Ayubu

30 “Na sasa wamenicheka,+

Wale wenye siku chache kuliko mimi,+

Ambao baba zao ningekataa

Kuwaweka pamoja na mbwa wa kundi langu.

 2 Hata nguvu za mikono yao—zilinifaa nini?

Nguvu zimekwisha ndani yao.+

 3 Wao ni tasa kwa sababu ya upungufu na njaa,

Wanatafuna eneo lisilo na maji,+

Ambapo jana palikuwa na dhoruba na ukiwa.

 4 Walikuwa waking’oa mmea wa chumvi kando ya vichaka,

Na mzizi wa miretemu ulikuwa chakula chao.

 5 Walikuwa wakifukuzwa kutoka katika jamii;+

Watu waliwapaazia sauti kama kupaazia mwizi.

 6 Wanalazimika kukaa kwenye mteremko wa mabonde ya mito,

Katika matundu ya mavumbi na katika miamba.

 7 Walilia katikati ya vichaka;

Walisongamana pamoja chini ya upupu.

 8 Wana wa mtu asiye na akili,+ pia wana wa mtu asiye na jina,

Wamepigwa mijeledi watoke katika nchi.

 9 Na sasa mimi nimekuwa hata kichwa cha wimbo wao,+

Nami ni simango kwao.+

10 Wamenichukia, wamekaa mbali nami;+

Nao hawakuacha kunitemea mate usoni.+

11 Kwa kuwa aliifungua kamba yangu ya upinde na kuninyenyekeza,

Nao waliifungua lijamu kwa sababu yangu.

12 Wanasimama upande wa mkono wangu wa kuume kama kundi la waovu;

Wameachilia miguu yangu,

Lakini wakajenga juu yangu vizuizi vyao vyenye kuleta msiba.+

13 Wameziharibu barabara zangu;

Walizidisha shida kwangu,+

Bila wao kuwa na msaidizi yeyote.

14 Walikuja kana kwamba ni kupitia pengo pana;

Wamejiviringisha katika dhoruba.

15 Vitisho vya ghafula vimegeuzwa juu yangu;

Cheo changu cha heshima kinafukuzwa kama upepo,

Na wokovu wangu umepitilia mbali kama wingu.

16 Na sasa nafsi yangu inamwagwa ndani yangu;+

Siku za mateso+ zinanishika.

17 Mifupa+ yangu imetobolewa usiku na kuanguka kutoka kwangu,

Na maumivu yanayonitafuna hayapumziki.+

18 Vazi langu linabadilika kutokana na wingi wa nguvu;

Linanifunga kama ukosi wa vazi langu refu.

19 Amenishusha chini katika udongo,

Hivi kwamba nimekuwa kama mavumbi na majivu.

20 Ninakulilia nipate msaada, lakini wewe hunijibu;+

Nimesimama, ili unikazie fikira.

21 Unajibadili ili uwe mkatili kwangu;+

Unadumisha uadui kwangu kwa nguvu kamili za mkono wako.

22 Unaniinua kwenye upepo, unanifanya niupande;

Kisha unaniyeyusha kwa kishindo.

23 Kwa maana najua vema kwamba utanirudisha kwenye kifo,+

Na kwenye nyumba ya kukutania ya kila mtu aliye hai.

24 Ila tu hakuna yeyote anayeunyoosha mkono wake juu ya rundo la mabomoko matupu,+

Wala wakati wa kudhoofika kwa mtu hakuna kilio cha kuomba msaada kuhusu mambo hayo.

25 Hakika nimemlilia mtu aliye na siku ngumu;+

Nafsi yangu imemhuzunikia maskini.+

26 Ijapokuwa nilingojea mema, mabaya yalikuja;+

Nami nikaendelea kungojea nuru, lakini giza likaja.

27 Matumbo yangu yalichemshwa wala hayakukaa kimya;

Siku za mateso zilinikabili.

28 Nilitembea huku na huku kwa huzuni+ wakati ambapo hakukuwa nuru ya jua;

Nilisimama katika kutaniko, nikaendelea kulia nipewe msaada.

29 Nikawa ndugu ya mbwa-mwitu,

Na rafiki ya binti za mbuni.+

30 Ngozi yangu ikawa nyeusi+ na kuanguka kutoka kwangu,

Na mifupa yangu ikawaka moto kutokana na ukavu.

31 Na kinubi changu kikawa cha maombolezo matupu,

Na zumari yangu kwa ajili ya sauti ya watu wanaolia.