ʼE Kotou Lagolago Koa Ki Te Pule Faʼitaliha ʼa Sehova?

“Kotou fakahā ʼi te lotolotoiga ʼo te ʼu puleʼaga: ‘Kua liliu ia Sehova ʼo hau.’ ”—Pesalemo 96:10.

1, 2. (a) Koteā te meʼa fakatalakitupua ʼaē neʼe hoko ʼi te māhina ʼo ʼOketopeli ʼo te taʼu 29 ʼo totatou temi? (b) Neʼe koteā te faka ʼuhiga ʼo te meʼa ʼaē neʼe hoko kiā Sesu?

ʼI TE māhina ʼo ʼOketopeli 29 ʼo totatou temi, neʼe hoko ai te meʼa fakatalakitupua neʼe mole heʼeki hoko ki muʼa atu. ʼE ʼui fēnei e te tagata faitohi Evaselio ko Mateo: “ ʼI tona ʼosi papitemaʼi, neʼe hake ake aipē ia Sesu mai te vai; pea koʼenī ia te lagi neʼe ava age, pea neʼe sio ia [Soane Patita] ki te laumālie ʼo te ʼAtua ʼe hifo age kiā [Sesu] ohagē he lupe. Pea koʼenī, mai te lagi, te leʼo ʼe ina ʼui fēnei: ‘Ko ia nei ko toku ʼAlo, ia te ʼofaina, ʼaenī kua au fiafia ʼaupitō ia te ia.” Neʼe ko he ʼaluʼaga neʼe fakamatala fuli e te ʼu tagata faitohi Evaselio ʼaē e toko fā.—Mateo 3:16, 17; Maleko 1:9-11; Luka 3:21, 22; Soane 1:32-34.

² Ko te laumālie māʼoniʼoni ʼaē neʼe hifo ifo kiā Sesu neʼe ina fakamoʼoni ko ia te Fakanofo, peʼe ko te Mēsia, peʼe ko Kilisito. (Soane 1:33) Neʼe kua ʼasi leva ia te “hako” ʼaē neʼe fakapapauʼi mai! Iā muʼa ʼo Soane Patita, neʼe tuʼu ai ia ia ʼaē kā maumauʼi e Satana ʼi tona muli vaʼe, pea ki muli age ko ia leva ʼaē kā ina maumauʼi anai te ʼulu ʼo ia ʼaē ʼe fakafeagai ʼaupitō kiā Sehova pea mo Tana pule faʼitaliha. (Senesi 3:15) Talu mai te temi ʼaia, neʼe kua ʼiloʼi lelei e Sesu ʼe tonu anai ke ina fakahoko te fakatuʼutuʼu ʼa Sehova ʼo ʼuhiga mo Tana pule faʼitaliha pea mo te Puleʼaga.

3. Neʼe teuteuʼi feafeaʼi e Sesu ia ia ki te gāue ʼaē kā ina fai moʼo faka lakatonuʼi ia te pule faʼitaliha ʼa Sehova?

³ Moʼo teuteuʼi lelei ia ia ki tana gāue, ko Sesu ʼaē neʼe “fonu ʼi te laumālie māʼoniʼoni, neʼe mavae ia mai Solotane, pea neʼe taki ia ia e te laumālie ʼi hē mo hē ʼi te toafa.” (Luka 4:1; Maleko 1:12) ʼI te toafa, lolotoga ʼaho e 40 neʼe maʼu e Sesu tona temi feʼauga moʼo metitāsioʼi te fakafifihi ʼaē neʼe lagaʼi e Satana ʼo ʼuhiga mo te pule faʼitaliha ʼa te ʼAtua, pea mo ina toe metitāsioʼi peʼe feafeaʼi anai hana fakaʼaogaʼi ʼo tona maʼuli moʼo faka lakatonuʼi te pule faʼitaliha ʼaia ʼa Sehova. Pea ʼe pipiki ki te fakafifihi ʼaia ia te ʼu fakatupu fuli ʼaē ʼe māʼuʼuli ʼi te lagi pea mo te kele. Koia ʼe lelei ke tou vakavakaʼi ia te maʼuli agatonu ʼo Sesu pea mo fakakaukauʼi te meʼa ʼaē ʼe tonu ke tou fai moʼo fakahā ʼe tou fia lagolago mo tātou ki te faka lakatonuʼi ʼo te pule faʼitaliha ʼa Sehova.—Sopo 1:6-12; 2:2-6.

Te Fakafihiʼi ʼo Te Pule Faʼitaliha ʼa Te ʼAtua

4. Koteā ʼaē neʼe fai e Satana moʼo fakafihiʼi te pule faʼitaliha ʼa Sehova?

⁴ Neʼe sio ia Satana ki te ʼu meʼa fuli ʼaia neʼe hoko ʼo ʼuhiga mo Sesu. Koia ʼaē neʼe ina foimo ʼohofiʼi ai te koga tāfito ʼo te “hako” ʼo te “ ʼohoana” ʼo te ʼAtua. (Senesi 3:15) Neʼe ina faigaʼi tuʼa tolu ke filifili e Sesu ia te meʼa ʼaē ʼe lelei age kiā te ia totonu kae ke ʼaua naʼa ina fai te faʼahi ʼaē neʼe finegalo kiai tana Tamai. Neʼe ko te tolu fakahala ʼaē neʼe fakafihiʼi tāfito ai e Satana ia te pule faʼitaliha ʼa Sehova. ʼI tana fakahā age kiā Sesu “te ʼatu puleʼaga kātoa ʼo te mālamanei mo tonatou kolōlia,” neʼe tala fakahagatonu age e Satana kiā Sesu: “ ʼE au foaki atu anai kiā te koe te ʼu meʼa fuli ʼaenī mo kapau ʼe ke punou pea mo fai ʼi ʼoku muʼa he ʼatolasio.” Neʼe mahino lelei kiā Sesu ʼe pule te Tēvolo ki “te ʼatu puleʼaga kātoa ʼo te mālamanei,” koia ʼaē neʼe ina fakahā ai ʼi te temi ʼaia ʼe lagolago ia ki te pule faʼitaliha ʼa te ʼAtua, ʼo ina tali fēnei age: “ ʼAlu, Satana, heʼe tohi fēnei: ‘Ko Sehova, tou ʼAtua, ʼaē ʼe maʼua ke ke ʼatolasio ki ai, pea ʼe ko ia tokotahi pē ʼaē ʼe maʼua ke ke tauhi ki ai ʼaki he tauhi tapu.’ ”—Mateo 4:8-10.

5. Koteā te toe gāue maʼuhiga ʼaē neʼe tonu ke fakahoko e Sesu?

⁵ Neʼe fakahā lelei e Sesu ʼi tona maʼuli, ko te meʼa ʼaē neʼe maʼuhiga tāfito kiā te ia, neʼe ko te lagolago ki te pule faʼitaliha ʼa Sehova. Neʼe ʼiloʼi lelei e Sesu neʼe tonu ke nofo agatonu ʼo aʼu ki tona matehi e Satana, ke feala ai he fakamoʼoni ʼe matatonu ke pule faʼitaliha te ʼAtua, pea ko te faʼahi ʼaia neʼe fakakikite ʼaki te ʼui ko te “hako” ʼo te fafine, ʼe maumauʼi anai ʼi tona muli vaʼe. (Mateo 16:21; 17:12) Neʼe ina toe faka mafola foki ko te Puleʼaga ʼo te ʼAtua ʼe ko te puleʼaki neʼe fai e Sehova moʼo fakaʼauha ia te ʼāselo talagataʼa ko Satana pea mo toe fakatuʼu ia te tokalelei ʼi te ʼatulaulau kātoa. (Mateo 6:9, 10) Koteā ʼaē neʼe fai e Sesu moʼo fakahoko ia te toe gāue maʼuhiga ʼaia?

“Ko Te Puleʼaga ʼo Te ʼAtua Kua Fakaovi Mai”

6. Neʼe fakahā feafeaʼi e Sesu ko te Puleʼaga ʼe ko te puleʼaki ʼaē kā fakaʼaogaʼi anai e te ʼAtua moʼo “maumauʼi te ʼu gāue ʼa te Tēvolo”?

⁶ ʼI te kamata, neʼe “ ʼalu . . . ia Sesu ki Kalilea, ʼo ina faka mafola ai te logo lelei ʼa te ʼAtua ʼo ʼui māʼana: ‘Ko te temi ʼaē neʼe fakakatofa kua iku, pea ko te puleʼaga ʼo te ʼAtua kua fakaovi mai.’ ” (Maleko 1:14, 15) Koia, neʼe ina ʼui fēnei ai: “ ʼE tonu ke au toe faka mafola te logo lelei ʼo te puleʼaga ʼo te ʼAtua, . . . heʼe ko te tupuʼaga lā ʼaia ʼo toku fekauʼi mai.” (Luka 4:18-21, 43) Neʼe feʼaluʼaki ia Sesu ʼi te fenua kātoa, “ ʼo fai faka mafola pea mo kalagaʼi te logo lelei ʼo te puleʼaga ʼo te ʼAtua.” (Luka 8:1) Neʼe toe fai e Sesu mo te ʼu milakulo—neʼe ina fafaga te toe hahaʼi tokolahi, neʼe ina fakamalu ifo te matagi pea mo te tai, mo faitoʼo te kau mahaki, pea mo fakatuʼuake ia te kau mate. ʼAki te ʼu milakulo ʼaia, neʼe fakahā ai e Sesu ko te ʼAtua ʼe ina lava pulihi ia te ʼu tokakovi fuli pea mo te ʼu mamahi ʼaē neʼe tupu mai te fakafeagai neʼe hoko ʼi Eteni, pea mo “maumauʼi [ai] te ʼu gāue ʼa te Tēvolo.”—1 Soane 3:8.

7. Koteā ʼaē neʼe akoʼi age e Sesu ki tana kau tisipulo ke natou ʼolo ʼo tala, pea neʼe koteā tona ʼu fua?

⁷ Neʼe tānaki e Sesu he ʼu tisipulo agatonu e tokosiʼi pea mo akoʼi nātou ki te gāue ʼaia, ke feala he faka mafola lahi ʼo te logo lelei ʼo te Puleʼaga. ʼUluaki, neʼe ina hinoʼi tana ʼu ʼapositolo e toko 12 pea mo “fekauʼi . . . nātou ke natou ʼolo ʼo faka mafola te puleʼaga ʼo te ʼAtua.” (Luka 9:1, 2) ʼOsi ʼaia, pea neʼe ina fekauʼi te tahi ʼu tisipulo e toko 70 ke natou ʼolo ʼo tala te logo ʼaenī: “Ko te puleʼaga ʼo te ʼAtua kua fakaovi mai kiā koutou.” (Luka 10:1, 8, 9) ʼI te liliu mai ʼa te kau tisipulo ʼaia pea mo fakamatala age kiā Sesu te tali lelei ʼo tanatou faka mafola te logo lelei ʼo te Puleʼaga, neʼe ina ʼui fēnei age kiā nātou: “Neʼe kua au mamata kiā Satana kua ʼosi tō mai te lagi ohagē ko he ʼuhila.”—Luka 10:17, 18.

8. Koteā ʼaē neʼe fakahā lelei e Sesu ʼi tona maʼuli?

⁸ Neʼe gāue kinakina ia Sesu pea neʼe ina fakaʼaogaʼi ia te ʼu faigamālie fuli pē moʼo fagonogono ia te logo lelei ʼo te Puleʼaga. Neʼe mole maʼuli fakafīfīmālie, kae neʼe gāue ʼi te temi fuli pē, ʼi te ʼaho mo te pō. Neʼe ina ʼui fēnei: “ ʼE maʼu te ʼu tafu ʼo te ʼu lenato pea mo te ʼu fātaʼi ʼo te ʼu manulele ʼo te lagi, kae mole he potu ʼo te Foha ʼo te tagata ke ʼuluga ai tona ʼulu.” (Luka 9:58; Maleko 6:31; Soane 4:31-34) Mole faʼa fualoa ʼi muʼa ʼo tana mate, neʼe lototoʼa ia Sesu ʼo ʼui fēnei age kiā Posio Pilato: “Neʼe au tupu ʼuhi ko te potu ʼaenī, pea neʼe au haʼu ki te mālamanei ʼuhi ko te potu ʼaenī: ko te fakamoʼoni ki te moʼoni.” (Soane 18:37) Neʼe fakahā e Sesu ʼi tona maʼuli kātoa neʼe mole gata pē tana gāue ʼi tana ʼu faiakonaki peʼe ʼi tana ʼu fai milakulo, peʼe ko tana maʼuli faka sākilifisio moʼo haofaki te mālamanei, kae neʼe haʼu moʼo faka lakatonuʼi te pule faʼitaliha ʼa Sehova, pea mo fagonogono ke feala ki te ʼAtua ke ina fakaʼaogaʼi ia te Puleʼaga moʼo fakahoko tona finegalo.—Soane 14:6.

“Ko Te Meʼa ʼAia Kua Hoko!”

9. Neʼe lava feafeaʼi te maumauʼi e Satana ia te muli vaʼe ʼo te “hako” ʼo te ʼohoana ʼo te ʼAtua?

⁹ Ko te ʼu gāue fuli ʼaē neʼe fai e Sesu ʼo ʼuhiga mo te Puleʼaga neʼe mole leleiʼia e te Fili ko Satana te Tēvolo. Neʼe faigaʼi tuʼumaʼu pē e Satana ke ina matehi te “hako” ʼo te ʼohoana ʼo te ʼAtua ʼaki tona “hako” ʼaē ʼi te kele, ia te politike pea mo te ʼu lotu. Talu mai te tupu tagata ʼa Sesu ʼo aʼu ki tana mate, neʼe tauʼi tuʼumaʼu aipē ia ia e Satana pea mo tana kau gāue. ʼI te taʼu 33 leva ʼo totatou temi, neʼe kua aʼu mai leva te temi ʼaē ke matehi ai e te Fili te Foha ʼo te tagata, ʼo ina maumauʼi tona muli vaʼe. (Mateo 20:18, 19; Luka 18:31-33) ʼE fakahā lelei mai ʼi te ʼu Evaselio, pe neʼe fakahalaʼi feafeaʼi e Satana ia te hahaʼi, ohagē ko Sutasi Isikaliote pea mo te kau takitaki pelepitelō, mo te kau sekelipa, mo te kau Faliseo pea mo te kau Loma, ke natou tauteaʼi ia Sesu pea mo matehi ia ia ʼi he pou fakamamahi.—Gāue 2:22, 23.

10. Koteā ʼaē neʼe fakahoko tāfito e Sesu ʼaki tona mate ʼi te pou fakamamahi?

¹⁰ Koteā ʼaē ʼe kotou manatuʼi mokā kotou fakakaukauʼi te tautau ʼaē ʼo Sesu ʼi te pou fakamamahi pea mo tana tau tugaki ai? ʼE lagi kotou manatuʼi te sākilifisio faitotogi ʼaē neʼe foaki e Sesu mo he lotolelei maʼa te mālamanei ʼaē ʼe nofo ʼi te agahala. (Mateo 20:28; Soane 15:13) ʼE lagi kotou ofo ki te ʼofa lahi ʼaē neʼe fakahā e Sehova ʼaki ia te sākilifisio ʼaia. (Soane 3:16) ʼE lagi kotou hagē ko te ofisie Loma ʼaē neʼe ina ʼui fēnei: “ ʼE moʼoni ia, ko ia nei neʼe ko te ʼAlo ʼo te ʼAtua.” (Mateo 27:54) Ko te ʼu ʼaluʼaga fuli ʼaia neʼe ko he ʼu tali lelei ki te fakafifihi ʼaē neʼe fai. Tahi ʼaē meʼa, kotou manatuʼi te ʼu palalau fakaʼosi ʼa Sesu ʼi te temi ʼaē neʼe tautau ai ʼi te pou fakamamahi, neʼe ina ʼui fēnei: “Ko te meʼa ʼaia kua hoko!” (Soane 19:30) Neʼe koteā ʼaē neʼe kua fakahoko? Neʼe lahi te ʼu meʼa ʼaē neʼe hoko ʼaki te maʼuli pea mo te mate ʼo Sesu, kae ko te faʼahi tāfito ʼaē neʼe lava lelei ʼi tana haʼu ki te kele, ʼe ko te fakatokatoka ʼo te fakafifihi ʼaē ʼo te pule faʼitaliha ʼa Sehova. Pea neʼe kua fakakikite ko te “hako” ʼe fakamamahiʼi ʼaupitō anai e Satana, ke feala ai he fakamaʼa ʼo te huafa ʼo Sehova mai te ʼu tukugākovi fuli ʼaē neʼe fai ki ai. (Isaia 53:3-7) Neʼe faigataʼa ʼaupitō te ʼu ʼaluʼaga fuli ʼaia, kae neʼe fakahoko kātoa e Sesu ia te ʼu faʼahi fuli ʼaia. ʼI toe gāue leva ʼaē neʼe fakahoko e Sesu!

11. Koteā ʼaē kā fai anai e Sesu moʼo fakahoko kātoa ia te lea faka polofetā ʼaē neʼe fai ʼi Eteni?

¹¹ Neʼe fakatuʼuake ia Sesu mai te mate ʼuhi he neʼe agatonu, pea neʼe liliu ia ko “he laumālie ʼe ina foaki te maʼuli.” (1 Kolonito 15:45; 1 Petelo 3:18) Neʼe fēnei te fakapapau ʼa Sehova ki tona ʼAlo ʼaē kua faka kolōliaʼi: “Heka ʼi toku toʼomataʼu ʼo kaku ki taku tuku tou ʼu fili ke hagē ko he tuʼuʼaga ki ʼou vaʼe.” (Pesalemo 110:1) Ko te “ ʼu fili” ʼe ko Satana te agakovi lahi, pea mo nātou fuli ʼaē ʼe natou faʼufaʼu tona “hako.” ʼE fakaʼauha anai e Sesu Kilisito te kau fakafeagai fuli ʼaia ʼaē ʼi te lagi mo te kele, heʼe ko ia te Hau ʼo te Puleʼaga Faka Mēsia ʼo Sehova. (Fakahā 12:7-9; 19:11-16; 20:1-3, 10) Pea ʼe hoko kātoa ai leva ia te lea faka polofetā ʼaē iā Senesi 3:15, ʼo fēia mo te faikole ʼaē neʼe akoʼi age e Sesu ki tana kau tisipulo, ʼaē ʼe ʼui fēnei: “Ke hoko mai tou puleʼaga. Ke fai tou finegalo ʼi te kele, ohagē ko selō.”—Mateo 6:10; Filipe 2:8-11.

He Faʼifaʼitaki Ke Kotou Mulimuli Lelei Kiai

12, 13. (a) Koteā te tali kua tou sio kiai iā ʼaho nei ʼi te faka mafola ʼaē ʼo te logo lelei ʼo te Puleʼaga? (b) Koteā ʼaē ʼe tonu ke tou tokagaʼi ʼi tatatou muliʼi ia te ʼu tapugā vaʼe ʼo Kilisito?

¹² Iā ʼaho nei, kua faka mafola ia te logo lelei ʼo te Puleʼaga ʼi te ʼu fenua fuli, ohagē ko tona fakakikite ʼaē e Sesu. (Mateo 24:14) ʼAki te fai faka mafola ʼaia, kua foaki e te ʼu toko lauʼi miliona hahaʼi tonatou maʼuli ki te ʼAtua. ʼE natou fiafia ʼo ʼuhiga mo te ʼu tapuakina ʼaē kā foaki anai e te Puleʼaga. ʼE natou talitali fakafiafia ki te maʼuli heʼegata ʼaē ʼi he palatiso ʼi te kele, ʼe maʼu ai te tokalelei pea mo te fīmālie, pea ʼe natou fiafia ʼi te tala ki te hahaʼi ia tanatou ʼamanaki ʼaia. (Pesalemo 37:11; 2 Petelo 3:13) ʼE kotou kau koa ʼi te kau fai faka mafola ʼaia ʼo te Puleʼaga? Kapau koia, pea ʼe fai atu he fakavikiviki kiā koutou. Kae ʼe ʼi ai te tahi faʼahi, ʼe tonu ke tou vakaʼi takitokotahi.

¹³ Neʼe tohi fēnei e te ʼapositolo ko Petelo: “Neʼe mamahi foki ia Kilisito maʼa koutou, ʼo ina tuku atu kiā koutou he faʼifaʼitaki ke kotou mulimuli lelei ki tona ʼu tapugā vaʼe.” (1 Petelo 2:21) Kotou fakatokagaʼi ʼi te ʼaluʼaga ʼaenī, neʼe mole talanoa ia Petelo ki te faʼafai ʼa Sesu ʼi te fai faka mafola peʼe ʼi te faiakonaki, kae neʼe talanoa ia ki tona ʼu mamahi. Neʼe sio mata ia Petelo ki te ʼu mamahi ʼaia ʼo Sesu, koia neʼe mahino lelei ai ki te tali leleiʼi ʼaē e Sesu ke fakamamahiʼi moʼo fakahā ia tana fakalogo ki te pule faʼitaliha ʼa Sehova pea mo fakahā te gutuloi ʼaē ʼa Satana. Ko te ʼu ʼaluʼaga fea ʼaē ʼe feala ai ke tou muliʼi te ʼu tapugā vaʼe ʼo Sesu? ʼE tonu ke tou fai ia te fehuʼi ʼaenī kiā tātou takitokotahi: ‘ ʼE feala koa haku tali mamahi moʼo lagolago pea mo faka maʼuhigaʼi te pule faʼitaliha ʼa Sehova? ʼE au fakahā koa ʼi toku maʼuli pea mo taku fakahoko ʼo taku minisitelio, ʼe au fakamuʼamuʼa tuʼumaʼu taku faka lakatonuʼi te pule faʼitaliha ʼa Sehova?’—Kolose 3:17.

14, 15. (a) Koteā ʼaē neʼe fai e Sesu ʼo ʼuhiga mo te ʼu tokoni hala ʼaē neʼe fai age kiā ia, pea koteā tona tupuʼaga? (b) Ko te fakafifihi fea ʼaē ʼe tonu ke tou manatuʼi tuʼumaʼu? (Talanoa ki te fakamatala ʼaē ʼe ʼātakai “Tou Lagolago Kiā Sehova.”)

¹⁴ ʼI te ʼaho fuli, ʼe tou tau mo te ʼu ʼahiʼahi pea mo te ʼu tonu ke tou fai, ʼe lagi lalahi peʼe veliveli. Koteā ʼaē kā tokoni mai kiā tātou ʼo ʼuhiga mo te tali ʼaē kā tou fai? Ohagē lā, kā hoko mai he fakahala ke tou fai he meʼa ʼe feala ai ke tou maumauʼi tatatou agatonu faka Kilisitiano, koteā ʼe tou fai? ʼI te temi ʼaē neʼe ʼui age e Petelo kiā Sesu ke agalelei kiā te ia totonu, koteā te tali ʼa Sesu? Neʼe ina tali fēnei age: “Haʼu ʼi ʼoku tuʼa, Satana! . . . [ʼE] mole ke manatu ʼaki te ʼu manatu ʼa te ʼAtua, kae ʼaki te ʼu manatu ʼa te tagata.” (Mateo 16:21-23) ʼE tou tali anai koa ohagē ko Sesu, mo kapau ʼe tuku mai he ʼu faigamālie kiā tātou ʼi te faʼahi faka paʼaga peʼe ko he gāue ʼe hikihiki ai totatou totogi, ʼo tuʼutāmaki ai totatou maʼuli fakalaumālie? ʼI te ʼiloʼi ʼaē e Sesu ko nātou ʼaē neʼe sio ki tana ʼu milakulo “[neʼe] natou ʼamanaki ʼomai ʼo puke ia ia ke natou fakanofo ko he hau,” neʼe foimo mavae mai iā nātou.—Soane 6:15.

¹⁵ He koʼē neʼe fakafeagai mālohi ia Sesu ki te ʼu faigamālie ʼaia pea mo ʼihi age faigamālie? He neʼe mahino lelei kiā ia, neʼe ʼi ai te faʼahi neʼe maʼuhiga age ʼi tona maʼuli fīmālie. Neʼe ina fia fakahoko tāfito ia te finegalo ʼo tana Tamai pea mo faka lakatonuʼi te pule faʼitaliha ʼa Sehova. (Mateo 26:50-54) Koia, kapau ʼe mole tou hagē ko Sesu, ʼo tou manatuʼi tuʼumaʼu ia te fakafifihi ʼaē neʼe lagaʼi ʼi Eteni, pea ʼe feala pē ʼi te temi fuli ke tou lakahala ai peʼe ke mole tou fai te meʼa ʼaē ʼe lelei. Koteā tona tupuʼaga? Koteʼuhi ʼe feala pē hatatou tō ki te ʼu kākā ʼa Satana, heʼe faiva ia ʼi te fakaneke ʼo tātou ke tou leleiʼia te ʼu meʼa ʼaē ʼe kovi, ohagē ko tana fakahalaʼi ʼaē ia Eva.—2 Kolonito 11:14; 1 Timoteo 2:14.

16. Koteā ʼaē ʼe tonu ke tou tōkakaga tāfito kiai ke feala hatatou tokoni ki te hahaʼi?

¹⁶ ʼI tatatou minisitelio, ʼe tou fai palalau mo te hahaʼi ki tonatou ʼu tuʼania pea mo tou fakahā age te ʼu tokoni ʼaē ʼe tou maʼu ʼi te Tohi-Tapu ʼo ʼuhiga mo te ʼu faʼahi ʼaia. ʼE ko he faʼahiga fai ʼe lelei moʼo lagaʼi ia tanatou fia ako ia te Tohi-Tapu. Kae ʼe mole feʼauga pē anai ʼaki tatatou tokoni ki te hahaʼi ke natou ʼiloʼi te manatu ʼa te Tohi-Tapu peʼe ko tanatou ʼiloʼi ia te ʼu tapuakina ʼaē kā tou maʼu anai mai te Puleʼaga ʼo te ʼAtua. ʼE tonu foki ke tou toe tokoni kiā nātou ke natou mahino ki te fakafifihi ʼaē neʼe lagaʼi. ʼE natou tali koa ke natou liliu ko ni ʼu Kilisitiano moʼoni pea mo ʼamo tonatou “pou fakamamahi” pea mo tali mamahi ʼuhi ko te Puleʼaga? (Maleko 8:34) ʼE natou fia kau koa kiā nātou ʼaē ʼe natou faka lakatonuʼi te pule faʼitaliha ʼa Sehova pea mo natou fakamoʼoni ai ko Satana ʼe gutuloi pea mo fasituʼu? (Tāʼaga Lea 27:11) ʼE ko he pilivilēsio hatatou haofaki iā tātou totonu pea mo te hahaʼi.—1 Timoteo 4:16.

Te Temi ʼAē Kā Liliu Ai Te ʼAtua Ko “Meʼa Fuli Ki Te Hahaʼi Fuapē”

17, 18. Ko te temi faka kolōlia fea ʼe feala ke tou fakaʼamu kiai mo kapau ʼe tou fakahā ʼe tou lagolago ki te pule faʼitaliha ʼa Sehova?

¹⁷ Kapau ʼi te temi nei ʼe tou faiga mālohi ke tou fakahā ʼi tatatou aga pea mo tatatou minisitelio ʼe tou lagolago ki te pule faʼitaliha ʼa Sehova, pea ʼe feala anai ke tou fakaʼamu ki te temi ʼaē kā “fakatoʼo [ai] anai [e Sesu Kilisito] te puleʼaga ki tona ʼAtua pea mo Tamai.” Ko ʼāfea ʼaē kā hoko ai ia te faʼahi ʼaia? ʼE fakamahino fēnei e te ʼapositolo ko Paulo: “ ʼI tana ʼosi maumauʼi anai te ʼu puleʼaga fuli pea mo te pule fuli pea mo te mālohi fuli. Heʼe tonu ke hau ʼo aʼu ki te temi ʼaē kā tuku ai e te ʼAtua tona ʼu fili fuli ki ʼona lalo vaʼe. . . . Pea ko te ʼAlo ʼe toe fakalogo anai mo ia kiā Ia ʼaē neʼe ina tuku iā meʼa fuli kiā te ia, ke ʼafio kātoa te ʼAtua ia meʼa fuli ki te hahaʼi fuapē.”—1 Kolonito 15:24, 25, 28.

¹⁸ Ko te temi ʼaē kā liliu ai te ʼAtua ko “meʼa fuli ki te hahaʼi fuapē”—ʼe ko he temi faka kolōlia anai! Kua fakahoko leva e te Puleʼaga ia tana gāue. Kua fakaʼauha fuli anai ia te ʼu fili ʼo te pule faʼitaliha ʼa Sehova. Kua toe maʼu ia te tokalelei pea mo te maʼuli fīmālie ʼi te ʼatulaulau kātoa. ʼI te ʼu palalau ʼa te tagata fai pesalemo, ʼe hiva fēnei anai ia te ʼu fakatupu fuli: “Foaki kiā Sehova ia te kolōlia ʼaē ʼe pipiki ki tona huafa. . . . Fakahā ʼi te lotolotoiga ʼo te ʼu puleʼaga: ‘Kua liliu ia Sehova ko te hau.’ ”—Pesalemo 96:8, 10.

ʼE Feala Koa Hakotou Tali?

• Neʼe fakahā feafeaʼi e Sesu ia te maʼuhiga tāfito ʼo te pule faʼitaliha ʼa te ʼAtua?

• Koteā ʼaē neʼe fakahoko tāfito e Sesu ʼaki tana minisitelio pea mo tona mate?

• Ko te ʼu ʼaluʼaga fea ʼaē ʼe feala ai ke tou muliʼi ia te faʼifaʼitaki ʼa Sesu moʼo lagolago ki te pule faʼitaliha ʼa Sehova?

[Talanoa ʼo te pasina 11]

TOU LAGOLAGO KIĀ SEHOVA

Ohagē ko te ʼu tehina e tokolahi ʼi Kolea pea mo te ʼu potu fuli, kā tau te kau Fakamoʼoni mo ni ʼu faigataʼaʼia, pea ʼe lelei ke natou manatuʼi te tupuʼaga tāfito ʼo te hoko ʼo te ʼu fihifihia ʼaia kiā nātou.

Neʼe ʼui e te Fakamoʼoni ʼa Sehova neʼe pilisoniʼi lolotoga te temi pule ʼo te Lusia ʼāfea: “Ko te faʼahi ʼaē neʼe tokoni mai kiā mātou ke matou kātakiʼi, neʼe ko tamatou mahino lelei ki te fakafifihi ʼaē neʼe lagaʼi ʼi te ʼōloto ʼo Eteni—te fakafihiʼi ʼo te pule ʼa te ʼAtua. . . . Neʼe matou ʼiloʼi neʼe matou maʼu ia te faigamālie ke matou lagolago ai ki te pule ʼa Sehova. . . . Neʼe tupu ai tamatou mālolohi pea mo tamatou fia nonofo agatonu.”

Neʼe fakamahino mai e te tahi Fakamoʼoni peʼe koteā ʼaē neʼe tokoni kiā ia pea mo tona ʼu tehina ʼi te lotoʼā fakamamahi, ʼo ina ʼui fēnei: “Neʼe tokoni mai ia Sehova kiā mātou. Logolā te ʼu ʼaluʼaga faigataʼa ʼaē neʼe tau mo mātou, kae neʼe matou nonofo ʼalaʼala ʼi te faʼahi fakalaumālie. Neʼe matou fefakalotomālohiʼaki, ʼo matou manatuʼi neʼe tonu ke matou lagolago kiā Sehova ʼo ʼuhiga mo te fakafifihi ʼo tona pule faʼitaliha ʼi te ʼatulaulau.”

[Paki ʼo te pasina 8]

Neʼe faka lakatonuʼi feafeaʼi e Sesu ia te pule faʼitaliha ʼa Sehova ʼi te temi ʼaē neʼe ʼahiʼahiʼi ai ia ia e Satana?

[Paki ʼo te pasina 10]

Koteā ʼaē neʼe fakahoko ʼaki te mate ʼo Sesu?