Июлё

Вся, со дэлас дума и терэлас о Исусо, ай кадяжэ и чудеса, на 100 процэнтов сыкавэнас, саво гиндо и со по ди кай лэско Дад (Иоан. 14:9). Сости амэн моӷут тэ сытярэн лэ Исусостирэ чудеса? О Исусо и лэско Дад фартэ амэн любин. Лэ Исусостири любовь каринг и мануша дицолас андэ кода, сар во использовал лэ Дэвлэско зор. Во терэлас када, кай тэ поможый лэ манушэнди тэ пэрэандярэн о ԥаримос. Еқвар дуй корэ мануша фартэ мангэнас лэстар помощь (Матф. 20:30—34). Шон сама, кай лэ Исусости лэн ашэля жалко и во лэн исцэлисардя. О ӷреческо алав, саво пэрэандярдо, сар «ашэля лэн жалко» пэрэдэл о гиндо пала бари пэрэжывания, сави фартэ дур андо ди и латар жал кацави боль, сар кабута дуқал и тила. Через кацави бари пэрэжывания дицол лэ Исусостири любовь. Имено через латэ во закамля тэ праварэл лэ боқалэн и тэ исцэлий лэ манушэс, савэстэ сас проказа (Матф. 15:32; Мар. 1:41). Амэ можэм тэ авас уверени, кай о Иегова — Дэл, саво жалуий анда вся оди — и лэско Шаво амэн фартэ любин. Лэнди фартэ ԥарэс тэ диқэн, кала амэ страдаем лэ ԥаримастар (Лука 1:78; 1 Пёт. 5:7). Вонэ фартэ аштярэн кодэя время, кала улэна лэ манушэндар о ԥаримос и бида! w23.04 3, абз. 4, 5

Важно тэ терас вся, со па амаро зор, кай и гиндоря анда кадэя люма тэ на влияют пар мэндэ. Амэнди трэбуй тэ ԥэрас пэстири годи лашэ гиндонэнца, кала адиносарас и изучаем и Библия. Кадяжэ амэ фэрисараса пэстири годи, кала ласа тэ ԥирас пэ собрания и пэ служэния. Ай о Иегова пэстиря ригатар дэл алав, кай во на домэкэла ԥаримос, саво май баро амарэ зорэстар (1 Кр. 10:12, 13). Кай тэ ашаспэ верни лэ Иеговасти андэ кадэла ԥарэ деса амэнди трэбуй май бут тэ мангаспэ, чем обычно. О Иегова камэл, кай тумэ тэ росԥэнэн лэсти вся, со тумэндэ по ди (Пс. 62:8). Хвалин лэ Иеговас и блаӷодарин лэс пала вся, со во терэл. Мангэн, кай во тэ поможый тумэнди тэ авэн смили андэ служэния. Мангэн, кай во тэ дэл зор, кала тумэндэ исин проблемы, или кай тумэ тэ на подэнпэ лэ бэзэхэсти. На домэкэн, кай тумэнди варисо тэ мишает вся и время тэ мангэнпэ лэ Иеговасти. w23.05 7, абз. 17, 18

Васо амэ авас пэ собрания? Ӷлавно амари цэль — када кай тэ прославляем лэ Иеговас (Пс. 26:12; 111:1). Но амэ кадяжэ авас пэ собрания, кай тэ подритярас ек еқэс андэ найвушэро время (1 Фес. 5:11). Кала амэ ваздас о вас и дас каминтарии, амэ прославляем лэ Иеговас и подритярас лэ ԥралэн и лэ ԥэян. Но кала амэ дас каминтарии, амэндэ моӷут тэ авэн дэсавэ трудности. Например, амэндэ можэт тэ авэл дар. Или амэ фартэ камас тэ атвечаем, но амэн пушэн най кадя дэ часто, сар амэ камлоп. Со амэ можэм тэ терас, кай кадэла трудности тэ улас? Андо письмо лэ евреёнэнди о Павло ԥэндя пэскати дэ важно тэ авас пэ собрании. Во побудисардя лэ христианонэн тэ подритярэн ек еқэс. Амэ аваса май смило тэ ваздас о вас, если полас, кай кодэлэн, ко бэшэл пэ собрания моӷут тэ подритярэн дажэ прости алава, андэ савэ дицол и вера. Ай если амэн най кадя часто пушэн, амэ можэм тэ радосавас, кай авэр тожэ моӷут тэ дэн каминтарии (1 Пёт. 3:8). w23.04 20, абз. 1—3

О царё дя указо! И евреёря, савэ сас раборя андо Вавилоно почти 70 лет, акана моӷли тэ ринпэ андо Израилё (Езд. 1:2—4). Када моӷ тэ стерэл кати о Иегова. Анда Вавилоно обычно на одмэкэнас пэстирэ рабонэн (Ис. 14:4, 17). Но андо Вавилоно паруделя о правителё и во ԥэндя, кай и евреёря моӷут тэ ринпэ пэ пэстирэ краёря. Ай тоди кажнонэсти андар лэндэ, особено лэ хуланди андо ери, трэбуй сас тэ витидэн: тэ ужан анда Вавилоно или тэ ашэнпэ. Тэ прилэн кацави ришэния сас найвушэро. Бутэнди сас найвушэро тэ жан андэ кадэва дром через кода, кай лэндэ сас ԥурэ бэрша. Аврэ евреёнэнди сас тожэ ԥарэс, важ кода кай вонэ арақаделэпэ андо Вавилоно, и када сас кати ек форо, саво вонэ ӷанэнас. Важ лэндэ о Израилё сас просто ԥув лэндирэ папонэнди. Ай дэсавэ, наверно, фартэ розбарваделэ андо Вавилоно. Важ када лэнди, возможно, сас трудно тэ ашавэн пэстирэ лашэ цэра или пэстири бути и тэ жан пэ кодэя ԥув, сави на ӷанэнас. w23.05 14, абз. 1, 2

Андэ лэ Дэвлэско алав ԥэнэнпэ, кай трэбуй тэ сытювас тэ пэрэандярас и ԥари время, тэ жалуисарас анда вся оди и тэ любисарас. Андэ Лука 21:19 ԥэнэнпэ: «Тумэ спасынапэ, если ашэнапэ састэ андэ ԥари время». Андэ Калосы 3:12 пистромэ: «Старыинпэ всаворэ одеса тэ жалуин». Ай андэ 1 Фесалоники 4:9, 10 амэ адиносарас: «О Дэл сытярдя тумэн тэ любин ек еқэс. [...] Но амэ ԥэнас тумэнди, ԥрала, тэ любин инке май фартэ». Всаворэ кадэла алава сас пистромэ важ и христианоря, савэ ужэ ӷанэнас тэ пэрэандярэн и ԥари время, тэ жалуин анда вся оди и тэ любин. Но лэнди трэбуй сас и май дур тэ старыинпэ тэ терэн када инке май драго. Кадя жэ трэбуй тэ терас и амэ. Со андэ када поможыя? Роздик, сар кажно анда кадэла качестворя сыкавэнас и христианоря андо пэрво вико. Ай потом погиндосар, сар ту можешь тэ терэс кадя жэ, сар кодэла ԥрала и ԥэя. Кадя ту сможеш тэ полэс, ӷотово ту каринг и бида чи най. Тоди каринг кодэя время, сар тэ залэлпэ и бари бида, ту уже ӷанэса, сар тэ виритярэс о ԥаримос, и тутэ авэла зор и дальшэ тэ ашэспэ састо андэ ԥари время. w23.07 3, абз. 4, 8

Нэважно, амэ памазаникоря или амэ «авэр бакрорэ», амэнди трэбуй тэ ашаспэ пэ кадэва «Свынто дром» (Иоан. 10:16). Кадэва дром прожал через о духовно раё и андярэл амэн каринг и блаӷословении, савэ анэна лэ Дэвлэско Царство. Лэ 1919 бэршэстар ужэ милионоря мурша, жувля и бэяцэ линэ тэ жан па кадэва дром, кала вижылэ анда Вавилоно Велико — када всаворэ хохавнэ веры. О Иегова позаботисайля пала евреёря, савэ вижан анда Вавилоно. Во уля па дром вся, со моӷло тэ мишает лэстирэ народости (Ис. 57:14). Ай со можно тэ ԥэнас пала «Свынто дром» андэ амари время? Важ дэсавэ викоря жы каринг 1919 бэрш о Иегова через дэсавэ мурша, савэ кандэн лэс, розвужарэлас о дром анда Вавилоно Велико. (Сыстон Исайя 40:3.) Вонэ стердэ бари дила, кай потом и мануша, савэндэ лашо ди, моӷли тэ вижан анда Вавилоно Велико и тэ зажан андо духовно раё, кай правильно тэ тэлён лэ Иеговасти. w23.05 15, 16, абз. 8, 9

О Иегова камэл, кай амэ тэ служысарас лэсти радостяса и анда вся оди (2 Кр. 9:7). Но со, если амэндэ нинай жылания тэ жас каринг и дэвликони цэль, тоди можэт амэ на трэбуй када тэ терас? Роздиқаса примеро, саво сыкадя о апостало Павло. Во ԥэндя: «Мэ зритярав пэстири тила и застависарав ла тэ кандэл ман» (1 Кр. 9:25—27). О Павло заставияс пэс тэ терэл кода, со правильно, дажэ кала во камэлас тэ терэл па аврятэ. Чалёлас лэ Иеговасти лэ Павлостири служэния? Канешно! Кай во стодя бут зор пэ када, о Дэл лэс блаӷословил (2 Тим. 4:7, 8). Сар сыкавэл лэ Павлоско примеро, о Иегова радуийпэ, кала амэ пристас о зор, кай тэ жас каринг пэстири цэль дажэ тоди, кала амэндэ нинай жылания. Лэсти чалёл тэ диқэл, кай амаро ди цырдэлпэ най каринг кода, со амэ терас, ай каринг лэстэ. О Иегова блаӷословияс лэ Павлос и во кадяжэ блаӷословия амаро трудо (Пс. 126:5). И кала амэ додиқаса кадэла блаӷословении андэ пэстири жызня, када поможыя амэнди инке май фартэ тэ камас тэ домардювас пэстири цэль. w23.05 29, абз. 9, 10

О Павло сыстосардя кодэлэн, ко на спасыяпэ андэ лэ Иеговаско дес, лэ манушэнца, савэ совэн. Вонэ на ӷанэн, со терэлпэ андэ люма, и на ӷанэн, сар дэ быстро жал и время. Важ када вонэ нэ моӷут тэ шон сама пэ важни событии или тэ полэн, со трэбуй тэ терэн. Адес и мануша духовно совэн (Римо 11:8). Вонэ на шон сама пэ кода, со доԥэнэн, кай амэ жувас андэ послидни деса и кай фартэ ӥто авэла и бари бида (2 Пёт. 3:3, 4). Но амэ полас, кала пашол лэ Дэвлэско дес, амэ трэбуй тэ на домэкас, кай амэн тэ лэл и линдра (1 Фес. 5:6). Амэ трэбуй тэ ашаспэ спокойни и драго тэ гиндосарас, кай амэндэ тэ на авэл нисави дила кадэла люмаса. Пар мэндэ моӷут тэ тасавэн, кай амэ андэ политически вопросоря тэ залас варикастири риг. Со май пашэ лэ Иеговаско дес, со май фартэ пар мэндэ лэна тэ тасавэн. Амэ на трэбуй тэ пэрэжываем пала кода, сар тэ дас атвето. Лэ Дэвлэско свынто духо поможыя тэ ашаспэ спокойни, драго тэ гиндосарас и тэ прилас мудри ришэнии (Лука 12:11, 12). w23.06 9, 10, абз. 6, 7

Пала со тумэ гиндон, кала ашунэн алав Самсоно? Наверно, тумэнди авэл по гиндо, кай када лэ Дэвлэско служытелё, савэстэ сас фартэ баро зор. Да, во сас кацаво. Но еқвар о Самсоно приля неправильно ришэния. Када андя лэс каринг и бида. Но всаек важ о Иегова о Самсоно сас верно служытелё. Важ када о Дэл позаботисайля, кай пала лэ Самсоностири жызня тэ авэл запистромэ андэ Библия важ амэндэ. Через о Самсоно о Иегова терэлас удивительно дила, кай тэ поможый пэстирэ народости, лэ Израилёсти, савэс во витидя. Прожылэ бут бэрша посли кода, сар муля о Самсоно. Кала о апостало Павло пистрояс пала мануша, савэндэ сас састи вера, о Иегова побудисардя лэс тэ пистрой кадяжэ и пала Самсоно (Евр. 11:32—34). О Самсоно надеияспэ по Иегова дажэ тоди, кала када сас найвушэро. Амэ можэм бутэсти тэ сытювас кай кадэва лэ Дэвлэско служытелё, и лэско примеро можэт тэ подритярэл амэн. w23.09 2, абз. 1, 2

Амэндэ вижала инке май драго тэ пэрэандярас и ԥари время, если амэ ласа часто и анда вся оди тэ росԥэнас лэ Иеговасти пала пэстирэ пэрэжывании (1 Фес. 5:17). Можэт, ворта акана тутэ нинай баро ԥаримос. Но пуш пэстар: «Родав мэ помощь кай о Иегова, кала ростроено или кала на ӷанав, со тэ терав?» Если ту присытелян тэ взвиспэ каринг о Дэл андэ любо сложно ситуацыя, тоди ту сразу мангэса лэстар помощь, кала авэла баро ԥаримос. Ту на лэса самневаца, кай во точно ӷанэн, кала и сар тути тэ поможый (Пс. 27:1, 3). Амэнди авэла май вушэро тэ виритярас и бари бида, если ужэ акана амэ ӷанас тэ пэрэандярас и ԥари время (Римо 5:3). Васо можно кадя тэ ԥэнас? Бут ԥрала шутэ сама, кай кала вонэ виритярэнас ек ԥаримос, тэ виритярэн авэр лэнди сас ужэ май вушэро. Кадэлэстар ашэлас май састи лэндири вера андэ кода, кай о Иегова паша лэндэ и кай во ӷотово лэнди тэ поможый. Ай ужэ и вера поможыяс лэнди тэ виритярэн и авэр ԥаримос (Иак. 1:2—4). w23.07 3, абз. 7, 8

О Иегова блаӷоразумно, важ кода кай смирено и жалуий анда вся оди. Например, о Иегова сыкадя и смирения, кала камэлас тэ уничтожыт лэ найлашэ манушэн андо Содомо. Через и анӷелоря о Иегова ԥэндя лэ Лотости тэ нашэл андэ плая. Но о Лото пэрэдарайля. Во ля фартэ тэ мангэл, кай о Иегова тэ мэкэл, кай во и лэско ери тэ нашэн андо Цоаро — найбаро форицэ, саво тожэ трэбуй сас тэ авэл уничтожэно. О Иегова моӷ бы тэ приԥэнэн, кай о Лото тэ стерэл кадя, сар во ԥэнэн, ай най па пэстирятэ. Но во приашунделя каринг о Лото, хоть через када и трэбуй сас тэ на уничтожыт о Цоаро (Быт. 19:18—22). Через бут бэрша о Иегова анда оди жалуисардя и Ниневия. Во бишалдя лэ Ионас тэ ԥэнэн, кай о форо и всаворэ мануша андэр лэстэ авэна уничтожэни. Но и мануша анда Ниневия каисайлэ. Важ када о Иегова жалуисардя лэн и нэ уничтожыл о форо (Иона 3:1, 10; 4:10, 11). w23.07 21, абз. 5

Сости амэ сытювас кай о Иоасо? Во сас сар витка найбарэ корнёнэнца, савя трэбуй тэ подритярэн авэр каштора. Если кай кадэя витка вилэна и каштора, тоди через и балвал вой можэт тэ пэрэл. О Иодаё, кадя жэ, сар кодэла каштора, подритярэлас лэ царёс. Но кала о Иодаё муля, о Иоасо ля тэ патял андо хохаимос, саво ԥэнэн кодэла, ко отжылэ лэ Иеговастар, и тоди во пэля, сар кодэя витка. Када драго сыкавэл, кай амэ трэбуй тэ дарас лэ Дэвлэстар най через кода, кай када терэн ԥрала и ԥэя андэ собрания или амаро ери. Кай амэндэ тэ авэл лащи дружба лэ Иеговаса, трэбуй тэ пристас зор, кай тэ стас бари патив по Дэл и тэ дарас лэстар. Ай важ када трэбуй тэ проандярас и иследовании па Библия, тэ розмышляем пала кода, со проадиносардям, и тэ мангаспэ (Иер 17:7, 8; Клс. 2:6, 7). О Иегова на мангэл амэндар фартэ бут. Кода, со во аштярэл амэндар, запистромэ андэ Экклезиаст 12:13: «Трэбуй тэ авэл дар англа чачуно Дэл, и трэбуй тэ андярэс лэстири время. Именно када аштярэл о Дэл лэ манушэстар». Если амэ дарас лэ Дэвлэстар, амэ сможэм тэ на ашавас лэс и тэ виритярас о ԥаримос, саво авэла англэ. Кадя амари дружба лэ Иеговаса нисо и нико на розмарэла. w23.06 18, 19, абз. 17—19

О стихо, саво пистромэ май упрэ, залэлпэ кацавэ алавэнца: «Кодэва, ко бэшэл по троно, ԥэндя» (Тайна 21:5а). Андэ книӷа Свынто тайна пистромэ кати трин случаёря, кала о Иегова дэлас дума най через варикастэ, ай екжэно. Вижал, кадэла алава ԥэнэн най о анӷело и дажэ най о Исусо, саво рисайля каринг и жызня, ай екжэно о Иегова. Када сыкавэл, кай кодэлэсти, со пистромэ май дур, исин инке май бут патяимос. Васо можно кадя тэ ԥэнэс? Важ кода кай о Иегова «нэ можэт тэ хохавэл» (Титу 1:2). Драго дицол, кай и пэрви алава анда 5 стихо поможын тэ патяс кодэлэсти, со пистромэ андэ Свынто тайна 21:5, 6. Акана май драго роздиқаса и алава «мэ терав вся нэво». Пэ ӷреческо шыб катэ исин о алав, саво можно тэ пэрэандярэс сар «дик» или «ашун». Кадэва алав андэ книӷа Свынто тайна исин андэ бут стихоря. Инке диқэн, о Иегова ԥэнэн: «Мэ терав», ай най: «Мэ лава тэ терав». О Иегова ԥэнэн пала кода, со парудёла англэ, кабута када ужэ терэлпэ щяс. Када сыкавэл, кай во точно ӷанэн, кай лэстирэ алава исполнинапэ (Ис. 46:10). w23.11 3, абз. 7, 8

Кай о Пётро най всегда вижалас тэ терэл кадя, сар во камэл. Акэ дэсавэ примероря: о Исусо ԥэндя, кай лэсти прижалапэ тэ пэрэандярэл о ԥаримос и дажэ тэ хасарэл пэстири жызня, кай тэ исполний и библейски пророчестворя. Но о Пётро ԥэндя, кай о Исусо не право (Мар. 8:31—33). О Пётро и авэр апосталоря бут разоря споринаспэ, ко андар лэндэ май ӷлавно (Мар. 9:33, 34). Андэ время, кала авелэ тэ залэн лэ Исусос, о Пётро анда холи вихутилдя о мечо и отшындя лэ манушэсти о кан (Иоан. 18:10). Андэ кодэя жэ рят, лэс ля и дар и во тривар отԥэнделя лэ Исусостар, хоть во сас лэско пашутно друӷо (Мар. 14:66—72). Потом о Пётро розровьяпэ. Но о Исусо на отԥэнделя, кай о Пётро тэ авэл лэско апостало. Во ӷанэнас, кай о Пётро кадя жэ лэс любий. И во дя лэсти возможность, кай во када тэ сыкавэл. Посли кода, сар о Исусо рисайля каринг и жызня, во диқляпэ лэ Петроса и ԥэндя лэсти: «Дик пала мэрнэ бакрорэ». И кодэва анда вся оди ля кадя тэ терэл (Иоан. 21:15—17). Кала андэ Пятидесятница андо Иерусалимо пэ лэ Исусостирэ ученикоря пэрво разо сжыля о свынто духо, о Пётро сас машкар лэндэ. w23.09 22, абз. 6, 7

О апостало Пётро пистросардя лэ барэдэрэ ԥралэнди: «Пасын лэ Дэвлэско стадо» (1 Пёт. 5:1—4). Кучутно барэдэр ԥрал, амэ ӷанас, кай ту любис пэстирэ ԥралэн и ԥэян и камэс драго тэ диқэс пала лэндэ. Но дэкала тути можэт тэ здэлпэ, кай через бут дила или через кода, кай ту цыелян, тутэ на вижала тэ терэс вся, со трэбуй. Со жэ тоди тэ терэс? Росԥэн вся, пала со пережываеш, лэ Иеговасти. О Пётро пистросардя: «Кодэва, ко терэл и дила важ авэр, трэбуй тэ терэл и дила и тэ надеийпэ по зор, саво дэл о Дэл» (1 Пёт. 4:11). О ԥаримос, саво исин кай и ԥрала и ԥэя, возможно, авэла улино кати андо раё пэ ԥув. Но сэр, кай о ӷлавно пастухо, о Исусо Христос, можэт тэ стерэл важ лэндэ кода, со най па тиро зор. Варисо во терэл ужэ адес, ай варисо стерэла кати англэ. Вся, со о Дэл аштярэл лэ барэдэрэ ԥралэндар — када, кай вонэ просто тэ любин пэстирэ ԥралэн, драго тэ диқэн пала лэндэ и тэ сыкавэн лашо примеро. w23.09 29, 30, абз. 13, 14

Амэнди трэбуй тэ на подаспэ кодэлэсти, сар и мануша гиндон. Если амэ ласа тэ гиндосарас, сар и мануша андэ кадэя люма, тоди через дэсави время можэм тэ бистрас лэ Иеговас и лэстирэ нормы (1 Кр. 3:19). «И мудрость кадэлэ миростири» часто подмарэл лэ манушэн тэ на кандэн лэ Дэвлэс. Дэсавэ христианоря андэ Перга́ма и Фиати́ра домэклэ, кай пэр лэндэ тэ влияют кодэла, ко андярэлас билажаварди жызня и тэлёлас лэ идалонэнди. О Исусо дя кадэлэ дуе собраниенди строӷо совето, важ кода кай вонэ на диқэнас нисо найлашо андо билажавардо бэзэх (Тайна 2:14, 20). Адес и мануша круӷом амэндэ тожэ терэн вся, кай важ амэндэ тэ авэл нармально кода, со нэправильно. Амаро ери и авэр мануша моӷут тэ ԥэнэн, кай амэндэ вся фартэ строӷо и кай амэ можэм тэ жас против лэ Иеговаско законо. Например, вонэ моӷут тэ ԥэнэн, кай нинай нисо вэрыто андэ кода, кай тэ терэс, со камэс, и кай и библейски нормы ужэ пуранэ. Ай дэкала амэ можэм тэ гиндосарас, кай кода, со ԥэнэн о Иегова, на хутилэл. Амэ можэм дажэ тэ закамас тэ стерас кода, «[со най] пистромэ» (1 Кр. 4:6). w23.07 16, абз. 10, 11

Ла Марияти, лэ Исусостиря дати, трэбуй сас лэ Иеговаско зор. О анӷело Гавриило ԥэндя лати, кай вой заԥирэла, хоть инке на авэла миростэ. Кай и Мария на сас опыто, сар тэ барярэл лэ бэятонэн, ай лати трэбуй сас тэ диқэл пала шаворо, саво ашэла Христос! Ай инке ла аштярэлас найвушэро дума латирэ тэрнэса, лэ Иосифоса. Сар тэ росԥэнэн лэсти, васо вой ԥирэл, хоть и на сас никаса? (Лука 1:26—33). Со придя зор ла Марияти? Вой родэлас подержка аврэндар. Например, вой мангля лэ Гавриилос май бут тэ росԥэнэн пала латири задания (Лука 1:34). Ӥто посли када вой жыля «андо форо, саво андэ Иудейски плая» каринг пэстири родичка Елизавета. И Елизавета похвалисардя ла Мария и через о свынто духо ԥэндя пророчество пала лако шаво (Лука 1:39—45). И Мария ԥэндя, кай о Иегова «стердя пэстирэ вастэса ашунгли дила» (Лука 1:46—51). Через о Гавриило и через и Елизавета о Иегова подритярдя ла Мария. w23.10 14, 15, абз. 10—12

И 144 000 избрани лэ свынтонэ духоса лэ Христостирэ ученикоря лэна вмести лэса тэ служын по небо сар рашая (Тайна 14:1). Кала вонэ инке жувэн пэ ԥув, о Дэл витидэл лэн пэстирэ духоса и прилэл сар шавэн. О Свынто андэ свынто катуна сыкавэл пэ кадэла особи отношэнии машкар лэндэ (Римо 8:15—17). О Свынто май анда свынти сыкавэл о небо, кай жувэл о Иегова. И шырма, сави отделияс о Свынто и о Свынто май анда свынти, сыкавэл лэ Исусостири манушыкани тила. Пока во сас мануш, во не моӷ тэ жал по небо. Кала во отдя пэстири манушыкани тила важ и мануша, о Исусо вазгляпэ по небо и ԥэрнадя о дром каринг и жызня по небо важ всаворэ избрани христианоря. Кай тэ получин и небесно наӷрада, вонэ тожэ трэбуй тэ ашавэн пэстири манушыкани тила (Евр. 10:19, 20; 1 Кр. 15:50). w23.10 28, абз. 13

Кала и ефремляноря линэ тэ виԥэнэн лэ Гедеоности вся, во всаек дэлас дума ковлэс (Суд. 8:1—3). О Гедеоно на ля тэ холявэл. Во сыкадя, кай сас найӷордо: виашундя, со лэнди на чалёлас, и успокоил лэн. И годявэр барэдэр ԥрала терэн кадя жэ, сар о Гедеоно. Вонэ внимательно виашунэн кода, со на чалёл аврэнди, и дэн дума ковлэс (Иак. 3:13). Кадя вонэ терэн, кай андэ собрания тэ авэл мирно. И мануша камэнас тэ прославин лэ Гедеонос, кала во победисардя лэ мадианитянонэн, но во шутя лэндири сама по Иегова (Суд. 8:22, 23). Сар и барэдэр ԥрала моӷут тэ терэн кадяжэ, сар о Гедеоно? Если лэндэ варисо драго вижал, вонэ трэбуй тэ хвалин лэ Иеговас (1 Кр. 4:6, 7). Например, варико хвалий лэ барэдэрэ ԥралэс, кай во драго сытярэл. Тоди о барэдэр ԥрал можэт тэ шол лэ манушэстири сама, кай амэ всаворэ сытювас па Библия и кай лэ Иеговастири арӷанизацыя. Дэкала лэ барэдэрэ ԥралэсти авелоп драго тэ погиндой, на шол во фартэ бут сама пэр пэстэ. w23.06 4, абз. 7, 8

Если амэ на получисарас и атветоря пэ пэстирэ молитвы, амэ можэм тэ задас пэсти вопросо: «Чаче мэ мангавпэ пала кода, со трэбуй?» Часто амэ гиндосарас, кай ӷанас, со важ амэндэ май фэдэр. Но о Иегова ӷанэн май драго. Лэстэ исин май лащи ришэния, чем кодэя, пала сави амэ лэсти ԥэнас. Можэт тумэ мангэн кода, со вобще на сжалпэ лэстиря времяса (1 Иоан. 5:14). Например, прецтавьте, кай и родителя мангэн лэ Иеговас, кай лэнго бэято тэ ашэлпэ андэ истина. Здэлпэ, кай када правильно. Но о Иегова никас на заставий лэсти тэ служын. Во камэл, кай амэ, ай кадяжэ и бэяцэ, тэ тэлювас лэсти, важ кода кай екжэнэ кадя витидям (Втор. 10:12, 13; 30:19, 20). Важ када драго авелоп, кай и родителя тэ мангэн лэ Иеговастар помощь, кай тэ поможын лэ бэятонэнди тэ полюбин лэ Иеговас и тэ ашэн лэстирэ друӷоря (Прит. 22:6; Еф. 6:4). w23.11 21, абз. 5; 23, абз. 12

Васо тэ подритярас аврэн, — када розлащи возможность тэ сыкавас аврэнди пэстири любовь? Андэ ек библейско справочнико ԥэнэнпэ, кай о алав, саво пэрэандярдо, сар «тэ подритярас», сыкавэл тэ авас паша кодэва, касти ԥарэс. Вижал, кала амэ подритярас амарэ ԥралэн и ԥэян, савэнди найдраго, амэ поможысарас лэнди тэ лэн зор и тэ на парашэн тэ служын лэ Дэвлэсти. Кажно разо, кала амэ подритярас лэ ԥралэс или ла ԥья и дас лэнди возможность тэ вировэнпэ, амэ сыкавас, кай любисарас лэн (2 Кр. 7:6, 7, 13). О алав «тэ подритярэс» и «тэ жалуис анда вся оди» сжанпэ ек еқэса. Кала о мануш жалуий анда вся оди, во старыийпэ тэ подритярэл лэ манушэн. Вижал, спэрва и жалость появийпэ андо амаро ди, ай тоди через када амэ дас зор аврэнди. Кадя терэл о Иегова. Андэ Библия ԥэнэнпэ, кай во — «Дад, саво глаба пала амэндэ и саво жалуий амэн анда вся ди и вся и время терэл амэнди май вушэро по ди» (2 Кр. 1:3). w23.11 9, 10, абз. 8—10

О ԥаримос на обжала ригаса ни еқэ христианинос. Роздиқаса, саво примеро сыкавэл о апостало Павло. Во ԥэндя лэ ԥралэнди анда Фесалоники: «Кала амэ самас тумэнца, амэ най еқвар ԥэнасас, кай амэндэ авэла ԥари время, и тумэ ӷанэн кай вся кадя и тердяпэ» (1 Фес. 3:4). Ай лэ христианонэнди андо Каринфо во пистросардя: «Амэнди сас кадя ԥарэс, кай пэстирэ зорэса амэ на виритярдоп. И амэ на ӷанасас, вижуваса чи най» (2 Кр. 1:8; 11:23—27). Кай кажно христианино андэ жызня бут трудности (2 Тим. 3:12). Можэт тумэнца ӷрубо дэнас дума и вишонас холи друӷоря и о родо, кала тумэ прилинэ ришэния тэ ашэн лэ Исусостирэ ученикоря? Ай возможно, тумэ камэнас андэ вся тэ андярэн пэс честно, но тумэндэ через када сас проблемы пэ бути? (Евр. 13:18). Или тумэ полэн, кай о правительство тасавэл пэр тумэндэ, важ кода кай тумэ росԥэнэн пала пэстири надежда? Саво бы ԥаримос тумэндэ тэ на авэл, о Павло ԥэндя, кай трэбуй тэ радуинпэ. w23.12 10, 11, абз. 9, 10

Кай о Иаково сас и авэр бут ԥаримос. Дуй лэстирэ шавэ, о Симеоно и о Левиё, лажавардэ лэ ерес и андярдэ найлашо алав по Иегова. Лэ Иаковости любимо хулаи, Рахиль, муля, кала андя лэ дуйтонэ бэятос. И потом, через фартэ баро боқалимос, лэ Иаковости прижыляпэ андэ ԥурэ бэрша тэ пэрэладэл тэ жувэл андо Египто (Быт. 35:16—19; 37:28; 45:9—11, 28). Хоть кай о Иаково сас фартэ бут ԥаримос, во никала на парашэлас тэ патял андо Иегова и андэ лэстирэ обещянии. Ай о Дэл най еқвар ԥэнэнас лэсти, кай во лэса довольно. Например, о Иегова блаӷословияс лэ Иаковос мищимаса. И сар о Иаково, наверно, сас блаӷодарно лэ Иеговасти, кала додиқля лэ Иосифос, пала саво во долӷо гиндояс, кай во муля! Со поможысардя лэ Иаковости тэ виритярэл вся кадэва ԥаримос? Када и пашутни дружба лэ Иеговаса (Быт. 30:43; 32:9, 10; 46:28—30). Если амэ цэнисарас амари дружба лэ Иеговаса, амэ тожэ сможэм тэ виритярас любо ԥаримос, саво можэт нэожыдано тэ авэл андэ амари жызня. w23.04 15, абз. 6, 7

О 23 Псалом — када дили. Андэ кажно латири строчка дицол, кай о Давидо и о Иегова глаба ек пала еқэстэ. О Давидо сас уверено андэ када. Во ԥэнэн, кай о Дэл лэско Пастухо. О Давидо домэкэлас, кай о Иегова тэ сыкавэл лэсти о дром па саво тэ жал, важ кода кай патялас лэсти. Кала о Давидо жалас пала лэско алав, во чуствовал пэс, кай о Дэл лэс фэрий. О Давидо ӷанэнас, кай лэ Иеговастири любовь авэла тэ дицол андэ вся лэстири жызня. Васо во андэ када фартэ патялас? О Давидо диқэлас, сар о Иегова драго пала лэстэ заботийпэ и кажно дес дэл лэсти кода, со трэбуй. Во ӷанэнас, кай вонэ лэ Иеговаса друӷоря и кай во пэстиря жызняса радуий лэс. Во точно ӷанэнас, кай со бы тэ на терэлпэ, о Иегова никала на парашэла пала лэстэ тэ заботийпэ. О Давидо патялас, кай о Иегова глаба пала лэстэ и када придэлас лэсти зор тэ на дарал. Важ када во сас бахтало и лошало (Пс. 16:11). w24.01 29, абз. 12, 13

Посли кода, сар прожыля и Дуйто мирово война, лэ Иеговастирэ служытеля андэ бут страны линэ свободно тэ росԥэнэн пала лэстэ. Блаӷодаря кадэлэсти бут уӷанглэ пала Иегова и акана и новость пала Царство ашундёл па вся и ԥув. Адес и ԥрала анда Руководящё совето на парашэн тэ пристон о зор, кай тэ полэн, со о Исусо камэл, кай вонэ тэ терэн. Вонэ камэн, кай андэ кода, со вонэ ԥэнэн и пистрон лэ ԥралэнди, тэ дицол, сар о Иегова и о Исусо диқэн пэ варисаво вопросо. И раёни и катутнэ барэдэр ԥрала пэстиря ригатар ԥэнэн андэ собрании, со тэ терэн. И барэдэр ԥрала, савэн о Дэл витидя тэ жувэн по небо, ай кадяжэ, можно тэ ԥэнас, всаворэ барэдэр ԥрала — «андо право вас» кай о Христос (Тайна 2:1). Канешно, кадэла ԥрала найидеальни и дэкала шылинпэ. О Маисеё и о Исусо Навино тожэ дэкала терэнас варисо най кадя, сар и апосталоря (Чис. 20:12; Иис. Н. 9:14, 15; Римо 3:23). И всаек о Исусо драго андярэл лэ кандинэ рабос и лэ барэдэрэ ԥралэн, и во лэла тэ терэл када и дальшэ. Важ када амэндэ исин вся, кай тэ патяс кодэлэсти, со во ԥэнэн амэнди через и ԥрала, савэн во назначил. w24.02 23, 24, абз. 13, 14

Адес амэ можэм тэ радосарас лэ Иеговас, кала анда оди ԥэнас, кай любисарас лэс и блаӷодарни лэсти. Кала амэ росԥэнас важ лэстэ, амэ сэрас, кай амари ӷлавно цэль — тэ пашарас лэ манушэн каринг о Иегова. Амэ камас тэ поможысарас лэнди тэ диқэн пэ амаро любящё Дад кадя жэ, сар и амэ (Иак. 4:8). Амэнди чалёл тэ сыкавас лэ манушэнди, со андэ Библия ԥэнэнпэ пала Иегова. Вонэ уӷанэн, саво во любящё, справедливо, годявэрно и зорало, ай кадяжэ, со инке исин андэ лэско лашо характеро. Кадяжэ амэ хвалисарас лэ Иеговас и радосарас лэс, кала старысавас тэ шаспэ пэр лэстэ андэ кода, со терас кажно дес. Блаӷодаря кадэлэсти авэр, возможно, шона сама, кай амэ на шаспэ пэ мануша андэ кадэя люма и закамэна тэ уӷанэн, васо кадя (Матф. 5:14—16). Тоди амэ сможэм тэ росԥэнас лэнди, васо амэ андярас пэс кадя, ай най па аврятэ. И мануша, савэндэ лашо ди, закамэна тэ ашэн лэ Иеговастирэ друӷоря. Амэ хвалисарас лэ Иеговас кодэлэса, кай росԥэнас важ лэстэ и драго пэс андярас. Через када лэско ди лошавэл (1 Тим. 2:3, 4). w24.02 10, абз. 7

Кай тэ авэл лащи дружба лэ Дэвлэса, тути трэбуй тэ сытёс тэ терэс кода, со приӷодияпэ андэ жызня. Када поможыя тути тэ терэс и дила андэ собрания, тэ виарақэс бути, кай тэ проправарэс пэс или пэстирэ ерес, ай кадяжэ тэ ладис аврэнца. Например, сытюв драго тэ адинос и тэ пистрос. Андэ Библия ԥэнэнпэ, кай лэ манушэстэ драго вижала тэ терэл и дила и во авэла бахтало, если во кажно дес адиной лэ Дэвлэско Алав и гиндой пала кода, со адиной (Пс. 1:1—3). Если ту адинос и Библия кажно дес, када поможыя тути тэ гиндос кадя, сар о Иегова. Тоди, кала лэса тэ прилэс и ришэнии, ту лэса тэ шос сама най пэ кода, сар ту гиндос, ай пэ принцыпоря анда Библия (Прит. 1:3, 4). Лэ ԥралэнди и лэ ԥэянди фартэ трэбуй, кай лэн тэ сытярэн кодэлэсти, со пистромэ андэ лэ Дэвлэско Алав. Если ту ӷанэс драго тэ адинос и тэ пистрос, тоди ту можэш тэ подӷотовиш пэстирэ каминтарии и речи кадя, кай када тэ придэл зор аврэнди. Кадяжэ ту можэш тэ випистрос важ пэстэ и гиндоря, савэ поможына тути тэ састярэс пэстири вера и тэ подритярэс аврэн. w23.12 26, 27, абз. 9—11

Кала тут шол андэ дар, погиндосар пала кода, со о Иегова стерэла англэ. Прицтавь, сар дэ драго авэла тэ жувэс андэ люма, кай на авэла лэ Сатанас и найлашэ манушэн. По регионально канӷрэсо андо 2014 бэрш и ԥрала сыкадэ, сар о дад поможый пэстирэ ерести тэ розмышляет пала надежда, сави пистромэ андэ Библия. Вонэ дэнас дума, сар авелоп пистромэ и алава анда 2 Тимафеё 3:1—5, если пэ ԥув тэ авэл о раё: «Андо раё пэ ԥув авэла фартэ бахтали жызня. И мануша любина най кати пэс, лэна тэ любин лэ Дэвлэско чачимос, авэна сэжи, лэндэ авэла ковло ди, вонэ лэна тэ славин лэ Дэвлэс, тэ кандэн лэ родителёнэн, тэ авэн блаӷодарни, на придэна, лэна тэ любин аврэн, тэ ладин андэ дума, кадяжэ лэна драго тэ дэн дума пала авэр, тэ ритярэн пэс андэ вас, на авэна жэстоки, лэна тэ любин лашымос, авэна надёжни, лэна тэ уступин ек еқэсти, на авэна ӷорди, лэна тэ любин лэ Дэвлэс май фартэ, чем и развличении, всаворэ́ одеса лэна тэ стон патив по Дэл. Кацавэ манушэнца дружысар». Ай тумэ дэн дума андо ери или лэ друӷонэнца пала кода, сави жызня авэла андо раё пэ ԥув? w24.01 6, абз. 13, 14

Сар дэ драго по ди, кай лэ Иеговасти чалёл лэско народо. Андэ Библия ԥэнэнпэ, кай о Иегова радуийпэ, кала диқэл пэ пэстирэ мануша (Пс. 149:4). Но дэкала варико можэт тэ гиндой: «Ай мэ уӷодно лэ Иеговасти?» Андэ Библия ԥэнэнпэ пала бут мануша, савэ на парашэнас тэ служын лэ Дэвлэсти. Но дэкала лэндэ тожэ сас гиндоря, через савэ вонэ умэкэнас и вас (1 Сам. 1:6—10; Иов 29:2, 4; Пс. 51:11). И всаек анда Библия драго дицол, кай и найидиальни мануша моӷут тэ уӷодин лэ Иеговасти. Со трэбуй тэ стерэл о мануш, кай кадя тэ авэл? Во трэбуй тэ патял андо Исус Христос и тэ болдёл (Иоан. 3:16). Када сыкавэла, кай во каисайля андэ пэстирэ бэзэха и дя алав лэ Дэвлэсти тэ терэл кода, со лэсти чалёл (Дила 2:38; 3:19). Лэ Иеговасти фартэ драго по ди, кала о мануш пашол каринг лэстэ. Если амэ зритярас пэско алав, саво дям лэ Иеговасти, кай тэ жувас важ лэстэ, тоди амэ лэсти уӷодни, и во диқэл пар мэндэ, сар пэ пэстирэ пашутнэ друӷоря (Пс. 25:14). w24.03 26, абз. 1, 2

Амэ, сар кодэла ученикоря, тожэ можэм тэ авас смили и тэ росԥэнас важ о Дэл дажэ тоди, кала и власти стон запрето. Можэм тэ мангаспэ пала смилость и мудрость и тэ патяс, кай о Иегова поможыя амэнди тэ росԥэнас пала лэстэ. Инке мангэнпэ лэ Иеговасти, кай во тэ поможый тумэнди тэ пэрэандярэн о ԥаримос. Бут андар мэндэ пэрэандярэн ԥаримос лэ зорэса — када кала варисо дуқал или кала ԥарэс по ди. Варикасти ԥарэс, важ кода кай муля лэско пашутно мануш. Дэкастэ найвушэро ситуацыя андо ери. Ай кай авэр исин ԥаримос через и преследовании или авэр трудности. Кадяжэ кадэла трудности ашэн инке май ԥарэ через и бида андэ природа, пандэмия и войны. Росԥэнэн лэ Иеговасти вся, со по ди. Росԥэнэн лэсти пала пэстири ситуацыя кадя жэ, сар тумэ росԥэндоп када пэстирэ пашутнэ друӷости, и патян: о Иегова стерэла вся, кай тумэнди тэ поможый! (Пс. 37:3—5). Если тумэ вся и время мангэнпэ, када поможыя тэ «авэн састэ андэ ԥари время» (Римо 12:12). О Иегова ӷанэн, савэ трудности пэрэандярэн лэстирэ служытеля. Андэ Библия ԥэнэнпэ, кай во «ашунэла, кала и мануша цыпина важ и помощь» (Пс. 145:18, 19). w23.05 5, 6, абз. 12—15

Англа кода сар тэ прилас и ришэния, трэбуй спэрва тэ полас, «со уӷодно лэ Иеговасти», ай тоди тэ терас кадя (Еф. 5:17). Сар амэ можэм тэ полас, сар о Дэл диқэл пэ варисаво вопросо? Амэнди трэбуй тэ арақас, савэ принцыпоря анда Библия поджан каринг амари ситуацыя. И если амэ приласа кадэла принцыпоря андэ пэстири жызня, тоди амарэ ришэнии май часто лэна тэ анэн лашымос. Амаро вороӷо, о Сатана, камэл тэ зашол амэн разнона диласа, кай амэндэ тэ на ашэлпэ время важ о Дэл (1 Иоан. 5:19). Дэсавэ христианоря моӷут тэ ришын, кай бут тэ сытён, тэ домардён варисо андэ жызня или тэ затерэн ловэ — када май важно, чем и служэния лэ Иеговасти. Кодэва, ко кадя гиндой, диқэл пэ када кадя, сар и мануша андэ кадэя люма. Канешно, вся када най вэрыто. Но нащи тэ домэкас, кай када тэ авэл по пэрво ҭан андэ жызня. w24.03 24, абз. 16, 17