mwarei. 16 Ahpw kumwail wekidala amwail lamalam oh kasaminehla mwarei+ ni amwail kapwurehdo noumwail ohl oh lih lidu kan me kumwail kasaledekihala nin duwen me re inengieng, oh kumwail idingohng irail en pwurodo wia lidu.’
17 “Eri iet me Siohwa ketin mahsanih: ‘Kumwail sohte peikiong ie en lohki saledek, emenemen ong rie oh ienge.+ Eri met I pahn lohkihong kumwail saledek,’ Siohwa me ketin mahmahsen, ‘I pahn kihong kumwail saledek, ni kedlahs, soumwahu lusulus oh lehk lapalap ar pahn kemeikumwailla,+ oh I pahn wiahkinkumwailla mehkot kamasepwehk ehu ong wehi koaros en sampah.+ 18 Oh iet me pahn wiawihong aramas akan me kauwehla ei inou lapo ni ar sohte kapwaiada mahsen kan en inou lap me re wiahda mwohn silangi ni ar pwalangpeseng koupwulo wiahda riau oh alu nanpwungen pelien kou riauo,+ 19 me iei, lapalap akan en Suda, lapalap akan en Serusalem, lapalap akan en tehnpaso, samworo kan, oh aramas koaros en sahpwo me alu nanpwungen pelien kou riauo: 20 I pahn kihirailla rehn ar imwintihti kan oh irail me kin raparapahki en kihsang ar mour oh paliwararail mehla kan pahn wiahla kenen menpihr en pahnlahng kan oh kenen mahn en sampah kan.+ 21 Oh I pahn kihla Nanmwarki Sedekaia en Suda oh nah lapalap akan nan pehn ar imwintihti kan oh nan pehn irail me kin raparapahki en kihsang ar mour oh nan pehn nein nanmwarkien Papilon+ karis en sounpei kan, me pweipweiekla sang kumwail.’+
22 “Siohwa ketin mahsanih, ‘I pahn ruwes, oh I pahn kapwureiraildo nan kahnimw wet, oh irail pahn mahweniong oh kalowehdi oh isikala;+ oh I pahn wiakihla kahnimw en Suda kan wasa tehn ehu me sohla towe.’”+
35 Ni mwehin Sehoiakim+ nein Sosaia, nanmwarkien Suda, Siohwa ketin mahsanihong Seremaia: 2 “Kohla rehn peneinei en mehn Rekap kan+ oh koasoiong irail oh wairaildo nan tehnpesen Siohwa, nan ehu perehn mwenge ko;* kowe eri kihong irail en nim wain.”
3 Ngehi eri wahla Saasanaia nein Seremaia nein Apasinaia, rie ko, nah pwutak ko koaros oh peneinei en mehn Rekap kan pwon 4 nan tehnpesen Siohwa. I wairailla nan perehn mwengehn nein Ahnan ko nein Ikdalaia, ohl en Koht mehlelo, me mihte limwahn en lapalap akan perehn mwengeo pohnangin en Maaseaia nein Sallum, silepen wenihmwo, eh perehn mwenge. 5 Ngehi eri kihdi kep kan oh kep en wain kan me diren wain loale mwohn ohl akan en peneinei en mehn Rekap kan oh ndaiong irail: “Kumwail nim wain.”
6 Ahpw irail nda: “Se sohte pahn nim wain, pwehki Sehonadap*+ nein Rekap, samat mehn mahso, kihong kiht kehkehlik wet, ‘Kumwail de pil noumwail kan sohte douluhl pahn nim wain. 7 Oh kumwail sohte pahn kauwada ihmw ehu, kamwarak werentuhke de padok de alehdi mwetin kreip ehu. Ahpw, kumwail pahn koukousoante nan impwal kan, pwe kumwail en kak mour ahnsou werei nan sahpw me kumwail koukousoan ie nin duwen mehn liki kei.’ 8 Eri se pousehlahte peikiong mahsen en Sehonadap nein Rekap samat mehn mahso ni mehkoaros me e kehkehlingkihong kiht, ni at sohte mwahn nim wain—kiht, at pwoud kan, nait pwutak kan oh nait serepein kan. 9 Oh se sohte kin kauwada ihmw kan pwehn kousoan loale, de pil sohte ahneki mwetin kreip kan de mwaht akan de werentuhke. 10 Se usehlahte koukousoan nan impwal kan oh peikiong mehkoaros me Sehonadap* samat mehn mahso kehkehlingkihong kiht. 11 Ahpw ni ahnsou me Nanmwarki Nepukadnesar* en Papilon kohdahdo mahweniong sahpwet,+ se nda, ‘Kohdo, kitail kohdahla nan Serusalem pwehn pitsang karis en sounpei en mehn Kaldia kan oh mehn Siria kan,’ oh met se koukousoan nan Serusalem.”
12 Oh Siohwa ketin mahsanihong Seremaia: 13 “Iet me Siohwa kaunen karis en sounpei, Koht en Israel ketin mahsanih, ‘Kohla oh ndaiong aramas en Suda kan oh tohn Serusalem kan: “Kumwail sou kin pousehlahte ale kehkehlik en peikiong ei mahsen kan?”+ Siohwa me ketin mahmahsen. 14 “Sehonadap nein Rekap kehkehlingkihong kadaudoke kan ren dehr nim wain, oh re kapwaiada eh mahsen ko ni ar sohte nim wain leledo rahnwet, eri re peikiong ruwes en samarail mehn mahso.+ Ahpw, I kin pwurupwurehng* mahseniong kumwail, ahpw kumwail sohte kin peikiong ie.+ 15 Oh I kin usehlahte kadarewei rehmwail nei ladu kan koaros me wia soukohp kei, I kin pwurupwurehng kadarirailewei,*+ mahsanih, ‘Menlau, emenemen kumwail en sohpeisang amwail ahl suwed kan,+ oh wia dahme pwung! Kumwail dehr idawehn koht teikan oh papah irail. Eri kumwail ahpw pahn usehlahte koukousoan nan sahpw me I kihong kumwail oh samamwail mehn mahs ako.’+ Ahpw kumwail sohte rong kanahieng de rong ie. 16 Kadaudok kan en Sehonadap nein Rekap kapwaiadahr kehkehlik me samarail mehn mahso kihong irail,+ ahpw aramas pwukat sohte rong ie.”’”
17 “Kahrehda iet me Siohwa, Koht en kaunen karis en sounpei, Koht en Israel, ketin mahsanih: ‘I pahn wadohng Suda oh tohn Serusalem kan koaros kahpwal koaros me I kehkehlingkihong irail,+ pwe I mahseniong irail, ahpw re sohte rong, oh I kin malipei irail, ahpw irail sohte kin sapeng.’”+
18 Seremaia eri ndaiong peneinei en mehn Rekap kan: “Iet me Siohwa kaunen karis en sounpei, Koht en Israel ketin mahsanih, ‘Pwehki kumwail peikiong kehkehlik en samamwail mehn mahso Sehonadap oh kumwail usehlahte kapwaiada eh kehkehlik kan koaros, wiewiahte dahme e kehkehlingkihong kumwail, 19 iet me Siohwa kaunen karis en sounpei, Koht en Israel ketin mahsanih: “E sohte pahn sohla kadaudok en Sehonadap* nein Rekap me pahn papah mwohi.”’”
36 Ni kapahieun sounpar en Sehoiakim+ nein Sosaia, nanmwarkien Suda, Siohwa ketin mahsanihong Seremaia: 2 “Ale doaropwe limilimpene ehu* oh ntingihediong loale mahsen koaros me I mahsanihonguhkehr duwen Israel oh Suda+ oh wehi kan koaros,+ sangete ni tepin rahn me I mahseniong uhk ni mwehin Sosaia leledo rahnwet.+ 3 Mweinele ni ahnsou me irail tohnwehin Suda kan rong kahpwal koaros me I koasoanehdi en wadohng pohrail, irail pahn sohpeisang ar ahl suwed kan, pwe I en kak mahkohng ar sapwung kan oh diparail kan.”+
4 Seremaia eri ekerodo Paruk+ nein Neraia, oh Seremaia koasoiahda mahsen koaros me Siohwa ketin mahsanihong ih, oh Paruk eri ntingihedi mepwukat nan doaropwe limilimpeneo.*+ 5 Seremaia eri kehkehlingkihong Paruk: “I solahr mweimwei en pedolong nan tehnpesen Siohwa. 6 Eri kowe me pahn kohlongala oh wadek ni ngihl laud mahsen en Siohwa kan sang nan doaropwe limilimpeneo, me ke ntingihedi dahme I padahkihong uhk ko. Wadek mepwukat ni aramas akan ar rongorong ni tehnpesen Siohwa ni rahnen kaisihsol ehu; eri ke pahn wadek mepwukat ong aramas en Suda koaros me kohdo sang nan ar kahnimw kan. 7 Mweinele ar peki kupwuramwahu pahn lellahng Siohwa, oh emenemen irail pahn sohpeisang eh ahl suwed kan, pwe Siohwa ketin mahsanihier me e ketin engieng kowahlap pahn aramas pwukat.”
8 Paruk nein Neraia ahpw kapwaiada mehkoaros me soukohp Seremaia kehkehlingkihong ih; e wadek ni ngihl laud mahsen en Siohwa ko sang nan doaropwe limilimpeneo* ni tehnpesen Siohwa.+
9 Eri ni kelimaun sounpar en Sehoiakim+ nein Sosaia, nanmwarkien Suda, ni keduwaun sounpwong, aramas koaros nan Serusalem oh aramas koaros me kohlongodo nan Serusalem sang nan kahnimw en Suda kan ahpw tepida kaisihsol mwohn silangin Siohwa.+ 10 Paruk eri wadek ni ngihl laud sang nan doaropwe limilimpeneo* en Seremaia koasoi ko ni tehnpesen Siohwa ni aramas koaros ar wie rongorong, nan pere laud* en Kemaraia+ nein Sapan+ me wia sounnting, nan wasa me kelpene powe, ni wasahn pedolong en ewen kehl kapw en tehnpesen Siohwa.+
11 Ni ahnsou me Maikaia nein Kemaraia nein Sapan rongada mahsen en Siohwa koaros sang nan doaropwe limilimpeneo,* 12 e kohdihla ni tehnpesen nanmwarkio, ni en sekteri pere laudo. Lapalap ako* koaros wie mwomwohd wasao: Elisama+ sekterio, Delaia nein Semaia, Elnadan+ nein Akpor,+ Kemaraia nein Sapan, Sedekaia nein Ananaiah, oh lapalap teikan koaros. 13 Maikaia eri ndaiong irail mahsen koaros me e rongada ni ahnsou me Paruk wadek sang nan doaropwe limilimpeneo* ni aramas ako ar rongorong.
14 Lapalap ako koaros eri kadarala Seudi nein Nedanaia nein Selemaia nein Kusi rehn Paruk, nda: “Kohdo oh wahdo doaropwe limilimpene me ke wadek ni aramas ako ar rongorong.” Paruk nein Neraia eri ale doaropwe limilimpeneo oh kohlongala rehrail. 15 Irail ndaiong ih: “Menlau mwohndi oh wadekohng kiht ni ngihl laud.” Paruk eri wadekohng irail.
16 Eri ni ahnsowohte me re rong mahsen pwukat koaros, re ahpw masepwehkada kilengpene, oh re ndaiong Paruk: “Se uhdahn anahne patohwanohng nanmwarkio mahsen pwukat koaros.” 17 Oh re idek rehn Paruk: “Menlau komw padahkihong kiht ia duwen omw ntingihedi mahsen pwukat koaros. Ih me padahkihong uhk?” 18 Paruk eri sapengkin irail: “Ih me padahkihong ie mahsen pwukat koaros, oh I ntingihekihdi mepwukat ingk nan doaropwe limilimpene wet.”* 19 Lapalap ako eri ndaiong Paruk: “Kohla oh rukula, kowe oh Seremaia, oh dehr mweidohng emen en ese wasa me kumwa mihmi ie.”+
20 Irail eri kohlongala rehn nanmwarkio, ni wasa me kelpeneo, oh kihdi doaropwe limilimpeneo nan en sekteri Elisama pere laudo, oh irail ndaiong nanmwarkio mehkoaros me irail rongehr.
21 Nanmwarkio eri kadarala Seudi+ pwe en ale doaropwe limilimpeneo, oh e wahdo sang nan en sekteri Elisama pere laudo. Seudi eri tepida wadek ni nanmwarkio oh lapalap ako koaros me kesihnen limwahn nanmwarkio ar rongorong. 22 Ni keduwaun sounpwong,* nanmwarkio wie mwomwohd nan ihmw en ahnsoun kopou oh mie kisiniei wie lullul nan deupen kisiniei ehu mwowe. 23 Mwurin Seudi eh kin wadekala lain siluh de pahieu, nanmwarkio kin doadoahngki nein sekteri naipo oh lupukasang wasao ni doaropweo oh kesehlong nan kisiniei me wie lullul nan deupen kisinieio, lao doaropwe limilimpeneo pwon isihsla nan deupen kisinieio. 24 Oh irail sohte masepwehkada; nanmwarkio de pil nah ladu kan koaros me rong mahsen pwukat koaros sohte tehrpeseng ar likou kan. 25 Mendahki Elnadan,+ Delaia+ oh Kemaraia+ peki rehn nanmwarkio en dehr isikala doaropwe limilimpeneo, e sohte rong irail. 26 Oh pil, nanmwarkio ruwese Serameel nein nanmwarkio, Seraia nein Asriel oh Selemaia nein Apdeel ren koledi sekteri Paruk oh soukohp Seremaia, ahpw Siohwa ketin karirihirahla.+
27 Oh mwurin nanmwarkio eh isikala doaropwe limilimpeneo me audaudki mahsen kan me Paruk ntingihedi sang dahme Seremaia padahkihong ih,+ Siohwa ketin pwurehng mahsanihong Seremaia: 28 “Ale ehu doaropwe limilimpene tohrohr oh ntingihediong powe mahsen kan koaros me mi nan tepin doaropwe limilimpeneo, me Nanmwarki Sehoiakim en Suda isikalao.+ 29 Oh ke pahn ndaiong Nanmwarki Sehoiakim en Suda, ‘Iet me Siohwa ketin mahsanih: “Ke isikala doaropwe limilimpene wet oh nda, ‘Dahme kahrehda ke ntingihedi powe: “Nanmwarkien Papilon uhdahn pahn kohdo oh kamwomwala sahpwet oh kihsang aramas akan oh mahn akan”?’+ 30 Kahrehda iet me Siohwa ketin mahsaniheki duwen Nanmwarki Sehoiakim en Suda, ‘Sohte emen kadaudoke pahn mihmihte pwehn mwohd nan mwoalen Depit,+ oh paliwere mehlao pahn mihmihte pahn karakar nin rahn oh nan lemwulemwur nipwong.+ 31 I pahn kapwukoahki ih oh kadaudoke kan oh nah ladu kan arail sapwung kan, oh I pahn wadohng pohrail oh pohn tohn Serusalem kan oh pohn aramas en Suda kan kahpwal koaros me I mahsaniheki duwen irail,+ pwehki irail sohte rong ie.’”’”+
32 Seremaia eri ale ehu doaropwe limilimpene tohrohr oh kihong Paruk nein Neraia, sekterio,+ oh e ntingihedi loale mahsen koaros en doaropwe limilimpene* me Nanmwarki Sehoiakim en Suda isikalao+ ni Seremaia eh padahkihong ih. Oh mahsen tohto me duwehte mepwukat pil kapatapatohng.
37 Oh Nanmwarki Sedekaia+ nein Sosaia ahpw tepida kakaun wiliandi Konaia*+ nein Sehoiakim, pwe Nanmwarki Nepukadnesar* en Papilon me wiahkihla ih nanmwarki nan sapwen Suda.+ 2 Ahpw ih oh nah ladu ko oh aramas en sahpwo sohte rong mahsen en Siohwa me soukohp Seremaia koasoia.
3 Oh Nanmwarki Sedekaia eri kadarala Seukal+ nein Selemaia oh Sepanaia+ nein samworo Maaseaia rehn soukohp Seremaia, nda: “Menlau kapakapkin kiht ong Siohwa atail Koht.” 4 Seremaia sansaledek kohkohseli nanpwungen aramas ako, pwe irail saikinte kesehlong ih nan imweteng.+ 5 Nein Parao karis en sounpei kan mweselsangehr Isip,+ oh mehn Kaldia kan me kapikapil Serusalem ahpw rongada rohng wet duwen irail. Irail eri pweieklahsang Serusalem.+ 6 Siohwa eri ketin mahsanihong soukohp Seremaia: 7 “Iet me Siohwa, Koht en Israel ketin mahsanih, ‘Iet me kumwail pahn ndaiong nanmwarkien Suda, me kadarkumwaildo rehi pwehn idek rehi: “Kilang! Nein Parao karis en sounpei kan me kohkodohng sewesei kumwail pahn anahne pwuralahng nan sapweo, Isip.+ 8 Oh mehn Kaldia kan pahn pwurodo oh mahweniong kahnimw wet oh kalowehdi oh isikada.”+ 9 Iet me Siohwa ketin mahsanih, “Kumwail dehr pitih pein kumwail nda, ‘Mehn Kaldia kan uhdahn pahn kohkohlahsang kitail,’ pwehki re sohte pahn kohkohla. 10 Mehnda ma kumwail pahn kalowehdi karis en sounpei en mehn Kaldia kan pwon me wie mahmahweniong kumwail oh ihte neirail ohl me ohla kan me luhwehdi, re pil pahn uhdahte sang nan ar impwal kan oh isikada kahnimw wet.”’”+
11 Ni ahnsou me karis en sounpei en mehn Kaldia kan pweieklahsang Serusalem pwehki nein Parao karis en sounpei kan,+ 12 Seremaia eri mweselsang Serusalem kohla nan sapwen Pensamin+ pwehn alehdi pwaise wasao nanpwungen eh aramas akan. 13 Ahpw ni ahnsou me e lella ni Ewen Kelen Pensamin, kaun me kin apwalih sounsilasil kan, me adaneki Irisa nein Selemaia nein Ananaiah, ahpw koledi soukohp Seremaia oh nda: “Ke tangatangalahng rehn mehn Kaldia kan!” 14 Ahpw Seremaia nda: “Soh, kaidehn! I sohte tangatangalahng rehn mehn Kaldia kan.” Ahpw e sohte rong ih. Irisa eri salihedi Seremaia oh wahla ih rehn lapalap ako. 15 Lapalap ako eri lingeringerda pahn Seremaia,+ irail eri keme oh salihedi ih*+ nan imwen sekteri Sehonadan, me wiahla imweteng ehu. 16 Seremaia eri lekdekiong nan imweteng,* nan pere kan pahn ihmwo, oh e mihmihki wasao rahn tohto.
17 Nanmwarki Sedekaia eri ileklahng ih, oh ni rir nanmwarkio idek reh nan tehnpeseo.+ E idek, “Mie mahsen sang Siohwa?” Seremaia eri nda, “Ei maing, mie!” oh e usehla, “Komw pahn pengipengla rehn nanmwarkien Papilon!”+
18 Seremaia pil ndaiong Nanmwarki Sedekaia: “Dihp dah me I wiahiong komwi oh sapwellimomwi ladu kan oh aramas pwukat, me kahrehda kumwail ketikinielong nan imweteng? 19 Eri, ia sapwellimomwi soukohp ako me kohpadahng komwi, ‘Nanmwarkien Papilon sohte pahn kodohng mahweniong komwi oh sahpwet’?+ 20 Eri maing ei kaun nanmwarki, komw kupwurkalahngan oh karonge ie. Komw kupwurkalahngan oh kapwaiada ei pekipek wet. Komw dehr ketin kapwureielahng imwen sekteri Sehonadan,+ pwe I en dehr mehla wasao.”+ 21 Nanmwarki Sedekaia eri ruwese me Seremaia en selidi nan Wasa me Kelpene en Sounsilasil,+ oh re kin kihong ih ehu pilawa pwonopwon ehuehu rahn sang ni ahl en sounwia pilawa kan+ lao sohla pilawa nan kahnimwo.+ Oh Seremaia eri mihmihte nan Wasa me Kelpene en Sounsilasil.
38 Sepataia nein Mattan, Kedalaia nein Pasuhr, Sukal+ nein Selemaia oh Pasuhr+ nein Malkaisa ahpw rongada mahsen kan me Seremaia koasoakoasoiaiong aramas ako koaros, nda: 2 “Iet me Siohwa ketin mahsanih, “Aramas me mihmi nan kahnimw wet pahn mehkihla kedlahs, lehk lapalap oh soumwahu lusulus.+ Ahpw aramas me pekimahk* rehn mehn Kaldia kan pahn momourte oh e pahn pitila.’*+ 3 Iet me Siohwa ketin mahsanih, ‘Kahnimw wet uhdahn pahn kohieng nein nanmwarkien Papilon karis en sounpei kan, oh e pahn kalowehdi.’”+
4 Lapalap ako eri ndaiong nanmwarkio: “Menlau kemehla ohl menet,+ pwe ih met me e kin kaluwetehkihla koapworopwor* en sounpei kan me luhwehdi nan kahnimw wet, iangahki ahn aramas akan koaros, ni eh kin koasoiaiong irail mahsen pwukat. Pwe ohl menet sohte kin rapahki en aramas pwukat popohl ahpw ar kahpwal.” 5 Nanmwarki Sedekaia eri sapengki: “Kilang! E miher nan pehmwail, pwe nanmwarki sohte kak wia mehkot pwehn ireikumwaildi.”
6 Irail eri ale Seremaia oh kesehlong ih nan pwoaren nahk pihl en Malkaisa nein nanmwarkio, me mi nan Wasa me Kelpene en Sounsilasil.+ Irail doadoahngki sahl kei oh kadaredi Seremaia. Sohte pilen pwoaren nahk pihlo, ihte pwelmatak, oh Seremaia ahpw tepida suhrla nan pwelmatako.
7 Epedmelek+ mehn Idiopiao, lapalap men nan tehnpesen nanmwarkio, ahpw rongada me irail kesehdiong Seremaia nan pwoaren nahk pihlo. Nanmwarkio wie mwomwohd nan Ewen Kelen Pensamin,+ 8 Epedmelek eri pedoisang nan tehnpesen nanmwarkio oh koasoiong nanmwarkio, nda: 9 “Maing ei kaun nanmwarki, dahme ohl pwukat wiahiong soukohp Seremaia me suwed! Irail kesehdiong ih nan pwoaren nahk pihlo, oh e pahn mehla wasao pwehki lehk lapalapo, pwe sohte pilawa luhwehdi nan kahnimw wet.”+
10 Nanmwarkio eri kehkehlingkihong Epedmelek mehn Idiopiao: “Kahrehda ohl 30 sang wasaht, oh apihadahsang soukohp Seremaia nan pwoaren nahk pihlo mwohn eh pahn mehla.” 11 Epedmelek eri kahrehda ohl ako oh kohlongala nan tehnpesen nanmwarkio, wasa ehu pahnangin wasahn nahk dipwisou kesempwal kan,+ oh irail ale likou mering kei oh pelien likou kei sang wasao oh kadaredi mepwukat ni sahl kei rehn Seremaia nan pwoaren nahk pihlo. 12 Epedmelek mehn Idiopiao eri ndaiong Seremaia: “Menlau kihong likou mering kan oh pelien likou kan pahn pehmw kan pwe sahl kan en dehr kauweiukala.” Seremaia eri kapwaiada, 13 oh irail apihkihda Seremaia sahl ko oh waikadahsang nan pwoaren nahk pihlo. Oh Seremaia mihmihte nan Wasa me Kelpene en Sounsilasil.+
14 Nanmwarki Sedekaia eri ileklahng soukohp Seremaia en kohdo reh ni wasahn pedolong kesiluh, me mi nan tehnpesen Siohwa, oh nanmwarkio ndaiong Seremaia: “Mie mehkot I men idek rehmw. Ke dehpa ekihsang ie mehkot.” 15 Seremaia eri ndaiong Sedekaia: “Ma I patohwanohng komwi, komw uhdahn pahn ketin kemeiehla. Oh ma I kaweid komwi, komw sohte pahn ketin karonge ie.” 16 Nanmwarki Sedekaia eri kahukihong Seremaia ni rir, nda: “Nin duwen Siohwa eh ketin ieias, me ketikihong kita mour, I sohte pahn kemeiukala, oh I sohte pahn panguhkala rehn aramas pwukat me raparapahki en kihsang omw mour.”
17 Seremaia eri ndaiong Sedekaia: “Iet me Siohwa, Koht en kaunen karis en sounpei, Koht en Israel, ketin mahsanih, ‘Ma ke pekimahk* rehn lapalap akan en nanmwarkien Papilon, ke pahn mourla, oh kahnimw wet sohte pahn isihsla. Kowe oh omw peneinei* pahn mourla.+ 18 Ahpw ma ke sohte pahn pekimahk* rehn lapalap akan en nanmwarkien Papilon, kahnimw wet pahn kohieng rehn mehn Kaldia kan, oh re pahn isikada,+ oh ke sohte pahn pitsang nan pehrail kan.’”+
19 Nanmwarki Sedekaia eri ndaiong Seremaia: “I masak mehn Suhs kan me tangalahng rehn mehn Kaldia kan, pwe ma I pengpengla rehrail, irail pahn kakete wiakauwe ie.” 20 Ahpw Seremaia nda: “Komw sohte pahn pengpengla rehrail. Menlau, peikiong kapitien Siohwa duwen me I patopatohwanohng komwi, oh e pahn pweida mwahu rehmwi, oh komwi ahpw pahn ketin momourte. 21 Ahpw ma komw kahng pekimahk,* iet me Siohwa ketin kasalehiongieier: 22 Kilang! Lih koaros me mihmihte nan tehnpesen nanmwarkien Suda pahn wisikieido rehn lapalap akan en nanmwarkien Papilon,+ oh re pahn nda,
Re kahrehiong nehmw kan en suhrla nan pwelmatak.
Met re sohpeilahr oh tang.’
23 Oh re pahn wahieila omwi pwoud kan oh noumwi pwutak kan koaros rehn mehn Kaldia kan, oh komw sohte pahn pitsang nan pehrail kan, ahpw komw pahn kolokoldi pahn nanmwarkien Papilon,+ oh kahnimw wet pahn isihsla pwehki komwi.”+
24 Sedekaia eri ndaiong Seremaia: “Ke dehpa mweidohng emen en ese duwen mepwukat, pwe ke de mehla. 25 Oh ma lapalap akan rongada me I koasoiong uhk oh re kohdo oh ndaiong uhk, ‘Menlau, ndaiong kiht dahme ke patohwanohng nanmwarkio. Ke dehpa ekihsang kiht mehkot, oh se sohte pahn kemeiukala.+ Dahme nanmwarkio mahsanihong uhk?’ 26 ke pahn sapengkin irail, ‘I wiewia pekipek ehu rehn nanmwarkio, pwe en dehr kadarielahng ni imwen Sehonadano pwe I en mehla wasao.’”+
27 Kedekedeo lapalap ako koaros ahpw kohdo rehn Seremaia oh kapeidakih. E ndaiong irail mehkoaros me nanmwarkio kehkehlingkihong ih en nda. Irail eri sohla koasoiong ih, pwe sohte emen irail rong koasoi ko. 28 Lao lel rahn me Serusalem lohdi, Seremaia mihmihte nan Wasa me Kelpene en Sounsilasil;+ e mihmihte wasao ni ahnsou me Serusalem lohdi.+
39 Ni keduwaun sounpar en Nanmwarki Sedekaia en Suda, ni kaeisek en sounpwong, Nanmwarki Nepukadnesar* en Papilon oh nah karis en sounpei kan koaros ahpw kohdo Serusalem, oh re kapilpene kahnimwo.+
2 Ni kaeisek ehun sounpar en Sedekaia, ni kapahieun sounpwong, ni keduwaun rahn en sounpwongo, irail kauwehla kelen kahnimwo.+ 3 Oh lapalap akan koaros en nanmwarkien Papilon ahpw kohlongala oh mwohndi ni Ewen Kelen Nanwerenge.+ Iet irail kan, Nerkal-sareser Samkar, Nepo-sarsekim Rapsaris,* Nerkal-sareser Rapmak,* oh lapalap teikan koaros en nanmwarkien Papilon.
4 Ni ahnsou me Nanmwarki Sedekaia en Suda oh sounpei kan koaros kilangirailda, re ahpw tangdoaui.+ Re tangasang nan kahnimwo nipwong oh re tang nan ahl en mwetuwel en nanmwarki, kolahng ni ewen kehlo nanpwungen kehl riauo, oh re douluhlla ni ahl en Arapa.+ 5 Ahpw karis en sounpei en mehn Kaldia kan pwakihirailla, oh re koanohdi Sedekaia nan sapwtehn en Seriko.+ Re koledi ih oh wahdahdo rehn Nanmwarki Nepukadnesar* en Papilon nan Ripla+ nan sapwen Amad,+ wasa me e pakairkihda kadeikpe. 6 Sang ni ruwes en nanmwarkien Papilon, nein Sedekaia pwutak kan kamakamala mwohn mese wasao nan Ripla. Oh lapalap en Suda kan koaros pil kamakamala sang ni ruwes en nanmwarkien Papilon.+ 7 Ih eri kauwehla pwoaren mesen Sedekaia ko, oh mwurin mwo e salihekihdi selmete prons kan pwehn walahng ih nan Papilon.+
8 Mehn Kaldia kan eri isikada tehnpesen nanmwarkio oh imwen aramas ako,+ oh irail karangkehdi kehl en Serusalem kan.+ 9 Nepusaradan+ kaunen sounsilasil ko ahpw kalipelahng Papilon aramas ako me luhwehdi nan kahnimwo, irail me tang me pekimahk reh, oh meteikan me luhwehdi.
10 Ahpw Nepusaradan kaunen sounsilasil ko pwilikihdi nan sapwen Suda ekei aramas me keieu semwehmwe kan, irail kan me sohte douluhl ahneki mehkot. Rahno e pil kihong irail mwetin kreip kan oh mwaht akan ren koadoahke.*+
11 Nanmwarki Nepukadnesar* en Papilon eri kihong Nepusaradan kaunen sounsilasil ko kehkehlik pwukat duwen Seremaia: 12 “Wahda ih oh apwalih; ke dehpa kamedekihala, oh kapwaiada sohte lipilipil dahme e peki rehmw.”+
13 Eri Nepusaradan kaunen sounsilasil ko, Nepusaspan Rapsaris,* Nerkal-sareser Rapmak,* oh nein nanmwarkien Papilon ohl kesempwal kan koaros ahpw kadarala ohl akan 14 oh wahsang Seremaia nan Wasa me Kelpene en Sounsilasil+ oh kihla rehn Kedalaia+ nein Ahikam+ nein Sapan+ pwe en wisikla ni imweo. Seremaia eri kousoan nanpwungen aramas ako.
15 Ni ahnsou me Seremaia wie sensel nan Wasa me Kelpene en Sounsilasil,+ Siohwa ketin mahsanihong ih: 16 “Kohla oh ndaiong Epedmelek+ mehn Idiopiao, ‘Iet me Siohwa kaunen karis en sounpei, Koht en Israel ketin mahsanih: “I pahn kapwaiada ei mahsen duwen kahnimwet en wahdo kahpwal a kaidehn kamwahu, oh rahno ke pahn kilang eh wiawi.”’
17 “Siohwa ketin mahsanih, ‘Ahpw I pahn kapituhkala rahno, oh ke sohte pahn pengpengla rehn aramas akan me ke kin masak.’
18 “Siohwa ketin mahsanih, ‘Pwe I uhdahn pahn wiahiong uhk ken pitila, oh ke sohte pahn mehkihla kedlahs. Ke pahn momourte,*+ pwehki ke likih ie.’”+
40 Siohwa ketin mahseniong Seremaia mwurin Nepusaradan+ kaunen sounsilasil ko eh kasaledekihala Seremaia sang Rama.+ Seremaia wisiklahng wasao ni peh ko eh pirapirkihdi sein kan oh e mi rehn aramas ako koaros me kalipilipasang Serusalem oh Suda oh kalipilipala Papilon. 2 Kaunen sounsilasil ko eri ale Seremaia oh ndaiong ih: “Siohwa omw Koht ketin kohpadahr duwen kahpwal wet ong wasaht, 3 oh Siohwa ketin wahdo kahpwal wet duwehte me e ketin mahsanih, pwehki kumwail aramas akan dipadahr ong Siohwa oh sohte peikiong kapitie. Ihme kahrehda met wiawihong kumwail.+ 4 Eri I pahn kasaledekihiukala rahnwet sang sein kan me mi ni pehmw kan. Ma ke men iang ie kohla Papilon, kohdo, oh I pahn apwalihiuk. Ahpw ma ke sohte men iang ie kohla Papilon, a ke dehr. Kilang! Sahpwet pwon mi mwohmw. Kohla wasa sohte lipilipil me ke pilada.”+
5 Ni Seremaia eh saikinte pilada en pwurala, Nepusaradan ahpw nda: “Pwurala rehn Kedalaia+ nein Ahikam+ nein Sapan,+ me nanmwarkien Papilon idihada pohn kahnimw en Suda kan, oh mihmihte reh nanpwungen aramas akan; de kohla wasa sohte lipilipil me ke pilada.”
Kaunen sounsilasil ko eri kihong ih mwenge kei oh kisakis ehu oh mweidohng en kohkohla. 6 Seremaia eri kohla rehn Kedalaia nein Ahikam nan Mispa+ oh mihmihte reh nanpwungen aramas ako me luhwehdi nan sahpwo.
7 Kedekedeo kaunen karis en sounpei koaros me mihmi nan mohso rehn neirail ohl akan ahpw rongada me nanmwarkien Papilon idihadahr Kedalaia nein Ahikam pohn sahpwo oh me e idihadahr ih pohn ohl akan, lih akan, oh seri kan sang aramas semwehmwe kan nan sahpwo me sohte kalipilipala Papilon.+ 8 Irail eri kohla rehn Kedalaia nan Mispa.+ Irail akan iei Ismael+ nein Nedanaia, Sohanan+ oh Sonadan nein Karea, Seraia nein Tanumed, nein Epai ko mehn Netopa oh Sesanaia+ nein mehn Maakad men, iangahki neirail ohl akan. 9 Kedalaia nein Ahikam nein Sapan ahpw kahukihong irail oh neirail ohl akan inou ehu, oh nda: “Kumwail dehr masak papah mehn Kaldia kan. Kumwail kousoan nan sahpwet oh papah nanmwarkien Papilon, oh e pahn pweida mwahu rehmwail.+ 10 A ngehi, I pahn mihmihte nan Mispa pwe I en wiliankumwaildi ong* mehn Kaldia kan me pahn kohdo rehtail. Ahpw kumwail pahn kihpene wain, wahntuhkehn ahnsoun karakar kan, oh leh oh kihdiong mepwukat nan noumwail deupen nahk dipwisou kan oh kousoan nan kahnimw kan me kumwail ahnekihla.”+
11 Oh mehn Suhs kan koaros me mihmi nan Mohap, Ammon oh Edom, iangahki irail kan me mi nan sahpw teikan koaros, pil rongada me nanmwarkien Papilon mweidohng aramas luhwehdi kan ren mihmi nan Suda oh me e idihada pohrail Kedalaia nein Ahikam nein Sapan. 12 Mehn Suhs kan koaros ahpw tepida pwurodo sang wasa koaros me irail mwarahkpeseng ie, oh irail ahpw kohdo nan sapwen Suda, rehn Kedalaia nan Mispa. Oh irail kihpene wain oh wahntuhkehn ahnsoun karakar kan ni uwe ieu me inenen laud.
13 Sohanan nein Karea oh kaunen karis en sounpei koaros me mihmi nan mohso ahpw kohdo rehn Kedalaia nan Mispa. 14 Irail ndaiong ih: “Komw sohte mwahngih me Paalis, nanmwarkien mehn Ammon kan,+ kadarodohr Ismael nein Nedanaia pwehn kemeikomwihla?”+ Ahpw Kedalaia nein Ahikam sohte kamehlele irail.
15 Sohanan nein Karea ahpw ndaiong Kedalaia ni rir nan Mispa: “I men kohla oh kemehla Ismael nein Nedanaia, oh sohte me pahn ese. Pwe ia kahrepen eh pahn kemeikomwihla, oh ia kahrepen aramas en Suda koaros me pokonpenehr rehmwi en mwarahkpeseng oh luhwen aramas en Suda kan en sohrala?” 16 Ahpw Kedalaia+ nein Ahikam ndaiong Sohanan nein Karea: “Ke dehr wia met, pwe dahme ke ndindahn duwen Ismael likamw ehu.”
41 Ni keisuhwen sounpwong, Ismael+ nein Nedanaia nein Elisama, me wia kisehn kadaudok en nanmwarki oh wia kisehn emen nein nanmwarkio ohl kesempwal kan, ahpw kohdo iangahki ohl ehk rehn Kedalaia nein Ahikam nan Mispa.+ Ni ar wie mwengemwengepene nan Mispa, 2 Ismael nein Nedanaia oh ohl ehk ko me iangih ahpw uhda oh kemehkihla Kedalaia nein Ahikam nein Sapan kedlahs. Eri Ismael kemehla aramaso me nanmwarkien Papilon idihada pohn sahpwo. 3 Ismael pil kemehla mehn Suhs koaros me mi rehn Kedalaia nan Mispa, iangahki sounpei en mehn Kaldia kan me mi wasao.
4 Ni keriaun rahn mwurin Kedalaia eh kamakamalao, mwohn aramas ar esehda, 5 ohl 80 sang Sekem,+ sang Sailo+ oh sang Sameria+ ahpw kohdo. Arail alis kan sihpsang, ar likou kan teipeseng, re leke paliwararail kan,+ oh re weuwa meirong en krein kan oh warpwohmwahu pwetepwet*+ pwehn walahng ni tehnpesen Siohwa. 6 Ismael nein Nedanaia ahpw kohieilahsang nan Mispa pwehn tuhwong irail. E wie sengiseng ni eh alialu kohla. Ni eh tuhwongiraildi, e ndaiong irail: “Kumwail kohdo rehn Kedalaia nein Ahikam.” 7 Ahpw ni ahnsou me irail kohlongodo nan kahnimwo, Ismael nein Nedanaia oh nah ohl ako ahpw kemeirailla oh keseirailla nan pwoaren nahk pihlo.
8 Ahpw mie ohl ehk nanpwungarail me ndaiong Ismael: “Komw dehr kemeikitala, pwe mie reht wihd, parli, leh oh sukehn loangalap me se wie ekieki nan mwaht.” Ih eri sohte wiahiong irail en iang riarail ko kamakamala. 9 Ismael eri kesehdiong paliweren ohl mehla ko koaros me e kemehla nan pwoaren nahk pihl laud ehu me Nanmwarki Asa wiahda pwehki Nanmwarki Paasa en Israel.+ Ih pwoaren nahk pihl wet me Ismael nein Nedanaia audehkihda ohl kamakamala ko.
10 Ismael eri salihedi luhwen aramas ako koaros nan Mispa,+ iangahki nein nanmwarkio serepein kan oh aramas ako koaros me luhwehdi nan Mispa, me Nepusaradan kaunen sounsilasil ko kihdi pahn epwelpen Kedalaia+ nein Ahikam. Ismael nein Nedanaia ahpw salihiraildi oh mwesel pwehn kotehla kolahng mehn Ammon kan.+
11 Ni ahnsou me Sohanan+ nein Karea oh kaunen karis en sounpei kan koaros me mihmi reh rongada duwen soahng suwed koaros me Ismael nein Nedanaia wiadahr, 12 re ahpw kahrehda ohl koaros oh kohla pwehn peiong Ismael nein Nedanaia, oh re diarada ih limwahn pihl kalaimwun kan* nan Kipeon.
13 Aramas koaros me iang Ismael ahpw perenda ni ar kilangada Sohanan nein Karea oh kaunen karis en sounpei koaros me iangih. 14 Aramas ako koaros me Ismael salihedi sang Mispa+ ahpw sohpeila oh iang Sohanan nein Karea pwurala. 15 Ahpw Ismael nein Nedanaia oh nah ohl welimen pitsang Sohanan oh kohla rehn mehn Ammon kan.
16 Sohanan nein Karea oh kaunen karis en sounpei koaros me iangih ahpw wahda luhwen aramas ako me kohsang Mispa, irail me re doarehla sang Ismael nein Nedanaia mwurin eh kemehla Kedalaia+ nein Ahikam. Irail wahdo ohl ako, sounpei ko, lih ako, seri ko oh lapalap akan en tehnpaso sang Kipeon. 17 Irail eri kohla oh mihmi wasahn pweidi en Simam limwahn Pedleem.+ Re koasoakoasoane ren kohlongala nan Isip+ 18 pwehki mehn Kaldia kan. Pwe re masak irail, pwehki Ismael nein Nedanaia eh kemelahr Kedalaia nein Ahikam, me nanmwarkien Papilon idihadahr pohn sahpwo.+
42 Kaunen karis en sounpei ko koaros, oh Sohanan+ nein Karea, Sesanaia nein Osaia, oh aramas ako koaros, sang me keieu tikitik lel me keieu lapalap ahpw kohdo 2 oh ndaiong soukohp Seremaia: “Menlau, komw karonge at peki kupwuramwahu, oh kapakapkin kiht ong Siohwa omw Koht, oh kapakapki aramas pwukat koaros me luhwehdi, pwe se me tohto ahpw me malaulaute me luhwehdi,+ duwen me komwi mahsanih. 3 Siohwa omw Koht en ketin padahkihong kiht ahl me se anahne weid loale oh dahme se anahne wia.”
4 Soukohp Seremaia eri sapengkin irail: “I rongkumwailehr, oh I pahn kapakapohng Siohwa amwail Koht nin duwen me kumwail peki; oh mahsen koaros me Siohwa ketin sapengkin kumwail, I pahn ndaiong kumwail. I sohte pahn ekihsang kumwail mehkot.”
5 Irail eri sapengki Seremaia: “Siohwa en ketin wia sounkadehde mehlel oh lelepek oh kaloke kiht ma se sohte kapwaiada duwehte me Siohwa omw Koht ketin padahkihong kiht sang rehmwi. 6 Mehnda ma mwahu de suwed, se pahn peikiong kapitien Siohwa at Koht, me se kadaralahng komwi reh, pwe en pweida mwahu reht pwehki at peikiong kapitien Siohwa at Koht.”
7 Eri rahn eisek mwuri Siohwa ketin mahseniong Seremaia. 8 Ih eri ekerodo Sohanan nein Karea oh kaunen karis en sounpei ko koaros me ieiang ih oh aramas ako koaros, sang me keieu tikitik lel me keieu lapalap.+ 9 E ndaiong irail: “Iet me Siohwa, Koht en Israel, me kumwail kadariehla I en wia amwail pekipek en kupwuramwahu mwohn silangi, ketin mahsanih: 10 ‘Ma mehlel kumwail pahn mihmihte nan sahpwet, eri I pahn kaukumwailda a kaidehn kauweikumwailla, oh I pahn padongkumwaildi a kaidehn uskumwailda, pwe I pahn koluhkihla* kahpwal me I wiahiong kumwail.+ 11 Kumwail dehpa masepwehkada pwehki nanmwarkien Papilon, me kumwail kin masak.’+
“Siohwa ketin mahsanih, ‘Kumwail dehpa masepwehkada pwehki ih, pwe I pahn ieiang kumwail, pwehn doareikumwailla oh kapitkumwailla sang nan peh. 12 Oh I pahn kasalehiong kumwail kadek kalahngan,+ oh e pahn kasalehiong kumwail kadek kalahngan oh kapwureikumwailla nan sapwamwailo.
13 “‘Ahpw ma kumwail pahn nda, “Soh, se sohte pahn mihmihte nan sahpwet!” oh kumwail sapeikiong kapitien Siohwa amwail Koht 14 ni amwail nda, “Soh, se pahn kohlahte nan sapwen Isip,+ wasa me se sohte pahn kilang mahwen de rong ngilen mehn pepeuk* de men mwengehda; wasao me se pahn kousoan ie,” 15 eri rong mahsen en Siohwa, kumwail mehn Suda kan me luhwehdi. Iet me Siohwa kaunen karis en sounpei, Koht en Israel ketin mahsanih: “Ma kumwail uhdahn koasoanehdi en kohla Isip oh kumwail kohla wasao pwehn kousoan ie,* 16 eri kedlahs me kumwail kin masako pahn lelohng kumwail wasao nan sapwen Isip, oh lehk lapalap me kumwail kin masako pahn kohwei mwurimwail nan Isip, oh kumwail pahn mehla wasao.+ 17 Oh aramas koaros me koasoanehdi en kohla Isip pwehn kousoan wasao pahn mehkihla kedlahs, lehk lapalap oh soumwahu lusulus. Sohte emen irail pahn mourla de pitsang kahpwal me I pahn wadohng pohrail.”
18 “Pwe iet me Siohwa kaunen karis en sounpei, Koht en Israel ketin mahsanih: ‘Duwehte ei engieng kowahlap eh wudekdiong pohn tohn Serusalem kan,+ eri ei engieng pahn wudekdiong pohmwail ma kumwail pahn kohla Isip, oh kumwail pahn wiahla mehn keria ehu, mehkot kamasepwehk ehu, mehn kauwe ehu, oh kanamenek ehu,+ oh kumwail sohte pahn pwurehng kilang wasaht.’
19 “Siohwa ketin mahseniongkumwailehr, kumwail mehn Suda kan me luhwehdi. Kumwail dehpa kohla Isip. Kumwail en uhdahn ese me I panawihekin kumwail rahnwet 20 me amwail sapwung pahn kahrehda kumwail en luhssang amwail mour.* Pwe kumwail kadariehla rehn Siohwa amwail Koht, oh nda, ‘Kapakapkin kiht ong Siohwa at Koht, oh padahkihong kiht mehkoaros me Siohwa at Koht ketin mahsanih, oh se pahn kapwaiada.’+ 21 Oh I ndaiong kumwail rahnwet, ahpw kumwail sohte pahn peikiong kapitien Siohwa amwail Koht de sohte pahn wia dahme e ketin poaroneiehdo I en padahkihong kumwail.+ 22 Eri, kumwail en uhdahn ese me kumwail pahn mehkihla kedlahs, lehk lapalap oh soumwahu lusulus nan wasa me kumwail men kohla oh kousoan ieo.”+
43 Ni Seremaia eh kaerala eh koasoiaiong aramas ako koaros mahsen pwukat koaros sang Siohwa ar Koht, mahsen koaros me Siohwa ar Koht ketin poaronehla ih en padahkihong irail, 2 Asaraia nein Osaia, Sohanan+ nein Karea, oh ohl aklapalap* ako koaros ahpw ndaiong Seremaia: “Dahme ke ndindahn likamw ehu! Siohwa at Koht sohte ketin poaroneiukodo pwehn nda, ‘Kumwail dehpa kohla Isip pwehn kousoan wasao.’ 3 Ahpw Paruk+ nein Neraia me kin kangoangeiuk en uhwong kiht, pwe ken kihong kiht rehn mehn Kaldia kan, pwehn kemeikitala de kalipeikitalla nan Papilon.”+
4 Sohanan nein Karea oh kaunen karis en sounpei kan koaros oh aramas ako koaros ahpw sohte peikiong kapitien Siohwa me re en mihmihte nan sapwen Suda. 5 Sohanan nein Karea oh kaunen karis en sounpei kan koaros ahpw kahrehda luhwen aramas en Suda ko koaros me pwurodo pwehn kousoan nan sapwen Suda sang wehi koaros me re mwarahkpeseng ie.+ 6 Irail wahda ohl ako, lih ako, seri ko, nein nanmwarki serepein ko, oh koaros me Nepusaradan+ kaunen sounsilasil ko kihdi rehn Kedalaia+ nein Ahikam+ nein Sapan,+ iangahki soukohp Seremaia oh Paruk nein Neraia. 7 Irail eri kohlongala nan sapwen Isip pwe irail sohte peikiong kapitien Siohwa, oh irail kohla lel Dapanihs.+
8 Siohwa ketin mahsanihong Seremaia nan Dapanihs: 9 “Rikada takai kalaimwun kan, oh ekihla mepwukat nan taht prik kan* oh pwainkihdi siment ni wasahn pedolong en imwen Parao nan Dapanihs, ni ohlen Suhs kan ar kilikilang. 10 Oh ndaiong irail, ‘Iet me Siohwa kaunen karis en sounpei, Koht en Israel ketin mahsanih: “I pahn ekerodo Nepukadnesar* nanmwarkien Papilon, nei laduwo,+ oh I pahn kihdi mwoale pohn takai pwukat me I ekihla, oh e pahn katehlapahla eh impwalo* pohrail.+ 11 Oh e pahn kohlongodo oh mahweniong sapwen Isip.+ Ekei pahn mehkihla soumwahu keper, ekei pahn selidi, oh ekei pahn mehkihla kedlahs.+ 12 Oh I pahn isikada imwen kaudok en koht en Isip kan,+ oh e pahn isikirailla oh salihiraildi. E pahn kidimkihla pein ih sapwen Isip duwehte silepen sihpw men eh kin kidimkihla pein ih eh likou, oh e pahn mweselsang wasao ni popohl.* 13 Oh e pahn kapisetikihpeseng uhr* en Ped-semes* kan nan sapwen Isip, oh e pahn isikada imwen kaudok en koht en Isip kan.”’”
44 Siohwa ketin mahsanihong Seremaia duwen mehn Suhs kan koaros me kin koukousoan nan sapwen Isip,+ irail me kin koukousoan nan Mikdol,+ Dapanihs,+ Nohp*+ oh sapwen Padros:+ 2 “Iet me Siohwa kaunen karis en sounpei, Koht en Israel ketin mahsanih, ‘Kumwail kilangehr kahpwal koaros me I wadohng pohn Serusalem+ oh kahnimw en Suda koaros, oh rahnwet re wia mohn kahnimw kei, me sohte towe.+ 3 Met wiawi pwehki soahng suwed kan me re wiahda pwehn kansensuwedihkin ie ni ar kohla oh wiahda meirong kan+ oh papah koht teikan me re sehse, me kumwail oh pil samamwail mehn mahs ako sehse.+ 4 I kin usehlahte kadarewei rehmwail nei ladu kan koaros me wia soukohp kei. I kin pwurupwurehng kadarirailewei,* mahsanih: “Menlau dehr wia soahng kasaut wet me I kalahdeki.”+ 5 Ahpw irail sohte rong de rong kanahieng pwehn sohpeisang ar suwed kan ni ar sohte pahn wiahda meirong kan ong koht teikan.+ 6 Eri I wudekihdi ei engieng kowahlap oh e lulda nan kahnimw en Suda kan oh nanial en Serusalem kan, oh re wiahla mohn kahnimw ehu oh wasa tehn ehu, duwehte me re wia rahnwet.’+
7 “Oh iet me Siohwa, Koht en kaunen karis en sounpei, Koht en Israel, ketin mahsanih, ‘Dahme kahrehda kumwail wiewiahki kahpwal laud ehu ong pein kumwail? Pwe ohl oh lih, seri oh seri pwelel kan koaros pahn sohrasang Suda, sohte emen rehmwail pahn luhwehdi. 8 Dahme kahrehda kumwail kansensuwedihkin ie doadoahk en pehmwail kan ni amwail wiahda meirong kan ong koht teikan nan sapwen Isip wasa me kumwail kohla kousoan ie? Kumwail pahn sohrala oh wiahla mehn keria ehu oh kanamenek ehu nan wehi koaros en sampah.+ 9 Ia duwe, kumwail manokelahr wiewia suwed en samamwail mehn mahs ako oh wiewia suwed en nanmwarkien Suda kan+ oh wiewia suwed en ar pwoud kan,+ pil pein amwail wiewia suwed kan oh wiewia suwed en amwail pwoud kan,+ me wiawi nan sapwen Suda oh nanial en Serusalem kan? 10 Leledo rahnwet irail sohte aktikitikla. Re kin kasalehda ar sohte masak,+ oh re pil sohte kin keid nan ei kosonned oh ei koasoandi kan me I kihdi mwohmwail oh mwohn samamwail mehn mahs ako.’+
11 “Eri iet me Siohwa kaunen karis en sounpei, Koht en Israel ketin mahsanih, ‘I koasoanedier en wahdo kahpwal pohmwail pwehn kamwomwala Suda pwon. 12 Oh I pahn ale luhwen aramas en Suda kan me koasoanehdi en kohla nan sapwen Isip pwehn kousoan wasao, oh irail koaros pahn sohrala nan sapwen Isip.+ Irail pahn mehkihla kedlahs oh sohrala sang ni lehk lapalap; sang me keieu tikitik lel me keieu lapalap, irail pahn mehkihla kedlahs oh lehk lapalap. Oh irail pahn wiahla mehn keria ehu, mehkot kamasepwehk ehu, mehn kauwe ehu oh soahng kanamenek ehu.+ 13 I pahn kalokehki irail me kin koukousoan nan sapwen Isip kedlahs, lehk lapalap oh soumwahu lusulus, duwehte ei kaloke Serusalem.+ 14 Oh luhwen aramas en Suda kan me kohla kousoan nan sapwen Isip sohte pahn pitila de mourla pwe ren pwurala nan sapwen Suda. Irail pahn men pwurala oh kousoan wasao, ahpw re sohte pahn pwurala, ihte ekei me pitila kan.’”
15 Ohl koaros me kin ese me ar pwoud kan kin wiahda meirong kan ong koht teikan oh lih pwopwoud koaros me kesikesihnen wasao, me wia lapalahn pwihn ehu, oh aramas koaros me kin koukousoan nan sapwen Isip,+ nan Padros,+ ahpw sapengki Seremaia: 16 “Se sohte pahn rong mahsen me ke koasoiaiong kiht ni mwaren Siohwa. 17 Ahpw, se uhdahn pahn kapwaiada mahsen koaros me kohsang nan awat kan, oh se pahn wiahda meirong kan ong Lih Nanmwarkien Nanleng* oh wudekihdi meirong en wain kan ong ih,+ duwehte me kiht, samat mehn mahs ako, at nanmwarki kan oh nait lapalap akan kin wia nan kahnimw en Suda kan oh nanial en Serusalem kan. Ahnsowo se kin medkihla pilawa oh paiamwahu, oh se sohte douluhl kin kilang kahpwal. 18 Sang ni ahnsou me se tokedihsang at wiahda meirong kan ong Lih Nanmwarkien Nanleng* oh wudekihdi meirong en wain kan ong ih, se sohla ahneki mehkoaros oh se mehkihla kedlahs oh lehk lapalap.”
19 Lih ako ahpw usehla nda: “Oh ni ahnsou me se wiewia meirong kan ong Lih Nanmwarkien Nanleng* oh wudekihdi meirong en wain kan ong ih, kaidehn at pwoud kan me pwungki sen wiahda keik en meirong kan ni mwomwen Lih Nanmwarkio oh sen wudekihdi meirong en wain kan ong ih?”
20 Seremaia eri ndaiong aramas ako koaros, ohl ako oh ar pwoud kan oh aramas ako koaros me koasoakoasoiong ih: 21 “Meirong kan me kumwail, samamwail mehn mahs ako, amwail nanmwarki kan, noumwail lapalap akan, oh aramas akan en sahpwo wiahda nan kahnimw en Suda kan oh nanial en Serusalem kan+—Siohwa ketin tamataman mepwukat, e sohte ketin meliehla mepwukat!* 22 Siohwa eri sohla kak ketin kanengamahiong amwail wiewia suwed kan oh soahng kasaut kan me kumwail wiadahr, oh sapwamwailo wialahr wasa tehn ehu, mehkot kamasepwehk ehu oh keria ehu, sohla towe, duwehte me wiawi rahnwet.+ 23 Pwehki kumwail wiadahr meirong pwukat oh pwehki kumwail dipadahr ong Siohwa ni amwail sohte peikiong kapitien Siohwa oh sohte idawehn sapwellime kosonned, sapwellime koasoandi kan oh sapwellime mehn kataman kan, me kahrehda kahpwal wet eh kohdier pohmwail, duwehte me wiawi rahnwet.”+
24 Seremaia eri usehlahte ndaiong aramas ako koaros oh lih ako koaros: “Kumwail rong mahsen en Siohwa, kumwail mehn Suda kan koaros me mi nan sapwen Isip. 25 Iet me Siohwa kaunen karis en sounpei, Koht en Israel ketin mahsanih, ‘Dahme kumwail oh amwail pwoud kan ndahsang nan awamwail kan, kumwail kapwaiadahr sang ni pehmwail kan, pwe kumwail nda: “Se uhdahn pahn kapwaiada at inou me se kahukihla en wiahda meirong kan ong Lih Nanmwarkien Nanleng* oh wudekihdi meirong en wain kan ong ih.”+ Kumwail lih akan uhdahn pahn kapwaiada amwail inou kan me kumwail kahukihla oh wia dahme kumwail kahukihla.’
26 “Eri, kumwail mehn Suda kan koaros me koukousoan nan sapwen Isip, kumwail rong mahsen en Siohwa: “Siohwa ketin mahsanih, ‘I kahukihla ni mwarei lapalap me sohla aramas en Suda men+ nan sapwen Isip pwon pahn kahukihla ni mwarei oh nda, ‘Nin duwen Kaun Wasa Lapalahpie Siohwa eh ketin ieias!’+ 27 Eri met I kilikilang irail pwe I en wadohng pohrail kahpwal a kaidehn mehkot mwahu;+ aramas en Suda koaros nan sapwen Isip pahn mehkihla kedlahs oh lehk lapalap, lao re sohla mie.+ 28 Me malaulau keite me pahn pitsang kedlahs oh kohsang nan sapwen Isip pwurala nan sapwen Suda.+ Mwuri luhwen aramas en Suda koaros me kohdo nan sapwen Isip pwehn kousoan wasao pahn ese en ihs mahsen me pweida, ahi de arail!”’”
29 “Siohwa ketin mahsanih, ‘Oh iet kilel ong kumwail me I pahn kaloke kumwail wasaht, pwe kumwail pahn ese me ei mahsen kan me inoukihda kahpwal ong kumwail uhdahn pahn pweida. 30 Iet me Siohwa ketin mahsanih: “I pahn kihong Parao Ohpra nanmwarkien Isip, nan pehn eh imwintihti kan oh nan pehn irail me kin raparapahki en kihsang eh mour, duwehte ei kihla Nanmwarki Sedekaia en Suda nan pehn Nanmwarki Nepukadnesar* en Papilon, me wia eh imwintihti oh me raparapahki pwehn kihsang eh mour.”’”+
45 Ni kapahieun sounpar en Sehoiakim+ nein Sosaia, nanmwarkien Suda, iet mahsen me soukohp Seremaia koasoiaiong Paruk+ nein Neraia ni eh kin ntingihedi nan pwuhk ehu mahsen pwukat me Seremaia+ koasoia:
2 “Iet me Siohwa, Koht en Israel ketin mahsaniheki duwen kowe, Paruk, 3 ‘Ke nda: “Meid suwediong ie, pwe Siohwa ketin kapatahiong ei medek pahtou! I pwangadahr pwehki ei ingihngtik, oh I sohte diar wasahn kommoal.”’
4 “Ke pahn ndaiong Paruk, ‘Iet me Siohwa ketin mahsanih: “Kilang! Dahme I kauwada I pahn karangkehdi, oh dahme I padokedi I pahn usada. I pahn wia met nan sahpwet pwon.+ 5 Ahpw ke kin raparapahki* ken pweida mwahu.* Uhdihsang omw kin rapahki soahng pwukat.”’
“Siohwa ketin mahsanih: ‘Pwe I pahn wahdo kahpwal ehu pohn aramas koaros*+ oh sohte lipilipil wasa me ke pahn kohla ie, I pahn mweidohng uhk ken momourte.’”*+
46 Siohwa ketin mahsanihong soukohp Seremaia duwen wehi kan:+ 2 Iet rohng duwen Isip,+ duwen nein Parao Neko+ nanmwarkien Isip karis en sounpei kan. Parao mi ni keilen Pillap Iupreitis oh Nanmwarki Nepukadnesar* en Papilon kalowehdi ih ni Karkemis, ni kapahieun sounpar en Sehoiakim+ nein Sosaia, nanmwarkien Suda:
3 “Kumwail kaunopada noumwail mehn sansar tikitik kan oh mehn sansar laud kan,
Oh wenewohng nan mahwen.
4 Kumwail soundak oahs kan, kumwail kaunopada oahs kan oh douda pohrail.
Kumwail lisoaropda oh onopada.
Kumwail edehda ketieu kan oh pwuhriong nan amwail likou mete kan.*
5 Siohwa ketin mahsanih: ‘Dahme I kilangki ar masepwehkada?
Re pweipweiekdohr, neirail sounpei kan lohdier.
Re tangdoaui ni ar masepwehkada, neirail sounpei kan sohte pirekekla mwurirail.
Mie masak wasa koaros.
6 Me marahra kan sohte kak tangdoaui, oh sounpei kan sohte kak pitila.
Ni paliepeng, ni keilen Pillap Iupreitis,
Re dipekelekel oh pwupwudi.’+
7 Ihs met, me kohkohdahdo rasehng Pillap Nail,
Rasehng pillap kan me kin mwekimwekid?
8 Isip kohkohdahdo rasehng Pillap Nail,+
Rasehng pillap kan me kin mwekimwekid,
Oh e nda, ‘I pahn kohdahla oh kipehdi sampah.
I pahn kauwehla kahnimw oh towe kan.’
9 Kumwail oahs kan, kumwail kohdahla!
Kumwail kuruma kan, kumwail tang uk!
Sounpei kan en wonowei,
Kus oh Pud, me kin doadoahngki mehn sansar,+
Oh mehn Lud kan,+ me kin doadoahngki oh kadangpeseng* kesik ketieu.+
10 “Rahno iei sapwellimen Kaun Wasa Lapalahpie, Siohwa kaunen karis en sounpei, oh rahnen ikih pwe en ketin dupukohng sapwellime imwintihti kan. Oh kedlahs pahn kadalleirailla lao e medla oh nim ntahrail kan lao e medla, pwe Kaun Wasa Lapalahpie, Siohwa kaunen karis en sounpei, sapwellimanki meirong ehu* nan sapwen paliepeng ni keilen Pillap Iupreitis.+
Sohte katepen omw doadoahngki wini tohto,
Pwe sohte mehkot pahn kamwahwihiukala.+
12 Wehi kan rongehr duwen omw mwamwahlla,+
Oh ngilen omw sengiseng kipehdi wasa koaros nan sahpwo.
Pwe emen sounpei dipekelekel pohn emen sounpei,
Oh ira koaros ahpw pwupwudi.”
13 Iet mahsen me Siohwa ketin mahsanihong soukohp Seremaia duwen Nanmwarki Nepukadnesar* en Papilon eh kohkohdo pwehn kalowehdi sapwen Isip:+
14 “Lohkihda met nan Isip, pakairki nan Mikdol.+
Pakairki nan Nohp* oh Dapanihs.+
Nda, ‘Kesikesihnente oh onopada,
Pwe kedlahs pahn kadallehla aramas koaros limwahmw.
15 Dahme kahrehda noumw ohl kehlail kan koakoahksang?
Re sohte kesikesihnen nan arail wasa,
Pwe Siohwa ketin sikeniraildi.
16 Me tohto irail kin dipekelekel oh pwupwudi.
Re kin ndindapene:
“Uhda! Kitail pwurala rehn atail aramas akan oh uhdakatail
Pwehki kedlahs lemeio.”’
17 Re lohkihda met wasao,
‘Parao nanmwarkien Isip kin lokolokaia tohr, ahpw sohte kin wia mehkot,
18 Nanmwarkio, me mware iei Siohwa kaunen karis en sounpei ketin mahsanih, ‘Nin duwen ei ieias,
E* pahn kohdo duwehte Tapor+ nanpwungen nahna kan
Oh duwehte Karmel+ limwahn sehd.
19 Serepein me kousoan Isip,
Kaunopada omw dipwisou kan pwe ken kalipilipala.
20 Isip rasehng koupwul lih kaselel men,
Ahpw loahng kan pahn kohsang paliepeng oh ngalis ih.
21 Pil nah sounpei me e pwainda kan me mi reh rasehng kou mworourou kan,
Ahpw irail koaros pil pweiekla oh tangdoaui.
Re sohte kak kesikesihnen nan arail wasa,+
Pwe rahnen arail apwal kodohngehr pohrail,
Arail ahnsoun kadeik.’
22 ‘Ngile duwehte ngilen serpent men me limwlimwahdek,
Pwe re pwakih ih ni ar tohto* oh kolokol sile kan,
Rasehng ohl akan me kin pelehdi tuhke kan.*
23 Re pahn pelehdi eh nanwelo, mendahki eh mwomwen me re sohte kak kotehla,’ Siohwa me ketin mahmahsen,
‘Pwe re tohtohsang pelin loukust, sohte kak wadawad.
24 Isip* pahn namenekla.
E pahn pengpengla rehn aramas en paliepeng.’+
25 “Siohwa kaunen karis en sounpei, Koht en Israel ketin mahsanih: ‘Eri I pahn kaloke Amon,+ koht en Noh,*+ ong Parao, ong Isip, ong eh koht kan,+ oh ong eh nanmwarki kan—ei, ong Parao oh irail koaros me kin likih ih.’+
26 “‘Oh I pahn kihirailla rehn irail akan me kin songosong en kemeirailla, rehn Nanmwarki Nepukadnesar* en Papilon+ oh nah ladu kan. Ahpw mwurin mwo aramas akan pahn kousoanla nan Isip duwehte mahso,’ Siohwa me ketin mahmahsen.+
27 ‘A kowe, ei ladu Seikop, ke dehr masak,
Oh Israel, ke dehpa masepwehkada.+
Pwe I pahn doareiukala sang wasa doh
Oh kadaudokomw sang sahpw me re sensel ie.+
Seikop pahn pwurodo oh meleileidi oh sohte me pahn kedirapwa,
Sohte me pahn kamasak irail.+
28 Eri ei ladu Seikop, ke dehr masak,’ Siohwa me ketin mahmahsen, ‘pwe I pahn ieiang uhk.
47 Siohwa ketin mahsanihong soukohp Seremaia duwen mehn Pilisdia kan,+ mwohn Parao eh kalowehdi Kasa. 2 Iet me Siohwa ketin mahsanih:
“Kilang! Pihl kan kohkohdo sang ni paliepeng.
Re pahn wiahla lapake laud ehu.
Oh re pahn kipehdi sahpwo oh mehkoaros loale,
Kahnimw oh towe kan.
Aramas akan pahn sengiseng,
Oh koaros me kin kousoan nan sahpwo pahn mwahiei.
3 Ni ar rong ngilen nehn nah oahs wol kan ar kumwukumwusek,
Ngilen ngirisek en were kurumahn mahwen kan
Oh ngilen tangatang en were daia kan,
Pahpa kan sohte mwahn pahn sohpeilahng neirail seri kan,
Pwe pehrail kan pahn sohla angi,
4 Pwehki rahn me kohkohdo pahn kamwomwala mehn Pilisdia kan koaros;+
E pahn katokehdi iangara kan koaros me luwehdi sang Dair+ oh Saidon.+
5 Kasa pahn moangamadla.*
Askelon nennenlahr.+
6 Kedlahs en Siohwa!+
Ia erein omw sohte pahn nennenla?
Pwurala nan kidipomw.
Kommoal oh nennenla.
7 Ia duwen eh kak nennenla
Ni Siohwa eh ketikihongehr kehkehlik ehu?
Askelon oh oaroahro,+
Ih wasa me e ketin koasoanedier kedlahso en peiong.”
48 Ong Mohap,+ iet me Siohwa kaunen karis en sounpei, Koht en Israel ketin mahsanih:
“Meid suwediong Nepo,+ pwe e mwomwlahr!
Kiriadaim+ nameneklahr oh lohdier.
Wasahn ruk* nameneklahr oh rengkdier.+
2 Re solahr kapinga Mohap.
Nan Espon+ re koasoanehdi eh mwomwla, ndinda:
‘Kitail kamwomwala ih nin duwen wehi ehu.’
Madmen, ke pil pahn usehlahte nennenla,
Pwe kedlahs pwakipwakihiuk.
3 Mie ngilen sengiseng sang Oronaim,+
Ngilen mwomwla oh ohla laud.
4 Mohap ohlahr.
Nah kisin seri kan wie sengiseng.
5 Ni ukada en Luhid re kin doulahte wie sengiseng ni ar kohdahla.
Oh ni ahl me kohdihla sang Oronaim re kin rong ngilen sengiseng en kahpwal laudo.+
6 Kumwail tang, pwe kumwail en mourla!
Kumwail pahn duwehla tuhke suniper pwoat nan sapwtehn.
7 Pwehki ke likih omw wiewia kan oh omw dipwisou kesempwal kan,
Ke pil pahn lohdi.
Oh Kemos+ pahn kalipilipala,
Iangahki nah samworo kan oh nah lapalap akan.
8 Sounkamwomwalao pahn kohdo nan kahnimw kan koaros,
Oh sohte kahnimw ehu pahn pitila.+
9 Kumwail kauwada kilel ehu ong Mohap,
Pwe ni eh pahn tehnla e pahn tang,
Oh eh kahnimw kan pahn wiahla mehkot kamasepwehk ehu,
Sohla towe.+
10 Mehmen me kin seukautihong kapwaiada pwukoa me kohsang Siohwa en riahla!
Mehmen me sohte kamwakid nah kedlahs pwehn kakerehdi nta en riahla!
11 Mehn Mohap kan kin ahneki meleilei sang ni ar pwulopwul,
Rasehng wain me mihmihte nan sah ehu.
Re sohte kin wudeksang nan ehu sah ong ehu sah tohrohr,
Oh re sohte mwahn kin kalipilipala.
Ihme kahrehda nemenemarail duweduwehte,
Oh pwohrail sohte wekila.
12 “Siohwa ketin mahsanih: ‘Kahrehda kilang! rahn akan pahn kohdo ahnsou me I pahn kadarala aramas akan pwe ren wekidiraildi. Re pahn wekidiraildi oh wudekihsang kanengen ar dahl kan, oh re pahn pwalangpeseng ar sah laud kan ni pisetik. 13 Oh mehn Mohap kan pahn namenengki Kemos duwehte mehn Israel kan ar kin namenengki Pedel me re koapworopworki.+
14 Ia duwen amwail kak nda: “Kiht sounpei kehlail kan onopadahngehr mahwen”?’+
15 ‘Mohap mwomwlahr,
Imwintihtio pedolongalahr nan eh kahnimw kan,+
Oh neirail mwahnakapw me keieu kaselel kan kamakamalahr,’+
Nanmwarkio, me mware iei Siohwa kaunen karis en sounpei me ketin mahmahsen.+
16 Kahpwal en mehn Mohap kan kerendohr,
Arail ohla pahn mwadang leledo.+
17 Irail koaros me karanih irail uhdahn pahn poakeirailla,
Irail koaros me ese adarail.
Ndaiong irail: ‘Sokon kehlail, sokon lingan, ohlahr!’
18 Serepein me kin kousoan Dipon,+ kohdihdo sang omw lingan,
Oh mwohndi ni omw men nimpil,*
Pwe sounkamwomwala Mohap kodohng mahweniong uhk,
Oh e pahn kauwehla omw wasa kelpene kehlail kan.+
19 Tohn Aroer,+ kesihnenda ni keilen ahlo oh kilang.
Idek rehn ohl me tangatang kohwei oh lih me pitila, ‘Dahme wiawiher?’
20 Mohap nameneklahr oh masepwehkada.
Mwahiei oh sengiseng.
Lohkihda nan Arnon+ me Mohap mwomwlahr.
21 “Kadeik leledohngehr sahpw patapat,*+ ong Olon, Sahas+ oh Mepaad;+ 22 ong Dipon,+ Nepo+ oh Ped-dipladaim; 23 ong Kiriadaim,+ Pedkamul oh Pedmeon;+ 24 ong Keriod+ oh Posra; oh ong kahnimw koaros en sapwen Mohap, kahnimw doh oh keren kan.
25 Siohwa ketin mahsanih: ‘Kehl* en Mohap lopdier;
Peho ohlahr.
26 Kumwail kasakawihala ih,+ pwe e kasapwilada pein ih mwohn Siohwa.+
Mohap tapwurseli nan eh mwus,
Oh e wiahla mehn kepit ehu.
27 Ke sou wiahki Israel mehn kepit ehu?+
Ia duwe, e dierekda nanpwungen lipirap akan,
Kahrehda ke pahn itik moangomw oh kedipa ih?
28 Tohn Mohap kan, kumwail mweselsang kahnimw kan oh kousoanla pohn paipalap,
Oh kumwail en duwehla mwuroi men me kin wiahda pese ni keilen wahu kan.’”
29 “Se rongehr duwen pohnmwahso en Mohap—e uhdahn aklapalap—
Duwen eh aklapalap, eh lamalam ile, eh aksuwei oh eh mohngiong pohnmwahso.”+
30 “Siohwa ketin mahsanih: ‘I ese eh lingeringer,
Ahpw eh lokaia soh katepe sohte pahn pweida.
Re sohte pahn wia mehkot.
31 Ihme kahrehda I pahn mwahieiki Mohap,
I pahn sengisengki Mohap pwon
Oh ingitingki aramas en Kir-eres kan.+
Omw rah kan me kohkohpeseng kotelahr sehdo.
Re lelehr sehdo, lelehr Saser.
Sounkamwomwalao kohdiongehr
Pohn omw wahntuhkehn ahnsoun karakar oh omw kreip me dondolda kan.+
33 Peren oh nsenamwahu kohsangehr nan mwahto
Oh nan sapwen Mohap.+
I katokehdi wain en pwiliwei sang wasahn tiak kreip.
Sohte me pahn tiak kreip ni weriwer en peren.
Weriwero pahn wekiong ni ehu weriwer tohrohr.’”+
34 “‘Mie ngilen weriwer ehu sang Espon+ lella Eleale.+
Pihl en Nimrim kan pil pahn madada.+
35 I pahn kasohrehla sang Mohap
Aramas me kin wahla meirong ehu pohn wasa ile
Oh me kin wiahda meirong kan ong eh koht,’ Siohwa me ketin mahmahsen.
36 ‘Ihme kahrehda ei mohngiong pahn ingitingki* Mohap rasehng keseng pepeuk ehu,*+
Oh ei mohngiong pahn ingitingki* aramas en Kir-eres rasehng keseng pepeuk ehu.*
Pwe kepwe kan me e wiahda pahn sohrala.
37 Pwe moahng koaros koimadla,+
Oh alis koaros seiseisang.
38 “Siohwa ketin mahsanih: ‘Pohn imwen Mohap koaros
Oh nan eh wasahn tuhpene kan koaros,
Sohte mehkot mie pwe mwahieite.
Pwe I kauwelahr Mohap
Rasehng sah ehu me lekdekla.
39 Ia uwen eh masepwehkada! Kumwail mwahiei!
Ia uwen Mohap eh namenekla oh sohpeila!
Mohap wialahr mehn kepit ehu,
Mehkot kamasepwehk ong irail koaros me mi limwah.’”
40 “Pwe iet me Siohwa ketin mahsanih:
41 Kisin kahnimw kan pahn lohdi,
Oh eh wasahn ruk kehlail kan pahn lohdi.
Rahno, mohngiong en sounpei en Mohap kan
Pahn duwehte mohngiong en lih emen me pahn neitik.’”
43 Masak oh pwoahr oh lidip mi mwohmw,
Tohn Mohap,’ Siohwa me ketin mahmahsen.
44 ‘Mehmen me tangasang masak pahn pwupwudiong nan pwoahr,
Oh mehmen me kohdahdo sang nan pwoahro pahn lohdi nan lidipo.’
Siohwa ketin mahsanih: ‘Pwe I pahn wadohng Mohap pahr en kalokeparail.
45 Irail me tangdoaui pahn kesihnen ni eh sohte ar kehl pahn mwetehn Espon.
Pwe kisiniei ehu pahn kohieisang Espon
Oh mpwul ehu kohsang Sihon.+
E pahn isikala temwen Mohap
Oh tihn moangen sounpei lemei kan.’+
46 ‘Meid suwediong uhk, Mohap!
Aramas en Kemos kan+ sohralahr.
Pwe noumw pwutak kan selidier,
Oh noumw serepein kan kalipilipalahr.+
47 Ahpw I pahn kihpene me selidi kan en Mohap ni kaimwiseklahn rahn akan,’ Siohwa me ketin mahmahsen.
‘Ih met me imwin rongen kadeik ong Mohap.’”+
49 Ong mehn Ammon kan,+ iet me Siohwa ketin mahsanih:
“Ia duwe, sohte nein Israel pwutak?
Sohte nah serien sohso?
Dahme kahrehda Malkam+ sapwenikihla Kad?+
Oh dahme kahrehda nah aramas akan kin koukousoan nan kahnimw en Israel kan?”
2 “Siohwa ketin mahsanih, ‘Kahrehda kilang! rahn akan pahn kohdo
Me I pahn kahrehiong Rappa,+ kahnimw en mehn Ammon kan+ en rong ngilen mahwen.*
E pahn wiahla mohn kahnimw ehu,
Oh eh kisin kahnimw kan me kapilpene pahn lulda.’
‘Oh Israel pahn sapwenikihla sapwen irail me adihasang sapweo,’+ Siohwa me ketin mahmahsen.
3 ‘Espon, mwahiei, pwe Ai mwomwlahr!
Kisin kahnimw en Rappa kan, kumwail sengiseng.
Kumwail pwuhriong nan likoun nsensuwed.*
Kumwail mwahiei oh kohkohseli nanpwungen kehl takai kan,*
Pwe Malkam pahn kalipilipala,
Iangahki nah samworo kan oh nah lapalap akan.+
4 Dahme kahrehda ke suweiki wahu kan,*
Omw wasa patapat pwelmwahu, kowe serepein salelepek,
Me kin likih pein eh dipwisou kesempwal kan
Oh me kin nda: “Ihs me pahn kohdo uhwong ie?”’”
5 “Kaun Wasa Lapalahpie, Siohwa kaunen karis en sounpei ketin mahsanih:
‘I pahn wahdo mehkot kamasepwehk ehu pohmw,
Sang rehn irail koaros me kapiluhkpene.
Kumwail pahn mwarahkpeseng wasa koaros,
Oh sohte me pahn kihpene me tangpeseng kan.’”
6 “‘Ahpw mwurin mwo I pahn kihpene mehn Ammon kan me selidi,’ Siohwa me ketin mahmahsen.”
7 Ong Edom, iet me Siohwa kaunen karis en sounpei ketin mahsanih:
“Ia duwe, solahr erpit nan Deman?+
Kaweid mwahu sohrasangehr irail me koahiek en wehwehki ire kan?
Ia duwe, arail erpit solahr katepe?
8 Kumwail tang, pweiekla!
Tohn Dedan kan,+ kumwail kohla oh kousoan nan wasa loal kan!
Pwe I pahn wahdo kahpwal pohn Esau
Ni ahnsou me I pahn kaloke ih.
9 Ma sounrik kreip kan kohdo rehmw,
Re sou pahn luhwehkihdi ekei ong meteikan ren rikada?
Ma lipirap kan kohdo nipwong,
Re pahn kauwehlahte uwen me re mwahuki.+
10 Ahpw I pahn kakilisawihada Esau.
I pahn kapwarehda eh wasahn ruk kan
Pwe en sohte kak rukula.
11 Pwilikihdi noumw me sepwoupwou kan,
Oh I pahn mweidohng irail en momour,
Oh noumw liohdi kan pahn likih ie.”
12 Pwe iet me Siohwa ketin mahsanih: “Kilang! Ma irail me sohte ale kadeik en nim kepo uhdahn pahn nim met, a ia duwe, ke sohte douluhl pahn ale kalokolok? Ke uhdahn pahn ale kalokolok, pwe ke uhdahn pahn nim met.”+
13 Siohwa ketin mahsanih, “Pwe ni mwarei I kahukilahr me Posra pahn wiahla mehkot kamasepwehk ehu,+ kanamenek ehu, mwomwla ehu oh mehn keria ehu; oh eh kahnimw kan koaros pahn wiahla mohn kahnimw kohkohlahte.”+
14 I rongehr rohng ehu sang Siohwa,
Wiliepe men pekederla nan wehi kan, oh ndinda:
15 “Pwe kilang! I wiahkinuhkala me soh wede men nan wehi kan,
Oh aramas akan en mwamwahlikin uhk.+
16 Masak me ke pein kahrehda,
Oh pil aklapalap* en mohngiongomw, pitihiukedier,
Kowe me kin kousoan nan wasahn ruk en paipalap,
Me kin kousoan pohn dohl me keieu ile.
Mendahki ke wiahda omw pahs wasa ile duwehte ikel men,
I pahn waiukedihsang wasao,” Siohwa me ketin mahmahsen.
17 Oh Edom uhdahn pahn wiahla mehkot kamasepwehk ehu.+ Koaros me kin keid limwah pahn kangkakil ni masak oh kuwaiki eh kalokolok kan koaros. 18 Duwehte kamwomwmwomwlahn Sodom oh Komora oh kisin kahnimw kan limwahra,+ sohte me pahn kousoan wasao, oh sohte me pahn soandihla wasao,”+ Siohwa me ketin mahmahsen.
19 “Kilang! Mie me pahn kohdahdo rasehng laion men+ me kohsang wasa tuhkehn kan ni keilen Sordan pwehn uhwong mohs kan me silasildi. Ahpw I pahn mwadang wiahiong ih* en tangasang wasao. I pahn idihada me pilipilda men en kaunda wasao. Pwe ihs me duwe ie, oh ihs me pahn pelian ie? Ihs silepen sihpw me kak uh mwohn silangi?+ 20 Kahrehda aramas akan, kumwail rong pilipil* me Siohwa ketin wiadahr ong Edom oh dahme e ketin kupwuredahr ong tohn Deman kan:+
Sihmpwul kan sang pelin sihpw kan uhdahn pahn wurahdeksang.
E pahn wiahiong arail wasahn kousoan kan en tehnla pwehki irail.+
21 Sang ni ngilen ar pwupwudi, sampah rerada.
Mie weriwer ehu!
Ngihlo peipeila lel ni Sehd Weitahtao.+
22 Kilang! Rasehng ikel men, imwintihtio pahn pihrda oh pihrdi,+
Oh eh pehnpihr kan pahn ngampeseng pohn Posra.+
Rahno mohngiong en sounpei en Edom kan
Pahn duwehla mohngiong en lih emen me pahn neitik.”
23 Ong Damaskus:+
“Amad+ oh Arpad nameneklahr,
Pwe ira rongehr rohng suwed ehu.
Ira peikipeseng masepwehk.
Aramas akan rasehng sehd me sohte kak mwelehdi.
24 Damaskus solahr ahneki eimah.
E sohpeila pwehn tang, ahpw masak kipehdi ih.
Pwunod oh medek koledier ih,
Rasehng lih emen me pahn neitik.
25 Dahme kahrehda kahnimw me warohng kaping,
Kisin kahnimwo me diren peren sohte lekdengkihla?
26 Pwe nah mwahnakapw kan pahn pwupwudi nan eh wasahn tuhpene kan,
Oh sounpei kan koaros pahn sohrala rahno,” Siohwa kaunen karis en sounpei me ketin mahmahsen.
27 “I pahn isikala kelen Damaskus,
Oh kisinieio pahn isikala imwen doulik kehlail kan en Penadad.”+
28 Ong Kedar+ oh wehin Eisor kan, me Nanmwarki Nepukadnesar* en Papilon kalowehdi, iet me Siohwa ketin mahsanih:
“Kumwail uhda, kohdahla Kedar,
Oh kamwomwala irail me kin koukousoan Palimese.
29 Imwarail impwal kan oh neirail pelinmen kan pahn wisiksang,
Arail likoun impwal kan oh arail kepwe kan koaros.
Neirail kamel kan pahn wisiksang,
Oh re pahn werkilahng irail, ‘Masak kapilpene wasa koaros!’”
30 Siohwa ketin mahsanih: “Kumwail tang, kumwail kohla wasa doh!
Kumwail kohla oh kousoan nan wasa loal kan, tohn Eisor kan.
Pwe Nanmwarki Nepukadnesar* en Papilon wiadahr koasoandi ehu me uhwong kumwail,
Oh e medewedahr pilahn ehu pwehn uhwong kumwail.”
31 “Kumwail uhda, kohdahla mahweniong wehio me ahneki popohl,
Me kin kousoan ni eh sohte perki mehkot!” Siohwa me ketin mahmahsen.
“Sohte wenihmw de lepin tuhkehn kateng kan wasao; re kin kelekelehpw kousoan wasao.
32 Neirail kamel kan pahn wiahla dipwisou lohdi kei,
Oh neirail pelinmen ngeder kan pahn wiahla dipwisou lohdi kei.
I pahn kamwarakpeseng wasa* koaros,
Irail akan me kin sehkasang pengepengen pitenmoangarail kan,+
Oh I pahn wadohng irail kahpwal sang wasa koaros,” Siohwa me ketin mahmahsen.
33 “Eisor pahn wiahla pwoahr en kidien wel kan,
Oh e pahn tehnla kohkohlahte.
Sohte me pahn kousoan wasao,
Oh sohte me pahn soandihla wasao.”
34 Ni tepin mwehin Nanmwarki Sedekaia+ en Suda, Siohwa ketin mahsanihong soukohp Seremaia duwen Elam:+ 35 “Iet me Siohwa kaunen karis en sounpei ketin mahsanih, ‘I pahn kauwehla nein Elam kesik ketieu,+ utupen* ar kehlail. 36 I pahn wadohng pohn Elam ahng pahieu sang keimw pahieu en pahnlahng, oh I pahn kamwarakirailpeseng wasa* pwukat koaros. Mehn Elam kan me mwarahkpeseng pahn kohla nan wehi koaros.’”
37 Siohwa ketin mahsanih: “I pahn kamasakada mehn Elam kan mwohn ar imwintihti kan oh mwohn irail me kin raparapahki en kihsang ar mour; oh I pahn wahdo kahpwal pohrail, ei engieng kowahlap. Oh I pahn kadarala kedlahs pwoat mwurirail lao I pahn kasohreirailla.”
38 Siohwa ketin mahsanih: “Oh I pahn kauwada mwoalei nan Elam,+ oh I pahn kasohrehla sang wasao nanmwarkio oh lapalap akan.”
39 Siohwa ketin mahsanih: “Ahpw ni kaimwiseklahn rahn akan, I pahn kihpene me selidi kan en Elam.”
50 Mahsen me Siohwa ketin mahsaniheki duwen Papilon,+ duwen sapwen mehn Kaldia kan, ni eh ketin doadoahngki soukohp Seremaia:
2 “Kumwail lohkihda met nan wehi kan oh pakairki met.
Kumwail kauwada kilel ehu* oh pakairki met.
Kumwail dehr ekihla mehkot ehu!
Kumwail nda, ‘Papilon lohdier.+
Pel nameneklahr.+
Merodak masepwehkadahr.
Eh sansal kan nameneklahr.
Eh dikedik kasaut kan* masepwehkadahr.’
3 Pwe wehi ehu kohdo mahweniong ih sang paliepeng.+
E wiakihla sapweo mehkot kamasepwehk ehu;
Sohte me kin kousoan loale.
Aramas oh mahn akan tangpesengier;
Irail solahr mie.”
4 Siohwa ketin mahsanih: “Ni rahn ako oh ahnsowo, aramas en Israel kan oh aramas en Suda kan pahn ehu kohdo.+ Re pahn sengiseng ni ar alialu,+ oh irail pahn ehupene rapahki Siohwa arail Koht.+ 5 Irail pahn idek elen kolahng Saion, ni masarail kan ar sohpeilahng ahlo,+ oh nda, ‘Kumwail kohdo oh kitail en iang Siohwa nan inou lap poatopoat ehu me sohte pahn manokonokla.’+ 6 Nei aramas akan wialahr pelin sihpw ehu me salongala.+ Sileparail kan me kasalongeirailla.+ Irail kahreirailla pohn nahna kan oh re kohkohseli, sang ehu nahna kolahng ehu dohl. Irail manokelahr ar wasahn kommoalo. 7 Koaros me kin diar irail kin kadalleirailla,+ oh arail imwintihti kan kin nda, ‘Kitail sohte dipada, pwehki re dipada ong Siohwa, utupen* pwung oh koapworopwor en samarail mehn mahs ako, Siohwa.’”
8 “Kumwail tangieisang Papilon,
Kumwail kohieisang nan sapwen mehn Kaldia kan,+
Oh kumwail en duwehla mahn akan me kin tieng mwohn pelinmen kan.
9 Pwe I pahn ekerodo oh wadohng Papilon
Pwihn en wehi laud kan sang sapwen paliepeng.+
Irail pahn kohdo mahweniong ih ni ireken mahwen;
E pahn lohdi sang wasao.
Neirail arep kan duwehte nein sounpei men arep kan
Me kin kihsang nein pahpa nohno seri kan;+
Re sohte kin katihasang dahme re kasikih.
10 Kaldia pahn wiahla dipwisou lohdi ehu.+
Irail koaros me kihsang dipwisou lohdi reh pahn uhdahn nsenamwahula,”+ Siohwa me ketin mahmahsen.
Pwe kumwail kin lusulus* pohn dihpw duwehte koupwul lih men,
Oh kumwail kin wiahda ngihl duwehte ngilen oahs wol kan.
12 Amwail nohno nameneklahr.+
Lih me neitikihkumwaildio nsensuwedlahr.
Kilang! Ih me keieu tikitik nan wehi kan,
Sapwtehn ehu me sohte pihl.+
Mehmen me keid limwahn Papilon pahn kangkakil ni masak
Oh kuwaiki eh kalokolok kan koaros.+
14 Kumwail kohdo mahweniong Papilon ni ireken mahwen ni pali koaros,
Kumwail koaros me kadangpeseng* kesik ketieu.
15 Kumwail werkilahng ih wer en mahwen ni pali koaros.
E pekimahkehr.*
Kumwail ikih ih.
Kumwail wiahiong ih duwehte dahme e wiadahr.+
16 Kumwail kihsang sounkamwarako nan Papilon
Oh me kin doadoahngki naipokos ni ahnsoun dolung.+
Pwehki kedlahs lemei, emenemen pahn pwuralahng rehn eh aramas akan,
Emenemen pahn tangalahng sapwe.+
17 “Aramas en Israel kan iei sihpw kan me mwarahkpeseng.+ Laion kan me kamwarakirailpeseng.+ Keieu nanmwarkien Asiria kadalleirailla;+ mwuri Nanmwarki Nepukadnesar* en Papilon ngalispeseng tihrail kan.+ 18 Kahrehda iet me Siohwa kaunen karis en sounpei, Koht en Israel ketin mahsanih: ‘I pahn kaloke nanmwarkien Papilon oh sapweo duwehte me I kalokehki nanmwarkien Asiria.+ 19 Oh I pahn kapwurehdo Israel nan eh mohso,+ oh e pahn mwenge pohn Karmel oh Pasan,+ oh e pahn medla pohn nahnahn Epraim+ oh Kilead kan.’”+
20 Siohwa ketin mahsanih: “Ni rahn ako oh ahnsowo,
Re pahn rapahki dipen Israel,
Ahpw re sohte pahn diar,
Oh re sohte pahn diar dipen Suda,
Pwe I pahn mahkohng irail me I mweidohng ren mihmihte.”+
21 “Kohdahla mahweniong sapwen Meradaim oh tohn Pekod kan.+
Ren kamakamala oh kamwomwmwomwla douluhl,”* Siohwa me ketin mahmahsen.
“Wia mehkoaros me I kehkehlingkihong uhk.
22 Mie ngilen mahwen nan sahpwo,
Kahpwal laud ehu.
23 Ama me sukpeseng wehin sampah kan koaros lopdier oh ohlahr!+
Papilon wialahr mehkot kamasepwehk ehu nan wehi kan!+
24 Papilon, I wiadahr lidip ehu ong kowe, oh ke lohdier,
Oh ke sasairki met.
Ke dierekda oh lohdi,+
Pwe Siohwa me ke uhwongada.
25 Siohwa ketin ritingadahr sapwellime imwen nahk,
Oh e ketikihieido tehtehn mahwen en sapwellime engieng.+
Pwe mie doadoahk ehu me Kaun Wasa Lapalahpie, Siohwa kaunen karis en sounpei, pahn ketin wia
Nan sapwen mehn Kaldia kan.
26 Kumwail kohdo mahweniong ih sang wasa doh kan.+
Kumwail ritingada eh imwen nahk krein kan.+
Kumwail koasoakehda ih duwehte koasoakoasoak en krein.
Kumwail kamwomwala ih douluhl.+
Sohte emen en luwehdi reh.
27 Kumwail kemehla nah koupwul wol kan koaros;+
Ren kohdihla pwehn kamakamala.
Meid suwediong irail, pwe arail rahn leledohr,
Arail ahnsoun kadeik!
28 Mie ngilen irail me tangatang,
Irail me tangasang sapwen Papilon,
Pwe ren lohki nan Saion me atail Koht Siohwa pahn ketin ikih,
E pahn ketin ikih pwehki sapwellime tehnpas sarawio.+
29 Kumwail ekerpene sounkesik ketieu kan pwe ren mahweniong Papilon,
Kumwail kauwada impwal kan kapilpene ih; kumwail dehr mweidohng emen en pitila.
Kumwail dupungkihong ih nin duwen eh wiewia kan.+
Kumwail wiahiong ih duwehte dahme e wiadahr.+
Pwe e aklapalapala ong Siohwa,
Ong Koht Sarawi en Israel.+
30 Eri nah mwahnakapw kan pahn pwupwudi nan eh wasahn tuhpene kan,+
Oh nah sounpei kan koaros pahn sohrala* rahno,” Siohwa me ketin mahmahsen.
31 Kaun Wasa Lapalahpie, Siohwa kaunen karis en sounpei ketin mahsanih: “Kilang! I pahn uhwong uhk,+ kowe me kin kahngohdi,+
Pwe omw rahno pahn kohdo, ahnsou me I pahn kapwukoahkin uhk.
32 Kowe, me kin kahngohdi, ke pahn dipekelekel oh pwupwudi,
Ni eh sohte me pahn pwekuhkada.+
Oh I pahn isikada omw kahnimw kan,
Oh kisinieio pahn isikala mehkoaros limwahmw.”
33 Iet me Siohwa kaunen karis en sounpei ketin mahsanih:
“Aramas en Israel oh Suda kan kin mi pahn lokolok,
Oh irail koaros me salihiraildi kin kolokolirailte.+
Re kahng mweidohng irail en saledekla.+
34 Ahpw me ketin pwainirailda sapahl me roson.+
Siohwa kaunen karis en sounpei iei mware.+
E uhdahn pahn ketin apwalih arail repenpwung,+
Pwe en ketikihong sahpwo kommoal+
Oh ketikihong tohn Papilon kan pwunod.”+
35 Siohwa ketin mahsanih: “Mie kedlahs pwoat me pahn kauwehla mehn Kaldia kan,
Tohn Papilon kan oh nah lapalap akan oh nah me loalokong kan.+
36 Mie kedlahs pwoat me pahn kauwehla irail me kin koasoi mwahl kan,* oh re pahn mwekid en pweipwei.
Mie kedlahs pwoat me pahn kauwehla nah sounpei kan, oh re pahn masepwehkada.+
37 Mie kedlahs pwoat me pahn kauwehla neirail oahs kan oh wararail kurumahn mahwen kan,
Oh soangsoangen aramas koaros reh,
Oh irail pahn duwehla lih akan.+
Mie kedlahs pwoat me pahn kauwehla eh dipwisou kesempwal kan, oh mepwukat pahn kulsang.+
38 Meid suwediong eh pihl kan, re pahn madada.+
Pwe Papilon iei sapwen sansal perperda kan,+
Oh pwehki ar kaudiahl kamasepwehk kan, re kin wiewia mwekid en sahliel.
39 Kahrehda, mahn en nan sapwtehn kan pahn kousoan rehn mahn akan me kin wer,
Oh ostris kan pahn kousoan wasao.+
E sohla pahn pwurehng mie towe,
De e pil sohla pahn wia wasahn kousoan erein dih kan koaros.”+
40 Siohwa ketin mahsanih: “Duwehte Koht eh ketin kamwomwala Sodom oh Komora+ oh kisin kahnimw kan limwahra,+ sohte me pahn kousoan wasao, oh sohte me pahn soandihla wasao.+
41 Kilang! Pwihnen aramas ehu kohkohdo sang paliepeng;
Wehi laud ehu oh nanmwarki lapalap kan+ pahn pwarada
Sang wasa me keieu doh kan nin sampah.+
42 Re doadoahngki kesik ketieu oh ketieu.+
Re me lemei oh sohte pahn kasalehda kadek kalahngan.+
Ngilarail kan rasehng ngiringirisek en sehd,+
Ni ar dakedake wararail oahs kan.
Duwehte aramas emen, re pahn koasoaneiraildi ni ireken mahwen pwehn mahweniong uhk, Papilon.*+
Pwunod kipehdi ih,
Medek duwehte medek en lih emen me pahn neitik.
44 “Kilang! Mie me pahn kohdahdo rasehng laion men me kohsang wasa tuhkehn kan ni keilen Sordan pwehn uhwong mohs kan me silasildi. Ahpw I pahn mwadang wiahiong irail en tangasang wasao. I pahn idihada me pilipilda men en kaunda wasao.+ Pwe ihs me duwe ie, oh ihs me pahn pelian ie? Ihs silepen sihpw me kak uh mwohn silangi?+ 45 Kahrehda aramas akan, kumwail rong pilipil* me Siohwa ketin wiadahr ong Papilon+ oh dahme e ketin kupwuredahr ong sapwen mehn Kaldia kan.
Sihmpwul kan sang pelin sihpw kan uhdahn pahn wurahdeksang.
E pahn wiahiong arail wasahn kousoan kan en tehnla pwehki irail.+
46 Sang ni ngilen lohdi en Papilon, sampah pahn rerada,
Oh ngilen wer ehu pahn peilahng nan wehi kan.”+
51 Iet me Siohwa ketin mahsanih:
2 I pahn kadaralahng Papilon aramas akan,
Oh re pahn kesehda ih nan wehwe rasehng kisinieng me kin ipirala reh meng, oh re pahn wiahiong sapweo en tehnla;
Irail pahn kohdo mahweniong ih sang wasa koaros ni rahnen kahpwal.+
3 Sounkesik ketieu men en dehr kadangpeseng* nah kesik ketieu.
Oh sohte emen pahn uhda ni eh likawih eh likou mete.*
Kumwail dehr poakehla nah mwahnakapw kan.+
Kumwail kamwomwala douluhl nah karis en sounpei kan koaros.
4 Oh irail pahn kamakamala oh pwupwudi nan sapwen mehn Kaldia kan,
Irail pahn dokdi nanial akan.+
5 Pwe Siohwa kaunen karis en sounpei sohte ketin kesehla Israel oh Suda.+ Ira sohte duwehla liohdi kan.
Ahpw sapwarailo* me diren dihp mwohn silangin Koht Sarawi en Israel.
Kumwail dehr sohrala pwehki eh sapwung kan.
Pwe met iei ahnsou me Siohwa pahn ketin ikih.
E pahn ketin dupungkihong ih dahme e wiadahr.+
7 Papilon wia kep kohl ehu nin limen Siohwa;
Papilon kasakawihala sampah pwon.
8 Papilon mwadangete pwupwudi oh ohla.+
Kumwail mwahieiki ih!+
Kumwail wahdo palsam* ong eh medek; mweinele e pahn kak mwahula.”
9 “Kitail songehr kamwahwihala Papilon, ahpw e sohte kak mwahula.
Kumwail pwilikihdi ih oh kitail kohkohla, emenemen pwuralahng sapwe.+
Pwe dipe kan leldahla nanleng;
E ileile duwehte depwek kan.+
10 Siohwa ketin kasalehdahr pwung pahrek ong kitail.+
Kumwail kohdo, kitail koasoia nan Saion dahme Siohwa atail Koht ketin wiadahr.”+
11 “Kumwail edehda arep kan;+ pwekada mehn sansar pwonopwon kan.*
Siohwa ketin kamwakidadahr mohngiong* en nanmwarkien Media kan,+
Pwehki eh ketin koasoanehdi en kamwomwala Papilon.
Pwe iei met duwen Siohwa eh pahn ketin ikih, e pahn ketin ikih pwehki sapwellime tehnpas sarawio.
12 Kumwail kauwada kilel ehu*+ pwehn mahweniong kelen Papilon kan.
Kumwail silehdi mwahu wasao, kihdi sounsilasil kan.
Kumwail kaunopada irail me pahn rukihedi mehn Papilon kan.
Pwe Siohwa ketin wiadahr koasoandio,
Oh e pahn ketin kapwaiada dahme e ketin inoukihda en wiahiong tohn Papilon kan.”+
13 “Kowe lih me kin mi pohn pihl tohto,+
Me naineki dipwisou kesempwal tohto,+
Omw ahnsou imwiseklahr, omw kin alehdi kepwe kan imwiseklahr.+
14 Siohwa kaunen karis en sounpei ketin kahukilahr ni mware,
‘I pahn audehkinuhkala ohl akan, me tohto duwehte loukust kan,
Oh irail pahn weriwerki ngilen kana pwehki kowe.’+
15 Ih me ketin wiahda sampah sang ni sapwellime manaman,
Ih me ketin koasoanehdi teng sahpw pwelmwahwo sang ni sapwellime erpit+
Oh ih me ketin katehlapahla nanleng sang ni sapwellime kupwurokong.+
16 Ni eh kin ketin wiahiong kapitie en kohda,
Pihl kan nanleng kin ngiringirisek,
Oh e kin ketin kahrehiong depwek kan* en kohda sang ni imwin sampah.
E kin ketin wiahda lioal en piripir nan* keteu,
Oh e kin ketikihdo kisinieng sang nan sapwellime imwen nahk kan.+
17 Aramas koaros kin mwekid en pweipwei oh soaloalokong.
Sounsukmete koaros pahn namenekla pwehki sansal perperda kan;+
Pwe ar sansal mete kan me likamw,
18 Sohte katepen mepwukat,*+ konehng ren wia mehn kepit.
Ni arail rahnen kadeik eh pahn leledo, irail pahn sohrala.
19 Koht* en Seikop sohte duwehte mepwukat,
Pwe iei Ih me ketin wiahda mehkoaros,
Pil sokon me e ketin sohsohki.+
Siohwa kaunen karis en sounpei iei mware.”+
20 “Kowe me nei tuhkehn wowoki, tehtehn mahwen ehu,
Pwe ni ei doadoahngkin uhk I pahn kamwutepene wehi kan,
Oh pahn kamwomwala wehi kan.
21 Ni ei doadoahngkin uhk I pahn kamwutepene oahs oh soundakepe,
Oh pahn kamwutepene kurumahn mahwen oh soundakepe.
22 Ni ei doadoahngkin uhk I pahn kamwutepene ohl oh lih,
Oh pahn kamwutepene ohl mah oh pwutak,
Oh pahn kamwutepene mwahnakapw oh peinakapw.
23 Ni ei doadoahngkin uhk I pahn kamwutepene silepen sihpw oh nah pelin sihpw,
Oh pahn kamwutepene soumwet oh nah mahn en deipwel kan,
Oh pahn kamwutepene kepina kan oh keriaun kaun akan.
24 Oh I pahn dupukohng Papilon oh tohn Kaldia kan koaros
Pwehki soahng suwed koaros me re wiahda nan Saion mwohn masamwail kan,”+ Siohwa me ketin mahmahsen.
I pahn kapahwei limei oh katapwureiukedihsang pohn paipalap kan
Oh wiahkinuhkala nahna isihsla ehu,” Siohwa me ketin mahmahsen.
26 “Aramas akan sohte pahn ale takain pwukakeimw ehu de takain poahsoan ehu rehmw,
Pwehki ke pahn tehnla kohkohlahte,”+ Siohwa me ketin mahmahsen.
27 “Kumwail kauwada kilel ehu* nan sahpwo.+
Kumwail peuk mehn pepeuk* ehu nan wehi kan.
Kumwail pilada* wehi kan en uhwong ih.
Kumwail ekerpene wehin Ararat,+ Minni oh Askenas+ pwe ren mahweniong ih.
Kumwail idihada kaunen sounpei men en uhwong ih.
Kumwail wiahiong oahs kan ren kohda rasehng mwutumwut en loukust pwulopwul kan.
28 Kumwail pilada* wehi kan en uhwong ih,
Nanmwarkien Media kan,+ nah kepina kan oh nah keriaun kaun akan koaros
Oh sahpw koaros me re kin kaunda.
29 Oh sampah pahn rerrer oh itihtikek,
Pwe kupwuren Siohwa ong Papilon pahn pweida
Pwehn wiahkihla sapwen Papilon mehkot kamasepwehk ehu, sohla towe.+
30 Sounpei en Papilon kan tokedihsangehr ar pei.
Re mwomwohd nan ar wasahn ruk kehlail kan.
Solahr ar kehl.+
Re duwelahr lih akan.+
Ihmw en Papilon kan luldahr.
Eh lepin tuhkehn katenge ewen kehl kan ohlahr.+
31 Emen sounkair tangala tuhwong emen sounkair,
Oh emen meninkeder tangala tuhwong emen meninkeder,
Pwehn pakairkihong nanmwarkien Papilon me eh kahnimwo lohdier ni pali koaros,+
32 Me imwintihtio kalowedier wasahn kotehla pillap kan,+
Me pwoht papairus kan isihslahr,
Oh me sounpei kan masepwehkadahr.”
33 Pwe iet me Siohwa kaunen karis en sounpei, Koht en Israel ketin mahsanih:
“Papilon* duwehte wasahn kihsang kilin krein ehu.
Met iei ahnsoun tiakedi ih douluhl.
Ni ahnsou keren ahnsoun dolung pahn kodohng ih.”
E wiahkinielahr deudeu ehu me sohte kanenge.
E kadalleielahr duwehte lapalahn sineik men;+
E audehkidahr kapehde ei soahng mwahu kan.
E keseielahr.*
35 Tohn Saion kin nda, ‘Tiahk lemei me wiawihong ie oh paliwerei en wiawihong Papilon!’+
Serusalem kin nda, ‘Oh mehn Kaldia kan en pwukoahki ei nta.’”
36 Kahrehda iet me Siohwa ketin mahsanih:
I pahn kamadahda eh sehd oh eh pwarer kan.+
37 Oh Papilon pahn wiahla koasoakoasoak en takai kan,+
Pwoahr en kidien wel kan,+
Mehkot kamasepwehk ehu oh mehkot me aramas en kin kuwaiki,
Oh sohla towe.+
38 Irail koaros pahn weriwer rasehng laion pwulopwul kan.*
Irail pahn ngiringir rasehng kisin laion kan.”
39 Siohwa ketin mahsanih, “Ni ar ineng kehlailda, I pahn kaunopada arail kamadipw oh kasakawihirailla,
Pwe ren pereperen;+
Eri re pahn meir kohkohlahte,
Re sohte pahn pirida.+
40 I pahn wairaildi pwe ren kamakamala rasehng sihmpwul kan,
Rasehng sihpw wol kan oh kuht kan.”
Papilon wialahr mehkot kamasepwehk ehu nan wehi kan!
42 Sehdo kipehdier Papilon.
Ilok tohto koaduhpwalihdi.
43 Eh kahnimw kan wialahr mehkot kamasepwehk ehu, sahpw ehu me sohte pihl oh sapwtehn ehu.
Sahpw ehu me sohte me pahn kousoan ie oh sohte me pahn keid ie.+
Wehi kan solahr pahn pokonlahng reh,
Oh kelen Papilon pahn pwupwudi.+
45 Kumwail nei aramas akan, kumwail pedoisang reh!+
Kumwail tangasang sapwellimen Siohwa engieng kowahlap,+ pwe kumwail en mourla!+
46 Kumwail dehr nan kapehd tikitikla de masakada rohng me kumwail rong nan sahpwo.
Nan sounpar ehu rohng ehu pahn kohdo,
Oh pahr me pahn wad pil ehu rohng,
Duwen tiahk lemei nan sahpwo oh duwen emen kaun pahn uhwong emen kaun.
47 Kahrehda kilang! rahn akan pahn kohdo
Ahnsou me I pahn kaloke sansal perperda kan en Papilon.
Sapweo pwon pahn namenekla,
Oh nah me kamakamala kan koaros pahn pwupwudi wasao.+
48 Nanleng oh sampah oh audepara kan koaros
Pahn werki peren ni ahnsou me Papilon pahn lohdi,+
Pwe sounkamwomwala ko pahn kodohng ih sang paliepeng,”+ Siohwa me ketin mahmahsen.
49 “Papilon sohte kahrehdahte kamakamalahn mehn Israel kan+
Ahpw pil aramas wasa koaros nin sampah kamakamala nan Papilon.
50 Kumwail me pitsang kedlahs, kumwail douluhlwei, kumwail dehr kesikesihnen!+
Kumwail tamataman Siohwa sang wasa doh,
Oh kumwail en medemedewe duwen Serusalem.”+
51 “Kitail nameneklahr, pwe kitail rongehr duwen kepit ko.
Namenek kipehdier masatail kan,
Pwe mehn liki kan* kodohr uhwongada wasa sarawi kan en tehnpesen Siohwa.”+
52 Siohwa ketin mahsanih, “Kahrehda kilang! rahn akan pahn kohdo,
Ahnsou me I pahn kaloke eh sansal perperda kan,
Oh nan sapweo pwon aramas ohla kan pahn ingihngtik.”+
53 “Mehnda ma Papilon pahn kohdahla nanleng,+
Mehnda ma e pahn kakehlakahda eh wasahn ruk kehlail ile kan,
Irail me pahn kamwomwala ih pahn kohsang rehi,”+ Siohwa me ketin mahmahsen.
54 “Rong! Mie ngilen weriwer ehu sang Papilon,+
Ngilen kahpwal laud sang sapwen mehn Kaldia kan,+
55 Pwe Siohwa ketin kamwkamwomwala Papilon,
E pahn ketin katokehdi eh ngihl laud,
Oh ngilen eh imwintihti kan pahn rasehng ilok en nan madau.
Ngilarail kan pahn sansalda.
56 Pwe sounkamwomwalao pahn kohdo Papilon;+
Nah sounpei kan pahn lohdi,+
Neirail kesik ketieu kan pahn ohla,
Pwe Siohwa iei Koht en dupuk.+
E uhdahn pahn ketin dupuk.+
57 I pahn kasakawihala nah lapalap akan oh nah ohl loalokong kan,+
Nah kepina kan oh nah keriaun kaun akan oh nah sounpei kan,
Oh irail pahn meir kohkohlahte,
Re sohte pahn pirida,”+ Nanmwarki, me mware iei Siohwa kaunen karis en sounpei me ketin mahmahsen.
58 Iet me Siohwa kaunen karis en sounpei ketin mahsanih:
“Mendahki kelen Papilon mosul, e pahn rengkidi douluhl,+
Oh mendahki eh ewen kehl kan ileile, e pahn isihsla.
Aramas akan pahn doadoahk laud ahpw sohte katepe;
Wehi kan pahn sasaunte kisinieio oh pwangahkihda.”+
59 Iet mahsen me soukohp Seremaia kihong Seraia nein Neraia+ nein Mahseia nin duwen kehkehlik ehu ni ahnsou me e iang Nanmwarki Sedekaia en Suda kohla Papilon ni kapahieun sounpar en eh mwehi; Seraia me kin apwalih en nanmwarkio kepwe kan. 60 Seremaia ntingihedi nan pwuhk ehu duwen kahpwal koaros me pahn lelohng Papilon. Mahsen pwukat koaros ntingdi duwen Papilon. 61 Oh Seremaia pil ndaiong Seraia: “Ni omw pahn lella Papilon oh kilang kahnimwo, ke pahn anahne wadek mahsen pwukat koaros ni ngihl laud. 62 Kowe eri nda, ‘Maing Siohwa, komwi ketin mahsanih duwen kahnimw wet me e pahn mwomwla oh sohla towe, aramas de mahn akan, oh e pahn tehnla kohkohlahte.’+ 63 Oh ni omw kaimwisekala omw wadek pwuhk wet, pirehiong ni ehu takai oh keselahng nanwerengen Iupreitis. 64 Kowe eri nda, ‘Ih met mwomwen Papilon eh pahn kihrla oh sohte pwurehng pwarada+ pwehki kahpwal me I pahn wadohng powe; irail pahn pwangada.’”+
Ih met imwin en Seremaia mahsen kan.
52 Sedekaia+ sounpar 21 ni ahnsou me e wiahla nanmwarki, oh e kakaunki sounpar 11 nan Serusalem. Eden eh nohno iei Amudal+ nein Seremaia en Lipna. 2 E doulahte wia dahme suwed mwohn silangin Siohwa, duwehte soahng koaros me Sehoiakim wiadahr.+ 3 Dahme wiawi nan Serusalem oh Suda kahngiangihada Siohwa, eri e ketin keseirahla.+ Sedekaia eri uhwongada nanmwarkien Papilon.+ 4 Ni keduwaun sounpar en mwehin Sedekaia, ni kaeisek en sounpwong, ni kaeisek en rahn en sounpwongo, Nanmwarki Nepukadnesar* en Papilon ahpw kohdo iangahki nah karis en sounpei kan koaros pwehn mahweniong Serusalem. Irail kauwada imwarail impwal kan kapilpene kahnimwo oh kauwada dihd kan kapilpene kahnimwo.+ 5 Oh imwintihti kan kapilpene kahnimwo lao lel ni kaeisek ehun sounpar en Nanmwarki Sedekaia.
6 Ni kapahieun sounpwong, ni keduwaun rahn en sounpwongo,+ lehk lapalapo uklahr nan kahnimwo, oh sohla mwenge ong aramas akan nan sahpwo.+ 7 Kelen kahnimwo eri pwallongala, oh sounpei ko koaros ahpw tangasang nan kahnimwo nipwongo, re pedoisang ni ewen kehlo nanpwungen kehl riauo limwahn mwetuwel en nanmwarki, nindoken mehn Kaldia kan ar kapikapil kahnimwo; oh re douluhlla ni ahl en Arapa.+ 8 Ahpw karis en sounpei en mehn Kaldia kan pwakihala nanmwarkio, oh re koanohdi Sedekaia+ nan sapwtehn en Seriko, oh nah pwihnen sounpei ko koaros ahpw tangasang ih. 9 Irail eri koledi nanmwarkio oh wahdahdo rehn nanmwarkien Papilon nan Ripla nan sapwen Amad, oh e pakairkihda kadeikpe. 10 Oh nanmwarkien Papilon kemehla nein Sedekaia pwutak kan mwohn mese, oh e pil kemehla lapalap en Suda kan koaros wasao nan Ripla. 11 Nanmwarkien Papilon eri kauwehla pwoaren mesen Sedekaia ko,+ salihekihdi selmete prons kan, walahng ih nan Papilon, oh kihdi ih nan imweteng lao e mehla.
12 Ni kelimaun sounpwong, ni kaeisek en rahn en sounpwongo, me iei, ni kaeisek duwaun sounpar en Nanmwarki Nepukadnesar* nanmwarkien Papilon, Nepusaradan kaunen sounsilasil ko, me wia nein nanmwarkien Papilon sounpapah, ahpw kohlongodo nan Serusalem.+ 13 E isikala tehnpesen Siohwa,+ tehnpesen nanmwarkio, oh ihmw koaros nan Serusalem; e pil isikala ihmw laud koaros. 14 Oh karis en sounpei en mehn Kaldia kan koaros me mi rehn kaunen sounsilasil ko ahpw karangkehdi kehl kan me kapilpene Serusalem.+
15 Nepusaradan kaunen sounsilasil ko ahpw kalipehla ekei aramas semwehmwe kan oh aramas ako me luhwehdi nan kahnimwo. E pil wahda irail me tang me pekimahk rehn nanmwarkien Papilon pil iangahki luhwen tohndoadoahk saman kan.+ 16 Ahpw Nepusaradan kaunen sounsilasil ko pwilikihdi ekei aramas me keieu semwehmwe nan sahpwo pwe ren wia soumwet en kreip oh wia doadoahk idihd kan.+
17 Oh mehn Kaldia ko lupukpene uhr prons kan+ en tehnpesen Siohwa oh kuruma kan+ oh Sehd pronso*+ me mi nan tehnpesen Siohwa, oh irail walahng Papilon prons ko koaros.+ 18 Irail pil wahsang deupen pehs kan, sapwel kan, mehn kakunla lamp kan, pwohl kan,+ kep kan+ oh dipwisou prons koaros me kin kadoadoahk ong doadoahk en tehnpas sarawio. 19 Kaunen sounsilasil ko eri wahsang peisin kan,+ dewen mwoalus kan, pwohl kan, deupen pehs kan, dewen lamp kan,+ kep kan oh pwohl kan me wiawihkihda kohl oh silper tohr.+ 20 A uhr riapwoato, Sehd pronso,* kouwol prons 12 ko+ me mi pahn Sehd pronso, oh kuruma kan me Nanmwarki Solomon wiahda ong tehnpesen Siohwa, prons me kadoadoahk ong dipwisou pwukat koaros sohte kak tenekda.
21 A uhr ko, ehuehu uhr ko ilehki kiupid* 18, sahl en sosohng me reireiki kiupid 12 kak pidakihpene;+ uwen mosul en met iei sosohng en sendin peh* pahieu, oh mie pwoahr nan uhr ko. 22 Oh kadoken uhr keieuo wiawihkihda prons; oh kadoken uhro kiupid limau ile;+ oh uhk oh pwohmakraneid kan koaros me kapilpene kadokeo wiawihkihda prons. Uhr keriauo duwehte me keieuo, pil iangahki pwohmakraneid ko. 23 Mie pwohmakraneid 96 ni keile ko; patpene koaros, mie pwohmakraneid 100 kapilpene uhko.+
24 Kaunen sounsilasil ko pil wahsang kaunen samworo Seraia,+ keriaun kaunen samworo Sepanaia,+ oh silepen wenihmw silimen ko.+ 25 Oh e wahsang nan kahnimwo emen lapalap en tehnpaso me wia kaunen sounpei kan, nein nanmwarkio sounkaweid isimen me mihmihte nan kahnimwo, iangahki nein kaunen karis en sounpei ko sekterio me kin kihpene sounpei kan nan sahpwo, oh ohl 60 nan sahpwo me mihmihte nan kahnimwo. 26 Nepusaradan kaunen sounsilasil ko eri ale irail oh wairaillahng rehn nanmwarkien Papilon nan Ripla. 27 Nanmwarkien Papilon eri kemeirailla nan Ripla+ nan sapwen Amad. Suda eri kalipilipasang nan uhdakeo.+
28 Iet aramas akan me Nepukadnesar* kalipehla: ni keisuhwen sounpar, mehn Suhs 3,023.+
29 Ni kaeisek waluhn sounpar en Nepukadnesar,*+ aramas* 832 wisiksang Serusalem.
30 Ni kerieisek siluhn sounpar en Nepukadnesar,* Nepusaradan kaunen sounsilasil ko ahpw kalipehla mehn Suhs kan, aramas* 745.+
Koaros patpene, aramas* 4,600 me kalipilipala.
31 Eri ni kesilihsek isuhwen sounpar en kalipiliplahn Nanmwarki Sehoiakin+ en Suda, ni kaeisek riaun sounpwong, ni kerieisek limau en rahn en sounpwongo, pahr me Nanmwarki Epilmerodak en Papilon wiahla nanmwarki, e kasaledekala Nanmwarki Sehoiakin en Suda oh kihsang ih nan imweteng.+ 32 Epilmerodak koasoi kadekohng ih oh wiahiong mwoale en ileilehsang mwoalen nanmwarki teikan me mi reh nan Papilon. 33 Sehoiakin eri kapwuhrasang eh likoun nan imweteng ko, oh ahnsou koaros e kin iang mwenge ni tehpel en nanmwarkio erein eh mour. 34 Mie mwenge kei me kin kohieng ih rahn koaros sang rehn nanmwarkien Papilon, erein eh mour, lao e mehla.
Kakete wehwehki “Siohwa ketin kasapwilada ih.”
De “piluhkada.”
LI, “mwohn omw pedoi sang nan kapehden inomw.”
De “katohreiukala.”
LI, “emen me kin pepehd.”
De “einpwoat auwalek en kuk ehu.”
LI, “pepeuk ong,” met kasalehda irip kisiniei pahn einpwoat.
LI, “katengehdi lukopomw.”
LI, “lohkihong nan salengen Serusalem.”
De “limpoak loalopwoat.”
De “sahpw ehu me diren mwaht.”
De “deke kan.”
De “parada,” kakete sang nan paip.
De “laion pwulopwul kan me wunaun ni tepinwere.”
De “Mempis.”
Me iei, ehu kahng en Pillap Nail.
Me iei, Iupreitis.
De “soda.”
LI, “eh sounpwong.”
De “koht en liki kan.”
De “eh kateng en likoun kapwopwoud?”
LI, neʹphesh. Kilang KLL.
LI, “mehn Arepia men.”
Keteu en mwuhr tepida mpen nanwerengen April. Kilang Ortk B15.
De “koht en liki kan.”
De kakete, “amwail pwoud.”
LI, “mohngiongi.”
Me iei, en kihong uhk sohso ehu me kin kohieng pwutak kan.
LI, “karis en sounpei en wehi kan.”
LI, “werek.”
De “koht kanamenek.”
LI, “kod.” Kilang KLL.
De “tuhkehn kilel ehu.”
E wiawihkihda mwein likou arekarek me kin wiahda ehd.
De “Pikir mwaremwaramwail kan.”
LI, “mohngiong.”
De “sohla eimah.”
De “sohla eimah.”
LI, “nei aramas nair serepein kan.” Lokaiahn karasaras ehu ni koasoi kaselel kan, ele kasalepen pepehm en poakehla.
Me iei, irail me kilikilang kahnimw pwehn koasoanehdi ahnsoun mahwen.
Me iei, Serusalem.
LI, “mwasahlei kan.”
LI, “dihd kan en mohngiongi.”
De kakete, “ngilen wer en mahwen.”
De “tuhkehn kilelo.”
De “koluhkihla.”
De kakete, “lih soumwahu men.”
LI, “nein Saion serepein.”
LI, “irail sohte luwetala.”
De kakete, “E sohte ketin ieias.”
LI, “direkihla kisinieng.”
Me iei, mahsen en Koht.
LI, “kumwail aramas pweipwei kan me sohte mohngiong.”
Tepin ahnsoun keteu tepida mpen nanwerengen October. Kilang Ortk B15.
Keteu en mwuhr tepida mpen nanwerengen April. Kilang Ortk B15.
LI, “kodo.” Kilang KLL.
LI, “Nein Saion serepein.”
LI, “Kasarawihla.”
LI, “Salengarail kan sohte sirkumsaisla.”
LI, “irail me diren arail rahn akan.”
De “kaweido.”
Kilang KLL.
LI, “nein Saion serepein.”
LI, “Medek en neitik.”
LI, “nei aramas nair serepein kan.”
E wiawihkihda mwein likou arekarek me kin wiahda ehd.
Me iei, Seremaia.
Mehn doadoahk ehu me sounkamwekel mete men kin doadoahngki pwehn peukolong ahng nan kisiniei mwehl ehu pwehn kak karakarda.
LI, “mepwukat,” dokedoke ihmw koaros me kisehn tehnpas sarawio.
De “meirong ediniei.”
LI, “sangkenei pirida oh mahmahsen.”
Me iei, Seremaia.
Lengileng en koht lih men me mehn Israel kan me sohpeisangehr Koht kin kaudokiong; kakete koht lih en kaparapar.
De “kansensuwedih; kalingeringerih.”
De “kaweid.”
LI, “rahn koaros sangkenei pirida oh kadarewei.”
LI, “lupsang ni awarail kan.”
De “pitenmoangomw me reirei,” “pitenmoangomw me wia kilelepen omw inou.”
De “koulen mwahiei pwoat.”
LI, “pwoaren mesei kat.”
Kilang KLL, “Kiehna.” LI, “wahun nein Innom pwutak.”
De “sohte mwahn pwarada nan ei madamadau.”
Kilang KLL, “Kiehna.” LI, “wahun nein Innom pwutak.”
LI, “karis en nanleng koaros.”
De “ahnsou kan me kileldi.”
Lokaiahn wai “swift.”
Lokaiahn wai “thrush.” De kakete, “krain.”
De “mwekidlahng ehu wasa tohrohr.”
De “kaweid.”
De “sekteri kan.”
LI, “nei aramas nair serepein kan.”
LI, “nei aramas nair serepein kan.”
LI, “nei aramas nair serepein kan.”
Kilang KLL.
LI, “nei aramas nair serepein kan.”
Met dokedoke en doadoahngki kisiniei pwehn kapeipeseng mete pwehn kihsang samin kan.
LI, “nei aramas nair serepein kan.”
De “koulen mwahiei pwoat.”
De “kaweid.”
De “koulen mwahiei kan.”
De “koulen mwahiei wet.”
Kilang KLL.
De “likamw.”
De “uhdahn likamw.”
Met iei dereht me wiawihdahsang wunen sihpw oh kaduh nan poh ntahnmwel.
Iretikitik 11 tepin ntingdi ni lokaiahn Aramaik.
De “adin pihl kan.”
De kakete, “ritingada ewen kehl en pihl kan ong.”
De “angin esingek.” LI, ruʹach. Kilang KLL “pneuʹma; ruʹach.”
De “mepwukat me likamw.”
LI, “Pwais.”
Me iei, Serusalem.
E sansal me kehkehlik wet ong Seremaia.
De “wasahn kisiniei ong kapeipeseng mete.”
LI, “sahpw ehu me kin kapwilewei milik oh sukehn loangalap.”
De “En wiawi.”
LI, “sangkenei pirida oh panapanawih.”
De “meirong ediniei.”
De “koht kanameneko.”
Me iei, Seremaia.
Me iei, meirong kan me wiawi nan tehnpas sarawio.
Me iei, Suda.
De “pepehm keieu loal kan.” LI, “mwidihlik kan.”
De “pepehm keieu loal kan.” LI, “mwidihlik kan.”
De “mwangerenger.”
De kakete, “E mwahiei.”
De “ahl koaros me aramas kin kalapw keid ie.”
De “Imwintihti kan kapilpene kahnimw en palieir kan.”
De “mehn Idiopia men.”
De “neirail me tikitik kan.”
De “warawar kan; pwoaren nahk pihl kan.”
LI, “nei aramas nair serepein.”
De kakete, “soangen kadeik pahieu.” LI, “peneinei pahieu.”
De kakete, “kin alialu kohla mwuri.”
De “koluhkihla.”
De kakete, “E namenekla oh sarohdi.”
E mwomwen me met dokedoke wehin Suda.
LI, “Komw dehr ketikihsang ie.”
De “rongen kadeik pwoat.”
De “duwehla doaueseiet.”
LI, “pwainuhkada sapahl.”
Tiahk en kaudok likamw me pid mwahiei. E mwomwen wiewiawi nan Israel me sohpeisangehr Koht.
LI, “pwoaren mesei kat.”
LI, “alarail kan koaros.”
Kilang KLL.
De kakete, “Pwe rasehng kisiniei ehu kumwail luldahr sang ni ei engieng.”
De “Aramas kehlail men.”
De “Aramas kehlail men.”
De kakete, “sohte kak mwahula.”
De “pepehm keieu loal kan.” LI, “mwidihlik kan.”
De “ahpw kaidehn ni pwung pahrek.”
LI, “sohpeisangiehier,” met mwomwen dokedoke Siohwa.
De “kamwomwirailla pak riau.”
LI, “re kakeluwakihala tepinwararail.”
De “palieir.”
Kilang KLL.
LI, “nin duwen me pwungiong nan mesen sounwia dahlo en wiahda.”
De “koluhkihla.”
LI, “pwoaren mesei kat.”
De “koluhkihla.”
LI, “wiewiahda.”
De “meirong ediniei.”
De “sohte wiawihda.”
LI, “I pahn kasalehiong irail tihnsewei a kaidehn silangi.”
De “kaweid.”
LI, neʹphesh. Kilang KLL.
LI, “wahun nein Innom pwutak.”
LI, “salenge ko pahn rerkihda.”
De “sohte mwahn pwarada nan ei madamadau.”
LI, “wahun nein Innom pwutak.”
E dokedoke audepen lahng.
LI, “re kakeluwakihala tepinwararail pwe ren dehr.”
Lepin lokaiahn Ipru wet kin dokedoke dipwisou ehu me ele kin kolpene neh kan, peh kan, oh tepinwere.
De “pepehm keieu loal kan.” LI, “mwidihlik kan.”
LI, “Nepukadresar,” ehu sipehl tohrohr.
De “kawetiong.”
De kakete, “aramas pwukat.”
LI, “Nepukadresar,” ehu sipehl tohrohr.
De “e pahn ahneki mour nin duwen dipwisou lohdi ehu.”
LI, “I kauhlahngehr silangiet en uhwong kahnimw wet ong.”
De “wasa patapat pah.”
LI, “kasarawihala.”
Pil adaneki Sehoahas.
LI, “Medek en neitik.”
Pil adaneki Sehoiakin oh Sekonaia.
LI, “Nepukadresar,” ehu sipehl tohrohr.
De “sahpw.”
LI, “rahn akan.”
De “serien sohso.”
De “sohpeisangehr Koht.”
LI, “kakehlakahda pehn.”
De “Re kin audehkin kumwail koapworopwoar soh katepe kan.”
LI, “kupwuren eh mohngiong.”
De “I sou audehda nanleng oh sampah?”
De “rohng kapwunod.” Lepin lokaiahn Ipru wet mie wehwe riau: “sapwellimen Koht pakair ehu me kesempwal” de “mehkot me toutou.”
De “rohng kapwunod.”
De “rohng kapwunod.”
De “rohng kapwunodo.”
De “rohng kapwunod.”
De “rohng kapwunod.”
De “rohng kapwunod.”
LI, “Nepukadresar,” ehu sipehl tohrohr.
Pil adaneki Sehoiakin oh Konaia.
De kakete, “sounkauwada dihd kehlail kan.”
Mepwukat iei tepin pik kan me kin dondol nan tepin pahr.
LI, “Nepukadresar,” ehu sipehl tohrohr.
De “koasoiaiong.”
LI, “sangkenei pirida oh koasoakoasoi.”
LI, “sangkenei pirida oh kadarewei.”
LI, “Nepukadresar,” ehu sipehl tohrohr.
Mehn ngidar tikitik me aramas kin kapirki peh. Kilang “Takain ngidar pilawa” nan KLL.
De “kaloke.”
Met mwomwen ehu ahd tohrohr ong Papel (Papilon).
LI, “uduk koaros.”
De “laion pwulopwul men me wunaun ni tepinwere.”
De “koasoiong.”
De “poaridi.”
De “koluhkihla.”
De “kaweid.”
LI, “sangkenei pirida oh kadarewei.”
De “koluhkihla.”
De “koluhkihla.”
LI, “ong mehmen me pwung ni mesei kat.”
LI, “kommoal.”
Me iei, lapalahn peisin prons en tehnpas sarawio.
LI, “sounpar en rahn akan.”
De “En wiawi!”
De kakete, “sounkauwada dihd kehlail kan.”
De kakete, “sawapeseng.”
LI, “sangkenei pirida oh kadarewei.”
LI, “Nepukadresar,” ehu sipehl tohrohr.
LI, “lapalap.”
De “mehn liki kan.”
De “irail.”
De “kapwunguhkala.”
LI, “me selidi kan en impwal en Seikop.”
De kakete, “waunla.”
LI, “kupwuren eh mohngiong.”
De “doulahte kasalehiong uhk limpoak loalopwoat.”
De “kohwei iang kahlek rehn irail me kokouruhr.”
LI, “pwainda sapahl.”
De “pwurehng ale.”
De “soahng mwahu kan sang.”
LI, “wih.”
De “seri kan.”
LI, “mwasahl kan.”
LI, neʹphesh. Kilang KLL.
LI, neʹphesh. Kilang KLL.
LI, “konsla.”
De kakete, “ar pwoud.”
De “Koasoandi kan.”
De “wasa patapat pah.”
De “pehs me kirihsla kan,” me iei, pehs kan me direkihla kirihs en meirong kan.
LI, “Nepukadresar,” ehu sipehl tohrohr.
Me iei, rien eh pahpa.
Sekel ehu pahrekiong 11.4 g (0.367 oz t). Kilang Ortk B14.
LI, “ni pahnadi en.”
LI, “kaweid.”
LI, “sahpw ehu me kin kapwilewei milik oh sukehn loangalap.”
LI, “uduk koaros.”
LI, “Nepukadresar,” ehu sipehl tohrohr.
LI, “pwoaren mesei kat.”
LI, “sangkenei pirida oh padakih.”
Kilang KLL, “Kiehna.” LI, “wahun nein Innom pwutak.”
LI, “kahrehiong neirail pwutak kan oh serepein kan ren kohlongala nan kisiniei.”
De “sohte mwahn pwarada nan ei madamadau.”
LI, neʹphesh. Kilang KLL.
De “soahng mwahu kan.”
De “serien sohso.”
E dokedoke audepen lahng.
De “koasoandi kan.”
LI, “Nepukadresar,” ehu sipehl tohrohr.
Kilang Eks 13:3, ntp.
LI, “rahnwet.”
LI, “pwoaren mesei kat.”
De “pere ko.”
LI, “Sonadap,” iei kamwotepen Sehonadap.
LI, “Sonadap,” iei kamwotepen Sehonadap.
LI, “Nepukadresar,” ehu sipehl tohrohr.
LI, “sangkenei pirida oh mahmahsen.”
LI, “sangkenei pirida oh kadarewei.”
LI, “Sonadap,” iei kamwotepen Sehonadap.
LI, “pwuhken doaropwe limilimpene ehu.”
LI, “pwuhken doaropwe limilimpeneo.”
De “pwuhko.”
De “pwuhko.”
De “perehn mwenge.”
De “pwuhko.”
De “lapalap en tehnpas ko.”
De “pwuhko.”
De “pwuhk wet.”
Imwin elep en November oh tepin elep en December. Kilang Ortk B15.
De “pwuhko.”
Pil kin adaneki Sehoiakin oh Sekonaia.
LI, “Nepukadresar,” ehu sipehl tohrohr.
LI, “kihong ih nan imwen selmete kan.”
LI, “imwen pwoaren nahk pihl.”
LI, “kohieila.”
De “e pahn ahneki mour nin duwen dipwisou lohdi ehu.”
LI, “peh kan.”
LI, “kohieila.”
LI, “imwomw.”
LI, “kohieila.”
LI, “kohieila.”
LI, “Ohl akan en omw popohl.”
LI, “Nepukadresar,” ehu sipehl tohrohr.
De pil ehu irepeseng en lepin lokaia pwukat ni lokaiahn Ipru, “Nerkal-sareser, Samkar-nepo, Sarsekim, Rapsaris.”
De “kaunen sounakmanaman (sounkasawih usu).”
LI, “Nepukadresar,” ehu sipehl tohrohr.
De kakete “doadoahk idihd kan.”
LI, “Nepukadresar,” ehu sipehl tohrohr.
De “kaunen lapalap akan en tehnpas.”
De “kaunen sounakmanaman (sounkasawih usu).”
De “ke pahn ahneki mour nin duwen dipwisou lohdi ehu.”
LI, “pwehn kesihnen mwohn.”
Kilang KLL.
De kakete, “leh kalaimwun.”
De “pahtoukihla.”
LI, “kod.” Kilang KLL.
De “pwehn kousoan erein ahnsou ehu.”
LI, neʹphesh. Kilang KLL.
Kilang Nem 14:44, ntp.
Met kin kalapw dokedoke prik kan me wiawihkihda reh meng oh pwehl.
LI, “Nepukadresar,” ehu sipehl tohrohr.
De “impwal en nanmwarki.”
De “sohte ohla.”
De “takain kataman kan.”
De “Ihmw (Imwen Kaudok) en Ketipin,” me iei, Iliopolis.
De “Mempis.”
LI, “sangkenei pirida oh kadarewei.”
Lengileng en koht lih men me mehn Israel kan me sohpeisangehr Koht kin kaudokiong; kakete koht lih en kaparapar.
Lengileng en koht lih men me mehn Israel kan me sohpeisangehr Koht kin kaudokiong; kakete koht lih en kaparapar.
Lengileng en koht lih men me mehn Israel kan me sohpeisangehr Koht kin kaudokiong; kakete koht lih en kaparapar.
LI, “re pwarada nan mohngiongi.”
Lengileng en koht lih men me mehn Israel kan me sohpeisangehr Koht kin kaudokiong; kakete koht lih en kaparapar.
LI, “Nepukadresar,” ehu sipehl tohrohr.
De “kasikasik.”
LI, “soahng kan me laud ong pein kowe.”
LI, “uduk koaros.”
De “I pahn kihong uhk mour nin duwen dipwisou lohdi ehu.”
LI, “Nepukadresar,” ehu sipehl tohrohr.
Likoun perehpe ehu ong ahnsoun mahwen.
LI, “tiak.”
De “ketin kemehla.”
LI, “nein Isip serepein.”
Kilang KLL.
LI, “Nepukadresar,” ehu sipehl tohrohr.
De “Mempis.”
LI, “ahnsou me kileldi.”
Me iei, me pahn kalowehdi Isip.
De “Mempis.”
De kakete, “pahn wiahla wasa tehn ehu.”
De “ni kehl.”
De “me kin wesei tuwi.”
LI, “Nein Isip serepein.”
Me iei, Dihpes.
LI, “Nepukadresar,” ehu sipehl tohrohr.
De “kapwunguhkala.”
Me iei, Krihd.
Me iei, re pahn sihpihla moangarail kan ni ar mwahiei oh namenek.
De “wasa patapat pah.”
De “wasahn ruk ileile.”
De “wasa patapat pah.”
De “wasa patapat en wasa ile.”
De kakete, “pohn pwehl madekeng.”
De “wasa patapat en wasa ile.”
LI, “Kod.” Kilang KLL.
De “rerrerki.”
Me iei, keseng pepeuk ehu me aramas kin kesengki koulen kedepwidepw ni ahnsoun mehla.
De “rerrerki.”
Me iei, keseng pepeuk ehu me aramas kin kesengki koulen kedepwidepw ni ahnsoun mehla.
E wiawihkihda mwein likou arekarek me kin wiahda ehd.
De kakete, “ngilen wer en mahwen.”
E wiawihkihda mwein likou arekarek me kin wiahda ehd.
De “kelen sihpw kan.”
De “wasa patapat kan pah.”
Me iei, Edom.
Kilang Nem 14:44, ntp.
Mwein e doakedoake Edom.
De “kaweid.”
LI, “Nepukadresar,” ehu sipehl tohrohr.
LI, “Nepukadresar,” ehu sipehl tohrohr.
LI, “kisinieng.”
LI, “tepin.”
LI, “kisinieng.”
De “tuhkehn kilel ehu.”
Lepin lokaiahn Ipru wet kakete pid lepin lokaia ehu ong “pwise” oh kadoadoahk ong kasalepen mwamwahliki.
LI, “wasahn kousoan en.”
De “tihtiak.”
LI, “tiak.”
LI, “kihlahr peho.”
LI, “Nepukadresar,” ehu sipehl tohrohr.
De “oh kamwomwirailla.”
LI, “tiak.”
LI, “nennenla.”
De “soukohp likamw akan.”
LI, “nein Papilon serepein.”
De “kaweid.”
Met mwomwen ehu ahd tohrohr ong Kaldia.
LI, “tiak.”
Likoun perehpe ehu ong ahnsoun mahwen.
Me iei, sapwen mehn Kaldia kan.
Kilang KLL.
De kakete, “audehda kopwoun arep kan.”
LI, ruʹach. Kilang KLL “pneuʹma; ruʹach.”
De “tuhkehn kilel ehu.”
De “adin pihl kan.”
De kakete, “ritingada ewen kehl en pihl kan ong.”
De “angin esingek.” LI, ruʹach. Kilang KLL “pneuʹma; ruʹach.”
De “mepwukat me likamw.”
LI, “Pwais.”
De “tuhkehn kilel ehu.”
LI, “kod.” Kilang KLL.
LI, “kasarawihala.”
LI, “kasarawihala.”
LI, “Nein Papilon serepein.”
LI, “Nepukadresar,” ehu sipehl tohrohr.
De “usupihiehsangehr.”
De “laion pwulopwul kan me wunaun ni tepinwere.”
Met mwomwen ehu ahd tohrohr ong Papel (Papilon).
De “mehn keiru kan.”
LI, “Nepukadresar,” ehu sipehl tohrohr.
LI, “Nepukadresar,” ehu sipehl tohrohr.
Me iei, lapalahn peisin prons en tehnpas sarawio.
Me iei, lapalahn peisin prons en tehnpas sarawio.
Kiupid ehu kin pahrekiong 44.5 cm (17.5 in.). Kilang Ortk B14.
Sosohng en sendin peh pahrekiong 1.85 cm (0.73 in.). Kilang Ortk B14.
LI, “Nepukadresar,” ehu sipehl tohrohr.
LI, “Nepukadresar,” ehu sipehl tohrohr.
LI, neʹphesh. Kilang KLL.
LI, “Nepukadresar,” ehu sipehl tohrohr.
LI, neʹphesh. Kilang KLL.
LI, neʹphesh. Kilang KLL.