Lama

Misapwilo ya Kulonda mu Mwingilo wa Budimi

Mwa Kwingidijija Dino Dyani dya Ntentekelo

Misapwilo mivule mu ino ke miletwe kala mu manimelo a kunyuma a Mwingilo Wetu wa Bulopwe. Tompa kwingidija misapwilo mivule mu mwingilo obe wa busapudi, usa kwimwena. Lama dino dyani dya ntentekelo mwanda wa kunyemena’ko shi kowiteakanya mwa kutambila mu mwingilo.

Ubwanya kufikija muntu ku kusangela Kinenwa kya Leza shi utenga pa mwanda mwine wakimba. Mwipangule kipangujo kishilakane, kupwa, mutangile kilondololwa kīpi mu Bible. Tompa bidi kulonda ino misapwilo:

“Poelanga milafwe ku būmi bobe bwa kumeso, lelo ukulupile amba bukekala buyampe’ni, kwayukile mobukekadila? [Muleke akulondolole.] Bible wānene kala amba bino bimyanda bidyambakane byotumona dyalelo bivutakanya ñeni bikekala’ko, wālombola ne mobikapwila.”​—2 Tem. 3:1, 2, 5; Nk. 2:21, 22.

“Mu ino yetu myaka mudi makambakano mavule atala myanda ya bundapi. Lelo uyukile amba Leza wālaile kupwija lonso misongo yotwikonda nayo ino?”​—Is. 33:24; Kus. 21: 3, 4.

“Lelo uyukile amba Bible i munene amba kukekalanga umbikalo umo kete pano pa ntanda ponso?”​—Dan. 2:44; Mat. 6:9, 10.

“Molangila ngikadilo yadi ya kwikala namani shi kwadi amba Yesu Kidishitu ye uludika ino ntanda?”​—Mit. 72:7, 8.

“Bantu bavule bamweshibwanga malwa mwanda’po’tu i bana-balume nansha bana-bakaji, mwanda wa mutōtelo wabo nansha lukoba lwabo. Molangila Leza umwene namani mfwatakani ya uno muswelo?”​—Bil. 10:34, 35.

“Tuyukile amba Yesu Kidishitu wālongele bingelengele bivule mu myaka yaādi pano panshi. Shi wadi amba ukibwanya kumunena alonge kingelengele kikwabo, lelo kyadi kya kwikala kingelengele’ka?”​—Mit. 72:12-14, 16.

“Dyalelo bantu bavule ke bapungile kwivwanaivwana myanda. Basakanga kwivwana mwa kwiipwijija. Ino i kwepi kotukokeja kutana muswelo wa kupwija myanda yetu?”​—2 Tem. 3:16, 17.

“Lelo ukokeja kuntelela Bulopwe bwine bolombanga mu Milombelo ya Tata Wetu?”​—Kus. 11:15.

Binenwa bya Kushilula Nabyo Mīsambo

Bipangujo bidi kunshi’ku, bya myanda iselelwe mu dibuku Comment raisonner, bilombola mapaje patanwa malondololo:

Lelo bantu bayampe bonso bendanga mūlu? (61)

Lelo muntu unenwe enka kwenda mūlu penepa kaikala na būmi bwa nsangaji? (62)

Lelo kudi buluji bwendele’mo bwa kukulupidila mudi Leza? (106)

Lelo Leza utele binebine mutyima ku bintu bitufikila batwe bantu? (107)

Le Leza i muntu binebine? (108)

Mwanda waka i kipite buya kuyuka dijina dya Leza ne kwiditela? (200)

Lelo bine Yesu Kidishitu i Leza? (205)

I bika bibwanya kulonga ba mulume ne mukaji balumbulule busongi bwabo? (229)

Mwanda waka kudi bibi bivule namino? (237)

Le i ani ubikele ino ntanda​—I Leza’ni, i Satana? (250)

Mwanda waka tununupa ne kufwa? (253)

Le bafwe badi mu ngikadilo’ka? (255)

Lelo mitōtelo yonso itabijibwe na Leza? (310)

Le tukayuka namani amba ou o mutōtelo wabine? (316)

I bika bikalonga Bulopwe bwa Leza? (336)

Lelo Satana udi na lupusa lukatampe pa ino ntanda? (368)

Mwanda waka Leza ulekele’ko masusu? (375)

Būmi bwa muntu budi na kitungo’ka? (434)

Madingi a Mwa Kupānina Mukanda Kisaka Leza

“Kunena na bubine nobe uyukile amba bavule betabije mudi Leza. Kadi bonso bamwitabije bayukile amba Leza usakanga kintu kampanda kotudi. Ino bantu bonso kebanenangapo kintu kimo pa uno mwanda, Lelo i kika kisaka Leza kotudi?” Mulombole mukanda Kisaka Leza, pūtula pa kifundwa 1, ne kwisambila’po.

“Mwanda wa bikambija bivule byatādila kisaka dyalelo, le kweipangwile kasha i lufungulo’ka lukokeja kuleta būmi bwa nsangaji mu kisaka?” Muleke akulondolole, kupwa muyukije amba Leza i mulombole patōka mu Bible lufungulo lwabinebine lwa būmi bwa nsangaji mu kisaka. Tanga Isaya 48:17. Kupwa pūtula mukanda Kisaka Leza pa kifundwa 8, kokela milangwe pa bisonekwa bimobimo bya mu Bible biletelwe bileta madingi afwaninwe kulondwa na umo ne umo wa mu kisaka. Tanga mulongo wa bipangujo bipangwilwe ku ngalwilo kwa kifundwa. Mwipangule shi usakile kutanga malondololo.

“Uno mukanda i bwifundi bwimanine pa mfundijo ya kyalwilo ya Bible. Pa paje ne paje ukatana’po malondololo a bipangujo biipangulanga bantu bavule mu bula bwa tutwa twa myaka. Kifwa: Lelo Leza udi na mpango’ka itala ino ntanda?” Pūtula kifundwa 5, tanga bipangujo bidi ku ngalwilo. Mwipangule i kyepi kyamusangaja nakampata, kupwa tanga musāngo nansha misāngo ikwatañene nakyo, ne mavese oimanine’po. Mushintulwile amba nandi ukokeja kutana malondololo mayampe ku bipangujo bikwabo mu muswelo upēla. Mulaye kwiya kubandaula nandi kipangujo kikwabo.

“Molangila bupolapola bwavula ku masomo’bu i bika byebulengeja? Le i bambutwile batunya kufundija babo bana’ni, nansha i kintu kikwabo kyebulengeja, kifwa lupusa lubi lwa Dyabola?” Muleke akulondolole. Shi wanena’mba i lupusa lubi lwa Dyabola, mutangile Kusokwelwa 12:​9, 12. Lombola patōka mwingilo wingila Dyabola wa kuleta tuvutakanya mu ino ntanda. Kupwa pūtula mukanda Kisaka Leza pa kifundwa 4, mwipangule shi nandi usakanga kuyuka kwātambile Dyabola. Endelela na kutanga ne kwisambila pa misāngo ibidi imbajinji. Ino shi wanena’mba i “bambutwile bo batunya kufundija babo bana” o mwanda ku masomo kubayula bupolapola, tanga 2 Temote 3:​1-3, kupwa tela tuyukeno tulengeja kwikale bino bintu bibi. Ebiya pūtula mukanda Kisaka Leza pa kifundwa 8, tanga musāngo 5, endelela na mīsambo.

“Molangila, i kyendele’mo kukulupila amba Umpangi ubwanya kwitupa buyuki bwitukwasha kulumbulula būmi bwa kisaka?” Shi wapu kulondolola, mulombole mukanda Kisaka Leza. Pūtula pa kifundwa 8 ne kushintulula amba misoñanya idi’mo i milupulwe mu Bible, kadi itala umo ne umo wa mu kisaka. Mulombole muswelo wa kwingidija uno mukanda, pamo ne Bible, mwanda wa amwene’mo kamweno kakatampe mpata.

“Bikambija byotutana mu būmi bwa dyalelo byo byavula namino, ulanga milombelo ikokeja’tu kulonga kintu? [Muleke akulondolole.] Bantu bavule banenanga amba milombelo ikomejanga mityima yabo. [Tanga Fidipai 4:6, 7.] Nansha nankyo, muntu ukokeja kumona amba milombelo yandi keilondololwangapo. [Pūtula mukanda Kisaka Leza pa kifundwa 7.] Uno mukanda ushintulula muswelo ukokeja kwitukwasha milombelo byabinebine.”

“Twisambanga na balondakani netu pa buluji bwikadile’ko bipwilo bivulevule pano pa ntanda kadi bishileshile. Ino Bible’ko umo yenka. Molangila, mwanda waka kudi kavutakanya ka mitōtelo uno muswelo? [Muleke akulondolole. Pūtula mukanda Kisaka Leza pa kifundwa 13, kupwa tanga bipangujo bya ñanjilo.] Usa kutana malondololo malumbuluke a bino bipangujo shi utange kino kifundwa.”

Shi ubapu kupa muntu dipepala Kiteba kya Mulami nansha Réveillez-vous !, munene shi ukokeja kumutangila musāngo umo mwīpi. Shi waitabija, pūtula mukanda Kisaka Leza pa kifundwa 5. Mulombole bipangujo bidi ku ngalwilo kwa kifundwa, ebiya munene atentekele malondololo a kipangujo kibajinji potanga musāngo wa ñanjilo. Shi ubapu kutanga musāngo, mwipangule kipangujo, kupwa teja malondololo aleta. Mupe mukanda, shi waitabija’o, mulaye amba usa kwiya kumupempula mwa kwiila kwivwana malondololo a bipangujo bibidi byashala’ko.

Madingi a Mwa Kupānina Dibuku Buyuki

Shilula kunena, koku ukwete Bible ku makasa, amba: “Twendanga twisambila pa kisonekwa kimo na bonso botwitana nabo mu kipito kyenu dyalelo. Kinena amba . . . ” Tanga Yoano 17:3, ebiya umwipangule amba: “Ubamone bintu byobetulaya shi twikale na buyuki bufwaninwe? [Muleke akulondolole.] I kwepi kukokeja kutana muntu buyuki bwa uno muswelo?” Shi wapu kukulondolola mulombole dibuku Buyuki, kupwa unene’mba: “Dino dibuku dipānanga buyuki butwala ku būmi bwa nyeke. Dipānanga’bo na kulondolola bipangujo biipangulanga bantu pangala pa Bible.” Mulombole kifunka, kupwa umwipangule shi nandi kadi mwiipangule bipangujo pa kishinte kampanda pa bitelelwe’po.

“Lelo kodi mwiipangule shi Leza utele mutyima ku ino mboloji ne ano masusu otwikonda nao? [Muleke akulondolole.] Bible witupanga kikulupiji amba Leza witusenswe ne ukokeja kwitukwasha mu bitatyi bikomokomo.” Tangai myanda idi mu Mitōto 72:12-17. Pūtula dibuku Buyuki pa shapita 8, umulombole amba dino dibuku dilondololanga kipangujo kiipangulanga bantu bavule dyalelo: Mwanda waka Leza ukilekele masusu? Shi bibwanika, mwisambilei pa milangwe imanine pa Bisonekwa idi mu musāngo 3-5, nansha kukesambila’po mu kujokela’mo kupya.

“Bavule motudi bafwilwanga baswe babo. Lelo kasha kweipangwile shi tukemona nabo dikwabo? [Muleke akulondolole.] Yesu wālombwele amba bakena betu bakanyongololwa mu lufu. [Tanga Yoano 11:​11, 25, 44.] Nansha shi uno mwanda wāpityile myaka tutwa kunyuma, inoko ulombola byobya bilaile Leza amba byo byaketulongela.” Pūtula dibuku Buyuki pa kifwatulo kidi pa paje 85, ne kutanga binenwa bishintulula kifwatulo. Ebiya mulombole ne kifwatulo kidi pa paje 86, ne kumushintulwila’kyo. Ala kyalwilo kya mīsambo ya mu bupempudi bukwabo na kumwipangula’mba: “Le usaka kuyuka buluji bununupila bantu ne kufwa?” Jokela’ko monka mwisambile pa shapita 6.

“Lelo kasha kweipangwile kikimbilanga bantu kwikala na būmi bulampe?” Shi wakulondolola, pūtula dibuku Buyuki pa shapita 6, ne kutanga musāngo 3. Languluka nandi pa bisonekwa biletelwe’mo. Kupwa pituluka mu bipangujo bibidi bidi ku mfulo kwa musāngo, ipangula mwisambi nobe shi usaka kuyuka malondololo. Shi waitabija, nankyo endelela na kwisambila pa misāngo ilonda’ko.

“Twendanga twipangula bantu mobalangila pa uno mwanda. . . ” Tanga Ngalwilo 1:1, kupwa ipangula amba: “Lelo nobe witabije bino binenwa pano?” Shi waitabija, nena’mba: “Nami nkulupile’byo. Ino molangila, Leza byapangile bintu byonso, lelo ye aye ulengeja ne bibi byonso bilongeka?” Shi wapu kuleta kilondololwa kyandi, tanga Musapudi 7:29. Pūtula mu dibuku Buyuki, pa shapita 8, ne kutanga musāngo 2. Shi ketabijepo binena Ngalwilo 1:1, mukankamike abandaule bubinga bulombola amba Umpangi udi’ko.​—Tala dibuku Comment raisonner, paje 72-74.

“Mwene nobe uyukile amba kwalamuka kwenda kwalamuka mikadilo ya bantu lubilolubilo dyalelo kwitusakila twikale na kalombwe ukulupilwa wa kwituludika mu būmi bwetu? [Muleke akulondolole.] Bible shandi i dibuku dya kala kupita onso, ino uletanga madingi mafike’po mu būmi bwa dyalelo ne mu būmi bwa nsangaji mu kisaka.” Kupwa pūtula shapita 2 mu dibuku Buyuki, ne kutanga musāngo 10 ne mulongo umbajinji mu musāngo 11, pamo ne 2 Temote 3:16, 17.

“Lelo usakanga kuyuka mukekadila būmi bwetu ne ntanda mu kitatyi kīya kumeso? [Muleke akulondolole.] Bible i mukongele būmi bwa kumeso mobukekadila mu kishima kimo​—Paladisa! Mo mwātūdile Leza ba mulume ne mukaji babajinji pa kupwa kwibapanga. Tala moyādi ya kwikadila.” Pūtula dibuku Buyuki pa paje 8, tanga musāngo 9 munshi mwa kamutwe ka mwanda “Būmi mu Paladisa.” Kupwa wisambile pa myanda idi mu musāngo 10, tanga ne kisonekwa kiletelwe’mo, Isaya 55:10, 11. Mulombe mwisambile pa mukekadila būmi mu Paladisa ikajokejibwa ne kubandaula nandi musāngo 11-16.

Shi mu kujokela’mo kupya, ubakapempula muntu owashidile dipepala Kiteba kya Mulami nansha Réveillez-vous !, ubwanya kunena’mba:

“Ponaile kukupempula, nasangele ponakushidile dipepala Kiteba kya Mulami. Nalanga wajingulwile amba mutwe wa mwanda wa dino dipepala onso mutuntulu i Kiteba kya Mulami Kisapula Bulopwe bwa Yehova. Dyalelo nsaka kukushintulwila buno Bulopwe i bulopwe’ka ne byobukakulongela abe ne kisaka kyobe.” Ebiya pūtula mukanda Kisaka Leza pa kifundwa 6, mwisambe nandi mungya kitatyi kyadi nakyo.

“Mafuku kunyuma naile kukupempula, nakushila ne mapepala Kiteba kya Mulami ne Réveillez-vous ! Ano majulunale atamijanga mutyika ukwete nao bantu Bible ne misoñanya yandi ya mu mwikadilo. Momwenine ami, i kya mvubu bantu bonso bayuke Kinenwa kya Leza, o mwanda najoka kukulombola kintu kimo kya kukukwasha nobe uyuke kino kinenwa.” Mulombole mukanda Kisaka Leza nansha dibuku Buyuki, munene mushilule nandi kifundwa kya Bible.

Shi kolombola dibuku dimo pa mabuku a kala a mapaje 192, ubwanya kunena’mba:

“Dyalelo bantu batendelanga bininge kufunda masomo malumbuluke. Molangila, i bufundiji’ka bufwaninwe kufundwa bukokeja kwitupa būmi bwa nsangaji ne ntundubuko? [Muleke akulondolole. Kupwa tanga Nkindi 9:10, 11.] Dino dibuku [tela mutwe wa mwanda wa dibuku dyopāna] dimanine pa Bible. Dilombolanga nsulo imo kete ya buyuki butwala ku būmi bwa nyeke.” Lombola kifwa kampanda kitanwa mu dino dibuku, mukankamike atange’dyo.

Mabuku Makwabo

Misapwilo mikwabo ya mwa kupānina mabuku ne mikanda, idi mu dibuku Index pa kamutwe ka mwanda:

Présentation

Liste par publication

Mwa Kushilwila Kifundwa Ponka na Ponka

Pa kushilula kifundwa kya Bible, tompa bidi kwingidija ntwelelo ya kwifunda na muntu Bible ponka na ponka:

“Lelo uyukile’mba shi witūdile’ko’tu minite mityetye yonka, ukokeja kusokola malondololo ku kipangujo kikatampe kya mu Bible? Kifwa, . . . ” Penepo ipangula kipangujo kidi ku ñanjilo ya kifundwa kyo-kyonso mu mukanda Kisaka Leza, kyolanga amba kibwanya kusangaja muntu’wa.

“Naiya kukulombola motwifundilanga Bible na bantu ku bitupu. Nsa kukulombola mu minite kubwipi kwa itano kete. Lelo udi na kyaba kya minite itano nkulombole?” Shi waitabija, enda pa kifundwa 1 mu mukanda Kisaka Leza umulombole mwifundilwanga, tanga kisonekwa kimo nansha bibidi kete byokatonga. Kupwa mwipangule amba: “I kyaba’ka kyokamona’ko minite kubwipi kwa 15 mwanda wa tukefunde kifundwa kilonda’ko?”

“Bantu bavule badi shabo na Bible, ino kebayukilepo amba uletanga malondololo ku bipangujo bya mvubu byotwiipangulanga umbūmi. Shi twifunde kino kitabo [mukanda Kisaka Leza, nansha dibuku Buyuki] kintu kya nsaa umo ku yenga, ukekala na buyuki bwa Bible bwa kyalwilo mu myeji mityetye yonka. Tala nkulombole mwifundilwanga.”

“Naiya twifunde nobe Bible ku bitupu. Shi bikokejika, mbwanya kukusela’ko minite mityetye nkulombole mwifundilanga bantu Bible mu matanda 200 ne musubu mu bisaka. Tubwanya kwisambila pa mutwe wa mwanda o-onso pa ino. [Mulombole kifunka mu dibuku Buyuki.] I wepi wa kusangaja’po nakampata?” Muleke atonge. Pūtula shapita waatonga, shilula nandi kifundwa mu musāngo umbajinji.

“Nefundanga Bible na bantu ku bitupu, kadi nakidi na kyaba kya kwifundila’ko na bantu bakwabo. Dino dibuku dyo dyotwifundanga. [Mulombole dibuku Buyuki.] Kwifunda’dyo kulomba myeji mityetye kete, kadi kuletanga malondololo ku bipangujo pamo bwa bino: Mwanda’ka Leza ulekele masusu? Mwanda’ka tununupanga ne kufwa? I kika kifikilanga bakena betu bafwa? Ne i muswelo’ka otukokeja kwifwenya kudi Leza? Lelo mbwanya kukulombola motwifundilanga?”

Shi ubatana musapwilo mulumbuluke utamija biyampe kusangela musapu kwa bantu, bine endelela na kwingidija’o! Ino kwatañanya’o na dibuku dya kupāna mu mwine kweji’wa.