Isaayyaas
44 “Tajaajilaa koo kan taate yaa Yaaqoob,
Yaa Israaʼel isan filadhe nana,+ dhagaʼi.
2 Yihowaan inni si uume,
Inni si tolche,+
Inni yeroo gadameessa keessa turte irraa* jalqabee si gargaare akkana jedha:
3 Sababiin isaas, ani isa* dheebote irratti bishaan,+
Lafa gogaa irrattis lageen yaaʼan nan dhangalaasa.
Sanyii kee irratti hafuura koo,
Ijoollee kee irrattis eebba koo nan dhangalaasa.+
4 Isaan akkuma biqiltuu marga lalisaa gidduu jiruutti
Akkuma mukeetii alaltuu lageen yaaʼan qarqara jiraniittis ni biqilu.+
5 Inni tokko, “Ani kan Yihowaa ti” jedha.+
Inni kan biraan maqaa Yaaqoobiin of waama,
Inni kan biraan immoo, “Ani kan Yihowaa ti” jedhee harka isaa irratti barreessa.
Maqaa Israaʼeliinis waamamuu jalqaba.’
‘Ani isa jalqabaa fi isa xumuraa ti.+
Ana malee Waaqni kan biraan hin jiru.+
7 Kan akka kootii eenyu?+
Inni deebii haa kennu, haa dubbatu, naaf haa mirkaneessus!+
Isaan yeroon saba isa bara dheeraa dura ture hundeesse irraa jalqabee
Wantoota dhiheenyatti dhufan,
Wantoota gara fuulduraatti raawwatamanis haa dubbatan.
Ani dursee tokkoon tokkoon keessanitti hin himnee? Akkasumas isinitti hin beeksisnee?
Isin dhugaa baatota koo ti.+
Ana malee Waaqni kan biraan jiraa?
Hin jiru, Qarsaan kan biraan hin jiru;+ ani tokko illee hin beeku.’”
9 Warri fakkiiwwan bocaman tolchan hundi gatii hin qaban,
Miʼawwan isaanii warri isaan bakka guddaa kennaniif sunis faayidaa hin qaban.+
Ragoonni isaanii* kun homaa hin argan, homaas hin beekan,+
Kanaafuu, warri isaan tolchan ni qaanaʼu.+
10 Namni waaqa tolfatu yookiin sibiila baqfame irraa
Fakkii faayidaa hin qabne tolfatu eenyu?+
11 Kunoo, michoonni isaa hundi ni qaanaʼu!+
Ogeeyyiin harkaa sunis namoota dha.
Hundi isaanii walitti qabamanii iddoo isaanii haa qabatan.
Isaan ni naʼu, hundi isaaniis ni salphatu.
12 Namni sibiila tumu, sibiilicha barbadaa irra kaaʼee meeshaa* isaatiin ni tolcha.
Irree isaa isa jabaadhaan tumee
Burruusaan boca itti baasa.+
Achiis ni beelaʼa, humni isaas ni dhuma;
Bishaan waan hin dhugneefis ni dadhaba.
13 Namni muka bocu wadaroo safaraa isaa diriirsee boronqii diimaadhaan sarara itti baasa.
Achiis qirixiidhaan ni soqa, meeshaadhaanis* boca itti baasa.
Fakkii namaa irratti ni kaasa,+
Bifa namaa isa miidhagus irratti ni boca,
14 Namni hojiin isaa muka gaattiraa muruu taʼe tokko jira.
Inni akaakuu mukaa tokko, jechuunis muka qilxuu ni filata,
Mukti sun mukeetii bosonaa gidduutti hamma cimutti ni eega.+
Inni muka laawuroo* ni dhaaba, bokkaanis isa guddisa.
15 Achiis namni tokko ibidda bobeessuuf itti fayyadama.
Inni muraasa isaa bobeessee ibidda qaqqaammata;
Ibidda qabsiisees daabboo tolfata.
Haa taʼu malee, waaqa tolfatee isa ni waaqeffata.
Fakkii bocamaa tolfatees gombifamee isa duratti ni sagada.+
16 Walakkaa isaa ibiddaan ni guba;
Walakkaa isaatiin immoo foon waadee nyaata, ni quufas.
Ibidda qaqqaammatees, “Ishoo, natti hoʼe, ibiddichas argeera” jedha.
17 Isa hafe garuu fakkii bocee waaqa ni tolfata.
Isaaf ni sagada, isa ni waaqeffatas.
Achiis, “Ati waaqa koo waan taateef, na oolchi” jedhee
Kadhannaa isatti dhiheessa.+
18 Isaan homaa hin beekan, homaas hin hubatan;+
Sababiin isaas, ijji isaanii walitti qadaadameera, arguus hin dandaʼan,
Garaan isaanii hubannaa hin qabu.
19 Namni garaa isaatti xiinxalee
Yookiin beekumsa qabaatee yookiin hubannaa qabaatee,
“Walakkaa isaa nan bobeesse,
Ibidda isaatiinis daabboo tolchee, foonis waadee nan nyaadhe.
Maarree isa irraa hafeen wanta jibbisiisaa tolchuun qabaa?+
Muka* hoo waaqeffachuun qabaa?” jedhu hin jiru.
20 Inni daaraa ni nyaata.
Garaan isaa inni gowwoomfame karaa irraa isa jalʼiseera.
Inni of* oolchuu hin dandaʼu
Yookiin, “Wanti harka mirgaa koo irra jiru soba dha mitii?” hin jedhu.
21 “Ati tajaajilaa koo waan taateef,
Yaa Yaaqoob, yaa Israaʼel, wantoota kana yaadadhu.
Ani si tolcheera, ati tajaajilaa koo ti.+
Yaa Israaʼel, ani si hin irraanfadhu.+
22 Ani balleessaa kee akka waan duumessaan haguugameetti,+
Cubbuu kees akka waan duumessa cimaadhaan haguugameetti nan haqa.
Waanan si furuuf, gara kootti deebiʼi.+
23 Yihowaan tarkaanfii waan fudhateef,
Isin samiiwwan ililchaa!
Isin iddoowwan gad fagoon lafaas ililchaa!
Isin gaaronni,
Ati bosonnii fi mukeetiin kee hundis ililchaa!+
Sababiin isaas, Yihowaan Yaaqoobiin fureera,
Ulfina isaas Israaʼel irratti argisiiseera.”+
24 Yihowaan inni si furu,+
Inni yeroo gadameessa keessa turtee jalqabee si tolche akkana jedha:
“Ani Yihowaa isa wanta hunda tolche dha.
Eenyutu anaa wajjin ture?
25 Mallattoo namoonni dubbii gatii hin qabne dubbatan kennan* nan fashaleessa,
Warri hooda dubbatanis akkuma gowwootaa akka taʼan nan godha;+
Namoota ogeeyyii nan joonjessa,
Beekumsa isaaniis gowwummaatti nan jijjiira;+
26 Ani dubbiin tajaajiltoota kootii akka raawwatamu nan godha,
Raajii ergamoonni koo dubbatanis guutummaatti nan raawwadha;+
Ani waaʼee Yerusaalem, ‘Ishiin bakka jireenyaa ni taati’+
Waaʼee magaalota Yihudaas, ‘Isaan deebiʼanii ni ijaaramu,+
Diiggaawwan ishiis deebisee nan ijaara’+ nan jedha;
27 Ani bishaanota gad fagoodhaan, ‘Hurkaa,
Lageen keessan hundumaas nan gogsa’+ nan jedha;
28 Waaʼee Qiirosis,+ ‘Inni tiksee koo ti,
Fedhii koo hundumaas guutummaatti ni raawwata’+ nan jedha;
Waaʼee Yerusaalem, ‘Ishiin deebitee ni ijaaramti,’
Waaʼee mana qulqullummaas, ‘Buʼuurri kee ni kaaʼama’+ nan jedha.”