Yu o „tan na libi” neleki Yeremia?

1, 2. Fu san ede a no e fruwondru wi taki te Bijbel e taki fu wan sma, a e kari en osofamiri tu?

BAKA DI Yosua gi den Israelsma a rai fu bosroiti suma den ben o dini, dan a taki: „Mi nanga mi osofamiri, wi o dini Yehovah” (Yos. 24:15). Yosua ben teki a bosroiti fu tai hori na Gado èn a ben de seiker taki en osofamiri ben o du dati tu. Furu yari baka dati, di a ten ben e doro taki Yerusalem kisi pori, dan Yeremia taigi Kownu Sedekia san ben o pasa efu a ben o gi ensrefi abra na den Babilonsma. A taki: „Yu nanga yu osofamiri o tan na libi” (Yer. 38:17). Den don bosroiti di a kownu teki tyari takru bakapisi kon gi en, gi den wefi fu en, èn gi den manpikin fu en. Sma kiri den manpikin fu en leti na en fesi, baka dati den breni en, ne den tyari en go na ini katibo na Babilon.​—Yer. 38:18-23; 39:6, 7.

² Den tu pisi di skrifi skoinsi, e taki fu wán sma, ma en osofamiri kari tu. Dati no e fruwondru wi. Aladi ibri bigisma musu gi frantwortu na Gado, toku furu Israelsma ben de memre fu wan osofamiri. Na osofamiri prenspari tu gi Kresten. Wi kan si dati te wi e luku den sani di wi e leisi na ini Bijbel èn te wi e luku a leri di wi e kisi na den Kresten konmakandra. Den sani dati abi fu du nanga a trowlibi, fa fu kweki pikin, èn fa fu sori lespeki gi tra sma na ini na osofamiri.​—1 Kor. 7:36-39; 1 Tim. 5:8.

YEREMIA BEN MUSU DU WAN SANI DI SMA NO BEN GWENTI

3, 4. Na sortu fasi a situwâsi fu Yeremia ben de tra fasi leki di fu furu sma, èn sortu wini dati tyari kon gi en?

³ Yeremia ben de wan fu den sma di „tan na libi” na ini a ten fu en. Aladi a situwâsi fu en ben de tra fasi leki di fu furu sma, toku a no lasi en libi di Yerusalem kisi pori (Yer. 21:9; 40:1-4). Gado ben taigi en fu no trow, fu no meki pikin, èn fu no teki prati na tra sani di den Dyu ben gwenti du na ini a ten dati.​—Leisi Yeremia 16:1-4.

⁴ Na ini a ten fu Yeremia èn na ini a kulturu fu en, sma ben gwenti trow èn meki pikin. Furu Dyu mansma ben e du dati, so taki a pisi gron di den ben kisi fu den afo fu den ben e tan na ini a lo èn na ini a famiri (Deut. 7:14).a Fu san ede Yeremia no ben mag trow? Fu di rampu ben o kon, meki Gado taigi en fu no teki prati na okasi pe sma ben e kon makandra fu row noso fu meki prisiri. A no ben musu trowstu sma di e row èn a no ben musu nyan nanga den baka wan beri. Boiti dati, a no ben musu go meki prisiri na trow-oso fu den Dyu. Heri esi, den fesa nanga den prisiri okasi dati no ben o hori moro (Yer. 7:33; 16:5-9). A fasi fa Yeremia ben e libi ben kan yepi tra sma fu bribi a boskopu fu en èn fu kon si taki bigi rampu ben o kon. Te fu kaba a rampu dati kon. Yu kan frustan fa den sma ben e firi di a situwâsi ben kon ogri so te taki den ben abi fu nyan tra libisma? Yu kan frustan fa den ben e firi di den si fa den lobiwan fu den ben e didon leki dede meti na strati? (Leisi Yeremia 14:16; Sari 2:20.) Sobun, nowan sma ben abi fu sari Yeremia fu di a no ben trow. Na ini den 18 mun di a feanti ben o lontu Yerusalem, bun furu osofamiri ben o dede na wan ogri-ati fasi. Ma fu di Yeremia no ben abi wefi noso pikin, meki den sari sani dati no ben o miti en.

5. San Kresten e leri fu den rai di skrifi na Yeremia 16:5-9?

⁵ Ma wi kan taki dati Yeremia 16:5-9 abi fu du nanga wi? Nôno. Kresten e kisi a rai fu ’trowstu tra sma di de na ini ala sortu banawtu’ èn fu „prisiri nanga sma di e prisiri” (2 Kor. 1:4; Rom. 12:15). Yesus ben go na wan trowfesa èn a du wan sani di meki taki den sma na a fesa ben abi moro prisiri. Ma toku a sani di o miti na ogri sistema disi, na wan seryusu tori. A kan pasa srefi taki muilek ten nanga pina miti Kresten. Yesus sori taki neleki den brada fu wi di ben musu lowe komoto fu Yudea na ini a fosi yarihondro, wi musu de klariklari tu fu du ala san wi man fu horidoro èn fu tan gi yesi na Gado. Fu dati ede wi musu denki bun efu wi o tan sondro fu trow, efu wi o trow, noso efu wi o meki pikin.​—Leisi Mateyus 24:17, 18.

6. Suma kan kisi wini te den e poti prakseri na a rai di Gado ben gi Yeremia?

⁶ Soleki fa wi si, dan Gado taigi Yeremia fu no trow èn fu no meki pikin. San wi e leri fu a sani disi? Na ini a ten disi, son Kresten di e tan anbegi Gado nanga den heri ati no trow noso den no abi pikin. San den kan leri fu a situwâsi fu Yeremia? Fu san ede srefi Kresten di trow èn di abi pikin musu poti prakseri na a libi fu Yeremia te a abi fu du nanga a tori disi?

7. Fu san ede a bun fu poti prakseri na a rai di Gado ben gi Yeremia fu no meki pikin?

⁷ Luku taki Yeremia no ben musu meki pikin. Ma Yesus no ben taigi den bakaman fu en taki den no ben musu meki pikin. Toku a bun fu sabi taki a bari „helu” gi uma di ben o de nanga bere noso di ben o abi pikin na bobi te banawtu ben o miti Yerusalem na ini 66-70 B.K. (Baka Krestes). A no de fu taki dati a situwâsi fu den ben o meki en muilek gi den (Mat. 24:19). Now wan bigi banawtu de fu kon. Kresten trowpaar di e prakseri fu meki pikin musu denki bun fu a tori disi. Yu no e agri taki dei fu dei a libi e kon moro muilek? Son trowpaar e taki dati a no makriki srefisrefi fu kweki pikin na so wan fasi taki den „tan na libi” te a sistema disi kon na wan kaba. Aladi ibri trowpaar musu bosroiti gi densrefi efu den o meki pikin, toku a bun fu poti prakseri na a situwâsi fu Yeremia. Ma fa a de nanga a rai di Gado ben gi Yeremia taki a no ben musu trow srefi?

TEKI LERI FU YEREMIA DI NO BEN TROW

8. Fu san ede wi kan taki dati wan sma no abi fu trow fu man plisi Gado?

⁸ Di Gado taigi Yeremia taki a no ben musu trow, dan dati no ben wani taki dati ala den futuboi fu en ben musu du dati. A no wan ogri te sma e trow. Yehovah ben seti a trowlibi so taki libisma ben kan furu grontapu èn so taki den ben kan firi prisiri èn de koloku trutru (Odo 5:18). Toku a no ala sma na ini a ten fu Yeremia ben trow. A kan taki son mansma di no ben man kisi pikin ben abi demakandra nanga a pipel fu Gado na a ten di Yeremia ben e taki profeititori.b Boiti dati, umasma nanga mansma ben musu fu de tu di ben lasi den patna na ini dede. Sobun, Yeremia no ben de a wan-enkri tru anbegiman di no ben abi wan patna. A no de fu taki dati a ben sabi fu san ede a no ben trow, neleki fa a de nanga son Kresten na ini a ten disi.

9. Te a abi fu du nanga a trowlibi, dan na sortu rai fu Bijbel wi musu poti seryusu prakseri?

⁹ Furu Kresten e trow, ma a no alamala. Yu sabi taki Yesus no ben trow èn a ben taki dati son disipel ben o bosroiti na ini den ati fu „tan sondro fu trow”. A gi den wan di ben man du dati, a deki-ati fu du so. (Leisi Mateyus 19:11, 12.) Fu dati ede a bun fu prèise den wan di wani tan sondro fu trow soso fu di den wani du moro na ini a diniwroko fu Gado. Wi no musu spotu den. A tru taki son Kresten no trow, awansi na fu wan pisi ten nomo, fu di a situwâsi fu den no e gi pasi taki den du dati. Kande den no feni wan bun Kresten patna ete. Ma a de fu prèise taki den abi a fasti bosroiti fu trow „soso nanga wan sma di de wan bakaman fu Masra”, soleki fa Gado wani (1 Kor. 7:39). A no de fu taki dati sonwan fu den futuboi fu Gado lasi den patna na ini dede, sobun den de den wawan.c Noiti den musu frigiti taki langa ten kaba Gado (nanga Yesus) sori taki den e broko den ede nanga den sma disi di no trow.​—Yer. 22:3; leisi 1 Korentesma 7:8, 9.

10, 11. (a) San yepi Yeremia fu abi bun bakapisi na ini a libi aladi a no ben trow? (b) Fa ondrofenitori fu a ten disi e sori taki sma di no trow kan de koloku?

¹⁰ Fu dati ede, leki wan sma di no ben trow, Yeremia ben kan abi a frutrow taki Gado ben o horibaka gi en. Fa so? We, memre taki Yeremia ben lobi a wortu fu Yehovah. A wortu dati ben e gi Yeremia krakti nanga deki-ati na ini den someni tenti yari di a ben e du a wroko di Gado ben gi en. Boiti dati, a ben e luku bun nanga sma di ben kan spotu en fu di a no ben trow. A ben feni en bun fu ’sidon en wawan’, na presi fu moksi nanga sma di ben lobi spotu trawan.​—Leisi Yeremia 15:17.

¹¹ Furu Kresten di no trow, awansi den na mansma, umasma, yonguwan noso owruwan, e teki a bun eksempre fu Yeremia. Ondrofeni e sori taki a de wan bigi yepi te wan sma e gi ensrefi dorodoro na ini a diniwroko fu Gado. So wan sma e teki prati fayafaya na sani di abi fu du nanga na anbegi. Fu eksempre, wan Kresten di e dini na ini wan Sneisitongo gemeente e taki: „Fu di mi e pionier meki mi sabi taki mi e du wan bun sani nanga mi libi. Leki wan sisa di no trow, mi abi furu fu du èn dati e yepi mi fu no firi leki mi de mi wawan. Mi e firi koloku na a kaba fu ibri dei, fu di mi kan si taki a diniwroko fu mi e yepi sma trutru. A sani disi e gi mi furu prisiri.” Wan pionier sisa di abi 38 yari e taki: „Mi denki taki wan sma o man de koloku trutru soso te a man si a bun sei fu iniwan situwâsi di a de na ini.” Wan tra Kresten sisa di no trow èn di e libi na a zuidsei fu Europa e taki krin: „Kande mi libi no waka soifri leki fa mi ben wani, ma mi de koloku èn mi sa tan koloku.”

12, 13. (a) Te wan sma trow noso te a no trow, dan san na a yoisti fasi fa wi musu si dati? (b) San sma di no trow kan leri fu a libi fu Paulus èn fu den rai fu en?

¹² Kande Yeremia ben si taki a libi fu en no ben waka leki fa a ben abi na prakseri di a ben e gro kon bigi. Ma kande a ben si tu taki na so a ben de nanga furu sma di ben trow èn ben abi pikin. Wan pionier na ini Spanyorokondre ben taki a sani disi: „Mi sabi trowpaar di de koloku èn trawan di no de koloku. A sani disi sori mi krin taki awansi mi trow noso awansi mi no trow na ini a ten di e kon, toku mi kan de koloku.” Boiti na eksempre fu Yeremia, dusundusun trawan de tu di e sori taki wan sma di no trow kan abi furu fu du, a kan abi bun bakapisi èn a kan de koloku. Na apostel Paulus e sori tu taki a sani disi tru, fu di a skrifi: „Mi e taigi den sma di no trow èn den uma di den masra dede kaba, taki a bun efu den tan leki mi” (1 Kor. 7:8). A kan taki Paulus ben trow, ma taki en wefi dede. Awansi fa a no fa, a no ben trow di a ben e du so furu na ini a zendelingwroko (1 Kor. 9:5). Disi e sori taki a ben tyari wini kon gi en taki a no ben trow, a no so? Fu di a no ben trow, meki a ben man ’dini Masra doronomo sondro taki sani puru en prakseri’, èn na so a ben man du furu bun sani.​—1 Kor. 7:35.

¹³ A santa yeye meki Paulus skrifi ete wan sani: „Den wan di e trow o kisi banawtu na ini den libi.” Gado ben meki Paulus skrifi a prenspari tru tori disi: „Efu wan sma bosroiti na ini en ati fu no trow . . . dan a e du bun. Sobun, a sma di trow, e du bun, ma a sma di no trow, o du moro bun” (1 Kor. 7:28, 37, 38). Noiti Yeremia leisi den wortu dati, ma a fasi fa a libi furu yari langa e sori taki wan sma di e dini Gado man de koloku awansi a no trow. Fu taki en leti, so wan sma kan de koloku trutru te a e poti a tru anbegi na a fosi presi na ini en libi. Kownu Sedekia ben trow, toku a no gi yesi na a rai fu Yeremia so taki a ben kan „tan na libi”. Ma a profeiti di no ben trow ben libi na wan fasi di meki taki a tan na libi.

GI TRAWAN DEKI-ATI ÈN KISI DEKI-ATI BAKA

14. San wi e leri fu a matifasi di Akwila nanga en wefi ben abi nanga Paulus?

¹⁴ Soleki fa wi si kaba, dan furu mansma nanga umasma na ini a ten fu Yeremia ben e trow èn den ben abi wan osofamiri. Na so a ben de tu na ini a ten fu Paulus. A no de fu taki dati furu Kresten di ben abi wan osofamiri no ben man go preiki na tra kondre neleki fa Paulus ben du dati, ma den ben abi furu fu du na ini a kontren pe den ben e libi. Den ben de wan blesi tu gi brada nanga sisa di no ben trow. Memre taki di Paulus doro na ini Korente, Akwila nanga Preskela teki en na ini den oso èn den ben e meki tenti makandra nanga en. Ma dati no ben de ala. A ben musu de so taki Paulus ben kisi deki-ati fu di Akwila nanga en wefi ben de en mati. Prakseri fa den ben e nyan switi nanga makandra èn fa den ben abi switi demakandra na tra okasi. Yeremia ben abi den sortu mati dati tu? Leki wan sma di no trow, a ben e gebroiki en ten fu du diniwroko gi Gado, ma toku wi no musu si en leki wan sma di ben e hori ensrefi aparti fu trawan. A kan taki a ben abi switi demakandra nanga osofamiri di ben e dini Gado fayafaya, kande nanga osofamiri soleki a di fu Baruk, a di fu Ebed-meilek, noso trawan.​—Rom. 16:3; leisi Tori fu den apostel 18:1-3.

15. Fa Kresten osofamiri kan de wan bigi yepi gi Kresten brada nanga sisa di no trow?

¹⁵ Neleki fa Paulus ben kisi wini fu di a ben de mati fu Akwila nanga en wefi, na so Kresten di no trow e kisi wini te den de mati nanga sma di abi wan osofamiri. Yu nanga yu osofamiri e du muiti fu de bun mati nanga sma di no trow? Wan sisa di e fruteri fa a e firi, e taki: „Mi gowe libi a grontapu èn mi no wani drai go baka na ini. Ma mi abi sma fanowdu di e broko den ede nanga mi èn di lobi mi. Mi e begi Yehovah fu gi wi leki sma di no trow, moro leri nanga deki-ati. Wi abi yepi fanowdu èn sma no musu frigiti wi. A no de so taki ibriwan fu wi di no trow e angri fu trow. Toku a gersi son leisi taki nowan sma e yepi wi. A tru taki wi kan suku yepi na Yehovah ala ten. Ma te wi abi sma fanowdu, dan a de so taki wi man taki nanga den brada nanga sisa fu wi?” Dusundusun brada nanga sisa di no trow o taki dati den man du dati. Den breiti taki den abi den sortu sma dati na ini a gemeente fu den. Den mati fu den a no soso brada nanga sisa di de speri fu den. Ma fu di den lobi fu de nanga tra sma, meki den de mati fu ala sortu sma, owruwan nanga yonguwan na ini a Kresten famiri.

16. Sortu pikinpikin sani yu kan du fu gi deki-ati na brada noso sisa di no trow?

¹⁶ Efu yu meki pikinso muiti, dan yu o si taki fasi de fa yu kan gi den wan di no trow deki-ati. Son leisi yu kan aksi den fu du wan sani makandra nanga yu osofamiri. Kande yu kan aksi den fu kon na yu Osofamiri Anbegi. Te yu kari wan brada noso wan sisa di no trow fu kon nyan na yu oso, dan a sani dati kan de wan bigi sani gi en. Kande yu kan aksi a sma dati fu wroko nanga yu na ini a preikiwroko. Fu san ede yu no e aksi en fu go du wan wroko na a Kownukondre zaal makandra nanga yu osofamiri, noso fu go bai sani makandra nanga unu? Son osofamiri aksi brada noso sisa di patna dede noso pionier di no trow, fu go nanga den na wan kongres noso na fakansi. Den sortu demakandra disi e tyari wini kon gi ala tu grupu.

17-19. (a) Fu san ede pikin musu hori makandra na prakseri te den e bosroiti fa den o sorgu gi den papa nanga mama di owru noso siki? (b) San wi e leri fu a sani di Yesus du fu sorgu gi en mama?

¹⁷ Son leisi brada noso sisa di no trow musu sorgu gi den papa nanga mama di kon owru kaba. Na ini a ten fu Yesus, son prenspari Dyu ben e kon nanga ala sortu triki soso fu no sorgu den papa nanga mama. Den ben feni taki den ben abi frantwortu na ini na anbegi di ben prenspari moro a frantwortu di Gado ben gi den fu sorgu gi den papa nanga mama (Mark. 7:9-13). Na ini Kresten osofamiri a no musu de so.​—1 Tim. 5:3-8.

¹⁸ Ma kon meki wi taki dati papa nanga mama di kon owru kaba abi moro leki wán pikin na ini a tru anbegi. Efu wan fu den pikin dati no trow, dan a de so taki nomonomo na en abi a frantwortu fu sorgu den bigisma? Wan sisa na ini Yapan e skrifi: „Mi ben sa wani trow, ma fu di mi musu sorgu mi papa nanga mama, meki mi no man trow. Mi de seiker taki Yehovah e frustan taki a no makriki gi sma fu sorgu gi den papa nanga mama èn a sabi fa sma di no trow e firi son tron.” Kande a sisa disi abi tra brada nanga sisa di trow, ma sondro fu taki nanga en fosi, den bosroiti taki na en musu sorgu den bigisma fu den. Na ini den sortu situwâsi disi, a bun fu hori na prakseri taki Yeremia ben abi brada di no ben e libi bun nanga en.​—Leisi Yeremia 12:6.

¹⁹ Yehovah e frustan fa sma di no trow e firi èn a e firi gi den wan di de na ini muilek situwâsi (Ps. 103:11-14). Ma papa nanga mama di owru noso siki, na papa nanga mama fu ala den pikin fu den, a no soso fu den wan di no trow. A kan de so taki sonwan fu den pikin trow èn taki den abi den eigi pikin. Ma dati no wani taki dati den no abi fu sori lobi moro gi den papa nanga mama. A no wani taki tu dati den no abi fu tyari a Kresten frantwortu di den abi fu yepi den papa nanga mama te dati de fanowdu. Wi sabi taki srefi di Yesus ben de fu dede na a postu, a ben sabi a frantwortu fu en èn a du wan sani fu sorgu gi en mama (Yoh. 19:25-27). Bijbel no e taki finifini fa pikin musu wroko makandra fu sorgu gi den papa nanga mama di owru noso siki. A no e taki tu dati na den pikin di no trow abi a moro bigi frantwortu fu sorgu gi den. Fu di a no makriki ala ten fu seti den sortu tori disi, meki ala den pikin musu luku bun taki den no e aksi tumusi furu fu makandra èn den musu hori makandra na prakseri. Boiti dati, den musu prakseri na eksempre di Yesus gi wi te a abi fu du nanga a fasi fa a sorgu gi en mama.

20. Fa yu feni en fu abi demakandra nanga brada nanga sisa di no trow?

²⁰ Nanga yepi fu santa yeye, Yeremia ben taki: „Nowan fu den o taigi en mati noso en brada: ’Yu musu sabi Yehovah!’, bika den alamala o sabi mi” (Yer. 31:34). Fu taki en leti, wi abi den sortu mati disi kaba na ini a Kresten gemeente, èn dati na brada nanga sisa tu di no trow. A no de fu taki dati wi alamala wani gi makandra deki-ati èn wi wani taki den sma disi di no trow e „tan na libi”.