YEREMIYA
1 Awa ndi mafala a Yeremiya* mwana wa Hilkiya, mʼbodzi wa anyantsembe a ku Anatote,+ mu dziko ya Bhenjamini. 2 Yahova alonga naye mu ntsiku za Yosiya+ mwana wa Amoni+ mambo wa ku Yuda, mu caka 13 ca utongi wace. 3 Iye alonga naye pontho mu ntsiku za Yeowakimu+ mwana wa Yosiya mambo wa ku Yuda mpaka kunkhomo kwa caka 11 ca utongi wa Zedhekiya+ mwana wa Yosiya mambo wa ku Yuda, pa mwezi wacixanu pidaendeswa Yerusalemu ku ubitcu.+
4 Yahova andipanga kuti:
Ine ndakusankhula toera ukhale mprofeta kuna madzindza a anthu.”
6 Mbwenye ine ndalonga: “Mama ine pano, Yahova Mbuya Wankulu Kakamwe!
Ine nkhabe kwanisa kulonga,+ thangwi ndine mʼphale.”+
7 Penepo Yahova andipanga:
“Leka kulonga kuti: ‘Ndine mʼphale.’
Thangwi usafunika kuenda kuna anthu onsene, kunafuna kukutuma ine,
Pontho usafunika kulonga pinthu pyonsene pinafuna kukupanga ine.+
9 Penepo Yahova afuthula nkono wace, mbakhuya mulomo wanga.+ Pontho Yahova andipanga: “Ine ndaikha mafala anga pamulomo pako.+ 10 Ona, lero ine ndakupasa mphambvu pakati pa madzindza a anthu na maumambo, toera udule, ugomole, ufudze, ugwise, pontho toera umange na kutceka.”+
11 Yahova alonga pontho na ine mbandipanga: “Yeremiya, ninji cinaona iwe?” Ine ndatawira: “Ndiri kuona nthawi ya muti wa amendwa.”
12 Yahova andipanga: “Waona mwadidi, thangwi ine ndisapitiriza kuonesesa mwadidi toera ndicite pidalonga ine.”
13 Yahova alonga pontho kaciwiri na ine, mbati: “Ninji cinaona iwe?” Ine ndatawira: “Ndiri kuona cikalango* ciri kuwira,* pontho ico capendamira kunterero buluka kunkwiriro.” 14 Penepo Yahova andipanga:
“Nyatwa inabwera buluka kunkwiriro,
Mbigwera anthu onsene anakhala mu dziko ineyi.+
15 Thangwi Yahova alonga:+ ‘Ine ndinacemeresa madzindza onsene a maumambo a kunkwiriro.’
‘Iwo anabwera; mʼbodzi na mʼbodzi anaikha mpando wace waumambo,
Pa misuwo ya Yerusalemu,+
Anazungulira mpanda onsene,
Na mizinda yonsene ya ku Yuda.+
16 Ine ndinadzaatonga thangwi ya pinthu pyonsene pyakuipa pidacita iwo,
Thangwi iwo andisiya,+
Pontho asapereka ntsembe* kuna alungu anango,+
Mbagodamira pinthu pidacita iwo na manja awo.’+
17 Mbwenye iwe usafunika kukhunganyika,
Lamuka, ndoko kaapange pyonsene pinafuna ine kukupanga.
Leka kugopa thangwi ya iwo,+
Toera ine ndikhonde kukugopesa pamaso pawo.
18 Thangwi lero ine ndakucitisa kukhala nzinda wakuwanga,
Nzati wa utale na mpanda wa nkuwa toera ukwanise kuthimbana na dziko yonsene:+
Amambo a ku Yuda na akulu-akulu ace,
Anyantsembe ace na mbumba ya mu dziko ineyi.+
19 Mwandimomwene iwo anadzamenyana na iwe,
Mbwenye nee anadzakukunda,
Thangwi Yahova alonga: ‘Ine ndiri na iwe toera kukupulumusa.’”+
2 Yahova andipanga kuti: 2 “Ndoko kapange mbumba ya mu Yerusalemu kuti: ‘Yahova alonga:
“Ine ndisakumbuka mwadidi ufuni ukhapangiza iwe kuna ine pikhali iwe ntsikana,+
Ufuni ukhapangiza iwe mu ndzidzi ukhadikhira iwe kumanga banja,+
Iwe ukhanditowera mu ndzidzi ukhakutsogolera ine nʼthando,
Mu dziko yakuti nkhabe kubzwalwa mbeu.+
3 Izraeli akhali wakucena pamaso pa Yahova,+ misapo yace yakutoma kubvunwa.”’
‘Anthu onsene akuti akhayesera kuafudza akakhala na mulando.
Iwo akhaoneswa nyatwa,’ alonga Yahova.”+
4 Bveserani fala ya Yahova imwe dzindza ya Yakobe,
Pabodzi na imwe mbumba yonsene ya Izraeli.
5 Ipi ndi pidalonga Yahova:
“Ndi pinthu pipi pyakuipa pidaona ambuyanu muna ine,+
Toera athaukirane kakamwe na ine,
Mbalambira madzimunthu akusowa basa,+ iwo mbadzakhalambo akusowa basa?+
6 Iwo nee alonga kuti: ‘Tendeni tisake Yahova,
Ule adatibulusa mu dziko ya Ejitu,+
Adatitsogolera nʼthando,
Mu dziko yakuti iri na mathando+ na madjenje,
Mu dziko yakusowa madzi+ na ya cidima cikulu,
Mu dziko yakuti nkhabe munthu anapita na mwenemu,
Mu dziko yakuti nkhabe kukhala anthu.’
7 Ine ndakubweresani mu dziko yakuti iri na miti yakubala misapo,
Toera mudye misapo yace, mbamutsandzaya na pinthu pyadidi,+
Mbwenye imwe mwafika, mbamupswipisa dziko yanga;
Imwe mwacitisa unthaka wanga kukhala cinthu cakunyanyasa.+
8 Anyantsembe nee alonga: ‘Tendeni tisake Yahova.’+
Apfundzisi a Mwambo nee andidziwa,
Akumbizi andisandukira,+
Aprofeta alonga maprofesiya mu dzina ya Bhaale,+
Mbalambira alungu akuti nkhabe kwanisa kuphedza munthu.
9 ‘Natenepa, ine ndinapitiriza kukupasani mulando,’+ alonga Yahova,
‘Pontho ndinapasa mulando adzukulu anu.’
10 ‘Wambukani bara mpaka ku magowa a Kitimu+ toera muone.
Tumani munthu aende ku Kedhari+ toera muone mwadidi;
Onani khala pinthu ninga pyenepi pyacitika kale:
11 Kodi iripo mbumba idasiya alungu awo mbalambira anango akuti nee ndi alungu?
Mbwenye mbumba yanga yandisiya, mbipereka mbiri yanga kuna alungu akusowa basa.+
12 Yangʼanani pyenepi mwakudzumatirwa, imwe kudzulu;
Tetemerani mwakugopa,’ alonga Yahova,
13 ‘Thangwi mbumba yanga yacita pinthu piwiri pyakuipa:
Iwo asiya ine, mphuno ya madzi akupasa umaso,+
Mbakumba* micera yawo,
Micera yakuti nkhabe kwanisa kukoya madzi.’
14 ‘Kodi Izraeli ndi ntumiki peno bitcu adabalwa panyumba?
Mphapo thangwi yanji iye amala kutapatwa?
15 Iye alirirwa na nkhalamu zamphambvu;+
Izo zalira mwakugaluza,
Mbazicitisa kuti dziko yawo ikhale yakugopesa.
Mizinda yawo yapiswa, mbisala yakusowa anthu.
16 Mbumba ya ku Nofi*+ na ya ku Tafanesi+ zapala* padzulu pa nsolo wako.
17 Iwe wabweresa wekhene nyatwa zako,
Thangwi yakusiya Yahova Mulungu wako,+
Mu ndzidzi ukhakutsogolera iye munjira.
18 Mphapo thangwi yanji cincino usafuna kuenda ku Ejitu,+
Toera ukamwe madzi a mu nkulo wa Siori?*
Thangwi yanji usafuna kuenda ku Asirya,+
Toera ukamwe madzi a nkulo wa Eufrate?
19 Uipi wako usafunika kukulanga,
Kukhonda kukhulupirika kwako kusafunika kukusandika.
Ona, pontho pfundza kuti kusiya Yahova Mulungu wako,
Ndi pyakuipa kakamwe na pyakutsukwalisa;+
Iwe nkhabe kundigopa,’+ alonga Mbuya Wankulu Kakamwe, Yahova wa anyankhondo.
20 ‘Thangwi kale kakamwe, ine ndagwanda-gwanda goli yako,+
Mbandithumula maunyolo ako.
Mbwenye iwe walonga: “Nee ndinakutumikirani,”
Thangwi pa nthunda ibodzi na ibodzi na pantsi pa miti mikulu yonsene ya masamba akubithimira,+
Iwe ukhagona pantsi toera kucita ulukwali.+
21 Ine ndakubzwala ninga muti wa mauva akufuira,+ a mbeu zadidi kakamwe;
Mphapo waphumbusika tani pamaso panga, mbucinja kudza nthawi za muti wa mauva a ntsanga?’+
22 ‘Maseze usambe pyako na soda, mbutsukika na sabau izinji,
Mulando wako mbudapitiriza kukhala midonthi pamaso panga,’+ alonga Yahova, Mbuya Wankulu Kakamwe.
23 Mphapo thangwi yanji usalonga kuti: ‘Ine nee ndapswipisika.
Ine nee ndalambira Abhaale.’
Ona pidacita iwe mu gowa.
Nyerezera mwadidi pidacita iwe.
Iwe wakhala ninga kamelo ingʼono ikazi yakuthamanga kakamwe,
Yakuti isathamanga kuenda uku na uku mbikhonda dziwa kunaenda iyo,
24 Ninga buru ikazi yantsanga idadzolowera kukhala nʼthando,
Inanunkha mphepo toera kutundusa buru imuna.
Mbani anafuna kuikhurudza mu ndzidzi unabindula iyo?
Buru imuna nkhabe funika kuneta na kuifambira nduli;
Iwo anaigumana mu ndzidzi unabindula iyo.
25 Cita mphole-mphole gopa unadzafamba mwakusowa ntsapato,
Gopa kholongo yako inadzauma na nyota.
Mbwenye iwe walonga: ‘Nkhabe! Pyenepi nkhabe basa!+
26 Ninga mbava asakhala na manyadzo angaphatwa,
Munjira ibodzi ene, mbumba ya Izraeli yapasika manyadzo,
Iwo, amambo awo, akulu-akulu awo,
Anyantsembe awo na aprofeta awo.+
27 Iwo asapanga muti kuti: ‘Iwe ndiwe pai wanga,’+
Pontho asapanga mwala kuti: ‘Iwe ndiwe adandibala.’
Natenepa, iwo andipasira nkhodolo, mbakhonda kuyangʼana kuna ine.+
Mbwenye angagwerwa na nyatwa, iwo anadzalonga:
‘Bwerani mutipulumuse!’+
28 Mphapo cincino ali kupi alungu anu adacita imwe?+
Khala anakwanisa, mbabwere kudzakupulumusani mungagwerwa na nyatwa,
Thangwi iwe Yuda, alungu ako ndi azinji kakamwe ninga kunjipa kwa mizinda yako.+
29 Yahova alonga: ‘Thangwi yanji musapitiriza kudungunya thangwi ya ine?
Thangwi yanji monsene mwandisandukira?’+
30 Ine ndatcunyusa papezi ananu.+
31 Imwe mbumba yanga, bveserani mwadidi mafala a Yahova.
Kodi ine ndadzakhala ninga thando kuna Izraeli,
Peno ninga dziko ya cidima cikulu?
Thangwi yanji iwo akuti ndi mbumba yanga, alonga: ‘Ife tiri kufamba mwadidi.
Ife cipo tinabwerera pontho kuna imwe.’+
32 Kodi pinakwanisika kuti ntsikana aduwale pinthu pyace pyakubalikisa manungo?
Kodi nkazi anadikhira kumanga banja anaduwala tani nguwo zace zakumanga paditi?
Mbwenye mbumba yanga yandiduwala mu ntsiku zizinji kakamwe.*+
33 Nkaziwe, iwe uli na luso kakamwe yakukhunganya njira yako toera kusaka ufuni!
Iwe wapfundzisika wekhene kufamba munjira zakuipa.+
34 Nguwo zako ziri na midonthi ya ciropa ca atcerengi na ca anthu akusowa mulando,+
Maseze nee ndaaona mbakaswa nyumba yako;
Ciropa cawo ciri pa nguwo zako zonsene.+
35 Mbwenye iwe usalonga: ‘Ine nkhabe mulando.
Mwandimomwene, kuipirwa kwace na ine kwamala.’
Cincino ine ndinakutcunyusa,
Thangwi iwe usalonga: ‘Ine nee ndadawa.’
36 Thangwi yanji usanyerezera kuti kucinja-cinja kwa makhaliro ako nee ndi kwakuipa?
37 Na thangwi ineyi, unadzaphatambo nsolo wako ungadzabuluka,+
Thangwi Yahova akhonda ale adanyindira iwe;
Iwo nee anadzakuphedza.”
3 Anthu asabvundza: “Khala mamuna akhonda nkazace, nkazi unoyu mbasembwa na mamuna unango, kodi iye asafunika kubwererana naye pontho?”
Kodi dziko iyi nee yamala kupswipiswa?+
Yahova alonga: “Iwe wacita uputa na amuna azinji,+
Mphapo cincino usafunika kubwerera kuna ine?”
2 “Lamusa maso ako mbuyangʼana ku mapiri akusowa tsanga toera uone.
Ndi papi padakhonda iwe kugonwa na amuna?
Iwe ukakhala pantsi nʼkhundu mwa miseu mbuadikhira,
Ninga munthu anafuluka-fuluka nʼthando.
Iwe usapitiriza kupswipisa dziko,
Thangwi ya uputa unacita iwe na uipi wako.+
3 Na thangwi ineyi, madzi nee asabvumba,+
Pontho madzi nee asabvumba mu ndzidzi wa malimwe.
Makhaliro ako ndi ninga a nkazi anacita uputa;
Iwe wakhonda kupasika manyadzo.+
4 Mbwenye cincino iwe usandicemera, mbulonga:
‘Pai wanga, imwe ndimwe xamwali wanga kutomera mu uwana wanga!+
5 Kodi musafunika kupitiriza kukhala wakuipirwa kwenda na kwenda,
Peno kukoya kuipirwa muntima ndzidzi onsene?’
Pyenepi ndi pinalonga iwe,
Mbwenye iwe usapitiriza kucita pinthu pyonsene pyakuipa pinakwanisa iwe kucita.”+
6 Mu ntsiku za mambo Yosiya,+ Yahova andipanga: “‘Kodi waona pidacita Izraeli wakukhonda kukhulupirika? Iye akwira paphiri ibodzi na ibodzi yakulapha, mbaenda pantsi pa miti mikulu yonsene ya masamba akubithimira toera kucita uputa.+ 7 Maseze iye acita pinthu pyenepi pyonsene, ine ndapitiriza kumpanga toera abwerere kuna ine,+ mbwenye iye nee abwerera; pontho Yuda akhaona pikhacita mʼbale wace wankazi wakukhonda kubvera.+ 8 Pidaona ine pyenepi, ndapasa Izraeli wakukhonda kukhulupirika tsamba inapangiza kuti ndakhondana naye+ thangwi ya upombo wace, mbandinʼthamangisa.+ Mbwenye Yuda wakuti ndi mʼbale wace wankazi wakukhonda bvera nee agopa; iye atomambo kucita uputa.+ 9 Iye aona kuti uputa wace nee ndi cinthu cakuipa, apswipisa dziko, mbacita upombo thangwi yakulambira miyala na miti.+ 10 Mwakukhonda tsalakana pyonsene pidacitika, Yuda wakuti ndi mʼbale wace wankazi wakukhonda bvera nee abwerera kuna ine na ntima wace onsene, mbwenye abwerera mwaciphamaso,’ alonga Yahova.”
11 Yahova andipanga: “Izraeli wakukhonda kukhulupirika apangiza kukhala wakulungama kakamwe kupiringana Yuda wakukhonda bvera.+ 12 Ndoko ukalonge mafala awa kunkwiriro:+
“‘“Bwerera kuna ine iwe Izraeli wakukhonda bvera,” alonga Yahova.’+ ‘“Nee ndinadzakuyangʼanani mwakuipirwa,+ thangwi ndine wakukhulupirika,” alonga Yahova.’ ‘“Nee ndinadzakoya kuipirwa muntima ndzidzi onsene. 13 Basi ene dzindikira mulando wako, thangwi wasiya kubvera Yahova Mulungu wako. Pantsi pa miti mikulu yonsene ya masamba akubithimira, iwe ukhapitiriza kugona na amuna a madziko anango. Imwe mwakhonda kubvera fala yanga,” alonga Yahova.’”
14 “Bwererani kuna ine imwe ana akukhonda bvera,” alonga Yahova. “Thangwi ine ndadzakhala mwanaciro wanu wandimomwene;* ndinadzakwata mʼbodzi mu nzinda ubodzi na ubodzi, ndinadzakwata awiri pabanja ibodzi na ibodzi mbandikubweresani ku Sioni.+ 15 Ndinadzakupasani akumbizi akuti anadzacita pinthu mwakubverana na pinafuna ine,+ iwo anadzakudyesani na cidziwiso pabodzi na luso yakubvesesa. 16 Mu ntsiku zenezi, imwe munadzabala ana mbamunjipa mu dziko ineyi,” alonga Yahova.+ “Anthu nkhabe kudzalongabve kuti: ‘Bokosi ya Cibverano ca Yahova!’ Iwo nkhabe kudzainyerezera nee kuikumbuka, nee kuitsuwa, pontho iyo nee inadzacitwabve. 17 Mu ndzidzi unoyu, Yerusalemu anadzacemerwa mpando waumambo wa Yahova;+ anthu a madzindza onsene anadzagumanyikana mu Yerusalemu toera kusimba dzina ya Yahova,+ iwo nee anapitirizabve kucita pinthu pinafuna mitima yawo yakuipa.”
18 “Mu ntsiku zenezi, anthu a ku Yuda na anthu a ku Izraeli anadzafamba pabodzi pene,+ iwo anadzabuluka pabodzi pene ku dziko yakunkwiriro mbaenda ku dziko idapasa ine ambuyanu ninga unthaka.+ 19 Ine ndalonga: ‘Ndakomerwa pidakuikha ine pakati pa ananga mbandikupasa dziko yadidi, unthaka wadidi kakamwe pakati pa madzindza anango!’+ Inembo ndanyerezera kuti imwe mbamudandicemera, ‘Pai wanga,’ pontho kuti nee mbamudasiya kunditowera. 20 ‘Mbwenye mwandimomwene, ninga nkazi wakukhonda kukhulupirika anacita upombo mbasiya mamunace, imwembo mbumba ya Izraeli nee mwakhala wakukhulupirika kuna ine,’+ alonga Yahova.”
21 Mʼmapiri akusowa tsanga muli kubveka fala,
Kulira na kudembetera kwa mbumba ya Izraeli,
Thangwi iwo agongonyesa njira zawo;
Iwo aduwala Yahova Mulungu wawo.+
22 “Bwererani kuna ine imwe ana akukhonda bvera.
Ine ndinadzakuwangisani, mbamukhonda kukhala pontho anthu akukhonda bvera.”+
“Ife tiri pano! Ife tabwera kuna imwe,
Thangwi imwe Yahova, ndimwe Mulungu wathu.+
23 Mwandimomwene, ife tanyengezeka tekhene pidakhuwa ife nʼnthunda na mʼmapiri.+
Mwandimomwene, Yahova Mulungu wathu ndi mpulumusi wa Izraeli.+
24 Kutomera mu uphale wathu cinthu cakupasa manyadzo* cisakwata pinthu pyonsene pyakuti ambuyathu apiphatira basa mwakuwanga,+
Mabira awo na ngʼombe zawo,
Anawo amuna na akazi.
25 Tendeni tigone pantsi thangwi ya manyadzo athu,
Mbatifinika kupwazika kwathu,
Thangwi ife tadawira Yahova Mulungu wathu,+
Ife na ambuyathu kutomera mu uwana wathu mpaka lero,+
Pontho ife nee tabvera fala ya Yahova Mulungu wathu.”
4 Yahova alonga: “Iwe Izraeli, ungabwerera,
Ungabwerera kuna ine,
Pontho ungabulusa madzimunthu ako akunyanyasa pamaso panga,
Nee unapitirizabve kukhala munthu wakuthawa-thawa.+
2 Ungacita pinthu pyandimomwene, pyadidi na pyakulungama, mbudumbira kuti:
‘Ndiri kudumbira mu dzina ya Yahova Mulungu wa mʼmaso!’
Penepo madzindza a anthu anadzapaswa nkhombo kubulukira mwa iye,
Pontho iwo anadzagaya thangwi ya iye.”+
3 Thangwi ipi ndi pidalonga Yahova kuna anthu a ku Yuda na a ku Yerusalemu:
4 Cenesekani* pamaso pa Yahova,
Pontho sidzani mitima yanu,+
Imwe anthu a ku Yuda na imwe anakhala mu Yerusalemu,
Toera ukali wanga ukhonde kugaka ninga moto,
Mbugaka munjira yakuti nkhabe anafuna kwanisa kuuthimisa,
Thangwi ya pinthu pyakuipa pinacita imwe.”+
5 Longani pyenepi ku Yuda, pontho dziwisani pyenepi ku Yerusalemu.
Khuwani, pontho lizani nyanga mu dziko yonsene.+
Khuwani mwakugaluza kakamwe, mbamulonga: “Gumanyikanani,
Tendeni tithawire mʼmizinda idazungulirwa na mipanda yakuwanga.+
6 Lamusani cidzindikiro* cinapangiza njira yakuenda ku Sioni.
Sakani pakuthawira, lekani kulimira kwene basi,”
Thangwi ndiri kubweresa nyatwa kubuluka kunkwiriro,+ nyatwa ikulu kakamwe.
7 Iye abuluka ninga nkhalamu inabuluka ntsanga pa mbuto inabisala iyo;+
Nyakufudza madzindza a anthu akubwera.+
Iye abuluka ku mbuto inakhala iye toera kucitisa dziko yanu kukhala mbuto yakugopesa.
Mizinda yanu inadzafudzwa, mbisala madembe akusowa anthu.+
8 Na thangwi ineyi, bvalani masakha,+
Lirani, mbamutsukwala,
Thangwi ukali ukulu wa Yahova nee wabuluka pana ife.
9 Yahova alonga: “Pa ntsiku ineyi, mambo anadzaluza cipapo,*+
Akulu-akulu anadzaluzambo cipapo;
Anyantsembe anadzagopa kakamwe, aprofeta anadzasowa cakucita.”+
10 Penepo ine ndalonga: “Mama ine pano Yahova, Mbuya Wankulu Kakamwe! Mwandimomwene imwe musanyengeza kakamwe mbumba iyi+ na ya ku Yerusalemu, mungalonga kuti: ‘Imwe munadzakhala na ntendere,’+ mu ndzidzi wakuti supada iri pakhosi pathu.”*
11 Pa ndzidzi unoyu, mbumba iyi na ya ku Yerusalemu inadzapangwa kuti:
“Mphepo yakupisa kakamwe inabuluka ku mapiri akusowa tsanga a kuthando,
Inadzapepesa mbumba yanga;*
Iyo nee inabwera toera kumburusa mapwepwa peno kucenesa tirigu.
12 Mphepo iri kubwera na mphambvu yonsene buluka kweneko mwakubverana na pidalonga ine.
Cincino ndinaadziwisa kutonga kunafuna kuacita ine.
13 Onani! Iye anabwera ninga makole a madzi anafuna kubvumba,
Pontho ngolo zace za nkhondo ndi ninga condzi.+
Makavalo ace asathamanga kakamwe kupiringana pyapungu.+
Dzedze kuna ife, thangwi tamala kufudzwa!
14 Iwe Yerusalemu, tsuka uipi wa muntima mwako toera upulumuswe.+
Mpaka lini unapitiriza kukhala na manyerezero akuipa?
15 Fala iri kubweresa mphangwa buluka ku Dhani,+
Pontho iri kudziwisa nyatwa kubulukira ku mapiri a Efraimu.
16 Longani pyenepi kuna madzindza a anthu;
Dziwisani pyenepi ku Yerusalemu.”
“Anyakuonera anafika buluka ku dziko yakutali,
Pontho iwo anadzakhuwira mizinda ya ku Yuda.
17 Iwo anazungulira Yerusalemu mʼmakhundu onsene ninga anyakuonera kunja kwa nzinda,+
Thangwi iye akhonda kundibvera,”+ alonga Yahova.
18 “Makhaliro ako na macitiro ako pinadzakubwerera.+
Nyatwa yako ndi ikulu kakamwe,
Thangwi kukhonda bvera kwako kwamera mitcitci muntima mwako!”
19 Ui mama ine, ui mama ine pano!
Ndiri kubva kupha kakamwe muntima mwanga.
Ntima wanga uli kupaluka kakamwe.
Nee ndinakwanisa kumatama,
Thangwi ndabva kulira kwa nyanga,
20 Zisalongwa mphangwa thangwi ya nyatwa padzulu pa nyatwa zinango,
Thangwi dziko yonsene iri kufudzwa.
Mwakukhonda dikhira misasa yanga yafudzwa,
Mu ndzidzi wakucepa, nguwo za misasa yanga zamala kupanduka-panduka.+
21 Mpaka lini ndinapitiriza kuona cidzindikiro cinapangiza njira yakuenda ku Sioni?
Mpaka lini ndinapitiriza kubva kulira kwa nyanga?+
22 “Thangwi mbumba yanga ndi yakusowa ndzeru;+
Iyo nkhabe kundilemedza.
Iwo ndi ana akusowa ndzeru na akusowa luso yakubvesesa.
Iwo ali na ndzeru zakukwana toera kucita pinthu pyakuipa,
Mbwenye iwo nkhabe dziwa kucita pinthu pyadidi.”
23 Ine ndayangʼana dziko yawo! Iyo ikhali thando yakusowa pinthu.+
Ine ndayangʼana kudzulu, mbwenye nee kukhalibve ceza.+
24 Ine ndayangʼana mapiri, mbandiona kuti iwo akhatetemera,
Pontho nthunda zikhatetemera.+
25 Ine ndayangʼana, mbandiona kuti nee pakhalibve munthu,
Pontho mbalame zonsene zikhadathawa.+
26 Ine ndayangʼana, mbandiona kuti munda wa miti ya misapo wadzakhala thando,
Pontho mizinda yace yonsene ikhadamala kufudzwa.+
Pyenepi pyacitika thangwi ya Yahova,
Thangwi iye aipirwa kakamwe.
27 Yahova alonga: “Dziko yonsene inadzakhala yakusowa anthu,+
Mbwenye nee ndinafudza dziko yonsene.
Thangwi ine ndapilonga, pontho ndatonga kupicita,
Ine nee ndinacinja manyerezero anga,* pontho nee ndinabwerera nduli.+
29 Pidabva iwo kukhuwa kwa anyamakavalo na anyamauta,
Anthu onsene a mu nzinda athawa.+
Iwo asathawira mʼmisitu,
Mbabisala mʼmiyala.+
Anthu athawa mʼmizinda yonsene,
Pontho nkhabebve munthu anakhala mwenemu.”
30 Nakuti cincino wamala kufudzwa, unacitanji pontho?
Iwe ukhabvala nguwo zadidi kakamwe,*
Ukhabalikisa manungo ako na pyakubalikisa pya ouro,
Mbukhwaza maso ako na tinta yakupswipa.
Mbwenye kubalikisa kwako manungo kukhali kwapezi,+
Thangwi ale akhakufuna akukhonda;
Cincino iwo asafuna kukupha.+
31 Ndiri kubva kubulira ninga kwa nkazi anabva kupha,
Kukhuwa ninga kunacita nkazi pakubala mwana wakutoma,
Fala ya mwana wankazi wa Sioni mbakapuma mwakunentseka.
Iye asafuthula manja ace, mbalonga:+
“Dzedze kuna ine, thangwi ndaneta na anyakupha anthu!”
5 Famba-fambani mʼmiseu ya Yerusalemu.
Yangʼanani nʼkhundu, mbamuonesesa mwadidi.
Sakani mu mbuto zapakweca toera muone,
Khala munagumana munthu anacita pinthu pyakulungama,+
Wakuti asasaka kukhala munthu wakukhulupirika,
Munganʼgumana, ine ndinalekerera nzinda unoyu.
2 Maseze iwo alonge kuti: “Tiri kudumbira mu dzina ya Yahova Mulungu wa mʼmaso!”
Ngakhale tenepo, kudumbira kwawo mbakudakhala kwapezi.+
3 Yahova, kodi imwe nee musakomerwa maso anu angaona kukhulupirika?+
Imwe mwaatcunyusa, mbwenye iwo nee abva kupha.
Imwe mwafudza azinji a iwo, mbwenye iwo nee atawira kulangwa.+
4 Natenepa, ine ndalonga: “Mwandimomwene iwo ndi anthu ene pyawo.
Iwo asacita pinthu mwaudzemwa thangwi iwo nkhabe dziwa pinafuna* Yahova,
Mitemo ya Mulungu wawo.
5 Ine ndinaenda kuna akulu-akulu toera ndicedze nawo,
Thangwi iwo asafunika kudziwa pinafuna Yahova,
Mitemo ya Mulungu wawo.+
Mbwenye onsene agwanda goli yawo,*
Mbathumula nkhambala.”
6 Na thangwi ineyi, iwo asalumwa na nkhalamu za mu nsitu,
Iwo asaphiwa na bindzi ya nʼthando,
Nyalugwe asaabisalira cifupi na mizinda yawo.
Onsene anabuluka mʼmizinda asakhwadzulwa-khwadzulwa.
Thangwi madawo awo ndi mazinji;
Macitiro awo akukhonda kukhulupirika ndi mazinji kakamwe.+
7 Ndinakulekerera tani pinthu pyenepi?
Anako andisiya,
Iwo asadumbira mu dzina ya alungu authambi.+
Maseze ine ndikhaapasa pinafuna iwo,
Iwo akhapitiriza kucita upombo,
Iwo akhaenda ninga nsoka kunyumba ya puta.
8 Iwo akhala ninga makavalo adalamukirwa, mbafuna kakamwe kupita mʼmabonde,
Mʼbodzi na mʼbodzi asasirira nkazi wa ndzace.+
9 “Kodi nee ndisafunika kuatcunyusa thangwi ya pinthu pyenepi?” alonga Yahova.
“Kodi nee ndisafunika kubwezera pinthu pidacita mbumba ineyi?”+
10 “Ndokoni kuminda ya mauva ya ku Yerusalemu toera muifudze,
Mbwenye lekani kufudziratu yonsene.+
Gwandani nthawi zace zipswa,
Thangwi izo nee ndi za Yahova.
11 Thangwi anthu a dzindza ya Izraeli na a dzindza ya Yuda,
Andisandukira kakamwe,” alonga Yahova.+
12 “Iwo akhonda Yahova, pontho asalonga:
‘Iye nee anacita pinthu.+
Nee nyatwa ibodzi inafuna kutigwera;
Ife nee tinadzathabuka na nkhondo, nee na njala.’+
13 Aprofeta asalonga pinthu pyakusowa basa,*
Mafala a Mulungu nee ali muna iwo.
Pyenepi mbapiacitikire!”*
14 Mbwenye ipi ndi pidalonga Yahova, Mulungu wa anyankhondo:
“Nakuti anthu anewa asalonga pyenepi,
Ndinacitisa kuti mafala anga akhale moto pamulomo pako,+
Mbumba iyi inadzakhala ninga nkhuni,
Mwakukhonda penula, moto unoyu unadzaapisa.”+
15 Yahova alonga: “Imwe mbumba ya Izraeli, ine ndinabweresa kuna imwe mbumba yakutali,+
Ndi mbumba yakuti iripo kutomera kale,
Mbumba yakale,
Mbumba yakuti cilongero cace imwe nkhabe kucidziwa,
Mbumba yakuti mafalace imwe nee munaabvesesa.+
16 Budu yawo yakuikhira mapswimo ndi ninga nthumbi yakufunguka;
Onsene ndi anyankhondo.
17 Iwo anadzafudza pinthu pinabvuna imwe na pyakudya pyanu.+
Iwo anadzapha ananu amuna na akazi.
Anadzapha ngʼombe zanu na mabira anu.
Anadzagwanda miti yanu ya mauva na misambvu yanu.
Pontho anadzapha na supada anthu a mʼmizinda yanu yakuwanga inanyindira imwe.”
18 “Ngakhale mu ntsiku zenezi,” alonga Yahova, “nee ndinadzakufudzani monsene.+ 19 Iwo angabvundza kuti: ‘Thangwi yanji Yahova Mulungu wathu aticitira pinthu pyenepi pyonsene?’ Iwe usafunika kuatawira: ‘Ninga mudandisiya imwe toera kutumikira mulungu unango mu dziko yanu, munjira ibodzi ene, imwe munadzatumikira anthu a dziko inango, mu dziko yakuti nee ndi yanu.’”+
20 Longa ipi kuna dzindza ya Yakobe,
Dziwisa pyenepi ku Yuda:
21 “Bveserani ipi imwe mbumba yakuti ndi madzemwa na yakusowa ndzeru:+
22 ‘Kodi imwe nkhabe kundigopa?’, alonga Yahova,
‘Nee mukhafunika kutetemera pamaso panga?
Ndine adaikha tcetca ninga madire a bara,
Ntemo wakwenda na kwenda, wakuti iyo nee isafunika kupiringana madire anewa.
Maseze kuoneke mabimbi makulu, iwo nkhabe kwanisa kunumpha madire,
Maseze iwo asatitima, iwo nkhabe kwanisa kupiringana madire.+
23 Mbwenye mbumba iyi ndi anthu akuuma ntima na akukhonda bvera;
Iwo asiya njira yanga, mbatowezera njira inafuna iwo.+
24 Iwo nkhabe kulonga muntima mwawo kuti:
“Tendeni tigope Yahova Mulungu wathu,
Ule anabvumbisa madzi pa ndzidzi wakuthema,
Madzi akutoma na akumalisa,
Ule anacita pyonsene toera tikhale na masumana akubvuna.”+
25 Madodo anu ndiwo adapingiza toera pinthu pyenepi pikhonde kucitika;
Madawo anu ndiwo adakupingizani toera mukhonde kutambira pinthu pyadidi.+
26 Thangwi pakati pa mbumba yanga pali na anthu akuipa.
Iwo asapitiriza kubisala ninga anyakuteya misampha ya mbalame angabwathama pantsi.
Iwo asakhunganya misampha yakugopswa kakamwe;
Iwo asamanga anthu pa misampha ineyi.
27 Ninga cipwere cidadzala na mbalame,
Nyumba zawo zadzalambo na pinthu pyakubiwa.+
Na thangwi ineyi, iwo adzakhala anthu amphambvu na akupfuma.
28 Iwo akhuma mbakhala na khanda yakuzwerera;
Iwo adzala na pinthu pyakuipa mpaka kutayikira.
Toera pinthu pyawo pifambe mwadidi,
Iwo nkhabe kutsalakana mulando wa mwana waumphawi;*+
Pontho asakhonda kutonga mwakulungama anthu akutcerenga.’”+
29 “Kodi nee ndisafunika kuatcunyusa thangwi ya pinthu pyenepi?” alonga Yahova.
“Kodi nee ndisafunika kubwezera pinthu pidacita mbumba ineyi?
30 Cinthu cakutsukwalisa na cakuipa ciri kucitika mu dziko iyi:
31 Aprofeta asalonga maprofesiya authambi,+
Anyantsembe asaphatisira mphambvu zawo toera kuponderera anthu,
Pontho mbumba yanga isakomerwa na pinthu pyenepi.+
Mphapo munacitanji kumala kungafika?”
6 Imwe ana a dzindza ya Bhenjamini, sakani mbuto yakuthawira, kutali na Yerusalemu.
Thangwi nyatwa iri kubwera buluka kunkwiriro, cidengwa cikulu.+
2 Nzinda* wa Sioni walandana na nkazi wakubalika na wautumbe.+
3 Akumbizi anabwera na mikumbi ya pifuyo pyawo.
Iwo anadzamanga misasa yawo nʼkhundu mwa nzinda,+
Mʼbodzi na mʼbodzi anadzakwata nkumbi wa pifuyo mbaenda kapidyesa.+
4 “Khunganyikani toera kumenya nkhondo na nzinda unoyu!
Lamukani, tendeni tikamenyane nawo namasikati!”
“Dzedze kuna ife, thangwi dzuwa iri kudoka,
Thangwi mwapangʼono-pangʼono kunja kuli kupswipa!”
5 “Lamukani, tendeni tikamenyane nawo namasiku,
Pontho tifudze nyumba zawo zakuwanga za ndzulu.”+
6 Thangwi Yahova wa anyankhondo alonga:
“Gwandani miti toera kumanga mbuto yakumenyera nkhondo na Yerusalemu.+
Yerusalemu ndi nzinda wakuti usafunika kutcunyuswa;
Thangwi wadzala na makhaliro akupondererana.+
7 Ninga ncera usakoya madzi akutonthola,
Yerusalemu asakomerwa na pinthu pyakuipa ninga ndi pinthu pyadidi.
Musabveka mphangwa za uphanga na kuthabuka kwa anthu;+
Mautenda na miliri piri pamaso panga ndzidzi onsene.
8 Iwe Yerusalemu, bvera cenjezo, ungakhonda kucita pyenepi, ine ndinanyanyasirwa na iwe mbandikusiya;+
Ndinakucitisa kukhala madembe, dziko yakusowa anthu.”+
9 Ipi ndi pidalonga Yahova wa anyankhondo:
“Iwo anadzaphalakatira Aizraeli onsene adasalikira ninga munaphalakatirwa mauva akumalisa mʼmuti wa mauva.
Bwerera toera utcode pontho ninga pinacita munthu anatcoda mauva.”
10 “Kodi ndinalonga na ani, pontho ndinacenjeza ani?
Mbani anafuna bvesera?
Makutu awo afungika; na thangwi ineyi iwo nkhabe kwanisa kubvesesa.+
Mafala a Yahova adzakhala akupwazika kuna iwo;+
Iwo nkhabe komerwa nawo.
11 Natenepa, ukali wa Yahova wakuti uli muna ine uli kutayikira,
Ndaneta na kuuphatirira.”+
“Ubhomereni anapiana mu nseu,+
Na misoka ya aphale adagumanyikana pabodzi pene.
Thangwi onsene anadzaphatwa: Mamuna na nkazace,
Anyakugwesera pabodzi na ale adakalamba kakamwe.+
12 Nyumba zawo zinadzaperekwa kuna anthu anango,
Kuphatanizambo minda yawo pabodzi na akazawo.+
Thangwi ine ndinadzafuthula djanja yanga toera kutcunyusa anthu anakhala mu dziko ineyi,” alonga Yahova.
13 “Kutomera wangʼono mpaka wankulu, onsene asawina pinthu munjira yakukhonda kulungama;+
Kutomera mprofeta mpaka nyantsembe, onsene asabera andzawo.+
14 Iwo asayesera kukondza pironda pya mbumba yanga mwaciphamaso, mbalonga:
‘Pali na ntendere! Pali na ntendere!’*
Mu ndzidzi wakuti nkhabepo ntendere.*+
15 Kodi iwo asakhala na manyadzo thangwi ya pinthu pyakunyanyasa pidacita iwo?
Iwo nkhabe kukhala na manyadzo, nee pangʼono pene!
Iwo nkhabe dziwa kuti ninji kukhala na manyadzo!+
Na thangwi ineyi, iwo anadzagwa pakati pa ale adagwa.
Iwo anadzagwa ine ndingaatcunyusa,” alonga Yahova.
16 Ipi ndi pidalonga Yahova:
“Limirani pa mphambano za miseu mbamuyangʼana.
Bvundzani kuti ndi ipi miseu yakale,
Bvundzani kuti ndi ipi njira yadidi, pontho fambani munjira ineyi,+
Natenepa, imwe munadzapuma.”
Mbwenye iwo alonga: “Ife nee tinafamba munjira ineyi.”+
Mbwenye iwo alonga: “Ife nee tinabvesera.”+
18 “Natenepa, bveserani imwe madzindza a anthu!
Imwe mbumba,
Dziwani pinthu pinafuna kuacitikira.
19 Bveserani imwe monsene munakhala pa dziko yapantsi!
Ine ndinabweresa nyatwa kuna mbumba iyi,+
Thangwi ya manyerezero awo akuipa,
Iwo nee abvera mafala anga,
Pontho akhonda kubvera mwambo wanga.”*
20 “Ndiri napyo basa yanji khala usabweresa olibhano wa ku Sabha,
Na kalamo* wa ku dziko yakutali?
Ntsembe zako zakupiswa nee ndi zakutawirika,
Pontho ntsembe zako nee ndisakomerwa nazo.”+
21 Natenepa Yahova alonga:
“Ndinaikha miyala yakugwegwedusa patsogolo pa mbumba iyi,
Iwo anadzagwegweduka nayo,
Ababa na ana,
Andzawo apacisa na axamwali awo,
Pontho onsene anadzafa.”+
22 Yahova alonga tenepa:
“Onani, mbumba iri kubwera buluka ku dziko yakunkwiriro,
Pontho mbumba yamphambvu kakamwe inadzabwereswa buluka ku mbuto zakutali kakamwe za dziko yapantsi.+
23 Iwo anabwera na mauta pabodzi na madipa.
Iwo ndi akuipa mitima na akusowa ntsisi.
Mafala awo anadzatitimira ninga bara,
Pontho iwo anabwera na makavalo.+
Iwe nzinda* wa Sioni, iwo anabwera kuna iwe ninga anyankhondo adapakana toera kumenya nkhondo.”
24 Ife tabva mphangwa za pinthu pyenepi.
Mbatikhala akufewa manungo;+
Ife takundwa na kudzudzumika,
Tiri kubva kupha ninga kunabva nkazi pakubala.+
25 Lekani kubuluka kunja kwa nzinda,
Pontho lekani kufamba mʼmiseu,
Thangwi nyamalwa ali na supada;
Dziko yonsene iri na pinthu pyakugopswa.
26 Iwe mbumba yanga,
Bvala masakha+ mbubulumunda pa dotha.
Bvala nguwo zaciliro mbulira kakamwe ninga kuti waferwa na mwanako mʼbodzi basi,+
Thangwi nyakufudza anabwera kuna ife mwakututumusa.+
27 “Ine ndakucitisa kukhala nyakudinga utale pakati pa mbumba yanga,
Munthu wakuti asadinga mwakukwana;
Onesesa mwadidi mbudinga makhaliro awo.*
28 Iwo ndi anthu akukhonda kubva kakamwe kupiringana onsene,+
Ndzidzi onsene asalonga pinthu pinaipisa makhaliro a andzawo.+
Iwo ndi ninga nkuwa na utale;
Onsene pakati pawo asacita pinthu pyakuipa.
29 Mabudu a nthembe akupepesa nawo moto pa gota amala kugonontha.
Pa moto wawo basi ene pasabuluka ntobve.
30 Mwandimomwene anthu anadzaacemera parata idakhondiwa,
Thangwi Yahova aakhonda.”+
7 Awa ndi mafala adalonga Yahova kuna Yeremiya: 2 “Limira pansuwo wa nyumba ya Yahova, mbudziwisa penepo mphangwa izi: ‘Bveserani mafala a Yahova, imwe monsene anthu a ku Yuda, anapita na misuwo iyi toera kugodama pamaso pa Yahova. 3 Ipi ndi pidalonga Yahova wa anyankhondo, Mulungu wa Izraeli: “Sasanyirani makhaliro anu* na macitiro anu, natenepa ine ndinakutawirisani toera mupitirize kukhala mu dziko ino.+ 4 Lekani kunyindira mafala akunyengeza, mbamulonga kuti: ‘Iyi ndi templo ya Yahova, templo ya Yahova, templo ya Yahova!’+ 5 Thangwi mwandimomwene, mungasasanyira makhaliro anu na macitiro anu, mungatonga mwakulungama miseru ya anthu;+ 6 mungakhonda kuponderera anthu a dziko inango, ana aumphawi* na azice;*+ mungakhonda kupha anthu akusowa mulando mu dziko ino; mbamukhonda kulambira alungu anango, pinthu pyakuti pinakubwereserani nyatwa;+ 7 ine ndinakutawirisani kuti mupitirize kukhala kwenda na kwenda mu dziko ino idapasa ine ambuyanu.”’”
8 “Mbwenye imwe musakhulupira mafala akunyengeza;+ pyenepi nee pinakuphedzani, nee pangʼono pene. 9 Kodi imwe munakwanisa kuba,+ kupha munthu, kucita upombo, kudumbira papezi,+ kupereka ntsembe kuna Bhaale+ na kulambira alungu anango akuti nee mukhaadziwa, 10 buluka penepo, mbamubwera pamaso panga nʼnyumba ino inadziwika na dzina yanga, mbamulonga kuti: ‘Ife tinapulumuswa,’ maseze mwacita pinthu pyenepi pyonsene pyakunyanyasa? 11 Kodi nyumba ino inadziwika na dzina yanga yadzakhala dzimba ya mambava kuna imwe?+ Dziwani kuti ine ndiri kuona pyenepi,” alonga Yahova.
12 “‘Natenepa, cincino ndokoni ku Silo,+ ku mbuto idasankhula ine pakutoma+ toera dzina yanga ipaswe mbiri, pontho onani pidacita ine pa mbuto ineyi thangwi ya uipi wa mbumba yanga ya Izraeli.+ 13 Mbwenye imwe mwapitiriza kucita pinthu pyenepi pyonsene,’ alonga Yahova, ‘maseze ine ndikhalonga na imwe mwakubwereza-bwereza, imwe nee mwandibvesera.+ Ine ndikhakucemerani mwakubwereza-bwereza, mbwenye imwe nee mukhanditawira.+ 14 Natenepa, ine ndinadzacita pibodzi pyene ninga pidacita ine ku Silo.+ Ndinacita pyenepi panyumba inadziwika na dzina yanga,+ mbuto ire inanyindira imwe,+ idapereka ine kuna imwe na ambuyanu. 15 Ine ndinakuthamangisani pamaso panga, ninga mudathamangisa ine abale anu onsene, anthu onsene a dzindza ya Efraimu.’+
16 “Mbwenye iwe leka kucita phembero thangwi ya mbumba iyi. Leka kulira, leka kucita phembero peno kudembetera thangwi ya iwo,+ thangwi ine nee ndinakubvesera.+ 17 Kodi iwe nee ukuona pinacita iwo mʼmizinda ya ku Yuda na mʼmiseu ya ku Yerusalemu? 18 Ana asagumanya nkhuni, ababawo asagasa moto, akazawo asamunya ufa toera kucita mikate yakupereka ntsembe kuna Nyanyi Wakudzulu,*+ pontho iwo asapereka ntsembe za pyakumwa kuna alungu anango toera kunditsukwalisa.+ 19 ‘Kodi iwo ali kuthabusa* ine?’ alonga Yahova. ‘Kodi iwo nee ali kuthabusika okhene, mbapasika manyadzo?’+ 20 Mbwenye Yahova Mbuya Wankulu Kakamwe alonga: ‘Onani! kuipirwa kwanga na ukali wanga pinadzagwera mbuto iyi,+ pinadzagwerambo anthu na pinyama, miti ya ntsanga na misapo ya pa dziko yapantsi; iwo unadzagaka, pontho nee unadzathimiswa.’+
21 “Ipi ndi pidalonga Yahova wa anyankhondo, Mulungu wa Izraeli: ‘Pitirizani, bvungazani ntsembe zanu zakupiswa na ntsembe zanu zinango, pontho dyani nyama.+ 22 Thangwi pa ntsiku idabulusa ine ambuyanu mu dziko ya Ejitu, ine nee ndalonga nawo peno kuapanga cinthu thangwi ya ntsembe zakupiswa na ntsembe zinango.+ 23 Mbwenye ine ndaapasa ntemo uyu: “Bverani fala yanga, ine ndinadzakhala Mulungu wanu, imwe mbamukhala mbumba yanga.+ Ndzidzi onsene fambani munjira inafuna ine kukupangizani toera pinthu pyonsene pikufambireni mwadidi.”’+ 24 Iwo nee abvesera peno kubvesesa mwadidi;+ mbwenye akhacita pinthu pikhanyerezera iwo, mbapitiriza kutowezera mitima yawo yakuipa,+ pontho iwo akhabwerera nduli, mbakhonda kuenda kutsogolo, 25 kutomera pa ntsiku idabuluka ambuyanu mu dziko ya Ejitu mpaka lero.+ Na thangwi ineyi, ine ndikhatuma atumiki anga onsene akuti ndi aprofeta mbabwera kuna imwe, ndikhaatuma ntsiku zonsene, pontho ndikhacita pyenepi mwakubwereza-bwereza.*+ 26 Mbwenye iwo akhonda kundibvera, pontho nee atsalakana pikhalonga ine.+ Kusiyapo pyenepi, iwo aumisa mitima yawo, mbacita pinthu pyakuipa kakamwe kupiringana pidacita ambuyawo!
27 “Iwe unadzaapanga mafala anewa onsene,+ mbwenye iwo nee anakubvera; iwe unadzaacemera, mbwenye iwo nee anakutawira. 28 Pontho iwe unadzaapanga kuti: ‘Iyi ndi dzindza yakuti nee yabvera fala ya Yahova Mulungu wawo, mbikhonda kusandikwa. Iwo asiya kukhala akukhulupirika, pontho nkhabebve munthu analonga pya kukhulupirika pakati pawo.’+
29 “Cinga tsisi yako* mbuitaya, pontho imba nyimbo yaciliro mʼmapiri akusowa tsanga, thangwi Yahova akhonda, pontho anadzasiya dzindza iyi idantsukwalisa. 30 ‘Thangwi mbumba ya Yuda yacita pinthu pyakuipa pamaso panga,’ alonga Yahova. ‘Iwo aikha madzimunthu awo akunyanyasa nʼnyumba inadziwika na dzina yanga toera aipswipise.+ 31 Iwo amanga mbuto zaulambiri* ku Tofeti, nʼGowa ya Mwana wa Inoni,*+ toera kupisa pa moto anawo amuna na akazi,+ pinthu pyakuti nee ndaapanga, pontho cipo ndapinyerezera muntima mwanga.’+
32 “‘Natenepa, ziri kufika ntsiku,’ alonga Yahova, ‘zakuti mbuto iyi nee inadzacemerwabve Tofeti peno Gowa ya Mwana wa Inoni,* mbwenye inadzacemerwa Gowa Inapherwa Anthu. Iwo anadzafikira anthu akufa ku Tofeti mpaka kusoweka mbuto toera kuikha anthu akufa.+ 33 Pontho manungo akufa a mbumba ineyi anadzakhala cakudya ca mbalame na ca pinyama pa dziko yapantsi, nkhabe munthu anafuna kupithamangisa.+ 34 Ine ndinadzamatamisa ale anakhuwa mwakutsandzaya na ale anakhuwa mwakukomerwa, pontho ndinadzamatamisa mankhadzi wamamuna na mankhadzi wankazi+ mʼmizinda ya ku Yuda na mʼmiseu ya ku Yerusalemu, thangwi dziko inadzafudzwa, mbisala madembe.’”+
8 “Pa ndzidzi unoyu,” alonga Yahova, “magogodo a amambo a ku Yuda, magogodo a atsogoleri, magogodo a anyantsembe, magogodo a aprofeta na magogodo a anthu anakhala mu Yerusalemu anadzabuluswa munthumbi. 2 Magogodo anewa anadzasiyiwa pakweca, mbamwanikirwa na dzuwa, mwezi na pinthu pyonsene pyakudzulu,* pyakuti iwo akhapifuna, akhapitumikira, akhapitowera, akhapisaka mbapigodamira.+ Iwo nee anadzagumanywa nee kuikhwa munthumbi. Mbwenye anadzakhala ninga ndimu pa mataka.”+
3 “Mu mbuto zonsene zinafuna ine kuamwaza, ale anafuna kupulumuka pakati pa mbumba ineyi yakuipa anakhonda kukhala na umaso mbasankhula pyawo kufa,” alonga Yahova wa anyankhondo.
4 “Apange kuti: ‘Ipi ndi pidalonga Yahova:
“Kodi iwo anadzagwa mbacimwana kulamuka pontho?
Kodi munthu mʼbodzi angabwerera nduli, unango nee anabwererambo nduli?
5 Thangwi yanji anthu awa a ku Yerusalemu asapitiriza na makhaliro awo akukhonda kukhulupirika?
Iwo asapitiriza kucita pinthu pyakunyengeza;
Iwo asakhonda kubwerera nduli.+
6 Ine ndabva mbandipitiriza kubvesera, mbwenye iwo nee akhalonga pinthu pyandimomwene.*
Nkhabe munthu adatcunyuka madawo ace, nee kubvundza kuti: ‘Ninji pyenepi pidacita ine?’+
Mʼbodzi na mʼbodzi asabwerera mbacita pinthu ninga munacitira anthu azinji, ninga makavalo anathamanga kuenda kunkhondo.
7 Soliri yakuti ndi mbalame inamburuka kudzulu isadziwa ndzidzi wace;*
Djiwa, nyantambamibvi na ntcenga pisabwerera ndzidzi wawo ungakwana.
Mbwenye mbumba yanga nkhabe kudziwa ndzidzi wakuti ine Yahova ndinadzaatonga.”’+
8 ‘Thangwi yanji musalonga kuti: “Ndife anthu audziwisi pontho tiri na mwambo wa Yahova”?
Mwandimomwene, apfundzisi a mwambo asaphatisira lapi+ yawo toera kulemba pinthu pyauthambi.
9 Anthu audziwisi apaswa manyadzo.+
Iwo agopa kakamwe pontho anadzaphatwa.
Onani! Iwo akhonda mafala a Yahova,
Ndi udziwisi upi uli na iwo?
10 Na thangwi ineyi, ine ndinadzapereka akazawo kuna amuna anango,
Minda yawo ndinaipereka kuna anthu anango;+
Thangwi kutomera wangʼono mpaka wankulu, onsene asawina pinthu munjira yakukhonda kulungama;+
Kutomera mprofeta mpaka nyantsembe, onsene asabera andzawo.+
11 Iwo asayesera kukondza pironda pya mbumba yanga mwaciphamaso, mbalonga:
“Pali na ntendere! Pali na ntendere!”
Mu ndzidzi wakuti nkhabepo ntendere.+
12 Kodi iwo asakhala na manyadzo thangwi ya pinthu pyakunyanyasa pidacita iwo?
Iwo nkhabe kukhala na manyadzo, nee pangʼono pene!
Iwo nkhabe dziwa kuti ninji kukhala na manyadzo!+
Na thangwi ineyi, iwo anadzagwa pakati pa ale adagwa.
Iwo anadzagwa ine ndingaatcunyusa,’+ alonga Yahova.
13 ‘Ndingamala kuagumanya, ine ndinadzaafudza,’ alonga Yahova.
‘Nkhabe kudzasala mauva pamuti wa mauva, nee masambvu pamuti wa nsambvu, pontho masamba anadzabunyala.
Iwo anadzaluza pinthu pidaapasa ine.’”
14 “Thangwi yanji tiri nawa pano?
Tendeni tigumanyikane, tipite mʼmizinda ya mipanda yakuwanga+ toera tifere mwenemu.
Thangwi Yahova Mulungu wathu anadzatifudza,
Iye asatipasa madzi a venenu toera timwe,+
Thangwi ife tadawira Yahova.
15 Ife tikhadikhira ntendere, mbwenye nkhabe cinthu cadidi cidacitika,
Tikhadikhira ndzidzi wakuwangiswa, mbwenye basi ene tisaona pinthu pyakugopswa!+
16 Kulira kwa makavalo a anyamalwa kusabveka bulukira ku Dhani.
Dziko yonsene isatekenyeka,
Thangwi ya kulira kwa makavalo awo acimuna,
Anyamalwa asapita mbafudza dziko na pyonsene piri mwenemu,
Nzinda na anthu anakhala mwenemu.”
17 “Ine ndinatumiza nyoka kuna imwe,
Nyoka za venenu zakuti nkhabe kubviniswa,
Mwandimomwene, izo zinadzakulumani,” alonga Yahova.
18 Kutsukwala kwanga ndi kwakukhonda mala;
Ntima wanga uli kubva kupha.
19 Kubulukira ku dziko yakutali,
Mbumba yanga isakhuwa* toera kuphemba ciphedzo:
“Kodi Yahova nee ali ku Sioni?
Mambo wace nee ali kweneko?”
“Thangwi yanji iwo anditsukwalisa na madzimunthu awo akusemwa,
Na alungu awo a dziko inango akuti ndi akusowa basa?”
20 “Ndzidzi wakubvuna wapita, malimwe amala,
Mbwenye ife tidzati kupulumuswa!”
21 Ndiri wakutsukwala kakamwe thangwi ya pironda pya mbumba yanga;+
Ndiri wakutsukwala kakamwe,
Ndakundwa na kugopa.
22 Kodi ku Jiliyadhi+ nkhabeko mafuta a bhalsamu?
Kweneko nkhabeko munthu wakuti anakwanisa kukondza?+
Thangwi yanji mbumba yanga nee yawanga?+
9 Mbapidakhala mwadidi nsolo wanga mbudakhala ninga ncera udadzala na madzi,
Maso anga ninga ncera wa misozi!+
Mbidakhala tenepo, ine mbidalira masiku na masikati,
Thangwi ya anthu a mbumba yanga adamala kuphiwa.
2 Kwa ine mbapidakhala mwadidi khala nʼthando muli na nyumba yakufikira alendo!
Ine mbidasiya mbumba yanga mbandienda kutali na iwo,
Thangwi onsene ndi anyaupombo,+
Nsoka wa anthu anacita pinthu mwakunyengeza.
3 Iwo asafunya malirimi awo ninga munakungwa uta;
Uthambi ndiwo udanjipa kakamwe mu dziko kupiringana kukhulupirika.+
“Iwo asathimiza kucita pyakuipa padzulu pa pinthu pyakuipa,
Pontho iwo nee asandibvesera,”+ alonga Yahova.
4 “Monsene musafunika kucita mphole-mphole unango na ndzace,
Pontho lekani kunyindira mʼbale wanu.
5 Mʼbodzi na mʼbodzi wa iwo asanyengeza ndzace,
Pontho nee mʼbodzi asalonga undimomwene.
Iwo apfundzisa malirimi awo toera kulonga uthambi.+
Iwo asaneta kakamwe thangwi yakucita pinthu pyakuipa.
6 Iwe usakhala pakati pa anthu authambi.
Thangwi yakukhala kwawo anthu authambi, iwo asakhonda kundidziwa,” alonga Yahova.
7 Natenepa, ipi ndi pidalonga Yahova wa anyankhondo:
“Ine ndinaanyungulusa toera ndiacenese,+
Thangwi ndinacitanji pontho na mbumba yanga?
8 Malirimi awo ndi mapswimo akupha anthu, akuti asalonga uthambi.
Na milomo yawo, iwo asalonga pya ntendere kuna andzawo,
Mbwenye muntima, iwo asanyerezera kucitira andzawo pyakuipa.”*
9 “Kodi nee ndisafunika kuatcunyusa thangwi ya pinthu pyenepi?” alonga Yahova.
“Kodi nee ndisafunika kubwezera pinthu pidacita mbumba ineyi?+
10 Ine ndinadzalira mbandidungunya thangwi ya mapiri,
Pontho ndinaimba nyimbo yaciliro thangwi ya mbuto zakudyesera pifuyo nʼthando,
Thangwi zamala kupiswa, natenepa nkhabebve munthu anapita na mwenemu,
Pontho nkhabe kubvekabve kulira kwa pifuyo.
Mbalame na pinyama pya ntsanga pyathawa; pyamala kuenda.+
11 Ine ndinadzacitisa Yerusalemu kukhala nkuku wa miyala,+ dzimba ya anambwa a ntsanga,+
Pontho ndinadzacitisa mizinda ya Yuda kukhala madembe akusowa anthu.+
12 Mbani ali na udziwisi wakukwana toera kubvesesa pyenepi?
Kodi Yahova alonga na ani, toera munthu unoyu adziwise pyenepi?
Thangwi yanji dziko iyi yamala kufudzwa?
Thangwi yanji iyo yauma ninga thando,
Munjira yakuti nkhabe munthu anapita na mwenemu?”
13 Yahova atawira: “Thangwi iwo akhonda mwambo wanga udaapasa ine,* pontho thangwi iwo nee autoweza, mbakhonda kubvera fala yanga. 14 Kusiyapo pyenepi, iwo abvera mitima yawo+ mbalambira madzimunthu a Bhaale, ninga mudapfundziswa iwo na ambuyawo.+ 15 Natenepa, ipi ndi pidalonga Yahova wa anyankhondo, Mulungu wa Izraeli: ‘Ine ndinadzadyesa mbumba iyi masamba a muti wakuwawa, pontho ndinadzaamwesa madzi a venenu.+ 16 Ine ndinadzaabalalisa pakati pa mbumba zakuti nee iwo, nee ambuyawo akhazidziwa,+ pontho ndinadzatumiza anyamalwa awo* nduli mwawo mpaka ndingamala kuafudza.’+
17 Ipi ndi pidalonga Yahova wa anyankhondo:
‘Citani pinthu mwandzeru.
Cemeresani akazi anaimba nyimbo zaciliro,+
Cemeresani akazi aluso kakamwe,
18 Toera abwere mwakucimbiza kudzatiimbira nyimbo yaciliro,
Toera maso athu adjodje misozi,
Pontho maputu athu atote na misozi.+
19 Thangwi ku Sioni kusabveka nyimbo zaciliro:+
“Ife tamala kufudzwa!
Manyadzo athu ndi makulu kakamwe!
Thangwi tasiya dziko yathu, pontho iwo afudza nyumba zathu.”+
20 Imwe akazimwe, bveserani fala ya Yahova.
Makutu anu mbatawire kubva fala inabuluka pamulomo pace.
Pfundzisani ananu akazi nyimbo ineyi yaciliro,
Pontho pfundzisanani unango na ndzace nyimbo ineyi yaciliro.+
21 Thangwi kufa kwapita na mʼmajanela;
Kwapita nʼnyumba zathu za ndzulu zidazungulirwa na mipanda yakuwanga,
Toera kupha anapiana mʼmiseu,
Pontho toera kupha aphale mu mbuto zapakweca.’+
22 Longa kuti: ‘Ipi ndi pidalonga Yahova:
“Manungo a anthu akufa anadzakhala ninga ndimu pa mataka a mʼminda,
Ninga misumbu ya tirigu idamala kwene kubvunwa yakuti anyakubvuna aisiya nduli,
Yakuti nkhabepo munthu toera kuigumanya.”’”+
23 Ipi ndi pidalonga Yahova:
“Nyaudziwisi mbaleke kugaya thangwi ya udziwisi wace;+
Nyamphambvu mbaleke kugaya thangwi ya mphambvu zace;
Pontho nyakupfuma mbaleke kugaya thangwi ya mpfuma zace.”+
24 “Mbwenye ule anagaya mbagaye thangwi ya ipi:
Thangwi yakukhala na ndzeru, pontho thangwi yakundidziwa,+
Kuti ine ndine Yahova, ule anapangiza ufuni wakukhonda mala, ulungami, na kucita pinthu munjira yadidi pa dziko yapantsi,+
Thangwi ine ndisakomerwa na pinthu pyenepi,”+ alonga Yahova.
25 Yahova alonga: “Bveserani! Ziri kufika ntsiku zakuti ine ndinadzatcunyusa anthu onsene akusidzwa, akuti mwandimomwene nee asidzwa,+ 26 anthu anewa ndi a ku Ejitu,+ a ku Yuda,+ a ku Edhomi,+ a ku Amoni,+ a ku Moabhe,+ na anthu onsene anakhala nʼthando adacinga ndebvu zawo mʼmaputu,+ thangwi anthu a madzindza onsene ndi akukhonda sidzwa, pontho mbumba yonsene ya Izraeli ndi yakukhonda sidzwa muntima.”+
10 Imwe mbumba ya Izraeli, bveserani mafala adalonga Yahova thangwi ya imwe. 2 Ipi ndi pidalonga Yahova:
“Lekani kutowezera* misambo ya anthu a madzindza anango,+
Lekani kutetemera thangwi ya pidzindikiro pyakudzulu,
Basi ene thangwi anthu a madzindza anango asatetemera thangwi ya pinthu pyenepi.+
3 Thangwi misambo ya anthu a madzindza anango ndi yakusowa basa.
Madzimunthu awo basi ene ndi muti udagwandwa mu nsitu,
Adacitwa na manja a mesiri waluso adaphatisira faramentu yace.+
4 Iwo asaabalikisa na parata na ouro,+
Pontho asakwata martelo mbaakhomera maperego toera akhonde kugwa.+
5 Madzimunthu anewa alandana na ale anaikhwa mʼmunda wa makaka, iwo nkhabe kwanisa kulonga;+
Iwo asafunika kuthukulwa, thangwi nkhabe kwanisa kufamba.+
Lekani kuagopa, thangwi iwo nkhabe kwanisa kukucitani pinthu pyakuipa,
Nee kukucitirani pinthu pyadidi.”+
6 Yahova, nkhabe unango adalandana na imwe.+
Imwe ndimwe wankulu, pontho dzina yanu ndi ikulu na yamphambvu.
7 Mbani wakuti nee anakugopani imwe Mambo wa madzindza,+ thangwi imwe mwathema kulemedzwa;
Thangwi pakati pa anthu onsene audziwisi, pontho pakati pa maumambo a madzindza awo onsene,
Nkhabepo munthu adalandana na imwe.+
8 Iwo ndi madzemwa na anthu akusowa ndzeru.+
Cipfundziso ca muti ndi cakusowa basa kakamwe.+
9 Parata isabwereswa buluka ku Tarsi,+ ouro isabwereswa buluka ku Ufazi,
Pinthu pidacitwa na amesiri aluso, na manja a amesiri.
Nguwo zawo ndi za usalu wa bhurumu na maweya a mabira akukhwazwa pinthu pyakufuirira.
Madzimunthu anewa asacitwa na anyabasa aluso.
10 Mbwenye Yahova ndi Mulungu wandimomwene.
Iye ndi Mulungu wa mʼmaso,+ na Mambo wakwenda na kwenda.+
Thangwi yakuipirwa kwace, dziko inadzatekenyeka,+
Pontho nkhabe mbumba inafuna kwanisa kupirira ukali wace.
11 Ipi ndipyo pinafunika imwe kuapanga:
“Alungu akuti nee acita kudzulu na dziko yapantsi,
Anadzazambazika pa dziko yapantsi na pantsi pa thambo.”+
12 Iye ndiye adacita dziko yapantsi na mphambvu zace,
Ule wakuti na udziwisi wace acitisa dziko yapantsi kukhala yakuwanga,+
Wakuti na luso yace, acita kudzulu.+
13 Angacitisa kuti fala yace ibveke,
Madzi kudzulu asatekenyeka,+
Iye asacitisa makole kukwira kudzulu kubulukira kunkhomo kwa dziko yapantsi.+
Iye asacitisa kucetuma mu ndzidzi unabvumba madzi;
Pontho iye asacitisa mphepo kubuluka pa mbuto inaikoya iye.+
14 Anthu onsene asacita pinthu mwakusowa ndzeru na mwakusowa cidziwiso.
Amesiri onsene aluso anadzapasika manyadzo thangwi ya madzimunthu awo akusemwa;+
Thangwi madzimunthu awo a utale ndi akusowa basa;
Pontho madzimunthu anewa nkhabe umaso.+
15 Iwo ndi akusowa basa, pinthu pyakuti pyathema kusingirirwa.+
Ntsiku yakufudzwa kwawo ingafika, iwo anadzazambazika.
16 Mbwenye Mulungu wa Yakobe ndi wakusiyana na pinthu pyenepi,
Thangwi iye ndiye adacita pinthu pyonsene,
Pontho Izraeli ndi ndodo ya unthaka wace.+
Dzina yace ndi Yahova wa anyankhondo.+
17 Iwe nkazi adazungulirwa na anyamalwa,
Thukula ntolo wako uli pantsi.
18 Thangwi ipi ndi pidalonga Yahova:
“Cincino, anthu anakhala muno ndinaaponya kutali na dziko ino,+
Pontho ndinaacitisa kuti athabuke na nyatwa.”
19 Dzedze kuna ine thangwi ya nyatwa yanga!+
Cironda canga nkhabe kuwanga.
Ine ndalonga: “Mwandimomwene, uyu ndi utenda wanga, ine ndisafunika kuupirira.
20 Nsasa wanga wamala kufudzwa, nkhambala zace zamala kuthumulwa.+
Ananga andithawa, pontho iwo nee alipobve.+
Nkhabepo adasala toera kumanga nsasa wanga, peno toera kumanika nguwo za nsasa wanga.
Na thangwi ineyi, iwo acita pinthu mwakusowa ndzeru,
Pontho mabira awo onsene amala kubalaliswa.”+
22 Bveserani! Mphangwa zafika cincino!
Nyatwa ikulu iri kubwera buluka ku dziko yakunkwiriro,+
Toera kufudza mizinda ya ku Yuda, mbisala ninga dzimba ya anambwa a ntsanga.*+
23 Yahova, ine ndisadziwa mwadidi kuti munthu nee athema kusankhula ekhene njira yace.
Munthu nkhabe ufulu wakutsogolera* ekhene mathanyo ace.+
25 Khuthulani ukali wanu kuna madzindza anakupwazani,+
Kuna mbumba zakuti nkhabe kucemera dzina yanu.
Thangwi iwo apha ana a Yakobe.*+
11 Yeremiya atambira mafala awa a Yahova: 2 “Imwe mbumba, bveserani mafala a cibverano ici!
“Longa mafala anewa kuna anthu a ku Yuda na ale anakhala mu Yerusalemu. 3 Apange kuti: ‘Ipi ndi pidalonga Yahova Mulungu wa Izraeli: “Mbapaswe dzedze munthu anakhonda kubvera mafala a cibverano ici,+ 4 cidacita ine na ambuyanu pa ntsiku idaabulusa ine mu dziko ya Ejitu,+ mu forno inanyunguluswa utale,+ mbandiapanga kuti: ‘Bverani mafala anga, pontho citani pyonsene pinakupangani ine; natenepa imwe munadzakhala mbumba yanga, inembo ndinadzakhala Mulungu wanu.+ 5 Munjira ineyi, ine ndinadzacita pidapikira ine kuna ambuyanu, kuti mbidaapasa dziko ya nkaka na uci,+ ninga pinaona imwe lero.’”’”
Penepo ine ndatawira: “Ameni Yahova.”
6 Buluka penepo Yahova andipanga: “Dziwisa mafala awa onsene mʼmizinda ya ku Yuda na mʼmiseu ya ku Yerusalemu: ‘Bveserani mafala a cibverano ici mbamuabvera. 7 Thangwi ine ndacenjeza ambuyanu pidaabulusa ine mu dziko ya Ejitu, ndisacita pyenepi mpaka lero, mbandiacenjeza mwakubwereza-bwereza* kuti: “Bverani mafala anga.”+ 8 Ngakhale tenepo, iwo nee abvesera, pontho nee apitsalakana, mbwenye mʼbodzi na mʼbodzi wa iwo asankhula kubvera ntima wace wakuipa.+ Natenepa, ine ndaatcunyusa mwakubverana na mafala onsene a cibverano ceneci cidaapanga ine toera acibvere, iwo mbakhonda kucibvera.’”
9 Penepo Yahova andipanga: “Anthu a ku Yuda na anthu anakhala ku Yerusalemu abverana toera kundisandukira. 10 Iwo abwerera ku madodo adacita ambuyawo kubulukira pakutoma, ale adakhonda kubvera mafala anga.+ Pontho iwo atowera alungu anango mbaatumikira.+ Mbumba ya Izraeli na mbumba ya Yuda aswa cibverano canga cidacita ine na ambuyawo.+ 11 Natenepa, ipi ndi pidalonga Yahova: ‘Ine ndiri kuabweresera nyatwa+ yakuti iwo nee anakwanisa kuicalira. Iwo angandicemera toera kuphemba ciphedzo, ine nee ndinaabvesera.+ 12 Penepo, anthu anakhala mʼmizinda ya ku Yuda na anakhala mu Yerusalemu, anadzaenda kuna alungu awo anaperekera iwo ntsembe* mbalira toera kuphemba ciphedzo,+ mbwenye iwo nee anadzaapulumusa nyatwa zawo zingafika. 13 Thangwi alungu anu adzanjipa kakamwe ninga mizinda yanu imwe mbumba ya Yuda, pontho maguwa adamangira imwe cinthu cakupasa manyadzo* ndi mazinji kakamwe ninga kunjipa kwa miseu ya mu Yerusalemu, maguwa toera kupereka ntsembe kuna Bhaale.’+
14 “Mbwenye iwe leka kucita phembero thangwi ya mbumba iyi. Leka kulira thangwi ya iwo, nee kuacitira phembero,+ thangwi iwo angagwerwa na nyatwa mbandilirira, ine nee ndinaabvesera.
15 Thangwi yanji mbumba yanga yakufunika isakhala na cipapo cakubwera panyumba panga,
Mu ndzidzi wakuti azinji a iwo asacita pinthu mwakubverana na pisankhulo pyawo pyakuipa?
Kodi nyama idaceneswa inakwanisa kupingiza toera mukhonde kugwerwa na nyatwa?
Kodi imwe munadzatsandzaya pa ndzidzi unoyu?
16 Yahova akhakucemerani muti wa mulivera wakudzala na masamba akubithimira,
Muti wakubalika na wa misapo yadidi.
Pabveka fala yakugaluza kakamwe, iye mbauponyera moto,
Pontho anyamalwa akhumula nthawi zace.
17 “Imwe mbumba ya Yuda, Yahova wa anyankhondo, ule adakutcekani,+ alonga kuti munagwerwa na nyatwa thangwi ya madawo adacita imwe pabodzi na mbumba ya Izraeli, thangwi imwe mwantsukwalisa pidapereka imwe ntsembe kuna Bhaale.”+
18 Yahova, imwe mwandipanga toera ndipidziwe;
Pa ndzidzi unoyu, imwe mwandipangiza pikhacita iwo.
19 Ine ndikhali ninga mwanabira wakupfulika anakwatwa toera kuenda kaphiwa.
Ine nee ndikhadziwa kuti iwo akhabverana toera kundicita pinthu pyakuipa, mbalonga:+
“Tendeni tifudze muti unoyu na misapo yace ene,
Pontho tendeni timuphe,
Toera dzina yace ikhonde kukumbukirwa pontho.”
20 Mbwenye Yahova wa anyankhondo asatonga mwakulungama;
Iye asadinga manyerezero* a nkati kakamwe na ntima wa munthu.+
Ndiphedzeni toera ndione kuatcunyusa kunafuna kuacita imwe,
Thangwi ine ndanyindira imwe toera mutsalakane nseru wanga.
21 Natenepa, ipi ndi pidalonga Yahova thangwi ya anthu a ku Anatote,+ akuti asafuna kundipha, mbalonga: “Leka kulonga maprofesiya mu dzina ya Yahova,+ thangwi ungacita pyenepi ife tinakupha”; 22 mbwenye ipi ndi pinalonga Yahova wa anyankhondo: “Ine ndinadzaatcunyusa. Aphale anadzaphiwa na supada,+ anawo amuna na akazi anadzafa na njala.+ 23 Nee munthu mʼbodzi anafuna kudzapulumuka pakati pawo, thangwi ine ndinadzabweresa nyatwa kuna anthu a ku Anatote+ pa caka cinafuna kuatcunyusa ine.”
12 Yahova, imwe ndimwe wakulungama.+ Ndingadungunya kuna imwe,
Pontho ndingalonga na imwe thangwi ya kutonga kwanu, imwe musacita pinthu pyakulungama.
Mbwenye thangwi yanji anyakuipa pinthu pisaafambira mwadidi?+
Pontho thangwi yanji anyakusandukira nee asakhala akudzudzumika?
2 Imwe mwaatceka, iwo mbamera mitcitci.
Iwo akula, mbabala misapo.
Ndzidzi onsene milomo yawo isalonga pya imwe, mbwenye manyerezero awo* ali kutali kakamwe na imwe.+
3 Yahova, imwe musandidziwa mwadidi,+ imwe musandiona;
Imwe mwayangʼana mwadidi ntima wanga, mbamuona kuti uli wakuphatana na imwe.+
Apambuleni ninga mabira anafuna kuenda kaphiwa,
Aikheni pakhundu, mbadikhira ntsiku yakuphiwa kwawo.
4 Mpaka lini dziko ino inapitiriza kubunyala?
Tsanga mbimala kuuma mu mbuto zonsene?+
Pinyama na mbalame pyamala kufa,
Thangwi ya uipi wa anthu anakhala mu dziko ino.
Thangwi iwo asalonga: “Iye nkhabe dziwa pinafuna kuticitikira.”
5 Khala usaneta ungathamanga pabodzi na anthu andzako,
Unakwanisa tani kucita mapika na ale anathamanga na makavalo?+
Maseze usabva kuti uli wakutsidzikizika mu dziko yantendere,
Unacitanji ungadzakhala mʼmisitu ya nʼkhundu mwa nkulo wa Yordani?
6 Thangwi abale ako ene, akuti ndi anthu a panyumba ya pai wako,
Akusandukira.+
Iwo akulonga mwakuipa.
Leka kuanyindira,
Maseze alonge pinthu pyadidi.
7 “Ine ndasiya nyumba yanga;+ ndasiya unthaka wanga.+
Mbumba yanga yakufunika ndaipereka mʼmanja mwa anyamalwa awo.+
8 Kwa ine, mbumba yanga, yakuti ndi unthaka wanga yadzakhala ninga nkhalamu yakuti iri mu nsitu.
Iyo yandilirira.
Natenepa, ine ndisaiida.
9 Kwa ine, unthaka wanga ndi ninga capungu cakuyetimira;
Pyapungu pinango pisampomokera konsene kwene.+
Bwerani, gumanyikanani imwe pinyama pyonsene pya ntsanga,
Bwerani mudye.+
Mbacitisa kuti unthaka wanga wakufunika kakamwe ukhale thando yakusowa anthu.
11 Iwo aucitisa kukhala ninga thando.
Iwo wabunyala;
Iwo wamala kufudzwa pamaso panga.+
Dziko yonsene yamala kufudzwa,
Mbwenye nee mʼbodzi asatsalakana pyenepi.+
12 Anyakufudza abwera na njira zonsene zinagwanda na nʼthando,
Thangwi supada ya Yahova iri kufudza dziko ino kutomera kunkhomo kwa dziko mpaka kunkhomo inango.+
Nkhabepo munthu ali muntendere.
13 Iwo abzwala tirigu, mbwenye abvuna minga.+
Aphata basa mpaka kuneta kakamwe, mbwenye nkhabe cidawina iwo.
Iwo anadzapasika manyadzo na pidalima iwo,
Thangwi ya ukali wa Yahova.”
14 Ipi ndi pidalonga Yahova thangwi ya anthu akuipa anakhala cifupi na cisa canga, ale anasosa dziko idapereka ine kuna mbumba yanga ya Izraeli toera ikhale unthaka wawo:+ “Ine ndinadzaabulusa mu dziko yawo,+ pontho ndinabulusambo mbumba ya Yuda pakati pawo. 15 Mbwenye ndingamala kuabulusa, ine ndinadzaabvera pontho ntsisi, mbandibweza mʼbodzi na mʼbodzi ku unthaka wace na kucisa cace.”
16 “Mwandimomwene, iwo angapfundza makhaliro a mbumba yanga, mbadumbira mu dzina yanga, mbalonga kuti: ‘Ndiri kudumbira mu dzina ya Yahova Mulungu wa mʼmaso!’, ninga mudapfundzisa iwo mbumba yanga toera kudumbira mu dzina ya Bhaale, iwo anadzatawiriswa kukhala pakati pa mbumba yanga. 17 Mbwenye iwo angakhonda kubvera, ine ndinadzabulusa mbumba ineyi; ndinadzaibulusa, mbandiifudza,” alonga Yahova.+
13 Ipi ndi pidandipanga Yahova: “Ndoko kagule sintu ya usalu mbuimanga ncunu mwako, mbwenye leka kuibvika mʼmadzi.” 2 Natenepa, ine ndagula sintu mbandiimanga ncunu mwanga mwakubverana na mafala adalonga Yahova. 3 Buluka penepo, Yahova alonga pontho na ine kaciwiri: 4 “Kwata sintu idagula iwe, yakuti uli kuibvala, ndoko ku nkulo wa Eufrate, uibise kweneko mʼmphako ya mwala.” 5 Natenepa ine ndaenda, mbandiibisa nʼkhundu mwa nkulo wa Eufrate ninga mudandipangira Yahova.
6 Pidapita ntsiku zizinji, Yahova andipanga: “Ndoko ku nkulo wa Eufrate toera ukakwate sintu idakupanga ine kuti uibise kweneko.” 7 Natenepa, ine ndaenda ku nkulo wa Eufrate mbandifukula sintu pa mbuto ikhadaibisa ine; mbwenye ndaona kuti sintu ineyi ikhadabvunda, iyo nee ikhalibve na basa.
8 Penepo Yahova andipanga: 9 “Ipi ndi pidalonga Yahova: ‘Ninga pidacitika na sintu ineyi, ine ndinadzamalisa kudzikuza kwa dzindza ya Yuda na kudzikuza kukulu kwa Yerusalemu.+ 10 Mbumba iyi ya anthu akuipa, akuti asakhonda kubvera mafala anga,+ mbakakamira kucita pinafuna iwo,+ akuti asalambira alungu anango, asaatumikira mbaagodamira, anadzakhala sawasawa na sintu iyi, yakuti ndi yakusowa basa kakamwe.’ 11 ‘Thangwi ninga sintu isaphata ncunu mwa munthu, ine ndacitisa kuti mbumba yonsene ya Izraeli na mbumba yonsene ya Yuda ikhale yakuphatana na ine’, alonga Yahova, ‘toera iwo akhale mbumba yanga,+ kusimbwa kwanga,+ mbiri yanga na cinthu canga cakubalika. Mbwenye iwo nee abvera.’+
12 “Pontho iwe usafunikambo kuapanga mphangwa izi: ‘Ipi ndi pidalonga Yahova Mulungu wa Izraeli: “Nkhali zonsene zikulu zisafunika kudzadzwa na vinyu.”’ Mbwenye iwo anadzakutawira: ‘Kodi ife nee tisadziwa kuti nkhali zonsene zikulu zisafunika kudzadzwa na vinyu?’ 13 Penepo apange kuti: ‘Ipi ndi pidalonga Yahova: “Ndiri kuledzeresa anthu onsene anakhala mu dziko iyi,+ amambo anakhala pa mpando waumambo wa Dhavidhi, anyantsembe, aprofeta, pabodzi na anthu onsene anakhala mu Yerusalemu. 14 Ine ndinaagwanda-gwanda na kuamenyera kuna anango, ababa na ana ene,”+ alonga Yahova. “Ine nee ndinaabvera ntsisi peno kusandikika thangwi ya iwo; nkhabepo cinthu cinafuna kundipingiza toera ndikhonde kuafudza.”’+
15 Bveserani mwadidi.
Lekani kudzikuza thangwi Yahova alonga.
16 Pasani mbiri Yahova Mulungu wanu,
Mbadzati kubweresa cidima,
Pontho miyendo yanu mbidzati kugwegweduka mʼmapiri mu ndzidzi unadoka dzuwa.
Imwe munadzadikhira ceza,
Mbwenye iye anadzabweresa cidima cikulu;
Iye anadzacinja ceza mbacidza cidima cikulu kakamwe.+
17 Imwe mungakhonda kubvera,
Ine ndinadzalira ncibisobiso thangwi yakudzikuza kwanu.
Ndinadzabulusa misozi mizinji, mʼmaso mwanga munadzawewa misozi,+
Thangwi mbumba ya Yahova+ yaendeswa ku ubitcu.
18 Panga mambo na mai wace mambo+ kuti: ‘Khalani pantsi pa mbuto yakupwazika,
Thangwi nthimba yanu yakubalika inadzagwa munsolo mwanu.’
19 Mizinda yakunterero yafungwa, nkhabepo munthu toera kuifungula.
Anthu onsene a ku Yuda aendeswa ku ubitcu, nee mʼbodzi adasala.+
20 Lamusa maso ako, mbuyangʼana ale anabwera buluka kunkwiriro.+
Uli kupi nkumbi wa mabira akubalika adapaswa iwe?+
21 Unadzalonganji kutcunyuswa kwako kungafika,
Kuna ale akuti ndzidzi onsene usaatsalakana ninga axamwali ako apantima?+
Kodi iwe nee unadzabva kupha kakamwe ninga kubva kupha kunakhala na nkazi pakubala?+
22 Pontho ungalonga muntima mwako kuti: ‘Thangwi yanji pinthu pyenepi pyandicitikira?’+
Dziwa kuti waduliswa saya yako, thangwi ya madawo ako makulu,+
Mbubva kupha kakamwe pa pitende pyako.
23 Kodi munthu wa ku Etiopya anakwanisa kucinja khanda yace, peno nyalugwe anakwanisa kucinja madamba* ace?+
Khala pinakwanisika, imwe akuti musapfundziswa toera kucita pinthu pyakuipa,
Munakwanisambo kucita pinthu pyadidi.
24 Natenepa, ine ndinaamwaza ninga munamwazwa maudzu na mphepo ya nʼthando.+
25 Pyenepi ndipyo pinafuna kukucitikirani. Ineyi ndi khundu inafuna ine kukupasani,” alonga Yahova,
26 Natenepa, ndinakundzula saya yako mpaka kuphimbira nkhope yako,
Pontho, iwe unadzaoneka cipezipezi,+
27 Macitiro ako aulukwali+ na kusirira kwako,
Uputa wako wakunyanyasa unadzaoneka.
Ine ndaona macitiro ako akunyanyasa,+
Mʼmapiri na mʼminda.
Dzedze kwa iwe Yerusalemu!
Kodi unapitiriza kukhala wakupswipa mpaka lini?”+
14 Awa ndi mafala adalonga Yahova kuna Yeremiya thangwi yakukhonda kubvumba kwa madzi:+
2 Nzinda wa Yuda uli wakutsukwala,+ pontho misuwo yace yamala kugudjulwa.
Iyo iri yakutsukwala, yagwa pantsi;
Pontho kulira kusabveka kubulukira mu Yerusalemu.
3 Ambuyawo atuma anyabasa toera kuenda katunga madzi.
Iwo asaenda mʼmicera mbwenye nee asagumanamo madzi.
Iwo asabwerera na pyombo pyakusowa madzi.
Thangwi yakutsukwala, pontho thangwi yakukhala na manyadzo,
Iwo asaphimbira misolo yawo.
4 Nakuti mataka amala kupanduka,
Thangwi yakukhonda kubvumba kwa madzi mu dziko ineyi,+
Anyakulima ali akufewa manungo, pontho aphimbira misolo yawo.
5 Ngakhale mbawala ntsanga isasiya mwanace adamala kwene kubalwa,
Thangwi yakusoweka kwa thongwe.*
6 Maburu a ntsanga asalimira mʼmapiri akusowa tsanga.
Iwo asapuma mwakunentseka ninga anambwa a ntsanga;
Maso awo nkhabe kuona mwadidi thangwi yakusowa cakudya.+
7 Maseze madawo athu asapereka umboni thangwi ya ife,
Yahova, citani pinthu thangwi ya dzina yanu.+
Thangwi ife tacita pinthu pizinji pyakuipa,+
Pontho, takudawirani.
8 Imwe cidikhiro ca Izraeli, Mpulumusi wawo+ mʼmidzidzi ya nyatwa,
Thangwi yanji musacita pinthu mu dziko iyi ninga ndimwe munthu wa dziko inango,
Ninga munthu anacita ulendo wakuti asalimira basi ene toera kugona namasiku?
9 Thangwi yanji musacita pinthu ninga ndimwe munthu wakudzudzumika,
Ninga nyankhondo wakuti nkhabe kwanisa kupulumusa munthu?
Lekani kutisiya.
10 Ipi ndi pidalonga Yahova thangwi ya mbumba iyi: “Iwo asakomerwa na kundzendza-ndzendza;+ iwo nkhabe kukhazikika.+ Na thangwi ineyi, Yahova nkhabe kukomerwa na iwo.+ Cincino iye anakumbuka madodo awo mbaatcunyusa thangwi ya madawo awo.”+
11 Natenepa Yahova andipanga: “Leka kucita phembero thangwi ya mbumba iyi toera pinthu piafambire mwadidi.+ 12 Iwo angacita jejuu, ine nee ndisabvesera maphembero awo akudembetera,+ angapereka ntsembe zakupiswa na ntsembe za pyakudya, ine nee ndisakomerwa nazo,+ ine ndinaapha onsene na supada, na njala, pontho na utenda.”+
13 Natenepa ine ndalonga: “Mama ine Mbuya Wankulu Yahova! Aprofeta ali kupanga mbumba kuti: ‘Imwe nee munadzaphiwa na supada, nee munadzathabuka na njala, mbwenye ine ndinadzakupasani ntendere wandimomwene mu dziko ino.’”+
14 Buluka penepo, Yahova anditawira: “Aprofeta ali kulonga maprofesiya authambi mu dzina yanga.+ Ine nee ndaatuma, nee ndaapanga, pontho nee ndalonga nawo.+ Iwo ali kulonga masomphenya authambi, kulotera pinthu pyakusowa basa, na uthambi wa mʼmitima yawo.+ 15 Natenepa, ipi ndi pinalonga Yahova thangwi ya aprofeta analonga maprofesiya mu dzina yanga akuti nee atumwa na ine, ale analonga kuti mu dziko ino nee munadzaoneka nkhondo nee njala: ‘Aprofeta anewa anadzaphiwa na supada, pontho na njala.+ 16 Pontho manungo akufa a anthu anapanga iwo maprofesiya anadzaponywa mʼmiseu ya mu Yerusalemu. Thangwi ya njala na nkhondo, nee anadzaoneka munthu toera kuikha iwo,+ akazawo, anawo amuna peno anawo akazi thangwi ndinaabweresera nyatwa zidathema iwo kuona.’+
17 “Usafunika kuapanga mafala awa:
‘Maso anga mbapitirize kubuluka misozi masiku na masikati,+
Thangwi mbumba yanga yakundwa, yanyedzwa,+
Mbiphekeswa kakamwe.
18 Ndingaenda ntsanga,
Ndisaona anthu adaphiwa na supada!+
Ndingapita mu nzinda,
Ndisaona anthu akuti ali na mautenda thangwi ya njala!+
Aprofeta na anyantsembe asandzendza-ndzendza mu dziko inakhonda iwo kudziwa.’”+
19 Kodi imwe mwakhonderatu dzindza ya Yuda, peno mwanyanyasirwa na Sioni?+
Thangwi yanji mwatiphekesa munjira yakuti nee tinakwanisabve kukondzwa?+
Ife tikhadikhira ntendere, mbwenye nkhabe cinthu cadidi cidacitika,
Tikhadikhira ndzidzi wakuwangiswa, mbwenye basi ene tisaona pinthu pyakugopswa!+
20 Yahova, ife tadzindikira pinthu pyakuipa pidacita ife,
Na madodo a ambuyathu,
Thangwi takudawirani.+
21 Thangwi ya dzina yanu, lekani kutikhonda;+
Lekani kupwaza mpando wanu wa mbiri.
Kumbukani cibverano cidacita imwe na ife, pontho lekani kucifudza.+
22 Kodi madzimunthu akusowa basa a madzindza anakwanisa kubvumbisa madzi,
Kodi kudzulu kokhene kunakwanisa kubvumbisa madzi mazinji?
Yahova Mulungu wathu, basi ene ndimwe anakwanisa kucita pyenepi.+
Ife tisadikhira imwe,
Thangwi ndimwe basi anacita pinthu pyenepi pyonsene.
15 Buluka penepo Yahova andipanga: “Ngakhale Mose na Samweli abwere pamaso panga,+ ine nee ndinabvera ntsisi mbumba iyi. Abuluse pamaso panga. Mbabuluke. 2 Iwo angakubvundza kuti: ‘Tinaenda kupi?’ iwe usafunika kuatawira: ‘Yahova alonga tenepa:
Ule anafunika kufa na utenda, anafa na utenda!+
Ule anafunika kuphiwa na supada, anaphiwa na supada!
Ule anafunika kufa na njala, anafa na njala!
Ule anafunika kuenda ku ubitcu, anaenda ku ubitcu!”’+
3 “‘Ine ndinaabweresera mitundu minai ya nyatwa,+ alonga Yahova, supada toera kupha, anambwa toera kukwekweta manungo awo akufa, mbalame na pikala toera kudya na kufudza.+ 4 Ndinadzaacitisa kuti akhale cinthu cakugopesa kuna anthu a maumambo onsene pa dziko yapantsi,+ thangwi ya Manase mwana wa Ezekiya mambo wa ku Yuda, thangwi ya pinthu pidacita iye mu Yerusalemu.+
5 Iwe Yerusalemu, mbani anafuna kukubvera ntsisi,
Mbani anafuna kukubvera ntsisi,
Mbani anafuna limira toera kukubvundza kuti uli tani?’
6 ‘Imwe mwandisiya,’ alonga Yahova.+
‘Pontho musapitiriza kundipasira nkhodolo.*+
Na thangwi ineyi, ine ndinafuthula djanja yanga kuna imwe mbandikufudzani.+
Ine ndaneta kukubverani ntsisi.
7 Ine ndinaamwaza, ninga munamwazwa maudzu na mphepo mʼmisuwo ya mu dziko iyi.
Ndinaasiya akusowa ana.+
Ine ndinafudza mbumba yanga,
Thangwi iwo akhonda kusiya njira zawo.+
8 Azice awo anadzakhala azinji kakamwe pamaso panga kupiringana matcetca a nʼkhundu mwa bara.
Ndinabweresa anyakufudza namasikati toera afudze iwo, amai na aphale.
Mwakututumusa, ndinaacitisa kukhala akugopa na akudzudzumika.
9 Nkazi adabala ana anomwe amala mphambvu;
Iye asapuma mwakunentseka.
Kwa iye, dzuwa isadoka namasikati,
Iye ali na manyadzo, pontho ali wakupwazika.’
‘Akucepa adasala na iye,
Ine ndinadzaapha na supada, pamaso pa anyamalwa ace,’ alonga Yahova.”+
10 Imwe mai wanga, dzedze kuna ine, thangwi imwe mwandibala,+
Pa dziko yonsene, anthu asalongezana, mbakhonda kubverana thangwi ya ine.
Ine nee ndafiyari, pontho nee ndafiyarisi munthu,
Mbwenye onsene asandipasa dzedze.
11 Yahova alonga: “Mwandimomwene, ine ndinadzakuphedza toera pinthu pikufambire mwadidi;
Ndinakuphedza mu ndzidzi wa nyatwa,
Pontho ungathimbana na nyamalwa wako.
12 Kodi munthu anakwanisa kugwanda-gwanda utale,
Utale wakunkwiriro na nkuwa?
13 Pinthu pyanu na mpfuma zanu ndinapipereka kuna anyamalwa anu,+
Iwo nee anadzalipa, mbwenye ine ndinacita pyenepi thangwi ya madawo anu onsene adacita imwe mu dziko yanu yonsene.
14 Ndinadzapipereka kuna anyamalwa anu
Toera apikwate, mbaenda napyo ku dziko yakuti imwe nkhabe kuidziwa.+
Thangwi ukali wanga, wagaka moto;
Pontho iwo usagaka thangwi ya imwe.”+
15 Yahova, imwe musadziwa pyonsene;
Ndikumbukeni, pontho zungunukani toera mundiyangʼane.
Tcunyusani ale ananditcinga.+
Lekani kundisiya mbandifa thangwi yakupirira kwanu.
Dziwani kuti ndisapirira kutikanwa kweneku thangwi ya imwe.+
16 Pidagumana ine mafala anu, ine ndaadya;+
Mafala anu ndakomerwa nawo, mbatsandzayisa ntima wanga,
Thangwi ine ndisadziwika na dzina yanu, imwe Yahova Mulungu wa anyankhondo.
17 Nee ndisakhala pantsi pabodzi na ale akuti basi ene asakomerwa na matsendzo, ine nee ndisakomerwa nawo.+
Nakuti djanja yanu iri pana ine, ine ndisakhala pantsi ndekhene,
Thangwi imwe mwandidzadza na ukali.+
18 Thangwi yanji utenda wanga nkhabe kuwanga, pontho cironda canga nkhabe kupola?
Ico nkhabe funa kupola.
Kodi kuna ine, imwe munadzakhala ninga ncera wakusowa madzi,
Wakuti nkhabe kunyindirwa?
19 Natenepa, ipi ndi pidalonga Yahova:
“Ungabwerera kuna ine, unadzakhala pontho wakutawirika,
Mbupitiriza kunditumikira.
Ungapambula pinthu pyadidi pakati pa pinthu pyakusowa basa,
Unadzakhala nyakulonga mphangwa zanga.
Iwo anadzabwerera kuna iwe,
Mbwenye iwe leka bwerera kuna iwo.”
20 “Ine ndiri kukucitisa kukhala mpanda wakuwanga wa nkuwa kuna mbumba iyi.+
Mwandimomwene iwo anadzamenyana na iwe,
Mbwenye nee anadzakukunda,+
Thangwi ine ndiri na iwe,
toera kukupulumusa na kukuombola,” alonga Yahova.
21 “Ine ndinadzakupulumusa mʼmanja mwa anyakuipa
Pontho ndinadzakuombola mʼmanja mwa anthu akuipa.”
16 Yahova alonga pontho na ine, mbandipanga: 2 “Iwe nee usafunika kusemba, pontho nee usafunika kubala ana amuna peno akazi mu dziko ino. 3 Ipi ndi pidalonga Yahova thangwi ya ana amuna na akazi anabalwa muno, pontho thangwi ya amai wawo na apai wawo anaabala mu dziko ino: 4 ‘Iwo anadzafa na mautenda akugopswa,+ mbwenye nkhabe munthu anafuna kualira peno kuaikha munthumbi; iwo anadzakhala ninga ndimu pa mataka.+ Iwo anadzaphiwa na supada, pontho anadzafa na njala,+ manungo awo anadzakhala pyakudya pya mbalame na pyakudya pya pinyama pya ntsanga.’
5 Ipi ndi pidalonga Yahova:
‘Leka kupita nʼnyumba yakuti iri na ciliro,
Leka kuenda kunyumba ineyi toera kulira peno kutsukwala.’+
‘Thangwi ine ndabulusa ntendere wanga pakati pa mbumba iyi,’ alonga Yahova,
‘Ndabulusambo ufuni wanga na ntsisi zanga.+
6 Akulu na ana ene anadzafa mu dziko ino.
Iwo nee anadzaikhwa munthumbi,
Nkhabe munthu anafuna kudzaalira,
Nee kucekeka-cekeka peno kucinga mpala thangwi ya iwo.
7 Nkhabe munthu anafuna kupereka cakudya kuna ale adaferwa,
Toera aabalangaze thangwi yakuferwa;
Nee kuapasa vinyu toera kuabalangaza,
Toera amwe thangwi yakuferwa na pai wawo peno mai wawo.
8 Pontho, leka kuenda panyumba yakuti iri na phwando,
Mbukhala pantsi pabodzi na anthu toera kudya na kumwa.’
9 “Ipi ndi pidalonga Yahova wa anyankhondo, Mulungu wa Izraeli: ‘Pa mbuto ino, imwe mbamudzati kufa munaona na maso anu kuti ndinadzamalisa kutsandzaya na kukomerwa, fala ya mankhadzi wamamuna na fala ya mankhadzi wankazi.’+
10 “Ungapanga mbumba iyi mafala anewa onsene, iwo anakubvundza: ‘Thangwi yanji Yahova alonga kuti tinagwerwa na nyatwa ineyi ikulu? Ndi madodo api, pontho ndi madawo api adacitira ife Yahova Mulungu wathu?’+ 11 Iwe usafunika kuatawira: ‘“Ndi thangwi yakuti ambuyanu andisiya,”+ alonga Yahova, “pontho iwo alambira alungu anango, aatumikira mbaagodamira.+ Mbwenye ine, iwo andisiya, pontho nee abvera mwambo wanga.+ 12 Imwe musacita pinthu pyakuipa kakamwe kupiringana ambuyanu,+ musakhonda kundibvera, pontho mʼbodzi na mʼbodzi asacita pinthu mwakubverana na ntima wace wakuipa.+ 13 Natenepa, ine ndinakuthamangisani mu dziko ino, mbandikuendesani mu dziko yakuti nee imwe, nee ambuyanu mukhaidziwa,+ kweneko imwe munadzatumikira alungu anango masiku na masikati,+ thangwi nee ndinadzakubverani ntsisi.”’
14 “‘Mbwenye ziri kufika ntsiku,’ alonga Yahova, ‘zakuti iwo nee anadzalongabve kuti: “Tiri kudumbira mu dzina ya Yahova Mulungu wa mʼmaso, ule adabulusa mbumba ya Izraeli mu dziko ya Ejitu!”+ 15 Mbwenye iwo anadzalonga: “Tiri kudumbira mu dzina ya Yahova Mulungu wa mʼmaso, ule adabulusa mbumba ya Izraeli ku dziko yakunkwiriro na mʼmadziko adaabalalisa iye,” ndinaabweresa pontho mu dziko yawo, idapasa ine ambuyawo.’+
16 Yahova alonga: ‘Ine ndinadzabweresa anyakumedza,
Pontho iwo anadzaamedza.
Buluka penepo, ine ndinadzabweresa anyakusodza azinji,
Iwo anadzaasodza mʼmapiri onsene, nʼnthunda zonsene,
Na mʼmphako za miyala mikulu.
17 Thangwi maso anga asaona pyonsene pinacita iwo.
Iwo nee abisika pamaso panga,
Pontho madawo awo nee abisika pamaso panga.
18 Pakutoma, ine ndinadzaabwezera mwakukwana madodo awo na madawo awo,+
Thangwi iwo apswipisa dziko yanga na madzimunthu awo akunyanyasa akuti nkhabe umaso,
Pontho iwo adzadza pinthu pyakunyanyasa mu dziko yanga.’”+
19 Yahova, imwe ndimwe mphambvu yanga na mbuto yanga yacitsidzikizo,
Mbuto yanga yakubisalira pa ntsiku ya nyatwa,+
Madzindza a anthu anadzabwera kuna imwe kubulukira kunkhomo kwa dziko,
Iwo anadzalonga: “Ambuyathu atowezera nsambo wakulambira alungu apezi,*
Pinthu pyapezi na pyakusowa basa pyakuti nkhabe phedza.”+
20 Kodi munthu anakwanisa kucita ekhene alungu ace?
Pinthu pinacita iye nee ndi alungu andimomwene.+
21 “Natenepa iwo anadzadziwa,
Inde, pa ndzidzi uno iwo
anadzadziwa kuti ine, ndine wamphambvu kakamwe,
Pontho anadzadziwa kuti dzina yanga ndi Yahova.”
17 “Madawo a mbumba ya Yuda alembwa na cakulemba naco ca utale.
Alembwa mʼmitima yawo na ntsonga ya dhiamanti,
Na pa nyanga za maguwa awo,
2 Ngakhale anawo, asakumbuka maguwa awo na miti yawo yakulambirwa,*+
Pakhundu pa miti mikulu ya masamba akubithimira na pa nthunda zikulu,+
3 Mʼmapiri kunja kwa nzinda,
Pinthu pyako na mpfuma zako zonsene ndinadzapipereka ninga pinthu pyakutapatwa,+
Inde, mbuto zanu zakulambira, thangwi ya madawo adacita imwe mupisa pyanu pyonsene.+
4 Imwe munadzakhonda mwekhene unthaka udakupasani ine.+
Ndinadzacitisa kuti mutumikire anyamalwa anu mu dziko inakhonda imwe kudziwa,+
Iwo unagaka kwenda na kwenda.”
5 Yahova alonga tenepa:
“Mbapaswe dzedze munthu ananyindira anthu,+
Ule ananyindira mphambvu za anthu,+
Wakuti ntima wace usasiya kubvera Yahova.
6 Iye anadzakhala ninga muti wakuti uli okhene nʼthando,
Iye nee anadzaona pinthu pyadidi pingabwera,
Mbwenye anadzakhala mu mbuto zakusowa madzi nʼthando,
Mu dziko yakulungula munyu, yakuti nkhabe munthu anakwanisa kukhalamo.
7 Mbapaswe nkhombo munthu ananyindira Yahova,
Wakuti cinyindiro cace ciri kuna Yahova.+
8 Iye anadzakhala ninga muti udatcekwa nʼkhundu mwa madzi,
Wakuti mitcitci yace isaenda mpaka mʼmadzi.
Ndzidzi wakupisa ungafika, iye nee anadzindikira,
Mbwenye masamba ace anadzakhala akubithimira ndzidzi onsene.+
Iye nee anadzudzumika pa caka cinakhonda kubvumba madzi,
Pontho nee anadzasiya kubala misapo.
9 Ntima ndi wakunyengeza* kakamwe kupiringana pinthu pinango pyonsene, pontho ndi wakusowa cidikhiro.*+
Mbani anakwanisa kuudziwa?
10 Ine Yahova ndisaona mwadidi piri muntima,+
Ndisaona pinanyerezera munthu nkati mwa ntima wace,
Toera kubwezera mʼbodzi na mʼbodzi mwakubverana na pinacita iye,
11 Munthu anawina mpfuma munjira yakukhonda kulungama,+
Ndi ninga nkhwale inakhalira mazai akuti nee ndi ace.
Mpfuma zace zinadzamala pakati pa umaso wace,
Pakumalisa, iye anadzapangizika kuti ndi munthu wakusowa ndzeru.”
12 Mbuto yathu yakucena,+
Ndi mpando waumambo wambiri wakuti usakuzwa kutomera pakutoma.
13 Imwe Yahova, cidikhiro ca Izraeli,
Onsene anakusiyani anadzapaswa manyadzo.
Ale anasiya kukutumikirani, madzina awo anadzalembwa pa pfumbi,+
Thangwi iwo asiya Yahova, ncera wa madzi akupasa umaso.+
14 Ndiwangiseni imwe Yahova; natenepa, ine ndinawanga,
Ndipulumuseni, natenepa ine ndinapulumuka,+
Thangwi imwe ndimwe ule anasimba ine.
15 Onani, anthu anango asandibvundza:
“Ali kupi mafala a Yahova?+
Mbapicitike pidalonga iye!”
16 Ninga nkumbizi, ine nee ndasiya kukutowerani,
Pontho nee ndafuna kuti ntsiku ya nyatwa ifike,
Imwe musadziwa mwadidi pinthu pyonsene pidalonga ine na mulomo wanga;
Pyonsene piri pamaso panu,
17 Lekani kukhala cinthu cakugopesa kuna ine.
Imwe ndimwe mbuto yanga yakuthawira pa ntsiku ya nyatwa.
18 Ale ananditcinga mbapaswe manyadzo,+
Mbwenye ine mbandileke kupaswa manyadzo,
Iwo mbagope,
Mbwenye ine mbandileke kugopa,
Abweresereni ntsiku ya nyatwa,+
Afudzeni mbamuamalisiratu.
19 Ipi ndi pidandipanga Yahova: “Ndoko mpaka pansuwo ukulu wa mbumba,* ule wakuti amambo a ku Yuda asapita nawo mbabuluka nawo, na pa misuwo inango yonsene ya mu Yerusalemu.+ 20 Iwe usafunika kuapanga tenepa: ‘Bveserani mafala a Yahova, imwe amambo a ku Yuda, mbumba yonsene ya ku Yuda na anthu onsene anakhala mu Yerusalemu, ale anapita na mʼmisuwo iyi. 21 Ipi ndi pidalonga Yahova: “Citani mphole-mphole toera mukhonde kuthukula mitolo pa ntsiku ya Sabudu, nee kupita nayo na pa misuwo ya Yerusalemu.+ 22 Lekani kubweresa mitolo pa ntsiku ya Sabudu buluka kunyumba kwanu, pontho lekani kuphata basa yakuwanga.+ Ntsiku ya Sabudu isafunika kukhala yakucena kuna imwe, ninga mudapanga ine ambuyanu.+ 23 Mbwenye iwo akhonda kubvera, pontho nee apitsalakana, iwo nee abvera, pontho nee atawira kulangwa.”’+
24 “‘“Mbwenye imwe mungandibvera na ntima onsene,” alonga Yahova, “mbamukhonda kupita na mitolo pa misuwo ya nzinda pa ntsiku ya Sabudu, pontho mungapitiriza kukoya ntsiku ya Sabudu ninga yakucena, mbamukhonda kuphata basa pa ntsiku ineyi,+ 25 penepo, amambo na akulu-akulu anakhala pa mpando waumambo wa Dhavidhi,+ anadzapitambo na pa misuwo ya nzinda uno, iwo anadzafamba na ngolo, pontho na makavalo; iwo pabodzi na akulu-akulu awo, amuna a ku Yuda na anthu anakhala mu Yerusalemu,+ pontho nzinda uno unadzakhala na anthu kwenda na kwenda. 26 Anthu anadzabwera buluka mʼmizinda ya ku Yuda, mupisa pya nʼkhundu mwa Yerusalemu, mu dziko ya Bhenjamini,+ ku gowa,+ mucisa ca ku mapiri na ku Nejebhu, nʼnyumba ya Yahova, iwo anadzabweresa ntsembe zakupiswa,+ miyoni,+ ntsembe za pyakudya,+ mafuta a olibhano na ntsembe zakupereka takhuta.+
27 “‘“Mbwenye angakhonda kubvera, pontho angakhonda kupitiriza kuona ntsiku ya Sabudu ninga yakucena, mbathukula mitolo, mbapita nayo na pa misuwo ya mu Yerusalemu pa ntsiku ya Sabudu, ndinadzapisa na moto misuwo ya nzinda, mwandimomwene, moto unoyu unadzapisa nyumba za ndzulu zidazungulirwa na mipanda yakuwanga mu Yerusalemu,+ pontho nee unadzathima.”’”+
18 Awa ndi mafala adalonga Yahova kuna Yeremiya: 2 “Lamuka, ndoko kunyumba ya nyakuumba pyombo pya dongo,+ kweneko ine ndinadzakudziwisa mafala anga.”
3 Natenepa, ine ndaenda kunyumba ya nyakuumba, mbandinʼgumana ali kuumba combo ca dongo. 4 Mbwenye combo cikhaumba iye mʼmanja mwace nee cabuluka mwadidi. Na thangwi ineyi, nyakuumba akanya pontho dongo ineyi mbacita combo cinango mwakubverana na pikhafuna iye.
5 Buluka penepo Yahova andipanga: 6 “‘Imwe dzindza ya Izraeli, kodi ine nee ndinakwanisambo kucita na imwe ninga pidacita nyakuumba uyu?’ alonga Yahova. ‘Imwe mbumba ya Izraeli, mʼmanja mwanga, imwe ndimwe ninga dongo mʼmanja mwa nyakuumba.+ 7 Ndzidzi onsene unalonga ine kuti ndinadula, ndinagomola peno ndinafudza mbumba peno umambo,+ 8 mbumba ineyi ingasiya kucita pinthu pyakuipa pidandicitisa kuasandika napyo, inembo ndinadzabwerera nduli, mbandikhonda kuathabusa na nyatwa idalonga ine kuti mbidaabweresera.+ 9 Mbwenye ndzidzi onsene unalonga ine kuti ndinawangisa peno ndinacita mbumba peno umambo, 10 iwo angacita pinthu pyakuipa pamaso panga, mbakhonda kubvera fala yanga, inembo ndinadzacinja manyerezero anga, mbandikhonda kucita pinthu pyadidi pidalonga ine kuti mbidaacitira.’
11 “Cincino ndaphata miyendo, panga amuna a ku Yuda na anthu anakhala mu Yerusalemu kuti: ‘Ipi ndi pidalonga Yahova: “Ine ndiri kukhunganya nyatwa, pontho ndiri kunyerezera kuti ndinakutcunyusani tani. Ndaphata miyendo, siyani njira zanu zakuipa, pontho sasanyirani njira zanu na macitiro anu.”’”+
12 Mbwenye iwo atawira: “Walemba mʼmadzi!+ Thangwi ife tinapitiriza kucita pinanyerezera ife, pontho mʼbodzi na mʼbodzi wa ife anapitiriza kucita pinthu mwakubverana na ntima wace wakuipa.”+
13 Natenepa, ipi ndi pidalonga Yahova:
“Ndaphata miyendo, bvundzisani anthu a madzindza anango.
Mbani adabva kale pinthu ninga pyenepi?
Mbumba ya Izraeli yacita pinthu pyakuipa kakamwe.+
14 Kodi neve inazambazika pa miyala ya nʼkhundu mwa phiri ya ku Libhano?
Kodi madzi akutonthola anabuluka kutali anauma?
15 Mbwenye mbumba yanga yandiduwala.+
Thangwi iwo asapereka ntsembe kuna alungu akusowa basa,+
Pontho asacitisambo kuti anango agwe munjira zawo, munjira zakale.+
Asafamba munjira zacigwandira zakuti nee zazerezwa,
16 Toera kucitisa dziko yawo kukhala cinthu cakugopesa,+
Cinthu cakuti ndzidzi onsene munthu angaciona anaimba ciruzwi.+
Anthu onsene anafuna kupita na kweneko anaiona, anagopa, mbasukusa nsolo.+
17 Ine ndinadzakhala ninga mphepo yakumabulukiro a dzuwa, mbandiabalalisa pamaso pa anyamalwa awo.
Ine ndinadzaapasira nkhodolo, mbandikhonda kuyangʼana kuna iwo pa ntsiku ya nyatwa yawo.”+
18 Penepo iwo alonga: “Tendeni tibverane pinthu pyakuipa pinafuna ife kucitira Yeremiya,+ thangwi mwambo wa anyantsembe athu, uphungu wa anyakudziwisa athu na mafala a aprofeta athu nkhabe kudzamala. Tendeni timpambizire, pontho mbatilekeni kubvesera pinalonga iye.”
19 Yahova, ndibvesereni;
Pontho bveserani pinalonga anyamalwa anga.
20 Kodi munthu angacita pinthu pyadidi asafunika kucitirwa pinthu pyakuipa?
Thangwi iwo andikumbira djenje toera kundipha.+
Kumbukani kuti ine ndikhali pamaso panu toera kuabvunulira,
Toera ukali wanu ukhonde kuagwera.
21 Natenepa, siyani kuti anawo afe na njala,
Asiyeni aphiwe na supada.+
Akazawo mbaferwe na anawo, pontho mbaferwe na amunawo.+
Amunawo mbafe na utenda wakugopswa,
Aphale awo mbaphiwe na supada kunkhondo.+
22 Mʼmanyumba mwawo mbamubveke kukhuwa,
Mungaabweresera anyakutapata mwakututumusa.
Iwo andikumbira djenje toera kundiphata,
Pontho anditeyera nsampha toera kumanga miyendo yanga.+
23 Mbwenye imwe Yahova,
Imwe musadziwa mwadidi pinthu pyonsene pyakuipa pinabverana iwo toera kundicitira, toera kundipha.+
Lekani kulekerera madodo awo,
Pontho lekani kufudza madawo awo pamaso panu,
Iwo mbagwe pamaso panu,+
Mungapangiza ukali wanu kuna iwo toera kuatcunyusa.+
19 Ipi ndi pidalonga Yahova: “Ndoko kagule nkhali ya dongo kuna nyakuumba.+ Kwata akulu a mbumba angasi na akulu a anyantsembe angasi, 2 ndoko ku Gowa ya Mwana wa Inoni,+ Pansuwo Ukulu wa Madzinga. Penepo longa mafala anafuna kukupanga ine. 3 Iwe usafunika kulonga kuti: ‘Imwe amambo a ku Yuda na anthu anakhala mu Yerusalemu, bveserani mafala a Yahova. Ipi ndi pidalonga Yahova wa anyankhondo, Mulungu wa Izraeli:
“‘“Mwakukhonda dembuka, ine ndinadzabweresa nyatwa mu nzinda uno, pontho anthu onsene anafuna kubva pya nyatwa ineyi anadzatsukwala.* 4 Ine ndinacita pyenepi thangwi iwo andisiya,+ pontho iwo acitisa kuti ine ndikhonde kudzindikira mbuto ino.+ Pa mbuto ino, iwo asapereka ntsembe kuna alungu anango akuti nee iwo, nee ambuyawo, nee amambo a ku Yuda akhaadziwa, pontho iwo adzadza mbuto ino na ciropa ca anthu adaphiwa mwakusowa mulando.+ 5 Iwo amanga mbuto za kulambira Bhaale toera kupisa anawo pa moto ninga ntsembe za Bhaale,+ pinthu pyakuti ine nee ndaapanga toera apicite, pontho cipo ndikhadapinyerezera kale muntima mwanga.”’+
6 “‘“Natenepa, ziri kufika ntsiku,” alonga Yahova, “zakuti mbuto iyi nee inadzacemerwabve Tofeti peno Gowa ya Mwana wa Inoni, mbwenye inadzacemerwa Gowa Inapherwa Anthu.+ 7 Ine ndinadzapingiza pinafuna kucita mbumba ya Yuda na Yerusalemu pa mbuto ino, ine ndinacitisa kuti iwo aphiwe na supada na anyamalwa awo, pontho na ale anaasaka toera kuaapha. Ine ndinadzapereka manungo awo akufa ninga cakudya kuna mbalame na pinyama pya ntsanga.+ 8 Ine ndinacitisa kuti nzinda uyu ukhale cinthu cakugopesa na cinthu cakuti munthu angaciona anaimba ciruzwi. Anthu onsene anafuna kupita na kweneko anauona, anagopa, mbaimba ciruzwi thangwi ya nyatwa zidaugwera.+ 9 Ine ndinadzaacitisa kuti adye manungo a anawo amuna na akazi, pontho mʼbodzi na mʼbodzi anadzadya manungo a ndzace, thangwi yakusowa cidikhiro angazungulirwa na anyamalwa awo pabodzi na ale anaasaka toera kuapha.”’+
10 “Penepo usafunika kuswa nkhali pamaso pa amuna anafuna kuenda na iwe, 11 pontho apange kuti: ‘Ipi ndi pidalonga Yahova wa anyankhondo: “Ine ndinadzafudza mbumba iyi na nzinda uno ninga munaswiwa combo ca dongo cakuti cipo cinakwanisa kuphatanizwa; ku Tofeti iwo anadzaikha munthumbi anthu akufa mpaka kusoweka mbuto ya kuaikha.”’+
12 “Yahova alonga: ‘Pyenepi ndipyo pinafuna kucita ine na mbuto ino pabodzi na anthu anakhala muno, toera kucitisa mbuto ino kukhala ninga Tofeti. 13 Nyumba za mu Yerusalemu na nyumba za amambo a ku Yuda, zinadzakhala zakukhonda cena ninga mbuto ino ya Tofeti,+ inde, nyumba zonsene zakuti padzulu pazo iwo aperekapo ntsembe kuna pinthu pyonsene pyakudzulu,*+ pontho aperekapo ntsembe za pyakumwa kuna alungu anango.’”+
14 Pidabwerera Yeremiya buluka ku Tofeti kukhadantuma Yahova toera kulonga maprofesiya, iye alimira pa thando ya nyumba ya Yahova mbapanga mbumba yonsene kuti: 15 “Ipi ndi pidalonga Yahova wa anyankhondo, Mulungu wa Izraeli: ‘Mu nzinda uno na mupisa pyace pyonsene, ndiri kubweresa nyatwa zonsene zidalonga ine kuti mbidazibweresa, thangwi iwo aumisa mitima yawo mbakhonda kubvera mafala anga.’”+
20 Pasuri mwana wa Imeri, akhali nyantsembe, pontho akhali muyangʼaniri wankulu wa panyumba ya Yahova, iye abvesera Yeremiya pikhalonga iye profesiya thangwi ya pinthu pyenepi. 2 Penepo, Pasuri amenya mprofeta Yeremiya, mbamʼmangira pa phindi ya muti+ yakuti ikhali Pansuwo Ukulu wa Bhenjamini, panyumba ya Yahova. 3 Mbwenye mangwana mwace, Pasuri pidasudzula iye Yeremiya pa phindi ya muti, Yeremiya ampanga:
“Pasuri, Yahova acinja dzina yako mbikhala Cinthu Cakugopesa Konsene Kwene.+ 4 Thangwi ipi ndi pidalonga Yahova: ‘Ine ndinakucitisa kukhala cinthu cakugopesa kuna iwe na kuna axamwali ako onsene. Anyamalwa awo anadzaapha na supada, iwe unadzaona pyenepi na maso ako;+ pontho ine ndinadzapereka anthu onsene a mbumba ya ku Yuda mʼmanja mwa mambo wa ku Bhabhilonya, iye anadzaakwata mbaenda nawo ku ubitcu ku Bhabhilonya, mbaapha na supada.+ 5 Ine ndinakwata mpfuma zonsene za nzinda uno, pinthu pyawo pyonsene, pinthu pyonsene pya ntengo ukulu na pinthu pyonsene pya amambo a ku Yuda mbandipipereka mʼmanja mwa anyamalwa awo.+ Iwo anadzatapata pinthu pyenepi pyonsene, pontho iwo anadzapikwata, mbaenda napyo ku Bhabhilonya.+ 6 Mbwenye iwe Pasuri pabodzi na anthu onsene anakhala panyumba pako, munaendeswa ku ubitcu. Unaenda ku Bhabhilonya, pontho unafera kweneko, mbuikhwa munthumbi pabodzi na axamwali ako onsene thangwi iwe walonga profesiya yauthambi kuna iwo.’”+
7 Yahova, imwe mwandinyengeza, ine ndanyengezwa.
Imwe mwapangiza kuti ndimwe wamphambvu kakamwe kupiringana ine, mbamuwina.+
Ndine cinthu cakusekesa pa ntsiku yonsene;
Onsene asandisingirira.+
8 Thangwi ndzidzi onsene unalonga ine, ndisafunika kukhuwa mbandidziwisa:
“Uphanga na kufudzwa!”
Ine ndisatikanwa, pontho ndisapwazwa ntsiku yonsene thangwi ya mafala a Yahova.+
9 Natenepa ine ndalonga: “Nee ndinaalonga pontho,
Nee ndinalongabve mu dzina yace.”+
Mbwenye mafalace adzakhala ninga moto wakugaka muntima mwanga, udafungirwa mʼmagogodo anga,
Ine ndikhadaneta na kuupirira;
Nee ndikhakwanisabve kumatama.+
10 Ine ndabva pinthu pyakuipa pinalonga anthu azinji;
Pinthu pyakugopesa pyandizungulira.+
“Nsumireni; tendeni tinsumire!”
Anthu onsene akuti akhafuna kukhala muntendere na ine, akhadikhira kuti ndicitikirwe na cinthu cakuipa, iwo alonga:+
“Panango iye anadodomeka mbacita cinthu cakuipa,
Penepo, ife tinakwanisa kunkunda, mbatimʼbwezera pyakuipa pidaticitira iye.”
11 Mbwenye Yahova akhali na ine ninga nyankhondo wakugopswa.+
Na thangwi ineyi, ale ananditcinga anadzagwa, iwo nee anadzawina.+
Iwo anadzapasika manyadzo, thangwi pinthu nee pinaafambira mwadidi.
Iwo anapwazwa kwenda na kwenda, pyenepi cipo pinadzaduwalika.+
12 Thangwi imwe Yahova wa anyankhondo, musadinga munthu wakulungama;
Musaona manyerezero a nkati kakamwe na ntima wa munthu.+
Ndiphedzeni toera ndione kuatcunyusa kunafuna kuacita imwe,+
Thangwi ine ndanyindira imwe toera mutsalakane nseru wanga.+
13 Imbirani Yahova! Simbani Yahova!
Thangwi iye aombola nyakutcerenga mʼmanja mwa anyakuipa.
14 Mbipaswe dzedze ntsiku idabalwa ine!
Mbileke kupaswa nkhombo ntsiku idandibala mai wanga!+
15 Mbapaswe dzedze munthu adabweresa mphangwa zadidi kuna pai wanga, mbalonga:
“Abalwa mwanako, ndi mwana wamamuna!”
Natenepa iye mbatsandzaya kakamwe.
16 Munthu unoyu mbakhale ninga mizinda yakuti Yahova aifudza, mbakhonda kuibvera ntsisi.
Iye mbabvesere kukhuwa kwa anthu namacibese, na kulira kwa nyanga namasikati.
17 Thangwi yanji iye nee andiphera mʼmimba mwa mai wanga,
Toera mimba ya mai wanga ikhale nthumbi yanga,
Iye mbakhala na mimba kwenda na kwenda?+
18 Thangwi yanji ndabuluka mʼmimba mwa mai wanga,
Basi ene toera ndione nyatwa na kutsukwala,
Mbandimalisa ntsiku za umaso wanga mwakupasika manyadzo?+
21 Yeremiya atambira mafala a Yahova, mu ndzidzi wakuti Mambo Zedhekiya+ atuma Pasuri+ mwana wa Malkiya na Sofoniya+ mwana wa Maseya, wakuti akhali nyantsembe, toera amʼphembe kuti: 2 “Taphata miyendo, phembani Yahova toera atiphedze, thangwi Nabhukodhonozore Mambo wa ku Bhabhilonya ali kumenyana na ife.+ Panango Yahova anacita cirengo cakudzumatirisa toera kutiphedza, mbankakamiza toera abuluke.”+
3 Yeremiya aatawira: “Ipi ndi pinafunika imwe kupanga Zedhekiya: 4 ‘Ipi ndi pidalonga Yahova Mulungu wa Izraeli: “Ine ndinacitisa kuti pida pya nkhondo piri mʼmanja mwanu pikuzungunukireni, pida pinaphatisira imwe toera kumenyana na mambo wa ku Bhabhilonya,+ na Akaldheya adakuzungulirani kunja kwa mpanda. Pontho ine ndinadzapigumanya pakati pa nzinda uno. 5 Ine ndinadzamenyana na iwe+ na mphambvu zanga zonsene, na nkono wanga wamphambvu, na ukali wanga, pontho na kuipirwa kwanga kukulu.+ 6 Ine ndinadzapha anthu anakhala mu nzinda uno, anthu na pinyama pyene anadzafa thangwi ya utenda ukulu.”’+
7 “‘“Buluka penepo,” alonga Yahova, “ine ndinadzapereka Zedhekiya Mambo wa ku Yuda, atumiki ace na mbumba ya nzinda uno, ale adakhonda kufa na utenda, na supada, pontho na njala; ndinadzaapereka mʼmanja mwa Nabhukodhonozore Mambo wa ku Bhabhilonya, na mʼmanja mwa anyamalwa awo, na mʼmanja mwa ale anaasaka toera kuapha,+ iye anadzaapha na supada, iye nkhabe kudzaabvera ntsisi, nee kualekerera.”’+
8 “Usafunika kupanga mbumba iyi kuti: ‘Ipi ndi pidalonga Yahova: “Ndiri kuikha pamaso panu njira ya umaso na njira yakufa. 9 Ale anafuna kupitiriza kukhala mu nzinda uno, anadzaphiwa na supada, anadzafa na njala, pontho na utenda. Mbwenye ule anafuna kubuluka, mbaenda kaperekeka kuna Akaldheya adakuzungulirani, anadzapitiriza na umaso wace.”’+
10 “‘“Thangwi ine ndatonga kubweresa nyatwa mu nzinda uno, tayu pinthu pyadidi,”+ alonga Yahova. “Iwo unadzaperekwa mʼmanja mwa mambo wa ku Bhabhilonya,+ pontho iye anadzaupisa na moto.”+
11 “‘Imwe anthu a panyumba ya mambo wa ku Yuda: Bveserani mafala a Yahova. 12 Imwe mbumba ya Dhavidhi, ipi ndi pidalonga Yahova:
“Tsidzikizani ulungami ntsiku zonsene,
Ale anaberwa, apulumuseni mʼmanja mwa ale anaaponderera,+
Toera ukali wanga ukhonde kugaka ninga moto,+
Mbugaka munjira yakuti nkhabe anafuna kwanisa kuuthimisa,
Thangwi ya pinthu pyakuipa pinacita imwe.”’+
13 ‘Ine ndinakutcunyusani imwe anthu anakhala nʼgowa,
Imwe mwala wa nʼgowa,’ alonga Yahova.
‘Imwe musalonga kuti: “Mbani anafuna bwera kudzatitcunyusa?
Mbani anafuna kudzafudza nyumba zathu?”
14 Mbwenye ine ndinadzakutcunyusani,
Mwakubverana na macitiro anu,’ alonga Yahova.+
‘Nsitu wanu ndinadzaupisa na moto,
Moto unoyu unadzapisa pinthu pyonsene piri nʼkhundu mwawo.’”+
22 Ipi ndi pidalonga Yahova: “Ndoko kunyumba ya mambo wa ku Yuda toera ukampange mphangwa izi. 2 Iwe usafunika kumpanga: ‘Bveserani mafala a Yahova imwe mambo wa ku Yuda anakhala pa mpando waumambo wa Dhavidhi, inde, imwe na atumiki anu pabodzi na mbumba yanu inapita na pa misuwo iyi. 3 Ipi ndi pidalonga Yahova: “Tsidzikizani ulungami na udidi. Ale anaberwa apulumuseni mʼmanja mwa ale anaaponderera. Lekani kuthabusa munthu wa dziko inango, lekani kuonesa nyatwa mwana waumphawi peno nzice.*+ Pontho pa mbuto ino lekani kupha anthu akusowa mulando.+ 4 Mungabvera mwadidi mafala awa, amambo anakhala pa mpando wa Dhavidhi+ anadzapita na pa misuwo ya nyumba iyi mbafamba na ngolo, pontho na makavalo, iwo, atumiki awo pabodzi na mbumba yawo.”’+
5 Yahova alonga: “‘Mbwenye mungakhonda kubvera mafala awa, ndiri kudumbira mu dzina yanga kuti nyumba iyi inadzakhala madembe.’+
6 “Ipi ndi pidalonga Yahova thangwi ya nyumba ya mambo wa ku Yuda:
‘Kuna ine iwe ndiwe ninga Jiliyadhi,
Ninga padzulu paphiri ya Libhano.
Mbwenye ndinakucitisa kukhala thando,
Mizinda yako yonsene inadzakhala yakusowa anthu.+
7 Ndinadzasankhula anyakufudza mbandiatuma kuna iwe,
Mʼbodzi na mʼbodzi anadzakhala na pida pyace pya nkhondo.+
Iwo anadzagwanda miti yako yadidi kakamwe ya sedhro,
Mbaiponya pa moto.+
8 “‘Madzindza mazinji anadzapita na mu nzinda uno, mbabvundzana unango na ndzace: “Thangwi yanji Yahova acita pyenepi kuna nzinda uno ukulu?”+ 9 Iwo anadzatawirwa: “Ndi thangwi yakuti iwo asiya cibverano ca Yahova Mulungu wawo, alambira alungu anango mbaatumikira.”’+
10 Lekani kulira munthu adafa,
Pontho lekani kumbvera ntsisi.
Mbwenye lirani munthu anaenda,
Thangwi iye cipo anabwerera pontho toera kuona dziko idabalwa iye.
11 “Ipi ndi pidalonga Yahova thangwi ya Salumu+ mwana wa Yosiya mambo wa ku Yuda anatonga pa mbuto ya babace Yosiya+ ule adabuluka pa mbuto ino: ‘Iye cipo anabwerera pontho. 12 Thangwi iye anadzafera ku dziko idaendeswa iye ku ubitcu, pontho iye cipo anadzaona pontho dziko ino.’+
13 Dzedze kuna ule anamanga nyumba yace mwakusowa ulungami,
Pontho asamanga makwartu ace andzulu mwakusowa ulungami,
Wakuti asaphatisa ndzace basa papezi,
Mbakhonda kumulipa;+
14 Iye asalonga: ‘Ndinadzamanga nyumba yanga ikulu,
Yakuti iri na makwartu makulu andzulu.
Ndinadzaikha majanela,
Ndinadzaikha matabwa a sedhro mbandiipintari na kore yakufuira.’
15 Kodi iwe unapitiriza kutonga thangwi usaphatisira kakamwe sedhro kupiringana anango?
Pai wako akhadyambo, mbamwa;
Mbwenye akhacita pinthu pyadidi na pyakulungama,+
Pontho pinthu pyonsene pikhanfambira mwadidi.
16 Iye akhabvunulira munthu wakusowa na ntcerengi,
Natenepa pinthu pyonsene pikhafamba mwadidi.
‘Kodi si pyenepi tayu pinapangiza kuti munthu asandidziwa?’, alonga Yahova.
17 ‘Mbwenye iwe basi ene usafuna kuwina pinthu mwakusowa ulungami,
Kupha anthu akusowa mulando,
Kubera anthu na kuapokosera pinthu.’
18 “Mbwenye ipi ndi pidalonga Yahova thangwi ya Yeowakimu+ mwana wa Yosiya mambo wa ku Yuda,
‘Nkhabe munthu anafuna kudzamulira, mbalonga:
“Mama ine mʼbale wanga! Mama ine mwanankazi wanga!”
Nkhabe munthu anafuna kudzamulira, mbalonga:
“Mama ine mbuyanga! Mama ine imwe wakulemedzwa!”
19 Iye anadzaikhwa munthumbi ninga munaikhwa buru,+
Iye anadzakwekwetwa mbaponywa kutali,
Kunja kwa misuwo ya Yerusalemu.’+
20 Ndoko kalire ku Libhano,
Khuwa ku Bhasani,
Khuwa mwakugaluza ku Abharimu,+
Thangwi onsene anakufuna amala kufudzwa.+
21 Ine ndalonga na iwe mu ndzidzi ukhaona iwe kuti ukhali wakutsidzikizika.
Mbwenye iwe walonga: ‘Ine nee ndinabvera.’+
Iwe usacita pyenepi kutomera mu uphale wako,
Thangwi iwe cipo wabvera mafala anga.+
22 Mphepo inadzakumbiza akumbizi ako onsene,+
Pontho ale anakufuna anadzaendeswa ku ubitcu.
Penepo iwe unadzapasika manyadzo mbupwazika thangwi ya nyatwa zako zonsene.
23 Iwe wakuti usakhala ku Libhano,+
Usamanga ntsandza yako pakati pa miti ya sedhro,+
Unatetemera kakamwe ungagwerwa na nyatwa,
Nyatwa ninga inakhala na nkazi pakubala!”+
24 Yahova alonga: “‘Ine ndiri kudumbira mu dzina yanga kuti iwe Koniya+ mwana wa Yeowakimu+ mambo wa ku Yuda, mbudakhala mphete ncala canga ca nkono wamadyo, ine mbidakubulusa! 25 Ine ndinadzakupereka mʼmanja mwa ale anakusaka toera kukupha, mʼmanja mwa ale anagopa iwe, mʼmanja mwa Nabhukodhonozore Mambo wa ku Bhabhilonya na mʼmanja mwa Akaldheya.+ 26 Iwe pabodzi na mai wako adakubala ndinadzakuponyani ku dziko inango, ku dziko idakhonda imwe kubalwa, pontho imwe munadzafera kweneko. 27 Iwo cipo anabwerera pontho ku dziko inafuna iwo.+
28 Kodi mamuna uyu Koniya nee ndi ninga nkhali yakupwazika idaswiwa,
Combo cakuti nkhabe munthu anacifuna?
Thangwi yanji iye na dzindza yace agwiswa pantsi,
Mbaponywa ku dziko yakuti iwo nkhabe kuidziwa?’+
29 Iwe dziko, dziko, dziko,
bvesera mafala a Yahova.
30 Ipi ndi pidalonga Yahova:
‘Lemberani mamuna unoyu ninga munthu wakusowa ana,
Ninga munthu wakuti pinthu nee pinanfambira mwadidi mu umaso wace,
Thangwi nkhabe munthu wa dzindza yace wakuti pinthu pinanfambira mwadidi,
Mbakhala pa mpando wa Dhavidhi toera kutonga pontho dziko ya Yuda.’”+
23 Yahova alonga: “Dzedze kuna akumbizi anafudza mabira anga anakumbiza ine, mbaabalalisa.”+
2 Natenepa, ipi ndi pidalonga Yahova Mulungu wa Izraeli, kuna akumbizi anakumbiza mbumba yanga: “Imwe mwamwaza mabira anga, mwaabalalisa, mbamukhonda kuatsalakana.”+
“Natenepa, ine ndinakutcunyusani thangwi ya pinthu pyakuipa pinacita imwe,” alonga Yahova.
3 “Buluka penepo, ine ndinadzagumanya mabira anga onsene adasalikira, mʼmadziko onsene adaabalalisa ine,+ mbandiabweresa pontho pa mbuto inadyera iwo;+ penepo iwo anadzabalana, mbanjipa kakamwe.+ 4 Ine ndinadzaapereka kuna akumbizi akuti mwandimomwene anadzaakumbiza.+ Iwo nkhabe kudzagopabve, nee kutetemera, pontho nee ibodzi inafuna kudzatayika,” alonga Yahova.
5 Yahova alonga: “Onani, ziri kufika ntsiku zakuti ine ndinadzabweresera Dhavidhi nthawi ipswa yakulungama.*+ Pontho mambo anadzatonga,+ iye anadzapangiza luso yakubvesesa, anatsidzikiza ulungami na makhaliro adidi mu dziko ino.*+ 6 Mu ntsiku zace, Yuda anadzapulumuswa,+ Izraeli anadzakhala mwakutsidzikizika.+ Pontho, iwo anadzacemerwa na dzina iyi: Ife Ndife Akulungama Thangwi ya Yahova.”+
7 “Mbwenye ziri kufika ntsiku,” alonga Yahova, “zakuti iwo nee anadzalongabve kuti: ‘Tiri kudumbira mu dzina ya Yahova Mulungu wa mʼmaso, ule adabulusa mbumba ya Izraeli mu dziko ya Ejitu!’+ 8 Mbwenye iwo anadzalonga: ‘Tiri kudumbira mu dzina ya Yahova Mulungu wa mʼmaso, ule adabweresa dzindza ya Izraeli buluka ku dziko yakunkwiriro na mʼmadziko onsene adaabalalisa iye,’ pontho iwo anadzakhala mu dziko yawo.”+
9 Kuna aprofeta:
Ntima wanga uli wakutsukwala.
Magogodo anga onsene ali kutetemera.
Ndiri ninga munthu adaledzera,
Ninga munthu adaledzera na vinyu,
Thangwi ya Yahova, pontho thangwi ya mafalace akucena.
10 Thangwi dziko ino yadzala na anyaupombo;+
Thangwi yakupaswa dzedze, dziko ino iri paciliro,+
Pontho, mbuto zakudyesera pifuyo nʼthando zauma.+
Macitiro awo ndi akuipa, iwo asaphatisira mwakuipa mphambvu zawo.
11 “Aprofeta na anyantsembe ene ndi akukhonda cena.+
Ngakhale nʼnyumba mwanga, ine ndagumana pinthu pyakuipa pinacita iwo,”+ alonga Yahova.
12 “Na thangwi ineyi, njira yawo inadzakhala yautherezi,* na yacidima;+
Iwo anadzasukhumwa, mbagwa.
Thangwi ine ndinadzaabweresera nyatwa,
Pa caka cinafuna ine
kuatcunyusa,” alonga Yahova.
13 “Kuna aprofeta a ku Samariya,+ ine ndaona cinthu cakunyanyasa.
Maprofesiya awo asabuluka kuna Bhaale,
Pontho iwo asapeusa mbumba yanga ya Izraeli.
14 Kuna aprofeta a ku Yerusalemu, ine ndaona pinthu pyakuipa kakamwe.
Iwo asacita upombo,+ pontho ndzidzi onsene iwo asalonga uthambi;+
Asaphedzera ale anacita pinthu pyakuipa,
Pontho iwo nee asasiya kucita pinthu pyakuipa.
15 Natenepa, ipi ndi pidalonga Yahova wa anyankhondo thangwi ya aprofeta:
“Ine ndinaadyesa masamba a muti wakuwawa,
Pontho ndinadzaapasa madzi a venenu toera amwe.+
Thangwi mu dziko yonsene ya Yerusalemu, aprofeta acitisa anthu kusiya kulambira Mulungu.”
16 Ipi ndi pidalonga Yahova wa anyankhondo:
“Lekani kubvesera mafala a aprofeta anakupangani maprofesiya.+
Iwo asakunyengezani.*
17 Kuna ale anandipwaza, iwo asaapanga mwakubwereza-bwereza kuti:
‘Yahova alonga: “Munadzakhala na ntendere.”’+
Kuna ale anapitiriza kubvera mitima yawo, iwo asaapanga:
‘Nee nyatwa ibodzi inafuna kukugwerani.’+
18 Mbwenye mbani ali mu nsoka wa axamwali a pantima a Yahova,
Toera kubva na kucita pinalonga mafalace?
Mbani adabvesesa mafalace, mbaabvera?
19 Onani, mphepo inafuna kubuluka kuna Yahova inadzapepesa mwamphambvu;
Ninga condzi, iyo inadzapepesa pa nsolo wa anyakuipa.+
20 Ukali wa Yahova nkhabe kudzabwerera nduli,
Mpaka angamala kucita pinafuna iye muntima mwace.
Kunkhomo kwa ntsiku zakumalisa, imwe munadzabvesesa mwadidi pyenepi.
21 Ine nee ndatuma aprofeta anewa, mbwenye iwo aenda nakuthamanga.
Ine nee ndalonga nawo, ngakhale tenepo, iwo alonga maprofesiya.+
22 Mbwenye iwo mbadakhala a mu nsoka wa axamwali anga a pantima,
Mbadaphedza mbumba yanga toera kubva mafala anga,
Pontho mbadaaphedza toera kusiya njira zawo zakuipa na pinthu pyakuipa pinacita iwo.”+
23 Yahova alonga: “Kodi ndine Mulungu basi ene ndingakhala dhuzi, ndingakhala kutali nee ndisapitiriza kukhala Mulungu?”
24 “Kodi munthu anakwanisa kubisala pa mbuto yakuti nee ndinakwanisa kumuona?”,+ alonga Yahova.
“Kodi ine nee ndisakhala
kudzulu na pa dziko yapantsi?”,+ alonga Yahova.
25 “Ine ndabva aprofeta analonga maprofesiya authambi mu dzina yanga. Iwo asalonga: ‘Ndalota! Ndalota!’+ 26 Mpaka lini manyerezero akulonga maprofesiya authambi anapitiriza mʼmitima ya aprofeta? Iwo ndi aprofeta analonga uthambi wa mʼmitima yawo.+ 27 Iwo asafuna kuti mbumba yanga iduwale dzina yanga thangwi ya ndoto zinalonga iwo kuna unango na ndzace, ninga pidacita ambuyawo adaduwala dzina yanga thangwi ya Bhaale.+ 28 Mprofeta adalota ndoto, mbalonge ndoto zace, mbwenye ule ali na mafala anga, mbalonge mafala anga mwakukhulupirika.”
Yahova alonga: “Kodi mapesi a tirigu alandana na tirigu?”
29 Yahova alonga: “Kodi mafala anga nee ndi ninga moto,+ pontho nee ndi ninga martelo ananyedza mwala ukulu?”+
30 “Na thangwi ineyi, ine ndinadzatcunyusa aprofeta,” alonga Yahova, “ale anaba mafala anga kuna andzawo.”+
31 Yahova alonga: “Ine ndinadzatcunyusa aprofeta, ale analonga kuti: ‘Iye alonga!’”+
32 “Ine ndinadzatcunyusa aprofeta analonga ndoto zauthambi,” alonga Yahova, “ale anazilonga, mbapeusa mbumba yanga thangwi ya uthambi wawo na kudzikuza kwawo.”+
“Mbwenye ine nee ndaatuma, nee kuapanga. Natenepa, iwo nee anadzaphedza mbumba iyi, nee pangʼono pene,”+ alonga Yahova.
33 “Munthu mʼbodzi pakati pa mbumba, peno mprofeta, peno nyantsembe angakubvundza kuti: ‘Ninji ntolo* wa Yahova?’ Penepo iwe usafunika kuatawira: ‘“Imwe ndimwe ntolo, pontho ine ndinadzakutayani,”+ alonga Yahova.’ 34 Mbwenye mprofeta, nyantsembe peno munthu mʼbodzi pakati pa mbumba angalonga kuti: ‘Uyu ndi ntolo wa* Yahova!’ Ine ndinadzatcunyusa munthu unoyu na anthu a panyumba pace. 35 Mʼbodzi na mʼbodzi wa imwe asabvundza ndzace na mʼbale wace: ‘Yahova atawira tani? Ninji pidalonga Yahova?’ 36 Mbwenye imwe nee musafunika kulonga pontho ntolo wa Yahova, thangwi ntolo ndi mafala a mʼbodzi na mʼbodzi wa imwe, pontho imwe mwacinja mafala a Mulungu wa mʼmaso, Yahova wa anyankhondo, Mulungu wathu.
37 “Iwe usafunika kubvundza aprofeta kuti: ‘Kodi Yahova akutawirani tani? Kodi Yahova alonganji? 38 Mungapitiriza kulonga kuti: “Ntolo wa Yahova!” Ipi ndi pidalonga Yahova: “Nakuti musalonga kuti: ‘Mafala awa ndi ntolo wa Yahova,’ maseze ine ndakupangani kale kuti: ‘Lekani kulonga: “Ntolo wa Yahova!”’ 39 Ine ndinakuthukulani, mbandikuponyani kutali na ine, imwe pabodzi na nzinda udapereka ine kuna imwe na kuna ambuyanu. 40 Ine ndinadzakupasani manyadzo, mbamupwazika kwenda na kwenda, pontho kupwazika kwanu cipo kunadzaduwalika.”’”+
24 Penepo Yahova andipangiza pitundu piwiri pya masambvu pyakuti pikhali patsogolo pa templo ya Yahova, pidamala Nabhukodhonozore mambo wa ku Bhabhilonya kukwata Yekoniya+ mwana wa Yeowakimu,+ mambo wa ku Yuda, mbaenda naye ku ubitcu pabodzi na akulu-akulu a ku Yuda, amesiri kuphatanizambo ale anaphata basa na utale; iye aakwata ku Yerusalemu mbaenda nawo ku Bhabhilonya.+ 2 Citundu cibodzi cikhali na masambvu adidi kakamwe, ninga masambvu anatoma kutokota, mbwenye citundu cinango cikhali na masambvu akuipa kakamwe, akuipa kakamwe akuti nee mbadakwanisa kudyiwa.
3 Penepo Yahova andibvundza: “Yeremiya uli kuonanji?” Ine ndatawira: “Ndiri kuona masambvu; masambvu adidi, ali mwadidi kakamwe, mbwenye masambvu akuipa, ndi akuipa kakamwe, akuipa kakamwe akuti nee anakwanisa kudyiwa.”+
4 Buluka penepo Yahova andipanga: 5 “Ipi ndi pidalonga Yahova, Mulungu wa Izraeli: ‘Anthu a ku Yuda adaendeswa ku ubitcu, ale adabulusa ine mu dziko ino mbandiaendesa ku dziko ya Akaldheya ndinadzaaona ninga adidi. 6 Ndinapitiriza kuaonera toera pinthu piafambire mwadidi, ine ndinadzaabweresa pontho mu dziko ino.+ Ndinadzaawangisa, pontho nee ndinadzaafudza; ndinadzaatceka, pontho nee ndinadzaadula.+ 7 Ndinadzaapasa ntima wakuti unaaphedza toera kundidziwa kuti ine ndine Yahova.+ Iwo anadzakhala mbumba yanga, pontho ine ndinadzakhala Mulungu wawo,+ thangwi iwo anadzabwerera kuna ine na ntima wawo onsene.+
8 “‘Mbwenye ipi ndi pidalonga Yahova thangwi ya masambvu akuipa, akuipa kakamwe akuti nee anakwanisa kudyiwa:+ “Zedhekiya mambo+ wa ku Yuda, akulu-akulu ace, na anthu onsene adapulumuka ku Yerusalemu akuti ndi ale anakhala mu dziko ino, pabodzi na ale adaenda kakhala ku dziko ya Ejitu ndinadzaaona ninga masambvu anewa akuipa.+ 9 Ndinadzacitisa kuti anthu a maumambo onsene pa dziko yapantsi+ agope angaona nyatwa zinafuna kuagwera, iwo anadzatikanwa, anadzapwazwa, anadzasingirirwa, pontho anadzapaswa dzedze+ mu mbuto zonsene zinafuna ine kuabalalisa.+ 10 Ine ndinadzaathabusa na nkhondo,+ na njala, pontho na utenda,+ mpaka iwo angamala mu dziko ino idapereka ine kuna iwo na kuna ambuyawo.”’”
25 Mu caka cacinai ca utongi wa Yeowakimu+ mwana wa Yosiya mambo wa ku Yuda, cakuti ndi caka cakutoma ca utongi wa Nabhukodhonozore mambo wa ku Bhabhilonya, Yeremiya atambira mafala analonga pya mbumba yonsene ya ku Yuda. 2 Ipi ndi pidalonga mprofeta Yeremiya thangwi ya mbumba yonsene ya ku Yuda na anthu onsene anakhala mu Yerusalemu:
3 “Kutomera mu caka 13 ca utongi wa Yosiya+ mwana wa Amoni mambo wa ku Yuda mpaka lero, ine ndisatambira mafala a Yahova mu pyaka pyenepi pyakukwana 23; ine ndisalonga na imwe mwakubwereza-bwereza, mbwenye imwe nkhabe kubva.+ 4 Pontho Yahova akhatuma kuna imwe atumiki ace onsene akuti ndi aprofeta, iye akhaatuma mwakubwereza-bwereza, mbwenye imwe nee mwaabvera, nee kuatsalakana.+ 5 Iwo akhalonga: ‘Taphata miyendo, mʼbodzi na mʼbodzi asafunika kusiya njira zace zakuipa na macitiro ace akuipa;+ mungacita pyenepi, munapitiriza kukhala pyaka pizinji mu dziko idapereka Yahova kale kakamwe kuna imwe na kuna ambuyanu. 6 Lekani kulambira alungu anango, nee kuatumikira, nee kuagodamira, mbamunditsukwalisa na pinthu pidacita imwe na manja anu; thangwi mungacita pyenepi, ine ndinakubwereserani nyatwa.’
7 “‘Ngakhale tenepo, imwe nee mwandibvera,’ alonga Yahova. ‘Mbwenye mukhanditsukwalisa na pinthu pidacita imwe na manja anu, mbamubweresa mwekhene nyatwa yanu.’+
8 “Natenepa, ipi ndi pidalonga Yahova wa anyankhondo: ‘“Nakuti nee mwabvera mafala anga, 9 ndinabweresa mbumba zonsene za kunkwiriro,”+ alonga Yahova, “ndinabweresa ntumiki wanga Nabhukodhonozore mambo wa ku Bhabhilonya+ toera kufudza dziko ino,+ toera kufudza anthu anakhala mu dziko ino, kuphatanizambo madzindza onsene anakhala cifupi na dziko ino;+ ine ndinadzaafudza mbandiacitisa kukhala cinthu cakugopesa, cakuti anthu angaciona anaimba ciruzwi, pontho mbuto ino inadzakhala madembe kwenda na kwenda. 10 Ine ndinadzamatamisa ale anakhuwa mwakutsandzaya na ale anakhuwa mwakukomerwa,+ pontho ndinadzamatamisa mankhadzi wamamuna na mankhadzi wankazi,+ nkhabe kudzabvekabve kupeya kwa libwe, nee kuoneka ceza ca nyale. 11 Dziko ino yonsene inadzakhala madembe na cinthu cakugopesa, pontho madzindza awa onsene anadzatumikira mambo wa ku Bhabhilonya mu pyaka 70.”’+
12 “‘Mbwenye pyaka 70 pingamala,+ ndinadzatcunyusa mambo wa ku Bhabhilonya na dzindza yace thangwi ya madodo awo,’+ alonga Yahova, ‘pontho ndinadzacitisa dziko ya Akaldheya kukhala thando kwenda na kwenda.+ 13 Ine ndinadzatcunyusa dziko ineyi, mwakubverana na mafala onsene adalonga ine thangwi ya iyo, pinthu pyonsene pidalonga Yeremiya pyakuti pyalembwa mʼbukhu iyi toera kutcunyusa madzindza onsene. 14 Thangwi madzindza mazinji na amambo amphambvu+ anadzaacita mabitcu,+ ine ndinadzaabwezera mwakubverana na pidacita iwo, pontho mwakubverana na mabasa a manja awo.’”+
15 Thangwi ipi ndi pidandipanga Yahova, Mulungu wa Izraeli: “Kwata ndiko iyi ‘mʼmanja mwanga yakuti iri na vinyu yaukali wanga, pontho ndoko kamwese madzindza onsene kunafuna kukutuma ine. 16 Iwo anadzaimwa, mbadzedzereka, pontho anadzacita pinthu ninga anyansala thangwi ya supada inafuna kutumiza ine kuna iwo.”+
17 Penepo, ine ndakwata ndiko ineyi mʼmanja mwa Yahova, mbandiimwesa madzindza onsene kukhadandituma Yahova:+ 18 Kutomera mu Yerusalemu na mʼmizinda ya ku Yuda,+ amambo awo na akulu-akulu awo toera ikhale madembe na cinthu cakugopesa, cinthu cakuti munthu angaciona anaimba ciruzwi mbacipasa dzedze+ ninga munaonera imwe lero; 19 pontho Farau mambo wa ku Ejitu, atumiki ace, akulu-akulu ace na mbumba yace yonsene,+ 20 anthu onsene akusiyana-siyana ali pakati pawo; amambo onsene a ku dziko ya Uzi; amambo onsene a ku dziko ya Afilisti,+ Asikaloni,+ Gaza, Ekroni na ale adasala ku Asidhodhe; 21 dzindza ya Aedhomi,+ Amoabhe+ na Aamoni;+ 22 amambo onsene a ku Tiro, amambo onsene a ku Sidhoni+ na amambo a pa ntsuwa ya bara; 23 dzindza ya Dhedhani,+ Tema, Bhuze na ale onsene anacinga ndebvu zawo mʼmaputu;+ 24 amambo onsene a ku Arabhya+ na amambo onsene a mbumba zakusiyana-siyana zinakhala nʼthando; 25 amambo onsene a ku Zinri, amambo onsene a ku Elami+ na amambo onsene a ku Medhya;+ 26 amambo onsene a kunkwiriro akuti ali cifupi peno kutali unango na ndzace na maumambo anango onsene a pa dziko yapantsi, kuphatanizambo mambo Sezaki,+ anadzamwa, iwo angamala kumwa.
27 “Apange kuti: ‘Ipi ndi pidalonga Yahova wa anyankhondo, Mulungu wa Izraeli: “Mwani, ledzerani, tapikani, pontho gwani pantsi mbamucimwana kulamuka+ thangwi ya supada inafuna kutumiza ine kuna imwe.”’ 28 Iwo angakhonda kukwata ndiko mʼmanja mwako toera kumwa, apange kuti: ‘Ipi ndi pidalonga Yahova wa anyankhondo: “Imwe musafunika kumwa! 29 Khala nyatwa zinafuna kubweresa ine zinatoma mu nzinda unadziwika na dzina yanga,+ kodi imwe munakhala tenepo nee kutcunyuswa?”’+
‘“Imwe nee munasiyiwa tenepo, thangwi ndinabweresa supada toera kufudza anthu onsene pa dziko yapantsi,’ alonga Yahova wa anyankhondo.
30 Pontho iwe usafunika kuapanga mafala awa onsene:
‘Yahova anakhuwa kubulukira kudzulu,
Kubulukira pa mbuto yace yakucena, iye anacitisa kuti fala yace ibveke.
Iye anadzakhuwira kakamwe mbuto yace inakhala iye.
Anadzakhuwa ninga ale anakamula mauva pa mbuto yakukamulira mauva,
Iye anadzaimba nyimbo yakuwina kuna anthu onsene anakhala pa dziko yapantsi.’
31 ‘Kukhuwa kunabveka mpaka kunkhomo kwa dziko yapantsi,
Thangwi Yahova anadzatonga anthu onsene.
Iye anadzatonga ekhene anthu onsene.+
Pontho, anthu akuipa anadzaasiya toera aphiwe na supada,’ alonga Yahova.
32 Ipi ndi pidalonga Yahova wa anyankhondo:
‘Onani, nyatwa iri kumwazika mʼmadzindza onsene,+
Pontho, mphepo ikulu kakamwe inabwera buluka ku mbuto zakutali kakamwe za dziko yapantsi.+
33 “‘Pa ntsiku ineyi, anthu anafuna kuphiwa na Yahova anadzakhala phwataku-phwataku kutomera kunkhomo ibodzi ya dziko mpaka kunkhondo inango. Iwo nee anadzalirwa, nee kugumanywa, pontho nee anadzaikhwa munthumbi. Iwo anadzakhala ninga ndimu pa mataka.’
34 Lirani imwe akumbizi, pontho khuwani!
Bulumundani pantsi imwe pifuyo pyakufunika kakamwe mu nkumbi,
Thangwi ntsiku yakuphiwa kwanu na yakubalaliswa kwanu yafika,
Imwe munadzagwa pantsi ninga combo cakufunika!
35 Akumbizi nkhabe mbuto yakuthawira,
Pontho pifuyo pyakufunika kakamwe mu nkumbi nkhabe pakuthawira.
36 Bveserani kukhuwa kwa akumbizi,
Na kulira kwa pifuyo pyakufunika kakamwe mu nkumbi,
Thangwi Yahova ali kufudza mbuto zawo zakudyesera pifuyo.
37 Thangwi yaukali ukulu wa Yahova,
Mu mbuto zantendere nkhabebve cinthu cakuti ciri na umaso.
38 Iye abuluka pa mbuto yace inabisala iye ninga nkhalamu yamphambvu,+
Pontho dziko yawo yadzakhala cinthu cakugopesa,
Thangwi iye aphatisira supada toera kupha anthu azinji,
Pontho thangwi yaukali wace ukulu.”
26 Pakutoma kwa utongi wa Yeowakimu+ mwana wa Yosiya mambo wa ku Yuda, Yeremiya atambira mafala awa adabuluka kuna Yahova: 2 “Ipi ndi pidalonga Yahova: ‘Ndoko pa thando ya nyumba ya Yahova, penepo panga anthu onsene anakhala mʼmizinda ya ku Yuda akuti asabwera kudzalambira panyumba ya Yahova. Apange pyonsene pinakupanga ine; leka kuabisira cinthu. 3 Panango iwo anabvesera, mʼbodzi na mʼbodzi mbasiya njira yace yakuipa, pyenepi pingacitika, ine ndinabwerera nduli mbandikhonda kuabweresera nyatwa ikhafuna ine kuabweresera thangwi ya macitiro awo akuipa.+ 4 Apange kuti: “Ipi ndi pidalonga Yahova: ‘Mungakhonda kundibvera thangwi ya kukhonda kutoweza mwambo udakupasani ine, 5 pontho mungakhonda kubvesera mafala a atumiki anga akuti ndi aprofeta, anatuma ine kuna imwe mwakubwereza-bwereza,+ 6 ine ndinadzacitisa kuti nyumba iyi ikhale ninga Silo,+ pontho ndinacitisa kuti nzinda uno ukhale cinthu cakupaswa dzedze na madzindza onsene pa dziko yapantsi.’”’”+
7 Pontho anyantsembe, aprofeta na mbumba yonsene abva Yeremiya mbakalonga mafala anewa panyumba ya Yahova.+ 8 Pidamala Yeremiya kulonga mafala onsene adapangwa iye na Yahova toera apange mbumba, penepo anyantsembe, aprofeta na mbumba yonsene amʼphata, mbampanga: “Mwandimomwene iwe unadzafa. 9 Thangwi yanji walonga profesiya mu dzina ya Yahova kuti: ‘Nyumba ino inadzakhala ninga Silo, pontho nzinda uno unadzafudzwa mbukhala wakusowa anthu’?” Penepo mbumba yonsene yazungulira Yeremiya panyumba ya Yahova.
10 Atsogoleri a ku Yuda pidabva iwo mafala anewa, abuluka panyumba ya mambo mbaenda mpaka panyumba ya Yahova mbakhala pantsi pansuwo upswa wa panyumba ya Yahova.+ 11 Anyantsembe na aprofeta apanga atsogoleri pabodzi na mbumba yonsene kuti: “Munthu uyu athema kuphiwa,+ thangwi iye alonga profesiya kuti nzinda uno unagwerwa na nyatwa ninga pidabva imwe na makutu anu.”+
12 Penepo Yeremiya apanga atsogoleri onsene na mbumba yonsene kuti: “Ndi Yahova adandituma toera ndilonge mafala onsene adabva imwe thangwi ya nyumba ino na nzinda uno.+ 13 Cincino, sasanyirani njira zanu na macitiro anu mbamubvera mafala a Yahova Mulungu wanu, natenepa Yahova anadzacinja manyerezero ace mbakhonda kukubwereserani nyatwa idalonga iye.+ 14 Mbwenye ine ndiri mʼmanja mwanu. Citani kuna ine pinaona imwe kuti mphyadidi. 15 Mbwenye mungandipha, dziwani kuti imwe, nzinda uno na anthu anakhala muno, munadzakhala na mulando thangwi ya kupha munthu wakusowa mulando, thangwi mwandimomwene ndi Yahova adandituma toera ndilonge mafala anewa onsene pamaso panu.”
16 Penepo, atsogoleri na mbumba yonsene apanga anyantsembe na aprofeta: “Munthu uyu nee athema kuphiwa, thangwi iye alonga na ife mu dzina ya Yahova Mulungu wathu.”
17 Mbwenye akulu-akulu anango a dziko ineyi alamuka, mbapanga mbumba yonsene idagumanyikana penepo: 18 “Mikeya+ wa ku Moreseti wakuti akhalonga maprofesiya mu ntsiku za Ezekiya+ mambo wa ku Yuda, apanga mbumba yonsene ya ku Yuda: ‘Ipi ndi pidalonga Yahova wa anyankhondo:
“Sioni anadzalimwa ninga munda,
Nzinda wa Yerusalemu unadzafudzwa mbusala madembe,+
Pontho phiri ya panyumba ya Mulungu inadzakhala ninga nthunda yakuti iri mu nsitu.”’+
19 “Kodi Ezekiya mambo wa ku Yuda na mbumba yonsene ya ku Yuda amupha? Kodi iye nee agopa Yahova mbadembetera Yahova toera aabvere ntsisi, Yahova mbacinja manyerezero ace thangwi ya nyatwa idalonga iye kuti mbadaabweresera?+ Mbwenye ife tiri cifupi toera kubweresa tekhene nyatwa yathu.
20 “Akhalipombo mamuna unango wakuti akhalonga maprofesiya mu dzina ya Yahova, dzina yace ikhali Uriya mwana wa Semaya wa ku Kiriyati-Jearimu,+ iye akhalonga maprofesiya thangwi ya nzinda uno, pontho thangwi ya dziko ino na mafala mabodzi ene ninga analonga Yeremiya. 21 Mambo Yeowakimu+ na anyankhondo ace onsene pabodzi na atsogoleri ace abva mafalace, penepo mambo atonga kumupha.+ Uriya pidabva iye pyenepi agopa, mbathawira ku Ejitu. 22 Penepo mambo Yeowakimu atuma Elnatani+ mwana wa Akibhori pabodzi na amuna anango mbaenda ku Ejitu. 23 Iwo akwata Uriya ku Ejitu mbabwera naye kuna mambo Yeowakimu, iye amupha na supada+ mbaponya manungo ace mʼmasiye anaikhwa anthu akutcerenga.
24 Mbwenye Aikamu+ mwana wa Safani+ aphedza Yeremiya kuti akhonde kuperekwa mʼmanja mwa mbumba toera aphiwe.+
27 Pakutoma kwa utongi wa Yeowakimu mwana wa Yosiya mambo wa ku Yuda, Yeremiya atambira mafala awa adabuluka kuna Yahova: 2 “Ipi ndi pidandipanga Yahova: ‘Luka nkhambala, pontho sasanya magoli, ungamala, aikhe nʼkhosi mwako. 3 Buluka penepo, atumize kuna mambo wa ku Edhomi,+ kuna mambo wa ku Moabhe,+ kuna mambo wa Aamoni,+ kuna mambo wa ku Tiro+ na kuna mambo wa ku Sidhoni,+ atumize na ale adabwera buluka ku Yerusalemu toera kuonana na Zedekiya mambo wa ku Yuda. 4 Apange toera alonge mphangwa izi kuna ambuyawo:
“‘“Ipi ndi pidalonga Yahova wa anyankhondo, Mulungu wa Izraeli, ipi ndi pinafunika imwe kupanga ambuyanu: 5 ‘Ndine adacita dziko yapantsi, anthu, na pinyama piri pa dziko yapantsi, ine ndacita pyenepi na mphambvu zanga zikulu, na nkono wanga wamphambvu, pontho ine ndisapipereka kuna ule anakomerwa na ine.+ 6 Cincino, ine ndiri kupereka madziko awa onsene mʼmanja mwa ntumiki wanga Nabhukodhonozore mambo+ wa ku Bhabhilonya; ndiri kumpasambo na pinyama pyene pya ntsanga toera pintumikire. 7 Madzindza onsene a anthu anadzatumikira iye, mwanace na ndzukulu wace, mpaka kumala kwa utongi wace.+ Buluka penepo, iye anadzakhala bitcu wa madzindza mazinji na wa amambo amphambvu.’+
8 “‘“‘Dzindza peno umambo ungakhonda kutumikira Nabhukodhonozore mambo wa ku Bhabhilonya, pontho ungakhonda kuikha khosi yawo mu goli ya mambo wa ku Bhabhilonya, ine ndinatcunyusa dzindza ineyi na supada,+ na njala, pontho na utenda, mpaka ndingamala kuafudzisa na Nabhukodhonozore,’ alonga Yahova.
9 “‘“‘Natenepa, lekani kubvera aprofeta anu, anyakulotera anu, anyakufokotoza ndoto, nee ale anakhulupira mizimu, nee mangʼanga anu, ale anakupangani kuti: “Imwe nee munadzatumikira mambo wa ku Bhabhilonya.” 10 Thangwi iwo asalonga maprofesiya authambi kuna imwe, na thangwi ineyi, imwe munadzakwatwa mbamuendeswa kutali na dziko yanu, ine ndinadzakubalalisani, pontho imwe munadzafudzwa.
11 “‘“‘Mbwenye dzindza inaikha khosi yace mu goli ya mambo wa ku Bhabhilonya mbintumikira, ndinaisiya mu dziko yawo,’ alonga Yahova, ‘toera ilime, mbikhala mwenemu.’”’”
12 Ine ndalongambo mphangwa zibodzi zene kuna Zedhekiya+ mambo wa ku Yuda kuti: “Ikhani khosi yanu mu goli ya mambo wa ku Bhabhilonya, mbamutumikira iye na mbumba yace, toera mupitirize kukhala na umaso.+ 13 Thangwi yanji imwe pabodzi na mbumba yanu musafuna kuphiwa na supada,+ kufa na njala,+ peno na utenda,+ mwakubverana na pidalonga Yahova kuti pinacitika kuna dzindza inakhonda kutumikira mambo wa ku Bhabhilonya? 14 Lekani kubvera mafala a aprofeta anakupangani kuti: ‘Imwe nee munadzatumikira mambo wa ku Bhabhilonya,’+ thangwi iwo asalonga maprofesiya authambi kuna imwe.+
15 “‘Ine nee ndaatuma,’ alonga Yahova, ‘mbwenye iwo ali kulonga maprofesiya authambi mu dzina yanga, na thangwi ineyi, ine ndinadzakubalalisani, pontho imwe munadzafudzwa pabodzi na aprofeta analonga maprofesiya kuna imwe.’”+
16 Kuna aprofeta na kuna mbumba iyi yonsene, ine ndalonga: “Ipi ndi pidalonga Yahova: ‘Lekani kubvera maprofesiya anakupangani aprofeta kuti: “Onani, mwakukhonda dembuka, pyombo pya nʼnyumba ya Yahova pinadzabwereswa buluka ku Bhabhilonya!”+ Thangwi iwo ali kulonga maprofesiya authambi kuna imwe.+ 17 Lekani kuabvera. Tumikirani mambo wa ku Bhabhilonya toera mupitirize kukhala na umaso.+ Thangwi yanji nzinda uno usafunika kukhala madembe? 18 Mbwenye khala iwo ndi aprofeta, pontho khala iwo ali na mafala a Yahova, ndaphata miyendo, mbadembetere Yahova wa anyankhondo toera pyombo pidasala nʼnyumba ya Yahova, nʼnyumba ya mambo wa ku Yuda, na mu Yerusalemu, pikhonde kukwatwa mbapiendeswa ku Bhabhilonya.’
19 “Ipi ndi pidalonga Yahova wa anyankhondo thangwi ya mizati,+ Tanki ya Madzi,+ ngolo+ na pyombo pinango pidasala mu nzinda uno, 20 pyakuti Nabhukodhonozore mambo wa ku Bhabhilonya nee apikwata mu ndzidzi udakwata iye Yekoniya mwana wa Yeowakimu mambo wa ku Yuda, buluka ku Yerusalemu mbaenda naye ku ubitcu ku Bhabhilonya pabodzi na akulu-akulu onsene a ku Yuda na a ku Yerusalemu;+ 21 inde, ipi ndi pidalonga Yahova wa anyankhondo, Mulungu wa Izraeli, thangwi ya pyombo pidasala nʼnyumba ya Yahova, nʼnyumba ya mambo wa ku Yuda na mu Yerusalemu: 22 ‘“Iwo anadzakwatwa mbaendeswa ku Bhabhilonya,+ mpaka ine ndingaakumbuka,” alonga Yahova. “Buluka penepo, ine ndinadzaabweresa pontho pa mbuto ino.”’”+
28 Mu caka cibodzi cene, pakutoma kwa utongi wa Zedhekiya Mambo+ wa ku Yuda, pa mwezi wacixanu wa caka cacinai, mprofeta Ananiya mwana wa Azuri wakuti akhali wa ku Jibheyoni+ andipanga mafala awa panyumba ya Yahova pamaso pa anyantsembe na mbumba yonsene: 2 “Ipi ndi pidalonga Yahova wa anyankhondo, Mulungu wa Izraeli: ‘Ine ndinadzagwanda goli ya mambo wa ku Bhabhilonya.+ 3 Nkati mwa pyaka piwiri, ndinabweresa pyombo pyonsene pya panyumba ya Yahova pidakwata Nabhukodhonozore mambo wa ku Bhabhilonya pa mbuto ino, mbaenda napyo ku Bhabhilonya.’”+ 4 “‘Ndinabweresa Yekoniya+ mwana wa Yeowakimu+ mambo wa ku Yuda na onsene adakwatwa ku Yuda, mbaendeswa ku ubitcu ku Bhabhilonya,’+ alonga Yahova, ‘thangwi ine ndinadzagwanda goli ya mambo wa ku Bhabhilonya.’”
5 Penepo mprofeta Yeremiya atawira mprofeta Ananiya pamaso pa anyantsembe na pamaso pa mbumba yonsene yakuti ikhadalimira panyumba ya Yahova. 6 Mprofeta Yeremiya alonga: “Ameni! Yahova mbacite pyenepi! Yahova mbacite mwakubverana na mafala a profesiya idalonga iwe, mbabwerese buluka ku Bhabhilonya pyombo pyonsene pya panyumba ya Yahova na mbumba yonsene idaendeswa ku ubitcu! 7 Mbwenye ndaphata miyendo, bvesera mphangwa zinafuna ine kupanga iwe na mbumba yonsene. 8 Aprofeta adatumikira kale kakamwe ine na iwe mbatidzati kubalwa, akhalonga maprofesiya kuti mʼmadziko mazinji na mʼmaumambo amphambvu mbamudaoneka nkhondo, nyatwa na mautenda. 9 Mprofeta angalonga pya ntendere, pontho pinthu pidalonga mprofeta unoyu pingacitika, anthu anadziwa kuti mwandimomwene mprofeta unoyu atumwa na Yahova.”
10 Penepo, mprofeta Ananiya abulusa goli nʼkhosi mwa mprofeta Yeremiya mbaigwanda.+ 11 Natenepa, Ananiya alonga pamaso pa mbumba yonsene: “Ipi ndi pidalonga Yahova: ‘Ine ndinafudza tenepa goli ya Nabhukodhonozore mambo wa ku Bhabhilonya, pontho ndinaibulusa nʼkhosi mwa madzindza onsene nkati mwa pyaka piwiri.’”+ Penepo, mprofeta Yeremiya abuluka, mbaenda pyace.
12 Mprofeta Ananiya pidagwanda iye goli, mbaibulusa nʼkhosi mwa mprofeta Yeremiya, Yeremiya atambira mafala awa adabuluka kuna Yahova: 13 “Ndoko kapange Ananiya kuti ‘ipi ndi pidalonga Yahova: “Iwe wagwanda goli ya muti,+ mbwenye unadzacita goli ya utale toera ikhale pa mbuto ya ire idagwanda iwe.” 14 Thangwi ipi ndi pidalonga Yahova wa anyankhondo, Mulungu wa Izraeli: “Ndinaikha goli ya utale nʼkhosi mwa madzindza onsene, toera atumikire Nabhukodhonozore mambo wa ku Bhabhilonya, pontho iwo anadzantumikira.+ Ine ndinadzampasa na pinyama pyene pya ntsanga.”’”+
15 Penepo mprofeta Yeremiya apanga mprofeta Ananiya:+ “Ananiya, ndaphata miyendo bvesera! Yahova nee akutuma, ngakhale tenepo, iwe wacitisa kuti mbumba iyi ikhulupire uthambi.+ 16 Natenepa ipi ndi pidalonga Yahova: ‘Bvesera, ine ndinamalisa umaso wako pa dziko yapantsi. Iwe unafa caka cino, thangwi wanyengerera anthu toera kusandukira Yahova.’”+
17 Natenepa, mprofeta Ananiya afa pa mwezi wacinomwe wa caka ceneci.
29 Awa ndi mafala a tsamba yakuti mprofeta Yeremiya aitumiza buluka ku Yerusalemu mbienda kuna akulu adasalikira pakati pa mbumba idaendeswa ku ubitcu, kuna anyantsembe, kuna aprofeta na kuna mbumba yonsene yakuti Nabhukodhonozore aikwata ku Yerusalemu mbaenda nayo ku ubitcu ku Bhabhilonya, 2 iye atumiza tsamba ineyi pidamala kubuluka Mambo Yekoniya+ mu Yerusalemu pabodzi na mai wace mambo,+ akulu-akulu a panyumba ya mambo, atsogoleri a ku Yuda na a ku Yerusalemu, amesiri na anyakuphata basa na utale.+ 3 Iye atumiza tsamba ineyi na Elaza mwana wa Safani+ na Jemariya mwana wa Hilkiya, akuti Zedhekiya mambo+ wa ku Yuda aatumiza ku Bhabhilonya kuna Nabhukodhonozore mambo wa ku Bhabhilonya, tsamba ineyi ikhalonga:
4 “Ipi ndi pidalonga Yahova wa anyankhondo, Mulungu wa Izraeli, kuna mbumba yonsene idaendeswa ku ubitcu buluka ku Yerusalemu, mbandiiendesa ku ubitcu ku Bhabhilonya: 5 ‘Mangani nyumba mbamukhala mwenemu, tcekani miti yakubala misapo mbamudya misapo yace. 6 Sembani akazi mbamubala ana amuna na akazi, semberani ananu amuna, pontho sembesani ananu akazi toera iwo abalembo ana amuna na akazi. Musafunika kunjipa, mbamukhonda kupunguka. 7 Sakani kukhala muntendere mu nzinda udakuendesani ine ku ubitcu, citani phembero kuna Yahova thangwi ya nzinda unoyu, thangwi iwo ungakhala muntendere imwe munakhalambo muntendere.+ 8 Thangwi ipi ndi pidalonga Yahova wa anyankhondo, Mulungu wa Izraeli: “Lekani kunyengezwa na aprofeta anu+ pontho na anyakulotera anu akuti ali pakati panu, lekani kubvesera ndoto zawo. 9 Thangwi ‘iwo asalonga maprofesiya authambi mu dzina yanga. Ine nee ndaatuma,’+ alonga Yahova.”’”
10 “Thangwi ipi ndi pidalonga Yahova: ‘Pingapita pyaka 70 imwe muli ku Bhabhilonya, ine ndinadzakukumbukani,+ pontho ndinadzacita pidapikira ine, mbandikubweresani pontho pa mbuto ino.’+
11 “Thangwi ine ndisadziwa mwadidi kakamwe pinafuna ine kuna imwe,’ alonga Yahova, ‘ndisafuna kuti mukhale na ntendere, tayu nyatwa,+ ndisafuna kukupasani cidikhiro na pinthu pyadidi kutsogolo.+ 12 Imwe munadzandicemera mbamubwera mpaka kuna ine mu phembero, pontho ine ndinadzakubveserani.’+
13 “‘Imwe munadzandisaka mbamundigumana,+ thangwi imwe munadzandisaka na ntima wanu onsene.+ 14 Pontho ine ndinadzatawirisa kuti imwe mundigumane,’+ alonga Yahova. ‘Ndinadzagumanya mbumba yanu idaendeswa ku ubitcu mbandikugumanyani pakati pa madzindza onsene na mbuto zidakubalalisani ine,’+ alonga Yahova. ‘Pontho ndinakubweresani pa mbuto idakubulusani ine mbandikuendesani ku ubitcu.’+
15 “Mbwenye imwe musalonga: ‘Yahova atipasa aprofeta ku Bhabhilonya.’
16 “Natenepa, ipi ndi pidalonga Yahova kuna mambo adakhala pa mpando waumambo wa Dhavidhi+ na kuna mbumba yonsene inakhala mu nzinda uno, akuti ndi abale anu adakhonda kuenda ku ubitcu pabodzi na imwe. 17 ‘Ipi ndi pidalonga Yahova wa anyankhondo: “Ine ndinaatumizira supada, njala na utenda,+ pontho ndinaacitisa kuti akhale ninga masambvu akubvunda, akuipa kakamwe akuti nkhabe kwanisa kudyiwa.”’+
18 “‘Ine ndinadzaatcunyusa na supada,+ na njala, pontho na utenda; ndinadzaacitisa kuti akhale cinthu cakugopesa kuna anthu a maumambo onsene pa dziko yapantsi,+ ninga cipangizo ca anthu adapaswa dzedze, pontho konsene kwene kunafuna ine kuabalalisa,+ anthu angaaona anadzagopa, anaimba ciruzwi+ mbaatikana, 19 thangwi iwo nee abvera mafala anga akhatumiza ine kuna iwo na atumiki anga, akuti ndi aprofeta,’ alonga Yahova, ‘ine ndikhaatuma mwakubwereza-bwereza.’+
“‘Mbwenye iwo nee abvera,’+ alonga Yahova.
20 “Na thangwi ineyi, bveserani mafala a Yahova imwe mbumba yonsene idaendeswa ku ubitcu, idabulusa ine ku Yerusalemu mbandiiendesa ku Bhabhilonya. 21 Ipi ndi pidalonga Yahova wa anyankhondo, Mulungu wa Izraeli thangwi ya Akabu mwana wa Kolaya, pontho thangwi ya Zedhekiya mwana wa Maseya akuti asakupangani maprofesiya authambi mu dzina yanga:+ ‘Ine ndinadzaapereka mʼmanja mwa Nabhukodhonozore Mambo wa ku Bhabhilonya, natenepa iye anadzaapha pamaso panu. 22 Pontho pinthu pinafuna kuacitikira pinadzaphatisirwa na anthu a ku Yuda adaendeswa ku ubitcu akuti ali ku Bhabhilonya ninga mafala akupasa dzedze, mbalonga: “Yahova mbakucite ninga pidacitirwa Zedhekiya na Akabu, akuti Mambo wa ku Bhabhilonya aaotca pa moto.” 23 thangwi iwo acita pinthu pyakupasa manyadzo ku Izraeli,+ pidacita iwo upombo na akazi a andzawo, pontho thangwi yakulonga uthambi mu dzina yanga maseze ine nee ndaapanga toera alonge.+
“‘“Ine ndisadziwa, pontho ndine mboni wa pinthu pyenepi,”+ alonga Yahova.’”
24 “Pontho panga Semaya+ wa ku Nelamu kuti: 25 ‘Ipi ndi pidalonga Yahova wa anyankhondo, Mulungu wa Izraeli: “Nakuti iwe watumiza matsamba mu dzina yako kuna mbumba yonsene iri ku Yerusalemu, kuna nyantsembe Sofoniya+ mwana wa Maseya na kuna anyantsembe onsene; matsamba anewa akhalonga kuti: 26 ‘Yahova akusankhula toera ukhale nyantsembe kuti upite pa mbuto ya nyantsembe Yeoyadha, toera ukhale muyangʼaniri wa panyumba ya Yahova, toera uonere madzemwa onsene anacita pinthu ninga aprofeta, pontho toera uamangire pamuti;+ 27 mphapo thangwi yanji nee wasandika Yeremiya wa ku Anatote,+ wakuti asacita pinthu ninga mprofeta pamaso panu?+ 28 Thangwi iye atumiza mphangwa kuno ku Bhabhilonya zinalonga kuti: “Imwe munakhala kweneko mu pyaka pizinji! Mangani nyumba mbamukhala mwenemu. Tcekani miti yakubala misapo mbamudya misapo yace,+ . . .”’”’”
29 Nyantsembe Sofoniya+ pidaleri iye tsamba ineyi pamaso pa mprofeta Yeremiya, 30 mprofeta Yeremiya atambira mafala awa a Yahova: 31 “Tumiza mphangwa kuna mbumba yonsene iri ku ubitcu mbuapanga: ‘Ipi ndi pidalonga Yahova thangwi ya Semaya wa ku Nelamu: “Nakuti Semaya alonga profesiya maseze ine nee ndantuma, pontho ayesera kukucitisani kukhulupira uthambi,+ 32 ipi ndi pidalonga Yahova: ‘Ine ndinadzatcunyusa Semaya wa ku Nelamu na dzindza yace. Nee munthu mʼbodzi wa dzindza yace anadzapulumuka pakati pa mbumba iyi, iye nee anadzaona pinthu pyadidi pinafuna ine kucitira mbumba yanga,’ alonga Yahova, ‘thangwi iye anyengerera anthu toera kusandukira Yahova.’”’”
30 Yeremiya atambira mafala awa adabuluka kuna Yahova: 2 “Ipi ndi pidalonga Yahova Mulungu wa Izraeli: ‘Lemba mʼbukhu mafala onsene anakupanga ine. 3 Thangwi “ziri kufika ntsiku,” alonga Yahova, “zakuti ine ndinadzagumanya mbumba yanga idaendeswa ku ubitcu, yakuti ndi Izraeli na Yuda,”+ alonga Yahova, “ine ndinadzaabweresa pontho mu dziko idapasa ine ambuyawo, pontho iwo anadzatambira dziko ineyi mbikhala yawo.”’”+
4 Awa ndi mafala adalonga Yahova kuna mbumba ya Izraeli na ya Yuda.
5 Ipi ndi pidalonga Yahova:
“Tabva anthu akukhuwa, mbakatetemera;
Anthu asagopa, pontho nkhabe ntendere.
6 Ndaphata miyendo, bvundzisani khala mamuna anakwanisa kubala mwana.
Mphapo thangwi yanji ndisaona amuna onsene mbakaphata mimba zawo,
Ninga pinacita nkazi pakubala?+
Thangwi yanji anthu onsene ali na nkhope zakutsukwala?
7 Mama ine pano! Thangwi ntsiku ineyi ndi yakugopswa kakamwe.+
Nkhabe ntsiku inango idalandana na ntsiku ineyi,
Ndi ndzidzi wakunentsa kuna Yakobe.
Mbwenye iye anadzapulumuswa.”
8 Yahova wa anyankhondo alonga: “Pa ntsiku ineyi, ine ndinadzagwanda goli yako, ndinaibulusa nʼkhosi mwako mbandithumula nkhambala zako; pontho nee munthu mʼbodzi wa dziko inango anadzakucita bitcu. 9 Mbumba yanga inadzatumikira Yahova Mulungu wawo na Dhavidhi mambo wawo, ule anafuna kudzaapasa ine.”+
10 “Mbwenye iwe ntumiki wanga Yakobe, leka kugopa,” alonga Yahova,
“Pontho leka kugopeswa, iwe Izraeli.+
Thangwi ine ndinadzakupulumusa ku mbuto yakutali,
Pontho dzindza yako ndinadzaipulumusa ku dziko idaendeswa iyo ku ubitcu.+
Yakobe anadzabwerera mbakhala mwakupfulika na muntendere,
Mbakhonda kuoneka munthu anafuna kunʼgopesa.”+
11 “Thangwi ine ndiri na iwe toera kukupulumusa,” alonga Yahova.
“Ine ndinadzafudza madzindza onsene mu mbuto zidakubalalisa ine;+
Mbwenye iwe, ine nee ndinadzakufudza.+
Ndinadzakulanga, tayu mwakupiringana midida,
Pontho, nee ndinadzakusiya tenepo nee kukutcunyusa.”+
12 Thangwi ipi ndi pidalonga Yahova:
“Utenda wako ndi wakukhonda wanga.+
Cironda cako nkhabe kondzeka.
13 Nkhabe munthu toera kubvunulira nseru wako,
Nkhabe ntombwe toera kukondza cironda cako.
Nkhabepo ntombwe toera kukukondza.
14 Onsene akhacita upombo na iwe akuduwala.+
Iwo nee anadzakusakabve.
Thangwi ine ndakukwapula ninga munakwapulwa nyamalwa,+
Mbandikutcunyusa mwakuipa kakamwe,
Thangwi ya mulando wako ukulu na madawo ako mazinji.+
15 Usakhuwiranji thangwi ya cironda cako?
Utenda wako ndi wakukhonda wanga!
Ine ndine adakucita pyenepi,
Thangwi ya mulando wako ukulu na madawo ako mazinji.+
16 Mbwenye onsene anafudza mbumba yako, anadzafudzwambo,+
Anyamalwa ako onsene anadzaendeswambo ku ubitcu.+
Ale anakubera, anadzaberwambo,
Pontho onsene anakutapata anadzatapatirwa.”+
17 “Ndinadzakupasa pontho ungumi wadidi mbandikondza pontho pironda pyako,”+ alonga Yahova:
“Maseze iwo akhakucemera nzinda udakhondiwa, mbalonga:
‘Uyu ndi nzinda wa Sioni wakuti nkhabe munthu anausaka.’”+
18 Ipi ndi pidalonga Yahova:
“Ine ndinadzagumanya anthu a dzindza ya Yakobe adaendeswa ku ubitcu,+
Pontho ine ndinadzaabvera ntsisi.
Nzinda unadzamangwa pontho padzulu paphiri yace,+
Pontho nyumba yakuwanga ya nyakuonera inadzamangwa pa mbuto yace yakuthema.
19 Iwo anadzalonga mafala akupereka takhuta, mbakhuwa mwakutsandzaya.+
Ine ndinadzaanjipisa, pontho iwo nee anadzakhala akucepa;+
Ine ndinadzaanjipisa kakamwe,
Pontho iwo nee anadzakhala nsoka ungʼono.+
20 Ana a Yakobe anadzakhala ninga mwakale,
Mbumba yace inadzakhala yakuwanga pamaso panga.+
Ine ndinadzatcunyusa onsene anamponderera.+
21 Ntsogoleri wawo wamphambvu anadzakhala mʼbodzi wa mbumba yace,
Ntongi wawo anadzakhala mʼbodzi wapakati pawo.
Ine ndinadzamʼbweresa dhuzi, pontho iye anadzandifendedzera dhuzi.”
“Thangwi ndingakhonda kucita pyenepi, mbani anafuna kukhala na cipapo toera kundifendedzera dhuzi?”, alonga Yahova.
22 “Imwe munadzakhala mbumba yanga,+ pontho ine ndinadzakhala Mulungu wanu.”+
23 Onani! Mphepo inafuna kubuluka kuna Yahova inadzapepesa mwamphambvu,+
Inadzakhala condzi cakufudza, cakuti cinadzaponywa pa misolo ya anthu akuipa.
24 Ukali ukulu wa Yahova nkhabe kudzabwerera nduli,
Mpaka angamala kucita pinafuna iye muntima mwace.+
Kunkhomo kwa ntsiku zakumalisa, imwe munadzabvesesa pyenepi.+
31 “Pa ndzidzi unoyu,” alonga Yahova, “ine ndinadzakhala Mulungu wa madzindza onsene a Izraeli, pontho iwo anadzakhala mbumba yanga.”+
2 Ipi ndi pidalonga Yahova:
“Mbumba idakhonda kuphiwa na supada, yabverwa ntsisi na Mulungu nʼthando,
Pikhafamba Aizraeli kuenda ku mbuto yawo yakupuma.”
3 Yahova aonekera kuna ine nakutali, mbalonga:
“Ine ndisakufuna na ufuni wakwenda na kwenda.
Thangwi ya ufuni unoyu, ndakukwewera kuna ine, mbandikhala wakukhulupirika kuna iwe.+
4 Ine ndinadzakumanga pontho, iwe mbukhala pontho nzinda.+
5 Munadzatceka pontho miti ya mauva mʼmapiri a ku Samariya;+
Anyakulima anadzatceka, mbadya misapo yawo.+
6 Thangwi inadzafika ntsiku yakuti anyakuonera akuti ali mʼmapiri a Efraimu anadzakhuwa:
Tendeni tikwire Phiri ya Sioni kuna Yahova Mulungu wathu.’”+
7 Thangwi ipi ndi pidalonga Yahova:
“Imbirani Yakobe mwakutsandzaya.
Khuwani mwakutsandzaya, thangwi imwe ndimwe akutoma pakati pa madzindza.+
Dziwisani pyenepi, simbani, mbamulonga:
‘Yahova, pulumusani mbumba yanu, yakuti ndi Aizraeli adasalikira.’+
8 Ine ndinaabweresa buluka ku dziko yakunkwiriro.+
Ndinaagumanya buluka ku mbuto zakutali kakamwe za pa dziko yapantsi.+
Pakati pawo panadzaoneka maboliboli na anyakulamala.+
Akazi akuti ali na mimba, pabodzi na ale akuti ali cifupi toera kubala.
Iwo anadzabwerera ninga mwinji ukulu.+
9 Iwo anabwera mbakalira.+
Ndinaatsogolera mu ndzidzi unadembetera iwo toera ndiabvere ntsisi.
Ndinaatsogolera ku mbuto yakuti iri na madzi akuwewa,+
Ndinaapitisa na njira yakusowa madjenje, yakuti iwo nkhabe kudzagwegweduka.
Thangwi ine ndine Baba wa Izraeli, pontho Efraimu ndi mwananga wakutoma.”+
10 Bveserani mafala a Yahova imwe madzindza,
Pontho adziwiseni ku ntsuwa zakutali kuti:+
“Ule adamwaza Aizraeli ndiye anafuna kudzaagumanya,
Iye anaatsidzikiza ninga nkumbizi anatsidzikiza* nkumbi wa pifuyo pyace.+
11 Thangwi Yahova anadzaombola Yakobe,+
Pontho anadzampulumusa mʼmanja mwa ule wakuti ndi wamphambvu kakamwe kupiringana iye.+
12 Iwo anadzabwera, mbakhuwa mwakutsandzaya padzulu Paphiri ya Sioni,+
Pontho iwo anadzatsandzaya thangwi ya kukoma ntima kwa Yahova,
Anadzatsandzaya na pyakudya, na vinyu ipswa,+ pontho na mafuta a azeti,
Anadzatsandzayambo na anamabira na anangʼombe.+
13 “Pa ndzidzi unoyu, amiyali anadzabvina mwakutsandzaya,
Pabodzi na aphale na mankhalamba.+
Ndinadzacinja kulira kwawo, mbakukhala kutsandzaya.+
Ndinadzaabalangaza, mbandiacitisa kukhala akukomerwa, tayu akutsukwala.+
14 Anyantsembe ndinadzaapasa pyakudya pizinji,
Pontho, mbumba yanga inadzakhuta na pinthu pyadidi pinafuna kuapasa ine,”+ alonga Yahova.
15 “Ipi ndi pidalonga Yahova:
‘Ku Rama kusabveka fala ya munthu+ wakuti akulira na kubulira kakamwe:
Ndi Rakeli akulira anace.+
Iye asakhonda kubalangazwa,
Thangwi anace nee alipobve.’”+
16 Yahova alonga:
“‘Matama, leka kulira, pukuta misozi yako,
Thangwi unadzapaswa muoni wa basa yako,’ alonga Yahova.
‘Iwo anadzabwerera buluka ku dziko ya anyamalwa awo.’+
17 ‘Iwe uli na cidikhiro,’+ alonga Yahova.
‘Anako anadzabwerera ku dziko yawo.’”+
18 “Ine ndabva mwadidi kudungunya kwa Efraimu,
‘Imwe mwandisandika, ine mbanditawira kusandikwa,
Ninga mwananʼgombe wakuti adzati kupfundziswa.
Ndibwezeni, ine ndinabwerera mwakucimbiza,
Thangwi imwe ndimwe Yahova Mulungu wanga.
19 Thangwi pidabwerera ine kuna imwe ndapasika mulando;+
Pidamala ine kubvesesa, ndamenya ntcafu yanga ninga cipangizo ca kutcunyuka.
Ndapasika manyadzo, mbandipwazika,+
Thangwi ya pinthu pyakupasa manyadzo pidacita ine mu uwana wanga.’”
20 “Kodi Efraimu nee ndi mwananga wapantima, mwananga wakufunika?+
Thangwi mu ndzidzi unansandika ine mwakubwereza-bwereza, ndisankumbuka kakamwe.
Na thangwi ineyi, manyerezero anga* asadzudzumika thangwi ya iye.+
Mwandimomwene, ine ndinadzambvera ntsisi,” alonga Yahova.+
21 “Ikha pidzindikiro mu nseu,
Limirisa pidzindikiro mwenemu.+
Onesesa mwadidi nseu, wakuti ndi njira inafuna kupita na iwe.+
Bwerera mbumba ya Izraeli, bwerera ku mizinda yako.
22 Iwe mwananga wankazi wakukhonda khulupirika, mpaka lini unapitiriza kulangalira?
Thangwi Yahova acita cinthu cipswa pa dziko yapantsi:
Nkazi mʼbodzi anadzasaka mamuna na cifuno cikulu kakamwe.”
23 Ipi ndi pidalonga Yahova wa anyankhondo, Mulungu wa Izraeli: “Mafala awa anadzalongwa pontho mu dziko ya Yuda na mizinda yace, ndingabweresa pontho mbumba yace buluka ku ubitcu: ‘Yahova mbakupase nkhombo, iwe mbuto yakulungama,+ iwe phiri yakucena.’+ 24 Mwenemu munadzakhala Yuda na mizinda yace yonsene, anyakulima pabodzi na ale anakumbiza pifuyo.+ 25 Thangwi ine ndinadzawangisa ule adaneta, pontho ndinadzakhutisa ule wakuti ali kukomoka na njala.”+
26 Penepo, ine ndalamuka ncitulo, mbandifungula maso anga, pontho ndikhadagona mwadidi kakamwe.*
27 “Onani, ziri kufika ntsiku,” alonga Yahova, “zakuti ine ndinadzanjipisa dzindza ya Izraeli na dzindza ya Yuda, pontho ndinadzanjipisa pifuyo pyawo.”+
28 “Pontho, ninga mudaonesesa ine toera kuadula, kuagomola, kuagwisa, kuafudza na kuacitira pyakuipa,+ munjira ibodzi ene, inembo ndinadzaonesesa toera kuawangisa na kuatceka,”+ alonga Yahova. 29 “Mu ntsiku zenezi, nkhabe kudzalongwabve nsangani uyu: ‘Anyakubala ndiwo adadya mauva akuxaxa, mbwenye anawo ndiwo adabva kuxaxa nkanwa.’*+ 30 Mbwenye mʼbodzi na mʼbodzi anadzafa thangwi ya madodo ace. Ule anafuna kudya mauva akuxaxa, ndiye anafuna kubva kuxaxa nkanwa.”
31 “Onani! Ziri kufika ntsiku,” alonga Yahova, “zakuti ine ndinadzacita cibverano cipswa na dzindza ya Izraeli pabodzi na dzindza ya Yuda.+ 32 Nee cinadzakhala cibverano ninga cidacita ine na ambuyawo pa ntsiku idaaphata ine nkono toera kuabulusa mu dziko ya Ejitu,+ ‘cibverano canga cidakhonda iwo kubvera,+ maseze ine ndikhali mwanaciro wawo* wandimomwene,’ alonga Yahova.”
33 “Thangwi ici ndi cibverano cinafuna kucita ine na mbumba ya Izraeli pakumala kwa ntsiku zenezi,” alonga Yahova. “Ine ndinadzaikha mwambo wanga mʼmanyerezero mwawo,+ pontho ndinadzaulemba mʼmitima yawo.+ Ine ndinadzakhala Mulungu wawo, iwombo anadzakhala mbumba yanga.”+
34 “Pontho, iwo nee anadzapfundzisanabve unango na ndzace, peno mʼbale na mʼbale, mbalonga: ‘Dziwani Yahova!’+ Thangwi onsene anadzandidziwa, kutomera wanʼgono mpaka wankulu,”+ alonga Yahova. “Thangwi ine ndinadzalekerera madodo awo, pontho nee ndinadzakumbukabve madawo awo.”+
35 Ipi ndi pidalonga Yahova,
Ule adacita dzuwa toera imwanikire masikati,
Ule adakhazikisa mitemo ya mwezi na ya nyenyezi toera kumwanikira masiku,
Ule anabvundula bara, mbaicitisa kukhala na mabimbi,
Wakuti dzina yace ndi Yahova wa anyankhondo:+
36 “‘Mitemo ineyi mbidasiya kuphata basa,’ alonga Yahova,
‘Penepo dzindza ya Izraeli mbidasiya kukhala dzindza pamaso panga kwenda na kwenda.’”+
37 Ipi ndi pidalonga Yahova: “‘Munthu mbadakwanisa kupima kudzulu, pontho mbadakwanisa kudziwa pyonsene pinatsidzikiza dziko yapantsi, penepo ine mbidakwanisa kukhonda dzindza yonsene ya Izraeli thangwi ya pinthu pyonsene pidacita iwo,’ alonga Yahova.”+
38 “Onani! Ziri kufika ntsiku,” alonga Yahova, “zakuti nzinda unadzamangwa pontho+ toera ukhale wa Yahova kutomera Panyumba ya Anyakuonera ya Ananeli+ mpaka Pansuwo wa Pankhomo.+ 39 Nkhambala yakupima nayo+ inadzafuthulwa mpaka kuphiri ya ku Garebhi mbizungunukira kukhundu ya ku Goa. 40 Pontho gowa yonsene ya manungo a anthu akufa na ya madotha, na minda yonsene mpaka ku Gowa ya Sidhroni,+ mpaka pankhomo ya Nsuwo wa Makavalo+ kukhundu yakumabulukiro a dzuwa, pinadzakhala pinthu pyakucena kuna Yahova.+ Nzinda unoyu cipo unadzagomolwa pontho, nee kufudzwa.”
32 Pa caka cacikhumi ca utongi wa Zedhekiya mambo wa ku Yuda, cakuti ndi caka 18 ca utongi wa Nabhukodhonozore,+ Yeremiya atambira mafala a Yahova. 2 Pa ndzidzi unoyu, anyankhondo a mambo wa ku Bhabhilonya akhadazungulira Yerusalemu, pontho mprofeta Yeremiya akhadafungirwa nʼnyumba yakuti ikhali pa Thando ya Anyakuonera,+ panyumba ya mambo wa ku Yuda. 3 Thangwi Zedhekiya mambo wa ku Yuda akhadanfungira,+ mbalonga: “Thangwi yanji usalonga maprofesiya anewa? Iwe usalonga: ‘Ipi ndi pidalonga Yahova: “Ndinadzapereka nzinda uno mʼmanja mwa mambo wa ku Bhabhilonya, pontho iye anadzaukunda;+ 4 Zedhekiya mambo wa ku Yuda anadzaphatwa na Akaldheya, thangwi mwakukhonda penula, iye anadzaperekwa mʼmanja mwa mambo wa ku Bhabhilonya, pontho iye anadzaonana naye, mbalonga naye nkhope na nkhope.”’+ 5 ‘Iye anadzakwata Zedhekiya mbaenda naye ku Bhabhilonya, pontho iye anapitiriza kweneko mpaka ine ndingankumbukira,’ alonga Yahova. ‘Maseze imwe mupitirize kumenya nkhondo na Akaldheya, pinthu nee pinakufambirani mwadidi.’”+
6 Yeremiya alonga: “Awa ndi mafala a Yahova adatambira ine: 7 ‘Anameli mwana wa mʼbale wace pai wako anacemerwa Salumu, anabwera kuna iwe, mbakupanga: “Gula munda wanga uli ku Anatote,+ thangwi iwe ndiwe munthu wakutoma wakuti uli na ufulu toera kuuombola.”’”+
8 Mwakubverana na pidalonga Yahova, Anameli mwana wa mʼbale wace pai wanga abwera kuna ine pa Thando ya Anyakuonera, mbandipanga: “Ndaphata miyendo, gula munda wanga uli ku Anatote ku dziko ya Bhenjamini, thangwi iwe uli na ufulu wa kuukwata na kuuombola, ugule toera ukhale wako.” Penepo, ine ndabvesesa kuti anewa akhali mafala a Yahova.
9 Natenepa, ine ndagula munda ku Anatote wa Anameli mwana wa mʼbale wace pai wanga. Ine ndapima kobiri+ toera kumpasa, masiklo* manomwe na kobiri khumi za parata. 10 Buluka penepo, ine ndalemba ntengo unoyu pa tsamba,+ mbandiifunga na cidzindikiro, ndacemera amboni,+ mbandipima kobiri ineyi pa bhalansa. 11 Ine ndakwata tsamba idakhonda kuikhwa cidzindikiro inapangiza kuti ndagula munda, pabodzi na tsamba idaikhwa cidzindikiro mwakubverana na mwambo na pinaphemba utongi; 12 tsamba inapangiza kuti ndagula munda, ndaipereka kuna Bharuki+ mwana wa Neriya+ ndzukulu wa Maseya pamaso pa Anameli mwana wa mʼbale wace pai wanga, pamaso pa amboni adalemba madzina awo pa tsamba inapangiza kuti ndagula munda na pamaso pa Ayuda onsene akuti akhali nawa pa Thando ya Anyakuonera.+
13 Buluka penepo, ine ndapanga Bharuki pamaso pawo kuti: 14 “Ipi ndi pidalonga Yahova wa anyankhondo, Mulungu wa Izraeli: ‘Kwata matsamba anewa, tsamba idaikhwa cidzindikiro inapangiza kuti ndagula munda, na ire idakhonda kuikhwa cidzindikiro, aikhe mu nkhali ya dongo toera akoyeke mu ndzidzi uzinji.’ 15 Thangwi ipi ndi pidalonga Yahova wa anyankhondo, Mulungu wa Izraeli: ‘Mu dziko ino, anthu anadzagula pontho nyumba, minda na minda ya mauva.’”+
16 Pidamala ine kupereka tsamba kuna Bharuki mwana wa Neriya inapangiza kuti ndagula munda, ine ndaphembera kuna Yahova, mbandilonga: 17 “Mama ine Yahova, Mbuya Wankulu Kakamwe! Na mphambvu zanu zikulu, pontho na nkono wanu wamphambvu,+ imwe mwacita kudzulu na dziko yapantsi, kuna imwe nkhabe cinthu cinacimwanika. 18 Imwe musapangiza ufuni ukulu kuna pikwi na pikwi pya anthu, mbwenye musatcunyusa ana thangwi ya madodo a anyakubalawo,+ imwe ndimwe Mulungu wandimomwene, Wankulu na Wamphambvu, wakuti dzina yanu ndi Yahova wa anyankhondo. 19 Pinafuna imwe kucita ndi pikulu kakamwe, pontho mabasa anu ndi amphambvu kakamwe,+ maso anu asaona pyonsene pinacita* anthu+ toera kubwezera mʼbodzi na mʼbodzi mwakubverana na macitiro ace,* pontho na mabasace.+ 20 Ku Ejitu imwe mwacita pidzindikiro na pirengo, pyakuti pisadziwika mpaka lero; natenepa imwe mwadziwisa dzina yanu mu Izraeli na pakati pa anthu+ onsene, ninga pinaona ife lero. 21 Pontho imwe mwabulusa mbumba yanu ya Izraeli ku dziko ya Ejitu pidapangiza imwe pidzindikiro, pirengo, mphambvu ya djanja yanu, nkono wanu wamphambvu na mabasa akudzumisa.+
22 “Mukupita kwa ndzidzi, imwe mwaapasa dziko ino idapikira imwe kuti mbamudapasa ambuyawo,+ dziko ya nkaka na uci.+ 23 Iwo apita, mbakhala mu dziko ino, mbwenye nee abvera mafala anu, pontho nee atoweza mwambo wanu. Iwo nee acita pinthu pidaapanga imwe, natenepa, imwe mwaabweresera nyatwa zenezi zonsene.+ 24 Onani, anthu afika na pinthu pyakukwira napyo mpanda toera kukunda nzinda uno,+ mwandimomwene, iwo unadzakundwa na Akaldheya akuti ali kumenya nkhondo na nzinda uno; anthu anadzaphiwa na supada,+ anadzafa na njala, pontho na utenda,+ pinthu pyonsene pidalonga imwe pyacitika, ninga pinaona imwe. 25 Mbwenye imwe Yahova, Mbuya Wankulu Kakamwe, imwe mwandipanga kuti: ‘Kwata kobiri ugule munda, pontho cemeresa amboni,’ ngakhale kuti mwakukhonda penula nzinda uno unadzaperekwa mʼmanja mwa Akaldheya.”
26 Penepo Yeremiya atambira mafala awa a Yahova: 27 “Ine ndine Yahova, Mulungu wa mbumba zonsene. Kodi pana cinthu cakuti ine nkhabe kwanisa kucicita? 28 Natenepa, ipi ndi pidalonga Yahova: ‘Ine ndinapereka nzinda uno mʼmanja mwa Akaldheya, pontho ndinadzaupereka mʼmanja mwa Nabhukodhonozore mambo wa ku Bhabhilonya, iye anadzaukunda.+ 29 Akaldheya akuti ali kumenya nkhondo na nzinda uno, anadzapita mu nzinda uno, mbaupisa na moto.+ Iwo anadzaupisa pabodzi na nyumba zakuti padzulu pazo mbumba yaperekapo ntsembe kuna Bhaale, pontho akhaperekapo ntsembe kuna alungu anango toera kunditsukwalisa.’+
30 “‘Thangwi anthu a ku Izraeli na a ku Yuda asacita pinthu pyakuipa pamaso panga kutomera mu uwana wawo;+ mbumba ya Izraeli isanditsukwalisa na pinthu pinacita iwo na manja awo,’ alonga Yahova. 31 ‘Thangwi kutomera pa ntsiku idamangwa iwo mpaka lero, nzinda uno usasosa ukali wanga, ine mbandikhala wakuipirwa.+ Natenepa, ndinadzaubulusa pamaso panga,+ 32 thangwi ya pinthu pyonsene pyakuipa pinacita mbumba ya Izraeli na mbumba ya Yuda toera kunditsukwalisa, iwo asacita pyenepi pabodzi na amambo awo,+ akulu-akulu awo,+ anyantsembe awo, aprofeta awo,+ anthu a ku Yuda na anthu anakhala mu Yerusalemu. 33 Iwo apitiriza kundipasira nkhodolo, mbakhonda kuyangʼana kuna ine;+ maseze ine ndayesera kuapfundzisa mwakubwereza-bwereza, nee mʼbodzi wa iwo abvesera toera kutawira kulangwa.+ 34 Pontho iwo aikha madzimunthu awo akunyanyasa nʼnyumba inadziwika na dzina yanga toera kuipswipisa.+ 35 Kusiyapo pyenepi, iwo amanga mbuto toera kulambira Bhaale nʼGowa ya Mwana wa Inoni+ toera kupisa pa moto anawo amuna na akazi ninga ntsembe kuna Moloke,+ pinthu pyakuti ine nee ndaapanga toera apicite,+ pontho cipo ndikhadanyerezera kale muntima mwanga kuaphemba toera acite pinthu pyenepi pyakunyanyasa, mbacitisa Yuda kudawa.’
36 “Natenepa, ipi ndi pidalonga Yahova Mulungu wa Izraeli thangwi ya nzinda uno unalonga imwe kuti unaperekwa mʼmanja mwa mambo wa ku Bhabhilonya toera aufudze na supada, na njala, pontho na utenda, 37 ‘ine ndinadzaagumanya buluka mʼmadziko onsene adaabalalisa ine thangwi yakuipirwa kwanga, kubva kwanga kupha muntima na ukali wanga ukulu,+ pontho ine ndinadzaabweresa pa mbuto ino toera akhale mwakutsidzikizika.+ 38 Iwo anadzakhala mbumba yanga, inembo ndinadzakhala Mulungu wawo.+ 39 Ine ndinadzaapasa ntima ubodzi basi+ na njira ibodzi toera iwo andigope ndzidzi onsene, kuti pinthu pifambe mwadidi kuna iwo na kuna anawo kutsogolo.+ 40 Pontho ndinadzacita na iwo cibverano cakwenda na kwenda,+ nee ndinadzasiya kuacitira pinthu pyadidi;+ ndinadzaikha mʼmitima yawo cifuno ca kundigopa, toera akhonde kundisiya.+ 41 Ine ndinadzakomerwa na kuacitira pinthu pyadidi,+ ndinadzaatceka na ntima wanga onsene, pontho na mphambvu zanga zonsene mbakhala akuwanga mu dziko ino.’”+
42 “Thangwi ipi ndi pidalonga Yahova: ‘Ninga mudabweresa ine nyatwa ineyi ikulu kuna mbumba iyi, munjira ibodzi ene, ine ndinaabwereserambo pinthu pyonsene pyadidi pinaapikira ine.+ 43 Anthu anadzagula pontho minda mu dziko ino,+ maseze imwe musalonga: “Iyo yamala kufudzwa, nkhabebve anthu nee pinyama, pontho yaperekwa mʼmanja mwa Akaldheya.”’
44 “‘Minda inadzagulwa na kobiri, matsamba anapangiza kuti munthu agula munda, anadzalembwa mbaikhwa pidzindikiro, amboni anadzacemereswa ku dziko ya Bhenjamini,+ mupisa pya cifupi na Yerusalemu, mʼmizinda ya ku Yuda,+ mʼmizinda ya cisa ca ku mapiri, mʼmizinda ya ku gowa+ na mʼmizinda yakunterero, thangwi ine ndinadzabweresa mbumba zawo ziri ku ubitcu,’+ alonga Yahova.”
33 Yeremiya atambira pontho mafala a Yahova mu ndzidzi ukhapitiriza iye pa mbuto idafungirwa iye pa Thando ya Anyakuonera:+ 2 “Ipi ndi pidalonga Yahova ule adacita dziko yapantsi, Yahova ule adaicita mbaikhazikisa mwakuwanga; dzina yace ndi Yahova. 3 ‘Ndicemere, ine ndinakutawira, pontho ndinakupanga mwakucimbiza pinthu pikulu na pyakunentsa kubvesesa pyakuti iwe nkhabe kupidziwa.’”+
4 “Thangwi ipi ndi pidalonga Yahova Mulungu wa Izraeli thangwi ya nyumba za mu nzinda uno na nyumba za amambo a ku Yuda zakuti ziri kugomolwa toera kupingiza pyakukwira napyo mpanda na masupada a anyamalwa, 5 pontho thangwi ya ale anabwera kudzamenya nkhondo na Akaldheya mbadzadza nyumba na manungo a anthu akufa, ale adapha ine thangwi ya ukali wanga na kuipirwa kwanga, akuti madawo awo andicitisa kubisa nkhope mbandikhonda kuyangʼana nzinda uno: 6 ‘Ine ndinadzawangisa anthu a mu nzinda unoyu mbandiapasa ungumi,+ ndinadzaawangisa mbandiapasa ntendere ukulu na citsidzikizo.*+ 7 Ndinadzabweresa mbumba yanga ya Yuda na ya Izraeli buluka ku ubitcu,+ pontho ndinadzaiwangisa ninga pidacita ine pakutoma.+ 8 Ndinadzamalisa mulando wawo onsene thangwi ya madodo awo,+ ndinadzalekerera mulando wawo onsene thangwi ya madodo awo, pontho thangwi ya madawo awo adandicitira iwo.+ 9 Nzinda uno unadzakhala dzina yakukuzwa kwanga, kusimbwa kwanga na kubalika kwanga pamaso pa madzindza onsene pa dziko yapantsi anafuna kubva pinthu pyonsene pyadidi pinafuna kucitira ine mbumba yanga.+ Madzindza anewa anadzagopa, mbatetemera+ thangwi ya pinthu pyonsene pyadidi na ntendere unafuna kudzapasa ine mbumba yanga.’”+
10 “Ipi ndi pidalonga Yahova: ‘Mbuto ino yakuti ndi mizinda ya ku Yuda na miseu ya ku Yerusalemu inafuna kudzalonga imwe kuti ndi thando, nkhabe anthu nee pinyama, nkhabe anakhala mwenemu, mbuto zakusowa anthu nee pinyama; mwenemu munadzabveka pontho 11 kukhuwa kwa anthu akukomerwa na akutsandzaya,+ fala ya mankhadzi wamamuna, fala ya mankhadzi wankazi na fala ya anthu analonga kuti: “Perekani takhuta kuna Yahova wa anyankhondo, thangwi Yahova ndi wadidi;+ ufuni wace ndi wakukhonda mala!”’+
“‘Iwo anadzabweresa miyoni yakupereka takhuta nʼnyumba ya Yahova,+ thangwi ine ndinadzabweresa pontho mu dziko ino anthu adaendeswa ku ubitcu, iwo anadzakhala pontho ninga mwakale,’ alonga Yahova.”
12 “Ipi ndi pidalonga Yahova wa anyankhondo: ‘Mbuto ino yakuti ndi thando, yakusowa anthu nee pinyama, na mizinda yace yonsene, munadzakhala pontho na mbuto yakudyesera pifuyo yakuti akumbizi anadzakwata mikumbi yawo mbaenda kaipumisa mwenemu.’+
13 “‘Mʼmizinda ya cisa ca ku mapiri, mʼmizinda ya ku gowa, mʼmizinda yakunterero, mu dziko ya Bhenjamini, mupisa pya cifupi na Yerusalemu,+ na mʼmizinda ya ku Yuda,+ akumbizi anadzalengesa pontho mabira mu ndzidzi unapita iwo na pantsi pa manja awo,’ alonga Yahova.”
14 “‘Onani! Ziri kufika ntsiku,’ alonga Yahova, ‘zakuti ine ndinadzacita pinthu pyadidi pidapikira ine kuna mbumba ya Izraeli na mbumba ya Yuda.+ 15 Mu ntsiku zenezi na mu ndzidzi unoyu, ine ndinadzabweresera Dhavidhi nthawi ipswa na yakulungama,*+ iye anadzatsidzikiza ulungami na makhaliro adidi mu dziko ino.*+ 16 Mu ntsiku zenezi, anthu a ku Yuda anadzapulumuswa,+ anthu a ku Yerusalemu anadzakhala mwakutsidzikizika.+ Pontho iwo anadzacemerwa na dzina iyi: Ife Ndife Akulungama Thangwi ya Yahova.’”+
17 “Thangwi ipi ndi pidalonga Yahova: ‘Mʼbanja mwa Dhavidhi nee munadzasoweka mwana toera kukhala pa mpando waumambo wa dzindza ya Izraeli,+ 18 pontho ndzidzi onsene anadzaoneka nyantsembe wa dzindza ya Levi toera kupereka ntsembe zakupiswa, kupisa ntsembe za pyakudya na kupereka ntsembe.’”
19 Yeremiya atambira pontho mafala a Yahova: 20 “Yahova alonga: ‘Ine ndacita cibverano toera aoneke masiku na masikati, imwe mungakwanisa kufudza cibverano ceneci toera akhonde kuoneka masiku na masikati pa ndzidzi udakhazikiswa,+ 21 pyenepi pingakwanisika, cibverano canga cidacita ine na ntumiki wanga Dhavidhi cinafudzikambo,+ mbasiya kukhala na mwana toera kutonga pa mpando wace waumambo,+ pontho cibverano canga na anyantsembe a dzindza ya Levi akuti ndi atumiki anga cinafudzikambo.+ 22 Ine ndinadzanjipisa dzindza ya ntumiki wanga Dhavidhi na anyantsembe ananditumikira; natenepa, iwo anadzanjipa kakamwe ninga nyenyezi zakudzulu* zakuti nkhabe kulengeseka, pontho ninga tcetca ya mʼbara yakuti nkhabe kupimika.”
23 Yeremiya atambira pontho mafala a Yahova: 24 “Kodi iwe nee wabva pinalonga mbumba iyi: ‘Yahova anadzakhonda mbumba ziwiri zene zidasankhula iye’! Iwo asatsalakana mbumba yanga mwakusowa cilemedzo, pontho nee asaionabve ninga dzindza.
25 “Ipi ndi pidalonga Yahova: ‘Mwandimomwene, ninga mudacita ine cibverano canga toera aoneke masiku na masikati,+ mbandikhazikisa mitemo yakudzulu na ya dziko yapantsi,+ 26 munjira ibodzi ene, ine cipo ndinadzakhonda dzindza ya Yakobe na ya ntumiki wanga Dhavidhi, mbandisiya kusankhula pakati pa dzindza yace atongi toera atonge dzindza ya Abhrahamu, ya Izaki na ya Yakobe. Thangwi ine ndinadzabweresa mbumba yace idaendeswa ku ubitcu,+ pontho ndinadzaibvera ntsisi.’”+
34 Mu ndzidzi wakuti Nabhukodhonozore mambo wa ku Bhabhilonya, anyankhondo ace onsene, maumambo a madziko onsene akhatongwa na iye, pabodzi na mbumba zonsene, akhamenya nkhondo na Yerusalemu pabodzi na mizinda yonsene ya nʼkhundu mwace, Yeremiya atambira mafala awa a Yahova:+
2 “Ipi ndi pidalonga Yahova Mulungu wa Izraeli: ‘Ndoko kalonge na Zedhekiya Mambo+ wa ku Yuda, mpange kuti: “Ipi ndi pidalonga Yahova: ‘Ine ndinadzapereka nzinda uno mʼmanja mwa mambo wa ku Bhabhilonya, pontho iye anadzaupisa na moto.+ 3 Imwe munadzaphatwa na mambo wa ku Bhabhilonya, thangwi mwakukhonda penula imwe munadzamangwa mbamuperekwa mʼmanja mwace,+ munadzaonana na mambo wa ku Bhabhilonya iye mbalonga na imwe nkhope na nkhope, buluka penepo munadzaendeswa ku Bhabhilonya.’+ 4 Mbwenye bveserani mafala a Yahova imwe Zedhekiya Mambo wa ku Yuda: ‘Ipi ndi pidalonga Yahova thangwi ya imwe mambo: “Iwe nee unadzaphiwa na supada. 5 Unadzafa muntendere,+ pontho anthu anadzakupisira pinthu pyakununkhira pakuikhwa kwako munthumbi ninga pidacitira iwo ambuyako, akuti ndi amambo adakhala mʼmaso iwe mbudzati kubalwa. Anthu anadzakulira mbalonga: ‘Mama ine pano mbuyanga!’ Thangwi ‘ndine adakupanga mafala anewa,’ alonga Yahova.”’”’”
6 Penepo mprofeta Yeremiya alonga mafala anewa onsene ku Yerusalemu kuna Zedhekiya Mambo wa ku Yuda, 7 mu ndzidzi wakuti anyankhondo a mambo wa ku Bhabhilonya akhamenya nkhondo na Yerusalemu, pontho akhamenya nkhondo na mizinda yonsene idasalikira ku Yuda,+ wakuti ndi nzinda wa Lakisi+ na Azeka;+ thangwi ikhali mizinda ineyi basi ikhadazungulirwa na mipanda yakuwanga idasalikira pakati pa mizinda ya ku Yuda.
8 Yeremiya atambira mafala awa a Yahova pidamala Mambo Zedhekiya kucita cibverano na mbumba yonsene ku Yerusalemu cakuti iwo asafunika kupasa ufulu mabitcu,+ 9 onsene akhafunika kupasa ufulu mabitcu awo Acihebheri, amuna na akazi ene, toera akhonde kuoneka munthu wakuti ali na mʼbale wace Waciyuda ninga bitcu. 10 Natenepa akulu-akulu onsene na mbumba yonsene abvera. Iwo acita cibverano cakuti onsene mbadapasa ufulu mabitcu awo amuna na akazi, pontho nee mbadapitiriza kukhala nawo ninga mabitcu. Iwo abvera, mbaapasa ufulu. 11 Mbwenye mukupita kwa ndzidzi, iwo abweresa pontho mabitcu awo amuna na akazi adapasa iwo ufulu mbaacita pontho mabitcu. 12 Na thangwi ineyi, Yeremiya atambira mafala awa a Yahova, adabuluka kuna Yahova:
13 “Ipi ndi pidalonga Yahova Mulungu wa Izraeli: ‘Ine ndacita cibverano na ambuyanu+ pa ntsiku idaabulusa ine mu dziko ya Ejitu, mu dziko ya ubitcu,+ mbandiapanga: 14 “Kunkhomo kwa caka cacinomwe, mʼbodzi na mʼbodzi asafunika kupasa ufulu mʼbale wace Wacihebheri adagulisirwa iye ninga bitcu, wakuti amʼphatira basa mu pyaka pitanthatu; usafunika kumpasa ufulu.”+ Mbwenye ambuyanu nee abvera pidalonga ine, pontho nee apitsalakana. 15 Mu ndzidzi ungasi nduli, imwe mwacinja makhaliro anu mbamucita pinthu pyadidi pamaso panga, pidadziwisa imwe kuti mʼbodzi na mʼbodzi asafunika apase ufulu ndzace, mwacita cibverano pamaso panga, panyumba inadziwika na dzina yanga. 16 Mbwenye patsogolo pace, imwe mwabwerera pontho nduli mbamupswipisa dzina yanga,+ pidabweresa imwe mabitcu anu amuna na akazi akuti mukhadaapasa ufulu mwakubverana na pikhafuna iwo, mbamuacita pontho mabitcu.’
17 “Natenepa, ipi ndi pidalonga Yahova: ‘Imwe nee mwandibvera pidadziwisa imwe kuti mʼbodzi na mʼbodzi anapasa ufulu mʼbale wace na ndzace.+ Na thangwi ineyi, ine ndiri kudziwisa pya ufulu,’ alonga Yahova, ‘ufulu wakusankhula kuphiwa na supada, kufa na utenda peno kufa na njala,+ pontho ndinadzakucitisani kuti mukhale cinthu cakugopesa kuna anthu a maumambo onsene pa dziko yapantsi.+ 18 Pyenepi ndipyo pinafuna kucitikira anthu adakhonda kutoweza cibverano canga, thangwi yakukhonda kubvera mafala a cibverano cidacita iwo pamaso panga, pidagwanda iwo mwanangʼombe pakati-nakati mbapita na pakati pa mapindi anewa,+ 19 akuti ndi akulu-akulu a ku Yuda, akulu-akulu a ku Yerusalemu, akulu a utongi, anyantsembe na mbumba yonsene ya dziko ino adapita na pakati pa mapindi mawiri a mwanangʼombe: 20 Ndinadzaapereka kuna anyamalwa awo na kuna ale anaasaka toera kuapha, manungo awo akufa anadzakhala cakudya kuna mbalame na kuna pinyama pya pa dziko yapantsi.+ 21 Zedhekiya mambo wa ku Yuda na akulu-akulu ace ndinadzaapereka kuna anyamalwa awo, kuna ale anaasaka toera kuapha na kuna anyankhondo a mambo wa ku Bhabhilonya,+ akuti ali kubwerera nduli mbakhonda kumenya nkhondo na imwe.’+
22 “‘Ine ndinadzaapanga pinafunika iwo kucita,’ alonga Yahova, ‘ndinadzaabweresa pontho mu nzinda uno, iwo anadzamenya nkhondo na nzinda uno, anadzaukunda mbaupisa na moto;+ mizinda ya Yuda ndinadzaisiya madembe, mbikhonda kukhala na anthu.’”+
35 Mu ntsiku za utongi wa Yeowakimu+ mwana wa Yosiya mambo wa ku Yuda, Yeremiya atambira mafala awa a Yahova: 2 “Ndoko kuna anthu a dzindza ya Arekabu,+ kalonge nawo mbuabweresa panyumba ya Yahova, mʼmasala anadyera anthu, pontho apase vinyu toera amwe.”
3 Natenepa ine ndakwata Yazaniya mwana wa Yeremiya ndzukulu wa Abhaziniya pabodzi na abale ace, anace onsene na anthu onsene a dzindza ya Arekabu, 4 mbandipita nawo nʼnyumba ya Yahova. Ndaenda nawo mu sala inadyera ana a Anane mwana wa Igadhaliya, ntumiki wa Mulungu wandimomwene, sala ineyi yakudyera ikhali kukhundu ya sala yakudyera ya akulu-akulu yakuti ikhali padzulu pa sala yakudyera ya Maseya mwana wa nyakuonera nsuwo anacemerwa Salumu. 5 Buluka penepo, ine ndaikha ndiko zakudzala na vinyu patsogolo pa amuna a dzindza ya Arekabu, mbandiapanga: “Mwani vinyu.”
6 Mbwenye iwo alonga: “Ife nee tinamwa vinyu, thangwi Yonadhabhe+ mwana wa mbuyathu Rekabu atipasa ntemo uyu: ‘Imwe pabodzi na ananu cipo musafunika kumwa vinyu. 7 Lekani kumanga nyumba nee kubzwala, lekani kutceka nee kukhala na minda ya mauva. Mbwenye ndzidzi onsene khalani mʼmisasa, toera mukhale pyaka pizinji mu dziko inakhala imwe ninga alendo.’ 8 Natenepa, ife tisapitiriza kubvera mafala a Yonadhabhe mwana wa mbuyathu Rekabu mbaticita pyonsene pidatipanga iye. Ife na akazathu, pabodzi na anathu amuna na akazi, cipo tamwa vinyu. 9 Ife nee tamanga nyumba toera kukhala, nee tiri na minda ya mauva, nee minda, nee mbeu. 10 Ife tisapitiriza kukhala mʼmisasa, mbatibvera pyonsene pidatipanga mbuyathu Yonadhabhe. 11 Mbwenye Nabhukodhonozore mambo wa ku Bhabhilonya pidabwera iye kudzamenyana na dziko yathu,+ ife talonga: ‘Tendeni tipite mu Yerusalemu toera tikhonde kuphiwa na anyankhondo a ku Kaldheya na a ku Sirya,’ cincino ife tiri kukhala mu Yerusalemu.”
12 Penepo Yeremiya atambira mafala awa a Yahova: 13 “Ipi ndi pidalonga Yahova wa anyankhondo, Mulungu wa Izraeli: ‘Ndoko kapange anthu a ku Yuda na anthu anakhala mu Yerusalemu kuti: “Kodi imwe nee mwacenjezwa mwakubwereza-bwereza kuti musafunika kubvera mafala anga?”+ alonga Yahova. 14 “Yonadhabhe mwana wa Rekabu apanga anthu a dzindza yace toera akhonde kumwa vinyu, natenepa mpaka lero iwo asabvera mafalace, mbakhonda kumwa vinyu, iwo asacita pidapangwa iwo na mbuyawo.+ Ine ndisalonga na imwe mwakubwereza-bwereza, mbwenye imwe nee musandibvera.+ 15 Ine ndikhakutumizirani atumiki anga onsene akuti ndi aprofeta, ndikhaatuma kuna imwe mwakubwereza-bwereza,+ mbandilonga: ‘Ndaphata miyendo, siyani njira zanu zakuipa+ mbamucita pinthu pyadidi, lekani kulambira alungu anango mbamuatumikira. Mungacita pyenepi munapitiriza kukhala mu dziko idapereka ine kuna imwe na kuna ambuyanu.’+ Mbwenye imwe nee mwandibvera, pontho nee mwatsalakana pidalonga ine. 16 Anthu a dzindza ya Yonadhabhe, mwana wa Rekabu asabvera ntemo udapaswa iwo na mbuyawo,+ mbwenye mbumba iyi nee isandibvera.”’”
17 “Natenepa ipi ndi pidalonga Yahova, Mulungu wa anyankhondo, Mulungu wa Izraeli: ‘Dziko ya Yuda pabodzi na anthu onsene anakhala mu Yerusalemu ndinaabweresera nyatwa zidalonga ine kuti mbidaabweresera,+ thangwi ndaapanga, mbwenye iwo nee andibvera, pontho ndapitiriza kuacemera, mbwenye iwo nee anditawira.’”+
18 Yeremiya apanga dzindza ya Arekabu: “Ipi ndi pidalonga Yahova wa anyankhondo, Mulungu wa Izraeli: ‘Nakuti musabvera ntemo wa mbuyanu Yonadhabhe, pontho musapitiriza kubvera mitemo yace yonsene, mbamucita pyonsene pidakupangani iye, 19 ipi ndi pidalonga Yahova wa anyankhondo, Mulungu wa Izraeli: “Ndzidzi onsene anaoneka munthu wa dzindza ya Yonadhabhe mwana wa Rekabu toera kunditumikira.”’”
36 Mu caka cacinai ca utongi wa Yeowakimu+ mwana wa Yosiya mambo wa ku Yuda, Yeremiya atambira mafala awa a Yahova: 2 “Kwata bukhu ulembe mafala onsene adakupanga ine thangwi ya Izraeli, Yuda+ na madzindza onsene,+ kutomera pa ntsiku idalonga ine na iwe mu ntsiku za Yosiya mpaka lero.+ 3 Panango mbumba ya Yuda ingabva pya nyatwa zonsene zinafuna ine kuabweresera, anasiya makhaliro awo akuipa toera ine ndialekerere madodo awo na madawo awo.”+
4 Natenepa, Yeremiya acemera Bharuki+ mwana wa Neriya, Yeremiya alonga mafala onsene adapangwa iye na Yahova, Bharuki mbaalemba mʼbukhu.*+ 5 Yeremiya apanga Bharuki: “Ine ndafungirwa, nee ndinakwanisa kupita nʼnyumba ya Yahova. 6 Natenepa, iwe ndiwe anafunika kuenda, pontho usafunika kuleri mwakugaluza mafala a Yahova adakupanga ine, ale adalemba iwe mʼbukhu. Aleri pamaso pa mbumba ya ku Yuda panyumba ya Yahova, pa ntsiku ya jejuu; natenepa unadzaaleri pamaso pa mbumba yonsene ya ku Yuda inabwera buluka mʼmizinda yawo. 7 Panango Yahova anabva kudembetera kwawo toera kubverwa ntsisi, pontho mʼbodzi na mʼbodzi mbasiya makhaliro ace akuipa, thangwi Yahova alonga mafala anewa kuna mbumba iyi thangwi yakuipirwa kwace na ukali wace ukulu.”
8 Natenepa, Bharuki mwana wa Neriya acita pyonsene pidapangwa iye na mprofeta Yeremiya; mbaleri mwakugaluza panyumba ya Yahova mafala a Yahova adalembwa mʼbukhu.+
9 Pa caka cacixanu ca utongi wa Yeowakimu+ mwana wa Yosiya mambo wa ku Yuda, pa mwezi wacipfemba, mbumba yonsene mu Yerusalemu na mbumba yonsene idabwera mu Yerusalemu buluka mʼmizinda ya ku Yuda, yacita jejuu pamaso pa Yahova.+ 10 Buluka penepo, Bharuki aleri mwakugaluza mafala a Yeremiya adalembwa mʼbukhu, iye aaleri panyumba ya Yahova pa sala ya Jemariya+ mwana wa mulembi Safani,+ pa thando ikulu, pansuwo upswa wa nyumba ya Yahova+ pamaso pa mbumba yonsene.
11 Mikaya mwana wa Jemariya ndzukulu wa Safani pidabva iye mafala onsene a Yahova adalembwa mʼbukhu, 12 abuluka panyumba ya mambo mbaenda mu sala ya mulembi. Akulu-akulu awa onsene akhali nawa penepo: Mulembi Elizama,+ Dhelaya mwana wa Semaya, Elnatani+ mwana wa Akibhori,+ Jemariya mwana wa Safani, Zedhekiya mwana wa Ananiya pabodzi na akulu-akulu anango onsene. 13 Mikaya aapanga mafala onsene adabva iye mu ndzidzi ukhaleri Bharuki bukhu pamaso pa mbumba.
14 Penepo akulu-akulu onsene atuma Yeudhi mwana wa Netaniya ndzukulu wa Selemiya mwana wa Kuzi toera aende kapange Bharuki kuti: “Bweresa bukhu idaleri iwe pamaso pa mbumba.” Natenepa, Bharuki mwana wa Neriya akwata bukhu mbaenda kaonana nawo. 15 Iwo ampanga: “Taphata miyendo khala pantsi, pontho tileriri bukhu mwakugaluza.” Penepo Bharuki aaleriri bukhu.
16 Pidabva iwo mafala onsene, ayangʼanisana unango na ndzace mwakugopa, mbapanga Bharuki: “Mwandimomwene ife tisafunika kudziwisa mambo mafala anewa onsene.” 17 Iwo abvundza Bharuki: “Taphata miyendo, tipange, walemba tani mafala anewa onsene. Ndiye akhaalonga iwe mbualemba?” 18 Bharuki aatawira: “Ndiye adandipanga mafala anewa onsene, ine mbandialemba na tinta mʼbukhu iyi.” 19 Akulu-akulu apanga Bharuki: “Iwe na Yeremiya ndokoni kabisale, pontho nee munthu mʼbodzi asafunika kudziwa panafuna imwe kubisala.”+
20 Buluka penepo, iwo aenda kuna mambo pa thando, akoya bukhu mu sala ya mulembi Elizama, mbapanga mambo pinthu pyonsene pidabva iwo.
21 Natenepa, mambo atuma Yeudhi+ toera aende kakwate bukhu, iye aenda kaikwata mu sala ya mulembi Elizama. Yeudhi atoma kuileri pamaso pa mambo na pamaso pa akulu-akulu onsene akhali dzololo cifupi na mambo. 22 Ukhali mwezi wacipfemba,* mambo akhali nawa nʼnyumba inakhala iye mu ndzidzi wakutonthola,* pontho iye akhaotha moto. 23 Yeudhi pikhamala iye kuleri makhundu matatu peno manai, mambo akhagwanda makhundu anewa na mpeni wa mulembi mbaaponya pa moto mpaka kumala kupisa bukhu yonsene pa moto. 24 Mambo pabodzi na atumiki ace adabva mafala anewa onsene, nee agopa, pontho nee apandula nguwo zawo. 25 Maseze Elnatani,+ Dhelaya+ na Jemariya+ adembetera mambo toera akhonde kupisa bukhu, iye nee aabvera. 26 Kusiyapo pyenepi, mambo apanga Yerameli mwana wa mambo, Seraya mwana wa Azrieli, Selemiya mwana wa Abhidheli toera aende kamange mulembi Bharuki na mprofeta Yeremiya, mbwenye Yahova aabisa.+
27 Pidamala mambo kupisa bukhu ikhali na mafala adalonga Yeremiya, Bharuki mbaalemba;+ Yeremiya atambira pontho mafala awa a Yahova: 28 “Ndoko kakwate bukhu inango toera ulembe mafala onsene akhali mʼbukhu yakutoma idapisa Yeowakimu mambo wa ku Yuda.+ 29 Iwe usafunika kupanga Yeowakimu mambo wa ku Yuda kuti: ‘Ipi ndi pidalonga Yahova: “Iwe wapisa bukhu ire, mbulonga: ‘Thangwi yanji walemba kuti: “Mwandimomwene mambo wa ku Bhabhilonya anabwera, anafudza dziko ino mbaisiya yakusowa anthu na yakusowa pinyama”?’+ 30 Natenepa ipi ndi pidalonga Yahova thangwi ya Yeowakimu mambo wa ku Yuda: ‘Mu dzindza yace nee munadzasala munthu toera kukhala pa mpando waumambo wa Dhavidhi,+ pontho manungo ace akufa anadzapya na dzuwa namasikati mbatontholerwa namasiku.+ 31 Ine ndinadzatcunyusa iye, anace pabodzi na atumiki ace thangwi ya madodo awo. Nyatwa zidalonga ine, ndinadzabweresa kuna iwo, kuna anthu anakhala mu Yerusalemu na kuna anthu anakhala ku Yuda,+ thangwi iwo nee andibvera.’”’”+
32 Natenepa Yeremiya aenda kakwata bukhu inango mbapasa mulembi+ Bharuki mwana wa Neriya, mu ndzidzi ukhalonga Yeremiya, iye akhalemba mʼbukhu mafala onsene akhali mʼbukhu yakuti Yeowakimu mambo wa ku Yuda aipisa pa moto.+ Pontho mwathimizirwa mafala anango mazinji akulandana na akutoma.
37 Mambo Zedekiya+ mwana wa Yosiya apita pa mbuto ya Koniya+ mwana wa Yeowakimu mbatoma kutonga ninga mambo, thangwi Nabhukodhonozore mambo wa ku Bhabhilonya ansankhula toera akhale mambo wa dziko ya Yuda.+ 2 Mbwenye iye na atumiki ace pabodzi na mbumba ya mu dziko ineyi, nee abvera mafala a Yahova adalongwa na mprofeta Yeremiya.
3 Mambo Zedhekiya atuma Yeukali+ mwana wa Selemiya pabodzi na Sofoniya+ mwana wa nyantsembe Maseya toera aende kapange mprofeta Yeremiya kuti: “Taphata miyendo, ticitireni phembero kuna Yahova Mulungu wathu.” 4 Yeremiya akhafamba mwakusudzuka pakati pa mbumba, thangwi iwo akhadzati kumuikha nkaidi.+ 5 Mbwenye anyankhondo a Farau akhadabuluka ku Ejitu.+ Akaldheya akuti akhadazungulira Yerusalemu pidabva iwo mphangwa zenezi, abuluka ku Yerusalemu.+ 6 Penepo mprofeta Yeremiya atambira mafala awa a Yahova: 7 “Ipi ndi pidalonga Yahova Mulungu wa Izraeli: ‘Pangani mambo wa ku Yuda, ule adakutumani toera mubwere kudzasaka citsogolero ca Mulungu kuna ine: “Anyankhondo a Farau akuti ali kubwera kudzakuphedzani, anadzabwerera ku dziko yawo ya Ejitu.+ 8 Akaldheya anadzabwerera, mbamenya nkhondo na nzinda uno, iwo anadzaukunda mbaupisa na moto.”+ 9 Ipi ndi pidalonga Yahova: “Lekani kunyengezeka mbamulonga kuti: ‘Mwandimomwene Akaldheya anaenda, pontho nee anabwerera kudzamenyana na ife,’ thangwi iwo nee anaenda. 10 Mbamudakwanisa kupha anyankhondo onsene a Akaldheya anamenyana na imwe, mbasala amuna adaphekeka basi, ngakhale tenepo, iwo mbadalamuka mʼmisasa yawo mbapisa nzinda uno na moto.”’”+
11 Anyankhondo a Akaldheya pidabuluka iwo ku Yerusalemu thangwi ya anyankhondo a Farau,+ 12 Yeremiya abuluka mu Yerusalemu toera aende ku dziko ya Bhenjamini+ katambira mbuto pakati pa mbumba yace. 13 Mbwenye pidafika iye Pansuwo wa Bhenjamini, nkulu wa anyakuonera anacemerwa Iriya mwana wa Selemiya ndzukulu wa Ananiya, aphata mprofeta Yeremiya mbampanga: “Iwe uli kuthawira kuna Akaldheya!” 14 Yeremiya alonga: “Unoyu si undimomwene tayu! Ine nee ndiri kuthawira kuna Akaldheya.” Mbwenye Iriya nee ambvera. Iye amanga Yeremiya mbaenda naye kuna akulu-akulu. 15 Akulu-akulu aipirwa na Yeremiya,+ iwo amʼmenya mbanfungira+ nʼnyumba ya mulembi Yeonatani, yakuti ikhadacinjwa mbikhala kaidi. 16 Yeremiya amangwa mbafungirwa nkwartu yapantsi, mbakhala mwenemu mu ntsiku zizinji.
17 Penepo mambo Zedhekiya ancemeresa, pontho mambo ambvundza mwacibisobiso panyumba pace.+ Iye ambvundza: “Uli na mphangwa za Yahova?” Yeremiya atawira: “Ndiri nazo!” Yeremiya athimiza: “Imwe munadzaperekwa mʼmanja mwa mambo wa ku Bhabhilonya!”+
18 Yeremiya apangambo mambo Zedhekiya: “Ndadawanji kuna imwe, kuna atumiki anu na kuna mbumba iyi toera mundiikhe nkaidi? 19 Ali kupi aprofeta anu adalonga maprofesiya kuna imwe kuti: ‘Mambo wa ku Bhabhilonya nee anabwera kudzamenyana na imwe nee na dziko ino’?+ 20 Ndibvesereni, ndaphata miyendo mbuyanga mambo. Ndaphata miyendo, tawirani pinakuphembani ine. Lekani kundibweza kunyumba ya mulembi Yeonatani,+ gopa ndinafa kweneko.”+ 21 Natenepa, mambo Zedhekiya atonga kuti Yeremiya afungirwe pa Thando ya Anyakuonera,+ pontho ntsiku zonsene iwo akhampasa nkate wakubulungika wa ku nseu wa anyakuphika mikate,+ mpaka pidamala mikate yonsene mu nzinda.+ Pontho Yeremiya apitiriza kukhala pa Thando ya Anyakuonera.
38 Sefatiya mwana wa Matani, Jedhaliya mwana wa Pasuri, Yukali+ mwana wa Selemiya na Pasuri+ mwana wa Malkiya abva mafala awa akhalonga Yeremiya kuna mbumba: 2 “Ipi ndi pidalonga Yahova: ‘Ule anapitiriza mu nzinda uno anadzaphiwa na supada, anafa na njala pontho anadzafa na utenda.+ Mbwenye ule anaperekeka kuna Akaldheya nee anadzafa, anadzawina umaso wace ninga muoni mbapitiriza kukhala na umaso.’+ 3 Ipi ndi pidalonga Yahova: ‘Mwakukhonda penula, nzinda uno unadzaperekwa mʼmanja mwa anyankhondo a mambo wa ku Bhabhilonya, pontho iwo anadzaukunda.’”+
4 Akulu-akulu apanga mambo: “Taphata miyendo, tongani kuti munthu uyu aphiwe,+ thangwi na mafala anewa iye asafewesa manungo anyankhondo adasala mu nzinda uno na mbumba yonsene. Munthu uyu nee asafuna kuti mbumba iyi ikhale muntendere, mbwenye asafuna kuti ione nyatwa.” 5 Mambo Zedhekiya atawira: “Iye ali mʼmanja mwanu, nkhabe cinafuna kucita mambo toera kukupingizani.”
6 Natenepa, iwo akwata Yeremiya mbamʼbiza mu ncera wa Malkiya mwana wa mambo, wakuti ukhali pa Thando ya Anyakuonera.+ Iwo anʼgwisira mu ncera na nkhambala. Mu ncera nee mukhali na madzi, basi ene mukhali na matope, pontho Yeremiya atoma kubira mʼmatope.
7 Ebhedhi-Meleki+ wa ku Etiopya wakuti akhali ntumiki wankulu panyumba ya mambo, abva kuti iwo akhadabiza Yeremiya mu ncera. Mu ndzidzi unoyu mambo akhali nawa Pansuwo wa Benjamini,+ 8 penepo Ebhedhi-Meleki abuluka panyumba ya mambo mbaenda kalonga na mambo, iye ampanga: 9 “Mbuyanga mambo, pidacita anthu awa kuna mprofeta Yeremiya ndi pyakuipa kakamwe! Iwo amʼbiza mu ncera, iye anafa mwenemu na njala, thangwi mu nzinda nkhabebve mikate.”+
10 Mambo apanga Ebhedhi-Meleki wa ku Etiopya: “Kwata amuna 30 a pano, ndoko kabuluse mprofeta Yeremiya mu ncera iye mbadzati kufa.” 11 Penepo, Ebhedhi-Meleki akwata amuna anewa mbapita nʼnyumba ya mambo, mu mbuto yakuti ikhali pantsi pa sala inakoyerwa mpfuma.+ Iwo akwata masakala mangasi na mapindi a nguwo zakale apimanga na nkhambala mbapigwisira mu ncera ukhali Yeremiya. 12 Buluka penepo Ebhedhi-Meleki wa ku Etiopya apanga Yeremiya: “Taphata miyendo, ikha masakala na nguwo nʼkhapwa mwako, ungamala, ikha nkhambala.” Yeremiya acita pidapangwa iye, 13 iwo akwewa Yeremiya na nkhambala zenezi mbamʼbulusa mu ncera. Pontho Yeremiya apitiriza kukhala pa Thando ya Anyakuonera.+
14 Mambo Zedhekiya acemeresa mprofeta Yeremiya mbabwera mpaka pakhali iye pansuwo wacitatu wa nyumba ya Yahova. Mambo apanga Yeremiya: “Ndiri na mbvundzo toera kukucita. Leka kundibisira cinthu.” 15 Penepo Yeremiya apanga Zedhekiya: “Ine ndingakutawirani, mwandimomwene imwe munandipha, pontho ndingakupasani uphungu, imwe nee munandibvera.” 16 Mambo Zedhekiya adumbira mwacibisobiso kuna Yeremiya, mbalonga: “Ndiri kudumbira mu dzina ya Yahova wa mʼmaso, ule adatipasa umaso, kuti ine nee ndinakupha, pontho nee ndinakupereka mʼmanja mwa anthu anakusaka toera kukupha.”
17 Yeremiya apanga Zedhekiya: “Ipi ndi pidalonga Yahova Mulungu wa anyankhondo, Mulungu wa Izraeli: ‘Iwe ungaperekeka kuna akulu-akulu a mambo wa ku Bhabhilonya, iwe nee unadzaphiwa, pontho nzinda uno nee unadzapiswa na moto, iwe pabodzi na anthu a panyumba pako nee munadzaphiwa.+ 18 Mbwenye iwe ungakhonda kuperekeka kuna akulu-akulu a mambo wa ku Bhabhilonya, nzinda uno unadzaperekwa kuna Akaldheya, iwo anadzaupisa na moto,+ pontho iwo anadzakuphata.’”+
19 Penepo mambo Zedhekiya apanga Yeremiya: “Ine ndisagopa Ayuda adathawa kukhundu yathu mbaphatana na Akaldheya, thangwi ine ndingaperekwa mʼmanja mwawo, panango iwo anandithabusa kakamwe.” 20 Mbwenye Yeremiya alonga: “Imwe nee munadzaperekwa mʼmanja mwawo. Ndaphata miyendo, bverani mafala a Yahova mbamucita pinakupangani ine, natenepa imwe munadzakhala mwadidi mbamupitiriza kukhala na umaso. 21 Mbwenye imwe mungakhonda kuperekeka, ipi ndi pinandipangiza Yahova: 22 Ndiri kuona akazi onsene adasala panyumba ya mambo wa ku Yuda ali kuendeswa kunja kuna akulu-akulu a mambo wa ku Bhabhilonya,+ pontho iwo asalonga:
‘Amuna akhanyindira imwe akunyengezani, mbakukundani.+
Iwo acitisa kuti miyendo yanu ibire mʼmatope.
Cincino iwo akupasirani nkhodolo, mbathawa.’
23 Iwo ali kukwata akazako onsene na anako mbaenda nawo kuna Akaldheya, pontho iwe nee unadzakwanisa kuthawa, mbwenye unadzaphatwa na mambo wa ku Bhabhilonya,+ pontho thangwi ya iwe, nzinda uno unadzapiswa na moto.”+
24 Penepo Zedhekiya apanga Yeremiya: “Leka kupanga munthu pinthu pyenepi toera ukhonde kuphiwa. 25 Akulu-akulu angadziwa kuti ine ndalonga na iwe, pontho angabwera kuna iwe mbakupanga kuti: ‘Taphata miyendo, tipange pidapanga iwe mambo. Leka kutibisira cinthu, ife nee tinakupha.+ Ninji pidakupanga mambo?’ 26 Iwe usafunika kuatawira kuti: ‘Ine ndikhalonga na mambo toera kuphemba kuti akhonde kundibweza kunyumba ya Yeonatani, thangwi ine mbidafa kweneko.’”+
27 Mukupita kwa ndzidzi, akulu-akulu onsene aenda kuna Yeremiya mbambvundza. Iye aapanga pyonsene pidampanga mambo. Natenepa iwo nee ambvundzabve cinthu cinango, thangwi nkhabe munthu adabva pikhacedza iwo. 28 Yeremiya apitiriza kukhala pa Thando ya Anyakuonera+ mpaka pa ntsiku idafudzwa Yerusalemu, iye akhali penepo pa ndzidzi udafudzwa Yerusalemu.+
39 Pa caka cacipfemba ca utongi wa Zedhekiya mambo wa ku Yuda, pa mwezi wacikhumi, Nabhukodhonozore Mambo wa ku Bhabhilonya pabodzi na anyankhondo ace onsene afika ku Yerusalemu mbazungulira nzinda unoyu.+
2 Pa caka 11 ca utongi wa Zedhekiya, pa ntsiku yacipfemba ya mwezi wacinai, iwo afungula benga pa mpanda wa nzinda.+ 3 Pontho akulu-akulu onsene a mambo wa ku Bhabhilonya apita mbakhala pantsi Pansuwo Wapakati.+ Madzina awo ndi awa: Nerigali-Sarezeri, Samugari-Bhebho, Sarisekimi, Rabhisari, Nerigali-Sarezeri na Rabhimagi,* pabodzi na akulu-akulu anango onsene a mambo wa ku Bhabhilonya.
4 Zedhekiya mambo wa ku Yuda na anyankhondo ace onsene pidaaona iwo athawa,+ iwo abuluka mu nzinda namasiku mbapita na njira ya munda* wa mambo, abuluka na pansuwo pakati pa mipanda miwiri, mbaenda na njira ya ku Arabha.+ 5 Mbwenye anyankhondo a Akaldheya aatowerera mbaphata Zedhekiya nʼthando ya Yeriko.+ Iwo amʼphata mbaenda naye kuna Nabhukodhonozore mambo wa ku Bhabhilonya wakuti akhali ku Ribhila+ mu dziko ya Amati,+ ndi kweneko kudantonga iye kuti asafunika kucitwanji. 6 Mambo wa ku Bhabhilonya aphesa ana a Zedhekiya ku Ribhila pamaso pace, pontho mambo wa ku Bhabhilonya aphesambo akulu-akulu onsene a ku Yuda.+ 7 Buluka penepo iye aswa maso a Zedhekiya, pidamala iye, amʼmanga na maunyolo a nkuwa toera aende naye ku Bhabhilonya.+
8 Akaldheya apisa nyumba ya mambo na nyumba za mbumba,+ pontho iwo agomola mpanda wa Yerusalemu.+ 9 Nebhuzaradhani+ nkulu wa anyakuonera, akwata anthu adasalikira mu nzinda, mbaaendesa ku ubitcu ku Bhabhilonya. Iye akwatambo ale adathawa mbaenda kukhundu yace, kuphatanizambo anthu onsene adasalikira.
10 Mbwenye Nebhuzaradhani nkulu wa anyakuonera asiya anthu angasi akutcerenga kakamwe mu dziko ya Yuda, ale akuti nee akhali na pinthu. Pa ntsiku ineyi, iye aapasa minda ya mauva na minda inango toera ailime.+
11 Nabhukodhonozore mambo wa ku Bhabhilonya apereka pitsogolero ipi kuna Nebhuzaradhani thangwi ya Yeremiya: 12 “Ndokoni kankwate, pontho ntsalakaneni; lekani kuncita pyakuipa, citani pyonsene pinakuphembani iye.”+
13 Natenepa, Nebhuzaradhani nkulu wa anyakuonera, Nebhusazibhani, Rabhisari, Nerigali-Sarezeri na Rabhimagi pabodzi na atsogoleri onsene a mambo wa ku Bhabhilonya aphemba toera 14 abuluse Yeremiya pa Thando ya Anyakuonera+ kuti ampereke kuna Jedhaliya+ mwana wa Aikamu+ ndzukulu wa Safani+ toera aende naye kunyumba kwace. Natenepa Yeremiya akakhala pakati pa mbumba.
15 Pidafungirwa Yeremiya pa Thando ya Anyakuonera,+ iye atambira mafala awa a Yahova: 16 “Ndoko kapange Ebhedhi-Meleki+ wa ku Etiopya, kuti ‘ipi ndi pidalonga Yahova wa anyankhondo, Mulungu wa Izraeli: “Ndiri kucita pinthu pidalonga ine kuti ndinapicitira nzinda uno toera kuuonesa nyatwa, tayu kuucitira pinthu pyadidi, pontho pa ntsiku ineyi iwe unadzaona pyenepi mbapikacitika.”’
17 “‘Mbwenye ine ndinadzakupulumusa pa ntsiku ineyi,’ alonga Yahova, ‘pontho iwe nee unadzaperekwa mʼmanja mwa anthu anagopa iwe.’
18 “‘Thangwi mwandimomwene ine ndinadzakupulumusa, pontho nee unadzaphiwa na supada. Unadzatambira umaso wako ninga muoni,+ thangwi iwe wandinyindira,’+ alonga Yahova.”
40 Yeremiya atambira mafala a Yahova pidamala iye kusudzulwa ku Rama+ na Nebhuzaradhani+ nkulu wa anyakuonera. Yeremiya akhadamangwa na maunyolo mu ndzidzi udankwata iye mbaenda naye kweneko, iye akhali pakati pa anthu adakwatwa ku Yerusalemu na ku Yuda, mu ndzidzi ukhaendeswa iwo ku Bhabhilonya. 2 Nkulu wa anyakuonera akwata Yeremiya, mbampanga: “Yahova Mulungu wako akhadalonga kale kuti mbuto ino mbidagwerwa na nyatwa ineyi, 3 Yahova abweresa nyatwa ineyi ninga mukhadalonga iye, thangwi imwe mwadawira Yahova, pontho nee mwabvera fala yace. Na thangwi ineyi, pinthu pyenepi pyakucitikirani.+ 4 Cincino ine ndinasudzula maunyolo adamangwa na iwe mʼmikono yako. Ungaona kuti mphyadidi kuenda na ine ku Bhabhilonya, tende, ine ndinakutsalakana. Mbwenye khala nee usafuna kuenda na ine ku Bhabhilonya, sala pyako. Ona, dziko yonsene iri pamaso pako, ndoko kunafuna iwe.”+
5 Yeremiya mbadzati kuzungunuka toera kuenda, Nebhuzaradhani ampanga: “Bwerera kuna Jedhaliya+ mwana wa Aikamu,+ ndzukulu wa Safani,+ ule adasankhulwa na mambo wa ku Bhabhilonya toera kukhala muyangʼaniri wa mizinda ya ku Yuda, khala pabodzi na iye pakati pa mbumba, peno ndoko kakhale ku mbuto inafuna iwe.”
Penepo nkulu wa anyakuonera ampasa cakudya na muoni, mbansiya toera aende pyace. 6 Natenepa, Yeremiya aenda ku Mispa+ kuna Jedhaliya mwana wa Aikamu, mbakhala na iye pakati pa mbumba idasalikira mu dziko ineyi.
7 Mukupita kwa ndzidzi, akulu onsene a anyankhondo akuti akhali na anyankhondo awo ntsanga, abva kuti mambo wa ku Bhabhilonya, asankhula Jedhaliya mwana wa Aikamu, toera akhale muyangʼaniri wa dziko ineyi, pontho akhadampasa basa yakutsalakana amuna, akazi na ana akutcerenga mu dziko ineyi, akuti nee akhadaendeswa ku Bhabhilonya.+ 8 Natenepa, iwo aenda kaonana na Jedhaliya ku Mispa.+ Iwo akhali Ijimaeli+ mwana wa Netaniya, Yowanani+ na Yonatani ana a Kareya; Seraya mwana wa Tanumeti; ana a Efai wa ku Netofa na Yezaniya+ mwana wa dzindza ya Amaakati, pabodzi na anyankhondo awo. 9 Jedhaliya mwana wa Aikamu, ndzukulu wa Safani, adumbira kuna iwo na kuna anyankhondo awo, mbalonga: “Lekani kugopa kutumikira Akaldheya. Khalani mu dziko ino mbamutumikira mambo wa ku Bhabhilonya, natenepa pinthu pinakufambirani mwadidi.+ 10 Mbwenye ine ndinapitiriza kukhala ku Mispa, mbandikuimirirani Akaldheya angabwera kuna ife. Imwe musafunika kugumanya vinyu, misapo ya mʼmalimwe, na mafuta a azeti, koyani pinthu pyenepi mu pyombo, pontho pitirizani kukhala mʼmizinda idakwata imwe.”+
11 Pontho, Ayuda onsene akuti akhali ku Moabhe, ku Amoni, ku Edhomi na mʼmadziko anango onsene, abvambo kuti mambo wa ku Bhabhilonya akhadasiya anthu anango ku Yuda, pontho akhadasankhula Jedhaliya mwana wa Aikamu ndzukulu wa Safani toera akhale ntsogoleri wawo. 12 Natenepa, Ayuda onsene atoma kubwerera buluka mu mbuto zidabalaliswa iwo, mbapita mu dziko ya Yuda. Iwo aenda kuna Jedhaliya ku Mispa, pontho iwo agumanya vinyu na misapo ya mʼmalimwe, iwo agumanya pinthu pyenepi pizinji kakamwe.
13 Yowanani mwana wa Kareya na akulu onsene a anyankhondo akuti akhali ntsanga, aenda kuna Jedhaliya ku Mispa. 14 Iwo ampanga: “Kodi imwe nee musadziwa kuti Bhaalisi mambo wa Aamoni+ atuma Ijimaeli mwana wa Netaniya toera kukuphani?”+ Mbwenye Jedhaliya mwana wa Aikamu nee anyindira pidalonga iwo.
15 Natenepa, Yowanani mwana wa Kareya apanga mwacibisobiso Jedhaliya ku Mispa: “Ndisafuna ndiende kaphe Ijimaeli mwana wa Netaniya, pontho nkhabe munthu anafuna kudziwa pyenepi. Thangwi yanji iye asafunika kukuphani? Thangwi yanji mbumba yonsene ya ku Yuda yakuti iri kubwera kuna imwe, isafunika kubalaliswa? Pontho thangwi yanji Ayuda adasalikira asafunika kuphiwa?” 16 Mbwenye Jedhaliya+ mwana wa Aikamu apanga Yowanani mwana wa Kareya: “Leka kucita pyenepi, thangwi pinthu pinalonga iwe thangwi ya Ijimaeli, mphyauthambi.”
41 Pa mwezi wacinomwe, Ijimaeli+ mwana wa Netaniya ndzukulu wa Elizama, wakuti akhali wa dzindza ya mambo na mʼbodzi wa akulu a mambo, aenda pabodzi na amuna khumi ku Mispa kuna Jedhaliya mwana wa Aikamu.+ Mu ndzidzi ukhadya iwo pabodzi pene ku Mispa, 2 Ijimaeli mwana wa Netaniya pabodzi na amuna khumi akhali na iye, alamuka mbapha na supada Jedhaliya mwana wa Aikamu ndzukulu wa Safani. Natenepa, iye apha ule adasankhulwa na mambo wa ku Bhabhilonya toera akhale ntsogoleri wa dziko ineyi. 3 Ijimaeli aphambo Ayuda onsene akhali na Jedhaliya ku Mispa, kuphatanizambo anyankhondo a Akaldheya akhali kweneko.
4 Mangwana mwace pa ndzidzi wakuti nee munthu mʼbodzi akhadziwa kuti Jedhaliya aphiwa, 5 Afika amuna 80 buluka ku Sikemu,+ ku Silo+ na ku Samariya.+ Iwo akhadacinga ndebvu zawo, pontho nguwo zawo zikhadapanduka, akhadacekeka-cekeka mʼmanungo,+ iwo akhadabweresa ntsembe za pyakudya na mafuta a olibhano+ toera kupipereka panyumba ya Yahova. 6 Penepo, Ijimaeli mwana wa Netaniya abuluka ku Mispa mbaenda kaonana nawo, iye akhalira mu ndzidzi ukhafamba iye. Pidagumanikana iye nawo, aapanga: “Tendeni kuna Jedhaliya mwana wa Aikamu.” 7 Mbwenye pidapita iwo mu nzinda, Ijimaeli mwana wa Netaniya pabodzi na amuna akhali na iye, aapha mbaaponya mu ncera.
8 Mbwenye amuna khumi pakati pawo apanga Ijimaeli: “Lekani kutipha thangwi ife tiri na tirigu, sevadha, mafuta a azeti na uci, tapibisa ntsanga.” Natenepa iye nee aapha ninga pidacita iye na abale awo. 9 Manungo a anthu onsene adapha iye, Ijimaeli aaponya mu ncera ukulu, unoyu ukhali ncera udakumba mambo Aza thangwi ya Bhaasa mambo wa Izraeli.+ Ndi ncera unoyu wakuti Ijimaeli mwana wa Netaniya audzadza na manungo a anthu adapha iye.
10 Ijimaeli akwata anthu onsene adasala pakati pa mbumba ku Mispa,+ kuphatanizambo ana akazi a mambo pabodzi na anthu onsene adasala ku Mispa, akuti Nebhuzaradhani nkulu wa anyakuonera akhadaapereka kuna Jedhaliya+ mwana wa Aikamu toera aaonere. Ijimaeli mwana wa Netaniya aakwata mbaenda nawo kukhundu ya dziko ya Aamoni.+
11 Yowanani+ mwana wa Kareya pabodzi na akulu onsene a anyankhondo pidabva iwo pinthu pyenepi pyakuipa pidacita Ijimaeli mwana wa Netaniya, 12 agumanya amuna onsene, mbabuluka toera kuenda kamenyana na Ijimaeli mwana wa Netaniya; iwo anʼgumana cifupi na madzi makulu* ku Jibheyoni.
13 Anthu onsene akhali na Ijimaeli akomerwa pidaona iwo Yowanani mwana wa Kareya, pabodzi na akulu onsene a anyankhondo akhali na iye. 14 Penepo anthu onsene akhadakwatwa na Ijimaeli ku Mispa,+ azungunuka mbabwerera na Yowanani mwana wa Kareya. 15 Mbwenye Ijimaeli mwana wa Netaniya, pabodzi na amuna asere akhali na iye, athawa Yowanani mbaenda ku dziko ya Aamoni.
16 Yowanani mwana wa Kareya pabodzi na akulu onsene a anyankhondo akhali na iye, akwata anthu adasala ku Mispa, adapulumusa iye mʼmanja mwa Ijimaeli mwana wa Netaniya wakuti akhadapha Jedhaliya+ mwana wa Aikamu. Ku Jibheyoni iwo akwata amuna, anyankhondo, akazi, ana pabodzi na akulu-akulu a utongi. 17 Natenepa, iwo abuluka kweneko mbaenda kakhala pa mbuto inafikira alendo ku Kimani cifupi na Bhetelehemu,+ cifuno cawo cikhali kuenda ku Ejitu,+ 18 thangwi ya Akaldheya. Iwo akhaagopa, thangwi Ijimaeli mwana wa Netaniya akhadapha Jedhaliya mwana wa Aikamu wakuti mambo wa ku Bhabhilonya akhadansankhula toera aonere dziko ineyi.+
42 Natenepa, akulu onsene a anyankhondo, kuphatanizambo Yowanani+ mwana wa Kareya, Yezaniya mwana wa Osaya na mbumba yonsene kutomera wangʼono mpaka wankulu, agumanikana, 2 mbapanga mprofeta Yeremiya: “Taphata miyendo, bvesera phembo yathu toera tibverwe ntsisi, pontho cita phembero kuna Yahova Mulungu wako thangwi ya anthu awa onsene adasala, thangwi ninga munaona iwe, pakati pa anthu azinji, adasala ndi pangʼono basi.+ 3 Yahova Mulungu wako mbatipange njira inafunika ife kufamba nayo na pinthu pinafunika ife kucita.”
4 Mprofeta Yeremiya aatawira: “Ndapibva, ndinacita phembero kuna Yahova Mulungu wanu mwakubverana na pidaphemba imwe; pontho ndinakupangani mafala onsene anafuna kundipanga Yahova. Nee fala ibodzi inafuna kukubisirani ine.”
5 Iwo apanga Yeremiya: “Yahova mbakhale mboni wandimomwene na wakukhulupirika, pontho mbatitcunyuse tingakhonda kucita sawasawa na pinafuna kutipanga Yahova Mulungu wako kubulukira mwa iwe. 6 Mwakukhonda tsalakana khala tinakomerwa napyo peno nkhabe, ife tinabvera fala ya Yahova Mulungu wathu, ule adakutuma ife toera pinthu pitifambire mwadidi, thangwi ife tinabvera fala ya Yahova Mulungu wathu.”
7 Pidapita ntsiku khumi Yeremiya atambira mafala a Yahova. 8 Penepo iye acemeresa Yowanani mwana wa Kareya, akulu a anyankhondo onsene akhali na iye, pabodzi na mbumba yonsene, kutomera wangʼono mpaka wankulu,+ 9 mbaapanga: “Ipi ndi pidalonga Yahova Mulungu wa Izraeli, ule adandituma imwe toera ndimpange phembo yanu toera mubverwe ntsisi: 10 ‘Imwe mungapitiriza kukhala mu dziko ino, ine ndinadzakuwangisani mbandikhonda kukugwisani, ndinadzakutcekani mbandikhonda kukudulani, thangwi ine ndinadzacinja manyerezero anga mbandikhonda kukuonesani nyatwa zidakudzeserani ine.+ 11 Lekani kugopa mambo wa ku Bhabhilonya, ule anagopa imwe.’+
“‘Lekani kunʼgopa,’ alonga Yahova, ‘thangwi ine ndiri na imwe, toera kukupulumusani na kukuombolani mʼmanja mwace. 12 Ine ndinadzakubverani ntsisi,+ pontho iye anadzakubverani ntsisi mbakubwezani ku dziko yanu.
13 “‘Mbwenye imwe mungalonga kuti: “Nkhabe, ife nee tinapitiriza kukhala mu dziko ino!” Mbamukhonda kubvera fala ya Yahova Mulungu wanu, 14 mbamulonga kuti: “Nkhabe, ife tinaenda ku dziko ya Ejitu,+ kwakuti nee tinadzaona nkhondo peno kubva kulira kwa nyanga, nee kuthabuka na njala; ife tinaenda pyathu kakhala kweneko,” 15 khala ndi pyenepi pinafuna imwe kucita, bveserani mafala a Yahova imwe Ayuda adasalikira. Ipi ndi pidalonga Yahova wa anyankhondo, Mulungu wa Izraeli: “Khala mwasankhula na ntima wanu onsene toera kuenda ku Ejitu, pontho mungaenda kakhala kweneko,* 16 anyamalwa anagopa imwe anabwera kudzakuphani na masupada ku dziko ya Ejitu, njala ineyi inagopa imwe inakutowerani mpaka mu dziko ya Ejitu, pontho imwe munadzafa kweneko.+ 17 Anthu onsene anafuna kusankhula kuenda kakhala ku Ejitu, anadzaphiwa na supada, anadzafa na njala, pontho na utenda. Nee mʼbodzi anafuna kudzapulumuka pa nyatwa inafuna kuabweresera ine.”’
18 “Thangwi ipi ndi pidalonga Yahova wa anyankhondo, Mulungu wa Izraeli: ‘Ninga mudapangiza ine ukali wanga na kuipirwa kwanga kuna anthu a ku Yerusalemu,+ munjira ibodzi ene ine ndinadzapangiza ukali wanga kuna imwe mungaenda ku Ejitu, imwe munadzakhala anthu adapaswa dzedze, pontho anthu anafuna kudzakuonani anadzagopa, anakupwazani, mbakutikanani,+ imwe cipo munadzaona pontho mbuto ino.’
19 “Yahova akupangani, imwe Ayuda adasalikira. Lekani kuenda ku Ejitu. Kumbukani kuti ine ndakucenjezani lero, 20 kuti imwe munadzafa thangwi ya madodo anu, thangwi ndimwe adandituma kuna Yahova Mulungu wanu, mbamulonga: ‘Ticitire phembero kuna Yahova Mulungu wathu, pontho tipange pinthu pyonsene pinafuna kukupanga Yahova Mulungu wathu, ife tinadzapicita.’+ 21 Lero ine ndakupangani mafala anewa, mbwenye imwe nee munadzabvera fala ya Yahova Mulungu wanu, nee kucita pinthu pidandipanga iye toera ndikudziwiseni.+ 22 Na thangwi ineyi, dziwani kuti mwakukhonda penula, imwe munadzaphiwa na supada, munadzafa na njala, pontho na utenda ku mbuto inafuna imwe kuenda kakhala.”+
43 Pidamala Yeremiya kupanga mbumba yonsene mafala onsene a Yahova Mulungu wawo, inde, fala ibodzi na ibodzi idapangwa iye na Yahova Mulungu wawo toera aadziwise, 2 Azariya mwana wa Osaya, Yowanani+ mwana wa Kareya na amuna onsene akudzikuza, apanga Yeremiya: “Pinalonga iwe ndi uthambi, Yahova Mulungu wathu nee akutuma toera utipange kuti: ‘Lekani kuenda kakhala ku Ejitu.’ 3 Mbwenye ndi Bharuki+ mwana wa Neriya anakunyengerera toera tiperekwe kuna Akaldheya, toera tiphiwe, peno toera tiendeswe ku ubitcu ku Bhabhilonya.”+
4 Natenepa, Yowanani mwana wa Kareya, akulu onsene a anyankhondo na mbumba yonsene, akhonda kubvera ntemo wa Yahova, wakuti iwo akhafunika kupitiriza kukhala mu dziko ya Yuda. 5 Na thangwi ineyi, Yowanani mwana wa Kareya, akulu onsene a anyankhondo, akwata Ayuda onsene adasalikira, ale adabwerera buluka mʼmadziko onsene adabalaliswa iwo toera kukhala mu dziko ya Yuda.+ 6 Iwo akwata amuna, akazi, ana, ana akazi a mambo pabodzi na anthu onsene akuti Nebhuzaradhani+ nkulu wa anyakuonera akhadaasiya na Jedhaliya+ mwana wa Aikamu+ ndzukulu wa Safani.+ Akwatambo mprofeta Yeremiya na Bharuki mwana wa Neriya. 7 Iwo aenda ku dziko ya Ejitu, thangwi nee abvera fala ya Yahova, iwo aenda mpaka ku Tafanesi.+
8 Ku Tafanesi, Yeremiya atambira mafala awa a Yahova: 9 “Kwata miyala mikulu mingasi, Ayuda onsene akuone mu ndzidzi unaibisa iwe mʼmatope, pa nthunda idacitwa na mabhuloko,* yakuti iri pansuwo wa nyumba ya Farau ku Tafanesi. 10 Penepo apange kuti: ‘Ipi ndi pidalonga Yahova wa anyankhondo, Mulungu wa Izraeli: “Ndinadzacemeresa ntumiki wanga Nabhukodhonozore mambo wa ku Bhabhilonya,+ pontho ndinadzaikha mpando wace wa umambo padzulu pa miyala iyi idabisa ine, iye anadzamanga nsasa wace waumambo padzulu pa miyala ineyi.+ 11 Iye anabwera kudzamenya nkhondo na dziko ya Ejitu.+ Ule anafunika kufa na utenda, anadzafa na utenda; ule anafunika kuenda ku ubitcu, anadzaenda ku ubitcu; ule anafunika kuphiwa na supada, anadzaphiwa na supada.+ 12 Pontho ine ndinadzapisa nyumba za* alungu a ku Ejitu, iye anadzazipisa,+ mbaendesa anthu ku ubitcu. Ninga nkumbizi wakuti nee asanentseka toera kubvala nguwo yace, munjira ibodzi ene, Nabhukodhonozore nee ananentseka toera kukunda dziko ya Ejitu, iye anadzabuluka mwenemu muntendere.* 13 Iye anadzanyedza mizati ya Bheti-Semesi* mu dziko ya Ejitu, pontho anadzapisa na moto nyumba za* alungu a ku Ejitu.”’”
44 Yeremiya atambira mafala awa toera kupanga Ayuda onsene akuti akakhala mu dziko ya Ejitu,+ ku Migidholi,+ ku Tafanesi,+ ku Nofi*+ na ku dziko ya Patrosi:+ 2 “Ipi ndi pidalonga Yahova wa anyankhondo, Mulungu wa Izraeli: ‘Imwe mwaona nyatwa zidabweresera ine Yerusalemu+ na mizinda yonsene ya ku Yuda, cincino iyo yasala madembe, pontho nkhabe munthu anakhala mwenemo.+ 3 Pyenepi pyacitika thangwi ya pinthu pyakuipa pidacita iwo toera kunditsukwalisa, pidapereka iwo ntsembe,+ mbatumikira alungu anango akuti iwo nee akhaadziwa, nee imwe nee ambuyanu.+ 4 Ine ndikhatuma kuna imwe atumiki anga onsene akuti ndi aprofeta, ndikhaatuma mwakubwereza-bwereza, mbandilonga: “Ndaphata miyendo, lekani kucita pinthu pyenepi pyakunyanyasa pyakuti ine ndisapiida.”+ 5 Mbwenye iwo nee abvera, nee kupitsalakana, toera asiye macitiro awo akuipa akupereka ntsembe kuna alungu anango.+ 6 Na thangwi ineyi, ine ndinapangiza ukali wanga na kuipirwa kwanga ninga kudapangiza ine mʼmizinda ya ku Yuda na mʼmiseu ya ku Yerusalemu, iyo mbikhala madembe na yakusowa anthu ninga munaonera imwe lero.’+
7 “Ipi ndi pidalonga Yahova Mulungu wa anyankhondo, Mulungu wa Izraeli: ‘Thangwi yanji mukubweresa mwekhene nyatwa ineyi ikulu, mbamucitisa kuti amuna onsene, akazi, ana na ana ene a pabere aphiwe mu Yuda, mbakhonda kusala nee mʼbodzi? 8 Thangwi yanji mwanditsukwalisa na mabasa a manja anu, thangwi yakupereka ntsembe kuna alungu anango mu dziko ya Ejitu, ire idaenda imwe kakhala? Imwe munadzafa, munadzapaswa dzedze, pontho munadzatikanwa pakati pa madzindza onsene pa dziko yapantsi.+ 9 Kodi imwe mwaduwala pinthu pyakuipa pidacita ambuyanu, pinthu pyakuipa pidacita amambo a ku Yuda,+ pinthu pyakuipa pidacita akazawo,+ pinthu pyakuipa pidacita imwe, pontho na akazanu,+ pinthu pyenepi pyakuipa pidacitwa mu dziko ya Yuda na mʼmiseu ya mu Yerusalemu? 10 Mpaka lero imwe nee mwacepeseka, nee mwagopa,+ pontho nee mwatoweza mwambo wanga, nee mitemo yanga idapereka ine kuna imwe na kuna ambuyanu.’+
11 “Na thangwi ineyi, ipi ndi pidalonga Yahova wa anyankhondo, Mulungu wa Izraeli: ‘Ine ndatonga kukubwereserani nyatwa toera kufudza dziko yonsene ya Yuda. 12 Ine ndinakwata Ayuda adasalikira, ale adasankhula kuenda kakhala mu dziko ya Ejitu, onsene anadzafera mu dziko ya Ejitu.+ Iwo anadzaphiwa na supada, anadzafa na njala; kutomera ana mpaka akulu, anadzaphiwa na supada, pontho anadzafa na njala. Iwo anadzakhala anthu akupaswa dzedze, cinthu cakugopesa, pontho iwo anadzapwazwa, mbatikanwa.+ 13 Ine ndinadzatcunyusa ale anakhala mu dziko ya Ejitu, ninga mudatcunyusa ine Yerusalemu na supada, na njala, pontho na utenda.+ 14 Pontho Ayuda akusalikira adaenda kakhala mu dziko ya Ejitu, nee anadzathawa, nee kupulumuka mbaenda kakhala pontho mu dziko ya Yuda. Iwo anadzafuna kakamwe kubwerera toera akhale pontho kweneko; mbwenye nee anabwerera, kusiyapo angasi adathawa.’”
15 Amuna onsene akuti akhadziwa kuti akazawo akhadapereka ntsembe kuna alungu anango, pabodzi na akazi akhali penepo, akuti akhali nsoka ukulu na mbumba yonsene ikakhala ku Patrosi+ mu dziko ya Ejitu,+ atawira Yeremiya: 16 “Ife nee tinabvera mafala adatipanga iwe mu dzina ya Yahova. 17 Mbwenye mwandimomwene, ife tinacita pinthu pyonsene pidalonga ife na milomo yathu, ife tinapereka ntsembe kuna Nyanyi Wakudzulu,* pontho tinapereka kuna iye ntsembe za pyakumwa+ ninga pidacita ife, ambuyathu, amambo athu na akulu-akulu athu mʼmizinda ya ku Yuda na mʼmiseu ya ku Yerusalemu mu ndzidzi ukhadya ife mbatikhuta, mbatikhonda kusowa cinthu, mu ndzidzi wakuti nee nyatwa ibodzi ikhaona ife. 18 Pidasiya ife kupereka ntsembe kuna Nyanyi Wakudzulu,* na kupereka ntsembe za pyakumwa kuna iye; ife tatoma kusowa pyonsene, mbatitoma kuphiwa na supada, pontho mbatifa na njala.”
19 Akazi athimiza: “Pikhapereka ife ntsembe kuna Nyanyi Wakudzulu,* na kupereka ntsembe za pyakumwa kuna iye, kodi ife nee tatawiriswa na amuna athu toera kuncitira mikate yakulandana na dzimunthu yace, mbatipereka ntsembe za pyakumwa kuna iye?”
20 Natenepa Yeremiya apanga mbumba yonsene, amuna na akazawo, pabodzi na mbumba yonsene ikhalonga na iye: 21 “Mbwenye ntsembe zidapereka imwe, ambuyanu, amambo anu, akulu-akulu anu na mbumba mʼmizinda ya ku Yuda na mʼmiseu ya ku Yerusalemu,+ Yahova azikumbuka, inde, iye azikumbuka! 22 Pakumalisa, Yahova nee akwanisabve kupirira macitiro anu akuipa na pinthu pyakunyanyasa pikhacita imwe, pontho dziko yanu yadzakhala madembe, yakugopesa, ninga cipangizo ca mbuto idapaswa dzedze, na yakusowa anthu ninga munaionera imwe lero.+ 23 Nakuti imwe mwapereka ntsembe zenezi, mbamudawira Yahova, thangwi yakukhonda kubvera fala ya Yahova, mbamukhonda kutoweza mwambo wace, matongero ace na macenjezo ace, imwe mwagwerwa na nyatwa ineyi ninga munaonera imwe lero.”+
24 Yeremiya apitiriza kupanga mbumba yonsene na akazi onsene: “Bveserani mafala a Yahova, imwe anthu onsene a ku Yuda anakhala mu dziko ya Ejitu. 25 Ipi ndi pidalonga Yahova wa anyankhondo, Mulungu wa Izraeli: ‘Pinthu pidalonga imwe na akazanu mwapicita na manja anu, thangwi mwalonga: “Mwandimomwene, ife tinacita pidalonga ife kuti tinapereka ntsembe kuna Nyanyi Wakudzulu,* na kupereka ntsembe za pyakumwa kuna iye.”+ Akazimwe, mwandimomwene imwe munapitiriza kucita pidapikira imwe, mbamupitoweza.’
26 “Natenepa, bveserani mafala a Yahova imwe anthu onsene a ku Yuda anakhala mu dziko ya Ejitu: ‘“Ine ndiri kudumbira mu dzina yanga ikulu,” alonga Yahova, “kuti mu dziko yonsene ya Ejitu nkhabe munthu wa ku Yuda+ anafuna pontho kuphatisira dzina yanga pakudumbira, mbalonga: ‘Ndiri kudumbira mu dzina ya Yahova Mulungu wa mʼmaso, Mbuya Wankulu Kakamwe!’+ 27 Ndiri kuaonesesa mwadidi toera kuabweresera nyatwa, tayu pinthu pyadidi;+ anthu onsene a ku Yuda akuti ali mu dziko ya Ejitu anadzaphiwa na supada, pontho anadzafa na njala, mpaka kumala onsene.+ 28 Anthu pangʼono basi, ndiwo anafuna khonda kuphiwa na supada, mbabwerera ku Yuda buluka ku dziko ya Ejitu.+ Penepo, Ayuda onsene adasalikira, adabwera kudzakhala mu dziko ya Ejitu, anadzadziwa kuti ndi pinthu pipi pidacitika, pidalonga ine peno pidalonga iwo!”’”
29 Yahova alonga: “‘Ine ndiri kukupasani cidzindikiro ici cakuti ndinadzakutcunyusani mu dziko ino, toera mudziwe kuti pidalonga ine na imwe kuti ndinadzakuonesani nyatwa, pinadzacitikadi. 30 Ipi ndi pidalonga Yahova: “Farau Hofra mambo wa ku Ejitu, ine ndinadzampereka mʼmanja mwa anyamalwa ace na kuna ale anansaka toera kumupha, ninga mudapereka ine Zedhekiya mambo wa ku Yuda mʼmanja mwa nyamalwa wace Nabhukodhonozore mambo wa ku Bhabhilonya, wakuti akhansaka toera kumupha.”’”+
45 Pa caka cacinai ca utongi wa Yeowakimu+ mwana wa Yosiya mambo wa ku Yuda, mu ndzidzi wakuti Bharuki+ mwana wa Neriya akhalemba mʼbukhu mafala akhapangwa iye na mprofeta Yeremiya,+ iye ampanga mafala awa:
2 “Ipi ndi pidalonga Yahova Mulungu wa Izraeli thangwi ya iwe Bharuki: 3 ‘Iwe walonga: “Dzedze kuna ine, thangwi Yahova athimizira kutsukwala kwanga na nyatwa zanga. Ine ndaneta na kubulira kakamwe, thangwi nyatwa zanga nkhabe kumala.”’*
4 “Iwe usafunika kumpanga kuti: ‘Ipi ndi pidalonga Yahova: “Bvesera! Ine ndiri kugomola pidamanga ine, pontho ndiri kudula pidatceka ine, ndinacita pyenepi mu dziko yonsene.+ 5 Mbwenye iwe uli kusaka pinthu pikulu kakamwe. Leka kupitiriza kusaka pinthu pyenepi.”’
“‘Thangwi ine ndiri dhuzi toera kubweresa nyatwa kuna anthu onsene,’+ alonga Yahova, ‘pontho konsene kunafuna iwe kuenda, ine ndinadzatsidzikiza umaso wako.’”*+
46 Awa ndi mafala a Yahova adatambira mprofeta Yeremiya thangwi ya pinafuna kucitikira madzindza a anthu:+ 2 Izi ndi mphangwa thangwi ya Ejitu,+ thangwi ya anyankhondo a Farau Neko+ mambo wa ku Ejitu, pikhali iye dhuzi na Nkulo wa Eufrate ku Karkemi pidakundwa iye na Nabhukodhonozore mambo wa ku Bhabhilonya, pa caka cacinai ca utongi wa Yeowakimu+ mwana wa Yosiya mambo wa ku Yuda:
3 “Khunganyani maxango anu makulu na mangʼono ene,
Ndokoni kamenye nkhondo.
4 Imwe anyamakavalo, khunganyani makavalo mbamuakwira.
Pakanani mbamubvala pyapeu pya nkhondo.
Pukutani mapswimo mbamubvala pyakutsidzikiza napyo diti pya utale.
5 ‘Thangwi yanji ndisaaona mbakagopa?
Iwo asabwerera nduli, anyankhondo awo amala kukundwa.
Iwo ali kuthawa balala-balala, anyankhondo awo nkhabe kuyangʼana nduli.
Anthu ali kugopa konsene kwene,’ alonga Yahova.
6 ‘Nyakuthamanga kakamwe
nkhabe kwanisa kuthawa, anyankhondo nkhabe kwanisa kuthawa.
Kunkwiriro, nʼkhundu mwa Nkulo wa Eufrate,
Iwo asagwegweduka mbagwa.’+
7 Mbani unoyu anabwera ninga Nkulo wa Nilo,
Ninga madzi anakuka mʼmikulo?
8 Ejitu ali kubwera ninga Nkulo wa Nilo,+
Ninga madzi anakuka mʼmikulo,
Mbalonga: ‘Ine ndinaenda, pontho ndinabiza dziko yonsene.
Ndinadzafudza mizinda na anthu anakhala mwenemu.’
9 Thamangani, imwe makavalo!
Thamangani mwakucimbiza, imwe ngolo za nkhondo!
Anyankhondo mbathamange,
Anthu a ku Etiopya na a ku Puti akuti asaphatisira maxango,+
10 “Ineyi ndi ntsiku ya Yahova wa anyankhondo Mbuya Wankulu Kakamwe, ndi ntsiku yakubwezera toera kutcunyusa anyamalwa ace. Supada inadzapha anthu mpaka kukhuta, iyo inadzamwa ciropa cawo mpaka kumalisa nyota, thangwi Yahova Mbuya Wankulu Kakamwe akhunganya ntsembe ku dziko yakunkwiriro cifupi na Nkulo wa Eufrate.+
11 Imwe anthu a ku Ejitu,
Ndokoni ku Jiliyadhi kasaka bhalsamu.+
Mitombwe yanu yonsene nkhabe basa,
Thangwi imwe nee munawanga.+
12 Anthu a madzindza anango abva pya manyadzo anu,+
Pontho kulira kwanu kusabveka mu dziko yonsene.
Thangwi nyankhondo asagwegwedusa nyankhondo ndzace,
Uwiri wawo mbagwa pabodzi pene.”
13 Awa ndi mafala a Yahova adalonga mprofeta Yeremiya thangwi yakubwera kwa Nabhukodhonozore mambo wa ku Bhabhilonya toera kukunda dziko ya Ejitu:+
14 “Dziwisani pyenepi ku Ejitu, pontho pidziwiseni ku Migidholi.+
Pidziwisenimbo ku Nofi* na ku Tafanesi.+
Longani: ‘Pakanani mbamukhunganyika,
Thangwi supada inadzafudza anthu onsene nʼkhundu mwanu.
15 Thangwi yanji amuna akuwanga pakati panu amala kufudzwa?
Iwo nee akwanisa kupitiriza kukhala dzololo,
Thangwi Yahova aagwisa pantsi.
16 Iwo asagwegweduka mbagwa azinji kakamwe.
Iwo asalonga kuna unango na ndzace:
“Tendeni! Tendeni tibwerere mwakucimbiza kuna mbumba yathu na ku dziko yathu,
Thangwi anthu azinji ali kuphiwa na supada.”’
17 Kweneko iwo asadziwisa kuti:
‘Farau mambo wa ku Ejitu asalonga pinthu pizinji, mbwenye nkhabe cinacita iye,
Iye nee acita pinthu pa ndzidzi wakuthema.’+
18 ‘Ine ndiri kudumbira mu dzina yanga,’ alonga Mambo wakuti dzina yace ndi Yahova wa anyankhondo,
‘Iye anabwera mbaonekera ninga phiri ya Tabhori+ pakati pa mapiri anango,
Pontho anadzakhala ninga phiri ya Karmelo+ nʼkhundu mwa bara.
19 Pakani mitolo toera muende ku ubitcu,
Imwe anthu a ku Ejitu.
Thangwi nzinda wa Nofi* unadzakhala cinthu cakugopesa;
20 Ejitu alandana na ngʼombe ikazi yakubalika,
Mbwenye imbu zinabwera buluka ku dziko yakunkwiriro mbazimuluma.
21 Anyankhondo adalipa iye toera amʼphedze alandanambo na ngʼombe zakukhuma pakati pawo,
Mbwenye iwombo azungunuka, mbathawa pabodzi pene;
Iwo nee apitiriza kukhala akuwanga,+
Thangwi yafika ntsiku yawo ya kuoneswa nyatwa,
Ndzidzi wakutcunyuswa kwawo.’
22 ‘Kukhuwa kwace ndi ninga dungu ya nyoka yakuti iri kuthawa,
Thangwi iwo ali kubwera kuna iye na mphambvu, pontho na macado,
Ninga amuna akuti asagwisa miti.
23 Iwo anadzagwisa miti ya mu nsitu wace,’ alonga Yahova, ‘maseze usaoneka ninga nkhabe pitika.
Thangwi iwo ndi azinji kakamwe kupiringana anyadzombe, ndi akukhonda lengeseka.
24 Anthu a ku Ejitu anadzapaswa manyadzo.
Iwo anadzaperekwa mʼmanja mwa mbumba yakunkwiriro.’+
25 “Yahova wa anyankhondo, Mulungu wa Izraeli, alonga: ‘Cincino, ine ndinatcunyusa Amoni+ mulungu wa ku No,*+ ndinatcunyusa Farau, Ejitu na alungu ace+ pabodzi na amambo ace, inde, ndinatcunyusa Farau na anthu onsene ananʼnyindira.’+
26 “‘Ine ndinadzaapereka kuna ale anaasaka toera kuapha, kuna Nabhukodhonozore mambo wa ku Bhabhilonya+ na atumiki ace. Mbwenye buluka penepo, dziko ya Ejitu inadzakhala pontho na anthu ninga mwakale,’ alonga Yahova.+
27 ‘Mbwenye iwe ntumiki wanga Yakobe, leka kugopa,
Pontho leka kugopeswa iwe Izraeli.+
Thangwi ine ndinadzakupulumusa ku mbuto yakutali,
Pontho dzindza yako ndinadzaipulumusa ku dziko idaendeswa iyo ku ubitcu.+
Yakobe anadzabwerera, mbakhala mwakupfulika na muntendere,
Mbakhonda kuoneka munthu anafuna kunʼgopesa.+
28 Natenepa, leka kugopa, iwe ntumiki wanga Yakobe,’ alonga Yahova, ‘thangwi ine ndiri na iwe,
Ine ndinadzafudza madzindza onsene mu mbuto zidakubalalisa ine.+
Mbwenye iwe, ine nee ndinadzakufudza.+
47 Awa ndi mafala a Yahova adatambira mprofeta Yeremiya thangwi ya Afilisti,+ Farau mbadzati kukunda nzinda wa Gaza. 2 Ipi ndi pidalonga Yahova:
“Onani, madzi ali kubwera buluka kunkwiriro!
Iwo anadzakhala madzi makulu.
Anadzabiza dziko na pinthu pyonsene piri mwenemu,
Nzinda na anthu anakhala mwenemu.
Anthu anadzakhuwa,
Pontho, anthu onsene anakhala mu dziko ineyi anadzalira.
3 Angabva mititi ya makavalo a anyamalwa awo,
Angabva dungu ya ngolo za nkhondo,
Na kutitima kwa maroda a ngolo,
Anyakubala nee anabwerera toera kupulumusa anawo,
Thangwi cipapo cawo cinadzamala,*
4 Thangwi iri kufika ntsiku yakuti Afilisti onsene anadzafudzwa;+
Anthu onsene adasalikira ku Tiro+ na ku Sidhoni+ akuti asaaphedzera, anadzafudzwa.
Imwe mudasalikira ku gowa,
Mpaka lini munapitiriza kucekeka-cekeka mwekhene?+
6 Iwe supada ya Yahova!+
Unapuma lini?
Bwerera pa mbuto inakhala iwe.
Puma, mbupfulika.
7 Kodi iyo inapuma tani,
Nee ndi Yahova adaipanga?
Toera ifudze Asikaloni na kukhundu ya bara,+
Ndi kweneko kudaituma iye.”
48 Ipi ndi pidalonga Yahova wa anyankhondo, Mulungu wa Izraeli thangwi ya Moabhe:+
“Dzedze kuna nzinda wa Nebho,+ thangwi wamala kufudzwa!
Nzinda wa Kiriyataimu+ wapaswa manyadzo, mbukundwa.
Mbuto yakutsidzikizika yapaswa manyadzo, mbifudzwa.+
2 Iwo nee asasimbabve Moabhe.
Ku Esibhoni+ iwo abverana toera kukunda Moabhe, mbalonga:
‘Bwerani, tendeni tifudze dzindza ineyi.’
Iwembo Madhimeni, pitiriza kumatama,
Thangwi supada iri kukutowera.
3 Ku Oronaimu kusabveka kukhuwa kwa anthu,+
Thangwi yakufudzwa, pontho thangwi ya nyatwa ikulu idaagwera.
4 Moabhe amala kufudzwa.
Pontho anace angʼono ali kulira.
5 Anthu asalira nee kumatama mu ndzidzi unakwira iwo nthunda yakuenda ku Luiti.
Pa materero a ku Oronaimu pasabveka kukhuwa kwa anthu thangwi ya nyatwa ikulu.+
6 Thawani, pulumusani umaso wanu!
Khalani ninga muti wa junipero nʼthando.
7 Nakuti usanyindira mabasa ako na mpfuma zako,
Iwe unadzakundwambo.
Pontho, Kemosi+ anadzaendeswa ku ubitcu,
Pabodzi na anyantsembe ace na akulu-akulu ace.
8 Nyamalwa anafudza mizinda yonsene,
Nee nzinda ubodzi unafuna kupulumuka.+
Gowa inadzafudzwa,
Thando inadzafudzwa, ninga mudalongera Yahova.
9 Ikhani pidzindikiro mu nseu toera kupangiza njira anthu a ku Moabhe,
Thangwi iwo anadzathawa nzinda ungafudzwa,
Pontho mizinda yace inadzakhala cinthu cakugopesa,
Mbikhala yakusowa anthu.+
10 Dzedze kuna ule anakhonda kuphata mwaphinga basa idapaswa iye na Yahova!
Dzedze kuna ule anakhonda kuphatisira supada yace toera kupha anthu!
11 Anthu a ku Moabhe ali akupfulika kutomera mu uwana wawo,
Iwo asakhala ninga vinyu yakuti idzati kubvundulwa.
Iwo cipo atsanulwa mu combo cibodzi mbaikhwa mu combo cinango,
Iwo cipo aendeswa kale ku ubitcu.
Na thangwi ineyi, kudzipa
kwace ndi kubodzi kwene,
Pontho khwema yace nee yacinja.
12 “‘Mbwenye ziri kufika ntsiku,’ alonga Yahova, ‘zakuti ine ndinadzatuma anthu akuti anadzaabhoma. Iwo anadzaabhoma, pyombo pyawo anadzapisiya pyakusowa pinthu, pontho anadzaswa makhomitco awo makulu. 13 Anthu a ku Moabhe anadzapasika manyadzo na mulungu wawo Kemosi, ninga mbumba ya Izraeli yapasika manyadzo na pidacita iwo ku Bheteli, pyakuti ndi pinthu pikhanyindira iwo.+
14 Mphapo thangwi yanji musakhala na cipapo, mbamulonga kuti: “Ife ndife anyankhondo amphambvu, tiri dzololo toera kumenya nkhondo”?’+
Alonga Mambo, wakuti dzina yace ndi Yahova wa anyankhondo.+
16 Nyatwa ya anthu a dzindza ya Moabhe iri dhuzi na kufika,
Kufudzwa kwawo kuli cifupi kakamwe.+
17 Imwe anthu onsene anakhala cifupi na iye, mbvereni ntsisi,
Onsene anadziwa dzina yace,
Mbampange kuti: ‘Pyakwanisika tani kuti mpswimbo yamphambvu, yakuti ndi ndodo yakubalika, igwandike!’
18 Tcitani pa mbuto yanu ya mbiri,
Khalani pantsi, mbamuthabuka na nyota, imwe anthu anakhala ku Dhibhoni,+
Thangwi ule anafuna kufudza Moabhe abwera kuna imwe,
Pontho iye anadzafudza mbuto zanu zidazungulirwa na mipanda yakuwanga.+
19 Imwe anthu anakhala ku Aroeri,+ limirani nʼkhundu mwa nseu, mbamuona.
Bvundzani mamuna na nkazi akuti ali kuthawa: ‘Ninji pidacitika?’
20 Moabhe apaswa manyadzo, pontho iye ali kugopa,
Lirani, mbamukhuwa.
Dziwisani ku Arnoni+ kuti Moabhe amala kufudzwa.
21 “Mulungu atonga dziko yakusowa nthunda,+ atongambo Oloni, Yaazi+ na Mefati;+ 22 iye atonga Dhibhoni,+ Nebho+ na Bheti-Dhibhlataimu; 23 atonga Kiriyataimu,+ Bheti-Gamuli na Bheti-Meoni;+ 24 atongambo Keriyoti,+ Bhozira na mizinda yonsene ya mu dziko ya Moabhe, yakutali na yacifupi ene.
25 ‘Mphambvu ya Moabhe yamala;
Nkono wace wakhumulwa,’ alonga Yahova.
26 ‘Muledzereseni,+ thangwi iye akuzika ekhene pamaso pa Yahova.+
Moabhe asabulumunda pa matapiko ace,
Natenepa, iye athema kusingirirwa.
27 Imwe mukhasingirira Izraeli,+
Kodi iye agumanizwa kale ninga mbava?
Toera mulonge pinthu pyakuipa thangwi ya
iye?
28 Imwe anthu anakhala ku Moabhe, bulukani mʼmizinda mbamuenda kakhala mʼmphako za miyala,
Khalani ninga nkhangaiwa inamanga ntsandza yace mʼmadjenje akuzika kakamwe pakati pa miyala.’”
29 “Ife tabva pya kudzikuza kwa Moabhe, iye ndi wakudzikuza kakamwe,
Ife tabva pya kugaya kwace na kudzikuza kwace, iye asakuzika ekhene mbagaya muntima mwace.”+
30 “‘Ine ndisadziwa kuti iye nkhabe nentsa kuipirwa,’ alonga Yahova.
‘Mbwenye mafalace akusowa basa nee anaphedza.
Anthu a ku Moabhe nkhabe cinafuna kucita iwo.
31 Na thangwi ineyi, ine ndinadzalira Moabhe,
Ndinadzalira thangwi ya dziko yonsene ya Moabhe,
Pontho ine ndinadzalira amuna a ku Kiri-Eresi.+
Nthawi zako zipswa zadidi zanumpha bara.
Izo zaenda mpaka ku bara, mpaka ku Yazeri.
Nyamalwa abwera mbafudza+
Misapo yako ya malimwe na mauva ako adatcoda iwe.
33 Kutsandzaya na kukhuwa mwakukomerwa kwamala mʼmunda wa misapo,
Na mu dziko ya Moabhe.+
Ine ndacitisa kuti vinyu iume pa mbuto yakukamulira mauva.
Nkhabebve munthu anafuna kudzakhuwa mwakutsandzaya mu ndzidzi unaponda-ponda iye mauva toera kuakamula.
Kunadzabveka kukhuwa, mbwenye tayu kwakutsandzaya.’”+
34 “‘Ku Esibhoni+ kusabveka kukhuwa kwa anthu mpaka kubveka ku Eleale.+
Iwo asakhuwa mpaka kubveka ku Yaazi,+
Kutomera ku Zoari asabveka ku Oronaimu+ mpaka kubveka ku Egilati-Selesiya.
Madzi a mu nkulo wa Nimirimu amala kupwa.+
35 Yahova alonga: ‘Ine ndinadzamalisa ku Moabhe,’
‘Ale anapereka ntsembe mu mbuto zinalambira iwo,
Na ale anapereka ntsembe kuna alungu awo.
36 Na thangwi ineyi, ntima wanga unadzalira ninga citoliro* thangwi ya Moabhe,+
Pontho ntima wanga unadzalira ninga citoliro thangwi ya anthu a ku Kiri-Eresi.
Thangwi mpfuma idagumanya iwo inadzamala.
37 Thangwi misolo yonsene yamala kucingwa mpala,+
Ndebvu zonsene zamala kucingwa.
38 “‘Thangwi pantsoi pa nyumba zonsene za ku Moabhe,
Na pa mbuto zawo zonsene zapakweca,
Basi ene pasabveka kulira kwa anthu.
Thangwi ine ndanyedza-nyedza Moabhe,
Ninga combo cinatayiwa kutali,’ alonga Yahova.
39 ‘Iye ali kugopa kakamwe! Lirani!
Moabhe abwerera nduli mbapasika manyadzo!
Iye adzakhala cinthu cakuthema kusingirirwa,
Cinthu cakugopesa kuna onsene ali nʼkhundu mwace.’”
40 “Thangwi ipi ndi pidalonga Yahova:
‘Bveserani! Ninga nkhwazi isabira mʼmadzi toera kuphata cakudya cace,+
Nyamalwa anadzafuthula maphapido ace toera kuphata Moabhe.+
41 Mizinda inadzakundwa,
Pontho mbuto zawo zakuwanga zinadzakundwa.
Pa ntsiku ineyi mitima ya anyankhondo a ku Moabhe,
Inadzakhala ninga mitima ya akazi mu ndzidzi wakubala.’”
42 “‘Anthu a ku Moabhe anadzafudzwa mbasiya kukhala mbumba,+
Thangwi iwo akuzika okhene pamaso pa Yahova.+
43 Imwe anthu a ku Moabhe,
Kugopa, djenje na nsampha pisakudikhirani,’ alonga Yahova.
44 ‘Ule anafuna kuthawa thangwi yakugopa, anadzagwa nʼdjenje,
Ule anafuna kubuluka nʼdjenje anadzamangwa na nsampha.’
‘Thangwi ine ndinadzatcunyusa Moabhe pa caka cidasankhula ine,’ alonga Yahova.
45 ‘Anyakuthawa anadzaneta mbalimira pa nʼthundzi wa Esibhoni.
Ku Esibhoni kunadzabuluka moto,
Pontho pakati pa nzinda wa Sihoni panadzabuluka malirimi a moto.+
Wakuti unadzapisa nkhope ya Moabhe,
Na madudu a misolo ya anyankhondo a ukali.’+
46 ‘Dzedze kuna iwe Moabhe!
Mbumba ya mulungu Kemosi+ yafudzwa.
Thangwi anako amuna akwatwa mbaendeswa ku ubitcu,
Pontho anako akazi aenda ku ubitcu.+
47 Mbwenye mu ntsiku zakumalisa, ine ndinadzagumanya mbumba ya Moabhe idaendeswa ku ubitcu,’ alonga Yahova.
‘Mphangwa za kutongwa kwa Moabhe zamalira pano.’”+
49 Ipi ndi pidalonga Yahova thangwi ya dzindza ya Amoni:+
“Kodi Izraeli nkhabe ana?
Kodi iye nee ali na nyakutambira unthaka?
Mphapo thangwi yanji Malkamu+ akwata cisa ca dzindza ya Gadhi?+
Thangwi yanji mbumba yace isakhala mʼmizinda ya mbumba ya Izraeli?”
2 “‘Natenepa ziri kufika ntsiku,’ alonga Yahova,
‘Zakuti ndinadzaliza nyanga ninga cidzindikiro ca nkhondo ku Rabha+ nzinda wa Aamoni.+
Iwo unadzasala madembe na wakusowa anthu,
Pontho pisa pya nʼkhundu mwace pinadzapiswa na moto.’
‘Izraeli anadzatapata ale adaatapata,’+ alonga Yahova.
3 ‘Lirani imwe anthu a ku Esibhoni, thangwi nzinda wa Ai wafudzwa!
Khuwani imwe pisa piri nʼkhundu mwa Rabha.
Pontho bvalani masakha.
Lirani mbamuthamanga uku na uku pakati pa mathanga a miyala,
Thangwi Malkamu anadzaendeswa ku ubitcu,
Pabodzi na anyantsembe ace na akulu-akulu ace.+
4 Imwe mbumba yakukhonda kukhulupirika,
Thangwi yanji musagaya na magowa anu, thangwi ya pisa pyanu pyakusowa nthunda pyakuti pisathirirwa mwadidi?
Thangwi yanji musanyindira mpfuma zanu,
Mbamulonga kuti: “Mbani anafuna bwera kudzamenyana na ife?”’”
5 Yahova wa anyankhondo Mbuya Wankulu Kakamwe, alonga: “‘Ine ndinadzabweresa cinthu cakugopswa kakamwe kuna imwe.
Cinafuna kubuluka kuna anthu onsene ali nʼkhundu mwanu,
Imwe munadzabalaliswa konsene kwene,
Pontho nkhabe munthu anafuna kudzagumanya ale adathawa.’”
6 “‘Mbwenye buluka penepo, ine ndinadzagumanya mbumba ya Amoni idaendeswa ku ubitcu,’ alonga Yahova.”
7 Ipi ndi pidalonga Yahova wa anyankhondo thangwi ya Edhomi:
“Kodi ku Temani nkhabebve udziwisi?+
Kodi ale ali na luso yakubvesesa nkhabebve udziwisi?
Kodi udziwisi wawo wamala kubvunda?
8 Zungunukani, thawani!
Imwe anthu a ku Dhedhani, bisalani mʼmagowa akuzika!+
Thangwi ine ndinabweresera nyatwa Izau,
Ungakwana ndzidzi unafuna kuntcunyusa ine.
9 Anyakubvuna mauva mbadabwera kuna iwe,
Kodi iwo nee mbadasiya mauva toera ualokotere?
Mambava mbadabwera namasiku,
Kodi iwo nee mbadakwata basi ene pinafuna iwo?+
10 Mbwenye ine ndinadzatapata Izau.
Ndinadzapangiza pakweca mbuto zinabisala iye,
Toera akhonde kubisala.
11 Siyani ananu aumphawi mʼmanja mwanga,
Ine ndinadzaapulumusa,
Pontho azice anu anadzanyindira ine.”
12 Thangwi ipi ndi pidalonga Yahova: “Khala ale akuti nee atongwa kumwa ndiko ya ukali wanga anadzaimwa, kodi iwe unakhala tenepo nee kutcunyuswa? Iwe nee unasiyiwa tenepo nee kutcunyuswa, thangwi unadzaimwa.”+
13 Yahova alonga: “Thangwi ine ndadumbira mu dzina yanga kuti Bhozira anadzakhala cinthu cakugopesa,+ mbuto idathema kusingirirwa, mbuto idafudzwa ninga cipangizo ca mbuto idapaswa dzedze; pontho mizinda yace yonsene inadzakhala madembe kwenda na kwenda.”+
14 Ine ndabva mphangwa zidabuluka kuna Yahova,
Atumwa munthu toera akapange madzindza a anthu kuti:
15 “Ona! Ine ndakucitisa kukhala munthu wakusowa basa pakati pa madzindza a anthu,
Na wakupwazika pakati pa anthu.+
16 Yahova alonga, iwe unakhala mʼmphako za miyala,
Iwe unakhala paphiri yakulapha kakamwe,
Iwe wanyengezeka thangwi ya kukugopa kudacita anthu.
Pontho thangwi ya kudzikuza kwa ntima wako,
Maseze umange ntsandza yako padzulu kakamwe ninga capungu,
Ine ndinadzakutcitisa penepo.”
17 “Nzinda wa Edhomi unadzakhala cinthu cakugopesa.+ Pontho onsene anafuna kupita na kweneko, anadzauyangʼana mwakudzumatirwa, mbaimba ciruzwi thangwi ya nyatwa zace zonsene. 18 Ninga pidacitika mu ndzidzi udafudzwa nzinda wa Sodhoma na Gomora pabodzi na mizinda inango yacifupi na mizinda ineyi,”+ alonga Yahova, “nkhabe anafuna kudzakhala mwenemu, pontho nee munthu mʼbodzi anafuna kudzakhazikika mwenemu.+
19 “Onani, munthu anadzabwera toera kufudza mbuto zakudyesera pifuyo ninga nkhalamu+ yakuti iri kubuluka mʼmisitu yakupata ya nʼkhundu mwa Yordani, mbwenye mwakucimbiza ndinacitisa kuti athawe mbaenda kutali na iye.* Ndinadzansankhulira ntsogoleri adasankhulwa kale. Thangwi mbani adalandana na ine, pontho mbani anafuna kuthimbana na ine? Ndi nkumbizi upi wakuti anakwanisa kulimira pamaso panga?+ 20 Natenepa, imwe anthu, bveserani cisankhulo cidacita Yahova toera kutcunyusa anthu a ku Edhomi na pinafuna kucita iye toera kutcunyusa anthu a ku Temani:+
Mwakukhonda penula, anamabira anadzakwekwetwa mbaendeswa kutali.
Iye anadzafudza mbuto zawo zinadyesera iwo pifuyo thangwi ya iwo.+
21 Dziko yatekenyeka thangwi ya ntiti wa kugwa kwawo.
Kusabveka kulira kwa anthu!
Kukhuwa kwawo kusabveka mpaka ku Bara Yakufuira.+
22 Onani, ninga nkhwazi, iye anamburuka mbabira toera kuphata cakudya cace,+
Pontho anafuthula maphapido ace mbagudumira Bhozira,+
Pa ntsiku ineyi, mitima ya anyankhondo a ku Edhomi,
Inadzakhala ninga ntima wankazi mu ndzidzi wakubala.”
23 Mphangwa kuna Dhamasku:+
“Amati+ na Arpadhi apaswa manyadzo,
Thangwi ya mphangwa zakuipa zidabva iwo.
Iwo ali kutetemera thangwi yakugopa.
Mʼbara muli na mabimbi, pontho nkhabe anakwanisa kuipfulikisa.
24 Dhamasku aluza cipapo.
Iye azungunuka toera kuthawa, mbwenye akundwa na kugopa.
Iye ali kuthabuka na nyatwa na kubva kupha,
Ninga pinacitika na nkazi mu ndzidzi wakubala.
25 Thangwi yanji nzinda wakuti usasimbwa, pontho wakuti anthu akakhala mwenemo akhatsandzaya,
Usapitiriza kukhala na anthu?
26 Thangwi aphale awo anadzaphiwa mu mbuto zapakweca,
Pontho anyankhondo awo anadzafa pa ntsiku ineyi,” alonga Yahova wa anyankhondo.
27 “Mpanda wa ku Dhamasku ndinadzaupisa na moto,
Wakuti unadzapisambo nyumba za ndzulu zakuwanga za Bheni-Adhadhi.”+
28 Ipi ndi pidalonga Yahova thangwi ya Kedhari+ na maumambo a Azori, adakundwa na Nabhukodhonozore mambo wa ku Bhabhilonya:
“Lamukani, ndokoni ku Kedhari,
Fudzani anthu a Kumabulukiro a Dzuwa.
29 Kwatani misasa yawo na mikumbi ya pifuyo pyawo,
Nguwo za misasa yawo na pinthu pyawo pyonsene.
Kwatani makamelo awo,
Anthu anadzaakhuwira: ‘Pinthu pyakugopesa piri konsene kwene!’”
30 Yahova alonga: “Thawani, ndokoni kutali!
Imwe anthu anakhala ku Azori, bisalani mʼmagowa akuzika,
Thangwi Nabhukodhonozore mambo wa ku Bhabhilonya akhunganyika toera kukucitirani pyakuipa.
Pontho acita masasanyiro toera kukukundani.”
31 Yahova alonga: “Lamukani, ndokoni kamenyane na mbumba yakuti iri muntendere,
Pontho isakhala mwakutsidzikizika!
Kweneko nkhabe misuwo, nee mipiringanyo; pontho iwo asakhala okhene.
32 Makamelo awo anadzatapatwa,
Pifuyo pyawo pizinji pinadzakwatwa.
Ndinadzabalalisa mʼmakhundu onsene,
Ale anacinga ndebvu zawo mʼmaputu,+
Pontho ndinadzaabweresera nyatwa buluka mʼmakhundu onsene,” alonga Yahova.
33 “Azori inadzakhala dzimba ya anambwa a ntsanga,*
Inadzafudzwa, mbikhala madembe kwenda na kwenda.
Nkhabe anafuna kudzakhala mu dziko ineyi,
Pontho nee munthu mʼbodzi anafuna kudzakhazikika mwenemu.”
34 Pakutoma kwa utongi wa Zedhekiya,+ mambo wa ku Yuda, mprofeta Yeremiya atambira mafala awa a Yahova thangwi ya dziko ya Elami:+ 35 “Ipi ndi pidalonga Yahova wa anyankhondo: ‘Ine ndinadzakhumula uta wa Elami,+ wakuti ndi mphambvu yawo. 36 Ine ndinadzabweresa mphepo buluka mʼmakhundu manai a dziko toera kufudza Elami, pontho ine ndinadzaabalalisa konsene kwene. Aelami anafuna kubalaliswa anadzaenda kuna madzindza onsene.’”
37 “Ndinadzacitisa kuti anthu a ku Elami agope pamaso pa anyamalwa awo na pamaso pa ale anaasaka toera kuapha; pontho ndinadzaabweresera nyatwa yakuti ndi ukali wanga ukulu,” alonga Yahova. “Ndinadzatumiza supada kuna iwo, mpaka ndingamala kuafudza onsene.”
38 “Ndinadzaikha mpando wanga waumambo ku Elami,+ pontho ndinadzafudza mambo wawo na akulu-akulu awo,” alonga Yahova.
39 “Mbwenye kunkhomo kwa ntsiku zakumalisa, ine ndinadzagumanya mbumba ya ku Elami idaendeswa ku ubitcu,” alonga Yahova.
50 Awa ndi mafala a Yahova adalonga mprofeta Yeremiya thangwi ya Bhabhilonya,+ dziko ya Akaldheya:
2 “Longani, pontho dziwisani pakati pa madzindza a anthu.
Lamusani cidzindikiro, mbamulonga pyenepi.
Lekani kubisa cinthu!
Longani kuti: ‘Bhabhilonya akundwa.+
Bheli apaswa manyadzo.+
Merodhaki agopa.
Madzimunthu awo apaswa manyadzo.
Madzimunthu awo akunyanyasa* agopa.’
3 Thangwi kunkwiriro kwabuluka mbumba mbibwera kudzamenyana na iwo.+
Mbicitisa dziko yawo kukhala cinthu cakugopesa;
Nkhabebve munthu anakhala mwenemu.
Anthu na pinyama pyene pyamala kuthawa;
Iwo athawa.”
4 Yahova alonga: “Mu ntsiku zenezi na mu ndzidzi unoyu, anthu a ku Izraeli na a ku Yuda anadzabwera pabodzi pene.+ Iwo anadzalira mu ndzidzi unafamba iwo,+ pontho iwo anadzasaka pabodzi pene Yahova Mulungu wawo.+ 5 Iwo anadzabvundzisa njira yakuenda ku Sioni, pontho anadzayangʼana kukhundu ineyi,+ mbalonga: ‘Bwerani, tendeni tikhale akuphatana na Yahova mu cibverano cakwenda na kwenda, cakuti nee cinadzaduwalika.’+ 6 Mbumba yanga yadzakhala ninga nkumbi wa mabira adatayika.+ Akumbizi awo acitisa kuti iwo atayike.+ Iwo aakwata, mbaenda nawo ku mapiri, aandzendzesa mʼmapiri na nʼnthunda. Iwo aduwala mbuto yawo yakupuma. 7 Onsene anaagumana asaafudza,+ pontho anyamalwa awo alonga: ‘Ife nee tiri na mulando, thangwi iwo adawira Yahova, wakuti ndi mbuto yaulungami na cidikhiro ca ambuyawo, Yahova.’”
8 “Thawani mʼBhabhilonya,
Bulukani mu dziko ya Akaldheya,+
Khalani ninga mabira acimuna anatsogolera nkumbi.
9 Ine ndinadzacitisa kuti nsoka ubodzi wa madzindza amphambvu a ku dziko yakunkwiriro,
Ubwere kudzamenyana na Bhabhilonya.
Iwo anapakana mbabwera kudzamenyana naye;
Iye anadzakundwa na anthu adabuluka kunkwiriro.+
Mapswimo awo ndi ninga mapswimo a nyankhondo,
Akuti asasiya anyakubala akusowa ana;+
Pontho nee asakhwica cinafuna iwo kulasa.
10 Dziko ya Akaldheya inadzatapatwa.+
Pontho, onsene anafuna kuitapata anadzakwata pinthu pizinji,”+ alonga Yahova.
Mukhanumpha-numpha ninga mwanangʼombe wakuti ali ntsanga yakubithimira,
Pontho mukhalira ninga makavalo acimuna.
12 Mai wanu apaswa manyadzo.+
Ule adakubalani ali wakutsukwala.
Onani, iye nee ndi wakufunika kakamwe pakati pa madzindza,
Iye ndi ninga thando yakusowa madzi.+
13 Thangwi yakuipirwa kwa Yahova, dziko ya Bhabhilonya nee inadzakhala pontho na anthu;+
Iyo inadzakhala thando.+
Anthu onsene anafuna kupita na ku dziko ya Bhabhilonya anadzaiyangʼana mwakugopa,
Pontho, iwo anadzaimba ciruzwi thangwi ya nyatwa zonsene zidagwera dziko ineyi.+
14 Pakanani mbamubuluka mʼmakhundu onsene toera mubwere kudzamenyana na Bhabhilonya,
Imwe monsene munakunga mauta.
15 Khuwani mʼmakhundu onsene, pontho menyanani naye.
Iye aperekeka,
Mizati yace yagwa, pontho mipanda yace yamala kugomolwa,+
Thangwi ndi Yahova anabwezera.+
Mʼbwezereni,
Ncitirenimbo pidakucitirani iye.+
16 Mu dziko ya Bhabhilonya, phani munthu anabzwala mbeu.
Na ule anaphatisira sikeya pa ndzidzi wakubvuna.+
Mʼbodzi na mʼbodzi anadzabwerera kuna dzindza yace,
Pontho, mʼbodzi na mʼbodzi anadzathawa mbabwerera ku dziko yace thangwi yakugopa supada,+
17 “Mbumba ya Izraeli ndi ninga mabira adatayika.+ Ndi nkhalamu zidaabalalisa.+ Pakutoma, mambo wa ku Asirya aafudza;+ buluka penepo, Nabhukodhonozore mambo wa ku Bhabhilonya anyenyena magogodo awo.+ 18 Natenepa, ipi ndi pidalonga Yahova wa anyankhondo, Mulungu wa Izraeli: ‘Ine ndinadzatcunyusa mambo wa ku Bhabhilonya na dziko yace ninga mudatcunyusa ine mambo wa ku Asirya.+ 19 Ine ndinadzabweresa pontho Izraeli pa mbuto inadya iye thongwe,+ iye anadzadya thongwe ku Karmelo na ku Bhasani,+ anadzakhuta mʼmapiri a ku Efraimu+ na a ku Jiliyadhi.’”+
20 Yahova alonga: “Mu ntsiku zenezi na mu ndzidzi unoyu,
Madodo a Izraeli anadzasakwa,
Mbwenye nee anadzaoneka,
Pontho madawo a Yuda nee anadzagumanwa,
Thangwi ndinadzalekerera ale anafuna ine kusiya toera akhale na umaso.”+
21 Yahova alonga: “Ndoko kamenyane na dziko ya Merataimu. Kamenyane na anthu anakhala ku Pekodhe.+
Iwo mbaphiwe, pontho mbafudzwe onsene.”
“Cita pyonsene pidakupanga ine.
22 Mu dziko ineyi muli kubveka kukhuwa kwa anthu anamenya nkhondo,
Ndi kukundwa kukulu.
23 Martelo wakuti akhafudza anthu pa dziko yonsene yapantsi agwandwa, mbanyedzwa!+
Bhabhilonya adzakhala cinthu cakugopesa pakati pa madzindza a anthu!+
24 Iwe Bhabhilonya, ine ndakuteyera nsampha, mbumangwa,
Mbwenye nee waudzindikira.
Wagumanwa mbuphatwa,+
Thangwi iwe wasandukira Yahova.
25 Yahova afungula mbuto inakoyera iye pida pyace pya nkhondo,
Pontho anabulusamo pida pinaphatisira iye toera kupangiza kuipirwa kwace.+
Thangwi Yahova wa anyankhondo, Mbuya Wankulu Kakamwe ali na basa toera kuiphata,
Mu dziko ya Akaldheya.
26 Bwerani mudzamenyane na Bhabhilonya buluka mu mbuto zakutali.+
Fungulani pikwa pyace.+
Gumanyani pinthu pyace pidatapatwa ninga nkuku wa tirigu.
Nfudzeni onsene.+
Nee musafunika kusala munthu.
27 Phani mwenemu amuna onsene akuti ndi ninga ngʼombe zingʼono zimuna;+
Iwo asafunika kuenda kaphiwa.
Dzedze kwa iwo, thangwi yafika ntsiku yawo,
Ndzidzi wakutcunyuswa kwawo!
28 Isabveka fala ya anthu adathawa,
Ya ale adapulumuka ku dziko ya Bhabhilonya,
Toera adziwise ku Sioni pya kutcunyusa kwa Yahova Mulungu wathu,
Pya kutcunyusa kwace thangwi ya templo yace.+
29 Cemeresani anyamauta toera abwere kudzamenyana na Bhabhilonya,
Onsene anakunga mauta.+
Mbazungulire Bhabhilonya toera akhonde kuoneka munthu anafuna kuthawa.
Mʼbwezereni mwakubverana na pidacita iye.+
Ncitireni pinthu pibodzi pyene ninga pidacita iye.+
Thangwi iye acita pinthu mwakudzikuza kuna Yahova,
Wakucena wa Izraeli.+
30 Na thangwi ineyi, aphale ace anadzaphiwa mu mbuto zapakweca,+
Anyankhondo ace onsene anadzaphiwa pa ntsiku ineyi,” alonga Yahova.
31 Yahova wa anyankhondo, Mbuya Wankulu Kakamwe alonga: “Ona, ine ndine nyamalwa wako+ iwe nyakudzikuza,+
Thangwi isafunika kufika ntsiku yako, ndzidzi wakuti ine ndinadzakutcunyusa.
32 Iwe nyakudzikuza unadzagwegweduka, mbugwa,
Nkhabe kudzaoneka munthu anafuna kukulamusa.+
Ndinadzapisa mizinda yako na moto,
Moto unoyu unadzapisa pyonsene piri nʼkhundu mwako.”
33 Ipi ndi pidalonga Yahova wa anyankhondo:
“Mbumba ya Izraeli na mbumba ya Yuda zisapondererwa,
Anthu onsene adaaendesa ku ubitcu asapitiriza kuafungira.+
Iwo asakhonda kuasiya toera abuluke.+
34 Mbwenye Mpulumusi wawo ndi wamphambvu.+
Dzina yace ndi Yahova wa anyankhondo.+
Mwandimomwene iye anadzaabvunulira,+
Toera kupasa ntendere dziko yawo,+
Na kudzudzumisa anthu anakhala mu dziko ya Bhabhilonya.”+
35 “Akaldheya anadzaphiwa na supada,” alonga Yahova,
“Anthu anakhala mʼBhabhilonya, akulu-akulu awo, pabodzi na anyakudziwisa awo anadzaphiwa na supada.+
36 Supada inabwera toera kufudza aprofeta authambi, iwo anadzacita pinthu ninga madzemwa.
Supada inabwera toera kufudza anyankhondo awo, pontho iwo anadzagopa kakamwe.+
37 Supada inabwera toera kupha makavalo awo na kufudza ngolo zawo za nkhondo,
Inabwera toera kupha mbumba zakusiyana-siyana ziri pakati pawo,
Pontho iwo anadzagopa kakamwe mbakhala ninga akazi.+
Supada inabwera toera kufudza mpfuma zawo, pontho izo zinadzatapatwa.+
38 Madzi awo anadzapaswa dzedze, pontho iwo anadzauma.+
Thangwi iyo ndi dziko ya madzimunthu akusemwa,+
Iwo asacita pinthu ninga madzemwa thangwi ya masomphenya awo akugopesa.
39 Na thangwi ineyi, pinyama pya nʼthando pinadzakhala mu dziko ineyi pabodzi na pinyama pyakuti nkhabe kulira mwakugaluza,
Pontho mwenemu munadzakhala na mbalame zinacemerwa avestruji.+
Dziko ineyi cipo inadzakhala pontho na anthu,
Nkhabebve munthu anafuna kukhala mwenemu, kwenda na kwenda.”+
40 “Ninga pidacitika mu ndzidzi udafudza Mulungu Sodhoma na Gomora+ pabodzi na mizinda inango yacifupi na mizinda ineyi,+ nkhabebve anafuna kudzakhala mwenemu, pontho nee munthu mʼbodzi anafuna kudzakhazikika mwenemu,”+ alonga Yahova.
41 Onani, mbumba iri kubwera buluka kunkwiriro;
Mbumba ikulu pabodzi na amambo amphambvu+ anadzacemerwa, mbabwera,
Buluka ku mbuto zakutali kakamwe pa dziko yapantsi.+
42 Iwo ali na mauta pabodzi na mapswimo.+
Ndi akuuma ntima, pontho nkhabe kudzabvera munthu ntsisi.+
Kukhuwa kwawo ndi ninga kutitima kwa bara,+
Mu ndzidzi unabwera iwo padzulu pa makavalo awo.
Iwo anapakana toera kumenya nkhondo na imwe mbumba ya ku Bhabhilonya.+
Iye adzudzumika kakamwe,
Mbabva kupha ninga kunabva nkazi pakubala.
44 “Onani, munthu anadzabwera toera kufudza mbuto zakudyesera pifuyo ninga nkhalamu yakuti iri kubuluka mʼmisitu yakupata ya nʼkhundu mwa Yordani, mbwenye mwakucimbiza ndinaacitisa kuti athawe mbaenda kutali na iye. Ndinadzansankhulira ntsogoleri adasankhulwa kale.+ Thangwi mbani adalandana na ine, pontho mbani anafuna kuthimbana na ine? Ndi nkumbizi upi wakuti anakwanisa kulimira pamaso panga?+ 45 Natenepa, imwe anthu, bveserani cisankhulo cidacita Yahova toera kutcunyusa Bhabhilonya+ na pinafuna kucita iye toera kutcunyusa dziko ya Akaldheya.
Mwakukhonda penula, anamabira anadzakwekwetwa mbaendeswa kutali.
Iye anadzafudza mbuto zawo zinadyesera iwo pifuyo thangwi ya iwo.+
46 Dziko inadzatetemera thangwi ya nʼkhuwo wakukundwa kwa Bhabhilonya,
Kunadzabveka kukhuwa pakati pa madzindza a anthu.”+
51 Ipi ndi pidalonga Yahova:
2 Ine ndinadzatumiza ku Bhabhilonya anthu akuti anadzaabalalisa,
Iwo anadzaabalalisa, mbasiya dziko yawo yakusowa anthu;
Anadzaizungulira konsene kwene pa ntsiku ya nyatwa.+
3 Anyamauta mbaleke kukunga mauta awo.
Anyankhondo a ku Bhabhilonya nee anadzalamuka mbabvala pyakutsidzikiza diti pya utale.
Lekani kubvera ntsisi aphale awo.+
Fudzani anyankhondo awo onsene.
4 Iwo anadzaphiwa mu dziko ya Akaldheya,
Mbalaswa mʼmiseu yawo.+
5 Thangwi Izraeli na Yuda nee asiyiwa na Mulungu wawo, Yahova wa anyankhondo,+ iwo nee ndi ninga azice.
Mbwenye dziko yawo yadzala na mulando pamaso pa Wakucena wa Izraeli.
6 Thawani mʼBhabhilonya,
Pontho pulumusani umaso wanu.+
Lekani kuphiwa thangwi ya madawo ace.
Thangwi uno ndi ndzidzi toera Yahova antcunyuse.
Iye anadzamʼbwezera pidacita iye.+
7 Bhabhilonya asakhala ninga ndiko ya ouro mʼmanja mwa Yahova;
Iye aledzeresa dziko yonsene.
8 Mwakucimbiza, Bhabhilonya agwa, mbasala madembe.+
Lirani thangwi ya iye!+
Bweresani mafuta a bhalsamu toera kuwangisa utenda wace, panango iye anawanga.”
9 “Ife tayesera kukondza Bhabhilonya, mbwenye iye nee anakwanisa kukondzeka.
Nsiyeni ekhene, tendeni pyathu, mʼbodzi na mʼbodzi mbaende ku dziko yace.+
Thangwi mulando wace wafika mpaka kudzulu,
Wakwira mpaka mʼmakole.+
10 Yahova aticitira pinthu pyakulungama.+
Bwerani, tendeni tidziwise ku Sioni mabasa a Yahova Mulungu wathu.”+
11 “Nozani mapswimo,+ kwatani maxango.*
Yahova akulumiza amambo a ku Medhya toera kuenda kamenya nkhondo,+
Thangwi iye asafuna kufudza Bhabhilonya.
Yahova anadzantcunyusa, iye anadzantcunyusa thangwi ya templo yace.
12 Limirisani cidzindikiro+ ca nkhondo pa mpanda wa Bhabhilonya.
Thimizirani anyakuonera, ikhani anyakuonera pa mbuto zawo.
Khunganyani anthu anafuna kuabisalira.
Thangwi Yahova anyerezera kale pinafuna kuacitira iye,
Iye anadzacita pidapikira iye thangwi ya anthu a ku Bhabhilonya.”+
13 “Iwe nkazi anakhala padzulu pa madzi mazinji,+
Iwe wapfuma kakamwe,+
Mbwenye ndzidzi wako wakufudzwa wafika, kuwina kwako kwamala.+
14 Yahova wa anyankhondo adumbira mu dzina yace,
‘Ine ndinadzakudzadza na amuna, amuna azinji kakamwe ninga anyadzombe,
Iwo anadzakhuwa mwakutsandzaya, thangwi anadzakukunda.’+
15 Iye ndiye adacita dziko yapantsi na mphambvu zace,
Ule wakuti na udziwisi
wace acitisa dziko yapantsi kukhala yakuwanga,+
Wakuti na luso yace, acita kudzulu.+
16 Angacitisa kuti fala yace ibveke,
Madzi kudzulu asatekenyeka,
Iye asacitisa makole kukwira kudzulu kubulukira kunkhomo kwa dziko yapantsi.
Iye asacitisa kucetuma mu ndzidzi unabvumba madzi;
Pontho iye asacitisa mphepo kubuluka pa mbuto inaikoya iye.+
17 Anthu onsene asacita pinthu mwakusowa ndzeru na mwakusowa cidziwiso.
Amesiri onsene aluso anadzapasika manyadzo thangwi ya madzimunthu awo akusemwa;+
Thangwi madzimunthu awo a utale ndi akusowa basa;
Pontho madzimunthu anewa nkhabe umaso.+
18 Iwo ndi akusowa basa,+ pinthu pyakuti pyathema kusingirirwa.
Ntsiku yakufudzwa kwawo ingafika, iwo anadzazambazika.
19 Mbwenye Mulungu* wa Yakobe ndi wakusiyana na pinthu pyenepi,
Thangwi iye ndiye adacita pinthu pyonsene,
Pontho iye ndi ndodo ya unthaka wace.+
Dzina yace ndi Yahova wa anyankhondo.”+
20 “Iwe ndiwe ntcamu wanga, cida canga ca nkhondo,
Ine ndinaphatisira iwe toera kunyedza madzindza a anthu,
Mbandifudza maumambo.
21 Ine ndinaphatisira iwe toera kunyedza kavalo na ule anaifambisa.
Toera kunyedza ngolo ya nkhondo na ule anaitekenya.
22 Ine ndinaphatisira iwe toera kunyedza amuna na akazi.
Toera kunyedza ankhalamba na ana.
Toera kunyedza aphale na atsikana.
23 Ine ndinadzaphatisira iwe toera kunyedza nkumbizi na nkumbi wa pifuyo pyace.
Toera kunyedza nyakulima na pifuyo pinaphatisira iye toera kulima napyo.
Toera kunyedza atongi na akulu-akulu a utongi wawo.
24 Bhabhilonya na anthu onsene anakhala ku Kaldheya,
Ine ndinadzaabwezera pinthu pyonsene pyakuipa pidacita iwo ku Sioni pamaso panu,”+ alonga Yahova.
Ine ndinadzafuthula djanja yanga, mbandikuponya pantsi buluka padzulu pamwala ukulu,
Pontho ndinadzakucitisa kukhala phiri idamala kupiswa.”
26 “Anthu nkhabe kudzabulusa muna iwe mwala wapankhomo, peno mwala udaikhwa pantsi pakumanga nyumba,
Thangwi iwe unadzakhala madembe kwenda na kwenda,”+ alonga Yahova.
27 “Limirisani cidzindikiro mu dziko ineyi.+
Lizani nyanga pakati pa madzindza a anthu.
Sankhulani madzindza a anthu toera amenyane naye,
Cemeresani maumambo a ku Ararati,+ a ku Mini na a ku Asikenazi+ toera amenyane naye.
Nsankhulireni nyankhondo wakuti anasaka anyankhondo anango toera amenyane naye.
Bweresani makavalo ninga nkumbi wa anyadzombe angʼono.
28 Sankhulani madzindza a anthu toera amenyana naye,
Amambo a ku Medhya,+ atongi awo na akulu-akulu a utongi wawo,
Pabodzi na madziko onsene anatonga iwo.
29 Dziko inadzatetemera, mbitekenyeka,
Thangwi pinanyerezera Yahova toera kucitira Bhabhilonya pinadzacitika,
Toera kucitisa dziko ya Bhabhilonya kukhala cinthu cakugopesa, mbaisiya yakusowa anthu.+
30 Anyankhondo a ku Bhabhilonya asiya kumenya nkhondo.
Iwo akhala pantsi nʼnyumba zawo zakutsidzikizika,
Mbamala mphambvu.+
Iwo adzakhala ninga akazi.+
Nyumba zawo zapiswa na moto.
Mipiringanyo yawo yagwandwa-gwandwa.+
31 Nyakupereka mphangwa asathamanga toera kugumanikana na nyakupereka mphangwa unango,
Munthu adatumwa asathamanga toera kugumanikana na munthu unango adatumwa,
Toera kudziwisa mambo wa ku Bhabhilonya kuti nzinda wace wakundwa mʼmakhundu onsene,+
32 Kuti mbuto zinawambuka na anthu nkulo zafungwa,+
Kuti mabote a papiro amala kupiswa na moto,
Pontho kuti anyankhondo ali kugopa kakamwe.”
33 Thangwi ipi ndi pidalonga Yahova wa anyankhondo, Mulungu wa Izraeli:
“Bhabhilonya ndi ninga mbuto yakububudira tirigu.
Uli kufika ndzidzi wace toera apondwe mwamphambvu.
Mwakukhonda dembuka, ndzidzi wakubvunwa kwace unafika.”
34 “Nabhukodhonozore mambo wa ku Bhabhilonya andifudza;+
Iye andithabusa,
Mbandisiya ninga kopo yakusowa pinthu.
Ninga nyoka ikulu, iye andimeza;+
Adzadza mimba yace na pinthu pyanga pyadidi.
Iye andiponya kunja.
35 ‘Uphanga udacitirwa ine mbubwezerwe Bhabhilonya,’ alonga anthu anakhala ku Sioni.+
‘Mulando wa ciropa canga mbubwezerwe anthu anakhala ku Kaldheya,’ alonga Yerusalemu.”
36 Natenepa, ipi ndi pidalonga Yahova:
Ndinadzaumisa bara yace na micera yace.+
37 Bhabhilonya anadzakhala nkuku wa miyala,+
Ninga dzimba ya anambwa a ntsanga,*+
Cinthu cakuti munthu angaciona, anagopa mbaimba ciruzwi,
Dziko yakuti nkhabebve kudzakhala anthu.+
38 Onsene anadzalira ninga nkhalamu zipswa.
Anadzalira ninga ana a nkhalamu.”
39 “Iwo angadzakhala akudzikuza, ine ndinadzaakhunganyira phwando, mbandialedzeresa,
Toera iwo atsandzaye;+
Buluka penepo, iwo anadzagona citulo cakwenda na kwenda,
Citulo cakuti cipo anadzalamuka,”+ alonga Yahova.
40 “Ine ndinadzaapha ninga
mabira anaenda kaphiwa,
Ninga mabira na mabokho.”
Bhabhilonya adzakhala cinthu cakugopesa kuna madzindza a anthu!
42 Bara yaphafuka mbibiza Bhabhilonya.
Yamʼbiza na mabimbi ace mazinji.
43 Mizinda yace yadzakhala cinthu cakugopesa, dziko yakusowa madzi, yakuti ndi thando.
Dziko yakuti nkhabe anafuna kudzakhala mwenemu, pontho nee munthu mʼbodzi anafuna kudzapita na mwenemu.+
44 Ine ndinadzatcunyusa mulungu Bheli+ ku Bhabhilonya,
Mbandibulusa pamulomo pace pire pidameza iye.+
Madzindza a anthu nee anadzaendabve kuna iye,
Mpanda wa Bhabhilonya unadzagwa.+
45 Bulukani muna iye, imwe mbumba yanga!+
Pontho pulumusani umaso wanu,+ toera mukhonde kufudzwa na ukali wa Yahova unagaka ninga moto!+
46 Lekani kufewa manungo, pontho lekani kugopa thangwi ya mphangwa zinafuna imwe kubva mu dziko.
Pa caka zinafika mphangwa,
Pa caka cinatowera zinafika mphangwa zinango,
Mphangwa zauphanga mu dziko na za kumenyana kwa ntongi na ntongi ndzace.
47 Mbwenye ziri kufika ntsiku,
Zakuti ine ndinadzafudza madzimunthu onsene akusemwa a ku Bhabhilonya.
Dziko yawo yonsene inadzapaswa manyadzo,
Anthu onsene anafuna kuphiwa anadzagwa kweneko.+
48 Kudzulu, dziko yapantsi na pinthu ponsene piri mwenemu,
Pinadzakhuwa thangwi yakufudzwa kwa Bhabhilonya,+
Thangwi anyakufudza anafika kweneko buluka kunkwiriro,”+ alonga Yahova.
49 “Bhabhilonya nee apha anthu a ku Izraeli basi,+
Mbwenye anthu a pa dziko yonsene aphiwambo mʼBhabhilonya.
50 Imwe anafuna kupulumuka mbamukhonda kuphiwa na supada, pitirizani kufamba, lekani kulimira!+
Imwe muli kutali, kumbukani Yahova,
Pontho kumbukani Yerusalemu mʼmitima yanu.”+
51 “Ife tapasika manyadzo thangwi tabva mafala a kutikanwa kwathu.
Tiri na manyadzo kunkhope,
Thangwi anthu a madziko anango abwera kudzafudza mbuto zakucena za panyumba ya Yahova.”+
52 “Mbwenye ziri kufika ntsiku,” alonga Yahova,
“Zakuti ine ndinadzafudza madzimunthu awo akusemwa,
Pontho mu dziko yawo yonsene, ale adaphekeswa anadzabulira.”+
53 “Maseze Bhabhilonya akwire mpaka kudzulu,+
Maseze awangise kakamwe nyumba zace zikulu zakuwanga,
Anyakufudza anafuna kutumiza ine anafika kweneko,”+ alonga Yahova.
54 “Bveserani, ku Bhabhilonya kusabveka kukhuwa kwa anthu,+
Ku dziko ya Akaldheya kusabveka kukhuwa thangwi yakuphiwa kwa anthu azinji,+
55 Thangwi Yahova anadzafudza Bhabhilonya,
Iye anadzamatamisa fala yace ikulu,
Anyamalwa ace anadzabveka ninga kutitima kwa mabimbi a mʼbara.
Pontho anthu anadzabva mafala awo.
56 Nyakufudza anabwera ku Bhabhilonya;+
Anyankhondo ace anadzaphatwa,+
Mauta awo anadzakhumulwa,
Thangwi Yahova ndi Mulungu wakubwezera.+
Mwakukhonda penula, iye anadzabwezera.+
57 Ndinadzaledzeresa akulu-akulu ace na anyakudziwisa ace,+
Atongi ace, akulu-akulu a utongi wace, na anyankhondo ace,
Pontho iwo anadzagona citulo cakwenda na kwenda,
Citulo cakuti cipo anadzalamuka,”+ alonga Mambo wakuti dzina yace ndi Yahova wa anyankhondo.
58 Natenepa, ipi ndi pidalonga Yahova wa anyankhondo:
“Maseze mpanda wa Bhabhilonya ndi wamphindza kakamwe, iwo unadzagomolwa onsene,+
Maseze misuwo yace ndi yakulapha, iyo inadzapiswa na moto.
Anthu anadzaphata basa mwakuwanga, mbwenye inadzakhala yapezi;
Madzindza a anthu anadzaphata basa yakunetesa, mbwenye inadzapiswa na moto.”+
59 Uyu ndi ntemo udapereka mprofeta Yeremiya kuna Seraya mwana wa Neriya,+ ndzukulu wa Maseya, pidaenda iye ku Bhabhilonya na Zedhekiya mambo wa ku Yuda pa caka cacinai ca utongi wace; Seraya akhali mʼbodzi wa akulu akhayangʼanira pinthu pya mambo. 60 Yeremiya alemba mʼbukhu nyatwa zonsene zikhafuna kugwera Bhabhilonya, mafala anewa onsene adalembwa thangwi ya Bhabhilonya. 61 Kusiyapo pyenepi, Yeremiya apanga Seraya: “Mu ndzidzi unafika iwe kwene ku Bhabhilonya, mbuona nzinda unoyu, usafunika kuleri mwakugaluza mafala anewa. 62 Pontho usafunika kulonga kuti: ‘Yahova, imwe mwalonga kuti nzinda uno unadzafudzwa, mbusiyiwa wakusowa anthu, iwo nee unadzakhala na anthu, nee pinyama; pontho iwo unadzakhala madembe kwenda na kwenda.’+ 63 Ungamala kuleri bukhu ineyi, imangire mwala, mbuiponya mu nkulo wa Eufrate. 64 Buluka penepo, usafunika kulonga kuti: ‘Bhabhilonya anadzalirima tenepo, iye cipo anadzaoneka pontho,+ thangwi ya nyatwa zinafuna kumʼbweresera ine, iwo anadzaneta.’”+
Mafala a Yeremiya amalira pano.
52 Zedhekiya+ akhali na pyaka 21 pyakubalwa pidatoma iye kutonga ninga mambo, pontho iye atonga pyaka 11 mu Yerusalemu. Mai wace akhacemerwa Amutali+ mwana wa Yeremiya wa ku Libhina. 2 Iye apitiriza kucita pinthu pyakuipa pamaso pa Yahova, mwakubverana na pyonsene pidacita Yeowakimu.+ 3 Pinthu pyenepi pyacitika ku Yerusalemu na ku Yuda, thangwi Yahova akhadaipirwa, pontho pakumalisa iye aathamangisa pamaso pace.+ Buluka penepo, Zedhekiya asandukira mambo wa ku Bhabhilonya.+ 4 Pa caka cacipfemba ca utongi wa Zedhekiya, pa ntsiku yacikhumi ya mwezi wacikhumi, Nabhukodhonozore Mambo wa ku Bhabhilonya pabodzi na anyankhondo ace onsene abwera toera kudzamenyana na Yerusalemu. Iwo amanga misasa toera kumenyana na nzinda unoyu, amanga mpanda mbazungulira nzinda onsene.+ 5 Pontho nzinda wapitiriza kuzungulirwa mpaka pa caka 11 ca utongi wa mambo Zedhekiya.
6 Pa ntsiku yacipfemba ya mwezi wacinai,+ njala ikhadakula kakamwe mu nzinda, pontho anthu nee akhali na cakudya mu dziko ineyi.+ 7 Pakumalisa, pa mpanda wa nzinda pafungulwa benga, pontho anyankhondo onsene athawa mu nzinda namasiku, iwo apita na pansuwo ukulu ukhali pakati pa mipanda miwiri dhuzi na munda wa mambo,* mbaenda na njira ya ku Arabha+ mu ndzidzi wakuti Akaldheya akhazungulira nzinda. 8 Mbwenye anyankhondo a Akaldheya atowerera mambo Zedhekiya+ mbanʼgumana kuthando ya Yeriko, pontho anyankhondo ace onsene abalalika. 9 Penepo iwo aphata mambo mbaenda naye kuna mambo wa ku Bhabhilonya ku Ribhila, ku dziko ya Amati, pontho ndi kweneko kudantonga iye kuti asafunika kucitwanji. 10 Mambo wa ku Bhabhilonya apha ana a Zedhekiya pamaso pace, pontho aphambo akulu-akulu onsene a ku Yuda, ku Ribhila. 11 Buluka penepo, mambo wa ku Bhabhilonya aswa maso a Zedhekiya,+ amʼmanga na maunyolo a nkuwa mbaenda naye ku Bhabhilonya, anfungira kweneko mpaka pa ntsiku idafa iye.
12 Pa mwezi wacixanu, pa ntsiku khumi ya mwezi unoyu, ceneci cikhali caka 19 ca utongi wa Nabhukodhonozore mambo wa ku Bhabhilonya, Nebhuzaradhani nkulu wa anyakuonera, wakuti akhali ntumiki wa mambo wa ku Bhabhilonya, afika ku Yerusalemu.+ 13 Iye apisa nyumba ya Yahova,+ nyumba ya mambo na nyumba zonsene za mu Yerusalemu, iye apisambo nyumba zonsene zikulu. 14 Pontho mpanda onsene wa Yerusalemu wagwiswa na anyankhondo a Akaldheya akuti akhali pabodzi na nkulu wa anyakuonera.+
15 Nebhuzaradhani nkulu wa anyakuonera akwata pakati pa mbumba anthu angasi akupwazika mbaendesa ku ubitcu pabodzi na anthu anango akuti akhadasiyiwa mu nzinda. Iye akwatambo ale adathawa mbaenda kukhundu ya mambo wa ku Bhabhilonya, kuphatanizambo amesiri aluso akhadasala.+ 16 Mbwenye Nebhuzaradhani nkulu wa anyakuonera asiya anthu angasi akutcerenga kakamwe pakati pa mbumba ya dziko ineyi toera aphate basa mʼminda ya mauva, pontho toera akhale anyakuphata basa mwakukakamizwa.+
17 Akaldheya agwanda-gwanda mizati ya nkuwa+ ya panyumba ya Yahova, ngolo,+ Tanki ya madzi ya panyumba ya Yahova yakuti ikhacemerwa Bara ya nkuwa,+ pontho iwo akwata nkuwa onsene mbaenda nawo ku Bhabhilonya.+ 18 Iwo akwatambo pyakubulusa napyo dotha, mafoxolo, pyakuthimisa napyo moto, mabasiya,+ makhomitco+ na pyombo pyonsene pya nkuwa pyakuti pikhaphatisirwa mu templo. 19 Nkulu wa anyakuonera akwata mabasiya,+ pyakupalira moto, mbale, pyombo, pyakuikhira nyale,+ makhomitco, mbale za ouro yadidi kakamwe na za parata yadidi kakamwe.+ 20 Mbwenye nkuwa wa mizati miwiri, Tanki ya madzi, ngʼombe 12 za nkuwa+ zikhali pantsi pa Tanki ya madzi, na ngolo zidacita Mambo Salomoni toera ziphatisirwe panyumba ya Yahova, nee akwanisa kupima kulemera kwa nkuwa wa pinthu pyenepi.
21 Mbwenye nzati ubodzi na ubodzi ukhali na makhono 18 a cengo, pontho nkhambala yakupima nayo ya makhono* 12 mbidakwana toera kuzungulira nzati ubodzi,+ mphindza ya nzati wakutoma ikhali ya pyala pinai, nkati mwace nee mukhali na pinthu. 22 Cakubalikisa cikhali padzulu pa nzati cikhali ca nkuwa, cakubalikisa ceneci cikhali na makhono maxanu a cengo,+ pontho pinthu pyakulandana na malitcera na pyakulandana na misapo ya romaa pyakuti pikhali nʼkhundu monsene mwa cakubalikisa, pyonsene pikhadacitwa na nkuwa. Nzati waciwiri ukhali sawasawa na wakutoma, pontho ukhalimbo na pinthu pyakulandana na misapo ya romaa. 23 Nʼkhundu mwa nzati mukhali na pinthu pyakulandana na misapo ya romaa pyakukwana 96, pinthu pyonsene pyakulandana na misapo ya romaa pyakuti pikhali nʼkhundu mwa pinthu pidalandana na malitcera pikhali 100.+
24 Nkulu wa anyakuonera akwatambo Seraya+ nkulu wa anyantsembe, Sofoniya+ wakuti ndi nyantsembe waciwiri, na anyakuonera nsuwo atatu.+ 25 Iye akwata mu nzinda unoyu nkulu mʼbodzi wa utongi wakuti akhali ntsogoleri wa anyankhondo, akwata anyakupereka uphungu anomwe a mambo akuti akhali mu nzinda, kuphatanizambo mulembi wankulu wa anyankhondo wakuti akhalembera anthu a mu dziko ineyi toera akhale anyankhondo, na amuna 60 pakati pa mbumba ya dziko ineyi akuti akhadzati kubuluka mu nzinda. 26 Nebhuzaradhani nkulu wa anyakuonera aakwata mbaenda nawo ku Ribhila kuna mambo wa ku Bhabhilonya. 27 Mambo wa ku Bhabhilonya aapha ku Ribhila+ mu dziko ya Amati. Natenepa, Ayuda abuluswa mu dziko yawo mbaendeswa ku ubitcu.+
28 Iyi ndi numero ya anthu adakwatwa na Nabhukodhonozore mbaenda nawo ku ubitcu pa caka cacinomwe ca utongi wace, Ayuda akukwana 3.023.+
29 Pa caka 18 ca utongi wa Nabhukodhonozore,+ anthu akukwana 832 akwatwa mu Yerusalemu.
30 Pa caka 23 ca utongi wa Nabhukodhonozore, Nebhuzaradhani nkulu wa anyakuonera akwata Ayuda akukwana 745 mbaenda nawo ku ubitcu.+
Anthu onsene adaendeswa ku ubitcu akhali 4.600.
31 Pa caka 37 ca ubitcu wa Yeowakimu mambo+ wa ku Yuda, pa ntsiku 25 ya mwezi 12, pa caka cidakhazikiswa Evili-Merodhaki ninga mambo wa ku Bhabhilonya, iye asudzula Yeowakimu mambo wa ku Yuda, mbamʼbulusa nkaidi.+ 32 Iye alonga naye mwadidi, pontho ampasa cidzo cikulu kupiringana amambo anango akhali na iye ku Bhabhilonya. 33 Natenepa Yeowakimu adula nguwo zace zikhabvala iye ninga nyankaidi, pontho iye akhadya na mambo ntsiku zonsene mpaka kufa kwace. 34 Ntsiku zonsene iye akhapaswa cakudya na mambo wa ku Bhabhilonya, mu ntsiku zonsene za umaso wace mpaka pa ntsiku idafa iye.
Panango dzina ineyi isabveka “Yahova Asakuza.”
Peno: “ndakusankhula.”
Peno: “Ine ndakuikha kale pakhundu.”
Fala na Fala: “mbudzati kubuluka mʼmimba mwa mai wako.”
Peno: “Leka kugopa nkhope zawo.”
Peno: “cikalango ca mulomo ukulu.”
Fala na Fala: “kupepeserwa,” pyenepi pisapangiza kuti moto uli pantsi pa cikalango ceneci uli kupepeserwa.
Peno: “ntsembe zakupiswa.”
Panango aikumba pa miyala.
Peno: “Mefi.”
Peno: “zadya.”
Nkulo unoyu wagawika mu nkulo wa Nilo.
Peno: “alungu.”
Peno: “zakukhonda kulengeseka.”
Munjira inango: “ndadzakhala mamunanu.”
Peno: “mulungu wakupasa manyadzo.”
Peno: “Limani.”
Fala na Fala: “Sidzikani.”
Peno: “muti wa cidzindikiro.”
Peno: “anadzafewa manungo.”
Peno: “mu ndzidzi wakuti tiri dhuzi toera kuphiwa na supada.”
Fala na Fala: “mwana wankazi wa mbumba yanga.”
Munjira inango: “nʼkhuwo wa nkhondo.”
Peno: “Ine nee ndinatsumbikika.”
Peno: “nguwo zakufuirira.”
Fala na Fala: “aumisa kakamwe nkhope zawo.”
Fala na Fala: “njira ya.”
Pyenepi pisabveka, iwo asiya kubvera Mulungu.
Fala na Fala: “Aprofeta adzala na mphepo.”
Pyenepi pisabveka, mbakhale akusowa basa, ninga mafala awo akusowa basa.
Peno: “mwana adaferwa na pai.”
Fala na Fala: “Mwana wankazi.”
Peno: “Pyonsene piri mwadidi! Pyonsene piri mwadidi!”
Peno: “Mu ndzidzi wakuti pinthu nee piri mwadidi.”
Peno: “cipfundziso canga.”
Unoyu ndi muti wakununkhira.
Fala na Fala: “mwana wankazi.”
Fala na Fala: “njira yawo.”
Fala na Fala: “njira zanu.”
Peno: “ana adaferwa na ababawo.”
Peno: “akazi adaferwa na amunawo.”
Ineyi ndi dzina ya mulungu wankazi wakuti akhalambirwa na Aizraeli akukhonda kukhulupirika, pisaoneka kuti iwo akhalonga kuti mulungu unoyu ndiye anacitisa akazi kubala.
Peno: “kutsukwalisa; kusosa.”
Fala na Fala: “ntsiku zonsene ndikhalamuka namacibese, mbandiatuma.”
Peno: “tsisi yakuti nee ikhacingwa.”
Peno: “zapadzulu.”
Onani Mabvekero a Mafala Anango, “Djehena.”
Onani Mabvekero a Mafala Anango, “Djehena.”
Fala na Fala: “anyankhondo onsene akudzulu.”
Peno: “mbwenye iwo nee akhalonga munjira yadidi.”
Peno: “ndzidzi udakhazikiswa.”
Fala na Fala: “Mwana wankazi wa mbumba yanga asakhuwa.”
Peno: “asaipisa makhaliro a anango.”
Fala na Fala: “iwo asanyerezera kubisalira andzawo toera kuacita pyakuipa.”
Peno: “citsogolero canga cidaapasa ine.”
Fala na Fala: “ndinadzatumiza supada.”
Peno: “Lekani kupfundza.”
Peno: “ninga mbuto inabisala anambwa a ntsanga.”
Peno: “nkhabe luso yakutsogolera; nkhabe kwanisa kutsogolera.”
Fala na Fala: “apha Yakobe.”
Fala na Fala: “ndikhalamuka namacibese mbandiacenjeza.”
Peno: “ntsembe zakupiswa.”
Peno: “mulungu wakupasa manyadzo.”
Peno: “mabvero.”
Peno: “mbwenye mabvero awo a nkati kakamwe.”
Peno: “malemba.”
Peno: “tsanga iwisi.”
Munjira inango: “kubwerera nduli.”
Peno: “unthaka wapezi.”
Onani Mabvekero a Mafala Anango.
Munjira inango: “Thangwi ninga moto, imwe mwagaka mu ukali wanga.”
Peno: “usanyengerera.”
Munjira inango: “wakukhonda kukondzeka.”
Fala na Fala: “misapo ya mabasace.”
Fala na Fala: “nsuwo ukulu wa ana a mbumba.”
Fala na Fala: “makutu awo anadzagadzika.”
Fala na Fala: “anyankhondo onsene akudzulu.”
Peno: “nkazi adaferwa na mamunace.”
Peno: “nyakutambira unthaka.”
Peno: “dziko yapantsi.”
Peno: “yakuphuruza.”
Peno: “Iwo asakupasani cidikhiro capezi.”
Peno: “mphangwa zakulemera.” Mucihebheri fala ineyi iri na mabvekero mawiri: “Mphangwa zakulemera za Mulungu” peno “cinthu cakulemera.”
Peno: “mphangwa zakulemera za.”
Peno: “ngʼoma zanu zingʼono.”
Peno: “Iye anadzaaonera ninga nkumbizi anaonera.”
Peno: “mabvero anga.”
Peno: “citulo canga cikhadakoma kakamwe.”
Fala na Fala: “mbwenye mano a anawo ndiwo adazirizwa.”
Munjira inango: “mamunawo.”
Siklo ibodzi ikhalemera magrama 11,4. Onani Apendise B14.
Peno: “asaona njira zonsene za.”
Peno: “njira zace.”
Peno: “undimomwene.”
Peno: “nyakutambira unthaka.”
Peno: “dziko yapantsi.”
Fala na Fala: “anyankhondo akudzulu.”
Peno: “mu mpukutu.”
Kutomera pakati pa mwezi wa Novembro mpaka pakati pa mwezi wa Dezembro. Onani Apendise B15.
Peno: “mu ndzidzi wa khoni.”
Peno: “nkulu wa anyakulotera (nyakulotera anaphatisira nyenyezi.)”
Peno: “munda wa maluwa.”
Munjira inango: “mbuto ikulu inakoyerwa madzi.”
Peno: “mungaenda kakhala kweneko mu ntsiku zingasi.”
Peno: “matijolo.”
Peno: “matemplo a.”
Peno: “nee kuphekeswa.”
Peno: “Nyumba (Templo) ya Dzuwa.”
Peno: “matemplo a.”
Peno: “Mefi.”
Ineyi ndi dzina ya mulungu wankazi wakuti akhalambirwa na Aizraeli akukhonda kukhulupirika. Pisaoneka kuti iwo akhalonga kuti mulungu unoyu ndiye anacitisa akazi kubala.
Ineyi ndi dzina ya mulungu wankazi wakuti akhalambirwa na Aizraeli akukhonda kukhulupirika. Pisaoneka kuti iwo akhalonga kuti mulungu unoyu ndiye anacitisa akazi kubala.
Ineyi ndi dzina ya mulungu wankazi wakuti akhalambirwa na Aizraeli akukhonda kukhulupirika. Pisaoneka kuti iwo akhalonga kuti mulungu unoyu ndiye anacitisa akazi kubala.
Ineyi ndi dzina ya mulungu wankazi wakuti akhalambirwa na Aizraeli akukhonda kukhulupirika. Pisaoneka kuti iwo akhalonga kuti mulungu unoyu ndiye anacitisa akazi kubala.
Peno: “ine nkhabe ndzidzi wakupuma.”
Peno: “ine ndinadzakupasa umaso wako ninga muoni.”
Peno: “Mefi.”
Peno: “Mefi.”
Munjira inango: “unadzakhala thando.”
Nzinda unoyu usadziwikambo na dzina ya Tebha.
Peno: “Ndinadzakusandika.”
Peno: “manja awo anadzafewa.”
Ntsuwa ineyi ndi Kreta.
Pyenepi pisabveka, iwo anadzacinga mpala toera kupangiza kuti ali kutsukwala thangwi yakuferwa na kupasika manyadzo.
Peno: “flauta.” Citoliro ceneci cisaimbwa ninga cidzindikiro toera kupangiza kutsukwala pakuikha munthu munthumbi.
Unoyu ndi Edhomi.
Pisaoneka kuti ineyi ndi dziko ya Edhomi.
Peno: “mbuto inabisalira anambwa a ntsanga.”
Fala ineyi Mucihebheri panango isaphatisirwa toera kulonga pya “matubzwi a pinyama,” pontho isapangiza kupwaza.
Pisaoneka kuti ineyi ndi dzina yakubisika ya Akaldheya.
Munjira inango: “dzadzani mabudu akuikhira mapswimo.”
Fala na Fala: “Unthaka.”
Peno: “mbuto inabisalira anambwa a ntsanga.”
Peno: “munda wa maluwa wa mambo.”
Khono ibodzi ndi masentimetru 44 na hafu. Onani Apendise B14.