Dio el rispeta e el ghe dà valor ale done

QUANDO l’è vegnesto ala Tera, Gesù el ga dimostrà le qualità de so Pare de maniera perfeta. Lu el ga fato compagno al so Pare Selestial. Gesù el ga dito che lu el fea come el so Pare ghe gavea insegnà e sempre fea quel che ghe piase a lu. (Gioani 8:28, 29; Colossensi 1:15) Alora, quando pensemo nela maniera che Gesù el parlea cole done e come le tratea, podemo capir cossa che Dio el pensa de lore e come lu el vol che le tratemo.

Arquanti studiosi, dopo de gaver ledesto i relati dei Vangeli, i ga visto che Gesù el tratea le done de una maniera difarente dele persone del so tempo. Parché che lu el tratea le done de una maniera difarente? Come che l’era difarente? E pi importante, sarà che quel che Gesù el ga insegnà ancora giuta le done a gaver pi libertà?

Come Gesù el tratea le done

Gesù el vedea le done de una maniera pura. Arquanti lìderi religiosi giudei i credea che, quando un omo el rivea darente de una dona, lu el gavaria voie sbaliade. Par quela, le done no le gavea de ciacolar coi òmini fora de casa o ndar fora sensa querzerse col velo. Ma Gesù no’l ga dito de mai parlar cole done. Invesse, lu el ga dito che i òmini i gavaria de controlar le so voie sbaliade e tratar le done con rispeto. — Mateo 5:28.

Gesù anca el ga dito: “Quel che se divorsia dela so dona e se marida con nantra el fà adultèrio contra ela.” (Marco 10:11, 12) Alora, Gesù el ga mostrà che l’era contra el insegnamento dei rabini che assea che i òmini i se divorsiesse “par qualche motivo.” (Mateo 19:3, 9) I rabini i insegnea che el omo mai l’era considerà infedele, sol la dona. De acordo con un comentàrio bìblico, Gesù el ga assà ciaro che el omo el ga la medèsima obrigassion che la dona de esser fedele. Cossita, lu el ga mostrà che le done le ga valor e le ga de esser rispetade.

Come el so insegnamento ne giuta ancoi: Nele riunion dele Testimònie de Geovà le done e i òmini i resta insieme. Le done no ghe ocore gaver paura che i òmini i va vardarle de una maniera che le fà sentirse mal o tratarle de una maniera che le assa con vergogna. I òmini che i serve a Geovà i trata “le done pi vècie come mare e le pi gióvene come sorele, con tuto el rispeto.” — 1 Timòteo 5:2.

Gesù el se ga tolto tempo par insegnar le done. I rabini i pensea che le done no le gavea de esser insegnade. Ma Gesù l’era contra la idea comun che la dona la gavaria de restar sol drio i so afari in cosina. Invesse, lu ghe ga insegnà e le ga motivade a parlar quel che le sentia o pensea, par quela el ga volesto insegnar Maria. (Luca 10:38-42) Anca Marta, so sorela de Maria, la ga imparà tanto de Gesù. Savemo de questo parché ela la ga rispondesto a Gesù de maniera sàbia dopo dela morte de Làsaro. — Gioani 11:21-27.

Gesù el se importea con quel che le done le pensea. In quel tempo, tante done le pensea che sol le ndaria esser felice se le gavesse un brao fiol omo, meio ancora se fusse un profeta. Quando una dona ghe ga dito a Gesù: ‘Felice ze la to mare!’, lu el ghe ga insegnà che l’è pi importante esser obediente a Dio. (Luca 11:27, 28) Alora, lu el volea mostrar che la amicìssia con Dio la gavea pi valor che sol ndarghe drio dele tradission sora le done. — Gioani 8:32.

Come el so insegnamento ne giuta ancoi: Quei che i insegna nela congregassion ghe piase tanto quando le done le fà comentari nela riunion. Lori i rispeta le done che le ga pi speriensa e che ‘le insegna quel che l’è bon’ par meso de quel che le dise o anca par meso del so esémpio. (Tito 2:3) Anca, lori i ga el so aiuto par predicar le bone notìssie del Regno de Dio. — Salmo 68:11; vedi el quadro “El apòstolo Paolo el ga proibio le done de parlar?”, nela pàgina 9.

Gesù el ghe dea valor ale done. Nei tempi bìblichi, no se dea tanto valor ale fiole quanto se dea ai fioi. El Talmude, un libro che parla dele tradission dei giudei, dise: “Felice l’è quel che el ga fioi òmini e poareto de quel che el ga fiole done.” Arquanti i pensea che no l’era mia bon gaver una fiola parché i gavaria de catar un omo par maridarse con ela, pagar el prèssio del matrimònio e ela no la podaria tender de lori quando i vegnesse veci.

Gesù el ga ressussità la fiola de Giairo e el fiol dela védova de Nain. Cossita, el ga mostrà che el ghe dea valor ala vita de una toseta compagno ala vita de un toseto. (Marco 5:35, 41, 42; Luca 7:11-15) Dopo che Gesù el ga curà una dona che la gavea una malatia fea 18 ani, lu la ga ciamada de “fiola de Abraon”. Questa spression ghen’è poche volte nei scriti dei giudei. (Luca 13:10-16) Gesù el ga parlà con ela con rispeto e bontà, nò sol parché ela la fea parte de quela nassion, ma anca parché la gavea granda fede. — Luca 19:9; Gàlati 3:7.

Come el so insegnamento ne giuta ancoi: Ghen’è un dito dela Àsia che dise: “Slevar su una fiola l’è come darghe àqua al giardin del visin.” El pare e la mare seghidori de Gesù no i pensa cossita. Lori i tende ben dei so fioi, sia tosi o tose. Lori i fà tuto quel che i pol par insegnarghe, darghe una bona creansa e tender dela so salute.

Gesù el se fidea nele done. Nel tribunai dei giudei, i fea poco del testimònio de una dona, come se fusse el testimònio de un schiavo. Giusefo, che el studiea la stòria nel primo sècolo, el ga dito: “No se pol fidarse in quel che le done le dise nei tribunai. Parché lore le parla sensa pensarghe sora e le se assa influensar fàcile.”

Gesù l’era ben difarente de quei lìderi giudei parché lu el ga scoliesto le done par parlar dela so ressuression. (Mateo 28:1, 8-10) Queste done fedele le gavea pròpio visto quando Gesù l’è stà copà e sepoltà, ma i apòstoli no i se ga fidà de lore. (Mateo 27:55, 56, 61; Luca 24:10, 11) Invesse, Gesù el ga mostrà che se fidea dele done parché, quando l’è stà ressussità, lu el se ga fato veder prima a lore e ghe ga dito de contarghe ai altri cossa che le gavea visto. — Ati 1:8, 14.

Come el so insegnamento ne giuta ancoi: I òmini Testimònie de Geovà che i ga responsabilità nela congregassion i ghe dà valor ale done quando i scolta quel che lore le dise. I òmini maridadi che i seghe a Gesù ‘i ghe dà onor’ ale so done quando le scolta con atension. — 1 Piero 3:7; Génesi 21:12.

Prinsipi dela Bìblia giuta le done a esser pi felice

Quando i òmini i fà compagno a Cristo, le done le ga el rispeto e la libertà che Dio el volea che le gavesse. (Génesi 1:27, 28) I òmini seghidori de Gesù che i ze maridadi no i pensa che i ze meio che le done. Invesse, lori i fà de acordo coi prinsipi dela Bìblia, cossita i fà le so done contente. — Efesi 5:28, 29.

Varda el esémpio de Yelena. El so omo la tratea mal parché l’è stà slevà nte una situassion che la dona no la podea scòlier con chi la ndaria maridarse e l’era comun par la dona ciapar bote del so omo. Alora, ela la ga scominsià a studiar la Bìblia. Ela la ga dito: “Quel che go imparà dela Bìblia me ga dato forsa. Go imparà che ghen’è un Dio che me ama tanto, che me dà valor e se preocupa con mi. Go visto che, se anca el me omo el studiesse la Bìblia, lu el podaria cambiar la maniera che el me tratea”. Ela la era premosa che questo sucedesse. Alora, lu el ga scominsià a studiar la Bìblia e el se ga batesà come Testimònia de Geovà. Yelena la ga dito: “Adesso, lu l’è un esémpio de autocontrolo. Ghemo imparà a sempre perdonar un al altro.” Cossa che la ga imparà de questo? “I prinsipi dela Bìblia i me ga giutà pròpio a veder che son protegesta nel me matrimònio e che mi go valor.” — Colossensi 3:13, 18, 19.

No ghen’è sol el esémpio de Yelena. Ghen’è tante done che le seghe a Gesù e che le ze felice insieme col so omo parché lore le se sforsa de far de acordo coi prinsipi dela Bìblia. Lore le se sente rispetade, consolade e lìbere intrà i so fradei dela congregassion. — Gioani 13: 34, 35.

Tuti i òmini e done che i seghe a Gesù, i sà che i ze pecadori e imperfeti. Ma lori i riva darente al so Dio e Pare amoroso, parché i ga la speransa de esser lìberi del pecato e de gaver ‘la libertà dei fioi de Dio’. Che bela speransa che la vien del Dio che el ghe dà valor ai òmini e ale done. — Romani 8:20, 21.