Rivyu Bilong Skul Bilong Wok Autim Tok

Rivyu bilong ol tok i bin kamap insait long Skul, kirap long Septemba 1 i go inap long Disemba 22, 1997. Long narapela hap pepa, traim raitim planti bekim insait long taim bilong mekim rivyu.

[Harim: Long taim bilong mekim rivyu long Skul, yu ken lukim Baibel tasol bilong helpim yu long bekim ol askim. Long pinis bilong ol askim i gat mak bilong ol buk samting, na taim yu kisim dispela pepa i go long haus paslain long taim bilong mekim rivyu, yu ken lukim ol dispela buk samting bilong helpim yu long raitim stret ol bekim bilong rivyu long Skul. Sampela taim ol i no putim namba bilong pes na paragraf bilong Wastaua.]

Makim ol dispela tok I Stret o I No Stret:

1. Sapos God i no bin givim rot long ol man long tingim wanem samting ol i laik mekim, bai i no gat pasin nogut long graun. [1, rs p. 354 par. 2] I Stret. Pasin nogut i bin kamap, long wanem, ol man i bin tingim ol yet tasol taim ol i gat rot long mekim ol samting ol i laikim.

2. Long Luk 22:30, “12-pela lain bilong Israel” i makim wankain samting olsem long Matyu 19:28, tok bilong en i no makim tasol ol nambatu lain pris em God i bin makim ol long spirit holi, em i makim tu olgeta narapela manmeri bilong graun. [5, Hap bilong Baibel yumi kaunim long olgeta wik; lukim w87-E 3/1 p. 27 par. 10; p. 28 par. 12.] I Stret.

3. Taim Jisas i toktok wantaim wanpela meri Samaria, ol disaipel bilong em i tingting planti, long wanem, dispela meri i gat planti man. (Jon 4:​27) [8, Hap bilong Baibel yumi kaunim long olgeta wik; lukim w95 7/15 p. 15 par. 1, 2.] I No Stret. Ol i kirap nogut, long wanem, Jisas i no bihainim pasin tumbuna bilong ol Juda i tok, ol man i no ken toktok wantaim wanpela meri long ai bilong planti man. Na tu, em i wanpela meri Samaria na ol Juda i no save toktok wantaim ol Samaria.

4. Dispela tok, “bipo yet” long Jon 6:64 i makim olsem, kirap long taim Jisas i makim Judas olsem wanpela aposel, em i save pinis olsem Judas bai givim Em long han bilong ol birua. [9, Hap bilong Baibel yumi kaunim long olgeta wik; lukim it-2-E p. 129 par. 4-6.] I No Stret. Long kirap bilong wok aposel bilong em, Judas i bin stap gut long God na long Jisas. Olsem na taim Jon i kolim dispela tok “bipo yet” em i bin toktok long taim Judas i kirap long mekim ol pasin nogut, na em i kirap long larim laik nogut bilong sin i bosim em, long dispela taim Jisas i save Judas bai kamapim em long ol birua.

5. Bilong i stap amamas insait long famili Kristen, yumi mas lusim pasin pamuk na rejistaim marit long gavman. Em tasol. [9, uw p. 139 par. 1] I No Stret. Sampela samting moa yumi mas mekim i olsem: Yumi mas save, taim yumi marit dispela i bilong oltaim, na yumi mas mekim ol wok bilong yumi insait long famili, na mekim stretpela pasin long ol narapela insait long famili.

6. Namba wan Pita 3:​3, 4 i no tambuim ol meri long penim pes liklik na pasim sampela bilas gol olsem ring samting, wankain olsem em i no tambuim ol long pasim klos. [7, rs p. 315 par. 1] I Stret.

7. Jon 5:1 i toktok long “wanpela bikpela de bilong lotu bilong ol Juda,” em i makim de Pasova bilong yia 31 C.E. [7, si Oktoba 13 par. 8] I Stret. Dispela tok i stap klostu tasol long tok Jisas i mekim olsem “i gat 4-pela mun i stap yet na taim bilong kisim kaikai bai i kamap,” na dispela tok i kamapim klia olsem dispela bikpela de em de Pasova, em i bin kamap long kirap bilong taim bilong kisim ol kaikai. (Jo 4:⁠35)

8. Sapos wanpela brata Kristen i mekim wanpela rong long yumi, em i no gutpela sapos yumi givim baksait long em na yumi no laik toktok wantaim em. [4, uw p. 134 par. 7] I Stret. Dispela kain pasin bai kamapim klia olsem yumi sot long pasin bilong laikim tru brata bilong yumi. Yumi mas laikim tru ol brata bambai God i ken orait long ol samting yumi mekim bilong lotuim em. (1 Jo 4:​20)

9. Yumi olgeta i mas kisim sampela tok bilong skulim na stretim yumi. [2, uw p. 130 par. 12] I Stret. Dispela inap helpim yumi long save long ol tingting na pasin bilong yumi em yumi mas stretim na olsem wanem yumi ken mekim. (Kain tok olsem em inap)

10. Taim Luk i stap long Efesus em i raitim Buk Aposel. [16, si Disemba 15 par. 3] I No Stret. Luk i bin i stap long Rom taim em i raitim Buk Aposel.

Bekim ol dispela askim:

11. Man i mas mekim wok bos olsem wanem? [12, uw p. 142 par. 7] Man i mas bihainim ol pasin bilong Krais Jisas na mekim wok bos bilong em. Jisas i strong long bihainim pasin bilong Jehova; em i laikim tumas stretpela pasin na i nolaik long pasin bilong sakim lo. (Hi 1:​8, 9) Em i laikim tumas kongrigesen o lain bilong em; em i no gat pasin antap na em i save tingim gut ol narapela man. Em i save “mekim pasin isi long ol man” na daunim em yet. (Mt 11:29) (Kain tok olsem em inap)

12. Bilong wanem dispela tok “poroman bilong helpim em” long Stat 2:18 em i no daunim ol meri. [3, rs p. 311 par. 6] Dispela tok i makim pasin bilong narapela bai inapim pasin bilong narapela. Ol meri i gat ol gutpela pasin na save bilong ol, na ol man i gat bilong ol. (Kain tok olsem em inap)

13. Bilong wanem Jisas i no laik insait long kros bilong tupela brata long ol samting em papa i dai pinis i bin lusim? (Lu 12:​13, 14) [1, Hap bilong Baibel yumi kaunim long olgeta wik; lukim w97 4/1 p. 28.] Jisas i bin kam bilong autim gutnius bilong Kingdom, i no bilong stretim kain hevi olsem. Na tu, Lo bilong God i kamapim pinis wanpela rot bilong stretim ol kros. (Lo 1:​16, 17)

14. Taim ol disaipel i askim Jisas wanem taim em bai kirapim gen Kingdom bilong Israel, olsem Aposel 1:6 i stori long en, ol i no bin save long wanem samting? [16, Hap bilong Baibel yumi kaunim long olgeta wik; lukim w91 2/1 p. 11 par. 4.] Ol i no bin save olsem dispela Kingdom bai i stap long heven.

15. Kolim tupela samting em inap helpim marit long wok gut. [11, uw p. 140 par. 4] Wet pastaim na marit taim tupela i bikpela pinis na i gat gutpela tingting; painim wanpela poroman i gat wankain tingting na laik, na yupela inap toktok gut wantaim; stap man bilong givim bel long God; laikim Jehova na ol pasin bilong em; no ken sutim tok long ol liklik pasin kranki bilong poroman bambai yumi ken abrusim wok bilong yumi yet insait long marit. (Tupela inap; kain tok olsem em inap)

16. Bilong wanem ol meri Kristen i mas karamapim het long sampela taim? [6, rs p. 314 par. 1] Olsem 1 Korin 11:​3-10 i tok, dispela pasin i makim olsem meri i daun long lo bilong God long wok bos, na tu em i daun long wok God i givim long man.

17. Bilong wanem Baibel New World Translation i tanim tok bilong Jon 1:1 olsem, “Tok em i wanpela god” na i no olsem “Tok em yet i God” olsem sampela Baibel i tanim? [7, Hap bilong Baibel yumi kaunim long olgeta wik; lukim rs p. 213 par. 3.] Long dispela ves, paslain long namba wan tok “God” (tok Grik, the·osʹ) i gat wanpela hap tok Grik (dispela) i stap, na em i no stap paslain long namba 2 tok “God.” Long rait Grik, taim ol i skruim dispela hap tok long narapela tok, dispela i makim olsem ol i stori long man yet, na taim i no gat dispela hap tok, ol i stori long pasin bilong man, em i kain olsem wanem. Olsem na dispela ves i no stori long Tok (Jisas) em i dispela God em Tok i stap wantaim em. Nogat. Dispela ves i stori long Jisas em i kain olsem God, em i wanpela god. (Kain tok olsem em inap)

18. Olsem wanem Lo Bilong Moses i mekim “sin em i kamap ples klia”? (Ga 3:​19) [14, uw p. 147 par. 4] Lo i makim stret ol samting ol Juda i mas mekim na i kamapim ples klia olsem ol i sinman. Maski ol i laik tru long bihainim dispela Lo na ol i wok strong long mekim, tasol ol i no inap. (Kain tok olsem em inap)

19. Jisas em man i no gat sin na em i tok em i wanpela Tisa, tasol bilong wanem em i no laik bai ol man i kolim em “Gutpela Tisa”? (Lu 18:​18, 19) [3, Hap bilong Baibel yumi kaunim long olgeta wik; lukim w95 3/1 p. 15 par. 7.] Jisas i no laik bai ol man i kolim em olsem, long wanem, em i gat pasin daun na em i strong long Jehova i mas kisim biknem na em yet nogat. (Kain tok olsem em inap)

20. Olsem wanem dispela lo i stap long Jon 13:34 em i nupela? [12, Hap bilong Baibel yumi kaunim long olgeta wik; lukim w90 10/1 p. 24 par. 5, 6.] Jisas i bin laikim tru ol man na em i dai tu bilong helpim ol, na ol disaipel i mas redi long mekim olsem bilong helpim ol narapela. Dispela pasin bilong laikim man i antap moa, long wanem, Lo Bilong Moses i no tok man i mas redi long i dai tu bilong helpim ol narapela.

Raitim wanem hap tok i stret bilong pinisim ol dispela tok:

21. Sapos yumi pilim olsem wanpela brata i gat tok long yumi, yumi mas i gat pasin sori na pasin daun bambai yumi yet i ken i go toktok wantaim em na bai yumi ken kamap wanbel gen. [5, uw p. 135 par. 10]

22. ‘Twenti kina’ i makim ol samting ol disaipel em God i bin makim long spirit holi ol i holim bilong mekim wok long en bilong kamapim sampela manmeri moa bilong Kingdom. (Lu 19:13) [4, Hap bilong Baibel yumi kaunim long olgeta wik; lukim gt sapta 100 par. 5.]

23. Tripela tok giaman ol Juda i sutim long Jisas taim ol i kotim em long Pailat, em nambawan gavman bilong Judia, i olsem: em i paulim ol manmeri bilong Israel, em i tambuim ol long givim takis long Sisar, na em i save tok em yet em i wanpela king. (Lu 23:⁠2) [6, Hap bilong Baibel yumi kaunim long olgeta wik; lukim w90-E 12/1 p. 9 par. 1.]

24. Pasin bilong laikim ol brata bilong yumi bai kamap strong moa sapos yumi lusim tingting long ol liklik pasin kranki bilong ol, na yumi wok long tingim ol gutpela pasin bilong ol, na tingim wok bilong Jehova ol i mekim. [8, uw p. 137 par. 15]

25. Yumi ol sumatin bilong Baibel yumi mas lain long lukim ol indeks bilong kisim sampela save, yumi no ken ting olsem bai yumi painim bekim olsem “I stret” o “I no stret” long olgeta askim, na yumi mas tingting long mekim ol samting i kamapim olsem, yumi laikim tumas Jehova na famili bilong yumi. [13, uw p. 144 par. 13]

Makim wanem tok i stret:

26. Olsem aposel Pita i tok, Jehova i (mekim gutpela pasin; laikim yumi; isi long yumi) na wet inap long nau na dispela i givim rot long yumi bilong kamapim klia olsem yumi (tanim bel; stap gut long em; harim tok). (2 Pi 3:⁠9) [2, rs p. 355 par. 2]

27. Tok i tru i save mekim ol man i stap fri, em tok i tru bilong (saiens; lotu giaman; Krais Jisas), long wanem, long rot bilong em tasol yumi inap long lusim kalabus bilong (ol bilip giaman; tok gris bilong graun; sin i save bringim indai). (Jo 8:​12-​36) [10, Hap bilong Baibel yumi kaunim long olgeta wik; lukim gt sapta 68 par 15.]

28. Ol “arapela sipsip” olsem Jon 10:16 i toktok long en i makim (ol Kristen i no bilong lain Juda; ol Kristen Juda; olgeta manmeri ol inap kisim laip oltaim long Paradais long graun). [11, Hap bilong Baibel yumi kaunim long olgeta wik; lukim w95 4/15 p. 31 par. 4.]

29. Taim Jisas i askim aposel Pita, ‘Ating yu laikim mi moa yet winim ol dispela?,’ Jisas i askim Pita sapos em i laikim Em moa winim (ol dispela narapela disaipel; laik bilong ol narapela disaipel; ol dispela samting, olsem ol pis). (Jo 21:15) [15, Hap bilong Baibel yumi kaunim long olgeta wik; lukim w92 2/15 p. 16 par. 12.]

30. Long taim Jisas i mekim tok piksa bilong (“diwai wain tru”; “gutpela wasman”; “ol sipsip na meme”) em i kamapim klia gutpela pasin wanbel i stap namel long em yet na ol disaipel tru bilong em, na tu namel long em na Papa. (Jo 15:⁠1) [15, si Disemba 8, par. 32]

Putim wanem skripsa i stret long ol dispela tok:

Kis 31:​12, 13; Mt 5:​14-​16; Lu 9:​60, 62; 13:​4, 5; Ro 7:​6, 7

31. Jisas i kamapim klia olsem God i no makim pinis ol samting i mas painim yumi ol man, na em i stori long wanpela bagarap i bin kamap na ol man i harim tok bilong em ol i save long en. Na em i tok dispela samting i kamap nating tasol, long wanem, taim nogut i save painim olgeta man. [Lu 13:​4, 5] [1, Hap bilong Baibel yumi kaunim long olgeta wik; lukim w96 9/1 p. 5 par. 5.]

32. Lo Bilong Moses i no bilong olgeta manmeri i mas bihainim. [Kis 31:​12, 13] [17, uw p. 147 par. 5]

33. Bilong man i ken i go insait long Kingdom, em i mas givim bel olgeta. [Lu 9:​60, 62] [6, si Oktoba 6 par. 32]

34. Taim Lo Bilong Moses i pinis, Tenpela Lo tu i pinis wantaim. [Ro 7:​6, 7] [17, uw p. 147 par. 5]

35. Ol Kristen tru i mas wok long autim tok long nem na laik bilong God bambai ol manmeri bilong graun i ken litimapim nem bilong God. [Mt 5:​14-​16] [9, rs p. 311 par. 3]