Nan̈ino ma Vavaka io Tokony Hatao Aminy An̈arany Jesosy?

JESOSY natetiky nampianatra pianatranany aby io hivavaka. Tamy zen̈y iro pitondra fivavahan̈a jiosy aby io tia nivavaka tamy “zorony lalan̈a.” Fotony nan̈ino? Fotony iro “tiho hita” ndreky tihahazo dera baka taminolo. Nan̈ano vavaka nidariatra iro, sady volan̈a mitovy nampodimpodindro. Sambarandro hitandrin̈esany Zan̈ahary baka iro koa man̈ano karaha zen̈y. (Matio 6:5-8) Nambarany Jesosy iro fa tsisy dikany amy Zan̈ahary foeky vavakandro zen̈y. Fa nanjary nazava tamindro olo tsara fô tamy zen̈y ino raha tsy tokony hatao izikoa fa mivavaka. Fa nisy raha hafa koa nampianariny Jesosy iro.

Nampianariny Jesosy iro fa tokony ho hita amy vavaka ataontsika fa irintsika han̈amasin̈ana an̈arany Zan̈ahary ndreky haviany Fanjakan̈anany, avio han̈atantirahan̈a sitraponany. Nivolan̈a koa izy fa atsika mety mivavaka momba raha ilaintsika manokana. (Matio 6:9-13; Lioka 11:2-4) Izy nan̈ano fan̈oharan̈a, han̈aboahan̈a fa mila tsy voly mangataka, avio mila finoan̈a ndreky fanetrenten̈a atsika, izikoa fa mivavaka. (Lioka 11:5-13; 18:1-14) Tsy vitany nivolan̈a fo izy fa mbala nan̈amia modely koa tamy vavaka.​—Matio 14:23; Marka 1:35.

Toromariky nazondro pianatra aby io ten̈a nan̈ampy iro nankatsara vavaka nataondro. Fa taminy alin̈y farany niarahany Jesosy tamy pianatranany aby io izy vo ten̈a nan̈amia iro leson maventy momba vavaka.

‘Fivoandraha maventy’

Taminy alin̈y io Jesosy niasa nankahery iro apostolinany tsy nivadiky aby io fo. Ho izy: “Zaho lalan̈a, fahamarin̈ana ndreky fiain̈ana. Tsisy olo mahavita man̈aton̈o Baba andan̈itry an̈y, izikoa tsy mandalo aminaka.” Avio izy nan̈amia toky iro karaha ty: “Hataoko aby zay raha angatahinaro aminy an̈arako, amy zen̈y anaro han̈amia voninahitry Baba andan̈itry an̈y.” Farany amy zay izy nivolan̈a karaha ty: “Firaka izioty anaro mbala tsiary nisy raha nangatahinaro taminy an̈aranaka. Ke mangataha fa anaro hahazo, amy zen̈y feno tsarabe haravoan̈anaro.”​—Jaona 14:6, 13, 14; 16:24.

Ten̈a raha maventy volan̈a Jesosy io. Nisy boky araiky nivolan̈a fa nampisy fivoandraha maventy tamy fomba fivavahan̈a iro volan̈a aby io. Jesosy taminio tsy nivolan̈a fa mila avantan̈a aminany vavaka ataondro, fa izy nampianatra fomba vaovao ifandraisan̈a amy Zan̈ahary.

Jehovah tsiary ndraiky tsy nitandren̈y vavaka nataony panomponany aby taloha tan̈y. (1 Samoela 1:9-19; Salamo 65:2) Fa izy koa fa nan̈ano fifan̈ikian̈a tamy firenenany Israely, tsy maintsy nan̈eky olo araiky izikoa tiany tandrin̈esany Zan̈ahary fa Israelita vahoaka nifidiny Zan̈ahary. Fa izikoa ndraiky efa vita tempoliny Solomona, tsy maintsy man̈eky olo araiky fa tao tany nifidiny Zan̈ahary hanoloran̈a fan̈atitry. (Deoteronomia 9:29; 2 Tantara 6:32, 33) Fa fomba fivavahan̈a io tsy nahadin̈y ela. Apostoly Paoly nivolan̈a fa Lalàn̈a namian̈a Israelita aby io ndreky fan̈atitry natao tamy tempoly tao in̈y ‘tsy ten̈a izy fa aloko raha mbala ho avy.’ (Hebreo 10:1, 2) Aloko io tsy maintsy soloan̈a amy ten̈a izy. (Kolosianina 2:17) Ke nanomboko tamy taon̈o 33, efa tsy niankin̈y tamy fan̈arahan̈a Lalàn̈any Mosesy fifandraisanolo araiky tamy Zan̈ahary fa miankin̈y amy fan̈arahan̈a raha volan̈iny Kristy Jesosy, araiky “ten̈a izy” io.​—Jaona 15:14-16; Galatianina 3:24, 25.

An̈aran̈a “an̈abo mandilatra an̈aran̈a jiaby”

Jesosy nan̈apetraka fototro matanjaka momba fomba tokony hifandraisan̈a amy Jehovah. Jesosy nivolan̈a fa izy kamaradintsika sady pan̈elan̈elan̈a atsika amy Zan̈ahary, ke zen̈y mahavy vavaka ataontsika ho ren̈iny fa Jehovah ndreky valiany. Akory nahavy Jesosy nahavita man̈ano zen̈y?

Atsika jiaby io baka nandova fahotan̈a aby. Ke atsika tsy mendriky hifandray tsarabe amy Zan̈ahary zen̈y. Avio atsika ndray man̈ano fan̈atitry ndreky fanompoan̈a, raha zen̈y tsy mahavita man̈adio atsika. (Romanina 3:20, 24; Hebreo 1:3, 4) Fa Jesosy ndraiky nan̈amia ain̈inany lavorary, baka han̈adosoan̈a lan̈iany olo mendriky avotan̈a, ho afaka amy fahotan̈a io. (Romanina 5:12, 18, 19) Ke izikoa tiantsika hadoso amy fahotan̈a io, atsika tsy maintsy man̈aboaka finoan̈a soron̈o nataony Jesosy ndreky mivavaka aminy an̈arany Jesosy. Lera atsika man̈ano karaha zen̈y fo atsika vo hadio amy Jehovah, ndreky ‘hasaky’ hikoran̈a aminany.​—Efesianina 3:11, 12.

Atsika koa fa mivavaka aminy an̈arany Jesosy, haboakantsika amy zen̈y fa atsika mino andraikitrinany amy fan̈atantirahan̈a fikasan̈any Zan̈ahary. Izikoa atao konty, misy telo farany vitsy andraikitrinany zen̈y. 1) Izy “Zanaka Ondrikondrikiny Zan̈ahary”, ke soron̈o nataony in̈y azahoantsika familankeloko. 2) Izy nivilominy Jehovah, baka io man̈ano asany “pisoron̈obe”, amy zen̈y atsika hahazo hatsaran̈a baka amy vidipan̈avotan̈a. 3) Izy zaraiky fo “lalan̈a” mampifandray atsika amy Jehovah.​—Jaona 1:29; 14:6; Hebreo 4:14, 15.

Man̈amia voninahitry Jesosy atsika koa mivavaka aminy alalany. Izy mendriky zen̈y fotony sitrapony Jehovah izikoa ‘aminy an̈arany Jesosy handohalifany lohaliky jiaby ndreky han̈ikiany lela jiaby fa Jesosy Kristy io Tompo, ho voninahitriny Zan̈ahary Babantsika io’. (Filipianina 2:10, 11) Fa mbala bebenizen̈y, atsika koa mivavaka aminy alalany Jesosy, man̈amia voninahitry Jehovah nan̈amia Zanany hazahoantsika hatsaran̈a io atsika.​—Jaona 3:16.

Maro an̈aran̈a namian̈a Jesosy amy Baiboly ao, baka hazava amintsika tsarabe fa maventy anjara asanany. Iro an̈aran̈a aby io han̈ampy atsika hahatsapa hatsaran̈a azontsika, baka amy raha nataony Jesosy taloha, izioty, ndreky aminy amaray an̈y. (Zahava “Anjara Asa Maventy Tanany Jesosy”) Namian̈a ‘an̈aran̈a an̈abon̈abony an̈aran̈a jiaby’ ankitin̈y Jesosy.a Efa namian̈a izy fahifan̈a jiaby andan̈itry an̈y ndreky ambony tany eto.​—Filipianina 2:9; Matio 28:18.

Tsy tokony ho fahazaran̈a fo

Izikoa tiantsika ho ren̈iny Jehovah vavaka ataontsika, atsika mila mivavaka aminy an̈arany Jesosy marin̈y. (Jaona 14:13, 14) Fa nan̈ino ma tsy tokony hataontsika fahazaran̈a karaha io fo fivolan̈ana “aminy an̈arany Jesosy” zen̈y?

Ohatra, olo koa fa manoratra taratasy aminy olo manampahifan̈a, matetiky karaha ty farany raha soratindro ao: “Raiso tompoko ny haja sy voninahitra atolotro anao.” Fahitanao izy, baka amy fonolo manoratra io ma volan̈a zen̈y sa raha efa mahazatra izy fo? Tsy karaha zen̈y fampiasan̈a “aminy an̈arany Jesosy” io. Koran̈iny Baiboly marin̈y fa atsika tsy tokony ho voly hivavaka. Fa kanefa tokony hataontsika amy fontsika jiaby vavaka io fa tsy atao fahazaran̈a fo.​—1 Tesalonianina 5:17; Salamo 119:145.

Ke izikoa tsy tianao hanjary fahazaran̈a fo fampiasanao “aminy an̈arany Jesosy” io, ino raha tokony hataonao? Aleva onon̈o iro toetry maro tsarany Jesosy aby io. Aleva onon̈o koa raha efa nataony ndreky mbala hataony hahatsara anao. Anao koa fa mivavaka, tokony han̈ano mersy ndreky hidera Jehovah anao, nohony izy nampiasa Zanany io tamy fomba mahagaga. Anao koa man̈ano ambaka zen̈y, hahaihatoky fampan̈antinan̈any Jesosy ty fo anao: “Na ino na ino raha angatahinaro amy Baba andan̈itry an̈y, hamiany anaro fo zen̈y baka aminy an̈aranaka.”​—Jaona 16:23.