၄ မိၤၡ့
၁ ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးဝံၤ ခံနံၣ်တနံၣ်, လါခံလါတလါ, လါထီၣ်တသီန့ၣ်+ ယဟိဝၤယွၤ တဲတၢ်ဒီး စီၤမိၤၡ့လၢ စံၤနါအပှၢ်မုၢ်ကနၢ+ လၢတၢ်အိၣ်ဖှိၣ် အဒဲပူၤလီၤ.+ အဝဲ တဲဝဲလၢ ၂ “ထၢပှၤအံၣ်စရ့လးဖိခဲလၢာ် အနီၣ်ဂံၢ်+ ခီဖျိ သုဂံၢ် အဝဲသ့ၣ် တဂၤစုာ်စုာ် ဒ်အဒူၣ်အသိး ဒီးဒ်အဒူၣ်ဖိထၢဖိအသိး ဒီးခီဖျိ သုဂံၢ် ပှၤပိာ်ခွါကိးဂၤဒဲး အမံၤတက့ၢ်. ၃ ပှၤကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ်လၢ+ အကဲသုးလၢ အံၣ်စရ့လးအပူၤသ့န့ၣ် နၤဒီးစီၤအၤဟရိၣ် ကဘၣ်ထၢနုာ် အဝဲသ့ၣ်အမံၤ ဒ်အဝဲသ့ၣ် အသုးက့ အိၣ်ဝဲအသိးလီၤ.
၄ “သုကဘၣ် ကိးဃုာ်ဒီး အံၣ်စရ့လး အဒူၣ်တဒူၣ်စုာ်စုာ် အခိၣ်တဂၤ, တဒူၣ်တဂၤ တဒူၣ်တဂၤလီၤ.+ ၅ ပှၤလၢ အကမၤစၢၤသု တဖၣ်အံၤန့ၣ် အမံၤအိၣ်ဝဲ ဒ်အံၤလီၤ. လၢရူၤဘ့ၣ်အဒူၣ်န့ၣ် စီၤၡဒ့အူၢ်+ အဖိခွါ စီၤအလံစူၢ်လီၤ. ၆ လၢစူၤမ့းအိၣ် အဒူၣ်န့ၣ် စီၤစူၤရံၡးဒံၤ+ အဖိခွါ စီၤၡလူမံၤအ့လးလီၤ. ၇ လၢယူဒၤ အဒူၣ်န့ၣ် စီၤဧးမံၤနဒး အဖိခွါ စီၤနးၡိၣ်လီၤ.+ ၈ လၢယံးစၣ်ကၢ် အဒူၣ်န့ၣ် စီၤစူဧၢ် အဖိခွါ စီၤနၤသန့လးလီၤ.+ ၉ လၢစဘူလိၣ် အဒူၣ်န့ၣ် စီၤဃ့လူၣ် အဖိခွါ စီၤအလံအာ်လီၤ.+ ၁၀ လၢစီၤယိၤသး အဖိခွါ လၢအမ့ၢ် အ့ဖရဲၣ် အဒူၣ်န့ၣ်+ စီၤဧးမံၤဟူး အဖိခွါ စီၤအလံၡမၤ ဒီးလၢစီၤယိၤသး အဖိခွါ မနၤၡ့ၤ အဒူၣ်န့ၣ် စီၤပဒၤစူၢ် အဖိခွါ စီၤကမၤလ့လးလီၤ. ၁၁ လၢဘံၣ်ယၤမံၣ် အဒူၣ်န့ၣ် စီၤကံးဒဧိနံၤ အဖိခွါ စီၤအဘံဒၣ်လီၤ.+ ၁၂ လၢဒၣ် အဒူၣ်န့ၣ် စီၤဧးမံၤၡးဒံၤ အဖိခွါ စီၤအဃံၤဧ့စ့ၢ်လီၤ.+ ၁၃ လၢစီၤအၤၡ့ၢ် အဒူၣ်န့ၣ် စီၤဧးကရၣ် အဖိခွါ စီၤပးကံၤအ့လးလီၤ.+ ၁၄ လၢကး အဒူၣ်န့ၣ် စီၤဒဧူၤအ့လး အဖိခွါ စီၤအ့လယၤစာ်လီၤ.+ ၁၅ လၢနးသၤလံ အဒူၣ်န့ၣ် စီၤဧ့နၣ် အဖိခွါ စီၤအဃံရၤလီၤ.+ ၁၆ ပှၤသ့ၣ်တဖၣ်အံၤ ဘၣ်တၢ်ဃုထၢထီၣ်အီၤလၢ တၢ်အိၣ်ဖှိၣ်အကျါလီၤ. အဝဲသ့ၣ်န့ၣ် မ့ၢ်ပှၤအဒူၣ် အခိၣ်အနၢ်တဖၣ်+ လၢအမ့ၢ် ပှၤအံၣ်စရ့လးဖိ အကထိတဖၣ် အခိၣ်အနၢ်တဖၣ်လီၤ.”+
၁၇ အဃိ စီၤမိၤၡ့ ဒီးစီၤအၤဟရိၣ် ကိးန့ၢ်ဝဲ ပှၤလၢ အဘၣ်တၢ်ဃုထၢအီၤ တဖၣ်အံၤလီၤ. ၁၈ ဒီးဖဲလါခံလါတလါ, လါထီၣ်တသီန့ၣ် အဝဲသ့ၣ် ကိးဖှိၣ်ဝဲ တၢ်အိၣ်ဖှိၣ် ဒီတဖု ဒ်သိး ကထၢ အံၣ်စရ့လးပိာ်ခွါလၢ အသးနံၣ်အိၣ် ၂၀ ဒီးဆူအဖီခိၣ် တဂၤစုာ်စုာ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိး,+ ၁၉ ဒ်ယဟိဝၤယွၤ မၤလိာ် စီၤမိၤၡ့ အသိးန့ၣ်လီၤ. အဃိ ဖဲစံၤနါအပှၢ်မုၢ်ကနၢ အပူၤန့ၣ် စီၤမိၤၡ့ထၢနုာ် အဝဲသ့ၣ် အမံၤလီၤ.+
၂၀ စီၤအံၣ်စရ့လး အဖိခွါဝဲၢ်ကိ စီၤရူၤဘ့ၣ် အစၢၤအသွဲၣ်တဖၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ်လၢ အကဲသုးသ့န့ၣ် ဘၣ်တၢ်ဂံၢ် အဝဲသ့ၣ် တဂၤစုာ်စုာ်လီၤ. ၂၁ အဃိ လၢရူၤဘ့ၣ်အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၄၆,၅၀၀ လီၤ.
၂၂ စီၤစူၤမ့းအိၣ် အစၢၤအသွဲၣ်တဖၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ် အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် တဂၤစုာ်စုာ်လီၤ. ၂၃ အဃိ လၢစူၤမ့းအိၣ် အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၅၉,၃၀၀ လီၤ.
၂၄ စီၤကး အစၢၤအသွဲၣ်တဖၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ်လၢ အကဲသုးသ့န့ၣ် ဘၣ်တၢ်ဂံၢ်အဝဲသ့ၣ် ၂၅ ဒီးလၢ ကးအဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၄၅,၆၅၀ လီၤ.
၂၆ စီၤယူဒၤ အစၢၤအသွဲၣ်တဖၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၂၇ ဒီးလၢ ယူဒၤအဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၇၄,၆၀၀ လီၤ.
၂၈ စီၤယံးစၣ်ကၢ် အစၢၤအသွဲၣ်တဖၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ် အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ်လၢ အကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၂၉ ဒီးလၢ ယံးစၣ်ကၢ် အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၅၄,၄၀၀ လီၤ.
၃၀ စီၤစဘူလိၣ် အစၢၤအသွဲၣ်တဖၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၃၁ ဒီးလၢ စဘူလိၣ်အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၅၇,၄၀၀ လီၤ.
၃၂ စီၤယိၤသး အစၢၤအသွဲၣ်တဖၣ် ခီဖျိ စီၤအ့ဖရဲၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၃၃ ဒီးလၢ အ့ဖရဲၣ် အဒူၣ်န့ၣ် ပှၤလၢ အမံၤဘၣ်တၢ် ထၢနုာ်အီၤန့ၣ် အိၣ်ဝဲအဂၤ ၄၀,၅၀၀ လီၤ.
၃၄ စီၤမနၤၡ့ၤ အစၢၤအသွဲၣ်တဖၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၃၅ ဒီးလၢမနၤၡ့ၤ အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၃၂,၂၀၀ လီၤ.
၃၆ စီၤဘံၣ်ယၤမံၣ် အစၢၤအသွဲၣ်တဖၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၃၇ ဒီးလၢ ဘံၣ်ယၤမံၣ် အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၃၅,၄၀၀ လီၤ.
၃၈ ဒီးစီၤဒၣ် အစၢၤအသွဲၣ်တဖၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၃၉ ဒီးလၢ ဒၣ်အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၆၂,၇၀၀ လီၤ.
၄၀ စီၤအၤၡ့ၢ် အစၢၤအသွဲၣ်တဖၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၄၁ ဒီးလၢ အၤၡ့ၢ် အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၄၁,၅၀၀ လီၤ.
၄၂ စီၤနးသၤလံ အစၢၤအသွဲၣ်တဖၣ်န့ၣ်+ ဘၣ်တၢ်ကွဲးနီၣ်ကွဲးဃါ အဝဲသ့ၣ်အမံၤ ဒ်အမံၤ, အဒူၣ် ဒီးအဒူၣ်ဖိထၢဖိ အိၣ်ဝဲအသိးလီၤ. ပှၤပိာ်ခွါကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ် လၢအကဲသုးသ့န့ၣ် ဘၣ်တၢ်ဂံၢ် အဝဲသ့ၣ် ၄၃ ဒီးလၢ နးသၤလံ အဒူၣ်န့ၣ် ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၅၃,၄၀၀ လီၤ.
၄၄ စီၤမိၤၡ့ ဃုာ်ဒီး စီၤအၤဟရိၣ် ဒီးပှၤအံၣ်စရ့လးဖိ အခိၣ်အနၢ် ၁၂ ဂၤလၢ အခၢၣ်စးဝဲ အနီၢ်ကစၢ် အဒူၣ် တဒူၣ်စုာ်စုာ်န့ၣ် ထၢနုာ်ဝဲ ပှၤသ့ၣ်တဖၣ်န့ၣ် အမံၤလီၤ. ၄၅ အံၣ်စရ့လးပိာ်ခွါ ကိးဂၤဒဲးလၢ အသးနံၣ်အိၣ် ၂၀ ဒီးဆူအဖီခိၣ်လၢ အကဲသုးသ့န့ၣ် ဘၣ်တၢ်ထၢနုာ်အမံၤ ဒ်အဒူၣ်ဖိထၢဖိ အိၣ်ဝဲအသိးလီၤ. ၄၆ ဒီးပှၤလၢ အမံၤဘၣ်တၢ် ထၢနုာ်အီၤန့ၣ် အိၣ်ဝဲခဲလၢာ်ခဲဆ့ အဂၤ ၆၀၃,၅၅၀ လီၤ.+
၄၇ မ့မ့ၢ် ပှၤလ့ၤဝံဖိတဖၣ်န့ၣ်+ တဘၣ်တၢ်ထၢနုာ် အဝဲသ့ၣ်အမံၤလၢ ပှၤတဖၣ်န့ၣ် အကျါဘၣ်.+ ၄၈ ယဟိဝၤယွၤ တဲစီၤမိၤၡ့လၢ ၄၉ “ပှၤလၢနတဘၣ် ထၢနုာ်အမံၤဘၣ်န့ၣ် အိၣ်ဒၣ်ထဲ ပှၤလ့ၤဝံဖိ တဒူၣ်လီၤ. နတဘၣ် ထၢနုာ် ပှၤလ့ၤဝံဖိတဖၣ် အနီၣ်ဂံၢ် လၢပှၤအံၣ်စရ့လးဖိ အဂၤတဖၣ် အနီၣ်ဂံၢ် အကျါဘၣ်.+ ၅၀ ဒီးနကဘၣ် ပာ်ထီၣ် ပှၤလ့ၤဝံဖိတဖၣ်လၢ ကအံးထွဲကွၢ်ထွဲဝဲ ဒဲစီဆှံလၢ အအိၣ်ဒီး တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်+ ဒီးဒဲစီဆှံ အတၢ်ပီးတၢ်လီတဖၣ် ခဲလၢာ်လီၤ.+ ဒီးအဝဲသ့ၣ် ကလဲၤစိာ်ဒဲစီဆှံ ဒီးအတၢ်ပီးတၢ်လီခဲလၢာ်လီၤ.+ ဒီးအဝဲသ့ၣ် ကမၤတၢ် ဖဲဒဲစီဆှံ+ ဒီးအဝဲသ့ၣ် ကသူၣ်ထီၣ်အဒဲတဖၣ် ဝးတရံး ဒဲစီဆှံလီၤ.+ ၅၁ ဖဲပှၤကဘၣ်သုး ဒဲစီဆှံ တဘျီဂ့ၤတဘျီဂ့ၤန့ၣ် ပှၤလ့ၤဝံဖိတဖၣ် ကဘၣ်ဃဲၣ်လီၤအီၤ+ ဒီးဖဲပှၤကဆီလီၤ ကဒီးက့ၤ ဒဲစီဆှံအခါန့ၣ် ပှၤလ့ၤဝံဖိတဖၣ် ကဘၣ် ဆီလီၤအီၤလီၤ. ပှၤလၢ အတအိၣ်ဒီး တၢ်ခွဲးတၢ်ယာ်ဘၣ်* မ့ၢ်လဲၤဘူးဒီး တၢ်စီဆှံအလီၢ်န့ၣ် ကဘၣ်တၢ်မၤသံအီၤလီၤ.+
၅၂ “ပှၤအံၣ်စရ့လးဖိ တဂၤစုာ်စုာ် ကဘၣ်သူၣ်ထီၣ်အဒဲ ဖဲတၢ်လီၢ်လၢ အဘၣ်တၢ်ပာ်ပနီၣ်န့ၢ်အီၤ ဒ်အသုးက့ အိၣ်ဝဲအသိး, ပှၤသၢဒူၣ်တတီၤ သၢဒူၣ်တတီၤလီၤ.+ ၅၃ ဒီးပှၤလ့ၤဝံဖိတဖၣ် ကဘၣ်သူၣ်ထီၣ် အဒဲတဖၣ် ဝးတရံး ဒဲစီဆှံလၢ အအိၣ်ဒီး တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ် ဒ်သိး ယတၢ်သးဒိၣ်ထီၣ် သုတဘၣ် ပှၤအံၣ်စရ့လးဖိ တဂ့ၤအဂီၢ်လီၤ.+ ဒီးပှၤလ့ၤဝံတဖၣ် အိၣ်ဒီးမူဒါလၢ ကအံးထွဲကွၢ်ထွဲဝဲ ဒဲစီဆှံလၢ အအိၣ်ဒီး တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်လီၤ.”+
၅၄ ဒီးပှၤအံၣ်စရ့လးဖိတဖၣ် မၤဝဲ ဒ်ယဟိဝၤယွၤ မၤလိာ်ပာ်စၢၤ စီၤမိၤၡ့အသိး ခဲလၢာ်လီၤ. အဝဲသ့ၣ် မၤထွဲဝဲ လီၤတံၢ်လီၤဆဲးလီၤ.
၂ ယဟိဝၤယွၤတဲ စီၤမိၤၡ့ ဒီးစီၤအၤဟရိၣ်လၢ ၂ “ဒ်ပှၤအံၣ်စရ့လးဖိ ဘၣ်တၢ်ပာ်ပနီၣ်န့ၢ် အတၢ်လီၢ် ပှၤသၢဒူၣ်တတီၤ သၢဒူၣ်တတီၤအသိး+ ပှၤအံၣ်စရ့လးဖိ တဂၤစုာ်စုာ် ကဘၣ်သူၣ်ထီၣ်အဒဲ ဘူးဒီးအဒူၣ်ဖိထၢဖိ အတၢ်ပနီၣ်လီၤ. ဒီးအဝဲသ့ၣ် ကဘၣ်သူၣ်ထီၣ် အဒဲတဖၣ် ဝးတရံး တၢ်အိၣ်ဖှိၣ်အဒဲလီၤ.
၃ “ပှၤသၢဒူၣ် ကသူၣ်ထီၣ် အဒဲတဖၣ် လၢမုၢ်ထီၣ်တခီ ဒ်အသုးက့တဖၣ် အိၣ်ဝဲအသိး ဒီးလၢအဝဲသ့ၣ် အသုးမုၢ်သံၣ်ဘိ တဖၣ် အကျါယူဒၤ အဒူၣ် ကတီခိၣ်ရိၤမဲ ဝဲလီၤ. ဒီးစီၤယူဒၤ အစၢၤအသွဲၣ်တဖၣ် အခိၣ်အနၢ် တဂၤန့ၣ် မ့ၢ်ဝဲ စီၤဧမံၤနဒး အဖိခွါ စီၤနးၡိၣ်လီၤ.+ ၄ ဒီးပှၤလၢ အမံၤ ဘၣ်တၢ်ထၢနုာ်အီၤလၢ ယူဒၤ အသုးမုၢ်ကျါန့ၣ် အိၣ်ဝဲအဂၤ ၇၄,၆၀၀ လီၤ.+ ၅ လၢယူဒၤ အဒူၣ် အကပၤန့ၣ် ယံးစၣ်ကၢ် အဒူၣ် ကသူၣ်ထီၣ် အဒဲတဖၣ်လီၤ. စီၤယံးစၣ်ကၢ် အစၢၤအသွဲၣ်တဖၣ် အခိၣ်အနၢ် တဂၤန့ၣ် မ့ၢ်ဝဲ စီၤစူဧၢ်အဖိခွါ စီၤနၤသန့လးလီၤ.+ ၆ ဒီးပှၤလၢအမံၤ ဘၣ်တၢ်ထၢနုာ်အီၤလၢ ယံးစၣ်ကၢ် အသုးမုၢ်ကျါန့ၣ် အိၣ်ဝဲ အဂၤ ၅၄,၄၀၀ လီၤ.+ ၇ မ့မ့ၢ်လၢ ယူဒၤအဒူၣ် အဝဲတကပၤန့ၣ် မ့ၢ်ဝဲ စဘူလိၣ် အဒူၣ်လီၤ. စီၤစဘူလိၣ် အစၢၤအသွဲၣ်တဖၣ် အခိၣ်အနၢ်တဂၤန့ၣ် မ့ၢ်ဝဲ စီၤဃ့လူၣ် အဖိခွါ စီၤအလံအာ်လီၤ.+ ၈ ဒီးပှၤလၢအမံၤ ဘၣ်တၢ်ထၢနုာ်အီၤလၢ စဘူလိၣ် အသုးမုၢ်ကျါန့ၣ် အိၣ်ဝဲအဂၤ ၅၇,၄၀၀ လီၤ.+
၉ “အဃိ သုးမုၢ်သံၣ်ဘိလၢ အမံၤဘၣ်တၢ်ထၢနုာ်အီၤ လၢယူဒၤအဒူၣ် တီခိၣ်ရိၤမဲဝဲန့ၣ် အိၣ်ဝဲခဲလၢာ်ခဲဆ့ အဂၤ ၁၈၆,၄၀၀ လီၤ. အဝဲသ့ၣ် ကဘၣ်မ့ၢ် ပှၤလၢ အဟးထီၣ် အဆိကတၢၢ်တဖုလီၤ.+
၁၀ “ပှၤသၢဒူၣ် ကဘၣ်သူၣ်ထီၣ် အဒဲတဖၣ်လၢ ကလံၤထံးတခီ ဒ်အသုးက့တဖၣ် အိၣ်ဝဲအသိးလီၤ. ဒီးလၢ အဝဲသ့ၣ် အသုးမုၢ်သံၣ်ဘိတဖၣ် အကျါ ရူၤဘ့ၣ်အဒူၣ်+ ကတီခိၣ်ရိၤမဲဝဲလီၤ. စီၤရူၤဘ့ၣ် အစၢၤအသွဲၣ်တဖၣ် အခိၣ်အနၢ်တဂၤန့ၣ် မ့ၢ်ဝဲ စီၤၡဒ့အူၢ် အဖိခွါ စီၤအလံစူၢ်လီၤ.+ ၁၁ ဒီးပှၤလၢအမံၤ ဘၣ်တၢ်ထၢနုာ်အီၤလၢ ရူၤဘ့ၣ် အသုးမုၢ်ကျါန့ၣ် အိၣ်ဝဲအဂၤ ၄၆,၅၀၀ လီၤ.+ ၁၂ လၢရူၤဘ့ၣ် အဒူၣ်အကပၤန့ၣ် စူၤမ့းအိၣ်အဒူၣ် ကသူၣ်ထီၣ် အဒဲတဖၣ်လီၤ. စီၤစူၤမ့းအိၣ် အစၢၤအသွဲၣ်တဖၣ် အခိၣ်အနၢ်တဂၤန့ၣ် မ့ၢ်ဝဲ စီၤစူၤရံၡးဒံၤ အဖိခွါ စီၤၡလူမံၤအ့လးလီၤ.+ ၁၃ ပှၤလၢ အမံၤ ဘၣ်တၢ်ထၢနုာ်အီၤ လၢစီၤစူၤမ့းအိၣ် အသုးမုၢ်ကျါန့ၣ် အိၣ်ဝဲအဂၤ ၅၉,၃၀၀ လီၤ.+ ၁၄ မ့မ့ၢ်လၢ ရူၤဘ့ၣ်အဒူၣ် အဝဲတကပၤန့ၣ် မ့ၢ်ဝဲ ကးအဒူၣ်လီၤ. စီၤကး အစၢၤအသွဲၣ်တဖၣ် အခိၣ်အနၢ်တဂၤန့ၣ် မ့ၢ်ဝဲ စီၤရဧူၤအ့လး အဖိခွါ စီၤအ့လယၤစာ်လီၤ.+ ၁၅ ဒီးပှၤလၢအမံၤ ဘၣ်တၢ်ထၢနုာ်အီၤ လၢကး အသုးမုၢ်ကျါန့ၣ် အိၣ်ဝဲအဂၤ ၄၅,၆၅၀ လီၤ.+
၁၆ “အဃိ သုးမုၢ်သံၣ်ဘိလၢ အမံၤဘၣ်တၢ်ထၢနုာ်အီၤ လၢရူၤဘ့ၣ်အဒူၣ် တီခိၣ်ရိၤမဲဝဲန့ၣ် အိၣ်ဝဲခဲလၢာ်ခဲဆ့ အဂၤ ၁၅၁,၄၅၀ လီၤ. အဝဲသ့ၣ် ကဘၣ်မ့ၢ်ပှၤလၢ အဟးထီၣ် ခံဖုတဖုလီၤ.+
၁၇ “ဖဲတၢ်အိၣ်ဖှိၣ်အဒဲ ကဘၣ်တၢ်သုးအီၤအခါ+ ပှၤလ့ၤဝံဖိတဖၣ်န့ၣ် ကဘၣ်အိၣ်လၢ ပှၤအဖုလၢ အဂၤတဖၣ် အခၢၣ်သးလီၤ.
“ပှၤအဒူၣ် တဒူၣ်စုာ်စုာ် ကဘၣ်လဲၤတၢ် လၢအလီၢ်ဒၣ်ဝဲ ဒ်တၢ်ပာ်ပနီၣ်န့ၢ် အဝဲသ့ၣ် အလီၢ်လၢ ကသူၣ်ထီၣ် အဒဲ,+ ပှၤသၢဒူၣ်တတီၤ သၢဒူၣ်တတီၤ အိၣ်ဝဲအသိးလီၤ.
၁၈ “ပှၤသၢဒူၣ် ကဘၣ်သူၣ်ထီၣ် အဒဲတဖၣ်လၢ မုၢ်နုာ်တခီ ဒ်အသုးက့တဖၣ် အိၣ်ဝဲ အသိးလီၤ. ဒီးလၢ အဝဲသ့ၣ် အသုးမုၢ်သံၣ်ဘိတဖၣ် အကျါ အ့ဖရဲၣ် အဒူၣ် ကတီခိၣ်ရိၤမဲဝဲလီၤ. စီၤအ့ဖရဲၣ် အစၢၤအသွဲၣ်တဖၣ် အခိၣ်အနၢ် တဂၤန့ၣ် မ့ၢ်ဝဲ စီၤဧးမံၤဟူး အဖိခွါ စီၤအလံၡမၤလီၤ.+ ၁၉ ဒီးပှၤလၢအမံၤ ဘၣ်တၢ်ထၢနုာ်အီၤ လၢအ့ဖရဲၣ် အသုးမုၢ်ကျါန့ၣ် အိၣ်ဝဲ အဂၤ ၄၀,၅၀၀ လီၤ.+ ၂၀ လၢစီၤအ့ဖရဲၣ် အဒူၣ်အကပၤန့ၣ် မနၤၡ့ၤ အဒူၣ် ကသူၣ်ထီၣ် အဒဲတဖၣ်လီၤ.+ စီၤမနၤၡ့ၤ အစၢၤအသွဲၣ်တဖၣ် အခိၣ်အနၢ်တဂၤန့ၣ် မ့ၢ်ဝဲ စီၤပဒၤစူၢ် အဖိခွါ စီၤကမၤလ့လးလီၤ.+ ၂၁ ဒီးပှၤလၢအမံၤ ဘၣ်တၢ်ထၢနုာ်အီၤ လၢမနၤၡ့ၤ အသုးမုၢ်ကျါန့ၣ် အိၣ်ဝဲအဂၤ ၃၂,၂၀၀ လီၤ.+ ၂၂ မ့မ့ၢ်လၢ အ့ဖရဲၣ်အဒူၣ် အဝဲတကပၤန့ၣ် မ့ၢ်ဝဲ ဘံၣ်ယၤမံၣ် အဒူၣ်လီၤ. စီၤဘံၣ်ယၤမံၣ် အစၢၤအသွဲၣ်တဖၣ် အခိၣ်အနၢ်တဂၤန့ၣ် မ့ၢ်ဝဲ စီၤကံးဒဧိနံၤ အဖိခွါ စီၤအဘံဒၣ်လီၤ.+ ၂၃ ဒီးပှၤလၢအမံၤ ဘၣ်တၢ်ထၢနုာ်အီၤလၢ ဘံၣ်ယၤမံၣ် အသုးမုၢ်ကျါန့ၣ် အိၣ်ဝဲအဂၤ ၃၅,၄၀၀ လီၤ.+
၂၄ “အဃိ သုးမုၢ်သံၣ်ဘိလၢ အမံၤဘၣ်တၢ်ထၢနုာ်အီၤ လၢအ့ဖရဲၣ်အဒူၣ် တီခိၣ်ရိၤမဲဝဲန့ၣ် အိၣ်ဝဲခဲလၢာ်ခဲဆ့ အဂၤ ၁၀၈,၁၀၀ လီၤ. အဝဲသ့ၣ် ကဘၣ်မ့ၢ်ပှၤလၢ အဟးထီၣ် သၢဖုတဖုလီၤ.+
၂၅ “ပှၤသၢဒူၣ် ကဘၣ်သူၣ်ထီၣ် အဒဲတဖၣ်လၢ ကလံၤစိးတခီ ဒ်အသုးက့ အိၣ်ဝဲအသိးလီၤ. ဒီးလၢအဝဲသ့ၣ် အသုးမုၢ်သံၣ်ဘိတဖၣ် အကျါ ဒၣ်အဒူၣ် ကတီခိၣ်ရိၤမဲဝဲလီၤ. စီၤဒၣ် အစၢၤအသွဲၣ်တဖၣ် အခိၣ်အနၢ်တဂၤန့ၣ် မ့ၢ်ဝဲ စီၤဧးမံၤၡးဒံၤ အဖိခွါ စီၤအဃံၤဧ့စ့ၢ်လီၤ.+ ၂၆ ဒီးပှၤလၢအမံၤ ဘၣ်တၢ်ထၢနုာ်အီၤလၢ ဒၣ်အသုးမုၢ်ကျါန့ၣ် အိၣ်ဝဲအဂၤ ၆၂,၇၀၀ လီၤ.+ ၂၇ လၢဒၣ် အဒူၣ်အကပၤန့ၣ် အၤၡ့ၢ်အဒူၣ် ကသူၣ်ထီၣ် အဒဲတဖၣ်လီၤ. စီၤအၤၡ့ၢ် အစၢၤအသွဲၣ်တဖၣ် အခိၣ်အနၢ် တဂၤန့ၣ် မ့ၢ်ဝဲ စီၤဧးကရၣ် အဖိခွါ စီၤပးကံၤအ့လးလီၤ.+ ၂၈ ဒီးပှၤလၢအမံၤ ဘၣ်တၢ်ထၢနုာ်အီၤ လၢအၤၡ့ၢ် အသုးမုၢ်ကျါန့ၣ် အိၣ်ဝဲအဂၤ ၄၁,၅၀၀ လီၤ.+ ၂၉ မ့မ့ၢ် လၢဒၣ်အဒူၣ် အဝဲတကပၤန့ၣ် မ့ၢ်ဝဲ နးသၤလံ အဒူၣ်လီၤ. စီၤနးသၤလံ အစၢၤအသွဲၣ်တဖၣ် အခိၣ်အနၢ်တဂၤန့ၣ် မ့ၢ်ဝဲ စီၤဧ့နၣ် အဖိခွါ စီၤအဃံရၤလီၤ.+ ၃၀ ဒီးပှၤလၢအမံၤ ဘၣ်တၢ်ထၢနုာ်အီၤ လၢနးသၤလံ အသုးမုၢ်ကျါန့ၣ် အိၣ်ဝဲအဂၤ ၅၃,၄၀၀ လီၤ.+
၃၁ “အဃိ သုးမုၢ်သံၣ်ဘိလၢ အမံၤဘၣ်တၢ် ထၢနုာ်အီၤ လၢဒၣ်အဒူၣ် တီခိၣ်ရိၤမဲဝဲန့ၣ် အိၣ်ဝဲ ခဲလၢာ်ခဲဆ့ အဂၤ ၁၅၇,၆၀၀ လီၤ. အဝဲသ့ၣ် ကဘၣ်မ့ၢ်ပှၤလၢ အဟးထီၣ် အလီၢ်ခံကတၢၢ်+ ဒ်ပှၤအံၣ်စရ့လးဖိ ဘၣ်တၢ်နီၤဖးအီၤ သၢဒူၣ်တတီၤ သၢဒူၣ်တတီၤ အသိးလီၤ.”
၃၂ ပှၤတဖၣ်န့ၣ် မ့ၢ်ပှၤအံၣ်စရ့လးဖိလၢ အမံၤဘၣ်တၢ်ထၢနုာ်အီၤ ဒ်အဒူၣ်ဖိထၢဖိ အိၣ်ဝဲအသိးန့ၣ်လီၤ. အဃိ လၢဒဲကဝီၤအပူၤန့ၣ် ပှၤကိးဂၤဒဲးလၢ အမံၤဘၣ် တၢ်ထၢနုာ်အီၤ လၢကကဲသုးအဂီၢ်န့ၣ် အိၣ်ဝဲခဲလၢာ်ခဲဆ့ အဂၤ ၆၀၃,၅၅၀ လီၤ.+ ၃၃ ဘၣ်ဆၣ် ဒ်ယဟိဝၤယွၤ မၤလိာ် စီၤမိၤၡ့အသိး မ့မ့ၢ်ပှၤလ့ၤဝံဖိတဖၣ်န့ၣ် တဘၣ်တၢ်ထၢနုာ် အဝဲသ့ၣ် အမံၤလၢ+ ပှၤအံၣ်စရ့လးဖိ အဂၤတဖၣ် အကျါဘၣ်.+ ၃၄ အဃိ ပှၤအံၣ်စရ့လးဖိတဖၣ် မၤဝဲ ဒ်ယဟိဝၤယွၤ မၤလိာ် စီၤမိၤၡ့အသိး ခဲလၢာ်လီၤ. ဒ်တၢ်ပာ်ဖျါထီၣ်အီၤ လၢထးအသိး အဝဲသ့ၣ်သူၣ်ထီၣ် အဒဲတဖၣ် သၢဒူၣ်တတီၤ သၢဒူၣ်တတီၤ+ ဒီးအဝဲသ့ၣ် ဟးထီၣ်ဝဲ+ ဒ်အဒူၣ် ဒီးအဒူၣ်ဖိထၢဖိ အိၣ်ဝဲအသိးန့ၣ်လီၤ.
၃ အဝဲအံၤမ့ၢ် စီၤအၤဟရိၣ် ဒီးစီၤမိၤၡ့ အစၢၤအသွဲၣ်တဖၣ် ဖဲမုၢ်နံၤလၢ ယဟိဝၤယွၤ တဲတၢ်ဒီး စီၤမိၤၡ့ လၢကစၢၢ်စံၤနါ အလိၤအခါလီၤ.+ ၂ စီၤအၤဟရိၣ် အဖိခွါတဖၣ် အမံၤမ့ၢ်ဝဲ ဒ်အံၤလီၤ. အဖိခွါဝဲၢ်ကိ အမံၤမ့ၢ်ဝဲ စီၤနၤဒး ဝံၤဒီး စီၤအဘံဟူၤ,+ စီၤအလၤဧစၢ်+ ဒီးစီၤအံသမၢ်လီၤ.+ ၃ အဝဲန့ၣ်မ့ၢ် စီၤအၤဟရိၣ် အဖိခွါတဖၣ် အမံၤလီၤ. အဝဲသ့ၣ်မ့ၢ် ပှၤလုၢ်တၢ်ဒိၣ်လၢ ဘၣ်တၢ်ဒိးဖှူအီၤတဖၣ် ဒီးဘၣ်တၢ်ပာ်ထီၣ် အဝဲသ့ၣ် ဒ်သိး ကမၤတၢ်ဒ် ပှၤလုၢ်တၢ်ဒိၣ်တဖၣ် အဂီၢ်လီၤ.+ ၄ ဘၣ်ဆၣ် ဖဲစီၤနၤဒး ဒီးစီၤအဘံဟူၤ လုၢ်ထီၣ်မ့ၣ်အူလၢ အတလီၤပလိာ်ဒီး တၢ်သိၣ်တၢ်သီဘၣ် လၢယဟိဝၤယွၤ အမဲာ်ညါအခါ+ အဝဲသ့ၣ်သံဝဲလၢ ယဟိဝၤယွၤ အမဲာ်ညါလၢ စံၤနါအပှၢ်မုၢ်ကနၢ အပူၤလီၤ. အဝဲသ့ၣ်န့ၣ် အဖိခွါတအိၣ် နီတဂၤဘၣ်. ဘၣ်ဆၣ် စီၤအလၤဧစၢ်+ ဒီးစီၤအံသမၢ်န့ၣ်+ ဆဲးမၤတၢ်ဒ် ပှၤလုၢ်တၢ်ဒိၣ်တဖၣ် ဃုာ်ဒီးအပၢ် စီၤအၤဟရိၣ်လီၤ.
၅ ယဟိဝၤယွၤတဲစီၤမိၤၡ့လၢ ၆ “ဟဲကိး လ့ၤဝံအဒူၣ်+ ဒီးမၢအဝဲသ့ၣ် ဆၢထၢၣ်လၢ ပှၤလုၢ်တၢ်ဒိၣ် စီၤအၤဟရိၣ် အမဲာ်ညါတက့ၢ်. ဒီးအဝဲသ့ၣ် ကဘၣ် မၤစၢၤအီၤလီၤ.+ ၇ အဝဲသ့ၣ် ကဘၣ်မၤလၢပှဲၤ အမူဒါလၢ ကမၤစၢၤအီၤအဂီၢ် ဒီးကဘၣ်မၤလၢပှဲၤ အမူဒါလၢ ပှၤဂီၢ်မုၢ်ခဲလၢာ်အဂီၢ် လၢတၢ်အိၣ်ဖှိၣ် အဒဲအမဲာ်ညါ ခီဖျိလၢ အဝဲသ့ၣ် မၤတၢ်မၤလၢ အဘၣ်ထွဲဒီး ဒဲစီဆှံန့ၣ်လီၤ. ၈ အဝဲသ့ၣ် ကဘၣ် အံးထွဲကွၢ်ထွဲ တၢ်အိၣ်ဖှိၣ်အဒဲ အတၢ်ပီးတၢ်လီ ခဲလၢာ်+ ဒီးကဘၣ်မၤလၢပှဲၤ အမူဒါလၢ ပှၤအံၣ်စရ့လးဖိအလီၢ် ခီဖျိလၢ အဝဲသ့ၣ်မၤအတၢ်မၤလၢ အဘၣ်ဃးဒီး ဒဲစီဆှံလီၤ.+ ၉ နကဘၣ်ဟ့ၣ်လီၤ ပှၤလ့ၤဝံဖိတဖၣ် လၢစီၤအၤဟရိၣ် ဒီးအဖိခွါတဖၣ် အအိၣ်လီၤ. လၢပှၤအံၣ်စရ့လးဖိအကျါန့ၣ် အဝဲသ့ၣ်မ့ၢ် ပှၤဘၣ်တၢ်ဃုထၢထီၣ်အီၤတဖၣ်လၢ အဘၣ်တၢ်ဟ့ၣ်လီၤ စီၤအၤဟရိၣ်လီၤ.+ ၁၀ နကဘၣ်ပာ်ထီၣ် စီၤအၤဟရိၣ် ဒီးအဖိခွါတဖၣ် ဒီးအဝဲသ့ၣ် ကဘၣ်မၤလၢပှဲၤ ပှၤလုၢ်တၢ်ဒိၣ် အမူဒါလီၤ.+ ဒီးပှၤလၢ အတအိၣ်ဒီး တၢ်ခွဲးတၢ်ယာ်ဘၣ်* လၢအလဲၤဘူးဒီး တၢ်စီဆှံအလီၢ်န့ၣ် ကဘၣ်တၢ်မၤသံအီၤလီၤ.”+
၁၁ ယဟိဝၤယွၤ ဆဲးတဲ စီၤမိၤၡ့လၢ ၁၂ “မ့မ့ၢ်ယၤန့ၣ် ယဟံးန့ၢ် ပှၤလ့ၤဝံဖိတဖၣ်လၢ ပှၤအံၣ်စရ့လးဖိ အဖိဝဲၢ်ကိခဲလၢာ် အလီၢ်လီၤ.+ ဒီးပှၤလ့ၤဝံဖိတဖၣ်န့ၣ် ကကဲထီၣ် ယတၢ်လီၤ. ၁၃ နီၢ်ကီၢ်န့ၣ် တၢ်အဝဲၢ်ကိခဲလၢာ် ကဲယတၢ်လီၤ.+ မုၢ်နံၤလၢ ယမၤသံ တၢ်အဝဲၢ်ကိ ခဲလၢာ်လၢ ကီၢ်အဲၤကူပတူးန့ၣ်+ ယပာ်စီဆှံ ပှၤအံၣ်စရ့လးဖိ အဖိဝဲၢ်ကိ ခဲလၢာ် ဒီးအဆၣ်ဖိကီၢ်ဖိ အဖိဝဲၢ်ကိ ခဲလၢာ် လၢယဂီၢ်လီၤ.+ အဝဲသ့ၣ် ခဲလၢာ် ကဘၣ်ကဲထီၣ် ယတၢ်လီၤ. ယမ့ၢ် ယဟိဝၤယွၤလီၤ.”
၁၄ ယဟိဝၤယွၤ ဆဲးတဲတၢ်ဒီး စီၤမိၤၡ့လၢ စံၤနါအပှၢ်မုၢ်ကနၢအပူၤ+ ဒီးတဲဝဲလၢ ၁၅ “ထၢ ပှၤလ့ၤဝံဖိတဖၣ် အမံၤ ဒ်အဒူၣ်ဖိထၢဖိ ဒီးအဒူၣ် အိၣ်ဝဲအသိးတက့ၢ်. နကဘၣ်ထၢ ကယဲၢ်ပှၤပိာ်ခွါ လၢအသးနံၣ် အိၣ်တလါ ဒီးဆူအဖီခိၣ် အမံၤလီၤ.”+ ၁၆ အဃိ စီၤမိၤၡ့ ထၢအဝဲသ့ၣ် အမံၤ ဒ်ယဟိဝၤယွၤ မၤလိာ်ဝဲ အသိးလီၤ. ၁၇ စီၤလ့ၤဝံ အဖိခွါတဖၣ် အမံၤမ့ၢ်ဝဲ စီၤက့ရၡိၣ်, စီၤကဃး ဒီးစီၤမရၤရံၤလီၤ.+
၁၈ စီၤက့ရၡိၣ် အဖိခွါတဖၣ်န့ၣ် မ့ၢ်စီၤလံးဘနံၤ ဒီးစီၤၡံမံၤ ဒ်အဝဲသ့ၣ် အဒူၣ်ဖိထၢဖိတဖၣ် အိၣ်ဝဲအသိးလီၤ.+
၁၉ စီၤကဃး အဖိခွါတဖၣ်န့ၣ် မ့ၢ်စီၤဧၤမရၣ်, စီၤယံးစဟၢ်, စီၤဃ့ဘြိၣ် ဒီးစီၤဧူးစံၤအ့လး ဒ်အဝဲသ့ၣ် အဒူၣ်ဖိထၢဖိတဖၣ် အိၣ်ဝဲအသိးလီၤ.+
၂၀ စီၤမရၤရံၤ အဖိခွါတဖၣ် မ့ၢ်စီၤမးဃလံ+ ဒီးစီၤမူၡံၤ+ ဒ်အဝဲသ့ၣ် အဒူၣ်ဖိထၢဖိတဖၣ် အိၣ်ဝဲအသိးလီၤ.
ပှၤတဖၣ်န့ၣ် မ့ၢ်ပှၤလ့ၤဝံဖိ အဒူၣ်ဖိထၢဖိတဖၣ် ဒ်အဝဲသ့ၣ် အဒူၣ်အိၣ်ဝဲအသိးလီၤ.
၂၁ ပှၤလံးဘနံၤဖိ အဒူၣ်ဖိထၢဖိ+ ဒီးပှၤၡံမံၤဖိ အဒူၣ်ဖိထၢဖိန့ၣ် ဟဲလီၤစၢၤလၢ စီၤက့ရၡိၣ်လီၤ. အဝဲသ့ၣ်န့ၣ် ကဲထီၣ် ပှၤက့ရၡိၣ်ဖိ အဒူၣ်ဖိထၢဖိတဖၣ်လီၤ. ၂၂ ပှၤပိာ်ခွါလၢ အသးနံၣ်အိၣ် တလါ ဒီးဆူအဖီခိၣ်န့ၣ် အမံၤဘၣ်တၢ်ထၢအီၤ ခဲလၢာ်ခဲဆ့အိၣ်ဝဲအဂၤ ၇,၅၀၀ လီၤ.+ ၂၃ ပှၤက့ရၡိၣ်ဖိ အဒူၣ်ဖိထၢဖိတဖၣ်န့ၣ် သူၣ်လီၤအဒဲလၢ ဒဲစီဆှံ အလီၢ်ခံ+ လၢမုၢ်နုာ် တခီလီၤ. ၂၄ ပှၤက့ရၡိၣ်ဖိ အဒူၣ်ဖိထၢဖိ အခိၣ်အနၢ်န့ၣ် မ့ၢ်ဝဲ စီၤလၤအ့လး အဖိခွါ စီၤအ့လယၤစာ်လီၤ. ၂၅ စီၤက့ရၡိၣ် အစၢၤအသွဲၣ်တဖၣ်န့ၣ် အိၣ်ဒီးမူဒါလၢ+ တၢ်အိၣ်ဖှိၣ်အဒဲပူၤ လၢကကွၢ်ထွဲဝဲ ဒဲစီဆှံ+ ဒီးအတၢ်ကျၢၢ်ဘၢတဖၣ်,+ တၢ်ကံးညာ်လၢ+ တၢ်အိၣ်ဖှိၣ်အဒဲ အတၢ်နုာ်လီၤအလီၢ်အဂီၢ်, ၂၆ တၢ်ကံးညာ်တဖၣ်လၢ အကရၢၢ်ဃာ်တၢ်ပျီ,+ တၢ်ကံးညာ်လၢ+ တၢ်နုာ်လီၤအလီၢ် လၢပှၤကနုာ်လီၤ ဆူတၢ်ပျီအံၤလၢ အအိၣ်ဒီး ဒဲစီဆှံ ဒီးတၢ်လုၢ်လီၢ်, ဒဲအပျံၤတဖၣ် ဒီးတၢ်မၤခဲလၢာ်လၢ အဘၣ်ဃးဒီး တၢ်သ့ၣ်တဖၣ်န့ၣ်လီၤ.
၂၇ ပှၤဧၤမရၣ်ဖိ အဒူၣ်ဖိထၢဖိ, ပှၤယံးစဟၢ်ဖိ အဒူၣ်ဖိထၢဖိ, ပှၤဃ့ဘြိၣ်ဖိ အဒူၣ်ဖိထၢဖိ ဒီးပှၤဧူးစံၤအ့လးဖိ အဒူၣ်ဖိထၢဖိန့ၣ် ဟဲလီၤစၢၤဝဲလၢ စီၤကဃးလီၤ. အဝဲသ့ၣ်န့ၣ် ကဲထီၣ် ပှၤကဃးဖိ အဒူၣ်ဖိထၢဖိတဖၣ်လီၤ.+ ၂၈ ပှၤပိာ်ခွါလၢ အသးနံၣ်အိၣ် တလါ ဒီးဆူအဖီခိၣ်န့ၣ် ခဲလၢာ်ခဲဆ့ အိၣ်ဝဲအဂၤ ၈,၆၀၀ လီၤ. အဝဲသ့ၣ် အိၣ်ဒီးမူဒါလၢ ကကွၢ်ထွဲဝဲ တၢ်စီဆှံအလီၢ်လီၤ.+ ၂၉ ပှၤကဃးဖိ အဒူၣ်ဖိထၢဖိတဖၣ်န့ၣ် သူၣ်လီၤအဒဲလၢ ဒဲစီဆှံ အကလံၤထံး တခီလီၤ.+ ၃၀ ပှၤကဃးဖိ အဒူၣ်ဖိထၢဖိတဖၣ် အခိၣ်အနၢ်န့ၣ် မ့ၢ်ဝဲ စီၤဧူးစံၤအ့လး အဖိခွါ စီၤအလံစဖၣ်လီၤ.+ ၃၁ အဝဲသ့ၣ် အမူဒါ အိၣ်ဝဲလၢ ကကွၢ်ထွဲဝဲ တလါစီဆှံ,+ စီၢ်နီၤခိၣ်,+ မ့ၣ်အူဒၢ,+ တၢ်လုၢ်လီၢ်တဖၣ်,+ တၢ်ပီးတၢ်လီတဖၣ်လၢ+ အဘၣ်တၢ်သူအီၤလၢ ကမၤတၢ်လၢ တၢ်စီဆှံအလီၢ်, ယၣ်ဘျးသဒၢ+ ဒီးတၢ်မၤခဲလၢာ် လၢအဘၣ်ဃးဒီး တၢ်သ့ၣ်တဖၣ်န့ၣ်လီၤ.+
၃၂ ပှၤလ့ၤဝံဖိ အခိၣ်အဒိၣ်ကတၢၢ်န့ၣ် မ့ၢ်ဝဲ ပှၤလုၢ်တၢ်ဒိၣ် စီၤအၤဟရိၣ် အဖိခွါ စီၤအလၤဧစၢ်လီၤ.+ အဝဲမ့ၢ် ပှၤလၢအတီခိၣ်ရိၤမဲ ပှၤလၢအအိၣ်ဒီး မူဒါတဖၣ်လၢ တၢ်စီဆှံအလီၢ်လီၤ.
၃၃ ပှၤမးဃလံဖိ အဒူၣ်ဖိထၢဖိတဖၣ် ဒီးပှၤမူၡံၤဖိ အဒူၣ်ဖိထၢဖိတဖၣ်န့ၣ် ဟဲလီၤစၢၤလၢ စီၤမရၤရံၤလီၤ. အဝဲသ့ၣ်န့ၣ် ကဲထီၣ် ပှၤမရၤရံၤဖိ အဒူၣ်ဖိထၢဖိတဖၣ်လီၤ.+ ၃၄ ပှၤပိာ်ခွါလၢ အသးနံၣ်အိၣ် တလါ ဒီးဆူအဖီခိၣ်န့ၣ် အမံၤဘၣ်တၢ်ထၢအီၤ ခဲလၢာ်ခဲဆ့ အိၣ်ဝဲအဂၤ ၆,၂၀၀ လီၤ.+ ၃၅ ပှၤမရၤရံၤဖိ အဒူၣ်ဖိထၢဖိတဖၣ် အခိၣ်အနၢ်န့ၣ် မ့ၢ်ဝဲ စီၤအဘံဃယ့းလး အဖိခွါ စီၤစူရံၤအ့လးလီၤ. အဝဲသ့ၣ်န့ၣ် သူၣ်လီၤအဒဲလၢ ဒဲစီဆှံ အကလံၤစိးတခီလီၤ.+ ၃၆ ဒီးစီၤမရၤရံၤ အစၢၤအသွဲၣ်တဖၣ်န့ၣ် အိၣ်ဒီးမူဒါလၢ ကကွၢ်ထွဲဝဲ ဒဲစီဆှံ အသ့ၣ်ဘ့ၣ်ဘၣ် အကျီၤတဖၣ်,+ တၢ်အတီတဖၣ်,+ ဒဲအထူၣ်တဖၣ်,+ တၢ်အခီၣ်လီၢ်တဖၣ်, အတၢ်ပီးတၢ်လီခဲလၢာ်+ ဒီးတၢ်မၤခဲလၢာ်လၢ အဘၣ်ဃးဒီး တၢ်သ့ၣ်တဖၣ်န့ၣ်+ ၃၇ ဒီးတၢ်အထူၣ်တဖၣ်လၢ အအိၣ်ဝးတရံး တၢ်ပျီလၢ အအိၣ်လၢ ကရၢၢ်ပူၤ, တၢ်အထူၣ် အခီၣ်လီၢ်တဖၣ်,+ ထးခိၣ်စူတဖၣ် ဒီးအပျံၤတဖၣ်လီၤ.
၃၈ ပှၤလၢအသူၣ်လီၤအဒဲလၢ ဒဲစီဆှံအမဲာ်ညါလၢ မုၢ်ထီၣ်တခီန့ၣ် မ့ၢ်ဝဲ စီၤမိၤၡ့ ဒီးစီၤအၤဟရိၣ် ဒီးအဖိခွါတဖၣ်လီၤ. အဝဲသ့ၣ် အိၣ်ဒီးမူဒါလၢ ကကွၢ်ထွဲဝဲ တၢ်စီဆှံအလီၢ် ဒီးအမ့ၢ်ဝဲ မူဒါလၢ အဝဲသ့ၣ် ကဘၣ်မၤန့ၢ်ဝဲလၢ ပှၤအံၣ်စရ့လးဖိတဖၣ် အလီၢ်လီၤ. ပှၤလၢ အတအိၣ်ဒီး တၢ်ခွဲးတၢ်ယာ်ဘၣ် မ့ၢ်လဲၤဘူးဒီး တၢ်စီဆှံအလီၢ်န့ၣ် ကဘၣ်တၢ်မၤသံအီၤလီၤ.+
၃၉ ဒ်ယဟိဝၤယွၤ မၤလိာ်ဝဲအသိး စီၤမိၤၡ့ ဒီးစီၤအၤဟရိၣ်ထၢဝဲ ပှၤလ့ၤဝံဖိ အပိာ်ခွါလၢ အသးနံၣ်အိၣ် တလါ ဒီးဆူအဖီခိၣ် အမံၤ ဒ်အဝဲသ့ၣ် အဒူၣ် အိၣ်ဝဲအသိးလီၤ. အဝဲသ့ၣ် ခဲလၢာ်ခဲဆ့န့ၣ် အိၣ်ဝဲအဂၤ ၂၂,၀၀၀ လီၤ.
၄၀ ဒီးယဟိဝၤယွၤ တဲဘၣ် စီၤမိၤၡ့လၢ “ထၢပှၤအံၣ်စရ့လးဖိ အဖိဝဲၢ်ကိ အပိာ်ခွါ ကိးဂၤဒဲး လၢအသးနံၣ်အိၣ် တလါ ဒီးဆူအဖီခိၣ်တဖၣ် အမံၤ,+ ဂံၢ်အဝဲသ့ၣ် ဒီးကွဲးလီၤ အဝဲသ့ၣ်အမံၤ လၢစရီပူၤတက့ၢ်. ၄၁ သုကဘၣ် ပာ်လီၤဆီ ပှၤလ့ၤဝံဖိတဖၣ် လၢယဂီၢ်လၢ ပှၤအံၣ်စရ့လးဖိ အဖိဝဲၢ်ကိ ခဲလၢာ် အလီၢ်+ ဒီးပာ်လီၤဆီ ပှၤလ့ၤဝံဖိ အဆၣ်ဖိကီၢ်ဖိ အဒၢတဖၣ်လၢ ပှၤအံၣ်စရ့လးဖိ အဆၣ်ဖိကီၢ်ဖိ အဒၢတဖၣ် အလီၢ်လီၤ.+ ယမ့ၢ် ယဟိဝၤယွၤလီၤ.” ၄၂ ဒီးဒ်ယဟိဝၤယွၤ မၤလိာ်ဝဲအသိး စီၤမိၤၡ့ ထၢဝဲ ပှၤအံၣ်စရ့လးဖိ အဖိဝဲၢ်ကိ အပိာ်ခွါကိးဂၤဒဲး အမံၤလီၤ. ၄၃ ဖိဝဲၢ်ကိ အပိာ်ခွါလၢ အသးနံၣ်အိၣ် တလါ ဒီးဆူအဖီခိၣ်န့ၣ် အမံၤဘၣ်တၢ်ထၢအီၤ ခဲလၢာ်ခဲဆ့ အိၣ်ဝဲအဂၤ ၂၂,၂၇၃ လီၤ.
၄၄ ယဟိဝၤယွၤ တဲစီၤမိၤၡ့လၢ ၄၅ “ပာ်လီၤဆီ ပှၤလ့ၤဝံဖိတဖၣ်လၢ ပှၤအံၣ်စရ့လးဖိ အဖိဝဲၢ်ကိခဲလၢာ် အလီၢ်ဒီး ပာ်လီၤဆီ ပှၤလ့ၤဝံဖိ အဆၣ်ဖိကီၢ်ဖိ အဒၢတဖၣ်လၢ ပှၤအံၣ်စရ့လးဖိ အဆၣ်ဖိကီၢ်ဖိ အဒၢတဖၣ်အလီၢ်တက့ၢ်. ဒီးပှၤလ့ၤဝံဖိတဖၣ်န့ၣ် ကဘၣ်ကဲ ယတၢ်လီၤ. ယမ့ၢ် ယဟိဝၤယွၤလီၤ. ၄၆ ပှၤအံၣ်စရ့လးဖိ အဖိဝဲၢ်ကိတဖၣ် အိၣ်အါန့ၢ်ဒံး ပှၤလ့ၤဝံဖိန့ၣ် အိၣ်ဝဲအဂၤ ၂၇၃ ဂၤအဃိ+ ဒ်သိး ကပှ့ၤက့ၤ+ ဖိဝဲၢ်ကိ လၢအအိၣ်တ့ၢ်တဖၣ်အံၤအဂီၢ် ၄၇ နကဘၣ်ဟံးန့ၢ် ၅ ၡက့လး* လၢအဝဲသ့ၣ် တဂၤစုာ်စုာ်အလီၢ်+ တဂၤ ၅ ၡက့လး ဒ်တၢ်စီဆှံအလီၢ် အၡက့လးအသိးလီၤ. တၡက့လးန့ၣ် အိၣ်ဝဲ က့ရၤ* ၂၀ လီၤ.+ ၄၈ ဒီးစ့လၢ တၢ်ပှ့ၤက့ၤ ဖိဝဲၢ်ကိ လၢအအိၣ်တ့ၢ်တဖၣ်အံၤ အဂီၢ်န့ၣ် နကဘၣ်ဟ့ၣ်လီၤ စီၤအၤဟရိၣ် ဒီးအဖိခွါတဖၣ်လီၤ.” ၄၉ အဃိ ဒ်သိးကပှ့ၤက့ၤဝဲ ပှၤအနီၣ်ဂံၢ်လၢ အအါန့ၢ် ပှၤလ့ၤဝံဖိအဂီၢ် စီၤမိၤၡ့ ထၢဝဲ စ့လၢ တၢ်ပှ့ၤက့ၤအဂီၢ်လီၤ. ၅၀ အဝဲဟံးန့ၢ်ဝဲ စ့ ၁,၃၆၅ ၡက့လး လၢပှၤအံၣ်စရ့လးဖိ အဖိဝဲၢ်ကိတဖၣ်အဂီၢ် ဒ်တၢ်စီဆှံအလီၢ် အၡက့လးအသိးလီၤ. ၅၁ ဒ်ယဟိဝၤယွၤ အတၢ်ကတိၤ အိၣ်ဝဲအသိး ဒီးဒ်ယဟိဝၤယွၤ မၤလိာ်ဝဲ စီၤမိၤၡ့အသိး စီၤမိၤၡ့ ဟ့ၣ်လီၤဝဲ စ့လၢတၢ်ပှ့ၤက့ၤအဂီၢ်လၢ စီၤအၤဟရိၣ် ဒီးအဖိခွါတဖၣ် အအိၣ်လီၤ.
၄ ယဟိဝၤယွၤ တဲစီၤမိၤၡ့ ဒီးစီၤအၤဟရိၣ်လၢ ၂ “စီၤကဃး အစၢၤအသွဲၣ်တဖၣ်လၢ+ ပှၤလ့ၤဝံဖိ အကျါန့ၣ် ထၢအဝဲသ့ၣ် အနီၣ်ဂံၢ် ဒ်အဒူၣ်ဒီး အဒူၣ်ဖိထၢဖိတဖၣ် အိၣ်ဝဲအသိးတက့ၢ်. ၃ အဝဲသ့ၣ် ကိးဂၤဒဲးလၢ အသးနံၣ်အိၣ် ၃၀+ တုၤလၢ ၅၀+ န့ၣ်ကဘၣ် တၢ်ဂံၢ်အီၤလီၤ. အဝဲသ့ၣ်န့ၣ် ကနုာ်လီၤ ပၣ်ဃုာ်လၢ ပှၤတကရူၢ်လၢ အကန့ၢ်ဘၣ် မူဒါလၢ ကမၤတၢ်လၢ တၢ်အိၣ်ဖှိၣ် အဒဲလီၤ.+
၄ “စီၤကဃး အစၢၤအသွဲၣ်တဖၣ် အတၢ်မၤလၢ တၢ်အိၣ်ဖှိၣ်အဒဲပူၤန့ၣ်+ မ့ၢ်တၢ်လၢ အစီဆှံ နီၢ်ကီၢ်လီၤ. အဝဲသ့ၣ်အမူဒါတဖၣ် အိၣ်ဝဲဒ်အံၤလီၤ. ၅ ဖဲတၢ်ကသုးကွံာ်ဝဲ ဒဲကဝီၤ အဆၢကတီၢ်န့ၣ် စီၤအၤဟရိၣ် ဒီးအဖိခွါတဖၣ် ကလဲၤဃဲၣ်လီၤကွံာ် ယၣ်ဘျးသဒၢ+ ဒီးကးဘၢဝဲ တၢ်အၢၣ်လီၤအီလီၤ အတလါလၢ+ ယၣ်ဘျးသဒၢအံၤလီၤ. ၆ ဒီးအဝဲသ့ၣ် ကဘၣ်ကးဘၢအီၤလၢ ပီၣ်လဲၣ်ဆှီအဘ့ၣ် ဝံၤဒီး ကဒါလီၤတၢ်ကံးညာ် လၢအလွဲၢ်လါအဲး လၢအဖီခိၣ် ဒီးဂိာ်လီၤ အနီၣ်ယိးဘိတဖၣ်လၢ+ အလီၢ်လီၤ.
၇ “စီၢ်နီၤခိၣ်လၢ ပှၤပာ်ထီၣ်ကိၣ်လၢ တၢ်လုၢ်ထီၣ်အဂီၢ်န့ၣ်+ အဝဲသ့ၣ် ကဘၣ်ဒါလီၤ တၢ်ကံးညာ်လၢ အလွဲၢ်လါအဲး လၢအဖီခိၣ် ဒီးလၢအဖီခိၣ်န့ၣ် အဝဲသ့ၣ် ကဘၣ်ပာ်လီၤဝဲ လီခီတဖၣ်, ထံခွးတဖၣ်, လီခီဖျၢၣ်တဖၣ်, ထံအီဒၢတဖၣ်လၢ စပံးထံလၢ တၢ်လုၢ်တၢ်ပာ် အဂီၢ်လီၤ.+ ဒီးကိၣ်လၢအဘၣ် တၢ်လုၢ်ထီၣ်အီၤန့ၣ်+ ကဘၣ်အိၣ်လၢ စီၢ်နီၤခိၣ်အဖီခိၣ် ထီဘိလီၤ. ၈ ဒီးအဝဲသ့ၣ် ကဒါလီၤဝဲ တၢ်ကံးညာ်လၢ အလွဲၢ်ဂီၤဆှုၣ်ကလာ် လၢအဖီခိၣ် ဒီးကကးဘၢဝဲလၢ ပီၣ်လဲၣ်ဆှီအဘ့ၣ် ဒီးကဂိာ်လီၤ အနီၣ်ယိးဘိတဖၣ်လၢ+ အလီၢ်လီၤ. ၉ ဝံၤဒီး အဝဲသ့ၣ် ကဘၣ်ဟံးန့ၢ် တၢ်ကံးညာ်လၢ အလွဲၢ်လါအဲး ဒီးကဘၣ်ဘိၣ်ဘံထီၣ်ဝဲ မ့ၣ်အူဒၢ+ ဃုာ်ဒီး မ့ၣ်အူဒၢအခွးတဖၣ်,+ မ့ၣ်အူဒၢ အနီၣ်တံာ်, မ့ၣ်အူအ့ၣ် အခွးတဖၣ်+ ဒီးသိအဒၢ ခဲလၢာ်လၢ ပှၤသူအီၤလၢ မ့ၣ်အူဒၢ အဂီၢ်လီၤ. ၁၀ အဝဲသ့ၣ် ကဘၣ်ဘိၣ်ဘံထီၣ်ဝဲ မ့ၣ်အူဒၢအထူၣ်ဒီး အတၢ်ပီးတၢ်လီခဲလၢာ် လၢပီၣ်လဲၣ်ဆှီအဘ့ၣ် ဒီးပာ်ထီၣ်အီၤလၢ နီၣ်ယိးဘိ အလိၤလီၤ. ၁၁ ဒီးအဝဲသ့ၣ် ကဒါလီၤ တၢ်ကံးညာ်လၢ အလွဲၢ်လါအဲး လၢတၢ်လုၢ်လီၢ်ထူ အဖီခိၣ်+ ဒီးကကးဘၢဝဲလၢ ပီၣ်လဲၣ်ဆှီအဘ့ၣ် ဒီးကဂိာ်လီၤ အနီၣ်ယိးဘိတဖၣ်လၢ+ အလီၢ်လီၤ. ၁၂ ဒီးအဝဲသ့ၣ် ကဘၣ်ဟံးန့ၢ်ဝဲ တၢ်ပီးတၢ်လီ ခဲလၢာ်လၢ+ အဝဲသ့ၣ်သူဝဲလၢ ကမၤတၢ်လၢ တၢ်စီဆှံအလီၢ် ဒီးကပာ်လီၤဝဲလၢ တၢ်ကံးညာ်လၢ အလွဲၢ်လါအဲးအပူၤ ဒီးကကးဘၢဝဲလၢ ပီၣ်လဲၣ်ဆှီအဘ့ၣ် ဝံၤဒီး ကပာ်ထီၣ်ဝဲလၢ နီၣ်ယိးဘိ အလိၤလီၤ.
၁၃ “အဝဲသ့ၣ် ကဘၣ်ထုးထီၣ်ကွံာ် ဖၣ်ဆါလၢ အအိၣ်ဝဲလၢ တၢ်လုၢ်လီၢ် အဖီခိၣ်+ ဒီးကဘၣ်ဒါလီၤ တၢ်ကံးညာ်လၢ အလွဲၢ်လုး လၢတၢ်လုၢ်လီၢ် အဖီခိၣ်န့ၣ်လီၤ. ၁၄ ဒီးလၢအဖီခိၣ်န့ၣ် အဝဲသ့ၣ် ကဘၣ်ပာ်ထီၣ်ဝဲ တၢ်ပီးတၢ်လီလၢ အဝဲသ့ၣ် သူဝဲဖဲ အဝဲသ့ၣ်မၤတၢ်လၢ တၢ်လုၢ်လီၢ် အခါလီၤ. တၢ်ပီးတၢ်လီတဖၣ်အံၤ မ့ၢ်ဝဲ မ့ၣ်အူအ့ၣ်အခွးတဖၣ်, နီၣ်ဆဲးတဖၣ်, နီၣ်တရီာ်တၢ်တဖၣ်, လီခီဖျၢၣ်တဖၣ် ဒီးတၢ်လုၢ်လီၢ် အတၢ်ပီးတၢ်လီ ခဲလၢာ်လီၤ.+ ဒီးအဝဲသ့ၣ် ကဒါလီၤဝဲ ပီၣ်လဲၣ်ဆှီ အဘ့ၣ်လၢ အဖီခိၣ် ဒီးကဂိာ်လီၤ အနီၣ်ယိးဘိတဖၣ်လၢ+ အလီၢ်လီၤ.
၁၅ “ဖဲတၢ်ကသုးကွံာ်ဝဲ ဒဲကဝီၤ အဆၢကတီၢ်န့ၣ် စီၤအၤဟရိၣ် ဒီးအဖိခွါတဖၣ် ကဘၣ်ကးဘၢဝဲ တၢ်စီဆှံအလီၢ်+ ဒီးအတၢ်ပီးတၢ်လီ ခဲလၢာ်လီၤ. ဖဲအဝဲသ့ၣ် မၤဝဲဝံၤ အဆၢကတီၢ်န့ၣ် စီၤကဃး အစၢၤအသွဲၣ်တဖၣ် ကဘၣ်ဟဲ ဒ်သိး ကလဲၤစိာ် တၢ်သ့ၣ်တဖၣ်န့ၣ်အဂီၢ်+ ဘၣ်ဆၣ် အဝဲသ့ၣ် တဘၣ်ထိးဝဲ တၢ်စီဆှံ အလီၢ်ဘၣ်. အဝဲသ့ၣ် မ့ၢ်ထိးဝဲန့ၣ် ကသံဝဲလီၤ.+ တၢ်သ့ၣ်တဖၣ်န့ၣ် မ့ၢ်ဝဲ စီၤကဃး အစၢၤအသွဲၣ်တဖၣ် အမူဒါလၢ အဘၣ်ထွဲဒီး တၢ်အိၣ်ဖှိၣ် အဒဲလီၤ.
၁၆ “ပှၤလုၢ်တၢ်ဒိၣ် စီၤအၤဟရိၣ် အဖိခွါ စီၤအလၤဧစၢ်န့ၣ်+ အိၣ်ဒီးမူဒါလၢ ကကွၢ်ထွဲဝဲ မ့ၣ်အူဒၢ အသိ,+ တၢ်နၢမူ,+ တၢ်လုၢ်ဘုလၢ ပှၤဘၣ်လုၢ်ထီၣ်အီၤ ထီဘိ ဒီးသိလၢ တၢ်ဒိးဖှူတၢ် အဂီၢ်လီၤ.+ အဝဲ ကဘၣ်ကွၢ်ထွဲဝဲ ဒဲစီဆှံ ဒီတဖျၢၣ် ဒီးတၢ်အိၣ်လၢအပူၤ ခဲလၢာ် ဃုာ်ဒီး တၢ်စီဆှံအလီၢ် ဒီးအတၢ်ပီးတၢ်လီ တဖၣ်လီၤ.”
၁၇ ယဟိဝၤယွၤ တဲစီၤမိၤၡ့ ဒီးစီၤအၤဟရိၣ်လၢ ၁၈ “ပှၤကဃးဖိ အဒူၣ်ဖိထၢဖိတဖၣ် လၢအဟဲလီၤစၢၤလၢ ပှၤလ့ၤဝံဖိန့ၣ်+ တဘၣ်ပျဲအဝဲသ့ၣ် တုၤလၢတၢ်ဟးဂီၤတဂ့ၤ. ၁၉ ဖဲအဝဲသ့ၣ်လဲၤဘူးဒီး တၢ်လၢအစီဆှံ နီၢ်ကီၢ်တဖၣ်အခါ ဒ်သိးအဝဲသ့ၣ် ကဆဲးအိၣ်မူ ဒီးအသုတသံ တဂ့ၤအဂီၢ် သုကဘၣ်မၤ ဒ်န့ၣ်လီၤ.+ စီၤအၤဟရိၣ် ဒီးအဖိခွါတဖၣ် ကလဲၤနီၤလီၤန့ၢ် အဝဲသ့ၣ် တဂၤစုာ်စုာ် အမူဒါ ဒီးကဒုးနဲၣ် အဝဲသ့ၣ်လၢ တၢ်လၢ အဝဲသ့ၣ်ကဘၣ် စိာ်ဝဲလီၤ. ၂၀ အဝဲသ့ၣ် တဘၣ်လဲၤနုာ်ကွၢ်ဝဲ တၢ်လၢအစီဆှံတဖၣ် ထဲတဘျးဖိန့ၣ်ဘၣ်. အဝဲသ့ၣ်မ့ၢ်မၤဝဲ ဒ်န့ၣ်န့ၣ် အဝဲသ့ၣ် ကသံလီၤ.”+
၂၁ ဒီးယဟိဝၤယွၤ တဲစီၤမိၤၡ့လၢ ၂၂ “ထၢစီၤက့ရၡိၣ် အစၢၤအသွဲၣ်တဖၣ်+ အနီၣ်ဂံၢ် ဒ်အဒူၣ်ဖိထၢဖိ ဒီးအဒူၣ် အိၣ်ဝဲအသိး တက့ၢ်. ၂၃ အဝဲသ့ၣ် ကိးဂၤဒဲးလၢ အသးနံၣ်အိၣ် ၃၀ တုၤလၢ ၅၀ န့ၣ် နကဘၣ်ထၢ အမံၤလီၤ. အဝဲသ့ၣ်န့ၣ် ကနုာ်လီၤပၣ်ဃုာ်လၢ ပှၤတကရူၢ်လၢ အကန့ၢ်ဘၣ် မူဒါလၢ ကမၤတၢ်လၢ တၢ်အိၣ်ဖှိၣ် အဒဲလီၤ. ၂၄ ပှၤက့ရၡိၣ်ဖိ အဒူၣ်ဖိထၢဖိတဖၣ် န့ၢ်ဘၣ်မူဒါလၢ ကအံးထွဲကွၢ်ထွဲဝဲ ဒီးစိာ်ဝဲ တၢ်လၢ အဘၣ်တၢ်ပာ်ဖျါအီၤလၢ လာ်လီၤ.+ ၂၅ အဝဲသ့ၣ် ကဘၣ်လဲၤစိာ်ဝဲ ဒဲစီဆှံ အတၢ်ကံးညာ်တဖၣ်,+ တၢ်အိၣ်ဖှိၣ် အဒဲ အတၢ်ကျၢၢ်ဘၢတၢ်, တၢ်ကျၢၢ်ဘၢတၢ်တဘ့ၣ် လၢအမ့ၢ် ပီၣ်လဲၣ်ဆှီအဘ့ၣ်+ ဒီးတၢ်ကျၢၢ်ဘၢတၢ် အဂၤလၢ အအိၣ်ဝဲလၢ အဖီလာ် တဘ့ၣ်လီၤ. အဝဲသ့ၣ် ဘၣ်လဲၤစိာ်စ့ၢ်ကီး တၢ်ကံးညာ်လၢ တၢ်ကနုာ်လီၤလၢ တၢ်အိၣ်ဖှိၣ် အဒဲအဂီၢ်,+ ၂၆ တၢ်ကံးညာ်တဖၣ်လၢ တၢ်ပျီလၢ အအိၣ်လၢ ကရၢၢ်ပူၤအဂီၢ်,+ တၢ်ကံးညာ်လၢ တၢ်နုာ်လီၤအလီၢ် လၢပှၤကနုာ်လီၤ ဆူတၢ်ပျီအံၤလၢ+ အအိၣ်ဒီး ဒဲစီဆှံ ဒီးတၢ်လုၢ်လီၢ်, ဒဲအပျံၤတဖၣ်, အတၢ်ပီးတၢ်လီခဲလၢာ် ဒီးတၢ်ခဲလၢာ်လၢ အဘၣ်တၢ်သူအီၤလၢ ဒဲစီဆှံတၢ်မၤ အဂီၢ်လီၤ. အဝဲန့ၣ် မ့ၢ်အဝဲသ့ၣ် အမူဒါလီၤ. ၂၇ စီၤက့ရၡိၣ် အစၢၤအသွဲၣ်တဖၣ်+ ကဘၣ်စိာ်တၢ် ဒီးမၤတၢ် ဒ်စီၤအၤဟရိၣ် ဒီးအဖိခွါတဖၣ် ဟ့ၣ်လီၤတၢ်ကလုၢ်အသိး ခဲလၢာ်လီၤ. သုကဘၣ် ဟ့ၣ်လီၤ အဝဲသ့ၣ် အတၢ်မၤတဖၣ်အံၤ ကိးမံၤဒဲး ဒ်အဝဲသ့ၣ် အမူဒါ အိၣ်ဝဲ အသိးလီၤ. ၂၈ အဝဲန့ၣ် မ့ၢ်ဝဲ ပှၤက့ရၡိၣ်ဖိ အဒူၣ်ဖိထၢဖိတဖၣ် အမူဒါ လၢအဘၣ်ဃးဒီး တၢ်အိၣ်ဖှိၣ် အဒဲ လၢအဝဲသ့ၣ် ကဘၣ်မၤဝဲလီၤ.+ ဒီးအဝဲသ့ၣ် ကဘၣ်မၤဝဲ အမူဒါတဖၣ်အံၤလၢ ပှၤလုၢ်တၢ်ဒိၣ် စီၤအၤဟရိၣ် အဖိခွါ စီၤအံသမၢ် အတၢ်ဟံးစုနဲၣ်ကျဲ အဖီလာ်လီၤ.+
၂၉ “ထၢ စီၤမရၤရံၤ အစၢၤအသွဲၣ်တဖၣ်အမံၤ+ ဒ်အဒူၣ် ဒီးအဒူၣ်ဖိထၢဖိတဖၣ် အိၣ်ဝဲအသိးတက့ၢ်. ၃၀ အဝဲသ့ၣ် ကိးဂၤဒဲးလၢ အသးနံၣ်အိၣ် ၃၀ တုၤလၢ ၅၀ န့ၣ် နကဘၣ်ထၢ အမံၤလီၤ. အဝဲသ့ၣ်န့ၣ် ကနုာ်လီၤ ပၣ်ဃုာ်လၢ ပှၤတကရူၢ်လၢ အကန့ၢ်ဘၣ် မူဒါလၢ ကမၤတၢ်လၢ တၢ်အိၣ်ဖှိၣ် အဒဲလီၤ. ၃၁ ဒ်အဝဲသ့ၣ် အတၢ်မၤလၢ တၢ်အိၣ်ဖှိၣ်အဒဲ အိၣ်ဝဲအသိးန့ၣ် အဝဲသ့ၣ် အိၣ်ဒီးမူဒါလၢ ကဘၣ်လဲၤစိာ်+ ဒဲစီဆှံ အသ့ၣ်ဘ့ၣ်ဘၣ် အကျီၤတဖၣ်,+ တၢ်အတီတဖၣ်,+ တၢ်အထူၣ်တဖၣ်+ ဒီးတၢ်အခီၣ်လီၢ်တဖၣ်,+ ၃၂ တၢ်အထူၣ်တဖၣ်လၢ+ အအိၣ်ဝးတရံး တၢ်ပျီလၢ အအိၣ်လၢ ကရၢၢ်ပူၤ, တၢ်အထူၣ် အခီၣ်လီၢ်တဖၣ်,+ အထးခိၣ်စူတဖၣ်,+ အပျံၤတဖၣ် ဃုာ်ဒီး အတၢ်ပီးတၢ်လီခဲလၢာ် လၢအဘၣ်ဃးဒီး တၢ်မၤအံၤလီၤ. အဝဲသ့ၣ် ကဘၣ်လဲၤစိာ် တၢ်ပီးတၢ်လီ မနုၤတဖၣ်လဲၣ်န့ၣ် သုကဘၣ် ဟ့ၣ်လီၤအဝဲသ့ၣ်မူဒါ ဒ်အဝဲသ့ၣ် အမံၤ အိၣ်ဝဲအသိးလီၤ. ၃၃ စီၤမရၤရံၤ အစၢၤအသွဲၣ် အဒူၣ်ဖိထၢဖိတဖၣ်န့ၣ်+ ကဘၣ်မၤတၢ်လၢ တၢ်အိၣ်ဖှိၣ်အဒဲ လၢပှၤလုၢ်တၢ်ဒိၣ် စီၤအၤဟရိၣ် အဖိခွါ စီၤအံသမၢ် အတၢ်ဟံးစုနဲၣ်ကျဲ အဖီလာ်လီၤ.”+
၃၄ ဝံၤဒီး စီၤမိၤၡ့, စီၤအၤဟရိၣ် ဒီးပှၤဂီၢ်မုၢ် အခိၣ်အနၢ်တဖၣ်န့ၣ်+ ထၢဝဲ ပှၤကဃးဖိ အစၢၤအသွဲၣ်တဖၣ်+ အမံၤ ဒ်အဝဲသ့ၣ် အဒူၣ် ဒီးအဒူၣ်ဖိထၢဖိတဖၣ် အိၣ်ဝဲအသိးလီၤ. ၃၅ ဒီးအဝဲသ့ၣ် ကိးဂၤဒဲးလၢ အသးနံၣ်အိၣ် ၃၀ တုၤလၢ ၅၀ န့ၣ် ဘၣ်တၢ်ထၢ အမံၤလီၤ. အဝဲသ့ၣ်န့ၣ် ကနုာ်လီၤ ပၣ်ဃုာ်လၢ ပှၤတကရူၢ်လၢ အကန့ၢ်ဘၣ် မူဒါလၢ ကမၤတၢ်လၢ တၢ်အိၣ်ဖှိၣ် အဒဲလီၤ.+ ၃၆ ပှၤလၢ အမံၤဘၣ်တၢ်ထၢအီၤ ဒ်အဒူၣ် အိၣ်ဝဲအသိးန့ၣ် ခဲလၢာ်ခဲဆ့ အိၣ်ဝဲအဂၤ ၂,၇၅၀ လီၤ.+ ၃၇ ပှၤတဖၣ်န့ၣ် မ့ၢ်ပှၤလၢ အမံၤဘၣ်တၢ်ထၢအီၤလၢ ပှၤကဃးဖိ အဒူၣ်ဖိထၢဖိ တဖၣ်အကျါ လၢအကမၤတၢ်လၢ တၢ်အိၣ်ဖှိၣ်အဒဲလီၤ. ဒ်ယဟိဝၤယွၤ ဟ့ၣ်လီၤစီၤမိၤၡ့ တၢ်ကလုၢ်အသိး စီၤမိၤၡ့ ဒီးစီၤအၤဟရိၣ် ထၢအဝဲသ့ၣ် အမံၤလီၤ.+
၃၈ စီၤက့ရၡိၣ် အစၢၤအသွဲၣ်တဖၣ်န့ၣ်+ ဘၣ်တၢ်ထၢအမံၤ ဒ်အဒူၣ် ဒီးအဒူၣ်ဖိထၢဖိတဖၣ် အိၣ်ဝဲအသိးလီၤ. ၃၉ အဝဲသ့ၣ် ကိးဂၤဒဲးလၢ အသးနံၣ်အိၣ် ၃၀ တုၤလၢ ၅၀ န့ၣ် ဘၣ်တၢ်ထၢ အမံၤလီၤ. အဝဲသ့ၣ်န့ၣ် ကနုာ်လီၤပၣ်ဃုာ်လၢ ပှၤတကရူၢ်လၢ အကန့ၢ်ဘၣ် မူဒါလၢ ကမၤတၢ်လၢ တၢ်အိၣ်ဖှိၣ် အဒဲလီၤ. ၄၀ ပှၤလၢ အမံၤဘၣ်တၢ်ထၢအီၤ ဒ်အဒူၣ် ဒီးအဒူၣ်ဖိထၢဖိတဖၣ် အိၣ်ဝဲအသိးန့ၣ် ခဲလၢာ်ခဲဆ့ အိၣ်ဝဲအဂၤ ၂,၆၃၀ လီၤ.+ ၄၁ အဝဲန့ၣ်မ့ၢ်ဝဲ ပှၤကိးဂၤဒဲးလၢ စီၤက့ရၡိၣ် အစၢၤအသွဲၣ် အဒူၣ်ဖိထၢဖိတဖၣ် အကျါ လၢကမၤတၢ်လၢ တၢ်အိၣ်ဖှိၣ် အဒဲလီၤ. ဒ်ယဟိဝၤယွၤ ဟ့ၣ်လီၤ တၢ်ကလုၢ်အသိး စီၤမိၤၡ့ ဒီးစီၤအၤဟရိၣ် ထၢအဝဲသ့ၣ် အမံၤလီၤ.+
၄၂ စီၤမရၤရံၤ အစၢၤအသွဲၣ်တဖၣ်န့ၣ် ဘၣ်တၢ်ထၢအမံၤ ဒ်အဒူၣ် ဒီးအဒူၣ်ဖိထၢဖိတဖၣ် အိၣ်ဝဲအသိးလီၤ. ၄၃ အဝဲသ့ၣ် ကိးဂၤဒဲးလၢ အသးနံၣ်အိၣ် ၃၀ တုၤလၢ ၅၀ န့ၣ် ဘၣ်တၢ်ထၢ အမံၤလီၤ. အဝဲသ့ၣ်န့ၣ် ကနုာ်လီၤပၣ်ဃုာ်လၢ ပှၤတကရူၢ်လၢ အကန့ၢ်ဘၣ် မူဒါလၢ ကမၤတၢ်လၢ တၢ်အိၣ်ဖှိၣ် အဒဲလီၤ.+ ၄၄ ပှၤလၢ အမံၤဘၣ်တၢ်ထၢအီၤ ဒ်အဒူၣ်အိၣ်ဝဲ အသိးန့ၣ် ခဲလၢာ်ခဲဆ့ အိၣ်ဝဲအဂၤ ၃,၂၀၀ လီၤ.+ ၄၅ အဝဲန့ၣ်မ့ၢ်ဝဲ စီၤမရၤရံၤ အစၢၤအသွဲၣ် အဒူၣ်ဖိထၢဖိတဖၣ် လၢစီၤမိၤၡ့ ဒီးစီၤအၤဟရိၣ် ထၢအမံၤ ဒ်ယဟိဝၤယွၤ ဟ့ၣ်လီၤ စီၤမိၤၡ့ တၢ်ကလုၢ် အသိးလီၤ.+
၄၆ စီၤမိၤၡ့, စီၤအၤဟရိၣ် ဒီးပှၤအံၣ်စရ့လးဖိ အခိၣ်အနၢ်တဖၣ်န့ၣ် ထၢဝဲပှၤလ့ၤဝံဖိ တဖၣ်အံၤအမံၤ ဒ်အဒူၣ် ဒီးအဒူၣ်ဖိထၢဖိတဖၣ် အိၣ်ဝဲအသိးလီၤ. ၄၇ ပှၤသ့ၣ်တဖၣ်အံၤ အသးနံၣ်အိၣ် ၃၀ တုၤလၢ ၅၀ ဒီးအဝဲသ့ၣ် အိၣ်ဒီးမူဒါလၢ ကမၤတၢ် ဒီးစိာ်တၢ်လၢ အဘၣ်ထွဲ ဒီးတၢ်အိၣ်ဖှိၣ် အဒဲလီၤ.+ ၄၈ ပှၤလၢအမံၤ ဘၣ်တၢ်ထၢအီၤန့ၣ် ခဲလၢာ်ခဲဆ့ အိၣ်ဝဲအဂၤ ၈,၅၈၀ လီၤ.+ ၄၉ ဒ်ယဟိဝၤယွၤ ဟ့ၣ်လီၤစီၤမိၤၡ့ တၢ်ကလုၢ်အသိး အဝဲသ့ၣ် အမံၤ ဘၣ်တၢ်ထၢအီၤ ဒ်အဝဲသ့ၣ် အတၢ်မၤလၢ အဒိးန့ၢ်ဘၣ်ဝဲအသိး ဒီးဒ်တၢ်လၢ အဝဲသ့ၣ် ကဘၣ်လဲၤစိာ်ဝဲအသိးလီၤ. အဝဲသ့ၣ် အမံၤ ဘၣ်တၢ်ထၢအီၤ ဒ်ယဟိဝၤယွၤ မၤလိာ် စီၤမိၤၡ့အသိးလီၤ.
၅ ယဟိဝၤယွၤ တဲစီၤမိၤၡ့လၢ ၂ “မၤလိာ် ပှၤအံၣ်စရ့လးဖိလၢ အဝဲသ့ၣ် ကဘၣ်ဒုးဟးထီၣ်ကွံာ် ကယဲၢ်ပှၤဘၣ် တၢ်ဆါအၢ,+ ပှၤလၢ အတၢ်ဆါထံ ဟးထီၣ်လၢအတၢ်+ ဒီးကယဲၢ် ပှၤလၢ အတကဆှီဘၣ် လၢပှၤသံအဃိ+ ဆူဒဲကဝီၤ အချၢတက့ၢ်. ၃ ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ သုကဘၣ် ဒုးဟးထီၣ် အဝဲသ့ၣ်လီၤ. သုကဘၣ် ဒုးဟးထီၣ် အဝဲသ့ၣ် ဆူဒဲကဝီၤအချၢ ဒ်သိး အသုတမၤဘၣ်အၢ+ ဒဲကဝီၤဒီဘ့ၣ်လၢ ယအိၣ်လၢ အကျါတဂ့ၤ အဂီၢ်လီၤ.”+ ၄ အဃိ ပှၤအံၣ်စရ့လးဖိတဖၣ် မၤဝဲဒ်န့ၣ် ဒီးဒုးဟးထီၣ် အဝဲသ့ၣ် ဆူဒဲကဝီၤ အချၢလီၤ. ဒ်ယဟိဝၤယွၤ မၤလိာ်ဝဲ စီၤမိၤၡ့အသိး ပှၤအံၣ်စရ့လးဖိတဖၣ် မၤထွဲဝဲလီၤ.
၅ ယဟိဝၤယွၤ တဲစီၤမိၤၡ့လၢ ၆ “တဲဘၣ် ပှၤအံၣ်စရ့လးဖိလၢ ‘ပိာ်မုၣ်ဂ့ၤ ပိာ်ခွါဂ့ၤ မ့ၢ်မၤဘၣ် တၢ်ဒဲးဘးလၢ ပှၤကညီ ညီနုၢ်မၤဝဲတဖၣ်အကျါ တခါခါ ဒီးမၤတၢ်လၢ အတအိၣ်ဒီး တၢ်သးတီလၢ ယဟိဝၤယွၤ အဖီခိၣ်ဘၣ်န့ၣ် ပှၤတဂၤအံၤ အတၢ်ကမၣ် အိၣ်ဝဲလီၤ.+ ၇ အဝဲ ကဘၣ်အၢၣ်လီၤ+ အတၢ်ဒဲးဘးလၢ အမၤဝဲလီၤ. ဒီးခီဖျိလၢ အတၢ်ကမၣ် အိၣ်အဃိ အကဘၣ် လိးက့ၤဝဲ အပှ့ၤပှဲၤပှဲၤ တကးဒံးဘၣ် ကဘၣ်ဟ့ၣ်အါထီၣ် အပှ့ၤ ယဲၢ်ပူတပူလီၤ.+ အဝဲကဘၣ်ဟ့ၣ်ဝဲ ပှၤလၢ အမၤကမၣ်ဘၣ်ဝဲ တဂၤလီၤ. ၈ ဘၣ်ဆၣ် ပှၤလၢအဘၣ်တၢ်မၤကမၣ်အီၤတဂၤ အဘူးအတံၢ် လၢအကတူၢ်လိာ် တၢ်အပှ့ၤ* မ့ၢ်တအိၣ်ဘၣ်န့ၣ် ပှၤကဘၣ်ဟ့ၣ် တၢ်အပှ့ၤအံၤ လၢယဟိဝၤယွၤ အအိၣ် ဒီးကကဲထီၣ်ဝဲ ပှၤလုၢ်တၢ်ဒိၣ် အတၢ်လီၤ. ဒီးတကးဒံးဘၣ် အဝဲ ကဘၣ်ဟဲစိာ်ဝဲ သိဖါ လၢတၢ်မၤဘၣ်လိာ်ဖိးဒ့က့ၤတၢ်အဂီၢ် ဆူပှၤလုၢ်တၢ်ဒိၣ်အအိၣ် ဒ်သိးပှၤလုၢ်တၢ်ဒိၣ် ကမၤဘၣ်လိာ်ဖိးဒ့က့ၤတၢ် လၢအဂီၢ်လီၤ.+
၉ “‘ကယဲၢ်တၢ်မၤဘူၣ် လၢအစီဆှံ+ လၢပှၤအံၣ်စရ့လးဖိ ဟဲစိာ်န့ၢ် ပှၤလုၢ်တၢ်ဒိၣ်န့ၣ် ကကဲထီၣ် ပှၤလုၢ်တၢ်ဒိၣ် အတၢ်လီၤ.+ ၁၀ တၢ်လၢအစီဆှံ လၢပှၤတဂၤစုာ်စုာ် ဟဲစိာ်န့ၢ် ပှၤလုၢ်တၢ်ဒိၣ်န့ၣ် ကကဲထီၣ် ပှၤလုၢ်တၢ်ဒိၣ် အတၢ်လီၤ.’”
၁၁ ယဟိဝၤယွၤ တဲဘၣ် စီၤမိၤၡ့လၢ ၁၂ “တဲဘၣ် ပှၤအံၣ်စရ့လးဖိတဖၣ်လၢ ‘ပှၤပိာ်ခွါတဂၤ အမါ မ့ၢ်မၤတၢ်ဒဲးဘး ဒီးအတတီဒီး အီၤဘၣ် ၁၃ ဒီးပှၤပိာ်ခွါအဂၤတဂၤ မ့ၢ်မံဃုာ်ဒီးအမါ+ ဒီးအဝၤ မ့ၢ်တသ့ၣ်ညါဘၣ် ဒီးပှၤမ့ၢ်တသ့ၣ်ညါဘၣ်န့ၣ် မ့ၢ်ဒၣ် ပိာ်မုၣ်တဂၤန့ၣ် မၤဘၣ်အၢလီၤအသးလီၤ. ဘၣ်ဆၣ် ပှၤအုၣ်အသး မ့ၢ်တအိၣ်ဘၣ် ဒီးပှၤမ့ၢ်တသ့ၣ်ညါထွဲဘၣ်န့ၣ် ပှၤကဘၣ်မၤဝဲ ဒ်အံၤလီၤ. ၁၄ အဝဲ မ့ၢ်မၤဘၣ်အၢလီၤအသးမ့ၢ်ဂ့ၤ တမၤဘၣ်အၢလီၤအသးဘၣ်မ့ၢ်ဂ့ၤ အဝၤ မ့ၢ်သူၣ်က့ၣ်သးကါအီၤ ဒီးသးဒ့ဒီလၢ အတၢ်သးတီ အဖီခိၣ်န့ၣ် ၁၅ အဝၤ ကဘၣ်လဲၤကိး အမါလၢ ပှၤလုၢ်တၢ်ဒိၣ်အအိၣ်လီၤ. ဒီးအဝဲဟဲစိာ်ဃုာ်ဒီး ဘုမုယီၤ အကမူၣ် တကံလိ* လၢအမ့ၢ် တၢ်လုၢ်လၢ အမါအဂီၢ်လီၤ. ဒီးအဝဲန့ၣ် မ့ၢ်ဝဲ တၢ်လုၢ်ဘုလၢ အဘၣ်ဃးဒီး တၢ်သူၣ်က့ၣ်သးကါ ဒီးမ့ၢ်ဝဲ တၢ်လုၢ်ဘုလၢ အကပာ်ဖျါထီၣ်ဝဲလၢ ပိာ်မုၣ်တဂၤန့ၣ် အတၢ်ကမၣ်အိၣ်ဧါ တအိၣ်ဧါ အဃိ အဝဲတဘၣ်လူလီၤ သိဒီးလီၢ်ဘၣ်* လၢတၢ်လုၢ်ဘုအဖီခိၣ်ဘၣ်.
၁၆ “‘ဒီးပှၤလုၢ်တၢ်ဒိၣ် ကကိးဘူးထီၣ်ဝဲ ပိာ်မုၣ် ဒီးကမၢ ပိာ်မုၣ် ဆၢထၢၣ်လၢ ယဟိဝၤယွၤ အမဲာ်ညါလီၤ.+ ၁၇ ပှၤလုၢ်တၢ်ဒိၣ် ကဟံးန့ၢ်ဝဲ ထံစီဆှံ လၢသပၢၤဟီၣ်ခိၣ်အပူၤ ဒီးကဟံးန့ၢ်ဝဲ ဟီၣ်ခိၣ်ကမူၣ်တနီၤလၢ ဒဲစီဆှံအဟီၣ်ခိၣ်လိၤ ဒီးထၢနုာ်အီၤ လၢထံကျါလီၤ. ၁၈ ဒီးပှၤလုၢ်တၢ်ဒိၣ်န့ၣ် ကဘၣ်မၢ ပိာ်မုၣ်တဂၤအံၤ ဆၢထၢၣ်လၢ ယဟိဝၤယွၤ အမဲာ်ညါ ဒီးအကရၢ်လီၤဝဲ ပိာ်မုၣ်တဂၤအံၤ အခိၣ်ဆူၣ်လီၤ. ဒီးတၢ်လုၢ်ဘု လၢကဒုးသ့ၣ်နီၣ်အီၤ လၢအတၢ်ကမၣ်န့ၣ် ပှၤလုၢ်တၢ်ဒိၣ် ကပာ်ဝဲလၢ ပိာ်မုၣ်အံၤ အစုညါသး အပူၤလီၤ. အဝဲန့ၣ် မ့ၢ်တၢ်လုၢ်ဘုလၢ ဘၣ်ဃးဒီး တၢ်သူၣ်က့ၣ်သးကါလီၤ.+ ဒီးထံခၣ်လၢ အဒုးအိၣ်ထီၣ် တၢ်ဆိၣ်အၢန့ၣ် ကဘၣ်အိၣ်ဝဲလၢ ပှၤလုၢ်တၢ်ဒိၣ် အစုပူၤလီၤ.+
၁၉ “‘ဒီးပှၤလုၢ်တၢ်ဒိၣ်န့ၣ် ကဘၣ်မၢပိာ်မုၣ် အၢၣ်လီၤတၢ် ဒီးကတဲဘၣ် ပိာ်မုၣ်လၢ “ဖဲနဖျီသးဒီး နဝၤ ဝံၤအလီၢ်ခံ*+ နမ့ၢ် တမံဃုာ်ဒီး ပှၤပိာ်ခွါ နီတဂၤဘၣ် ဒီးနမ့ၢ် တမၤတၢ်ဒဲးဘး ဒီးမၤဘၣ်အၢလီၤ နသးဘၣ်န့ၣ် ထံခၣ်လၢ အဒုးအိၣ်ထီၣ် တၢ်ဆိၣ်အၢ မ်အသု တမၤဘၣ်ဒိနၤ တဂ့ၤ. ၂၀ ဘၣ်ဆၣ် ဖဲနဖျီသးဒီးနဝၤ ဝံၤအလီၢ်ခံ နမ့ၢ်မၤတၢ်ဒဲးဘး ခီဖျိလၢ နမၤဘၣ်အၢလီၤနသး ဒီးနမံဃုာ်ဒီး ပိာ်ခွါအဂၤ တဂၤလၢ+ အတမ့ၢ် နဝၤဘၣ်ဒု—” ၂၁ ဝံၤဒီး ပှၤလုၢ်တၢ်ဒိၣ် ကမၢအမၤ တၢ်အၢၣ်လီၤလၢ အပၣ်ဃုာ်ဒီး တၢ်ဆိၣ်အၢ ဒီးပှၤလုၢ်တၢ်ဒိၣ်န့ၣ် ကတဲ ပိာ်မုၣ်တဂၤအံၤလၢ “မ်ယဟိဝၤယွၤ မၤဃ့ထီ နဒၢလီၢ်* ဒီးဒုးညိးထီၣ် နဟၢဖၢ ဒီးမ်ယဟိဝၤယွၤ ဒုးကဲထီၣ်နၤလၢ တၢ်အဒိလၢ နပှၤဂီၢ်မုၢ် ကယၢၤထီၣ်ဝဲ ဖဲအဝဲသ့ၣ် ဆိၣ်အၢတၢ် ဒီးအၢၣ်လီၤတၢ် အခါန့ၣ်တက့ၢ်. ၂၂ ဒီးထံလၢအဒုးအိၣ်ထီၣ် တၢ်ဆိၣ်အၢန့ၣ် ကနုာ်လီၤလၢ နပှံာ်ပူၤ ဒီးကဒုးညိးထီၣ် နဟၢဖၢ ဒီးမၤဃ့ထီနဒၢလီၢ်လီၤ.” ဒီးပိာ်မုၣ်န့ၣ် ကဘၣ်တဲဝဲလၢ “အၤမ့ၣ်, အၤမ့ၣ်” လီၤ.
၂၃ “‘ဒီးပှၤလုၢ်တၢ်ဒိၣ် ကကွဲးလီၤ တၢ်ဆိၣ်အၢတဖၣ်အံၤ လၢလံာ်ပူၤ ဒီးကထွါဝဲလၢ ထံခၣ်လီၤ. ၂၄ ဒီးအဝဲကဒုးအီဝဲ ပိာ်မုၣ်တဂၤန့ၣ် လၢထံခၣ် လၢအဒုးအိၣ်ထီၣ် တၢ်ဆိၣ်အၢ ဒီးထံခၣ်လၢ အဒုးအိၣ်ထီၣ် တၢ်ဆိၣ်အၢန့ၣ် ကနုာ်လီၤ လၢအပူၤ ဒီးကကဲထီၣ် တၢ်လၢအခၣ်လီၤ. ၂၅ ပှၤလုၢ်တၢ်ဒိၣ် ကဟံးန့ၢ်ဝဲ တၢ်လုၢ်ဘုလၢ အဘၣ်ဃးဒီး တၢ်သူၣ်က့ၣ်သးကါ+ လၢပိာ်မုၣ်တဂၤန့ၣ် အစုပူၤ ဒီးကဝံၢ်ဝၢ်ဝဲလၢ အလီၢ်ခံ ဒီးအမဲာ်ညါ လၢယဟိဝၤယွၤ အမဲာ်ညါ ဝံၤဒီး အဝဲ ကလဲၤစိာ်ဘူးဝဲဒီး တၢ်လုၢ်လီၢ်လီၤ. ၂၆ ဒီးပှၤလုၢ်တၢ်ဒိၣ် ကဟံးန့ၢ်ဝဲ တၢ်လုၢ်ဘု တစှီၤ ဒ်တၢ်လၢအခၢၣ်စး တၢ်လုၢ်ဒီတခါ ဒီးကဒွဲၣ်အူထီၣ်ဝဲ လၢတၢ်လုၢ်လီၢ်အဖီခိၣ် ဒ်သိး အကခုၣ်ထီၣ် အဂီၢ်လီၤ.+ အဝဲမၤဒ်န့ၣ်မ့ၢ်ဝံၤန့ၣ် အကမၢ ပိာ်မုၣ်အံၤ အီထံခၣ်လၢ အဒုးအိၣ်ထီၣ် တၢ်ဆိၣ်အၢလီၤ. ၂၇ ဖဲပှၤလုၢ်တၢ်ဒိၣ် ဒုးအီဝဲ ပိာ်မုၣ်တဂၤန့ၣ် လၢထံအံၤအခါ ပိာ်မုၣ်အံၤ မ့ၢ်မၤဘၣ်အၢလီၤတ့ၢ်အသး ခီဖျိလၢ အတတီဒီး အဝၤဘၣ်အဃိန့ၣ် ထံလၢ အဒုးအိၣ်ထီၣ် တၢ်ဆိၣ်အၢန့ၣ် ကနုာ်လီၤလၢအပူၤ ဒီးကကဲထီၣ် တၢ်လၢအခၣ်လီၤ. ဒီးပိာ်မုၣ်န့ၣ် အဟၢဖၢ ကညိးထီၣ် ဒီးအဒၢလီၢ် ကဃ့ထီ ဒီးအကဲထီၣ် တၢ်အဒိလၢ အပှၤဂီၢ်မုၢ် ကယၢၤထီၣ်ဝဲ ဖဲအဝဲသ့ၣ် ဆိၣ်အၢတၢ် အခါန့ၣ်လီၤ. ၂၈ ဘၣ်ဆၣ် ပိာ်မုၣ်အံၤ မ့ၢ်တမၤဘၣ်အၢလီၤအသးဘၣ် ဒီးမ့ၢ်ကဆှီဝဲန့ၣ် အဝဲကပူၤဒီး တၢ်စံၣ်ညီၣ်အံၤလီၤ. အဃိ အဝဲဒၢထီၣ်ဝဲကန့ၢ် ဒီးကအိၣ်ဖျဲၣ်ထီၣ် အဖိလီၤ.
၂၉ “‘အဝဲန့ၣ်မ့ၢ်ဝဲ တၢ်သိၣ်တၢ်သီလၢ ဘၣ်ဃးဒီး တၢ်သူၣ်က့ၣ်သးကါလီၤ.+ ဖဲပှၤပိာ်မုၣ်တဂၤ ဖျီအသးဒီး အဝၤဝံၤအလီၢ်ခံ အဝဲ မ့ၢ်မၤတၢ်ဒဲးဘး ဒီးမ့ၢ်မၤဘၣ်အၢလီၤအသး ၃၀ မ့တမ့ၢ် ပှၤပိာ်ခွါတဂၤ မ့ၢ်သူၣ်က့ၣ်သးကါအမါ ဒီးမ့ၢ်သးဒ့ဒီ လၢအမါ အတၢ်သးတီ အဖီခိၣ်န့ၣ် အဝဲ ကဘၣ်မၢ အမါ ဆၢထၢၣ်လၢ ယဟိဝၤယွၤ အမဲာ်ညါလီၤ. ဒီးပှၤလုၢ်တၢ်ဒိၣ် ဘၣ်မၤဝဲ ပိာ်မုၣ်တဂၤန့ၣ် ဒ်တၢ်သိၣ်တၢ်သီအံၤ အိၣ်ဝဲအသိး ခဲလၢာ်လီၤ. ၃၁ ပှၤပိာ်ခွါတဂၤန့ၣ် ကပူၤဖျဲးလၢ တၢ်ကမၣ် ဒီးမ့မ့ၢ်အမါန့ၣ် ကဘၣ် ဟ့ၣ်တၢ်စံးဆၢ လၢအတၢ်ကမၣ် အဃိလီၤ.’”
၆ ယဟိဝၤယွၤ တဲစီၤမိၤၡ့လၢ ၂ “တဲဘၣ် ပှၤအံၣ်စရ့လးဖိလၢ ‘ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ လၢအမၤတၢ်အၢၣ်လီၤ လီၤဆီလၢ အကအိၣ်မူဒ် ပှၤနစၤရံဖိ*+ လၢယဟိဝၤယွၤ အဂီၢ်န့ၣ် ၃ အဝဲ ကဘၣ်ဟးဆှဲး စပံးထံ ဒီးတၢ်ထံတၢ်နိအဂၤ လၢအပၣ်ဃုာ်ဒီး သံးလီၤ. အဝဲတဘၣ်အီ စပံးထံလၢ အဆံၣ် ဒီးသံးလၢအဆံၣ်ဘၣ်. တၢ်ထံတၢ်နိ တမံၤဂ့ၤ တမံၤဂ့ၤလၢ ပှၤတ့အီၤလၢ စပံးသၣ်န့ၣ် အဝဲ တဘၣ်အီဘၣ်.+ ဒီးစပံးသၣ် လၢအသၣ်ဂ့ၤမ့ၢ်ဂ့ၤ, အဃ့မ့ၢ်ဂ့ၤ တဘၣ်အီၣ်ဝဲဘၣ်. ၄ ဖဲမုၢ်နံၤတဖၣ်လၢ အဝဲကဲ ပှၤနစၤရံဖိ အခါ စပံးသၣ်လၢ အတမံဘၣ်မ့ၢ်ဂ့ၤ စပံးသၣ် အဘ့ၣ်မ့ၢ်ဂ့ၤ တၢ်တမံၤဂ့ၤတမံၤဂ့ၤလၢ အဟဲလၢစပံးမုၢ် အအိၣ်န့ၣ် အဝဲတဘၣ်အီၣ်ဘၣ်.
၅ “‘ဖဲမုၢ်နံၤတဖၣ်လၢ အဝဲအၢၣ်လီၤလၢ အကကဲ ပှၤနစၤရံဖိ ဒီတကတီၢ်န့ၣ် အဝဲတဘၣ် တံာ်အခိၣ်ဆူၣ်ဘၣ်.+ ဒ်သိး အကအိၣ် စီဆှံအဂီၢ် အကဘၣ်ပာ်ထီ အခိၣ်ဆူၣ် တုၤလီၤလၢ မုၢ်နံၤတဖၣ်လၢ တၢ်ပာ်လီၤဆီအီၤလၢ ယဟိဝၤယွၤအဂီၢ် ပှဲၤထီၣ် တစုလီၤ. ၆ မုၢ်နံၤတဖၣ်လၢ တၢ်ပာ်လီၤဆီအီၤလၢ ယဟိဝၤယွၤအဂီၢ် ဒီတကတီၢ်န့ၣ် အဝဲ တဘၣ်လဲၤမၤဘူး ပှၤသံ* ဘၣ်. ၇ မ့ၢ်လၢ ကစၢ်ယွၤ အပှၤနစၤရံဖိ အတၢ်ပနီၣ် အိၣ်ဝဲလၢ အခိၣ်လိၤအဃိ အမိၢ်မ့ၢ်ဂ့ၤ, အပၢ်မ့ၢ်ဂ့ၤ, အဒီပုၢ်ဝဲၢ်မုၣ်မ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ မ့ၢ်သံဒၣ်လဲာ် အတဘၣ် မၤဘၣ်အၢလီၤ အသးဘၣ်.+
၈ “‘ဖဲမုၢ်နံၤတဖၣ်လၢ အဝဲကဲ ပှၤနစၤရံဖိ ဒီတကတီၢ်န့ၣ် အဝဲ စီဆှံလၢ ယဟိဝၤယွၤ အဂီၢ်လီၤ. ၉ ဘၣ်ဆၣ် ပှၤတဂၤဂၤ မ့ၢ်သံလၢ အကပၤ သတူၢ်ကလာ်+ ဒီးအဝဲ မ့ၢ်မၤဘၣ်အၢလီၤ အခိၣ်ဆူၣ်လၢ အမ့ၢ်တၢ်ပနီၣ်လၢ တၢ်ပာ်လီၤဆီအီၤလၢ ကစၢ်ယွၤအဂီၢ်န့ၣ် အဝဲကဘၣ် လူၤအခိၣ်ဆူၣ်+ ဖဲမုၢ်နံၤလၢ အဝဲ ကဆှီထီၣ် အနံၤန့ၣ်လီၤ. အဝဲကဘၣ်လူၤ အခိၣ်ဆူၣ်ဖဲ နွံသီတသီလီၤ. ၁၀ ဒီးဖဲဃိးသီတသီန့ၣ် အဝဲ ကဘၣ်ဟဲစိာ်ဝဲ ထိၣ်လွံၢ် ခံဘ့ၣ် မ့တမ့ၢ် ထိၣ်ကးက့ၣ်ဖိ ခံဘ့ၣ် လၢပှၤလုၢ်တၢ်ဒိၣ်အအိၣ် လၢတၢ်အိၣ်ဖှိၣ်အဒဲ အတၢ်နုာ်လီၤအလီၢ်လီၤ. ၁၁ ဒီးပှၤလုၢ်တၢ်ဒိၣ်န့ၣ် ကလုၢ်ထီၣ်ဝဲ တဘ့ၣ်လၢ တၢ်လုၢ်လၢ တၢ်ဒဲးဘးအဂီၢ် ဒီးအဝဲတဘ့ၣ်လၢ တၢ်လုၢ်ဒွဲၣ်အူ အဂီၢ်လီၤ. ဒီးပှၤလုၢ်တၢ်ဒိၣ် ကမၤဘၣ်လိာ်ဖိးဒ့က့ၤတၢ်လၢအဂီၢ် ခီဖျိလၢ အတၢ်ဒဲးဘးအိၣ်ဝဲလၢ+ ပှၤသံ* အဃိလီၤ. ဒီးအဝဲ ကဘၣ် ပာ်စီဆှံ အခိၣ် ဖဲမုၢ်နံၤ အဝဲန့ၣ်လီၤ. ၁၂ ဒီးအဝဲကဘၣ် ပာ်လီၤဆီ ကဒီးအသးလၢ ယဟိဝၤယွၤအဂီၢ် ဒီးမုၢ်နံၤတဖၣ်လၢ အအၢၣ်လီၤပာ်စၢၤလၢ အကအိၣ်မူဒ် ပှၤနစၤရံဖိအသိးန့ၣ် အဝဲ ဘၣ်က့ၤစးထီၣ်ဝဲလၢ အသီတဘျီလီၤ. ဒီးအကဘၣ် ဟဲစိာ်ဝဲ သိဖါဖိတဒုလၢ အအိၣ်တနံၣ်လၢ တၢ်လုၢ်လၢ တၢ်ကမၣ် အဂီၢ်လီၤ. ဘၣ်ဆၣ် မ့ၢ်လၢ အမၤဘၣ်အၢလီၤအသးအဃိ မုၢ်နံၤတဖၣ် ဖဲအကဲတ့ၢ် ပှၤနစၤရံဖိ လၢအပူၤကွံာ်န့ၣ် တၢ်တက့ၤဒွးဃုာ်ဝဲ လၢၤဘၣ်.
၁၃ “‘အဝဲအံၤ မ့ၢ်ဝဲ တၢ်သိၣ်တၢ်သီ လၢအဘၣ်ဃးဒီး ပှၤနစၤရံဖိလီၤ. ဖဲမုၢ်နံၤတဖၣ်လၢ အဝဲကဲ ပှၤနစၤရံဖိ ပှဲၤထီၣ်အခါ+ ပှၤကဘၣ် လဲၤကိးအီၤလၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ်လီၤ. ၁၄ ဒီးအဝဲ ကဘၣ်ဟဲစိာ်ဝဲ အတၢ်လုၢ်လၢ ယဟိဝၤယွၤ အအိၣ်လီၤ. အဝဲကဘၣ် ဟဲစိာ်ဝဲ သိဖါဖိလၢ အလၢအပှဲၤ တဒု လၢအသးအိၣ်တနံၣ် လၢတၢ်လုၢ်ဒွဲၣ်အူအဂီၢ်+ ဒီးသိမိၢ်ဖိ လၢအလၢအပှဲၤတဒု လၢအသးအိၣ်တနံၣ် လၢတၢ်လုၢ်လၢ တၢ်ဒဲးဘးအဂီၢ်+ ဒီးသိဖါလၢ အလၢအပှဲၤတဒု လၢတၢ်လုၢ်အိၣ်ဃူအိၣ်ဖိး အဂီၢ်,+ ၁၅ နာ်တဖျၢၣ် လၢအအိၣ်ဒီး ကိၣ်လၢ အတပၣ်ဒီး ကိၣ်မံၣ်ဘၣ် လၢအဘၣ်တၢ်တ့အီၤ ဃုာ်ဒီးသိ ဒီးအလီၤဂာ်ဒ် ကိၣ်ထံဖှံၣ် အသိး ဒီးကိၣ်ဘူဘူဖိလၢ အတပၣ်ဒီး ကိၣ်မံၣ်ဘၣ်လၢ တၢ်ဖှူအီၤလၢသိ, တၢ်လုၢ်ဘု+ ဒီးစပံးထံ လၢတၢ်လုၢ်တၢ်ပာ် အဂီၢ်လီၤ.+ ၁၆ ပှၤလုၢ်တၢ်ဒိၣ် ကဟဲစိာ်ဝဲ တၢ်သ့ၣ်တဖၣ်န့ၣ် လၢယဟိဝၤယွၤ အမဲာ်ညါ ဒီးအဆိကတၢၢ်န့ၣ် ကလုၢ်ထီၣ်ဝဲ တၢ်လုၢ်လၢ တၢ်ဒဲးဘးအဂီၢ် ဒီးတၢ်လုၢ်ဒွဲၣ်အူလီၤ. ၁၇ ဒီးပှၤလုၢ်တၢ်ဒိၣ် ကလုၢ်ထီၣ်ဝဲ သိဖါ ဒ်တၢ်လုၢ်အိၣ်ဃူအိၣ်ဖိးအသိး လၢယဟိဝၤယွၤအအိၣ် ဃုာ်ဒီး ကိၣ်လၢအတပၣ်ဒီး ကိၣ်မံၣ်ဘၣ် တနာ်လီၤ. ဒီးအဝဲကလုၢ်ထီၣ်ဝဲ တၢ်လုၢ်ဘု+ ဒီးစပံးထံလၢ တၢ်လုၢ်တၢ်ပာ် အဂီၢ်လီၤ.
၁၈ “‘ဝံၤဒီး ပှၤနစၤရံဖိ တဂၤန့ၣ် ကဘၣ်လူၤ အခိၣ်ဆူၣ်လၢ အပာ်ထီဝဲန့ၣ်+ ဖဲတၢ်အိၣ်ဖှိၣ်အဒဲ အတၢ်နုာ်လီၤအလီၢ်န့ၣ်လီၤ. ဒီးအကဘၣ်လဲၤစိာ် အခိၣ်ဆူၣ်လၢ အပာ်ထီဝဲ ဖဲအကဲ ပှၤနစၤရံဖိ အဆၢကတီၢ် ဒီးပာ်အီၤလၢ မ့ၣ်အူအပူၤ လၢအအိၣ်ဝဲလၢ တၢ်လုၢ်အိၣ်ဃူအိၣ်ဖိး အဖီလာ်လီၤ. ၁၉ ပှၤလုၢ်တၢ်ဒိၣ် ကဟံးန့ၢ်ဝဲ သိဖါ အဖံဘၣ်ခိၣ် လၢပှၤချီအီၤ,+ ကိၣ်တလိၣ်လၢ အတပၣ်ဒီး ကိၣ်မံၣ်ဘၣ် လၢအလီၤဂာ်ဒ် ကိၣ်ထံဖှံၣ် အသိး လၢနာ်ပူၤ, ကိၣ်ဘူဘူဖိတဘ့ၣ်လၢ အတပၣ်ဒီးကိၣ်မံၣ်ဘၣ် ဒီးကပာ်လီၤဝဲလၢ ပှၤနစၤရံဖိ အစုညါသးအလိၤ ဖဲအဝဲ လူၤကွံာ်ဝဲ ပှၤနစၤရံဖိ အတၢ်ပနီၣ် လၢအခိၣ်လိၤ ဝံၤအခါလီၤ. ၂၀ ဒီးပှၤလုၢ်တၢ်ဒိၣ် ကဝံၢ်ဝၢ် တၢ်သ့ၣ်တဖၣ်န့ၣ် လၢအလီၢ်ခံ ဒီးအမဲာ်ညါ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါလီၤ.+ တၢ်သ့ၣ်တဖၣ်န့ၣ် ဒီးတၢ်အသးနါပှၢ်လၢ တၢ်လုၢ်ဝံၢ်ဝၢ်အဂီၢ် ဒီးတၢ်အခီၣ်လၢ အဘၣ်တၢ်ဟ့ၣ်လီၤအီၤ လၢတၢ်မၤဘူၣ်အဂီၢ်န့ၣ် မ့ၢ်ဝဲ တၢ်လၢ အစီဆှံလၢ အဘၣ်တၢ်ဟ့ၣ်လီၤအီၤ ဒ်ပှၤလုၢ်တၢ်ဒိၣ် အတၢ်လီၤ.+ ဝံၤဒီး ပှၤလၢအကဲတ့ၢ် ပှၤနစၤရံဖိတဂၤအံၤ အီဝဲစပံးထံ သ့လီၤ.
၂၁ “‘တၢ်သိၣ်တၢ်သီလၢ အဘၣ်ဃးဒီး ပှၤနစၤရံဖိ+ လၢအမၤ တၢ်အၢၣ်လီၤန့ၣ် အိၣ်ဝဲဒ်အံၤလီၤ. ပှၤနစၤရံဖိတဂၤ အတၢ်မ့ၢ်ယၢဝဲလၢ* အကလုၢ်ထီၣ် တၢ်လုၢ်တဖၣ်လၢ ယဟိဝၤယွၤအအိၣ် အါန့ၢ်ဒံး တၢ်လၢ အကဘၣ်လုၢ်ထီၣ်ဝဲ ဒီးအဝဲမ့ၢ်မၤဝဲ တၢ်အၢၣ်လီၤလၢ အကလုၢ်ထီၣ် တၢ်လုၢ်တဖၣ်အံၤန့ၣ် အကဘၣ် မၤလၢပှဲၤဝဲ အတၢ်အၢၣ်လီၤ ဒ်ပှၤနစၤရံဖိ အတၢ်သိၣ်တၢ်သီ အိၣ်ဝဲအသိးလီၤ.’”
၂၂ ယဟိဝၤယွၤ တဲစီၤမိၤၡ့လၢ ၂၃ “တဲဘၣ် စီၤအၤဟရိၣ် ဒီးအဖိခွါတဖၣ်လၢ ‘သုကဘၣ် ဆိၣ်ဂ့ၤ+ ပှၤအံၣ်စရ့လးဖိတဖၣ် ဒ်အံၤလီၤ. တဲအဝဲသ့ၣ်လၢ
၂၄ “မ်ယဟိဝၤယွၤ ဆိၣ်ဂ့ၤနၤ+ ဒီးဒီသဒၢနၤတက့ၢ်.
၂၅ မ်ယဟိဝၤယွၤ ပာ်ဖျါထီၣ် တၢ်သူၣ်ဂ့ၤသးဝါ လၢနဖီခိၣ်+ ဒီးမ်အဘၣ်သူၣ်ဘၣ်သးနၤ တက့ၢ်.
၂၆ မ်ယဟိဝၤယွၤ ပာ်ဖျါထီၣ်လၢ အဘၣ်သူၣ်ဘၣ်သးနၤ ဒီးဟ့ၣ်လီၤနၤ တၢ်သူၣ်မံသးမုာ် တက့ၢ်.’”+
၂၇ ဒီးအဝဲသ့ၣ် ကဘၣ်သူယမံၤ လၢကဆိၣ်ဂ့ၤ ပှၤအံၣ်စရ့လးဖိတဖၣ်အဂီၢ်+ ဒီးယကဆိၣ်ဂ့ၤ ပှၤအံၣ်စရ့လးဖိတဖၣ်လီၤ.”+
၇ ဖဲစီၤမိၤၡ့ ရဲၣ်လီၤကျဲၤလီၤ ဒဲစီဆှံ ဝံၤအနံၤန့ၣ်+ အဝဲ ဒိးဖှူဒဲစီဆှံ+ ဒီးပာ်စီဆှံဝဲ ဃုာ်ဒီး ဒဲစီဆှံ အတၢ်ဖိတၢ်လံၤ ခဲလၢာ် ဒီးတၢ်လုၢ်လီၢ် ဒီးအတၢ်ပီးတၢ်လီ ခဲလၢာ်လီၤ.+ ဖဲအဝဲ ဒိးဖှူဒီးပာ်စီဆှံ တၢ်သ့ၣ်တဖၣ်န့ၣ်+ ဝံၤအခါ ၂ ပှၤအံၣ်စရ့လးဖိ အခိၣ်အနၢ်တဖၣ်+ လၢအမ့ၢ် ဒူၣ်ဖိထၢဖိ အခိၣ်အနၢ်တဖၣ် လုၢ်ထီၣ်တၢ်လီၤ. ပှၤအဒူၣ် အခိၣ်အနၢ်တဖၣ်အံၤလၢ အတီခိၣ်ရိၤမဲဝဲ တၢ်ထၢ ပှၤမံၤပှၤသၣ်တဖၣ်န့ၣ် ၃ ဟဲစိာ်ဝဲ အတၢ်လုၢ်လၢ ယဟိဝၤယွၤ အမဲာ်ညါလီၤ. ဒီးအဝဲသ့ၣ် အတၢ်လုၢ်မ့ၢ်ဝဲ လ့ၣ်* ဃုခိၣ် ဒီးကျီၢ်ဖါ ၁၂ ဒုလီၤ. အဃိ ပှၤခိၣ်ပှၤနၢ်တဖၣ်အံၤ ဟဲစိာ်ဝဲလ့ၣ်, ခံဂၤတခိၣ် ခံဂၤတခိၣ် ဒီးကျီၢ်ဖါ တဂၤတဒု စုာ်စုာ်လီၤ. ဒီးအဝဲသ့ၣ် ဟဲစိာ် တၢ်သ့ၣ်တဖၣ်န့ၣ်လၢ ဒဲစီဆှံ အမဲာ်ညါလီၤ. ၄ ယဟိဝၤယွၤ တဲစီၤမိၤၡ့လၢ ၅ “ပှၤကသူ တၢ်သ့ၣ်တဖၣ်အံၤလၢ တၢ်အိၣ်ဖှိၣ်အဒဲ အတၢ်မၤအဂီၢ် အဃိ တူၢ်လိာ် တၢ်သ့ၣ်တဖၣ်အံၤလၢ အဝဲသ့ၣ် အအိၣ်တက့ၢ်. ဒီးနကဘၣ် ဟ့ၣ်လီၤက့ၤ တၢ်သ့ၣ်တဖၣ်အံၤလၢ ပှၤလ့ၤဝံဖိတဖၣ်အအိၣ် ဒ်အဝဲသ့ၣ် တဂၤစုာ်စုာ် လိၣ်ဘၣ်ဝဲလၢ အမူဒါအဂီၢ် အသိးလီၤ.”
၆ အဃိ စီၤမိၤၡ့ တူၢ်လိာ် လ့ၣ်တဖၣ်အံၤ ဒီးကျီၢ်တဖၣ် ဒီးဟ့ၣ်လီၤက့ၤဝဲ ပှၤလ့ၤဝံဖိတဖၣ်လီၤ. ၇ ဒီးအဝဲ ဟ့ၣ်လီၤဝဲ စီၤက့ရၡိၣ် အစၢၤအသွဲၣ်တဖၣ် လ့ၣ်ခံခိၣ် ဒီးကျီၢ်ဖါလွံၢ်ဒု ဒ်အဝဲသ့ၣ် လိၣ်ဘၣ်ဝဲလၢ အမူဒါအဂီၢ် အသိးလီၤ.+ ၈ ဒီးအဝဲဟ့ၣ်လီၤဝဲ စီၤမရၤရံၤ အစၢၤအသွဲၣ်တဖၣ် လ့ၣ်လွံၢ်ခိၣ် ဒီးကျီၢ်ဖါဃိးဒု ဒ်အဝဲသ့ၣ် လိၣ်ဘၣ်ဝဲလၢ အမူဒါအဂီၢ် အသိးလီၤ. တၢ်သ့ၣ်တဖၣ်န့ၣ် အိၣ်ဝဲလၢ ပှၤလုၢ်တၢ်ဒိၣ် စီၤအၤဟရိၣ် အဖိခွါ စီၤအံသမၢ် အတၢ်ဟံးစုနဲၣ်ကျဲ အဖီလာ်လီၤ.+ ၉ ဘၣ်ဆၣ် အဝဲတဟ့ၣ်လီၤ စီၤကဃး အစၢၤအသွဲၣ်တဖၣ် လၢတၢ်နီတမံၤဘၣ်, မ့ၢ်လၢအဝဲသ့ၣ် အမူဒါတဖၣ်န့ၣ် မ့ၢ်တၢ်မၤလၢ အဘၣ်ထွဲလိာ်သးဒီး တၢ်စီဆှံအလီၢ်+ ဒီးအဝဲသ့ၣ် ဘၣ်ယိးဝဲ တၢ်လၢအစီဆှံတဖၣ် လၢအဖံဘၣ်ခိၣ် အဃိလီၤ.+
၁၀ ဒီးပှၤခိၣ်ပှၤနၢ်တဖၣ်န့ၣ် ဟဲစိာ်ဝဲ တၢ်လုၢ်အဂၤတမံၤ ဖဲတၢ်ပာ်စီဆှံ ဒီးတၢ်ဒိးဖှူ တၢ်လုၢ်လီၢ် အဆၢကတီၢ်လီၤ.+ ဖဲပှၤခိၣ်ပှၤနၢ်တဖၣ် ဟဲစိာ်ဝဲ အတၢ်လုၢ်လၢ တၢ်လုၢ်လီၢ် အမဲာ်ညါအခါ ၁၁ ယဟိဝၤယွၤ တဲဘၣ်စီၤမိၤၡ့လၢ “လၢတၢ်ပာ်စီဆှံ တၢ်လုၢ်လီၢ် အဂီၢ်န့ၣ် ပှၤခိၣ်ပှၤနၢ် တဂၤစုာ်စုာ် ကဘၣ်ဟဲစိာ် အတၢ်လုၢ် တဂၤတနံၤ တဂၤတနံၤလီၤ.”
၁၂ ဖဲအဆိကတၢၢ်တနံၤန့ၣ် စီၤဧးမံၤနဒး အဖိခွါ စီၤနးၡိၣ်+ လၢအပၣ်ဃုာ်လၢ ယူဒၤအဒူၣ်ကျါန့ၣ် ဟဲစိာ် အတၢ်လုၢ်လီၤ. ၁၃ အဝဲအတၢ်လုၢ်န့ၣ် မ့ၢ်ဝဲ လီခီစ့တဘ့ၣ်လၢ အဃၢဝဲ ၡက့လး* ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၁၄ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၁၅ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၁၆ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၁၇ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤဧးမံၤနဒး အဖိခွါ စီၤနးၡိၣ် အတၢ်လုၢ်လီၤ.+
၁၈ ဖဲခံနံၤတနံၤန့ၣ် စီၤစူဧၢ် အဖိခွါ စီၤနၤသန့လး+ လၢအမ့ၢ် ယံးစၣ်ကၢ်အဒူၣ် အခိၣ်အနၢ်န့ၣ် ဟဲစိာ် အတၢ်လုၢ်လီၤ. ၁၉ အဝဲ ဟဲစိာ်ဝဲ အတၢ်လုၢ်လၢအမ့ၢ် လီခီစ့ တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၂၀ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၂၁ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၂၂ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၂၃ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤစူဧၢ် အဖိခွါ စီၤနၤသန့လး အတၢ်လုၢ်လီၤ.
၂၄ ဖဲသၢနံၤတနံၤန့ၣ် စီၤဃ့လူၣ် အဖိခွါ စီၤအလံအာ်+ လၢအမ့ၢ် စီၤစဘူလိၣ် အစၢၤအသွဲၣ်တဖၣ် အခိၣ်အနၢ် တဂၤန့ၣ် ၂၅ ဟဲစိာ်ဝဲ အတၢ်လုၢ်လၢအမ့ၢ် လီခီစ့တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၂၆ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၂၇ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၂၈ မဲာ်တဲးလဲးဖိ တဒုလၢ တၢ်လုၢ်လၢ တၢ်ဒဲးဘးအဂီၢ်+ ၂၉ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိ ယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤဃ့လူၣ် အဖိခွါ စီၤအလံအာ် အတၢ်လုၢ်လီၤ.+
၃၀ ဖဲလွံၢ်နံၤတနံၤန့ၣ် စီၤၡဒ့အူၢ် အဖိခွါ စီၤအလံစူၢ်+ လၢအမ့ၢ် စီၤရူၤဘ့ၣ် အစၢၤအသွဲၣ်တဖၣ် အခိၣ်အနၢ် တဂၤန့ၣ် ၃၁ ဟဲစိာ်ဝဲ အတၢ်လုၢ် လၢအမ့ၢ် လီခီစ့ တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၃၂ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၃၃ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၃၄ မဲာ်တဲးလဲးဖိ တဒုလၢ တၢ်လုၢ်လၢ တၢ်ဒဲးဘးအဂီၢ်+ ၃၅ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤၡဒ့အူၢ် အဖိခွါ စီၤအလံစူၢ် အတၢ်လုၢ်လီၤ.+
၃၆ ဖဲယဲၢ်နံၤတနံၤန့ၣ် စီၤစူၤရံၡးဒံၤ အဖိခွါ စီၤၡလူမံၤအ့လး+ လၢအမ့ၢ် စီၤစူၤမ့းအိၣ် အစၢၤအသွဲၣ်တဖၣ် အခိၣ်အနၢ် တဂၤန့ၣ် ၃၇ ဟဲစိာ်ဝဲ အတၢ်လုၢ် လၢအမ့ၢ် လီခီစ့တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၃၈ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၃၉ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၄၀ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၄၁ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤစူၤရံၡးဒံၤ အဖိခွါ စီၤၡလူမံၤအ့လး အတၢ်လုၢ်လီၤ.+
၄၂ ဖဲဃုနံၤတနံၤန့ၣ် စီၤဒဧူၤအ့လး အဖိခွါ စီၤအ့လယၤစာ်+ လၢအမ့ၢ် စီၤကး အစၢၤအသွဲၣ်တဖၣ် အခိၣ်အနၢ် တဂၤန့ၣ် ၄၃ ဟဲစိာ်ဝဲ အတၢ်လုၢ် လၢအမ့ၢ် လီခီစ့တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၄၄ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၄၅ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၄၆ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၄၇ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤဒဧူၤအ့လး အဖိခွါ စီၤအ့လယၤစာ် အတၢ်လုၢ်လီၤ.+
၄၈ ဖဲနွံနံၤတနံၤန့ၣ် စီၤဧးမံၤဟူး အဖိခွါ စီၤအလံၡမၤ+ လၢအမ့ၢ် စီၤအ့ဖရဲၣ် အစၢၤအသွဲၣ်တဖၣ် အခိၣ်အနၢ် တဂၤန့ၣ် ၄၉ ဟဲစိာ်ဝဲ အတၢ်လုၢ်လၢ အမ့ၢ် လီခီစ့တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၅၀ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၅၁ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၅၂ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၅၃ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤဧးမံၤဟူး အဖိခွါ စီၤအလံၡမၤ အတၢ်လုၢ်လီၤ.+
၅၄ ဖဲဃိးနံၤတနံၤန့ၣ် စီၤပဒၤစူၢ် အဖိခွါ စီၤကမၤလ့လး+ လၢအမ့ၢ် စီၤမနၤၡ့ၤ အစၢၤအသွဲၣ်တဖၣ် အခိၣ်အနၢ် တဂၤန့ၣ် ၅၅ ဟဲစိာ်ဝဲ အတၢ်လုၢ် လၢအမ့ၢ် လီခီစ့တဘ့ၣ် လၢအဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၅၆ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူတဖၣ်, ၅၇ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၅၈ မဲာ်တဲးလဲးဖိ တဒုလၢ တၢ်လုၢ်တၢ်ဒဲးဘးအဂီၢ်+ ၅၉ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤပဒၤစူၢ် အဖိခွါ စီၤကမၤလ့လး အတၢ်လုၢ်လီၤ.+
၆၀ ဖဲခွံနံၤတနံၤန့ၣ် စီၤကံးဒဧိနံၤ အဖိခွါ စီၤအဘံဒၣ်+ လၢအမ့ၢ် စီၤဘံၣ်ယၤမံၣ် အစၢၤအသွဲၣ်တဖၣ် အခိၣ်အနၢ် တဂၤန့ၣ်+ ၆၁ ဟဲစိာ်ဝဲ အတၢ်လုၢ် လၢအမ့ၢ် လီခီစ့တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၆၂ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၆၃ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၆၄ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၆၅ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤကံးဒဧိနံၤ အဖိခွါ စီၤအဘံဒၣ် အတၢ်လုၢ်လီၤ.+
၆၆ ဖဲအသီတဆံ အနံၤန့ၣ် စီၤဧးမံၤၡးဒံၤ အဖိခွါ စီၤအဃံၤဧ့စ့ၢ်+ လၢအမ့ၢ် စီၤဒၣ် အစၢၤအသွဲၣ်တဖၣ် အခိၣ်အနၢ် တဂၤန့ၣ် ၆၇ ဟဲစိာ်ဝဲ အတၢ်လုၢ် လၢအမ့ၢ် လီခီစ့တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၆၈ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၆၉ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၇၀ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၇၁ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤဧးမံၤၡးဒံၤ အဖိခွါ စီၤအဃံၤဧ့စ့ၢ် အတၢ်လုၢ်လီၤ.+
၇၂ ဖဲတဆံတသီ အနံၤန့ၣ် စီၤဧးကရၣ် အဖိခွါ စီၤပးကံၤအ့လး+ လၢအမ့ၢ် စီၤအၤၡ့ၢ် အစၢၤအသွဲၣ်တဖၣ် အခိၣ်အနၢ် တဂၤန့ၣ် ၇၃ ဟဲစိာ်ဝဲ အတၢ်လုၢ်လၢ အမ့ၢ် လီခီစ့တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၇၄ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၇၅ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၇၆ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၇၇ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိ ယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤဧးကရၣ် အဖိခွါ စီၤပးကံၤအ့လး အတၢ်လုၢ်လီၤ.+
၇၈ ဖဲတဆံခံသီတသီန့ၣ် စီၤဧ့နၣ် အဖိခွါ စီၤအဃံရၤ+ လၢအမ့ၢ် စီၤနးသၤလံ အစၢၤအသွဲၣ်တဖၣ် အခိၣ်အနၢ် တဂၤန့ၣ် ၇၉ ဟဲစိာ်ဝဲ အတၢ်လုၢ် လၢအမ့ၢ် လီခီစ့တဘ့ၣ်လၢ အဃၢဝဲ ၡက့လး ၁၃၀ ဒီးလီခီဖျၢၣ်စ့ တဖျၢၣ်လၢ အဃၢဝဲ ၡက့လး ၇၀ ဒ်တၢ်စီဆှံအလီၢ် အၡက့လး အသိးလီၤ.+ ဒီးလီခီ ဒီးလီခီဖျၢၣ် ပှဲၤဝဲဒီး ကိၣ်ကမူၣ်လၢ အဂ့ၤလၢ အဃါဃုာ်အသးဒီးသိ လၢတၢ်လုၢ်ဘုအဂီၢ်,+ ၈၀ ဒီးထံခွးထူတဖျၢၣ်လၢ အဃၢဝဲ ၡက့လး ၁၀ လၢအပှဲၤဝဲဒီး တၢ်နၢမူ, ၈၁ ကျီၢ်ဖါဖိတဒု, သိဖါတဒု ဒီးသိဖါဖိ တဒုလၢ အအိၣ်တနံၣ် လၢတၢ်လုၢ်ဒွဲၣ်အူအဂီၢ်,+ ၈၂ မဲာ်တဲးလဲးဖိတဒုလၢ တၢ်လုၢ်လၢ တၢ်ဒဲးဘးအဂီၢ်+ ၈၃ ဒီးကျီၢ်ခံဒု, သိဖါယဲၢ်ဒု, မဲာ်တဲးလဲးဖါ ယဲၢ်ဒု ဒီးသိဖါဖိယဲၢ်ဒု လၢအအိၣ်ဝဲ တနံၣ်လၢ တၢ်လုၢ်အိၣ်ဃူအိၣ်ဖိး အဂီၢ်လီၤ.+ အဝဲန့ၣ် မ့ၢ်ဝဲ စီၤဧ့နၣ် အဖိခွါ စီၤအဃံရၤ အတၢ်လုၢ်လီၤ.+
၈၄ ဖဲပှၤဒိးဖှူ တၢ်လုၢ်လီၢ်အခါ ပှၤအံၣ်စရ့လးဖိ အခိၣ်အနၢ်တဖၣ် အတၢ်လုၢ်လၢ တၢ်ပာ်စီဆှံ တၢ်လုၢ်လီၢ် အဂီၢ်န့ၣ်+ မ့ၢ်ဝဲ လီခီစ့ ၁၂ ဘ့ၣ်, လီခီဖျၢၣ်စ့ ၁၂ ဖျၢၣ် ဒီးထံခွးထူ ၁၂ ဖျၢၣ်လီၤ.+ ၈၅ လီခီစ့ တဘ့ၣ်စုာ်စုာ်န့ၣ် ဃၢဝဲ ၡက့လး ၁၃၀ ဒီးလီခီဖျၢၣ် တဖျၢၣ်စုာ်စုာ်န့ၣ် ဃၢဝဲ ၡက့လး ၇၀ ဒီးတၢ်ပီးတၢ်လီစ့တဖၣ်အံၤ ခဲလၢာ်န့ၣ် အိၣ်ဝဲ ၡက့လး ၂,၄၀၀ ဒ်တၢ်စီဆှံအလီၢ် အၡက့လး အသိးလီၤ.+ ၈၆ ဒီးထံခွးထူ ၁၂ ဖျၢၣ်န့ၣ် တဖျၢၣ်စုာ်စုာ်ဃၢဝဲ ၡက့လး ၁၀ ဒ်တၢ်စီဆှံအလီၢ် အၡက့လး အသိး အဃိ ထံခွးထူ ခဲလၢာ်န့ၣ် ဃၢဝဲ ၡက့လး ၁၂၀ ဒီးပှဲၤဝဲဒီး တၢ်နၢမူလီၤ. ၈၇ ဒီးဆၣ်ဖိကီၢ်ဖိ ခဲလၢာ်လၢ တၢ်လုၢ်ဒွဲၣ်အူ အဂီၢ်န့ၣ် အိၣ်ဝဲ ကျီၢ်ဖါ ၁၂ ဒု, သိဖါ ၁၂ ဒု, သိဖါဖိ လၢအသးအိၣ် တနံၣ် ၁၂ ဒု ဒီးအဝဲသ့ၣ် အတၢ်လုၢ်ဘု ဒီးမဲာ်တဲးလဲးဖိ ၁၂ ဒု လၢတၢ်လုၢ်လၢ တၢ်ဒဲးဘး အဂီၢ်လီၤ. ၈၈ ဒီးဆၣ်ဖိကီၢ်ဖိ ခဲလၢာ်လၢ တၢ်လုၢ်အိၣ်ဃူအိၣ်ဖိး အဂီၢ်န့ၣ် အိၣ်ဝဲ ကျီၢ်ဖါ ၂၄ ဒု, သိဖါ အဒု ၆၀, မဲာ်တဲးလဲးဖါ အဒု ၆၀ ဒီးသိဖါဖိ လၢအသးအိၣ်တနံၣ် အဒု ၆၀ လီၤ. တၢ်သ့ၣ်တဖၣ်န့ၣ် မ့ၢ်ဝဲ တၢ်လုၢ်လၢ တၢ်ပာ်စီဆှံ တၢ်လုၢ်လီၢ် အဂီၢ်+ ဖဲပှၤဒိးဖှူ တၢ်လုၢ်လီၢ် ဝံၤအလီၢ်ခံလီၤ.+
၈၉ ဖဲစီၤမိၤၡ့ လဲၤနုာ်လီၤလၢ တၢ်အိၣ်ဖှိၣ်အဒဲ ဒ်သိးကတဲတၢ်ဒီး ကစၢ်ယွၤ တဘျီဂ့ၤတဘျီဂ့ၤန့ၣ်+ အဝဲနၢ်ဟူဘၣ် တၢ်ကလုၢ်လၢ အတဲတၢ်ဒီးအီၤ လၢတၢ်အၢၣ်လီၤအီလီၤ အတလါ အခိၣ်ကျးအဖီခိၣ်+ လၢခ့ရူာ်ခံဒု အဘၢၣ်စၢၤ+ ဒီးကစၢ်ယွၤ တဲတၢ်ဒီးအီၤလီၤ.
၈ ယဟိဝၤယွၤ တဲစီၤမိၤၡ့လၢ ၂ “တဲဘၣ် စီၤအၤဟရိၣ်ဒ်အံၤ, ‘ဖဲနဒွဲၣ်ထီၣ် မ့ၣ်အူဒၢ အခွးတဖၣ်အခါ မ့ၣ်အူဒၢ အခွးနွံဖျၢၣ်န့ၣ် ကဘၣ်ကပီၤထီၣ်ဝဲလၢ တၢ်လီၢ်လၢ မ့ၣ်အူဒၢ အမဲာ်ညါလီၤ.’”+ ၃ အဃိ စီၤအၤဟရိၣ် ဒွဲၣ်ထီၣ်ဝဲ မ့ၣ်အူဒၢ အခွးတဖၣ် ဒ်သိး တၢ်ကကပီၤထီၣ်လၢ တၢ်လီၢ်လၢ အအိၣ်လၢ မ့ၣ်အူဒၢ အမဲာ်ညါအဂီၢ်+ ဒ်ယဟိဝၤယွၤ မၤလိာ်ဝဲ စီၤမိၤၡ့ အသိးလီၤ. ၄ မ့ၣ်အူဒၢ ဘၣ်တၢ်တ့အီၤ ဒ်အံၤလီၤ. မ့ၣ်အူဒၢန့ၣ် ဘၣ်တၢ်ပိာ်အီၤလၢထူ စးထီၣ်လၢ အထူၣ် တုၤလီၤလၢ အတၢ်ကယၢကယဲတဖၣ်+ ဒ်တၢ်ထံၣ်လၢညါခီ+ လၢယဟိဝၤယွၤဒုးနဲၣ် စီၤမိၤၡ့ အသိးလီၤ.
၅ ယဟိဝၤယွၤ တဲကဒီး စီၤမိၤၡ့လၢ ၆ “ပာ်လီၤဆီ ပှၤလ့ၤဝံဖိတဖၣ် ဒီးပှၤအံၣ်စရ့လးဖိ အဂၤတဖၣ် ဒီးမၤကဆှီထီၣ် အဝဲသ့ၣ်တက့ၢ်.+ ၇ နကဘၣ် မၤကဆှီထီၣ် အဝဲသ့ၣ် ဒ်အံၤလီၤ. နကဘၣ်ဖှံလီၤ ထံလၢတၢ်မၤကဆှီထီၣ် တၢ်ဒဲးဘးအဂီၢ် လၢအဝဲသ့ၣ်အလိၤ ဒီးအဝဲသ့ၣ် ကဘၣ်လူၤ အဆူၣ်လၢ အအိၣ်လၢ အလိၤဒီဂၤညါ လၢဒီလူၤဆူၣ်, ကဘၣ်ဆှုၣ် အတၢ်ကူတၢ်ကၤ ဒီးမၤကဆှီထီၣ် အသးလီၤ.+ ၈ ဒီးအဝဲသ့ၣ် ကဘၣ်ဟဲမူၤ ကျီၢ်ဖါဖိတဒု+ ဒီးဟဲစိာ်စ့ၢ်ကီး ကိၣ်ကမူၣ် လၢအဂ့ၤ လၢအဃါဃုာ်အသးဒီးသိ လၢတၢ်လုၢ်ဘုအဂီၢ်+ ဒီးနကဘၣ် ဟဲမူၤ ကျီၢ်ဖါဖိအဂၤတဒု လၢတၢ်လုၢ်လၢ တၢ်ဒဲးဘး အဂီၢ်လီၤ.+ ၉ ဒီးနကဘၣ် ဟဲကိး ပှၤလ့ၤဝံဖိတဖၣ် လၢတၢ်အိၣ်ဖှိၣ်အဒဲ အမဲာ်ညါ ဒီးကိးဖှိၣ် ပှၤအံၣ်စရ့လးဖိ ခဲလၢာ်လီၤ.+ ၁၀ ဖဲနဟဲကိး ပှၤလ့ၤဝံဖိတဖၣ် လၢယဟိဝၤယွၤ အမဲာ်ညါအခါ ပှၤအံၣ်စရ့လးဖိတဖၣ် ကဘၣ်ပာ်လီၤ အစုလၢ ပှၤလ့ၤဝံဖိတဖၣ် အလိၤလီၤ.+ ၁၁ ဒီးစီၤအၤဟရိၣ် ကမၢ ပှၤလ့ၤဝံဖိတဖၣ် ဝံၢ်ဝၢ်အသးလၢ အလီၢ်ခံဒီးအမဲာ်ညါ လၢယဟိဝၤယွၤ အမဲာ်ညါ ဒ်တၢ်လုၢ်ဝံၢ်ဝၢ်လၢ+ အဟဲလၢ ပှၤအံၣ်စရ့လးဖိ အအိၣ်အသိး ဒီးပှၤလ့ၤဝံဖိ ကမၤယဟိဝၤယွၤ အတၢ်လီၤ.+
၁၂ “ဒီးပှၤလ့ၤဝံဖိတဖၣ် ကပာ်အစုလၢ ကျီၢ်ဖါတဖၣ် အခိၣ်လိၤ+ ဝံၤဒီးကျီၢ်ဖါတဒု ကဘၣ်တၢ်လုၢ်ထီၣ်အီၤ ဒ်တၢ်လုၢ်လၢ တၢ်ဒဲးဘးအဂီၢ် ဒီးကျီၢ်ဖါအဝဲတဒု ဒ်တၢ်လုၢ်ဒွဲၣ်အူ လၢယဟိဝၤယွၤအအိၣ် ဒ်သိး ကမၤဘၣ်လိာ်ဖိးဒ့က့ၤတၢ်လၢ+ ပှၤလ့ၤဝံဖိတဖၣ် အဂီၢ်လီၤ. ၁၃ ဒီးနကဘၣ်မၢ ပှၤလ့ၤဝံဖိတဖၣ် ဆၢထၢၣ်လၢ စီၤအၤဟရိၣ် ဒီးအဖိခွါတဖၣ် အမဲာ်ညါ ဒီးမၢအဝဲသ့ၣ် ဝံၢ်ဝၢ်အသးလၢ အလီၢ်ခံဒီးအမဲာ်ညါ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါလီၤ. ၁၄ ဒီးနကဘၣ် ပာ်လီၤဆီ ပှၤလ့ၤဝံဖိတဖၣ် ဒီးပှၤအံၣ်စရ့လးဖိအဂၤတဖၣ် ဒီးပှၤလ့ၤဝံဖိတဖၣ်န့ၣ် ကကဲထီၣ် ယတၢ်လီၤ.+ ၁၅ ဝံၤဒီးပှၤလ့ၤဝံဖိတဖၣ် ကဟဲနုာ်လီၤမၤတၢ် လၢတၢ်အိၣ်ဖှိၣ် အဒဲလီၤ. နကဘၣ် မၤကဆှီထီၣ် အဝဲသ့ၣ် ဒီးမၢအဝဲသ့ၣ် ဝံၢ်ဝၢ်အသးလၢ အလီၢ်ခံ ဒီးအမဲာ်ညါ ဒ်တၢ်လုၢ်ဝံၢ်ဝၢ်အသိး ဒ်န့ၣ်လီၤ. ၁၆ လၢပှၤအံၣ်စရ့လးဖိ အကျါန့ၣ် အဝဲသ့ၣ်မ့ၢ် ပှၤဘၣ်တၢ်ဃုထၢထီၣ်အီၤတဖၣ်လၢ အဘၣ်တၢ်ဟ့ၣ်လီၤယၤလီၤ. လၢပှၤအံၣ်စရ့လးဖိ အဖိဝဲၢ်ကိ ခဲလၢာ်အလီၢ်န့ၣ်+ ယပာ်လီၤဆီ အဝဲသ့ၣ်လၢ ယဂီၢ်လီၤ. ၁၇ တၢ်အဝဲၢ်ကိခဲလၢာ် လၢပှၤအံၣ်စရ့လးဖိတဖၣ်အကျါ ပှၤကညီ အဖိဝဲၢ်ကိ မ့ၢ်ဂ့ၤ, ဆၣ်ဖိကီၢ်ဖိ အဖိဝဲၢ်ကိမ့ၢ်ဂ့ၤန့ၣ် ကဲယတၢ်လီၤ.+ ယပာ်စီဆှံ အဝဲသ့ၣ် ဖဲမုၢ်နံၤလၢ ယမၤသံ တၢ်အဝဲၢ်ကိ ခဲလၢာ်လၢ ကီၢ်အဲၤကူပတူး အပူၤန့ၣ်လီၤ.+ ၁၈ ယကဟံးန့ၢ် ပှၤလ့ၤဝံဖိတဖၣ်လၢ ပှၤအံၣ်စရ့လးဖိ အဖိဝဲၢ်ကိခဲလၢာ် အလီၢ်လီၤ. ၁၉ လၢပှၤအံၣ်စရ့လးဖိတဖၣ် အကျါန့ၣ် ပှၤလ့ၤဝံဖိမ့ၢ် ပှၤဘၣ်တၢ်ဃုထၢထီၣ်အီၤတဖၣ် လၢယကဟ့ၣ်လီၤ စီၤအၤဟရိၣ် ဒီးအဖိခွါတဖၣ်လီၤ. ဒီးအဝဲသ့ၣ် ကမၤတၢ်လၢ ဒဲစီဆှံ လၢပှၤအံၣ်စရ့လးဖိတဖၣ် အလီၢ်+ ဒီးကမၤဘၣ်လိာ်ဖိးဒ့က့ၤတၢ် လၢပှၤအံၣ်စရ့လးဖိတဖၣ် အဂီၢ် ဒ်သိး ပှၤအံၣ်စရ့လးဖိတဖၣ် သုတဟဲဘူးထီၣ်လၢ တၢ်စီဆှံအလီၢ်+ ဒီးတၢ်နးတၢ်ဖှီၣ် သုတလီၤဘၣ်လၢ အဝဲသ့ၣ်အကျါ တဂ့ၤအဂီၢ်လီၤ.”
၂၀ စီၤမိၤၡ့ ဒီးစီၤအၤဟရိၣ် ဒီးပှၤအံၣ်စရ့လးဖိ ခဲလၢာ်န့ၣ် မၤဝဲ ပှၤလ့ၤဝံဖိတဖၣ် ဒ်န့ၣ်လီၤ. ကယဲၢ်တၢ်လၢ ယဟိဝၤယွၤ မၤလိာ်ဝဲ စီၤမိၤၡ့ လၢအဘၣ်ဃးဒီး ပှၤလ့ၤဝံဖိတဖၣ်န့ၣ် ပှၤအံၣ်စရ့လးဖိတဖၣ် မၤအဝဲသ့ၣ် ဒ်န့ၣ်လီၤ. ၂၁ အဃိ ပှၤလ့ၤဝံဖိတဖၣ် မၤကဆှီထီၣ်အသး ဒီးဆှုၣ်အတၢ်ကူတၢ်ကၤ+ ဝံၤအလီၢ်ခံ စီၤအၤဟရိၣ် မၢအဝဲသ့ၣ် ဝံၢ်ဝၢ်အသးလၢ အလီၢ်ခံဒီး အမဲာ်ညါ ဒ်တၢ်လုၢ်ဝံၢ်ဝၢ်အသိး လၢယဟိဝၤယွၤ အမဲာ်ညါလီၤ.+ ဝံၤဒီး စီၤအၤဟရိၣ် မၤဘၣ်လိာ်ဖိးဒ့က့ၤတၢ်လၢ အဝဲသ့ၣ်အဂီၢ် ဒ်သိး အဝဲသ့ၣ် ကကဆှီထီၣ် အဂီၢ်လီၤ.+ ၂၂ တၢ်န့ၣ်ဝံၤအလီၢ်ခံ ပှၤလ့ၤဝံဖိတဖၣ် လဲၤနုာ်လီၤမၤတၢ်လၢ တၢ်အိၣ်ဖှိၣ်အဒဲ လၢစီၤအၤဟရိၣ် ဒီးအဖိခွါတဖၣ် အမဲာ်ညါလီၤ. ဒီးတၢ်ခဲလၢာ် မၤအသး ဒ်တၢ်လၢ ယဟိဝၤယွၤ မၤလိာ်စီၤမိၤၡ့ လၢအဘၣ်ဃးဒီး ပှၤလ့ၤဝံဖိတဖၣ်န့ၣ်လီၤ.
၂၃ ယဟိဝၤယွၤ တဲစီၤမိၤၡ့လၢ ၂၄ “တၢ်ဘျၢလၢ အဘၣ်ဃးဒီး ပှၤလ့ၤဝံဖိတဖၣ်န့ၣ် မ့ၢ်ဝဲ ဒ်အံၤလီၤ. စးထီၣ်ဖဲ ပှၤပိာ်ခွါတဖၣ်အံၤ အသးနံၣ်အိၣ် ၂၅ နံၣ်န့ၣ် အဝဲသ့ၣ် ကလဲၤနုာ်လီၤ မၤသကိးဃုာ်တၢ်ဒီး ပှၤလၢ အမၤ တၢ်အိၣ်ဖှိၣ်အဒဲ အတၢ်မၤလီၤ. ၂၅ ဘၣ်ဆၣ် ဖဲအဝဲသ့ၣ် အသးနံၣ်ပှဲၤထီၣ် အနံၣ် ၅၀ န့ၣ် အဝဲသ့ၣ် ကအိၣ်ဘှံးလၢ အတၢ်မၤ ဒီးတမၤ တၢ်မၤအံၤလၢၤဘၣ်. ၂၆ ပှၤဒ်န့ၣ်တဂၤကမၤစၢၤ အဒီပုၢ်ဝဲၢ်တဖၣ်လၢ အမၤဝဲ တၢ်အိၣ်ဖှိၣ်အဒဲ အမူဒါတဖၣ် ဘၣ်ဆၣ် အဝဲတဘၣ်လဲၤမၤတၢ်ဘၣ်. ဘၣ်ဃးဒီး ပှၤလ့ၤဝံဖိတဖၣ် ဒီးအဝဲသ့ၣ် အမူဒါတဖၣ်န့ၣ် နကဘၣ်မၤ ဒ်န့ၣ်လီၤ.”+
၉ ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးဝံၤ ခံနံၣ်တနံၣ်, လါအဆိကတၢၢ် တလါန့ၣ် ယဟိဝၤယွၤ တဲတၢ်ဒီး စီၤမိၤၡ့လၢ စံၤနါအပှၢ်မုၢ်ကနၢပူၤ+ ဒီးတဲဝဲလၢ ၂ “ပှၤအံၣ်စရ့လးဖိတဖၣ် ကဘၣ် ကတဲာ်ကတီၤဝဲ ဘူၣ်လဲၤကပာ် အတၢ်လုၢ်+ ဖဲဆၢကတီၢ်လၢ အဘၣ်တၢ်ပာ်ပနီၣ်အီၤ ဘၣ်ဝဲအခါလီၤ.+ ၃ ဖဲလါတလါအံၤ လါထီၣ် ၁၄ သီတသီ, မုၢ်လီၤနုာ် အဆၢကတီၢ်န့ၣ်* သုကဘၣ် ကတဲာ်ကတီၤ ဘူၣ်လဲၤကပာ် ဖဲဆၢကတီၢ်လၢ အဘၣ်တၢ်ပာ်ပနီၣ်အီၤ ဘၣ်ဝဲအခါလီၤ. သုကဘၣ် ကတဲာ်ကတီၤအီၤ ဒ်တၢ်သိၣ်တၢ်သီ ဒီးတၢ်ဟံးစုနဲၣ်ကျဲ အိၣ်ဝဲအသိး ခဲလၢာ်လီၤ.”+
၄ အဃိ စီၤမိၤၡ့ မၢပှၤအံၣ်စရ့လးဖိတဖၣ် ကတဲာ်ကတီၤထီၣ်ဝဲ ဘူၣ်လဲၤကပာ် အတၢ်လုၢ်လီၤ. ၅ ဒီးအဝဲသ့ၣ် ကတဲာ်ကတီၤဝဲ ဘူၣ်လဲၤကပာ် အတၢ်လုၢ် ဖဲလါအဆိကတၢၢ်တလါ, လါထီၣ် ၁၄ သီတသီ, မုၢ်လီၤနုာ် အဆၢကတီၢ်လၢ စံၤနါအပှၢ်မုၢ်ကနၢ အပူၤလီၤ. ဒ်တၢ်လၢ ယဟိဝၤယွၤ မၤလိာ်ဝဲ စီၤမိၤၡ့အသိးန့ၣ် ပှၤအံၣ်စရ့လးဖိတဖၣ် မၤဝဲခဲလၢာ်လီၤ.
၆ ဒီးပှၤပိာ်ခွါအိၣ်ဝဲတနီၤလၢ အကဲထီၣ်ပှၤလၢ အတကဆှီဘၣ် မ့ၢ်လၢ အဝဲသ့ၣ်ထိးဘၣ် ပှၤသံအစိၣ်အဃိလီၤ.+ အဃိ ဖဲတၢ်တနံၤန့ၣ် အဝဲသ့ၣ် ကတဲာ်ကတီၤထီၣ် ဘူၣ်လဲၤကပာ် အတၢ်လုၢ် တန့ၢ်ဘၣ်. အဃိ ဖဲတၢ်တနံၤန့ၣ် အဝဲသ့ၣ် လဲၤလၢစီၤမိၤၡ့ ဒီးစီၤအၤဟရိၣ် အအိၣ်+ ၇ ဒီးတဲစီၤမိၤၡ့လၢ “မ့ၢ်လၢ ပထိးဘၣ် ပှၤသံအစိၣ်အဃိ ပတကဆှီဘၣ်. ဘၣ်ဆၣ် မ့ၢ်အကြၢးတြီပှၤလၢ ပကလုၢ်ထီၣ် တၢ်လုၢ်လၢ ယဟိဝၤယွၤအအိၣ် ဃုာ်ဒီး ပှၤအံၣ်စရ့လးဖိ အဂၤတဖၣ် ဖဲတၢ်ဆၢကတီၢ် လၢအဘၣ် တၢ်ပာ်ပနီၣ်အီၤ ဘၣ်ဝဲအခါဧါ.”+ ၈ ဖဲန့ၣ်န့ၣ် စီၤမိၤၡ့ တဲအဝဲသ့ၣ်လၢ “အိၣ်ခိးဖဲအံၤ. ယဟိဝၤယွၤ ကမၤလိာ်သု ဒ်လဲၣ်န့ၣ် ယကလဲၤ ကနၣ်ကွၢ် တထံၣ်.”+
၉ ယဟိဝၤယွၤတဲ စီၤမိၤၡ့လၢ ၁၀ “တဲဘၣ် ပှၤအံၣ်စရ့လးဖိတဖၣ်လၢ ‘ပှၤလၢသုကျါ တဂၤဂၤ မ့ၢ်ဂ့ၤ, သုစၢၤသုသွဲၣ်လၢ ခါဆူညါမ့ၢ်ဂ့ၤ မ့ၢ်ကဲထီၣ်ပှၤလၢ အတကဆှီဘၣ် ခီဖျိလၢ အထိးဘၣ် ပှၤသံအစိၣ်+ မ့တမ့ၢ် အမ့ၢ်လဲၤတၢ်လၢ တၢ်လီၢ်ယံၤန့ၣ် အဝဲကဘၣ် မၤဒံး ဘူၣ်လဲၤကပာ်လၢ ယဟိဝၤယွၤ အဂီၢ်ဒံးလီၤ. ၁၁ အဝဲသ့ၣ် ကဘၣ်ကတဲာ်ကတီၤဝဲ ဘူၣ်လဲၤကပာ် ဖဲလါခံလါတလါ,+ လါထီၣ် ၁၄ သီတသီ, မုၢ်လီၤနုာ် အဆၢကတီၢ်လီၤ. ဒီးအဝဲသ့ၣ် ကဘၣ်အီၣ်ဝဲ သိညၣ် ဃုာ်ဒီး ကိၣ်လၢအတပၣ်ဒီး ကိၣ်မံၣ်ဘၣ် ဒီးတၢ်ဒိးတၢ်လၣ် လၢအခၣ်လီၤ.+ ၁၂ အဝဲသ့ၣ် တဘၣ်ပာ်ဃာ်အီၤ တုၤလၢဂီၤခီ နီတစဲးဘၣ်.+ ဒီးအဝဲသ့ၣ် တဘၣ်မၤကၢ် အဃံ နီတဘိဘၣ်.+ အဝဲသ့ၣ် ကဘၣ် ကတဲာ်ကတီၤဝဲ ဒ်ဘူၣ်လဲၤကပာ် အတၢ်သိၣ်တၢ်သီ အိၣ်ဝဲအသိး ခဲလၢာ်လီၤ. ၁၃ ဘၣ်ဆၣ် မ့မ့ၢ်ပှၤလၢ အကဆှီမ့ၢ်ဂ့ၤ ပှၤတလဲၤတၢ်လၢ တၢ်လီၢ်အဂၤဘၣ်မ့ၢ်ဂ့ၤ အဝဲမ့ၢ်တမၤ ဘူၣ်လဲၤကပာ်ဘၣ်န့ၣ် အဝဲကဘၣ် တၢ်မၤသံကွံာ်အီၤ+ မ့ၢ်လၢ အတလုၢ်ထီၣ် တၢ်လုၢ်လၢ ယဟိဝၤယွၤအအိၣ် ဖဲတၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ ဘၣ်အခါ အဃိလီၤ. အဝဲ ကဘၣ်ဟ့ၣ်တၢ်စံးဆၢလၢ အတၢ်ဒဲးဘး အဃိလီၤ.
၁၄ “‘ပှၤထံဂၤကီၢ်ဂၤဖိတဂၤ မ့ၢ်ဟဲအိၣ်ဒီးသုန့ၣ် အဝဲကဘၣ် ကတဲာ်ကတီၤဝဲ ဘူၣ်လဲၤကပာ် အတၢ်လုၢ် လၢယဟိဝၤယွၤ အဂီၢ်လီၤ.+ ဒီးအဝဲကဘၣ် မၤဝဲ ဒ်ဘူၣ်လဲၤကပာ် အတၢ်သိၣ်တၢ်သီ ဒီးတၢ်ဟံးစုနဲၣ်ကျဲ အိၣ်ဝဲအသိးလီၤ.+ လၢပှၤထံဂၤကီၢ်ဂၤဖိ အဂီၢ်မ့ၢ်ဂ့ၤ, ပှၤလၢအအိၣ်ဖျဲၣ်ထီၣ် ဒ်ပှၤအံၣ်စရ့လးဖိ အသိး အဂီၢ်မ့ၢ်ဂ့ၤ တၢ်သိၣ်တၢ်သီ ကဘၣ်အိၣ်ဝဲ တမံၤဃီလီၤ.’”+
၁၅ ဖဲဒဲစီဆှံ ဘၣ်တၢ်ရဲၣ်လီၤကျဲၤလီၤအီၤ အနံၤန့ၣ်+ တၢ်အၢၣ် အိၣ်ကးဘၢဝဲလၢ ဒဲစီဆှံ လၢအမ့ၢ် တၢ်အၢၣ်လီၤအီလီၤအဒဲ အဖီခိၣ် ဘၣ်ဆၣ် လၢဟါလီၤခီန့ၣ် တၢ်လၢအလီၤဂာ်ဒီး မ့ၣ်အူ အိၣ်ဝဲလၢ ဒဲစီဆှံ အဖီခိၣ်တုၤလၢ ဂီၤခီလီၤ.+ ၁၆ ဒီးတၢ်ဆဲးမၤအသး ဒ်န့ၣ်လီၤ. အဃိ လၢမုၢ်ဆါခီန့ၣ် တၢ်အၢၣ်န့ၣ် အိၣ်ကးဘၢအီၤ ဒီးလၢမုၢ်နၤခီန့ၣ် တၢ်လၢအလီၤဂာ်ဒီး မ့ၣ်အူ အိၣ်ကးဘၢအီၤလီၤ.+ ၁၇ ဖဲတၢ်အၢၣ် သုးထီၣ်ကွံာ်အသးလၢ ဒဲအအိၣ် တဘျီဂ့ၤတဘျီဂ့ၤန့ၣ် ပှၤအံၣ်စရ့လးဖိတဖၣ် ဟးထီၣ်ဝဲ တဘျီဃီလီၤ.+ ဒီးဖဲတၢ်အၢၣ် အိၣ်ပတုာ်ဝဲ အလီၢ်န့ၣ် ပှၤအံၣ်စရ့လးဖိတဖၣ် သူၣ်လီၤအဒဲလီၤ.+ ၁၈ ယဟိဝၤယွၤ မ့ၢ်ဟ့ၣ်လီၤ အကလုၢ်လၢ အဝဲသ့ၣ် ဘၣ်ဟးထီၣ်န့ၣ် အဝဲသ့ၣ် ဟးထီၣ်ဝဲလီၤ. ယဟိဝၤယွၤ မ့ၢ်ဟ့ၣ်လီၤ အကလုၢ်လၢ အဝဲသ့ၣ် ဘၣ်သူၣ်လီၤအဒဲန့ၣ် အဝဲသ့ၣ် သူၣ်လီၤဝဲလီၤ.+ ဖဲတၢ်အၢၣ်အိၣ်ဝဲလၢ ဒဲစီဆှံ အဖီခိၣ် ဒီတကတီၢ်န့ၣ် အဝဲသ့ၣ် ဆဲးအိၣ်လၢ ဒဲကဝီၤဖဲန့ၣ်လီၤ. ၁၉ တၢ်အၢၣ်မ့ၢ်အိၣ်လၢ ဒဲစီဆှံ အဖီခိၣ် အါနံၤအါသီန့ၣ် ပှၤအံၣ်စရ့လးဖိတဖၣ် ဒိကနၣ် ယဟိဝၤယွၤ အကလုၢ် ဒီးတဟးထီၣ်ဘၣ်.+ ၂၀ တဘျီတခီၣ် တၢ်အၢၣ်ကအိၣ်လၢ ဒဲစီဆှံ အဖီခိၣ် စှၤကိာ်သီလီၤ. ယဟိဝၤယွၤ မ့ၢ်ဟ့ၣ်လီၤ အကလုၢ်လၢ အဝဲသ့ၣ် ဘၣ်ဆဲးအိၣ်လၢ ဒဲကဝီၤ ဖဲန့ၣ်န့ၣ် အဝဲသ့ၣ် အိၣ်ဝဲဖဲန့ၣ်လီၤ. ယဟိဝၤယွၤ မ့ၢ်ဟ့ၣ်လီၤ အကလုၢ်လၢ အဝဲသ့ၣ် ဘၣ်ဟးထီၣ်န့ၣ် အဝဲသ့ၣ် ဟးထီၣ်ဝဲလီၤ. ၂၁ တဘျီတခီၣ် တၢ်အၢၣ်အိၣ်ဝဲထဲလၢ ဟါလီၤခီ တုၤလၢ ဂီၤခီလီၤ. ဒီးဖဲတၢ်အၢၣ် သုးထီၣ်အသး လၢဂီၤခီ အဆၢကတီၢ်န့ၣ် အဝဲသ့ၣ် ဟးထီၣ်ဝဲလီၤ. တၢ်အၢၣ် မ့ၢ်သုးထီၣ်အသးလၢ မုၢ်ဆါခီမ့ၢ်ဂ့ၤ မုၢ်နၤခီမ့ၢ်ဂ့ၤ အဝဲသ့ၣ် ဟးထီၣ်ဝဲလီၤ.+ ၂၂ တၢ်အၢၣ်မ့ၢ်ဆဲး အိၣ်ဝဲလၢ ဒဲစီဆှံ အဖီခိၣ် ခံသီမ့ၢ်ဂ့ၤ, တလါမ့ၢ်ဂ့ၤ, မ့ၢ်ယံာ်န့ၢ် အန့ၣ်မ့ၢ်ဂ့ၤန့ၣ် ပှၤအံၣ်စရ့လးဖိတဖၣ် ဆဲးအိၣ်လၢ ဒဲကဝီၤဖဲန့ၣ် ဒီးတဟးထီၣ်ဝဲဘၣ်. ဘၣ်ဆၣ် ဖဲတၢ်အၢၣ် သုးထီၣ်အသးအခါ အဝဲသ့ၣ် ဟးထီၣ်ဝဲလီၤ. ၂၃ ယဟိဝၤယွၤ မ့ၢ်ဟ့ၣ်လီၤ အကလုၢ်လၢ အဝဲသ့ၣ် ဘၣ်အိၣ်ဝဲလၢ ဒဲကဝီၤ ဖဲန့ၣ်န့ၣ် အဝဲသ့ၣ် အိၣ်ဝဲဖဲန့ၣ် ဒီးယဟိဝၤယွၤ မ့ၢ်ဟ့ၣ်လီၤ အကလုၢ်လၢ အဝဲသ့ၣ် ဘၣ်ဟးထီၣ်န့ၣ် အဝဲသ့ၣ် ဟးထီၣ်ဝဲလီၤ. အဝဲသ့ၣ် ဒိကနၣ် ယဟိဝၤယွၤ ဒ်ယဟိဝၤယွၤဟ့ၣ်လီၤ အကလုၢ် ခီဖျိလၢ စီၤမိၤၡ့ အသိးလီၤ.
၁၀ ယဟိဝၤယွၤ တဲဘၣ် စီၤမိၤၡ့လၢ ၂ “တ့ထီၣ် ကွဲၤခံဖျၢၣ်+ လၢနဂီၢ်တက့ၢ်. နကဘၣ်ပိာ်န့ၢ်အီၤ လၢစ့ညၣ်ဒီး သူအီၤဒ်သိး နကကိးဖှိၣ်တၢ်အိၣ်ဖှိၣ် ဒီးသုးလီၢ်သုးကျဲ အဂီၢ်လီၤ. ၃ တၢ်မ့ၢ်အူထီၣ်ကွဲၤ ခံဖျၢၣ်လၢာ်န့ၣ် တၢ်အိၣ်ဖှိၣ် ဒီတဖု ကဘၣ်လဲၤလၢ နအိၣ်ဖဲ တၢ်အိၣ်ဖှိၣ်အဒဲ အတၢ်နုာ်လီၤအလီၢ်န့ၣ်လီၤ.+ ၄ တၢ်မ့ၢ်အူထီၣ်ကွဲၤ ထဲတဖျၢၣ်န့ၣ် ထဲဒၣ် ပှၤခိၣ်ပှၤနၢ်တဖၣ် လၢအမ့ၢ် ပှၤအံၣ်စရ့လးဖိ အကထိတဖၣ် အခိၣ်အနၢ်တဖၣ်န့ၣ် ကလဲၤလၢ နအိၣ်လီၤ.+
၅ “ဖဲသုအူသီၣ်ထီၣ်ကွဲၤ ဒိၣ်တထံၣ်ထံၣ် ဆံးတထံၣ်ထံၣ်အခါ ပှၤအဒူၣ်တဖၣ်လၢ အိၣ်ဝဲလၢ မုၢ်ထီၣ်တခီန့ၣ်+ ကဘၣ် ဟးထီၣ်ဝဲလီၤ. ၆ ဖဲသုအူသီၣ်ထီၣ်ကွဲၤ ဒိၣ်တထံၣ်ထံၣ် ဆံးတထံၣ်ထံၣ် ခံဘျီတဘျီန့ၣ် ပှၤအဒူၣ်တဖၣ်လၢ အိၣ်ဝဲလၢ ကလံၤထံးတခီန့ၣ်+ ကဘၣ် ဟးထီၣ်ဝဲလီၤ. အဝဲသ့ၣ် ကအူထီၣ်ကွဲၤ ဒ်အံၤ ဖဲပှၤတဖုစုာ်စုာ် ကဟးထီၣ်ဝဲ အခါလီၤ.
၇ “ဖဲသုကိးဖှိၣ် တၢ်အိၣ်ဖှိၣ်အခါ သုကဘၣ် အူထီၣ်ကွဲၤ+ ဘၣ်ဆၣ် သုတဘၣ် အူသီၣ်ထီၣ်အီၤ ဒိၣ်တထံၣ်ထံၣ် ဆံးတထံၣ်ထံၣ်ဘၣ်. ၈ ပှၤလၢအအူထီၣ် ကွဲၤတဖၣ်န့ၣ် ကဘၣ်မ့ၢ် စီၤအၤဟရိၣ် အဖိခွါတဖၣ် လၢအမ့ၢ် ပှၤလုၢ်တၢ်ဒိၣ်တဖၣ်န့ၣ်လီၤ.+ ဒီးတၢ်သူကွဲၤတဖၣ်န့ၣ် မ့ၢ်ဝဲ တၢ်သိၣ်တၢ်သီလၢ အဂၢၢ်အကျၢၤ လၢသုဂီၢ် တစိၤဘၣ်တစိၤလီၤ.
၉ “သုမ့ၢ်ဘၣ်လဲၤဒုး ဒုၣ်ဒါတဖၣ်လၢ မၤနၢၤအီၣ်ဃီၣ်သုလၢ သုကီၢ်ပူၤန့ၣ် သုကဘၣ် အူထီၣ်ကွဲၤတဖၣ်လၢ တၢ်ဒုးအဂီၢ်+ ဒီးသုကစၢ် ယဟိဝၤယွၤ ကသ့ၣ်နီၣ်ထီၣ်က့ၤသု ဒီးမၤပူၤဖျဲးသုလၢ သုဒုၣ်သုဒါ အစုပူၤလီၤ.
၁၀ “ဖဲသုသူၣ်ခုသးခု အဆၢကတီၢ်+ လၢအမ့ၢ် ဖဲသုမၤဘူၣ်တဖၣ်+ ဒီးဖဲလါထီၣ်သီ ကိးလါဒဲးန့ၣ် သုကဘၣ် အူကွဲၤတဖၣ် လၢတၢ်လုၢ်ဒွဲၣ်အူတဖၣ်+ ဒီးတၢ်လုၢ်အိၣ်ဃူအိၣ်ဖိးတဖၣ် အမဲာ်ညါလီၤ.+ တၢ်သ့ၣ်တဖၣ်န့ၣ် ကကဲထီၣ် တၢ်သ့ၣ်နီၣ်ထီၣ်က့ၤတၢ် လၢသုဂီၢ် လၢကစၢ်ယွၤ အမဲာ်ညါလီၤ. ယမ့ၢ် သုကစၢ် ယဟိဝၤယွၤလီၤ.”+
၁၁ ဖဲခံနံၣ်တနံၣ်, လါခံလါတလါ, လါထီၣ်အသီ ၂၀ အနံၤန့ၣ်+ တၢ်အၢၣ် သုးထီၣ်ကွံာ်အသးလၢ ဒဲစီဆှံလၢ အအိၣ်ဒီး+ တၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ် အအိၣ်လီၤ. ၁၂ အဃိ ပှၤအံၣ်စရ့လးဖိတဖၣ် စးထီၣ် ဟးထီၣ်ဝဲလၢ စံၤနါအပှၢ်မုၢ်ကနၢပူၤ ဒ်တၢ်ရဲၣ်လီၤပာ်စၢၤ အဝဲသ့ၣ် လၢအကဘၣ် ဟးထီၣ်ဝဲ အသိးလီၤ.+ ဒီးတၢ်အၢၣ်န့ၣ် အိၣ်ပတုာ်ဝဲလၢ ပၤရၣ်အပှၢ်မုၢ်ကနၢလီၤ.+ ၁၃ အဝဲအံၤ မ့ၢ်ဝဲ အဝဲသ့ၣ် အတၢ်ဟးထီၣ် အဆိကတၢၢ်တဘျီ ဒ်ယဟိဝၤယွၤ ဟ့ၣ်လီၤတၢ်ကလုၢ်လၢ စီၤမိၤၡ့ အသိးလီၤ.+
၁၄ ပှၤသၢဒူၣ်လၢ စီၤယူဒၤ အစၢၤအသွဲၣ်တဖၣ် တီခိၣ်ရိၤမဲဝဲန့ၣ် ဟးထီၣ်အဆိကတၢၢ် ဒ်အသုးက့တဖၣ် အိၣ်ဝဲအသိးလီၤ. ဒီးစီၤဧးမံၤနဒး အဖိခွါ စီၤနးၡိၣ်+ မ့ၢ်ဝဲ အနီၢ်ကစၢ်အဒူၣ် အခိၣ်လီၤ. ၁၅ ဒီးစီၤစူဧၢ် အဖိခွါ စီၤနၤသန့လး+ မ့ၢ်ဝဲ ယံးစၢ်ကၢ်အဒူၣ် အခိၣ်လီၤ. ၁၆ စီၤဃ့လူၣ် အဖိခွါ စီၤအလံအာ်+ မ့ၢ်ဝဲ စဘူလိၣ် အဒူၣ် အခိၣ်လီၤ.
၁၇ ဖဲတၢ်ဃဲၣ်လီၤ ဒဲစီဆှံ ဝံၤအခါ+ စီၤက့ရၡိၣ် အစၢၤအသွဲၣ်တဖၣ်+ ဒီးစီၤမရၤရံၤ အစၢၤအသွဲၣ်တဖၣ်+ လၢအယိးဝဲ ဒဲစီဆှံန့ၣ် ဟးထီၣ်ဝဲလီၤ.
၁၈ ဝံၤဒီး ပှၤသၢဒူၣ်လၢ စီၤရူၤဘ့ၣ် အစၢၤအသွဲၣ်တဖၣ် တီခိၣ်ရိၤမဲဝဲန့ၣ် ဟးထီၣ်ဝဲ ဒ်အသုးက့တဖၣ် အိၣ်ဝဲအသိးလီၤ. ဒီးစီၤၡဒ့အူၢ် အဖိခွါ စီၤအလံစူၢ်+ မ့ၢ်ဝဲ အနီၢ်ကစၢ်အဒူၣ် အခိၣ်လီၤ. ၁၉ ဒီးစီၤစူၤရံၡးဒံၤ အဖိခွါ စီၤၡလူမံၤအ့လး+ မ့ၢ်ဝဲ စူၤမ့းအိၣ်အဒူၣ် အခိၣ်လီၤ. ၂၀ ဒီးစီၤဒဧူၤအ့လး အဖိခွါ စီၤအ့လယၤစာ်+ မ့ၢ်ဝဲ ကးအဒူၣ် အခိၣ်လီၤ.
၂၁ ဝံၤဒီး ပှၤကဃးဖိတဖၣ် လၢအစိာ်ဝဲ တၢ်စီဆှံအလီၢ် အတၢ်ပီးတၢ်လီတဖၣ်န့ၣ် ဟးထီၣ်ဝဲလီၤ.+ ဖဲအဝဲသ့ၣ် လဲၤတုၤအခါ ဒဲစီဆှံန့ၣ် ကဘၣ်တၢ်ရဲၣ်လီၤကျဲၤလီၤ ပာ်စၢၤအီၤလီၤ.
၂၂ ဝံၤဒီး ပှၤသၢဒူၣ်လၢ စီၤအ့ဖရဲၣ် အစၢၤအသွဲၣ်တဖၣ် တီခိၣ်ရိၤမဲဝဲန့ၣ် ဟးထီၣ်ဝဲ ဒ်အသုးက့တဖၣ် အိၣ်ဝဲအသိးလီၤ. ဒီးစီၤဧးမံၤဟူး အဖိခွါ စီၤအလံၡမၤ+ မ့ၢ်ဝဲ အနီၢ်ကစၢ်အဒူၣ် အခိၣ်လီၤ. ၂၃ ဒီးစီၤပဒၤစူၢ် အဖိခွါ စီၤကမၤလ့လး+ မ့ၢ်ဝဲ မနၤၡ့ၤအဒူၣ် အခိၣ်လီၤ. ၂၄ ဒီးစီၤကံးဒဧိနံၤ အဖိခွါ စီၤအဘံဒၣ်+ မ့ၢ်ဝဲ ဘံၣ်ယၤမံၣ်အဒူၣ် အခိၣ်လီၤ.
၂၅ ဝံၤဒီး ပှၤသၢဒူၣ်လၢ စီၤဒၣ် အစၢၤအသွဲၣ်တဖၣ် တီခိၣ်ရိၤမဲဝဲန့ၣ် ဟးထီၣ်ဝဲ အလီၢ်ခံကတၢၢ် ဒ်အသုးက့တဖၣ် အိၣ်ဝဲအသိး ဒီးဒီသဒၢဝဲ ပှၤအဒူၣ်အဂၤတဖၣ်လၢ တၢ်လီၢ်ခံလီၤ. ဒီးစီၤဧးမံၤၡးဒံၤ အဖိခွါ စီၤအဃံၤဧ့စ့ၢ်+ မ့ၢ်ဝဲ အနီၢ်ကစၢ်အဒူၣ် အခိၣ်လီၤ. ၂၆ ဒီးစီၤဧးကရၣ် အဖိခွါ စီၤပးကံၤအ့လး+ မ့ၢ်ဝဲ အၤၡ့ၢ်အဒူၣ် အခိၣ်လီၤ. ၂၇ ဒီးစီၤဧ့နၣ် အဖိခွါ စီၤအဃံရၤ+ မ့ၢ်ဝဲ နးသၤလံ အဒူၣ် အခိၣ်လီၤ. ၂၈ အဝဲန့ၣ်မ့ၢ်ဝဲ တၢ်ရဲၣ်တၢ်ကျဲၤလၢ ပှၤအံၣ်စရ့လးဖိတဖၣ် ဒီးအသုးက့တဖၣ် လူၤပိာ်ထွဲဝဲ ဖဲအဝဲသ့ၣ်ဟးထီၣ် အခါန့ၣ်လီၤ.+
၂၉ စီၤမိၤၡ့ တဲဘၣ် အမံၤပှၢ် ပှၤမံးဒယၣ်ဖိ စီၤရဧူၤအ့လး*+ အဖိခွါ စီၤဃိဘာ် လၢ “ပကလဲၤလၢ တၢ်လီၢ်လၢ ယဟိဝၤယွၤ အၢၣ်လီၤပှၤလၢ အကဟ့ၣ်လီၤပှၤလီၤ.+ မ့ၢ်လၢ ယဟိဝၤယွၤ အၢၣ်လီၤဝဲလၢ အကဟ့ၣ်ဝဲ ပှၤအံၣ်စရ့လးဖိတဖၣ်လၢ တၢ်လၢအဂ့ၤတဖၣ်အဃိ လဲၤပိာ်ပခံ+ ဒီးပကမၤဂ့ၤနၤ စ့ၢ်ကီးလီၤ.”+ ၃၀ ဘၣ်ဆၣ် စီၤဃိဘာ် တဲစီၤမိၤၡ့လၢ “ယတလဲၤဘၣ်. ယကက့ၤလၢ ယထံယကီၢ် ဒီးယဘူးယတံၢ် အအိၣ်လီၤ.” ၃၁ ဒီးစီၤမိၤၡ့ တဲအီၤလၢ “ပကဘၣ် ဆီလီၤ ပဒဲကဝီၤလၢ ပှၢ်မုၢ်ကနၢ အပူၤလၢ တၢ်လီၢ် ဖဲလဲၣ်ဖဲလဲၣ်န့ၣ် နသ့ၣ်ညါ ဂ့ၤဂ့ၤ ဒီးနကဲ ပှၤလၢ အနဲၣ်ပကျဲသ့ အဃိ ဝံသးစူၤ တဘၣ်ပာ်တ့ၢ် ပှၤတဂ့ၤ. ၃၂ နမ့ၢ် လဲၤပိာ်ပခံန့ၣ်+ တၢ်လၢအဂ့ၤလၢ ယဟိဝၤယွၤ ဟ့ၣ်လီၤပှၤန့ၣ် ပကနီၤလီၤလၢ နအိၣ်စ့ၢ်ကီးလီၤ. ကယဲၢ် တၢ်ဆိၣ်ဂ့ၤ တမံၤဂ့ၤ တမံၤဂ့ၤလၢ ပဒိးန့ၢ်ဘၣ်လၢ ကစၢ်ယွၤအအိၣ်န့ၣ် နကန့ၢ်ဘၣ်အဘျုး ဃုာ်ဒီးပှၤလီၤ.”
၃၃ ဒီးအဝဲသ့ၣ် ဟးထီၣ်လၢ ယဟိဝၤယွၤ အကစၢၢ်+ ဒီးလဲၤဝဲ သၢသီကျဲလီၤ. ဒီးလၢတၢ်လဲၤသၢသီ အတီၢ်ပူၤန့ၣ် ယဟိဝၤယွၤ အတၢ်အၢၣ်လီၤအီလီၤ အတလါ+ လဲၤတၢ်လၢ အဝဲသ့ၣ် အမဲာ်ညါ ဒ်သိး ကဃုဝဲ တၢ်အိၣ်ဘှံးအလီၢ် လၢအဝဲသ့ၣ် အဂီၢ်လီၤ.+ ၃၄ ဖဲအဝဲသ့ၣ် ဟးထီၣ်လၢ အသူၣ်လီၤတ့ၢ်ဒဲ အလီၢ်အခါ ယဟိဝၤယွၤ အတၢ်အၢၣ်+ အိၣ်လၢ အဝဲသ့ၣ် အဖီခိၣ် လၢမုၢ်ဆါခီန့ၣ်လီၤ.
၃၅ ဖဲတလါစီဆှံ ဘၣ်တၢ်သုးအီၤ တဘျီဂ့ၤ တဘျီဂ့ၤန့ၣ် စီၤမိၤၡ့ တဲဝဲလၢ “အိ ယဟိဝၤယွၤဧၢ, ဝံသးစူၤ ဂဲၤထၢၣ်+ ဒီးမၤလီၤပြံလီၤပြါ နဒုၣ်နဒါတဖၣ် ဒီးဒုးဃ့ၢ်ထီၣ်ကွံာ် ပှၤလၢအသးဟ့နၤတဖၣ် လၢနမဲာ်ညါ တက့ၢ်.” ၃၆ ဖဲတလါစီဆှံ အိၣ်ပတုာ်အခါ အဝဲ တဲဝဲလၢ “အိ ယဟိဝၤယွၤဧၢ, ဟဲက့ၤလၢ ပှၤအံၣ်စရ့လးဖိ အကထိတဖၣ် အကထိ အအိၣ်တက့ၢ်.”+
၁၁ ဒီးပှၤဂီၢ်မုၢ်တဖၣ် စးထီၣ် ကဒူးကဒ့ၣ်တၢ် ဆူၣ်ဆူၣ်လၢ ယဟိဝၤယွၤ အမဲာ်ညါလီၤ. ဖဲယဟိဝၤယွၤ နၢ်ဟူဝဲအခါ အသးဒိၣ်ထီၣ်တၢ် ဒီးယဟိဝၤယွၤ ဆှၢလီၤမ့ၣ်အူလၢ အဝဲသ့ၣ်အအိၣ် ဒီးမ့ၣ်အူအီၣ်ကွံာ်ဝဲ ပှၤတနီၤလၢ အအိၣ်လၢ ဒဲကဝီၤ အဃၢၤလီၤ. ၂ ဖဲပှၤဂီၢ်မုၢ်တဖၣ် ကိးပသူထီၣ်လၢ စီၤမိၤၡ့အအိၣ်အခါ စီၤမိၤၡ့ ဃ့ကညး ယဟိဝၤယွၤ+ ဒီးမ့ၣ်အူ လီၤပံာ်ဝဲလီၤ. ၃ အဃိ တၢ်လီၢ်အဝဲန့ၣ် ပှၤကိးန့ၢ်အမံၤလၢ တးဘဧ့ရၤ မ့ၢ်လၢ ယဟိဝၤယွၤ ဆှၢလီၤမ့ၣ်အူလၢ အဝဲသ့ၣ်အအိၣ် ဒီးမ့ၣ်အူ အီၣ်ကွံာ်အဝဲသ့ၣ် အဃိလီၤ.+
၄ ဝံၤဒီး ပှၤထံဂၤကီၢ်ဂၤဖိလၢ အအိၣ်လၢ အဝဲသ့ၣ် အကျါန့ၣ်+ တဲဖျါထီၣ် အတၢ်သူၣ်လီသးကွံလီၤ.+ ဒီးပှၤအံၣ်စရ့လးဖိ တဖၣ်စ့ၢ်ကီး စးထီၣ်ဟီၣ်ကဒီးဝဲ ဒီးတဲဝဲလၢ “မတဂၤ ကဟ့ၣ်ဒုးအီၣ်ပှၤ တၢ်ဖံးတၢ်ညၣ်လဲၣ်.+ ၅ ညၣ်လၢ ကီၢ်အဲၤကူပတူးအပူၤ လၢပအီၣ်ဘၣ်အီၤ ခီလီလီ ဃုာ်ဒီး ဒံသၣ်, တဲၣ်တီသၣ်, ပသၢဘိ, ပသၢဂီၤ ဒီးပသၢဝါန့ၣ် ပသ့ၣ်နီၣ်ထီၣ်က့ၤအီၤ ဒိၣ်မးလီၤ.+ ၆ ခဲအံၤန့ၣ် ပဂံၢ်ပဘါလီၤစၢ် သပှၢ်တၢၢ်လံ. ဖဲအံၤ တၢ်တအိၣ် နီတမံၤဘၣ်, ပထံၣ်ထဲ ကိၣ်မၤနၤ တခါအံၤလီၤ.”+
၇ တၢ်လၢ ကိၣ်မၤနၤန့ၣ်+ လီၤဂာ်ဒ် တၢ်အချံဝါဝါ ဆံးဆံးဖိတဖၣ်+ ဒီးအဖျါလီၤဂာ်ဒ် သ့ၣ်ဒဲလံယၢၤ အထုးလီၤ. ၈ ဒီးပှၤဂီၢ်မုၢ်တဖၣ် ညီနုၢ်လဲၤထၢထီၣ်ဝဲ ကိၣ်မၤနၤ ဒီးဂူာ်ဝဲလၢ ဆၢၣ်ဂူာ်ပူၤ မ့တမ့ၢ် တိၢ်ဝဲလၢ ဆၢၣ်တိၢ်ပူၤလီၤ. ဝံၤဒီး အဝဲသ့ၣ် ချီထီၣ်ဝဲလၢ သပၢၤပူၤ မ့တမ့ၢ် တ့ဝဲဒ်ကိၣ်ကဝီၤကျီၤ+ ဒီးအဝံၣ်အဆၢ လီၤဂာ်ဒီး ကိၣ်ခ့းလၢ ဘၣ်တၢ်တ့အီၤဒီးသိ အသိးလီၤ. ၉ ဖဲပစီၤထံ လီၤလၢ ဒဲကဝီၤပူၤ လၢမုၢ်နၤခီအခါ ကိၣ်မၤနၤ လီၤဝဲစ့ၢ်ကီးလီၤ.+
၁၀ စီၤမိၤၡ့ နၢ်ဟူဝဲလၢ ပှၤဂီၢ်မုၢ် တဂၤစုာ်စုာ် လၢဟံၣ်ဖိဃီဖိ ကိးဒူၣ်ဒဲးအပူၤန့ၣ် ဟီၣ်ဝဲလၢ အနီၢ်ကစၢ်အဒဲ အတၢ်နုာ်လီၤအလီၢ်လီၤ. ဒီးယဟိဝၤယွၤ သးဒိၣ်ထီၣ်တၢ်ဒိၣ်မး+ ဒီးစီၤမိၤၡ့စ့ၢ်ကီး အသးဘၣ်တံာ်တာ်ဒိၣ်မးလီၤ. ၁၁ ဒီးစီၤမိၤၡ့ တဲယဟိဝၤယွၤလၢ “ဘၣ်မနုၤအဃိ နမၤနးမၤဖှီၣ် နခ့နပှၤ ယၤအံၤလဲၣ်. ဘၣ်မနုၤအဃိ ယတဒိးန့ၢ်ဘၣ် နတၢ်ဘၣ်သးလဲၣ်. ဘၣ်မနုၤအဃိ နမၢယဝံဃာ်ယိးဃာ် ပှၤဂီၢ်မုၢ်တဖၣ်အံၤလဲၣ်.+ ၁၂ လၢနကတဲယၤလၢ ယဘၣ် စိာ်အဝဲသ့ၣ်လၢ ယသးနါပှၢ် ဒ်ပှၤကွၢ်ထွဲတၢ်တဂၤ စိာ်ဝဲ ဖိသၣ်အီၣ်နုၢ် အသိး ဆူကီၢ်တဘ့ၣ်လၢ နအၢၣ်လီၤလၢ နကဟ့ၣ် အဝဲသ့ၣ် အမိၢ်ပၢ်ဖံဖု လၢပျၢၤတဖၣ်အဂီၢ်န့ၣ် မ့ၢ်ယဒၢထီၣ် ပှၤဂီၢ်မုၢ်တဖၣ်အံၤ ဒီးအိၣ်ဖျဲၣ်ထီၣ် အဝဲသ့ၣ်ဧါ.+ ၁၃ အဝဲသ့ၣ် ဟီၣ်ဝံၤဟီၣ်က့ၤ လၢယမဲာ်ညါ ဒီးတဲဝဲလၢ ‘ဟ့ၣ်ဒုးအီၣ်ပှၤ တၢ်ညၣ်သၢၤ.’ အဃိ ဒ်သိးယကဟ့ၣ် တၢ်ညၣ်လၢ ပှၤဂီၢ်မုၢ်ခဲလၢာ် အဂီၢ်န့ၣ် ယကလဲၤမၤန့ၢ် တၢ်ညၣ်ဖဲလဲၣ်. ၁၄ ယယိး ပှၤဂီၢ်မုၢ်တဖၣ်အံၤ လၢယနီၢ်ကစၢ် တန့ၢ်လၢၤဘၣ်. အဃၢတလၢ လၢယဂီၢ်လီၤ.+ ၁၅ နမ့ၢ်အဲၣ်ဒိး မၤယၤဒ်အံၤန့ၣ် ဝံသးစူၤ မၤသံယၤ ခဲအံၤ.+ ယမ့မ့ၢ် ပှၤလၢ နဘၣ်သူၣ်ဘၣ်သးအီၤန့ၣ် တဘၣ်ပျဲလၢ ယကထံၣ် တၢ်ကီတၢ်ခဲအံၤ လၢၤတဂ့ၤ.”
၁၆ ယဟိဝၤယွၤ တဲဆၢက့ၤ စီၤမိၤၡ့လၢ “ကိးဖှိၣ်န့ၢ်ယၤ အံၣ်စရ့လး အပှၤသူၣ်က့သးပှၢ် အဂၤ ၇၀ လၢအမ့ၢ် ပှၤပိာ်ခွါလၢ နသ့ၣ်ညါအီၤဒ် ပှၤသူၣ်က့သးပှၢ်တဖၣ် ဒီးပှၤဂီၢ်မုၢ်အပဒိၣ်တဖၣ် န့ၣ်တက့ၢ်.+ ဒီးလဲၤကိး အဝဲသ့ၣ်လၢ တၢ်အိၣ်ဖှိၣ်အဒဲ ဒီးမၢအဝဲသ့ၣ် ဆၢထၢၣ်ဒီးနၤ ဖဲန့ၣ်တက့ၢ်. ၁၇ ယကဟဲလီၤ+ ဒီးတဲတၢ်ဒီးနၤဖဲန့ၣ်+ ဒီးယကထုးထီၣ်ကွံာ် သးစီဆှံ လၢနအိၣ် တနီၤ+ ဒီးပာ်လီၤက့ၤလၢ အဝဲသ့ၣ်အလိၤ ဒီးအဝဲသ့ၣ် ကဝံစၢၤယိးစၢၤနၤ လၢပှၤဂီၢ်မုၢ်တဖၣ် အတၢ်ဝံတၢ်ယိးလီၤ. အဃိ တလိၣ်လၢ နကဘၣ် ဝံတၢ်ယိးတၢ် ထဲတဂၤလၢၤဘၣ်.+ ၁၈ နကဘၣ်တဲ ပှၤဂီၢ်မုၢ်လၢ ‘ယဟိဝၤယွၤ နၢ်ဟူသုဟီၣ်+ ဒီးသုတဲလၢ “မတဂၤ ကဟ့ၣ်ဒုးအီၣ်ပှၤ တၢ်ဖံးတၢ်ညၣ်လဲၣ်. ပအိၣ်လၢ ကီၢ်အဲၤကူပတူးန့ၣ် ဂ့ၤဒိၣ်လၢ ပဂီၢ်ဒံး.”+ လၢတၢ်န့ၣ်အဃိ မၤစီဆှံသုသးလၢ ခဲမုၢ်ဆ့ၣ်အဂီၢ်+ ဒီးသုကအီၣ်ဘၣ် တၢ်ဖံးတၢ်ညၣ် သပှၢ်ကတၢၢ်လီၤ. ယဟိဝၤယွၤ ကဟ့ၣ်သု တၢ်ဖံးတၢ်ညၣ် သပှၢ်ကတၢၢ် ဒီးသုကအီၣ်ဘၣ်လီၤ.+ ၁၉ သုတအီၣ်ဘၣ်ထဲ ၂ သီ မ့တမ့ၢ် ၅ သီ မ့တမ့ၢ် အသီ ၁၀ မ့တမ့ၢ် အသီ ၂၀ ဘၣ်. ၂၀ သုကအီၣ်ဘၣ်အီၤ ဒီတလါ တုၤလၢ သုအီၣ်အီၤတကဲလၢၤဘၣ်* ဒီးကကဲထီၣ် တၢ်လၢအလီၤသးဘၣ်အၢ လၢသုဂီၢ်,+ မ့ၢ်လၢ သုစူးကွံာ်ညိကွံာ် ယဟိဝၤယွၤ လၢအအိၣ်လၢ သုကျါ ဒီးသုဟီၣ်လၢ အမဲာ်ညါ ဒီးတဲလၢ “ဘၣ်မနုၤအဃိ ပဘၣ်ဟးထီၣ်လၢ ကီၢ်အဲၤကူပတူး အပူၤလဲၣ်” အဃိလီၤ.’”+
၂၁ ဒီးစီၤမိၤၡ့ တဲဝဲလၢ “လၢပှၤဂီၢ်မုၢ်လၢ အအိၣ်ဒီးယၤအကျါ ပှၤပိာ်ခွါ အိၣ်ဝဲ အဂၤ ၆၀၀,၀၀၀ ညါ.+ ဘၣ်ဆၣ် နတဲလၢ ‘ယကဟ့ၣ်လီၤ အဝဲသ့ၣ် လၢတၢ်ညၣ် ဒီးအဝဲသ့ၣ် ကအီၣ်ဝဲ ဘျဲဘျဲ ဒီတလါ’ န့ၣ်. ၂၂ ပှၤမ့ၢ်မၤသံ သိဒီးမဲာ်တဲးလဲး ဒီးကျီၢ် အဖုတဖၣ်အဖု သနာ်က့ မ့ၢ်အကယၢလၢ* အဝဲသ့ၣ် အဂီၢ်ဧါ. ပှၤမ့ၢ်ဖီၣ်န့ၢ် ညၣ်လၢပီၣ်လဲၣ်ပူၤ ခဲလၢာ်သနာ်က့ မ့ၢ်အကယၢလၢ အဝဲသ့ၣ် အဂီၢ်ဧါ.”
၂၃ ယဟိဝၤယွၤ တဲဘၣ်စီၤမိၤၡ့လၢ “ယၤ ယဟိဝၤယွၤန့ၣ် မ့ၢ်ယစုဖုၣ်တလၢဧါ.+ တၢ်လၢယတဲန့ၣ် ကကဲထီၣ်ဧါ တကဲထီၣ်ဧါန့ၣ် ခဲအံၤ နကထံၣ်ဘၣ်လီၤ.”
၂၄ ဒီးစီၤမိၤၡ့ လဲၤတဲဘၣ် ပှၤဂီၢ်မုၢ် လၢယဟိဝၤယွၤ အတၢ်ကတိၤတဖၣ်လီၤ. ဒီးအဝဲကိးဖှိၣ် ပှၤဂီၢ်မုၢ် အပှၤသူၣ်က့သးပှၢ် အဂၤ ၇၀ ဒီးမၢအဝဲသ့ၣ် ဆၢထၢၣ်ဘူးဒီး တၢ်အိၣ်ဖှိၣ်အဒဲလီၤ.+ ၂၅ ဒီးယဟိဝၤယွၤ ဟဲလီၤလၢ တၢ်အၢၣ်အပူၤ+ ဒီးတဲတၢ်ဒီး စီၤမိၤၡ့+ ဒီးထုးထီၣ်ကွံာ် သးစီဆှံ လၢအအိၣ်လၢ စီၤမိၤၡ့အလိၤတနီၤ+ ဒီးပာ်လီၤက့ၤဝဲလၢ ပှၤသူၣ်က့သးပှၢ်အဂၤ ၇၀ အလိၤလီၤ. ဖဲသးစီဆှံ လီၤလၢ အဝဲသ့ၣ် အလိၤအခါ အဝဲသ့ၣ် မၤထီၣ်အသး ဒ်ဝံတဖၣ် အသိးလီၤ.+ ဘၣ်ဆၣ် လၢခံ အဝဲသ့ၣ် တမၤဝဲ ဒ်န့ၣ်လၢၤဘၣ်.
၂၆ ဒီးပှၤပိာ်ခွါခံဂၤလၢ အပၣ်ဃုာ်လၢ ပှၤလၢအမံၤ ဘၣ်တၢ်ကွဲးနီၣ် ပာ်စၢၤအီၤ အကျါန့ၣ် တလဲၤဝဲလၢ တၢ်အိၣ်ဖှိၣ်အဒဲဘၣ်. အဝဲသ့ၣ်အိၣ်တ့ၢ်ဒံးလၢ ဒဲကဝီၤအပူၤ ဘၣ်ဆၣ် သးစီဆှံ လီၤလၢ အဝဲသ့ၣ်အလိၤစ့ၢ်ကီးလီၤ. အဃိ အဝဲသ့ၣ် မၤထီၣ်အသး ဒ်ဝံတဖၣ်အသိး လၢဒဲကဝီၤ အပူၤလီၤ. အဝဲသ့ၣ် အမံၤမ့ၢ်ဝဲ စီၤအ့လဒး ဒီးစီၤမ့ဒးလီၤ. ၂၇ ဒီးပိာ်ခွါ သးစၢ်တဂၤ လဲၤဃ့ၢ်တဲဘၣ် စီၤမိၤၡ့လၢ “စီၤအ့လဒး ဒီးစီၤမ့ဒး မၤထီၣ်အသး ဒ်ဝံတဖၣ်အသိး လၢဒဲကဝီၤ အပူၤလီၤ.” ၂၈ ဒီးစီၤနိၣ်အဖိခွါ စီၤယိၤၡူ+ လၢအမ့ၢ် ပှၤလၢအမၤစၢၤစီၤမိၤၡ့ စးထီၣ်လၢအသးစၢ်ခါ လံၤလံၤန့ၣ် တဲဝဲလၢ “ယကစၢ် စီၤမိၤၡ့ဧၢ, တြီအဝဲသ့ၣ်မီၤ.”+ ၂၉ ဘၣ်ဆၣ် စီၤမိၤၡ့ တဲအီၤလၢ “မ့ၢ်နသူၣ်က့ၣ်သးကါတၢ် လၢယဂီၢ်ဧါ. တဘၣ်မၤ ဒ်န့ၣ်တဂ့ၤ. ယမုၢ်လၢ်လၢ ယဟိဝၤယွၤ အပှၤဂီၢ်မုၢ် ကိးဂၤဒဲး ကကဲဝံတဖၣ် ဒီးယဟိဝၤယွၤ ကပာ် အသးစီဆှံလၢ အဝဲသ့ၣ် အလိၤလီၤ.” ၃၀ ဒီးစီၤမိၤၡ့ ဒီးအံၣ်စရ့လး အပှၤသူၣ်က့သးပှၢ်တဖၣ် က့ၤကဒါက့ၤလၢ ဒဲကဝီၤလီၤ.
၃၁ ဒီးကလံၤလၢ ယဟိဝၤယွၤ အအိၣ်န့ၣ် ဟဲအူထီၣ်ဝဲ ဒီးဟဲစိာ်ဝဲ ထိၣ်ပဝံ လၢပီၣ်လဲၣ် ဒီးဒုးလီၤတဲာ်ဝဲဖဲ ဒဲကဝီၤ အဃၢၤဝးဝးတုၤလၢ+ အယံၤဝဲဒီးဒဲကဝီၤ တသီကျဲလီၤ. ဒီးအတီၣ် ကအိၣ်ခံပျၢ်* လၢဟီၣ်ခိၣ်လိၤလီၤ. ၃၂ ပှၤဂီၢ်မုၢ်တဖၣ် လဲၤထၢဖှိၣ်ဝဲ ထိၣ်ပဝံတဖၣ် ဖဲနံၤအဝဲန့ၣ် ဒီနံၤဒီနၤ ဒီးလၢခံတသီ ဒီတနံၤလီၤ. ပှၤလၢအထၢဝဲ စှၤန့ၢ်ဒံး ဃိမ့ၢ်* တဆံ တအိၣ်နီတဂၤဘၣ်. ဒီးအဝဲသ့ၣ် ရၤလီၤဝဲလၢအနီၢ်ကစၢ် အဂီၢ်လၢ ဟီၣ်ခိၣ်လိၤလၢ ဒဲကဝီၤအကပိာ်ကပၤ ဝးဝးလီၤ.* ၃၃ ဘၣ်ဆၣ် ဖဲတၢ်ညၣ် အိၣ်လၢ အဝဲသ့ၣ် အကိာ်ပူၤ ဒီးအ့ၣ်ဘျဲးဝဲ တချုးဝံၤဒံးဘၣ်န့ၣ် ယဟိဝၤယွၤ သးဒိၣ်ထီၣ် အဝဲသ့ၣ် ဒီးယဟိဝၤယွၤ ဒုးလီၤဘၣ် တၢ်ဆါသံသတြိာ်လၢ အဝဲသ့ၣ် အကျါ ဒီးအဝဲသ့ၣ်သံ အါအါဂီၢ်ဂီၢ်လီၤ.+
၃၄ ဒီးအဝဲသ့ၣ် ကိးဝဲ တၢ်လီၢ်အဝဲန့ၣ် အမံၤလၢ ကံးဘြိၤဟးတဝၤ,+ မ့ၢ်လၢ အဝဲသ့ၣ် ခူၣ်လီၤ ပှၤလၢအသူၣ်လီသးကွံ တၢ်အီၣ်တဖၣ် ဖဲန့ၣ်အဃိလီၤ.+ ၃၅ ဒီးပှၤဂီၢ်မုၢ်တဖၣ် ဟးထီၣ်လၢ ကံးဘြိၤဟးတဝၤ ဒီးလဲၤဝဲလၢ ဃစ့ရိၤ ဒီးအဝဲသ့ၣ် အိၣ်ဝဲဖဲ ဃစ့ရိၤလီၤ.+
၁၂ နီၢ်မံးရယၣ် ဒီးစီၤအၤဟရိၣ် စးထီၣ်တဲအၢတဲသီ စီၤမိၤၡ့ ခီဖျိလၢ အဝဲဟံးအမါ ဒီးပှၤကူၤၡးမုၣ် တဂၤ အဃိလီၤ.+ ၂ ဒီးအဝဲသ့ၣ် တဲဝဲလၢ “မ့ၢ်ယဟိဝၤယွၤ တဲတၢ်ခီဖျိထဲ စီၤမိၤၡ့ တဂၤလီၤဧါ. အတဲတၢ်ခီဖျိ ပှၤစ့ၢ်ကီး တမ့ၢ်ဧီၤ.”+ ဒီးယဟိဝၤယွၤ ကနၣ်ဝဲလီၤ.+ ၃ စီၤမိၤၡ့ မ့ၢ်ပှၤလၢ အသးစူၤ ဒိၣ်န့ၢ်ဒံး ပှၤကိးဂၤဒဲးလၢ+ ဟီၣ်ခိၣ်ချၢ စၢၢ်တလၢၢ်လီၤ.*
၄ သတူၢ်ကလာ်န့ၣ် ယဟိဝၤယွၤ တဲစီၤမိၤၡ့, စီၤအၤဟရိၣ် ဒီးနီၢ်မံးရယၣ်လၢ “သုသၢဂၤအံၤန့ၣ် လဲၤလၢ တၢ်အိၣ်ဖှိၣ်အဒဲတက့ၢ်.” အဃိ အဝဲသ့ၣ် သၢဂၤန့ၣ် လဲၤဝဲလီၤ. ၅ ဒီးယဟိဝၤယွၤ ဟဲလီၤလၢ တၢ်အၢၣ်အထူၣ်ပူၤ+ ဒီးဆၢထၢၣ်လၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒီးကိးဝဲ စီၤအၤဟရိၣ် ဒီးနီၢ်မံးရယၣ်လီၤ. ဒီးအဝဲသ့ၣ် ခံဂၤလၢာ် လဲၤဝဲလၢ တၢ်မဲာ်ညါလီၤ. ၆ ဒီးအဝဲ တဲဝဲလၢ “ဝံသးစူၤ ကနၣ် ယတၢ်ကတိၤတက့ၢ်. လၢသုကျါန့ၣ် ပှၤတဂၤ မ့မ့ၢ်ဝဲ ယဟိဝၤယွၤအဝံန့ၣ် ယကလီၣ်ဖျါထီၣ်ယသး လၢအအိၣ် လၢတၢ်ထံၣ်လၢညါခီအပူၤ ဒီးဒုးသ့ၣ်ညါအီၤလၢ ယမ့ၢ်မတၤလဲၣ် လၢတၢ်လီၣ်ဖျါအပူၤ+ ဒီးယကတဲတၢ်ဒီးအီၤ လၢတၢ်မံမီၢ် အပူၤလီၤ.+ ၇ ဘၣ်ဆၣ် မ့မ့ၢ် ယခ့ယပှၤ စီၤမိၤၡ့န့ၣ် တမ့ၢ်ဒ်န့ၣ်ဘၣ်. ယအးလီၤ ယဟံၣ်* လၢအစုပူၤလီၤ.*+ ၈ ယတဲတၢ်ဒီးအီၤလၢ မဲာ်သကိးမဲာ်+ ပျီပျီဒီး တမ့ၢ် ခီဖျိလၢ တၢ်ကတိၤလီၤဘၢတဖၣ်ဘၣ်. ဒီးအဝဲထံၣ်ဘၣ် ယၤ ယဟိဝၤယွၤ လီၣ်ဖျါထီၣ် အသးလၢ အမဲာ်ညါလီၤ. မ့မ့ၢ်ဒ်န့ၣ်န့ၣ် ဘၣ်မနုၤအဃိ သုတဲအၢတဲသီ ယခ့ယပှၤ စီၤမိၤၡ့ ဘူၣ်လဲၣ်.”
၉ ဒီးယဟိဝၤယွၤ သးပှံၢ်ထီၣ် အဝဲသ့ၣ် ဒီးဟးထီၣ်လၢ အဝဲသ့ၣ် အအိၣ်လီၤ. ၁၀ ဒီးတၢ်အၢၣ်န့ၣ် သုးကွံာ်အသးလၢ ဒဲအဖီခိၣ် ဒီးနီၢ်မံးရယၣ်န့ၣ် ဘၣ်တၢ်ဆါအၢလၢ အဝါဝဲဒ် မူခိၣ်ဖီ အသိးလီၤ.+ ဒီးစီၤအၤဟရိၣ် ဃၣ်ဃီၤအသးလၢ နီၢ်မံးရယၣ် အအိၣ် ဒီးထံၣ်ဝဲလၢ နီၢ်မံးရယၣ် ဘၣ်တၢ်ဆါအၢလီၤ.+ ၁၁ တဘျီဃီန့ၣ် စီၤအၤဟရိၣ် တဲစီၤမိၤၡ့လၢ “ကစၢ်ဧၢ, ယဃ့ကညးနၤလီၤ. ပမၤဘၣ်တၢ် ဒ်ပှၤမၢးဖိအသိးလံ, ဝံသးစူၤ တဘၣ်ဟံးန့ၢ်ပှၤ အရ့လၢ တၢ်ဒဲးဘးအံၤ အဃိတဂ့ၤ. ၁၂ ဝံသးစူၤ တဘၣ်ပျဲ လၢနီၢ်မံးရယၣ် ကဆဲးအိၣ် ဒ်ပှၤဖိသၣ်လၢ အသံလၢ တၢ်အီၣ်ကွံာ်အညၣ် တဝာ်န့ၣ်တဂ့ၤ.” ၁၃ ဒီးစီၤမိၤၡ့ ဃ့ကညး ယဟိဝၤယွၤလၢ “အိ ကစၢ်ယွၤဧၢ, ဝံသးစူၤ မၤဘျါအီၤတက့ၢ်. ဝံသးစူၤလီၤ.”+
၁၄ ဒီးယဟိဝၤယွၤ တဲဆၢ စီၤမိၤၡ့လၢ “အပၢ်မ့ၣ်ထူးပှဲာ်ဒိး အမဲာ်သၣ်န့ၣ် အဝဲ ကတူၢ်ဘၣ် တၢ်မဲာ်ဆှး နွံသီတမ့ၢ်ဧီၤ. အဃိ မ်အဝဲ အိၣ်လီၤဆီဝဲလၢ ဒဲကဝီၤအချၢ နွံသီတက့ၢ်.+ ဝံၤဒီး ပှၤကိးနုာ် ကဒါက့ၤအီၤ သ့လီၤ.” ၁၅ အဃိ နီၢ်မံးရယၣ် ဘၣ်တၢ်ပာ်လီၤဆီအီၤ လၢဒဲကဝီၤအချၢ နွံသီ+ ဒီးတချုးလၢ အဝဲဘၣ်တၢ်ကိးနုာ် ကဒါက့ၤအီၤဒံးဘၣ်န့ၣ် ပှၤဂီၢ်မုၢ်တဖၣ် တသုးဝဲ ဒဲကဝီၤဘၣ်. ၁၆ လၢခံ ပှၤဂီၢ်မုၢ်တဖၣ် ဟးထီၣ်လၢ ဃစ့ရိၤ+ ဒီးသူၣ်လီၤအဒဲလၢ ပၤရၣ်အပှၢ်မုၢ်ကနၢပူၤလီၤ.+
၁၃ ယဟိဝၤယွၤ တဲစီၤမိၤၡ့လၢ ၂ “ဃုထၢထီၣ် ပှၤခိၣ်ပှၤနၢ်လၢ+ ပှၤအဒူၣ် တဒူၣ်စုာ်စုာ်အကျါ+ တဒူၣ်တဂၤ တဒူၣ်တဂၤ ဒီးဆှၢလီၤ အဝဲသ့ၣ်လၢ ကလဲၤကွၢ်ဟုၣ် ကီၢ်ကနၤဧၣ်လၢ ယကဟ့ၣ်လီၤ ပှၤအံၣ်စရ့လးဖိ န့ၣ်တက့ၢ်.”
၃ အဃိ ဒ်ယဟိဝၤယွၤ မၤလိာ်ဝဲအသိး ဖဲအဝဲသ့ၣ် အိၣ်ဝဲလၢ ပၤရၣ်အပှၢ်မုၢ်ကနၢ+ အခါ စီၤမိၤၡ့ မၢလီၤအဝဲသ့ၣ်လီၤ. ဒီးအဝဲသ့ၣ် ခဲလၢာ်မ့ၢ်ဝဲ ပှၤအံၣ်စရ့လးဖိ အခိၣ်အနၢ်တဖၣ်လီၤ. ၄ အဝဲသ့ၣ်မ့ၢ်ဝဲ စီၤစးကူၢ် အဖိခွါ စီၤၡးမူၤ လၢအပၣ်ဃုာ်လၢ ရူၤဘ့ၣ်အဒူၣ်ကျါ, ၅ စီၤဃိရံၤ အဖိခွါ စီၤၡၤဖး လၢအပၣ်ဃုာ်လၢ စူၤမ့းအိၣ် အဒူၣ်ကျါ, ၆ စီၤယဖူန့ၤ အဖိခွါ စီၤကၤလ့း+ လၢအပၣ်ဃုာ်လၢ ယူဒၤအဒူၣ်ကျါ, ၇ စီၤယိၤသး အဖိခွါ စီၤယံးက့လး လၢအပၣ်ဃုာ်လၢ ယံးစၣ်ကၢ် အဒူၣ်ကျါ, ၈ စီၤနိၣ် အဖိခွါ စီၤဟိၤၡ့+ လၢအပၣ်ဃုာ်လၢ အ့ဖရဲၣ် အဒူၣ်ကျါ, ၉ စီၤရါဖူၤ အဖိခွါ စီၤဖးလတံၤ လၢအပၣ်ဃုာ်လၢ ဘံၣ်ယၤမံၣ် အဒူၣ်ကျါ, ၁၀ စီၤစိဒံၤ အဖိခွါ စီၤကးဒံၤအ့လး လၢအပၣ်ဃုာ်လၢ စဘူလိၣ် အဒူၣ်ကျါ, ၁၁ စီၤစူစံၤ အဖိခွါ စီၤကၤဒံ လၢအပၣ်ဃုာ်လၢ ယိၤသးအဒူၣ်+ လၢအမ့ၢ် မနၤၡ့ၤအဒူၣ်ကျါ,+ ၁၂ စီၤကမးလံၤ အဖိခွါ စီၤဧးမံၤအ့လး လၢအပၣ်ဃုာ်လၢ ဒၣ်အဒူၣ်ကျါ, ၁၃ စီၤမံၤက့လး အဖိခွါ စီၤစသူၢ် လၢအပၣ်ဃုာ်လၢ အၤၡ့ၢ် အဒူၣ်ကျါ, ၁၄ စီၤဝးဖစံၤ အဖိခွါ စီၤဃၤနဘံ လၢအပၣ်ဃုာ်လၢ နးသၤလံ အဒူၣ်ကျါ ၁၅ ဒီးစီၤမၤကံ အဖိခွါ စီၤကအူၤအ့လး လၢအပၣ်ဃုာ်လၢ ကးအဒူၣ်ကျါလီၤ. ၁၆ အဝဲသ့ၣ်တဖၣ်န့ၣ် မ့ၢ်ဝဲ ပှၤလၢ စီၤမိၤၡ့ ဆှၢလီၤဝဲ ဒ်သိးကလဲၤကွၢ်ဟုၣ်ကီၢ် အဂီၢ်လီၤ. ဒီးစီၤမိၤၡ့ ကိးန့ၢ်ဝဲ စီၤနိၣ် အဖိခွါ စီၤဟိၤၡ့ အမံၤလၢ စီၤယိၤၡူလီၤ.*+
၁၇ ဖဲစီၤမိၤၡ့ ဆှၢလီၤ အဝဲသ့ၣ်လၢ ကလဲၤကွၢ်ဟုၣ် ကီၢ်ကနၤဧၣ်အခါ အဝဲ တဲအဝဲသ့ၣ်လၢ “လဲၤထီၣ်လၢ နဲကဲၤ ဝံၤဒီး လဲၤထီၣ်လၢ ကစၢၢ်ကလိ အကျါတက့ၢ်.+ ၁၈ သုဘၣ်လဲၤကွၢ် ကီၢ်တဘ့ၣ်န့ၣ် မၤအသးဒ်လဲၣ်ဒ်လဲၣ်,+ ပှၤအိၣ်ဖဲန့ၣ်တဖၣ်န့ၣ် အဂံၢ်ဆူၣ်ဧါ တဆူၣ်ဧါ, အနီၣ်ဂံၢ်အါဧါ စှၤဧါ, ၁၉ ဒီးကီၢ်အဝဲန့ၣ် ဂ့ၤဧါတဂ့ၤဧါ ဒီးဝ့ၢ်တဖၣ်လၢ အဝဲသ့ၣ် အိၣ်လၢအပူၤန့ၣ် အဒူၣ်ကျၢၤဧါ, အဒူၣ် တအိၣ်ဘၣ်ဧါန့ၣ်လီၤ. ၂၀ ဒီးဃုသ့ၣ်ညါ စ့ၢ်ကီးလၢ ကီၢ်အဝဲန့ၣ် အဟီၣ်ခိၣ်ညၣ် ဂ့ၤဧါတဂ့ၤဧါ+ ဒီးသ့ၣ်အိၣ်ဧါ တအိၣ်ဧါ န့ၣ်တက့ၢ်. သုကဘၣ် ပာ်ဖျါထီၣ် တၢ်သးဒူ+ ဒီးဟံးန့ၢ် တၤသူတၤသၣ် တနီၤလၢ ကီၢ်တဘ့ၣ်န့ၣ် အပူၤလီၤ.” ဖဲန့ၣ်အခါ ဘၣ်ဖဲ စပံးသၣ် မံထီၣ်သီသီ အဆၢကတီၢ်လီၤ.+
၂၁ အဃိ အဝဲသ့ၣ် လဲၤထီၣ်ကွၢ်ဟုၣ်ဝဲ ကီၢ်တဘ့ၣ်န့ၣ် စးထီၣ်လၢ စံၣ်အပှၢ်မုၢ်ကနၢ+ တုၤလၢ ဝ့ၢ်ရဃိာ်+ လၢအအိၣ်ဘူးဒီး လံၤဘိၤဃမါသးလီၤ.+ ၂၂ ဖဲအဝဲသ့ၣ် လဲၤထီၣ်လၢ နဲကဲၤအခါ အဝဲသ့ၣ် လဲၤတုၤဝဲလၢ ဝ့ၢ်ဃ့ဘြိၣ်လၢ+ စီၤအဃံမ့ၣ်, စီၤၡ့ၤၡဲ ဒီးစီၤတးလမဲ+ အစၢၤအသွဲၣ်တဖၣ် လၢအမ့ၢ် ပှၤဧနးဖိ+ အိၣ်ဝဲ အလီၢ်လီၤ. တချုးလၢ ကီၢ်အဲၤကူပတူး အဝ့ၢ်စိၤဧၣ် အိၣ်ထီၣ်ဒံးဘၣ် နွံနံၣ်န့ၣ် ဝ့ၢ်ဃ့ဘြိၣ် ဘၣ်တၢ်သူၣ်ထီၣ်အီၤလီၤ. ၂၃ ဖဲအဝဲသ့ၣ် လဲၤတုၤလၢ အ့ၡကိၤလး အတၢ်တြီၤအခါ+ အဝဲသ့ၣ် မၤတဲာ်ဝဲ စပံးမုၢ်အဒ့တဒ့လၢ အအိၣ်ဒီး စပံးသၣ် အချုၣ်ဖးဒိၣ် တချုၣ်လီၤ. ဒီးစပံးသၣ်တချုၣ်အံၤ ဃုာ်ဒီးသလဲသၣ် ဒီးချၢၣ်ဒၢသၣ် တနီၤန့ၣ် ပှၤပိာ်ခွါ ဘၣ်ယိးဝဲခံဂၤ လၢနီၣ်ယိးဘိ တဘိလီၤ.+ ၂၄ အဝဲသ့ၣ် ကိးဝဲ တၢ်လီၢ်အဝဲန့ၣ်လၢ အ့ၡကိၤလး* အတၢ်တြီၤ,+ မ့ၢ်လၢ ပှၤအံၣ်စရ့လးဖိတဖၣ် မၤတဲာ်ဝဲ စပံးသၣ် အချုၣ် ဖဲန့ၣ်အဃိလီၤ.
၂၅ ဖဲအသီ လွံၢ်ဆံ ဝံၤအလီၢ်ခံန့ၣ်+ အဝဲသ့ၣ် ဟဲက့ၤဝဲလၢ တၢ်လဲၤကွၢ်ဟုၣ် ထံကီၢ်န့ၣ်လီၤ. ၂၆ ဒီးအဝဲသ့ၣ် က့ၤဝဲလၢ စီၤမိၤၡ့ ဒီးစီၤအၤဟရိၣ် ဒီးပှၤအံၣ်စရ့လးဖိခဲလၢာ် အအိၣ် လၢကၤဒ့ၣ် လၢပၤရၣ်အပှၢ်မုၢ်ကနၢပူၤလီၤ.+ ဒီးအဝဲသ့ၣ် တဲဘၣ် ပှၤဂီၢ်မုၢ်လၢ တၢ်ဂ့ၢ်တၢ်ကျိၤ ဒီးဒုးနဲၣ် အဝဲသ့ၣ်လၢ ကီၢ်တဘ့ၣ်န့ၣ် အတၤသူတၤသၣ်လီၤ. ၂၇ အဝဲသ့ၣ် တဲဘၣ် စီၤမိၤၡ့လၢ “ပလဲၤနုာ်လီၤလၢ ကီၢ်တဘ့ၣ်လၢ နမၢပလဲၤ ဒီးလၢကီၢ်တဘ့ၣ်အံၤ အပူၤန့ၣ် တၢ်နုၢ်ထံ ဒီးကနဲစီ ယွၤလီၤဝဲ သပှၢ်ကတၢၢ်လီၤ.+ ဒီးအဝဲအံၤ မ့ၢ်အတၤသူတၤသၣ် တဖၣ်လီၤ.+ ၂၈ ဘၣ်ဆၣ် ပှၤလၢအအိၣ်လၢ ကီၢ်ပူၤန့ၣ် မ့ၢ်ပှၤလၢ အဂံၢ်ဆူၣ် ဒီးအဝဲသ့ၣ် အဝ့ၢ်တဖၣ်န့ၣ် အိၣ်ဒီးအဒူၣ်လၢ အကျၢၤ ဒီးအဒိၣ်ဝဲလီၤ. ဒီးတကးဒံးဘၣ် ပထံၣ်စ့ၢ်ကီး ပှၤဧနးဖိတဖၣ် ဖဲန့ၣ်လီၤ.+ ၂၉ ပှၤဧမၤလ့းဖိတဖၣ်+ အိၣ်ဝဲလၢ နဲကဲၤ အဟီၣ်ကဝီၤ+ ဒီးပှၤဃ့ၤသးဖိ, ပှၤယဘူၣ်ဖိ+ ဒီးပှၤအမိၢ်ဖိတဖၣ်န့ၣ်+ အိၣ်ဝဲလၢ ကစၢၢ်ကလိ အကျါလီၤ. မ့မ့ၢ် ပှၤကနၤဧၣ်ဖိတဖၣ်န့ၣ်+ အိၣ်ဘူးဒီး ပီၣ်လဲၣ်+ ဒီးထံကျိယၢ်ဒ့ၣ် အဃၢၤလီၤ.”
၃၀ ဒီးစီၤကၤလ့း ဂုာ်ကျဲးစၢး မၤခုၣ်လီၤ ပှၤလၢ အဆၢထၢၣ်လၢ စီၤမိၤၡ့ အမဲာ်ညါ တဖၣ်အံၤ အသးလီၤ. အဝဲတဲဝဲလၢ “ပမၤနၢၤ ပှၤလၢ အအိၣ်ဖဲန့ၣ်တဖၣ် သ့ဝဲ သပှၢ်တၢၢ် အဃိ ပကလဲၤထီၣ်ဖဲန့ၣ် တဘျီဃီ ဒီးပကမၤန့ၢ် ကီၢ်တဘ့ၣ်န့ၣ် သပှၢ်တၢၢ်လီၤ.”+ ၃၁ ဘၣ်ဆၣ် ပှၤပိာ်ခွါတဖၣ် လၢအလဲၤဒီးအီၤန့ၣ် တဲဝဲလၢ “ပလဲၤဒုး အဝဲသ့ၣ် တနၢၤဘၣ်, အဝဲသ့ၣ်န့ၣ် အဂံၢ်ဆူၣ်န့ၢ်ဒံးပှၤလီၤ.”+ ၃၂ ဒီးဘၣ်ဃးဒီး ထံကီၢ်လၢ အဝဲသ့ၣ် လဲၤကွၢ်ဟုၣ်ဝဲန့ၣ် အဝဲသ့ၣ် ဆဲးတဲဝဲ ပှၤအံၣ်စရ့လးဖိတဖၣ် လၢတၢ်ဂ့ၢ်တၢ်ကျိၤ လၢအတဂ့ၤဘၣ်တခီ+ ဒီးတဲဝဲလၢ “ထံကီၢ်လၢ ပလဲၤနုာ်လီၤကွၢ်ဟုၣ်အီၤန့ၣ် မ့ၢ်ကီၢ်လၢအလီၤဘၣ်ယိၣ် ဒီးသုကသံသပှၢ်တၢၢ်. ဒီးပှၤလၢ ပထံၣ်ဘၣ်အီၤ ဖဲန့ၣ် ကိးဂၤဒဲးန့ၣ် မ့ၢ်ပှၤလၢ အနီၢ်ဖးဒိၣ်ဖးထီလီၤ.+ ၃၃ ဒီးဖဲန့ၣ်န့ၣ် ပထံၣ်ဘၣ် ပှၤနီၢ်ဒိၣ်ဖိတဖၣ်လီၤ. အဝဲသ့ၣ်မ့ၢ် ပှၤဧနးဖိ+ လၢအဟဲလီၤစၢၤလၢ ပှၤနီၢ်ဒိၣ်ဖိတဖၣ်လီၤ. ပှၤမ့ၢ်ထိၣ်သတြီၤ အဝဲသ့ၣ် ဒီးပှၤန့ၣ် လၢပတၢ်ထံၣ်မ့ၢ်ဂ့ၤ အဝဲသ့ၣ် အတၢ်ထံၣ်မ့ၢ်ဂ့ၤ ပလီၤဂာ် ဒ်ဒွဲၣ်တဖၣ် အသိးလီၤ.”
၁၄ ဖဲန့ၣ်အခါ ပှၤအံၣ်စရ့လးဖိ ခဲလၢာ် ကိးပသူထီၣ်ဝဲ ဒီးဟီၣ်ဝဲယၢၤဝဲ ဒီတနၤကျၢၤလီၤ.+ ၂ ပှၤအံၣ်စရ့လးဖိ ခဲလၢာ် စးထီၣ် ကဒူးကဒ့ၣ်ဝဲ စီၤမိၤၡ့ ဒီးစီၤအၤဟရိၣ်+ ဒီးတဲဝဲလၢ “ပမ့ၢ်သံဆိလၢ ကီၢ်အဲၤကူပတူးအပူၤ မ့တမ့ၢ် ပမ့ၢ်သံဆိလၢ ပှၢ်မုၢ်ကနၢအံၤ အပူၤန့ၣ် ကဂ့ၤဒိၣ်ဒံး. ၃ ဘၣ်မနုၤအဃိ ယဟိဝၤယွၤ အဲၣ်ဒိးဆှၢပှၤလၢ ကီၢ်တဘ့ၣ်အံၤလဲၣ်.+ မ့ၢ်ဒ်သိး ပကသံလၢနး အဂီၢ်ဧါ. ပဖိပမါတဖၣ် ကဘၣ် တၢ်ဂုာ်န့ၢ်ဆူၣ်အီၤလီၤ.+ ပမ့ၢ်က့ၤကဒါက့ၤ လၢကီၢ်အဲၤကူပတူးန့ၣ် ကဂ့ၤဒိၣ်လၢပဂီၢ် တမ့ၢ်ဧီၤ.”+ ၄ ဒီးအဝဲသ့ၣ် တဲလိာ်အသး တဂၤဒီးတဂၤလၢ “ပကပာ်ထီၣ် ခိၣ်နၢ်တဂၤ ဒီးပကက့ၤလၢ ကီၢ်အဲၤကူပတူးဟီ.”+
၅ စီၤမိၤၡ့ ဒီးစီၤအၤဟရိၣ် ထိၣ်လီၤပှီၤအသး ဒီးကျးလီၤအမဲာ် လၢဟီၣ်ခိၣ်လိၤ လၢအံၣ်စရ့လး အတၢ်အိၣ်ဖှိၣ် ဒီတဖု လၢအဟဲအိၣ်ဖှိၣ် ဖဲန့ၣ်တဖၣ် အမဲာ်ညါလီၤ. ၆ စီၤနိၣ် အဖိခွါ စီၤယိၤၡူ+ ဒီးစီၤယဖူန့ၤ အဖိခွါ စီၤကၤလ့း+ လၢအပၣ်ဃုာ်လၢ ပှၤလဲၤကွၢ်ဟုၣ် ထံကီၢ်အကျါန့ၣ် ဖှီညာ်အဆ့ကၤ ၇ ဒီးအဝဲသ့ၣ် တဲဝဲ ပှၤအံၣ်စရ့လးဖိ ခဲလၢာ်လၢ “ထံကီၢ်လၢ ပလဲၤနုာ်လီၤ ကွၢ်ဟုၣ်အီၤန့ၣ် မ့ၢ်ထံကီၢ်လၢအဂ့ၤ သပှၢ်ကတၢၢ်လီၤ.+ ၈ ယဟိဝၤယွၤ မ့ၢ်ဘၣ်သူၣ်ဘၣ်သးပှၤန့ၣ် အဝဲကဆှၢပှၤလၢ ထံကီၢ်လၢ တၢ်နုၢ်ထံဒီး ကနဲစီ ယွၤလီၤဝဲလၢ အပူၤအံၤ ဒီးကဟ့ၣ်လီၤပှၤ ကီၢ်တဘ့ၣ်အံၤ သပှၢ်ကတၢၢ်လီၤ.+ ၉ ဘၣ်ဆၣ် သုတဘၣ် ထီဒါက့ၤ ယဟိဝၤယွၤဘၣ် ဒီးသုတဘၣ်ပျံၤ ပှၤအိၣ်လၢ ကီၢ်ပူၤဘၣ်.+ နီၢ်ကီၢ်န့ၣ် ပကမၤနၢၤ အဝဲသ့ၣ် ညီညီဖိလီၤ.* တၢ်လၢ အကဒီသဒၢ အဝဲသ့ၣ်န့ၣ် တအိၣ်လၢၤဘၣ်. ဒီးယဟိဝၤယွၤ အိၣ်ဒီးပှၤအဃိ+ ပျံၤအဝဲသ့ၣ်တဂ့ၤ.”
၁၀ ဒီးပှၤဂီၢ်မုၢ်ခဲလၢာ် တဲဝဲလၢ ကကွံာ်အဝဲသ့ၣ် လၢလၢၢ်လီၤ.+ ဘၣ်ဆၣ် ပှၤအံၣ်စရ့လးဖိခဲလၢာ် ထံၣ်ဘၣ်ဝဲ ယဟိဝၤယွၤ အလၤကပီၤ အိၣ်ဖျါထီၣ်ဝဲလၢ တၢ်အိၣ်ဖှိၣ်အဒဲ အဖီခိၣ်လီၤ.+
၁၁ ဒီးယဟိဝၤယွၤ တဲစီၤမိၤၡ့လၢ “ယမၤတၢ်ပနီၣ်လီၤလး လၢပှၤဂီၢ်မုၢ်တဖၣ်အံၤအကျါ ဒီဒူၣ်လံ. သနာ်က့ အဝဲသ့ၣ် တပာ်ကဲယၤဘၣ်+ ဒီးအဝဲသ့ၣ် တနာ်ယၤဘၣ်. အဝဲသ့ၣ်ကမၤဒ်အံၤ ကယံာ်ဒံး ဆံးယံာ်လဲၣ်.+ ၁၂ ယကဒုးဘၣ် အဝဲသ့ၣ်ဒီး တၢ်ဆါသံသတြိာ် ဒီးမၤဟးဂီၤကွံာ် အဝဲသ့ၣ် ဒီးဒုးကဲထီၣ်နၤလၢ ပှၤတကလုာ်လၢ အဒိၣ်န့ၢ်ဒံး အဝဲသ့ၣ် ဒီးလၢအဂံၢ်ဆူၣ်ဘါဆူၣ်န့ၢ်ဒံး အဝဲသ့ၣ်လီၤ.”+
၁၃ ဘၣ်ဆၣ် စီၤမိၤၡ့တဲ ယဟိဝၤယွၤလၢ “နထုးထီၣ် နပှၤဂီၢ်မုၢ် လၢကီၢ်အဲၤကူပတူးအပူၤ လၢနစိနကမီၤ ဝံၤလံ, အဃိ နမ့ၢ်မၤ နပှၤဂီၢ်မုၢ်တဖၣ် ဒ်အံၤန့ၣ် ပှၤအဲၤကူပတူးဖိတဖၣ် ကနၢ်ဟူဝဲ+ ၁၄ ဒီးအဝဲသ့ၣ် ကတဲဘၣ် ပှၤလၢအအိၣ်လၢ ကီၢ်ကနၤဧၣ်တဖၣ် လၢတၢ်ဂ့ၢ်အံၤလီၤ. အဝဲသ့ၣ် နၢ်ဟူပာ်စၢၤလၢ နမ့ၢ်ယဟိဝၤယွၤ လၢအအိၣ်လၢ ပှၤဂီၢ်မုၢ်တဖၣ်အံၤအကျါ+ ဒီးနလီၣ်ဖျါထီၣ်နသးလၢ အဝဲသ့ၣ်အအိၣ် လၢမဲာ်သကိးမဲာ်,+ ဒီးနမ့ၢ် ယဟိဝၤယွၤ ဒီးနတၢ်အၢၣ်န့ၣ် အိၣ်ဆၢထၢၣ်ဝဲလၢ အဝဲသ့ၣ် အဖီခိၣ် ဒီးနလဲၤတၢ်လၢအဝဲသ့ၣ် အမဲာ်ညါလၢ တၢ်အၢၣ်အထူၣ် လၢမုၢ်ဆါခီ ဒီးလၢမ့ၣ်အူအထူၣ် လၢမုၢ်နၤခီလီၤ.+ ၁၅ နမ့ၢ်မၤသံ ပှၤသ့ၣ်တဖၣ်အံၤ ခဲလၢာ် တဘျီဃီန့ၣ် ပှၤကလုာ်တဖၣ် လၢအနၢ်ဟူပာ်စၢၤ နဂ့ၢ်န့ၣ် ကတဲဝဲလၢ ၁၆ ‘ယဟိဝၤယွၤ လဲၤဆှၢ ပှၤသ့ၣ်တဖၣ်န့ၣ်လၢ ကီၢ်လၢ အအၢၣ်လီၤဝဲလၢ အကဟ့ၣ်လီၤ အဝဲသ့ၣ် တန့ၢ်ဘၣ် အဃိ အဝဲမၤသံကွံာ် အဝဲသ့ၣ်လၢ ပှၢ်မုၢ်ကနၢ အပူၤလီၤ.’+ ၁၇ ယဟိဝၤယွၤဧၢ, ဝံသးစူၤ ပာ်ဖျါထီၣ် နစိနကမီၤလၢအဒိၣ် ဒ်နတဲတ့ၢ် အသိးတက့ၢ်. နတဲလၢ ၁၈ ‘ယဟိဝၤယွၤန့ၣ် တသးဒိၣ်ထီၣ်တၢ် ချ့ချ့ဘၣ်, အိၣ်ဒီး တၢ်အဲၣ်လၢ အတီဒိၣ်မး,+ ပျၢ်ကွံာ် တၢ်ကမၣ် ဘၣ်ဆၣ် ပှၤလၢအတၢ်ကမၣ် အိၣ်ဝဲတဖၣ်န့ၣ် အဝဲ တပျဲပူၤဝဲလၢ တၢ်စံၣ်ညီၣ်ဘၣ်. မ့မ့ၢ် တၢ်စံၣ်ညီၣ်လၢ ပၢ်တဖၣ် အတၢ်ကမၣ် အဂီၢ်န့ၣ် အဝဲ ဒုးလီၤဘၣ်လၢ အဝဲသ့ၣ် အဖိတဖၣ် အလိၤ ဒီးလၢအလံၤတဖၣ် အလိၤလီၤ.’+ ၁၉ ဒ်နအိၣ်ဒီး တၢ်အဲၣ် လၢအတီ ဒိၣ်ဒိၣ်မုၢ်မုၢ် အသိးန့ၣ် ဝံသးစူၤ ပျၢ်ကွံာ် ပှၤဂီၢ်မုၢ်တဖၣ်အံၤ အတၢ်ကမၣ် ဒ်နဝံသးစူၤတ့ၢ်အဝဲသ့ၣ် လၢကီၢ်အဲၤကူပတူး ဒီးတုၤလၢခဲအံၤ အသိး န့ၣ်တက့ၢ်.”+
၂၀ ဒီးယဟိဝၤယွၤ တဲဝဲလၢ “ဒ်နဃ့အသိးန့ၣ် ယပျၢ်အဝဲသ့ၣ် အတၢ်ကမၣ်လံ.+ ၂၁ ဘၣ်ဆၣ်သနာ်က့ ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ ဟီၣ်ခိၣ်ဒီဘ့ၣ် ကပှဲၤဝဲဒီး ယဟိဝၤယွၤ အလၤကပီၤလီၤ.+ ၂၂ ပှၤထံၣ်ဘၣ် ယလၤကပီၤ ဒီးယတၢ်ပနီၣ်လီၤလးတဖၣ်လၢ+ ယမၤအီၤလၢ ကီၢ်အဲၤကူပတူး ဒီးပှၢ်မုၢ်ကနၢအပူၤ သနာ်က့ အဝဲသ့ၣ် ဆဲးမၤကွၢ်ယၤ+ အဘျီတဆံ ဒီးတဒိကနၣ် ယကလုၢ်ဘၣ်.+ ၂၃ အဝဲသ့ၣ် တထံၣ်ဘၣ်ဝဲ ထံကီၢ်လၢ ယအၢၣ်လီၤလၢ ယကဟ့ၣ်လီၤ အဝဲသ့ၣ် အပၢ်တဖၣ်ဘၣ်. ပှၤလၢ အတပာ်ကဲယၤန့ၣ် တထံၣ်ဘၣ်ဝဲ ထံကီၢ်အံၤ နီတဂၤဘၣ်.+ ၂၄ ဘၣ်ဆၣ် ယခ့ယပှၤ စီၤကၤလ့းန့ၣ်+ အတၢ်ပာ်သူၣ်ပာ်သး လီၤဆီဒီးပှၤဂၤ ဒီးအဝဲ ဒိကနၣ် ယကလုၢ်လၢ အသးဒီဖျၢၣ် ထီဘိအဃိ ယကလဲၤ ဆှၢနုာ်အီၤလၢ ကီၢ်လၢ အလဲၤတုၤဝဲ တဘ့ၣ်န့ၣ် အပူၤ ဒီးအစၢၤအသွဲၣ်တဖၣ် ကမၤန့ၢ်ဘၣ် ကီၢ်တဘ့ၣ်န့ၣ်လီၤ.+ ၂၅ မ့ၢ်လၢ ပှၤဧမၤလ့းဖိ ဒီးပှၤကနၤဧၣ်ဖိ+ အိၣ်ဆိးဝဲလၢ တၢ်တြီၤ အဃိ ခဲမုၢ်ဆ့ၣ်န့ၣ် သုကဘၣ် ဃၣ်က့ၤသုသး ဒီးလဲၤတၢ်ဆူ ပှၢ်မုၢ်ကနၢ လၢပီၣ်လဲၣ်ဂီၤ အကျဲလီၤ.”+
၂၆ ဒီးယဟိဝၤယွၤ တဲစီၤမိၤၡ့ ဒီးစီၤအၤဟရိၣ်လၢ ၂၇ “တၢ်အိၣ်ဖှိၣ် လၢအအၢအသီ တဖုအံၤန့ၣ် ကဆဲးကဒူးကဒ့ၣ်ယၤ ဆံးယံာ်လဲၣ်.+ ပှၤအံၣ်စရ့လးဖိတဖၣ် ကဒူးကဒ့ၣ်ယၤ ဒ်လဲၣ်န့ၣ် ယနၢ်ဟူဘၣ်လံ.+ ၂၈ တဲအဝဲသ့ၣ်လၢ ‘ယဟိဝၤယွၤ တဲဝဲလၢ “ဒ်ယမ့ၢ်ပှၤလၢအမူဝဲ သပှၢ်တၢၢ်အသိး ယအၢၣ်လီၤလၢ ယကမၤသုဒ် တၢ်လၢယနၢ်ဟူ သုတဲအသိးလီၤ.+ ၂၉ ကယဲၢ် ပှၤလၢအကဒူးကဒ့ၣ်ယၤ လၢအသးနံၣ်အိၣ် ၂၀ ဒီးဆူအဖီခိၣ် လၢအမံၤ ဘၣ်တၢ်ထၢအီၤ ကိးဂၤဒဲးန့ၣ်+ ကသံဝဲလၢ ပှၢ်မုၢ်ကနၢ အပူၤလီၤ.+ ၃၀ သုတလဲၤနုာ်လီၤဘၣ်လၢ ကီၢ်လၢ ယအၢၣ်လီၤလၢ ယကဒုးအိၣ်သု နီတဂၤဘၣ်.+ ထဲဒၣ် စီၤယဖူန့ၤ အဖိခွါ စီၤကၤလ့း ဒီးစီၤနိၣ် အဖိခွါ စီၤယိၤၡူန့ၣ် ကလဲၤနုာ်လီၤဘၣ်ဝဲလီၤ.+
၃၁ “‘“သုဖိတဖၣ် လၢသုတဲလၢ တၢ်ကဂုာ်န့ၢ်ဆူၣ်အီၤန့ၣ် ယကဆှၢနုာ် အဝဲသ့ၣ်+ ဒီးအဝဲသ့ၣ် ကသ့ၣ်ညါဘၣ် ကီၢ်လၢ သုသးဘၣ်အၢအီၤလီၤ.+ ၃၂ ဘၣ်ဆၣ် မ့မ့ၢ်သုန့ၣ် သုကသံလၢ ပှၢ်မုၢ်ကနၢအံၤ အပူၤလီၤ. ၃၃ ခဲအံၤ သုဖိတဖၣ် ကကဲထီၣ် ပှၤကွၢ်သိလၢ ပှၢ်မုၢ်ကနၢအပူၤ အနံၣ် ၄၀+ ဒီးအဝဲသ့ၣ် ကဘၣ်တူၢ်တၢ် ခီဖျိလၢ သုတၢ်သးတီ တအိၣ်ဘၣ်* အဃိ တုၤလီၤလၢ ပှၤလၢ သုကျါ အလီၢ်ခံကတၢၢ်တဂၤ သံဝဲလၢ ပှၢ်မုၢ်ကနၢ အပူၤလီၤ.+ ၃၄ သုလဲၤကွၢ်ဟုၣ်တၢ် လၢထံကီၢ်ပူၤ အိၣ်ဝဲအနံၤ ၄၀ အဃိ+ ဒ်တနံၤလၢ တနံၣ်အဂီၢ်, တနံၤလၢ တနံၣ်အဂီၢ်အသိး သုကဘၣ် တူၢ်တၢ်လၢ သုတၢ်ကမၣ်အဃိ အနံၣ် ၄၀+ ဒီးသုကနၢ်ပၢၢ်ထီၣ် တၢ်ထီဒါယၤ အတၢ်ပိာ်ထွဲလီၤ.
၃၅ “‘“ယၤ, ယဟိဝၤယွၤန့ၣ် ယတဲလၢ တၢ်အိၣ်ဖှိၣ် လၢအအၢအသီတဖု လၢအပာ်ဖှိၣ်ထီၣ်အသး ဒီးထီဒါယၤန့ၣ် အကျဲကကတၢၢ်ဖဲ ပှၢ်မုၢ်ကနၢအပူၤ ဒီးအဝဲသ့ၣ် ကသံဝဲဖဲန့ၣ်လီၤ.+ ၃၆ ပှၤပိာ်ခွါတဖၣ်လၢ စီၤမိၤၡ့ ဆှၢလီၤဝဲ လၢကလဲၤကွၢ်ဟုၣ် ထံကီၢ်န့ၣ် အဝဲသ့ၣ်ထိၣ်ဟူးထိၣ်ဂဲၤထီၣ် ပှၤဂီၢ်မုၢ်ခဲလၢာ် ဒ်သိးကကဒူးကဒ့ၣ်စီၤမိၤၡ့ ဖဲအဝဲသ့ၣ် ဟဲက့ၤစိာ် ထံကီၢ် အတၢ်ဂ့ၢ်တၢ်ကျိၤလၢ အတဂ့ၤဘၣ်တဖၣ်အခါလီၤ.+ ၃၇ မ့ၢ်လီၤ, ပှၤပိာ်ခွါလၢ အဟဲက့ၤစိာ် ထံကီၢ် အတၢ်ဂ့ၢ်တၢ်ကျိၤလၢ အတဂ့ၤဘၣ်တဖၣ်န့ၣ် ကဘၣ်တၢ်စံၣ်ညီၣ်အီၤ ဒီးကသံဝဲလၢ ယဟိဝၤယွၤ အမဲာ်ညါလီၤ.+ ၃၈ ဘၣ်ဆၣ် စီၤနိၣ် အဖိခွါ စီၤယိၤၡူ ဒီးစီၤယဖူန့ၤ အဖိခွါ စီၤကၤလ့း လၢအပၣ်ဃုာ်လၢ ပှၤလဲၤကွၢ်ဟုၣ် ထံကီၢ် အကျါန့ၣ် ကဆဲးအိၣ်မူဘၣ်ဝဲ သပှၢ်ကတၢၢ်လီၤ.”’”+
၃၉ ဖဲစီၤမိၤၡ့ တဲဝဲ ပှၤအံၣ်စရ့လးဖိ ခဲလၢာ်လၢ တၢ်ကတိၤတဖၣ်န့ၣ်အခါ ပှၤဂီၢ်မုၢ်တဖၣ် သူၣ်အုးသးအုးဝဲ နးမးလီၤ. ၄၀ ဒီးအဝဲသ့ၣ် ဂဲၤဆၢထၢၣ်လၢ ဂီၤခီဂီၤဂီၤ ဒီးဂုာ်ကျဲးစၢး ဒ်သိးကလဲၤထီၣ်လၢ ကစၢၢ်ဒီခိၣ် ဒီးတဲဝဲလၢ “ပမၤဘၣ် တၢ်ဒဲးဘးလံ ဘၣ်ဆၣ် ခဲအံၤ ပအိၣ်ကတဲာ်ကတီၤပသးလၢ ပကလဲၤလၢ တၢ်လီၢ်လၢ ယဟိဝၤယွၤ တဲဝဲလံ.”+ ၄၁ ဘၣ်ဆၣ် စီၤမိၤၡ့ တဲဝဲလၢ “ဘၣ်မနုၤအဃိ သုလဲၤကပာ် ယဟိဝၤယွၤ အတၢ်မၤလိာ်လဲၣ်. တၢ်တခါအံၤ တကဲထီၣ်ဘၣ်. ၄၂ ယဟိဝၤယွၤ တအိၣ်ဒီးသုဘၣ် အဃိ တဘၣ်လဲၤထီၣ်တဂ့ၤ. သုဒုၣ်သုဒါ ကမၤနၢၤသုလီၤ.+ ၄၃ ပှၤဧမၤလ့းဖိ ဒီးပှၤကနၤဧၣ်ဖိ ကဟဲသဂၢၢ်သုဖဲန့ၣ်+ ဒီးသုကသံလၢ နးအဃိလီၤ. မ့ၢ်လၢ သုဃၣ်ကွံာ်သုသးလၢ ယဟိဝၤယွၤအအိၣ် အဃိ ယဟိဝၤယွၤ တအိၣ်ဒီးသုဘၣ်.”+
၄၄ ဘၣ်ဆၣ် လၢတၢ်ပာ်ထီၣ်ထီသးအပူၤ အဝဲသ့ၣ် လဲၤထီၣ်ဝဲ လၢကစၢၢ်ခိၣ်လီၤ.+ ဘၣ်ဆၣ် မ့မ့ၢ်ယဟိဝၤယွၤ အတၢ်အၢၣ်လီၤအီလီၤ အတလါ ဒီးစီၤမိၤၡ့န့ၣ် အိၣ်ဒံးဝဲလၢ ဒဲကဝီၤအခၢၣ်သးလီၤ.+ ၄၅ ဒီးပှၤဧမၤလ့းဖိ ဒီးပှၤကနၤဧၣ်ဖိလၢ အအိၣ်အဆိးလၢ ကစၢၢ်တဖျၢၣ်န့ၣ် ဟဲလီၤဒုးအဝဲသ့ၣ် ဒီးမၤလီၤပြံလီၤပြါ အဝဲသ့ၣ် တုၤလၢ ဃိၢ်မါလီၤ.+
၁၅ ယဟိဝၤယွၤ တဲစီၤမိၤၡ့လၢ ၂ “တဲပှၤအံၣ်စရ့လးဖိဒ်အံၤ, ‘ဖဲသုလဲၤနုာ်လီၤလၢ ကီၢ်တဘ့ၣ်လၢ ယကဟ့ၣ်လီၤသု လၢသုကအိၣ်အဂီၢ်+ ၃ ဒီးဖဲသု ဟ့ၣ်လုၢ်ထီၣ် ကျီၢ်, သိ မ့တမ့ၢ် မဲာ်တဲးလဲး လၢမ့ၣ်အူ လၢယဟိဝၤယွၤ အအိၣ်အခါ သုမ့ၢ်ဟ့ၣ်လုၢ်ထီၣ် တၢ်လုၢ်ဒွဲၣ်အူမ့ၢ်ဂ့ၤ,+ တၢ်လုၢ်လၢ သုကမၤ တၢ်အၢၣ်လီၤ လီၤဆီအဂီၢ်မ့ၢ်ဂ့ၤ, တၢ်လုၢ်လၢ တၢ်သးအိၣ်အပူၤမ့ၢ်ဂ့ၤ,+ တၢ်လုၢ်ဖဲသုဘူၣ်ဘၣ်အခါမ့ၢ်ဂ့ၤ+ ဒ်သိး အကမ့ၢ် တၢ်နၢမူလၢ အမၤမုာ် ယဟိဝၤယွၤ အသးအဂီၢ်န့ၣ်+ ၄ ပှၤလၢ အဟဲစိာ် တၢ်လုၢ်န့ၣ် ကဘၣ်ဟဲစိာ်ဝဲ ဃုာ်ဒီး တၢ်လုၢ်ဘုလၢ အမ့ၢ် ကိၣ်ကမူၣ်လၢအဂ့ၤ+ တကံလိ* လၢအဃါဃုာ်အသးဒီး သိတလံးထၢၣ်* လၢယဟိဝၤယွၤ အအိၣ်လီၤ. ၅ ဖဲနဟ့ၣ်လုၢ်ထီၣ် တၢ်လုၢ်ဒွဲၣ်အူ+ မ့တမ့ၢ် သိဖါဖိတဒု လၢတၢ်လုၢ် အဂီၢ်အခါ နကဘၣ် ဟ့ၣ်လုၢ်ထီၣ်အီၤ ဃုာ်ဒီး စပံးထံ တလံးထၢၣ် လၢတၢ်လုၢ်တၢ်ပာ် အဂီၢ်လီၤ. ၆ ဒီးနမ့ၢ်ဟ့ၣ်လုၢ်ထီၣ် သိဖါန့ၣ် နကဘၣ် ဟ့ၣ်လုၢ်ထီၣ်အီၤ ဃုာ်ဒီး တၢ်လုၢ်ဘု လၢအမ့ၢ် ကိၣ်ကမူၣ်လၢ အဂ့ၤ ခံကံလိ* လၢအဃါဃုာ်အသးဒီး သိတလံးထၢၣ်ဘျဲၣ်လီၤ.* ၇ ဒီးနကဘၣ် ဟ့ၣ်လုၢ်ထီၣ် စပံးထံ တလံးထၢၣ်ဘျဲၣ် လၢတၢ်လုၢ်တၢ်ပာ်အဂီၢ် ဒ်တၢ်နၢမူလၢ အမၤမုာ် ယဟိဝၤယွၤအသး အသိးလီၤ.
၈ “‘နမ့ၢ်ဟ့ၣ်လုၢ်ထီၣ် ကျီၢ်ဖါတဒု လၢတၢ်လုၢ်ဒွဲၣ်အူ အဂီၢ်မ့ၢ်ဂ့ၤ,+ တၢ်လုၢ်လၢ နကမၤ တၢ်အၢၣ်လီၤ လီၤဆီအဂီၢ်မ့ၢ်ဂ့ၤ,+ တၢ်လုၢ်အိၣ်ဃူအိၣ်ဖိး အဂီၢ်မ့ၢ်ဂ့ၤ လၢယဟိဝၤယွၤအအိၣ်န့ၣ်+ ၉ နကဘၣ် ဟဲစိာ်ဃုာ်ဒီး တၢ်လုၢ်ဘု+ လၢအမ့ၢ် ကိၣ်ကမူၣ်လၢ အဂ့ၤ သၢကံလိဒီးတဝာ်* လၢအဃါဃုာ်အသးဒီး သိခံလံးထၢၣ် ဃၣ်ဃၣ်လီၤ.* ၁၀ နကဘၣ် ဟ့ၣ်လုၢ်ထီၣ် စပံးထံ+ ခံလံးထၢၣ် ဃၣ်ဃၣ် လၢတၢ်လုၢ်တၢ်ပာ်အဂီၢ် ဒ်တၢ်လုၢ်လၢ မ့ၣ်အူ ဒီးဒ်တၢ်နၢမူလၢ အမၤမုာ် ယဟိဝၤယွၤအသး အသိးလီၤ. ၁၁ ကျီၢ်ဖါတဒု စုာ်စုာ်မ့ၢ်ဂ့ၤ, သိဖါတဒု စုာ်စုာ်မ့ၢ်ဂ့ၤ, သိဖါဖိ တဒုစုာ်စုာ်မ့ၢ်ဂ့ၤ, မဲာ်တဲးလဲး တဒုစုာ်စုာ်မ့ၢ်ဂ့ၤ သုကဘၣ် မၤအီၤဒ်န့ၣ်လီၤ. ၁၂ သုမ့ၢ်လုၢ်ထီၣ် ဆၣ်ဖိကီၢ်ဖိ အဒု ထဲလဲၣ်ဂ့ၤ ထဲလဲၣ်ဂ့ၤ သုကဘၣ်မၤအီၤ ဒ်န့ၣ် တဒုစုာ်စုာ်လီၤ. ၁၃ ပှၤအံၣ်စရ့လးဖိ ကိးဂၤဒဲး ကဘၣ်မၤဝဲ ဒ်န့ၣ် ဖဲအလုၢ်ထီၣ် တၢ်လုၢ်လၢမ့ၣ်အူ ဒ်အမ့ၢ် တၢ်နၢမူလၢ အမၤမုာ် ယဟိဝၤယွၤ အသးအခါလီၤ.
၁၄ “‘ပှၤထံဂၤကီၢ်ဂၤဖိ လၢအဟဲအိၣ်လၢသုကျါ မ့တမ့ၢ် ပှၤလၢ အဟဲအိၣ်လၢသုကျါ ဖးယံာ်န့ၣ် ကဘၣ် ဟ့ၣ်လုၢ်ထီၣ် တၢ်လုၢ်လၢမ့ၣ်အူ ဒ်အမ့ၢ် တၢ်နၢမူလၢ အမၤမုာ် ယဟိဝၤယွၤအသးလီၤ. အဝဲသ့ၣ် ကဘၣ်မၤဝဲ ဒ်သုမၤအသိးလီၤ.+ ၁၅ သုဝဲလၢ အပၣ်ဃုာ်လၢ အံၣ်စရ့လး အတၢ်အိၣ်ဖှိၣ်ပူၤမ့ၢ်ဂ့ၤ ပှၤထံဂၤကီၢ်ဂၤဖိလၢ အဟဲအိၣ်လၢ သုကျါမ့ၢ်ဂ့ၤ ကအိၣ်ဒီး တၢ်သိၣ်တၢ်သီ တမံၤဃီလီၤ. အဝဲန့ၣ်မ့ၢ် တၢ်သိၣ်တၢ်သီလၢ အဂၢၢ်ကျၢၤ တစိၤဘၣ်တစိၤလီၤ. လၢယဟိဝၤယွၤ အမဲာ်ညါန့ၣ် ပှၤထံဂၤကီၢ်ဂၤဖိ ဒီးသုန့ၣ် ကမ့ၢ် တၢ်ဒ်သိးသိးလီၤ.+ ၁၆ လၢသု ဒီးပှၤထံဂၤကီၢ်ဂၤဖိတဖၣ် လၢအဟဲအိၣ်လၢ သုကျါအဂီၢ်န့ၣ် တၢ်သိၣ်တၢ်သီ ဒီးတၢ်စံၣ်ညီၣ်ဆၢတဲာ်တၢ် ကအိၣ်ဝဲ တမံၤဃီလီၤ.’”
၁၇ ယဟိဝၤယွၤ ဆဲးတဲ စီၤမိၤၡ့လၢ ၁၈ “တဲပှၤအံၣ်စရ့လးဖိလၢ ‘ဖဲသုလဲၤနုာ်လီၤလၢ ကီၢ်တဘ့ၣ်လၢ ယကဆှၢသု ၁၉ ဒီးသုအီၣ် ကီၢ်တဘ့ၣ်န့ၣ် အတၢ်အီၣ် တမံၤဂ့ၤတမံၤဂ့ၤအခါ+ သုကဘၣ် မၤတၢ်လုၢ်လၢ ယဟိဝၤယွၤ အဂီၢ်လီၤ. ၂၀ သုကဘၣ်လုၢ်ထီၣ် သုတၤသၣ်ဆိ+ လၢအမ့ၢ် ဘုလၢ အဘၣ်တၢ်တိၢ်သဘှံးအီၤ တစဲး ဒီးဘၣ်တၢ်တ့ထီၣ်အီၤ ဒ်ကိၣ်ထံဖှံၣ်တဖၣ် အသိးလီၤ. ဒီးသုကဘၣ် လုၢ်ထီၣ်အီၤ ဒ်သုလုၢ်ထီၣ် တၢ်လုၢ်လၢ အဟဲလၢ သုကြဲၢ်ပူၤလီၤ. ၂၁ သုတၤသၣ်ဆိ လၢအမ့ၢ် ဘုလၢ အဘၣ် တၢ်တိၢ်သဘှံးအီၤ တစဲးန့ၣ် သုကဘၣ် လုၢ်ထီၣ်အီၤတနီၤ လၢယဟိဝၤယွၤအအိၣ် တစိၤဘၣ်တစိၤလီၤ.
၂၂ “‘တၢ်အိၣ်ဖှိၣ် မ့ၢ်တမၤထွဲ တၢ်မၤလိာ်ခဲလၢာ်လၢ ယဟိဝၤယွၤ တဲတ့ၢ် စီၤမိၤၡ့ဘၣ်န့ၣ် အတၢ်ဒဲးဘး ကအိၣ်ဝဲလီၤ. ၂၃ တၢ်မၤလိာ်တဖၣ်အံၤ မ့ၢ်ဝဲ ကယဲၢ်တၢ်လၢ ယဟိဝၤယွၤ မၤလိာ်သု ခီဖျိလၢ စီၤမိၤၡ့, စးထီၣ်ဖဲ မုၢ်နံၤလၢ ယဟိဝၤယွၤ မၤလိာ်ဝဲလၢ သုဒီးသုစၢၤသုသွဲၣ် အဂီၢ်လီၤ. ၂၄ ဒီးတၢ်အိၣ်ဖှိၣ် အတၢ်ဒဲးဘးအံၤ မ့မ့ၢ်လၢ တၢ်တပာ်သူၣ်ပာ်သးအပူၤ ခီဖျိလၢ အဝဲသ့ၣ် တသ့ၣ်ညါလီၤအသးဘၣ်အဃိန့ၣ် တၢ်အိၣ်ဖှိၣ်ဒီတဖု ကဘၣ်လုၢ်ထီၣ် ကျီၢ်ဖါဖိတဒု ဒ်တၢ်လုၢ်ဒွဲၣ်အူ လၢအကကဲထီၣ် တၢ်နၢမူ လၢအမၤမုာ် ယဟိဝၤယွၤအသး ဒီးတၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဒ်တၢ်ဟံးစုနဲၣ်ကျဲ အိၣ်ပာ်စၢၤအသိး+ ဒီးမဲာ်တဲးလဲးဖိတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ.+ ၂၅ ပှၤလုၢ်တၢ်ဒိၣ် ကမၤဘၣ်လိာ်ဖိးဒ့က့ၤတၢ်လၢ ပှၤအံၣ်စရ့လးဖိ တၢ်အိၣ်ဖှိၣ် ဒီတဖု အဂီၢ်လီၤ. ဒီးအဝဲသ့ၣ် အတၢ်ကမၣ် ကပျၢ်ဝဲ+ မ့ၢ်လၢ အမ့ၢ်ဝဲတၢ်ကမၣ်လၢ တၢ်တပာ်သူၣ်ပာ်သး အပူၤအဃိ, ဒီးလၢအဝဲသ့ၣ် အတၢ်ကမၣ် အဂီၢ်န့ၣ် အဝဲသ့ၣ် ဟဲစိာ် တၢ်လုၢ်လၢ မ့ၣ်အူလၢ ယဟိဝၤယွၤအအိၣ် ဒီးဟဲစိာ်ဝဲ တၢ်လုၢ်လၢ တၢ်ဒဲးဘးအဂီၢ် လၢယဟိဝၤယွၤ အမဲာ်ညါ အဃိလီၤ. ၂၆ မ့ၢ်လၢ တၢ်အိၣ်ဖှိၣ် ဒီတဖု အတၢ်ကမၣ်အိၣ်ထီၣ်လၢ တၢ်တပာ်သူၣ်ပာ်သး အပူၤအဃိ ပှၤအံၣ်စရ့လးဖိ ဒီတဖု ဒီးပှၤထံဂၤကီၢ်ဂၤဖိလၢ အဟဲအိၣ်လၢ အဝဲသ့ၣ် အကျါန့ၣ် အတၢ်ကမၣ် ကပျၢ်ဝဲလီၤ.
၂၇ “‘ပှၤတဂၤဂ့ၤတဂၤဂ့ၤ မ့ၢ်မၤကမၣ်ဘၣ်တၢ်လၢ တၢ်တပာ်သူၣ်ပာ်သး အပူၤန့ၣ် အဝဲကဘၣ် ဟဲစိာ်ဝဲ မဲာ်တဲးလဲးမိၢ် လၢအအိၣ်တနံၣ် လၢတၢ်လုၢ် လၢတၢ်ဒဲးဘး အဂီၢ်လီၤ.+ ၂၈ ဒီးပှၤလုၢ်တၢ်ဒိၣ် ကမၤဘၣ်လိာ်ဖိးဒ့က့ၤတၢ်လၢ ပှၤတဂၤလၢ အမၤကမၣ်ဘၣ်တၢ် လၢယဟိဝၤယွၤ အမဲာ်ညါလၢ တၢ်တပာ်သူၣ်ပာ်သးအပူၤအဂီၢ် ဒီးအတၢ်ကမၣ် ကပျၢ်ဝဲလီၤ.+ ၂၉ ဘၣ်ဃးဒီး တၢ်မၤကမၣ်တၢ်လၢ တၢ်တပာ်သူၣ်ပာ်သး အပူၤန့ၣ် ပှၤအံၣ်စရ့လးဖိမ့ၢ်ဂ့ၤ, ပှၤထံဂၤကီၢ်ဂၤဖိလၢ အဟဲအိၣ်လၢ အဝဲသ့ၣ် အကျါမ့ၢ်ဂ့ၤ တၢ်သိၣ်တၢ်သီ ကဘၣ်အိၣ်ဝဲ တမံၤဃီ လၢသုဂီၢ်လီၤ.+
၃၀ “‘ဘၣ်ဆၣ် ပှၤတဂၤ မ့ၢ်မၤတၢ်ကမၣ် တမံၤမံၤလၢ တၢ်သူၣ်အိၣ်သးအိၣ်အပူၤန့ၣ်+ အဝဲမ့မ့ၢ် ပှၤအံၣ်စရ့လးဖိမ့ၢ်ဂ့ၤ, ပှၤထံဂၤကီၢ်ဂၤဖိလၢ ဟဲအိၣ်လၢ အဝဲသ့ၣ် အကျါမ့ၢ်ဂ့ၤန့ၣ် မ့ၢ်ဒၣ် အကတိၤထီဒါ ယဟိဝၤယွၤ ဒီးအကဘၣ် တၢ်မၤသံအီၤလီၤ. ၃၁ မ့ၢ်လၢ အဝဲတပာ်ကဲ ယဟိဝၤယွၤ အတၢ်ကတိၤဘၣ် ဒီးမၤကမၣ် အတၢ်မၤလိာ်အဃိ အဝဲ ကဘၣ်တၢ်မၤသံအီၤ သပှၢ်ကတၢၢ်လီၤ.+ အဝဲကဘၣ်ဟ့ၣ် တၢ်စံးဆၢ လၢအတၢ်ဒဲးဘး အဃိလီၤ.’”+
၃၂ ဖဲပှၤအံၣ်စရ့လးဖိတဖၣ် အိၣ်ဝဲလၢ ပှၢ်မုၢ်ကနၢအခါ အဝဲသ့ၣ် ထံၣ်ဝဲလၢ ပှၤတဂၤ ထၢဖှိၣ်ဝဲသ့ၣ်မုၣ်လၢ မုၢ်အိၣ်ဘှံးနံၤလီၤ.+ ၃၃ ဒီးပှၤလၢအထံၣ် ပှၤတဂၤလၢ အထၢဖှိၣ် သ့ၣ်မုၣ်န့ၣ် အဝဲသ့ၣ် လဲၤကိးအီၤလၢ စီၤမိၤၡ့, စီၤအၤဟရိၣ် ဒီးတၢ်အိၣ်ဖှိၣ် ဒီတဖုအအိၣ်လီၤ. ၃၄ ဘၣ်ဆၣ် ပှၤကဘၣ်မၤအီၤ ဒ်လဲၣ်ဒ်လဲၣ်န့ၣ် တၢ်သိၣ်တၢ်သီ တပာ်ဖျါထီၣ်ဝဲ လီၤတံၢ်လီၤဆဲးဘၣ်အဃိ အဝဲသ့ၣ် ဖီၣ်ဃာ် ပှၤတဂၤအံၤလီၤ.+
၃၅ ဒီးယဟိဝၤယွၤ တဲစီၤမိၤၡ့လၢ “ပှၤတဂၤန့ၣ် ကဘၣ်တၢ်မၤသံအီၤ သပှၢ်ကတၢၢ်လီၤ.+ တၢ်အိၣ်ဖှိၣ် ဒီတဖု ကဘၣ်ကွံာ်သံအီၤ လၢလၢၢ် လၢဒဲကဝီၤအချၢလီၤ.”+ ၃၆ အဃိ တၢ်အိၣ်ဖှိၣ် ဒီတဖု ကိးထီၣ်အီၤလၢ ဒဲကဝီၤအချၢ ဒီးကွံာ်သံအီၤ လၢလၢၢ် ဒ်ယဟိဝၤယွၤ မၤလိာ် စီၤမိၤၡ့ အသိးလီၤ.
၃၇ ယဟိဝၤယွၤ ဆဲးတဲ စီၤမိၤၡ့လၢ ၃၈ “တဲဘၣ် ပှၤအံၣ်စရ့လးဖိတဖၣ်လၢ လၢအဝဲသ့ၣ် အဆ့ကၤ အခီၣ်ထံးန့ၣ် အဝဲသ့ၣ် ကဘၣ်မၤဝဲ အနွံတဖၣ်လီၤ. အဝဲသ့ၣ် ကဘၣ်မၤဝဲ ဒ်န့ၣ် တစိၤဘၣ်တစိၤလီၤ. ဒီးပျံၤဖိတဘိ လၢအလွဲၢ်လါအဲးန့ၣ် အဝဲသ့ၣ် ကဘၣ်ဆးထီၣ် ဝးတရံးအီၤ လၢဆ့ကၤ အနွံအဖီခိၣ်လီၤ.+ ၃၉ ‘သုကဘၣ် မၤတၢ်အနွံတဖၣ်န့ၣ် မ့ၢ်ဒ်သိးသုကထံၣ်အီၤ ဒီးသ့ၣ်နီၣ်ထီၣ် ယဟိဝၤယွၤ အတၢ်မၤလိာ်တဖၣ် ဒီးမၤထွဲအီၤအဂီၢ်လီၤ.+ သုတဘၣ် လူၤသုသး ဒီးသုမဲာ်ချံလၢ အကဆှၢသုလၢ တၢ်သးတတီဘၣ်* န့ၣ်တဂ့ၤ.+ ၄၀ ယဟ့ၣ်လီၤသု တၢ်သိၣ်တၢ်သီအံၤ ဒ်သိး အကမၤစၢၤသုလၢ သုကသ့ၣ်နီၣ်ထီၣ် ယတၢ်မၤလိာ်ခဲလၢာ် ဒီးမၤထွဲအီၤ ဒီးသုကစီဆှံ လၢကစၢ်ယွၤအမဲာ်ညါ အဂီၢ်လီၤ.+ ၄၁ ယမ့ၢ်သုကစၢ် ယဟိဝၤယွၤ လၢအဒုးဟးထီၣ်သုလၢ ကီၢ်အဲၤကူပတူး ဒ်သိး ယကပာ်ဖျါထီၣ်လၢ ယမ့ၢ် သုကစၢ်ယွၤ အဂီၢ်လီၤ.+ ယမ့ၢ်သုကစၢ် ယဟိဝၤယွၤလီၤ.’”+
၁၆ ဖဲန့ၣ်အခါ စီၤကိၤရး အိၣ်ဃူလိာ်အသးဒီး စီၤဒၤသၣ် ဒီးစီၤအဘံရၣ် လၢအမ့ၢ် စီၤအလံအာ် အဖိခွါတဖၣ်+ ဒီးစီၤပ့းလ့း အဖိခွါ စီၤအိၣ်လီၤ. တၢ်လၢ စီၤကိၤရးန့ၣ်+ မ့ၢ်ဝဲ စီၤယံးစဟၢ် အဖိခွါ,+ စီယံးစဟၢ် မ့ၢ်ဝဲ စီၤကဃး အဖိခွါ+ ဒီးစီၤကဃး မ့ၢ်ဝဲ စီၤလ့ၤဝံ အဖိခွါလီၤ.+ မ့မ့ၢ် စီၤဒၤသၣ်, စီၤအဘံရၣ် ဒီးစီၤအိၣ်န့ၣ် မ့ၢ်ဝဲ စီၤရူၤဘ့ၣ် အစၢၤအသွဲၣ်တဖၣ်လီၤ.+ ၂ အဝဲသ့ၣ် အိၣ်ဃူလိာ်အသးဒီး ပှၤအံၣ်စရ့လးဖိ အဂၤ ၂၅၀ လၢကထီဒါ စီၤမိၤၡ့ အဂီၢ်လီၤ. ဒီးပှၤတဖၣ်န့ၣ် မ့ၢ်ပှၤဂီၢ်မုၢ် အခိၣ်အနၢ်လၢ အမံၤဟူသၣ်ဖျါလၢ တၢ်အိၣ်ဖှိၣ် ဃုထၢထီၣ်အီၤတဖၣ်လီၤ. ၃ ဒီးအဝဲသ့ၣ် ပာ်ဖှိၣ်ထီၣ်အသး ဒ်သိး ကထီဒါ+ စီၤမိၤၡ့ ဒီးစီၤအၤဟရိၣ် အဂီၢ် ဒီးတဲအဝဲသ့ၣ်လၢ “ပမၤဃုာ်သု တကဲလၢၤဘၣ်. တၢ်အိၣ်ဖှိၣ် ဒီတဖုန့ၣ် စီဆှံဝဲ+ ကိးဂၤဒဲးလီၤ. ဒီးယဟိဝၤယွၤ အိၣ်လၢ အဝဲသ့ၣ် အကျါစ့ၢ်ကီး.+ မ့မ့ၢ် ဒ်န့ၣ်န့ၣ် ဘၣ်မနုၤအဃိ သုဘၣ် ပာ်ထီၣ်ထီသုသးလၢ ယဟိဝၤယွၤ အတၢ်အိၣ်ဖှိၣ် အဖီခိၣ်လဲၣ်.”
၄ ဖဲစီၤမိၤၡ့ နၢ်ဟူဝဲ ဒ်န့ၣ်အခါ အဝဲထိၣ်လီၤပှီၤအသးလီၤ. ၅ ဒီးအဝဲတဲဘၣ် စီၤကိၤရး ဒီးပှၤလၢ အအိၣ်ဃူဒီးအီၤ ကိးဂၤဒဲးလၢ “ဖဲဂီၤခီန့ၣ် ယဟိဝၤယွၤ ကပာ်ဖျါထီၣ်ဝဲလၢ မတဂၤမ့ၢ် အတၢ်လဲၣ်,+ မတဂၤန့ၣ် စီဆှံလဲၣ် ဒီးမတဂၤ ကဘၣ်သုးဘူးအသး လၢအအိၣ်လဲၣ် န့ၣ်လီၤ.+ ဒီးပှၤလၢ အဝဲ ဃုထၢထီၣ်ဝဲ တဂၤဂ့ၤ တဂၤဂ့ၤန့ၣ်+ ကသုးဘူးအသးဆူ အအိၣ်လီၤ. ၆ စီၤကိၤရးဧၢ, နၤဒီးပှၤလၢ အအိၣ်ဃူနၤန့ၣ် မၤဒ်အံၤတက့ၢ်.+ ဟံးန့ၢ် မ့ၣ်အူအ့ၣ်အခွးတဖၣ်+ ၇ ဒီးခဲမုၢ်ဆ့ၣ်န့ၣ် သုဘၣ်ထၢနုာ် မ့ၣ်အူလၢအပူၤ ဒီးပာ်လီၤတၢ်နၢမူလၢ အဖီခိၣ် လၢယဟိဝၤယွၤ အမဲာ်ညါလီၤ. ဒီးပှၤတဂၤလၢ ယဟိဝၤယွၤ ကဃုထၢထီၣ်အီၤန့ၣ်+ ကမ့ၢ်ပှၤလၢ အစီဆှံလီၤ. သုပှၤလ့ၤဝံဖိတဖၣ်+ သုမၤတၢ်တခါအံၤ တလၢကွံာ်အခၢးလံ.”
၈ ဝံၤဒီး စီၤမိၤၡ့ တဲစီၤကိၤရးလၢ “ပှၤလ့ၤဝံဖိသ့ၣ်ဧၢ, ဝံသးစူၤ ဒိကနၣ်တက့ၢ်. ၉ အံၣ်စရ့လး အကစၢ်ယွၤ ပာ်လီၤဆီသုလၢ ပှၤအံၣ်စရ့လးဖိ ခဲလၢာ်အကျါ+ ဒီးဟ့ၣ်သုအခွဲးလၢ သုကလဲၤ သုးဘူးသုသးလၢ အအိၣ် ဒ်သိး သုကမၤတၢ်ဖဲ ယဟိဝၤယွၤ အဒဲစီဆှံအဂီၢ် ဒီးဆၢထၢၣ်လၢ ပှၤအံၣ်စရ့လးဖိ အမဲာ်ညါ ဒီးမၤတၢ်အခ့အပှၤ အတၢ်မၤလၢ အဝဲသ့ၣ် အဂီၢ်န့ၣ် မ့ၢ်သုဆိကမိၣ်လၢ အမ့ၢ်တၢ်ဂ့ၢ် ဆံးဆံးဖိ တခါလီၤဧါ.+ ၁၀ တကးဒံးဘၣ် အဝဲကိးဘူးဃီၤသု ဒီးသုဒီပုၢ်ဝဲၢ် ပှၤလ့ၤဝံဖိတဖၣ် လၢအအိၣ်န့ၣ် မ့ၢ်သုဆိကမိၣ်လၢ အမ့ၢ် တၢ်ဂ့ၢ်ဆံးဆံးဖိ တခါလီၤဧါ. မ့ၢ်သုကဂုာ်ကျဲးစၢး ဟံးန့ၢ်စ့ၢ်ကီး ပှၤလုၢ်တၢ်ဒိၣ် အလီၢ်ဧါ.+ ၁၁ လၢတၢ်ဂ့ၢ်အံၤအဃိ နၤဒီးပှၤလၢ အအိၣ်ဃူဒီးနၤ လၢအပာ်ဖှိၣ်ထီၣ်အသးတဖၣ်န့ၣ် ထီဒါ ယဟိဝၤယွၤလီၤ. သုကဒူးကဒ့ၣ် စီၤအၤဟရိၣ်န့ၣ် မ့ၢ်လၢ အမၤဘၣ် တၢ်မနုၤ အဃိလဲၣ်.”+
၁၂ လၢခံ စီၤမိၤၡ့ မၢပှၤကိးန့ၢ် စီၤအလံအာ်အဖိခွါ စီၤဒၤသၣ် ဒီးစီၤအဘံရၣ်လီၤ.+ ဘၣ်ဆၣ် အဝဲသ့ၣ် တဲဝဲလၢ “ပတလဲၤ နီတစဲးဘၣ်. ၁၃ နဒုးဟးထီၣ်ပှၤလၢ ကီၢ်တဘ့ၣ်လၢ တၢ်နုၢ်ထံ ဒီးကနဲစီ ယွၤလီၤလၢအပူၤ ဒ်သိး နကမၤသံပှၤလၢ ပှၢ်မုၢ်ကနၢ အဂီၢ်န့ၣ် မ့ၢ်အကဲ တၢ်ဂ့ၢ်ဆံးဆံးဖိ တခါလီၤဧါ.+ ဒီးခဲအံၤန့ၣ် မ့ၢ်နအဲၣ်ဒိး ပာ်နသး ဒ်သိးဒီး ပဒိၣ်ဖးဒိၣ်တဂၤလၢ အပၢပှၤလၢ တၢ်ခဲလၢာ် အပူၤဧါ. ၁၄ နတလဲၤဆှၢပှၤလၢ ကီၢ်လၢ တၢ်နုၢ်ထံဒီး ကနဲစီ ယွၤလီၤလၢ အပူၤ နီတဘ့ၣ်ဘၣ်.+ ဒီးနတဟ့ၣ်ပှၤ ဟီၣ်ခိၣ် ဒီးစပံးကျီးလၢ ပတၢ်န့ၢ်သါအဂီၢ် နီတစဲးဘၣ်. မ့ၢ်နကတူခွဲးထီၣ်ကွံာ် ပှၤသ့ၣ်တဖၣ်န့ၣ်* အမဲာ်ချံဧါ. အဃိ ပတလဲၤ နီတစဲးဘၣ်.”
၁၅ ဒီးစီၤမိၤၡ့ သးဒိၣ်ထီၣ်တၢ်ဒိၣ်မး ဒီးတဲယဟိဝၤယွၤလၢ “တဘၣ်တူၢ်လိာ် အဝဲသ့ၣ် အတၢ်လုၢ်ဘုတဂ့ၤ. ယတဟံးန့ၢ် အဝဲသ့ၣ် အကသ့ၣ်ယီၤ နီတဒုဘၣ် ဒီးယတမၤဘၣ်ဒိ အဝဲသ့ၣ် နီတဂၤဘၣ်.”+
၁၆ ဒီးစီၤမိၤၡ့ တဲဝဲ စီၤကိၤရးလၢ “ခဲမုၢ်ဆ့ၣ်န့ၣ် နၤဒီးပှၤလၢ အအိၣ်ဃူဒီးနၤ ကိးဂၤဒဲးန့ၣ် လဲၤပာ်ဖျါထီၣ်သုသး လၢယဟိဝၤယွၤ အမဲာ်ညါ ဃုာ်ဒီး စီၤအၤဟရိၣ် တက့ၢ်. ၁၇ သုဝဲ တဂၤစုာ်စုာ်န့ၣ် သုကဘၣ် လဲၤစိာ် မ့ၣ်အူအ့ၣ်အခွးတဖၣ် ဒီးပာ်လီၤ တၢ်နၢမူ လၢအဖီခိၣ် ဒီးသုဘၣ် ဟဲစိာ်အီၤ လၢယဟိဝၤယွၤ အမဲာ်ညါလီၤ. သုဘၣ်ဟဲစိာ် မ့ၣ်အူအ့ၣ်အခွး အခါ ၂၅၀ ဒီးနၤဒီး စီၤအၤဟရိၣ်စ့ၢ်ကီး ကဘၣ်ဟဲစိာ် မ့ၣ်အူအ့ၣ်အခွး တဂၤတခါလီၤ.” ၁၈ အဃိ အဝဲသ့ၣ် တဂၤစုာ်စုာ် ဟံးန့ၢ် အမ့ၣ်အူအ့ၣ်အခွး ဒီးထၢနုာ်ဝဲ မ့ၣ်အူလၢအပူၤ ဒီးပာ်လီၤတၢ်နၢမူလၢ အဖီခိၣ် ဒီးဆၢထၢၣ်ဝဲလၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် ဃုာ်ဒီး စီၤမိၤၡ့ ဒီးစီၤအၤဟရိၣ်လီၤ. ၁၉ ဒီးဖဲစီၤကိၤရး ပာ်ဖှိၣ်ထီၣ်ဝဲ ပှၤလၢ အအိၣ်ဃူအီၤတဖၣ်လၢ+ တၢ်အိၣ်ဖှိၣ်အဒဲ အတၢ်နုာ်လီၤအလီၢ်အခါ ယဟိဝၤယွၤ အလၤကပီၤ အိၣ်ဖျါထီၣ်လၢ ပှၤဂီၢ်မုၢ်ခဲလၢာ် အမဲာ်ညါလီၤ.+
၂၀ ဒီးယဟိဝၤယွၤ တဲစီၤမိၤၡ့ ဒီးစီၤအၤဟရိၣ်လၢ ၂၁ “အိၣ်လီၤဆီဒီး ပှၤတဖုန့ၣ် ဒီးယကမၤဟးဂီၤကွံာ် အဝဲသ့ၣ် သတူၢ်ကလာ် တုၤအလၢာ်လီၤ.”+ ၂၂ ဒီးအဝဲသ့ၣ် ထိၣ်လီၤပှီၤအသး ဒီးကျးလီၤအမဲာ် လၢဟီၣ်ခိၣ် အလိၤ ဒီးတဲဝဲလၢ “အိ ကစၢ်ယွၤဧၢ, ကစၢ်ယွၤလၢ အဟ့ၣ်လီၤ ပှၤကိးဂၤဒဲး အသးသမူဧၢ,+ မ့ၢ်နကသးဒိၣ်ထီၣ် အံၣ်စရ့လး အတၢ်အိၣ်ဖှိၣ်ဒီတဖု လၢပှၤတဂၤ အတၢ်ဒဲးဘး အဃိဧါ.”+
၂၃ ယဟိဝၤယွၤ တဲစီၤမိၤၡ့လၢ ၂၄ “တဲဘၣ် တၢ်အိၣ်ဖှိၣ်လၢ ‘သုးယံၤသုသးဒီး စီၤကိၤရး, စီၤဒၤသၣ် ဒီးစီၤအဘံရၣ် အဒဲတဖၣ်တက့ၢ်.’”+
၂၅ ဒီးစီၤမိၤၡ့ ဂဲၤဆၢထၢၣ်ဝဲဒီး လဲၤဝဲလၢ စီၤဒၤသၣ် ဒီးစီၤအဘံရၣ် အအိၣ်လီၤ. ဒီးအံၣ်စရ့လး အပှၤသူၣ်က့သးပှၢ်တဖၣ်+ လဲၤပိာ်အခံလီၤ. ၂၆ ဒီးအဝဲတဲဘၣ် ပှၢ်ဂီၢ်မုၢ်တဖၣ်လၢ “ဝံသးစူၤ, ဒ်သိး သုသုတဘၣ် တၢ်မၤဟးဂီၤသုလၢ ပှၤအၢပှၤသီတဖၣ်အံၤ အတၢ်ဒဲးဘး အဃိ တဂ့ၤအဂီၢ် သုးယံၤထီၣ်သုသးဒီး အဝဲသ့ၣ်အဒဲတဖၣ် ဒီးတဘၣ်ထိးဘူး တၢ်လၢ အဘၣ်ဃးဒီး အဝဲသ့ၣ် နီတမံၤတဂ့ၤ.” ၂၇ တဘျီဃီန့ၣ် အဝဲသ့ၣ် သုးယံၤထီၣ်အသး လၢစီၤကိၤရး, စီၤဒၤသၣ် ဒီးစီၤအဘံရၣ် အဒဲကပၤ ကိးကပၤဒဲးလီၤ. ဒီးစီၤဒၤသၣ် ဒီးစီၤအဘံရၣ် ဟဲထီၣ်ဝဲ ဒီးဆၢထၢၣ်ဝဲဖဲ အဝဲသ့ၣ်အဒဲ အတၢ်နုာ်လီၤအလီၢ် ဃုာ်ဒီး အဝဲသ့ၣ် အဖိအမါတဖၣ် ဒီးအဝဲသ့ၣ် အဖိဆံးတဖၣ်လီၤ.
၂၈ ဒီးစီၤမိၤၡ့ တဲဝဲလၢ “ခီဖျိ တၢ်လၢ အကမၤအသးတဖၣ်အဃိ သုကသ့ၣ်ညါလၢ ယဟိဝၤယွၤ မၢလီၤယၤ လၢယကမၤ တၢ်သ့ၣ်တဖၣ်အံၤခဲလၢာ် ဒီးယတမၤတၢ် ဖဲယသးဘၣ်. ၂၉ ပှၤသ့ၣ်တဖၣ်အံၤ မ့ၢ်သံဝဲဒ် ပှၤခဲလၢာ် သံညီနုၢ်အသိး ဒီးအဝဲသ့ၣ် မ့ၢ်ဘၣ်တၢ်စံၣ်ညီၣ် ဒ်ပှၤခဲလၢာ် ဘၣ်တၢ်စံၣ်ညီၣ်အီၤ အသိးန့ၣ် အခီပညီ မ့ၢ်ဝဲဒၣ် ယဟိဝၤယွၤ တဆှၢလီၤယၤဘၣ်.+ ၃၀ ဘၣ်ဆၣ် ယဟိဝၤယွၤ မ့ၢ်မၤ အဝဲသ့ၣ်လၢ တၢ်လီၤတိၢ်လီၤဆီ တမံၤဒီး ဟီၣ်ခိၣ်မ့ၢ်အိးထီၣ်အသး ဒီးယူၢ်လီၤကွံာ် အဝဲသ့ၣ် ဃုာ်ဒီးတၢ်လၢ အအိၣ်ဒီး အဝဲသ့ၣ်ခဲလၢာ် ဒီးအဝဲသ့ၣ် မ့ၢ်လဲၤလီၤမူဒံးလၢ တၢ်သွၣ်ခိၣ်အပူၤန့ၣ်* သုကသ့ၣ်ညါလၢ ပှၤသ့ၣ်တဖၣ်အံၤန့ၣ် တပာ်ကဲ ယဟိဝၤယွၤဘၣ်.”
၃၁ ဖဲအဝဲတဲဝဲ တၢ်ကတိၤတဖၣ်အံၤ ဝံၤတဘျီဃီန့ၣ် ဟီၣ်ခိၣ်လၢ ပှၤသ့ၣ်တဖၣ်န့ၣ် အဖီလာ်န့ၣ် သ့ၣ်ဖးဝဲလီၤ.+ ၃၂ ဒီးဟီၣ်ခိၣ် အိးထီၣ်အသး ဒီးယူၢ်လီၤကွံာ် အဝဲသ့ၣ် ဃုာ်ဒီး အဝဲသ့ၣ် အဟံၣ်ဖိဃီဖိ ဒီးပှၤကိးဂၤဒဲးလၢ အဘၣ်ဃးဒီး စီၤကိၤရး+ ဒီးတၢ်လၢ အအိၣ်ဒီး အဝဲသ့ၣ် ခဲလၢာ်လီၤ. ၃၃ ဒီးအဝဲသ့ၣ် ဒီးပှၤလၢ အဘၣ်ဃးဒီး အဝဲသ့ၣ် ခဲလၢာ်န့ၣ် လဲၤလီၤမူဒံးလၢ တၢ်သွၣ်ခိၣ်အပူၤ* ဒီးဟီၣ်ခိၣ် ကးဘၢကွံာ် အဝဲသ့ၣ်လီၤ. ဒီးအဝဲသ့ၣ် ဘၣ်တၢ်မၤဟးဂီၤကွံာ်အီၤလၢ တၢ်အိၣ်ဖှိၣ် အကျါလီၤ.+ ၃၄ ဖဲအဝဲသ့ၣ် ကိးပသူထီၣ်အခါ ပှၤအံၣ်စရ့လးဖိတဖၣ် လၢအအိၣ်လၢ အဝဲသ့ၣ် အကပိာ်ကပၤန့ၣ် ဃ့ၢ်ကွံာ် ဒီးတဲဝဲလၢ “ပပျံၤလၢ ဟီၣ်ခိၣ် ကယူၢ်လီၤ ဘၣ်ဖုးပှၤ စ့ၢ်ကီးလီၤ.” ၃၅ ဝံၤဒီး မ့ၣ်အူလၢအဟဲလၢ ယဟိဝၤယွၤအအိၣ်န့ၣ်+ အီၣ်ကွံာ်ဝဲ ပှၤပိာ်ခွါ အဂၤ ၂၅၀ လၢအလုၢ်ထီၣ်ဝဲ တၢ်နၢမူလီၤ.+
၃၆ ဒီးယဟိဝၤယွၤ တဲစီၤမိၤၡ့လၢ ၃၇ “မ့ၢ်လၢ မ့ၣ်အူအ့ၣ်အခွးတဖၣ်န့ၣ်+ မ့ၢ်တၢ်လၢ အစီဆှံအဃိ မၢပှၤလုၢ်တၢ်ဒိၣ် စီၤအၤဟရိၣ် အဖိခွါ စီၤအလၤဧစၢ် ဟံးထီၣ်ကွံာ်အီၤ လၢမ့ၣ်အူကျါတက့ၢ်. ဒီးမၢအလဲၤဖှံ သွဲၣ်လးတဖၣ် လၢတၢ်လီၢ်လၢ အယံၤတစဲး တက့ၢ်. ၃၈ ပှၤလၢ အမၤတၢ်ဒဲးဘး ဒီးသံဝဲတဖၣ် အမ့ၣ်အူအ့ၣ်အခွးတဖၣ်န့ၣ် ပှၤဟဲစိာ်အီၤလၢ ယဟိဝၤယွၤ အမဲာ်ညါဝံၤလံ ဒီးကဲထီၣ်ဝဲ တၢ်လၢအစီဆှံလံ အဃိ ပှၤကဘၣ် တ့က့ၤအီၤလၢ တၢ်ကဘျၣ် ဘူဘူဖိတဖၣ် ဒ်သိး ပှၤကကျးအီၤလၢ တၢ်လုၢ်လီၢ်အဂီၢ်လီၤ.+ ဒီးတၢ်သ့ၣ်တဖၣ်န့ၣ် ကကဲထီၣ်ဝဲ တၢ်ပနီၣ်လၢ ပှၤအံၣ်စရ့လးဖိတဖၣ် အဂီၢ်လီၤ.”+ ၃၉ အဃိ ပှၤလုၢ်တၢ်ဒိၣ် စီၤအလၤဧစၢ် ဟံးန့ၢ်ဝဲ ပှၤလၢ မ့ၣ်အူအီၣ်ကွံာ်အီၤတဖၣ် အမ့ၣ်အူအ့ၣ်အခွး တိၢ်ဘီတဖၣ် ဒီးပိာ်က့ၤဝဲလၢ တၢ်ကဘျၣ်ဘူဘူဖိ ဒ်သိး ကကျးအီၤ လၢတၢ်လုၢ်လီၢ် ၄၀ ဒ်ယဟိဝၤယွၤ မၤလိာ်အီၤ ခီဖျိ စီၤမိၤၡ့ အသိးလီၤ. အဝဲန့ၣ် ကဲထီၣ်တၢ်ဒုးသ့ၣ်နီၣ်လၢ ပှၤအံၣ်စရ့လးဖိတဖၣ်အဂီၢ် လၢပှၤလၢအတမ့ၢ် စီၤအၤဟရိၣ် အစၢၤအသွဲၣ်ဘၣ်န့ၣ် တအိၣ်ဒီး တၢ်ခွဲးတၢ်ယာ်ဘၣ်* အဃိ အဝဲသ့ၣ် တဘၣ်သုးဘူးအသး ဒ်သိးကဒွဲၣ်ထီၣ် တၢ်နၢမူလၢ ယဟိဝၤယွၤ အမဲာ်ညါဘၣ်.+ ဒီးအကဲထီၣ် တၢ်ဒုးသ့ၣ်နီၣ်ဒ်သိး ပှၤသုတမၤထီၣ်အသး ဒ်စီၤကိၤရး ဒီးပှၤလၢ အအိၣ်ဃူဒီးအီၤတဖၣ် နီတဂၤတဂ့ၤအဂီၢ်လီၤ.+
၄၁ လၢခံတနံၤန့ၣ် ပှၤအံၣ်စရ့လးဖိ တၢ်အိၣ်ဖှိၣ် ဒီတဖုန့ၣ် ကဒူးကဒ့ၣ် စီၤမိၤၡ့ ဒီးစီၤအၤဟရိၣ်+ ဒီးတဲဝဲလၢ “သုခံဂၤန့ၣ် သုမၤသံ ယဟိဝၤယွၤ အပှၤဂီၢ်မုၢ်လီၤ.” ၄၂ ဖဲပှၤဂီၢ်မုၢ်တဖၣ် ပာ်ဖှိၣ်ထီၣ်အသး ဒီးထီဒါ စီၤမိၤၡ့ ဒီးစီၤအၤဟရိၣ်အခါ ပှၤတဖၣ်န့ၣ် ဃၣ်ဃီၤအသး လၢတၢ်အိၣ်ဖှိၣ်အဒဲ ဒီးထံၣ်ဝဲလၢ တၢ်အၢၣ် အိၣ်ကးဘၢ တၢ်အိၣ်ဖှိၣ်အဒဲ ဒီးယဟိဝၤယွၤ အလၤကပီၤ အိၣ်ဖျါထီၣ်ဝဲလီၤ.+
၄၃ ဒီးစီၤမိၤၡ့ ဒီးစီၤအၤဟရိၣ် လဲၤလၢ တၢ်အိၣ်ဖှိၣ်အဒဲ အမဲာ်ညါ+ ၄၄ ဒီးယဟိဝၤယွၤ တဲစီၤမိၤၡ့လၢ ၄၅ “မ့မ့ၢ်သုန့ၣ် ဟးထီၣ်လၢ ပှၤဂီၢ်မုၢ်အံၤအကျါ ဒီးယကမၤဟးဂီၤ အဝဲသ့ၣ် သတူၢ်ကလာ် တုၤအလၢာ်လီၤ.”+ ဒီးအဝဲသ့ၣ် ထိၣ်လီၤပှီၤအသး ဒီးကျးလီၤအမဲာ် လၢဟီၣ်ခိၣ် အလိၤလီၤ.+ ၄၆ ဒီးစီၤမိၤၡ့ တဲဝဲ စီၤအၤဟရိၣ်လၢ “မ့ၢ်လၢ ယဟိဝၤယွၤ သးဒိၣ်ထီၣ်တၢ်လံ အဃိ ဟံးန့ၢ် မ့ၣ်အူအ့ၣ်အခွး, ထၢနုာ် တၢ်လုၢ်လီၢ် အမ့ၣ်အူအ့ၣ်လၢ အပူၤ,+ ပာ်လီၤ တၢ်နၢမူ လၢအဖီခိၣ် ဒီးလဲၤချ့ချ့လၢ ပှၤဂီၢ်မုၢ်အအိၣ် ဒီးမၤဘၣ်လိာ်ဖိးဒ့က့ၤတၢ် လၢအဝဲသ့ၣ်အဂီၢ်တက့ၢ်.+ တၢ်နးတၢ်ဖှီၣ် စးထီၣ်အသးလံ.” ၄၇ တဘျီဃီန့ၣ် စီၤအၤဟရိၣ် ဟံးန့ၢ်ဝဲ မ့ၣ်အူအ့ၣ်အခွး ဒ်စီၤမိၤၡ့ တဲအီၤအသိး ဒီးလဲၤဃ့ၢ်ဝဲဆူ တၢ်အိၣ်ဖှိၣ်အကျါ ဒီးထံၣ်ဝဲလၢ တၢ်နးတၢ်ဖှီၣ် စးထီၣ်လၢ ပှၤဂီၢ်မုၢ် အကျါလီၤ. အဃိ အဝဲပာ်လီၤ တၢ်နၢမူလၢ မ့ၣ်အူအ့ၣ်အခွး အဖီခိၣ် ဒီးမၤဘၣ်လိာ်ဖိးဒ့က့ၤတၢ် လၢပှၤဂီၢ်မုၢ် အဂီၢ်လီၤ. ၄၈ ဒီးအဝဲ ဆဲးဆၢထၢၣ်ဝဲလၢ ပှၤသံဒီး ပှၤမူတဖၣ် အဘၢၣ်စၢၤ ဒီးတၢ်နးတၢ်ဖှီၣ်န့ၣ် ကတၢၢ်ကွံာ်ဝဲလီၤ. ၄၉ ပှၤလၢအသံလၢ စီၤကိၤရး အဃိ မ့ၢ်တပၣ်ဘၣ်န့ၣ် ပှၤသံလၢ တၢ်နးတၢ်ဖှီၣ်အဃိန့ၣ် အိၣ်ဝဲအဂၤ ၁၄,၇၀၀ လီၤ. ၅၀ ဖဲတၢ်နးတၢ်ဖှီၣ် ကတၢၢ် ဝံၤအလီၢ်ခံ စီၤအၤဟရိၣ် ဟဲက့ၤလၢ စီၤမိၤၡ့အအိၣ် လၢတၢ်အိၣ်ဖှိၣ်အဒဲ အတၢ်နုာ်လီၤအလီၢ်လီၤ.
၁၇ ယဟိဝၤယွၤ တဲစီၤမိၤၡ့လၢ ၂ “မၢပှၤအံၣ်စရ့လးဖိတဖၣ် ဟဲစိာ်ဝဲ နီၣ်ထိးဘိ ၁၂ ဘိလၢအမ့ၢ် ပှၤအဒူၣ် အခိၣ်အနၢ် တဂၤစုာ်စုာ် အနီၣ်ထိးဘိလၢ အဝဲသ့ၣ် အဒူၣ် တဒူၣ်စုာ်စုာ် အဂီၢ်တက့ၢ်.+ ဒီးကွဲးလီၤ အဝဲသ့ၣ် တဂၤစုာ်စုာ် အမံၤလၢ အနီၣ်ထိးဘိ အလိၤတက့ၢ်. ၃ နီၣ်ထိးဘိ တဘိစုာ်စုာ်န့ၣ် ခၢၣ်စးဝဲ ပှၤအဒူၣ် အခိၣ်အနၢ်တဂၤစုာ်စုာ် အဃိ နကဘၣ်ကွဲးလီၤ စီၤအၤဟရိၣ် အမံၤလၢ လ့ၤဝံအဒူၣ် အနီၣ်ထိးဘိ အလိၤလီၤ. ၄ ဒီးပာ်လီၤ နီၣ်ထိးဘိတဖၣ်လၢ တၢ်အိၣ်ဖှိၣ်အဒဲပူၤ လၢတၢ်အၢၣ်လီၤအီလီၤ အတလါ အမဲာ်ညါ+ ဖဲညီနုၢ် ယပာ်ဖျါထီၣ်ယသးလၢ သုမဲာ်ညါ အလီၢ်န့ၣ်တက့ၢ်.+ ၅ ပှၤလၢ ယဃုထၢထီၣ်အီၤ အနီၣ်ထိးဘိန့ၣ်+ ကဘိၣ်ထီၣ်ဖးထီၣ်လီၤ. ဒီးယကမၤပတုာ်ကွံာ် ပှၤအံၣ်စရ့လးဖိတဖၣ် အတၢ်ကဒူးကဒ့ၣ်ယၤ+ ဒီးအဝဲသ့ၣ် တကဒူးကဒ့ၣ်သုလၢၤဘၣ်.”+
၆ ဒီးစီၤမိၤၡ့ တဲဘၣ်ဝဲ ပှၤအံၣ်စရ့လးဖိတဖၣ် ဒီးအဝဲသ့ၣ် အခိၣ်အနၢ်တဖၣ်န့ၣ် ဟ့ၣ်လီၤဝဲ စီၤမိၤၡ့လၢ နီၣ်ထိးဘိ ၁၂ ဘိ လၢအမ့ၢ် ပှၤအဒူၣ် အခိၣ်အနၢ် တဂၤစုာ်စုာ် အနီၣ်ထိးဘိလီၤ. ဖဲန့ၣ်အကျါ စီၤအၤဟရိၣ် အနီၣ်ထိးဘိ ပၣ်ဃုာ်ဝဲ စ့ၢ်ကီးလီၤ. ၇ ဒီးစီၤမိၤၡ့ ပာ်လီၤဝဲ နီၣ်ထိးဘိတဖၣ် လၢယဟိဝၤယွၤ အမဲာ်ညါလၢ တၢ်အၢၣ်လီၤအီလီၤ အဒဲပူၤလီၤ.
၈ လၢခံတသီ ဖဲစီၤမိၤၡ့ လဲၤနုာ်လီၤလၢ တၢ်အၢၣ်လီၤအီလီၤ အဒဲအခါ အဝဲထံၣ်ဘၣ်ဝဲလၢ စီၤအၤဟရိၣ် အနီၣ်ထိးဘိလၢ ပှၤလ့ၤဝံဖိအဂီၢ်န့ၣ် ဘိၣ်ထီၣ်ဖီထီၣ်ဝဲ ဒီးသၣ်ထီၣ်ဝဲ ၡၤကးသၣ် အမံတဖၣ်လီၤ. ၉ ဒီးနီၣ်ထိးဘိ ခဲလၢာ်လၢ အအိၣ်လၢ ယဟိဝၤယွၤ အမဲာ်ညါန့ၣ် စီၤမိၤၡ့ လဲၤစိာ်ဝဲလၢ ပှၤအံၣ်စရ့လးဖိ ခဲလၢာ် အမဲာ်ညါလီၤ. ဒီးအဝဲသ့ၣ် ကွၢ်ဝဲ နီၣ်ထိးဘိတဖၣ်အံၤ ဒီးပှၤတဂၤစုာ်စုာ် ဟံးန့ၢ်က့ၤဝဲ အနီၢ်ကစၢ် အနီၣ်ထိးဘိလီၤ.
၁၀ ဒီးယဟိဝၤယွၤ တဲစီၤမိၤၡ့လၢ “က့ၤပာ်က့ၤ စီၤအၤဟရိၣ် အနီၣ်ထိးဘိလၢ+ တၢ်အၢၣ်လီၤအီလီၤ အတလါအမဲာ်ညါတက့ၢ်. ပာ်ဃာ်အီၤ ဒ်တၢ်ပနီၣ်လၢ+ ကဟ့ၣ်ပလီၢ် ပှၤလၢ အထီဒါတၢ်တဖၣ်အဂီၢ်+ ဒ်သိး အသုတကဒူးကဒ့ၣ်ယၤ လၢၤတဂ့ၤ ဒီးဒ်သိး အသုတသံတဂ့ၤ အဂီၢ် တက့ၢ်.” ၁၁ စီၤမိၤၡ့မၤဝဲ ဒ်ယဟိဝၤယွၤ မၤလိာ်အီၤအသိး တဘျီဃီလီၤ. ဒီးအဝဲ မၤထွဲဝဲ လီၤတံၢ်လီၤဆဲးလီၤ.
၁၂ ဒီးပှၤအံၣ်စရ့လးဖိ တဲစီၤမိၤၡ့လၢ “ခဲအံၤ ပကသံလီၤ. ပကတုၤလၢ တၢ်ဟးဂီၤ သပှၢ်တၢၢ် ဒီးပဝဲကိးဂၤဒဲး ပကတုၤလၢ တၢ်ဟးဂီၤလီၤသၢၤ. ၁၃ ပှၤတဂၤဂ့ၤ တဂၤဂ့ၤလၢ အလဲၤဘူးထီၣ်ဒီး ယဟိဝၤယွၤ အဒဲစီဆှံန့ၣ် ကသံ သပှၢ်တၢၢ်လီၤ.+ မ့ၢ်ပဘၣ်သံ ဒ်န့ၣ်ဧါ.”+
၁၈ ဒီးယဟိဝၤယွၤ တဲဘၣ် စီၤအၤဟရိၣ်လၢ “နၤဒီး နဖိခွါတဖၣ် ဒီးနစၢၤနသွဲၣ်တဖၣ်န့ၣ် ကဘၣ်ဟ့ၣ် တၢ်စံးဆၢလၢ တၢ်ကမၣ် တမံၤဂ့ၤတမံၤဂ့ၤ လၢအထီဒါ တၢ်စီဆှံအလီၢ် အဂီၢ်လီၤ.+ ဒီးနၤဒီး နဖိခွါတဖၣ်န့ၣ် ကဘၣ်ဟ့ၣ် တၢ်စံးဆၢလၢ တၢ်ကမၣ် တမံၤဂ့ၤတမံၤဂ့ၤလၢ အထီဒါလိာ်အသးဒီး ပှၤလုၢ်တၢ်ဒိၣ် အတၢ်မၤ အဂီၢ်န့ၣ်လီၤ.+ ၂ ဒီးဟဲကိးဘူးထီၣ် နဒီပုၢ်ဝဲၢ်တဖၣ် လၢအပၣ်ဃုာ်လၢ လ့ၤဝံအဒူၣ် လၢအမ့ၢ် နပၢ်အဒူၣ် ဒ်သိး အဝဲသ့ၣ် ကမၤစၢၤနၤ ဒီးမၤတၢ်အခ့အပှၤ အတၢ်မၤလၢ+ နၤဒီးနဖိခွါတဖၣ် အဂီၢ် လၢတၢ်အၢၣ်လီၤအီလီၤအဒဲ မဲာ်ညါတက့ၢ်.+ ၃ အဝဲသ့ၣ် ကဘၣ်မၤလၢပှဲၤ အမူဒါတဖၣ် လၢနဟ့ၣ်လီၤအဝဲသ့ၣ် ဒီးကဘၣ်မၤဝဲ ဒဲအတၢ်မၤ ခဲလၢာ်လီၤ.+ ဘၣ်ဆၣ် ဒ်သိးအဝဲသ့ၣ်မ့ၢ်ဂ့ၤ သုမ့ၢ်ဂ့ၤ သုတသံတဂ့ၤအဂီၢ် အဝဲသ့ၣ် တဘၣ် ဟဲဘူးဒီး တၢ်စီဆှံအလီၢ် အတၢ်ပီးတၢ်လီတဖၣ် ဒီးတၢ်လုၢ်လီၢ်ဘၣ်.+ ၄ အဝဲသ့ၣ် ကမၤစၢၤနၤ ဒီးကမၤလၢပှဲၤ အမူဒါ လၢဘၣ်ဃးဒီး တၢ်အိၣ်ဖှိၣ်အဒဲ ဒီးဒဲအတၢ်မၤ ခဲလၢာ်လီၤ. ဒီးပှၤလၢ အတအိၣ်ဒီး တၢ်ခွဲးတၢ်ယာ်ဘၣ်* န့ၣ်တဘၣ်ဟဲဘူးဒီး သုဘၣ်.+ ၅ သုကဘၣ် မၤလၢပှဲၤ သုမူဒါလၢ အဘၣ်ဃးဒီး တၢ်စီဆှံအလီၢ်+ ဒီးတၢ်လုၢ်လီၢ်+ ဒ်သိးယတၢ်သးဒိၣ်ထီၣ်+ သုတဘၣ် ပှၤအံၣ်စရ့လးဖိတဖၣ် လၢၤတဂ့ၤအဂီၢ်လီၤ. ၆ ယနီၢ်ကစၢ်ဒၣ်ယဲ ယဟံးန့ၢ် သုဒီပုၢ်ဝဲၢ် ပှၤလ့ၤဝံဖိတဖၣ် လၢပှၤအံၣ်စရ့လးဖိ တဖၣ်အကျါ ဒီးယဟ့ၣ်လီၤသု ဒ်တၢ်ဟ့ၣ် အသိးလီၤ.+ အဝဲသ့ၣ် ကမ့ၢ် ယဟိဝၤယွၤအတၢ် ဒီးကမၤ တၢ်အိၣ်ဖှိၣ် အဒဲအတၢ်မၤလီၤ.+ ၇ နၤဒီးနဖိခွါတဖၣ်န့ၣ် အိၣ်ဒီးမူဒါလၢအမ့ၢ် ပှၤလုၢ်တၢ်ဒိၣ် အမူဒါလၢ အဘၣ်ဃးဒီး တၢ်လုၢ်လီၢ် ဒီးတၢ်လၢအအိၣ်လၢ ယၣ်ဘျးသဒၢ အလီၢ်ခံလီၤ.*+ သုကဘၣ်မၤ သုတၢ်မၤတဖၣ်အံၤလီၤ.+ ယဟ့ၣ်လီၤသုလၢ ပှၤလုၢ်တၢ်ဒိၣ် အတၢ်မၤ ဒ်တၢ်ဟ့ၣ် အသိးလီၤ. ပှၤလၢ အတအိၣ်ဒီး တၢ်ခွဲးတၢ်ယာ်ဘၣ် လၢအလဲၤဘူးဒီး တၢ်စီဆှံအလီၢ်န့ၣ် ကဘၣ် တၢ်မၤသံအီၤလီၤ.”+
၈ ဒီးယဟိဝၤယွၤ တဲစီၤအၤဟရိၣ်လၢ “ယပာ်ထီၣ်နၤလၢ ပှၤကွၢ်ထွဲ တၢ်မၤဘူၣ်တဖၣ်လၢ ပှၤဟ့ၣ်မၤဘူၣ်လီၤ ယၤလီၤ.+ လၢကယဲၢ် တၢ်လၢ အစီဆှံတဖၣ်လၢ ပှၤအံၣ်စရ့လးဖိ မၤဘူၣ်လီၤယၤ အကျါန့ၣ် ယဟ့ၣ်လီၤအီၤ တနီၤ လၢနၤဒီး နဖိနလံၤတဖၣ်အဂီၢ် တစိၤဘၣ်တစိၤလီၤ.+ ၉ တၢ်လၢ အစီဆှံနီၢ်ကီၢ် အကူာ်အခီတဖၣ်အံၤ လၢအဘၣ် တၢ်ထုးထီၣ်အီၤလၢ တၢ်လုၢ်လၢ မ့ၣ်အူတဖၣ် အကျါန့ၣ် မ့ၢ်သုတၢ်လီၤ. ကယဲၢ်တၢ်လုၢ်လၢ အဝဲသ့ၣ် ဟဲစိာ်လၢယအိၣ်, ပၣ်ဃုာ်ဒီး အဝဲသ့ၣ် အတၢ်လုၢ်ဘု,+ တၢ်လုၢ်လၢ တၢ်ဒဲးဘးအဂီၢ်+ ဒီးတၢ်လုၢ်လၢ တၢ်ကမၣ်အဂီၢ်န့ၣ်+ မ့ၢ်တၢ်လၢ အစီဆှံနီၢ်ကီၢ်လၢ နၤဒီးနဖိခွါတဖၣ် အဂီၢ်လီၤ. ၁၀ နကဘၣ်အီၣ်အီၤ ဖဲတၢ်လီၢ်လၢ အစီဆှံနီၢ်ကီၢ်လီၤ.+ ပှၤပိာ်ခွါလၢသုကျါ ကိးဂၤဒဲး ကအီၣ်ဘၣ်ဝဲလီၤ. အမ့ၢ် တၢ်လၢအစီဆှံ လၢသုဂီၢ်လီၤ.+ ၁၁ တၢ်ဟ့ၣ်တဖၣ် လၢအဝဲသ့ၣ် မၤဘူၣ်လီၤဝဲ+ ဒီးပှၤအံၣ်စရ့လးဖိ အတၢ်လုၢ်ဝံၢ်ဝၢ် ခဲလၢာ်န့ၣ်+ ကကဲထီၣ် နတၢ်စ့ၢ်ကီးလီၤ. တၢ်သ့ၣ်တဖၣ်န့ၣ် ယကဟ့ၣ်လီၤနၤ ဒီးနဖိမုၣ်ဖိခွါတဖၣ် တစိၤဘၣ်တစိၤလီၤ.+ ပှၤလၢ အကဆှီ လၢအအိၣ် ဟံၣ်တဖျၢၣ်ဃီဒီးနၤ ကိးဂၤဒဲးန့ၣ် အီၣ်တၢ်သ့ၣ်တဖၣ်န့ၣ် သ့ဝဲလီၤ.+
၁၂ “သိလၢ အဂ့ၤကတၢၢ်ခဲလၢာ်, စပံးထံ အသီလၢ အဂ့ၤကတၢၢ် ခဲလၢာ် ဒီးဘုလၢ အဂ့ၤကတၢၢ်ခဲလၢာ် လၢအမ့ၢ် အဝဲသ့ၣ် အတၤသၣ်ဆိတဖၣ်လၢ+ အဝဲသ့ၣ် ဟ့ၣ်လီၤယၤ ယဟိဝၤယွၤန့ၣ် ယဟ့ၣ်လီၤနၤလီၤ.+ ၁၃ အဝဲသ့ၣ် အဟီၣ်ခိၣ် အတၤသၣ်ဆိ ကိးမံၤဒဲးလၢ အဝဲသ့ၣ် ဟဲစိာ်ဝဲလၢ ယဟိဝၤယွၤ အအိၣ်န့ၣ် ကကဲထီၣ် နတၢ်လီၤ.+ ပှၤလၢ အကဆှီ လၢအအိၣ် ဟံၣ်တဖျၢၣ်ဃီဒီးနၤ ကိးဂၤဒဲးန့ၣ် အီၣ်တၢ်သ့ၣ်တဖၣ်န့ၣ် သ့ဝဲလီၤ.
၁၄ “တၢ်လၢ ပှၤပာ်လီၤဆီအီၤလၢ အံၣ်စရ့လးအပူၤ ခဲလၢာ်န့ၣ် ကကဲထီၣ် နတၢ်လီၤ.+
၁၅ “ပှၤကညီ အဖိဝဲၢ်ကိမ့ၢ်ဂ့ၤ, ဆၣ်ဖိကီၢ်ဖိ အဖိဝဲၢ်ကိမ့ၢ်ဂ့ၤ, ကယဲၢ်ဖိဝဲၢ်ကိ လၢပှၤဟဲစိာ်အီၤလၢ ယဟိဝၤယွၤ အအိၣ်န့ၣ် ကကဲထီၣ် နတၢ်လီၤ.+ ဘၣ်ဆၣ် မ့မ့ၢ် ပှၤကညီ အဖိဝဲၢ်ကိန့ၣ် နကဘၣ်ပျဲလၢ ပှၤကပှ့ၤက့ၤအီၤ သပှၢ်ကတၢၢ်လီၤ.+ ဒီးဆၣ်ဖိကီၢ်ဖိ လၢအတကဆှီဘၣ်တဖၣ် အဖိဝဲၢ်ကိန့ၣ် နကဘၣ်ပျဲလၢ ပှၤကပှ့ၤက့ၤအီၤလီၤ.+ ၁၆ ဖဲအသးနံၣ်အိၣ် တလါ ဒီးဆူအဖီခိၣ် အခါ နကဘၣ် ပျဲလၢ ပှၤကပှ့ၤက့ၤအီၤ ဒ်တၢ်ပာ်ပနီၣ် အပှ့ၤ အိၣ်ဝဲအသိးလီၤ. ပှၤကဘၣ် ပှ့ၤက့ၤအီၤလၢ စ့ ၅ ၡက့လး*+ ဒ်တၢ်စီဆှံအလီၢ် အၡက့လး အသိးလီၤ. တၡက့လးန့ၣ် အိၣ်ဝဲ က့ရၤ ၂၀ လီၤ. ၁၇ မ့မ့ၢ် တၢ်အဖိဝဲၢ်ကိ လၢအမ့ၢ် ကျီၢ်ဖါမ့ၢ်ဂ့ၤ, သိဖါဖိမ့ၢ်ဂ့ၤ မဲာ်တဲးလဲးမ့ၢ်ဂ့ၤ တၢ်တဘၣ် ပှ့ၤက့ၤအီၤဘၣ်.+ တၢ်သ့ၣ်တဖၣ်န့ၣ် မ့ၢ်ဝဲ တၢ်လၢအစီဆှံလီၤ. နကဘၣ်ဖှံလီၤ ဆၣ်ဖိကီၢ်ဖိတဖၣ်အံၤ အသွံၣ်လၢ တၢ်လုၢ်လီၢ် အဖီခိၣ်+ ဒီးဒွဲၣ်အူထီၣ် ဆၣ်ဖိကီၢ်ဖိတဖၣ်အံၤ အသိလၢ တၢ်လုၢ်လီၢ် အဖီခိၣ် ဒ်သိး အကခုၣ်ထီၣ် အဂီၢ်လီၤ. ဒီးအမ့ၢ်ဝဲ တၢ်လုၢ်လၢမ့ၣ်အူ ဒီးကဲထီၣ် တၢ်နၢမူလၢ အမၤမုာ် ယဟိဝၤယွၤ အသးလီၤ.+ ၁၈ ဒီးဒ် တၢ်လုၢ်ဝံၢ်ဝၢ် အသးနါပှၢ် ဒီးဒ် တၢ်အခီၣ်ထွဲ အသိးန့ၣ် ဆၣ်ဖိကီၢ်ဖိတဖၣ်အံၤ အညၣ်န့ၣ် ကကဲထီၣ် နတၢ်လီၤ.+ ၁၉ တၢ်မၤဘူၣ်စီဆှံ ခဲလၢာ်လၢ ပှၤအံၣ်စရ့လးဖိ မၤဘူၣ်လီၤယၤ ယဟိဝၤယွၤန့ၣ်+ ယဟ့ၣ်လီၤနၤ ဒီးနဖိမုၣ်ဖိခွါ တစိၤဘၣ်တစိၤလီၤ.+ အဝဲန့ၣ် မ့ၢ်ဝဲ တၢ်အၢၣ်လီၤအီလီၤ လၢအဂၢၢ်ကျၢၤ* လၢယဟိဝၤယွၤ မၤဝဲဒီးနၤ ဒီးနစၢၤနသွဲၣ် တဖၣ်လီၤ.”
၂၀ ဒီးယဟိဝၤယွၤ ဆဲးတဲ စီၤအၤဟရိၣ်လၢ “လၢအံၣ်စရ့လး အကီၢ်ပူၤန့ၣ် နတဒိးန့ၢ်ဘၣ် တၢ်န့ၢ်သါဘၣ်. ဟီၣ်ခိၣ်လီၢ် လၢအဝဲသ့ၣ် အကျါန့ၣ် တကဲထီၣ် နတၢ် နီတကဝီၤဘၣ်.+ ယကကွၢ်ထွဲနၤ ဒီးလၢပှၤအံၣ်စရ့လးဖိ အကျါန့ၣ် ယကဟ့ၣ်လီၤနၤ တၢ်လၢနလိၣ်ဘၣ်တဖၣ်လီၤ.+
၂၁ “မ့ၢ်လၢ ပှၤလ့ၤဝံဖိတဖၣ် မၤဝဲ တၢ်အိၣ်ဖှိၣ်အဒဲ အတၢ်မၤအဃိ+ ယဟ့ၣ်လီၤ အဝဲသ့ၣ် တၢ်ကိးမံၤဒဲးလၢ အဟဲထီၣ်လၢ အံၣ်စရ့လးအပူၤ ဆံဆဲၣ်ပူတပူ ဒ်အဝဲသ့ၣ် အတၢ်န့ၢ်သါ အသိးလီၤ. ၂၂ ပှၤအံၣ်စရ့လးဖိ တဘၣ်ဟဲဘူးဒီး တၢ်အိၣ်ဖှိၣ်အဒဲလၢၤဘၣ်. အဝဲသ့ၣ် မ့ၢ်မၤဒ်န့ၣ်န့ၣ် အဝဲသ့ၣ် ကဘၣ် တၢ်ဒဲးဘး ဒီးကသံလီၤ. ၂၃ ပှၤလ့ၤဝံဖိတဖၣ်န့ၣ် ကဘၣ်မၤ တၢ်အိၣ်ဖှိၣ်အဒဲ အတၢ်မၤ ဒီးအဝဲသ့ၣ် မ့ၢ်ပှၤလၢ အကဘၣ် ဟ့ၣ်တၢ်စံးဆၢ လၢပှၤအံၣ်စရ့လးဖိတဖၣ် အတၢ်ကမၣ် အဂီၢ်လီၤ.+ အဝဲသ့ၣ် တဘၣ်ဒိးန့ၢ်ဘၣ် တၢ်န့ၢ်သါလၢ ပှၤအံၣ်စရ့လးဖိ အကျါဘၣ် ဒီးအဝဲန့ၣ် မ့ၢ်တၢ်သိၣ်တၢ်သီ လၢအဂၢၢ်ကျၢၤ လၢသု ဒီးသုစၢၤသုသွဲၣ် အဂီၢ်လီၤ.+ ၂၄ တၢ်ဆံဆဲၣ်ပူတပူလၢ ပှၤအံၣ်စရ့လးဖိ မၤဘူၣ်လီၤယၤ ယဟိဝၤယွၤန့ၣ် ယဟ့ၣ်လီၤအီၤလၢ ပှၤလ့ၤဝံဖိတဖၣ် အအိၣ် ဒ်အဝဲသ့ၣ် အတၢ်န့ၢ်သါ အသိးလီၤ. လၢတၢ်န့ၣ်အဃိ ယတဲအဝဲသ့ၣ်လၢ ‘အဝဲသ့ၣ် တဘၣ်ဒိးန့ၢ်ဘၣ် တၢ်န့ၢ်သါလၢ ပှၤအံၣ်စရ့လးဖိ အကျါဘၣ်.’”+
၂၅ ဒီးယဟိဝၤယွၤ တဲစီၤမိၤၡ့လၢ ၂၆ “နဘၣ်တဲ ပှၤလ့ၤဝံဖိတဖၣ်လၢ ‘သုကဒိးန့ၢ်ဘၣ် ပှၤအံၣ်စရ့လးဖိတဖၣ် အတၢ်ဆံဆဲၣ်ပူတပူ လၢယဟ့ၣ်လီၤသု ဒ်သုတၢ်န့ၢ်သါ အသိးလီၤ.+ ဒီးလၢတၢ်ဆံဆဲၣ်ပူတပူန့ၣ် အကျါ သုကဘၣ် ဟ့ၣ်မၤဘူၣ်လီၤ ယဟိဝၤယွၤ လၢတၢ်ဆံဆဲၣ်ပူတပူလီၤ.+ ၂၇ ဒီးသုတၢ်မၤဘူၣ်တဖၣ်န့ၣ် တၢ်ကပာ်ပနီၣ်အီၤ ဒ်သုနီၢ်ကစၢ် အဘု, စပံးထံ ဒီးသိအသိးလီၤ.+ ၂၈ လၢတၢ်န့ၣ်အဃိ လၢပှၤအံၣ်စရ့လးဖိ အတၢ်ဆံဆဲၣ်ပူတပူ တမံၤဂ့ၤတမံၤဂ့ၤ လၢသုဒိးန့ၢ်ဘၣ်အီၤအကျါန့ၣ် သုကဟ့ၣ်မၤဘူၣ်လီၤ ယဟိဝၤယွၤလီၤ. ဒီးသုကဘၣ် ဟ့ၣ်လီၤ တၢ်မၤဘူၣ်လၢ ယဟိဝၤယွၤအဂီၢ်အံၤ လၢပှၤလုၢ်တၢ်ဒိၣ် စီၤအၤဟရိၣ် အအိၣ်လီၤ. ၂၉ တၢ်ကိးမံၤဒဲးလၢ သုဟ့ၣ်မၤဘူၣ် ယဟိဝၤယွၤ ဒ်တၢ်လၢအစီဆှံအသိးန့ၣ် ကဘၣ်မ့ၢ်ဝဲ တၢ်လၢအဂ့ၤကတၢၢ် လၢတၢ်ဟ့ၣ်ခဲလၢာ်+ လၢသုဒိးန့ၢ်ဘၣ်အီၤအကျါလီၤ.’
၃၀ “နကဘၣ်တဲ ပှၤလ့ၤဝံဖိတဖၣ်လၢ ‘ဖဲသုမၤဘူၣ်လီၤ တၢ်လၢအဂ့ၤကတၢၢ်တဖၣ် လၢတၢ်လၢ သုဒိးန့ၢ်ဘၣ်အီၤတဖၣ် အကျါ ဝံၤအလီၢ်ခံ တၢ်လၢ အအိၣ်တ့ၢ်သ့ၣ်တဖၣ်န့ၣ် ကမ့ၢ်ဝဲ သုဝဲ ပှၤလ့ၤဝံဖိတဖၣ် အတၢ်လီၤ. ဒီးတၢ်ကပာ်ပနီၣ် တၢ်သ့ၣ်တဖၣ်န့ၣ် ဒ်သုနီၢ်ကစၢ် အဘု, စပံးထံ ဒီးသိအသိးလီၤ. ၃၁ မ့ၢ်လၢ သုမၤတၢ်ဖဲ တၢ်အိၣ်ဖှိၣ်အဒဲ အဃိ သုဒိးန့ၢ်ဘၣ် တၢ်အဘူးအလဲ သ့ၣ်တဖၣ်အံၤလီၤ. အဃိ သုဒီးပှၤအိၣ် ဟံၣ်တဖျၢၣ်ဃီဒီးသုန့ၣ် အီၣ်တၢ်သ့ၣ်တဖၣ်န့ၣ် လၢတၢ်လီၢ် တပူၤဂ့ၤ တပူၤဂ့ၤ သ့လီၤ.+ ၃၂ ဘၣ်ဆၣ် သုမ့ၢ်တမၤဘူၣ်လီၤ တၢ်လၢ အဂ့ၤကတၢၢ်လၢ တၢ်သ့ၣ်တဖၣ်န့ၣ်အကျါဘၣ်န့ၣ် သုတၢ်ဒဲးဘးကအိၣ်ဝဲလီၤ. ဒီးဒ်သိးသုသု တသံတဂ့ၤအဂီၢ် သုတဘၣ် မၤဘၣ်အၢ ပှၤအံၣ်စရ့လးဖိ အတၢ်လုၢ်စီဆှံတဖၣ်ဘၣ်.’”+
၁၉ ယဟိဝၤယွၤ တဲစီၤမိၤၡ့ ဒီးစီၤအၤဟရိၣ်လၢ ၂ “အဝဲအံၤမ့ၢ်ဝဲ တၢ်သိၣ်တၢ်သီလၢ ယဟိဝၤယွၤ မၤလိာ်ဝဲလီၤ. ‘မၢပှၤအံၣ်စရ့လးဖိတဖၣ်လၢ ကဟဲမူၤန့ၢ်နၤ ကျီၢ်မိၢ်ဂီၤတဒု လၢအလၢအပှဲၤ+ ဒီးလၢအတယိးဘၣ် နီၣ်ယိးဘိ နီတဘျီဘၣ် န့ၣ်တက့ၢ်. ၃ ဒီးသုကဘၣ်ဟ့ၣ်လီၤ ကျီၢ်တဒုအံၤလၢ ပှၤလုၢ်တၢ်ဒိၣ် စီၤအလၤဧစၢ် အအိၣ် ဒီးအဝဲ ကလဲၤမူၤဝဲလၢ ဒဲကဝီၤ အချၢလီၤ. ဒီးပှၤကဘၣ်မၤသံ ကျီၢ်အံၤလၢ အမဲာ်ညါလီၤ. ၄ ဒီးပှၤလုၢ်တၢ်ဒိၣ် စီၤအလၤဧစၢ်န့ၣ် ကဘျၢလီၤ အစုနၢတဘိလၢ ကျီၢ်မိၢ်အသွံၣ်ကျါ ဒီးကဖှံဝဲ တၢ်သွံၣ်အံၤလိၤလိၤ ဆူတၢ်အိၣ်ဖှိၣ်အဒဲ အမဲာ်ညါတခီ နွံဘျီလီၤ.+ ၅ ဝံၤဒီး ကျီၢ်မိၢ်တဒုန့ၣ် ကဘၣ် တၢ်ဒွဲၣ်အူထီၣ်အီၤလၢ အမဲာ်ညါလီၤ. ကျီၢ်မိၢ်အဘ့ၣ်, အညၣ်, အသွံၣ် ဃုာ်ဒီးအအ့ၣ်န့ၣ် ကဘၣ် တၢ်ဒွဲၣ်အူထီၣ်အီၤလီၤ.+ ၆ ဒီးပှၤလုၢ်တၢ်ဒိၣ်န့ၣ် ကဟံးန့ၢ်ဝဲ သ့ၣ်ဆှိအ့ရ့း, ကဖျီၣ်အ့စိး+ ဒီးတၢ်ဂီၤဆှုၣ်ကလာ် ဒီးတၢၤလီၤကွံာ် တၢ်သ့ၣ်တဖၣ်န့ၣ်လၢ မ့ၣ်အူအပူၤ ဖဲမ့ၣ်အူအီၣ်ဒံး ကျီၢ်မိၢ် အဆၢကတီၢ်လီၤ. ၇ ဒီးပှၤလုၢ်တၢ်ဒိၣ် ကဆှုၣ်အတၢ်ကူတၢ်သိး ဒီးကလုၢ်ထံ ဝံၤဒီး အဝဲဟဲက့ၤနုာ်လီၤလၢ ဒဲကဝီၤ အပူၤသ့လီၤ. ဘၣ်ဆၣ် ပှၤလုၢ်တၢ်ဒိၣ်န့ၣ် ကကဲထီၣ် ပှၤလၢတကဆှီဘၣ် တုၤလၢ ဟါလီၤခီလီၤ.
၈ “‘ဒီးပှၤလၢ အဒွဲၣ်အူထီၣ် ကျီၢ်မိၢ်န့ၣ် ကဆှုၣ် အတၢ်ကူတၢ်ကၤ လၢထံ ဒီးကလုၢ်ထံ ဒီးအဝဲ ကကဲထီၣ် ပှၤလၢအတကဆှီဘၣ် တုၤလၢ ဟါလီၤခီလီၤ.
၉ “‘ဒီးပှၤပိာ်ခွါလၢ အကဆှီတဂၤ ကပာ်ဖှိၣ်ထီၣ်ဝဲ ကျီၢ်မိၢ်အဖၣ်ဆါ+ ဒီးကပာ်ဝဲလၢ တၢ်လီၢ်လၢ အကဆှီ လၢဒဲကဝီၤ အချၢလီၤ. ဒီးပှၤအံၣ်စရ့လးဖိ အတၢ်အိၣ်ဖှိၣ် ကဘၣ်ပာ်ဃာ်ဝဲ ဖၣ်ဆါတဖၣ်အံၤ ဒ်သိးကကတဲာ်ကတီၤဝဲ ထံလၢ တၢ်မၤကဆှီထီၣ်က့ၤတၢ် အဂီၢ်လီၤ.+ အမ့ၢ်ဝဲ တၢ်လုၢ်လၢ တၢ်ဒဲးဘး အဂီၢ်လီၤ. ၁၀ ပှၤလၢ အပာ်ဖှိၣ်ထီၣ် ကျီၢ်မိၢ် အဖၣ်ဆါန့ၣ် ကဆှုၣ် အတၢ်ကူတၢ်ကၤတဖၣ် ဒီးအဝဲ ကကဲထီၣ် ပှၤလၢအတကဆှီဘၣ် တုၤလၢ ဟါလီၤခီလီၤ.
“‘အဝဲန့ၣ် ကမ့ၢ်ဝဲ တၢ်သိၣ်တၢ်သီ လၢအဂၢၢ်အကျၢၤ လၢပှၤအံၣ်စရ့လးဖိ ဒီးပှၤထံဂၤကီၢ်ဂၤဖိ လၢအဟဲအိၣ်လၢ အဝဲသ့ၣ်အကျါ အဂီၢ်လီၤ.+ ၁၁ ပှၤတဂၤဂ့ၤ တဂၤဂ့ၤလၢ အထိးဘၣ် ပှၤသံန့ၣ် ကကဲထီၣ် ပှၤလၢအတကဆှီဘၣ် နွံသီလီၤ.+ ၁၂ ဖဲသၢသီတသီန့ၣ် အဝဲကဘၣ် မၤကဆှီထီၣ်အသး လၢထံလၢ တၢ်မၤကဆှီထီၣ်က့ၤတၢ်အဂီၢ် ဒီးဖဲနွံသီတသီန့ၣ် အဝဲကကဲထီၣ် ပှၤလၢ အကဆှီလီၤ. ဘၣ်ဆၣ် အဝဲမ့ၢ်တမၤ ကဆှီထီၣ်အသး ဖဲသၢသီတသီဘၣ်န့ၣ် ဖဲနွံသီတသီ တုၤအခါ အဝဲတကဲထီၣ် ပှၤလၢအကဆှီဘၣ်. ၁၃ ပှၤတဂၤဂ့ၤ တဂၤဂ့ၤလၢ အထိးဘၣ် ပှၤသံအစိၣ် ဒီးမ့ၢ်တမၤ ကဆှီထီၣ် အသးဘၣ်န့ၣ် မ့ၢ်အမၤဘၣ်အၢ ယဟိဝၤယွၤ အဒဲစီဆှံအဃိ+ အဝဲ ကဘၣ် တၢ်မၤသံကွံာ်အီၤလီၤ.+ မ့ၢ်လၢ ပှၤတဖှံအီၤလၢ ထံလၢ တၢ်မၤကဆှီထီၣ်က့ၤတၢ် အဂီၢ်ဘၣ်အဃိ+ အဝဲ တကဆှီဒံးဘၣ်.
၁၄ “‘ဖဲပှၤတဂၤ သံလၢ ဒဲပူၤအခါ တၢ်သိၣ်တၢ်သီလၢ ပှၤကဘၣ်မၤထွဲအီၤန့ၣ် အိၣ်ဝဲဒ်အံၤလီၤ. ပှၤကိးဂၤဒဲး လၢအလဲၤနုာ်လၢ ဒဲအဝဲန့ၣ်အပူၤ ဒီးပှၤလၢ အအိၣ်ပာ်စၢၤလၢ ဒဲအဝဲန့ၣ် အပူၤန့ၣ် ကကဲထီၣ် ပှၤလၢ အတကဆှီဘၣ် နွံသီလီၤ. ၁၅ တၢ်ပူၤတၢ်လီၢ် တမံၤဂ့ၤတမံၤဂ့ၤလၢ အခိၣ်အိးထီၣ်အသး ဒီးပှၤတကးဘၢ အခိၣ်ဘၣ်န့ၣ် တကဆှီဘၣ်.+ ၁၆ ပှၤတဂၤဂ့ၤတဂၤဂ့ၤ လၢအအိၣ်လၢ တၢ်ပျီပူၤ လၢအထိးဘၣ် ပှၤလၢ အဘၣ်တၢ်မၤသံအီၤ လၢနး မ့ၢ်ဂ့ၤ, ပှၤအစိၣ်မ့ၢ်ဂ့ၤ, ပှၤအဃံမ့ၢ်ဂ့ၤ, တၢ်သွၣ်ခိၣ်မ့ၢ်ဂ့ၤန့ၣ် ကကဲထီၣ် ပှၤလၢ အတကဆှီဘၣ် နွံသီလီၤ.+ ၁၇ ဒ်သိးပှၤလၢ အတကဆှီဘၣ်တဂၤန့ၣ် ကကဆှီထီၣ်က့ၤအဂီၢ် အဝဲသ့ၣ် ကဘၣ်ဟံးန့ၢ်ဝဲ တၢ်လုၢ်လၢ တၢ်ဒဲးဘးအဂီၢ်လၢ အဘၣ်တၢ် ဒွဲၣ်အူထီၣ်ပာ်စၢၤအီၤ အဖၣ်ဆါ ဒီးထၢနုာ်အီၤလၢ တၢ်ပူၤတၢ်လီၢ် တခါအပူၤ ဒီးလူလီၤ ထံဆှံလၢ အဖီခိၣ်လီၤ. ၁၈ ဒီးပှၤလၢ အကဆှီတဂၤ+ ကဟံးန့ၢ် ကဖျီၣ်အ့စိး+ ဒီးကဘျၢလီၤဝဲလၢ ထံအံၤအကျါ ဒီးကဖှံလီၤဝဲလၢ ဒဲအလိၤ ဒီးလၢ တၢ်ပူၤတၢ်လီၢ် ခဲလၢာ်အလိၤ ဒီးလၢ ပှၤလၢအအိၣ်ပာ်စၢၤ ဖဲန့ၣ်တဖၣ် အလိၤ ဒီးပှၤလၢ အထိးဘၣ် ပှၤအဃံမ့ၢ်ဂ့ၤ, ထိးဘၣ် ပှၤလၢအဘၣ် တၢ်မၤသံအီၤ မ့ၢ်ဂ့ၤ, ထိးဘၣ်ပှၤအစိၣ်မ့ၢ်ဂ့ၤ, ထိးဘၣ်တၢ်သွၣ်ခိၣ်မ့ၢ်ဂ့ၤ အလိၤလီၤ. ၁၉ ပှၤလၢ အကဆှီတဂၤန့ၣ် ကဖှံလီၤထံအံၤ လၢပှၤလၢ အတကဆှီဘၣ် အလိၤ ဖဲသၢသီတသီ ဒီးနွံသီတသီလီၤ. ဒီးဖဲနွံသီတသီန့ၣ် အဝဲ ကမၤကဆှီထီၣ်အီၤ လၢအတၢ်ဒဲးဘးလီၤ.+ ဝံၤဒီး အဝဲကဘၣ်ဆှုၣ် အတၢ်ကူတၢ်ကၤ ဒီးလုၢ်ထံလီၤ. ဒီးဖဲဟါလီၤခီန့ၣ် အဝဲ ကကဲထီၣ် ပှၤလၢ အကဆှီလီၤ.
၂၀ “‘ဘၣ်ဆၣ် ပှၤတဂၤဂၤ မ့ၢ်တကဆှီဘၣ် ဒီးအဝဲ မ့ၢ်တမၤ ကဆှီထီၣ်အသးဘၣ်န့ၣ် မ့ၢ်အမၤဘၣ်အၢ ယဟိဝၤယွၤ အတၢ်စီဆှံအလီၢ်အဃိ အဝဲကဘၣ် တၢ်မၤသံကွံာ်အီၤလီၤ.+ မ့ၢ်လၢ ပှၤတဖှံအီၤလၢ ထံလၢ တၢ်မၤကဆှီထီၣ်က့ၤတၢ် အဂီၢ်ဘၣ်အဃိ အဝဲတကဆှီဘၣ်.
၂၁ “‘အဝဲအံၤ မ့ၢ်တၢ်သိၣ်တၢ်သီ လၢအဂၢၢ်အကျၢၤလၢ အဝဲသ့ၣ် အဂီၢ်လီၤ. ပှၤတဂၤလၢ အဖှံထံလၢ တၢ်မၤကဆှီထီၣ်က့ၤတၢ် အဂီၢ်န့ၣ်+ ကဘၣ်ဆှုၣ် အတၢ်ကူတၢ်ကၤလီၤ. ပှၤတဂၤဂ့ၤ တဂၤဂ့ၤလၢ အထိးဘၣ်ထံလၢ တၢ်မၤကဆှီထီၣ်က့ၤတၢ် အဂီၢ်န့ၣ် ကကဲထီၣ် ပှၤလၢ အတကဆှီဘၣ် တုၤလၢ ဟါလီၤခီလီၤ. ၂၂ တၢ်လၢ ပှၤလၢအတကဆှီဘၣ်တဂၤ ထိးဘၣ်ဝဲ တမံၤဂ့ၤတမံၤဂ့ၤ ကကဲထီၣ် တၢ်လၢ အတကဆှီဘၣ်လီၤ. ဒီးပှၤတဂၤဂၤ မ့ၢ်ထိးဘၣ်ဝဲ တၢ်တမံၤန့ၣ် အဝဲ တကဆှီလၢၤဘၣ် တုၤလၢ ဟါလီၤခီလီၤ.’”+
၂၀ ဖဲလါအဆိကတၢၢ်တလါန့ၣ် ပှၤအံၣ်စရ့လးဖိခဲလၢာ် လဲၤတုၤလၢ စံၣ်အပှၢ်မုၢ်ကနၢလီၤ. ဒီးပှၤဂီၢ်မုၢ်တဖၣ် အိၣ်ဆိးဝဲဖဲ ကၤဒ့ၣ်လီၤ.+ အဝဲန့ၣ် မ့ၢ်ဝဲ တၢ်လီၢ်လၢ နီၢ်မံးရယၣ်+ သံဒီးဘၣ်တၢ်ခူၣ်လီၤအီၤ အလီၢ်လီၤ.
၂ ဒီးမ့ၢ်လၢ ထံလၢပှၤဂီၢ်မုၢ်တဖၣ်အဂီၢ်န့ၣ် တအိၣ်ဘၣ်အဃိ+ အဝဲသ့ၣ် ပာ်ဖှိၣ်ထီၣ်အသး ဒီးထီဒါ စီၤမိၤၡ့ ဒီးစီၤအၤဟရိၣ်လီၤ. ၃ ဒီးပှၤဂီၢ်မုၢ်တဖၣ် တဲအါလိာ်သးဒီး စီၤမိၤၡ့+ ဒီးတဲဝဲလၢ “ပမ့ၢ်သံပာ်စၢၤ ဒ်သိးဒီး ပဒီပုၢ်ဝဲၢ်တဖၣ်လၢ အသံလၢ ယဟိဝၤယွၤ အမဲာ်ညါန့ၣ် ဝံၤလီၤ. ၄ ဘၣ်မနုၤအဃိ သုဟဲကိး ယဟိဝၤယွၤ အတၢ်အိၣ်ဖှိၣ် လၢပှၢ်မုၢ်ကနၢအံၤ အပူၤ ဒ်သိးပဝဲ ဒီးပဆၣ်ဖိကီၢ်ဖိတဖၣ် ကသံဖဲအံၤအဂီၢ်လဲၣ်.+ ၅ ဘၣ်မနုၤအဃိ သုဒုးဟးထီၣ်ပှၤလၢ ကီၢ်အဲၤကူပတူးအပူၤ ဒီးဟဲကိးပှၤလၢ တၢ်လီၢ်လၢ အတဂ့ၤဘၣ်အံၤလဲၣ်.+ ပသူၣ်လီၤ တၢ်ချံ ဖဲအံၤ တန့ၢ်ဘၣ်. ချၢၣ်ဒၢသၣ်, စပံးမုၢ် ဒီးသလဲသၣ် တမဲထီၣ် ဖဲအံၤဘၣ်. ဒီးဖဲအံၤန့ၣ် ထံလၢပကအီအဂီၢ် တအိၣ်စ့ၢ်ကီးဘၣ်.”+ ၆ ဒီးစီၤမိၤၡ့ ဒီးစီၤအၤဟရိၣ် ဟးထီၣ်လၢ တၢ်အိၣ်ဖှိၣ်အမဲာ်ညါ ဒီးလဲၤဝဲလၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒီးထိၣ်လီၤပှီၤအသး ဒီးကျးလီၤအမဲာ် လၢဟီၣ်ခိၣ်လိၤလီၤ. ဒီးယဟိဝၤယွၤ အလၤကပီၤ အိၣ်ဖျါထီၣ်လၢ အဝဲသ့ၣ် အအိၣ်လီၤ.+
၇ ဒီးယဟိဝၤယွၤတဲ စီၤမိၤၡ့လၢ ၈ “ဟံးန့ၢ် နီၣ်ထိးဘိ ဒီးနၤဒီးနကၠီ စီၤအၤဟရိၣ်န့ၣ် ကိးဖှိၣ် ပှၤအံၣ်စရ့လးဖိ ဒီးတဲတၢ်ဒီး လၢၢ်လၢ အဝဲသ့ၣ်အမဲာ်ညါ ဒ်သိး လၢၢ်ကဒုးဟဲထီၣ်ထံ အဂီၢ်တက့ၢ်. ဒီးနကဒုး ဟဲထီၣ်ထံလၢ လၢၢ်အပူၤလၢ ပှၤဂီၢ်မုၢ်အဂီၢ် ဒီးဒုးအီ အဝဲသ့ၣ် ဒီးအဝဲသ့ၣ် အဆၣ်ဖိကီၢ်ဖိတဖၣ်လီၤ.”+
၉ ဒီးစီၤမိၤၡ့ ဟံးထီၣ် နီၣ်ထိးဘိ လၢအအိၣ်လၢ ယဟိဝၤယွၤ အမဲာ်ညါ+ ဒ်ကစၢ်ယွၤ မၤလိာ်အီၤ အသိးလီၤ. ၁၀ ဒီးစီၤမိၤၡ့ ဒီးစီၤအၤဟရိၣ်န့ၣ် ကိးဖှိၣ်ဝဲ ပှၤအံၣ်စရ့လးဖိတဖၣ် လၢလၢၢ်အမဲာ်ညါ ဒီးစီၤမိၤၡ့ တဲအဝဲသ့ၣ်လၢ “ပှၤထီဒါတၢ်ဖိသ့ၣ်ဧၢ, ကနၣ်လၢအံၤ. မ့ၢ်ပဘၣ်ဒုးဟဲထီၣ်ထံလၢ လၢၢ်တဖျၢၣ်အံၤအပူၤ လၢသုဂီၢ်ဧါ.”+ ၁၁ ဝံၤဒီး စီၤမိၤၡ့ ယၤထီၣ်အစု ဒီးတီၢ်ဝဲလၢၢ်လၢ အနီၣ်ထိးဘိ ခံထံၣ်လီၤ. ဒီးထံဟဲဖျိးထီၣ်ဝဲ ဒီဒူၣ် ဒီးပှၤအံၣ်စရ့လးဖိ ဒီးအဝဲသ့ၣ် အဆၣ်ဖိကီၢ်ဖိတဖၣ် အီဝဲထံလီၤ.+
၁၂ လၢခံန့ၣ် ယဟိဝၤယွၤ တဲဘၣ် စီၤမိၤၡ့ ဒီးစီၤအၤဟရိၣ်လၢ “မ့ၢ်လၢ သုတပာ်ဖျါထီၣ် တၢ်နာ်လၢ ယဖီခိၣ်ဘၣ် ဒီးသုတပာ်စီဆှံယၤ လၢပှၤအံၣ်စရ့လးဖိတဖၣ် အမဲာ်ညါဘၣ်အဃိ သုတလဲၤဆှၢဘၣ် တၢ်အိၣ်ဖှိၣ်အံၤလၢ ကီၢ်တဘ့ၣ်လၢ ယကဟ့ၣ်လီၤ အဝဲသ့ၣ်ဘၣ်.”+ ၁၃ အဝဲန့ၣ်မ့ၢ်ဝဲ ထံမရံၤဘါလီၤ.*+ ပှၤအံၣ်စရ့လးဖိတဖၣ် တဲအါလိာ်သးဒီး ယဟိဝၤယွၤ ဒီးကစၢ်ယွၤ ပာ်စီဆှံအသးဖဲန့ၣ် လၢအဝဲသ့ၣ် အကျါလီၤ.
၁၄ ဖဲအဝဲသ့ၣ် အိၣ်ဒံးလၢ ကၤဒ့ၣ်အခါ စီၤမိၤၡ့ ဆှၢလီၤ ပှၤစိာ်တၢ်ကစီၣ်ဖိတဖၣ် လၢကီၢ်အဒိၣ် အစီၤပၤအအိၣ်+ ဒီးတဲဝဲလၢ “နဒီပုၢ်ဝဲၢ် အံၣ်စရ့လး+ တဲဝဲလၢ ‘ပလဲၤခီဖျိဘၣ် တၢ်ကီတၢ်ခဲ ဒ်လဲၣ်န့ၣ် နသ့ၣ်ညါ ခဲလၢာ်လီၤ. ၁၅ ပမိၢ်ပၢ်ဖံဖု လၢပျၢၤတဖၣ်န့ၣ် လဲၤလၢ ကီၢ်အဲၤကူပတူး+ ဒီးပအိၣ်လၢ ကီၢ်အဲၤကူပတူးအပူၤ အနံၣ်အါမး+ ဒီးပှၤအဲၤကူပတူးဖိတဖၣ် မၤအၢမၤနး ပှၤဒီးပမိၢ်ပၢ်ဖံဖု လၢပျၢၤတဖၣ်လီၤ.+ ၁၆ အဃိ ပဃ့တၢ်မၤစၢၤ လၢယဟိဝၤယွၤအအိၣ်+ ဒီးအဝဲနၢ်ဟူပှၤ ဒီးဆှၢလီၤ အမူခိၣ်ကလူးတဂၤ+ ဒီးဒုးဟးထီၣ်ပှၤလၢ ကီၢ်အဲၤကူပတူး အပူၤလီၤ. ခဲအံၤ ပအိၣ်လၢ ကၤဒ့ၣ် လၢအမ့ၢ် ဝ့ၢ်တဖျၢၣ်လၢ အအိၣ်လၢ နဟီၣ်ကဝီၤ အဆၢလီၤ. ၁၇ ဝံသးစူၤ ပျဲပလဲၤခီဂာ် နကီၢ်တက့ၢ်. ပတလဲၤခီဂာ်တၢ်လၢ သုစံာ်ပျီအပူၤ ဒီးသုစပံးကျီး အပူၤဘၣ်. ပတအီစ့ၢ်ကီး ထံလၢ သုထံကမျၢတဖၣ် အပူၤဘၣ်. ဖဲပလဲၤတၢ်လၢ စီၤပၤအကျဲမုၢ် အဖီခိၣ်အခါ ပတဃၣ်ပသးလၢ အစ့ၣ်မ့ၢ်ဂ့ၤ အထွဲမ့ၢ်ဂ့ၤဘၣ် တုၤလီၤလၢ ပလဲၤတလၢ နဟီၣ်ကဝီၤလီၤ.’”+
၁၈ ဘၣ်ဆၣ် ကီၢ်အဒိၣ် အစီၤပၤ တဲအီၤလၢ “နတဘၣ် လဲၤခီဂာ်တၢ်လၢ ပဟီၣ်ကဝီၤ အပူၤဘၣ်. နမ့ၢ်မၤ ဒ်န့ၣ်န့ၣ် ယကစိာ်ထီၣ်နး ဒီးဟဲသဂၢၢ် နၤလီၤ.” ၁၉ ဒီးပှၤအံၣ်စရ့လးဖိတဖၣ် တဲဆၢက့ၤအီၤလၢ “ပကလဲၤတၢ်လၢ ကျဲမုၢ်ခိၣ်လီၤ. ဒီးပဝဲ ဒီးပဆၣ်ဖိကီၢ်ဖိတဖၣ် မ့ၢ်အီနထံန့ၣ် ပကဟ့ၣ်နၤ အပှ့ၤလီၤ.+ ပတလီကီ တၢ်နီတမံၤဘၣ်. အိၣ်ဒၣ် ပအဲၣ်ဒိးလဲၤခီဂာ် တၢ်လၢပခီၣ်လီၤ.”+ ၂၀ ဘၣ်ဆၣ် ကီၢ်အဒိၣ်အစီၤပၤ တဲဝဲလၢ “နတဘၣ် လဲၤခီဂာ်ဘၣ်.”+ ဒီးကီၢ်အဒိၣ် အစီၤပၤ ဟဲဒီး အပှၤအါအါဂီၢ်ဂီၢ် ဒီးအသုးမုၢ်လၢ အဂံၢ်ဆူၣ်ဘါဆူၣ် ဒ်သိးကသဂၢၢ်အဝဲသ့ၣ် အဂီၢ်လီၤ. ၂၁ ကီၢ်အဒိၣ်အစီၤပၤ တဟ့ၣ်အခွဲးလၢ ပှၤအံၣ်စရ့လးဖိတဖၣ် ကလဲၤခီဂာ် အဟီၣ်ကဝီၤဘၣ်. အဃိ ပှၤအံၣ်စရ့လးဖိတဖၣ် လဲၤတၢ်လၢ ကျဲလၢ အဂၤတဘိလီၤ.+
၂၂ ပှၤအံၣ်စရ့လးဖိတဖၣ် အတၢ်အိၣ်ဖှိၣ် ဒီတဖုန့ၣ် ဟးထီၣ်လၢကၤဒ့ၣ် ဒီးလဲၤဝဲလၢ ကစၢၢ်ဃိၢ်လီၤ.+ ၂၃ ဖဲကစၢၢ်ဃိၢ် လၢအအိၣ်လၢ အဒိၣ်အကီၢ်ဆၢန့ၣ် ယဟိဝၤယွၤ တဲစီၤမိၤၡ့ ဒီးစီၤအၤဟရိၣ်လၢ ၂၄ “စီၤအၤဟရိၣ်န့ၣ် ကသံဝဲ ဒီးကဘၣ် တၢ်ခူၣ်လီၤအီၤ ဒ်အမိၢ်ပၢ်ဖံဖု လၢပျၢၤတဖၣ် အသိးလီၤ.+ အဝဲ တလဲၤနုာ်လီၤလၢ ကီၢ်တဘ့ၣ်လၢ ယကဟ့ၣ်လီၤ ပှၤအံၣ်စရ့လးဖိန့ၣ် အပူၤဘၣ်, မ့ၢ်လၢ သုခံဂၤလၢာ်န့ၣ် သုထီဒါက့ၤ ယတၢ်မၤလိာ်လၢ အဘၣ်ဃးဒီးထံလၢ မရံၤဘါ အဃိလီၤ.+ ၂၅ ကိးထီၣ် စီၤအၤဟရိၣ် ဒီးအဖိခွါ စီၤအလၤဧစၢ် လၢကစၢၢ်ဃိၢ်အလိၤ တက့ၢ်. ၂၆ ဘ့ၣ်လီၤကွံာ် စီၤအၤဟရိၣ် အတၢ်ကူတၢ်သိး+ ဒီးဒုးကူထီၣ်သိးထီၣ် အဖိခွါ စီၤအလၤဧစၢ် တက့ၢ်.+ ဒီးစီၤအၤဟရိၣ် ကသံဝဲ ဖဲန့ၣ်လီၤ.”
၂၇ ဒီးစီၤမိၤၡ့ မၤဝဲဒ် ယဟိဝၤယွၤ မၤလိာ်အီၤ အသိးလီၤ. ဒီးအဝဲသ့ၣ် လဲၤထီၣ်ဝဲလၢ ကစၢၢ်ဃိၢ်အလိၤ လၢပှၤဂီၢ်မုၢ်ခဲလၢာ် အမဲာ်ညါလီၤ. ၂၈ ဒီးစီၤမိၤၡ့ ဘ့ၣ်လီၤကွံာ် စီၤအၤဟရိၣ် အတၢ်ကူတၢ်သိးတဖၣ် ဒီးဒုးကူထီၣ်သိးထီၣ်ဝဲ စီၤအၤဟရိၣ် အဖိခွါ စီၤအလၤဧစၢ်လီၤ. ဝံၤဒီး စီၤအၤဟရိၣ် သံဝဲလၢ ကစၢၢ်ဒီခိၣ်လီၤ.+ ဒီးစီၤမိၤၡ့ ဒီးစီၤအလၤဧစၢ် ဟဲက့ၤလီၤလၢ ကစၢၢ်လိၤလီၤ. ၂၉ ဖဲပှၤဂီၢ်မုၢ်ခဲလၢာ် သ့ၣ်ညါဝဲလၢ စီၤအၤဟရိၣ် သံလံအခါ ပှၤအံၣ်စရ့လးဖိတဖၣ် ဟီၣ်လၢ စီၤအၤဟရိၣ်အဃိ အသီ ၃၀ လီၤ.+
၂၁ ပှၤကနၤဧၣ်ဖိ အစီၤပၤဧရး+ လၢအအိၣ်လၢ နဲကဲၤန့ၣ် ဖဲအနၢ်ဟူဝဲလၢ ပှၤအံၣ်စရ့လးဖိတဖၣ် လဲၤတၢ်လၢ အသၤရံၣ်အကျဲအခါ အဝဲဟဲဒုးဝဲ ပှၤအံၣ်စရ့လးဖိ ဒီးက့ၤဖီၣ် အဝဲသ့ၣ် တနီၤလီၤ. ၂ အဃိ ပှၤအံၣ်စရ့လးဖိတဖၣ် မၤတၢ်အၢၣ်လီၤဒီး ယဟိဝၤယွၤလၢ “နမ့ၢ်ဟ့ၣ်လီၤ ပှၤသ့ၣ်တဖၣ်အံၤ လၢပစုပူၤန့ၣ် ပကမၤဟးဂီၤ အဝဲသ့ၣ် အဝ့ၢ်တဖၣ် သပှၢ်ကတၢၢ်လီၤ.” ၃ ဒီးယဟိဝၤယွၤ ဒိကနၣ် ပှၤအံၣ်စရ့လးဖိ အကလုၢ် ဒီးဟ့ၣ်လီၤ ပှၤကနၤဧၣ်ဖိတဖၣ် လၢအဝဲသ့ၣ် အစုပူၤ ဒီးအဝဲသ့ၣ် မၤဟးဂီၤကွံာ် ပှၤကနၤဧၣ်ဖိတဖၣ် ဒီးအဝ့ၢ်တဖၣ်လီၤ. လၢတၢ်န့ၣ်အဃိ အဝဲသ့ၣ် ကိးဝဲ တၢ်လီၢ်အံၤ အမံၤလၢ ဃိၢ်မါလီၤ.+
၄ အဃိ ဖဲအဝဲသ့ၣ် ဟးထီၣ်ဝဲလၢ ကစၢၢ်ဃိၢ်အခါ+ အဝဲသ့ၣ်ဆဲး လဲၤဝဲလၢ ပီၣ်လဲၣ်ဂီၤအကျဲ ဒ်သိး ကလဲၤတရံးဝဲ ကီၢ်အဒိၣ် အဂီၢ်လီၤ.+ ဒီးပှၤဂီၢ်မုၢ်တဖၣ် လီၤဘှံးလီၤတီၤဝဲလၢ တၢ်လဲၤတၢ်က့ၤအံၤလီၤ. ၅ ဒီးပှၤဂီၢ်မုၢ် တဲတၢ်လၢ အထီဒါ ကစၢ်ယွၤ ဒီးစီၤမိၤၡ့လၢ+ “ဘၣ်မနုၤအဃိ သုဒုးဟးထီၣ်ပှၤလၢ ကီၢ်အဲၤကူပတူး အပူၤလဲၣ်. မ့ၢ်ဒ်သိး ပကသံလၢ ပှၢ်မုၢ်ကနၢ အပူၤအဂီၢ်ဧါ. တၢ်အီၣ်ဒီးထံ တအိၣ်ဘၣ်+ ဒီးကိၣ်လၢ အလီၤသးဘၣ်အၢ တခါအံၤ ပသးဟ့အီၤလံ.”+ ၆ အဃိ ယဟိဝၤယွၤ ဆှၢလီၤ ဂုၢ်လၢ အစုၣ်အၢတဖၣ်လၢ ပှၤဂီၢ်မုၢ် အကျါလီၤ. ခီဖျိလၢ ဂုၢ်သ့ၣ်တဖၣ် အ့ၣ်အဝဲသ့ၣ် အဃိ ပှၤအံၣ်စရ့လးဖိတဖၣ် သံဝဲအါဂၤလီၤ.+
၇ ဒီးပှၤဂီၢ်မုၢ်တဖၣ် ဟဲလၢ စီၤမိၤၡ့အအိၣ် ဒီးတဲဝဲလၢ “ပတဲဘၣ်တၢ်လၢ အထီဒါ ယဟိဝၤယွၤ ဒီးနၤ အဃိ ပမၤဘၣ်တၢ်ဒဲးဘးလံ.+ ဃ့ထုကဖၣ်န့ၢ်ပှၤလၢ ယဟိဝၤယွၤအအိၣ် ဒ်သိးအဝဲ ကမၤလီၤမၢ်ကွံာ် ဂုၢ်တဖၣ်အံၤ လၢပအိၣ်တက့ၢ်.” ဒီးစီၤမိၤၡ့ ဃ့ထုကဖၣ် လၢပှၤဂီၢ်မုၢ်တဖၣ် အဂီၢ်လီၤ.+ ၈ ဒီးယဟိဝၤယွၤ တဲစီၤမိၤၡ့လၢ “တ့ထီၣ် ဂုၢ်လၢအစုၣ်အၢ တဘိအဂီၤ ဒီးပာ်ထီၣ်အီၤလၢ တၢၣ်တတၢၣ်အလိၤတက့ၢ်. ဒီးပှၤလၢ ဂုၢ်အ့ၣ်အီၤန့ၣ် ကဘၣ်ကွၢ်ဝဲ ဒ်သိးကဆဲး အိၣ်မူအဂီၢ်လီၤ.” ၉ စီၤမိၤၡ့ တ့ထီၣ် ဂုၢ်တဘိလၢ တိၢ်ဘီ တဘျီဃီ+ ဒီးပာ်ထီၣ်အီၤလၢ တၢၣ်တတၢၣ်အလိၤလီၤ.+ ဒီးဖဲဂုၢ်အ့ၣ် ပှၤတဂၤဂၤအခါ အဝဲမ့ၢ်ကွၢ်ထီၣ် ဂုၢ်တိၢ်ဘီအံၤန့ၣ် အဝဲတသံဝဲလၢၤဘၣ်.+
၁၀ လၢခံ ပှၤအံၣ်စရ့လးဖိတဖၣ် လဲၤတၢ် ဒီးသူၣ်လီၤအဒဲဖဲ အိဘိးလီၤ.+ ၁၁ ဒီးအဝဲသ့ၣ် ဟးထီၣ်လၢ အိဘိး ဒီးသူၣ်လီၤအဒဲလၢ ဧ့ၤယ့ဟိးဘၤရံၣ်+ လၢပှၢ်မုၢ်ကနၢအပူၤ လၢကီၢ်မိၤအး အမဲာ်ညါ လၢမုၢ်ထီၣ်တခီလီၤ. ၁၂ ဒီးအဝဲသ့ၣ် ဟးထီၣ်ဖဲန့ၣ် ဒီးသူၣ်လီၤအဒဲလၢ စၤရ့း အတၢ်တြီၤလီၤ.+ ၁၃ ဝံၤဒီးအဝဲသ့ၣ် ဟးထီၣ်ဖဲန့ၣ် ဒီးသူၣ်လီၤအဒဲ လၢအၢ်နိၣ် အဟီၣ်ကဝီၤ+ လၢအအိၣ်ဝဲလၢ ပှၢ်မုၢ်ကနၢ လၢအလဲၤဝဲတုၤလၢ ပှၤအမိၢ်ဖိတဖၣ် အကီၢ်ဆၢလီၤ. ဒီးထံကျိအၢ်နိၣ်န့ၣ် မ့ၢ်ဝဲ ပှၤမိၤအးဖိ ဒီးပှၤအမိၢ်ဖိတဖၣ် အကီၢ်ဆၢလီၤ. ၁၄ လၢတၢ်န့ၣ်အဃိ လံာ်တဘ့ၣ်လၢ အဘၣ်ဃးဒီး ယဟိဝၤယွၤ အတၢ်ဒုးတဖၣ်န့ၣ် ပာ်ဖျါထီၣ်ဝဲ တၢ်ဂ့ၢ်လၢ အဘၣ်ဃးဒီး “ဝာ်ဟ့ာ် လၢစူာ်ဖၣ် အဟီၣ်ကဝီၤ အပူၤ, အၢ်နိၣ် အတၢ်တြီၤတဖၣ် ၁၅ ဒီးတၢ်တြီၤတဖၣ်လၢ အအိၣ်ဝဲလၢ ပှၤမိၤအးဖိ အကီၢ်ဆၢ ဒီးလီၤဘံဝဲ တုၤလၢ ဝ့ၢ်ဧၢ် အအိၣ်တခီလီၤ.”
၁၆ လၢခံ အဝဲသ့ၣ် လဲၤဝဲလၢဘ့ၢ်လီၤ. အဝဲန့ၣ် မ့ၢ်ဝဲ ထံကမျၢ* လၢယဟိဝၤယွၤ တဲဝဲ စီၤမိၤၡ့လၢ “ပာ်ဖှိၣ်ထီၣ် ပှၤဂီၢ်မုၢ် ဒီးယကဟ့ၣ် အဝဲသ့ၣ် ထံလီၤ.”
၁၇ ဖဲန့ၣ် အဆၢကတီၢ် ပှၤအံၣ်စရ့လးဖိတဖၣ် သးဝံၣ်ထီၣ် တၢ်သးဝံၣ်လၢ
“အိ ထံကမျၢဧၢ, ဒုးဟဲထီၣ် ထံတက့ၢ်. သးဝံၣ်ဆၢက့ၤတၢ်တက့ၢ်.
၁၈ အဝဲန့ၣ် မ့ၢ်ထံကမျၢလၢ ပှၤခိၣ်ပှၤနၢ်တဖၣ် ဒီးပှၤဒိၣ်ပှၤပှၢ်တဖၣ် ခူၣ်ဝဲဒီး
ခိၣ်နၢ် အနီၣ်ထိးဘိတဘိ ဒီးအဝဲသ့ၣ် အနီၢ်ကစၢ် အနီၣ်ထိးဘိတဖၣ်လီၤ.”
ဝံၤဒီး အဝဲသ့ၣ် ဟးထီၣ်လၢ ပှၢ်မုၢ်ကနၢ ဒီးလဲၤဝဲလၢ မးတၤနၤ ၁၉ ဒီးအဝဲသ့ၣ် ဟးထီၣ်လၢ မးတၤနၤ ဒီးလဲၤဝဲလၢ နၤဃလံၤအ့လး ဝံၤဒီး ဟးထီၣ်လၢ နၤဃလံၤအ့လး ဒီးလဲၤဝဲလၢ ဘၤမိးလီၤ.+ ၂၀ ဒီးအဝဲသ့ၣ် ဟးထီၣ်လၢ ဘၤမိး ဒီးလဲၤဝဲဆူ တၢ်တြီၤလၢ အအိၣ်လၢ ကီၢ်မိၤအး အဟီၣ်ကဝီၤပူၤ+ လၢအဘူးဒီး ပံးစကၤ အဒီခိၣ်လီၤ.+ ဖဲပံးစကၤ အဒီခိၣ်န့ၣ် ပှၤကွၢ်စိလီၤ ယံးၡံမိၣ် သ့လီၤ.+
၂၁ ဒီးပှၤအံၣ်စရ့လးဖိတဖၣ် ဆှၢလီၤ ပှၤစိာ်တၢ်ကစီၣ်ဖိတဖၣ် လၢပှၤအမိၢ်ဖိ အစီၤပၤစံဃိၣ် အအိၣ် ဒီးတဲဝဲလၢ+ ၂၂ “ပျဲပလဲၤခီဂာ် နကီၢ်တက့ၢ်. ပတဃၣ်ပသးလၢ သုစံာ်ပျီအပူၤ ဒီးသုစပံးကျီး အပူၤဘၣ်. ပတအီစ့ၢ်ကီး ထံလၢ သုထံကမျၢတဖၣ် အပူၤဘၣ်. ပကလဲၤတၢ်လၢ စီၤပၤအကျဲမုၢ် အဖီခိၣ် တုၤလီၤလၢ ပလဲၤတလၢ သုဟီၣ်ကဝီၤလီၤ.”+ ၂၃ ဒီးစီၤစံဃိၣ် တပျဲလဲၤခီဂာ် ပှၤအံၣ်စရ့လးဖိတဖၣ် လၢအဟီၣ်ကဝီၤဘၣ်. လၢတၢ်န့ၣ်အလီၢ် စီၤစံဃိၣ် ပာ်ဖှိၣ်ထီၣ် အပှၤခဲလၢာ် ဒီးလဲၤဝဲ ဒ်သိး ကထီဒါဝဲ ပှၤအံၣ်စရ့လးဖိ လၢပှၢ်မုၢ်ကနၢ အပူၤလီၤ. ဒီးဖဲအဝဲသ့ၣ် လဲၤတုၤလၢ ဝ့ၢ်ယါစၤအခါ အဝဲသ့ၣ် ဒုးတၢ်ဒီး ပှၤအံၣ်စရ့လးဖိတဖၣ်လီၤ.+ ၂၄ ဘၣ်ဆၣ် ပှၤအံၣ်စရ့လးဖိတဖၣ် မၤနၢၤအီၤလၢနး+ ဒီးမၤန့ၢ် တၢ်လီၢ်တၢ်ကျဲ လၢအအိၣ်လၢ အကီၢ်ပူၤ+ စးထီၣ်လၢ အၢ်နိၣ်+ တုၤလၢ ယးဘိး+ လၢအအိၣ်ဘူးဒီး ပှၤဧၣ်မိၣ်ဖိလီၤ. ဝ့ၢ်ယၤစ့ၢ်န့ၣ်+ မ့ၢ်ဝဲ ပှၤဧၣ်မိၣ်ဖိ အဟီၣ်ကဝီၤ အဆၢလီၤ.+
၂၅ ဒီးပှၤအံၣ်စရ့လးဖိတဖၣ် မၤန့ၢ်ဝဲ ပှၤအမိၢ်ဖိ အဝ့ၢ်တဖၣ်ခဲလၢာ်+ ပၣ်ဃုာ်ဒီး ဝ့ၢ်ဃ့ၡဘိၣ် ဒီးအဒူသဝီတဖၣ် ခဲလၢာ်လီၤ. ဒီးအဝဲသ့ၣ် အိၣ်ဝဲဆိးဝဲလၢ ဝ့ၢ်တဖၣ်အံၤ အပူၤလီၤ. ၂၆ တၢ်လၢ ဝ့ၢ်ဃ့ၡဘိၣ်န့ၣ် မ့ၢ်ဝဲ ပှၤအမိၢ်ဖိ အစီၤပၤ စံဃိၣ်အဝ့ၢ်လီၤ. လၢညါန့ၣ် အဝဲဒုးဝဲ ကီၢ်မိၤအးအစီၤပၤ ဒီးဟံးန့ၢ်ဝဲ အတၢ်လီၢ်ခဲလၢာ် တုၤလီၤလၢ အၢ်နိၣ် အတၢ်တြီၤလီၤ. ၂၇ လၢတၢ်န့ၣ်အဃိ တၢ်ကတိၤဒိလၢ အဒုၣ်ဒွဲၣ်တၢ် ဟဲအိၣ်ထီၣ်တခါလၢ အတဲဝဲလၢ
“ဟဲလၢ ဝ့ၢ်ဃ့ၡဘိၣ်သၢၤ.
မ်ပှၤသူၣ်ထီၣ် စီၤစံဃိၣ်အဝ့ၢ် ဒီးမၤဂၢၢ်ကျၢၤအီၤတက့ၢ်.
၂၈ မ့ၣ်အူဟဲထီၣ်လၢ ဝ့ၢ်ဃ့ၡဘိၣ်, မ့ၣ်အူလၣ် ဟဲထီၣ်လၢ စီၤစံဃိၣ် အဝ့ၢ်လီၤ.
မ့ၣ်အူအီၣ်ကွံာ် ဝ့ၢ်ဧၢ်လၢ ကီၢ်မိၤအးအပူၤ ဒီးအၢ်နိၣ်အတၢ်တြီၤ အတၢ်လီၢ်ထီၣ်ထီ အခိၣ်အနၢ် တဖၣ်လီၤ.
၂၉ ကီၢ်မိၤအးဧၢ, ကလီၤသးအုးလၢ နဂီၢ်ထဲလဲၣ်. ကစၢ်ကမိၣ် အပှၤဂီၢ်မုၢ်သ့ၣ်ဧၢ, တၢ်ကမၤဟးဂီၤသုလီၤ.+
ကမိၣ်န့ၣ် ကထံၣ်ဘၣ် အဖိခွါတဖၣ် လီၤမုၢ်ပြံပြါဝဲ ဒီးအဖိမုၣ်တဖၣ်န့ၣ် ပှၤအမိၢ်ဖိ အစီၤပၤစံဃိၣ် ကက့ၤဖီၣ် အဝဲသ့ၣ်လီၤ.
၃၀ မ်ပခး အဝဲသ့ၣ်တက့ၢ်.
ဝ့ၢ်ဃ့ၡဘိၣ် ကဘၣ် တၢ်မၤဟးဂီၤအီၤ တုၤလီၤလၢ ဝ့ၢ်ဒံၤဘိၣ်လီၤ.+
မ်ပမၤသယုၢ်အီၤ တုၤလီၤလၢ နိၤဖးတက့ၢ်.
မ့ၣ်အူကအီၣ်တၢ် တုၤလၢ မ့ဒဘၤလီၤ.”+
၃၁ ဒီးပှၤအံၣ်စရ့လးဖိတဖၣ် အိၣ်ဆိးဝဲလၢ ပှၤအမိၢ်ဖိတဖၣ် အကီၢ်လီၤ. ၃၂ ဒီးစီၤမိၤၡ့ ဆှၢလီၤဝဲ ပှၤပိာ်ခွါတနီၤ ဒ်သိး ကလဲၤကွၢ်ဟုၣ်တၢ် လၢဝ့ၢ်ယၤစ့ၢ် အဂီၢ်လီၤ.+ ဒီးအဝဲသ့ၣ် မၤန့ၢ်ဝဲ ဝ့ၢ်ယၤစ့ၢ် အဒူသဝီတဖၣ် ဒီးနီဟးထီၣ်ကွံာ် ပှၤအမိၢ်ဖိလၢ အအိၣ်ဖဲန့ၣ်တဖၣ်လီၤ. ၃၃ ဝံၤဒီးအဝဲသ့ၣ် ဃၣ်အသး ဒီးလဲၤထီၣ်ဝဲလၢ ဘၤၡၣ်အကျဲလီၤ. ဒီးဘၤၡၣ် အစီၤပၤဧိာ်န့ၣ်+ ဟဲဝဲဒီး အပှၤခဲလၢာ် ဒ်သိး ကဒုးတၢ်ဒီး အဝဲသ့ၣ်လၢ ဝ့ၢ်အ့ဒြံၤလီၤ.+ ၃၄ ဒီးယဟိဝၤယွၤ တဲစီၤမိၤၡ့လၢ “တဘၣ်ပျံၤအီၤတဂ့ၤ.+ အဝဲ ဒီးအပှၤခဲလၢာ် ဒီးအကီၢ်န့ၣ် ယကဟ့ၣ်လီၤ လၢနစုပူၤလီၤ.+ ဒီးနကမၤအီၤဒ် နမၤပှၤအမိၢ်ဖိ အစီၤပၤ စံဃိၣ်လၢ အအိၣ်ဟဲဝဲလၢ ဝ့ၢ်ဃ့ၡဘိၣ် အသိးလီၤ.”+ ၃၅ အဃိ အဝဲသ့ၣ် မၤသံအီၤ ဒီးအဖိခွါတဖၣ် ဒီးအပှၤတဖၣ် တုၤလၢ အလၢာ်လီၤ.+ ဒီးအဝဲသ့ၣ် မၤန့ၢ်ဝဲ တၢ်လီၢ်တၢ်ကျဲ လၢအအိၣ်လၢ အကီၢ်ပူၤလီၤ.+
၂၂ ဒီးပှၤအံၣ်စရ့လးဖိတဖၣ် ဟးထီၣ် ဒီးသူၣ်လီၤအဒဲလၢ ကီၢ်မိၤအး အပှၢ်မုၢ်ကနၢ လၢအဘူးဒီး ဝ့ၢ်ယရံၤဃိလၢ ထံကျိယၢ်ဒ့ၣ် အဝၢ်ဘးခီလီၤ.+ ၂ စီၤစံးပိၢ် အဖိခွါ စီၤဘၤလး+ နၢ်ဟူဝဲ တၢ်ခဲလၢာ်လၢ ပှၤအံၣ်စရ့လးဖိတဖၣ် မၤဝဲ ပှၤအမိၢ်ဖိ ၃ ဒီးမ့ၢ်လၢ ပှၤဂီၢ်မုၢ်တဖၣ် အိၣ်ဝဲအါမးအဃိ ပှၤမိၤအးဖိတဖၣ် ပျံၤတၢ်ဖုးတၢ်ဒိၣ်မး ဒီးလၢပှၤအံၣ်စရ့လးဖိအဃိ ပှၤမိၤအးဖိတဖၣ် ပျံၤတၢ် ပှဲၤဒီးတၢ်သူၣ်ကိၢ်သးဂီၤလီၤ.+ ၄ အဃိ ပှၤမိၤအးဖိ တဲဘၣ် ပှၤမံးဒယၣ်ဖိ အပှၤသူၣ်က့သးပှၢ်တဖၣ်လၢ+ “ခဲအံၤ ပှၤဂီၢ်မုၢ်တဖုအံၤ ကမၤဟးဂီၤ ပကီၢ် ဒ်ကျီၢ်ဖါ အီၣ်ယူၢ်လီၤနီၣ် လၢပျီပူၤအသိးလီၤ.”
ဖဲန့ၣ်အခါ စီၤစံးပိၢ် အဖိခွါ စီၤဘၤလး မ့ၢ်ဝဲ မိၤအးအစီၤပၤလီၤ. ၅ အဝဲဆှၢလီၤ ပှၤစိာ်တၢ်ကစီၣ်ဖိတဖၣ်လၢ စီၤဘဧိၢ် အဖိခွါ စီၤဘံးလၣ် အအိၣ်လီၤ.+ စီၤဘံးလၣ်န့ၣ် အိၣ်ဝဲလၢ တၢ်လီၢ်လၢအမ့ၢ် ပသူၢ် လၢအဘူးဒီး ထံကျိ ဖရၤသး ဖဲအအိၣ်ဖျဲၣ်ထီၣ် အလီၢ်လီၤ. စီၤဘၤလး မၢပှၤလဲၤကိးအီၤ ဒီးတဲအီၤလၢ “ပှၤဂီၢ်မုၢ်တဖု ဟးထီၣ်လၢ ကီၢ်အဲၤကူပတူး အပူၤလီၤ. ဒီးအဝဲသ့ၣ် အိၣ်ပှဲၤလၢ ဟီၣ်ခိၣ်အမဲာ်ဖံးခိၣ်+ ဒီးခဲအံၤ အဝဲသ့ၣ် အိၣ်ဆိးဝဲလၢ ယမဲာ်ညါလီၤ. ၆ မ့ၢ်လၢ အဝဲသ့ၣ် အဂံၢ်ဆူၣ်န့ၢ်ဒံးယၤအဃိ+ ဝံသးစူၤ ဟဲဆိၣ်အၢ ပှၤဂီၢ်မုၢ်တဖၣ်အံၤ လၢယဂီၢ်တက့ၢ်. မ့ၢ်လၢ ယသ့ၣ်ညါဂ့ၤဂ့ၤလၢ ပှၤလၢနဆိၣ်ဂ့ၤအီၤန့ၣ် ဘၣ်ဆိၣ်ဂ့ၤ ဒီးပှၤလၢ နဆိၣ်အၢအီၤန့ၣ် ဘၣ်ဆိၣ်အၢ အဃိ ဘၣ်သ့ၣ်သ့ၣ် ယမၤနၢၤ အဝဲသ့ၣ် ဒီးနီဟးထီၣ်ကွံာ် အဝဲသ့ၣ် လၢကီၢ်ပူၤ ကန့ၢ်လီၤ.”
၇ ဒီးပှၤမိၤအးဖိ အပှၤသူၣ်က့သးပှၢ်တဖၣ် ဒီးပှၤမံးဒယၣ်ဖိ အပှၤသူၣ်က့သးပှၢ်တဖၣ် လဲၤတၢ်ဒီး စိာ်ဃုာ်ဝဲ တၢ်ဆိၣ်အၢ* အပှ့ၤ ဒီးလဲၤတုၤလၢ စီၤဘံးလၣ် အအိၣ်+ ဒီးတဲဘၣ်အီၤလၢ စီၤဘၤလး အတၢ်ကတိၤလီၤ. ၈ ဒီးစီၤဘံးလၣ် တဲအဝဲသ့ၣ်လၢ “မံဖဲအံၤတနၤ ဒီးတၢ်လၢ ယဟိဝၤယွၤ တဲယၤန့ၣ် ယကတဲဘၣ်သုလီၤ.” အဃိ မိၤအး အပဒိၣ်တဖၣ် အိၣ်တ့ၢ်ဝဲဒီး စီၤဘံးလၣ်လီၤ.
၉ ဒီးကစၢ်ယွၤ ဟဲလၢစီၤဘံးလၣ် အအိၣ် ဒီးတဲဝဲလၢ+ “ပှၤလၢ အအိၣ်ဒီးနၤန့ၣ် မ့ၢ်မတၤ တဖၣ်လဲၣ်.” ၁၀ စီၤဘံးလၣ် တဲဝဲ ယွၤလၢအမ့ၢ်အတီလၢ “စီၤစံးပိၢ် အဖိခွါ စီၤဘၤလး လၢအမ့ၢ် မိၤအး အစီၤပၤန့ၣ် ဆှၢလီၤတၢ်ကစီၣ် လၢယအိၣ် ဒီးတဲဝဲလၢ ၁၁ ‘ပှၤဂီၢ်မုၢ်တဖု လၢအဟးထီၣ်လၢ ကီၢ်အဲၤကူပတူး အပူၤန့ၣ် အိၣ်ပှဲၤလၢ ဟီၣ်ခိၣ်အမဲာ်ဖံးခိၣ်လီၤ. အဃိ ဟဲဆိၣ်အၢအဝဲသ့ၣ် လၢယဂီၢ်တက့ၢ်.+ ဘၣ်သ့ၣ်သ့ၣ် ယကမၤနၢၤ အဝဲသ့ၣ် ဒီးနီဟးထီၣ်ကွံာ် အဝဲသ့ၣ် လၢကီၢ်ပူၤ ကန့ၢ်လီၤ.’” ၁၂ ဘၣ်ဆၣ် ကစၢ်ယွၤတဲ စီၤဘံးလၣ်လၢ “နတဘၣ် လဲၤပိာ်အဝဲသ့ၣ် အခံဘၣ်. မ့ၢ်လၢ ပှၤဂီၢ်မုၢ်တဖၣ်န့ၣ် အဘၣ်တၢ်ဆိၣ်ဂ့ၤအဃိ နတဘၣ်ဆိၣ်အၢ အဝဲသ့ၣ်ဘၣ်.”+
၁၃ စီၤဘံးလၣ် ဂဲၤဆၢထၢၣ် လၢဂီၤခီ ဒီးတဲဘၣ် စီၤဘၤလး အပဒိၣ်တဖၣ်လၢ “မ့ၢ်လၢ ယဟိဝၤယွၤ တပျဲယလဲၤဒီးသုဘၣ် အဃိ က့ၤလၢ သုတၢ်လီၢ်တက့ၢ်.” ၁၄ အဃိ မိၤအး အပဒိၣ်တဖၣ် က့ၤတဲဘၣ် စီၤဘၤလးလၢ “စီၤဘံးလၣ် တဟဲပိာ်ပခံဘၣ်.”
၁၅ အဃိ စီၤဘၤလးန့ၣ် ဆှၢလီၤကဒီး ပဒိၣ်တဖၣ်လၢ အနီၣ်ဂံၢ် အိၣ်အါန့ၢ်ဒံး အဆိကတၢၢ်တဖု ဒီးအလီၢ်လၤ ဒိၣ်န့ၢ်ဒံး အဆိကတၢၢ် တဖုလီၤ. ၁၆ ဒီးအဝဲသ့ၣ် လဲၤတဲ စီၤဘံးလၣ်လၢ “စီၤစံးပိၢ် အဖိခွါ စီၤဘၤလး တဲဝဲလၢ ‘ဝံသးစူၤ, ဒ်သိး နကဟဲလၢ ယအိၣ်အဂီၢ် တဘၣ်ပျဲ တၢ်တြီမၤတံာ်တာ်နၤ နီတမံၤတဂ့ၤ. ၁၇ ယကမၤလၤကပီၤနၤ ဒိၣ်ဒိၣ်မုၢ်မုၢ် ဒီးတၢ်လၢ နမၢယၤ တမံၤဂ့ၤတမံၤဂ့ၤန့ၣ် ယကမၤန့ၢ်နၤလီၤ. အဃိ ဝံသးစူၤ, ဟဲဆိၣ်အၢ ပှၤဂီၢ်မုၢ်တဖၣ်အံၤ လၢယဂီၢ်မီၤ.’” ၁၈ ဘၣ်ဆၣ် စီၤဘံးလၣ် တဲဆၢက့ၤ စီၤဘၤလး အခ့အပှၤတဖၣ်လၢ “စီၤဘၤလး မ့ၢ်ဟ့ၣ်ယၤ အနီၢ်ကစၢ်အဟံၣ်လၢ အပှဲၤဒီး ထူဒီးစ့ သနာ်က့ ယမၤတၢ်လၢ အဒိၣ်မ့ၢ်ဂ့ၤ အဆံးမ့ၢ်ဂ့ၤ လၢအခါကပာ် ယကစၢ် ယဟိဝၤယွၤ အတၢ်ကတိၤန့ၣ် တသ့နီတမံၤဘၣ်.+ ၁၉ ဘၣ်ဆၣ် ဝံသးစူၤ, သုဝဲစ့ၢ်ကီး တနၤအံၤန့ၣ် မံဖဲအံၤ ဒီးယဟိဝၤယွၤ ကတဲဒံးယၤ ဒ်လဲၣ်န့ၣ် ယကသ့ၣ်ညါဘၣ်လီၤ.”+
၂၀ ဒီးကစၢ်ယွၤ ဟဲလၢစီၤဘံးလၣ်အအိၣ် လၢမုၢ်နၤခီ ဒီးတဲအီၤလၢ “ပှၤတဖၣ်အံၤ မ့ၢ်ဟဲကိးနၤန့ၣ် လဲၤပိာ်အဝဲသ့ၣ်အခံ. ဘၣ်ဆၣ် နကဘၣ်တဲ ထဲဒၣ် တၢ်လၢယမၢ နတဲလီၤ.”+ ၂၁ အဃိ စီၤဘံးလၣ် ဆၢထၢၣ်လၢ ဂီၤခီ ဒီးကတဲာ်ကတီၤထီၣ် အကသ့ၣ်ယီၤ ဒီးလဲၤပိာ်ဝဲ မိၤအး အပဒိၣ်တဖၣ် အခံလီၤ.+
၂၂ မ့ၢ်လၢ အလဲၤတၢ်အဃိ ကစၢ်ယွၤ သးဒိၣ်ထီၣ်တၢ် ဒီးယဟိဝၤယွၤ အမူခိၣ်ကလူးတဂၤ အိၣ်ဆၢထၢၣ်လၢ ကျဲပူၤ ဒ်သိး ကတြီအီၤ အဂီၢ်လီၤ. ဒီးစီၤဘံးလၣ်န့ၣ် ဒိးဝဲ ကသ့ၣ်ယီၤ ဒီးအခ့အပှၤခံဂၤ လဲၤပိာ်အခံလီၤ. ၂၃ ဖဲကသ့ၣ်ယီၤ ထံၣ်ဝဲ ယဟိဝၤယွၤ အမူခိၣ်ကလူးလၢ အစိာ်ဝဲနးတဘ့ၣ် ဆၢထၢၣ်လၢ ကျဲပူၤအခါ ကသ့ၣ်ယီၤ ဃၣ်အသး ဒ်သိး ကဟးထီၣ်လၢကျဲပူၤ ဒီးကလဲၤဝဲလၢ တၢ်ပျီပူၤ အဂီၢ်လီၤ. ဘၣ်ဆၣ် စီၤဘံးလၣ်န့ၣ် တီၢ်ဝဲ ကသ့ၣ်ယီၤ ဒ်သိး အကဃၣ်ကဒါက့ၤ အခိၣ်လၢ ကျဲပူၤအဂီၢ်လီၤ. ၂၄ ဝံၤဒီး ယဟိဝၤယွၤ အမူခိၣ်ကလူးတဂၤန့ၣ် ဆၢထၢၣ် လၢကျဲအံၣ်အံၣ်ဖိတဘိလၢ စပံးကျီး ခံကျီးအဘၢၣ်စၢၤ ဒီးတၢ်အဒူၣ်လၢ အဘၣ် တၢ်တ့အီၤလၢလၢၢ်န့ၣ် အိၣ်ဝဲ ခံကပၤလၢာ်လီၤ. ၂၅ ဖဲကသ့ၣ်ယီၤ ထံၣ်ယဟိဝၤယွၤ အမူခိၣ်ကလူးအခါ ကသ့ၣ်ယီၤ လဲၤကျးတံၢ်အသးဒီး တၢ်ဒူၣ်ကပၤ အဃိ စီၤဘံးလၣ် အခီၣ်လၣ်ဘၣ်တံၢ်ဒီး တၢ်ဒူၣ်ကပၤလီၤ. ဒီးစီၤဘံးလၣ် တီၢ်ကဒီး အကသ့ၣ်ယီၤလီၤ.
၂၆ ဒီးယဟိဝၤယွၤ အမူခိၣ်ကလူး လဲၤတလၢကဒီးအီၤ ဒီးဆၢထၢၣ်ဝဲလၢ တၢ်လီၢ်အံၣ်အံၣ်ဖိ အဃိ အဃၣ်အသးလၢ အစ့ၣ်မ့ၢ်ဂ့ၤ အထွဲမ့ၢ်ဂ့ၤ တန့ၢ်လၢၤဘၣ်. ၂၇ ဖဲကသ့ၣ်ယီၤ ထံၣ်ဝဲ ယဟိဝၤယွၤ အမူခိၣ်ကလူးအခါ ကသ့ၣ်ယီၤကြာ်လီၤဝဲ* လၢစီၤဘံးလၣ် အဖီလာ်လီၤ. အဃိ စီၤဘံးလၣ် သးဒိၣ်ထီၣ်တၢ် ဒီးဆဲးတီၢ်ဝဲ ကသ့ၣ်ယီၤ လၢအနီၣ်ထိးဘိလီၤ. ၂၈ အဃိ ယဟိဝၤယွၤ ဒုးကတိၤ ကသ့ၣ်ယီၤတၢ်+ ဒီးကသ့ၣ်ယီၤ တဲဝဲ စီၤဘံးလၣ်လၢ “နတီၢ်ယၤ သၢဘျီညါန့ၣ် မ့ၢ်ယမၤဘၣ်နၤ တၢ်မနုၤလဲၣ်.”+ ၂၉ ဒီးစီၤဘံးလၣ် တဲဆၢက့ၤ ကသ့ၣ်ယီၤလၢ “တၢ် နမၤယၤဒ် တၢ်ပျုၢ်အသိးဒၢး. နးမ့ၢ်အိၣ်လၢ ယစုပူၤဒု ယကမၤသံနၤလီၤ.” ၃၀ ဒီးကသ့ၣ်ယီၤ တဲဆၢ စီၤဘံးလၣ်လၢ “ယကဲ နကသ့ၣ်ယီၤလၢ နဒိးအီၤလၢ နတၢ်အိၣ်မူဒီတစိၤ တမ့ၢ်ဧီၤ. လၢညါန့ၣ် မ့ၢ်ယမၤနၤဒ်အံၤ တဘျီဘျီဧါ.” ဒီးစီၤဘံးလၣ် တဲဆၢအီၤလၢ “ဟၢၤအၢ.” ၃၁ ဒီးယဟိဝၤယွၤ အိးထီၣ် စီၤဘံးလၣ် အမဲာ်ချံ+ ဒီးစီၤဘံးလၣ် ထံၣ်ဘၣ်ဝဲလၢ ယဟိဝၤယွၤ အမူခိၣ်ကလူး လၢအစိာ်ဝဲ နးတဘ့ၣ်န့ၣ် ဆၢထၢၣ်လၢ ကျဲပူၤလီၤ. အဃိ အဝဲ ဆုးလီၤအခိၣ် ဒီးထိၣ်လီၤပှီၤအသး တဘျီဃီလီၤ.
၃၂ ယဟိဝၤယွၤ အမူခိၣ်ကလူး တဲအီၤလၢ “ဘၣ်မနုၤအဃိ နတီၢ် နကသ့ၣ်ယီၤ သၢဘျီလဲၣ်. မ့ၢ်လၢ ကျဲလၢနလဲၤန့ၣ် ထီဒါလိာ်အသးဒီး ယတၢ်ဘၣ်သးအဃိ ယဟဲတြီနၤ လၢယနီၢ်ကစၢ်လီၤ.+ ၃၃ ကသ့ၣ်ယီၤထံၣ်ယၤဒီး ဂုာ်ကျဲးစၢး ဃၣ်ကွံာ်အသးလၢ ယအိၣ် သၢဘျီညါ.+ ကသ့ၣ်ယီၤ မ့ၢ်တဃၣ်ကွံာ်အသး လၢယအိၣ်ဘၣ်န့ၣ် ယမၤသံနၤ ဖးယံာ်လံ. ဘၣ်ဆၣ် ယကပာ်မူ ကသ့ၣ်ယီၤလီၤ.” ၃၄ ဒီးစီၤဘံးလၣ် တဲယဟိဝၤယွၤ အမူခိၣ်ကလူးလၢ “မ့ၢ်လၢ ယတသ့ၣ်ညါလၢ နဆၢထၢၣ်လၢ ကျဲပူၤ ဒ်သိး နကသဂၢၢ်ယၤ အဃိ ယမၤဘၣ် တၢ်ဒဲးဘးလံ. ယတၢ်လဲၤအံၤ မ့ၢ်တဂ့ၤဘၣ်လၢ နမဲာ်ညါန့ၣ် ယကက့ၤလီၤ.” ၃၅ ဘၣ်ဆၣ် ယဟိဝၤယွၤ အမူခိၣ်ကလူး တဲစီၤဘံးလၣ်လၢ “လဲၤပိာ် ပှၤတဖၣ်အံၤအခံ. ဘၣ်ဆၣ် နကဘၣ်တဲ ထဲဒၣ် တၢ်လၢယမၢ နတဲလီၤ.” အဃိ စီၤဘံးလၣ် ဆဲးလဲၤပိာ်ဝဲ စီၤဘၤလး အပဒိၣ်တဖၣ် အခံလီၤ.
၃၆ ဖဲစီၤဘၤလး နၢ်ဟူဝဲလၢ စီၤဘံးလၣ် ဟဲဝဲအခါ အဝဲလဲၤဝဲလၢ မိၤအးအဝ့ၢ် တဘျီဃီ ဒ်သိး ကလဲၤထံၣ်လိာ်အသးဒီးအီၤ အဂီၢ်လီၤ. ဝ့ၢ်အံၤန့ၣ် အိၣ်ဝဲလၢ အၢ်နိၣ်အတၢ်တြီၤ အကၢၢ်နံၤ လၢအမ့ၢ် ကီၢ်ဆၢလီၤ. ၃၇ စီၤဘၤလး တဲဘၣ် စီၤဘံးလၣ်လၢ “ယမၢပှၤလဲၤကိးနၤ တမ့ၢ်ဧီၤ. ဘၣ်မနုၤအဃိ နတဟဲလၢ ယအိၣ်ဘၣ်လဲၣ်. မ့ၢ်နဆိကမိၣ်လၢ ယမၤလၤကပီၤနၤ ဒိၣ်ဒိၣ်မုၢ်မုၢ် တသ့ဘၣ်န့ၣ်ဧါ.”+ ၃၈ ဒီးစီၤဘံးလၣ် တဲဆၢ စီၤဘၤလးလၢ “ယဟဲလၢနအိၣ်လံ. ဘၣ်ဆၣ် ယတဲတၢ်ဖဲယသး တန့ၢ်ဘၣ်. ယတဲသ့ထဲဒၣ် တၢ်လၢကစၢ်ယွၤ မၢယတဲလီၤ.”+
၃၉ အဃိ စီၤဘံးလၣ် လဲၤပိာ်ဝဲ စီၤဘၤလးအခံ ဒီးအဝဲသ့ၣ် လဲၤတုၤဝဲလၢ ကံးရယးဃူၤစိးလီၤ. ၄၀ ဒီးစီၤဘၤလး လုၢ်ထီၣ်ဝဲ ကျီၢ် ဒီးသိ ဒီးဆှၢလီၤဝဲ တၢ်ညၣ်လၢ စီၤဘံးလၣ် ဒီးပဒိၣ်လၢ အအိၣ်ဒီးအီၤတဖၣ် အအိၣ် တနီၤလီၤ. ၄၁ လၢဂီၤခီန့ၣ် စီၤဘၤလး ကိးဝဲ စီၤဘံးလၣ် ဒီးဆှၢထီၣ်အီၤလၢ ဝ့ၢ်ဘၤမိးဘဧၤလးလီၤ. ဖဲန့ၣ်န့ၣ် အဝဲ ထံၣ်စိဝဲ ပှၤအံၣ်စရ့လးဖိ ခဲလၢာ်သ့လီၤ.+
၂၃ စီၤဘံးလၣ် တဲစီၤဘၤလးလၢ “တ့ထီၣ် တၢ်လုၢ်လီၢ်နွံဖျၢၣ်+ ဖဲအံၤ ဒီးကတဲာ်ကတီၤထီၣ် ကျီၢ်ဖါနွံဒု ဒီးသိဖါ နွံဒု လၢယဂီၢ် တက့ၢ်.” ၂ ဒီးစီၤဘၤလး မၤဝဲဒ် စီၤဘံးလၣ် မၢအီၤအသိး တဘျီဃီလီၤ. ဒီးစီၤဘၤလး ဒီးစီၤဘံးလၣ်န့ၣ် လုၢ်ထီၣ်ဝဲ ကျီၢ်ဖါတဒု ဒီးသိဖါတဒု လၢတၢ်လုၢ်လီၢ် တဖျၢၣ်စုာ်စုာ် အဖီခိၣ်လီၤ.+ ၃ စီၤဘံးလၣ် တဲဝဲ စီၤဘၤလးလၢ “အိၣ်လၢ နတၢ်လုၢ်ဒွဲၣ်အူ အကပၤ ဖဲအံၤတက့ၢ်. မ့မ့ၢ်ယၤန့ၣ် ယကလဲၤတၢ်လီၤ. ဘၣ်သ့ၣ်သ့ၣ် ယဟိဝၤယွၤ ကဆဲးကျိးလိာ်သးဒီး ယၤလီၤ. ဒီးတၢ်လၢ အတဲဘၣ်ယၤ တမံၤဂ့ၤ တမံၤဂ့ၤန့ၣ် ယကတဲဘၣ်နၤလီၤ.” ဒီးအဝဲ လဲၤဝဲလၢ တၢ်လူၢ်ခိၣ်လီၤ.
၄ ဒီးကစၢ်ယွၤ ဆဲးကျိးဒီး စီၤဘံးလၣ်+ ဒီးစီၤဘံးလၣ် တဲအီၤလၢ “ယဆီလီၤ တၢ်လုၢ်လီၢ် နွံဖျၢၣ် ဒီးယလုၢ်ထီၣ် ကျီၢ်ဖါတဒု ဒီးသိဖါတဒု လၢတၢ်လုၢ်လီၢ် တဖျၢၣ်စုာ်စုာ် အဖီခိၣ်လီၤ.” ၅ ယဟိဝၤယွၤ တဲဘၣ် စီၤဘံးလၣ်လၢ တၢ်လၢအကဘၣ် တဲဝဲတဖၣ်လီၤ.+ အဝဲ တဲဝဲလၢ “က့ၤလၢ စီၤဘၤလးအအိၣ် ဒီးနကဘၣ်တဲအီၤ ဒ်အံၤဒ်နုၤလီၤ.” ၆ အဃိ အဝဲက့ၤဝဲဒီး ထံၣ်ဝဲလၢ စီၤဘၤလး ဒီးမိၤအး အပဒိၣ်တဖၣ်န့ၣ် ဆၢထၢၣ်ဝဲလၢ အတၢ်လုၢ်ဒွဲၣ်အူ အကပၤလီၤ. ၇ ဒီးစီၤဘံးလၣ် တဲဝဲ တၢ်ကတိၤဒိလၢ+
“ပှၤမိၤအးဖိ အစီၤပၤ ဘၤလး မၢပှၤဟဲကိးယၤ ဖဲယအိၣ်လၢ အရၣ်ဟီၣ်ကဝီၤ+
လၢမုၢ်ထီၣ် ကစၢၢ်ကျါ
ဒီးအဝဲ တဲဝဲလၢ ‘ဟဲဆိၣ်အၢန့ၢ်ယၤ စီၤယၤကိာ်,
ဟဲဒုၣ်ဒွဲၣ်စံးအၢ စီၤအံၣ်စရ့လးသၢၤ.’+
၈ ယဆိၣ်အၢပှၤလၢ ကစၢ်ယွၤ တဆိၣ်အၢဘၣ်တဖၣ်န့ၣ် ကသ့ဒ်လဲၣ်.
ဒီးယဒုၣ်ဒွဲၣ်စံးအၢ ပှၤလၢ ယဟိဝၤယွၤ တဒုၣ်ဒွဲၣ်စံးအၢဘၣ်တဖၣ်န့ၣ် ကသ့ဒ်လဲၣ်.+
၉ ဖဲယအိၣ်လၢ လ့တဖၣ် အဖီခိၣ်န့ၣ် ယထံၣ်စိ အဝဲသ့ၣ်,
ဖဲယအိၣ်လၢ တၢ်လူၢ်တဖၣ် အဖီခိၣ်န့ၣ် ယထံၣ်စိ အဝဲသ့ၣ်လီၤ.
အဝဲသ့ၣ် မ့ၢ်ပှၤတကလုာ်လၢ အအိၣ်ဒၣ် အတၢ်ဖဲန့ၣ်,+
အဝဲသ့ၣ် ထံၣ်လီၤအသးလၢ အလီၤဆီန့ၢ်ဒံး ပှၤကလုာ်တဖၣ်လီၤ.+
၁၀ မတၤတဂၤ ဂံၢ်ဝဲ စီၤယၤကိာ် အစၢၤအသွဲၣ်တဖၣ် လၢအအိၣ်အါ ထဲသိးဒီး ဟီၣ်ခိၣ်ကမူၣ်အသိး သ့တဂၤလဲၣ်.+
ဒီးပှၤအံၣ်စရ့လးဖိ လွံၢ်ပူတပူ ဒၣ်လဲာ် မတၤတဂၤဂံၢ်ဝဲ ကသ့လဲၣ်.
မ်ယတၢ်အိၣ်မူ ကတၢၢ် ဒ်အဝဲသ့ၣ်အသိး,
မ်ယသံဒ် ပှၤတီပှၤလိၤ သံဝဲအသိးတက့ၢ်.”
၁၁ စီၤဘၤလး တဲဘၣ် စီၤဘံးလၣ်လၢ “နမၤယၤ ဒ်လဲၣ်ခီလဲၣ်. ယကိးနၤ ဒ်သိး နကဟဲဆိၣ်အၢ ယဒုၣ်ယဒါတဖၣ် ဘၣ်ဆၣ် အိၣ်ဒၣ်ထဲ နဆိၣ်ဂ့ၤ အဝဲသ့ၣ်လီၤ.”+ ၁၂ ဒီးစီၤဘံးလၣ် တဲဆၢအီၤလၢ “ယကြၢးတဲ တၢ်ကိးမံၤဒဲးလၢ ယဟိဝၤယွၤ မၢယတဲ တမ့ၢ်ဧီၤ.”+
၁၃ ဒီးစီၤဘၤလး တဲစီၤဘံးလၣ်လၢ “ဝံသးစူၤ, လဲၤပိာ်ယခံလၢ တၢ်လီၢ်အဂၤတတီၤ ဖဲနထံၣ် အဝဲသ့ၣ်သ့ အလီၢ်န့ၣ်တက့ၢ်. နကထံၣ်ဘၣ် အဝဲသ့ၣ် တနီၤလီၤ. နတထံၣ် အဝဲသ့ၣ် ခဲလၢာ်ဘၣ်. ဖဲန့ၣ်န့ၣ် ဆိၣ်အၢ အဝဲသ့ၣ် လၢယဂီၢ်တက့ၢ်.”+ ၁၄ အဃိ စီၤဘၤလး လဲၤကိးဝဲ စီၤဘံးလၣ်လၢ စိဖံၣ် အတၢ်ပျီပူၤ လၢအအိၣ်လၢ ကစၢၢ် ပံးစကၤ အဒီခိၣ်+ ဒီးတ့ထီၣ်ဝဲ တၢ်လုၢ်လီၢ်နွံဖျၢၣ် ဒီးလုၢ်ထီၣ်ဝဲ ကျီၢ်ဖါတဒု ဒီးသိဖါတဒုလၢ တၢ်လုၢ်လီၢ် တဖျၢၣ်စုာ်စုာ် အဖီခိၣ်လီၤ.+ ၁၅ အဃိ စီၤဘံးလၣ် တဲစီၤဘၤလးလၢ “ယကလဲၤဆဲးကျိးဒီးအီၤ လၢန့ၣ်. မ့မ့ၢ်နၤန့ၣ် အိၣ်လၢ နတၢ်လုၢ်ဒွဲၣ်အူ အကပၤ ဖဲအံၤတက့ၢ်.” ၁၆ ဒီးယဟိဝၤယွၤ ဆဲးကျိးလိာ်သးဒီး စီၤဘံးလၣ် ဒီးတဲဘၣ်အီၤ တၢ်လၢအကဘၣ် တဲဝဲတဖၣ်လီၤ.+ အဝဲတဲဝဲလၢ “က့ၤလၢ စီၤဘၤလးအအိၣ် ဒီးနကဘၣ်တဲအီၤ ဒ်အံၤဒ်နုၤလီၤ.” ၁၇ ဒီးအဝဲ ဟဲက့ၤထံၣ်ဝဲလၢ စီၤဘၤလး ဒီးမိၤအး အပဒိၣ်တဖၣ်လၢ အအိၣ်ဒီးအီၤန့ၣ် အိၣ်ခိးတၢ်လၢ အတၢ်လုၢ်ဒွဲၣ်အူ အကပၤလီၤ. ဒီးစီၤဘၤလး သံကွၢ်အီၤလၢ “ယဟိဝၤယွၤ တဲဝဲဒ်လဲၣ်.” ၁၈ ဒီးစီၤဘံးလၣ် တဲဝဲ တၢ်ကတိၤဒိလၢ+
“စီၤဘၤလးဧၢ, ဆၢထၢၣ် ဒီးဒိကနၣ်ယၤ.
စီၤစံးပိၢ် အဖိခွါဧၢ, ကနၣ်လၢအံၤ.
၁၉ ကစၢ်ယွၤတမ့ၢ် ပှၤကညီတဂၤလၢ အတဲလံၣ်တဲလီတၢ်ဘၣ်+
ဒီးအဝဲတမ့ၢ် ပှၤဟီၣ်ခိၣ်ဖိလၢ အကဘၣ် ပီၢ်ယၢ်လီၤက့ၤ အသးဘၣ်.+
အဝဲ မ့ၢ်တဲတၢ်တမံၤမံၤန့ၣ် အဝဲကမၤဝဲ တမ့ၢ်ဧီၤ.
အဝဲ မ့ၢ်အၢၣ်လီၤန့ၣ် အဝဲကမၤ လၢပှဲၤဝဲ တမ့ၢ်ဧီၤ.+
၂၀ တၢ်ဟဲကိးယၤလၢ ကဆိၣ်ဂ့ၤတၢ် အဂီၢ်လီၤ.
ခဲအံၤန့ၣ် ယွၤဆိၣ်ဂ့ၤဝဲလံ+ ဒီးယက့ၤ ဆီတလဲ တၢ်ဆိၣ်ဂ့ၤအံၤ တန့ၢ်လၢၤဘၣ်.+
၂၁ အဝဲ တဟ့ၣ်အခွဲးလၢ တၢ်အူတၢ်သမူတၢ် အစိကမီၤ တမံၤဂ့ၤတမံၤဂ့ၤ ကမၤဘၣ်ဒိ စီၤယၤကိာ်ဘၣ်.
ဒီးအဝဲ တပျဲဝဲ တၢ်ကီတၢ်ခဲ ကဘၣ် စီၤအံၣ်စရ့လးဘၣ်.
အကစၢ် ယဟိဝၤယွၤန့ၣ် အိၣ်ဒီး အဝဲသ့ၣ်လီၤ.+
ဒီးအဝဲသ့ၣ် ကိးပသူထီၣ်ဝဲလၢ အကလုၢ်ဖးဒိၣ်လၢ အဝဲမ့ၢ် အဝဲသ့ၣ် အစီၤပၤလီၤ.
၂၂ ကစၢ်ယွၤ ဒုးဟးထီၣ် အဝဲသ့ၣ်လၢ ကီၢ်အဲၤကူပတူး အပူၤလီၤ.+
အဝဲ လီၤဂာ်ဒ် ကျီၢ်မံၤအဖါ အနၢၤတဖၣ်လၢ အဝဲသ့ၣ် အဂီၢ်လီၤ.+
၂၃ တၢ်ကၢ်တၢ်ဒွးတၢ် လၢအကမၤဘၣ်ဒိ စီၤယၤကိာ်န့ၣ် တအိၣ် နီတမံၤဘၣ်.+
ဒီးတၢ်ဖး တၢ်ကမၤအသး ခါဆူညါ လၢအကမၤဘၣ်ဒိ စီၤအံၣ်စရ့လးန့ၣ် တအိၣ်နီတမံၤဘၣ်.+
ဘၣ်ဃးဒီး စီၤယၤကိာ် ဒီးစီၤအံၣ်စရ့လးန့ၣ် ခဲအံၤ ပှၤတဲသ့လၢ
‘ကွၢ်တၢ်လၢ ကစၢ်ယွၤ မၤတ့ၢ် ဝဲသၢၤ.’
၂၄ ပှၤဂီၢ်မုၢ် တဒူၣ်အံၤ ကဂဲၤဆၢထၢၣ်ဒ် ခ့ယုၢ်အသိး
ဒီးပှၤဂီၢ်မုၢ်အံၤ ကလီၤဂာ် ဒ်ခ့ယုၢ်အသိးလၢ အဝံၣ်ဆၢထၢၣ် အနီၢ်ကစၢ်အသး,+
ဒီးတချုးလၢ အအီၣ်အဆၣ်
ဒီးအီဝဲ ဆၣ်ဖိကီၢ်ဖိ အသွံၣ်ဒံးဘၣ်န့ၣ် အတမံနီၤဝဲဘၣ်.”
၂၅ စီၤဘၤလး တဲဝဲ စီၤဘံးလၣ်လၢ “နဆိၣ်အၢ အဝဲသ့ၣ် မ့ၢ်တသ့ဘၣ်န့ၣ် နတကြၢး ဆိၣ်ဂ့ၤ အဝဲသ့ၣ် စ့ၢ်ကီးဘၣ်.” ၂၆ ဒီးစီၤဘံးလၣ် တဲဆၢ စီၤဘၤလးလၢ “‘ယကမၤဒ် တၢ်လၢ ယဟိဝၤယွၤ တဲဝဲအသိး ခဲလၢာ်’ န့ၣ် ယတတဲနၤဧီၤ.”+
၂၇ စီၤဘၤလး တဲဝဲ စီၤဘံးလၣ်လၢ “ဝံသးစူၤ, ဟဲဒီး ယကလဲၤကိးနၤ လၢတၢ်လီၢ် အဂၤတတီၤလီၤ. ဘၣ်သ့ၣ်သ့ၣ် ဖဲန့ၣ်န့ၣ် ယွၤလၢ အမ့ၢ်အတီတဂၤ ကထံၣ်ဝဲလၢ နကြၢးဆိၣ်အၢ ပှၤဂီၢ်မုၢ်တဖၣ် လၢယဂီၢ်လီၤ.”+ ၂၈ ဒီးစီၤဘၤလး လဲၤကိး စီၤဘံးလၣ် လၢပဧိၢ် အဒီခိၣ် လၢအမဲာ် ကွၢ်တၢ်လၢ ယံးၡံမိၣ် အပှၢ်မုၢ်ကနၢလီၤ.+ ၂၉ စီၤဘံးလၣ် တဲစီၤဘၤလးလၢ “တ့ထီၣ် တၢ်လုၢ်လီၢ်နွံဖျၢၣ် ဖဲအံၤ ဒီးကတဲာ်ကတီၤထီၣ် ကျီၢ်ဖါနွံဒု ဒီးသိဖါ နွံဒု လၢယဂီၢ်တက့ၢ်.”+ ၃၀ ဒီးစီၤဘၤလး မၤဝဲ ဒ်စီၤဘံးလၣ် တဲအီၤအသိး ဒီးအဝဲ လုၢ်ထီၣ်ဝဲ ကျီၢ်ဖါတဒု ဒီးသိဖါတဒု လၢတၢ်လုၢ်လီၢ် တဖျၢၣ်စုာ်စုာ် အဖီခိၣ်လီၤ.
၂၄ ဖဲစီၤဘံးလၣ် ထံၣ်ဝဲလၢ ယဟိဝၤယွၤ အဲၣ်ဒိး လၢပှၤအံၣ်စရ့လးဖိတဖၣ် ကဘၣ်ဆိၣ်ဂ့ၤအခါ အဝဲ တလဲၤကဒီး ဒ်သိး ကကၢ်တၢ်ဒွးတၢ် အဂီၢ်လၢၤဘၣ်.+ ဘၣ်ဆၣ် အဝဲ ဃၣ်ဃီၤအမဲာ်ဆူ ပှၢ်မုၢ်ကနၢလီၤ. ၂ ဖဲစီၤဘံးလၣ် ကွၢ်ထီၣ်တၢ် ဒီးထံၣ်ဝဲလၢ ပှၤအံၣ်စရ့လးဖိတဖၣ် သူၣ်လီၤအဒဲ ဒ်အဒူၣ်အိၣ်ဝဲ အသိးအခါ+ ကစၢ်ယွၤ အသးစီဆှံလီၤလၢ အလိၤလီၤ.+ ၃ ဒီးစီၤဘံးလၣ်တဲ တၢ်ကတိၤဒိလၢ+
“အဝဲအံၤမ့ၢ် စီၤဘဧိၢ် အဖိခွါ စီၤဘံးလၣ် အတၢ်ကတိၤ,
ပှၤလၢ အမဲာ်ချံ ဘၣ်တၢ်အိးထီၣ်အီၤတဂၤ အတၢ်ကတိၤလီၤ.
၄ ပှၤလၢအနၢ်ဟူဘၣ် ကစၢ်ယွၤ အကလုၢ် တဂၤအံၤ
ထံၣ်ဘၣ်ဝဲ တၢ်ထံၣ်လၢညါခီ လၢအဟဲလၢ သ့တၢ်လၢာ်ကစၢ် အအိၣ်
ဒီးလီၤဃံၢ် ဖဲအမဲာ်ချံ အိးထီၣ်အသးအခါန့ၣ် တဲဝဲလၢ+
၅ အိ စီၤယၤကိာ်ဧၢ, နဒဲတဖၣ် ဃံလၤညါ.
အိ စီၤအံၣ်စရ့လးဧၢ, နတၢ်အိၣ်တၢ်ဆိး အလီၢ်တဖၣ် မ့ၢ်စ့ၢ်ကီး ဒ်န့ၣ်လီၤ.+
၆ နဒဲတဖၣ် ရၤလီၤအသး ဖးယံၤ ဒ်တၢ်တြီၤတဖၣ် အသိး,+
လီၤဂာ်ဒ် ဖီကရၢၢ်တဖၣ် လၢထံကျိကပၤ အသိး,
လီၤဂာ်ဒ် သ့ၣ်တမၣ်ပျ့ၤတဖၣ်လၢ ယဟိဝၤယွၤ သူၣ်လီၤဝဲ အသိး
ဒီးဒ်သ့ၣ်ဆှိအ့ရ့းတဖၣ်လၢ အဘူးဒီး ထံအနံၤ အသိးလီၤ.
၈ ကစၢ်ယွၤ ထုးထီၣ်ကွံာ်အီၤလၢ ကီၢ်အဲၤကူပတူးအပူၤ
ဒီးကစၢ်ယွၤ လီၤဂာ်ဒီး ကျီၢ်မံၤအဖါ အနၢၤတဖၣ်လၢ အဝဲသ့ၣ် အဂီၢ်လီၤ.
ဒီးအဝဲသ့ၣ် ကအီၣ်ကွံာ်ဝဲ ပှၤကလုာ်တဖၣ်လၢ အဆီၣ်တံၢ်မၤနၢၤ အဝဲသ့ၣ်+
ဒီးကအ့ၣ်ဃီၤဝဲ ပှၤတဖၣ်န့ၣ် အဃံ ဒီးမၤဟးဂီၤကွံာ် ပှၤတဖၣ်န့ၣ်လၢ ပျၢ်တဖၣ်လီၤ.
၉ အကိာ်လီၤဝဲ ဒီးမံနီၤဝဲ ဒ်ခ့ယုၢ် အသိးလီၤ.
ဒီးအလီၤဂာ်ဒ် ခ့ယုၢ်အသိး အဃိ မ့ၢ်မတဂၤ မၤသးထီၣ်အီၤ ကဘူၣ်လဲၣ်.
ဒီးပှၤလၢ အဆိၣ်ဂ့ၤနၤန့ၣ် ကဘၣ်တၢ်ဆိၣ်ဂ့ၤအီၤ
ဒီးပှၤလၢ အဆိၣ်အၢနၤန့ၣ် ကဘၣ် တၢ်ဆိၣ်အၢအီၤလီၤ.”+
၁၀ ဖဲန့ၣ်န့ၣ် စီၤဘၤလး အသးပှံၢ်ထီၣ်ဝဲ စီၤဘံးလၣ် ဒိၣ်မးလီၤ. စီၤဘၤလးန့ၣ် ဒဲဆဲးအဲးလီၤ အနီၢ်ကစၢ်အစု ဒီးတဲစီၤဘံးလၣ်လၢ “ယကိးနၤဒ်သိး နကဟဲဆိၣ်အၢ ယဒုၣ်ယဒါတဖၣ်+ ဘၣ်ဆၣ် တၢ်သၢဘျီအံၤ အိၣ်ထဲ နဆိၣ်ဂ့ၤ အဝဲသ့ၣ်လီၤ. ၁၁ က့ၤကွံာ်လၢ နဟံၣ် ခဲအံၤ. ယတိာ်ပာ်လၢ ယကမၤလၤကပီၤနၤ ဒိၣ်ဒိၣ်မုၢ်မုၢ်လီၤ.+ ဘၣ်ဆၣ် ကွၢ်မီၤ ယဟိဝၤယွၤ တြီဝဲ ဒ်သိး နသုတန့ၢ်ဘၣ် တၢ်လၤကပီၤ တဂ့ၤအဂီၢ်လီၤ.”
၁၂ စီၤဘံးလၣ် တဲဝဲ စီၤဘၤလးလၢ “ယတဲပာ်စၢၤ နပှၤစိာ်တၢ်ကစီၣ်ဖိတဖၣ်လံ တမ့ၢ်ဧီၤ, ၁၃ ‘စီၤဘၤလး မ့ၢ်ဟ့ၣ်ယၤ အနီၢ်ကစၢ်အဟံၣ်လၢ အပှဲၤဒီး ထူဒီးစ့ သနာ်က့ ယမၤတၢ်လၢ အဒိၣ်မ့ၢ်ဂ့ၤ အဆံးမ့ၢ်ဂ့ၤ လၢအခါကပာ် ယကစၢ် ယဟိဝၤယွၤ အတၢ်ကတိၤန့ၣ် တသ့နီတမံၤဘၣ်. ယကတဲ ထဲဒၣ် တၢ်လၢ ယဟိဝၤယွၤ မၢယတဲလီၤ.’+ ၁၄ ခဲအံၤ ယကက့ၤလၢ ယပှၤကလုာ်အအိၣ်လီၤ. ဟဲ, ယကတဲဘၣ်နၤ ဘၣ်ဃးဒီး ခါဆူညါန့ၣ် ပှၤတကလုာ်အံၤ ကမၤဝဲ နပှၤကလုာ် ဒ်လဲၣ်န့ၣ်လီၤ.” ၁၅ ဒီးစီၤဘံးလၣ်တဲ တၢ်ကတိၤဒိလၢ+
“အဝဲအံၤမ့ၢ် စီၤဘဧိၢ် အဖိခွါ စီၤဘံးလၣ် အတၢ်ကတိၤ,
ပှၤလၢ အမဲာ်ချံ ဘၣ်တၢ်အိးထီၣ်အီၤတဂၤ အတၢ်ကတိၤလီၤ.+
၁၆ ပှၤလၢအနၢ်ဟူဘၣ် ကစၢ်ယွၤ အကလုၢ် တဂၤအံၤ,
ပှၤလၢအအိၣ်ဒီး တၢ်သ့ၣ်ညါလၢ တၢ်ထီကတၢၢ်တဂၤ ဟ့ၣ်လီၤဝဲ
ဒီးထံၣ်ဘၣ်ဝဲ တၢ်ထံၣ်လၢညါခီ လၢအဟဲလၢ သ့တၢ်လၢာ်ကစၢ် အအိၣ်
ဒီးလီၤဃံၢ် ဖဲအမဲာ်ချံ အိးထီၣ်အသးအခါန့ၣ် တဲဝဲလၢ
၁၇ ယကထံၣ်ဘၣ်အီၤ ဘၣ်ဆၣ် တမ့ၢ်ခဲအံၤဘၣ်.
ယကကွၢ်အီၤ ဘၣ်ဆၣ် အတဘူးထီၣ်ဒံးဘၣ်.
ဆၣ်တဖျၢၣ်+ ကဟဲထီၣ်လၢ ယၤကိာ်အအိၣ်
ဒီးဘီမုၢ် အနီၣ်ထိးဘိန့ၣ်+ ကဟဲထီၣ်လၢ အံၣ်စရ့လး အအိၣ်+
ဒီးအဝဲ ကတီၢ်သ့ၣ်ဖး မိၤအး အခိၣ် တိသၣ်+
ဒီးပှၤလၢ အစုဆူၣ်ခီၣ်တကးတဖၣ် အခိၣ်သၣ်ဃံလီၤ.
၁၈ အဝဲ ကဟံးန့ၢ် ကီၢ်အဒိၣ် ဒ်အတၢ်အသိး,+
မ့ၢ်လံ, စီၤစ့ဧၢ်+ အဒုၣ်အဒါ ကဟံးန့ၢ်အီၤ ဒ်အတၢ်အသိး,+
ဖဲပှၤအံၣ်စရ့လးဖိ ပာ်ဖျါထီၣ် တၢ်သးဒူအခါလီၤ.
၁၉ ပှၤလၢ အမၤနၢၤတၢ်တဂၤ ကဟဲထီၣ်လၢ ယၤကိာ်အကျါ+
ဒီးပှၤလၢ အပူၤဖျဲးထီၣ်လၢ ဝ့ၢ်ပူၤန့ၣ် အဝဲ ကမၤဟးဂီၤဝဲလီၤ.”
၂၀ ဖဲစီၤဘံးလၣ် ထံၣ်ဝဲ ပှၤဧမၤလ့းဖိတဖၣ်အခါ အဝဲ ဆဲးတဲဝဲ တၢ်ကတိၤဒိလၢ
“လၢပှၤကလုာ်တဖၣ် အကျါန့ၣ် ပှၤဧမၤလ့းဖိ မ့ၢ်ပှၤအဆိကတၢၢ် တဒူၣ်*+
ဘၣ်ဆၣ် လၢခံကတၢၢ်န့ၣ် အကတုၤလၢ တၢ်ဟးဂီၤလီၤ.”+
၂၁ ဖဲစီၤဘံးလၣ်ထံၣ်ဝဲ ပှၤက့ၣ်ဖိအခါ+ အဝဲ ဆဲးတဲဝဲ တၢ်ကတိၤဒိလၢ
“နအိၣ်အလီၢ်န့ၣ် အိၣ်ဝဲ ဘံၣ်ဘံၣ်ဘၢဘၢ ဒီးနတၢ်အိၣ်တၢ်ဆိး အလီၢ်န့ၣ် အိၣ်ဝဲလၢ လ့ဖးထီ အလိၤလီၤ.
၂၂ ဘၣ်ဆၣ် ပှၤတဂၤ ကဒွဲၣ်အူထီၣ်ကွံာ် ပှၤက့ၣ်ဖိတဖၣ်လီၤ.
တချုးလၢ ပှၤအၤၡူၢ်ဖိ က့ၤဖီၣ်သုဒံးဘၣ်န့ၣ် တၢ်ဆၢကတီၢ် ကယံာ်ဒံး ထဲလဲၣ်.”
၂၃ အဝဲ ဆဲးတဲဝဲ တၢ်ကတိၤဒိလၢ
“ကလီၤသးအုး ထဲလဲၣ်. ဖဲကစၢ်ယွၤ မၤဒ်န့ၣ်အခါ မ့ၢ်မတဂၤ ကပူၤဖျဲး ဒံးလဲၣ်.
၂၄ ကဘီတဖၣ် ကအိၣ်ဟဲလၢ ကံတံၣ်အကၢၢ်နံၤ+
ဒီးကမၤနးမၤဖှီၣ် ပှၤအၤၡူၢ်ဖိ သပှၢ်ကတၢၢ်+
ဒီးကမၤနးမၤဖှီၣ် ပှၤဧၤဘ့ၢ်ဖိ သပှၢ်ကတၢၢ်
ဘၣ်ဆၣ် လၢခံန့ၣ် အဝဲစ့ၢ်ကီး ကတုၤလၢ တၢ်ဟးဂီၤလီၤ.”
၂၅ ဒီးစီၤဘံးလၣ်+ ဟးထီၣ် ဒီးက့ၤဝဲလၢ အလီၢ်လီၤ. ဒီးစီၤဘၤလး စ့ၢ်ကီး က့ၤလၢ အကျဲဒၣ်ဝဲလီၤ.
၂၅ ဖဲပှၤအံၣ်စရ့လးဖိတဖၣ် အိၣ်ဝဲလၢ ၡံးတံၣ်အခါ+ ပှၤဂီၢ်မုၢ်တဖၣ် မၤကမၣ်မုၣ်ကမၣ်ခွါဒီး ပှၤမိၤအးမုၣ်တဖၣ်လီၤ.+ ၂ ပှၤပိာ်မုၣ်တဖၣ်အံၤ ကွဲမုာ်ဝဲ ပှၤအံၣ်စရ့လးဖိတဖၣ်လၢ ကလဲၤပိာ်အခံ ဖဲအဝဲသ့ၣ် လုၢ်ထီၣ်တၢ်လၢ အယွၤတဖၣ်အအိၣ် အခါလီၤ.+ ဒီးပှၤအံၣ်စရ့လးဖိတဖၣ် အီၣ်ဝဲတၢ်လုၢ် ဒီးဘူၣ်ထီၣ်ဘါထီၣ်ဝဲ အဝဲသ့ၣ် အယွၤတဖၣ်လီၤ.+ ၃ ဒီးပှၤအံၣ်စရ့လးဖိတဖၣ် ပၣ်ဃုာ်လၢ တၢ်ဘူၣ်ထီၣ်ဘါထီၣ် ဘဧၤလးပဧိၢ် အကျါလီၤ.+ အဃိ ယဟိဝၤယွၤ သးဒိၣ်ထီၣ် ပှၤအံၣ်စရ့လးဖိတဖၣ်လီၤ. ၄ ယဟိဝၤယွၤ တဲစီၤမိၤၡ့လၢ “ဒ်သိး ယဟိဝၤယွၤ အတၢ်သးဒိၣ်ထီၣ် ကလီၤမၢ်ကွံာ်လၢ ပှၤအံၣ်စရ့လးဖိ အဖီခိၣ်အဂီၢ် ဖီၣ်န့ၢ် ပှၤသ့ၣ်တဖၣ်အံၤ အခိၣ်အနၢ် ကိးဂၤဒဲး ဒီးဘျးထီၣ် အဝဲသ့ၣ်လၢ ယဟိဝၤယွၤ အမဲာ်ညါ ဖဲမုၢ်ဆါခီ အဆၢကတီၢ် န့ၣ်တက့ၢ်.” ၅ ဒီးစီၤမိၤၡ့န့ၣ် တဲဘၣ် ပှၤအံၣ်စရ့လးဖိ အစံၣ်ညီၣ်ကွီၢ်တဖၣ်လၢ+ “သုဝဲ တဂၤစုာ်စုာ်န့ၣ် သုကဘၣ်မၤသံကွံာ် သုပှၤတဖၣ်လၢ အဘူၣ်ထီၣ်ဘါထီၣ် ဘဧၤလးပဧိၢ်လီၤ.”+
၆ ဖဲန့ၣ်အခါ ပှၤအံၣ်စရ့လးဖိ ဟီၣ်ဝဲလၢ တၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒီးအံၣ်စရ့လးပိာ်ခွါတဂၤ ဟဲက့ၤကိးဝဲ မံးဒယၣ်မုၣ်တဂၤ+ လၢဒဲကဝီၤပူၤ လၢစီၤမိၤၡ့ ဒီးပှၤအံၣ်စရ့လးဖိ ခဲလၢာ် အမဲာ်ညါလီၤ. ၇ ဖဲပှၤလုၢ်တၢ်ဒိၣ် စီၤအၤဟရိၣ် အလံၤခွါ စီၤဖံၤနဃၣ်+ လၢအမ့ၢ် စီၤအလၤဧစၢ် အဖိခွါ ထံၣ်ဝဲအခါ အဝဲ ဟးထီၣ်ဝဲလၢ ပှၤဂီၢ်မုၢ်အကျါ တဘျီဃီ ဒီးဟံးထီၣ် ဘီတဘ့ၣ် လၢအစုပူၤလီၤ. ၈ ဒီးအဝဲ လဲၤလူၤပိာ်ဝဲ အံၣ်စရ့လးပိာ်ခွါ တဂၤန့ၣ်အခံလၢ ဒဲပူၤဒီးဆဲးဖျိ အဝဲသ့ၣ် ခံဂၤလၢာ်လီၤ. အဝဲဆဲးဝဲ အံၣ်စရ့လးပိာ်ခွါ တဂၤန့ၣ် ဒီးဆဲးဖျိ ပိာ်မုၣ်န့ၣ်လၢ အဒၢလီၢ်န့ၣ်လီၤ.* ဖဲန့ၣ်အခါ တၢ်ဆါသံသတြိာ်လၢ အလီၤဘၣ် ပှၤအံၣ်စရ့လးဖိတဖၣ်န့ၣ် ပတုာ်ကွံာ်ဝဲလီၤ.+ ၉ ဒီးပှၤလၢ အသံလၢ တၢ်ဆါသံသတြိာ် အဃိန့ၣ် အိၣ်ဝဲအဂၤ ၂၄,၀၀၀ လီၤ.+
၁၀ ဒီးယဟိဝၤယွၤ တဲစီၤမိၤၡ့လၢ ၁၁ “ပှၤလုၢ်တၢ်ဒိၣ် စီၤအၤဟရိၣ် အလံၤခွါ စီၤဖံၤနဃၣ်+ လၢအမ့ၢ် စီၤအလၤဧစၢ် အဖိခွါ မၤလီၤမၢ်ဝဲ ယတၢ်သးဒိၣ်လၢ ပှၤအံၣ်စရ့လးဖိတဖၣ် အဖီခိၣ် မ့ၢ်လၢ အတတူၢ်လိာ်ဝဲ တၢ်လၢ အထီဒါယၤ လၢအဝဲသ့ၣ်အကျါ နီတစဲးဘၣ် အဃိလီၤ.+ ယမၤလိာ်လၢ ပှၤကဘၣ်တီဒီးယၤ လၢသးဒီဖျၢၣ် ဘၣ်ဆၣ် ခီဖျိလၢ အဝဲ မၤဒ်န့ၣ်အဃိ ယတမၤဟးဂီၤကွံာ် ပှၤအံၣ်စရ့လးဖိ ခဲလၢာ်ဘၣ်.+ ၁၂ လၢတၢ်န့ၣ်အဃိ တဲအီၤလၢ ‘ယကမၤ တၢ်အၢၣ်လီၤအီလီၤဒီးအီၤ လၢအဘၣ်ဃးဒီး တၢ်မုာ်တၢ်ခုၣ်လီၤ. ၁၃ မ့ၢ်လၢ အတတူၢ်လိာ်ဝဲ တၢ်လၢအထီဒါ ကစၢ်ယွၤဘၣ်+ ဒီးအမၤဘၣ်လိာ်ဖိးဒ့က့ၤတၢ်လၢ ပှၤအံၣ်စရ့လးဖိအဂီၢ် အဃိ တၢ်အၢၣ်လီၤအီလီၤအံၤ ကမ့ၢ် တၢ်အၢၣ်လီၤအီလီၤလၢ အဝဲ ဒီးအစၢၤအသွဲၣ် သ့ၣ်တဖၣ် ကကဲဘၣ် ပှၤလုၢ်တၢ်ဒိၣ် လၢတၢ်ဆၢကတီၢ် ဖးယံာ်လီၤ.’”+
၁၄ အံၣ်စရ့လးပိာ်ခွါ လၢအဘၣ် တၢ်မၤသံအီၤ တပူၤဃီဒီး မံးဒယၣ်မုၣ် တဂၤန့ၣ် အမံၤမ့ၢ်ဝဲ စီၤစံၣ်ရံၤ ဒီးအပၢ် အမံၤမ့ၢ်ဝဲ စီၤစၤလူလီၤ. စီၤစံၣ်ရံၤ မ့ၢ်ဝဲ စူၤမ့းအိၣ် အဒူၣ် အခိၣ်အနၢ်တဂၤလီၤ. ၁၅ မံးဒယၣ်မုၣ် လၢအဘၣ် တၢ်မၤသံအီၤန့ၣ် အမံၤမ့ၢ်ဝဲ နီၢ်ကးစဘံၤ ဒီးအပၢ် အမံၤမ့ၢ်ဝဲ စီၤစူၢ်လီၤ.+ စီၤစူၢ်န့ၣ် မ့ၢ်ဝဲ ပှၤမံးဒယၣ်ဖိ အဒူၣ်တဒူၣ် အခိၣ်အနၢ် တဂၤလီၤ.+
၁၆ လၢခံ ယဟိဝၤယွၤ တဲစီၤမိၤၡ့လၢ ၁၇ “မၤကိၢ်မၤဂီၤ ပှၤမံးဒယၣ်ဖိတဖၣ် ဒီးမၤသံ အဝဲသ့ၣ်,+ ၁၈ မ့ၢ်လၢ အဝဲသ့ၣ် မၤကိၢ်မၤဂီၤသု ဖဲအဝဲသ့ၣ် ကွဲန့ၢ်လွဲန့ၢ်သု လၢသုကမၤ တၢ်ဒဲးဘးလၢ အဘၣ်ဃးဒီးပဧိၢ် အခါလီၤ.+ ဒီးအဝဲသ့ၣ် ကွဲန့ၢ်လွဲန့ၢ်သုလၢ သုကမၤ တၢ်ဒဲးဘး ခီဖျိ မံးဒယၣ် အခိၣ်အနၢ်တဂၤ အဖိမုၣ် နီၢ်ကးစဘံၤ လၢအဘၣ် တၢ်မၤသံအီၤ+ ဖဲတၢ်ဆါသံသတြိာ် အမုၢ်နံၤလၢ အဘၣ်ဃးဒီး ပဧိၢ်အဃိလီၤ.”+
၂၆ တၢ်ဆါသံသတြိာ် ကတၢၢ်ဝံၤအလီၢ်ခံ+ ယဟိဝၤယွၤ တဲဘၣ် စီၤမိၤၡ့ ဒီးပှၤလုၢ်တၢ်ဒိၣ် စီၤအၤဟရိၣ် အဖိခွါ စီၤအလၤဧစၢ်လၢ ၂ “ပှၤအံၣ်စရ့လးဖိခဲလၢာ် လၢအသးနံၣ်အိၣ် ၂၀ ဒီးဆူအဖီခိၣ် ဒီးပှၤခဲလၢာ်လၢ အကဲသုးလၢ အံၣ်စရ့လးအပူၤသ့န့ၣ် ထၢအဝဲသ့ၣ် အနီၣ်ဂံၢ် ဒ်အဒူၣ် အိၣ်ဝဲအသိးတက့ၢ်.”+ ၃ အဃိ စီၤမိၤၡ့ ဒီးပှၤလုၢ်တၢ်ဒိၣ် စီၤအလၤဧစၢ်+ တဲတၢ်ဒီး အဝဲသ့ၣ် လၢကီၢ်မိၤအး အပှၢ်မုၢ်ကနၢ+ လၢအအိၣ်လၢ ထံကျိယၢ်ဒ့ၣ်အဃၢၤ လၢအဘူးဒီး ဝ့ၢ်ယရံၤဃိလီၤ.+ ဒီးတဲဝဲလၢ ၄ “ပှၤလၢအသးအိၣ် ၂၀ ဒီးဆူအဖီခိၣ်န့ၣ် ထၢအဝဲသ့ၣ် အနီၣ်ဂံၢ် ဒ်ယဟိဝၤယွၤ မၤလိာ် စီၤမိၤၡ့ အသိးတက့ၢ်.”+
ပှၤအံၣ်စရ့လးဖိလၢ အဟးထီၣ်လၢ ကီၢ်အဲၤကူပတူးအပူၤန့ၣ် မ့ၢ်ဝဲပှၤလၢ အဘၣ်တၢ် ပာ်ဖျါထီၣ်အီၤ လၢလာ်လီၤ. ၅ လၢစီၤအံၣ်စရ့လး အဖိဝဲၢ်ကိ စီၤရူၤဘ့ၣ်+ အဒူၣ်ကျါန့ၣ် ပၣ်ဃုာ်ဒီး စီၤရူၤဘ့ၣ် အဖိခွါတဖၣ် အစၢၤအသွဲၣ်+ လၢအမ့ၢ် စီၤဃနိး အစၢၤအသွဲၣ်, စီၤပးလူ အစၢၤအသွဲၣ်, ၆ စီၤဃ့ၤစရိၣ် အစၢၤအသွဲၣ်, စီၤကၢ်မံၤ အစၢၤအသွဲၣ်လီၤ. ၇ ပှၤတဖၣ်န့ၣ် မ့ၢ်ဝဲ ပှၤရူၤဘ့ၣ်ဖိ အဒူၣ်ဖိထၢဖိတဖၣ် ဒီးလၢအဝဲသ့ၣ် အကျါန့ၣ် ပှၤလၢအမံၤ ဘၣ်တၢ်ထၢနုာ်အီၤ အိၣ်ဝဲအဂၤ ၄၃,၇၃၀ လီၤ.+
၈ စီၤပးလူ အဖိခွါမ့ၢ်ဝဲ စီၤအလံအာ်လီၤ. ၉ စီၤအလံအာ် အဖိခွါတဖၣ်န့ၣ် မ့ၢ်ဝဲ စီၤနမူၤအ့လး, စီၤဒၤသၣ် ဒီးစီၤအဘံရၣ်လီၤ. စီၤဒၤသၣ် ဒီးစီၤအဘံရၣ်န့ၣ် မ့ၢ်ပှၤလၢ အဘၣ် တၢ်ဃုထၢထီၣ် တ့ၢ်အီၤလၢ တၢ်အိၣ်ဖှိၣ် အကျါလီၤ. အဝဲသ့ၣ်န့ၣ် အိၣ်ဃူ စီၤကိၤရး ဒီးအပှၤတဖၣ်+ ဒီးထီဒါဝဲ စီၤမိၤၡ့+ ဒီးစီၤအၤဟရိၣ် ဒီးယဟိဝၤယွၤလီၤ.+
၁၀ ဒီးဟီၣ်ခိၣ် အိးထီၣ်အသး ဒီးယူၢ်လီၤကွံာ် အဝဲသ့ၣ်လီၤ. မ့မ့ၢ်စီၤကိၤရး ဒီးပှၤလၢ အအိၣ်ဃူအီၤအဂၤ ၂၅၀ န့ၣ် မ့ၣ်အူအီၣ်သံကွံာ် အဝဲသ့ၣ်လီၤ.+ ဒီးအဝဲသ့ၣ် အဒိအတဲာ်န့ၣ် ကဲထီၣ် တၢ်ဟ့ၣ်ပလီၢ် လၢပှၤဂၤအဂီၢ်လီၤ.+ ၁၁ ဘၣ်ဆၣ် စီၤကိၤရး အဖိခွါတဖၣ်န့ၣ် တသံဘၣ်.+
၁၂ မ့မ့ၢ်လၢ စီၤစူၤမ့းအိၣ် အဒူၣ်ကျါန့ၣ် ပၣ်ဃုာ်ဒီး စူၤမ့းအိၣ် အဖိခွါတဖၣ်+ အစၢၤအသွဲၣ် လၢအမ့ၢ် စီၤနမူၤအ့လး အစၢၤအသွဲၣ်, စီၤယၤမံၣ် အစၢၤအသွဲၣ်, စီၤယၤကံၣ် အစၢၤအသွဲၣ်, ၁၃ စီၤစ့ရၤ အစၢၤအသွဲၣ် ဒီးစီၤၡီအူး အစၢၤအသွဲၣ်လီၤ. ၁၄ ပှၤတဖၣ်န့ၣ်မ့ၢ် ပှၤစူၤမ့းအိၣ်ဖိ အဒူၣ်ဖိထၢဖိတဖၣ် ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၂၂,၂၀၀ လီၤ.+
၁၅ လၢစီၤကးအဒူၣ်ကျါန့ၣ် ပၣ်ဃုာ်ဒီး စီၤကးအဖိခွါတဖၣ်+ အစၢၤအသွဲၣ် လၢအမ့ၢ် စီၤစဖိၣ် အစၢၤအသွဲၣ်, စီၤဃးကံၤ အစၢၤအသွဲၣ်, စီၤၡူနံၤ အစၢၤအသွဲၣ်, ၁၆ စီၤအီးစနံၤ အစၢၤအသွဲၣ်, စီၤဧ့ရံၤ အစၢၤအသွဲၣ်, ၁၇ စီၤအရိး အစၢၤအသွဲၣ် ဒီးစီၤအၤအ့ၤလံ အစၢၤအသွဲၣ်လီၤ. ၁၈ ပှၤတဖၣ်န့ၣ်မ့ၢ် ပှၤကးဖိ အဒူၣ်ဖိထၢဖိတဖၣ် ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၄၀,၅၀၀ လီၤ.+
၁၉ စီၤယူဒၤ အဖိခွါတဖၣ်န့ၣ်+ မ့ၢ်ဝဲ စီၤအ့ၢ် ဒီးစီၤအိၤနၣ်လီၤ.+ ဘၣ်ဆၣ် စီၤအ့ၢ် ဒီးစီၤအိၤနၣ်န့ၣ် သံဝဲလၢ ကီၢ်ကနၤဧၣ် အပူၤလီၤ.+ ၂၀ အဃိ လၢစီၤယူဒၤအဒူၣ်ကျါန့ၣ် ပၣ်ဃုာ်ဒီး စီၤယူဒၤ အဖိခွါတဖၣ် အစၢၤအသွဲၣ် လၢအမ့ၢ် စီၤစ့ၤလါ+ အစၢၤအသွဲၣ်, စီၤဖ့ၤရ့း+ အစၢၤအသွဲၣ် ဒီးစီၤစ့ရၤ+ အစၢၤအသွဲၣ်လီၤ. ၂၁ ဒီးစီၤဖ့ၤရ့း အဖိခွါတဖၣ် အစၢၤအသွဲၣ်န့ၣ် မ့ၢ်ဝဲ စီၤဃ့ၤစရိၣ်+ အစၢၤအသွဲၣ် ဒီးစီၤဃမူ+ ဒီးအစၢၤအသွဲၣ်လီၤ. ၂၂ ပှၤတဖၣ်န့ၣ်မ့ၢ် စီၤယူဒၤ အဒူၣ်ဖိထၢဖိတဖၣ် ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၇၆,၅၀၀ လီၤ.+
၂၃ လၢစီၤယံးစၣ်ကၢ် အဒူၣ်ကျါန့ၣ် ပၣ်ဃုာ်ဒီး စီၤယံးစၣ်ကၢ် အဖိခွါတဖၣ်+ အစၢၤအသွဲၣ် လၢအမ့ၢ် စီၤတိလၤ+ အစၢၤအသွဲၣ်, စီၤဖူဝၤ အစၢၤအသွဲၣ်, ၂၄ စီၤယၤၡူာ် ဒီးအစၢၤအသွဲၣ် ဒီးစီၤၡံးမရိၣ် ဒီးအစၢၤအသွဲၣ်လီၤ. ၂၅ ပှၤတဖၣ်န့ၣ်မ့ၢ် ပှၤယံးစၣ်ကၢ်ဖိ အဒူၣ်ဖိထၢဖိတဖၣ် ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၆၄,၃၀၀ လီၤ.+
၂၆ လၢစီၤစဘူလိၣ် အဒူၣ်ကျါန့ၣ် ပၣ်ဃုာ်ဒီး စီၤစဘူလိၣ် အဖိခွါတဖၣ်+ အစၢၤအသွဲၣ် လၢအမ့ၢ် စီၤစ့ရ့း အစၢၤအသွဲၣ်, စီၤအ့လိၣ် အစၢၤအသွဲၣ် ဒီးစီၤယၤလအ့လး အစၢၤအသွဲၣ်လီၤ. ၂၇ ပှၤတဖၣ်န့ၣ်မ့ၢ် ပှၤစဘူလိၣ်ဖိ အဒူၣ်ဖိထၢဖိတဖၣ် ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၆၀,၅၀၀ လီၤ.+
၂၈ ဒီးလၢစီၤယိၤသး အဒူၣ်ဖိထၢဖိတဖၣ်အကျါန့ၣ် ပၣ်ဃုာ်ဒီး စီၤယိၤသးအဖိခွါတဖၣ်+ လၢအမ့ၢ် စီၤမနၤၡ့ၤ ဒီးစီၤအ့ဖရဲၣ် အစၢၤအသွဲၣ်လီၤ.+ ၂၉ စီၤမနၤၡ့ၤ အဖိခွါ အစၢၤအသွဲၣ်န့ၣ်+ မ့ၢ်ဝဲ စီၤမၤကံၢ် အစၢၤအသွဲၣ်တဖၣ်လီၤ. စီၤမၤကံၢ်+ န့ၣ်အဖိခွါမ့ၢ်ဝဲ စီၤကံးလဧး+ ဒီးပှၤကံးလဧးဖိ အဒူၣ်ဖိထၢဖိ ဟဲလီၤစၢၤလၢ စီၤကံးလဧးလီၤ. ၃၀ စီၤကံးလဧး အဖိခွါတဖၣ် အစၢၤအသွဲၣ်န့ၣ် မ့ၢ်ဝဲ စီၤအံစ့ၢ် အစၢၤအသွဲၣ်, စီၤဃ့လ့း အစၢၤအသွဲၣ်, ၃၁ စီၤအးစရံၤအ့လး အစၢၤအသွဲၣ်, စီၤၡက့ၣ် အစၢၤအသွဲၣ်, ၃၂ စီၤၡမံဒၤ အစၢၤအသွဲၣ် ဒီးစီၤဃ့ဖ့ၢ် အစၢၤအသွဲၣ်လီၤ. ၃၃ မ့မ့ၢ် စီၤဃ့ဖ့ၢ် အဖိခွါ စီၤစလၤဖဃးန့ၣ် အဖိခွါ တအိၣ်နီတဂၤဘၣ်.+ စီၤစလၤဖဃး အဖိမုၣ်တဖၣ်န့ၣ်+ အမံၤမ့ၢ်ဝဲ နီၢ်မၤလၤ, နီၢ်နိဧၤ, နီၢ်ဃၤကလၤ, နီၢ်မံးလကၤ ဒီးနီၢ်တံးရစၢ်လီၤ. ၃၄ ပှၤတဖၣ်န့ၣ်မ့ၢ် စီၤမနၤၡ့ၤ အဒူၣ်ဖိထၢဖိတဖၣ် ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၅၂,၇၀၀ လီၤ.+
၃၅ လၢစီၤအ့ဖရဲၣ် အဒူၣ်ကျါန့ၣ် ပၣ်ဃုာ်ဒီး စီၤအ့ဖရဲၣ် အဖိခွါတဖၣ်+ အစၢၤအသွဲၣ် လၢအမ့ၢ် စီၤၡူၤသ့လၤ+ အစၢၤအသွဲၣ်, စီၤဘ့က့ၢ် အစၢၤအသွဲၣ် ဒီးစီၤတၤဃၣ် အစၢၤအသွဲၣ်လီၤ. ၃၆ စီၤၡူၤသ့လၤ အဖိခွါ အစၢၤအသွဲၣ်န့ၣ် မ့ၢ်ဝဲ စီၤဧ့ရၣ် အစၢၤအသွဲၣ်လီၤ. ၃၇ ပှၤတဖၣ်န့ၣ်မ့ၢ် ပှၤအ့ဖရဲၣ်ဖိ အဒူၣ်ဖိထၢဖိတဖၣ် ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၃၂,၅၀၀ လီၤ.+ ပှၤသ့ၣ်တဖၣ်န့ၣ် မ့ၢ်ဝဲ စီၤယိၤသး အဖိခွါတဖၣ် အစၢၤအသွဲၣ် ဒ်အဒူၣ်တဖၣ် အိၣ်ဝဲအသိးလီၤ.
၃၈ လၢစီၤဘံၣ်ယၤမံၣ် အဒူၣ်ကျါန့ၣ် ပၣ်ဃုာ်ဒီး စီၤဘံၣ်ယၤမံၣ် အဖိခွါတဖၣ်+ အစၢၤအသွဲၣ် လၢအမ့ၢ် စီၤဘ့လၤ+ အစၢၤအသွဲၣ်, စီၤအၤၡဘ့လး အစၢၤအသွဲၣ်, စီၤအဃံရၣ် အစၢၤအသွဲၣ်, ၃၉ စီၤၡဖူဖၣ် အစၢၤအသွဲၣ်, စီၤဃူဖၣ် အစၢၤအသွဲၣ်လီၤ. ၄၀ စီၤဘ့လၤ အဖိခွါတဖၣ် အစၢၤအသွဲၣ်န့ၣ် မ့ၢ်ဝဲ စီၤအၤရး အစၢၤအသွဲၣ် ဒီးစီၤနဧၤမၣ်+ အစၢၤအသွဲၣ်လီၤ. ၄၁ ပှၤတဖၣ်န့ၣ်မ့ၢ် စီၤဘံၣ်ယၤမံၣ် အဖိခွါတဖၣ် ဒ်အဒူၣ်ဖိထၢဖိ အိၣ်ဝဲအသိး ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၄၅,၆၀၀ လီၤ.+
၄၂ လၢဒၣ် အဒူၣ်ကျါန့ၣ် ပၣ်ဃုာ်ဒီး စီၤဒၣ် အဖိခွါ+ စီၤၡူဃၣ် အစၢၤအသွဲၣ်တဖၣ်လီၤ. ပှၤတဖၣ်န့ၣ် မ့ၢ်ဝဲ စီၤဒၣ် အဒူၣ်ဖိထၢဖိတဖၣ်လီၤ. ၄၃ စီၤၡူဃၣ် အစၢၤအသွဲၣ် လၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲ ခဲလၢာ်ခဲဆ့အဂၤ ၆၄,၄၀၀ လီၤ.+
၄၄ လၢစီၤအၤၡ့ၢ် အဒူၣ်ကျါန့ၣ် ပၣ်ဃုာ်ဒီး စီၤအၤၡ့ၢ် အဖိခွါတဖၣ်+ အစၢၤအသွဲၣ် လၢအမ့ၢ် စီၤယံးမနၤ အစၢၤအသွဲၣ်, စီၤယံးၡဝံၤ အစၢၤအသွဲၣ်, စီၤဘရံဧၤ အစၢၤအသွဲၣ်လီၤ. ၄၅ စီၤဘရံဧၤ အဖိခွါတဖၣ် အစၢၤအသွဲၣ်န့ၣ် ပၣ်ဃုာ်ဒီး စီၤဃ့ဘ့ၢ် အစၢၤအသွဲၣ် ဒီးစီၤမးလကံၤအ့လး အစၢၤအသွဲၣ်လီၤ. ၄၆ စီၤအၤၡ့ၢ် အဖိမုၣ်န့ၣ် အမံၤမ့ၢ် နီၢ်စ့ရၤလီၤ. ၄၇ ပှၤတဖၣ်န့ၣ်မ့ၢ် ပှၤအၤၡ့ၢ်ဖိ အဒူၣ်ဖိထၢဖိတဖၣ် ဒီးပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၅၃,၄၀၀ လီၤ.+
၄၈ လၢစီၤနးသၤလံ အဒူၣ်ကျါန့ၣ် ပၣ်ဃုာ်ဒီး စီၤနးသၤလံ အဖိခွါတဖၣ်+ အစၢၤအသွဲၣ် လၢအမ့ၢ် စီၤယၤစအ့လး အစၢၤအသွဲၣ်, စီၤကူနံၤ အစၢၤအသွဲၣ်, ၄၉ စီၤယ့စ့ၢ် အစၢၤအသွဲၣ် ဒီးစီၤၡံးလ့ၣ် အစၢၤအသွဲၣ်လီၤ. ၅၀ ပှၤတဖၣ်န့ၣ်မ့ၢ် ပှၤနးသၤလံဖိ အဒူၣ်ဖိထၢဖိတဖၣ် ဒီးလၢ အဝဲသ့ၣ်အကျါ ပှၤလၢအမံၤ ဘၣ်တၢ်ထၢနုာ်အီၤန့ၣ် အိၣ်ဝဲအဂၤ ၄၅,၄၀၀ လီၤ.+
၅၁ ပှၤအံၣ်စရ့လးဖိလၢ အမံၤ ဘၣ်တၢ်ထၢနုာ်အီၤန့ၣ် အိၣ်ဝဲ ခဲလၢာ်ခဲဆ့အဂၤ ၆၀၁,၇၃၀ လီၤ.+
၅၂ ဝံၤဒီး ယဟိဝၤယွၤ တဲစီၤမိၤၡ့လၢ ၅၃ “နီၤဖးလီၤ ထံကီၢ်လၢ ပှၤသ့ၣ်တဖၣ်န့ၣ် အအိၣ်လၢ အဝဲသ့ၣ် အတၢ်န့ၢ်သါအဂီၢ် ဒ်ပှၤမံၤပှၤသၣ် အစရီ အိၣ်ဝဲအသိးတက့ၢ်.”*+ ၅၄ ဒ်ပှၤလၢ အဘၣ်တၢ်ထၢအီၤ အနီၣ်ဂံၢ် အိၣ်ဝဲအသိး ပှၤအဒူၣ် တဒူၣ်စုာ်စုာ်န့ၣ် ကဘၣ်န့ၢ် အတၢ်န့ၢ်သါ ထဲန့ၣ်လီၤ.+ အဃိ ပှၤအဒူၣ်လၢ အနီၣ်ဂံၢ်အါန့ၣ် နကဘၣ်ဟ့ၣ် တၢ်န့ၢ်သါအါ ဒီးပှၤအဒူၣ်လၢ အနီၣ်ဂံၢ်စှၤန့ၣ် နကဘၣ်ဟ့ၣ် တၢ်န့ၢ်သါ စှၤလီၤ. ၅၅ ဘၣ်ဆၣ် ထံကီၢ်န့ၣ် ကဘၣ်တၢ်နီၤလီၤအီၤ ခီဖျိလၢ တၢ်ဖးလီၤ.+ ဝံၤဒီး ဟံၣ်ဖိဃီဖိ တဒူၣ်စုာ်စုာ်န့ၣ် ကဒိးန့ၢ်ဘၣ် ဟီၣ်ခိၣ်လၢ အပှၤအဒူၣ် အတၢ်န့ၢ်သါ အကျါလီၤ. ၅၆ ပှၤအဒူၣ်လၢ အဒိၣ်မ့ၢ်ဂ့ၤ ပှၤအဒူၣ်လၢ အဆံးမ့ၢ်ဂ့ၤ အတၢ်န့ၢ်သါန့ၣ် ကဘၣ်တၢ်နီၤဖးလီၤအီၤ ခီဖျိလၢ တၢ်ဖးလီၤ.”
၅၇ ပှၤလၢအမံၤ ဘၣ်တၢ်ထၢနုာ်အီၤလၢ စီၤလ့ၤဝံ+ အဒူၣ်ကျါန့ၣ် ပၣ်ဃုာ်ဒီး စီၤက့ရၡိၣ် အစၢၤအသွဲၣ်, စီၤကဃး+ အစၢၤအသွဲၣ် ဒီးစီၤမရၤရံၤ အစၢၤအသွဲၣ်လီၤ. ၅၈ ပှၤလ့ၤဝံဖိ အဒူၣ်ဖိထၢဖိတဖၣ်န့ၣ် မ့ၢ်ဝဲ ပှၤလံးဘနံၤဖိ အဒူၣ်ဖိထၢဖိ,+ ပှၤဃ့ဘြိၣ်ဖိ အဒူၣ်ဖိထၢဖိ,+ ပှၤမးဃလံဖိ အဒူၣ်ဖိထၢဖိ,+ ပှၤမူၡံၤဖိ အဒူၣ်ဖိထၢဖိ+ ဒီးပှၤကိၤရးဖိ အဒူၣ်ဖိထၢဖိလီၤ.+
စီၤကဃးန့ၣ် အဖိခွါ မ့ၢ်ဝဲ စီၤဧၤမရၣ်လီၤ.+ ၅၉ စီၤဧၤမရၣ် အမါန့ၣ် အမံၤမ့ၢ်ဝဲ နီၢ်ယိကဘ့ၣ်+ လၢအမ့ၢ် စီၤလ့ၤဝံ အဖိမုၣ်လီၤ. စီၤလ့ၤဝံ အမါ အိၣ်ဖျဲၣ်ထီၣ်န့ၢ်အီၤ နီၢ်ယိကဘ့ၣ် လၢကီၢ်အဲၤကူပတူး အပူၤလီၤ. ဒီးနီၢ်ယိကဘ့ၣ် အိၣ်ဖျဲၣ်ထီၣ်န့ၢ်ဝဲ စီၤဧၤမရၣ်လၢ စီၤအၤဟရိၣ် ဒီးစီၤမိၤၡ့ ဒီးအဝဲသ့ၣ် အဒီပုၢ်ဝဲၢ်မုၣ် နီၢ်မံးရယၣ်လီၤ.+ ၆၀ စီၤအၤဟရိၣ် အဖိခွါတဖၣ်မ့ၢ်ဝဲ စီၤနၤဒး, စီၤအဘံဟူၤ, စီၤအလၤဧစၢ် ဒီးစီၤအံသမၢ်လီၤ.+ ၆၁ စီၤနၤဒး ဒီးစီၤအဘံဟူၤန့ၣ် မ့ၢ်လၢ အဝဲသ့ၣ်လုၢ်ထီၣ် မ့ၣ်အူလၢ အတလီၤပလိာ်ဒီး တၢ်သိၣ်တၢ်သီဘၣ် လၢယဟိဝၤယွၤ အမဲာ်ညါအဃိ အဝဲသ့ၣ် သံဝဲလီၤ.+
၆၂ ပှၤပိာ်ခွါတဖၣ်န့ၣ်လၢ အသးနံၣ်အိၣ်တလါ ဒီးဆူအဖီခိၣ်လၢ အမံၤဘၣ် တၢ်ထၢနုာ်အီၤန့ၣ် အနီၣ်ဂံၢ် ခဲလၢာ် အိၣ်ဝဲအဂၤ ၂၃,၀၀၀ လီၤ.+ ပှၤတထၢနုာ် အဝဲသ့ၣ် အမံၤလၢ ပှၤအံၣ်စရ့လးဖိ အဂၤတဖၣ် အကျါဘၣ်+ မ့ၢ်လၢ အဝဲသ့ၣ် တဒိးန့ၢ်ဘၣ် တၢ်န့ၢ်သါလၢ ပှၤအံၣ်စရ့လးဖိ အကျါဘၣ် အဃိလီၤ.+
၆၃ စီၤမိၤၡ့ ဒီးပှၤလုၢ်တၢ်ဒိၣ် စီၤအလၤဧစၢ် ထၢနုာ် ပှၤတဖၣ်န့ၣ် အမံၤ ဖဲအဝဲသ့ၣ် ထၢပှၤအံၣ်စရ့လးဖိတဖၣ်လၢ ကီၢ်မိၤအး အပှၢ်မုၢ်ကနၢ လၢထံကျိယၢ်ဒ့ၣ် အဃၢၤ လၢအဘူးဒီး ဝ့ၢ်ယရံၤဃိလီၤ. ၆၄ ဘၣ်ဆၣ် လၢပှၤတဖၣ်အံၤအကျါ ပှၤအံၣ်စရ့လးဖိလၢ စီၤမိၤၡ့ ဒီးပှၤလုၢ်တၢ်ဒိၣ် စီၤအၤဟရိၣ် ထၢဝဲအမံၤလၢ စံၤနါအပှၢ်မုၢ်ကနၢပူၤန့ၣ် တပၣ်နီတဂၤဘၣ်.+ ၆၅ ဘၣ်ဃးဒီး အဝဲသ့ၣ်န့ၣ် ယဟိဝၤယွၤ တဲဆိပာ်စၢၤဝဲလၢ “အဝဲသ့ၣ် ကဘၣ်သံဝဲလၢ ပှၢ်မုၢ်ကနၢအပူၤ သပှၢ်ကတၢၢ်”+ အဃိ အဝဲသ့ၣ် တအိၣ်တ့ၢ် နီတဂၤလၢၤဘၣ်. အိၣ်တ့ၢ်ထဲဒၣ် စီၤယဖူန့ၤ အဖိခွါ စီၤကၤလ့း ဒီးစီၤနိၣ် အဖိခွါ စီၤယိၤၡူလီၤ.+
၂၇ နီၢ်မၤလၤ, နီၢ်နိဧၤ, နီၢ်ဃၤကလၤ, နီၢ်မံးလကၤ ဒီးနီၢ်တံးရစၢ် မ့ၢ်ဝဲ စီၤစလၤဖဃး အဖိမုၣ်တဖၣ်လီၤ.+ စီၤစလၤဖဃးန့ၣ် မ့ၢ်ဝဲ စီၤဃ့ဖ့ၢ်အဖိခွါ, စီၤဃ့ဖ့ၢ်န့ၣ် မ့ၢ်ဝဲ စီၤကံးလဧး အဖိခွါ, စီၤကံးလဧးန့ၣ် မ့ၢ်ဝဲ စီၤမၤကံၢ် အဖိခွါ, စီၤမၤကံၢ်န့ၣ် မ့ၢ်ဝဲ စီၤမနၤၡ့ၤ အဖိခွါလီၤ. စီၤစလၤဖဃးန့ၣ် ပၣ်ဃုာ်လၢ စီၤယိၤသး အဖိခွါ စီၤမနၤၡ့ၤ အဒူၣ်ဖိထၢဖိတဖၣ် အကျါလီၤ. ၂ အဝဲသ့ၣ် လဲၤဆၢထၢၣ် လၢစီၤမိၤၡ့, ပှၤလုၢ်တၢ်ဒိၣ် စီၤအလၤဧစၢ်, ပှၤခိၣ်ပှၤနၢ်တဖၣ်+ ဒီးပှၤဂီၢ်မုၢ်တဖၣ် အမဲာ်ညါ လၢတၢ်အိၣ်ဖှိၣ်အဒဲ အတၢ်နုာ်လီၤအလီၢ် ဒီးတဲဝဲလၢ ၃ “ပပၢ်သံလၢ ပှၢ်မုၢ်ကနၢ အပူၤလီၤ. ဘၣ်ဆၣ် အဝဲ တပၣ်ဃုာ်လၢ ပှၤတဒူၣ်လၢ အအိၣ်ဃူ စီၤကိၤရး ဒီးပာ်ဖှိၣ်ထီၣ်အသး ဒ်သိး ကထီဒါ ယဟိဝၤယွၤ အကျါဘၣ်.+ လၢတၢ်န့ၣ်အလီၢ် အဝဲသံန့ၣ် မ့ၢ်ဒၣ်လၢ အနီၢ်ကစၢ် အတၢ်ဒဲးဘး အဃိလီၤ. ဒီးအဖိခွါ တအိၣ် နီတဂၤဘၣ်. ၄ ပပၢ် အဖိခွါ တအိၣ်ဘၣ် သနာ်က့ မ့ၢ်ပပၢ်အမံၤ ကြၢးလီၤမၢ်လၢ အဒူၣ်ဖိထၢဖိ အကျါ စ့ၢ်ကီးဧါ. ဟ့ၣ်လီၤပှၤ တၢ်စုလီၢ်ခီၣ်ခိၣ် ဒ်ပပၢ် အဒီပုၢ်ဝဲၢ်ခွါတဖၣ် ကဘၣ်တၢ်ဟ့ၣ်လီၤအီၤ အသိးမီၤ.” ၅ ဒီးစီၤမိၤၡ့ ပာ်ဖျါထီၣ် တၢ်ဂ့ၢ်တခါအံၤ လၢယဟိဝၤယွၤ အမဲာ်ညါလီၤ.+
၆ ဒီးယဟိဝၤယွၤ တဲစီၤမိၤၡ့လၢ ၇ “စီၤစလၤဖဃး အဖိမုၣ်တဖၣ် တဲတၢ်န့ၣ် ဘၣ်လီၤ. နကဘၣ်ဟ့ၣ်လီၤ အဝဲသ့ၣ် တၢ်စုလီၢ်ခီၣ်ခိၣ် ဒ်တၢ်န့ၢ်သါအသိး ဒ်အပၢ် အဒီပုၢ်ဝဲၢ်ခွါတဖၣ် ကဘၣ်တၢ်ဟ့ၣ်လီၤအီၤ အသိး ဒီးနကဘၣ် ဟ့ၣ်လီၤအဝဲသ့ၣ် လၢအပၢ် အတၢ်န့ၢ်သါလီၤ.+ ၈ ဒီးတဲဘၣ် ပှၤအံၣ်စရ့လးဖိတဖၣ်လၢ ‘ပှၤတဂၤ မ့ၢ်သံ ဒီးအဖိခွါ မ့ၢ်တအိၣ်ဘၣ်န့ၣ် သုကဘၣ်ဟ့ၣ်လီၤ အတၢ်န့ၢ်သါ လၢအဖိမုၣ် အအိၣ်လီၤ. ၉ ဒီးအဖိမုၣ် မ့ၢ်တအိၣ်ဘၣ်န့ၣ် သုကဘၣ်ဟ့ၣ်လီၤ အတၢ်န့ၢ်သါလၢ အဒီပုၢ်ဝဲၢ်ခွါတဖၣ် အအိၣ်လီၤ. ၁၀ ဒီးအဒီပုၢ်ဝဲၢ်ခွါတဖၣ် မ့ၢ်တအိၣ်ဘၣ်န့ၣ် သုကဘၣ်ဟ့ၣ်လီၤ အတၢ်န့ၢ်သါလၢ အပၢ် အဒီပုၢ်ဝဲၢ်ခွါတဖၣ် အအိၣ်လီၤ. ၁၁ ဒီးအပၢ် အဒီပုၢ်ဝဲၢ်ခွါတဖၣ် မ့ၢ်တအိၣ်ဘၣ်န့ၣ် သုကဘၣ်ဟ့ၣ်လီၤ အတၢ်န့ၢ်သါလၢ အဘူးအတံၢ်လၢ အဘူးဒီးအီၤ ဒိၣ်ကတၢၢ် လၢအဒူၣ်ဖိထၢဖိ အကျါ ဒီးပှၤတဂၤန့ၣ် ကန့ၢ်ဘၣ်ဝဲလီၤ. အဝဲန့ၣ် မ့ၢ်တၢ်ဆၢတဲာ်လၢ ကကဲထီၣ် တၢ်သိၣ်တၢ်သီလၢ ပှၤအံၣ်စရ့လးဖိတဖၣ် အဂီၢ် ဒ်ယဟိဝၤယွၤ မၤလိာ် စီၤမိၤၡ့ အသိးလီၤ.’”
၁၂ ဒီးယဟိဝၤယွၤ တဲစီၤမိၤၡ့လၢ “လဲၤထီၣ်လၢ ကစၢၢ်ဧဘါရံၣ်+ ဒီးကွၢ်စိလီၤ ကီၢ်လၢ ယကဟ့ၣ်လီၤ ပှၤအံၣ်စရ့လးဖိတက့ၢ်.+ ၁၃ ဖဲနထံၣ်ဘၣ် ကီၢ်အံၤ ဝံၤအလီၢ်ခံ ဒ်နဒီပုၢ်ဝဲၢ်ခွါ စီၤအၤဟရိၣ်အသိး+ နကသံ ဒီးနကဘၣ် တၢ်ခူၣ်လီၤနၤ ဒ်နမိၢ်ပၢ်ဖံဖု လၢပျၢၤတဖၣ်အသိး,+ ၁၄ မ့ၢ်လၢ ဖဲပှၤဂီၢ်မုၢ်တဖၣ် တဲအါလိာ်သးဒီးယၤလၢ စံၣ်အပှၢ်မုၢ်ကနၢအခါ နထီဒါက့ၤ ယတၢ်မၤလိာ် ဒီးနတပာ်စီဆှံယၤလၢ ပှၤဂီၢ်မုၢ်အမဲာ်ညါ ဖဲယဟ့ၣ်လီၤထံအခါဘၣ် အဃိလီၤ.+ အဝဲန့ၣ်မ့ၢ်ဝဲ ထံလၢမရံၤဘါ*+ လၢအအိၣ်လၢကၤဒ့ၣ်+ လၢစံၣ် အပှၢ်မုၢ်ကနၢပူၤလီၤ.”+
၁၅ စီၤမိၤၡ့ တဲယဟိဝၤယွၤလၢ ၁၆ “ယဟိဝၤ လၢအမ့ၢ် ကစၢ်ယွၤလၢ အဟ့ၣ်လီၤ ပှၤကိးဂၤဒဲး အသးသမူန့ၣ် မ်အဃုထၢထီၣ် ပှၤတဂၤလၢ ပှၤဂီၢ်မုၢ် အဖီခိၣ် ၁၇ လၢအကတီခိၣ်ရိၤမဲ အဝဲသ့ၣ်လၢ တၢ်ကိးမံၤဒဲးအပူၤ ဒီးဒ်သိး ယဟိဝၤယွၤ အပှၤဂီၢ်မုၢ် သုတကဲထီၣ်ဒ် သိလၢ ပှၤကွၢ်ထွဲအီၤ တအိၣ်ဘၣ်အသိး တဂ့ၤအဂီၢ်န့ၣ် တက့ၢ်.” ၁၈ အဃိ ယဟိဝၤယွၤ တဲစီၤမိၤၡ့လၢ “ကိးထီၣ်စီၤနိၣ် အဖိခွါတက့ၢ်. အဝဲမ့ၢ်ပှၤတဂၤလၢ အအိၣ်ဒီး တၢ်ပာ်သူၣ်ပာ်သးလီၤဆီလီၤ. ပာ်ထီၣ်နစုလၢ အလိၤတက့ၢ်.+ ၁၉ ဒီးမၢအဆၢထၢၣ်လၢ ပှၤလုၢ်တၢ်ဒိၣ် စီၤအလၤဧစၢ် ဒီးပှၤဂီၢ်မုၢ်ခဲလၢာ် အမဲာ်ညါတက့ၢ်. ဒီးဟ့ၣ်လီၤအီၤ မူဒါ လၢပှၤတဖၣ်န့ၣ် အမဲာ်ညါတက့ၢ်.+ ၂၀ ဒ်သိး ပှၤအံၣ်စရ့လးဖိ ခဲလၢာ် ကဒိကနၣ် အကလုၢ်အဂီၢ်+ နကဘၣ် ဟ့ၣ်လီၤအီၤလၢ နတၢ်န့ၢ်စိန့ၢ်ကမီၤ* တနီၤလီၤ.+ ၂၁ ဒီးစီၤယိၤၡူန့ၣ် ကဆၢထၢၣ်ဝဲလၢ ပှၤလုၢ်တၢ်ဒိၣ် စီၤအလၤဧစၢ် အမဲာ်ညါ ဒီးစီၤအလၤဧစၢ်န့ၣ် ကသံကွၢ်န့ၢ်တၢ်လၢ စီၤယိၤၡူ အခၢၣ်စး လၢယဟိဝၤယွၤအအိၣ် ခီဖျိ အူရံၣ်*+ ဒ်သိး ကသ့ၣ်ညါ အတၢ်ဆၢတဲာ် အဂီၢ်န့ၣ်လီၤ. ဒီးဒ်အဝဲ ဟ့ၣ်လီၤ တၢ်ကလုၢ်အသိး ပှၤကမၤထွဲ ကိးဂၤဒဲး, စီၤယိၤၡူမ့ၢ်ဂ့ၤ, ပှၤအံၣ်စရ့လးဖိမ့ၢ်ဂ့ၤ, ပှၤဂီၢ်မုၢ် ဒီတဖုမ့ၢ်ဂ့ၤ ကမၤထွဲဝဲလီၤ.”
၂၂ ဒီးစီၤမိၤၡ့ မၤဝဲဒ် ယဟိဝၤယွၤ မၤလိာ်အီၤအသိးလီၤ. စီၤမိၤၡ့ ကိးန့ၢ်စီၤယိၤၡူ ဒီးမၢအဆၢထၢၣ်လၢ ပှၤလုၢ်တၢ်ဒိၣ် စီၤအလၤဧစၢ် ဒီးပှၤဂီၢ်မုၢ်ခဲလၢာ် အမဲာ်ညါ ၂၃ ဒီးအဝဲ ပာ်ထီၣ်အစု လၢအလိၤ ဒီးဟ့ၣ်လီၤအီၤမူဒါ+ ဒ်ယဟိဝၤယွၤမၤလိာ် စီၤမိၤၡ့ အသိးလီၤ.+
၂၈ ဒီးယဟိဝၤယွၤ တဲစီၤမိၤၡ့လၢ ၂ “မၤလိာ် ပှၤအံၣ်စရ့လးဖိလၢ ‘သုကဘၣ် လုၢ်ထီၣ် တၢ်အီၣ်လၢ ယအိၣ်လီၤ. ယတၢ်လုၢ်လၢ မ့ၣ်အူတဖၣ် လၢအကဲထီၣ် တၢ်နၢမူလၢ အမၤမုာ်ယသးန့ၣ် ပှၤကဘၣ်မၤအီၤ ဖဲတၢ်ဆၢကတီၢ်ဘၣ်လၢ ဘၣ်တၢ်ပာ်ပနီၣ်အီၤ ဘၣ်ဝဲအခါလီၤ.’+
၃ “ဒီးနဘၣ်တဲ အဝဲသ့ၣ်လၢ ‘တၢ်လုၢ်လၢ မ့ၣ်အူလၢ သုကဘၣ် လုၢ်ထီၣ်လၢ ယဟိဝၤယွၤ အအိၣ်န့ၣ် မ့ၢ်ဝဲ သိဖါဖိခံဒုလၢ အလၢအပှဲၤ လၢအသးအိၣ် တနံၣ် ဒ်တၢ်လုၢ်ဒွဲၣ်အူ အသိး ကိးနံၤဒဲးလီၤ.+ ၄ အဃိ လၢဂီၤခီန့ၣ် နကဘၣ်လုၢ်ထီၣ် သိဖါဖိတဒု ဒီးဖဲမုၢ်လီၤနုာ် အဆၢကတီၢ်န့ၣ်* နကဘၣ် လုၢ်ထီၣ် သိဖါဖိ အဝဲတဒု+ ၅ ဃုာ်ဒီး ကိၣ်ကမူၣ် လၢအဂ့ၤ တကံလိ* ဃါဃုာ်အသးဒီး သ့ၣ်စၤယံး အသိစီ တလံးထၢၣ်* ဒ်တၢ်လုၢ်ဘု အသိးလီၤ.+ ၆ အဝဲန့ၣ် မ့ၢ်ဝဲ ကိးနံၤဒဲး အတၢ်လုၢ်ဒွဲၣ်အူ+ လၢပှၤစးထီၣ် မၤအီၤလၢ ကစၢၢ်စံၤနါ ဒ်တၢ်နၢမူလၢ အမၤမုာ်အသးလီၤ. ဒီးအမ့ၢ်ဝဲ တၢ်လုၢ်လၢမ့ၣ်အူ လၢယဟိဝၤယွၤ အအိၣ် ၇ ဃုာ်ဒီး စပံးထံလၢ တၢ်လုၢ်တၢ်ပာ်အဂီၢ် တလံးထၢၣ် လၢသိဖါဖိ တဒုစုာ်စုာ် အဂီၢ်လီၤ.+ ဒီးနကဘၣ်လူလီၤ စပံးထံလၢ တၢ်လုၢ်တၢ်ပာ်အဂီၢ်လၢ တၢ်စီဆှံအလီၢ် လၢယဟိဝၤယွၤ အအိၣ်လီၤ. ၈ ဖဲမုၢ်လီၤနုာ် အဆၢကတီၢ်န့ၣ် နဘၣ်ဟ့ၣ်လုၢ်ထီၣ် သိဖါဖိ အဝဲတဒု ဃုာ်ဒီး တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဒ်လၢဂီၤခီ အသိးလီၤ. နဘၣ်လုၢ်ထီၣ်အီၤ ဒ်တၢ်လုၢ်လၢ မ့ၣ်အူလၢ ယဟိဝၤယွၤ အအိၣ် ဒီးအမ့ၢ် တၢ်နၢမူလၢ အမၤမုာ် အသးလီၤ.+
၉ “‘ဘၣ်ဆၣ် ဖဲမုၢ်အိၣ်ဘှံးနံၤန့ၣ်+ နကဘၣ်လုၢ်ထီၣ် သိဖါဖိ ခံဒုလၢ အလၢအပှဲၤ လၢအသးအိၣ် တနံၣ် ဒီးကိၣ်ကမူၣ် လၢအဂ့ၤ ခံကံလိ* လၢအဃါဃုာ်အသးဒီးသိ ဒ်တၢ်လုၢ်ဘုအသိး ဃုာ်ဒီးစပံးထံ လၢတၢ်လုၢ်တၢ်ပာ် အဂီၢ်လီၤ. ၁၀ အဝဲန့ၣ် မ့ၢ်ဝဲ တၢ်လုၢ်ဒွဲၣ်အူလၢ မုၢ်အိၣ်ဘှံးနံၤအဂီၢ် ဃုာ်ဒီး ကိးနံၤဒဲး အတၢ်လုၢ်ဒွဲၣ်အူ ဒီးစပံးထံ လၢတၢ်လုၢ်တၢ်ပာ် အဂီၢ်လီၤ.+
၁၁ “‘ဖဲလါထီၣ်သီ ကိးလါဒဲးန့ၣ် သုကဘၣ် လုၢ်ထီၣ် ကျီၢ်ဖါဖိ ခံဒု, သိဖါတဒု ဒီးသိဖါဖိ နွံဒု လၢအလၢအပှဲၤ လၢအသးအိၣ် တနံၣ် ဒ်တၢ်လုၢ်ဒွဲၣ်အူ လၢယဟိဝၤယွၤ အအိၣ်အသိး+ ၁၂ ဒီးကိၣ်ကမူၣ် လၢအဂ့ၤ သၢကံလိဒီးတဝာ်* ဃါဃုာ်အသးဒီးသိ ဒ်တၢ်လုၢ်ဘုအသိး+ လၢကျီၢ်ဖါတဒု စုာ်စုာ်အဂီၢ် ဒီးကိၣ်ကမူၣ် လၢအဂ့ၤ ခံကံလိ ဃါဃုာ်အသးဒီးသိ ဒ်တၢ်လုၢ်ဘုအသိး လၢသိဖါ တဒုအဂီၢ်+ ၁၃ ဒီးကိၣ်ကမူၣ် လၢအဂ့ၤ တကံလိ ဃါဃုာ်အသးဒီးသိ ဒ်တၢ်လုၢ်ဘုအသိး လၢသိဖါဖိ တဒုစုာ်စုာ် အဂီၢ်လီၤ. တၢ်သ့ၣ်တဖၣ်န့ၣ် ကကဲထီၣ် တၢ်လုၢ်လၢ မ့ၣ်အူလၢ ယဟိဝၤယွၤအအိၣ် ဒီးတၢ်လုၢ်ဒွဲၣ်အူ လၢအမၤမုာ်အသးလီၤ.+ ၁၄ မ့မ့ၢ် စပံးထံ လၢတၢ်လုၢ်တၢ်ပာ် အဂီၢ်န့ၣ် အဝဲသ့ၣ် ကဘၣ်လုၢ်ထီၣ် စပံးထံ ခံလံးထၢၣ်ဃၣ်ဃၣ်* လၢကျီၢ်ဖါအဂီၢ်,+ တလံးထၢၣ်ဘျဲၣ်* လၢသိဖါအဂီၢ်+ ဒီးတလံးထၢၣ် လၢသိဖါဖိ အဂီၢ်လီၤ.+ အဝဲန့ၣ် မ့ၢ်ဝဲ တလါတဘျီ အတၢ်လုၢ်ဒွဲၣ်အူလၢ ဒီတနံၣ် အတီၢ်ပူၤလီၤ. ၁၅ ဒီးပှၤကဘၣ်လုၢ်ထီၣ် ကိးနံၤဒဲး အတၢ်လုၢ်ဒွဲၣ်အူ ဃုာ်ဒီး စပံးထံလၢ တၢ်လုၢ်တၢ်ပာ်အဂီၢ် တကးဘၣ် အမဲာ်ညါ ပှၤကဘၣ်လုၢ်ထီၣ် မဲာ်တဲးလဲးဖိ တဒုလၢ ယဟိဝၤယွၤ အအိၣ် ဒ်တၢ်လုၢ်လၢ တၢ်ဒဲးဘးအဂီၢ်လီၤ.
၁၆ “‘လါအဆိကတၢၢ်တလါ, လါထီၣ် ၁၄ သီတသီန့ၣ် ယဟိဝၤယွၤ အဘူၣ်လဲၤကပာ် ကဘၣ်ဝဲလီၤ.+ ၁၇ ဖဲလါအဝဲန့ၣ် ၁၅ သီတသီန့ၣ် ဘူၣ်ကအိၣ်ဝဲတခါလီၤ. ပှၤကဘၣ်အီၣ် ကိၣ်လၢအတပၣ်ဒီး ကိၣ်မံၣ်ဘၣ် နွံသီလီၤ.+ ၁၈ အဆိကတၢၢ် တသီန့ၣ် ပှၤကဘၣ်မၤ တၢ်အိၣ်ဖှိၣ်စီဆှံလီၤ. သုတဘၣ် မၤတၢ်ဆူၣ်ဆူၣ် နီတခါဘၣ်. ၁၉ ဒီးသုကဘၣ်လုၢ်ထီၣ် ကျီၢ်ဖါဖိ ခံဒု, သိဖါတဒု ဒီးသိဖါဖိ နွံဒု လၢအသးအိၣ် တနံၣ် ဒ်တၢ်လုၢ်ဒွဲၣ်အူ လၢယဟိဝၤယွၤ အအိၣ်လီၤ. သုကဘၣ်လုၢ်ထီၣ် ဆၣ်ဖိကီၢ်ဖိလၢ အလၢအပှဲၤတဖၣ်လီၤ.+ ၂၀ သုကဘၣ်လုၢ်ထီၣ် တၢ်သ့ၣ်တဖၣ်န့ၣ် ဃုာ်ဒီးတၢ်လုၢ်ဘု လၢအမ့ၢ် ကိၣ်ကမူၣ် လၢအဂ့ၤ သၢကံလိဒီးတဝာ် ဃါဃုာ်အသးဒီးသိ+ လၢကျီၢ်ဖါအဂီၢ် ဒီးခံကံလိ ဃါဃုာ်အသးဒီးသိ လၢသိဖါအဂီၢ် ၂၁ ဒီးတကံလိ ဃါဃုာ်အသးဒီးသိ လၢသိဖါဖိနွံဒု, တဒုစုာ်စုာ်အဂီၢ်လီၤ. ၂၂ ဒီးမဲာ်တဲးလဲးဖိ တဒုလၢ တၢ်လုၢ်လၢ တၢ်ဒဲးဘးအဂီၢ် ဒ်သိး ကမၤဘၣ်လိာ်ဖိးဒ့က့ၤတၢ် လၢသုဂီၢ်လီၤ. ၂၃ အဃိ ဂီၤခီ အတၢ်လုၢ်ဒွဲၣ်အူ လၢအပၣ်ဃုာ်လၢ ကိးနံၤဒဲး အတၢ်လုၢ်ဒွဲၣ်အူ အကျါန့ၣ် ကဘၣ် တၢ်လုၢ်ထီၣ်အီၤ ထီဘိ တကးဒံးဘၣ် သုကဘၣ်လုၢ်ထီၣ် တၢ်သ့ၣ်တဖၣ်န့ၣ်လီၤ. ၂၄ လၢနွံသီ အတီၢ်ပူၤန့ၣ် သုကဘၣ်လုၢ်ထီၣ် တၢ်သ့ၣ်တဖၣ်န့ၣ် ဒ်တၢ်အီၣ်အသိး ကိးနံၤဒဲး ဒီးအမ့ၢ်ဝဲ တၢ်လုၢ်လၢမ့ၣ်အူ ဒီးတၢ်နၢမူလၢ အမၤမုာ် ယဟိဝၤယွၤ အသးလီၤ. ဒီးပှၤကဘၣ် လုၢ်ထီၣ်အီၤ ဃုာ်ဒီး ကိးနံၤဒဲး အတၢ်လုၢ်ဒွဲၣ်အူ ဒီးစပံးထံလၢ တၢ်လုၢ်တၢ်ပာ် အဂီၢ်လီၤ. ၂၅ ဖဲနွံသီတသီန့ၣ် သုကဘၣ်မၤ တၢ်အိၣ်ဖှိၣ်စီဆှံလီၤ.+ သုတဘၣ် မၤတၢ်ဆူၣ်ဆူၣ် နီတခါဘၣ်.+
၂၆ “‘ဘူၣ်နွံတဖၣ် လၢအမ့ၢ် မုၢ်နံၤဖဲ သုဟဲစိာ် သုတၤသၣ်ဆိတဖၣ် အနံၤန့ၣ်+ သုဟဲစိာ် ဘုစဲၤသံသိ ဒ်တၢ်လုၢ်ဘုလၢ ယဟိဝၤယွၤအအိၣ် အသိးလီၤ.+ ဖဲန့ၣ်အခါ သုကဘၣ်မၤ တၢ်အိၣ်ဖှိၣ်စီဆှံလီၤ.+ ဒီးသုတဘၣ် မၤတၢ်မၤဆူၣ်ဆူၣ် နီတခါဘၣ်.+ ၂၇ ဒီးသုကဘၣ်လုၢ်ထီၣ် ကျီၢ်ဖါဖိ ခံဒု, သိဖါ တဒု ဒီးသိဖါဖိ နွံဒု လၢအသးအိၣ် တနံၣ် ဒ်တၢ်လုၢ်ဒွဲၣ်အူ ဒီးတၢ်နၢမူလၢ အမၤမုာ် ယဟိဝၤယွၤအသး အသိးလီၤ.+ ၂၈ သုကဘၣ်လုၢ်ထီၣ် တၢ်သ့ၣ်တဖၣ်န့ၣ် ဃုာ်ဒီးတၢ်လုၢ်ဘု လၢအမ့ၢ် ကိၣ်ကမူၣ် လၢအဂ့ၤ သၢကံလိဒီးတဝာ် ဃါဃုာ်အသးဒီးသိ လၢကျီၢ်ဖါအဂီၢ် ဒီးခံကံလိ ဃါဃုာ်အသးဒီးသိ လၢသိဖါအဂီၢ် ၂၉ ဒီးတကံလိ ဃါဃုာ်အသးဒီးသိ လၢသိဖါဖိနွံဒု, တဒုစုာ်စုာ်အဂီၢ်လီၤ. ၃၀ ဒီးမဲာ်တဲးလဲးဖိ တဒုလၢ တၢ်လုၢ်လၢ တၢ်ဒဲးဘးအဂီၢ် ဒ်သိး ကမၤဘၣ်လိာ်ဖိးဒ့က့ၤတၢ် လၢသုဂီၢ်လီၤ.+ ၃၁ သုကဘၣ် လုၢ်ထီၣ် တၢ်သ့ၣ်တဖၣ်န့ၣ် တကးဒံးဘၣ် သုကဘၣ် လုၢ်ထီၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘုလီၤ. သုကဘၣ် လုၢ်ထီၣ် ဆၣ်ဖိကီၢ်ဖိလၢ အလၢအပှဲၤတဖၣ်+ ဃုာ်ဒီး စပံးထံလၢ တၢ်လုၢ်တၢ်ပာ် အဂီၢ်လီၤ.
၂၉ “‘ဖဲနွံလါတလါ, လါထီၣ်အဆိကတၢၢ်တသီန့ၣ် သုကဘၣ်မၤ တၢ်အိၣ်ဖှိၣ်စီဆှံလီၤ. သုတဘၣ် မၤတၢ်မၤဆူၣ်ဆူၣ် နီတခါဘၣ်.+ ဖဲတၢ်တနံၤန့ၣ် သုကဘၣ် အူထီၣ်ကွဲၤလီၤ.+ ၂ သုကဘၣ် လုၢ်ထီၣ် ဆၣ်ဖိကီၢ်ဖိလၢ အလၢအပှဲၤတဖၣ် လၢအမ့ၢ် ကျီၢ်ဖါဖိတဒု, သိဖါတဒု ဒီးသိဖါဖိ နွံဒု ဒ်တၢ်လုၢ်ဒွဲၣ်အူ လၢကကဲထီၣ် တၢ်နၢမူလၢ အမၤမုာ် ယဟိဝၤယွၤအသး အသိး ၃ ဃုာ်ဒီးတၢ်လုၢ်ဘု လၢအမ့ၢ် ကိၣ်ကမူၣ် လၢအဂ့ၤ သၢကံလိဒီးတဝာ်* ဃါဃုာ်အသးဒီးသိ လၢကျီၢ်ဖါအဂီၢ် ဒီးခံကံလိ* ဃါဃုာ်အသးဒီးသိ လၢသိဖါအဂီၢ် ၄ ဒီးတကံလိ* ဃါဃုာ်အသးဒီးသိ လၢသိဖါဖိနွံဒု, တဒုစုာ်စုာ်အဂီၢ်လီၤ. ၅ ဒီးမဲာ်တဲးလဲးဖါဖိ တဒုလၢ တၢ်လုၢ်လၢ တၢ်ဒဲးဘးအဂီၢ် ဒ်သိး ကမၤဘၣ်လိာ်ဖိးဒ့က့ၤတၢ် လၢသုဂီၢ်လီၤ. ၆ သုကဘၣ်လုၢ်ထီၣ် တၢ်သ့ၣ်တဖၣ်န့ၣ် တကးဒံးဘၣ် သုကဘၣ် ဆဲးလုၢ်ထီၣ်ဒံး တလါတဘျီ အတၢ်လုၢ်ဒွဲၣ်အူ ဒီးအတၢ်လုၢ်ဘု+ ဒီးကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု+ ဃုာ်ဒီး စပံးထံလၢ တၢ်လုၢ်တၢ်ပာ်အဂီၢ်+ ဒ်တၢ်ဟံးစုနဲၣ်ကျဲ အိၣ်ပာ်စၢၤ အသိးလီၤ. အဝဲန့ၣ် မ့ၢ်ဝဲ တၢ်လုၢ်လၢမ့ၣ်အူလၢ ယဟိဝၤယွၤအအိၣ် ဒီးကဲထီၣ် တၢ်နၢမူလၢ အမၤမုာ်အသးလီၤ.
၇ “‘ဒီးဖဲနွံလါတလါ, လါထီၣ် အသီတဆံန့ၣ် သုကဘၣ်မၤ တၢ်အိၣ်ဖှိၣ်စီဆှံ+ ဒီးသုကဘၣ် သိၣ်ဃီၣ်လီၤသုသး* ဒီးသုတဘၣ် မၤတၢ်မၤ နီတခါဘၣ်.+ ၈ သုကဘၣ် လုၢ်ထီၣ် ကျီၢ်ဖါဖိတဒု, သိဖါတဒု ဒီးသိဖါဖိ နွံဒု လၢအသးအိၣ် တနံၣ် ဒ်တၢ်လုၢ်ဒွဲၣ်အူ ဒီးတၢ်နၢမူလၢ အမၤမုာ် ယဟိဝၤယွၤအသး အသိးလီၤ. ဒီးဆၣ်ဖိကီၢ်ဖိ တဖၣ်အံၤန့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၉ သုကဘၣ်လုၢ်ထီၣ် တၢ်သ့ၣ်တဖၣ်န့ၣ် ဃုာ်ဒီးတၢ်လုၢ်ဘု လၢအမ့ၢ် ကိၣ်ကမူၣ် လၢအဂ့ၤ သၢကံလိဒီးတဝာ် ဃါဃုာ်အသးဒီးသိ လၢကျီၢ်ဖါအဂီၢ် ဒီးခံကံလိ ဃါဃုာ်အသးဒီးသိ လၢသိဖါအဂီၢ် ၁၀ ဒီးတကံလိ ဃါဃုာ်အသးဒီးသိ လၢသိဖါဖိနွံဒု, တဒုစုာ်စုာ်အဂီၢ်လီၤ. ၁၁ ဒီးမဲာ်တဲးလဲးဖိတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် တၢ်လုၢ်လၢ တၢ်ဒဲးဘးအဂီၢ် ဖဲတၢ်မၤဘၣ်လိာ်ဖိးဒ့က့ၤတၢ် အမုၢ်နံၤ+ ဒီးကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဃုာ်ဒီး စပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ် တၢ်လုၢ်ထီၣ်အီၤ ထီဘိလီၤ.
၁၂ “‘ဒီးဖဲနွံလါတလါ, လါထီၣ် ၁၅ သီန့ၣ် သုကဘၣ်မၤ တၢ်အိၣ်ဖှိၣ်စီဆှံလီၤ. ဒီးသုတဘၣ် မၤတၢ်မၤဆူၣ်ဆူၣ် နီတခါဘၣ်. ဒီးသုဘၣ်မၤ ဘူၣ်တခါလၢ ယဟိဝၤယွၤအဂီၢ် နွံသီလီၤ.+ ၁၃ ဒီးသုကဘၣ်လုၢ်ထီၣ် ကျီၢ်ဖါဖိ ၁၃ ဒု, သိဖါ ၂ ဒု ဒီးသိဖါဖိ ၁၄ ဒုလၢအသးအိၣ် တနံၣ် ဒ်တၢ်လုၢ်ဒွဲၣ်အူ+ ဒီးတၢ်လုၢ်လၢမ့ၣ်အူလၢ ယဟိဝၤယွၤအအိၣ် ဒ်သိး ကကဲထီၣ် တၢ်နၢမူလၢ အမၤမုာ်အသး အဂီၢ်လီၤ. ဒီးဆၣ်ဖိကီၢ်ဖိတဖၣ်န့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၁၄ သုကဘၣ်လုၢ်ထီၣ် တၢ်သ့ၣ်တဖၣ်န့ၣ် ဃုာ်ဒီးတၢ်လုၢ်ဘု လၢအမ့ၢ် ကိၣ်ကမူၣ် လၢအဂ့ၤ သၢကံလိဒီးတဝာ် လၢအဃါဃုာ်အသးဒီးသိ လၢကျီၢ်ဖါ ၁၃ ဒု, တဒုစုာ်စုာ် အဂီၢ် ဒီးခံကံလိ လၢသိဖါ ၂ ဒု, တဒုစုာ်စုာ် အဂီၢ် ၁၅ ဒီးတကံလိ ဃါဃုာ်အသးဒီးသိ လၢသိဖါဖိ ၁၄ ဒု, တဒုစုာ်စုာ် အဂီၢ်လီၤ. ၁၆ ဒီးမဲာ်တဲးလဲးဖိတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဃုာ်ဒီး စပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ် တၢ်လုၢ်ထီၣ်အီၤ ထီဘိလီၤ.+
၁၇ “‘ဒီးဖဲခံသီတသီန့ၣ် သုကဘၣ်လုၢ်ထီၣ် ကျီၢ်ဖါဖိ ၁၂ ဒု, သိဖါ ၂ ဒု ဒီးသိဖါဖိ ၁၄ ဒုလၢအသးအိၣ် တနံၣ်လီၤ. ဒီးဆၣ်ဖိကီၢ်ဖိ တဖၣ်န့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၁၈ ဒီးဒ်တၢ်ဟံးစုနဲၣ်ကျဲ အိၣ်ပာ်စၢၤအသိး သုကဘၣ် လုၢ်ထီၣ်တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဃုာ်ဒီး ကျီၢ်ဖါ, သိဖါ ဒီးသိဖါဖိတဖၣ် ဒ်အနီၣ်ဂံၢ် အိၣ်ဝဲအသိး ၁၉ ဒီးသုကဘၣ် လုၢ်ထီၣ်စ့ၢ်ကီး မဲာ်တဲးလဲးဖိတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ်တၢ်လုၢ်ထီၣ်အီၤ ထီဘိလီၤ.+
၂၀ “‘ဒီးဖဲသၢသီတသီန့ၣ် သုကဘၣ်လုၢ်ထီၣ် ကျီၢ်ဖါ ၁၁ ဒု, သိဖါ ၂ ဒု ဒီးသိဖါဖိ ၁၄ ဒုလၢအသးအိၣ် တနံၣ်လီၤ. ဒီးဆၣ်ဖိကီၢ်ဖိတဖၣ်န့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၂၁ ဒီးဒ် တၢ်ဟံးစုနဲၣ်ကျဲ အိၣ်ပာ်စၢၤအသိး သုကဘၣ် လုၢ်ထီၣ်တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဃုာ်ဒီး ကျီၢ်ဖါ, သိဖါ ဒီးသိဖါဖိတဖၣ် ဒ်အနီၣ်ဂံၢ် အိၣ်ဝဲအသိး ၂၂ ဒီးသုကဘၣ် လုၢ်ထီၣ်စ့ၢ်ကီး မဲာ်တဲးလဲးတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ် တၢ်လုၢ်ထီၣ်အီၤ ထီဘိလီၤ.+
၂၃ “‘ဒီးဖဲလွံၢ်သီတသီန့ၣ် သုကဘၣ်လုၢ်ထီၣ် ကျီၢ်ဖါ အဒု ၁၀, သိဖါ ၂ ဒု ဒီးသိဖါဖိ ၁၄ ဒုလၢအသးအိၣ် တနံၣ်လီၤ. ဒီးဆၣ်ဖိကီၢ်ဖိတဖၣ်န့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၂၄ ဒီးဒ် တၢ်ဟံးစုနဲၣ်ကျဲ အိၣ်ပာ်စၢၤအသိး သုကဘၣ် လုၢ်ထီၣ်တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဃုာ်ဒီး ကျီၢ်ဖါ, သိဖါ ဒီးသိဖါဖိတဖၣ် ဒ်အနီၣ်ဂံၢ် အိၣ်ဝဲအသိး ၂၅ ဒီးသုကဘၣ် လုၢ်ထီၣ်စ့ၢ်ကီး မဲာ်တဲးလဲးဖိတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ်တၢ်လုၢ်ထီၣ်အီၤ ထီဘိလီၤ.+
၂၆ “‘ဒီးဖဲယဲၢ်သီတသီန့ၣ် သုကဘၣ်လုၢ်ထီၣ် ကျီၢ်ဖါ ၉ ဒု, သိဖါ ၂ ဒု ဒီးသိဖါဖိ ၁၄ ဒုလၢအသးအိၣ် တနံၣ်လီၤ. ဒီးဆၣ်ဖိကီၢ်ဖိတဖၣ်န့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၂၇ ဒီးဒ် တၢ်ဟံးစုနဲၣ်ကျဲ အိၣ်ပာ်စၢၤအသိး သုကဘၣ် လုၢ်ထီၣ်တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဃုာ်ဒီး ကျီၢ်ဖါ, သိဖါ ဒီးသိဖါဖိတဖၣ် ဒ်အနီၣ်ဂံၢ် အိၣ်ဝဲအသိး ၂၈ ဒီးသုကဘၣ် လုၢ်ထီၣ်စ့ၢ်ကီး မဲာ်တဲးလဲးတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ်တၢ်လုၢ်ထီၣ်အီၤ ထီဘိလီၤ.+
၂၉ “‘ဒီးဖဲဃုသီတသီန့ၣ် သုကဘၣ်လုၢ်ထီၣ် ကျီၢ်ဖါ ၈ ဒု, သိဖါ ၂ ဒု ဒီးသိဖါဖိ ၁၄ ဒုလၢအသးအိၣ် တနံၣ်လီၤ. ဒီးဆၣ်ဖိကီၢ်ဖိတဖၣ်န့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၃၀ ဒီးဒ် တၢ်ဟံးစုနဲၣ်ကျဲ အိၣ်ပာ်စၢၤအသိး သုကဘၣ် လုၢ်ထီၣ်တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဃုာ်ဒီး ကျီၢ်ဖါ, သိဖါ ဒီးသိဖါဖိတဖၣ် ဒ်အနီၣ်ဂံၢ် အိၣ်ဝဲအသိး ၃၁ ဒီးသုကဘၣ် လုၢ်ထီၣ်စ့ၢ်ကီး မဲာ်တဲးလဲးတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ်တၢ်လုၢ်ထီၣ်အီၤ ထီဘိလီၤ.+
၃၂ “‘ဒီးဖဲနွံသီတသီန့ၣ် သုကဘၣ်လုၢ်ထီၣ် ကျီၢ်ဖါ ၇ ဒု, သိဖါ ၂ ဒု ဒီးသိဖါဖိ ၁၄ ဒုလၢအသးအိၣ် တနံၣ်လီၤ. ဒီးဆၣ်ဖိကီၢ်ဖိတဖၣ်န့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၃၃ ဒီးဒ် တၢ်ဟံးစုနဲၣ်ကျဲ အိၣ်ပာ်စၢၤအသိး သုကဘၣ် လုၢ်ထီၣ်တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဃုာ်ဒီး ကျီၢ်ဖါ, သိဖါ ဒီးသိဖါဖိတဖၣ် ဒ်အနီၣ်ဂံၢ် အိၣ်ဝဲအသိး ၃၄ ဒီးသုကဘၣ် လုၢ်ထီၣ်စ့ၢ်ကီး မဲာ်တဲးလဲးတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ်တၢ်လုၢ်ထီၣ်အီၤ ထီဘိလီၤ.+
၃၅ “‘ဖဲဃိးသီတသီန့ၣ် သုကဘၣ်မၤ တၢ်အိၣ်ဖှိၣ်လီၤဆီလီၤ. သုတဘၣ် မၤတၢ်မၤဆူၣ်ဆူၣ် နီတခါဘၣ်.+ ၃၆ သုကဘၣ် လုၢ်ထီၣ် ကျီၢ်ဖါတဒု, သိဖါတဒု ဒီးသိဖါဖိ နွံဒု လၢအသးအိၣ်တနံၣ် ဒ်တၢ်လုၢ်ဒွဲၣ်အူ ဒီးတၢ်လုၢ်လၢမ့ၣ်အူ လၢယဟိဝၤယွၤအအိၣ် ဒ်သိးကကဲထီၣ် တၢ်နၢမူလၢ အမၤမုာ်အသး အဂီၢ်လီၤ. ဒီးဆၣ်ဖိကီၢ်ဖိတဖၣ်န့ၣ် ကဘၣ်မ့ၢ် ဆၣ်ဖိကီၢ်ဖိ လၢအလၢအပှဲၤလီၤ.+ ၃၇ ဒီးဒ်တၢ်ဟံးစုနဲၣ်ကျဲ အိၣ်ပာ်စၢၤအသိး သုကဘၣ် လုၢ်ထီၣ်တၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ် ဃုာ်ဒီး ကျီၢ်ဖါ, သိဖါ ဒီးသိဖါဖိတဖၣ် ဒ်အနီၣ်ဂံၢ် အိၣ်ဝဲအသိးလီၤ. ၃၈ ဒီးသုကဘၣ် လုၢ်ထီၣ်စ့ၢ်ကီး မဲာ်တဲးလဲးတဒု ဒ်တၢ်လုၢ်လၢ တၢ်ဒဲးဘးအဂီၢ် အသိးလီၤ. တကးဒံးဘၣ် ကိးနံၤဒဲး အတၢ်လုၢ်ဒွဲၣ်အူ ဒီးအတၢ်လုၢ်ဘု ဒီးစပံးထံလၢ တၢ်လုၢ်တၢ်ပာ်အဂီၢ်န့ၣ် ကဘၣ်တၢ်လုၢ်ထီၣ်အီၤ ထီဘိလီၤ.+
၃၉ “‘တၢ်သ့ၣ်တဖၣ်န့ၣ် မ့ၢ်ဝဲ တၢ်လၢသုကဘၣ် လုၢ်ထီၣ်လၢ ယဟိဝၤယွၤအအိၣ် ဖဲသုဘူၣ်ဘၣ်အခါလီၤ.+ တကးဒံးဘၣ် သုကဘၣ် ဆဲးလုၢ်ထီၣ် သုတၢ်လုၢ်လၢ တၢ်အၢၣ်လီၤအဂီၢ်+ ဒီးသုတၢ်လုၢ်လၢ တၢ်သးအိၣ်အပူၤ+ ဒ်သုတၢ်လုၢ်ဒွဲၣ်အူအသိး+ ဒီးသုတၢ်လုၢ်ဘု+ ဒီးစပံးထံလၢ တၢ်လုၢ်တၢ်ပာ်အဂီၢ်+ ဒီးသုတၢ်လုၢ်အိၣ်ဃူအိၣ်ဖိးလီၤ.’”+ ၄၀ ဒီးစီၤမိၤၡ့ တဲဘၣ်ဝဲ ပှၤအံၣ်စရ့လးဖိတဖၣ် တၢ်လၢ ယဟိဝၤယွၤ မၤလိာ်အီၤ ကိးမံၤဒဲးလီၤ.
၃၀ စီၤမိၤၡ့တဲဘၣ် ပှၤအံၣ်စရ့လးဖိအဒူၣ် အခိၣ်အနၢ်တဖၣ်လၢ+ “ယဟိဝၤယွၤ မၤလိာ်ဝဲလၢ ၂ ပှၤပိာ်ခွါတဂၤ မ့ၢ်အၢၣ်လီၤ+ ယဟိဝၤယွၤ တမံၤမံၤ မ့တမ့ၢ် ပာ်ဂၢၢ်ပာ်ကျၢၤ တၢ်အၢၣ်လီၤလၢ အဝဲ ကဟးဆှဲး တၢ်တမံၤမံၤန့ၣ်+ အတဘၣ်မၤဟးဂီၤ အတၢ်အၢၣ်လီၤဘၣ်.+ ဒ်အဝဲ တဲဝဲအသိး အကဘၣ်မၤဝဲ ကိးမံၤဒဲးလီၤ.+
၃ “ဖဲပိာ်မုၣ် သးစၢ်တဂၤ အိၣ်ဒံးလၢ အပၢ်အဟံၣ်ပူၤ အဆၢကတီၢ် အဝဲ မ့ၢ်အၢၣ်လီၤ ယဟိဝၤယွၤ တမံၤမံၤ မ့တမ့ၢ် မၤတၢ်အၢၣ်လီၤလၢ အကဟးဆှဲး တၢ်တမံၤမံၤ ၄ ဒီးအပၢ်မ့ၢ်နၢ်ဟူ တၢ်အၢၣ်လီၤလၢအမၤဝဲ မ့တမ့ၢ် နၢ်ဟူဘၣ် အတၢ်အၢၣ်လီၤလၢ အကဟးဆှဲး တၢ်တမံၤမံၤ ဒီးအပၢ်မ့ၢ် တတြီအီၤဘၣ်န့ၣ် အဝဲ ကဘၣ်မၤလၢပှဲၤ အတၢ်အၢၣ်လီၤ ခဲလၢာ်လီၤ. ဒီးအဝဲ အတၢ်အၢၣ်လီၤလၢ အကဟးဆှဲး တၢ်တမံၤမံၤန့ၣ် အကဘၣ် မၤလၢပှဲၤဝဲလီၤ. ၅ ဘၣ်ဆၣ် ဖဲအပၢ်နၢ်ဟူဝဲ အတၢ်အၢၣ်လီၤ မ့တမ့ၢ် အတၢ်အၢၣ်လီၤလၢ အကဟးဆှဲး တၢ်တမံၤမံၤအခါ အမ့ၢ်တြီအီၤန့ၣ် အဝဲတလိၣ်မၤလၢပှဲၤ အတၢ်အၢၣ်လီၤအံၤ လၢၤဘၣ်. ဒီးခီဖျိလၢ အပၢ်တြီအီၤအဃိ ယဟိဝၤယွၤ ကပျၢ်ဝဲ ပိာ်မုၣ်အံၤ အတၢ်ကမၣ်လီၤ.+
၆ “အဝဲမ့ၢ် မၤပာ်စၢၤ တၢ်အၢၣ်လီၤတမံၤမံၤ မ့တမ့ၢ် ကရီမၤတၢ်အၢၣ်လီၤ ဒီးလၢခံ မ့ၢ်ဟံးအဝၤ ၇ ဒီးအဝၤမ့ၢ်နၢ်ဟူဝဲန့ၣ် ဖဲအနၢ်ဟူဝဲ အနံၤ, အမ့ၢ်တတြီအီၤဘၣ်န့ၣ် ပိာ်မုၣ်တဂၤအံၤ ကဘၣ်မၤလၢပှဲၤ အတၢ်အၢၣ်လီၤ မ့တမ့ၢ် အတၢ်အၢၣ်လီၤလၢ ကဟးဆှဲး တၢ်တမံၤမံၤန့ၣ်လီၤ. ၈ ဘၣ်ဆၣ် အဝၤမ့ၢ်တြီအီၤ ဖဲအနၢ်ဟူဝဲ အနံၤန့ၣ် အဝၤ ကဂ့ၢ်လိာ်ဝဲ အတၢ်အၢၣ်လီၤ မ့တမ့ၢ် တၢ်အၢၣ်လီၤလၢ အကရီမၤဝဲလီၤ.+ ဒီးယဟိဝၤယွၤ ကပျၢ် ပိာ်မုၣ်တဂၤအံၤ အတၢ်ကမၣ်လီၤ.
၉ “ဘၣ်ဆၣ် မုၣ်ကမဲမ့ၢ်ဂ့ၤ, ပိာ်မုၣ်လၢ အလီၤဖးဒီးအဝၤမ့ၢ်ဂ့ၤ မ့ၢ်မၤတၢ်အၢၣ်လီၤန့ၣ် အကဘၣ်မၤလၢပှဲၤ အတၢ်အၢၣ်လီၤ ခဲလၢာ်လီၤ.
၁၀ “ဘၣ်ဆၣ် ဖဲပှၤပိာ်မုၣ်တဂၤ အိၣ်လၢ အဝၤအဟံၣ်အခါ အမ့ၢ်မၤတၢ်အၢၣ်လီၤ မ့တမ့ၢ် မၤတၢ်အၢၣ်လီၤ လၢအကဟးဆှဲး တၢ်တမံၤမံၤ ၁၁ ဒီးအဝၤမ့ၢ်နၢ်ဟူဝဲ ဒီးအမ့ၢ်တတြီအီၤဘၣ် မ့တမ့ၢ် မ့ၢ်တဂ့ၢ်လိာ်ဝဲဘၣ်န့ၣ် အဝဲကဘၣ်မၤလၢပှဲၤ အတၢ်အၢၣ်လီၤ မ့တမ့ၢ် အတၢ်အၢၣ်လီၤလၢ အကဟးဆှဲး တၢ်တမံၤမံၤန့ၣ်လီၤ. ၁၂ ဘၣ်ဆၣ် မုၢ်နံၤဖဲ အဝၤနၢ်ဟူဝဲ တၢ်အၢၣ်လီၤလၢ အမၤဝဲတမံၤမံၤ မ့တမ့ၢ် နၢ်ဟူဝဲ တၢ်အၢၣ်လီၤလၢ အကဟးဆှဲး တၢ်တမံၤမံၤအခါ အဝၤမ့ၢ်ဂ့ၢ်လိာ်ဝဲ သပှၢ်တၢၢ်န့ၣ် ပိာ်မုၣ်အံၤ တလိၣ်မၤလၢပှဲၤ တၢ်အၢၣ်လီၤအံၤလၢၤဘၣ်.+ ဒီးခီဖျိလၢ အဝၤဂ့ၢ်လိာ်ဝဲ အဃိ ယဟိဝၤယွၤကပျၢ်ဝဲ ပိာ်မုၣ်အံၤ အတၢ်ကမၣ်လီၤ. ၁၃ ဘၣ်ဃးဒီး တၢ်အၢၣ်လီၤ တမံၤဂ့ၤတမံၤဂ့ၤ မ့တမ့ၢ် တၢ်အၢၣ်လီၤလၢ အကကီၤအသး ဒီးကဟးဆှဲး တၢ်တမံၤမံၤန့ၣ် အဝၤ ကဘၣ်ပာ်ဂၢၢ်ပာ်ကျၢၤဝဲ မ့တမ့ၢ် အဝၤ ကဘၣ် ဂ့ၢ်လိာ်ဝဲလီၤ. ၁၄ ဘၣ်ဆၣ် တနံၤဘၣ်တနံၤ အဝၤ မ့ၢ်တတြီအီၤဘၣ်န့ၣ် မ့ၢ်ဝဲ အဝၤ ပာ်ဂၢၢ်ပာ်ကျၢၤ အတၢ်အၢၣ်လီၤခဲလၢာ် မ့တမ့ၢ် အတၢ်အၢၣ်လီၤ ခဲလၢာ်လၢ အကဟးဆှဲး တၢ်တမံၤမံၤန့ၣ်လီၤ. မ့ၢ်လၢ အဝၤတတြီအီၤ ဖဲအနၢ်ဟူဝဲ အနံၤဘၣ်အဃိ မ့ၢ်ဒၣ် အဝၤပာ်ဂၢၢ်ပာ်ကျၢၤဝဲလီၤ. ၁၅ ဘၣ်ဆၣ် အဝၤမ့ၢ်ဂ့ၢ်လိာ်တၢ် ဖဲအနၢ်ဟူဝဲ အမုၢ်နံၤ ဝံၤအလီၢ်ခံ တၢ်ဆၢကတီၢ် တတီၤတီၤန့ၣ် ပိာ်မုၣ်တဂၤအံၤ အတၢ်ကမၣ် ကလီၤတီလၢ အဝၤအလိၤလီၤ.+
၁၆ “အဝဲန့ၣ် မ့ၢ်ဝဲတၢ်သိၣ်တၢ်သီတဖၣ် လၢယဟိဝၤယွၤ မၤလိာ်စီၤမိၤၡ့ လၢအဘၣ်ဃးဒီး ဝၤဒီးမါ, ပၢ် ဒီးအဖိမုၣ်သးစၢ် လၢအအိၣ်ဒံးလၢ အဟံၣ်ပူၤလီၤ.”
၃၁ ယဟိဝၤယွၤ တဲစီၤမိၤၡ့လၢ ၂ “ဟ့ၣ်ကၣ်က့ၤ+ ပှၤမံးဒယၣ်ဖိတဖၣ် လၢပှၤအံၣ်စရ့လးဖိတဖၣ် အဂီၢ်တက့ၢ်.+ တၢ်န့ၣ်ဝံၤအလီၢ်ခံ နကသံ ဒီးနကဘၣ် တၢ်ခူၣ်လီၤနၤ ဒ်နမိၢ်ပၢ်ဖံဖု လၢပျၢၤတဖၣ် အသိးလီၤ.”+
၃ စီၤမိၤၡ့ တဲဘၣ် ပှၤဂီၢ်မုၢ်တဖၣ်လၢ “ပှၤပိာ်ခွါတဖၣ်လၢ သုကျါ လၢအကလဲၤဒုး ပှၤမံးဒယၣ်ဖိတဖၣ်န့ၣ် ဟ့ၣ်လီၤအဝဲသ့ၣ် တၢ်စုကဝဲၤ ဒီးဟ့ၣ်ကၣ်က့ၤ ပှၤမံးဒယၣ်ဖိ ဒ်ယဟိဝၤယွၤ တဲဝဲအသိး တက့ၢ်. ၄ သုကဘၣ်ဆှၢလီၤ ပှၤအဂၤ ၁,၀၀၀ လၢပှၤအံၣ်စရ့လးဖိ အဒူၣ်တဒူၣ်စုာ်စုာ်အကျါ လၢတၢ်ဒုးအဂီၢ်လီၤ.” ၅ လၢပှၤအံၣ်စရ့လးဖိ* တဒူၣ်စုာ်စုာ် အကျါ တဒူၣ်န့ၣ် ပှၤအဂၤ ၁,၀၀၀ တဒူၣ်န့ၣ်+ ပှၤအဂၤ ၁,၀၀၀ ဒိးန့ၢ်ဘၣ်မူဒါအဃိ ပှၤလၢ အကတဲာ်ကတီၤထီၣ်အသးလၢ တၢ်ဒုးအဂီၢ် ခဲလၢာ်ခဲဆ့န့ၣ် အိၣ်ဝဲအဂၤ ၁၂,၀၀၀ လီၤ.
၆ လၢပှၤအဒူၣ် တဒူၣ်စုာ်စုာ် အကျါန့ၣ် စီၤမိၤၡ့ ဆှၢလီၤဝဲ တဒူၣ်န့ၣ် အဂၤ ၁,၀၀၀ တဒူၣ်န့ၣ် အဂၤ ၁,၀၀၀ လီၤ. ဒီးစီၤမိၤၡ့ ဆှၢလီၤစ့ၢ်ကီး စီၤအလၤဧစၢ် အဖိခွါ စီၤဖံၤနဃၣ်+ လၢအမ့ၢ် သုးမုၢ် အပှၤလုၢ်တၢ်ဒိၣ် ဒီးတၢ်ပီးတၢ်လီ စီဆှံတဖၣ် ဒီးတၢ်ဒုးအကွဲၤတဖၣ်+ အိၣ်လၢအစုပူၤလီၤ. ၇ အဝဲသ့ၣ် လဲၤဒုးဝဲ ပှၤမံးဒယၣ်ဖိ ဒ်ယဟိဝၤယွၤ မၤလိာ်ဝဲ စီၤမိၤၡ့ အသိးလီၤ. ဒီးအဝဲသ့ၣ် မၤသံဝဲ ပှၤပိာ်ခွါ ကိးဂၤဒဲးလီၤ. ၈ လၢပှၤသံသ့ၣ်တဖၣ် အကျါန့ၣ် ပၣ်ဃုာ်ဒီး ပှၤမံးဒယၣ်ဖိ အစီၤပၤ ယဲၢ်ဂၤလၢ အမ့ၢ် စီၤအဝံၤ, စီၤရ့က့ၣ်, စီၤစူၢ်, စီၤဃူၢ် ဒီးစီၤရ့ဘၤလီၤ. ဒီးအဝဲသ့ၣ် မၤသံစ့ၢ်ကီး စီၤဘဧိၢ် အဖိခွါ စီၤဘံးလၣ် လၢနးလီၤ.+ ၉ ဘၣ်ဆၣ် ပှၤအံၣ်စရ့လးဖိတဖၣ် က့ၤဖီၣ်ဝဲ မံးဒယၣ်မုၣ်တဖၣ် ဒီးဖိသၣ်တဖၣ်လီၤ. ဒီးအဝဲသ့ၣ် ဂုာ်န့ၢ်ဆူၣ်စ့ၢ်ကီး ပှၤမံးဒယၣ်ဖိ အကျီၢ်, အသိဒီးမဲာ်တဲးလဲး ခဲလၢာ် ဒီးအတၢ်ဖိတၢ်လံၤ ခဲလၢာ်လီၤ. ၁၀ အဝဲသ့ၣ် ဒွဲၣ်အူထီၣ်ကွံာ် ပှၤမံးဒယၣ်ဖိ အဝ့ၢ်ခဲလၢာ် ဒီးအဒဲကဝီၤ ခဲလၢာ် လၢမ့ၣ်အူလီၤ. ၁၁ အဝဲသ့ၣ် က့ၤစိာ်ဝဲ ပှၤအိၣ်ဖဲန့ၣ်တဖၣ် အတၢ်ဖိတၢ်လံၤ ဒီးအဆၣ်ဖိကီၢ်ဖိခဲလၢာ် တကးဒံးဘၣ် အဝဲသ့ၣ် က့ၤဖီၣ်စ့ၢ်ကီး ပှၤကညီတဖၣ်လီၤ. ၁၂ အဝဲသ့ၣ် ဟဲက့ၤကိး ပှၤလၢ အဝဲသ့ၣ် ဖီၣ်န့ၢ်ဝဲတဖၣ် ဃုာ်ဒီး တၢ်ဖိတၢ်လံၤလၢ အဝဲသ့ၣ် ဂုာ်န့ၢ်ဆူၣ်ဝဲတဖၣ်လၢ စီၤမိၤၡ့, ပှၤလုၢ်တၢ်ဒိၣ် စီၤအလၤဧစၢ် ဒီးပှၤအံၣ်စရ့လးဖိ အတၢ်အိၣ်ဖှိၣ် အအိၣ်လီၤ. ဖဲန့ၣ်န့ၣ် အဝဲသ့ၣ် အိၣ်ဝဲလၢ ဒဲကဝီၤ ဖဲကီၢ်မိၤအး အပှၢ်မုၢ်ကနၢ+ လၢထံကျိယၢ်ဒ့ၣ် အဃၢၤ လၢအဘူးဒီး ဝ့ၢ်ယရံၤဃိလီၤ.
၁၃ စီၤမိၤၡ့ ဒီးပှၤလုၢ်တၢ်ဒိၣ် စီၤအလၤဧစၢ် ဒီးပှၤဂီၢ်မုၢ် အခိၣ်အနၢ်တဖၣ် ဟးထီၣ်ဝဲလၢ ဒဲကဝီၤအချၢ ဒ်သိး ကလဲၤထံၣ်လိာ်အသးဒီး အဝဲသ့ၣ်လီၤ. ၁၄ ဘၣ်ဆၣ် စီၤမိၤၡ့ သးထီၣ်ဝဲ ပှၤလၢအဘၣ် တၢ်ဃုထၢအီၤလၢ ကတီခိၣ်ရိၤမဲတၢ်ဒုး, ပှၤတကထိ အခိၣ်တဖၣ် ဒီးပှၤတကယၤ အခိၣ်တဖၣ် လၢအဟဲက့ၤလၢ တၢ်ဒုးန့ၣ်လီၤ. ၁၅ စီၤမိၤၡ့ တဲအဝဲသ့ၣ်လၢ “မ့ၢ်သုပာ်မူ ပှၤပိာ်မုၣ် ကိးဂၤဒဲးဧါ. ၁၆ မ့ၢ်လၢ စီၤဘံးလၣ် အတၢ်ကတိၤအဃိ အဝဲသ့ၣ် ကွဲန့ၢ်လွဲန့ၢ် ပှၤအံၣ်စရ့လးဖိတဖၣ်လၢ ကဃၣ်ကွံာ်အသး+ လၢယဟိဝၤယွၤ အအိၣ် ဒီးကဘူၣ်ထီၣ်ဘါထီၣ် ယွၤလၢအကမၣ် ပဧိၢ်လီၤ.+ အဃိ တၢ်ဆါသံသတြိာ် လီၤဘၣ် ယဟိဝၤယွၤ အပှၤဂီၢ်မုၢ်လီၤ.+ ၁၇ ခဲအံၤန့ၣ် သုကဘၣ်မၤသံ ပှၤဖိသၣ်ပိာ်ခွါ ကိးဂၤဒဲးလၢ ဖိသၣ်တဖၣ်အကျါ ဒီးသုကဘၣ် မၤသံ ပှၤပိာ်မုၣ် ကိးဂၤဒဲးလၢ အမံဃုာ်တ့ၢ်ဒီး ပှၤပိာ်ခွါလီၤ. ၁၈ ဘၣ်ဆၣ် မ့မ့ၢ် ပိာ်မုၣ်သးစၢ်တဖၣ်လၢ အတမံဃုာ်ဘၣ် ဒီးပှၤပိာ်ခွါ နီတဘျီဘၣ်န့ၣ် သုပာ်မူအဝဲသ့ၣ် ကိးဂၤဒဲးသ့လီၤ.+ ၁၉ ဒီးသုကဘၣ် သူၣ်လီၤသုဒဲ လၢဒဲကဝီၤအချၢ ဒီးအိၣ်လီၤဆီဖဲန့ၣ် နွံသီလီၤ. ပှၤကိးဂၤဒဲးလၢ အမၤသံဘၣ် ပှၤတဂၤဂၤ ဒီးပှၤကိးဂၤဒဲးလၢ အဖီၣ်ဘၣ် ပှၤလၢအဘၣ် တၢ်မၤသံအီၤ တဂၤဂၤန့ၣ်+ ကဘၣ်မၤကဆှီထီၣ်အသး+ ဖဲသၢသီတသီ ဒီးဖဲနွံသီတသီလီၤ. သုဒီးပှၤလၢ အဘၣ်တၢ်ဖီၣ်န့ၢ်အီၤ တဖၣ်န့ၣ် ကဘၣ်မၤဝဲ ဒ်န့ၣ်လီၤ. ၂၀ ကယဲၢ်တၢ်ကူတၢ်ကၤ, တၢ်လၢ ပှၤတ့အီၤလၢ ဆၣ်ဖိကီၢ်ဖိအဘ့ၣ်, တၢ်လၢ ပှၤတ့အီၤလၢ မဲာ်တဲးလဲး အဆူၣ် ဒီးတၢ်လၢ ပှၤတ့အီၤလၢသ့ၣ် ခဲလၢာ်န့ၣ် သုကဘၣ် မၤကဆှီထီၣ်အီၤ လၢတၢ်ဒဲးဘးလီၤ.”
၂၁ ပှၤလုၢ်တၢ်ဒိၣ် စီၤအလၤဧစၢ် တဲဝဲ ပှၤသုးဖိလၢ အလဲၤဒုးတၢ်တဖၣ်န့ၣ်လၢ “တၢ်သိၣ်တၢ်သီလၢ ယဟိဝၤယွၤ မၤလိာ်စီၤမိၤၡ့န့ၣ် မ့ၢ်ဝဲ ဒ်အံၤလီၤ. ၂၂ ‘ထူ, စ့ညၣ်, တိၢ်ဘီ, ထး, ထးဝါ, စၢၢ်တဖၣ် ၂၃ ဒီးတၢ်ခဲလၢာ်လၢ အတူၢ်မ့ၣ်အူကဲန့ၣ် ဒုးလဲၤခီဂာ်အီၤလၢ မ့ၣ်အူကျါ ဒီးအက ကဆှီထီၣ်လီၤ. ဘၣ်ဆၣ် သုကဘၣ် သ့ကဆှီစ့ၢ်ကီးအီၤဒီး ထံလၢ တၢ်မၤကဆှီထီၣ်က့ၤတၢ် အဂီၢ်လီၤ.+ မ့မ့ၢ်တၢ်လၢ အတူၢ်မ့ၣ်အူ တကဲဘၣ်တဖၣ်န့ၣ် သုကဘၣ် သ့အီၤဒီး ထံလီၤ. ၂၄ ဖဲနွံသီတသီန့ၣ် သုကဘၣ် ဆှုၣ်သုတၢ်ကူတၢ်ကၤ ဒီးသုက ကဆှီထီၣ်လီၤ. ဝံၤဒီး သုနုာ်လီၤလၢ ဒဲကဝီၤအပူၤ သ့လီၤ.’”+
၂၅ ယဟိဝၤယွၤ တဲစီၤမိၤၡ့လၢ ၂၆ “ဂံၢ်ကွၢ် ပှၤကညီ ဒီးဆၣ်ဖိကီၢ်ဖိ လၢပှၤဖီၣ်န့ၢ်အီၤတဖၣ် ဒီးကွဲးလီၤ တၢ်ဖိတၢ်လံၤလၢ အဘၣ်တၢ်ဂုာ်န့ၢ်ဆူၣ်အီၤတဖၣ် အစရီတက့ၢ်. နၤဒီးပှၤလုၢ်တၢ်ဒိၣ် စီၤအလၤဧစၢ် ဒီးဒူၣ်ဖိထၢဖိ အခိၣ်အနၢ်တဖၣ်န့ၣ် သုကဘၣ်မၤ ဒ်န့ၣ်လီၤ. ၂၇ တၢ်ဖိတၢ်လံၤလၢ အဘၣ်တၢ်ဂုာ်န့ၢ်ဆူၣ်အီၤတဖၣ်န့ၣ် နီၤဖးအီၤ ခံပူၣ် ဒ်သိး တၢ်ကနီၤလီၤအီၤလၢ ပှၤလၢ အလဲၤဒုးတၢ်တဖၣ် အအိၣ် ဒီးပှၤဂီၢ်မုၢ်လၢ အအိၣ်တ့ၢ်တဖၣ် အအိၣ် အဂီၢ်တက့ၢ်.+ ၂၈ လၢပှၤသုးဖိလၢ အလဲၤဒုးတၢ်တဖၣ် အအိၣ်န့ၣ် နကဘၣ်ဟံးန့ၢ် ပိာ်မုၣ်တဂၤ* လၢပိာ်မုၣ်အဂၤ ၅၀၀ အကျါ ဒီးနကဘၣ်ဟံးန့ၢ် ဆၣ်ဖိကီၢ်ဖိ လၢအမ့ၢ် ကျီၢ်, ကသ့ၣ်ယီၤ သိဒီးမဲာ်တဲးလဲး အဒု ၅၀၀ အကျါတဒု ဒီးဟ့ၣ်လီၤ ယဟိဝၤယွၤ ဒ်တၢ်ခိတၢ်သွဲ အသိးလီၤ. ၂၉ နကဘၣ် ဟံးန့ၢ်အီၤ လၢတၢ်တဝာ် လၢပှၤသုးဖိ ဒိးန့ၢ်ဘၣ်ဝဲ အကျါ ဒီးဟ့ၣ်လီၤအီၤလၢ ပှၤလုၢ်တၢ်ဒိၣ် စီၤအလၤဧစၢ် အအိၣ် ဒ်တၢ်မၤဘူၣ်လၢ ယဟိဝၤယွၤအဂီၢ် အသိးလီၤ.+ ၃၀ ဒီးလၢတၢ်တဝာ်လၢ ပှၤအံၣ်စရ့လးဖိတဖၣ် ဒိးန့ၢ်ဘၣ်ဝဲ အကျါန့ၣ် နကဘၣ် ဟံးန့ၢ် ပိာ်မုၣ်တဂၤလၢ ပိာ်မုၣ်အဂၤ ၅၀ အကျါ ဒီးနကဘၣ်ဟံးန့ၢ် ကျီၢ်, ကသ့ၣ်ယီၤ သိဒီးမဲာ်တဲးလဲး ဒီးဆၣ်ဖိကီၢ်ဖိ အဒၢကိးကလုာ်ဒဲး အဒု ၅၀ အကျါတဒု ဒီးဟ့ၣ်လီၤ ပှၤလ့ၤဝံဖိတဖၣ်လီၤ.+ ပှၤလ့ၤဝံဖိတဖၣ်အံၤ မၤဝဲ မူဒါလၢ အဘၣ်ထွဲဒီး ယဟိဝၤယွၤ အဒဲစီဆှံလီၤ.”+
၃၁ အဃိ စီၤမိၤၡ့ ဒီးပှၤလုၢ်တၢ်ဒိၣ် စီၤအလၤဧစၢ် မၤဝဲဒ် ယဟိဝၤယွၤ မၤလိာ် စီၤမိၤၡ့ အသိးလီၤ. ၃၂ တၢ်လၢ ပှၤသုးဖိတဖၣ် ဂုာ်န့ၢ်ဆူၣ်ဝဲ လၢအအိၣ်တ့ၢ်တဖၣ်န့ၣ် မ့ၢ်ဝဲ သိဒီးမဲာ်တဲးလဲး အဒု ၆၇၅,၀၀၀, ၃၃ ကျီၢ်အဒု ၇၂,၀၀၀, ၃၄ ဒီးကသ့ၣ်ယီၤ အဒု ၆၁,၀၀၀ လီၤ. ၃၅ ပှၤပိာ်မုၣ်လၢ အတမံဃုာ် ဘၣ်ဒီး ပှၤပိာ်ခွါ နီတဘျီ ဒံးဘၣ်န့ၣ်+ အိၣ်ဝဲ အဂၤ ၃၂,၀၀၀ လီၤ. ၃၆ တၢ်တဝာ် လၢပှၤသုးဖိလၢ အလဲၤဒုးတၢ်တဖၣ် အဂီၢ်န့ၣ် အိၣ်ဝဲ သိဒီးမဲာ်တဲးလဲး အဒု ၃၃၇,၅၀၀ လီၤ. ၃၇ သိဒီးမဲာ်တဲးလဲးလၢ ပှၤဟ့ၣ်လီၤအီၤဒ် တၢ်ခိတၢ်သွဲ လၢယဟိဝၤယွၤ အအိၣ်န့ၣ် အိၣ်ဝဲ ၆၇၅ ဒုလီၤ. ၃၈ ဒီးကျီၢ်အိၣ်ဝဲ အဒု ၃၆,၀၀၀ ဒီးပှၤဟ့ၣ်လီၤအီၤဒ် တၢ်ခိတၢ်သွဲ လၢယဟိဝၤယွၤ အအိၣ်န့ၣ် အိၣ်ဝဲ ၇၂ ဒုလီၤ. ၃၉ ကသ့ၣ်ယီၤ အိၣ်ဝဲ အဒု ၃၀,၅၀၀ ဒီးပှၤဟ့ၣ်လီၤအီၤဒ် တၢ်ခိတၢ်သွဲ လၢယဟိဝၤယွၤ အအိၣ်န့ၣ် အိၣ်ဝဲ ၆၁ ဒုလီၤ. ၄၀ ပှၤကညီ အိၣ်ဝဲ အဂၤ ၁၆,၀၀၀ ဒီးပှၤလၢအဘၣ် တၢ်ဟ့ၣ်လီၤအီၤဒ် တၢ်ခိတၢ်သွဲ လၢယဟိဝၤယွၤ အအိၣ်န့ၣ် အိၣ်ဝဲ ၃၂ ဂၤလီၤ. ၄၁ ဒ်ယဟိဝၤယွၤ မၤလိာ် စီၤမိၤၡ့ အသိး စီၤမိၤၡ့ ဟ့ၣ်လီၤဝဲ တၢ်ခိတၢ်သွဲ လၢယဟိဝၤယွၤအဂီၢ် လၢပှၤလုၢ်တၢ်ဒိၣ် စီၤအလၤဧစၢ် အအိၣ်လီၤ.+
၄၂ တၢ်လၢပှၤလၢအလဲၤဒုးတၢ် ဟဲက့ၤစိာ်ဝဲတဖၣ် အကျါ တၢ်တဝာ်လၢ စီၤမိၤၡ့ နီၤဖးလီၤဝဲလၢ ပှၤအံၣ်စရ့လးဖိတဖၣ် အဂီၢ်န့ၣ် ၄၃ မ့ၢ်ဝဲ သိဒီးမဲာ်တဲးလဲး အဒု ၃၃၇,၅၀၀ ၄၄ ဒီးကျီၢ်အိၣ်ဝဲ အဒု ၃၆,၀၀၀, ၄၅ ကသ့ၣ်ယီၤ အိၣ်ဝဲ အဒု ၃၀,၅၀၀ ၄၆ ဒီးပှၤကညီန့ၣ် အိၣ်ဝဲအဂၤ ၁၆,၀၀၀ လီၤ. ၄၇ ဒီးဒ်ယဟိဝၤယွၤ မၤလိာ် စီၤမိၤၡ့အသိး လၢတၢ်တဝာ်လၢ ပှၤအံၣ်စရ့လးဖိတဖၣ် ဒိးန့ၢ်ဘၣ်ဝဲ အကျါန့ၣ် စီၤမိၤၡ့ ဟံးန့ၢ် ပိာ်မုၣ်တဂၤ လၢပိာ်မုၣ်အဂၤ ၅၀ အကျါ ဒီးဟံးန့ၢ်ဝဲ ဆၣ်ဖိကီၢ်ဖိ တဒု လၢအဒု ၅၀ အကျါ ဒီးဟ့ၣ်လီၤဝဲ ပှၤလ့ၤဝံဖိတဖၣ်လၢ+ အမၤဝဲ မူဒါလၢ အဘၣ်ထွဲဒီး ယဟိဝၤယွၤ အဒဲစီဆှံလီၤ.+
၄၈ ဒီးပှၤလၢ အဘၣ်တၢ်ဃုထၢအီၤလၢ သုးမုၢ် အသုးက့တဖၣ်အကျါ+ လၢအမ့ၢ် ပှၤတကထိ အခိၣ်တဖၣ် ဒီးပှၤတကယၤ အခိၣ်တဖၣ်န့ၣ် လဲၤလၢ စီၤမိၤၡ့အအိၣ် ၄၉ ဒီးအဝဲသ့ၣ် တဲစီၤမိၤၡ့လၢ “ပဝဲ နခ့နပှၤတဖၣ်န့ၣ် ပဂံၢ်ပှၤသုးဖိလၢ အအိၣ်လၢ ပဖီလာ်တဖၣ် ဒီးအဝဲသ့ၣ် တလီၤမၢ် နီတဂၤဘၣ်.+ ၅၀ တၢ်ဖိတၢ်လံၤလၢ ပဒိးန့ၢ်ဘၣ်အီၤတဖၣ် လၢအမ့ၢ် ထူ, ခီၣ်ကျီၤတဖၣ်, ထံဖှံၣ်တဖၣ်, ပသံးတဖၣ်, နၢ်ဒံးတဖၣ် ဒီးတၢ်မၤဃံမၤလၤတၢ် လၢအဂၤတဖၣ်န့ၣ် ပျဲပဝဲတဂၤစုာ်စုာ် ဟ့ၣ်လီၤအီၤ ဒ်တၢ်လုၢ်လၢ ယဟိဝၤယွၤအအိၣ် ဒ်သိး တၢ်ကမၤဘၣ်လိာ်ဖိးဒ့က့ၤတၢ် လၢပဂီၢ် လၢယဟိဝၤယွၤ အမဲာ်ညါတက့ၢ်.”
၅၁ ဒီးစီၤမိၤၡ့ ဒီးပှၤလုၢ်တၢ်ဒိၣ် စီၤအလၤဧစၢ် တူၢ်လိာ်ဝဲ ထူတဖၣ် ဒီးတၢ်မၤဃံမၤလၤတၢ် ခဲလၢာ် လၢအဝဲသ့ၣ် အအိၣ်လီၤ. ၅၂ ထူလၢ ပှၤတကထိ အခိၣ်တဖၣ် ဒီးပှၤတကယၤ အခိၣ်တဖၣ် ဟ့ၣ်လီၤဝဲ ဒ်တၢ်မၤဘူၣ်လၢ ယဟိဝၤယွၤ အအိၣ်န့ၣ် အိၣ်ဝဲ ခဲလၢာ်ခဲဆ့ ၁၆,၇၅၀ ၡက့လးလီၤ.* ၅၃ ဒီးပှၤသုးဖိ တဂၤစုာ်စုာ်န့ၣ် ဟံးန့ၢ်ဝဲ တၢ်လၢ အဂုာ်န့ၢ်ဆူၣ်ဝဲတဖၣ် လၢအနီၢ်ကစၢ် အဂီၢ်လီၤ. ၅၄ ဒီးစီၤမိၤၡ့ ဒီးပှၤလုၢ်တၢ်ဒိၣ် စီၤအလၤဧစၢ် တူၢ်လိာ်ဝဲ ထူလၢ ပှၤတကထိ အခိၣ်တဖၣ် ဒီးပှၤတကယၤ အခိၣ်တဖၣ် အအိၣ် ဒီးလဲၤစိာ်ဝဲလၢ တၢ်အိၣ်ဖှိၣ် အဒဲပူၤ လၢယဟိဝၤယွၤ အမဲာ်ညါ ဒ်တၢ်သ့ၣ်နီၣ်ထီၣ်လၢ ပှၤအံၣ်စရ့လးဖိတဖၣ် အဂီၢ်လီၤ.
၃၂ စီၤရူၤဘ့ၣ် အစၢၤအသွဲၣ်တဖၣ်+ ဒီးစီၤကး အစၢၤအသွဲၣ်တဖၣ်+ အိၣ်ဒီး အဆၣ်ဖိကီၢ်ဖိ အါမး ဒီးအဝဲသ့ၣ် ထံၣ်ဝဲလၢ တၢ်လီၢ်လၢအမ့ၢ် ယၤစ့ၢ်+ ဒီးကံးလဧးန့ၣ် မ့ၢ်ဝဲ တၢ်လီၢ်လၢ အဂ့ၤလၢ ဆၣ်ဖိကီၢ်ဖိတဖၣ် အဂီၢ်လီၤ. ၂ အဃိ စီၤရူၤဘ့ၣ် အစၢၤအသွဲၣ်တဖၣ် ဒီးစီၤကး အစၢၤအသွဲၣ်တဖၣ် လဲၤလၢစီၤမိၤၡ့, ပှၤလုၢ်တၢ်ဒိၣ် စီၤအလၤဧစၢ် ဒီးပှၤဂီၢ်မုၢ် အခိၣ်အနၢ်တဖၣ် အအိၣ် ဒီးတဲဝဲလၢ ၃ “ဧးတၤရိး, ဒံၤဘိၣ်, ယၤစ့ၢ်, နံးမရၤ, ဃ့ၡဘိၣ်,+ အ့လဧၤလ့ၤ, စဘၣ်, နဘိ+ ဒီးဘဧိၣ်+ ၄ လၢအမ့ၢ် တၢ်လီၢ်လၢ ယဟိဝၤယွၤ မၤနၢၤဝဲလၢ အံၣ်စရ့လး အပှၤဂီၢ်မုၢ်တဖၣ် အမဲာ်ညါန့ၣ်+ ဂ့ၤဝဲလၢ ဆၣ်ဖိကီၢ်ဖိအဂီၢ် ဒီးပဝဲ နခ့နပှၤတဖၣ်အံၤန့ၣ် အိၣ်ဒီး ဆၣ်ဖိကီၢ်ဖိ အါမးလီၤ.”+ ၅ အဝဲသ့ၣ် ဆဲးတဲဝဲလၢ “နမ့ၢ်ဘၣ်သူၣ်ဘၣ်သးပှၤန့ၣ် ဟ့ၣ်လီၤပှၤ တၢ်လီၢ်အဝဲန့ၣ် ဒ်ပတၢ်အသိး တက့ၢ်. ဒီးတဘၣ်မၢ ပလဲၤခီဂာ် ထံကျိယၢ်ဒ့ၣ်တဂ့ၤ.”
၆ စီၤမိၤၡ့ တဲဝဲ စီၤရူၤဘ့ၣ် အစၢၤအသွဲၣ်တဖၣ် ဒီးစီၤကး အစၢၤအသွဲၣ်တဖၣ်လၢ “ဖဲသုဒီပုၢ်ဝဲၢ်တဖၣ် လဲၤဒုးတၢ်အခါ သုကအိၣ်တ့ၢ် ဖဲအံၤန့ၣ်. ၇ ဘၣ်မနုၤအဃိ သုအဲၣ်ဒိးမၤလီၤစၢ် ပှၤအံၣ်စရ့လးဖိတဖၣ် အသးဂံၢ်ဘါ လၢကလဲၤနုာ်လီၤလၢ ကီၢ်လၢ ယဟိဝၤယွၤ ကဟ့ၣ်လီၤ အဝဲသ့ၣ် သပှၢ်ကတၢၢ်န့ၣ်လဲၣ်. ၈ ဖဲသုပၢ်တဖၣ် အိၣ်လၢကၤဒ့ၣ်ဘၢ်န့ ဒီးယဆှၢလီၤအဝဲသ့ၣ် လၢကလဲၤကွၢ်ဝဲ ကီၢ်တဘ့ၣ်န့ၣ်အခါ အဝဲသ့ၣ် မၤဝဲဒ်န့ၣ်လီၤ.+ ၉ ဖဲအဝဲသ့ၣ် လဲၤတုၤလၢ တၢ်တြီၤ အ့ၡကိၤလး+ ဒီးထံၣ်ဝဲ ကီၢ်တဘ့ၣ်န့ၣ်အခါ အဝဲသ့ၣ် မၤလီၤစၢ် ပှၤအံၣ်စရ့လးဖိတဖၣ် အသးဂံၢ်ဘါ လၢကလဲၤနုာ်လီၤလၢ ကီၢ်တဘ့ၣ်လၢ ယဟိဝၤယွၤ ကဟ့ၣ်လီၤ အဝဲသ့ၣ်လီၤ.+ ၁၀ ဖဲတၢ်တနံၤန့ၣ် ယဟိဝၤယွၤ သးဒိၣ်ထီၣ်တၢ်အဃိ အအၢၣ်လီၤဝဲလၢ+ ၁၁ ‘ပှၤလၢ အဟးထီၣ်လၢ ကီၢ်အဲၤကူပတူးအပူၤ လၢအသးနံၣ်အိၣ် ၂၀ ဒီးဆူအဖီခိၣ်န့ၣ် တဒိကနၣ်ယၤ လၢအသးဒီဖျၢၣ်ဘၣ် အဃိ အဝဲသ့ၣ် တဘၣ်ထံၣ်ဘၣ် ကီၢ်လၢ+ ယအၢၣ်လီၤလၢ ယကဟ့ၣ် စီၤအၤဘြၤဟၣ်, စီၤအံၤစဲး ဒီးစီၤယၤကိာ်ဘၣ်.+ ၁၂ ထဲဒၣ် ပှၤကနးဖိ စီၤယဖူန့ၤ အဖိခွါ စီၤကၤလ့း+ ဒီးစီၤနိၣ် အဖိခွါ စီၤယိၤၡူန့ၣ်+ ကထံၣ်ဘၣ်ဝဲ မ့ၢ်လၢ အဝဲသ့ၣ် ဒိကနၣ် ယဟိဝၤယွၤ လၢအသးဒီးဖျၢၣ်ညါ အဃိလီၤ.’+ ၁၃ အဃိ ယဟိဝၤယွၤ သးဒိၣ်ထီၣ် ပှၤအံၣ်စရ့လးဖိ ဒီးဒုးဟးဝ့ၤဝီၤ အဝဲသ့ၣ်လၢ ပှၢ်မုၢ်ကနၢ အနံၣ် ၄၀+ တုၤလၢ ပှၤတစိၤလၢ အမၤတၢ်အၢလၢ ယဟိဝၤယွၤ အမဲာ်ညါ လၢာ်ကွံာ်ဝဲ ခဲလၢာ်လီၤ.+ ၁၄ ဒီးခဲအံၤ သုထီၣ်က့ၤ သုပၢ်တဖၣ်အလီၢ် ဒ်ပှၤတၢ်ဒဲးဘးဖိ တဒူၣ်လၢ အမၤအါထီၣ် ယဟိဝၤယွၤ အတၢ်သးဒိၣ်လၢ ပှၤအံၣ်စရ့လးဖိ အဖီခိၣ်လီၤ. ၁၅ သုမ့ၢ်တဒိကနၣ် အကလုၢ်လၢၤဘၣ်န့ၣ် အဝဲ ကပာ်တ့ၢ်ကွံာ်ကဒီး ပှၤအံၣ်စရ့လးဖိလၢ ပှၢ်မုၢ်ကနၢအပူၤ သပှၢ်ကတၢၢ် ဒီးပှၤဂီၢ်မုၢ်ခဲလၢာ် ကဟးဂီၤကွံာ် လၢသုဃိလီၤ.”
၁၆ လၢခံ အဝဲသ့ၣ်လဲၤလၢ စီၤမိၤၡ့အအိၣ် ဒီးတဲဝဲလၢ “ပျဲပတ့ထီၣ် ပသိကရၢၢ်တဖၣ်လၢလၢၢ် ဒီးသူၣ်ထီၣ်ဝ့ၢ်တဖၣ်လၢ ပဖိတဖၣ်အဂီၢ်လၢ တၢ်လီၢ်ဖဲအံၤ တက့ၢ်. ၁၇ ဒီးဖဲပဖိတဖၣ် အိၣ်ဘၣ်လၢ ဝ့ၢ်တဖၣ်လၢ အအိၣ်ဒီး အဒူၣ်လၢအကျၢၤအပူၤ ဒီးအိၣ်ဘၣ်ဝဲ ပူၤပူၤဖျဲးဖျဲးလၢ ပှၤကီၢ်ဖိတဖၣ်အစုပူၤ အခါ ပဝဲဒၣ်အံၤ ပကအိၣ်ကတဲာ်ကတီၤပသး ထီဘိလၢ တၢ်ဒုးအဂီၢ်+ ဒီးပကလဲၤတၢ်လၢ ပှၤအံၣ်စရ့လးဖိ အမဲာ်ညါ တုၤလၢ ပလဲၤဆှၢ အဝဲသ့ၣ်လၢ အတၢ်လီၢ်လီၤ. ၁၈ ဒီးတချုးလၢ ပှၤအံၣ်စရ့လးဖိ တဂၤစုာ်စုာ် ဒိးန့ၢ်ဘၣ် ဟီၣ်ခိၣ် ဒ်အတၢ်န့ၢ်သါအသိး ဒံးဘၣ်န့ၣ် ပတက့ၤလၢ ပဟံၣ်ဘၣ်.+ ၁၉ ဒီးမ့ၢ်လၢ ပဒိးန့ၢ်ဘၣ် ပတၢ်န့ၢ်သါလၢ ထံကျိယၢ်ဒ့ၣ် အမုၢ်ထီၣ်တခီလံ အဃိ ပတဟံးန့ၢ် တၢ်န့ၢ်သါလၢ ထံကျိယၢ်ဒ့ၣ် အဝၢ်ဘးခီ ဃုာ်ဒီး ပှၤအံၣ်စရ့လးဖိအဂၤတဖၣ် လၢၤဘၣ်.”+
၂၀ စီၤမိၤၡ့ တဲဆၢက့ၤ အဝဲသ့ၣ်လၢ “မ့မ့ၢ်ဒ်န့ၣ်န့ၣ် သုကဘၣ်ဖီၣ်ထီၣ် စုကဝဲၤလၢ ယဟိဝၤယွၤ အမဲာ်ညါ လၢတၢ်ဒုးအဂီၢ်လီၤ.+ ၂၁ ဒီးဖဲယဟိဝၤယွၤ နီဟးထီၣ်ကွံာ် အဒုၣ်ဒါတဖၣ်လၢ အမဲာ်ညါအခါ သုကိးဂၤဒဲး ကဘၣ်ဖီၣ်ထီၣ် စုကဝဲၤ ဒီးခီဂာ်ထံကျိယၢ်ဒ့ၣ်လၢ အမဲာ်ညါ+ ၂၂ တုၤလၢ ပှၤမၤန့ၢ်ကီၢ် လၢယဟိဝၤယွၤ အမဲာ်ညါလီၤ.+ ဝံၤဒီး သုက့ၤသ့လီၤ.+ သုမ့ၢ်မၤဒ်န့ၣ်န့ၣ် လၢယဟိဝၤယွၤ အမဲာ်ညါမ့ၢ်ဂ့ၤ လၢပှၤအံၣ်စရ့လးဖိ အမဲာ်ညါမ့ၢ်ဂ့ၤ သုတၢ်ကမၣ် တအိၣ်ဘၣ်. ဒီးဟီၣ်ကဝီၤတဘ့ၣ်အံၤ ကကဲထီၣ်သုတၢ် လၢယဟိဝၤယွၤ အမဲာ်ညါလီၤ.+ ၂၃ ဘၣ်ဆၣ် သုမ့ၢ်တမၤ ဒ်န့ၣ်ဘၣ်န့ၣ် မ့ၢ်ဒၣ် သုမၤတၢ်ဒဲးဘး လၢအထီဒါ ယဟိဝၤယွၤလီၤ. ဒီးသုကဘၣ် သ့ၣ်ညါလၢ သုတၢ်ဒဲးဘး တခါအံၤန့ၣ် ကချုးန့ၢ်သုလီၤ. ၂၄ သုသူၣ်ထီၣ် ဝ့ၢ်တဖၣ်လၢ သုဖိတဖၣ်အဂီၢ် ဒီးသုတ့ထီၣ် သိကရၢၢ်တဖၣ် လၢလၢၢ် သ့ဝဲ+ ဘၣ်ဆၣ် သုကဘၣ်မၤဒ် သုအၢၣ်လီၤတ့ၢ် အသိးလီၤ.”
၂၅ စီၤကး အစၢၤအသွဲၣ်တဖၣ် ဒီးစီၤရူၤဘ့ၣ် အစၢၤအသွဲၣ်တဖၣ် တဲစီၤမိၤၡ့လၢ “ပဝဲ နခ့နပှၤတဖၣ် ပကမၤဒ် ပကစၢ် မၤလိာ်ဝဲ အသိးလီၤ. ၂၆ ပဖိပမါတဖၣ်, ပဆၣ်ဖိကီၢ်ဖိတဖၣ် ဒီးပဆၣ်ဖိကီၢ်ဖိ အဒၢ ခဲလၢာ်န့ၣ် ကအိၣ်ဝဲလၢ ကံးလဧး အဝ့ၢ်တဖၣ် အပူၤလီၤ.+ ၂၇ ဘၣ်ဆၣ် မ့မ့ၢ် ပဝဲပှၤပိာ်ခွါ ကိးဂၤဒဲးန့ၣ် ပကလဲၤခီဂာ်တၢ် ဒီးပကအိၣ်ကတဲာ်ကတီၤပသးလၢ ပကလဲၤဒုးတၢ် လၢယဟိဝၤယွၤအဂီၢ်+ ဒ်ပကစၢ် တဲဝဲအသိးလီၤ.”
၂၈ အဃိ ဘၣ်ဃးဒီး အဝဲသ့ၣ်န့ၣ် စီၤမိၤၡ့ ဟ့ၣ်လီၤ တၢ်မၤလိာ်လၢ ပှၤလုၢ်တၢ်ဒိၣ် စီၤအလၤဧစၢ်, စီၤနိၣ်အဖိခွါ စီၤယိၤၡူ ဒီးအံၣ်စရ့လး အဒူၣ်ဖိထၢဖိ အခိၣ်အနၢ်တဖၣ် အအိၣ်လီၤ. ၂၉ စီၤမိၤၡ့ တဲအဝဲသ့ၣ်လၢ “ပှၤပိာ်ခွါကိးဂၤဒဲးလၢ စီၤကး အစၢၤအသွဲၣ်တဖၣ် ဒီးစီၤရူၤဘ့ၣ် အစၢၤအသွဲၣ်တဖၣ်အကျါ မ့ၢ်လဲၤခီဂာ် ထံကျိယၢ်ဒ့ၣ် ဃုာ်ဒီးသု ဒီးမ့ၢ်လဲၤဒုးတၢ် လၢယဟိဝၤယွၤ အဂီၢ် ဒီးသုမ့ၢ် မၤန့ၢ် ကီၢ်တဘ့ၣ်န့ၣ်န့ၣ် သုကဘၣ်ဟ့ၣ်လီၤ အဝဲသ့ၣ်လၢ ကံးလဧး အဟီၣ်ကဝီၤ ဒ်အဝဲသ့ၣ် အတၢ်အသိးလီၤ.+ ၃၀ ဘၣ်ဆၣ် အဝဲသ့ၣ် မ့ၢ်တဖီၣ်ထီၣ် တၢ်စုကဝဲၤ ဒီးခီဂာ်တၢ်ဒီး သုဘၣ်န့ၣ် အဝဲသ့ၣ် ကဘၣ် အိၣ်ဝဲဆိးဝဲဒီးသု လၢကီၢ်ကနၤဧၣ် အပူၤလီၤ.”
၃၁ ဘၣ်ဃးဒီး တၢ်ဂ့ၢ်အံၤန့ၣ် စီၤကး အစၢၤအသွဲၣ်တဖၣ် ဒီးစီၤရူၤဘ့ၣ် အစၢၤအသွဲၣ်တဖၣ် တဲဆၢဝဲလၢ “တၢ်လၢ ယဟိဝၤယွၤ တဲဘၣ် ပဝဲ နခ့နပှၤတဖၣ်န့ၣ် ပကမၤလီၤ. ၃၂ ပကဖီၣ်ထီၣ် တၢ်စုကဝဲၤတဖၣ် ဒီးပကလဲၤနုာ်လီၤလၢ ကီၢ်ကနၤဧၣ်အပူၤ လၢယဟိဝၤယွၤ အမဲာ်ညါလီၤ.+ ဘၣ်ဆၣ် တၢ်န့ၢ်သါလၢ ပကဒိးန့ၢ်ဘၣ်အီၤန့ၣ် ကအိၣ်လၢ ထံကျိယၢ်ဒ့ၣ် အမုၢ်ထီၣ် တကပၤလီၤ.” ၃၃ အဃိ စီၤမိၤၡ့ ဟ့ၣ်လီၤဝဲ ပှၤအမိၢ်ဖိ အစီၤပၤစံဃိၣ် အဘီအမုၢ်,+ ဘၤၡၣ် အစီၤပၤဧိာ် အဘီအမုၢ်+ ဒီးတၢ်လီၢ်တၢ်ကျဲလၢ အဘၣ်ဃးဒီး ဝ့ၢ်လၢ အအိၣ်လၢ ဟီၣ်ကဝီၤ ဖဲန့ၣ်တဖၣ် ခဲလၢာ် ဒီးဝ့ၢ်တဖၣ်လၢ အအိၣ်ဝဲလၢ တၢ်ခိၣ်တၢ်ဃၢၤ ဖဲန့ၣ်လၢ ပှၤကးဖိ, ပှၤရူၤဘ့ၣ်ဖိ+ ဒီးစီၤယိၤသး အဖိခွါ စီၤမနၤၡ့ၤ အဒူၣ်တဝာ်+ အအိၣ်လီၤ.
၃၄ ဒီးစီၤကး အစၢၤအသွဲၣ်တဖၣ်န့ၣ် သူၣ်ထီၣ်ဝဲ* ဝ့ၢ်ဒံၤဘိၣ်,+ ဝ့ၢ်ဧးတၤရိး,+ ဝ့ၢ်ဧရိၤဧ့ၢ်,+ ၃၅ ဝ့ၢ်ဧးတရိးၡိဖၣ်, ဝ့ၢ်ယၤစ့ၢ်+ ဒီးဝ့ၢ်ယၤကဘၤ,+ ၃၆ ဝ့ၢ်ဘ့ၤသနံးမရၤ+ ဒီးဝ့ၢ်ဘ့ၤသဟၤရံၣ်+ လၢအမ့ၢ် ဝ့ၢ်လၢအအိၣ်ဒီး အဒူၣ်လၢ အကျၢၤတဖၣ် ဒီးအဝဲသ့ၣ် တ့ထီၣ် သိကရၢၢ်တဖၣ် လၢလၢၢ်လီၤ. ၃၇ ဒီးစီၤရူၤဘ့ၣ် အစၢၤအသွဲၣ်တဖၣ်န့ၣ် သူၣ်ထီၣ်ဝဲ ဝ့ၢ်ဃ့ၡဘိၣ်,+ ဝ့ၢ်အ့လဧၤလ့ၤ,+ ဝ့ၢ်ကံးရယးသံၣ်,+ ၃၈ ဝ့ၢ်နဘိ+ ဒီးဝ့ၢ်ဘဧၤလးမဧိၣ်+ (ဝ့ၢ်တဖၣ်အံၤအမံၤ ဘၣ်တၢ်ဆီတလဲအီၤ) ဒီးဝ့ၢ်စံးဘမၤလီၤ. ဖဲအဝဲသ့ၣ် သူၣ်ထီၣ်က့ၤဝဲ ဝ့ၢ်တဖၣ်အံၤ ဝံၤအလီၢ်ခံ အဝဲသ့ၣ် ကိးက့ၤဝဲ ဝ့ၢ်တဖၣ်အံၤအမံၤ လၢအသီလီၤ.
၃၉ စီၤမနၤၡ့ၤ အစၢၤအသွဲၣ် လၢအမ့ၢ် ပှၤမၤကံၢ်ဖိတဖၣ်န့ၣ်+ လဲၤထီၣ်မၤန့ၢ် ကံးလဧး အဟီၣ်ကဝီၤလီၤ. ဒီးအဝဲသ့ၣ် နီဟးထီၣ်ကွံာ် ပှၤအမိၢ်ဖိလၢ အအိၣ်ဖဲန့ၣ်တဖၣ်လီၤ. ၄၀ အဃိ စီၤမိၤၡ့ ဟ့ၣ်လီၤဝဲ စီၤမနၤၡ့ၤ အစၢၤအသွဲၣ် လၢအမ့ၢ် ပှၤမၤကံၢ်ဖိတဖၣ်လၢ ကံးလဧး အဟီၣ်ကဝီၤ ဒီးအဝဲသ့ၣ် အိၣ်ဆိးဝဲ ဖဲန့ၣ်လီၤ.+ ၄၁ ဒီးစီၤယၤအံၢ် လၢအမ့ၢ် စီၤမနၤၡ့ၤ အစၢၤအသွဲၣ်န့ၣ် လဲၤထီၣ်မၤန့ၢ်ဝဲ ဒူသဝီတဖၣ်လၢ အအိၣ်လၢ ဟီၣ်ကဝီၤဖဲန့ၣ် ဒီးကိးန့ၢ်ဝဲ အမံၤလၢ ဃၤပိးယၤအံၢ်လီၤ.+ ၄၂ ဒီးစီၤနိဘၤ လဲၤထီၣ်မၤန့ၢ်ဝဲ ကနး ဒီးအဒူသဝီတဖၣ် ဒီးအဝဲ ကိးန့ၢ်ဝဲအမံၤလၢ နိဘၤ လၢအမ့ၢ် ဒ်အနီၢ်ကစၢ် အမံၤအသိးလီၤ.
၃၃ ဖဲပှၤအံၣ်စရ့လးဖိ ဟးထီၣ်လၢ ကီၢ်အဲၤကူပတူးအပူၤ+ လၢစီၤမိၤၡ့ ဒီးစီၤအၤဟရိၣ် အတၢ်ဟံးစုနဲၣ်ကျဲ အဖီလာ်+ ဒ်သုးဖိ အဒူၣ်တဖၣ်အသိး ဝံၤအလီၢ်ခံ အဝဲသ့ၣ် အတၢ်လဲၤ တတီၤဘၣ်တတီၤန့ၣ်+ ဘၣ်တၢ်ပာ်ဖျါအီၤ လၢလာ်လီၤ. ၂ စီၤမိၤၡ့ ကွဲးနီၣ်ဃာ်ဝဲ တၢ်လီၢ်လၢ အဝဲသ့ၣ်လဲၤဝဲ တတီၤဘၣ်တတီၤ ဒ်ယဟိဝၤယွၤ မၤလိာ်အီၤ အသိးလီၤ. တၢ်လီၢ်လၢ အဝဲသ့ၣ်လဲၤဝဲ တတီၤဘၣ်တတီၤန့ၣ် အိၣ်ဝဲ ဒ်အံၤလီၤ.+ ၃ ဖဲလါအဆိကတၢၢ်တလါ, လါထီၣ် ၁၅ သီတသီန့ၣ်+ ပှၤအံၣ်စရ့လးဖိ ဟးထီၣ်ဝဲလၢ ရၤမစ့ အဟီၣ်ကဝီၤ အပူၤလီၤ.+ ဖဲဘူၣ်လဲၤကပာ်ဝံၤ လၢခံတသီန့ၣ်+ ပှၤအံၣ်စရ့လးဖိ ဟးထီၣ်ဝဲလၢ ပှၤအဲၤကူပတူးဖိခဲလၢာ် အမဲာ်ညါလၢ တၢ်သးဆူၣ်အပူၤလီၤ. ၄ ဖဲန့ၣ်အဆၢကတီၢ် ဘၣ်ဖဲ ပှၤအဲၤကူပတူးဖိ ခူၣ်လီၤကွံာ်ဝဲ အဖိဝဲၢ်ကိတဖၣ်လၢ ယဟိဝၤယွၤ မၤသံဝဲလၢ အဝဲသ့ၣ်အကျါ,+ မ့ၢ်လၢ ယဟိဝၤယွၤ စံၣ်ညီၣ် အဝဲသ့ၣ် အယွၤတဖၣ် အဃိလီၤ.+
၅ အဃိ ပှၤအံၣ်စရ့လးဖိတဖၣ် ဟးထီၣ်လၢ ရၤမစ့ အဟီၣ်ကဝီၤ ဒီးသူၣ်လီၤအဒဲဖဲ စူးကိၤသးလီၤ.+ ၆ အဝဲသ့ၣ် ဟးထီၣ်လၢ စူးကိၤသး ဒီးသူၣ်လီၤအဒဲဖဲ အ့သၣ်+ လၢအအိၣ်လၢ ပှၢ်မုၢ်ကနၢ အဃၢၤန့ၣ်လီၤ. ၇ အဝဲသ့ၣ် ဟးထီၣ်လၢ အ့သၣ် ဒီးဃၣ်ကဒါက့ၤ အခိၣ်ဆူ ပံၤဟဃံရိး လၢပှၤထံၣ်စိ ဘဧၤလးစဖိၣ် သ့ဝဲအလီၢ်လီၤ.+ ဒီးအဝဲသ့ၣ် သူၣ်လီၤအဒဲဖဲ မံးကဒိးလး အမဲာ်ညါလီၤ.+ ၈ အဝဲသ့ၣ် ဟးထီၣ်လၢ ပံၤဟဃံရိး, ခီဂာ်ဝဲ ပီၣ်လဲၣ်+ ဒီးလဲၤဝဲဆူ ပှၢ်မုၢ်ကနၢလီၤ.+ အဝဲသ့ၣ် ဆဲးလဲၤတၢ် သၢသီကျဲ လၢအ့သၣ် အပှၢ်မုၢ်ကနၢပူၤ+ ဒီးသူၣ်လီၤအဒဲဖဲ မၤရၤလီၤ.+
၉ အဝဲသ့ၣ် ဟးထီၣ်လၢ မၤရၤ ဒီးလဲၤတုၤဝဲလၢ အ့လံၣ်လီၤ. ဖဲအ့လံၣ်န့ၣ် ထံထီၣ်ပၢၢ်အိၣ်ဝဲ ၁၂ ခါ ဒီးသ့ၣ်စူၣ်ပလိၣ် အိၣ်ဝဲ အထူၣ် ၇၀ လီၤ. အဃိ အဝဲသ့ၣ် သူၣ်လီၤအဒဲ ဖဲန့ၣ်လီၤ.+ ၁၀ အဝဲသ့ၣ် ဟးထီၣ်လၢ အ့လံၣ် ဒီးသူၣ်လီၤအဒဲဖဲ ပီၣ်လဲၣ်ဂီၤ အကပၤလီၤ. ၁၁ အဝဲသ့ၣ် ဟးထီၣ်လၢ ပီၣ်လဲၣ်ဂီၤ ဒီးသူၣ်လီၤအဒဲလၢ စံၤအပှၢ်မုၢ်ကနၢလီၤ.+ ၁၂ အဝဲသ့ၣ် ဟးထီၣ်လၢ စံၤအပှၢ်မုၢ်ကနၢအပူၤ ဒီးသူၣ်လီၤအဒဲဖဲ ဒၤဖကၤလီၤ. ၁၃ အဝဲသ့ၣ် ဟးထီၣ်လၢ ဒၤဖကၤ ဒီးသူၣ်လီၤအဒဲဖဲ အၤလူၣ်လီၤ. ၁၄ အဝဲသ့ၣ် ဟးထီၣ်လၢ အၤလူၣ် ဒီးသူၣ်လီၤအဒဲဖဲ ရဖံၤဒံၣ်+ လၢအမ့ၢ် တၢ်လီၢ်လၢ ထံတအိၣ်ဘၣ်လၢ ပှၤဂီၢ်မုၢ် ကအီဝဲ အဂီၢ်န့ၣ်လီၤ. ၁၅ ဝံၤဒီး အဝဲသ့ၣ် ဟးထီၣ်လၢ ရဖံၤဒံၣ် ဒီးသူၣ်လီၤအဒဲဖဲ စံၤနါ အပှၢ်မုၢ်ကနၢ န့ၣ်လီၤ.+
၁၆ အဝဲသ့ၣ် ဟးထီၣ်လၢ စံၤနါ အပှၢ်မုၢ်ကနၢ ဒီးသူၣ်လီၤအဒဲဖဲ ကံးဘြိၤဟးတဝၤလီၤ.+ ၁၇ အဝဲသ့ၣ် ဟးထီၣ်လၢ ကံးဘြိၤဟးတဝၤ ဒီးသူၣ်လီၤအဒဲဖဲ ဃစ့ရိၤလီၤ.+ ၁၈ အဝဲသ့ၣ် ဟးထီၣ်လၢ ဃစ့ရိၤ ဒီးသူၣ်လီၤအဒဲဖဲ ရံးသမၤလီၤ. ၁၉ အဝဲသ့ၣ် ဟးထီၣ်လၢ ရံးသမၤ ဒီးသူၣ်လီၤအဒဲဖဲ ရံးမိၣ်ပ့ၤရးလီၤ. ၂၀ အဝဲသ့ၣ် ဟးထီၣ်လၢ ရံးမိၣ်ပ့ၤရး ဒီးသူၣ်လီၤအဒဲဖဲ လံးဘနၤလီၤ. ၂၁ အဝဲသ့ၣ် ဟးထီၣ်လၢ လံးဘနၤ ဒီးသူၣ်လီၤအဒဲဖဲ ရံးစၤလီၤ. ၂၂ အဝဲသ့ၣ် ဟးထီၣ်လၢ ရံးစၤ ဒီးသူၣ်လီၤအဒဲဖဲ ကဟ့လသၤလီၤ. ၂၃ အဝဲသ့ၣ် ဟးထီၣ်လၢ ကဟ့လသၤ ဒီးသူၣ်လီၤအဒဲ ဖဲကစၢၢ်ၡၤဖၢ်လီၤ.
၂၄ အဝဲသ့ၣ် ဟးထီၣ်လၢ ကစၢၢ်ၡၤဖၢ် ဒီးသူၣ်လီၤအဒဲဖဲ ဃရၤဒါလီၤ. ၂၅ အဝဲသ့ၣ် ဟးထီၣ်လၢ ဃရၤဒါ ဒီးသူၣ်လီၤအဒဲဖဲ မၤကဟ့လိးလီၤ. ၂၆ အဝဲသ့ၣ် ဟးထီၣ်လၢ+ မၤကဟ့လိး ဒီးသူၣ်လီၤအဒဲဖဲ တၤဃးလီၤ. ၂၇ အဝဲသ့ၣ် ဟးထီၣ်လၢ တၤဃး ဒီးသူၣ်လီၤအဒဲဖဲ တ့ရၤလီၤ. ၂၈ အဝဲသ့ၣ် ဟးထီၣ်လၢ တ့ရၤ ဒီးသူၣ်လီၤအဒဲဖဲ မံးသကၤလီၤ. ၂၉ အဝဲသ့ၣ် ဟးထီၣ်လၢ မံးသကၤ ဒီးသူၣ်လီၤအဒဲဖဲ ဃၤၡမိနၤလီၤ. ၃၀ အဝဲသ့ၣ် ဟးထီၣ်လၢ ဃၤၡမိနၤ ဒီးသူၣ်လီၤအဒဲဖဲ မိၤစ့ရိးလီၤ. ၃၁ အဝဲသ့ၣ် ဟးထီၣ်လၢ မိၤစ့ရိး ဒီးသူၣ်လီၤအဒဲဖဲ ဘန့ယၤကၣ်လီၤ.+ ၃၂ အဝဲသ့ၣ် ဟးထီၣ်လၢ ဘန့ယၤကၣ် ဒီးသူၣ်လီၤအဒဲဖဲ ဃိးရဟးကံဒ့းလီၤ. ၃၃ အဝဲသ့ၣ် ဟးထီၣ်လၢ ဃိးရဟးကံဒ့း ဒီးသူၣ်လီၤအဒဲဖဲ ယးတဘၤသၤလီၤ.+ ၃၄ လၢခံ အဝဲသ့ၣ် ဟးထီၣ်လၢ ယးတဘၤသၤ ဒီးသူၣ်လီၤအဒဲဖဲ ဧဘြိနၤလီၤ. ၃၅ အဝဲသ့ၣ် ဟးထီၣ်လၢ ဧဘြိနၤ ဒီးသူၣ်လီၤအဒဲဖဲ ဧ့စယိၣ်က့းဘ့ၢ်လီၤ.+ ၃၆ အဝဲသ့ၣ် ဟးထီၣ်လၢ ဧ့စယိၣ်က့းဘ့ၢ် ဒီးသူၣ်လီၤအဒဲဖဲ ကၤဒ့ၣ် လၢစံၣ်အပှၢ်မုၢ်ကနၢ အပူၤလီၤ.+
၃၇ လၢခံ အဝဲသ့ၣ် ဟးထီၣ်လၢ ကၤဒ့ၣ် ဒီးသူၣ်လီၤအဒဲဖဲ ကစၢၢ်ဃိၢ်+ လၢအအိၣ်လၢ ကီၢ်အဒိၣ် အကီၢ်ဆၢလီၤ. ၃၈ ဒီးပှၤလုၢ်တၢ်ဒိၣ် စီၤအၤဟရိၣ် လဲၤထီၣ်လၢ ကစၢၢ်ဃိၢ်အလိၤ ဒ်ယဟိဝၤယွၤ မၤလိာ်ဝဲ အသိး ဒီးစီၤအၤဟရိၣ် သံဝဲဖဲန့ၣ်လီၤ. အဝဲသံဝဲ ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအပူၤ ဝံၤအလီၢ်ခံ ပှဲၤထီၣ် အနံၣ် ၄၀ နံၣ်တနံၣ်, ယဲၢ်လါတလါ, လါထီၣ်တသီန့ၣ်လီၤ.+ ၃၉ စီၤအၤဟရိၣ် သံဝဲလၢ ကစၢၢ်ဃိၢ် အလိၤ ဖဲအသးနံၣ်အိၣ် ၁၂၃ နံၣ်လီၤ.
၄၀ ပှၤကနၤဧၣ်ဖိ အစီၤပၤ ဧရး+ လၢအအိၣ်လၢ နဲကဲၤ လၢကီၢ်ကနၤဧၣ် အပူၤန့ၣ် နၢ်ဟူဝဲ ပှၤအံၣ်စရ့လးဖိတဖၣ် ဟဲဝဲအဂ့ၢ်လီၤ.
၄၁ လၢခံ အဝဲသ့ၣ် ဟးထီၣ်လၢ ကစၢၢ်ဃိၢ်+ ဒီးသူၣ်လီၤအဒဲဖဲ စးလမိနၤလီၤ. ၄၂ အဝဲသ့ၣ် ဟးထီၣ်လၢ စးလမိနၤ ဒီးသူၣ်လီၤအဒဲဖဲ ပူၤနိၣ်လီၤ. ၄၃ အဝဲသ့ၣ် ဟးထီၣ်လၢ ပူၤနိၣ် ဒီးသူၣ်လီၤအဒဲဖဲ အိဘိးလီၤ.+ ၄၄ အဝဲသ့ၣ် ဟးထီၣ်လၢ အိဘိး ဒီးသူၣ်လီၤအဒဲဖဲ ဧ့ၤယ့ဟိးဘၤရံၣ် လၢအအိၣ်လၢ မိၤအး အကီၢ်ဆၢလီၤ.+ ၄၅ လၢခံ အဝဲသ့ၣ် ဟးထီၣ်လၢ ဧ့ၤယ့ ဒီးသူၣ်လီၤအဒဲဖဲ ဒံဘိၣ်ကးလီၤ.+ ၄၆ အဝဲသ့ၣ် ဟးထီၣ်လၢ ဒံဘိၣ်ကး ဒီးသူၣ်လီၤအဒဲဖဲ ဧၤလမိၣ်ဒံးဘလၤသံၣ်လီၤ. ၄၇ အဝဲသ့ၣ် ဟးထီၣ်လၢ ဧၤလမိၣ်ဒံးဘလၤသံၣ် ဒီးသူၣ်လီၤအဒဲဖဲ ဧဘါရံၣ် အကစၢၢ်ကလိတဖၣ်လၢ+ နဘိအမဲာ်ညါလီၤ.+ ၄၈ လၢခံကတၢၢ်န့ၣ် အဝဲသ့ၣ် ဟးထီၣ်လၢ ဧဘါရံၣ် အကစၢၢ်ကလိတဖၣ် ဒီးသူၣ်လီၤအဒဲဖဲ ကီၢ်မိၤအး အပှၢ်မုၢ်ကနၢ လၢထံကျိယၢ်ဒ့ၣ် အဃၢၤ လၢအဘူးဒီး ဝ့ၢ်ယရံၤဃိလီၤ.+ ၄၉ အဝဲသ့ၣ် သူၣ်လီၤအဒဲဖဲ ကီၢ်မိၤအး အပှၢ်မုၢ်ကနၢ လၢယၢ်ဒ့ၣ်အဃၢၤ စးထီၣ်လၢ ဘ့းသၤယၡံမိး ပၢၢ်တုၤလၢ အၤဘ့ၤလးၡံးတံၣ်လီၤ.+
၅၀ ယဟိဝၤယွၤ တဲတၢ်ဒီး စီၤမိၤၡ့လၢ ကီၢ်မိၤအး အပှၢ်မုၢ်ကနၢ လၢထံကျိယၢ်ဒ့ၣ် အကပၤ လၢအဘူးဒီး ဝ့ၢ်ယရံၤဃိ ဒီးတဲဝဲလၢ ၅၁ “တဲဘၣ် ပှၤအံၣ်စရ့လးဖိလၢ ‘သုကခီဂာ် ထံကျိယၢ်ဒ့ၣ် ဒီးနုာ်လီၤလၢ ကီၢ်ကနၤဧၣ် အပူၤလီၤ.+ ၅၂ သုကဘၣ် နီဟးထီၣ်ကွံာ် ပှၤလၢ အိၣ်ဝဲဆိးဝဲလၢ ကီၢ်ပူၤခဲလၢာ် ဒီးသုကဘၣ် မၤဟးဂီၤကွံာ် အဝဲသ့ၣ် အတၢ်ဂီၤတဖၣ်လၢ ပှၤစိးပျၤအီၤ လၢလၢၢ်,+ အဝဲသ့ၣ် အတၢ်ဂီၤတၢ်ဖှီၣ် ထးတဖၣ်+ ဒီးအဝဲသ့ၣ် အတၢ်လီၢ်ထီၣ်ထီ စီဆှံတဖၣ် ခဲလၢာ်လီၤ.+ ၅၃ ဒီးသုကမၤန့ၢ်ကီၢ် ဒီးသုကအိၣ်ကဆိးလၢ အပူၤ မ့ၢ်လၢ ယကဟ့ၣ်လီၤသု ကီၢ်တဘ့ၣ်အံၤ ဒ်သုတၢ်အသိး အဃိလီၤ.+ ၅၄ ကီၢ်လၢ အဘၣ်တၢ်ဟ့ၣ်လီၤ သုဒူၣ်ဖိထၢဖိတဖၣ် ဒ်သုတၢ်အသိးန့ၣ် သုကဘၣ် နီၤဖးလီၤအီၤ ခီဖျိလၢ တၢ်ဖးလီၤ.+ ပှၤအဒူၣ်လၢ အနီၣ်ဂံၢ်အါန့ၣ် သုကဘၣ်ဟ့ၣ် တၢ်န့ၢ်သါအါ ဒီးပှၤအဒူၣ်လၢ အနီၣ်ဂံၢ်စှၤန့ၣ် သုကဘၣ်ဟ့ၣ် တၢ်န့ၢ်သါစှၤလီၤ.+ ပှၤခဲလၢာ် ကဒိးန့ၢ်ဘၣ် အတၢ်န့ၢ်သါ ဒ်တၢ်လီၢ်လၢ တၢ်ဖးလီၤဘၣ်ဝဲ အသိးလီၤ. သုကဒိးန့ၢ်ဘၣ် တၢ်စုလီၢ်ခီၣ်ခိၣ်လၢ တၢ်န့ၢ်သါအဂီၢ် ဒ်သုပၢ်အဒူၣ် အိၣ်ဝဲအသိးလီၤ.+
၅၅ “‘ဘၣ်ဆၣ် သုမ့ၢ်တနီဟးထီၣ်ကွံာ် ပှၤလၢအအိၣ်ဝဲဆိးဝဲလၢ ကီၢ်ပူၤဘၣ်န့ၣ်+ ပှၤလၢ သုပျဲအိၣ်အီၤ သ့ၣ်တဖၣ်အံၤ ကကဲထီၣ်ဒ် တၢ်ကမှံၤလၢ သုမဲာ်ချံပူၤအသိး ဒီးဒ်တၤဆှုၣ်တၤမဲတဖၣ်လၢ သုကပၤအသိး ဒီးအဝဲသ့ၣ် ကမၤကိၢ်မၤဂီၤသု ဖဲကီၢ်လၢ သုအိၣ်လၢအပူၤ တဘ့ၣ်လီၤ.+ ၅၆ ဒီးတကးဒံးဘၣ် ယကစံၣ်ညီၣ်သု ဒ်ယဆၢတဲာ်လၢ ယကစံၣ်ညီၣ် အဝဲသ့ၣ် အသိးလီၤ.’”+
၃၄ ယဟိဝၤယွၤ တဲစီၤမိၤၡ့လၢ ၂ “မၤလိာ် ပှၤအံၣ်စရ့လးဖိတဖၣ် ဒီးတဲအဝဲသ့ၣ်လၢ ‘သုကဒိးန့ၢ်ဘၣ် ကီၢ်ကနၤဧၣ်+ ဒ်တၢ်န့ၢ်သါအသိး ဒီးကီၢ်ဆၢန့ၣ် ဘၣ်တၢ်ပာ်ဖျါထီၣ်အီၤ ဒ်လၢလာ်အသိးလီၤ.+
၃ “‘သုကီၢ်ဆၢလၢ ကလံၤထံးတခီန့ၣ် ကစးထီၣ်အသးလၢ စံၣ်အပှၢ်မုၢ်ကနၢ လၢအဘူးဒီး ကီၢ်အဒိၣ် ဒီးသုကီၢ်ဆၢလၢ ကလံၤထံး မုၢ်ထီၣ်တခီန့ၣ် ကတုၤဝဲလၢ ပီၣ်လဲၣ်အံသၣ် အနၢၣ်လီၤ.+ ၄ ဒီးစးထီၣ်ဖဲန့ၣ် သုကီၢ်ဆၢ ကတရံးအသး ဒီးလဲၤလီၤလၢ ကလံၤထံးတခီ ဒီးလဲၤတလၢ ဧးကရးဘံၣ် အတၢ်စိခိၣ်+ ဒီးဆဲးလဲၤဝဲလၢစံၣ် ဒီးကကတၢၢ်ဝဲလၢ ကၤဒ့ၣ်ဘၢ်န့ အကလံၤထံးတခီလီၤ.+ ဝံၤဒီး အကတရံးအသးဆူ ဃစၢ်အးဒၢ်+ ဒီးကလဲၤတုၤလၢ ဧၤစမိၣ်လီၤ. ၅ ဝံၤဒီး ကီၢ်ဆၢန့ၣ် တရံးအသး ဖဲဧၤစမိၣ် ဒီးလဲၤဝဲဆူ အဲၤကူပတူး အတၢ်တြီၤပူၤ ဒီးကကတၢၢ်ဝဲဖဲ ပီၣ်လဲၣ်လီၤ.*+
၆ “‘ဒီးသုကီၢ်ဆၢလၢ မုၢ်နုာ်တခီန့ၣ် ကမ့ၢ်ဝဲ ပီၣ်လဲၣ်ဖးဒိၣ် ဒီးအကၢၢ်နံၤလီၤ. အဝဲန့ၣ် ကကဲထီၣ်ဝဲ သုကီၢ်ဆၢ လၢမုၢ်နုာ်တခီလီၤ.+
၇ “‘သုကီၢ်ဆၢလၢ ကလံၤစိးတခီန့ၣ် ကစးထီၣ်အသးလၢ ပီၣ်လဲၣ်ဖးဒိၣ် ပၢၢ်တုၤလၢ ကစၢၢ်ဃိၢ်လီၤ.+ ၈ ဒီးသုကီၢ်ဆၢ ကအိၣ်ဖဲ ကစၢၢ်ဃိၢ် ဒီးကလဲၤတုၤလၢ လံၤဘိၤဃမါသး*+ ဒီးကကတၢၢ်ဝဲဖဲ စဒးလီၤ.+ ၉ ဝံၤဒီး သုကီၢ်ဆၢန့ၣ် ကလဲၤကဒီးဆူ စံးဖြၣ် ဒီးကကတၢၢ်ဝဲဖဲ ဃစၢ်ဧ့နၣ်လီၤ.+ အဝဲန့ၣ်ကမ့ၢ်ဝဲ သုကီၢ်ဆၢ လၢကလံၤစိးတခီလီၤ.
၁၀ “‘သုကီၢ်ဆၢလၢ မုၢ်ထီၣ်တခီန့ၣ် ကစးထီၣ်အသးလၢ ဃစၢ်ဧ့နၣ် ဒီးကလဲၤတုၤလၢ ၡဖၣ်လီၤ. ၁၁ စးထီၣ်ဖဲ ၡဖၣ်န့ၣ် သုကီၢ်ဆၢ ကလဲၤတုၤလၢ ရံးဘလၤ လၢအိၣ်ဝဲလၢ ဧ့ၣ်အမုၢ်ထီၣ် ဒီးကီၢ်ဆၢန့ၣ် ကလဲၤလီၤ တုၤလၢ တၢ်လီၤဘံလၢ ပီၣ်လဲၣ် ကံးန့ၤရ့သး အမုၢ်ထီၣ်တခီလီၤ.+ ၁၂ ဒီးသုကီၢ်ဆၢန့ၣ် ကလဲၤကဒီးလၢ ထံကျိယၢ်ဒ့ၣ် ဒီးကကတၢၢ်လၢ ပီၣ်လဲၣ်အံသၣ်လီၤ.+ အဝဲန့ၣ် ကမ့ၢ်ဝဲ သုကီၢ်ဒီး+ သုကီၢ်ဆၢတဖၣ်လီၤ.’”
၁၃ စီၤမိၤၡ့ မၤလိာ် ပှၤအံၣ်စရ့လးဖိလၢ “ကီၢ်တဘ့ၣ်န့ၣ် မ့ၢ်ကီၢ်လၢ သုကဘၣ် နီၤဖးလီၤအီၤ လၢသုတၢ်န့ၢ်သါ အဂီၢ် ခီဖျိတၢ်ဖး+ ဒ်ယဟိဝၤယွၤ မၤလိာ်ဝဲလၢ ပှၤခွံဒူၣ်ဒီးတဝာ် ကဒိးန့ၢ်ဘၣ်ဝဲ အသိးလီၤ. ၁၄ မ့မ့ၢ်လၢ ရူၤဘ့ၣ်အဒူၣ်, ကးအဒူၣ် ဒီးမနၤၡ့ၤ အဒူၣ်တဝာ်န့ၣ် ဒိးန့ၢ်ဘၣ်ဝဲ အတၢ်န့ၢ်သါလံ.+ ၁၅ ပှၤခံဒူၣ်ဒီးတဝာ်န့ၣ် ဒိးန့ၢ်ဘၣ် အတၢ်န့ၢ်သါ လၢယၢ်ဒ့ၣ် အဟီၣ်ကဝီၤ အမုၢ်ထီၣ်တခီ လၢအဘူးဒီး ဝ့ၢ်ယရံၤဃိလီၤ.”+
၁၆ ယဟိဝၤယွၤ ဆဲးတဲ စီၤမိၤၡ့လၢ ၁၇ “ပှၤလၢ အကနီၤလီၤ ကီၢ်လၢ အကကဲထီၣ်သုတၢ်န့ၣ် မ့ၢ်ဝဲ ပှၤလုၢ်တၢ်ဒိၣ် စီၤအလၤဧစၢ်+ ဒီးစီၤနိၣ် အဖိခွါ စီၤယိၤၡူလီၤ.+ ၁၈ ဒီးလၢပှၤအဒူၣ် တဒူၣ်တစုာ်စုာ် အကျါ သုကဘၣ်ကိးန့ၢ် ပှၤခိၣ်ပှၤနၢ် တဒူၣ်န့ၣ်တဂၤ တဒူၣ်န့ၣ်တဂၤ ဒ်သိး ကမၤစၢၤတၢ်လၢ ကနီၤလီၤကီၢ် ဒ်သုတၢ်န့ၢ်သါအသိး အဂီၢ်လီၤ.+ ၁၉ ပှၤခိၣ်ပှၤနၢ်တဖၣ်န့ၣ် ဘၣ်တၢ်ပာ်ဖျါထီၣ်အီၤ ဒ်လၢလာ်အသိးလီၤ. လၢယူဒၤ အဒူၣ်အကျါန့ၣ်+ စီၤယဖူန့ၤ အဖိခွါ စီၤကၤလ့း,+ ၂၀ လၢစူၤမ့းအိၣ် အဒူၣ်အကျါန့ၣ်+ စီၤဧးမံၤဟူး အဖိခွါ စီၤၡံမူၤအ့လး, ၂၁ လၢဘံၣ်ယၤမံၣ် အဒူၣ်အကျါန့ၣ်+ စီၤကံးစလိၣ် အဖိခွါ စီၤအလံဒး, ၂၂ လၢဒၣ်အဒူၣ် အကျါန့ၣ်+ စီၤယၤကလံၤ အဖိခွါ စီၤဘူးကံၤ, ၂၃ လၢစီၤယိၤသး အဖိခွါ+ စီၤမနၤၡ့ၤ အဒူၣ်အကျါန့ၣ်+ စီၤအ့ဖိး အဖိခွါ စီၤဃနံၤအ့လး, ၂၄ လၢစီၤယိၤသး အဖိခွါ စီၤအ့ဖရဲၣ် အဒူၣ်အကျါန့ၣ်+ စီၤၡံးဖတၣ် အဖိခွါ စီၤကမူၤအ့လး, ၂၅ လၢစဘူလိၣ် အဒူၣ်အကျါန့ၣ်+ စီၤပၢ်နး အဖိခွါ စီၤအလံစဖၣ်, ၂၆ လၢယံးစၣ်ကၢ် အဒူၣ်အကျါန့ၣ်+ စီၤဧးစၣ် အဖိခွါ စီၤဖးလၤတံလး, ၂၇ လၢအၤၡ့ၢ် အဒူၣ်အကျါန့ၣ်+ စီၤၡလိၤမံ အဖိခွါ စီၤအဃံဟူာ်, ၂၈ ဒီးလၢနးသၤလံ အဒူၣ်အကျါန့ၣ်+ စီၤဧးမံၤဟူး အဖိခွါ စီၤပဒၤအ့လးလီၤ.” ၂၉ အဝဲသ့ၣ်န့ၣ် မ့ၢ်ဝဲ ပှၤလၢ ယဟိဝၤယွၤ မၤလိာ်အီၤလၢ ကနီၤဖးလီၤဝဲ ကီၢ်ကနၤဧၣ် အတၢ်လီၢ်တၢ်ကျဲတဖၣ် လၢပှၤအံၣ်စရ့လးဖိအအိၣ်လီၤ.+
၃၅ ယဟိဝၤယွၤ တဲတၢ်ဒီး စီၤမိၤၡ့လၢ ကီၢ်မိၤအး အပှၢ်မုၢ်ကနၢလၢ ထံကျိယၢ်ဒ့ၣ် အကပၤ+ လၢအဘူးဒီး ဝ့ၢ်ယရံၤဃိ ဒီးတဲဝဲလၢ ၂ “မၤလိာ် ပှၤအံၣ်စရ့လးဖိတဖၣ်လၢ တၢ်န့ၢ်သါလၢ အဝဲသ့ၣ် ကန့ၢ်ဘၣ်ဝဲအကျါန့ၣ် အဝဲသ့ၣ် ကဘၣ်ဟ့ၣ်ဝဲ ပှၤလ့ၤဝံဖိတဖၣ်လၢ ဝ့ၢ်တဖၣ်လၢ ပှၤလ့ၤဝံဖိတဖၣ် ကအိၣ်ဝဲဆိးဝဲ အဂီၢ်လီၤ.+ ဒီးအဝဲသ့ၣ် ကဘၣ်ဟ့ၣ်လီၤဝဲ ပှၤလ့ၤဝံဖိတဖၣ်လၢ တၢ်ပျီလၢ အအိၣ်ဝးတရံး ဝ့ၢ်တဖၣ်န့ၣ်လီၤ.+ ၃ အဝဲသ့ၣ် ကအိၣ်ဝဲလၢ ဝ့ၢ်တဖၣ်န့ၣ်အပူၤ ဒီးတၢ်ပျီတဖၣ်န့ၣ် ကမ့ၢ်ဝဲလၢ အဝဲသ့ၣ် အဆၣ်ဖိကီၢ်ဖိအဒၢ, အတၢ်ဖိတၢ်လံၤတဖၣ် ဒီးအဝဲသ့ၣ် အဆၣ်ဖိကီၢ်ဖိလၢ အဂၤတဖၣ် အဂီၢ်လီၤ. ၄ တၢ်ပျီတဖၣ်လၢ အအိၣ်ဝးတရံးဝ့ၢ်န့ၣ် သုကဘၣ်ဟ့ၣ်လီၤ ပှၤလ့ၤဝံဖိတဖၣ် စးထီၣ်လၢ ဝ့ၢ်ဒူၣ်အခီၣ်ထံး တုၤအလဲၢ်ဝဲ အပျၢ် ၁,၀၀၀ ဝးဝးလီၤ.* ၅ ဝ့ၢ်န့ၣ် ကအိၣ်ဝဲလၢ တၢ်ခၢၣ်သး ဒီးသုကဘၣ်ထိၣ် ဝ့ၢ်အချၢလၢ မုၢ်ထီၣ်တခီန့ၣ် အပျၢ် ၂,၀၀၀, လၢကလံၤထံးတခီန့ၣ် အပျၢ် ၂,၀၀၀, လၢမုၢ်နုာ်တခီန့ၣ် အပျၢ် ၂,၀၀၀ ဒီးလၢကလံၤစိးတခီန့ၣ် အပျၢ် ၂,၀၀၀ လီၤ. အဝဲန့ၣ် ကကဲထီၣ် ပှၤလ့ၤဝံဖိ အဝ့ၢ် အတၢ်ပျီတဖၣ်လီၤ.
၆ “ဝ့ၢ်တဖၣ်လၢ သုကဘၣ်ဟ့ၣ်လီၤ ပှၤလ့ၤဝံဖိတဖၣ်န့ၣ် မ့ၢ်ဝဲ တၢ်ပူၤဖျဲးအဝ့ၢ် ၆ ဖျၢၣ်လၢ+ ပှၤလၢအမၤသံဘၣ် ပှၤတဂၤဂၤ ကလဲၤဃ့ၢ်အိၣ်ဝဲ အဂီၢ်လီၤ.+ တကးဒံးဘၣ် သုကဘၣ် ဟ့ၣ်စ့ၢ်ကီး အဝဲသ့ၣ်လၢ ဝ့ၢ်အဂၤ ၄၂ ဖျၢၣ်လီၤ. ၇ အဃိ သုကဘၣ်ဟ့ၣ် ပှၤလ့ၤဝံဖိတဖၣ် ဝ့ၢ်ခဲလၢာ်ခဲဆ့ ၄၈ ဖျၢၣ် ဃုာ်ဒီး တၢ်ပျီတဖၣ်လီၤ.+ ၈ ဝ့ၢ်တဖၣ်လၢ သုကဘၣ်ဟ့ၣ် ပှၤလ့ၤဝံဖိတဖၣ်န့ၣ် ကအိၣ်ဝဲလၢ ပှၤအံၣ်စရ့လးဖိ အတၢ်န့ၢ်သါ အကျါလီၤ.+ ပှၤအဒူၣ်လၢ အပှၤနီၣ်ဂံၢ်အါန့ၣ် ကဘၣ်ဟ့ၣ်လီၤဝဲ ဝ့ၢ်အါဖျၢၣ် ဒီးပှၤအဒူၣ်လၢ အပှၤနီၣ်ဂံၢ်စှၤန့ၣ် ကဘၣ်ဟ့ၣ်လီၤဝဲ ဝ့ၢ်စှၤဖျၢၣ်လီၤ.+ ဒ်ပှၤအဒူၣ် တဒူၣ်စုာ်စုာ် အတၢ်န့ၢ်သါလၢ အဒိးန့ၢ်ဘၣ်ဝဲ အအံၣ်အလဲၢ် အိၣ်ဝဲအသိးန့ၣ် အဝဲသ့ၣ် ကဘၣ်ဟ့ၣ်လီၤ အဝ့ၢ်တနီၤလၢ ပှၤလ့ၤဝံဖိတဖၣ် အအိၣ်လီၤ.”
၉ ယဟိဝၤယွၤ ဆဲးတဲ စီၤမိၤၡ့လၢ ၁၀ “တဲဘၣ် ပှၤအံၣ်စရ့လးဖိလၢ ‘သုကဘၣ် လဲၤခီဂာ် ထံကျိယၢ်ဒ့ၣ် ဒီးလဲၤနုာ်လီၤလၢ ကီၢ်ကနၤဧၣ်လီၤ.+ ၁၁ သုကဘၣ် ဃုထၢထီၣ် ဝ့ၢ်တဖၣ်လၢ ပှၤလဲၤဘၣ်အီၤညီ ဒ်သိး ကကဲထီၣ် တၢ်ပူၤဖျဲး အဝ့ၢ်တဖၣ် အဂီၢ်လီၤ. ဒီးပှၤလၢ အမၤသံဘၣ် ပှၤတဂၤဂၤလၢ တၢ်တပာ်သူၣ်ပာ်သးအပူၤ ကလဲၤဃ့ၢ်ဝဲ ဖဲန့ၣ်လီၤ.+ ၁၂ ဒ်သိး ပှၤလၢအမၤသံဘၣ် ပှၤတဂၤဂၤ သုတဘၣ် တၢ်မၤသံအီၤ တချုးလၢ အဘၣ်တၢ်သမံသမိးအီၤ လၢတၢ်အိၣ်ဖှိၣ် အမဲာ်ညါ တဂ့ၤအဂီၢ်+ ဝ့ၢ်သ့ၣ်တဖၣ်အံၤ ကကဲထီၣ် တၢ်အိၣ်သဒၢအလီၢ်လၢ အဝဲကပူၤဖျဲးဝဲလၢ ပှၤလၢ အမၤကၣ်က့ၤတၢ်တဂၤ* အစုပူၤ အဂီၢ်လီၤ.+ ၁၃ တၢ်ပူၤဖျဲးအဝ့ၢ် ဃုဖျၢၣ်လၢ သုကဟ့ၣ်လီၤန့ၣ် အတၢ်တိာ်ပာ် မ့ၢ်ဝဲဒ်န့ၣ်လီၤ. ၁၄ လၢထံကျိယၢ်ဒ့ၣ် အအံၤတခီန့ၣ် သုကဘၣ် ဟ့ၣ်လီၤ ဝ့ၢ်သၢဖျၢၣ်+ ဒီးလၢကီၢ်ကနၤဧၣ် အပူၤန့ၣ် သုကဘၣ်ဟ့ၣ်လီၤ ဝ့ၢ်သၢဖျၢၣ်+ ဒ်သိး ကကဲထီၣ် တၢ်ပူၤဖျဲး အဝ့ၢ်တဖၣ် အဂီၢ်လီၤ. ၁၅ ဝ့ၢ်ဃုဖျၢၣ်အံၤ ကကဲထီၣ် တၢ်ပူၤဖျဲးအလီၢ်လၢ ပှၤအံၣ်စရ့လးဖိတဖၣ်အဂီၢ်, ပှၤထံဂၤကီၢ်ဂၤဖိ အဂီၢ်ဒီး+ ပှၤလၢအဟဲအိၣ်လၢ အဝဲသ့ၣ်အကျါ အဂီၢ်လီၤ. အဃိ ပှၤတဂၤဂ့ၤ တဂၤဂ့ၤ လၢအမၤသံဘၣ် ပှၤတဂၤဂၤလၢ တၢ်တပာ်သူၣ်ပာ်သးဘၣ် အပူၤန့ၣ် လဲၤဃ့ၢ်အိၣ်ဖဲန့ၣ် သ့ဝဲလီၤ.+
၁၆ “‘ဘၣ်ဆၣ် အဝဲ မ့ၢ်တီၢ်ပှၤတဂၤလၢ တၢ်တမံၤမံၤ လၢပှၤတ့အီၤလၢထး ဒီးပှၤတဂၤန့ၣ် မ့ၢ်သံန့ၣ် အဝဲမ့ၢ်ဝဲ ပှၤမၤသံတၢ်ဖိလီၤ. ပှၤမၤသံတၢ်ဖိတဂၤအံၤန့ၣ် ကဘၣ်တၢ်မၤသံအီၤ သပှၢ်ကတၢၢ်လီၤ.+ ၁၇ ဒီးအဝဲမ့ၢ်ကွံာ်ဘၣ်* ပှၤတဂၤလၢ လၢၢ်* ဒီးပှၤတဂၤန့ၣ် မ့ၢ်သံန့ၣ် အဝဲမ့ၢ်ဝဲ ပှၤမၤသံတၢ်ဖိလီၤ. ပှၤမၤသံတၢ်ဖိတဂၤအံၤန့ၣ် ကဘၣ် တၢ်မၤသံအီၤ သပှၢ်ကတၢၢ်လီၤ. ၁၈ အဝဲ မ့ၢ်တီၢ်ပှၤတဂၤလၢ တၢ်တမံၤမံၤ လၢပှၤတ့အီၤလၢသ့ၣ်* ဒီးပှၤတဂၤန့ၣ်မ့ၢ်သံန့ၣ် အဝဲမ့ၢ်ဝဲ ပှၤမၤသံတၢ်ဖိလီၤ. ပှၤမၤသံတၢ်ဖိတဂၤအံၤန့ၣ် ကဘၣ်တၢ် မၤသံအီၤ သပှၢ်ကတၢၢ်လီၤ.
၁၉ “‘ပှၤလၢ ကဘၣ်မၤသံဝဲ ပှၤလၢအမၤသံ ပှၤကညီန့ၣ် မ့ၢ်ဝဲ ပှၤလၢ အမၤကၣ်က့ၤတၢ်တဂၤလီၤ. ဖဲပှၤလၢ အမၤကၣ်က့ၤတၢ် တဂၤအံၤ ထံၣ်အီၤအခါ အကဘၣ်မၤသံအီၤ လၢအနီၢ်ကစၢ်လီၤ. ၂၀ ပှၤတဂၤဂၤမ့ၢ်သံ ခီဖျိလၢ ပှၤဂၤတဂၤ ဆီၣ်အီၤလၢ တၢ်သူၣ်ဟ့သးဟ့အပူၤ မ့ၢ်ဂ့ၤ, ကွံာ်အီၤလၢ တၢ်တမံၤမံၤ လၢတၢ်သူၣ်ဟ့သးဟ့ အပူၤမ့ၢ်ဂ့ၤ+ ၂၁ မ့တမ့ၢ် အဝဲ မ့ၢ်တီၢ်အီၤလၢအစု လၢတၢ်သးဟ့အပူၤ ဒီးပှၤတဂၤန့ၣ် မ့ၢ်သံန့ၣ် ပှၤလၢ အတီၢ်တၢ်တဂၤ ကဘၣ်တၢ်မၤသံအီၤ သပှၢ်ကတၢၢ်လီၤ. အဝဲမ့ၢ်ဝဲ ပှၤမၤသံတၢ်ဖိတဂၤလီၤ. ဖဲပှၤလၢ အမၤကၣ်က့ၤတၢ်တဂၤ ထံၣ်အီၤအခါ အကမၤသံအီၤလီၤ.
၂၂ “‘ဘၣ်ဆၣ် အဝဲမ့ၢ်ဆီၣ်ဘၣ်အီၤ မ့တမ့ၢ် မ့ၢ်ကွံာ်ဘၣ်အီၤလၢ တၢ်တမံၤမံၤ လၢတၢ်တပာ်သူၣ်ပာ်သးအပူၤ ဒီးတမ့ၢ်လၢ တၢ်သးဟ့အဃိဘၣ်မ့ၢ်ဂ့ၤ+ ၂၃ အဝဲ မ့ၢ်တထံၣ်အီၤဘၣ် ဒီးမ့ၢ်မၤလီၤတဲာ်ဘၣ် လၢၢ်တဖျၢၣ်လၢ အလိၤ ဒီးပှၤတဂၤန့ၣ် မ့ၢ်သံ သနာ်က့ အဝဲသ့ၣ် မ့ၢ်တကဲပာ်စၢၤ ဒုၣ်ဒါဘၣ် ဒီးအဝဲမ့ၢ်တအဲၣ်ဒိး မၤဆါအီၤဘၣ်န့ၣ် ၂၄ တၢ်အိၣ်ဖှိၣ် ကစံၣ်ညီၣ်န့ၢ်တၢ်လၢ ပှၤလၢအမၤဘၣ်တၢ်ဒ်န့ၣ်တဂၤ ဒီးပှၤလၢအမၤကၣ်တၢ်တဂၤအဂီၢ် ဒ်တၢ်သိၣ်တၢ်သီ လၢအဘၣ်တၢ်ပာ်ဖျါထီၣ်အီၤ လၢထးအသိးလီၤ.+ ၂၅ ဒီးတၢ်အိၣ်ဖှိၣ် ကဘၣ်မၤပူၤဖျဲးအီၤလၢ ပှၤလၢအမၤကၣ်က့ၤတၢ် အစုပူၤ ဒီးဆှၢက့ၤအီၤလၢ ဝ့ၢ်တၢ်ပူၤဖျဲးလၢ အဝဲလဲၤဃ့ၢ်ပူၤဖျဲးတ့ၢ်အသးအပူၤ ဒီးအဝဲ ကဘၣ်အိၣ်ဝဲဖဲန့ၣ် တုၤလၢ ပှၤလုၢ်တၢ်ခိၣ် အဒိၣ်ကတၢၢ်လၢ အဘၣ်တၢ်ဒိးဖှူအီၤလၢ သိစီဆှံတဂၤ သံဝဲတစုလီၤ.+
၂၆ “‘ဘၣ်ဆၣ် ပှၤလၢအမၤသံဘၣ် ပှၤတဂၤ မ့ၢ်ဟးထီၣ်လၢ ဝ့ၢ်တၢ်ပူၤဖျဲး* လၢအလဲၤဃ့ၢ်ပူၤဖျဲးအသးအပူၤ ၂၇ ဒီးပှၤလၢအမၤကၣ်က့ၤတၢ်တဂၤ မ့ၢ်ထံၣ်အီၤလၢ ဝ့ၢ်တၢ်ပူၤဖျဲးအချၢ ဒီးမၤသံအီၤန့ၣ် တၢ်သွံၣ်တလီၤတီလၢ အခိၣ်လိၤဘၣ်. ၂၈ အဝဲကဘၣ်အိၣ်လၢ ဝ့ၢ်တၢ်ပူၤဖျဲးအပူၤ တုၤလၢ ပှၤလုၢ်တၢ်ခိၣ် အဒိၣ်ကတၢၢ်တဂၤ သံတစုလီၤ. ဘၣ်ဆၣ် ဖဲပှၤလုၢ်တၢ်ခိၣ် အဒိၣ်ကတၢၢ်တဂၤ သံဝံၤအလီၢ်ခံ အဝဲက့ၤလၢ အဟံၣ်သ့လီၤ.+ ၂၉ ဖဲသုအိၣ်လၢ တၢ်လီၢ်တပူၤဂ့ၤ တပူၤဂ့ၤ တၢ်သ့ၣ်တဖၣ်န့ၣ် မ့ၢ်ဝဲ တၢ်သိၣ်တၢ်သီလၢ တၢ်စံၣ်ညီၣ်တၢ်အဂီၢ် တစိၤဘၣ်တစိၤလီၤ.
၃၀ “‘ပှၤလၢအမၤသံ ပှၤတဂၤဂၤန့ၣ် တၢ်ကဘၣ် မၤသံက့ၤအီၤ ဒ်အမ့ၢ် ပှၤမၤသံတၢ်ဖိတဂၤအသိး+ ခီဖျိ ပှၤအုၣ်အသးတဖၣ် အတၢ်အုၣ်အသး အဃိလီၤ.+ ဘၣ်ဆၣ် ပှၤအုၣ်အသး မ့ၢ်အိၣ်ဝဲ ထဲတဂၤန့ၣ် ပှၤတဘၣ် မၤသံအီၤဘၣ်. ၃၁ ပှၤမၤသံတၢ်ဖိတဂၤ လၢအကြၢးသံန့ၣ် သုကဘၣ်မၤသံကွံာ်အီၤ သပှၢ်ကတၢၢ် ဒီးသုတဘၣ် တူၢ်လိာ် တၢ်ပှ့ၤက့ၤလၢ အသးသမူ အဂီၢ်ဘၣ်.+ ၃၂ တချုးလၢ ပှၤလုၢ်တၢ်ခိၣ် အဒိၣ်ကတၢၢ် သံဒံးဘၣ်န့ၣ် သုတဘၣ် တူၢ်လိာ် တၢ်ပှ့ၤက့ၤလၢ ပှၤတဂၤလၢ အလဲၤဃ့ၢ်အိၣ်လၢ တၢ်ပူၤဖျဲးအဝ့ၢ်အဂီၢ် ဒီးပျဲက့ၤအိၣ်အီၤလၢ အတၢ်လီၢ်တၢ်ကျဲန့ၣ်ဘၣ်.
၃၃ “‘တၢ်လၢတၢ်သွံၣ်န့ၣ် မၤဘၣ်အၢ ထံကီၢ်လီၤ. ထံကီၢ်လၢ သုကလဲၤအိၣ် လၢအပူၤ တဘ့ၣ်န့ၣ် သုတဘၣ် မၤဘၣ်အၢအီၤဘၣ်.+ ဘၣ်ဃးဒီး တၢ်သွံၣ်လၢ အဘၣ်တၢ်လူလီၤဂၢ်လီၤအီၤ လၢထံကီၢ်ပူၤန့ၣ် ထံကီၢ် ကဆှီထီၣ်က့ၤ* ကသ့ထဲ ခီဖျိလၢ ပှၤလၢ အလူလီၤဂၢ်လီၤ ပှၤသွံၣ်တဂၤန့ၣ် အသွံၣ်အဃိလီၤ.+ ၃၄ ထံကီၢ်လၢ သုကလဲၤအိၣ် တဘ့ၣ်န့ၣ် မ့ၢ်လၢယကအိၣ်လၢ အပူၤအဃိ သုတဘၣ် မၤဘၣ်အၢအီၤဘၣ်. ယမ့ၢ် ယဟိဝၤယွၤလၢ အအိၣ်လၢ ပှၤအံၣ်စရ့လးဖိအကျါလီၤ.’”+
၃၆ စီၤမနၤၡ့ၤ အဖိခွါ မ့ၢ်ဝဲ စီၤမၤကံၢ် ဒီးစီၤမၤကံၢ် အဖိခွါမ့ၢ်ဝဲ စီၤကံးလဧးလီၤ.+ ဒီးစီၤကံးလဧး အစၢၤအသွဲၣ် အဒူၣ်ဖိထၢဖိ အခိၣ်အနၢ်တဖၣ် လၢအပၣ်ဃုာ်လၢ စီၤယိၤသး အဖိခွါတဖၣ် အဒူၣ်ဖိထၢဖိ တဖၣ်အကျါန့ၣ် လဲၤတဲတၢ်လၢ စီၤမိၤၡ့ ဒီးပှၤအံၣ်စရ့လးဖိ အခိၣ်အနၢ်တဖၣ် အမဲာ်ညါလီၤ. ၂ အဝဲသ့ၣ် တဲဝဲလၢ “ယဟိဝၤယွၤ မၤလိာ်ပကစၢ်လၢ ကနီၤလီၤန့ၢ်ဝဲ ပှၤအံၣ်စရ့လးဖိတဖၣ် လၢတၢ်လီၢ် ဒ်တၢ်န့ၢ်သါအသိး ခီဖျိလၢ တၢ်ဖးလီၤ.+ ဒီးယဟိဝၤယွၤ မၤလိာ် ပကစၢ်လၢ ကဟ့ၣ်လီၤ ပဒီပုၢ်ဝဲၢ် စီၤစလၤဖဃး အတၢ်န့ၢ်သါလၢ အဖိမုၣ်တဖၣ် အအိၣ်လီၤ.+ ၃ အဝဲသ့ၣ် မ့ၢ်ဆီဟံၣ်ဆီဃီဒီး ပိာ်ခွါလၢ ပှၤအံၣ်စရ့လးဖိ အဒူၣ်လၢ အဂၤတဒူၣ်ဒူၣ် အကျါန့ၣ် ပိာ်မုၣ်သ့ၣ်တဖၣ်အံၤ အတၢ်န့ၢ်သါန့ၣ် ကဘၣ်တၢ်ထုးထီၣ်အီၤ လၢပပၢ်တဖၣ် အတၢ်န့ၢ်သါအကျါ ဒီးတၢ်ကထၢနုာ်အီၤလၢ ပှၤအဒူၣ်လၢ အဝဲသ့ၣ် နုာ်လီၤလၢ အကျါတဒူၣ်န့ၣ် အတၢ်န့ၢ်သါ အကျါလီၤ. အဃိ ပကဘၣ်တူၢ်ၡူကွံာ် ပတၢ်န့ၢ်သါ တနီၤလၢ အဘၣ်တၢ်ဟ့ၣ်လီၤပှၤ ခီဖျိလၢ တၢ်ဖးလီၤ. ၄ ဖဲပှၤအံၣ်စရ့လးဖိ အကၠူဘလံၤ*+ ဘၣ်ဝဲအခါ ပိာ်မုၣ်သ့ၣ်တဖၣ်အံၤ အတၢ်န့ၢ်သါန့ၣ် တၢ်ကထၢနုာ်အီၤလၢ ပှၤအဒူၣ်လၢ အဝဲသ့ၣ် နုာ်လီၤလၢ အကျါတဒူၣ်န့ၣ် အတၢ်န့ၢ်သါ အကျါလီၤ. အဃိ အဝဲသ့ၣ် အတၢ်န့ၢ်သါန့ၣ် ကဘၣ်တၢ် ထုးထီၣ်ကွံာ်အီၤ လၢပပၢ်တဖၣ် အတၢ်န့ၢ်သါ အကျါလီၤ.”
၅ ဝံၤဒီး ဒ်ယဟိဝၤယွၤ ဟ့ၣ်လီၤတၢ်ကလုၢ်အသိး စီၤမိၤၡ့ မၤလိာ်ဝဲ ပှၤအံၣ်စရ့လးဖိတဖၣ်လၢ “တၢ်လၢ စီၤယိၤသး အစၢၤအသွဲၣ်တဖၣ် တဲဝဲန့ၣ် ဘၣ်ဝဲလီၤ. ၆ အဃိ ဘၣ်ဃးဒီး စီၤစလၤဖဃး အဖိမုၣ်တဖၣ်န့ၣ် ယဟိဝၤယွၤ မၤလိာ်ဝဲလၢ ‘အဝဲသ့ၣ် ဆီဟံၣ်ဆီဃီဒီး ပှၤတဂၤဂ့ၤတဂၤဂ့ၤ သ့လီၤ. ဘၣ်ဆၣ်အဝဲသ့ၣ် ကဘၣ်ဆီဟံၣ်ဆီဃီဒီး ပှၤတဂၤလၢ အပၣ်ဃုာ်လၢ အပၢ် အဒူၣ်ကျါလီၤ. ၇ ပှၤအံၣ်စရ့လးဖိတဖၣ် အတၢ်န့ၢ်သါန့ၣ် တဘၣ်သုးအသးလၢ ပှၤအဒူၣ် တဒူၣ်ဘၣ်တဒူၣ် အအိၣ်ဘၣ်. ပှၤအံၣ်စရ့လးဖိ အဒူၣ် တဒူၣ်စုာ်စုာ်န့ၣ် ကဘၣ်ပၢၤဃာ်ဝဲ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အတၢ်န့ၢ်သါလီၤ. ၈ ဖိမုၣ်ကိးဂၤဒဲးလၢ အန့ၢ်ဘၣ် တၢ်န့ၢ်သါလၢ အံၣ်စရ့လး အဒူၣ်တဖၣ်အကျါန့ၣ် ကဘၣ် ဆီဟံၣ်ဆီဃီဒီး ပှၤလၢ အပၢ်အဒူၣ် အစၢၤအသွဲၣ် အကျါလီၤ.+ မ့မ့ၢ်ဒ်န့ၣ်န့ၣ် ပှၤအံၣ်စရ့လးဖိတဖၣ် ပၢၤဃာ်ဝဲ အမိၢ်ပၢ်ဖံဖု လၢပျၢၤတဖၣ် အတၢ်န့ၢ်သါ ကသ့လီၤ. ၉ တၢ်န့ၢ်သါတဖၣ်န့ၣ် တဘၣ်သုးအသးလၢ ပှၤအဒူၣ် တဒူၣ်ဘၣ်တဒူၣ် အအိၣ်ဘၣ်. ပှၤအံၣ်စရ့လးဖိ အဒူၣ် တဒူၣ်စုာ်စုာ်န့ၣ် ကဘၣ်ပၢၤဃာ်ဝဲ အဝဲသ့ၣ် အနီၢ်ကစၢ် အတၢ်န့ၢ်သါလီၤ.’”
၁၀ စီၤစလၤဖဃး အဖိမုၣ်တဖၣ် မၤဝဲဒ် ယဟိဝၤယွၤ မၤလိာ် စီၤမိၤၡ့ အသိးလီၤ.+ ၁၁ ဒီးစီၤစလၤဖဃး အဖိမုၣ်တဖၣ် လၢအမ့ၢ် နီၢ်မၤလၤ, နီၢ်တံးရစၢ်, နီၢ်ဃၤကလၤ, နီၢ်မံးလကၤ ဒီးနီၢ်နိဧၤန့ၣ်+ ဆီဟံၣ်ဆီဃီဒီး အပၢ် အဒီပုၢ်ဝဲၢ်ခွါတဖၣ် အဖိခွါန့ၣ်လီၤ. ၁၂ ဒ်သိး အဝဲသ့ၣ် အတၢ်န့ၢ်သါတဖၣ် ကဆဲးအိၣ်ဝဲလၢ အပၢ် အဒူၣ်ကျါအဂီၢ် အဝဲသ့ၣ် ဆီဟံၣ်ဆီဃီဒီး ပိာ်ခွါတဖၣ်လၢ အပၣ်ဃုာ်လၢ စီၤယိၤသး အဖိခွါ စီၤမနၤၡ့ၤ အစၢၤအသွဲၣ်တဖၣ် အကျါလီၤ.
၁၃ တၢ်သ့ၣ်တဖၣ်န့ၣ် မ့ၢ်ဝဲ တၢ်မၤလိာ်တဖၣ် ဒီးတၢ်သိၣ်တၢ်သီတဖၣ်လၢ ယဟိဝၤယွၤ ဟ့ၣ်လီၤဝဲ ပှၤအံၣ်စရ့လးဖိတဖၣ် ခီဖျိလၢ စီၤမိၤၡ့, ဖဲကီၢ်မိၤအး အပှၢ်မုၢ်ကနၢလၢ ထံကျိယၢ်ဒ့ၣ်အကပၤ လၢအဘူးဒီး ဝ့ၢ်ယရံၤဃိလီၤ.+
အခီပညီလိၤလိၤ “ပှၤလၢ အလီၤဆီတဂၤဂၤ.” အဲၣ်ဒိးတဲဝဲ ပှၤလၢအတမ့ၢ် ပှၤလ့ၤဝံဖိဘၣ်.
အခီပညီလိၤလိၤ “ပှၤလၢ အလီၤဆီတဂၤဂၤ.” အဲၣ်ဒိးတဲဝဲ ပှၤလၢအတမ့ၢ် စီၤအၤဟရိၣ်အဒူၣ်ဖိထၢဖိဘၣ်.
၁ ၡက့လးန့ၣ် အဃၢထဲသိးဒီး ၁၁.၄ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
၁ က့ရၤန့ၣ် အဃၢထဲသိးဒီး ၀.၅ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
ဖျါလၢအဲၣ်ဒိးတဲဝဲ တၢ်အိၣ်သးဖဲ ပှၤလၢ အဘၣ်တၢ်မၤကမၣ်အီၤတဂၤ သံလံအခါ.
မ့ၢ်စ့ၢ်ကီး “တအ့ဖး ဆံဆဲၣ်ပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်ဝဲ တၢ်နၢမူ တကလုာ်.
မ့ၢ်စ့ၢ်ကီး “ဖဲနအိၣ်လၢ နဝၤ အတၢ်စိကမီၤ အဖီလာ် အဆၢကတီၢ်.”
အခီပညီလိၤလိၤ “မၤလီၤဖျု နခီၣ်ကံၣ်ဒုၣ်.”
ဟဲလၢဧ့ၤဘြံၤ အတၢ်ကတိၤ na·zirʹ လၢအခီပညီမ့ၢ်ဝဲ “ပှၤလၢ အဘၣ်တၢ်ပာ်လီၤဆီအီၤ မ့တမ့ၢ် ပှၤလၢအဟ့ၣ်လီၤအသး.”
အခီပညီလိၤလိၤ “နဲဖဲး(ၡ်) (ne′phesh).” ကွၢ် တၢ်ကတိၤအခီပညီ.
အခီပညီလိၤလိၤ “နဲဖဲး(ၡ်) (ne′phesh).” ကွၢ် တၢ်ကတိၤအခီပညီ.
မ့ၢ်စ့ၢ်ကီး “လၢဝဲလၢ.”
အခီပညီလိၤလိၤ “လ့ၣ်လၢ အအိၣ်ဒီး အခိၣ်ဒုး.”
၁ ၡက့လးန့ၣ် အဃၢထဲသိးဒီး ၁၁.၄ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
ဖျါလၢအဲၣ်ဒိးတဲဝဲ ဖဲမုၢ်လီၤနုာ် အလီၢ်ခံ ဒီးတချုး တၢ်ခံးဖးဒိၣ် ဒံးဘၣ်အခါ.
မ့ၢ်ဝဲ စီၤယံးသရိၤ.
မ့ၢ်စ့ၢ်ကီး “တုၤလၢ တၢ်ညၣ် ဟးထီၣ်လၢ သုနါဒ့.”
မ့ၢ်စ့ၢ်ကီး “လၢဝဲလၢ.”
ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
ဘၣ်သ့ၣ်သ့ၣ် အဝဲသ့ၣ် အတၢ်တိာ်ပာ်န့ၣ် မ့ၢ်ဝဲလၢ ကလိဃ့ဝဲ တၢ်ညၣ်အဂီၢ်.
မ့ၢ်စ့ၢ်ကီး “အိၣ်ဒီးတၢ်ဆီၣ်လီၤသး အါန့ၢ်ဒံး ပှၤဂၤခဲလၢာ်.”
မ့ၢ်စ့ၢ်ကီး “ယပှၤဂီၢ်မုၢ်.”
အခီပညီလိၤလိၤ “လၢယဟံၣ်ပူၤန့ၣ် အဝဲ ပာ်ဖျါထီၣ်ဝဲလၢ အမ့ၢ်ပှၤလၢ အတီ.”
မ့ၢ်စ့ၢ်ကီး “စီၤယဟိၤၡူ.” မံၤအံၤ အခီပညီမ့ၢ်ဝဲ “ယဟိဝၤမ့ၢ် တၢ်အုၣ်က့ၤခီၣ်က့ၤ.”
အခီပညီမ့ၢ်ဝဲ “စပံးသၣ်အချုၣ်.”
အခီပညီလိၤလိၤ “အဝဲသ့ၣ် ကမ့ၢ် ကိၣ်လၢပဂီၢ်.”
မ့ၢ်စ့ၢ်ကီး “သုမၤသးဒ် ပိာ်မုၣ်ဆါလီၤအီၣ်သး.”
မ့ၢ်စ့ၢ်ကီး “တအ့ဖး ဆံဆဲၣ်ပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “တဟံၣ်လွံၢ်ပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တအ့ဖးခံပူလၢ အပူတဆံအကျါ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “တဟံၣ်သၢပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တအ့ဖးသၢပူလၢ အပူတဆံအကျါ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “ဟံၣ်တဝာ်.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “တၢ်မၤကမၣ်မုၣ်ကမၣ်ခွါ လၢနီၢ်သးတခီ ဒ်ပိာ်မုၣ် ဆါလီၤအီၣ်သးအသိး.”
ဖျါလၢအဲၣ်ဒိးတဲဝဲ ပှၤလၢအထီဒါတၢ်တဖၣ်.
လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
လၢဧ့ၤဘြံၤကျိာ် မ့ၢ်ဝဲ “ၡံအိ(လ်).” ကွၢ် တၢ်ကတိၤအခီပညီ.
အခီပညီလိၤလိၤ “ပှၤလၢ အလီၤဆီတဂၤဂၤ.”
အခီပညီလိၤလိၤ “ပှၤလၢ အလီၤဆီ တဂၤဂၤ” အဲၣ်ဒိးတဲဝဲ ပှၤလၢအတမ့ၢ် စီၤအၤဟရိၣ် အဒူၣ်ဖိထၢဖိဘၣ်.
မ့ၢ်ဝဲ ယၣ်ဘျးသဒၢလၢ အအိၣ်လၢ တၢ်လီၢ်စီဆှံကတၢၢ် အမဲာ်ညါ.
၁ ၡက့လးန့ၣ် အဃၢထဲသိးဒီး ၁၁.၄ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “တၢ်အၢၣ်လီၤအီလီၤအံသၣ်.”
အခီပညီမ့ၢ်ဝဲ “တၢ်တဲအါတၢ်.”
မ့ၢ်စ့ၢ်ကီး “ထံပူၤ.”
မ့ၢ်စ့ၢ်ကီး “တၢ်ဖးတၢ်လၢ အကမၤအသးလၢ ခါဆူညါ.”
မ့ၢ်စ့ၢ်ကီး “မံနီၤဝဲ.”
မ့ၢ်စ့ၢ်ကီး “အချံအသၣ်.”
မ့ၢ်ဝဲ ပှၤအဆိကတၢၢ်တဒူၣ်လၢ အဒုးဝဲ ပှၤအံၣ်စရ့လးဖိ ဖဲအဝဲသ့ၣ် ဟးထီၣ်ဝဲလၢ ကီၢ်အဲၤကူပတူး ဝံၤအလီၢ်ခံ.
မ့ၢ်စ့ၢ်ကီး “ပိာ်မုၣ် အက့ၢ်အဂီၤ.”
မ့ၢ်စ့ၢ်ကီး “ဒ်ပှၤနီၣ်ဂံၢ် အိၣ်ဝဲအသိး.”
အခီပညီမ့ၢ်ဝဲ “တၢ်တဲအါတၢ်.”
မ့ၢ်စ့ၢ်ကီး “လၤကပီၤ.”
ကွၢ် တၢ်ကတိၤအခီပညီ.
ဖျါလၢအဲၣ်ဒိးတဲဝဲ ဖဲမုၢ်လီၤနုာ် အလီၢ်ခံ ဒီးတချုး တၢ်ခံးဖးဒိၣ် ဒံးဘၣ်အခါ.
မ့ၢ်စ့ၢ်ကီး “တအ့ဖး ဆံဆဲၣ်ပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “တဟံၣ်လွံၢ်ပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တအ့ဖးခံပူလၢ အပူတဆံအကျါ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တအ့ဖးသၢပူလၢ အပူတဆံအကျါ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “ဟံၣ်တဝာ်.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “တဟံၣ်သၢပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တအ့ဖးသၢပူလၢ အပူတဆံအကျါ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တအ့ဖးခံပူလၢ အပူတဆံအကျါ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “တအ့ဖး ဆံဆဲၣ်ပူတပူ.” ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
ဖျါလၢအဲၣ်ဒိးတဲဝဲ တၢ်ဒုၣ်တၢ်အီၣ် ဒီးတၢ်တြီဃာ်ဒ်န့ၣ် လၢအဂၤတဖၣ်.
အခီပညီလိၤလိၤ “ပှၤအံၣ်စရ့လးဖိ လၢအကထိတဖၣ်.”
အခီပညီလိၤလိၤ “နဲဖဲး(ၡ်) (ne′phesh).” ကွၢ် တၢ်ကတိၤအခီပညီ.
၁ ၡက့လးန့ၣ် အဃၢထဲသိးဒီး ၁၁.၄ ကြဲၣ်(မ်). ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
မ့ၢ်စ့ၢ်ကီး “သူၣ်ထီၣ်က့ၤ.”
မ့ၢ်ဝဲ ပီၣ်လဲၣ်ဖးဒိၣ် လၢအမ့ၢ် မဲးဒံးထၢၣ်ရ့နယၢၣ် ပီၣ်လဲၣ်.
မ့ၢ်စ့ၢ်ကီး “ဃမါသး အခိၣ်ထိး.”
ကွၢ် တၢ်ဂ့ၢ်ဘၣ်ထွဲလိာ်သး ခ၁၄.
အခီပညီလိၤလိၤ “ပှၤလၢအမၤကၣ်က့ၤတၢ်လၢ တၢ်သွံၣ်အဂီၢ်.”
မ့ၢ်စ့ၢ်ကီး “တီၢ်ပှၤတဂၤလၢလၢၢ်.”
အခီပညီလိၤလိၤ “လၢၢ်တဖျၢၣ်လၢ အမၤသံပှၤကညီသ့.”
အခီပညီလိၤလိၤ “တၢ်တမံၤမံၤ လၢပှၤတ့အီၤလၢသ့ၣ် လၢအမၤသံပှၤကညီသ့.”
အခီပညီလိၤလိၤ “အဝ့ၢ်တၢ်ပူၤဖျဲး အတၢ်လီၢ်တၢ်ကျဲအဆၢ.”
အခီပညီလိၤလိၤ “ဘၣ်လိာ်ဖိးဒ့က့ၤ.”
မ့ၢ်စ့ၢ်ကီး “နံၣ်တၢ်သးခု.”