AHENE NHOMA A ƐTO SO ABIEN

1 Ahab wu akyi no, Moab+ tew atua tiaa Israel.

2 Saa bere no, Ahasia fi ne fi a ɛwɔ Samaria no atifi dan mu bɛhwee fam, na opirae. Enti ɔsomaa nkurɔfo, na ɔka kyerɛɛ wɔn sɛ: “Monkɔ Ekron+ nyame Baal-Sebub hɔ nkobisa mma me sɛ opira a mapira yi, mɛsan anya ahoɔden anaa.”+ 3 Nanso Yehowa bɔfo ka kyerɛɛ Tisbini Elia*+ sɛ: “Sɔre kohyia nkurɔfo a Samaria hene asoma wɔn no, na ka kyerɛ wɔn sɛ, ‘Onyankopɔn nni Israel nti na morekɔ Ekron nyame Baal-Sebub hɔ abisa yi?+ 4 Enti nea Yehowa aka ni: “Mpa a woda so no, worensi mfi so, efisɛ owu na wubewu.”’” Ɛnna Elia fii hɔ kɔe.

5 Bere a nkurɔfo a ɔsomaa wɔn no san baa ne nkyɛn no, ɛhɔ ara na obisaa wɔn sɛ: “Adɛn nti na moasan aba?” 6 Na wɔka kyerɛɛ no sɛ: “Ɔbarima bi behyiaa yɛn, na ɔka kyerɛɛ yɛn sɛ, ‘Monsan nkɔ ɔhene a ɔsomaa mo no nkyɛn, na monkɔka nkyerɛ no sɛ, “Nea Yehowa aka ni: ‘Onyankopɔn nni Israel nti na morekɔ Ekron nyame Baal-Sebub hɔ abisa yi? Eyi nti mpa a woda so no, worensi mfi so, efisɛ owu na wubewu.’”’”+ 7 Ɛnna obisaa wɔn sɛ: “Ɔbarima a obehyiaa mo a ɔkaa nsɛm yi kyerɛɛ mo no, na ɔte dɛn?” 8 Na wobuaa no sɛ: “Ɔyɛ ɔbarima bi a ɔhyɛ ataade a wɔde aboa nwi ayɛ,+ na ɔde aboa nhoma abɔso* abɔ ne mu.”+ Ɛhɔ ara na ɔkae sɛ: “Ɛyɛ Tisbini Elia.”

9 Na ɔhene somaa 50 so panyin ne n’asraafo 50 kɔɔ ne nkyɛn. Bere a ɔkɔe no, ɔkɔtoo no sɛ ɔte bepɔw no so. Ɛnna ɔka kyerɛɛ no sɛ: “Nokware Nyankopɔn nipa,+ ɔhene se, ‘Sian bra.’” 10 Ɛnna Elia ka kyerɛɛ 50 so panyin no sɛ: “Sɛ meyɛ Onyankopɔn nipa a, ɛnde ogya mfi soro mmɛhyew wo ne w’asraafo 50 no.” Na ogya fii soro+ bɛhyew ɔne n’asraafo 50 no.

11 Afei ɔhene somaa 50 so panyin foforo ne n’asraafo 50 kɔɔ ne nkyɛn. Ɔno nso kɔka kyerɛɛ no sɛ: “Nokware Nyankopɔn nipa, ɔhene se, ‘Sian bra ntɛm.’” 12 Ɛnna Elia ka kyerɛɛ wɔn sɛ: “Sɛ meyɛ nokware Nyankopɔn nipa a, ɛnde ogya mfi soro mmɛhyew wo ne w’asraafo 50 no.” Na Onyankopɔn gya fii soro bɛhyew ɔne n’asraafo 50 no.

13 Ɛnna ɔhene san somaa 50 so panyin a ɔto so abiɛsa ne n’asraafo 50. Bere a 50 so panyin a ɔto so abiɛsa no kɔe no, okobuu nkotodwe wɔ Elia anim paa no kyɛw sɛ: “Nokware Nyankopɔn nipa, mesrɛ wo, ma me nkwa ne wo nkoa 50 yi nkwa* nsom bo wɔ w’ani so. 14 Ogya fi soro bae, na ɛbɛhyew 50 so mpanyimfo baanu a wodii kan bae no ne asraafo 50 a wɔn mu biara de wɔn bae no. Nanso me de, ma me nkwa* nsom bo wɔ w’ani so.”

15 Ɛnna Yehowa bɔfo ka kyerɛɛ Elia sɛ: “Sian na wo ne no nkɔ. Nsuro no.” Enti ɔsɔree, na osian ne no kɔɔ ɔhene nkyɛn. 16 Afei Elia ka kyerɛɛ ɔhene sɛ: “Nea Yehowa aka ni, ‘Wosomaa nkurɔfo sɛ wɔnkɔ Ekron+ nyame Baal-Sebub hɔ abisa. Onyankopɔn nni Israel anaa?+ Adɛn nti na woammisa n’anom asɛm? Eyi nti mpa a woda so no, worensi mfi so, efisɛ owu na wubewu.’” 17 Enti owui, na Yehowa asɛm a Elia kae no baa mu. Na esiane sɛ na onni ɔbabarima nti, Yehoram*+ bedii n’ade wɔ Yuda hene Yehosafat ba Yehoram ahenni afe a ɛto so abien no mu.+

18 Ahasia+ ho nsɛm a aka ne nea ɔyɛe nyinaa, wɔakyerɛw wɔ Israel ahemfo abakɔsɛm nhoma no mu.

2 Bere a Yehowa rebɛfa Elia+ akɔ soro* wɔ ahum mu+ no, Elia ne Elisa+ fii Gilgal+ kɔe. 2 Elia ka kyerɛɛ Elisa sɛ: “Mesrɛ wo tena ha, na Yehowa asoma me sɛ menkɔ Betel.” Nanso Elisa kae sɛ: “Sɛ́ Yehowa te ase na wo nso wote ase* yi, merennyae w’akyi di.” Enti wosian kɔɔ Betel.+ 3 Ɛnna adiyifo mma* a wɔwɔ Betel no baa Elisa nkyɛn bebisaa no sɛ: “Wunim sɛ ɛnnɛ Yehowa rebɛfa wo wura afi wo nkyɛn akɔ?”+ Na ɔkae sɛ: “Minim dedaw. Munnyae ho asɛm ka.”

4 Afei Elia ka kyerɛɛ no sɛ: “Elisa, mesrɛ wo tena ha, na Yehowa asoma me sɛ menkɔ Yeriko.”+ Nanso ɔkae sɛ: “Sɛ́ Yehowa te ase na wo nso wote ase* yi, merennyae w’akyi di.” Enti wosiim kɔɔ Yeriko. 5 Ɛnna adiyifo mma a wɔwɔ Yeriko no baa Elisa nkyɛn bebisaa no sɛ: “Wunim sɛ ɛnnɛ Yehowa rebɛfa wo wura afi wo nkyɛn akɔ?” Na ɔkae sɛ: “Minim dedaw. Munnyae ho asɛm ka.”

6 Ɛnna Elia ka kyerɛɛ no sɛ: “Mesrɛ wo tena ha, na Yehowa asoma me sɛ menkɔ Yordan ano.” Nanso ɔkae sɛ: “Sɛ́ Yehowa te ase na wo nso wote ase* yi, merennyae w’akyi di.” Enti wɔn baanu siim kɔe. 7 Wɔn baanu no kogyinaa Yordan ano, na adiyifo mma no mu 50 nso kogyinagyinaa akyiri hwɛɛ wɔn. 8 Ɛnna Elia yii n’ataade,*+ na ɔbobɔw de bɔɔ nsu no mu, na nsu no mu pae kɔɔ ha ne ha maa wɔn baanu no faa asaase kesee so twae.+

9 Bere a wotwae ara pɛ na Elia ka kyerɛɛ Elisa sɛ: “Ka nea menyɛ mma wo ansa na wɔafa me afi wo nkyɛn.” Na Elisa kae sɛ: “Mesrɛ wo, wo honhom+ no menya kyɛfa* abien+ anaa?” 10 Ɛnna ɔkae sɛ: “Woabisa ade a ɛyɛ den. Sɛ wuhu sɛ wɔrefa me afi wo nkyɛn a, wubenya; sɛ woanhu de a, ɛnde worennya.”

11 Bere a wɔnam kwan so rekɔ a wɔrekasa no, mpofirim ara na ogya teaseɛnam ne ogya apɔnkɔ+ bɛtetew wɔn baanu ntam, na Elia faa ahum mu kɔɔ soro.*+ 12 Bere a Elisa gu so rehwɛ nea ɛrekɔ so no, ɔteɛɛm sɛ: “Me papa, me papa! Hwɛ, Israel ɔko teaseɛnam ne ne nkurɔfo a wɔtete apɔnkɔ so!”+ Akyiri yi a onhu no bio no, osoo n’ankasa ataade mu na osuan mu abien.+ 13 Ɛno akyi no, ɔfaa Elia ataade*+ a afi ne ho agu fam no, na ɔsan kogyinaa Yordan ano. 14 Ɛnna ɔde Elia ataade* a efii ne ho guu fam no bɔɔ nsu no mu, na ɔkae sɛ: “Ɛhe na Yehowa, Elia Nyankopɔn no wɔ?” Bere a ɔde bɔɔ nsu no mu no, emu pae kɔɔ ha ne ha, na Elisa twae.+

15 Bere a adiyifo mma a wɔwɔ Yeriko no huu no wɔ akyirikyiri no, wɔkae sɛ: “Elia honhom aba Elisa so.”+ Ɛnna wokohyiaa no, na wɔbɔɔ wɔn mu ase de wɔn anim butubutuw fam wɔ n’anim. 16 Na wɔka kyerɛɛ no sɛ: “Wo nkoa wɔ mmarima akantinka 50 wɔ ha. Yɛsrɛ wo, ma wɔnkɔhwehwɛ wo wura. Ebia Yehowa honhom* ama no so akɔto bepɔw bi so anaa obon bi mu.”+ Nanso ɔkae sɛ: “Monnsoma wɔn.” 17 Na wɔkae ara ma afei de na ɛhaw no, enti ɔkae sɛ: “Monsoma ɛ.” Ɛnna wɔsomaa mmarima 50 kɔe, na wɔkɔhwehwɛɛ no nnansa, nanso wɔanhu no. 18 Bere a wɔsan baa ne nkyɛn no, na ɔwɔ Yeriko.+ Ɛnna ɔka kyerɛɛ wɔn sɛ: “Manka ankyerɛ mo sɛ, ‘Monnkɔ’?”

19 Akyiri yi, kurow no mu mmarima bɛka kyerɛɛ Elisa sɛ: “Sɛnea me wura ani tua yi, kurow yi da baabi pa,+ nanso nsu no nye, na asaase no nsow aba.”* 20 Ɛnna ɔkae sɛ: “Momfa kankyee ketewa a ɛyɛ foforo na momfa nkyene ngu mu mmrɛ me.” Na wɔkɔfa brɛɛ no. 21 Afei ɔkɔɔ nsu no ti de nkyene koguu mu,+ na ɔkae sɛ: “Nea Yehowa aka ni, ‘Nsu yi, masa no yare. Ɛrenkum obiara bio, na ɛremma obiara nyɛ obonin bio.’”* 22 Elisa asɛm no baa mu, na nsu no anya ayaresa abesi nnɛ.

23 Ofii hɔ sɛ ɔreforo akɔ Betel, na bere a ɔnam kwan so no, mmarimaa bi fi kurow no mu bae, na wofii ase dii ne ho agoru+ kae sɛ: “Wo ti so a apa, foro kɔ! Wo ti so a apa, foro kɔ!” 24 Eduu baabi no, ɔdan n’ani hwɛɛ wɔn, na ɔdomee wɔn wɔ Yehowa din mu. Ɛnna asisi* abien+ fi wuram bɛtetew mmofra no bi mu; ná wɔyɛ 42.+ 25 Na ɔtoaa so koduu Karmel Bepɔw+ so, na ofii hɔ san kɔɔ Samaria.

3 Yuda hene Yehosafat ahenni afe a ɛto so 18 mu no, Ahab ba Yehoram+ bɛyɛɛ Israel hene wɔ Samaria, na odii ade mfe 12. 2 Ɔyɛɛ Yehowa ani so bɔne, nanso anto ne papa ne ne maame de no, efisɛ Baal bosom dum a ne papa yɛe no,+ oyi fii hɔ. 3 Nanso bɔne a Nebat ba Yeroboam maa Israel yɛe no,+ ɛno ara bi na ɔno nso yɛe. Wantwe ne ho amfi ho.

4 Moab hene Mesa nso, na ɔwɔ nguan, na na ɔde bi tua tow ma Israel hene; ná ɔma no nguan mma 100,000 ne adwennini a wontwitwaa wɔn ho nwi 100,000. 5 Bere a Ahab wui no,+ ɛhɔ ara na Moab hene tew atua tiaa Israel hene.+ 6 Enti saa bere no, Ɔhene Yehoram fii Samaria kɔboaboaa Israel nyinaa ano. 7 Afei nso, ɔsoma kɔɔ Yuda hene Yehosafat nkyɛn sɛ: “Moab hene atew atua atia me. Wo ne me bɛkɔ ne Moab akɔko anaa?” Ɛnna ɔkae sɛ: “Mɛkɔ.+ Me ne wo nyinaa yɛ nipa baako. Me man ne wo man nso yɛ baako. M’apɔnkɔ ne w’apɔnkɔ yɛ baako.”+ 8 Afei obisaa no sɛ: “Ɔkwan bɛn na yɛmfa so?” Na ɔno nso kae sɛ: “Edom sare so kwan no.”

9 Israel hene ne Yuda hene ne Edom+ hene siim kɔe; bere a wɔde nnanson nantenantewee no, afei na wonnya nsu mma dɔm no ne mmoa a wodi wɔn akyi no nnom. 10 Ɛnna Israel hene kae sɛ: “Awerɛhosɛm! Yehowa aboa ahemfo baasa yi ano sɛ ɔde yɛn rebɛhyɛ Moabfo nsa!” 11 Ɛnna Yehosafat bisae sɛ: “Yehowa diyifo biara nni ha a yebetumi afa no so abisa Yehowa anom asɛm anaa?”+ Na Israel hene nkoa no baako buae sɛ: “Safat ba Elisa+ a na ɔde nsu gu Elia nsa so*+ no wɔ ha.” 12 Ɛnna Yehosafat kae sɛ: “Yehowa asɛm wɔ n’anom.” Enti Israel hene ne Yehosafat ne Edom hene kɔɔ ne nkyɛn.

13 Na Elisa bisaa Israel hene sɛ: “Dɛn na me ne wo wɔ yɛ?+ Kɔ adiyifo a wɔhyɛ nkɔm ma wo papa ne wo maame no hɔ.”+ Nanso Israel hene ka kyerɛɛ no sɛ: “Nka saa, efisɛ ahemfo baasa yi, Yehowa na waboaboa yɛn ano sɛ ɔde yɛn rebɛhyɛ Moabfo nsa.” 14 Ɛnna Elisa kae sɛ: “Sɛ́ asafo Yehowa a mesom no* no te ase yi, sɛ ɛnyɛ Yuda hene Yehosafat+ na mede m’ani ato n’anim a, anka merenhwɛ wo mpo na mahu wo.+ 15 Monkɔpɛ sankubɔfo* mmrɛ me.”+ Bere a sankubɔfo no fii ase bɔɔ sanku no, Yehowa honhom* baa no so.+ 16 Na ɔkae sɛ: “Nea Yehowa aka ni, ‘Muntutu amoa wɔ subon yi mu baabiara; 17 na Yehowa aka sɛ: “Mframa remmɔ na osu nso rentɔ, nanso nsu bɛhyɛ subon yi ma,+ na mo ne mo nyɛmmoa ne mo mmoa a aka nyinaa bɛnom emu nsu.”’ 18 Nanso eyi yɛ ade ketewa wɔ Yehowa ani so,+ na ɔde Moabfo nso bɛhyɛ mo nsa.+ 19 Kurow a wɔabɔ ho ban+ ne kurow pa biara, monsɛe no. Muntwa dua pa biara nkyene, nsu aniwa nyinaa munsisiw no, na momfa abo nsɛe asaase pa biara.”+

20 Bere a eduu anɔpa a wɔbɔ aduan afɔre no,+ nea wohui ara ne sɛ nsu fi Edom reba, na nsu no bɛhyɛɛ asaase no so ma.

21 Moabfo nyinaa tee sɛ ahemfo no aba sɛ wɔne wɔn rebɛko. Enti wɔfrɛfrɛɛ mmarima a wotumi kɔ ɔko* nyinaa, na wokogyinagyinaa wɔn hye so. 22 Bere a wɔsɔree anɔpatutuutu no, na owia atɔ nsu no so, na Moabfo a wogyinagyina ɔfã noho no hui sɛ nsu no ayɛ kɔɔ sɛ mogya. 23 Wɔkae sɛ: “Mogya! Ahemfo no de sekan akunkum wɔn ho. Enti Moabfo, monkɔfom wɔn nneɛma!”+ 24 Bere a wɔbaa Israelfo asoɛe hɔ no, ɛhɔ ara na Israelfo no sɔre tow hyɛɛ Moabfo no so fii ase kunkum wɔn, na woguan fii wɔn anim.+ Wɔkɔɔ Moabfo asaase so, na wɔrekɔ nyinaa na wɔrekunkum Moabfo no. 25 Wɔsɛee nkurow no, na asaase pa biara a ɛda hɔ no, wɔn mu biara soaa abo guu so de hyɛɛ so ma; wosisiw nsu aniwa nyinaa,+ na wotwitwaa nnua pa nyinaa gui.+ Kir-Hareset+ abo afasu no nko ara na ɛkae, na wɔn a wɔtow ataabo* kotwaa kurow no ho hyiae, na wofii ase sɛee no.

26 Bere a Moab hene hui sɛ wadi nkogu no, ɛhɔ ara na ɔfaa mmarima 700 a wokurakura asekan sɛ ɔrekɔ Edom hene+ so, nanso wɔantumi. 27 Ɛnna ɔfaa n’abakan a obedi n’ade de no bɔɔ ɔhyew afɔre+ wɔ ɔfasu no ho. Na nkurɔfo faa Israel ho abufuw kɛse, enti wogyaee ɔko no na wɔsan kɔɔ wɔn asaase so.

4 Adiyifo mma+ no baako yere besu kyerɛɛ Elisa sɛ: “Me kunu awu, na wo ara wunim sɛ bere a w’akoa te ase no, na osuro Yehowa.+ Mede obi ka, na waba sɛ ɔrebɛfa me mma baanu no akɔyɛ nkoa.” 2 Ɛnna Elisa bisaa no sɛ: “Dɛn na menyɛ mma wo? Ka kyerɛ me, dɛn na wowɔ wɔ fie?” Na ɔkae sɛ: “W’afenaa nni hwee wɔ fie sɛ ngo ahina baako.”+ 3 Ɛnna ɔkae sɛ: “Kɔ abɔnten kɔsrɛ nhina a hwee nni mu fi wɔn a wɔtete bɛn wo nyinaa nkyɛn. Dodow biara a wubenya no, gye. 4 Afei wo ne wo mma mmarima no nkɔhyɛ dan mu na monto pon mu, na hwiehwie ngo no gu nhina no nyinaa mu. Nea ɛbɛyɛ ma biara, fa si nkyɛn.” 5 Ɔkaa saa no, ɔbea no fii ne nkyɛn kɔe.

Ɔne ne mma mmarima no kɔhyɛɛ dan mu too pon mu, na sɛ wɔde nhina no ma no a, na ɔno nso ahwiehwie ngo no agu mu.+ 6 Bere a nhina no yeyɛɛ ma no, ɔka kyerɛɛ ne ba baako sɛ: “Fa ahina foforo brɛ me.”+ Nanso ɔka kyerɛɛ no sɛ: “Ahina biara nni hɔ bio.” Ɛnna ngo no twae.+ 7 Enti ɔbea no kɔka kyerɛɛ nokware Nyankopɔn nipa no. Na ɔno nso kae sɛ: “Kɔtɔn ngo no na fa tuatua wo ho aka, na nea ɛbɛka no, wo ne wo mma no mfa nhwɛ mo ho.”

8 Da bi, Elisa kɔɔ Sunem.+ Ná ɔbea nuonyamfo bi wɔ hɔ, na ɔbea no kae ara sɛ ommedidi wɔ ne fi.+ Ɛno akyi no, bere biara a ɔbɛkɔ hɔ no, na ɔfa hɔ kodidi. 9 Ɛnna ɔbea no ka kyerɛɛ ne kunu sɛ: “Minim sɛ ɔbarima a ɔba yɛn nkyɛn daa yi yɛ Onyankopɔn nipa kronkron. 10 Mesrɛ wo, ma yɛnyɛ atifi dan+ ketewa bi mma no, na yɛmfa mpa, ɔpon, agua, ne kaneadua nsisi mu mma no, na da biara a ɔbɛba yɛn nkyɛn no, wanya baabi atena.”+

11 Da bi, odiyifo no baa hɔ sɛnea ɔyɛ daa no, na ɔkɔɔ atifi dan no mu kɔdaa hɔ. 12 Ɛnna ɔka kyerɛɛ ne somfo Gehasi+ sɛ: “Frɛ Sunemni+ bea yi bra.” Enti ɔfrɛɛ no begyinaa n’anim. 13 Afei ɔka kyerɛɛ Gehasi sɛ: “Mesrɛ wo, ka kyerɛ no sɛ, ‘Woahaw wo ho ayɛ eyi nyinaa ama yɛn.+ Dɛn na yɛn nso yɛnyɛ mma wo?+ Biribi wɔ hɔ a wopɛ sɛ meka kyerɛ ɔhene+ anaa asraafo panyin no ma wo anaa?’” Nanso ɔbea no kae sɛ: “Me nkurɔfo mu na mete, enti minni haw.” 14 Enti odiyifo no bisae sɛ: “Dɛn koraa na yebetumi ayɛ ama no?” Ɛnna Gehasi kae sɛ: “Nea ɛte ne sɛ, onni ɔbabarima,+ na ne kunu nso abɔ akwakoraa.” 15 Ɛhɔ ara na ɔkae sɛ: “Frɛ no bra.” Enti ɔkɔfrɛɛ no, na ɔbea no begyinaa ɔkwan no ano. 16 Ɛnna odiyifo no kae sɛ: “Afe sesɛɛ na wuturu ɔbabarima.”+ Ɛnna ɔbea no kae sɛ: “Nokware Nyankopɔn nipa, ɛrenyɛ yiye! Me wura, nka asɛm a ɛnyɛ nokware nkyerɛ w’afenaa.”

17 Nanso ɔbea no nyinsɛnee, na sɛnea Elisa ka kyerɛɛ no no, afe pɛpɛɛpɛ na ɔwoo ɔbabarima. 18 Abofra no nyinii, na da bi a ne papa wɔ atwafo no nkyɛn wɔ afuw mu no, abofra no kɔɔ ne nkyɛn. 19 Na abofra no ka kyerɛɛ ne papa sɛ: “Me ti, me ti!” Ɛnna papa no ka kyerɛɛ ne somfo sɛ: “Fa no kɔma ne maame.” 20 Enti ɔmaa abofra no so de no kɔmaa ne maame. Ɔdaa ne maame nan so kosii awia,* na owui.+ 21 Ɛnna ɔbea no foro de no kɔtoo nokware Nyankopɔn nipa+ no mpa so, na ɔtoo pon no mu fii adi. 22 Afei ɔfrɛɛ ne kunu na ɔka kyerɛɛ no sɛ: “Mesrɛ wo, ma me asomfo no baako ne afurum baako, na memmɔ hwii nkɔ nokware Nyankopɔn nipa no nkyɛn mmra.” 23 Ɛnna ne kunu bisae sɛ: “Adɛn nti na worekɔ ne nkyɛn nnɛ? Ɛnnɛ nyɛ ɔsram foforo+ anaa Homeda.” Nanso ɔbea no kae sɛ: “Ɛnyɛ hwee.” 24 Enti ɔbea no hyehyɛɛ afurum no, na ɔka kyerɛɛ ne somfo no sɛ: “Ka wo ho. Nka sɛ me nti woretɔ wo bo ase, gye sɛ meka sɛ tɔ wo bo ase.”

25 Enti ɔbea no siim kɔɔ nokware Nyankopɔn nipa no nkyɛn wɔ Karmel Bepɔw so. Bere a nokware Nyankopɔn nipa no huu no wɔ akyirikyiri no, ɛhɔ ara na ɔka kyerɛɛ ne somfo Gehasi sɛ: “Hwɛ! Sunemni bea no na ɔreba no. 26 Mesrɛ wo, tu mmirika kohyia no na bisa no sɛ, ‘Wo ho ye? Wo kunu ho ye? Abofra no ho ye?’” Ɛnna ɔbea no kae sɛ: “Biribiara yɛ bɔkɔɔ.” 27 Bere a ɔbea no koduu nokware Nyankopɔn nipa no nkyɛn wɔ bepɔw no so no, ɛhɔ ara na ɔbea no besoo ne nan.+ Ɛnna Gehasi bae sɛ ɔrebepia no afi hɔ, nanso nokware Nyankopɔn nipa no kae sɛ: “Gyaa no, na awerɛhow ahyɛ no so.* Yehowa anka ankyerɛ me; ɔde ahintaw me.” 28 Afei ɔbea no kae sɛ: “Me na mekae sɛ me wura mma me ɔba anaa? Manka sɛ, ‘Mmɛdaadaa me’?”+

29 Ɛhɔ ara na ɔka kyerɛɛ Gehasi sɛ: “Fa w’ataade kyekyere w’asen+ na fa me poma kura na kɔ hɔ. Obiara a wubehyia no wɔ kwan so no, nkyia no; sɛ obi kyia wo nso a, nnye so. Fa me poma no kɔto abofra no anim.” 30 Ɛnna abofra no maame kae sɛ: “Sɛ́ Yehowa te ase na wo nso wote ase* yi, merennyaw wo hɔ nkɔ.”+ Enti ɔsɔree, na ɔne ɔbea no kɔe. 31 Gehasi dii kan kɔɔ hɔ de poma no kɔtoo abofra no anim, nanso wankasa na wankeka ne ho.+ Ɔsan n’akyi kohyiaa Elisa, na ɔka kyerɛɛ no sɛ: “Abofra no annyan.”

32 Bere a Elisa beduu ofie hɔ no, na abofra no awu ma wɔde no akɔto ne mpa so.+ 33 Ɛnna ɔkɔɔ mu kɔtoo pon no mu, na bere a ɛkaa wɔn baanu pɛ no, ɔbɔɔ Yehowa mpae.+ 34 Afei ɔforoo mpa no kɔdaa abofra no so, na ɔde n’ano butuw n’ano, na ɔde n’aniwa butuw n’aniwa so, na ɔde ne nsayam totoo ne nsayam, na wansɔre amfi abofra no so kosii sɛ abofra no ho fii ase yɛɛ hyew.+ 35 Afei, odii akɔneaba wɔ fie hɔ, na ɔsan foroo mpa no kobutuw abofra no so. Ɛnna abofra no nwansii mpɛn ason, na abofra no buee n’aniwa.+ 36 Afei Elisa frɛɛ Gehasi na ɔka kyerɛɛ no sɛ: “Frɛ Sunemni bea no bra.” Enti ɔfrɛɛ no ma ɔbaa ne nkyɛn. Na ɔka kyerɛɛ ɔbea no sɛ: “Fa wo ba no kɔ.”+ 37 Ɛnna ɔbea no baa mu bɛhwee ne nan ase butuw fam, na ɔfaa ne ba no kɔe.

38 Bere a Elisa san kɔɔ Gilgal no, na ɔkɔm aba asaase no so.+ Ná adiyifo mma+ no tete n’anim, na ɔka kyerɛɛ ne somfo+ no sɛ: “Fa kuku kɛse no si gya so yɛ forɔe ma adiyifo mma no.” 39 Enti wɔn mu baako kɔɔ wuram sɛ ɔrekɔtetew ɛfan, na okohuu afifide bi wɔ wuram, na ɔtetew ɛfere a ɛwɔ so no bi guu ne ntama mu ma ɛyɛɛ ma. Ɛnna obetwitwa guu kuku a esi gya so no mu; nanso na onnim n’adeban. 40 Akyiri yi wotiti maa mmarima no sɛ wonni. Bere a wɔde forɔe no bi kaa wɔn ano ara pɛ, wɔteɛɛm kae sɛ: “O nokware Nyankopɔn nipa, awuduru wɔ kuku no mu.” Na wɔantumi anni. 41 Enti ɔkae sɛ: “Momma me esiam.” Bere a ɔde guu kuku no mu no, ɔkae sɛ: “Muntiti mma wɔn na wonni.” Afei, na biribiara nni kuku no mu a ebetumi ahaw wɔn.+

42 Ɔbarima bi fi Baal-Salisa+ bae, na ɔde paanoo 20 a wɔde baali*+ aba a edi kan ayɛ brɛɛ nokware Nyankopɔn nipa no, na ɔde baali mono nso kaa ho bae; ná ɛyɛ kotoku baako.+ Ɛnna Elisa kae sɛ: “Fa ma nkurɔfo no ma wonni.” 43 Nanso ne somfo no kae sɛ: “Ɛbɛyɛ dɛn na mede eyi asi mmarima 100 anim?”+ Ɛnna ɔno nso kae sɛ: “Fa ma nkurɔfo no ma wonni, efisɛ Yehowa aka sɛ, ‘Wobedi ama ebi aka.’”+ 44 Ɛnna ɔde sii wɔn anim, na sɛnea Yehowa kae no, wodi maa ebi kae.+

5 Ná Siria hene wɔ ɔsahene bi a wɔfrɛ no Naaman. Ná ɔyɛ onipa kɛse a ne wura bu no, efisɛ na Yehowa nam no so ama Siriafo adi nkonim.* Ná ɔbarima no yɛ ɔkatakyi, nanso na ɔyare kwata.* 2 Bere bi Siriafo bɛtow hyɛɛ Israelfo so, na wɔkyeree abeawa kumaa bi fii Israelfo asaase so kɔe, na ɔkɔyɛɛ Naaman yere abaawa. 3 Abeawa no ka kyerɛɛ ne maame a ɔne no te no sɛ: “Sɛ anka me wura bɛkɔ odiyifo+ a ɔwɔ Samaria no anim a, anka ɔbɛsa ne kwata no+ ama no.” 4 Enti ɔkɔɔ* ne wura hɔ kɔbɔɔ no amanneɛ, na ɔkaa nea abeawa a ofi Israel no kae nyinaa kyerɛɛ no.

5 Ɛnna Siria hene kae sɛ: “Sim kɔ seesei ara! Mede krataa bɛkɔ akɔma Israel hene.” Enti ɔfaa dwetɛ dwetikɛse* du, sika kɔkɔɔ dwetikɛse 6,000, ne ntaade ahorow du, na osiim kɔe. 6 Ɔde krataa yi kɔmaa Israel hene sɛ: “Krataa yi akyi no, meresoma m’akoa Naaman aba wo nkyɛn na woasa ne kwata no ama no.” 7 Bere a Israel hene kenkan krataa no ara pɛ, osuan n’ataade mu, na ɔkae sɛ: “Adɛn, meyɛ Onyankopɔn na matumi akum onipa anaa mama onipa nkwa?+ Monhwɛ sɛ wasoma ɔbarima yi sɛ mensa ne kwata mma no. Mo ara mutumi hu sɛ ntɔkwaw ara na ɔrepɛ me.”

8 Nanso bere a nokware Nyankopɔn nipa Elisa tee sɛ Israel hene asuan n’ataade mu no, ɛhɔ ara na ɔsoma kobisaa ɔhene sɛ: “Adɛn nti na woasuan w’ataade mu? Mesrɛ wo, ma ɔmmra me nkyɛn, na obehu sɛ odiyifo bi wɔ Israel.”+ 9 Enti Naaman de n’apɔnkɔ ne ne nteaseɛnam a ɔde kɔ ɔko bae, na obegyinaa Elisa fi kwan ano. 10 Nanso Elisa tuu ɔbɔfo kɔka kyerɛɛ no sɛ: “Kɔ na koguare wɔ Yordan+ mu mpɛn ason,+ na wo honam besi ne dedaw mu ama wo ho atew.” 11 Ɛnna Naaman bo fuwii denneennen, na ɔdan ne ho sɛ ɔrekɔ, na ɔkae sɛ: “Hwɛ, me de, mekae wɔ me tirim sɛ, ‘Obepue aba me nkyɛn, na ɔbɛbɔ Yehowa, ne Nyankopɔn no din, na ɔde ne nsa afofa kwata no so asa me yare.’ 12 So Abana ne Farpar nsubɔnten a ɛwɔ Damasko+ no nye nsen Israel nsu nyinaa? Enti anka merentumi nguare mu mma me ho ntew?” Ɔkaa saa no, ɔde abufuw siim sɛ ɔrekɔ.

13 Ɛnna ne nkoa twiw bɛn no, na wɔka kyerɛɛ no sɛ: “Papa, sɛ ade kɛse bi na odiyifo no ka kyerɛɛ wo sɛ yɛ a, anka worenyɛ anaa? Enti sɛ waka sɛ ‘Guare na wo ho ntew’ a, ɛno na wuntumi nyɛ?” 14 Wɔkaa saa no, ɔkɔe na ɔkɔtɔɔ* Yordan mu mpɛn ason sɛnea nokware Nyankopɔn nipa+ no ka kyerɛɛ no no, na ne honam ani yɛɛ toromtorom kama te sɛ abofra ketewaa honam,+ na ne ho tewee.+

15 Ɛnna ɔsan n’akyi ne ne dɔm* nyinaa kɔɔ nokware Nyankopɔn nipa+ no nkyɛn, na okogyinaa n’anim kae sɛ: “Afei na mahu ampa sɛ Onyame biara nni asaase so baabiara, gye sɛ Israel.+ Mesrɛ wo, gye akyɛde* yi fi w’akoa nsam.” 16 Ɛnna Elisa kae sɛ: “Sɛ́ Yehowa a mesom no* no te ase yi, merennye.”+ Ɔsrɛɛ no ara sɛ onnye, nanso wannye. 17 Afei Naaman kae sɛ: “Sɛ saa a, ɛnde ma wɔmma w’akoa dɔte a mfurumpɔnkɔ abien betumi asoa, efisɛ w’akoa remmɔ ɔhyew afɔre anaa afɔre biara mma onyame foforo biara bio, gye Yehowa nkutoo. 18 Mmom ade baako na mɛsrɛ Yehowa sɛ ɔmfa nkyɛ w’akoa: Sɛ me wura kɔ Rimon fi* sɛ ɔrekɔkotow no wɔ hɔ, na sɛ otweri me nsa so a, ɛbɛma makotow wɔ Rimon fi hɔ bi. Sɛ mekotow wɔ Rimon fi saa a, ɛnde mesrɛ sɛ Yehowa mfa nkyɛ w’akoa.” 19 Ɛnna ɔka kyerɛɛ no sɛ: “Fa asomdwoe kɔ.” Bere a ofii ne nkyɛn twaa kwan kakra no, 20 Gehasi+ a ɔyɛ nokware Nyankopɔn nipa Elisa+ somfo no kae wɔ ne tirim sɛ: ‘Hwɛ, me wura agyaa Siriani Naaman+ yi ma ɔkɔ kwa, na wannye nea ɔde bae no. Sɛ́ Yehowa te ase yi, metu mmirika atiw no na makogye biribi afi ne hɔ.’ 21 Enti Gehasi de mmirika tiw Naaman. Bere a Naaman hui sɛ obi de mmirika di n’akyi no, ɛhɔ ara na osi fii ne teaseɛnam mu kohyiaa no, na obisaa no sɛ: “Biribiara yɛ bɔkɔɔ anaa?” 22 Ɛnna obuae sɛ: “Biribiara yɛ bɔkɔɔ. Me wura asoma me sɛ memmɛka nkyerɛ wo sɛ, ‘Hwɛ! Seesei ara na mmerante baanu bi a wofi adiyifo mma no mu fi Efraim mmepɔw mu aba me nkyɛn. Enti mesrɛ wo, ma wɔn dwetɛ dwetikɛse baako ne ntaade abien.’”+ 23 Naaman kae sɛ: “Gye dwetikɛse abien mpo.” Ɔsrɛɛ no ara,+ na afei ɔkyekyeree dwetɛ dwetikɛse abien wɔ nkotoku abien mu de ntaade abien kaa ho, na ɔde maa n’asomfo baanu, na wɔsoa dii n’anim.

24 Bere a oduu Ofel* no, ogyee nneɛma no fii wɔn nsam de koguu fie, na ogyaa wɔn kwan. Wɔkɔe no, 25 ɔkɔɔ ne wura nkyɛn. Ɛnna Elisa bisaa no sɛ: “Gehasi, ɛhe na wufi reba yi?” Na obuae sɛ: “W’akoa nkɔɔ baabiara.”+ 26 Elisa ka kyerɛɛ no sɛ: “Bere a ɔbarima no si fii ne teaseɛnam mu behyiaa wo no, wunnim sɛ na me koma di w’akyi anaa? Saa bere yi na ɛsɛ sɛ yegye dwetɛ, ntaade, ngodua mfuw, bobefuw,* nguan, anantwi, nkoa, anaa mfenaa?+ 27 Ɛno nti Naaman kwata+ no bɛfam wo ne w’asefo ho daa.” Ɛhɔ ara na ofii n’anim kɔe, na na kwata aguare no fitaa te sɛ sukyerɛmma.+

6 Adiyifo mma+ no ka kyerɛɛ Elisa sɛ: “Hwɛ! Baabi a yɛne wo te yi sua dodo ma yɛn. 2 Yɛsrɛ wo, ma yɛnkɔ Yordan ho na yɛn mu biara nkɔpɛ dua baako na yɛmfa nyɛ baabi a yɛbɛtena wɔ hɔ.” Ɔkae sɛ: “Monkɔ ɛ.” 3 Wɔn mu baako bisaa no sɛ: “Yɛsrɛ wo, wo ne wo nkoa bɛkɔ anaa?” Ɛnna ɔkae sɛ: “Mɛkɔ.” 4 Enti ɔne wɔn kɔe, na bere a wokoduu Yordan ho no, wofii ase twaa nnua no. 5 Bere a ɔbaako retwa dua no, abonnua no hɔn tɔɔ nsu no mu. Ɛnna ɔteɛɛm sɛ: “O me wura, yɛkɔsrɛe!” 6 Nokware Nyankopɔn nipa no bisaa no sɛ: “Ɛhe na ɛtɔe?” Na ɔkyerɛɛ no. Ɛnna otwaa dua ketewa bi tow too hɔ, na abonnua no bɛtɛn nsu no ani. 7 Ɔkae sɛ: “Yi fi nsu no mu.” Enti ɔteɛɛ ne nsa yii.

8 Na ɛbae sɛ Siria hene yɛe sɛ ɔne Israel rekɔko,+ na ɔne ne nkoa tuu agyina sɛ: “Ɛha ne ha na me ne mo bɛboa yɛn ho ano.” 9 Ɛnna nokware Nyankopɔn nipa+ no soma kɔka kyerɛɛ Israel hene sɛ: “Hwɛ yiye na woamfa ha, efisɛ ɛha na Siriafo bɛfa aba.” 10 Enti faako a nokware Nyankopɔn nipa no kaa ho asɛm kyerɛɛ Israel hene no, ɔhene no kɔbɔɔ nnipa a wɔwɔ hɔ no kɔkɔ. Odiyifo no bɔɔ ɔhene kɔkɔ mpɛn pii, enti wankɔ hɔ.+

11 Eyi hyɛɛ Siria hene abufuw,* na ɔfrɛɛ ne nkoa ka kyerɛɛ wɔn sɛ: “Monkyerɛ me nea ɔwɔ yɛn mu a ɔwɔ Israel hene afã.” 12 Na ne nkoa no baako kae sɛ: “Me wura ɔhene, yɛn mu biara nni n’afã. Mmom ɛyɛ odiyifo Elisa a ɔwɔ Israel no; ɔno na nsɛm a woka wɔ wo pia mu mpo,+ ɔka kyerɛ Israel hene.” 13 Ɔkae sɛ: “Monkɔhwehwɛ faako a ɔwɔ na mensoma nkɔkyere no.” Akyiri yi, wɔbɛbɔɔ no amanneɛ sɛ: “Ɔwɔ Dotan.”+ 14 Ɛhɔ ara na ɔsoma ma wɔde apɔnkɔ ne ɔko nteaseɛnam ne asraafodɔm kɛse kɔɔ hɔ. Woduu hɔ anadwo, na wotwaa kurow no ho hyiae.

15 Bere a nokware Nyankopɔn nipa no somfo sɔree anɔpa na opuei no, ohui sɛ asraafodɔm bi ne apɔnkɔ ne ɔko nteaseɛnam atwa kurow no ho ahyia. Ɛhɔ ara na ne somfo no ka kyerɛɛ no sɛ: “O me wura! Yɛbɛyɛ dɛn?” 16 Nanso ɔkae sɛ: “Nsuro!+ Efisɛ wɔn a wɔka yɛn ho no dɔɔso sen wɔn a wɔka wɔn ho.”+ 17 Ɛnna Elisa bɔɔ mpae sɛ: “O Yehowa, mesrɛ wo, bue n’ani na onhu nea ɛrekɔ so.”+ Ntɛm ara na Yehowa buee ɔsomfo no ani; ɔnkɔhwɛ a, ogya apɔnkɔ ne nteaseɛnam+ na ayɛ mmepɔw no so ma atwa Elisa ho nyinaa ahyia+ yi.

18 Bere a Siriafo no yɛe sɛ wɔreba Elisa so no, ɔbɔɔ Yehowa mpae sɛ: “Mesrɛ wo, ma nkurɔfo* yi ani mfura.”+ Enti ɔmaa wɔn ani furae sɛnea Elisa srɛe no. 19 Afei Elisa ka kyerɛɛ wɔn sɛ: “Ɛnyɛ ɔkwan no ni, na ɛnyɛ kurow no ni. Munni m’akyi na memfa mo nkɔ ɔbarima a morehwehwɛ no no hɔ.” Nanso odii wɔn anim de wɔn kɔɔ Samaria+ mmom.

20 Bere a woduu Samaria no, Elisa kae sɛ: “O Yehowa, bue nkurɔfo yi ani na wonhu ade.” Enti Yehowa buee wɔn ani, na wohui sɛ wɔwɔ Samaria mfinimfini. 21 Bere a Israel hene huu wɔn no, obisaa Elisa sɛ: “Minkunkum wɔn anaa, me papa, minkunkum wɔn anaa?” 22 Nanso ɔkae sɛ: “Nkunkum wɔn. Sɛ wode wo sekan ne w’agyan ko na wokyere nkurɔfo a, ɛsɛ sɛ wukunkum wɔn anaa? Ma wɔn aduan* ne nsu na wonnidi nnom,+ na wɔnsan nkɔ wɔn wura nkyɛn.” 23 Enti ɔtow pon kɛse maa wɔn; wodidi nomee, na ɛno akyi no ogyaa wɔn kwan ma wɔkɔɔ wɔn wura nkyɛn. Siriafo dɔm a wɔfom nkurɔfo nneɛma+ no ansan amma Israel asaase so bio.

24 Eyi akyi no, Siria hene Ben-Hadad boaboaa n’asraafodɔm nyinaa ano kotwaa Samaria ho hyiae.+ 25 Enti ɔkɔm kɛse+ baa Samaria. Wotwaa ho hyiae kosii sɛ afei eduu baabi no, na afurum ti+ mpo bo yɛ nnwetɛbona 80, na aburuburuw bin nsa ma abien* bo yɛ nnwetɛbona 5. 26 Bere a Israel hene nam ɔfasu no so retwam no, ɔbea bi teɛɛm ka kyerɛɛ no sɛ: “O me wura ɔhene, boa yɛn!” 27 Ɛnna obuae sɛ: “Sɛ Yehowa ammoa wo a, ɛhe na menya mmoa ama wo? Awiporowbea, anaasɛ baabi a wokyĩ nsã anaa ngo?” 28 Afei ɔhene bisaa no sɛ: “Wo haw ne dɛn?” Na ɔbea no buae sɛ: “Ɔbea yi ka kyerɛɛ me sɛ, ‘Fa wo ba bra ma yɛnwe no nnɛ, na ɔkyena me nso mede me ba bɛba ama yɛawe no.’+ 29 Enti yɛnoaa me ba no wee.+ Ade kyee no, meka kyerɛɛ no sɛ, ‘Wo nso fa wo ba no bra ma yɛnwe.’ Nanso ɔde ne ba no kosiei.”

30 Bere a ɔhene tee ɔbea no asɛm no, ntɛm ara na osuan n’ataade mu;+ bere a ɔnam ɔfasu no so retwam no, ɔmanfo no hui sɛ ofura awerɛhow ntama* wɔ n’ataade ase. 31 Ɛnna ɔkae sɛ: “Ɛnnɛ sɛ mantew Safat ba Elisa ti amfi so a, Onyankopɔn ntua me ka na ɔnsan mfa bi nka ho!”+

32 Ná Elisa te ne fi, na mpanyimfo no tete ne nkyɛn, ɛnna ɔhene no dii kan somaa obi kɔɔ hɔ. Ɔbɔfo no nnya nnuu hɔ no, Elisa ka kyerɛɛ mpanyimfo no sɛ: “Moahu sɛ owudifo+ ba no asoma sɛ wommetwa me ti? Sɛ ɔbɔfo no bedu a, monhwɛ nto pon no mu, na munnyina akyi mpia, na wantumi amma mu. Enti ne wura di n’akyi reba yi, monte ne nan ase?” 33 Ogu so ne wɔn rekasa no, ɔbɔfo no beduu ne nkyɛn. Ɛnna ɔhene no nso bae, na ɔkae sɛ: “Mmusu yi fi Yehowa. Adɛn nti na ɛsɛ sɛ mekɔ so twɛn Yehowa?”

7 Ɛnna Elisa kae sɛ: “Muntie Yehowa asɛm. Nea Yehowa aka ni, ‘Ɔkyena sesɛɛ, esiam muhumuhu seah susude* baako bo bɛyɛ dwetɛbona* baako, na baali* seah susude abien bo bɛyɛ dwetɛbona baako wɔ Samaria kurow pon ano.’”*+ 2 Ɛhɔ ara na ɔhene boafo a ogye no di no bisaa nokware Nyankopɔn nipa no sɛ: “Sɛ Yehowa rebue ɔsoro mfɛnsere mpo a, anka ɛbɛyɛ dɛn na asɛm yi atumi aba mu?”+ Na ɔno nso kae sɛ: “Wode w’ani behu,+ nanso ebi renka w’ano.”+

3 Ná mmarima akwatafo baanan bi wɔ kurow no pon ano,+ na wɔkeka kyerɛɛ wɔn ho sɛ: “Adɛn nti na ɛsɛ sɛ yɛtena ha wu? 4 Ɔkɔm wɔ kurow no mu,+ enti sɛ yɛka sɛ, ‘Momma yɛnkɔ kurow no mu’ a, yebewuwu wɔ hɔ. Na sɛ yɛtena ha nso a, yebewuwu. Enti momma yɛmmɔ nwura Siriafo asoɛe no mu. Sɛ wɔkora yɛn so a, yɛbɛtena nkwa mu, na sɛ wokunkum yɛn nso a, na yɛawu.” 5 Ɛnna wɔsɔree anwummere a esum reba, na wɔkɔɔ Siriafo asoɛe hɔ. Bere a wokoduu Siriafo asoɛe no ano no, na obiara nni hɔ.

6 Nea ɛbae ne sɛ, na Yehowa ama Siriafo no ate ɔko nteaseɛnam, apɔnkɔ, ne asraafodɔm kɛse nka wɔ wɔn asoɛe hɔ.+ Enti wɔkeka kyerɛɛ wɔn ho sɛ: “Hwɛ! Israel hene akɔbɔ Hitifo ahemfo ne Egypt ahemfo paa ama wɔreba yɛn so!” 7 Ntɛm ara na wɔsɔre guanee anwummere a anim rebiribiri no, na wogyaw wɔn ntamadan ne wɔn apɔnkɔ ne wɔn mfurum hɔ guan gyee wɔn ho nkwa.* Wogyaw asoɛe hɔ saa ara kɔe.

8 Bere a akwatafo yi beduu asoɛe no ano no, wɔkɔɔ ntamadan baako mu, na wodidi nomee, na wɔsesaw dwetɛ ne sika kɔkɔɔ ne ntaade fii hɔ de kosiei. Ɛno akyi no, wɔsan kɔɔ ntamadan foforo mu, na wɔsesaw nneɛma fii hɔ de kosiei.

9 Afei wɔkeka kyerɛɛ wɔn ho sɛ: “Nea yɛreyɛ yi nye. Anigyesɛm yi de, ɛsɛ sɛ yɛma nkurɔfo te ho asɛm! Sɛ yɛtwentwɛn yɛn nan ase, na yɛtena hɔ ma ade kye a, asɛm bɛto yɛn. Enti momma yɛnkɔbɔ amanneɛ wɔ ahemfi.” 10 Ɛnna wɔbɛka kyerɛɛ kurow pon ano ahwɛfo no sɛ: “Yɛkɔɔ Siriafo asoɛe hɔ, nanso yɛanhu obiara na yɛante obiara nka wɔ hɔ. Nea yɛkɔtoe ara ne apɔnkɔ ne mfurum a wɔamantam wɔn ne ntamadan a wɔagyaw hɔ saa ara.” 11 Ɛhɔ ara na apon ano ahwɛfo no kɔbɔɔ amanneɛ wɔ ahemfi.

12 Ntɛm ara na ɔhene sɔree anadwo, na ɔka kyerɛɛ n’asomfo sɛ: “Mesrɛ mo, momma menka nea Siriafo pɛ sɛ wɔde yɛ yɛn nkyerɛ mo. Wonim sɛ ɔkɔm de yɛn,+ enti wɔafi wɔn asoɛe hɔ akohintaw wuram, na wɔaka sɛ, ‘Sɛ wofi kurow no mu ba a, yɛbɛkyere wɔn animono, na yɛabɔ awura kurow no mu.’”+ 13 Ɛnna n’asomfo no baako kae sɛ: “Kurow no mu apɔnkɔ a aka no, mesrɛ wo, ma mmarima bi mfa anum nkɔ hɔ. Hwɛ! Wɔn nso nea ɛbɛto Israelfo a wɔaka kurow yi mu no, ɛno ara bi na ɛbɛto wɔn. Wɔn nso bɛyɛ sɛ Israelfo dodow a wɔawuwu no ara. Ma yɛnsoma wɔn na wɔnkɔhwɛ.” 14 Enti wɔfaa nteaseɛnam abien ne apɔnkɔ, na ɔhene somaa wɔn sɛ wɔnkɔ Siriafo asoɛe hɔ. Ɔkae sɛ: “Monkɔhwɛ.” 15 Ɛnna wodii wɔn anammɔn akyi ara koduu Yordan ho, na wohui sɛ ntaade ne nneɛma a ahopere nti Siriafo a wɔreguan no atotow agu no ayɛ kwan no so nyinaa ma. Mmarima no san bɛbɔɔ ɔhene amanneɛ.

16 Ɛnna ɔman no fii adi kɔsesaw Siriafo asoɛe hɔ nneɛma; enti esiam muhumuhu seah susude baako bo bɛyɛɛ dwetɛbona baako, na baali seah susude abien bo bɛyɛɛ dwetɛbona baako sɛnea Yehowa kae no.+ 17 Ɔhene boafo a ogye no di no, ɔhene paw no sɛ ɔnhwɛ kurow pon no ano, nanso ɔman no twiw faa no so wɔ ɔpon no ano tiatiaa no so ma owui, na ɛmaa asɛm a nokware Nyankopɔn nipa no kae bere a ɔhene baa ne nkyɛn no baa mu. 18 Nea nokware Nyankopɔn nipa no ka kyerɛɛ ɔhene no baa mu saa sɛ: “Ɔkyena sesɛɛ, baali seah susude abien bo bɛyɛ dwetɛbona baako, na esiam muhumuhu seah susude baako bo bɛyɛ dwetɛbona baako wɔ Samaria kurow pon ano.”+ 19 Nanso saa bere no, ɔboafo no bisaa nokware Nyankopɔn nipa no sɛ: “Sɛ Yehowa rebue ɔsoro mfɛnsere mpo a, anka ɛbɛyɛ dɛn na asɛm yi atumi aba mu?” Elisa nso kae sɛ: “Wode w’ani behu, nanso ebi renka w’ano.” 20 Saa pɛpɛɛpɛ nso na ɛtoo no, efisɛ ɔman no twiw faa no so wɔ kurow pon no ano tiatiaa no so ma owui.

8 Elisa ka kyerɛɛ ɔbea a onyan ne babarima* no+ sɛ: “Sɔre na kɔ, wo ne wo fifo, na kɔyɛ ɔhɔho wɔ baabiara a wubenya, efisɛ Yehowa aka sɛ ɔkɔm bɛba,+ na ɛbɛba asaase yi so mfe ason.” 2 Enti ɔbea no sɔree, na ɔyɛɛ nea nokware Nyankopɔn nipa no kae no. Ɔne ne fifo kɔe, na wɔkɔtenaa Filistifo asaase+ so mfe ason.

3 Bere a mfe ason no baa awiei no, ɔbea no fii Filistifo asaase so san bae, na ɔkɔe sɛ ɔrekosu akyerɛ ɔhene sɛ wɔmfa ne fi ne n’asaase mma no. 4 Saa bere no, na ɔhene ne nokware Nyankopɔn nipa no somfo Gehasi rekasa, na ɔhene no kae sɛ: “Me pa wo kyɛw, nneɛma akɛse a Elisa ayɛ nyinaa,+ ka kyerɛ me.” 5 Bere a ogu so reka sɛnea Elisa nyan obi a wawu no,+ ɔbea a onyan ne babarima no baa ɔhene no nkyɛn, na osu kyerɛɛ no sɛ wɔmfa ne fi ne n’asaase mma no.+ Ɛhɔ ara na Gehasi kae sɛ: “Me wura ɔhene, ɔbea no ni, na ne babarima yi na Elisa nyan no no.” 6 Ɛnna ɔhene bisaa ɔbea no nea esii, na ɔno nso kaa asɛm no kyerɛɛ no. Afei ɔhene yii ahemfi panyin bi sɛ ɔmmoa ɔbea no, na ɔka kyerɛɛ ɔpanyin no sɛ: “Biribiara a ɛyɛ ɔbea no de no, fa ma no. Na efi da a ofii asaase yi so kɔe besi nnɛ, nea afi n’afuw no mu aba nyinaa, fa ka ho ma no.”

7 Na Elisa kɔɔ Damasko.+ Saa bere no, na Siria hene Ben-Hadad+ yare. Enti wɔkɔka kyerɛɛ no sɛ: “Nokware Nyankopɔn nipa+ no aba ha.” 8 Ɛnna ɔhene no ka kyerɛɛ Hasael+ sɛ: “Fa akyɛde na kɔ nokware Nyankopɔn nipa+ no nkyɛn. Ka kyerɛ no sɛ ommisa Yehowa mma me sɛ, ‘Me yare no bɛkɔ anaa?’” 9 Enti Hasael faa akyɛde kohyiaa no, ɔfaa Damasko nneɛma pa nyinaa bi; yoma 40 na ɛsoaa nneɛma no. Na okogyinaa Elisa anim kae sɛ: “Wo ba Ben-Hadad, Siria hene no na asoma me wo nkyɛn. Ose mimmebisa wo sɛ, ‘Me yare no bɛkɔ anaa?’” 10 Ɛnna Elisa ka kyerɛɛ no sɛ: “Kɔ na kɔka kyerɛ no sɛ, ‘Wo ho bɛtɔ wo,’ nanso Yehowa ayi akyerɛ me sɛ owu na obewu.”+ 11 Na ɔhwɛɛ no* dinn kosii sɛ ɔyɛɛ basaa. Na nokware Nyankopɔn nipa no sui. 12 Ɛnna Hasael bisaa no sɛ: “Adɛn nti na me wura resu?” Na obuae sɛ: “Efisɛ minim bɔne a wobɛyɛ Israelfo.+ Wode ogya bɛhyew wɔn nkurow a ɛyɛ den, wode sekan bekunkum wɔn mmarima a wonim ko, wobɛtetew wɔn mma mu, na wɔn mmea a wɔnyenyem nso, wobɛpaapae wɔn mu.”+ 13 Ɛnna Hasael kae sɛ: “Ɛbɛyɛ dɛn na w’akoa, ɔkraman te sɛ me ayɛ ade a ɛte saa?” Nanso Elisa kae sɛ: “Yehowa ayi akyerɛ me sɛ wo na wobɛyɛ Siria hene.”+

14 Ɛnna ogyaw Elisa hɔ, na ɔsan kɔɔ ne wura nkyɛn. Na ne wura bisaa no sɛ: “Ɛdɛn na Elisa ka kyerɛɛ wo?” Na obuae sɛ: “Ɔka kyerɛɛ me sɛ wo ho bɛtɔ wo.”+ 15 Nanso ade kyee no, Hasael faa kuntu bɔɔ nsu mu de kataa ɔhene no anim, na ɔde tuaa no ahome kosii sɛ owui.+ Na Hasael bedii n’ade.+

16 Israel hene Yehoram a ɔyɛ Ahab ba no ahenni afe a ɛto so anum mu+ no, bere a na Yehosafat di ade wɔ Yuda no, Yuda hene Yehosafat ba Yehoram+ bedii hene. 17 Bere a obedii ade no, na wadi mfe 32, na odii hene mfe awotwe wɔ Yerusalem. 18 Ɔfaa Israel ahemfo akwan so+ sɛnea Ahab fifo yɛe no,+ efisɛ ɔwaree Ahab babea.+ Ɔyɛɛ nneɛma bɔne wɔ Yehowa ani so.+ 19 Nanso Yehowa ampɛ sɛ ɔsɛe Yuda esiane n’akoa Dawid nti,+ efisɛ na wahyɛ no bɔ sɛ ɔbɛma kanea bi ahyerɛn+ ama ɔne ne mma daa.

20 Ne bere so no, Edomfo tew atua tiaa Yuda,+ na wosii wɔn ankasa hene.+ 21 Enti Yehoram kɔɔ Sair, ɔne ne nteaseɛnam a ɛka ne ho nyinaa, na ɔsɔree anadwo kokunkum Edomfo a wɔatwa ɔne nteaseɛnam so asahene no ho ahyia no, na nkurɔfo no guan kokɔɔ wɔn ntamadan mu. 22 Ne nyinaa akyi no, Edom akɔ so atew Yuda so atua abesi nnɛ. Saa bere no ara, Libnafo+ nso tew atua.

23 Yehoram ho nsɛm a aka, nea ɔyɛe nyinaa, wɔakyerɛw wɔ Yuda ahemfo abakɔsɛm nhoma no mu. 24 Ɛnna Yehoram ne n’agyanom kɔdae, na wosiee no kaa n’agyanom ho wɔ Dawid Kurow+ mu. Na ne ba Ahasia+ bedii n’ade.

25 Israel hene Yehoram a ɔyɛ Ahab ba no ahenni afe a ɛto so 12 mu no, Yuda hene Yehoram ba Ahasia bedii hene.+ 26 Ahasia bedii ade no, na wadi mfe 22, na odii hene afe baako wɔ Yerusalem. Ne maame din de Atalia,+ na na ɔyɛ Israel hene Omri+ banana.* 27 Ɔfaa Ahab+ fifo akwan so, na ɔyɛɛ Yehowa ani so bɔne sɛnea Ahab fifo yɛe no, efisɛ ɔwaree Ahab fi, na ɔne wɔn bɛbɔɔ abusua.+ 28 Enti ɔne Yehoram a ɔyɛ Ahab ba no boom ne Siria hene Hasael kɔkoe wɔ Ramot-Gilead,+ nanso Siriafo no piraa Yehoram.+ 29 Enti Ɔhene Yehoram san kɔɔ Yesreel+ sɛ ɔrekɔsa ne ho yare, efisɛ bere a ɔne Siria hene Hasael kɔkoe+ no, Siriafo no piraa no wɔ Rama. Yuda hene Ahasia a ɔyɛ Yehoram ba no kɔɔ Yesreel sɛ ɔrekɔhwɛ Ahab ba Yehoram, efisɛ na wapira.*

9 Ɛnna odiyifo Elisa frɛɛ adiyifo mma no baako ka kyerɛɛ no sɛ: “Fa ntama kyekyere w’asen, na yɛ ntɛm fa ngo toa yi kɔ Ramot-Gilead.+ 2 Sɛ wudu hɔ a, hwehwɛ Nimsi ba Yehosafat ba Yehu+ wɔ hɔ; kɔ ne nkyɛn na ma ɔnsɔre mfi ne nuanom mu, na fa no kɔ pia mu. 3 Afei fa ngo toa no na hwie ngo no gu ne tirim, na ka sɛ, ‘Nea Yehowa aka ni: “Masra wo asi wo hene wɔ Israel so.”’+ Wuwie a, bue pon no na guan fi hɔ ntɛm.”

4 Enti odiyifo no somfo sii kwan so kɔɔ Ramot-Gilead. 5 Bere a oduu hɔ no, na asahene no tete hɔ, na ɔkae sɛ: “Ɔsahene, mepɛ sɛ meka asɛm bi kyerɛ wo.” Ɛnna Yehu bisaa no sɛ: “Yɛn mu hena?” Na ɔkae sɛ: “Ɔsahene, ɛyɛ w’ankasa.” 6 Enti Yehu sɔre kɔɔ ofie hɔ, na ɔsomfo no hwiee ngo no guu ne tirim, na ɔka kyerɛɛ no sɛ, “Nea Yehowa, Israel Nyankopɔn aka ni: ‘Masra wo asi wo hene wɔ Yehowa man Israel so.+ 7 Kunkum wo wura Ahab fifo, na mɛma Yesebel atua me nkoa adiyifo no ne Yehowa nkoa a okunkum wɔn no nyinaa mogya ho ka.+ 8 Na Ahab fifo nyinaa bewuwu; ɔbarima* biara a ɔwɔ Ahab fi no, mekum no, Israel nipahunu a wɔmfa no nyɛ hwee mpo, mekum no.+ 9 Na mɛsɛe Ahab fi sɛnea mesɛee Nebat ba Yeroboam+ fi ne Ahiya ba Baasa+ fi no. 10 Na Yesebel de, nkraman na ebedi ne nam wɔ Yesreel asaase no so,+ na obiara rensie no.’” Ɔkaa saa no, obuee pon no guanee.+

11 Bere a Yehu san kɔɔ ne wura nkoa no nkyɛn no, wobisaa no sɛ: “Biribiara yɛ bɔkɔɔ anaa? Adɛn nti na ɔbɔdamfo yi baa wo nkyɛn?” Ɛnna ɔka kyerɛɛ wɔn sɛ: “Mo ara munim ɔbarima yi ne sɛnea ɔkeka ne nsɛm.” 12 Nanso wɔkae sɛ: “Ɛnyɛ nokware! Yɛsrɛ wo, nea ɔkae no, ka kyerɛ yɛn.” Ɛnna ɔkae sɛ: “Nea ɔka kyerɛɛ me ni, ɛnna ɔka kaa ho sɛ, ‘Nea Yehowa aka ne sɛ: “Masra wo asi wo hene wɔ Israel so.”’”+ 13 Ɛhɔ ara na wɔn nyinaa yɛɛ ntɛm yiyii wɔn ntama, na wɔde sesɛw fam wɔ stɛps no so maa no,+ na wɔbɔɔ abɛn kae sɛ: “Yehu abɛyɛ ɔhene!”+ 14 Ɛnna Nimsi ba Yehosafat ba Yehu+ bɔɔ Yehoram ho pɔw.

Saa bere no, Siria hene Hasael+ nti, na Yehoram ne Israel nyinaa rebɔ Ramot-Gilead+ ho ban. 15 Akyiri yi, Ɔhene Yehoram san kɔɔ Yesreel+ sɛ ɔrekɔsa ne ho yare, efisɛ bere a ɔne Siria hene Hasael kɔkoe no,+ Siriafo piraa no.

Afei Yehu kae sɛ: “Sɛ mowɔ m’afã* a, ɛnde mommma obiara nnguan mmfi kurow no mu nnkɔbɔ amanneɛ wɔ Yesreel.” 16 Ɛnna Yehu tenaa ne teaseɛnam mu kɔɔ Yesreel, efisɛ na Yehoram apira da hɔ, na Yuda hene Ahasia nso kɔ hɔ sɛ ɔrekɔhwɛ Yehoram. 17 Ná ɔwɛmfo gyina Yesreel aban no so, na ohui sɛ Yehu ne ne dɔm reba. Ɛhɔ ara na ɔkae sɛ: “Mihu nnipadɔm bi sɛ wɔreba.” Yehoram kae sɛ: “Soma ɔpɔnkɔsotefo ma onkohyia wɔn na ommisa sɛ, ‘Wode asomdwoe na ɛnam anaa?’” 18 Enti obi a ɔte ɔpɔnkɔ so kohyiaa no na ɔkae sɛ: “Nea ɔhene aka ni, ‘Wode asomdwoe na ɛnam anaa?’” Ɛnna Yehu kae sɛ: “Wunim nea wɔfrɛ no ‘asomdwoe’? Dan wo ho bedi m’akyi!”

Ɛnna ɔwɛmfo no bɔɔ amanneɛ sɛ: “Ɔbɔfo no koduu wɔn nkyɛn nanso wansan amma.” 19 Enti ɔsomaa ɔpɔnkɔsotefo a ɔto so abien, na oduu wɔn nkyɛn no, ɔkae sɛ: “Nea ɔhene aka ni, ‘Wode asomdwoe na ɛnam anaa?’” Ɛnna Yehu kae sɛ: “Wunim nea wɔfrɛ no ‘asomdwoe’? Dan wo ho bedi m’akyi!”

20 Ɛnna ɔwɛmfo no bɔɔ amanneɛ sɛ: “Okoduu wɔn nkyɛn nanso wansan amma, na mehwɛ sɛnea teaseɛnam no reba no a, ɛte sɛ nea Nimsi banana* Yehu na ɔreka; ɔka no sɛnea wabɔ dam.” 21 Ɛnna Yehoram kae sɛ: “Siesie teaseɛnam no!” Enti wosiesiee teaseɛnam a ɔde kɔ ɔko no maa no, na Israel hene Yehoram ne Yuda hene Ahasia+ tenatenaa wɔn nteaseɛnam mu sɛ wɔrekohyia Yehu. Wɔkɔtoo no wɔ Yesreelni Nabot asaase+ no so.

22 Bere a Yehoram huu Yehu no, ntɛm ara na ɔkae sɛ: “Yehu, wode asomdwoe na ɛnam anaa?” Ɛnna ɔno nso kae sɛ: “Bere a wo maame Yesebel+ aguamammɔ ne n’asumansɛm+ bebrebe no da so wɔ hɔ yi, ɛbɛyɛ dɛn na asomdwoe aba?” 23 Ntɛm ara na Yehoram dan ne ho sɛ ɔreguan, na ɔka kyerɛɛ Ahasia sɛ: “Ahasia, wanya yɛn!” 24 Ɛnna Yehu twee agyan tow wɔɔ Yehoram akyi ma ekopuee ne komam, na otwa hwee ne teaseɛnam no mu. 25 Afei ɔka kyerɛɛ ne boafo Bidkar sɛ: “Ma no so tow no kyene Yesreelni Nabot+ asaase no so. Kae sɛ me ne wo nyinaa na na yɛka teaseɛnam di ne papa Ahab akyi bere a Yehowa kaa atemmusɛm yi tiaa no sɛ:+ 26 ‘“Ampa, nnɛra mihuu Nabot mogya+ ne ne mma mogya,” Yehowa asɛm ni, “asaase yi ara so na metua wo ka,”+ Yehowa asɛm ni.’ Enti ma no so tow no kyene asaase no so sɛnea Yehowa kae no.”+

27 Bere a Yuda hene Ahasia+ huu nea ɛrekɔ no, oguan faa turo fi kwan no so. (Akyiri yi, Yehu tiw no, na ɔkae sɛ: “Munkum ɔno nso!” Enti bere a ɔte teaseɛnam mu rekɔ Gur a ɛbɛn Yibleam+ no, wopiraa no. Nanso ɔtoaa so ara koduu Megido, na owui wɔ hɔ. 28 Ɛnna ne nkoa de no too teaseɛnam mu kɔɔ Yerusalem, na wosiee no wɔ ne damoa mu kaa n’agyanom ho wɔ Dawid Kurow+ mu. 29 Ahab ba Yehoram ahenni afe a ɛto so 11 mu na Ahasia+ bedii Yuda so hene.)

30 Bere a Yehu beduu Yesreel+ no, Yesebel+ tee. Enti ɔde adubiri kekaa n’ani akyi, na osiesiee ne ti ho, na ogyinaa mfɛnsere mu hwɛɛ fam. 31 Bere a Yehu wuraa kurow no pon mu bae no, ɔbea no bisaa no sɛ: “Simri a okum ne wura no, esii no yiye anaa?”+ 32 Ɛnna ɔno nso maa n’ani so hwɛɛ mfɛnsere no mu, na obisae sɛ: “Hena na ɔwɔ m’afã? Hena?”+ Ɛhɔ ara na nhenkwaa baanu anaa baasa begyinaa hɔ hwɛɛ no wɔ fam hɔ. 33 Ɔkae sɛ: “Montow no nhwe fam!” Enti wɔtow no hwee fam, na ne mogya no bi bɔ petee ɔfasu no ne apɔnkɔ no ho, na n’apɔnkɔ no tiatiaa no so. 34 Afei ɔkɔɔ mu kodidii na ɔnomee, na ɔkae sɛ: “Mesrɛ mo, monkɔfa ɔbea busuyɛfo no na munsie no. Anyɛ hwee koraa ɔyɛ ɔhene babea.”+ 35 Nanso bere a wɔkɔe sɛ wɔrekosie no no, wɔanhu ne ho hwee sɛ ne tikora ne ne nan ase ne ne nsayam.+ 36 Bere a wɔsan bɛbɔɔ no amanneɛ no, ɔkae sɛ: “Yehowa asɛm a ɔnam n’akoa Tisbini Elia so kae no na aba mu+ no. Ɔkae sɛ, ‘Nkraman na ebedi Yesebel nam wɔ Yesreel asaase no so.+ 37 Na Yesebel funu bɛyɛ sɛ sumina* wɔ Yesreel asaase no so, sɛnea ɛbɛyɛ a obi renka sɛ: “Yesebel ni.”’”

10 Ná Ahab+ wɔ mma mmarima 70 wɔ Samaria. Enti Yehu kyerɛw krataa de soma kɔɔ Samaria kɔmomaa Yesreel atitiriw, mpanyimfo,+ ne wɔn a wɔhwɛ Ahab mma so* no sɛ: 2 “Mo wura mma wɔ mo nkyɛn, na nteaseɛnam ne apɔnkɔ ne kurow a wɔabɔ ho ban ne akode nso wɔ mo nsam. Enti sɛ mo nsa ka krataa yi a, 3 munyi mo wura mma no mu nea odi mu na ɔfata paa,* na momfa no nsi ne papa agua so, na monko mma mo wura fi.”

4 Nanso ehu kaa wɔn, na wɔkae sɛ: “Hwɛ! Ahemfo baanu mpo antumi annyina n’anim,+ na yɛn na yebetumi?” 5 Enti ahemfi* panyin, kurow so hwɛfo, mpanyimfo, ne wɔn a wɔhwɛ ɔhene mma so no soma kɔka kyerɛɛ Yehu sɛ: “Yɛyɛ wo nkoa, na nea wobɛka akyerɛ yɛn biara, yɛbɛyɛ. Yɛrensi obiara hene. Nea eye wɔ w’ani so biara, yɛ.”

6 Ɛnna ɔkyerɛw wɔn krataa a ɛto so abien sɛ: “Mowɔ m’afã na sɛ mubetie me a, ɛnde muntwitwa mo wura mma mmarima a wɔwɔ mo nkyɛn no ti, na momfa mmrɛ me ɔkyena saa bere yi wɔ Yesreel.”

Saa bere no, na ɔhene mma 70 wɔ kurow no mu atitiriw nkyɛn a wɔrehwɛ wɔn. 7 Bere a wɔn nsa kaa krataa no ara pɛ, wɔfaa ɔhene mma mmarima 70 no kunkum wɔn,+ na wɔde wɔn ti guu nkɛntɛn mu, na wɔde kɔmaa no wɔ Yesreel. 8 Ɛnna obi bɛka kyerɛɛ no sɛ: “Wɔde ɔhene mma no ti aba.” Na ɔkae sɛ: “Mommoaboa ano akuw abien mfa ngu ɔkwan no ano nkosi anɔpa.” 9 Eduu anɔpa a opuei no, obegyinaa nkurɔfo no nyinaa anim ka kyerɛɛ wɔn sɛ: “Mo ho nni asɛm.* Me na mebɔɔ me wura ho pɔw kum no,+ nanso hena na okum eyinom nyinaa? 10 Enti munhu sɛ Yehowa asɛm biara nni hɔ a Yehowa aka atia Ahab fifo a ɛremma mu.*+ Yehowa na wama asɛm a ɔnam n’akoa Elia so kae no aba mu.”+ 11 Afei nso, Yehu kunkum Ahab fifo a wɔaka wɔ Yesreel nyinaa ne n’akunini, ne nnamfo, ne n’asɔfo+ nyinaa, na ne ho nipa biara anka.+

12 Ɛnna ɔsɔre siim sɛ ɔrekɔ Samaria. Ná ofi* bi wɔ kwan no so a nguanhwɛfo twitwa wɔn nguan ho nwi wɔ hɔ. 13 Na Yehu hyiaa Yuda hene Ahasia+ nuanom, na obisaa wɔn sɛ, “Moyɛ henanom?” Wobuae sɛ: “Yɛyɛ Ahasia nuanom, na yɛrekɔ akɔhwɛ sɛ ɔhene ne ɔhemmaa* mma no ho ye anaa.” 14 Ntɛm ara na ɔkae sɛ: “Monkyere wɔn anikan!” Ɛnna wɔkyeree wɔn anikan na wokunkum wɔn wɔ abura ho wɔ baabi a nguanhwɛfo twitwa wɔn nguan ho nwi no; ná wɔyɛ mmarima 42. Wannyaw ɔbaako mpo.+

15 Ofi hɔ rekɔ no, ohuu Rekab+ ba Yehonadab+ sɛ ɔrebehyia no. Okyiaa* no, na obisaa no sɛ: “Wo koma di mu wɔ me ho sɛnea me koma di mu wɔ wo ho no anaa?”

Yehonadab kae sɛ: “Yiw.”

“Sɛ saa a, ɛnde fa wo nsa to me nsayam.”

Enti ɔde ne nsa too ne nsayam. Na Yehu ma ɔforo bɛkaa ne ho wɔ teaseɛnam no mu. 16 Ɛnna ɔka kyerɛɛ no sɛ: “Bɛsen kogya me na kɔhwɛ sɛnea mereko ama Yehowa.”*+ Enti wɔma ɔkaa ne ho wɔ teaseɛnam no mu ne no kɔe. 17 Okoduu Samaria, na okunkum Ahab fifo a wɔaka wɔ Samaria nyinaa kosii sɛ ɔtɔree wɔn ase,+ na ɛno maa Yehowa asɛm a ɔka kyerɛɛ Elia no baa mu.+

18 Bio nso, Yehu boaboaa ɔman no nyinaa ano, na ɔka kyerɛɛ wɔn sɛ: “Ahab som Baal kakraa bi.+ Yehu de, ɔbɛsom no paa. 19 Enti Baal adiyifo no nyinaa,+ wɔn a wɔsom no nyinaa ne asɔfo no nyinaa,+ momfrɛfrɛ wɔn mmra me nkyɛn. Munnnyaw ɔbaako mpo, efisɛ merebɛbɔ afɔre kɛse ama Baal. Obiara a wamma ase no, ɔrentena nkwa mu.” Nanso na Yehu pɛ sɛ ɔfa nyansakwan so kunkum Baal asomfo no nti na ɔyɛɛ saa.

20 Yehu toaa n’asɛm no so sɛ: “Momfa nto gua na wɔnyɛ nhyiam titiriw mma Baal.” Enti wɔde too gua. 21 Ɛno akyi no, Yehu de nkra kɔɔ Israel nyinaa, na Baal asomfo no nyinaa behyiaam. Ɔbaako mpo anka a wamma bi. Wɔbaa Baal fi hɔ* maa Baal fi+ hɔ nyinaa yɛɛ ma. 22 Afei ɔka kyerɛɛ nea ɔhwɛ ntaade so no sɛ: “Fa ntaade brɛ Baal asomfo no nyinaa.” Enti ɔde ntaade no brɛɛ wɔn. 23 Ɛnna Yehu ne Rekab ba Yehonadab+ baa Baal fi hɔ. Na ɔka kyerɛɛ Baal asomfo no sɛ: “Monhwɛ mu yiye na Yehowa somfo biara ammɛfra mo mu; momma ɛnka Baal asomfo nkutoo.” 24 Afei wɔbae sɛ wɔrebɛbɔ afɔre ne ɔhyew afɔre, na na Yehu de mmarima 80 agyinagyina abɔnten aka akyerɛ wɔn sɛ: “Sɛ mo mu bi ma mmarima a mede wɔn bɛhyɛ mo nsa no bi guan a, ɛnde ɔde ne nkwa betwa so.”*

25 Bere a owiee ɔhyew afɔre no, ɛhɔ ara na Yehu ka kyerɛɛ awɛmfo* ne akunini no sɛ: “Mommra mmekunkum wɔn! Mommma obiara nnguan.”+ Ɛnna awɛmfo ne akunini no fii ase de sekan kunkum wɔn, na wɔtotow wɔn afunu guu abɔnten, na wokunkum wɔn ara koduu Baal fi no pia* mu. 26 Ɛnna woyiyii Baal fi hɔ abosom adum+ no fii adi, na wɔhyew ne nyinaa.+ 27 Afei wobubuu Baal bosom dum+ no, na Baal fi+ no nso, wobubui, na wɔde yɛɛ agyananbea de besi nnɛ.

28 Eyi ne ɔkwan a Yehu faa so tuu Baal ase fii Israel. 29 Nanso Nebat ba Yeroboam bɔne a ɔyɛe a ɛmaa Israel nso yɛɛ bɔne no de, Yehu antwe ne ho amfi ho; sika kɔkɔɔ nantwi mma a na baako si Betel na baako nso si Dan no, wanyi amfi hɔ.+ 30 Ɛnna Yehowa ka kyerɛɛ Yehu sɛ: “Esiane sɛ woadi asɛmpa na woayɛ nea ɛteɛ wɔ m’ani so, na woayɛ nea na ɛwɔ me komam sɛ mede bɛyɛ Ahab fifo nyinaa+ nti, w’asefo bɛtena Israel ahengua so akosi awo ntoatoaso anan so.”+ 31 Nanso Yehu anhwɛ amfa ne koma nyinaa anni Yehowa, Israel Nyankopɔn Mmara so.+ Wantwe ne ho amfi bɔne a Yeroboam maa Israel yɛe no ho.+

32 Saa bere no, Yehowa maa kwan maa nkurɔfo faa Israel nsaase nkakrankakra; Hasael tuu n’ani sii wɔn so wɔ Israel asaase nyinaa so,+ 33 efi Yordan ho kosi apuei fam, Gileadfo nsaase nyinaa, Gadfo ne Rubenfo ne Manasefo+ de, efi Aroer a ɛbɛn Arnon Bon no ne Gilead ne Basan+ nso.

34 Yehu ho nsɛm a aka, nea ɔyɛe ne ne nnwuma akɛse nyinaa, wɔakyerɛw wɔ Israel ahemfo abakɔsɛm nhoma no mu. 35 Ɛnna Yehu ne n’agyanom kɔdae, na wosiee no wɔ Samaria, na ne ba Yehoahas+ bedii n’ade. 36 Mfe* dodow a Yehu de dii Israel so hene wɔ Samaria no si mfe 28.

11 Bere a Ahasia maame Atalia+ hui sɛ ne ba no awu no,+ ɔsɔre kunkum adehye mma* no nyinaa.+ 2 Nanso Ɔhene Yehoram babea Yehoseba a ɔyɛ Ahasia nuabea no wiaa Ahasia ba Yehoas,+ na ɔfaa no fii ɔhene mma a na wɔrebekunkum wɔn no mu, na ɔde ɔne ɔbea a ɔhwɛ no no* kosiee pia mu. Wɔde no hintaw Atalia, enti wannya no ankum no. 3 Ɔne no tenaa Yehowa fi hɔ mfe asia a obiara anhu no. Saa bere no, Atalia na na odi ɔman no so.

4 Afe a ɛto so ason mu no, Yehoiada soma kɔfrɛɛ Karia awɛmfo ne ahemfi awɛmfo+ no ɔhaha so mpanyimfo baa ne nkyɛn wɔ Yehowa fi, na ɔne wɔn yɛɛ apam ma wɔkaa ntam wɔ Yehowa fi hɔ, na ɛno akyi no, ɔde ɔhene ba no kyerɛɛ wɔn.+ 5 Ɔka kyerɛɛ wɔn sɛ: “Nea monyɛ ni: Monkyɛ mo mu abiɛsa na nkyem baako mmra Homeda, na wɔmmɛwɛn ɔhene fi* no yiye;+ 6 nkyem baako nso nkɔ Nnyinaso Pon no ano, na nkyem baako a aka no nso mmegyina ɔpon a ɛwɔ ahemfi awɛmfo no akyi no ano; obiara nnyina ne gyinabea nwɛn ofi no. 7 Mo mu akuw abien a wɔawie wɔn adwuma Homeda no, wɔn nso nwɛn Yehowa fi no yiye, na wɔmmɔ ɔhene no ho ban. 8 Momfa mo akode nkurakura mo nsam na muntwa ɔhene no ho nhyia. Obiara a ɔbɛba awɛmfo no mu no, munkum no. Baabiara a ɔhene bɛkɔ* no, monhwɛ sɛ moka ne ho.”

9 Enti ɔha biara so panyin+ yɛɛ nea ɔsɔfo Yehoiada kae no pɛpɛɛpɛ. Wɔn mu biara de ne mmarima a wɔreba hɔ Homeda abɛsom ne wɔn a wɔrenyɛ adwuma saa Homeda no bae, na wɔbaa ɔsɔfo Yehoiada+ nkyɛn. 10 Afei ɔsɔfo no de Ɔhene Dawid mpeaw ne akyɛm akɛse ne akyɛm nketewa a ɛwɔ Yehowa fi hɔ no maa ɔhaha so mpanyimfo no. 11 Na ahemfi awɛmfo+ no faa wɔn akode kurakuraa wɔn nsam, na wogyinagyinaa ofi no benkum ne ne nifa so ne afɔremuka no+ ho ne ofi no ho, na wotwaa ɔhene no ho hyiae. 12 Ɛnna Yehoiada de ɔhene ba+ no pue bae, na wɔhyɛɛ no ahenkyɛw,* na wɔde Adanse+ nhoma* no too ne ti so, na wɔsraa no sii no hene. Afei wɔbɔɔ wɔn nsam kae sɛ: “Ɔhene, nya nkwa daa!”+

13 Bere a Atalia tee sɛ ɔmanfo no retu mmirika no, ɛhɔ ara na ɔbaa nkurɔfo no nkyɛn wɔ Yehowa fi hɔ.+ 14 Ɔnkɔhwɛ a, ɔhene no na ogyina abobow ano adum no baako ho sɛnea amanne te yi!+ Saa bere no, na mpanyimfo no ne wɔn a wɔrehyɛn ntorobɛnto+ no wɔ ɔhene no nkyɛn, na na ɔman no nyinaa redi ahurusi na wɔrehyɛn ntorobɛnto. Ɛhɔ ara na Atalia suan n’ataade mu, na ɔteɛɛm sɛ: “Atirisopam!* Atirisopam!” 15 Ɛnna ɔsɔfo Yehoiada ka kyerɛɛ ɔhaha so mpanyimfo+ a wɔdeda asraafo ano no sɛ: “Montwe no mfi nnipa no mu, na obiara a obedi n’akyi no, momfa sekan nkum no!” Nea ɛte ne sɛ, na ɔsɔfo no aka sɛ: “Munnkum no wɔ Yehowa fi.” 16 Enti wɔyeree no, na bere a wɔde no duu ɔpon a apɔnkɔ fa mu wura ɔhene fi*+ hɔ no, wokum no wɔ hɔ.

17 Ɛnna Yehoiada ne Yehowa ne ɔhene ne ɔman no nyinaa yɛɛ apam+ sɛ wɔbɛyɛ Yehowa man daa; na ɔmaa ɔhene no ne ɔman no nso yɛɛ apam.+ 18 Ɛno akyi no, ɔman no nyinaa kɔɔ Baal fi* kobubuu n’afɔremuka+ na wodwiriw n’ahoni gui,+ na Baal sɔfo Matan nso, wokum no+ wɔ afɔremuka no anim.

Ɛnna ɔsɔfo no de ahwɛfo sisii Yehowa fi so.+ 19 Afei ɔfaa ɔhaha so mpanyimfo,+ Karia awɛmfo, ahemfi awɛmfo,+ ne ɔman no mu nnipa nyinaa sɛ wɔmfa ɔhene no mfi Yehowa fi hɔ mmra. Enti wɔfaa ahemfi awɛmfo pon no mu kɔɔ ɔhene fi* hɔ, na ɔbɛtenaa ahengua no so.+ 20 Enti ɔman no mu nnipa nyinaa dii ahurusi, na asomdwoe baa kurow no mu, efisɛ na wɔde sekan akum Atalia wɔ ɔhene fi hɔ.

21 Yehoas+ bedii ade no, na wadi mfe ason.+

12 Yehu+ ahenni afe a ɛto so ason mu no, Yehoas+ bedii hene, na odii ade mfe 40 wɔ Yerusalem. Ne maame din de Sibiya, na na ofi Beer-Seba.+ 2 Yehoas yɛɛ nea ɛteɛ wɔ Yehowa ani so, nna a ɔsɔfo Yehoiada kyerɛkyerɛɛ no no nyinaa. 3 Mmom sorɔnsorɔmmea*+ no de, ɛkaa hɔ. Ɔman no kɔɔ so bɔɔ afɔre na wɔhyew afɔrebɔde wɔ sorɔnsorɔmmea hɔ.

4 Yehoas ka kyerɛɛ asɔfo no sɛ: “Afɔrebɔde kronkron+ sika a wɔde ba Yehowa fi nyinaa,+ ankorankoro tow, sika* a wɔn a wɔaka ntam no tua, ne sika biara a obi koma bɛka no ama ɔde aba Yehowa fi no,+ munnyigye ne nyinaa. 5 Momma asɔfo no nnyigye mfi wɔn a wɔde bɛba no* nkyɛn, na wɔmfa nsiesie baabiara a asɛe* wɔ ofi no mu.”+

6 Eduu Ɔhene Yehoas ahenni afe a ɛto so 23 no, na asɔfo no nsiesiee mmeae a asɛesɛe wɔ ofie hɔ no.+ 7 Enti Ɔhene Yehoas frɛɛ ɔsɔfo Yehoiada+ ne asɔfo a aka no, na ɔka kyerɛɛ wɔn sɛ: “Adɛn nti na munsiesiee mmeae a asɛesɛe wɔ ofie hɔ no? Ɛno nti afei munnnyigye sika biara mmfi wɔn a wɔde ba no nkyɛn bio, gye sɛ sika a wɔde besiesie ofi no nkutoo.”+ 8 Ɛnna asɔfo no gye toom sɛ wɔrennyigye sika mfi ɔman no nkyɛn bio, na ɛnyɛ wɔn na wɔbɛhwɛ ama wɔasiesie mmeae a asɛesɛe wɔ ofie hɔ no.

9 Ɔsɔfo Yehoiada faa adaka bi,+ na otuu ne mmuaso no mu tokuru de sii afɔremuka no nkyɛn. Sɛ obi fi abɔnten reba Yehowa fi hɔ a, na adaka no si nifa so. Emu na na asɔfo a wɔhwɛ ɔpon ano no de sika a wɔde ba Yehowa fi no nyinaa gu.+ 10 Bere biara a wobehu sɛ sika pii aba adaka no mu no, ɔhene kyerɛwfo ne ɔsɔfo panyin no yi,* na wɔkan ntoboa a aba Yehowa fi hɔ no.+ 11 Afei wɔde sika a wɔakan no hyɛ wɔn a wɔdeda adwuma no ano wɔ Yehowa fi no nsa, na wɔn nso de tua wɔn a wɔyɛ nnua ho adwuma ne adansifo a wɔreyɛ Yehowa fi hɔ adwuma no ka.+ 12 Wɔde bi nso tua abantofo ne abopaefo no ka, na wɔde bi tɔ nnua a wɔapae ne abo a wɔapae a wɔde besiesie mmeae a asɛesɛe wɔ Yehowa fi hɔ no, na wɔde bi nso tuatua ɛka biara a wɔbɔ de siesie ofi no.

13 Nanso sika a wɔde ba Yehowa fi no, wɔamfa bi anyɛ Yehowa fi hɔ dwetɛ asɛn, adumgya, nkankyee, ntorobɛnto,+ sika kɔkɔɔ nneɛma, ne dwetɛ nneɛma no.+ 14 Mmom no, adwumayɛfo no nkutoo na wɔde sika no maa wɔn, na wɔn nso de siesiee Yehowa fi no. 15 Nnipa a wɔde sika hyɛɛ wɔn nsa sɛ wɔmfa mma adwumayɛfo no, wɔne wɔn ammu ho akontaa, efisɛ na wɔyɛ anokwafo.+ 16 Afodi afɔre sika+ ne bɔne ho afɔre sika no de, wɔamfa amma Yehowa fi hɔ; ná ɛyɛ asɔfo no de.+

17 Saa bere no na Siria hene Hasael+ kɔɔ Gat+ so ne no kɔkoe, na odii kurow no so nkonim. Ɛno akyi no, Hasael yɛe sɛ ɔne Yerusalem rebɛko.*+ 18 Ɛnna Yuda hene Yehoas sesaw afɔrebɔde kronkron a ne nananom Yehosafat, Yehoram, ne Ahasia a na wɔyɛ Yuda ahemfo no ahyira so no nyinaa, ne n’afɔrebɔde kronkron ne sika kɔkɔɔ a ɛwɔ Yehowa fi ne ɔhene fi* akorade hɔ nyinaa, na ɔde kɔmaa Siria hene+ Hasael. Enti ogyaw Yerusalem hɔ kɔe.

19 Yehoas ho nsɛm a aka ne nea ɔyɛe nyinaa, wɔakyerɛw wɔ Yuda ahemfo abakɔsɛm nhoma no mu. 20 Nanso Yehoas nkoa sɔre yɛɛ baako bɔɔ ne ho pɔw,+ na wokum no wɔ Esiw*+ dan no mu wɔ ɔkwan a ɛkɔ Sila no so. 21 Simat ba Yosakar ne Somer ba Yehosabad a na wɔyɛ ne nkoa no na wokum no.+ Wosiee no kaa n’agyanom ho wɔ Dawid Kurow mu, na ne ba Amasia bedii n’ade.+

13 Yuda hene Ahasia+ ba Yehoas+ ahenni afe a ɛto so 23 mu no, Yehu+ ba Yehoahas bedii Israel so hene wɔ Samaria mfe 17. 2 Ɔyɛɛ Yehowa ani so bɔne; Nebat ba Yeroboam bɔne a ɔmaa Israel yɛe no,+ ɛno ara bi na ɔyɛe. Wantwe ne ho amfi ho. 3 Enti Yehowa bo fuw+ Israel paa,+ na wɔn nna nyinaa no, ɔde wɔn hyɛɛ Siria hene Hasael+ ne Hasael ba Ben-Hadad+ nsa.

4 Akyiri yi, Yehoahas su frɛɛ Yehowa,* na Yehowa tiee no; ohuu sɛnea Siria hene hyɛɛ Israel so.+ 5 Enti Yehowa maa ogyefo bi begyee Israelfo+ fii Siriafo nsam, na Israelfo tenatenaa wɔn afi mu sɛ kan no.* 6 (Nanso bɔne a Yeroboam fifo yɛe a ɛmaa Israel nso yɛɛ bɔne no+ de, wɔantwe wɔn ho amfi ho. Saa bɔne no ara bi na wɔyɛe;* wɔanyi abosonnua*+ no nso amfi Samaria.) 7 Nea na Yehoahas wɔ ara ne nnipa 50 a wɔtete apɔnkɔ so, nteaseɛnam 10, ne mmarima 10,000 a wɔnam fam, efisɛ na Siria hene ayɛ wɔn pasaa;+ ná wayɛ wɔn sɛ awiporowbea mfuturu.+

8 Yehoahas ho nsɛm a aka, nea ɔyɛe nyinaa ne ne nnwuma akɛse no, wɔakyerɛw wɔ Israel ahemfo abakɔsɛm nhoma no mu. 9 Yehoahas ne n’agyanom kɔdae, na wosiee no wɔ Samaria,+ na ne ba Yehoas bedii n’ade.

10 Yuda hene Yehoas+ ahenni afe a ɛto so 37 mu no, Yehoahas ba Yehoas bedii Israel so hene wɔ Samaria mfe 16. 11 Ɔyɛɛ Yehowa ani so bɔne. Bɔne a Nebat ba Yeroboam maa Israel yɛe no,+ wantwe ne ho amfi emu biara ho. Saa bɔne no ara bi na ɔyɛe.*

12 Yehoas ho nsɛm a aka, nea ɔyɛe nyinaa ne ne nnwuma akɛse, ne sɛnea ɔne Yuda hene Amasia koe+ no, wɔakyerɛw wɔ Israel ahemfo abakɔsɛm nhoma no mu. 13 Yehoas ne n’agyanom kɔdae, na Yeroboam*+ bɛtenaa n’agua so, na wosiee Yehoas wɔ Samaria kaa Israel ahemfo ho.+

14 Bere a Elisa+ yare a ɔregye nna awu no, Israel hene Yehoas kɔɔ ne nkyɛn kosu guu no so, na ɔkae sɛ: “Me papa, me papa! Hwɛ, Israel ɔko teaseɛnam ne ne nkurɔfo a wɔtete apɔnkɔ so!”+ 15 Ɛnna Elisa ka kyerɛɛ no sɛ: “Fa agyan ne mmɛmma bra.” Enti ɔfaa agyan ne mmɛmma kurae. 16 Afei ɔka kyerɛɛ Israel hene sɛ: “Ma agyan no so.” Ɛnna ɔmaa so, na Elisa nso soo ɔhene no nsa. 17 Afei ɔkae sɛ: “Bue mfɛnsere a ɛkyerɛ apuei fam no.” Na obuei. Ɛnna Elisa kae sɛ: “Tow agyan no!” Na ɔtowee. Afei ɔkae sɛ: “Yehowa nkonimdi* agyan ni; Siria so nkonimdi agyan ni! Wubedi Siria so nkonim* wɔ Afek+ akosi sɛ wubewie wɔn koraa.”

18 Ɔtoaa n’asɛm no so sɛ: “Sesaw mmɛmma no.” Ɛnna ɔsesawee. Afei ɔka kyerɛɛ Israel hene sɛ: “Fa bobɔ fam.” Ɛnna ɔde bɔɔ hɔ mprɛnsa na ogyaee. 19 Na nokware Nyankopɔn nipa no bo fuw no, na ɔkae sɛ: “Anka ɛsɛ sɛ wode bɔ hɔ mpɛn anum anaa asia! Ɛno de, anka wubedi Siria so nkonim awie wɔn koraa, nanso seesei wubedi Siria so nkonim mprɛnsa pɛ.”+

20 Ɛno akyi no, Elisa wui na wosiee no. Afe no mfiase no,* na Moabfo asraafodɔm+ taa bɛtow hyɛ asaase no so. 21 Bere bi, na nkurɔfo rekosie ɔbarima bi, ɛnna wohui sɛ dɔm no bi reba. Ɛhɔ ara na wɔtow ɔbarima no too baabi a wosiee Elisa no, na woguanee. Bere a ɔbarima no amu kaa Elisa nnompe no, onyanee+ na ɔsɔre gyinaa ne nan so.

22 Yehoahas nna nyinaa mu no, Siria hene Hasael+ hyɛɛ Israel so.+ 23 Nanso apam a Yehowa ne Abraham,+ Isak,+ ne Yakob+ yɛe nti, ɔdom wɔn huu wɔn mmɔbɔ,+ na otwaa n’ani bɛhwɛɛ wɔn. Ná ɔmpɛ sɛ ɔsɛe wɔn; wantow wɔn ankyene besi nnɛ. 24 Bere a Siria hene Hasael wui no, ne ba Ben-Hadad bedii n’ade. 25 Nkurow a Hasael gye fii Yehoahas nkyɛn wɔ ɔko mu no, Yehoahas ba Yehoas san gye fii Ben-Hadad nsam. Yehoas dii no so nkonim* mprɛnsa,+ na ɔsan gyee Israel nkurow no.

14 Israel hene Yehoahas ba Yehoas+ ahenni afe a ɛto so abien mu no, Yuda hene Yehoas ba Amasia bedii hene. 2 Obedii hene no, na wadi mfe 25, na odii ade mfe 29 wɔ Yerusalem. Ne maame din de Yehoadin, na na ofi Yerusalem.+ 3 Ɔyɛɛ nea ɛteɛ wɔ Yehowa ani so, nanso wanto ne nana Dawid.+ Nea ne papa Yehoas yɛe no, ɛno ara bi na ɔno nso yɛe.+ 4 Mmom sorɔnsorɔmmea* no de, ɛkaa hɔ.+ Ɔman no kɔɔ so bɔɔ afɔre na wɔhyew afɔrebɔde wɔ sorɔnsorɔmmea hɔ.+ 5 Bere a ahenni no yɛɛ den wɔ ne nsam ara pɛ na okunkum ne nkoa a wokum ne papa a na odi hene no.+ 6 Awudifo no mma de, wankum wɔn, na ɔyɛɛ nea wɔakyerɛw wɔ Mose mmara nhoma no mu no. Ná Yehowa aka wom sɛ: “Munnkum agyanom esiane wɔn mma bɔne nti, na munnkum mma esiane wɔn agyanom bɔne nti; nea wayɛ bɔne no na ɛsɛ sɛ wokum no.”+ 7 Okunkum Edomfo+ mmarima 10,000 wɔ Nkyene Bon+ no mu. Saa bere no ara nso na ɔko faa Sela,+ na wɔtoo hɔ din Yokteel, na saa na wɔafrɛ hɔ de besi nnɛ.

8 Ɛnna Amasia tuu abɔfo kɔɔ Israel hene Yehu ba Yehoahas ba Yehoas nkyɛn kɔka kyerɛɛ no sɛ: “Bra ma yɛmfa mmɔ ani.”*+ 9 Israel hene Yehoas nso de nkra kɔmaa Yuda hene Amasia sɛ: “Lebanon nsɔensɔe soma kɔka kyerɛɛ Lebanon sida dua sɛ, ‘Fa wo babea ma me babarima aware.’ Nanso, Lebanon wuram aboa bi a ɔretwam tiatiaa nsɔensɔe no so sɛee no pasaa. 10 Woaka Edom agu,+ enti wo koma ama ne ho so. Woanya anuonyam a fa na hwɛ so tena wo fi.* Adɛn nti na worebɛpɛ wo ho asɛm ahwe ase ama Yuda nso ahwe ase bi?” 11 Nanso Amasia antie.+

Enti Israel hene Yehoas kɔe, na ɔne Yuda hene Amasia de kɔbɔɔ ani wɔ Bet-Semes+ wɔ Yuda asaase so.+ 12 Yuda dii nkogu wɔ Israel anim maa obiara guan kɔɔ ne fi.* 13 Israel hene Yehoas kyeree Yuda hene Amasia a ɔyɛ Yehoas ba a ɔno nso yɛ Ahasia ba no wɔ Bet-Semes. Ɛnna ɔde no baa Yerusalem, na obebuu Yerusalem fasu no basafa 400* guu mu, efi Efraim Pon+ no ano kosi Ntwea So Pon+ no ano. 14 Ɔsesaw sika kɔkɔɔ ne dwetɛ ne nneɛma a ɛwɔ Yehowa fi nyinaa ne nea ɛwɔ ɔhene fi* akorae hɔ. Afei ɔfaa ebinom yɛɛ wɔn nkoa, na ɔsan kɔɔ Samaria.

15 Yehoas ho nsɛm a aka, nea ɔyɛe ne ne nnwuma akɛse ne sɛnea ɔne Yuda hene Amasia koe no, wɔakyerɛw ne nyinaa wɔ Israel ahemfo abakɔsɛm nhoma no mu. 16 Yehoas ne n’agyanom kɔdae, na wosiee no wɔ Samaria+ kaa Israel ahemfo ho, na ne ba Yeroboam*+ bedii n’ade.

17 Israel hene Yehoahas+ ba Yehoas+ wu akyi no, Yuda hene Yehoas ba Amasia+ tenaa ase mfe 15 kaa ho. 18 Amasia ho nsɛm a aka no, wɔakyerɛw ne nyinaa wɔ Yuda ahemfo abakɔsɛm nhoma no mu. 19 Akyiri yi, nkurɔfo bɔɔ ne ho pɔw+ wɔ Yerusalem, enti oguan kɔɔ Lakis, nanso wɔmaa mmarima kotiw no wɔ Lakis kokum no wɔ hɔ. 20 Enti wɔde no too apɔnkɔ so besiee no wɔ Yerusalem kaa n’agyanom ho wɔ Dawid Kurow mu.+ 21 Ɛnna Yuda man no nyinaa faa Asaria*+ a wadi mfe 16+ no, na wosii no hene ma odii ne papa Amasia ade.+ 22 Ɔno na ɔsan kyekyee Elat+ ma ebedii Yuda nsam bio, bere a Ɔhene Amasia* ne n’agyanom kɔdae no.+

23 Yuda hene Yehoas ba Amasia ahenni afe a ɛto so 15 mu no, Israel hene Yehoas ba Yeroboam+ bedii hene wɔ Samaria mfe 41. 24 Ɔyɛɛ Yehowa ani so bɔne. Bɔne a Nebat ba Yeroboam maa Israel yɛe nyinaa,+ wantwe ne ho amfi ho. 25 Ɔhwɛ maa Israel ahye dedaa baabi a kan no na ɛwɔ, efi Lebo-Hamat*+ kosi ɛpo a ɛwɔ Araba+ no ano.* Ɛno maa asɛm a Yehowa, Israel Nyankopɔn nam n’akoa odiyifo Yona+ so kae no baa mu. Ná Yona yɛ Amitai ba, na na ofi Gat-Hefer.+ 26 Amanehunu pii a Israel faa mu no,+ Yehowa hui. Israelfo annya obiara a ɔbɛboa wɔn, onipahunu anaa nea wɔmfa no nyɛ hwee mpo wɔannya. 27 Nanso na Yehowa ahyɛ bɔ sɛ ɔrempopa Israel din mfi ɔsoro ase.+ Enti ɔnam Yehoas ba Yeroboam nsa so gyee wɔn.+

28 Yeroboam ho nsɛm a aka, nea ɔyɛe nyinaa ne ne nnwuma akɛse, sɛnea odii ako na ɔsan de Damasko+ ne Hamat+ maa Yuda wɔ Israel no, wɔakyerɛw wɔ Israel ahemfo abakɔsɛm nhoma no mu. 29 Yeroboam ne n’agyanom Israel ahemfo no kɔdae, na ne ba Sakaria+ bedii n’ade.

15 Israel hene Yeroboam* ahenni afe a ɛto so 27 mu no, Yuda hene Amasia+ ba Asaria*+ bedii hene.+ 2 Obedii hene no, na wadi mfe 16, na odii ade mfe 52 wɔ Yerusalem. Ne maame din de Yekolia, na na ofi Yerusalem. 3 Ɔyɛɛ nea ɛteɛ wɔ Yehowa ani so sɛnea ne papa Amasia yɛe no.+ 4 Mmom sorɔnsorɔmmea* no de, ɛkaa hɔ.+ Ɔman no kɔɔ so bɔɔ afɔre na wɔhyew afɔrebɔde wɔ sorɔnsorɔmmea hɔ.+ 5 Yehowa maa ɔhene no yaree kwata+ kosii sɛ owui, na ɔtew ne ho kɔtenaa ofi bi mu.+ Ne ba Yotam+ na ɔhwɛɛ ahemfi* no so, na ɔno na obuu ɔman no mu nnipa atɛn.+ 6 Asaria ho nsɛm a aka+ ne nea ɔyɛe nyinaa, wɔakyerɛw wɔ Yuda ahemfo abakɔsɛm nhoma no mu. 7 Asaria ne n’agyanom kɔdae,+ na wosiee no kaa n’agyanom ho wɔ Dawid Kurow mu, na ne ba Yotam bedii n’ade.

8 Yuda hene Asaria+ ahenni afe a ɛto so 38 mu no, Yeroboam ba Sakaria+ bedii Israel so hene wɔ Samaria abosome asia. 9 Ɔyɛɛ Yehowa ani so bɔne sɛnea n’agyanom yɛe no. Bɔne a Nebat ba Yeroboam maa Israel yɛe no,+ wantwe ne ho amfi ho. 10 Ɛnna Yebes ba Salum bɔɔ ne ho pɔw, na okum no+ wɔ Yibleam,+ na obedii n’ade. 11 Sakaria ho nsɛm a aka no, wɔakyerɛw ne nyinaa wɔ Israel ahemfo abakɔsɛm nhoma no mu. 12 Ɛno maa Yehowa asɛm a ɔka kyerɛɛ Yehu no baa mu. Ɔkae sɛ: “W’asefo bɛtena Israel ahengua so+ akosi awo ntoatoaso anan so.”+ Na saa ara na ɛbae.

13 Yuda hene Usia+ ahenni afe a ɛto so 39 mu no, Yebes ba Salum bedii hene wɔ Samaria, na odii ade bosome baako. 14 Ɛnna Gadi ba Menahem fii Tirsa+ kɔɔ Samaria, na okokum Yebes ba Salum+ wɔ Samaria, na obedii n’ade. 15 Salum ho nsɛm a aka ne pɔw a ɔbɔe no, wɔakyerɛw ne nyinaa wɔ Israel ahemfo abakɔsɛm nhoma no mu. 16 Saa bere no na Menahem fi Tirsa kɔsɛee Tifsa ne nea ɛwom nyinaa ne ɛhɔ nsaase, efisɛ wɔammue wɔn pon amma no. Emu apemfo nso, ɔpaapaee wɔn nyinaa mu.

17 Yuda hene Asaria ahenni afe a ɛto so 39 mu no, Gadi ba Menahem bedii Israel so hene wɔ Samaria mfe du. 18 Ɔyɛɛ Yehowa ani so bɔne. Ne nna nyinaa mu no, bɔne a Nebat ba Yeroboam maa Israel yɛe nyinaa,+ wantwe ne ho amfi ho. 19 Asiria hene Pul+ baa asaase no so. Enti Menahem maa Pul dwetɛ dwetikɛse* 1,000 sɛ ɔmmoa no mma n’ahenni no ntim.+ 20 Israelfo nkyɛn na Menahem nyaa dwetɛ no; ogyigye fii atitiriw a wɔyɛ adefo+ no hɔ. Ogyee obiara hɔ dwetɛ nnwetɛbona* 50 de maa Asiria hene. Ɛnna Asiria hene fii asaase no so kɔe. 21 Menahem+ ho nsɛm a aka ne nea ɔyɛe nyinaa, wɔakyerɛw wɔ Israel ahemfo abakɔsɛm nhoma no mu. 22 Menahem ne n’agyanom kɔdae, na ne ba Pekahia bedii n’ade.

23 Yuda hene Asaria ahenni afe a ɛto so 50 mu no, Menahem ba Pekahia bedii Israel so hene wɔ Samaria mfe abien. 24 Ɔyɛɛ Yehowa ani so bɔne. Bɔne a Nebat ba Yeroboam maa Israel yɛe no,+ wantwe ne ho amfi ho. 25 Na ne boafo Remalia ba Peka+ bɔɔ ne ho pɔw, na ɔne Argob ne Arie kum no wɔ ɔhene fi* abantenten no mu wɔ Samaria. Ná Gileadfo mmarima 50 ka ne ho, na bere a okum no no, obedii n’ade. 26 Pekahia ho nsɛm a aka ne nea ɔyɛe nyinaa, wɔakyerɛw wɔ Israel ahemfo abakɔsɛm nhoma no mu.

27 Yuda hene Asaria ahenni afe a ɛto so 52 mu no, Remalia ba Peka+ bedii Israel so hene wɔ Samaria mfe 20. 28 Ɔyɛɛ Yehowa ani so bɔne. Bɔne a Nebat ba Yeroboam maa Israel yɛe no,+ wantwe ne ho amfi ho. 29 Israel hene Peka bere so no, Asiria hene Tiglat-Pilesa+ bɛko faa Eyon, Abel-Bet-Maaka,+ Yanoa, Kedes,+ Hasor, Gilead,+ ne Galilea, kyerɛ sɛ, Naftali+ asaase nyinaa, na ɔsoaa emu nnipa kɔɔ Asiria.+ 30 Ɛnna Ela ba Hosea+ bɔɔ Remalia ba Peka ho pɔw, na okum no, na obedii n’ade wɔ Usia ba Yotam+ ahenni afe a ɛto so 20 mu. 31 Peka ho nsɛm a aka ne nea ɔyɛe nyinaa, wɔakyerɛw wɔ Israel ahemfo abakɔsɛm nhoma no mu.

32 Israel hene Remalia ba Peka ahenni afe a ɛto so abien mu no, Yuda hene Usia+ ba Yotam+ bedii hene. 33 Obedii ade no, na wadi mfe 25, na odii hene mfe 16 wɔ Yerusalem. Ne maame din de Yerusa, na na ɔyɛ Sadok babea.+ 34 Ɔyɛɛ nea ɛteɛ wɔ Yehowa ani so sɛnea ne papa Usia yɛe no.+ 35 Mmom sorɔnsorɔmmea no de, ɛkaa hɔ. Ɔman no kɔɔ so bɔɔ afɔre na wɔhyew afɔrebɔde wɔ sorɔnsorɔmmea+ hɔ. Ɔno na osii atifi pon a ɛwɔ Yehowa fi no.+ 36 Yotam ho nsɛm a aka ne nea ɔyɛe no, wɔakyerɛw ne nyinaa wɔ Yuda ahemfo abakɔsɛm nhoma no mu. 37 Saa bere no, Yehowa maa Siria hene Resin ne Remalia ba Peka+ kɔɔ Yuda so.+ 38 Yotam ne n’agyanom kɔdae, na wosiee no kaa n’agyanom ho wɔ ne nana Dawid Kurow mu, na ne ba Ahas bedii n’ade.

16 Remalia ba Peka ahenni afe a ɛto so 17 mu no, Yuda hene Yotam ba Ahas+ bedii hene. 2 Ahas bedii hene no, na wadi mfe 20, na odii ade mfe 16 wɔ Yerusalem. Wanyɛ nea ɛteɛ wɔ ne Nyankopɔn Yehowa ani so sɛnea ne nana Dawid yɛe no.+ 3 Israel ahemfo akwan so na ɔfae.+ Afei nso, ɔhyew n’ankasa ba mpo wɔ ogya mu;*+ enti akyiwade a amanaman a Yehowa pam wɔn fii Israelfo anim yɛe no,+ ɛno ara bi na ɔyɛe. 4 Ɔsan bobɔɔ afɔre na ɔhyew afɔrebɔde wɔ sorɔnsorɔmmea,*+ nkoko so, ne nnua kusuu nyinaa bi ase.+

5 Saa bere no mu na Siria hene Resin ne Remalia ba Peka a ɔyɛ Israel hene no bae sɛ wɔne Yerusalem rebɛko,+ na wɔkaa Ahas hyɛɛ mu, nanso wɔantumi amfa kurow no. 6 Saa bere no ara nso na Siria hene Resin san gyee Elat+ maa Edomfo, na ɔpam Yudafo no fii Elat maa Edomfo no kɔɔ hɔ, na wɔatena hɔ abesi nnɛ. 7 Enti Ahas tuu abɔfo kɔɔ Asiria hene Tiglat-Pilesa+ nkyɛn kɔka kyerɛɛ no sɛ: “Meyɛ w’akoa ne wo ba, enti bra begye me fi Siria hene ne Israel hene nsam, efisɛ wɔne me reko.” 8 Ɛnna Ahas sesaw dwetɛ ne sika kɔkɔɔ a ɛwɔ Yehowa fi ne ahemfi* akorae no, na ɔde kotuaa adanmude* maa Asiria hene.+ 9 Na Asiria hene tiee no, na ɔkɔɔ Damasko kɔko fae; ɔkyeree emu nnipa kɔɔ Kir,+ na okum Resin.+

10 Ɛnna Ɔhene Ahas kohyiaa Asiria hene Tiglat-Pilesa wɔ Damasko. Bere a Ɔhene Ahas huu afɔremuka a ɛwɔ Damasko no, ɔsoma ma wɔde afɔremuka no nsusuwso kɔmaa ɔsɔfo Uriya de kyerɛɛ no ɔkwan a wɔfaa so yɛɛ afɔremuka no.+ 11 Afɔremuka no ho akwankyerɛ a Ɔhene Ahas de ho nkra fi Damasko brɛɛ ɔsɔfo Uriya+ no, odii akyi pɛpɛɛpɛ sii afɔremuka.+ Ɔsɔfo Uriya wiei ansa na Ɔhene Ahas refi Damasko aba. 12 Bere a ɔhene no fi Damasko bae a ohuu afɔremuka no, ɔkɔɔ afɔremuka no anim kɔbɔɔ afɔre wɔ so.+ 13 Na ɔtoaa so bɔɔ ɔhyew afɔre ne aduan afɔre wɔ afɔremuka no so; ohwiee afɔrebɔ nsa guu so, na ɔpetee asomdwoe afɔre mogya nso wɔ so. 14 Afei kɔbere afɔremuka+ a esi Yehowa anim wɔ ofi no anim no, oyi fii n’afɔremuka no ne Yehowa fi no ntam, na ɔde besii n’afɔremuka no nkyɛn wɔ atifi fam. 15 Ɔhene Ahas ka kyerɛɛ ɔsɔfo Uriya+ sɛ: “Anɔpa ɔhyew afɔre, anwummere aduan afɔre,+ ɔhene ɔhyew afɔre, ɔhene aduan afɔre, ne ɔman no nyinaa ɔhyew afɔre, wɔn aduan afɔre, ne wɔn nsã afɔre no, bɔ ne nyinaa wɔ afɔremuka kɛse no so.+ Ɔhyew afɔre ho mogya ne afɔre a aka no ho mogya nyinaa nso, fa pete so. Kɔbere afɔremuka no de, mɛhwɛ nea mede bɛyɛ.” 16 Na ɔsɔfo Uriya yɛɛ nea Ɔhene Ahas ka kyerɛɛ no no nyinaa.+

17 Bio nso, trɔk a wɔde twe nsu no ho nhyehyem ntraantraa no, Ɔhene Ahas twitwaa mu+ asinasin, na oyiyii asɛn no fii so.+ Ɛpo a esi kɔbere anantwi so no, oyi fii wɔn so,+ na ɔde sii fam wɔ abo nsɛwee so.+ 18 Nea wɔde akuru Homeda abrannaa no so no, oyi fii hɔ, na ɔkwan a efi ahemfi kɔ Yehowa fi hɔ nso, osiw no. Ne nyinaa Asiria hene nti na ɔyɛɛ saa.

19 Ahas ho nsɛm a aka ne nea ɔyɛe no, wɔakyerɛw ne nyinaa wɔ Yuda ahemfo abakɔsɛm nhoma no mu.+ 20 Ahas ne n’agyanom kɔdae, na wosiee no kaa n’agyanom ho wɔ Dawid Kurow mu, na ne ba Hesekia*+ bedii n’ade.

17 Yuda hene Ahas ahenni afe a ɛto so 12 mu no, Ela ba Hosea+ bedii Israel so hene wɔ Samaria mfe akron. 2 Ɔyɛɛ Yehowa ani so bɔne, na mmom anto Israel ahemfo a wodii no kan no. 3 Asiria hene Salmaneser baa no so,+ na Hosea bɛyɛɛ n’akoa a otua tow ma no.+ 4 Nanso Asiria hene hui sɛ Hosea pɛ sɛ ɔtew atua, efisɛ ɔsomaa abɔfo kɔɔ Egypt hene a wɔfrɛ no So nkyɛn,+ na tow a mfe bi a atwam no na otua ma Asiria hene no nso, wantua. Enti Asiria hene kyekyeree no too afiase.

5 Asiria hene de dɔm baa asaase no so, na ɔbaa Samaria betwaa ho hyiae mfe abiɛsa. 6 Hosea ahenni afe a ɛto so akron mu no, Asiria hene kɔko faa Samaria.+ Afei ɔsoaa Israelfo kɔɔ+ Asiria, na ɔde wɔn kɔtenatenaa Hala ne Habor wɔ Asubɔnten Gosan+ ho ne Mediafo nkurow mu.+

7 Nea ɛma ɛbaa saa ne sɛ, Yehowa wɔn Nyankopɔn a oyii Israelfo fii Egypt asaase so wɔ Egypt hene Farao nsam+ no, wɔyɛɛ bɔne tiaa no, na wɔkɔsom* anyame foforo;+ 8 Amanaman a Yehowa pam wɔn fii Israelfo anim no amammerɛ na wodii so, na Israel ahemfo amammerɛ a wɔn ankasa hyehyɛe na wodii so.

9 Israelfo yɛɛ Yehowa wɔn Nyankopɔn ani so bɔne. Wosisii sorɔnsorɔmmea* wɔ wɔn nkurow nyinaa mu,+ efi awɛmfo aban so kosi nkurow a wɔabɔ ho ban so.* 10 Wosisii abosom adum ne abosonnua*+ wɔ nkoko atenten so ne nnua kusuu nyinaa bi ase;+ 11 wɔkɔɔ so hyew afɔrebɔde wɔ sorɔnsorɔmmea hɔ te sɛ amanaman a Yehowa tuu wɔn ase fii hɔ no.+ Wɔyɛɛ nneɛma bɔne de hyɛɛ Yehowa abufuw.

12 Wɔkɔɔ so som abosom fĩ,*+ nanso na Yehowa aka akyerɛ wɔn sɛ: “Monnyɛ saa!”+ 13 Yehowa nam n’adiyifo ne adehufo no nyinaa so+ bɔɔ Israel ne Yuda kɔkɔ sɛ: “Montwe mo ho mfi mo akwammɔne ho!+ Afei me mmara nsɛm, m’ahyɛde, ne mmara a mede maa mo agyanom na menam me nkoa a wɔyɛ adiyifo no so de brɛɛ mo no nyinaa, munni so.” 14 Nanso wɔantie, na wɔyɛɛ asoɔden* te sɛ wɔn agyanom a wɔannye Yehowa wɔn Nyankopɔn anni no.+ 15 Wɔpoo n’ahyɛde ne apam+ a ɔne wɔn agyanom yɛe ne ne nkaesɛm a ɔde bɔɔ wɔn kɔkɔ no,+ na wokodii abosonhunu akyi,+ na wɔn nso bɛyɛɛ nnipahunu,+ na aman a atwa wɔn ho ahyia a Yehowa kae sɛ mma wɔnnyɛ sɛ wɔn no, wɔn na wosuasuaa wɔn.+

16 Wogyaw Yehowa wɔn Nyankopɔn ahyɛde nyinaa, na wɔde dade yɛɛ nantwi mma ahoni* abien,+ wɔyɛɛ ɔbosom dua,*+ wɔkotow ɔsoro asafo nyinaa,+ na wɔsom Baal.+ 17 Afei nso, wɔhyew wɔn mma mmarima ne wɔn mma mmea wɔ ogya mu,*+ na wɔhyehyɛɛ abosonkɔm+ kɔɔ abisa, na wosii wɔn bo* sɛ wɔbɛyɛ Yehowa ani so bɔne de ahyɛ no abufuw.

18 Enti Yehowa bo fuw Israel paa, na ɔpoo wɔn koraa.+ Wamma obiara anka asaase no so, gye Yuda abusuakuw no nkutoo.

19 Yuda mpo anni Yehowa wɔn Nyankopɔn mmara nsɛm so,+ na mmom Israel ahemfo amammerɛ na wɔn nso dii so.+ 20 Yehowa poo Israel asefo nyinaa, na oguu wɔn anim ase de wɔn hyɛɛ wɔn atamfo nsa ma wɔfom wɔn nneɛma kosii sɛ ɔpoo wɔn koraa. 21 Ɔtew Israel fii Dawid fi ho, na wosii Nebat ba Yeroboam hene.+ Nanso Yeroboam twee Israel fii Yehowa ho, na ɔma wɔyɛɛ bɔne kɛse. 22 Na bɔne a Yeroboam yɛe no, ɛno ara bi na Israelfo nso yɛe.+ Wɔantwe wɔn ho amfi ho, 23 kosii sɛ Yehowa poo Israel, sɛnea ɔnam ne nkoa adiyifo no nyinaa so kae no.+ Enti wotuu Israelfo fii wɔn asaase so kɔɔ Asiria,+ na wɔatena hɔ de abesi nnɛ.

24 Ɛnna Asiria hene de nnipa fi Babilon ne Kuta ne Awa ne Hamat ne Sefarwayim+ bɛtenatenaa Samaria nkurow mu, na wobesii Israelfo ananmu; wɔfaa Samaria nkurow tenatenaa mu. 25 Bere a wɔbɛtenaa hɔ no, na wɔnsom* Yehowa. Enti Yehowa maa agyata baa wɔn mu+ bekunkum wɔn mu binom. 26 Nkurɔfo kɔbɔɔ Asiria hene amanneɛ sɛ: “Amanaman a wode wɔn akogu Samaria nkurow mu no, esiane sɛ wonnim sɛnea wɔsom asaase no Nyame nti, ɔma agyata ba wɔn mu bekunkum wɔn, efisɛ obiara nnim sɛnea wɔsom asaase no Nyame.”

27 Ɛnna Asiria hene kae sɛ: “Momfa asɔfo a mofaa wɔn fii hɔ kɔe no baako nkɔ hɔ, na ɔnkɔtena hɔ nkyerɛ wɔn sɛnea wɔsom asaase no Nyame.” 28 Enti asɔfo a wɔde wɔn fii Samaria kɔe no, wɔmaa baako kɔɔ hɔ, na ɔkɔtenaa Betel+ kyerɛɛ wɔn sɛnea wɔbɛsom* Yehowa.+

29 Nanso amanaman no biara yɛɛ ne nyame,* na wɔde sisii sorɔnsorɔmmea hɔ adan a Samariafo sisii no mu. Ɔman biara yɛɛ ne de wɔ kurow a wɔte mu no mu. 30 Babilonfo yɛɛ Sakot-Benot, Kutfo yɛɛ Nergal, na Hamatfo+ nso yɛɛ Asima. 31 Awafo yɛɛ Nibhas ne Tartak, na Sefarwayimfo hyew wɔn mma wɔ ogya mu maa Sefarwayimfo+ anyame Adramelek ne Anamelek. 32 Wosuroo Yehowa de, nanso na wotumi de obiara a ɔwɔ ɔman no mu yɛ ɔsɔfo wɔ sorɔnsorɔmmea hɔ ma odi wɔn anim som wɔ sorɔnsorɔmmea hɔ adan no mu.+ 33 Ná wosuro Yehowa de, nanso wɔn ankasa anyame na wɔsom wɔn, sɛnea amanaman a woyii wɔn fii wɔn mu baa hɔ no som te.+

34 Ɛnnɛ yi nyinaa, wɔda so ara som te sɛ kan no. Wɔn mu biara nsom* Yehowa, na n’ahyɛde, n’atemmusɛm, Mmara no, ne mmara nsɛm a Yehowa de maa Yakob, a wɔsesaa ne din frɛɛ no Israel no,+ ne mma no mu biara nni so. 35 Bere a Yehowa ne wɔn yɛɛ apam no,+ ɔka kyerɛɛ wɔn sɛ: “Monhwɛ na moansuro anyame foforo, monnkotow wɔn, monnsom wɔn, na mommmɔ afɔre mmma wɔn.+ 36 Na mmom Yehowa a ɔde tumi kɛse ne basa a wateɛ mu yii mo fii Egypt no,+ ɔno na monsom* no,+ na ɔno na monkotow no na mommɔ afɔre mma no. 37 Na ahyɛde, atemmusɛm, Mmara no, ne mmara nsɛm a ɔkyerɛw maa mo no,+ monhwɛ nni so daa, na monnsom* anyame foforo. 38 Apam a me ne mo ayɛ no nso mommma mo werɛ mmfi,+ na monnsom* anyame foforo. 39 Yehowa mo Nyankopɔn mmom na monsom* no, efisɛ ɔno na obegye mo afi mo atamfo nyinaa nsam.”

40 Nanso wɔantie, na mmom wɔkɔɔ so somee te sɛ kan no.+ 41 Enti amanaman yi suroo Yehowa de,+ nanso na wɔsan som wɔn ahoni. Wɔn mma ne wɔn mmanana nso, sɛnea wɔn agyanom yɛe no, saa ara na wɔn nso ayɛ de besi nnɛ.

18 Israel hene Ela ba Hosea+ ahenni afe a ɛto so abiɛsa mu no, Yuda hene Ahas+ ba Hesekia+ bedii hene. 2 Obedii hene no, na wadi mfe 25, na odii ade mfe 29 wɔ Yerusalem. Ne maame din de Abi,* na na ɔyɛ Sakaria ba.+ 3 Ɔyɛɛ nea ɛteɛ wɔ Yehowa ani so+ sɛnea ne nana Dawid yɛe no.+ 4 Ɔno na oyiyii sorɔnsorɔmmea* no+ bubuu abosom adum no pasaa, na otwitwaa ɔbosom dua* no gui.+ Kɔbere ɔwɔ a Mose yɛe no+ nso, obubuu no pasaa, efisɛ ɛde besi saa bere no, na Israelfo no hyew afɔrebɔde wɔ anim, na na wɔfrɛ no kɔbere ɔwɔ honi.* 5 Ɔde ne ho too Yehowa, Israel Nyankopɔn so.+ Yuda ahemfo a wodii no kan ne wɔn a wɔbae wɔ n’akyi no, na obiara nte sɛ ɔno. 6 Ɔbataa Yehowa ho.+ Wamfi n’akyi; ɔkɔɔ so dii Yehowa mmara nsɛm a ɔde maa Mose no so. 7 Na Yehowa dii n’akyi. Biribiara a ɔyɛe no, ɔde nyansa na ɛyɛe. Ɔtew Asiria hene so atua, na wansom no.+ 8 Afei nso, okunkum Filistifo+ koduu Gasa ne n’ahye so, efi awɛmfo aban so kosi nkurow a wɔabɔ ho ban so.*

9 Ɔhene Hesekia ahenni afe a ɛto so anan no, na ɛyɛ Israel hene Ela ba Hosea+ ahenni afe a ɛto so ason. Saa bere no, Asiria hene Salmaneser baa Samaria so betwaa ho hyiae.+ 10 Mfe abiɛsa akyi no, Asiriafo no dii so nkonim.+ Hesekia ahenni afe a ɛto so asia a ɛyɛ Israel hene Hosea ahenni afe a ɛto so akron mu na wodii Samaria so nkonim. 11 Ɛnna Asiria hene soaa Israelfo kɔɔ+ Asiria, na ɔde wɔn kɔtenatenaa Hala ne Habor wɔ Asubɔnten Gosan ho ne Mediafo nkurow mu.+ 12 Nea enti a ɛbaa saa ne sɛ, wɔantie Yehowa wɔn Nyankopɔn nne, na mmom wobuu n’apam so. Nea Yehowa akoa Mose ka kyerɛɛ wɔn no nyinaa,+ wɔantie na wɔanyɛ.

13 Ɔhene Hesekia ahenni afe a ɛto so 14 mu no, Asiria hene Senaherib+ foro bae bɛtow hyɛɛ Yuda nkurow a wɔabɔ ho ban nyinaa so, na ɔfae.+ 14 Afei Yuda hene Hesekia soma kɔɔ Asiria hene nkyɛn wɔ Lakis sɛ: “Manyɛ no yiye. San kɔ, na ɛbo a wubetwa ama me biara, metua.” Enti Asiria hene kae sɛ Yuda hene Hesekia ntua dwetɛ dwetikɛse* 300 ne sika kɔkɔɔ dwetikɛse 30. 15 Ɛnna Hesekia de dwetɛ a ɛwɔ Yehowa fi ne ɔhene fi* akorade mu no nyinaa maa no.+ 16 Saa bere no, Hesekia tutuu* Yehowa asɔrefi no apon+ ne apongua a Yuda hene Hesekia ankasa de sika kɔkɔɔ faa ho no,+ na ɔde maa Asiria hene.

17 Na Asiria hene somaa Tartan,* Rabsaris,* ne Rabsake* fii Lakis+ de asraafodɔm kɛse kaa wɔn ho sɛ wɔnkɔ Ɔhene Hesekia nkyɛn wɔ Yerusalem.+ Wɔforo kɔɔ Yerusalem, na wɔkɔe no, baabi a atifi fam ɔtare no mu nsu nam no, ɛhɔ na wokogyinae wɔ ɔkwantempɔn a ɛkɔ ntamasifo asaase so no so.+ 18 Bere a wɔfrɛɛ ɔhene no sɛ ompue mmra no, Hilkia ba Eliakim+ a ofi* no hyɛ ne nsa, ne Sebna+ a ɔyɛ ɔkyerɛwfo, ne Asaf ba Yoa a ɔyɛ ɔhene krakye na wobehyiaa wɔn.

19 Ɛnna Rabsake ka kyerɛɛ wɔn sɛ: “Mesrɛ mo, monkɔka nkyerɛ Hesekia sɛ, ‘Nea ɔhenkɛse, Asiria hene, aka ni: “Dɛn koraa na wode wo ho ato so yi?+ 20 Woka sɛ, ‘Mewɔ nyansa ne ahoɔden a metumi de ako,’ nanso ne nyinaa yɛ nsɛnhunu ara kwa. Hena koraa na wode wo ho ato no so a enti woayɛ aniammɔnho atew atua atia me yi?+ 21 Hwɛ! Egypt na wode wo ho ato no so, demmire* a emu abu a sɛ onipa tweri a ɛbɛwɔ ne nsam apue yi!+ Saa na Egypt hene Farao te ma wɔn a wɔde wɔn ho ato no so nyinaa. 22 Na sɛ moka kyerɛ me sɛ, ‘Yehowa, yɛn Nyankopɔn na yɛde yɛn ho ato no so’+ a, ɛnyɛ ɔno ara na Hesekia atutu ne sorɔnsorɔmmea ne n’afɔremuka+ na waka akyerɛ Yuda ne Yerusalem sɛ: ‘Afɔremuka yi anim na monkotow no wɔ Yerusalem’ no?”’+ 23 Afei wopɛ a, wo ne me wura Asiria hene nto nkyia: Mɛma wo apɔnkɔ 2,000, na hwɛ sɛ wubetumi anya mmarima atenatena wɔn so anaa.+ 24 Na sɛ nteaseɛnam ne nnipa a wɔbɛtenatena apɔnkɔ so nti na wode wo ho ato Egypt so a, ɛnde wobɛyɛ dɛn atumi ako atia amrado baako a ɔyɛ me wura nkoa no mu akumaa koraa? 25 Wugye di sɛ Yehowa amma me kwan a anka mɛforo aba sɛ merebɛsɛe ha? Yehowa ankasa na ɔka kyerɛɛ me sɛ, ‘Foro kɔ asaase yi so kɔsɛe no.’”

26 Ɛnna Hilkia ba Eliakim ne Sebna+ ne Yoa ka kyerɛɛ Rabsake+ sɛ: “Yɛsrɛ wo, wo ne wo nkoa nka Aram kasa,*+ na yɛte; wo ne yɛn nnka Yudafo kasa mmma nkurɔfo a wɔwɔ ɔfasu no so no nnte.”+ 27 Nanso Rabsake ka kyerɛɛ wɔn sɛ: “Mugye di sɛ mo wura ne mo nko ara nti na me wura somaa me sɛ memmɛka nsɛm yi anaa? Wɔn a wɔtete ɔfasu no so no nka ho bi anaa? Wɔn na wobedi wɔn ankasa tiafi na wɔanom wɔn ankasa dwensɔ te sɛ mo ara.”

28 Afei Rabsake gyinaa yiye, na ɔde nne kɛse teɛɛm wɔ Yudafo kasa mu sɛ: “Muntie ɔhenkɛse, Asiria hene no asɛm.+ 29 Nea ɔhene aka ni, ‘Mommma Hesekia nnnaadaa mo, na ɔrentumi nnye mo mfi me nsam.+ 30 Munnni Hesekia akyi mmfa mo ho nnto Yehowa so nnka sɛ: “Sɛnea ɛte biara Yehowa begye yɛn, na ɔremfa kurow yi nhyɛ Asiria hene nsa.”+ 31 Munntie Hesekia, na Asiria hene aka sɛ: “Mungow mo ho mma me na mommra me nkyɛn,* na obiara bedi n’ankasa bobe ne ne borɔdɔma, na wanom n’ankasa abura mu nsu 32 kosi sɛ mɛba abɛfa mo akɔ asaase a ɛte sɛ mo ankasa mo asaase so,+ asaase a hwiit* ne bobesa foforo wɔ so, asaase a aduan* ne bobefuw* wɔ so, asaase a ngodua ne ɛwo wɔ so. Ɛno bɛma moatena nkwa mu, na moanwuwu. Munntie Hesekia efisɛ sɛ ɔka sɛ, ‘Yehowa begye yɛn’ a, na ɔredaadaa mo. 33 Amanaman no anyame no bi atumi agye ne nkurɔfo afi Asiria hene nsam pɛn? 34 Hamat+ ne Arpad anyame no wɔ he? Sefarwayim,+ Hena, ne Iwa anyame no nso wɔ he? Wɔatumi agye Samaria afi me nsam anaa?+ 35 Aman yi anyame nyinaa mu hena na watumi agye ne man afi me nsam a enti Yehowa betumi agye Yerusalem afi me nsam?”’”+

36 Nanso nkurɔfo no yɛɛ komm na wɔamma no mmuae biara, efisɛ na ɔhene aka sɛ: “Mummmua no.”+ 37 Ɛnna Hilkia ba Eliakim a ofi* no hyɛ ne nsa, ne Sebna a ɔyɛ ɔkyerɛwfo, ne Asaf ba Yoa a ɔyɛ ɔhene krakye no sunsuan wɔn ntaade mu kɔɔ Hesekia nkyɛn, na wɔkaa Rabsake nsɛm no kyerɛɛ no.

19 Bere a Ɔhene Hesekia tee asɛm no pɛ, osuan n’ataade mu, na ofuraa awerɛhow ntama* kɔɔ Yehowa fi hɔ.+ 2 Afei ɔsomaa Eliakim a ofi* no hyɛ ne nsa, ne ɔkyerɛwfo Sebna ne asɔfo no mu mpanyimfo no kɔɔ Amus ba odiyifo Yesaia nkyɛn,+ na na wofurafura awerɛhow ntama. 3 Na wɔka kyerɛɛ no sɛ: “Nea Hesekia aka ni, ‘Ɛnnɛ yɛ ahokyere ne animka* ne animguase da; efisɛ yɛayɛ sɛ ɔbea a awo aka no* nanso onni ahoɔden a ɔde bɛwo.+ 4 Ebia Yehowa, wo Nyankopɔn bɛte nsɛm a Rabsake aka no nyinaa; ɔno na ne wura Asiria hene asoma no sɛ ommebu Onyankopɔn teasefo no animtiaa.+ Na nsɛm a Yehowa, wo Nyankopɔn ate no nti, ɔbɛma wabu ho akontaa. Ɛno nti, bɔ mpae+ ma wɔn a wɔaka a wɔwɔ ha no.’”

5 Enti Ɔhene Hesekia nkoa no kɔɔ Yesaia nkyɛn.+ 6 Na Yesaia ka kyerɛɛ wɔn sɛ: “Monkɔka nkyerɛ mo wura sɛ, ‘Nea Yehowa aka ni: “Mma nsɛm a wotee no mmmɔ wo hu,+ abususɛm a Asiria hene nkoa aka atia me no.+ 7 Mede adwene bi bɛhyɛ ne tirim,* na ɔbɛte amanneɛbɔ bi, na wasan akɔ n’ankasa asaase so; na mɛma wɔde sekan akum no wɔ n’ankasa asaase so.”’”+

8 Bere a Rabsake tee sɛ Asiria hene afi Lakis+ no, ɔkɔɔ ne nkyɛn, na ɔkɔtoe sɛ ɔne Libna reko.+ 9 Afei ɔhene no tee sɛ Etiopia hene Tirhaka aba sɛ ɔne no rebɛko. Enti ɔsan somaa nnipa bi+ sɛ wɔnkɔ Hesekia nkyɛn. Ɔka kyerɛɛ wɔn sɛ: 10 “Monkɔka nkyerɛ Yuda hene Hesekia sɛ, ‘Mma wo Nyankopɔn a wode wo ho ato no so no nnnaadaa wo sɛ: “Wɔremfa Yerusalem nhyɛ Asiria hene nsa.”+ 11 Nea Asiria ahemfo de yɛɛ nsaase no nyinaa ne sɛnea wɔsɛee wɔn pasaa no, woate dedaw.+ Wo na wubenya wo ti adidi mu anaa? 12 Aman a m’agyanom sɛee wɔn no anyame tumi gyee wɔn anaa? Ɛhe na Gosan, Haran,+ Resef, ne Edenfo a na wɔwɔ Tel-Asar no wɔ? 13 Ɛhe na Hamat hene ne Arpad hene ne Sefarwayim ne Hena ne Iwa nkurow so ahemfo no wɔ?’”+

14 Ɛnna Hesekia gyee nhoma no fii nkurɔfo a wɔsomaa wɔn no nsam kenkanee, na Hesekia kɔɔ Yehowa fi kɔtrɛw mu wɔ Yehowa anim.+ 15 Na Hesekia bɔɔ mpae+ wɔ Yehowa anim sɛ: “O Yehowa, Israel Nyankopɔn a wote kerubim so,*+ wo nko ara ne nokware Nyankopɔn wɔ asaase so ahenni nyinaa so.+ Wo na woyɛɛ ɔsoro ne asaase. 16 O Yehowa, yɛ aso na tie!+ O Yehowa, bue w’aniwa na hwɛ!+ Tie nsɛm a Senaherib asoma sɛ wɔmfa mmebu Onyankopɔn teasefo no animtiaa. 17 O Yehowa, ɛyɛ nokware sɛ Asiria ahemfo asɛe amanaman ne wɔn nsaase.+ 18 Afei nso, wɔatow wɔn anyame agu ogya mu, efisɛ wɔnyɛ anyame,+ na mmom nnipa nsa ano adwuma,+ nnua ne abo; ɛno nti na wotumi sɛee wɔn no. 19 Enti afei, O Yehowa, yɛn Nyankopɔn, yɛsrɛ wo, gye yɛn fi ne nsam na asaase so ahenni nyinaa nhu sɛ wo, Yehowa, wo nko ara ne Onyankopɔn.”+

20 Na Amus ba Yesaia soma kɔka kyerɛɛ Hesekia sɛ: “Nea Israel Nyankopɔn Yehowa aka ni, ‘Asiria hene Senaherib+ ho mpae a wobɔɔ me no, mate.+ 21 Yehowa asɛm a waka atia no ni:

“Sion babea, ɔbaabun no, abu wo animtiaa, na wo ho yɛ no serew.

Yerusalem babea no awosow ne ti akyerɛ wo.

22 Hena na woabu no animtiaa aka abususɛm atia no yi?+

Ɛyɛ Israel Kronkronni no!+

Metwitwa sida nnua atenten ne ɔpopaw nnua fɛfɛ a ɛwɔ hɔ no agu.

Mɛkɔ mmeae a ɛwɔ akyirikyiri, ne ne kwaebirentuw mu.

25 Wontee anaa? Efi tete na mebɔɔ me tirim sɛ mɛyɛ.*+

Mehyɛ too hɔ nyɛ nnɛ.+

Afei mɛma aba mu.+

Wobɛma nkurow a wɔabɔ ho ban adan amamfo.*+

29 “‘Eyi bɛyɛ sɛnkyerɛnne ama wo:* Afe yi, mubedi hwiit* a ɛno ara afifi;* afe a ɛto so abien no nso, mubedi hwiit a ɛno ara afifi;+ nanso afe a ɛto so abiɛsa no de, mubegu aba na moatwa, na moayeyɛ bobefuw* na moadi mu aba.+ 30 Yuda fifo a wobenya wɔn ti adidi mu, wɔn a wɔbɛka no,+ wɔn ntini bewurawura fam, na wobenyin akɔ soro na wɔasow aba. 31 Na nkaefo bi befi Yerusalem aba, na wɔn a wɔanya wɔn ti adidi mu no befi Sion Bepɔw so aba. Asafo Yehowa ahokeka nti na ɔbɛyɛ eyi.+

32 “‘Enti nea Yehowa aka afa Asiria hene ho ni:+

35 Anadwo no ara, Yehowa bɔfo pue kɔɔ Asiriafo asoɛe hɔ kokunkum mmarima 185,000.+ Bere a nkurɔfo sɔree anɔpatutuutu no, wohui sɛ afunu ayɛ hɔ ma.+ 36 Enti Asiria hene Senaherib fii hɔ, na ɔsan kɔɔ Niniwe+ kɔtenaa hɔ.+ 37 Na bere a ɔkɔɔ ne nyame Nisrok fi* kɔkotowee no, ɔno ara ne mma mmarima Adramelek ne Sareser de sekan kum no,+ na woguan kɔɔ Ararat asaase so.+ Na ne ba Esar-Haddon+ bedii n’ade.

20 Saa nna no mu no, Hesekia yaree ma anka ɔreyɛ awu.+ Na Amus ba odiyifo Yesaia bae, na ɔbɛka kyerɛɛ no sɛ: “Nea Yehowa aka ni, ‘Yɛ ntotoe wɔ wo fi, efisɛ wubewu; wo ho rentɔ wo.’”+ 2 Ɛnna ɔde n’ani kyerɛɛ dan, na ofii ase bɔɔ Yehowa mpae sɛ: 3 “O Yehowa, mesrɛ wo, kae sɛnea mede nokwaredi ne koma mũ anantew w’anim, na mayɛ nea eye wɔ w’ani so.”+ Na Hesekia fii ase sui pii.

4 Bere a Yesaia nnya nnuu ahemfi adiwo hɔ no, Yehowa ka kyerɛɛ no sɛ:+ 5 “San w’akyi na kɔka kyerɛ me man kannifo Hesekia sɛ, ‘Nea Yehowa, wo nana Dawid Nyankopɔn aka ni: “Mate wo mpaebɔ no. Mahu wo nisu,+ na mɛsa wo yare.+ Da a ɛto so abiɛsa no, wobɛforo akɔ Yehowa fi.+ 6 Mede mfe 15 bɛka wo nkwa nna* ho, na megye wo ne kurow yi afi Asiria hene nsam,+ na mɛbɔ kurow yi ho ban, me din ne m’akoa Dawid nti.”’”+

7 Ɛnna Yesaia kae sɛ: “Momfa borɔdɔma a awo a wɔabɔ no tɔw mmra.” Enti wɔkɔfa de bɛtaree pɔmpɔ no so, na nkakrankakra, ne ho tɔɔ no.+

8 Ná Hesekia adi kan abisa Yesaia sɛ: “Dɛn ne sɛnkyerɛnne+ a ɛkyerɛ sɛ Yehowa bɛsa me yare na mɛforo akɔ Yehowa fi da a ɛto so abiɛsa?” 9 Ɛnna Yesaia kae sɛ: “Eyi ne sɛnkyerɛnne a efi Yehowa hɔ a ɛbɛma woahu sɛ Yehowa bɛyɛ nea waka no: Wopɛ sɛ sunsuma no kɔ anim wɔ stɛps* no so anammɔn du anaa ɛsan n’akyi anammɔn du?”+ 10 Hesekia kae sɛ: “Ɛyɛ mmerɛw sɛ sunsuma bɛkɔ anim anammɔn du sen sɛ ɛbɛsan n’akyi anammɔn du.” 11 Ɛnna odiyifo Yesaia maa ne nne so frɛɛ Yehowa, na ɔmaa sunsuma a ɛda Ahas stɛps no so a asian dedaw no kɔɔ n’akyi anammɔn du.+

12 Saa bere no, Babilon hene Berodak-Baladan a ɔyɛ Baladan ba no soma ma wɔde nkrataa ne akyɛde kɔmaa Hesekia, efisɛ ɔtee sɛ Hesekia yaree.+ 13 Hesekia gyee wɔn,* na ɔde n’adekoradan mu nneɛma nyinaa kyerɛɛ wɔn,+ kyerɛ sɛ, dwetɛ ne sika kɔkɔɔ ne balsam ngo ne ngo pa ne baabi a ɔkora n’akode, ne biribiara a ɛwɔ n’akorae. Biribiara nni Hesekia fi* ne n’ahemman mu a wamfa ankyerɛ wɔn.

14 Ɛnna odiyifo Yesaia baa Ɔhene Hesekia nkyɛn bebisaa no sɛ: “Asɛm bɛn na mmarima yi kae, na ɛhe na wofi bae?” Na Hesekia buae sɛ: “Wofi akyirikyiri asaase bi so, wofi Babilon.”+ 15 Na ɔsan bisae sɛ: “Dɛn na wohui wɔ wo fi?”* Ɛnna Hesekia kae sɛ: “Wohuu biribiara a ɛwɔ me fi.* Biribiara nni m’akorae a mamfa ankyerɛ wɔn.”

16 Ɛnna Yesaia ka kyerɛɛ Hesekia sɛ: “Tie Yehowa asɛm yi,+ 17 ‘Hwɛ! Nna bi reba, na nea ɛwɔ wo fi* nyinaa, ne nea w’agyanom de asie abesi nnɛ nyinaa, wɔbɛfa akɔ Babilon.+ Biribiara renka,’ Yehowa na waka. 18 ‘Na wɔbɛfa w’ankasa wo mma a wobɛwo wɔn no mu bi akɔ+ ama wɔakɔyɛ nhenkwaa wɔ Babilon hene ahemfi.’”+

19 Ɛnna Hesekia ka kyerɛɛ Yesaia sɛ: “Yehowa asɛm a woaka no ye.”+ Na ɔtoaa so kae sɛ: “Sɛ asomdwoe ne ahotɔ* bɛtena hɔ wɔ me bere so* a, ɛnde eye.”+

20 Hesekia ho nsɛm a aka ne ne nnwuma akɛse nyinaa, sɛnea ɔyɛɛ ɔtare+ ne suka, na ɔde nsu baa kurow no mu+ no, wɔakyerɛw wɔ Yuda ahemfo abakɔsɛm nhoma no mu. 21 Hesekia ne n’agyanom kɔdae,+ na ne ba Manase+ bedii n’ade.+

21 Manase+ bedii hene no, na wadi mfe 12, na odii ade mfe 55 wɔ Yerusalem.+ Ne maame din de Hefsiba. 2 Ɔhene no yɛɛ Yehowa ani so bɔne; akyiwade a amanaman a Yehowa pam wɔn fii Israelfo anim+ yɛe no, ɛno ara bi na ɔyɛe.+ 3 Sorɔnsorɔmmea* a ne papa Hesekia bubui no,+ ɔsan sisii, na osisii afɔremuka maa Baal; osii ɔbosom dua*+ sɛnea Israel hene Ahab yɛe no;+ ɔkotow ɔsoro asafo nyinaa, na ɔsom wɔn.+ 4 Ɔsan sisii afɔremuka wɔ Yehowa fi;+ ná Yehowa aka ofi no ho asɛm sɛ: “Yerusalem ne kurow a mede me din bɛto so.”+ 5 Afei nso, osisii afɔremuka maa ɔsoro asafo nyinaa+ wɔ Yehowa fi adiwo abien hɔ.+ 6 Ɔno ara ne ba mpo, ɔhyew no wɔ ogya mu,* na odii nkonyaayi akyi, ɔkɔɔ abisa,+ na ɔpaw akɔmfo ne asumanfo.+ Ɔyɛɛ Yehowa ani so bɔne kɔɔ akyiri paa de hyɛɛ no abufuw.

7 Ɔde ɔbosom dua*+ a wasen no sɛ ohoni no kosii ofi a Yehowa kaa ho asɛm kyerɛɛ Dawid ne ne ba Solomon no. Ɔka kyerɛɛ wɔn sɛ: “Mapaw ofi yi ne Yerusalem afi Israel mmusuakuw nyinaa mu sɛ mede me din bɛto so afebɔɔ.+ 8 Na sɛ Israel hwɛ di nea maka akyerɛ wɔn no nyinaa so, kyerɛ sɛ, wodi Mmara a m’akoa Mose de maa wɔn no nyinaa so a,+ me nso meremma womfi asaase a mede maa wɔn agyanom no so+ nkokyinkyin bio.” 9 Nanso wɔantie, na Manase ma wɔtew atua, na wɔyɛɛ bɔne sen aman a Yehowa sɛee wɔn fii Israelfo anim no.+

10 Yehowa nam ne nkoa adiyifo no so ne wɔn kasae daa+ sɛ: 11 “Yuda hene Manase ayɛ akyiwade yi nyinaa; wayɛ bɔne kyɛn Amorifo+ a wodii n’anim no nyinaa,+ na n’abosom fĩ* no nti, wama Yuda ayɛ bɔne. 12 Ɛno nti nea Yehowa, Israel Nyankopɔn aka ni: ‘Hwɛ, mede mmusu reba Yerusalem+ ne Yuda so, na obiara a ɔbɛte no, n’aso abien nyinaa mu bɛyɛ no yɔnn.+ 13 Na susuhama+ a wɔde too Samaria so+ ne prumo* a wɔde too Ahab fi so+ no, ɛno na mɛtwe mu wɔ Yerusalem so; mɛpopa Yerusalem korakora sɛnea obi popa kankyee mu na ɔdan butuw no.+ 14 Na mɛpo m’agyapade nkae no,+ na mede wɔn bɛhyɛ wɔn atamfo nsa, na wɔn atamfo bɛsoa wɔn akɔ, na wɔasesaw wɔn nneɛma nyinaa,+ 15 efisɛ wɔyɛɛ bɔne wɔ m’ani so, na wɔahyɛ me abufuw fi da a wɔn agyanom fi Egypt bae no de abesi nnɛ da yi.’”+

16 Bio nso, Manase hwiee mogya a edi bem bebree gui. Okunkum nnipa fi Yerusalem ti kosi ti,+ ɛsono bɔne a ɔyɛe a ɛnam so maa Yuda nso yɛɛ bɔne wɔ Yehowa ani so no. 17 Manase ho nsɛm a aka, nea ɔyɛe nyinaa ne ne bɔne no, wɔakyerɛw wɔ Yuda ahemfo abakɔsɛm nhoma no mu. 18 Manase ne n’agyanom kɔdae, na wosiee no wɔ ne mfikyifuw mu, Usa mfikyifuw no mu,+ na ne ba Amon bedii n’ade.

19 Amon+ bedii hene no, na wadi mfe 22, na odii ade mfe abien wɔ Yerusalem .+ Ne maame din de Mesulemet, na na ɔyɛ Harus a ofi Yotba no ba. 20 Ɔyɛɛ Yehowa ani so bɔne sɛnea ne papa Manase yɛe no.+ 21 Nea ne papa yɛe nyinaa, ɛno ara bi na ɔno nso yɛe; ɔsom abosom fĩ a ne papa somee no.+ 22 Enti ogyaw Yehowa, n’agyanom Nyankopɔn no, na wannantew Yehowa kwan so.+ 23 Ewiee ase no, Ɔhene Amon nkoa bɔɔ ne ho pɔw, na wokum no wɔ n’ankasa fi. 24 Nanso asaase no sofo kunkum wɔn a wɔbɔɔ Ɔhene Amon ho pɔw no nyinaa, na wosii ne ba Yosia hene ma odii n’ade.+ 25 Amon ho nsɛm a aka ne nea ɔyɛe no, wɔakyerɛw ne nyinaa wɔ Yuda ahemfo abakɔsɛm nhoma no mu. 26 Na wosiee no wɔ ne damoa mu wɔ Usa mfikyifuw no mu,+ na ne ba Yosia+ bedii n’ade.

22 Yosia+ bedii hene no, na wadi mfe awotwe, na odii ade mfe 31 wɔ Yerusalem.+ Ne maame din de Yedida, na na ɔyɛ Adaia a ofi Boskat+ no ba. 2 Ɔhene no yɛɛ nea ɛteɛ wɔ Yehowa ani so, na nea ne nana Dawid yɛe no,+ ɛno ara bi na ɔno nso yɛe; wamman ankɔ nifa anaa benkum.

3 Ɔhene Yosia ahenni afe a ɛto so 18 mu no, ɔsomaa Mesulam ba Asalia ba ɔkyerɛwfo Safan kɔɔ Yehowa fi+ sɛ: 4 “Kɔ ɔsɔfo panyin Hilkia+ nkyɛn, na ka kyerɛ no sɛ sika a wɔde ba Yehowa fi+ hɔ a apon ano ahwɛfo no aboaboa ano afi ɔman no nkyɛn no, onnyigye ne nyinaa.+ 5 Ma wɔmfa nhyɛ wɔn a wɔdeda adwuma no ano wɔ Yehowa fi hɔ no nsa, na wɔn nso mfa mma adwumayɛfo a wɔwɔ Yehowa fi hɔ no na wɔmfa nsiesie mmeae a asɛesɛe* wɔ fie hɔ no,+ 6 kyerɛ sɛ, adwumfo, adansifo, ne abantofo no, na wɔmfa bi ntɔ nnua a wɔapae ne abo a wɔapae na wɔmfa nsiesie ofi no.+ 7 Nanso sika a wɔde bɛhyɛ wɔn nsa no, ɛnsɛ sɛ wɔma wobu ho akontaa, efisɛ wɔyɛ anokwafo.”+

8 Akyiri yi, ɔsɔfo panyin Hilkia ka kyerɛɛ ɔkyerɛwfo Safan sɛ:+ “Mmara nhoma no,+ makohu wɔ Yehowa fi hɔ.” Enti Hilkia de nhoma no maa Safan, na ofii ase kenkanee.+ 9 Na ɔkyerɛwfo Safan baa ɔhene anim bɛka kyerɛɛ no sɛ: “Sika a ɛwɔ fie hɔ no, wo nkoa ahwie de ahyɛ wɔn a wɔdeda adwuma ano no nsa wɔ Yehowa fi hɔ.”+ 10 Afei nso, ɔkyerɛwfo Safan ka kyerɛɛ ɔhene sɛ: “Ɔsɔfo Hilkia de nhoma+ bi ama me.” Ɛnna Safan fii ase kenkanee wɔ ɔhene anim.

11 Bere a ɔhene tee Mmara nhoma no mu nsɛm ara pɛ, osuan n’ataade mu.+ 12 Ɛnna ɔhene ka kyerɛɛ ɔsɔfo Hilkia, Safan ba Ahikam,+ Mikaia ba Akbor, ɔkyerɛwfo Safan, ne ɔhene akoa Asaia sɛ: 13 “Nhoma a wɔahu yi mu nsɛm nti, munkobisa Yehowa anom asɛm mma me ne ɔman no ne Yuda nyinaa, na Yehowa abufuw a aba yɛn so no so,+ efisɛ yɛn agyanom antie nhoma yi mu nsɛm anyɛ nea wɔakyerɛw wom afa yɛn ho no nyinaa.”

14 Ɛnna ɔsɔfo Hilkia, Ahikam, Akbor, Safan, ne Asaia kɔɔ odiyifobea Hulda+ nkyɛn. Ná ɔyɛ ntaade sohwɛfo Harhas ba Tikwa ba Salum yere. Saa bere no, na odiyifobea no te Yerusalem Kurow Foforo no mu; ɛhɔ na wɔkɔkaa asɛm no kyerɛɛ no.+ 15 Na ɔka kyerɛɛ wɔn sɛ: “Nea Yehowa, Israel Nyankopɔn aka ni, ‘Monkɔka nkyerɛ ɔbarima a ɔsomaa mo me nkyɛn no sɛ: 16 “Nea Yehowa aka ni, ‘Mede mmusu bɛba kurow yi ne wɔn a wɔtete mu so, na nsɛm a wɔakyerɛw wɔ nhoma a Yuda hene akenkan no+ mu nyinaa, mede reba. 17 Esiane sɛ wɔagyaw me akɔhyew afɔrebɔde ama anyame foforo,+ na wɔde wɔn nsa ano adwuma nyinaa ahyɛ me abufuw nti,+ m’abufuw bɛdɛw wɔ kurow yi so, na ɛrennum.’”+ 18 Na Yuda hene a ɔsomaa mo sɛ mummebisa Yehowa anom asɛm no, monka nkyerɛ no sɛ, “Nea Yehowa, Israel Nyankopɔn aka ni: ‘Nsɛm a wotee no, 19 esiane sɛ woamma wo koma anyɛ den* na wobrɛɛ wo ho ase+ wɔ Yehowa anim bere a wotee nsɛm a maka atia kurow yi ne wɔn a wɔtete mu sɛ ɛbɛyɛ ahoyeraw ne nnome ama wɔn, na wusuan w’ataade mu+ sui m’anim nti, me nso matie wo, Yehowa asɛm ni. 20 Ɛno nti mɛboaboa wo akɔka w’agyanom ho,* na wobɛkɔ wo damoa mu asomdwoe mu, na w’ani renhu mmusu a mede reba kurow yi so no.’”’” Ɛnna wɔde mmuae no kɔmaa ɔhene.

23 Enti ɔhene de nkra kɔe, na wɔfrɛɛ Yuda ne Yerusalem mpanyimfo nyinaa bae.+ 2 Afei Yuda mmarima nyinaa, Yerusalemfo nyinaa, asɔfo, ne adiyifo no ne ɔman no nyinaa, efi akumaa so kosi ɔkɛse so, ɔhene ne wɔn kɔɔ Yehowa fi hɔ. Apam+ nhoma a wohui wɔ Yehowa fi hɔ+ no, ɔkenkan emu nsɛm no nyinaa kyerɛɛ wɔn.+ 3 Ɔhene gyinaa edum no ho, na ɔyɛɛ apam* wɔ Yehowa anim+ sɛ obedi Yehowa akyi na ɔde ne koma nyinaa ne ne kra* nyinaa adi ne mmara nsɛm, ne nkaesɛm, ne n’ahyɛde so, na wadi apam no mu nsɛm a wɔakyerɛw wɔ nhoma yi mu no so. Na ɔman no nyinaa penee so sɛ wobedi apam no so.+

4 Afei ɔhene ka kyerɛɛ ɔsɔfo panyin Hilkia+ ne asɔfo a wodi hɔ no ne apon ano ahwɛfo no sɛ anwenne a wɔyɛ maa Baal, ɔbosom dua*+ no, ne ɔsoro asafo nyinaa no, wonyiyi mfi Yehowa asɔredan no mu. Afei ɔkɔhyew ne nyinaa wɔ Kidron ho mfuw mu wɔ Yerusalem kurotia, na ɔde ɛho nsõ no kɔɔ Betel.+ 5 Na ananafo anyame no asɔfo a Yuda ahemfo de wɔn sisii hɔ sɛ wɔnhyew afɔrebɔde wɔ sorɔnsorɔmmea* hɔ wɔ Yuda nkurow mu ne mmeae a ɛbemmɛn Yerusalem no, ɔma wogyaee wɔn adwuma no; wɔn a na wɔhyew afɔrebɔde ma Baal, owia, ɔsram, sodiak nsorommakuw, ne ɔsoro asafo nyinaa+ nso, ɔma wogyaee wɔn adwuma no. 6 Oyii ɔbosom dua*+ no fii Yehowa fi hɔ de kɔɔ Kidron Bon no mu wɔ Yerusalem kurotia kɔhyewee+ wɔ Kidron Bon no mu, na ɔyam no muhumuhu, na ɔtow mfuturu no guu ɔmanfo amusiei.+ 7 Bio nso, tuutuufo mmarima a wɔwɔ asɔrefi hɔ no,+ obubuu wɔn adan a ɛwɔ Yehowa fi hɔ no, baabi a na mmea no nwene ntamadan ma ɔbosom dua* no.

8 Ɛnna oyiyii asɔfo no nyinaa fii Yuda nkurow mu, na sorɔnsorɔmmea a asɔfo no hyew afɔrebɔde wɔ hɔ, efi Geba+ kosi Beer-Seba+ no, oguu ho fĩ. Afei nso, sorɔnsorɔmmea a ɛwɔ kurow sohwɛfo Yosua pon ano a sɛ obi rewura kurow no mu a ɛwɔ benkum so no, obubui. 9 Sorɔnsorɔmmea asɔfo no de, wɔammɛsom wɔ Yehowa afɔremuka anim wɔ Yerusalem,+ nanso wɔne wɔn nuanom dii paanoo a mmɔkaw* nnim no bi. 10 Tofet+ a ɛwɔ Hinom Mma Bon*+ mu no nso, oguu ho fĩ sɛnea ɛbɛyɛ a obiara renhyew ne babarima anaa ne babea wɔ ogya mu* mma Molek.+ 11 Afei nso, apɔnkɔ a Yuda ahemfo hyiraa so maa* owia no, wamma wɔamfa ahemfi panyin Natan-Melek adekoradan* a ɛwɔ abrannaa no so amma Yehowa fi hɔ bio, na ɔde ogya hyew nteaseɛnam a wɔahyira so ama owia+ no. 12 Afɔremuka a Yuda ahemfo yeyɛe a ɛwowɔ Ahas abansoro pia atifi+ ne afɔremuka a Manase sisii wɔ Yehowa fi adiwo abien no,+ ɔhene bubui, na ɔyamee wɔ hɔ, na ɔtow mfuturu no guu Kidron Bon no mu. 13 Sorɔnsorɔmmea a ɛwowɔ Yerusalem anim wɔ Ɔsɛe Bepɔw* no anaafo fam* a Israel hene Solomon sisi maa Sidonfo bosom fĩ Astoret ne Moabfo bosom fĩ Kemos ne Ammonfo bosom fĩ+ Milkom+ no, ɔhene guu ho fĩ. 14 Obubuu abosom adum no mu asinasin, otwitwaa abosonnua*+ no gui, na ɔde nnipa nnompe hyɛɛ hɔ ma. 15 Betel afɔremuka no ne sorɔnsorɔmmea a Nebat ba Yeroboam yɛe a ɛmaa Israel yɛɛ bɔne+ no, obubuu saa afɔremuka no ne sorɔnsorɔmmea no, ɔhyew sorɔnsorɔmmea no, na ɔyam no muhumuhu, ɛnna ɔhyew ɔbosom dua*+ no.

16 Bere a Yosia twaa n’ani a ohuu adamoa a ɛwowɔ bepɔw no so no, ɔsoma ma wɔkɔfaa adamoa no mu nnompe bɛhyewee wɔ afɔremuka no so de guu ho fĩ, na ɛno maa Yehowa asɛm a nokware Nyankopɔn nipa no ka too hɔ no baa mu.+ 17 Afei obisae sɛ: “Ɔda* bɛn na mihu wɔ ha yi?” Ɛnna kurow no mufo ka kyerɛɛ no sɛ: “Ɛyɛ nokware Nyankopɔn nipa a ofi Yuda+ bae a ɔkaa nea wode ayɛ Betel afɔremuka yi ho asɛm too hɔ no damoa.” 18 Ɛnna ɔkae sɛ: “Momma ɔnhome. Mma obiara mmfa ne nsa nnka ne nnompe.” Enti wɔamfa wɔn nsa anka ɔne odiyifo a ofi Samaria no nnompe.+

19 Bio nso, sorɔnsorɔmmea adan a ɛwowɔ Samaria nkurow mu+ a Israel ahemfo sisi de hyɛɛ Onyankopɔn abufuw no, Yosia yiyii ne nyinaa, na ɔyɛɛ no sɛnea ɔyɛɛ Betel de no pɛpɛɛpɛ.+ 20 Enti asɔfo a na wɔwɔ sorɔnsorɔmmea hɔ no, okunkum wɔn nyinaa* wɔ afɔremuka no so, na ɔhyew nnipa nnompe wɔ so.+ Ɛno akyi no, ɔsan kɔɔ Yerusalem.

21 Afei ɔhene ka kyerɛɛ ɔman no nyinaa sɛ: “Sɛnea wɔakyerɛw wɔ apam nhoma yi mu no,+ munni Twam+ mma Yehowa mo Nyankopɔn.” 22 Efi atemmufo a wobuu atɛn wɔ Israel no bere so ne Israel ne Yuda ahemfo nyinaa bere so no, na wonnii Twam bi a ɛte sɛ eyi da.+ 23 Nanso Ɔhene Yosia ahenni afe a ɛto so 18 mu no, wodii Twam yi maa Yehowa wɔ Yerusalem.

24 Afei nso, akɔmfo, asumanfo,+ terafim ahoni,*+ abosom fĩ,* ne atantanne a abepue Yuda asaase so ne Yerusalem no, Yosia tuu ase na ama wadi Mmara no mu nsɛm so,+ nea wɔakyerɛw wɔ nhoma a ɔsɔfo Hilkia kohui wɔ Yehowa fi hɔ mu+ no. 25 N’anim no, ɔhene biara amma sɛ ɔno a ɔde ne koma nyinaa ne ne kra* nyinaa+ ne n’ahoɔden nyinaa dan baa Yehowa nkyɛn sɛnea Mose mmara no te pɛpɛɛpɛ, na n’akyi nso, obiara ansɔre a ɔte sɛ ɔno.

26 Ne nyinaa akyi no, Yehowa antwe n’abufuw kɛse no ansan, efisɛ nneɛma bɔne a Manase yɛ de huruu ne bo no maa ne bo fuw Yuda denneennen.+ 27 Yehowa kae sɛ: “Yuda nso mɛtow no afi m’anim akyene+ sɛnea metow Israel kyenee no;+ Yerusalem kurow a mapaw yi, ne ofi a mekaa ho asɛm sɛ, ‘Me din bɛkɔ so atena hɔ’+ no, mɛtow akyene.”

28 Yosia ho nsɛm a aka ne nea ɔyɛe nyinaa, wɔakyerɛw wɔ Yuda ahemfo abakɔsɛm nhoma no mu. 29 Ne bere so na Egypt hene Farao Neko baa Asiria hene nkyɛn wɔ Asubɔnten Eufrate ho, na Ɔhene Yosia fii adi sɛ ɔne no de rekosi ani, nanso bere a Neko huu no no, okum no wɔ Megido.+ 30 Enti ne nkoa de n’amu too teaseɛnam mu fi Megido kɔɔ Yerusalem, na wosiee no wɔ ne damoa mu. Ɛnna asaase no sofo faa Yosia ba Yehoahas, na wɔsraa no sii no hene ma odii ne papa ade.+

31 Yehoahas+ bedii hene no, na wadi mfe 23, na odii ade abosome abiɛsa wɔ Yerusalem. Ne maame din de Hamutal,+ na na ɔyɛ Yeremia a ofi Libna no babea. 32 Ɔyɛɛ Yehowa ani so bɔne sɛnea ne nananom yɛe no ara.+ 33 Farao Neko+ de no too afiase wɔ Ribla,+ Hamat asaase so, na wamma wanni hene bio wɔ Yerusalem, na ɔmaa asaase no sofo tuaa dwetɛ dwetikɛse* 100 ne sika kɔkɔɔ dwetikɛse baako.+ 34 Afei nso, Farao Neko de Yosia ba Eliakim sii hene ma odii ne papa Yosia ade, na ɔsesaa ne din frɛɛ no Yehoiakim. Yehoahas de, ɔde no kɔɔ Egypt,+ na ɛhɔ na okowui.+ 35 Yehoiakim de dwetɛ ne sika kɔkɔɔ no maa Farao. Ogyigyee tow fii ɔman no* nkyɛn ansa na ɔrenya de akotua dwetɛ a Farao twa maa no no. Otwaa dwetɛ ne sika kɔkɔɔ dodow a ɔmanfo no biara betua maa wɔn, na ɔde maa Farao Neko.

36 Yehoiakim+ bedii hene no, na wadi mfe 25, na odii ade mfe 11 wɔ Yerusalem.+ Ne maame din de Sebida, na na ɔyɛ Pedaia a ofi Ruma no ba. 37 Ɔyɛɛ Yehowa ani so bɔne+ sɛnea ne nananom yɛe no ara.+

24 Yehoiakim bere so na Babilon hene Nebukadnesar+ tow hyɛɛ kurow no so, na Yehoiakim bɛyɛɛ n’akoa mfe abiɛsa. Nanso otwaa ne ho sɔre tiaa no. 2 Ɛnna Yehowa somaa dɔm a wɔfom nkurɔfo nneɛma fii Kaldea,+ Siria, Moab, ne Ammon baa wɔn so; daa na ɔsoma wɔn ba Yuda so sɛ wɔmmɛsɛe no, na saa na na Yehowa nam ne nkoa adiyifo no so aka.+ 3 Ɛyɛ Yehowa asɛm a ɔkae no na ampa ara ɛbaa mu wɔ Yuda so. Ɔkae sɛ ɔbɛtow wɔn afi n’anim akyene+ esiane bɔne a Manase yɛe nyinaa+ 4 ne mogya a edi bem a ohwie gui nti,+ efisɛ ɔde mogya a edi bem hyɛɛ Yerusalem ma. Ɛno nti Yehowa ampɛ sɛ ɔde bɔne no bɛkyɛ.+

5 Yehoiakim ho nsɛm a aka ne nea ɔyɛe nyinaa, wɔakyerɛw wɔ Yuda ahemfo abakɔsɛm nhoma no mu.+ 6 Yehoiakim ne n’agyanom kɔdae,+ na ne ba Yehoiakin bedii n’ade.

7 Egypt hene amfi n’asaase so ankɔ obiara so bio da, efisɛ Babilon hene faa Egypt hene asaase nyinaa,+ efi Egypt Subon+ ho kosi Asubɔnten Eufrate ho.+

8 Yehoiakin+ bedii hene no, na wadi mfe 18, na odii ade abosome abiɛsa wɔ Yerusalem.+ Ne maame din de Nehusta, na na ɔyɛ Elnatan a ofi Yerusalem no ba. 9 Ɔyɛɛ Yehowa ani so bɔne sɛnea ne papa yɛe no ara. 10 Saa bere no, Babilon hene Nebukadnesar nkoa baa Yerusalem so, na wobetwaa kurow no ho hyiae.+ 11 Bere a Babilon hene Nebukadnesar nkoa betwaa kurow no ho hyiae no, ɔbaa hɔ.

12 Yuda hene Yehoiakin fii adi kɔɔ Babilon hene nkyɛn,+ ɔne ne maame, n’asomfo, n’adehye, ne n’ahemfi mpanyimfo,+ na Babilon hene ahenni afe a ɛto so awotwe mu no, Babilon hene no kyeree no de no kɔe.+ 13 Afei ɔfaa Yehowa fi akorade ne ɔhene fi* akorade nyinaa kɔe,+ na otwitwaa sika anwenne a Israel hene Solomon yɛe wɔ Yehowa asɔredan mu+ no nyinaa mu asinasin. Sɛnea Yehowa hyɛɛ nkɔm no, saa ara na ɛbae. 14 Ɔsoaa Yerusalemfo nyinaa, mpanyimfo+ no nyinaa, akatakyi no nyinaa, adwumfo, ne atomfo*+ no nyinaa kɔe; nnipa 10,000. Wɔannyaw obiara, gye asaase no so ahiafo paa no.+ 15 Enti ɔde Yehoiakin+ kɔɔ Babilon,+ na ɔhene maame, ɔhene yerenom, ne n’ahemfi mpanyimfo ne asaase no so atitiriw nso, ɔde wɔn nyinaa fii Yerusalem kɔɔ Babilon. 16 Afei nso, Babilon hene de akatakyi no nyinaa, nnipa 7,000, ne adwumfo ne atomfo* 1,000 kɔɔ Babilon; ná wɔn nyinaa yɛ mmarima akantinka a wɔkɔ ɔko. 17 Babilon hene yɛɛ Yehoiakin+ papa nua Matania hene sii n’ananmu, na ɔsesaa ne din frɛɛ no Sedekia.+

18 Sedekia bedii hene no, na wadi mfe 21, na odii ade mfe 11 wɔ Yerusalem. Ne maame din de Hamutal,+ na na ɔyɛ Yeremia a ofi Libna no babea. 19 Ɔyɛɛ Yehowa ani so bɔne sɛnea Yehoiakim yɛe no ara.+ 20 Yehowa abufuw nti na eyinom sisii wɔ Yerusalem ne Yuda kosii sɛ ɔtow wɔn fii n’anim kyenee.+ Na Sedekia tew Babilon hene so atua.+

25 Sedekia ahenni afe a ɛto so akron, bosome a ɛto so du, bosome no da a ɛto so du no, Babilon hene Nebukadnesar+ ne n’asraafo nyinaa baa Yerusalem so.+ Ɔkyekyee wɔn asoɛe wɔ kurow no ho, na osii akoban* twaa ho nyinaa hyiae.+ 2 Wɔkaa kurow no mufo hyɛɛ mu kosii Ɔhene Sedekia ahenni afe a ɛto so 11 mu. 3 Bosome a ɛto so anan no da a ɛto so akron no, ɔkɔm no mu yɛɛ den+ wɔ kurow no mu, na na aduan biara nni hɔ mma asaase no sofo.+ 4 Wobuu kurow no fasu guu mu,+ na asraafo no nyinaa guan fii kurow no mu anadwo. Wɔrekɔ no, wɔkɔfaa ɔpon a ɛda afasu abien no ntam no mu, baabi a ɛbɛn ɔhene turo no. Na ɔhene no de n’ani kyerɛɛ Araba kwan so.+ Saa bere no nyinaa, na Kaldeafo no atwa kurow no ho ahyia. 5 Na Kaldea asraafo no de mmirika taa ɔhene no, na wɔkɔtoo no wɔ Yeriko sare so, na n’asraafo a wɔwɔ ne nkyɛn nyinaa hwetee. 6 Ɛnna wɔkyeree ɔhene no,+ na wɔde no foro kɔmaa Babilon hene wɔ Ribla, na obuu no atɛn. 7 Wokunkum Sedekia mma mmarima wɔ n’anim, na Sedekia nso, Nebukadnesar sɛee n’ani maa n’ani furae. Afei ɔde kɔbere nkɔnsɔnkɔnsɔn guu no de no kɔɔ Babilon.+

8 Bosome a ɛto so anum, bosome no da a ɛto so ason, kyerɛ sɛ, Babilon hene Nebukadnesar ahenni afe a ɛto so 19 no, awɛmfo so panyin Nebusaradan+ a ɔyɛ Babilon hene akoa no baa Yerusalem.+ 9 Ɔhyew Yehowa fi+ ne ɔhene fi*+ no ne Yerusalem afi nyinaa dwerɛbee.+ Afei nso, ɔhyew otitiriw biara fi.+ 10 Na Kaldea asraafo a wɔka awɛmfo so panyin no ho no nyinaa dwiriw Yerusalem afasu a atwa ho ahyia no gui.+ 11 Awɛmfo so panyin Nebusaradan faa ɔmanfo a wɔaka wɔ kurow no mu, ne wɔn a wɔde wɔn ho kɔmaa Babilon hene no, ne ɔmanfo a wɔaka no kɔe.+ 12 Nanso awɛmfo so panyin no gyaw ɔman no mu ahiafo a wonni hwee no bi sɛ wɔnyɛ bobe mfuw mu adwuma ne nkoadwuma.+ 13 Na Yehowa fi hɔ kɔbere adum,+ ne trɔk a wɔde twe nsu,+ ne kɔbere Po+ a ɛwɔ Yehowa fi hɔ no, Kaldeafo no bubuu no asinasin, na wɔde kɔbere no kɔɔ Babilon.+ 14 Na nea wɔde sesaw nsõ, sofi, adumgya, nkuruwa, ne kɔbere nneɛma a wɔde yɛ adwuma wɔ asɔrefi hɔ no nyinaa, wɔsesaw ɛno nso kɔe. 15 Nkankyee a wɔde ogya gu mu ne nkankyee a wɔde sika kɔkɔɔ amapa+ ayɛ ne nea wɔde dwetɛ amapa+ ayɛ no, awɛmfo so panyin no sesaw kɔe. 16 Na adum abien no, Ɛpo no, ne trɔk a wɔde twe nsu a Ɔhene Solomon yɛ maa Yehowa fi no, kɔbere a wɔde yɛe no dodow nti, wɔantumi ankari.+ 17 Adum no biara tenten yɛ basafa* 18,+ na kɔbere na wɔde yɛe; ntaaso no baako tenten yɛ basafa anum; atena ne granate akutu* a etwa ntaaso no ho hyia no, kɔbere na wɔde yɛɛ ne nyinaa.+ Edum a ɛto so abien no ne ɛho granate akutu no nyinaa nso, saa ara na na ɛte.

18 Bio nso, awɛmfo so panyin no faa ɔsɔfo panyin Seraia+ ne n’abadiakyiri ɔsɔfo Sefania+ ne apon ano ahwɛfo baasa no de wɔn kɔe.+ 19 Nnipa a ɔfaa wɔn fii kurow no mu kɔe no bi nso ne ahemfi panyin baako a ɔda asraafo no ano, mmarima baanum a wɔwɔ kurow no mu a wɔne ɔhene tu agyina, ɔsahene no kyerɛwfo a ɔboaboa dɔm ano wɔ asaase no so, ne ɔmanfo no mu mmarima 60 a na wɔda so wɔ kurow no mu. 20 Awɛmfo so panyin Nebusaradan+ faa wɔn de wɔn kɔmaa Babilon hene wɔ Ribla.+ 21 Na Babilon hene kunkum wɔn wɔ Ribla wɔ Hamat+ asaase so. Saa na ɛyɛe a wotuu Yudafo ase fii wɔn asaase so kɔɔ obi man so.+

22 Ɔmanfo a Babilon hene Nebukadnesar gyaw wɔn wɔ Yuda asaase so+ no, ɔpaw Safan+ ba Ahikam+ ba Gedalia+ sɛ onni wɔn so. 23 Bere a asahene no nyinaa ne wɔn mmarima tee sɛ Babilon hene apaw Gedalia no, ntɛm ara na wɔbaa Gedalia nkyɛn wɔ Mispa. Wɔn a wɔbae ni: Netania ba Ismael, Karea ba Yohanan, Tanhumet a ɔyɛ Netofani no ba Seraia, ne Maakatni no ba Yaasania, wɔne wɔn mmarima.+ 24 Ɛnna Gedalia kaa ntam kyerɛɛ wɔne wɔn mmarima no sɛ: “Munnsuro sɛ mobɛsom Kaldeafo no. Montena asaase no so na monsom Babilon hene, na ebesi mo yiye.”+

25 Bosome a ɛto so ason mu no, Elisama ba Netania ba Ismael+ a ofi adehye abusua* mu no bae, ɔne mmarima du, na wokum Gedalia, na wokunkum Yudafo ne Kaldeafo a wɔka ne ho wɔ Mispa+ no nso. 26 Ɛno akyi no, nnipa no nyinaa, efi akumaa so kosi ɔkɛse so, ne asahene no sɔree, na wɔkɔɔ Egypt,+ efisɛ na wosuro Kaldeafo no.+

27 Bere a wɔkyeree Yuda hene Yehoiakin+ kɔe no, afe a ɛto so 37, bosome a ɛto so 12 no da a ɛto so 27 no, Babilon hene Ewil-Merodak afe a ɔbɛyɛɛ ɔhene no, oyii Yuda hene Yehoiakin* fii afiase.+ 28 Ɔne no kasae kama, na ɔmaa n’ahengua so sen ahemfo a aka a wɔka ne ho wɔ Babilon no nhengua. 29 Enti Yehoiakin yii n’afiase ntaade, na ne nkwa nna nyinaa, odidii wɔ ɔhene pon so daa. 30 Wɔde aduan fii ɔhene nkyɛn brɛɛ no da biara, ne nkwa nna nyinaa.