ILEZI

1 Jọ eva e were ohwo nọ ọ rẹ nya lele ohrẹ irumuomu hu

Nọ o re dikihẹ edhere erahaizi hi+

Nọ ọ rẹ keria agbara isẹkoko ho.+

 2 Rekọ uzi Jihova o rẹ were iẹe gaga,+

Yọ ọ rẹ rọ unu kpotọ se* uzi Riẹ te aso te uvo.+

 3 Ọ te jọ wọhọ ure nọ a kọ fihọ akotọ iko-ame,

Ure nọ o rẹ mọ ibi evaọ ezi riẹ,

Nọ ebe riẹ i re lo ho.

 4 Irumuomu na a rrọ ere he;

A wọhọ ehọrọ nọ ofou o re fou kufiẹ.

 5 Oyejabọ nọ irumuomu na a gbe ti ro dikihẹ hẹ evaọ ẹdhoguo na;+

Yọ erahaizi a ti dikihẹ hẹ evaọ ogbotu ahwo okiẹrẹe.+

 6 Keme Jihova ọ riẹ oware nọ ikiẹrẹe na a bi ru,+

Rekọ oware nọ irumuomu na a bi ru u ti kiekpe ai.+

2 Fikieme erẹwho na a bi ro mu ofu

Nọ ahwo na a be rọ ma omaa* oware ufofe?+

 2 Ivie otọakpọ na a mugba

Yọ enọ e rrọ ahwo ologbo evaọ esuo a kuomagbe* wọhọ omọvo+

Be wọso Jihova gbe ọnọ o wholo.*+

 3 A ta nọ: “Joma bru egbregba rai no

Je gbolo ifi rai kufiẹ!”

 4 Ọnọ ọ keria agbara-uvie evaọ obọ idhiwu na ọ te hwẹ;

Jihova ọ te rehọ ae jijehwẹ.

 5 Evaọ oke yena ọ te rọ ofu ta ẹme kẹ ae

Jẹ rọ ofu ọgaga riẹ fi iguegue họ ae oma,

 6 Be ta nọ: “Mẹ omamẹ mẹ rọ ovie mẹ mu no+

Evaọ Zayọn,+ ugbehru ọrẹri mẹ na.”

 7 Jọ me whowho oware nọ Jihova ọ ta;*

Ọ ta kẹ omẹ nọ: “Whẹ yọ ọmọzae mẹ;+

Nẹnẹ na me zihe ruọ ọsẹ ra no.+

 8 Yare mi omẹ, mẹ te kẹ owhẹ erẹwho re e jọ ukuoriọ ra

Jẹ kẹ owhẹ otọakpọ na soso re o jọ ora.+

 9 Whọ te rọ ọkpọ-isuẹsu ayọno whọlọ ae,+

Who ti kpe ai ehehẹhẹ wọhọ othẹ.”+

10 Fikiere obọnana, whai ivie, wha wo ovuhumuo;*

Wha jẹ ọkpọvio rehọ,* whai ibruoziẹ otọakpọ na.

11 Wha gọ Jihova avọ ozọ,

Jẹ ghọghọ avọ enuhu.

12 Wha rọ adhẹẹ kẹ* ọmọ na,+ o gbẹ rrọ ere he eva e te dha Ọghẹnẹ*

Ọ vẹ te raha owhai no edhere na no,+

Keme ofu Riẹ ọ rẹ wọ ze ovovẹrẹ.

 3 Rekọ, O Jihova, whẹ yọ ojese nọ o wariẹ omẹ họ,+

Oruaro mẹ+ gbe Ọnọ ọ be kpare uzou mẹ kpehru.+

 4 Mẹ te kpare urru mẹ bo se Jihova,

Yọ o ti yo kẹ omẹ no obọ ugbehru ọrẹri riẹ ze.+ (Silah)

 5 Me ti kiẹzẹ jẹ wezẹ;

Yọ mẹ te rọwo ze ababọ oware ovo nọ u re ru omẹ,

Keme Jihova o gbe bi fiobọhọ kẹ omẹ.+

 6 Mẹ be dhozọ ahwo idu ikpe eko buobu hu

Enọ i dhe uhie họ tabọ tabọ be wọ bru omẹ ze.+

Keme whọ te tehe ewegrẹ mẹ kpobi agba;

Whọ te kpare akọ ahwo omuomu na no.+

 3 Jọ wha riẹ nọ Jihova o ti ru oware obọdẹ kẹ odibo riẹ nọ ọ talamu ei;*

Jihova o ti yo nọ me te bo sei.

 5 Dhe idhe ẹrẹreokie,

Je fievahọ Jihova.+

 7 Whọ rehọ oghọghọ vọ udu mẹ no

Vi enọ i vu ibi ekakọ buobu je wo udi* okpokpọ buobu.

 8 Me ti kiẹzẹ jẹ wezẹ dhedhẹ,+

Keme, O Jihova, whẹ ọvo họ ọnọ o ru omẹ rria avọ omofọwẹ.+

5 Gaviezọ kẹ eme mẹ, O Jihova;+

Muẹrohọ imẹ-idio mẹ.

 2 Gaviezọ kẹ oviẹ mẹ rọkẹ obufihọ,

O Ovie mẹ gbe Ọghẹnẹ mẹ, keme whẹ mẹ be lẹ se.

 3 O Jihova, who ti yo urru mẹ evaọ ohiohiẹ;+

Evaọ ohiohiẹ mẹ te vuẹ owhẹ oware nọ o be kẹ omẹ uye+ jẹ hẹrẹ avọ irẹro.

 4 Keme whẹ yọ Ọghẹnẹ nọ umuomu o rẹ were he;+

Ohwo oyoma ọvo ọ rẹ sae jọ kugbe owhẹ hẹ.+

Who mukpahe ahwo kpobi nọ a re ru eware imuomu;+

 6 Whọ te raha ahwo nọ a rẹ ta erue.+

 7 Rekọ mẹ te nyaziọ uwou ra+ fiki uyoyou ulogbo ra nọ o rẹ hiẹ hẹ;+

Me ti guzou kpotọ rẹriẹ ovao ku etẹmpol ọrẹri* ra avọ ozodhẹ nọ me wo kẹ owhẹ.+

 8 Su omẹ, O Jihova, evaọ ẹrẹreokie ra fiki ewegrẹ mẹ;

Ru edhere ra vẹ kẹ omẹ.+

 9 Keme ẹme ọvo nọ a rẹ ta nọ a rẹ sai fievahọ ọ rrọ họ;

Oware ovo o rrọ ae eva ha ajokpaọ egrẹ;

Edhuru rai yọ uki nọ u kpefihọ;

A rẹ rọ ẹrọo rai jiri ahwo ujiro igbenu.*+

10 Rekọ Ọghẹnẹ o ti brukpe ai inọ a reabe;

Omaa uyoma obọrai o te wha ekie rai ze.+

Jọ a le ai vrẹ fiki izieraha ibuobu rai,

Keme a kpareso owhẹ.

11 Rekọ ahwo kpobi nọ a dhẹ bru owhẹ ze wọhọ oria adhẹzọ a te ghọghọ;+

A ti bo ubo oghọghọ ẹsikpobi.

Who ti ru nọ obọ u gbe ti ro te ai hi,

Yọ ahwo nọ a you odẹ ra a te ghọghọ fiki ra.

12 Keme whọ te ghale ohwo kpobi nọ o kiẹrẹe, O Jihova;

Whọ te jẹ ae rehọ, yọ whọ te thọ ae* wọhọ ojese ulogbo.+

6 O Jihova, whọ rọ evedha whọku omẹ hẹ,

Yọ whọ rọ ofu kpọ omẹ vi hi.+

 3 Ẹhẹ, mẹ* be ruawa gaga,+

Yọ mẹ be nọ owhẹ, O Jihova, inọ ẹvẹ u ti kri te?+

 4 Zihe ze, O Jihova, re who siwi omẹ;*+

Siwi omẹ fiki uyoyou ra nọ o rẹ hiẹ hẹ.+

 5 Keme ohwo nọ o whu no ọ rẹ sae fodẹ* owhẹ hẹ;

Kọ ono ọ rẹ sae jọ obọ Uki* jiri owhẹ?+

 6 Imẹ-idio mẹ i ru oma lọhọ omẹ no;+

Aso na soso mẹ rẹ viẹ ehwa mẹ vo avọ irui-oviẹ;*

Mẹ rẹ viẹ agbara othethei mẹ vọ.+

 7 Uweri o gbẹ be jọ omẹ ruẹ ude he;+

Ibiaro mẹ i dhe no* fiki ahwo kpobi nọ a bi kpokpo omẹ.

 8 Wha nyasiọ omẹ ba, whai kpobi nọ i bi ru eware imuomu,

Keme Jihova o ti yo edo oviẹ mẹ.+

 9 Jihova o ti yo ayare mẹ kẹ obufihọ;+

Jihova o ti yo olẹ mẹ.

10 A ti ru oma vo ewegrẹ mẹ kpobi a ve ti reghe no;

A ti si uzou rehọ idudhe avọ omovuọ.+

 2 O gbẹ rrọ ere he, a te va omẹ* ekekẹ wọhọ epanọ okpohrokpo o re ru na,+

A vẹ te wọ omẹ vrẹ ababọ ohwo ọvo nọ o re siwi omẹ no obọ rai.

 3 O Jihova Ọghẹnẹ mẹ, otẹrọnọ me ru thọ evaọ onana,

Otẹrọnọ me ru umuomu jọ,

 4 Otẹrọnọ me ru ohwo nọ o bi ru ewoma kẹ omẹ thọ,+

Hayo otẹrọnọ mẹ kwa eware ewegrẹ mẹ rehọ gheghe gheghe,*

 5 Jọ ọwegrẹ o le omẹ je le omẹ mu;

Jọ o thihi omẹ* nyaotọ ẹkpẹ

Je ru re orro mẹ o raha muotọ. (Silah)

 6 Rọ evedha kparoma, O Jihova;

Kpama re whọ họre ewegrẹ mẹ nọ ofu ọ rrọ eva;+

Kpama fiki mẹ, je ru re a bru uvioziẹ.+

 7 Jọ erẹwho na a wariẹ owhẹ họ;

Whọ vẹ te họre ae no obọ ehru ze.

Bruoziẹ mẹ, O Jihova, wọhọ epaọ ẹrẹreokie mẹ

Jẹ wọhọ epaọ ẹgbakiete mẹ.+

Rekọ ru re ikiẹrẹe na i dikihẹ,+

Keme whẹ yọ Ọghẹnẹ okiẹrẹe+ nọ ọ be kiẹ idu+ gbe iroro ididi obeva riwi.*+

11 Ọghẹnẹ yọ Obruoziẹ okiẹrẹe,+

Ọghẹnẹ o bi whowho oziẹobro* riẹ kẹdẹ kẹdẹ.

12 Otẹrọnọ ohwo jọ ọ rọwo kurẹriẹ hẹ,+ Ọ rẹ thọ ọgbọdọ riẹ;+

Ọ rẹ vẹ uze riẹ jẹ ruẹrẹ iẹe kpahe.+

13 Ọ rẹ ruẹrẹ ekwakwa ikpakpe riẹ họ;

Ọ rẹ ruẹrẹ ese riẹ nọ e be ware erae kpahe.+

14 Rri ohwo nọ o dieva umuomu họ;

Ẹme-ọgwọlọ ọvo ọ vọ riẹ eva, yọ erue o ti yẹ.+

15 Ọ tọ ọgọdọ, ọ tọ riẹ kokodo,

Rekọ o te kie fihọ ọgọdọ nọ ọye ọvo ọ tọ na.+

16 Omaa uyoma riẹ na u ti ghelie zihe fihọ iẹe uzou;+

Ozighi riẹ o ti kie fihọ oko uzou riẹ.

17 Me re jiri Jihova rọkẹ uvioziẹ riẹ;+

Mẹ te so ile jiri* odẹ Jihova+ Ọnọ Ọ Mai Kpehru na.+

8 O Jihova Olori mai, rri epanọ odẹ ra o rro te evaọ otọakpọ na soso;

Who ru oruaro ra kpehru gaga vi idhiwu na dede!*+

 2 Whọ rehọ unu emaha gbe emọboba+ dhesẹ ẹgba ra via

Fiki ewegrẹ ra,

Re who ruru unu ọwegrẹ gbe ohwo orukele na.

 3 Nọ mẹ ruẹ idhiwu ra, iruo iziabọ ra,

Ọvẹre na gbe isi na nọ whọ ruẹrẹhọ,+

 4 Kọ ono họ ohwo-akpọ* nọ whọ be rọ kareghẹhọ iẹe,

Gbe ọmọ ohwo-akpọ nọ whọ be rọ rẹrotei?+

 5 Who ru rie kpotọ omojọ vi enọ e wọhọ Ọghẹnẹ,*

Yọ whọ rehọ oruaro gbe ọghọ ro tu ei uzou.

 6 Whọ rehọ e riẹ mu ọnọ o wuzou iruo abọ ra;+

Who fi eware kpobi họ otọ awọ riẹ:

 7 Ithuru erao gbe iruẹ na kpobi,

Te erao ẹwọ na,*+

 8 Evra obọ ehru* na gbe iyei abade na,

Oware kpobi nọ o be nya eva* ebade na.

9 Mẹ rẹ rọ eva* mẹ kpobi jiri owhẹ, O Jihova;

Mẹ rẹ ta kpahe iruo igbunu ra kpobi.+

 2 Mẹ rẹ ghọghọ jẹ wereva fiki ra;

Mẹ te so ile jiri* odẹ ra, O Ọnọ Ọ Mai Kpehru.+

 3 Nọ ewegrẹ mẹ a te kuomarẹriẹ,+

A ti zoruẹ je whu no aro ra.

 4 Keme who dikihẹ kẹ omẹ whọ tẹ thọ omẹ fikinọ mẹ riẹ ru;

Whọ keria agbara-uvie ra bi guẹdhọ* nọ o kiẹrẹe.+

 5 Whọ whọku erẹwho+ jẹ raha irumuomu na,

Who te voro odẹ rai no bẹdẹ bẹdẹ.

 6 A raha ọwegrẹ na no bẹdẹ bẹdẹ;

Who vi ikpewho rai no otọ,

A gbẹ te kareghẹhọ ai ofa ha.+

 7 Rekọ Jihova ọ keria agbara-uvie bẹdẹ bẹdẹ;+

Ọ rehọ agbara-uvie riẹ vi no kẹ uvioziẹ.+

 8 Ọ te rọ ẹrẹreokie bruoziẹ akpọ* na;+

O ti bruoziẹ nọ o kiẹrẹe kẹ erẹwho na.+

 9 Jihova ọ te jọ oria adhẹzọ* nọ o foma kẹ enọ a bi kienyẹ,+

Oria adhẹzọ nọ o foma evaọ oke idhọvẹ.+

10 Enọ e riẹ* odẹ ra a ti fievahọ owhẹ;+

Whọ te nyasiọ enọ e be gwọlọ owhẹ ba vievie he, O Jihova.+

11 So ile jiri Jihova, ọnọ ọ be rria Zayọn na;

Ta eware nọ o ru via evaọ udevie ahwo na.+

12 Keme Ọnọ ọ rẹ kioja azẹ rai ọ be kareghẹhọ ae;+

Ọ rẹ kpairoro vrẹ oviẹ ahwo nọ a be reoja ha.+

13 Rri omẹ aro, O Jihova; rri oja nọ ahwo nọ a mukpahe omẹ a bi gbe kẹ omẹ,

Whẹ ọnọ ọ wọ omẹ no inuethẹ uwhu,+

14 Re mẹ ruẹsi whowho eware nọ who ru nọ i fo ejiro evaọ inuethẹ ọmọtẹ Zayọn,+

Jẹ ghọghọ fiki iruẹru esiwo ra.+

15 Erẹwho na a kie ruọ ọgọdọ nọ ae ọvo a tọ;

Ẹriri nọ ae ọvo a rọ kpahe ẹta* o mu awọ rai.+

17 Ahwo omuomu a ti kuomarẹriẹ kpobọ Uki,*

Ere o te jọ kẹ erẹwho kpobi nọ e be kpairoro vrẹ Ọghẹnẹ.

18 Rekọ a te kpairoro vrẹ iyogbe na bẹdẹ bẹdẹ hẹ;+

Yọ ẹruore enọ e be romakpotọ ọ te jọ ofofe vievie he.+

20 Fi ozọ họ ae oma, O Jihova,+

Jọ erẹwho na a riẹ nọ ahwo-akpọ gheghe a rrọ. (Silah)

 2 Ohwo omuomu na o bi le oruori na ududu,*+

Rekọ omaa umuomu riẹ nọ ọ be ma na u ti hwẹ ku ei uzou.+

 3 Keme ohwo omuomu na ọ be rọ isiuru oriobọ riẹ* seha+

Yọ o bi jiri ọnọ o wo uvou-uthethei na;*

נ [Nun]

Ọ be kẹ Jihova adhẹẹ hẹ.

 4 Fiki omorro riẹ, ohwo omuomu ọ rẹ kiẹ otọ oware he;

Iroro riẹ kpobi họ: “Ọghẹnẹ ọ rrọ họ.”+

 5 Eware i bi woma kẹe ọvo,+

Rekọ ọ rẹ sai wo otoriẹ iziẹibro ra ha;+

Ọ rẹ rọ ewegrẹ riẹ kpobi jijehwẹ.*

 6 Ọ rẹ jọ udu riẹ ta nọ: “Oware ovo u ti nuhu omẹ vievie he;*

No oge ruọ oge

Mẹ te ruẹ oware okpẹtu vievie he.”+

 7 Ehao,* erue, gbe ehaise e vọ riẹ unu;+

Ẹme-ọgwọlọ gbe eme edada* e rrọ otọ ẹrọo riẹ.+

 8 O re dhere kẹle iwhre be hẹrẹ;

Ọ rẹ jọ oria nọ o dhere na kpe ohwo nọ o ru oware ovo thọ họ.+

10 O ve gele ọnọ o kru na kie jẹ whọlọ iẹe;

Enọ i we ruọ abọ riẹ na e rẹ reoja evaọ obọ* riẹ.

Whẹ họ ọnọ ohwo nọ o kpawọ ku uye o re bo se;+

Whẹ họ ọnọ o re fiobọhọ kẹ ọmọ nọ o wo ọsẹ hẹ.*+

15 Wiri abọ ohwo omuomu ọgeva na,+

Re okenọ whọ te gwọlọ eware imuomu nọ o ru,

Whọ gbẹ ruẹ e rai hi.

18 Who ti bru uvioziẹ kẹ emọ nọ i wo esẹ hẹ na gbe enọ a guọghọ fihọ otọ na,+

Re ohwo-akpọ gheghe o gbe ru ozọ mu ai ofa ha.+

 2 Rri epanọ irumuomu na a be vẹ uze na;

A fi ose rai họ ufi-uze na no,

Re a jọ ebi sa ahwo nọ udu rai u kiete.

 3 Nọ a te kporo otọhotọ* na kuotọ no,

Eme ikiẹrẹe na a rẹ sai ru?”

 5 Jihova ọ be kiẹ ohwo okiẹrẹe na gbe ohwo omuomu na riwi;+

O* mukpahe ohwo kpobi nọ ozighi ọ rẹ were.*+

 6 O ti siobọno egbefẹ* fihọ ahwo omuomu na, wọhọ oso nọ ọ be rrọ;

A ti ku erae avọ isọ-ọre+ gbe ofou ọrrorro ọgaga fihọ egho rai.

 2 Ẹvẹ mẹ* rẹ ruawa kri te,

Avọ ọkora nọ ọ da omẹ oma fia kẹdẹ kẹdẹ?

Kẹ ibiaro mẹ elo re mẹ seba ekie ruọ owezẹ uwhu,

 4 Re ọwegrẹ mẹ ọ gbẹ ta ha inọ: “Me fi rie kparobọ no!”

 5 Rọkẹ omẹ, mẹ rẹroso uyoyou ra nọ o rẹ hiẹ hẹ;+

Udu mẹ o rẹ ghọghọ fiki iruẹru esiwo ra.+

A bi ru eware imuomu, a bi ru eware etọtọ;

Ohwo ọvuọvo nọ o bi ru ewoma ọ rrọ họ.+

 2 Rekọ Jihova o bi rri emọ ahwo no obọ odhiwu ze

Re ọ ruẹ sọ ọjọ ọ riẹ nọ o wo ovuhumuo,* sọ ọjọ ọ riẹ nọ ọ be gwọlọ Jihova.+

 3 Aikpobi a nyathọ no;+

Aikpobi a gbeku.

Ohwo ọvuọvo nọ o bi ru ewoma ọ rrọ họ,

Makọ omọvo dede.

 5 Rekọ ozọ ogaga o te ruọ ae oma,+

Keme Jihova ọ rrọ kugbe oge ahwo okiẹrẹe na.

 6 Whai ahwo nọ a bi ru oware uyoma wha be gwọlọ raha omaa oruori na,

Rekọ Jihova họ oria adhẹzọ riẹ.+

Okenọ Jihova o te koko ahwo riẹ nọ a mu kpohọ igbo ze no,

Jọ eva e were Jekọp, jọ Izrẹl ọ ghọghọ.

 2 Ohwo nọ ọ kare oruthọ,*+

Nọ o bi ru oware nọ u kiehọ+

Jẹ be ta uzẹme no udu riẹ ze.+

 3 Ọ rẹ rọ ẹrọo riẹ ta ahwo raha ha,+

O re ru ọrivẹ riẹ oware uyoma ovo ho,+

Yọ ọ rẹ raha odẹ egbẹnyusu riẹ hẹ.*+

 4 Ọ rẹ kẹnoma kẹ ohwo kpobi nọ o re ru eware etọtọ,+

Rekọ ọ rẹ kẹ ahwo nọ i wo ozodhẹ Jihova adhẹẹ.

 5 O re mi isuo fihọ ugho nọ o momo kẹ ohwo ho,+

Yọ ọ rẹ re udi hi re o brukpe ohwo nọ o ru oware ovo thọ họ.+

 3 Yọ erẹri otọakpọ na,

Ahwo nọ a wo ọghọ na* a bi ru eva were omẹ gaga.”+

Me re ku idhe udi orọ azẹ rai vievie he,

Yọ igbenu mẹ e rẹ fodẹ edẹ rai hi.+

Oghọghọ ulogbo o rrọ aro ra;*+

Evawere e rrọ* obọze ra bẹdẹ bẹdẹ.

17 Yo olẹ mẹ nọ mẹ be lẹ kẹ uvioziẹ, O Jihova;

Kezọ kẹ oviẹ mẹ rọkẹ obufihọ;

Gaviezọ kẹ olẹ mẹ nọ o kare eviẹhọ.+

 2 Ivie bru uvioziẹ kẹ omẹ;+

Jọ ibiaro ra e ruẹ oware nọ u kiehọ.

 3 Whọ kiẹ udu mẹ riwi no, whọ kiẹ omẹ riwi evaọ aso;+

Who ru omẹ fo no;+

Makọ evaọ obaro, whọ te ruẹ nọ mẹ ma omaa uyoma ovuovo ho,

Yọ mẹ rehọ unu mẹ raha uzi hi.

 4 Rọ kpahe eware nọ ahwo a bi ru,

Fikinọ me bi ru lele ẹme nọ o no unu ra ze, mẹ be kẹnoma kẹ uruemu uji.+

 5 Jọ ithihi mẹ e daji idhere ra

Re awọ mẹ ọ seba ezoruẹ.+

 7 Dhesẹ uyoyou ra nọ o rẹ hiẹ hẹ evaọ edhere igbunu,+

O, Osiwi enọ e dhẹ ziọ obọze riẹ re a ruẹse zọ

Rono obọ enọ e wọso owhẹ.

 8 Sẹro mẹ wọhọ ọmọ-ẹro ra;+

Si omẹ no họ otọ ibekpe ra.+

 9 Thọ omẹ no obọ ahwo omuomu nọ e be họre omẹ,

No obọ ewegrẹ mẹ nọ e gwọlọ kpe omẹ no* nọ e wariẹ omẹ họ.+

10 Udu rai u re brukpe ai hi;*

A be rọ unu rai ta eme omoya;

11 Obọnana a bi keke omai ba;+

A bi rri gwọlọ uvẹ nọ a re ro si uye se omai.*

12 Ọ wọhọ okpohrokpo nọ oma o be kpakpa re ọ za arao ekekẹ,

Wọhọ okpohrokpo ọgaga nọ o dhere be hẹrẹ.

13 Kparoma, O Jihova, re whọ zae dhe,+ re whọ fae kie fihọ otọ;

Rehọ ọgbọdọ ra siwi omẹ* no obọ ahwo omuomu;

14 Rehọ obọ ra siwi omẹ, O Jihova,

Rono obọ ahwo akpọ* nana, enọ ẹkẹ rai ọ rrọ uzuazọ nana,+

Enọ whọ kẹ eware iwoma buobu nọ i no obọ ra ze+

Nọ e be nyasiọ ukuoriọ ba kẹ emezae ibuobu rai.

15 Rọkẹ omẹ, ẹrẹreokie mẹ o ti ru nọ mẹ te rọ ruẹ ovao ra;

U te kẹ omẹ re mẹ rọwo ze evaọ aro ra.*+

Ọghẹnẹ mẹ họ utho mẹ,+ ọnọ mẹ rẹ dhẹ ruọ otọ riẹ,

Ojese mẹ gbe uzei* esiwo mẹ,* oria adhẹzọ* mẹ nọ o foma.+

 3 Me re bo se Jihova, ọnọ o te ọnọ a re jiri,

Yọ o ti siwi omẹ no obọ ewegrẹ mẹ.+

 4 Ifi uwhu e wariẹ omẹ họ;+

Ahwo nọ a fioka ha nọ a wọhọ ame nọ o bi kporo ẹkẹre a bi ru ozọ mu omẹ gaga.+

 5 Ifi Uki* e wariẹ omẹ họ;

Egbefẹ uwhu e rẹriẹ ovao ku omẹ.+

 6 Me bo se Jihova evaọ oke idhọvẹ mẹ,

Ọghẹnẹ mẹ me je bo se re o fiobọhọ kẹ omẹ.

Ọ jọ obọ etẹmpol riẹ yo urru mẹ,+

Yọ ezọ riẹ i yo ubo nọ me bo sei rọkẹ obufihọ.+

 7 Kẹsena otọakpọ na o te muhọ enuhu gaga;+

Etọhotọ igbehru na i te je nuhu zighi zighi

I je nuhu kpemu kparo keme a ru rie eva dha no.+

 8 Iwiri i kuye no ighogho-inwe riẹ kpehru,

Erae egaga i no unu riẹ ze;+

Iwowo-erae i no oma riẹ ze.

 9 Ọ vẹ idhiwu na ziọ otọ okenọ o je nwrotọ,+

Yọ ebi ọlala ọ jọ otọ awọ riẹ.+

11 Ọ tẹ rehọ ebi ruru omariẹ,+

Ọ rehọ e riẹ wariẹ oma riẹ kpobi họ wọhọ uwou,

Ame obiebi gbe ẹgho ọlala.+

12 Elo nọ ọ rrọ aro riẹ

U ru nọ oso-itho gbe iwowo-erae i ro no ẹgho na ze.

13 Kẹsena Jihova o te ru nọ egbrara e rọ va evaọ obọ idhiwu;+

Ọnọ Ọ Mai Kpehru na o te ru nọ a ro yo urru riẹ+

Avọ oso-itho gbe iwowo-erae.

14 Ọ sa ese riẹ, a tẹ vahabọ;+

O vi elo egbrara riẹ bru rai o te ru ai reghe no.+

15 A te mu otọ iko-ame* na họ ẹruẹ;+

Etọhotọ ẹkwotọ na e tẹ bẹre lahwe fiki ọwhọkuo ra, O Jihova,

Fiki edo ẹwẹ nọ o no ighogho-inwe ra ze.+

16 Ọ rriẹ obọ no obọ ehru ze;

O te kru omẹ, o te si omẹ no obọ ame odidi ze.+

17 O siwi omẹ no obọ ọwegrẹ ọgaga mẹ,+

No obọ enọ i mukpahe omẹ nọ e goma vi omẹ.+

18 A wọ bru omẹ ze evaọ ẹdẹ nọ okpẹtu o ro te omẹ,+

Rekọ Jihova ọ tha omẹ uke.

19 Ọ rehọ omẹ ziọ oria omofọwẹ;*

O siwi omẹ fikinọ eva mẹ e jẹ were iẹe.+

20 Jihova ọ be hwosa kẹ omẹ fiki ẹrẹreokie mẹ;+

Ọ be hwosa kẹ omẹ fikinọ abọ mẹ ọ fo.+

21 Keme mẹ be nya evaọ idhere Jihova,

Yọ mẹ re rọ eva imuomu nyasiọ Ọghẹnẹ mẹ ba ha.

22 Iziẹibro riẹ kpobi e rrọ aro mẹ;

Mẹ te jẹ izi riẹ fiẹ hẹ.

23 Mẹ te kare afuẹwẹ ẹsikpobi evaọ aro riẹ,+

Yọ mẹ te kẹnoma kẹ oruthọ.+

24 Jọ Jihova ọ hwosa kẹ omẹ fiki ẹrẹreokie mẹ;+

Fiki abọ mẹ nọ ọ fo evaọ aro riẹ.+

25 Whọ rẹ talamu ohwo nọ ọ talamu owhẹ;+

Who re lele ohwo nọ ọ kare afuẹwẹ yeri ababọ afuẹwẹ;+

26 Whọ rẹ rọ eva efuafo lele ohwo nọ o wo eva efuafo yeri,+

Rekọ whọ rẹ rọ areghẹ lele ohwo nọ o re ru ẹghẹ yeri.*+

27 Keme who re siwi iruori*+

Rekọ who re hrẹ ahwo omorro* kpotọ.+

28 Keme whẹ họ ọnọ ọ rehọ ukpẹ mẹ tu, O Jihova,

Ọghẹnẹ mẹ nọ o zihe ebi mẹ ruọ elo.+

29 Avọ obufihọ ra, mẹ rẹ sae wọ nyae họre egbaẹmo nọ e wọ ze te kwa eware;+

Mẹ rẹ sae gadiẹ ugbẹhẹ vrẹ avọ ogaga Ọghẹnẹ.+

30 Edhere Ọghẹnẹ uzẹme na ọ rrọ gbagba;+

Ẹme Jihova ọ rrọ fuafo.*+

32 Ọghẹnẹ uzẹme na họ ọnọ o fi ogaga họ omẹ oma wọhọ ewu,+

Yọ o ti ru edhere mẹ jọ liọliọ.+

33 O re ru awọ mẹ jọ wọhọ awọ orua;

O re ru omẹ dikihẹ eria ikpekpehru.+

34 O bi wuhrẹ abọ mẹ kẹ ẹmo-ofio;

Abọ mẹ ọ rẹ sae vẹ uze ekọpa.

35 Whọ kẹ omẹ ojese esiwo ra,+

Obọze ra o be thọ* omẹ,

Yọ omaurokpotọ ra u bi ru omẹ fihọ ohwo ologbo.+

36 Who ru edhere na kẹre kẹ ithihi awọ mẹ;

Otọ o te whra awọ* mẹ hẹ.+

37 Me ti le ewegrẹ mẹ je le ai mu;

Me ti zihe ze he bẹsenọ me re kpe ai muotọ.

38 Mẹ te pẹhẹ ai no, re a gbẹ sae kparoma ha;+

A ti kie fihọ otọ evawọ mẹ.

39 Whọ te kẹ omẹ ẹgba nọ me ti ro fi ẹmo na;

Who ti ru ewegrẹ mẹ kie kẹ omẹ.+

40 Who ti ru ewegrẹ mẹ dhẹ kẹ omẹ,*

Yọ me ti kpe ahwo nọ a mukpahe omẹ no.*+

41 A bi bo kẹ obufihọ, rekọ ohwo ọvo ọ riẹ nọ o re siwi ai hi;

A bi tube bo se Jihova, rekọ ọ be kẹ ai uyo ho.

42 Me ti duwu ai wuru wuru wọhọ ovu nọ ofou o re fou kufiẹ;

Me ti gbolo ai kufiẹ wọhọ ọloho nọ ọ rrọ iyẹrẹ.

44 A ti yoẹme kẹ omẹ fiki usi gheghe nọ a yo;

Ahwo erẹwho efa a te nyaze ti guzou kpotọ avọ iguegue evaọ aro mẹ.+

45 Udu u ti no ahwo erẹwho efa awọ;*

A ti no eria omofọwẹ rai ze yọ a bi nuhu.

47 Ọghẹnẹ uzẹme na ọ be kioja kẹ omẹ;+

O bi hrẹ ahwo na kpotọ re a jọ otọ mẹ.

48 O bi siwi omẹ no obọ ewegrẹ mẹ nọ eva e be dha;

Whọ kpare omẹ kpobọ ehru siọ ahwo nọ a be họre omẹ ba;+

Who siwi omẹ no obọ ohwo nọ o re ru ozighi.

49 Oyejabọ nọ me ti ro jiri owhẹ evaọ udevie erẹwho na, O Jihova,+

Yọ mẹ te so ile jiri* odẹ ra.+

50 O bi ru eware ilogbo ro siwi ovie riẹ;*+

O bi dhesẹ uyoyou nọ o rẹ hiẹ hẹ kẹ ọriẹ nọ o wholo,+

Rọkẹ Devidi gbe emọ* riẹ bẹdẹ bẹdẹ.+

19 Idhiwu na i bi whowho oruaro Ọghẹnẹ via;+

Ihru* na i bi whowho iruo abọ riẹ.+

 2 Kẹdẹ kẹdẹ eme rai i bi hwẹ ze,

Kaso kaso i bi dhesẹ eriariẹ via.

 3 A be ta ẹme ọvuọvo ho;

A bi yo urru rai hi.

 4 Rekọ edo rai o do ruọ* otọakpọ na soso no,

Yọ ovuẹ rai u do te oka avọ oka otọakpọ* na no.+

Ọ rehọ uwou-udhu vi kẹ ọre na evaọ obọ idhiwu na;

 5 Ọ wọhọ ọva nọ o bi no ubrukpẹ ọva ze;

Ọ be wereva wọhọ ọgba nọ ọ be dhẹ ohrẹ.

 6 Ọ rẹ va no oka idhiwu na jọ ze,

O ve ghelie wariẹ te oka riẹ odekọ;+

Yọ oware ovo nọ ẹrrorro riẹ o re mu hu o riẹ hẹ.

 8 Ijaje nọ i no obọ Jihova ze i kiẹrẹe, i re ru udu na ghọghọ;+

Izi Jihova e rrọ fuafo, i re rovie ohwo aro.*+

10 I woma* vi igoru,

I woma vi emamọ igoru* buobu,+

E mere vi ọnyọ,+ ọnyọ nọ o bi su no ithuzou-ọnyọ ze.

11 A rehọ e rai vẹvẹ odibo ra unu no;+

Ekoko rai o rẹ wha osohwa ulogbo ze.+

13 Whaha odibo ra iruẹru omorro;+

Whọ kuvẹ re e jọ ẹkẹ uruemu mẹ hẹ.+

Kẹsena mẹ vẹ te gbakiete,+

Me gbe keke aro fihọ raha uzi hi.*

14 Jọ ẹmeunu mẹ gbe eware nọ me bi roro didi kpahe evaọ udu mẹ

E jọ enọ e rẹ were owhẹ,+ O Jihova, Utho mẹ+ gbe Osiwi mẹ.*+

 2 Jọ o fiobọhọ kẹ owhẹ no oria ọrẹri riẹ ze+

Jẹ rẹrote owhẹ no obọ Zayọn ze.+

 3 Jọ ọ kareghẹhọ ekẹ idhe ra kpobi;

Jọ ọ jẹ idhe emahọ ra rehọ.* (Silah)

 4 Jọ o ru ẹgwọlọ udu ra kẹ owhẹ+

Je ru omaa ra* kpobi wo obokparọ.

 5 Ma ti bo ubo oghọghọ fiki iruẹru esiwo ra;+

Ma te kpare ebana mai kpehru evaọ odẹ Ọghẹnẹ mai.+

O re yo kẹe no obọ idhiwu ọrẹri riẹ ze

Ọ rẹ rehọ obọze riẹ siwi ei evaọ edhere igbunu.*+

 7 Ejọ e rẹroso ekẹkẹ, efa kọ enyenya,+

Rekọ odẹ Jihova Ọghẹnẹ mai ma re se.+

 8 A kie guọghọ fihọ otọ no,

Rekọ ma kpama no, yọ a zihe omai ziọ oria mai no.+

21 O Jihova, ovie na ọ be ghọghọ fiki ẹgba ra;+

Ọ be ghọghọ gaga fiki iruẹru esiwo ra.+

 2 Who ru ẹgwọlọ udu riẹ kẹe no,+

Yọ whọ siọ ayare nọ o no rie unu ze ba eru kẹe he. (Silah)

 3 Keme whọ rehọ eghale buobu sei;

Who ku etu-uvie emamọ igoru* họ iẹe uzou.+

 4 Ọ yare owhẹ uzuazọ, whọ tẹ rehọ iẹe kẹe,+

Uzuazọ uthethei,* no ebẹdẹ rite ebẹdẹ.

 6 Whọ ghale riẹ no bẹdẹ bẹdẹ;+

Who bi ru ei ghọghọ keme whọ rrọ kugbei.*+

 7 Keme ovie na o fievahọ Jihova;+

Fikinọ Ọnọ Ọ Mai Kpehru na o wo uyoyou nọ o rẹ hiẹ hẹ, oware ovo u ti nuhu iei* vievie he.+

 8 Obọ ra u ti mu ewegrẹ ra kpobi;

Obọze ra u ti te enọ i mukpahe owhẹ.

10 Whọ te raha emọ* rai no otọakpọ na no,

Jẹ raha uyẹ rai no udevie emọ ahwo.

11 Keme a gwọlọ ru owhẹ oware uyoma;+

A gba egwae imuomu nọ i ti woma kẹ ae he.+

12 Keme who ti ru ai kuomarẹriẹ dhẹ zihe+

Nọ whọ tẹ rriẹ uze* ra rri rai.*

Fikieme whọ gbẹ be gwọlọ siwi omẹ vievie he,

Who gbe bi ro yo enu oviẹ nọ me bi ku fiki edada ha?+

 2 Ọghẹnẹ mẹ, me bi se owhẹ esese evaọ okpẹdoke na, rekọ who bi yo kẹ omẹ hẹ;+

Yọ evaọ aso me bi se unu họ họ.

 3 Rekọ whẹ ọrẹri,+

Yọ ujiro ahwo Izrẹl o wariẹ owhẹ họ.*

 4 Whẹ esẹ mai a fievahọ;+

A fievahọ owhẹ, yọ whọ jẹ hae thọ ae.+

 5 Whẹ a bo se, yọ who siwi rai;

A fievahọ owhẹ, yọ u kiekpe ai hi.*+

 6 Rekọ mẹ yọ adha orọnikọ ohwo ho,

Ọnọ ahwo a bi ro jijehwẹ,* nọ ahwo a bi rri vo.+

 7 Ahwo kpobi nọ a ruẹ omẹ a bi se omẹ ẹkoko;+

A bi ni inwe họ omẹ je bi nuhu uzou:+

 9 Whẹ họ Ọnọ ọ rehọ omẹ no edhede ze,+

Ọnọ o ru oma fọ omẹ evaọ unu evie oni mẹ.

10 Whẹ a rehọ omẹ kẹ inọ ọ rẹrote omẹ* anwẹnọ a ro yẹ omẹ;

Whẹ họ Ọghẹnẹ mẹ no edhede oni mẹ ze.

11 Whọ kẹnoma thabọ kẹ omẹ hẹ, keme ẹbẹbẹ o thabọ no omẹ hẹ+

Yọ me wo omọfa nọ o re fiobọhọ kẹ omẹ hẹ.+

12 Iruẹ buobu e wariẹ omẹ họ;+

Iruẹ egaga Beshan e wariẹ omẹ họ.+

13 A rovie unu rai fihọ kẹkẹe kẹ omẹ,+

Wọhọ okpohrokpo nọ o bi do enu nọ ọ be za arao nọ o kpe ekekẹ.+

14 A ku omẹ fihọ otọ wọhọ ame;

Igbenwa mẹ kpobi i no ezo rai no.

Udu mẹ o wọhọ iwhri;+

O ghra no evaọ obeva mẹ.+

15 Me gbe wo ẹgba ha, mẹ wọhọ ẹwẹ-othẹ;+

Ẹrọo mẹ ọ tamu iwo-akọ mẹ;+

Whọ be rehọ omẹ kpohọ ẹkpẹ.+

16 Keme erakọ e wariẹ omẹ họ;+

A wọ ruru omẹ wọhọ ogba irumuomu,+

Wọhọ okpohrokpo, a be rowo abọ gbe awọ mẹ.+

18 A ghale iwu mẹ fihọ omoma rai,

A ma ẹta fiki ewu mẹ.+

20 Siwi omẹ* no ọgbọdọ,

Siwi uzuazọ oghaghae mẹ* no ikpituabọ* erakọ.+

21 Siwi omẹ no unu okpohrokpo+ je no izei igholi;

Yo kẹ omẹ re who siwi omẹ.

22 Me ti whowho odẹ ra kẹ inievo mẹ;+

Mẹ te jọ udevie ukoko na jiri owhẹ.+

24 Keme o bi gbolaro kẹ ohwo nọ a bi gboja kẹ hayo jẹe fiẹ hẹ;+

Ọ kuọ ovao riẹ dhere iei hi.+

25 Me re jiri owhẹ evaọ udevie ukoko ulogbo na;+

Me re ru eyaa mẹ gba evaọ iraro enọ e be dhozọ riẹ.

26 Enọ e be romakpotọ e te re, a vẹ te re eva vọ;+

Enọ e be gwọlọ Jihova a ti jiri ei.+

28 Keme uvie na orọ Jihova;+

Ọye o bi su erẹwho na.

29 Ahwo kpobi nọ eware i woma kẹ* evaọ otọakpọ na a te re je guzou kpotọ;

Enọ i bi kpohọ ẹkpẹ kpobi a ti kigwẹ fihọ aro riẹ;

Ọvuọvo rai ọ sai siwi uzuazọ* riẹ hẹ.

30 Emọ rai e te* gọe;

A ti gbiku Jihova kẹ oge nọ ọ be tha.

 2 Ọ rẹ rehọ omẹ kpohọ oria nọ ẹbe ọrọrọ ọ vọ nyai kiẹzẹ;

O re su omẹ kpohọ eria nọ ame ọ vọ nọ a rẹ jọ serihọ.*+

 4 Mẹ tẹ make be nya evaọ ukiekpotọ ebi ọlala dede,+

Mẹ rẹ dhozọ enwoma evo ho,+

Keme whọ rrọ kugbe omẹ;+

Ọkpọ ra avọ umure ra e be kẹ omẹ uduotahawọ.*

Who ku ewhri họ* omẹ uzou;+

Who ku egho mẹ vọ kokoko.+

 6 Evaọ uzẹme, ewoma gbe uyoyou nọ o rẹ hiẹ hẹ i ti lele omẹ evaọ edẹ uzuazọ mẹ kpobi,+

Yọ mẹ te rria uwou Jihova evaọ edẹ uzuazọ mẹ kpobi.+

24 Jihova họ ọnọ o wo otọakpọ na gbe eware kpobi nọ e rrọ eva riẹ,+

Otọ na gbe enọ e be rriae.

 2 Keme ọye ọ rehọ e riẹ vi kokoroko eva abade na+

Ọ rehọ e riẹ vi kothi eva ithẹ na.

 3 Ono ọ rẹ sae gadiẹ kpobọ ugbehru Jihova,+

Ono ọ rẹ sai dikihẹ oria ọrẹri riẹ?

 4 Ohwo kpobi nọ abọ riẹ ọ fo nọ udu riẹ o fo,+

Ọnọ ọ rẹ rehọ Omẹ* duwu iyei ọrue he,

Nọ o re duwu iyei eviẹhọ họ.+

 5 Jihova ọ te ghale iẹe+

Ọghẹnẹ esiwo riẹ o ti bru uvioziẹ kẹe.*+

 6 Oge nana yọ oge nọ ọ be gwọlọ iẹe,

Enọ e be gwọlọ ovao ra, O Ọghẹnẹ Jekọp. (Silah)

 7 Wha kpare izou rai kpehru, whai inuethẹ;+

Wha rovie,* whai inuethẹ anwae,

Re Ovie oruaro na ọ ruọ eva!+

Jihova, ọgba nọ ọ rrọ ruaro na,+

Jihova, ọgbaẹmo ologbo na.+

 9 Wha kpare izou rai kpehru, whai inuethẹ;+

Wha rovie, whai inuethẹ anwae,

Re Ovie oruaro na ọ ruọ eva!

 2 Ọghẹnẹ mẹ, mẹ rẹroso owhẹ;+

Whọ kuvẹ re a ru oma vuọ omẹ hẹ.+

 3 Evaọ uzẹme, ohwo ọvuọvo nọ ọ rẹroso owhẹ nọ oma o rẹ vo ọ riẹ hẹ,+

Rekọ omovuọ o be hẹrẹ enọ i re ru eware ẹghẹ gheghe gheghe.+

 4 Ru omẹ riẹ idhere ra, O Jihova;+

Wuhrẹ omẹ idhere ra.+

 5 Ru omẹ nya evaọ uzẹme ra re who wuhrẹ omẹ,+

Keme whẹ họ Ọghẹnẹ esiwo mẹ.

 6 Kareghẹhọ ohrọ-oriọ ra, O Jihova, gbe uyoyou ra nọ o rẹ hiẹ hẹ,+

Enọ who re dhesẹ ẹsikpobi na.*+

Kareghẹhọ omẹ fiki uyoyou ra nọ o rẹ hiẹ hẹ,+

Fiki ewoma ra, O Jihova.+

 9 Ọ te kpọ enọ e be romakpotọ na re a ru oware nọ u kiehọ,*+

Yọ o ti wuhrẹ enọ e romakpotọ na edhere riẹ.+

10 Idhere Jihova kpobi e vọ avọ uyoyou nọ o rẹ hiẹ hẹ gbe ọtẹruo

Nọ o re dhesẹ kẹ enọ i bi koko ọvọ riẹ+ gbe ekareghẹhọ riẹ.+

11 Fiki odẹ ra, O Jihova,+

Rọ iruthọ mẹ vrẹ omẹ, dede nọ e rrọ ruaro.

13 Oware uwoma u ti tei obọ,*+

Yọ emọ riẹ e te* rọ otọakpọ na reuku.+

14 Ahwo nọ a rẹ dhozọ Jihova a re wo usu okpekpe kugbei,+

Yọ o re ru ai riẹ ọvọ riẹ.+

15 Jihova mẹ be rọ ibiaro mẹ rri ẹsikpobi,+

Keme ọ te rra ẹriri no awọ mẹ.+

16 Rẹriẹ ovao ra rri omẹ re who dhesẹ aruoriwo kẹ omẹ,

Keme mẹ rrọ goli yọ mẹ oruori.

17 Idhọvẹ nọ e rrọ udu mẹ i bu gaga no;+

Si omẹ no uye nọ o rrọ omẹ oma.

18 Rri oja-oriọ mẹ gbe ebẹbẹ mẹ,+

Re whọ rọ izieraha mẹ kpobi vrẹ omẹ.+

19 Rri epanọ ewegrẹ mẹ i bu te,

Gbe epanọ omukpahọ ọgaga rai o be lẹliẹ ae gwọlọ họre omẹ.

21 Jọ ẹgbakiete gbe ẹrẹreokie* e sẹro mẹ,+

Keme whẹ me fi ẹruore mẹ họ.+

26 Rọ omẹ guẹdhọ, O Jihova, keme me kru ẹgbakiete mẹ;*+

Jihova me fievahọ, mẹ re siọ ere ba eru ẹdẹvo ho.+

 2 Kiẹ omẹ riwi, O Jihova, re whọ dawo omẹ;

Ru iroro mẹ nọ e mai diwi* avọ udu mẹ fo.+

 3 Keme uyoyou ra nọ o rẹ hiẹ hẹ o rrọ aro mẹ ẹsikpobi,

Mẹ be nya evaọ uzẹme ra.+

 4 Mẹ rẹ jọ* kugbe ahwo eviẹhọ họ,+

Yọ mẹ rẹ kẹnoma kẹ ahwo nọ a rẹ ko oghẹrẹ ohwo nọ a rrọ dhere.*

 5 Me mukpahe utu ahwo omuomu,+

Yọ mẹ se inọ me re kuomagbe* irumuomu hu.+

 6 Mẹ te wozẹ abọ mẹ fo,

Yọ mẹ te nya agbada-idhe ra wariẹ, O Jihova,

 7 Re mẹ so ole uyere nọ ahwo a re yo+

Je whowho iruo igbunu ra kpobi.

 8 Jihova, uwou nọ whọ be rria o were omẹ gaga,+

Oria nọ oruaro ra o rrọ na.+

 9 Who hwere omẹ* kufiẹ kugbe erahaizi hi+

Who kpe omẹ kugbe ahwo ozighi hi,*

10 Enọ i bi duwu abọ rai họ eware omovuọ,

Nọ obọze rai o vọ avọ udi-oriọ.

12 Owọ mẹ u dikihẹ otọ opraprara;+

Me re jiri Jihova evaọ udevie ogbotu nọ o kokohọ na.*+

 2 Okenọ ahwo omuomu a wọ ze re a kpe omẹ no,+

Ahwo nọ a be wọso omẹ gbe ewegrẹ mẹ họ enọ i zoruẹ je kie.

 3 Egbaẹmo e tẹ make fa evuẹ wariẹ omẹ họ re a họre omẹ,

Ozọ u re mu omẹ hẹ.+

O tẹ make rọnọ a rẹ wọ ẹmo bru omẹ ze dede,

Udu o rẹ gbẹ jọ omẹ awọ ghele.

 4 Oware ovo mẹ yare Jihova no,

Yọ oye me bi rẹro riẹ

Re mẹ rria uwou Jihova evaọ edẹ uzuazọ mẹ kpobi,+

Re mẹ tẹrovi ewoma* Jihova

Je rri etẹmpol* riẹ avọ edẹro.*+

 5 Keme o ti si omẹ no fihọ uwou riẹ evaọ ẹdẹ okpẹtu;+

Ọ te ko omẹ dhere oria nọ u siomano, uwou-udhu riẹ;+

O ti fi omẹ họ obehru ugbehru-utho.+

 6 Enẹna mẹ kparobọ* vi ewegrẹ mẹ nọ e wariẹ omẹ họ no;

Me ti dhe idhe evaọ uwou-udhu riẹ avọ ubo oghọghọ;

Mẹ te so ile jiri* Jihova.

 7 Gaviezọ kẹ omẹ, O Jihova, nọ me te bo via;+

Rri omẹ aro re who yo kẹ omẹ.+

Whẹ họ ofiobọhọ mẹ;+

Who kiukeku omẹ hayo nyasiọ omẹ ba ha, Ọghẹnẹ esiwo mẹ.

10 O tẹ make rọnọ ọsẹ gbe oni mẹ a gbabọkẹ omẹ dede,+

Jihova omariẹ o ti kru omẹ rehọ.+

11 Wuhrẹ omẹ idhere ra, O Jihova,+

Su omẹ evaọ edhere ẹrẹreokie* fiki ewegrẹ mẹ.

12 Ivie who siobọno omẹ kẹ ahwo* nọ a be wọso omẹ hẹ,+

Keme isisẹri erue a bi se isẹri kpe omẹ,+

Yọ a be wọ ozighi bru omẹ ze.

13 Diẹse mẹ hae te jọ ogbẹrọnọ me wo ẹrọwọ họ

Inọ mẹ te ruẹ ewoma Jihova evaọ ẹkwotọ enọ e rrọ uzuazọ?*+

14 Fi ẹruore ra họ Jihova;+

Wo udu je kru oma ga.+

28 Whẹ me bi bo se ẹsikpobi, O Jihova Utho mẹ;+

Who ru wọhọ ẹsenọ who bi yo ho ho.

Who te fibo nọ who gbe yo kẹ omẹ hẹ,

Mẹ vẹ te wọhọ enọ i bi kpobọ ọgọdọ.*+

 2 Yo ayare mẹ okenọ me te bo se owhẹ kẹ obufihọ

Nọ mẹ tẹ kpare abọ mẹ rri ubrukpẹ obeva orọ oria aruẹri ra na.+

 3 Who si omẹ vrẹ kugbe irumuomu hu, enọ i bi ru eware enwoma,+

Enọ e be ta eme udhedhẹ kugbe ahwo rekọ umuomu o rrọ udu rai.+

 4 Hwosa eware nọ a ru kẹ ae,+

Wọhọ epaọ eware imuomu nọ a ru.

Hwosa eware nọ a rọ abọ rai ru kẹ ae,

Wọhọ epaọ eware nọ a ru.+

 5 Keme a be daezọ iruẹru Jihova vievie he,+

Hayo muẹrohọ iruo abọ riẹ hẹ.+

 6 Jọ ujiro u te Jihova,

Keme o yo ayare mẹ kẹ obufihọ no.

 7 Jihova họ ẹgba mẹ+ gbe ojese mẹ;+

Ọye me fi udu mẹ họ.+

O fiobọhọ kẹ omẹ no, udu mẹ o tẹ be ghọghọ,

Fikiere mẹ te so ile jiri ei.

 8 Jihova họ ẹgba ahwo riẹ;

Ọye họ oria omofọwẹ, ọ be rọ edhere ologbo siwi ọriẹ nọ o wholo.+

29 Wha kẹ Jihova oware nọ u fo rie, whai emezae egba,*

Wha kẹ Jihova oware nọ u fo rie fiki oruaro gbe ẹgba riẹ.+

 3 A bi yo urru Jihova evaọ ehru ame obuobu na;

Ọghẹnẹ nọ o wo oruaro na ọ be va egbrara.+

 4 Urru Jihova u wo ẹgba gaga;+

Urru Jihova u re mu urirẹ.

 5 Urru Jihova o be bẹre ire sida;

Ẹhẹ, Jihova ọ be guọghọ ire sida erọ Lebanọn.+

 6 O bi ru Lebanọn* duola wọhọ ọmọ-eruẹ,

Je ru Siriọn+ duola wọhọ ọmọ ogholi.

 7 Ebruerae o re no urru Jihova ze;+

 8 Urru Jihova u re ru udhude na nuhu zighi zighi;+

Jihova o re ru udhude Kedẹsh+ nuhu zighi zighi.

 9 Urru Jihova u re ru orua nuhu o ve yẹ

Jẹ yẹ owhawho bafihọ.+

10 Jihova ọ keria agbara-uvie evaọ ehru ame owhe obuobu na;*+

Jihova ọ keria agbara-uvie, ọye họ Ovie bẹdẹ bẹdẹ.+

30 Me re jiri owhẹ, O Jihova, keme whọ kpare* omẹ kpehru no;

Whọ kuvẹ re ewegrẹ mẹ a ghọghọ fiki mẹ hẹ.+

 4 Wha so ile jiri* Jihova, whai ahwo riẹ nọ e talamu ei,+

Wha jiri odẹ* ọrẹri riẹ;+

 5 Keme ofu riẹ nọ ohwo ọ rẹ rẹriẹ ovao ku o rẹ jọ omoke kakao ọvo,+

Rekọ ọjẹrehọ riẹ nọ ohwo o re wo* o rẹ jọ evaọ edẹ uzuazọ ohwo na kpobi.+

 8 O Jihova, whẹ me bi bo se ẹsikpobi;+

Yọ Jihova mẹ be lẹ ẹsikpobi re o rri omẹ aro.

11 Who zihe uweri mẹ ruọ ile-igbe no;

Who si ehọ-ekpa* mẹ no, whọ tẹ rọ oghọghọ gọ omẹ ẹgọ,

12 Re mẹ ruẹse* so ile jiri owhẹ, re mẹ siọ unu ba ẹfare.

Zihe ruọ ugbehru adhẹzọ kẹ omẹ,

Oria nọ a di ogba wariẹ họ* nọ mẹ rẹ sae jọ zọ.+

 3 Keme whẹ họ ugbehru-utho mẹ gbe oria omofọwẹ mẹ;+

Fiki odẹ ra,+ who ti su omẹ jẹ kpọ omẹ.+

 4 Who ti si omẹ no ẹriri nọ a rọ lẹlẹ kpahe ẹta kẹ omẹ,+

Keme whẹ họ oria adhẹzọ mẹ.+

 6 Me mukpahe ahwo nọ a romakẹ emedhọ ifofe nọ i fioka ha,

Rekọ Jihova mẹ omamẹ me fievahọ.

 7 Mẹ te ghọghọ gaga fiki uyoyou ra nọ o rẹ hiẹ hẹ na,

Keme whọ ruẹ oja-oriọ mẹ no;+

Whọ riẹ idhọvẹ egaga mẹ.*

 8 Who siobọno omẹ kẹ ọwegrẹ na ha,

Rekọ whọ rehọ omẹ dikihẹ oria omofọwẹ.*

10 Uweri o da omẹ oma fia+

Ikpe uzuazọ mẹ e tẹ jẹ vọ avọ imẹ-idio.+

Ẹgba mẹ o bi re no fiki oruthọ mẹ;

Igbenwa mẹ e lọhọ no.+

11 Ewegrẹ mẹ kpobi a be rọ omẹ jijehwẹ,+

Maero kọ ahwo okegbe mẹ.

Egbẹrioma mẹ a be ruẹ omẹ dhẹ;

A tẹ ruẹ omẹ evaọ oko-ore, a vẹ dhẹ.+

12 A kpairoro vrẹ omẹ no,* mẹ thọrọ e rai ẹro no wọhọ ẹsenọ me whu no;

Mẹ wọhọ omothẹ nọ o whu no.

13 Me yo eme atanọ iyoma buobu no;

Eware idudu e wariẹ omẹ họ.+

Nọ a te kuomagbe wọhọ omọvo be wọ bru omẹ ze,

A rẹ gba ẹgwae epanọ a rẹ rọ rehọ uzuazọ* mẹ.+

Jọ oma o vuọ ahwo omuomu na;+

Jọ a kpobọ Uki* re a gbe yo unu rai hi.+

18 Jọ igbenu nọ e be ta erue i di,+

Igbenu nọ e be ta eme omoya kpahe ahwo okiẹrẹe na, avọ omorro gbe orivo.

Whọ ruẹrẹ e riẹ kpahe kẹ enọ e be dhozọ ra,+

Yọ whọ jọ iraro ahwo-akpọ kpobi dhesẹ iẹe kẹ enọ e dhẹ bru owhẹ ze re a zọ.+

20 Whọ te ko ai dhere oria nọ u siomano evaọ aro ra+

Rono omaa uyoma ahwo;

Who ti si ai no họ uwou ra

Rono ahwo oyoma nọ a be wọso ae.*+

21 Jọ ujiro u te Jihova,

Keme o dhesẹ uyoyou riẹ nọ o rẹ hiẹ hẹ kẹ omẹ evaọ edhere igbunu,+ evaọ okpẹwho nọ a ko họ.+

Jihova ọ rẹ thọ enọ i bi yoẹme,+

Rekọ ọ rẹ rọ uye ulogbo hwosa kẹ enọ i bi dhesẹ omorro.+

24 Wha wo udu, wha kru udu rai ga,+

Whai ahwo kpobi nọ a be hẹrẹ Jihova.+

 2 Jọ eva e were ohwo nọ Jihova ọ ta nọ ọ reabe he,+

Nọ eviẹhọ evuevo e rrọ oma ha.*

 5 Uwhremu na mẹ tẹ feva uzioraha mẹ kẹ owhẹ;

Mẹ ko oruthọ mẹ dhere he.+

 6 Oyejabọ nọ ohwo kpobi nọ ọ talamu owhẹ ọ te rọ lẹ se owhẹ+

Evaọ oke nọ a sae gbẹ rọ ruẹ owhẹ na.+

 7 Whẹ yọ oria idhere kẹ omẹ;

Whọ te thọ omẹ no idhọvẹ.+

 9 Who ru wọhọ anyenya hayo esi* nọ ọ kare otoriẹ hẹ,+

Ọnọ a rẹ rọ ufi hayo oviẹ-arao gba unu riẹ re a rọ kpọe fiki ugberuo riẹ

Re o te ti ru oware nọ whọ gwọlọ.”*

10 Irumuomu a wo edada buobu;

Rekọ Jihova ọ rẹ rọ uyoyou riẹ nọ o rẹ hiẹ hẹ wariẹ ohwo nọ o fievahọ iẹe họ.+

11 Wha ghọghọ fiki Jihova jẹ wereva, whai ikiẹrẹe;

Wha do edo oghọghọ, whai ahwo kpobi nọ udu rai u kiete.

 2 Rehọ akpata yere Jihova;

So ile jiri ei* avọ okwakwa ikporakporo nọ o wo ifi ikpe.

 3 So ole ọkpokpọ kẹe;+

Rọ onaa salọ ifi na avọ ubo oghọghọ.

 4 Keme ẹme Jihova ọ gbakiete,+

Yọ a re fievahọ oware kpobi nọ o ru.

 6 Ẹme Jihova a rọ ma idhiwu na,+

Yọ ẹzi* unu riẹ a rọ ma eware kpobi nọ e rrọ eva rai.*

 7 O koko ame abade na họ wọhọ ẹsenọ o di ogba wariẹe họ;+

O fi ame nọ o bi fi ẹkporo na họ iwou nọ a rẹ jọ sẹro* eware.

 9 Keme ọ ta ẹme, ẹme na o te rugba;+

Ọ ta oware nọ o rẹ via, o tẹ ginẹ via.+

10 Jihova ọ raha omaa umuomu erẹwho na* no;+

Ọ raha omaa* ahwo na ku ai no.+

11 Rekọ iroro nọ Jihova ọ jẹ e te jọ bẹdẹ bẹdẹ;+

Eware nọ o roro evaọ udu riẹ e te jọ no oge te oge.

12 Jọ eva e were orẹwho nọ Jihova ọ rrọ Ọghẹnẹ rai,+

Ahwo nọ ọ salọ re a jọ ahwo* obọriẹ.+

13 Jihova o bi rri no obọ odhiwu ze;

Ọ be ruẹ emọ ahwo kpobi.+

14 Evaọ oria nọ ọ be rria na,

Ọ be jọ etẹe tẹrovi ahwo nọ a be rria otọakpọ na.

15 Ọye họ ọnọ ọ ma* udu ohwo kpobi;

Ọ be kiẹ iruo rai kpobi riwi.+

16 Ovie ọvuọvo nọ ogbaẹmo ulogbo u re siwi ọ rrọ họ;+

Ọgba ọvuọvo nọ ogaga ulogbo riẹ u re siwi ọ rrọ họ.+

17 Ẹruore ofofe o rrọ re a rẹroso anyenya kẹ esiwo;*+

Ẹgba ologbo riẹ ọ nwani dhesẹ nọ ohwo ọ te dhẹ vabọ họ.

18 Rri! Ubiẹro Jihova u bi rri enọ e be dhozọ riẹ,+

Enọ e be hẹrẹ iẹe re o dhesẹ uyoyou riẹ nọ o rẹ hiẹ hẹ na,

19 Re o siwi ai no uwhu

Jẹ sẹro uzuazọ rai evaọ okenọ ohọo u bi mu.+

21 Udu mai o be ghọghọ fiki riẹ,

Keme ma rẹroso odẹ ọrẹri riẹ.+

22 Dhesẹ uyoyou ra nọ o rẹ hiẹ hẹ na kẹ omai, O Jihova,+

Nọ ma be hẹrẹ owhẹ na.+

34 Me ti jiri Jihova ẹsikpobi;

Ujiro riẹ o te jọ igbenu mẹ kẹse kẹse.

 2 Mẹ* te rọ Jihova seha;+

Enọ e be romakpotọ a ti yo a vẹ ghọghọ.

 3 Wha kuomagbe omẹ kẹ Jihova orro ulogbo;+

Joma kuomagbe kpare odẹ riẹ kpehru.

 5 Ovao ahwo nọ a rẹroso ẹe kpobi o tẹ jọ sasasa;

A sai ru oma vuọ ae he.

 7 Ukọ-odhiwu Jihova o bi rou* ahwo kpobi nọ a be dhozọ Riẹ,+

Yọ ọ rẹ thọ ae.+

 8 Dawo re whọ ruẹ nọ Jihova o woma;+

Jọ eva e were ohwo nọ ọ dhẹ bru ei ze re ọ zọ.

 9 Wha dhozọ Jihova, whai erẹri riẹ kpobi,

Keme oware ovo o rẹ kare enọ e be dhozọ riẹ hẹ.+

10 Makọ ikpohrokpo egaga* dede, ohọo u bi kpe ai,

Rekọ oware uwoma ovo o rẹ kare enọ e be gwọlọ Jihova ha.+

11 Wha nyaze, emezae mẹ, wha gaviezọ kẹ omẹ;

Me ti wuhrẹ owhai ozodhẹ Jihova.+

12 Ono uzuazọ o were evaọ usu rai na

Ọ tẹ jẹ gwọlọ ruẹ edẹ iwoma buobu?+

13 O tẹ rrọ ere, whọ rẹ kpọ ẹrọo ra re o siọ eme iyoma ba ẹta,+

Yọ whọ rẹ rehọ igbenu ra ta eme eviẹhọ họ.+

14 Siomano oware nọ u yoma re who ru oware nọ u woma;+

Gwọlọ udhedhẹ je lei.*+

15 Ibiaro Jihova i bi rri ikiẹrẹe na,+

Yọ ezọ riẹ i bi yo ubo rai kẹ obufihọ.+

16 Rekọ ovao Jihova o wọso enọ i bi ru eware iyoma,

Re o voro odẹ* rai no otọakpọ na no riẹriẹriẹ.+

17 A bo via, Jihova o te yo;+

O siwi rai no uye rai kpobi.+

18 Jihova ọ kẹle enọ e rrọ ọkora;+

O re siwi enọ e rrọ uweri.*+

19 Ebẹbẹ* ohwo okiẹrẹe e rrọ buobu,+

Rekọ Jihova o bi siwi ei no aikpobi.+

20 Ọ be sẹro igbenwa riẹ kpobi;

A wiri ọvuọvo rai hi.+

21 Uye u ti kpe ahwo omuomu na no;

A ti brukpe enọ i mukpahe ahwo okiẹrẹe na.

22 Jihova o bi siwi uzuazọ* idibo riẹ;*

A ti brukpe ohwo ọvuọvo nọ ọ dhẹ bru ei ze re ọ zọ họ.+

35 O Jihova, dikihẹ kẹ omẹ evaọ ẹdhọ mẹ avọ enọ e wọso omẹ na;+

Họre enọ e be họre omẹ.+

 2 Rehọ ojese osese* gbe ojese ologbo ra,+

Re whọ nyaze te thothọ mẹ.+

 5 Jọ a jọ wọhọ ehọrọ nọ ofou o bi fou;

Jọ ukọ-odhiwu Jihova o le ai vrẹ.+

 6 Jọ edhere rai o muebi re o jẹ whra

Nọ ukọ-odhiwu Jihova o bi le ai na.

 7 Keme a rehọ ẹriri kpahe ẹta si no kẹ omẹ gheghe gheghe;

A tọ ọgọdọ fihọ kẹ omẹ* gheghe gheghe.

 8 Jọ okpẹtu o kie bru ei ze idudhe;

Jọ ẹriri nọ ọ rọ kpahe ẹta si no na o mu ei;

Jọ o kie ruọ ẹe re o whu.+

 9 Rekọ mẹ* te ghọghọ fiki Jihova;

Mẹ te ghọghọ fiki iruẹru esiwo riẹ.

Who bi siwi iruori na no obọ enọ e ga vi ai,+

Who bi siwi iruori na avọ iyogbe na no obọ enọ i bi kpe ai mi eware.”+

11 Isisẹri imuomu a nyaze,+

Be nọ omẹ eware nọ mẹ riẹ oware ovo kpahe he.

12 A be rọ eyoma hwosa ewoma kẹ omẹ,+

Bi ru omẹ* jọ wọhọ ohwo nọ ohwo o whu ku.

13 Rekọ okenọ a jẹ mọ, me ku iwu ehọ-ekpa* họ oma;

Mẹ siọ emuọriọ ba ro gboja kẹ omamẹ,*

Yọ otẹrọnọ Ọghẹnẹ o yo olẹ mẹ hẹ,*

14 Mẹ rẹ nya uwuweri wọhọ ẹsenọ a rrọ egbẹnyusu hayo inievo mẹ;

Me gbuzou hotọ wọhọ ohwo nọ o bi weri oni riẹ.

15 Rekọ nọ me zoruẹ, a tẹ ghọghọ je kokohọ;

A kokohọ re a fa omẹ fihọ otọ evaọ oria nọ a dhere;

A rọ unu rai sawo omẹ ekekẹ, a fare unu rai hi.

16 Ahwo nọ a be gọ Ọghẹnẹ hẹ a be rọ omẹ zaharo,*

A be reakọ avọ ofu fiki mẹ.+

Siwi omẹ* no ohọre nọ a be họre omẹ,+

Siwi uzuazọ oghaghae mẹ* no obọ ikpohrokpo egaga* na.+

18 Me ve ti jiri owhẹ evaọ ukoko ulogbo* na;+

Me ti jiri owhẹ evaọ udevie ogbotu ahwo nọ a kokohọ na.

19 Ivie, whọ kuvẹ hẹ re enọ e rrọ ewegrẹ mẹ gheghe gheghe a ghọghọ fiki mẹ;

Whọ kuvẹ re enọ i mukpahe omẹ gheghe gheghe+ a fare ubiẹro avọ evega fiki mẹ hẹ.+

20 Keme a be ta ẹme udhedhẹ hẹ,

Rekọ a be gba ẹgwae eviẹhọ kpahe ahwo nọ a rrọ dhedhẹ evaọ otọ na.+

21 A rovie unu rai fihọ kẹkẹe be bọwo omẹ ota,

Be ta nọ: Aha! Aha! Ibiaro mai e ruẹ e riẹ.”

23 Kparoma re whọ nyaze te thothọ mẹ,

Jihova, Ọghẹnẹ mẹ, dikihẹ kẹ omẹ evaọ ẹdhọ mẹ na.

24 Rehọ ẹrẹreokie ra bruoziẹ mẹ,+ O Jihova, Ọghẹnẹ mẹ;

Whọ kuvẹ re a ghọghọ fiki mẹ hẹ.

26 Ru re oma o vuọ aikpobi gholo gholo,

Enọ e be ghọghọ fiki uye nọ u te omẹ oma.

27 Rekọ jọ enọ ẹrẹreokie mẹ ọ be were kpobi a do edo oghọghọ;

Jọ a ta kẹse kẹse nọ:

28 Kẹsena ẹrọo mẹ o ve ti gbiku ẹrẹreokie ra*+

Je jiri owhẹ ẹsikpobi.*+

36 Uzioraha o be ta ẹme kẹ ohwo omuomu evaọ udu riẹ;

Ozodhẹ Ọghẹnẹ o rrọ ẹro* riẹ hẹ.+

 2 Keme o rri omariẹ rro ga hrọ

Te epanọ ọ gbẹ sai ro vuhu iruthọ riẹ mu je mukpahe ae he.+

 3 Eme edada avọ eviẹhọ ọvo i bi no unu riẹ ze;

O bi dhesẹ hẹ inọ ọ riẹ oware uwoma eru.

Ọ gba riẹ mu nọ o re ru oware nọ u woma ha;

Ọ rẹ siọ oware uyoma ha.

 5 O Jihova, uyoyou ra nọ o rẹ hiẹ hẹ u kpehru te obọ idhiwu na,+

Ọtẹruo ra o kpehru te ẹgho na.

 6 Ẹrẹreokie ra ọ wọhọ igbehru ilogbo;*+

Iziẹibro ra e wọhọ ame odidi orereghe.+

 8 A be da emamọ eware ibuobu* nọ e rrọ uwou ra vọ eva,+

Yọ whọ kẹ rai eware omawere ra nọ i bi kporo ẹkẹre re a da.+

 9 Obọ ra uzuazọ u no ze;*+

Ẹkwoma elo ra ma be sae rọ ruẹ elo.+

10 Hai gbe dhesẹ uyoyou ra nọ o rẹ hiẹ hẹ na kẹ enọ udu rai u kiete,+

Jẹ hai gbe dhesẹ ẹrẹreokie ra kẹ enọ i wo emamọ udu.+

11 Whọ jọ evawọ ahwo omorro o thihi omẹ hẹ

Whọ jọ obọ ahwo oyoma o le omẹ kufiẹ hẹ.

12 Rri oria nọ ahwo nọ a bi ru oware uyoma na a kie fihọ!

A fa rai kie fihọ otọ no, yọ a rẹ sae kpama ha.+

37 Jọ eva e dha owhẹ* hẹ fiki ahwo omuomu

Whọ re ahwo nọ a bi ru oware uyoma ihri hi.+

 2 A ti lo no vẹrẹ vẹrẹ wọhọ ẹbe+

Jẹ ya no wọhọ ẹbe ọrọrọ nọ ọ be dhẹ ze obọ.

 3 Fievahọ Jihova re who ru oware uwoma;+

Rria otọakpọ* na, re who dhesẹ ọtẹruo.+

 4 Jọ eva e were owhẹ gaga* fiki Jihova,

O ve ti ru ẹgwọlọ udu ra kẹ owhẹ.

 5 Rehọ uzuazọ* ra họ obọ Jihova;+

Rẹroso ẹe, o ti fiobọhọ kẹ owhẹ.+

 6 O ti ru ẹrẹreokie ra lo wọhọ oke nọ o ke no,

Je ru uvioziẹ ra lo wọhọ ọre uvo kekeke.

 7 Fọ tou kẹ Jihova+

Jẹ hẹrẹ iẹe avọ irẹro.*

Whọ jọ eva e dha owhẹ hẹ

Fiki ohwo nọ o ru omaa omuomu riẹ gba.+

 8 Nyasiọ evedha ba re whọ siọ ofu-omuo ba;+

Whọ jọ eva e dha owhẹ re whọ nyai ru oware umuomu hu.*

 9 Keme a ti kpe ahwo omuomu no,+

Rekọ enọ i fi ẹruore rai họ Jihova a te rọ otọakpọ na reuku.*+

10 Omoke kakao ọvo u kiọkọ, ahwo omuomu na a gbẹ te jọ họ;+

Who ti rri oria nọ a jọ vẹre,

A gbẹ te jọ etẹe he.+

11 Rekọ enọ e be romakpotọ na e te rọ otọakpọ na reuku,+

Yọ eva e te were ae gaga fiki udhedhẹ nọ o dafia.+

12 Ohwo omuomu o bi roro iroro iyoma kpahe ohwo okiẹrẹe;+

Ọ be rọ evedha reakọ kẹe.

13 Rekọ Jihova ọ te hwẹe,

Keme Ọ riẹ nọ ẹdẹ riẹ ọ be tha.+

14 Ahwo omuomu a re yolo egbọdọ rai jẹ vẹ* ize rai

Re a kpe iruori gbe iyogbe na,

Re a kpe enọ i bi ru oware nọ u kiete.

15 Rekọ ọgbọdọ rai o ti duwu udu obọrai;+

A ti wiri ize rai no.

16 Umutho eware nọ ohwo okiẹrẹe o wo

I woma vi eware ibuobu nọ ahwo omuomu buobu a wo.+

17 Keme a ti wiri abọ ahwo omuomu na no,

Rekọ Jihova o ti fiobọhọ kẹ ahwo okiẹrẹe na.

18 Jihova ọ riẹ oware nọ ahwo nọ a kare afuẹwẹ na a be ruẹ uye riẹ,*

Yọ ukuoriọ rai o te jọ bẹdẹ bẹdẹ.+

19 A ti ru oma vuọ ae he evaọ oke okpẹtu;

Evaọ oke nọ ohọo u ti mu a ti wo emu buobu.

20 Rekọ ahwo omuomu na a ti whu kufiẹ;+

Ewegrẹ Jihova a ti lo no wọhọ ẹbe ọbọbọ;

A te rayẹ no wọhọ iwiri.

21 Ohwo omuomu o re momo rekọ ọ rẹ hwa zihe he,

Rekọ ohwo okiẹrẹe o re ru ọghọ* jẹ kẹ ahwo eware.+

22 Enọ Ọghẹnẹ ọ ghale a te rọ otọakpọ na reuku,

Rekọ enọ Ọ bọwo ehao a ti whu kufiẹ.+

23 Jihova ọ rẹ kpọ ithihi awọ ohwo*+

Nọ edhere ohwo na ọ tẹ were iẹe.+

24 Dede nọ ọ rẹ sai kie, a ti gbolo iei fihọ otọ họ,+

Keme Jihova o re kru rie obọ.*+

25 Mẹ jọ ọmaha oke jọ rekọ obọnana mẹ kpako no,

Rekọ mẹ re ruẹ ohwo okiẹrẹe ọvuọvo nọ a kiukeku hu,+

Hayo ruẹ emọ riẹ nọ e be gwọlọ emu* bẹ hẹ.+

26 O re momo kẹ ahwo odode,*+

Yọ emọ riẹ i ti wo eghale.

27 Siobọno oware uyoma re who ru oware uwoma,+

Whọ vẹ te rria bẹdẹ bẹdẹ.

28 Keme Jihova o you uvioziẹ,

Yọ o ti gbabọkẹ enọ e talamu ei hi.+

Ọ te sẹro rai ẹsikpobi;+

Rekọ a ti kpe uyẹ ahwo omuomu na no.+

29 Ahwo okiẹrẹe na a te rọ otọakpọ na reuku,+

Yọ a te rriae bẹdẹ bẹdẹ.+

30 Unu ohwo okiẹrẹe o rẹ ta ẹme areghẹ,*

Yọ ẹrọo riẹ ọ rẹ ta ẹme uvioziẹ.+

31 Uzi Ọghẹnẹ riẹ o rrọ udu riẹ;+

O re zoruẹ hẹ evaọ onya riẹ.+

32 Ohwo omuomu o bi rri ohwo okiẹrẹe kiọkiọkiọ,

Be gwọlọ epanọ o re ro kpei no.

33 Rekọ Jihova o ti vu ei wa kẹ ohwo yena ha+

Yọ ọ te reabe he okenọ a te rehọ iẹe guẹdhọ.+

34 Fi ẹruore ra họ Jihova re who lele edhere riẹ,

Ọ rẹ te kpare owhẹ kpehru re whọ rọ otọakpọ na reuku.

35 Mẹ ruẹ ohwo omuomu nọ ọ rrọ eva gaga

Nọ ọ be rro ọvo wọhọ okpure nọ ọ rrọ otọ nọ ọ dhẹ no ze.+

36 Rekọ idudhe na, o te whu no, a gbẹ ruẹ e riẹ hẹ;+

Mẹ jẹ gwọlọ iẹe, rekọ mẹ ruẹ e riẹ hẹ.+

37 Muẹrohọ ohwo nọ ọ kare afuẹwẹ,*

Jẹ tẹrovi ohwo nọ o kiete na,+

Keme ohwo yena o ti wo udhedhẹ evaọ obaro.+

38 Rekọ a ti kpe erahaizi na kpobi no;

A te raha ahwo omuomu na no evaọ obaro.+

39 Jihova họ ọnọ o re siwi ahwo okiẹrẹe na;+

Ọye họ oria adhẹzọ rai evaọ oke uye.+

Ọ te thọ ae no obọ ahwo omuomu je siwi ai,

Keme a dhẹ bru ei ze re a zọ.+

38 O Jihova, whọ rọ evedha whọku omẹ hẹ,

Yọ whọ rọ ofu kpọ omẹ vi hi.+

 2 Keme ese ra i duwu kpobọ eva mẹ,

Yọ obọ ra o nyẹ omẹ nyaotọ.+

 4 Keme iruthọ mẹ i kpehru vi uzou mẹ;+

E wọhọ owha ogbẹgbẹdẹ, e gbẹdẹ vi oware nọ mẹ rẹ sae wọ.

 5 Ela mẹ i bi gbo jẹ be kẹre

Fiki ugheghẹ mẹ.

 6 Mẹ be rova jẹ rrọ ọkora ọgaga;

Mẹ be nya uwuweri evaọ okpẹdoke na soso.*

 7 Oma mẹ o be rrorro evaọ obeva;*

Oma mẹ na kpobi o be mọ.+

 8 Oma mẹ u whu fihọ kpimẹ jẹ guọghọ fihọ otọ no;

Udu mẹ nọ o vọ avọ idhọvẹ o be lẹliẹ omẹ dimẹ via.*

 9 O Jihova, ẹgwọlọ mẹ kpobi ọ rrọ aro ra,

Yọ unuofiẹ mẹ u dhere owhẹ hẹ.

10 Udu mẹ u bi kie kpikpikpi, ẹgba mẹ o re no,

Yọ mẹ gbẹ be rọ ibiaro mẹ ruẹ ude ziezi hi.*+

11 Egbẹnyusu mẹ gbe erivẹ* mẹ a be ruẹ omẹ dhẹ fiki uye mẹ,

Yọ ahwo nọ a kpekpe omẹ oma a be kẹnoma kẹ omẹ.

12 Enọ e be gwọlọ uzuazọ* mẹ a kpahe eta;

Enọ e be gwọlọ nwa omẹ oma a be ta ẹme epanọ a rẹ rọ raha omẹ kufiẹ;+

A be lẹlẹ ta eme eviẹhọ evaọ okpẹdoke na soso.

13 Rekọ wọhọ ohwo nọ o diezọ, mẹ tehe ezọ mẹ di;+

Wọhọ ohwo nọ o dienu, me bi rovie unu mẹ hẹ.+

14 Me zihe ruọ ohwo nọ ọ be sai yo ẹme he no,

Nọ o wo ẹme ọvuọvo nọ ọ rẹ ta ro gu ẹkẹ unu riẹ hẹ.

15 Keme whẹ họ ọnọ mẹ hẹrẹ,+ O Jihova,

Yọ whọ kẹ omẹ uyo, O Jihova Ọghẹnẹ mẹ.+

16 Keme mẹ ta nọ: “Jọ a ghọghọ fiki mẹ hẹ

Hayo wereva fiki mẹ hẹ otẹrọnọ otọ o whra omẹ.”

17 Keme mẹ joma kie no vẹre,

Yọ edada e jọ omẹ oma ẹsikpobi.+

18 Mẹ ta oruthọ mẹ via;+

Uzioraha mẹ u je kpokpo omẹ.+

19 Rekọ ewegrẹ mẹ e rrọ gaga* jẹ rrọ ruaro,*

Enọ i mukpahe omẹ gheghe gheghe a bu gaga no.

20 A rọ eyoma hwosa ewoma kẹ omẹ;

A jẹ wọso omẹ fikinọ me bi ru oware uwoma.

22 Dhogbo bru omẹ ze vẹrẹ vẹrẹ,

O Jihova, osiwi mẹ.+

39 Mẹ ta nọ: “Mẹ te kpọ ithihi mẹ

Re mẹ gbẹ rọ ẹrọo mẹ raha uzi hi.+

Mẹ te gba unu mẹ di+

Evaọ ẹsikpobi nọ ohwo omuomu ọ rrọ kugbe omẹ.”

 2 Me fibo jẹ fare unu mẹ;+

Mẹ ta ẹme ọvuọvo ho makọ kpahe oware uwoma,

Rekọ edada mẹ e jọ gaga.*

 4 “O Jihova, fiobọhọ kẹ omẹ riẹ epanọ ekuhọ uzuazọ mẹ ọ te jọ,

Gbe epanọ edẹ mẹ i ti bu te,+

Re mẹ ruẹse riẹ epanọ uzuazọ mẹ o kpẹre te.*

 5 Evaọ uzẹme, who ru edẹ uzuazọ mẹ kawo gaga;*+

Yọ ikpe uzuazọ mẹ i te oware ovo ho evaọ aro ra.+

 9 Me fibo ọvo;

Mẹ sai rovie unu mẹ hẹ,+

Keme obọ ra onana u no ze.+

11 Whọ rẹ kẹ ohwo nọ o ru thọ uye rọ kpọe vi;+

Whọ rẹ raha eware riẹ nọ o rri ghaghae no wọhọ epanọ emera i re ru na.

12 Yo olẹ mẹ, O Jihova,

Gaviezọ kẹ ubo mẹ rọkẹ obufihọ.+

Keme mẹ yọ ọrara gheghe kẹ owhẹ,+

Ohwo nọ o bi kpohọ erẹ nọ ọ be nyavrẹ,* nwane wọhọ epanọ o jọ kẹ esẹ-esẹ mẹ kpobi.+

13 Si ibiaro ra nọ whọ tọvi omẹ na no re mẹ sasa ovao

Taure mẹ tẹ te nyavrẹ, nọ mẹ gbẹ te jọ họ.”

40 Me fi ẹruore mẹ kpobi họ* Jihova,

Yọ ọ kezọ* kẹ omẹ o te yo ubo mẹ kẹ obufihọ.+

 2 O si omẹ no ọgọdọ nọ edo ọgaga ọ rrọ,

No ọloho nọ ọ be whra.

Ọ rọ awọ mẹ dikihẹ ehru ugbehru-utho;

O ru awọ mẹ dikihẹ ga ziezi.

 3 Kẹsena o te fi ole ọkpokpọ họ unu mẹ,+

Ole ujiro rọkẹ Ọghẹnẹ mai.

Ahwo buobu a ti rri avọ ọwhewhe

Je fi eva rai họ Jihova.

 4 Jọ eva e were ohwo nọ o fievahọ Jihova

Nọ o fievahọ ohwo aghẹmeeyo hayo ahwo eviẹhọ họ.*

 5 Eware nọ who ru no i bu kẹhẹ,

O Jihova Ọghẹnẹ mẹ,

Iruo igbunu ra avọ iroro nọ who wo kpahe omai.+

Ọvuọvo ọ rrọ nọ a sae rọ wawo owhẹ hẹ;+

Mẹ tẹ make daoma re mẹ ta kpahe ae je gbiku rai dede,

I bu vi eware nọ mẹ rẹ sai kele!*+

 6 Whọ gwọlọ* idheidhe erao gbe idhe efa ha,+

Rekọ who rovie ezọ mẹ re me yo ẹme.+

 8 O Ọghẹnẹ mẹ, re me ru oreva ra oye o rẹ were omẹ,*+

Yọ uzi ra o rrọ obeva mẹ didi.+

Rri! Me ruru igbenu mẹ hẹ,+

Wọhọ epanọ whọ riẹ vevẹ na, O Jihova.

Iruthọ mẹ e rrọ buobu gaga te epanọ mẹ gbẹ be rọ ruẹ ude nya edhere he;+

I bu vi eto uzou mẹ,

Yọ udu o gbẹ rrọ omẹ awọ họ.

14 Enọ e be gwọlọ uzuazọ* mẹ kpe kpobi

Jọ a ru oma vuọ ae gholo gholo.

Enọ e be gwọlọ nọ okpẹtu o re te omẹ

Jọ a kuomarẹriẹ avọ omovuọ.

16 Rekọ jọ enọ e be gwọlọ owhẹ+

A wereva re a jẹ ghọghọ fiki ra.+

17 Rekọ mẹ yọ oruori gbe oyogbe;

Jọ Jihova ọ gaviezọ kẹ omẹ.

Whẹ họ ofiobọhọ mẹ gbe osiwi mẹ;+

Ọghẹnẹ mẹ, whọ raha oke he.+

41 Jọ eva e were ohwo kpobi nọ o re fiobọhọ kẹ oruori;+

Jihova o ti siwi ei evaọ ẹdẹ okpẹtu.

A ti sei ọnọ o wo evawere evaọ otọakpọ na;+

Who ti siobọnoi kẹ ewegrẹ riẹ vievie he re oware nọ a gwọlọ na o via.+

 3 Jihova ọ te rẹrotei evaọ ehwa ẹyao riẹ;+

Nọ ọ tẹ be mọ, who ti nwene ehwa riẹ riẹriẹriẹ.

O re koko eware iyoma họ nọ ọ rẹ ta;

Kẹsena ọ vẹ nyavrẹ nyae vravra ai fihọ oria kpobi.

 7 Enọ i mukpahe omẹ kpobi a be lẹlẹ ta ẹme kẹ ohwohwo;

A be gba ẹgwae omuomu kpahe omẹ, inọ:

 8 “Oware imuozọ o via kẹe no;

Nọ ọ rrọ otọ no na, ọ te gbẹ kpama ofa ha.”+

 9 Makọ ohwo nọ mẹ avọ iẹe ma be rria kugbe dhedhẹ, ọnọ me fievahọ,+

Ọnọ ọ jẹ re ebrẹdi mẹ, ọ kpare ethihrowọ riẹ ro thihi omẹ no.*+

10 Rekọ, O Jihova, rri omẹ aro jẹ kpare omẹ kpehru,

Re mẹ sae hwosa zihe kẹ ae.

12 Rekọ mẹ riẹ nọ whọ rrọ abọ mẹ fiki ẹgbakiete mẹ;+

Who ti fi omẹ họ aro ra bẹdẹ bẹdẹ.+

13 Jọ a jiri Jihova, Ọghẹnẹ Izrẹl

Bẹdẹ bẹdẹ.*+

42 Wọhọ epanọ orua ọ rẹ gwọlọ iko-ame gaga na,

Ere mẹ* gwọlọ owhẹ, O Ọghẹnẹ.

 3 Irui-oviẹ mẹ họ emu mẹ te aso te uvo;

Ẹsikpobi* ahwo a re se omẹ ẹkoko inọ: “Ọghẹnẹ ra ọ rrọ?”+

 4 Mẹ kareghẹhọ eware nana, mẹ tẹ ta eva mẹ kpobi,

Keme mẹ jẹ hai kuomagbe ogbotu na nya;

Mẹ jẹ hae jọ aro rai nya avọ oma urirẹ* kpobọ uwou Ọghẹnẹ,

Avọ edo oghọghọ gbe uyere-okẹ,

Orọ ogbotu nọ o bi ru ehaa.+

Hẹrẹ Ọghẹnẹ,+

Keme me ti gbe jiri ei wọhọ Osiwi Ologbo mẹ.+

Oyejabọ nọ mẹ rọ kareghẹhọ owhẹ,+

Evaọ obọ Jọdan gbe eria nọ e mai kpehru erọ Hẹmọn,

Evaọ Ugbehru Miza.*

 7 Ame odidi o re bo se ame odidi

Nọ a te yo edo ame ra nọ o bi hwẹ na.

 8 Evaọ uvo, Jihova o ti dhesẹ uyoyou riẹ nọ o rẹ hiẹ hẹ kẹ omẹ,

Yọ evaọ aso mẹ te so ole kẹe jẹ lẹ se Ọghẹnẹ uzuazọ mẹ.+

10 Ewegrẹ mẹ a be dhuaro kẹ omẹ gaga bi se omẹ ẹkoko;*

Ẹsikpobi a bi se omẹ ẹkoko nọ: “Ọghẹnẹ ra ọ rrọ?”+

Hẹrẹ Ọghẹnẹ,+

Keme me ti gbe jiri ei wọhọ Osiwi Ologbo mẹ gbe Ọghẹnẹ mẹ.+

43 Bruoziẹ mẹ, O Ọghẹnẹ,+

Jọ abọ mẹ evaọ ẹdhọ mẹ+ avọ orẹwho nọ o bi yoẹme kẹ owhẹ hẹ na.

Jọ i su omẹ;+

Jọ i su omẹ kpohọ ugbehru ọrẹri ra gbe uwou-udhu ulogbo ra na.+

 4 Kẹsena mẹ vẹ te nyaziọ agbada-idhe Ọghẹnẹ,+

Mẹ vẹ te nyabru Ọghẹnẹ ze, ọnọ ọ be kẹ omẹ evawere gaga na.

Hẹrẹ Ọghẹnẹ,+

Keme me ti gbe jiri ei wọhọ Osiwi Ologbo mẹ gbe Ọghẹnẹ mẹ.+

44 O Ọghẹnẹ, ma rọ ezọ mai yo no,

Esẹ-esẹ mai a gbiku kẹ omai,

Kpahe eware nọ who ru evaọ oke rai,+

Evaọ oke krẹkri nọ u kpemu.

 2 Whọ rọ obọ ra le erẹwho vrẹ+

Who te fi esẹ-esẹ mai họ etẹe.+

 3 Orọnikọ ọgbọdọ obọrai a rọ rehọ ẹkwotọ na ha,+

Yọ orọnikọ ugbobọ rai a ro fi kparobọ họ.+

Rekọ, ẹkwoma obọze ra gbe ugbobọ ra+ gbe elo ovao ra,

Keme who you rai.+

 4 Whẹ họ Ovie mẹ, O Ọghẹnẹ;+

Ta nọ jọ Jekọp o fi kparobọ riẹriẹriẹ.*

 5 Ma te rọ ogaga ra le ewegrẹ mai zihe;+

Ma te rọ odẹ ra thihi enọ e be kpareso omai nyaotọ.+

 6 Keme me fievahọ uze mẹ hẹ,

Yọ ọgbọdọ mẹ ọ sai siwi omẹ hẹ.+

 7 Whẹ họ ọnọ o siwi omai no obọ ewegrẹ mai,+

Whẹ họ ọnọ o ru oma vuọ enọ i mukpahe omai.

 8 Ma ti jiri Ọghẹnẹ kẹse kẹse,*

Yọ ma ti jiri odẹ ra bẹdẹ bẹdẹ. (Silah)

 9 Rekọ obọnana, who gbolo omai kufiẹ je kpomovuọ họ omai oma no,

Yọ who bi lele egbaẹmo mai kpohọ ẹmo ho.

10 Who ru nọ ma be hai ro kuomarẹriẹ dhẹ kẹ ọwegrẹ mai;+

Enọ i mukpahe omai a be rehọ eware mai kpobi nọ a gwọlọ.

11 Who siobọno omai re a kpe omai no wọhọ igodẹ;

Whọ vaha omai fihọ erẹwho sa-sa.+

12 Whọ zẹ ahwo ra enwenọ ọvọvẹ;+

Who wo erere ọvo ho nọ whọ zẹ ae na.*

13 Who ru nọ ahwo okegbe mai a be rọ poviẹ omai,

Enọ e wariẹ omai họ kpobi a bi se omai ẹkoko jẹ be hwẹ omai.

14 Who ru omai fihọ ahwo nọ a re ro jijehwẹ* evaọ udevie erẹwho na,+

Enọ ahwo a rẹ ruẹ a ve nuhu uzou.*

15 Oma o be vuọ omẹ ẹsikpobi,*

Oma o be vuọ omẹ gholo gholo,

16 Nọ me te yo ẹkoko gbe ekela rai,

Fiki ọwegrẹ mai nọ o bi ru omai kele.

17 Eware nana kpobi e via kẹ omai, ghele na whọ thọrọ omai ẹro ho,

Yọ ma raha ọvọ ra ha.+

18 Ma jọ udu mai nyase owhẹ ba ha;

Ithihi mai i ghoro no edhere ra ha.

19 Rekọ whọ whọlọ omai fihọ otọ evaọ oria nọ ikozi e be rria;

Whọ rọ ebi ọlala ruru omai.

20 Otẹrọnọ odẹ Ọghẹnẹ mai o thọrọ omai ẹro,

Hayo otẹrọnọ ma kpare abọ mai lẹ se ọghẹnẹ orẹwho ọfa jọ,

21 Kọ Ọghẹnẹ ọ gbẹ te riẹ onana?

22 Fiki ra ma be rọ rẹriẹ ovao dhe uwhu kẹse kẹse;

A rehọ omai wọhọ igodẹ nọ a re kpe.+

25 Keme a gele omai* fihọ ẹkpẹ no;

A thihi ugboma mai nyaotọ no.+

 3 Thọrọ* ọgbọdọ+ ra fihọ abefẹ ra, O ọgba na,+

Whẹ ọghọ ra avọ orro ra họ.+

 4 Fi kparobọ* evaọ oruaro ra;+

Dhẹ evaọ uzẹme avọ omaurokpotọ gbe ẹrẹreokie,+

Obọze ra u ti ru* eware nọ i re mu ọwhewhe.

 5 Ese ra e rrọ piọpiọpiọ, i bi duwu ahwo kie fihọ aro ra;+

I bi duwu idu ewegrẹ ovie na.+

 6 Ọghẹnẹ họ agbara-uvie ra bẹdẹ bẹdẹ;+

Ọkpọ-isuẹsu uvie ra yọ ọkpọ-isuẹsu ẹrẹreokie.*+

 8 A fi mọr avọ alọe gbe kasia họ iwu ra kpobi nọ e be jarai gbo emamọ ore;

Ekpata-ifi nọ i bi do no ọgwa-ovie ologbo nọ a rehọ akọ-eni whẹ erru họ na ze, i bi ru owhẹ ghọghọ.

10 Kezọ, O ọmọtẹ, gaviezọ re who fi ezọ ra hotọ;

Kpairoro vrẹ ahwo ra gbe uwou ọsẹ ra.

11 Yọ erru ra o ti si ovie na urru,

Keme ọye họ olori ra,

Fikiere guzou kpotọ kẹe.

12 Ọmọtẹ Taya ọ te wha okẹ ze;

Ezae nọ e mai fe a te gwọlọ aruoriwo ra.*

13 Ọmọtẹ ovie na ọ vọ avọ oruaro evaọ ọgwa-ovie* na;

A rehọ igoru whẹ erru họ* ewu riẹ.

15 A te rehọ ae ze avọ oghọghọ gbe evawere;

A te ruọ eva ọgwa-ovie na.

46 Ọghẹnẹ họ oria adhẹzọ mai gbe ẹgba mai,+

Ọ rẹ kake dhogbo ze ti fiobọhọ evaọ oke idhọvẹ.+

 2 Oyejabọ nọ ozọ u ti ro mu omai hi na dede nọ otọakpọ na o bi nwene,

Dede nọ igbehru na i bi ghelie kie fihọ edidi abade na,+

 3 Dede nọ ame obuobu nọ ọ rrọ eva riẹ o bi do enu jẹ be gbivuhu,+

Dede nọ igbehru na i bi nuhu fiki ẹvohẹ riẹ. (Silah)

 4 Ethẹ jọ ọ riẹ, nọ iko-ame riẹ i bi ru okpẹwho Ọghẹnẹ ghọghọ,+

Uwou-udhu ulogbo ọrẹri orọ Ọnọ Ọ Mai Kpehru na.

 6 Ozighi ọ jọ erẹwho na, a fi ekwotọ-ivie na kparobọ;

Ọ kpare urru riẹ, otọakpọ na o tẹ ghra no.+

 7 Jihova olori egbaẹmo na ọ rrọ kugbe omai;+

Ọghẹnẹ Jekọp họ oria adhẹzọ* mai nọ o foma. (Silah)

 8 Nyaze re whọ rọ ẹro ruẹ iruẹru Jihova,

Epanọ o ro ru eware urirẹ evaọ otọakpọ na.

O wiri uze na jẹ guọghọ ozuẹ na;

Ọ rọ erae mahe ekẹkẹ ẹmo na.*

A te kpare omẹ kpehru evaọ udevie erẹwho na;+

A te kpare omẹ kpehru evaọ otọakpọ na.”+

11 Jihova olori egbaẹmo na ọ rrọ kugbe omai;+

Ọghẹnẹ Jekọp họ oria adhẹzọ mai nọ o foma.+ (Silah)

 2 Keme Jihova, Ọnọ Ọ Mai Kpehru na yọ Ọghẹnẹ nọ o re mu ọwhewhe;+

Ọye họ Ovie ologbo rọkẹ otọakpọ na soso.+

 3 O fi ahwo kparobọ re a jọ otọ mai;

O fi erẹwho họ otọ awọ mai.+

 4 Ọ salọ ukuoriọ mai kẹ omai,+

Orro Jekọp, ọnọ o you na.+ (Silah)

 5 Ọghẹnẹ ọ kparoma evaọ udevie edo oghọghọ;

Jihova ọ kparoma evaọ udevie edo onware* na.

 7 Keme Ọghẹnẹ họ Ovie otọakpọ na soso;+

So ile ujiro, re who dhesẹ otoriẹ udidi.

 9 Isu ahwo na a kokohọ

Kugbe ahwo Ọghẹnẹ Abraham.

48 Jihova ọ rrọ ruaro yọ ọye ọ mai fo ejiro

Evaọ okpẹwho Ọghẹnẹ mai, evaọ ugbehru ọrẹri riẹ.

 2 U wo erru gaga evaọ oria ukpehru nọ o rrọ na, oghọghọ rọkẹ otọakpọ na soso,+

Ere Ugbehru Zayọn nọ o rrọ obọ ẹkpẹlobọ ovatha-ọre thethabọ na o rrọ,

Okpẹwho Ovie Ologbo na.+

 3 Evaọ iwou ikpehru nọ e rẹ bẹ ẹvẹruọ na,

Ọghẹnẹ o dhesẹ via no inọ ọyomariẹ yọ oria adhẹzọ* nọ o foma.+

 4 Keme rri! ivie i kokohọ;*

Aikpobi a tẹ wọ ze.

 6 A te bi nuhu kpakpakpa evaọ etẹe,

Avọ ẹrova wọhọ aye nọ o bi yẹ.

 8 Oware nọ ma yo kpahe na, oye ma rọ ẹro mai ruẹ no na

Evaọ okpẹwho Jihova olori egbaẹmo na, evaọ okpẹwho Ọghẹnẹ mai.

 9 Ma romatotọ roro kpahe uyoyou ra nọ o rẹ hiẹ hẹ na, O Ọghẹnẹ,+

Evaọ etẹmpol ra.

10 Wọhọ odẹ ra, O Ọghẹnẹ, ere ujiro ra

U te oka avọ oka otọakpọ na.+

11 Jọ Ugbehru Zayọn+ o ghọghọ,

Jọ ewho esese* Juda e ghọghọ fiki iziẹibro ra.+

12 Nya Zayọn wariẹ họ; nya omariẹ kpobi wariẹ họ;

Kele iwou ikpehru riẹ.+

Nabi rri iwou ikpehru riẹ nọ e rẹ bẹ ẹvẹruọ,

Re whọ ruẹsi gbiku riẹ kẹ ige nọ e be tha.

Wha gaviezọ, whai ahwo kpobi nọ a be rria akpọ na.*

 2 Te esese te ilogbo,*

Te edafe gbe iyogbe.

 3 Mẹ te rọ unu mẹ ta eme areghẹ,

Yọ eware nọ me bi roro didi kpahe evaọ udu mẹ+ i ti dhesẹ otoriẹ.

 4 Mẹ te gaviezọ kẹ ohare;

Mẹ te rọ akpata ru oze mẹ vẹ.

 5 Fikieme ozọ u re ro mu omẹ evaọ oke ebẹbẹ,+

Okenọ emuemu* enọ e be gwọlọ ekie mẹ o tẹ wariẹ omẹ họ?

 6 Enọ i bi fievahọ efe rai+

Gbe enọ e be rọ efe obuobu rai seha,+

 7 Ọvuọvo rai ọ rẹ sae ta oniọvo vievie he

Hayo kẹ Ọghẹnẹ ẹtanigbo riẹ hẹ,+

 8 (Osa ẹtanigbo rọkẹ uzuazọ* rai o rrọ ghaghae gaga

Fikiere a rẹ sae hwae vievie he);

 9 Re ọ rria uzuazọ ebẹdẹ bẹdẹ nọ ọ gbẹ rọ ruọ ọgọdọ họ.*+

10 Ọ ruẹ nọ makọ ahwo nọ a wo areghẹ dede a re whu;

Te igheghẹ te enọ e kare iroro a re whu,+

A vẹ nyasiọ efe rai ba kẹ amọfa.+

11 A be jọ obọ eva rai ta nọ dodokọ iwou rai e rẹ jọ bẹdẹ bẹdẹ,

Dodokọ iwou-udhu rai e rẹ jọ no oge ruọ oge.

12 Rekọ ohwo-akpọ, dede nọ a bru ọghọ họ iẹe oma, ọ rẹ jọ ribri hi;+

O woma vi erao obọ ẹwọ họ nọ i re whu.+

13 Enẹ o rẹ jọ kẹ ahwo nọ a rrọ gheghẹ+

Gbe enọ i bi lele ai, nọ eme ifofe rai e rẹ were. (Silah)

Uwhu u ti su ai wọhọ othuru-igodẹ;

Ohwo nọ o kiete o ti su ai+ evaọ ohiohiẹ.

A gbẹ te ruẹ e rai ofa ha;+

Uki*+ o te jọ uwou rai+ viukpọ uwou-ovie.

15 Rekọ Ọghẹnẹ ọ te ta omẹ* no ogaga* Uki,*+

Keme o ti kru omẹ. (Silah)

16 Jọ ozọ u mu owhẹ hẹ fikinọ ohwo jọ o fe no,

Fikinọ ekwakwa uwou riẹ i vihọ,

17 Keme okenọ o ti whu, ọ rẹ sae rehọ oware ovuovo lele oma ha;+

Orro riẹ na u ti lele iei kpobọ otọ họ.+

20 Ohwo-akpọ nọ o vuhu onana mu hu, dede nọ a bru ọghọ họ iẹe oma,+

O woma vi erao obọ ẹwọ họ nọ i re whu.

50 Jihova, Ọghẹnẹ nọ o kpehru vi eghẹnẹ efa kpobi na*+ ọ ta ẹme no;

O se otọakpọ na ẹdhọ

No ovatha-ọre rite ukiediwo-ọre.

Ebruerae e be to evaọ aro riẹ,+

Yọ ofou ọwhibo ọgaga o bi fou wariẹe họ.+

 4 O se idhiwu na avọ otọakpọ na ẹdhọ,+

Re ọ ruẹse rehọ ahwo riẹ guẹdhọ:+

 5 “Koko ahwo mẹ nọ a talamu omẹ na họ bru omẹ ze,

Enọ e be rọ ẹkwoma idheidhe re ọvọ kugbe omẹ.”+

 6 Idhiwu na i bi whowho ẹrẹreokie riẹ,

Keme Ọghẹnẹ omariẹ họ Obruoziẹ.+ (Silah)

 7 “Wha gaviezọ, O ahwo mẹ, re mẹ ta ẹme;

Izrẹl, me ti se isẹri kpe owhẹ.+

 8 Orọnikọ fiki idhe ra mẹ be rọ whọku owhẹ hẹ,

Hayo fiki idhe emahọ ra nọ whọ be hai dhe kẹ omẹ kẹse kẹse na ha.+

 9 U du gwọlọ nọ mẹ rẹ jọ uwou ra rehọ eruẹ hẹ,

Hayo jọ uwou-erao ra rehọ ewe he.*+

10 Keme erao ẹwọ na kpobi nọ e rrọ owhawho na emẹ,+

Makọ erao nọ e rrọ ehru igbehru odu.

11 Mẹ riẹ ọvra kpobi nọ ọ rrọ obọ igbehru na;+

Erao obọ ẹwọ nọ a rẹ sai kele mu hu na emẹ.

12 Otẹrọnọ ohọo u bi kpe omẹ, mẹ rẹ vuẹ owhẹ hẹ,

Keme otọ na gbe eware kpobi nọ e rrọ eva riẹ emẹ.+

13 Kọ mẹ rẹ re uwo iruẹ

Jẹ da azẹ ewe?+

14 Jọ uyere nọ whọ rẹ kẹ Ọghẹnẹ o jọ idhe nọ who re dhe kẹe,+

Re who je ru eyaa ra gba kẹ Ọnọ Ọ Mai Kpehru na;+

15 Bo se omẹ evaọ oke uye.+

“Udu vẹ who wo nọ whọ rẹ rọ ta kpahe ijaje mẹ+

Hayo ta ẹme kpahe ọvọ mẹ?+

17 Keme who mukpahe ọwhọkuo,*

Yọ who bi kiukeku eme mẹ* ẹsikpobi.+

18 Nọ whọ tẹ ruẹ oji, whọ rẹ jẹe rehọ,*+

Yọ who bi lele ibruẹnwae nya usu.

19 Whọ be rehọ unu ra vaha eme iyoma,

Yọ eviẹhọ e rrọ ẹrọo ra.+

20 Whọ rẹ keria who ve mu eme iyoma họ ẹta kpahe oniọvo obọra;+

Who re gu iruthọ* ọmọzae oni ra kẹ amọfa.

21 Okenọ who je ru eware nana kpobi, me fibo,

Fikiere who te je roro nọ mẹ te jọ wọhọ owhẹ.

Rekọ obọnana, mẹ te whọku owhẹ,

Mẹ vẹ te fodẹ eware nọ who ru thọ kẹ owhẹ.+

22 Ivie wha roro kpahe onana, whai enọ Ọghẹnẹ ọ thọrọ ẹro no,+

Re mẹ gbẹ za owhai ekekẹ hẹ ababọ ohwo ọvo nọ o re siwi owhai.

23 Ohwo nọ ọ rẹ kẹ uyere wọhọ idhe riẹ nọ o bi dhe, ọ be kẹ omẹ orro,+

Yọ ohwo nọ o re lele emamọ edhere kpobi,

Me ti ru ei ruẹ esiwo nọ o re no obọ Ọghẹnẹ ze.”+

 2 Nabe wozẹ omẹ fo no iruthọ mẹ,+

Re who ru omẹ fo no uzioraha mẹ.+

 3 Keme mẹ riẹ iruthọ mẹ vevẹ,

Yọ uzioraha mẹ o rrọ aro* mẹ ẹsikpobi.+

 4 Whẹ họ ọnọ mẹ mai* ru thọ;+

Me ru oware nọ u yoma evaọ aro ra.+

Fikiere who kiẹrẹe evaọ oware nọ whọ be ta,

Oziẹobro ra o kiehọ.+

 5 Rri! A yẹ omẹ ze avọ abe oruthọ nọ mẹ re,

Yọ evaọ uzioraha, oni mẹ o jo dieva mẹ họ.*+

 6 Rri! Ohwo nọ ọ rẹ ta uzẹme no eva riẹ kpobi ze ọ rẹ were owhẹ;+

Wuhrẹ omẹ* uvi areghẹ.

 7 Rọ hisọp ru omẹ fo no uzioraha mẹ, re mẹ ruẹse jọ fuafo;+

Wozẹ omẹ fo, re mẹ fo vi ekpalekpa-ame.+

 8 Jọ me yo edo evawere gbe oghọghọ,

Re igbenwa nọ whọ whọlọ no e ruẹse ghọghọ.+

 9 Ku ovao ra fiẹ no* izieraha mẹ,+

Je voro* iruthọ mẹ kpobi no.+

10 Kẹ omẹ udu ofuafo, O Ọghẹnẹ,+

Re who fi ẹzi ọkpokpọ họ omẹ oma,+ onọ o rrọ gaga.

11 Who gbolo omẹ kufiẹ no aro ra ha;

Who si ẹzi ọfuafo ra no omẹ oma ha.

12 Zihe oghọghọ nọ u re no esiwo ra ze kẹ omẹ;+

Fiobọhọ kẹ omẹ re mẹ rọ unevaze yoẹme kẹ owhẹ.*

13 Me ti wuhrẹ erahaizi idhere ra,+

Re irumuomu e ruẹsi zihe bru owhẹ ze.

14 Siwi omẹ no abe-ọriọ azẹ,+ O Ọghẹnẹ, Ọghẹnẹ esiwo mẹ,+

Re ẹrọo mẹ o whowho ẹrẹreokie ra avọ oghọghọ.+

15 O Jihova, rovie igbenu mẹ,

Re unu mẹ o ruẹsi jiri owhẹ.+

16 Keme whọ gwọlọ idhe he, o gbẹ rrọ ere he, mẹ hai dhe idhe kẹ owhẹ;+

Orọnikọ idhe emahọ eye e rẹ were owhẹ hẹ.+

17 Idheidhe nọ e rẹ were Ọghẹnẹ họ udu ọkora;

O Ọghẹnẹ, whọ te siọ* udu nọ o vọ avọ ọkora gbe uweri hi.+

18 Rọ emamọ eva ra ru oware uwoma kẹ Zayọn;

Bọ igbẹhẹ Jerusalẹm.

19 Kẹsena who ve ti wo evawere kpahe idhe ẹrẹreokie,

Idhe emahọ gbe idhe esoso;

A vẹ te rọ iruẹ dhe idhe evaọ agbada-idhe ra.+

 2 Ẹrọo ra nọ ọ rrọ dada wọhọ erezọbledi+ na,

Ọ rẹ ma omaa omuomu je ru iruẹru eviẹhọ.+

 3 Who you umuomu vi oware nọ u woma,

Je you ọrue vi oware nọ u kiehọ nọ whọ rẹ ta. (Silah)

 4 Eme iyoma* kpobi e rẹ were owhẹ,

O, whẹ ẹrọo eviẹhọ na!

 5 Oyejabọ nọ Ọghẹnẹ ọ te rọ raha owhẹ no riẹriẹriẹ;+

Ọ te tatabọ họ owhẹ je si owhẹ no uwou-udhu ra;+

O ti vi* owhẹ no ẹkwotọ enọ e rrọ uzuazọ no.+ (Silah)

 6 Ahwo okiẹrẹe na a te ruẹ e riẹ, u ve ti mu ai ọwhewhe,+

A vẹ te hwẹe.+

 7 “Rri ohwo nọ ọ rehọ Ọghẹnẹ fihọ oria adhẹzọ riẹ hẹ,+

Rekọ nọ o fievahọ efe obuobu riẹ+

Jẹ rẹroso* omaa umuomu riẹ.”*

 8 Rekọ mẹ te jọ wọhọ ure olivi ologbo evaọ uwou Ọghẹnẹ;

Me fievahọ uyoyou Ọghẹnẹ nọ o rẹ hiẹ hẹ+ na bẹdẹ bẹdẹ.

 9 Me ti jiri owhẹ bẹdẹ bẹdẹ fiki eware nọ who ru;+

Evaọ iraro enọ e talamu owhẹ,

Me ti fi ẹruore mẹ họ odẹ ra,+ keme o rrọ wowoma.

Eware iyoma nọ a bi ru e vọ avọ ogbekuo jẹ rrọ tọtọtọ;

Ohwo ọvuọvo nọ o bi ru ewoma ọ rrọ họ.+

 2 Rekọ Ọghẹnẹ o bi rri emọ ahwo no obọ odhiwu ze+

Re ọ ruẹ sọ ọjọ ọ riẹ nọ o wo otoriẹ udidi, sọ ọjọ ọ riẹ nọ ọ be gwọlọ Jihova.+

 3 Aikpobi a nyathọ no;

Aikpobi a gbeku.

Ohwo ọvuọvo nọ o bi ru ewoma ọ rrọ họ,

Makọ omọvo dede.+

 5 Rekọ ozọ ogaga o te ruọ ae oma,

Oghẹrẹ ozọ nọ a re dhẹ ẹdẹvo ho,*

Keme Ọghẹnẹ ọ te vaha igbenwa enọ e be họre owhẹ.*

Okenọ Jihova o te koko ahwo riẹ nọ a mu kpohọ igbo ze no,

Jọ eva e were Jekọp, jọ Izrẹl ọ ghọghọ.

54 O Ọghẹnẹ, siwi omẹ ẹkwoma odẹ ra,+

Re whọ rọ ogaga ra thothọ mẹ.*+

 2 O Ọghẹnẹ, yo olẹ mẹ;+

Gaviezọ kẹ eme nọ i bi no unu mẹ ze.

 3 Keme erara* e be kpareso omẹ,

Yọ ezae egeva e be gwọlọ uzuazọ* mẹ.+

 4 Rri! Ọghẹnẹ họ ofiobọhọ mẹ;+

Jihova ọ rrọ kugbe enọ e be tha omẹ* uke.

 5 Ọ te rehọ eyoma ewegrẹ mẹ hwosa zihe kẹ ae;+

Kpe ai no,* fiki ọtẹruo ra.+

 7 Keme o bi siwi omẹ no idhọvẹ kpobi,+

Yọ me ti rri ewegrẹ mẹ avọ oghọghọ obokparọ.+

55 Gaviezọ kẹ olẹ mẹ, O Ọghẹnẹ,+

Who ku ovao kufiẹ kẹ ayare mẹ rọkẹ ohrọ họ.*+

Eware nọ e be kẹ omẹ uye i bi ru omẹ rova,+

Yọ idhọvẹ e rrọ omẹ oma

 3 Fiki oware nọ ọwegrẹ na ọ be ta

Gbe ukpokpoma nọ u bi no obọ ohwo omuomu na ze.

Keme a bi koko ebẹbẹ họ omẹ uzou,

Yọ a be rọ ofu jẹ omẹ egrẹ.+

 4 Edada egaga e rrọ omẹ udu,+

Yọ iguegue uwhu e da omẹ oma fia.+

 5 Ozọ avọ iguegue e rrọ omẹ oma,

Me bi nuhu kpakpakpa.

 8 Ovovẹrẹ mẹ hai ro kpohọ oria nọ a rẹ rria

Rono ofou ọgaga, rono ofou ọwhibo.”

 9 Reghe ai, O Jihova, re whọ raha omaa rai,*+

Keme mẹ ruẹ ozighi gbe ohọre* evaọ okpẹwho na.

10 Te aso te uvo a be nya ugbẹhẹ riẹ wariẹ;

Egrẹ gbe ebẹbẹ e rrọ eva riẹ.+

11 Ọraha ọ rrọ udevie riẹ;

Okienyẹ gbe eviẹhọ i re no oko-ore riẹ vievie he.+

12 Keme orọnikọ ọwegrẹ ọ be poviẹ omẹ na ha;+

O hae jọ ere, mẹ hai thihakọ riẹ.

Orọnikọ ọwegrẹ ọ be kpareso omẹ na ha;

O hae jọ ere, mẹ hae kuọ oma dhere iei.

13 Rekọ owhẹ, ọzae wọhọ omẹ,*+

Ogbẹnyusu obọmẹ nọ mẹ riẹ ziezi.+

14 Ma jọ egbẹnyusu ekpekpe vẹre;

Ma jẹ hai kuomagbe ogbotu na nya usu kpohọ uwou Ọghẹnẹ.

Jọ a ruọ eva Uki* ọkpokpọ;

Keme umuomu o be rria udevie rai jẹ rrọ eva rai.

16 Rọkẹ omẹ, Ọghẹnẹ me re bo se,

Yọ Jihova o ti siwi omẹ.+

17 Te owọwọ, te ohiohiẹ gbe uvo, me bi dimẹ fiki idhọvẹ nọ e rrọ omẹ oma,*+

Yọ o bi yo urru mẹ.+

18 O ti siwi* omẹ jẹ kẹ omẹ* udhedhẹ rono obọ ahwo nọ a be họre omẹ,

Keme ogbotu ahwo a be wọ bru omẹ ze.+

19 Ọghẹnẹ o ti yo, yọ o ti ru ae oware,+

Ọnọ ọ keria agbara-uvie no oke anwae ze na.+ (Silah)

A te rọwo nwene he,

Enọ e be dhozọ Ọghẹnẹ hẹ na.+

20 Ọ* họre enọ e be rria dhedhẹ kugbei;+

Ọ raha ọvọ riẹ no.+

21 Eme riẹ e riẹriẹ vi ebọta,+

Rekọ ohọre o rrọ udu riẹ.

Eme riẹ e lọhọ vi ewhri,

Rekọ e wọhọ ọgbọdọ nọ a wolo lahwe.+

22 Gbolo owha ra kẹ Jihova,+

Ọ te rẹrote owhẹ.+

 2 Ẹsikpobi ewegrẹ mẹ a bi gbakọ họ omẹ;

Ahwo buobu a be họre omẹ ududu.*

 4 Ọghẹnẹ, ọnọ me bi jiri ẹme riẹ na,

Ọghẹnẹ me fievahọ; ozọ u bi mu omẹ hẹ.

 5 Kẹdẹ kẹdẹ* a be wha ọraha họ iruẹru mẹ;

Oware nọ a bi roro kpobi họ epanọ a rẹ rọ nwa omẹ oma.+

 6 A dhere be hẹrẹ re a họre omẹ;

A bi muẹrohọ oria kpobi nọ mẹ be nya,+

Be gwọlọ epanọ a rẹ rọ rehọ uzuazọ* mẹ.+

10 Ọghẹnẹ, ọnọ me bi jiri ẹme riẹ na,

Jihova, ọnọ me bi jiri ẹme riẹ na,

11 Ọghẹnẹ me fievahọ; ozọ u bi mu omẹ hẹ.+

12 Me re ru eyaa nọ mẹ ya kẹ owhẹ gba, O Ọghẹnẹ;+

Me ti dhe idhe uyere kẹ owhẹ.+

13 Keme who siwi omẹ* no uwhu+

Je ru nọ awọ mẹ o gbe ro zoruẹ hẹ,+

Re mẹ ruẹse nya evaọ aro Ọghẹnẹ, re mẹ gbẹ jọ uzuazọ.*+

57 Rri omẹ aro, O Ọghẹnẹ, rri omẹ aro,

Keme whẹ mẹ dhẹ bru ze re mẹ zọ,+

Yọ otọ ibekpe ra mẹ dhẹ ro bẹsenọ ebẹbẹ na e rẹ vrẹ.+

 2 Me bo se Ọghẹnẹ, Ọnọ Ọ Mai Kpehru na,

Ọghẹnẹ uzẹme na, ọnọ o ti kpe ai no kẹ omẹ.

 4 Ikpohrokpo e wariẹ omẹ* họ;+

O gbahọ nọ me re kiẹzẹ udevie ahwo nọ a be gwọlọ re omẹ no,

Enọ ibiakọ rai e wọhọ izuẹ gbe ese

Nọ ẹrọo rai ọ wọhọ ọgbọdọ ọdada.+

 5 Jọ orro ra u kpehru vi idhiwu na, O Ọghẹnẹ;

Jọ oruaro ra o vọ otọakpọ na soso.+

 6 A ruẹrẹ ẹriri họ rọ kpahe ẹta re o mu awọ mẹ;+

Idhọvẹ e lẹliẹ omẹ* gbuzou hotọ.+

A tọ ọgọdọ fihọ obaro kẹ omẹ,

Rekọ ae ọvo a te kie fihọ iẹe.+ (Silah)

 7 Udu mẹ o rrọ kothi, O Ọghẹnẹ,+

Udu mẹ o rrọ kothi.

 9 Me ti jiri owhẹ evaọ udevie ahwo na, O Jihova;+

Mẹ te so ile jiri* owhẹ evaọ udevie erẹwho na.+

10 Keme uyoyou ra nọ o rẹ hiẹ hẹ na o rrọ ruaro, u kpehru te idhiwu na,+

Yọ ọtẹruo ra o kpehru te ihru na.

11 Jọ orro ra u kpehru vi idhiwu na, O Ọghẹnẹ;

Jọ oruaro ra o vọ otọakpọ na soso.+

 2 Ukpoye kọ omaa umuomu wha be jọ udu rai ma,+

Yọ wha be rọ abọ rai ru ozighi evaọ otọ na.+

 3 Ahwo omuomu a nyathọ* no eva ze;*

A rrọ yoyoma, eterue no okenọ a ro yẹ ai ze.

 4 Obi rai ọ wọhọ obi eraomuomu;+

A diezọ wọhọ obi nọ ọ tehe ezọ riẹ di.

 5 Ọnọ ọ rẹ gaviezọ kẹ urru enọ e rẹ kpọ eraomuomu hu,

Ghelọ epanọ ẹbo rai ọ rẹ sẹ te kẹhẹ.

 8 Jọ a jọ wọhọ usekpe nọ u bi si vrẹ yọ o be ya;*

Wọhọ ọmọ nọ aye o yẹ thọwa nọ ọ ruẹ ọre vievie he.

 9 Taure erri erae ure-inwe na u te ti mu iwho nọ who ro there,

O ti hwere egha ire ekpokpọ gbe enọ e be to na kpobi kufiẹ, wọhọ epanọ ofou ọwhibo o re ru na.+

10 Okiẹrẹe na ọ te ghọghọ keme ọ ruẹ orukele+ na no;

Awọ riẹ ọ te jọ ehru azẹ irumuomu na zue.+

59 Siwi omẹ no obọ ewegrẹ mẹ, O Ọghẹnẹ mẹ;+

Thọ omẹ no obọ enọ e be kpareso omẹ.+

 2 Siwi omẹ no obọ enọ i bi ru eware imuomu,

Je siwi omẹ no obọ ahwo ozighi.*

 3 Rri! A dhere be hẹrẹ omẹ;*+

Ezae egaga e be họre omẹ

O Jihova, orọnikọ fikinọ mẹ kpareso hayo raha uzi hi.+

 6 A re zihe ze kowọwọ kowọwọ;+

A rẹ go* wọhọ erakọ+ jẹ lẹlẹ nya wariẹ evaọ okpẹwho na.+

 7 Rri oware nọ u bi hwẹ* no unu rai ze;

Igbenu rai e wọhọ egbọdọ,+

Keme a be ta nọ: “Ono ọ be gaviezọ?”+

 8 Rekọ whẹ, O Jihova, whọ te hwẹ ae;+

Whọ te rọ erẹwho na kpobi jijehwẹ.+

 9 O Ẹgba mẹ, mẹ te tẹrovi owhẹ;+

Keme Ọghẹnẹ họ oria adhẹzọ* mẹ nọ o foma.+

10 Ọghẹnẹ nọ o dhesẹ uyoyou nọ o rẹ hiẹ hẹ kẹ omẹ na, ọ te nyaze ti fiobọhọ kẹ omẹ;+

Ọghẹnẹ o ti ru nọ me ti ro rri ewegrẹ mẹ avọ oghọghọ obokparọ.+

Rehọ ogaga ra ru ai ghoro kpenẹ avọ enẹ;

Ru re a kie, O Jihova, ojese mai.+

12 Fiki uzioraha unu rai gbe ẹme igbenu rai,

Jọ a kru ae fiki omorro rai,+

Fiki eka nọ a be la gbe eme eviẹhọ nọ a be ta.

13 Rọ ofu ra raha ae muotọ;+

Raha ae muotọ, re a gbẹ jọ ofa ha;

Ru ai riẹ nọ Ọghẹnẹ o bi su evaọ Jekọp je rite oka avọ oka otọakpọ na.+ (Silah)

14 Jọ a zihe ze evaọ owọwọ;

Jọ a go* wọhọ erakọ jẹ lẹlẹ nya wariẹ evaọ okpẹwho na.+

15 Jọ a ghoro kpenẹ avọ enẹ gwọlọ oware nọ a rẹ re;+

Whọ kuvẹ re a re eva vọ hayo ruẹ oria nọ a re wo fihọ họ.

16 Rekọ rọkẹ omẹ, mẹ rẹ so ile kpahe ẹgba ra;+

Evaọ ohiohiẹ mẹ te rọ oghọghọ ta kpahe uyoyou ra nọ o rẹ hiẹ hẹ.

Keme whẹ họ oria adhẹzọ mẹ nọ o foma+

Gbe oria nọ mẹ rẹ dhẹ kpohọ evaọ oke uye mẹ.+

17 O Ẹgba mẹ, whẹ mẹ rẹ so ile ujiro* kẹ,+

Keme Ọghẹnẹ họ oria adhẹzọ mẹ nọ o foma, Ọghẹnẹ nọ o dhesẹ uyoyou nọ o rẹ hiẹ hẹ kẹ omẹ.+

 4 Kẹ* ahwo nọ a be dhozọ ra oka

Nọ a sae rọ dhẹ jẹ kẹnoma kẹ uze na. (Silah)

 5 Re ahwo nọ who you a sai no uye,*

Yo kẹ omai, re whọ rọ obọze ra siwi omai.+

“Mẹ te ghọghọ, me ti siobọno Shẹkẹm re a rehọ iẹe reuku,+

Yọ mẹ te ma Ukiekpotọ* Sọkọt fihọ akotọ.+

 7 Giliad ọmẹ, wọhọ epanọ me wo Manasẹ na,+

Yọ Ifremu họ etu-ọgaga* rọkẹ uzou mẹ;

Juda họ ọkpọ osu mẹ.+

10 Ogbẹrọnọ owhẹ, O Ọghẹnẹ, ọnọ ọ siọ omai no na,

Ọghẹnẹ mai, ọnọ o gbe bi lele egbaẹmo mai kpohọ ẹmo ho na?+

11 Fiobọhọ kẹ omai evaọ uye mai,

Keme esiwo nọ o re no obọ ohwo-akpọ ze o re fioka ha.+

12 Ọghẹnẹ ọ te kẹ omai ogaga,+

Yọ o ti thihi ewegrẹ mai nyaotọ.+

 2 Me ti bo se owhẹ no obọ oka otọakpọ na ze

Okenọ udu mẹ o tẹ rrọ ọkora.*+

 3 Keme whẹ họ oria adhẹzọ mẹ,

Uwou ukpehru ogaga nọ o rẹ thọ omẹ no obọ ọwegrẹ na.+

 4 Mẹ te jọ ọrara nọ ọ kpahe uwou-udhu ra bẹdẹ bẹdẹ;+

Mẹ te dhẹ ruọ otọ ibekpe ra re mẹ zọ.+ (Silah)

 6 Who ti fi edẹ ba uzuazọ* ovie na,+

Yọ ikpe riẹ i ti no oge te oge.

 7 Ọ te keria agbara-uvie* bẹdẹ bẹdẹ evaọ aro Ọghẹnẹ;+

Dhesẹ* uyoyou nọ o rẹ hiẹ hẹ gbe ọtẹruo kẹe, re enana e ruẹse thọe.+

 8 Mẹ vẹ te so ile jiri* odẹ ra bẹdẹ bẹdẹ+

Nọ me bi ru eyaa mẹ gba kẹdẹ kẹdẹ na.+

 2 Evaọ uzẹme, ọye họ utho mẹ gbe esiwo mẹ, oria adhẹzọ* mẹ nọ o foma;+

Me ti nuhu vrẹta vievie he.+

 4 Keme a si uzou kokohọ gba ẹgwae epanọ a re ro gele iei no oria ukpehru* riẹ fihọ otọ;

Erueta e rẹ were ae.

 5 Evaọ uzẹme, me fibo be hẹrẹ* Ọghẹnẹ+

Keme ọye ọ be kẹ omẹ ẹruore.+

 6 Evaọ uzẹme, ọye họ utho mẹ gbe esiwo mẹ, oria adhẹzọ mẹ nọ o foma;

Me ti nuhu vievie he.+

 9 Emọ ahwo-akpọ yọ ẹwẹ gheghe nọ a ku ze,

Emọ ahwo-akpọ a rẹ viẹ ohwo họ.+

10 Whọ rẹroso ofruriọ họ

Hayo rẹroso ewhariọ họ* keme oyena yọ ẹruọrọsuọ ofofe.

12 U te no ere no, uyoyou nọ o rẹ hiẹ hẹ yọ ora, O Jihova,+

Keme whọ rẹ hwosa kẹ omomọvo wọhọ epaọ iruo riẹ.+

Me rẹro* ra bẹ no

Evaọ otọ nọ o ya fia nọ ame ọ rrọ họ.+

 2 Keme me rri owhẹ evaọ oria ọrẹri na;

Mẹ ruẹ ẹgba ra gbe oruaro ra no.+

 3 Fikinọ uyoyou ra nọ o rẹ hiẹ hẹ u woma vi uzuazọ,+

Mẹ rẹ rọ igbenu mẹ jiri owhẹ.+

 4 Fikiere me ti jiri owhẹ evaọ edẹ uzuazọ mẹ kpobi;

Mẹ te kpare abọ mẹ kpehru evaọ odẹ ra.

 5 Mẹ re ẹkẹ nọ ọ mai woma kpaobọ bẹ,*

Fikiere unu mẹ u re jiri owhẹ avọ oghọghọ nọ o rrọ igbenu mẹ.+

 6 Mẹ kareghẹhọ owhẹ evaọ ehwa mẹ;

Me roro didi kpahe owhẹ evaọ oke aso.+

 7 Keme whẹ họ ofiobọhọ mẹ,+

Yọ me bi bo ubo oghọghọ evaọ otọ ibekpe ra.+

 8 Mẹ* talamu owhẹ;

Whọ rehọ obọze ra kru omẹ ziezi.+

 9 Rekọ enọ e be gwọlọ raha uzuazọ mẹ* no

A ti kpobọ otọ kokodo.

10 A ti siobọno ai kẹ akọ* ọgbọdọ;

A ti zihe ruọ emuore kẹ ikozi.*

Ohwo kpobi nọ ọ be rehọ Ọghẹnẹ duwu iyei ọ te ghọghọ,*

Keme a ti ruru unu ahwo nọ a be ta erue.