Sani di wi no musu du te wi e studeri Bijbel nanga sma

No taki tumusi furu: No denki taki yu musu fruklari ala sani. Yesus ben poti aksi gi den sma fu meki den denki fu wan tori, so taki den srefi ben kan feni a yoisti piki (Mt 17:24-27). Te yu e poti aksi gi wan sma, dan a tori di unu e studeri e kon moro span èn yu o kon sabi san a sma e frustan èn san a e bribi (be 253 ¶3, 4). Te yu poti wan aksi, dan yu musu abi pasensi èn wakti teleki a sma gi a piki. Efu a sma gi wan piki di no bun, dan yu no abi fu gi en a yoisti piki wantewante. Poti moro aksi gi en fu yepi en fu feni a yoisti piki (be 238 ¶1, 2). No taki tumusi esi, ma taki na so wan fasi taki a studenti e frustan den nyun sani di a e leri.​—be 230 ¶4.

No meki sani kon moro muilek: Awinsi yu sabi moro fu wan tori, toku yu no abi fu fruteri a sma ala sani wantewante (Yoh 16:12). Poti prakseri na den moro prenspari sani fu a paragraaf (be 226 ¶4-227 ¶1). No fruteri a sma ala sortu finifini tori, awinsi yu feni den tori dati moi. Efu yu e du disi, dan a kan taki a sma no o memre den moro prenspari pisi fu a tori (be 235 ¶3). Efu a sma frustan wan tori, dan go na a tra paragraaf.

No leri a sma soso san skrifi na ini a buku: Wi wani doro na ati fu a sma, wi no wani leri en nomo san skrifi na ini a buku (Lu 24:32). Poti prakseri na den prenspari Bijbeltekst. Na so Gado Wortu o abi krakti na tapu a sma (2Kor 10:4; Heb 4:12; be 144 ¶1-3). Gebroiki makriki agersitori (be 245 ¶2-4). Luku sortu problema a sma abi èn san a e bribi, dan gebroiki den sani na ini a les fu yepi en fu tyari kenki kon. Yu kan aksi en: „Fa yu e denki fu a sani di yu leri dya?” „San disi e leri yu fu Yehovah?” „Sortu wini yu denki taki yu o kisi te yu e du san skrifi dya?”​—be 238 ¶3-5; 259 ¶2.