Nutume ‘urubeya rwa Yehova’ ruguma rururumba

1. Bibiliya idondora gute urukundo nyakuri?

‘IMBEYA z’urukundo ni umuriro ururumba, urubeya rwa Yehova. Amazi menshi ntashobora kuzimya urukundo, eka n’inzuzi ntizishobora kurukukumura.’b (Ind. 8:6, 7) Umve nawe ingene urukundo nyakuri rudondorwa mu buryo bukora ku mutima! Ayo majambo arimwo iciyumviro kiremesha, na co kikaba ari iki: Murashobora gukundana urukundo rudahera.

2. Abubakanye bategerezwa gukora iki kugira ngo urwo bakundana ntirutimbe?

² Kugira abubakanye bakundane urukundo rudahera igihe cose bakiriho, biva kuri bo. Raba akarorero: Kugira ngo umuriro ugume waka, bisaba ko uguma wegenyezwa. Bitagenze ukwo, uburuhiro urazima. N’urukundo umugabo n’umugore bakundana ntirushobora kuguma rukomeye, batagumye bakomeza ubucuti bafitaniye. Rimwe na rimwe, abubakanye boshobora kwumva ko urwo bakundana ruriko ruratimba, canecane iyo baremerewe n’ingorane z’ivy’ubutunzi, iz’amagara, canke umwitwarariko wo kurera abana. None nimba wubatse, wokora iki kugira ngo ‘urubeya rwa Yehova’ rugume rururumba mu mubano wanyu? Muri iki kiganiro, tugiye kuraba ibintu bitatu vyotuma umubano wanyu uguma ukomeye kandi urangwamwo agahimbare.c

NUGUME UKOMEZA UBUCUTI UFITANIYE NA YEHOVA

3. Iyo abubakanye bafitaniye ubucuti bukomeye na Yehova bibafasha gute kuguma bakundana? (Umusiguzi 4:12) (Raba n’ishusho.)

³ Kugira umugabo n’umugore batume ‘urubeya rwa Yehova’ ruguma rwaka mu mubano wabo, bategerezwa gukomeza ubucuti bafitaniye na Yehova. None ivyo bifasha gute umubano wabo? Abubakanye bahaye agaciro ubucuti bafitaniye n’Umuvyeyi wabo wo mw’ijuru, bica biborohera gukurikiza impanuro atanga, na zo zigaca zibafasha kwirinda no kurengera ingorane zotuma urwo bakundana rutimba. (Soma Umusiguzi 4:12.) Abantu bakomeye mu vy’impwemu barihatira kandi kwigana Yehova no gutsimbataza kamere ziwe, nko kugira ubuntu, kwihangana be no guharira. (Ef. 4:32–5:1) Abubakanye bagaragaje izo kamere, bica vyoroha ko barushiriza gukundana. Mushiki wacu yitwa Lena amaze imyaka irenga 25 yubatse, avuga ati: “Biroroshe gukunda no kwubaha umuntu akomeye mu vy’impwemu.”

4. Kubera iki Yehova yahisemwo Yozefu na Mariya ngo babe abavyeyi ba Mesiya?

⁴ Raba akarorero ko muri Bibiliya. Igihe Yehova yagomba guhitamwo abobaye abavyeyi ba Mesiya, yahisemwo Yozefu na Mariya mu bandi benshi bakomoka kuri Dawidi. Kubera iki? Umwe wese muri bo yari afitaniye ubucuti bwiza na Yehova, kandi Yehova yari azi ko umubano wabo bowushingiye ku rukundo bamukunda. Yemwe abubakanye, ni ibiki mwokwigira kuri Yozefu na Mariya?

5. Abagabo bokwigira iki kuri Yozefu?

⁵ Kuba Yozefu yarakurikiza ubuyobozi yahabwa na Yehova, vyaratumye aba umugabo mwiza. N’imiburiburi incuro zitatu, Yehova yaramubwiye ivyo yokora ku bijanye n’umuryango wiwe. Incuro imwimwe muri izo, yaca agamburuka adatebaganye, n’igihe vyamusaba kugira amahinduka akomeye. (Mat. 1:20, 24; 2:13-15, 19-21) Kuba Yozefu yaragamburukiye Imana, vyatumye akingira Mariya, aramushigikira yongera aramuronsa ivya nkenerwa. Iyumvire nawe ingene ivyo bintu Yozefu yakoze vyatumye Mariya arushiriza kumukunda no kumwubaha! Bagabo, murashobora kwigana Yozefu mu kwisunga impanuro zo muri Bibiliya zijanye n’ingene mwokwitwararika imiryango yanyu.d Ushize mu ngiro izo mpanuro, mbere n’igihe bisaba ko ugira ivyo uhinduye, uba werekanye ko ukunda umugore wawe kandi birakomeza umubano wanyu. Mushiki wacu umwe wo mw’izinga rya Vanuwatu amaze imyaka irenga 20 yubatse, avuga ati: “Igihe umugabo wanje arondera ubuyobozi bwa Yehova akongera akabwisunga, nca ndushiriza kumwubaha. Nca numva ntekanye kandi nkizigira ingingo afata.”

6. Abakenyezi bokwigira iki kuri Mariya?

⁶ Mariya yari afitaniye ubucuti bwiza na Yehova, kandi ukwizera kwiwe ntikwavana n’ivyo Yozefu yakora. Yari azi neza Ivyanditswe.e Yarategekanya n’umwanya wo kuzirikana. (Luka 2:19, 51) Kuba Mariya yarakunda ivy’impwemu, nta nkeka ko vyatumye aba umukenyezi mwiza. Muri iki gihe, abakenyezi benshi barihatira kumwigana. Nk’akarorero, mushiki wacu yitwa Emiko avuga ati: “Igihe ntari bwubake nari mfise urutonde rw’ivy’impwemu nakurikiza. Ariko maze kwubaka, nasanze ukwizera kwanje gusigaye kwenena ku mugabo wanje, kuko ari we yama atura isengesho akongera akayobora ugusenga kwo mu muryango. Nahavuye mbona ko nari nkeneye kwikorera umutwaro wanje mu bijanye no gukomeza ubucuti mfitaniye na Yehova. Ni co gituma ubu mfata umwanya wo kwiyegereza Imana ubwanje, ngasenga, ngasoma Bibiliya nkongera nkazirikana ku vyo nsomye muri yo.” (Gal. 6:5) Bakenyezi, nimwabandanya gukomeza ubucuti mufitaniye na Yehova, abagabo banyu bazorushiriza kubakunda no kubashemagiza.​—Imig. 31:30.

7. Abubakanye bokwigira iki kuri Yozefu na Mariya ku bijanye no gukorera hamwe ibikorwa bijanye no gusenga Yehova?

⁷ Vyongeye, Yozefu na Mariya barakorera hamwe ibikorwa kugira bagume bakomeza ubucuti bafitaniye na Yehova. Baratahura ko vyari bihambaye ko baguma basenga Yehova uko bagize umuryango. (Luka 2:22-24, 41; 4:16) Naho bishobora kuba bitaborohera na canecane kubera ko umuryango waguma waguka, barabigize. Ese ukuntu babera akarorero keza abubakanye muri iki gihe! Nimba mufise abana nka Yozefu na Mariya, bishobora kuba bitaborohera kwitaba amakoraniro canke gutegekanya umwanya wo gusenga kwo mu muryango. Vyoshobora mbere kurushiriza kubagora kuronka akanya ko kwiga canke gusenga muri kumwe uko mwubakanye. Naho ari ukwo, nimwibuke ko gukorera hamwe ibikorwa bijanye no gusenga Yehova bituma murushiriza kumwiyegereza no kwiyegerezanya. Nimubishire rero mu kibanza ca mbere.

8. Abubakanye bafise ingorane mu mubano bokora iki kugira ugusenga kwo mu muryango kurushirize kubagirira akamaro?

⁸ Bite ho nimba umubano wanyu urimwo ingorane? Kugira ugusenga kwo mu muryango muri kumwe vyoshobora kutabaryohera. Nimba ari ko biri, nimuhere ku kuyaga akantu gatoyi kabashimisha kandi mwempi muhurizako. Ivyo birashobora gukomeza ubucuti mufitaniye be n’icipfuzo mufise co gukorera hamwe ibintu vy’impwemu uko mwubakanye.

NIMUMARANE UMWANYA

9. Kubera iki umugabo n’umugore bakwiye kumarana umwanya?

⁹ Yemwe abubakanye, kumarana umwanya na vyo nyene birashobora gutuma muguma mukundana. Mubigize, biratuma umwe wese amenya ivyo mugenziwe yiyumvira n’uko yiyumva. (Ita. 2:24) Lilia na Ruslan bamaze imyaka irenga 15 bubakanye. Raba ivyabashikiye haciye igihe gito bubakanye. Lilia avuga ati: “Twasanze tutamarana umwanya munini nk’uko twavyiyumvira. Twasanga twatwawe n’akazi, udukorwa two muhira, mu nyuma na ho abana bacu. Twarabonye ko tutarondeye akanya ko kuba kumwe nk’umugabo n’umugore, twoshobora gusanga tutaciyumvanamwo.”

10. Abubakanye boshira gute mu ngiro ibivugwa mu Banyefeso 5:15, 16?

¹⁰ Abubakanye bokora iki kugira ngo biyemeze ko bamarana umwanya? Mwoshobora gutegekanya umwanya wo kuba muri kumwe. (Soma Abanyefeso 5:15, 16.) Umuvukanyi umwe wo muri Nijeriya yitwa Uzondu avuga ati: “Igihe ngira urutonde rw’ivyo nzokora, ndashiramwo umwanya nzomarana n’umugore wanje, kandi uwo mwanya ni wo nshira imbere.” (Flp. 1:10) Raba ingene Anastasia, umugore w’umucungezi w’umuzunguruko wo muri Moldaviya, akoresha neza umwanya wiwe. Avuga ati: “Udukorwa twanje ngerageza kudukora igihe umugabo wanje aba afatiriwe n’amabanga ajejwe. Ivyo bituma mu nyuma dushobora kumarana umwanya.” Bite ho nimba ivyo mukora bituma mutaronka akaryo ko kumarana umwanya?

11. Ni ibikorwa ibihe Akwila na Pirisila bakorera hamwe?

¹¹ Abubakanye barashobora kugira ivyo bigiye ku karorero ka Akwila na Pirisila, umugabo n’umugore bashimwa cane n’abakirisu benshi bo mu ntango. (Rom. 16:3, 4) Naho ata vyinshi Bibiliya ivuga ku mubano wabo, iravuga ko bakorera hamwe, bakamamaza bari kumwe bakongera bagafasha abandi bari kumwe. (Ivyak. 18:2, 3, 24-26) Nkako, igihe cose Bibiliya ivuze Akwila na Pirisila, yama ibavuga bari kumwe.

12. Umugabo n’umugore bokora iki kugira barushirize kumarana umwanya? (Raba n’ishusho.)

¹² None abubakanye bokwigana gute Akwila na Pirisila? Niwiyumvire ibintu vyinshi wewe n’uwo mwubakanye mwokora. Hari ivyo mubona mwokorera hamwe, aho kuvyikorana? Nk’akarorero, Akwila na Pirisila bamamaza bari kumwe. Mwoba namwe mwama mutegekanya kwamamaza muri kumwe? Vyongeye, Akwila na Pirisila barakorana akazi. Naho namwe mwoba mufise akazi gatandukanye, mubona mwokorera hamwe udukorwa two muhira? (Umus. 4:9) Igihe hari igikorwa mukoreye hamwe, muca mwumva ko mugize urunani kandi mukaronka akaryo ko kuyaga. Robert na Linda bamaze imyaka irenga 50 bubakanye. Robert avuga ati: “Mvugishije ukuri, nta mwanya munini dufise wo kwisamariza hamwe. Mugabo iyo nogeje amasahani umugore wanje akayahanagura, canke iyo ndiko ndakora mu busitani umugore akaza kumfasha birampimbara cane. Gukorera ibintu hamwe bituma twiyegerezanya. Duca turushiriza gukundana.”

13. Kugira umugabo n’umugore biyegerezanye vy’ukuri bakwiye gukora iki?

¹³ Ariko mwibuke ko kuba muri kumwe gusa bidaca bituma mwiyegerezanya. Umugore umwe wo muri Brezile avuga ati: “Muri iki gihe aho usanga ibisamaza ari vyinshi cane, narabonye ko dushobora kugwa mu mutego wo kwiyumvira ko kuba turi mu nzu imwe bituma tumarana umwanya. Narabonye ko kuba kumwe gusa bidahagije. Nari nkwiye no kwitwararika uwo twubakanye.” Raba ingene Bruno n’umukenyezi wiwe Tays berekana ko bitwararikana. Bruno avuga ati: “Iyo turi kumwe, turabika amaterefone maze tukinovora uwo mwanya.”

14. Nimba abubakanye badakunda ivyo kumarana umwanya bokora iki?

¹⁴ Bite ho nimba wewe n’uwo mwubakanye mudakunda ivyo kumarana umwanya? Kumbure ntimukunda bimwe, canke na ho muca mutangura kuryagagurana. None mwoca mukora iki? Zirikana kuri ka karorero k’umuriro. Umuriro ntuca ururumba ugitangura kuwucana. Bisaba ko uza urawegenyeza. Muri ubwo buryo nyene, mubona gute mutanguye kuza muramarana umwanya mutomuto buri musi? Nimwitwararike gukora ikintu kibaryohera mwempi aho gukora ikintu cotuma mucanamwo. (Yak. 3:18) Muhereye kuri gitoyi, murashobora kuvyura urukundo mufitaniye.

NIMWUBAHANE

15. Kubera iki kwubahana bihambaye kugira abubakanye bagume bakundana?

¹⁵ Kwubahana birahambaye mu mubano. Bimeze nk’umuyaga utuma umuriro waka cane. Ata muyaga uhari, umuriro ntuteba kuzima. Iyo umugabo n’umugore na bo nyene batubahana, urukundo rwabo ntiruteba gutimba. Ariko iyo bihatira kwubahana bituma baguma bakundana. Mugabo rero, ukwiye kwibuka ko igihambaye atari uko wiyumvira ko wubaha uwo mwubakanye, ahubwo ari uko uwo mwubakanye yiyumvamwo ko umwubaha. Penny na Aret bamaze imyaka irenga 25 bubakanye. Penny avuga ati: “Kubera ko twubahana, mu rugo rwacu harangwa urukundo. Turayaga twisanzuye kuko tuzi ko umwe wese aha agaciro ivyiyumviro vy’uwundi.” None wokora iki kugira ngo utume uwo mwubakanye yiyumvamwo ko umwubaha vy’ukuri? Raba akarorero ka Aburahamu na Sara.

16. Abagabo bokwigira iki ku karorero ka Aburahamu? (1 Petero 3:7) (Raba n’ishusho.)

¹⁶ Aburahamu yarubaha Sara. Yaritaho ivyiyumviro vya Sara akongera akubahiriza ukuntu yiyumva. Igihe kimwe, Sara yarababaye maze aca abibwira Aburahamu ashavuye, mbere amutako ibirake. None Aburahamu yoba yaciye amwishurana ishavu? Habe namba. Yari asanzwe azi ko Sara ari umugore ayoboka kandi basenyera ku mugozi umwe. Aburahamu yaramwumvirije, aca aragerageza gutorera umuti iyo ngorane. (Ita. 16:5, 6) Ni icigwa ikihe none tuhigira? Bagabo, murafise uburenganzira bwo gufata ingingo mu miryango yanyu. (1 Kor. 11:3) Ariko imbere yo gufata ingingo, biraranga urukundo kwumviriza ico umugore wawe avyiyumvirako, na canecane igihe iyo ngingo ishobora kugira ico ikoze kuri we. (1 Kor. 13:4, 5) Mu bindi bihe na ho, umugore wawe yoshobora kugira akamubakiye, agaca akubwira uko yiyumva. Woba umwubahiriza mu kumwumviriza witonze? (Soma 1 Petero 3:7.) Angela na Dmitry bamaze imyaka hafi 30 bubakanye. Angela arasigura ingene umugabo wiwe amwereka icubahiro, ati: “Dmitry yama yiteguriye kunyumviriza igihe cose mba nshavuye canke igihe hari ico nipfuza kumuyagira. Aranyihanganira n’igihe mbere mba ndabivuganye agashavu.”

17. Abagore bokwigira iki ku karorero ka Sara? (1 Petero 3:5, 6)

¹⁷ Sara yarubaha Aburahamu mu gushigikira ingingo yafata. (Ita. 12:5) Igihe kimwe, Aburahamu yarafashe ingingo yo kwakira i muhira iwe abashitsi atari yiteze. Yaciye asaba Sara guhagarika ivyo yariko arakora kugira ategurire abo bantu imikate myinshi. (Ita. 18:6) Sara yaciye abikora adatebaganye arashigikira iyo ngingo ya Aburahamu. Bagore, murashobora kwigana Sara mu gushigikira ingingo abagabo banyu bafata. Mubigize, murarushiriza gukomeza umubano wanyu. (Soma 1 Petero 3:5, 6.) Umwe Dmitry twavuga mu ngingo y’imbere y’iyi, arasigura ingene umugore wiwe yerekana ko amwubaha. Avuga ati: “Ndashima ingene Angela agira akigoro ko gushigikira ingingo mfata, naho tutaba tuzihurizako. N’igihe zitagenze neza, ntaca ankora kw’itama.” Emwe, biroroshe gukunda umuntu akwubaha!

18. Igihe abubakanye bagira akigoro ko kuguma bakundana bibagirira akamaro gute?

¹⁸ Muri iki gihe, Shetani yipfuza kuzimya urukundo abubakanye bakundana. Arazi ko igihe baretse gukundana, baca batangura kuja kure ya Yehova. Ariko urukundo nyakuri ntirushobora kuzima. Ese rero urwo mukundana mu mubano wanyu rwoba nka rumwe rudondorwa mu Ndirimbo ya Salomo. Nimwiyemeze gushira imbere Yehova mu mubano wanyu, mumarane umwanya, mwitwararikane, kandi umwe wese yubahirize ivyiyumviro vy’uwundi. Ivyo bizotuma umubano wanyu uhesha iteka Yehova we Soko ry’urukundo nyakuri, urukundo rwanyu na rwo rugume rururumba nka kurya kw’umuriro uguma wegenyezwa.