Liboka Tsa Tšebeletso Tsa May
Beke e Qalang ka May 4
10 mets: Litsebiso tsa phutheho le Litsebiso tse tsoang ho Tšebeletso ea Rōna ea ’Muso. Khothalletsa bahoeletsi hore ba tsoele tšebeletsong mafelo-bekeng ana. Mohoeletsi e mong le e mong o lokela ho ba le pakane ea ho kopanela ka mehla tšebeletsong beke ka ’ngoe le ho tlisa tlaleho ea hae hang-hang qetellong ea khoeli.
20 mets: “Ho Buella Peeletso ea Molula-Qhooa ka May.” Sehlooho se koaheloe ka lipotso le likarabo. Kopanyelletsa puisano ka morero oa Molula-Qhooa joalokaha o boletsoe karolong e ka holimo ea leqephe 2 la tokollo ka ’ngoe. U ka etsa litlhahiso bakeng sa likenyelletso tse eketsehileng, tse thehiloeng limakasineng tse tla sebelisoa tšebeletsong ea tšimo bekeng ena. Lenane la limakasine tse tsamaisoang le theohile, kahoo mohoeletsi e mong le e mong o khothalletsoa hore a falimehele ho nehelana ka makasine ha monyetla o mong le o mong o hlaha, esita le haeba mpho ea peeletso e hanoa.
15 mets: “Likenyelletso li ka ba le Phello e Molemo.” Buisana le bamameli ka sehlooho sena. Na ba se ba lekile tse ling tsa likenyelletso tse hlahisitsoeng litokollong tsa morao-rao tsa Tšebeletso ea Rōna ea ’Muso, tseo boholo ba tsona bo nkiloeng bukeng ea Ho Bea Mabaka? Ba fumane likenyelletso life li atleha haholo tšimong ea bona? Bahoeletsi ba lokisetsa likenyelletso tsa bona le ho ikoetlisa neng bakeng sa tšebeletso ea tšimo? Etsa lipontšo tse peli kapa tse tharo tse khutšoaane u sebelisa likenyelletso tse ileng tsa atleha tšimong ea lōna.
Pina 32 le thapelo e koalang.
Beke e Qalang ka May 11
5 mets: Litsebiso tsa phutheho.
20 mets: “Etsa Maeto a ho Boela a Atlehang.” Buisana le bamameli ka lintlha tse khōlō tsa sehlooho sena, mohlomong u kopanyelletse le phihlelo ea haufinyane ea moo leeto la ho boela le ileng la tsosa thahasello e eketsehileng. Sebelisa metsotso ea ho qetela e tšeletseng kapa e robeli ho etsa pontšo ea kamoo mokhanni oa Thuto ea Buka ea Phutheho a thusang bahoeletsi ba babeli kapa ba bararo hore ba khutlele ho batho ba thahasellang ba sa tsoa fumanoa tšimong ea bona. Haeba ho ka etsahala, sebelisa maeto a sebele a ho boela ao bahoeletsi ba tla a etsa hamorao.
20 mets: Puisano ka “Ho Rapela Balimo” bukeng ea Ho Bea Mabaka, maqephe 164-6. Le hoja ba bangata ba ka bolela hore batho ba bangata ba lulang linaheng tsa Bophirimela ha ba rapele balimo, mehleng ea kajeno batho ba etsa lintho tse ngata bakeng sa ho hlompha bafu. Batho ba bang ba ntse ba hlomphuoa le ho rapeloa joalokaha eka ba sa phela. Liemahale, litšoantšo tse takiloeng, le libuka tse buang ka bophelo ba batho ba itseng li nkoa e le likhopotso ka batho ba itseng ba tummeng. Kenyelletsa boemo ba ha ntate a buisana le ngoana ea lilemong tsa bocha. Motsoali o sebelisa boitsebiso bo bukeng ea Ho Bea Mabaka, maqephe 164-5. Totobatsa boitsebiso bo leng sehloohong sa ho qetela ho leqephe 164 le se qalang ho leqephe 165 ho bontša ngoana hore na ke hobane’ng ha ho le kotsi ho shebella lifilimi tse tšosang tse buellang tšebelisano le meea kapa khopolo ea hore bafu ba ka khutla ho tla tšoenya ba ntseng ba phela. A hlalose boemo ba bafu le tšepo ea tsoho, ’me a bontše hore na sena se lokela ho ama pono ea rōna ka bafu joang. Ngoana o hlalosa takatso eo a nang le eona ea ho qoba boithabiso bo buellang tšebelisano le meea.
Pina 65 le thapelo e koalang.
Beke e Qalang ka May 18
10 mets: Litsebiso tsa phutheho, ho kopanyelletsa le tlaleho ea lichelete le liteboho tse entsoeng ke Mokhatlo bakeng sa monehelo o fanoeng. Babatsa phutheho bakeng sa ho fana ka tšehetso ea lichelete phuthehong haesita le mosebetsing oa lefatše ka bophara oa Mokhatlo. Liphutheho li lokela ho etsa litokisetso tse tobileng bakeng sa mosebetsi oa limakasine matsatsing a phomolo ea sechaba ka May. Ho khothalletsoa e mong le e mong hore a tšehetse litokisetso tsena, esita leha e ke ke ea ba letsatsi lohle.
20 mets: “Ba Khothalletseng ho Hahamalla Lipakane tsa Moea.” Puisano le bamameli e tšoaroe ke moholo. Ka mor’a ho buisana ka serapa 6, buisana le mohoeletsi ea behang mohlala eo joaloka mocha a ileng a arabela khothatsong ea ho hahamalla lipakane tsa moea. O ile a khothatsoa ke eng? Ha u bua ka serapa 7, totobatsa melemo e sebetsang e tla fumanoa ke batsoali le bana ka ho ikhopotsa likhaolo 22, 38, le 39 tsa buka ea Bacha baa Botsa.
15 mets: Itokisetseng Phutuho ea 1992 ea Tšimo e sa Abuoang. Molebeli oa Tšebeletso o bua ka lengolo la Mokhatlo la April 1, 1992, le buang ka phutuho ea 1992 ea tšimo e sa abuoang. Ho ka ’na ha sebelisoa liphihlelo tse tsoang ho Molula-Qhooa oa February 1, 1992, leqephe 24 le oa April 1, 1992, leqephe 15.
Pina 213 le thapelo e koalang.
Beke e Qalang ka May 25
10 mets: Litsebiso tsa phutheho le Litaba tsa Puso ea Molimo. Liphihlelo tse bileng teng ka phutuho ea lipeeletso (tsena li lokela ho hlophisoa esale pele ka thuso ea moena ea tšoarang lipeeletso phuthehong).
15 mets: Itšireletse Khahlanong le Bokoenehi. Puisano pakeng tsa moholo le mohoeletsi ba lutse tafoleng. Mohoeletsi o hlalosa hore o teane le motho e mong tšebeletsong ea balang lingoliloeng tsa bakoenehi. Mohoeletsi o bolella moholo hore o ikutloa hore mong’a ntlo o ne a tiile ho latela lipotso tseo a neng a li botsa. Mohoeletsi o ile a hana ho amohela likhatiso tsa bakoenehi tseo mong’a ntlo a neng a mo fa tsona empa a ka thabela ho leka ho araba lipotso tsa mong’a ntlo. Moholo o babatsa mohoeletsi ka boikutlo ba hae bo botle le liketso tsa hae. Ho e-na le ho bua ka seo bakoenehi ba se ngotseng kapa ba se buang, ho bohlale ho tsepamisa mohopolo ponong ea litaba ea Mangolo joalokaha e bontšitsoe bukeng ea Ho Bea Mabaka. Moholo o mema mohoeletsi hore a phetle buka ea hae ea Ho Bea Mabaka, ’me ka bobeli ba ikhopotsa se ho maqephe 68-71. Puisano e lokela ho ba mofuthu le ho khothatsa ha ba hlahloba tlhaloso ea bokoenehi, sehlooho ka seng, le litemana tsa sehlooho tse khethiloeng haeba nako e lumela. Phetha puisano ka ho bua mantsoe a khothatsang bakeng sa boitsebiso bohle bo hahang le bo khothatsang boo re ka ithutang bona. Khothalletsa mohoeletsi ho ba le moqoqo o hahang le mong’a ntlo. Haeba a tiile, o tla bona phapang pakeng tsa ho ba le katamelo e ntle ea ’nete le ho ba le katamelo e mpe, ea ho nyatsa-nyatsa e etsoang ke bakoenehi. Ka ho hanela mohopolo oa bokoenehi le boitsebiso ba bokoenehi, re bonahatsa botšepehi ba rōna ho Jehova le ho mokhatlo oa hae o hlophisitsoeng o bonahalang.
20 mets: “Lijo tsa Moea tsa Letsatsi le Letsatsi—Li Bohlokoa Bakeng sa Lelapa la Bokreste.” Boitsebiso bo buisanoe ka lipotso le likarabo.
Pina 108 le thapelo e koalang.