Wajamaka-liba

Gadu da Jesosi di makiti u puu hii dee fuka dee ta miti libisëmbë. Di du di Jesosi bi ta du foombo wooko, ta lei taa a sa puu hii dee fuka dee wa sa puu ku useei kaakiti. A abi di makiti u puu u a zöndu basu, söseei a abi di makiti u puu u a siki ku dëdë basu (Mat. 9:1-6; Lom. 5:12, 18, 19). Dee foombo wooko dee Jesosi bi du, ta lei taa a sa kula „hii pei” siki, söseei taa a sa weki sëmbë ko a libi baka (Mat. 4:23; Joh. 11:43, 44). Jesosi bi abi di makiti u mbei gaan ventu ko dë pii, söseei u puu taku jeje a sëmbë liba (Maik. 4:37-39; Luk. 8:2). A ta da u kötöhati seei u di u sabi taa Jehovah bi da di Womi Mii fëën di makiti u du dee lö soni aki! U sa dë seiki taa woo feni dee bunu di di Könuköndë u Gadu o tja ko. Dee foombo wooko dee Jesosi bi du di a bi dë a goonliba aki, ta lei u andi a o du a hii di goonliba u di a dë Könu u di Könuköndë u Gadu. w23.04 bld. 3-4 pal. 5-7

Ee i dë a wan gaan kemeente nöö i ta hopo maun, nöö a ta pasa taa ja ta feni okasi u da piki, kandë joo kë mati disa. Ma ja musu disa. I sa ta seeka sömëni piki da hiniwan komakandi. Nöö ee a ko dë sö taa ja feni okasi fii da piki a bigi u di komakandi, nöö joo sa feni okasi fii da piki jeti. Te i ta seeka iseei da Di Hei Wakitimawosu-lei, nöö pakisei luku unfa hiniwan palaklafu nama ku di në u di woto. Ee i ta du di soni dë, nöö joo sa feni soni di i bi o kë taki te un ta luku di woto. Boiti di dë, i sa seeka iseei fii da piki a dee palaklafu dee ta taki u soni di dë pikisö möön taanga u fusutan. Faandi mbei? Wë u di a sa kan taa sëmbë an o hia sö, di o kë da piki te u ta luku dee palaklafu dë. Ma nöö unfa a dë ee tökuseei ja ta feni piki a dee komakandi möönsö? Go piki di baaa di ta hoi Di Hei Wakitimawosu-lei, na un palaklafu i bi o kë da wan piki. w23.04 bld. 21-22 pal. 9-10

Josëfu bi ta dë kabakaba u du andi Jehovah bi piki ën, nöö fëën mbei a bi dë wan bumbuu womi. Möön leki dii pasi Gadu bi piki ën andi a bi musu du u heepi dee sëmbë fëën, nöö hiniwan u dee pasi dë a bi du andi Jehovah bi piki ën, aluwasi a bi taanga (Mat. 1:20; 2:13-15, 19-21). U di Josëfu bi ta du andi Gadu bi ta piki ën, mbei a bi sa sölugu Malia, söseei a bi sa heepi ën u soni an du ën. Pakisei luku unfa di soni dë bi mbei Malia bi ko ta möön lobi Josëfu, söseei unfa a bi mbei a ko ta möön lesipeki ën. Un dee womi dee tööu, un sa djeesi Josëfu. Un sa öndösuku soni a di Bëibel fuun sabi unfa un sa heepi dee sëmbë fuunu. Te un ta du andi di Bëibel ta taki, aluwasi a ta taanga, nöö a sö wan fasi un ta lei taa un lobi dee mujëë fuunu. Di soni dë o mbei soni ko ta waka möön bunu a di tööu libi fuunu. Wan sisa di ta libi a di paati de kai Vanuatu, di tööu möön leki 20 jaa kaa bi taki taa: „Te mi manu ta suku heepi a di Bëibel, söseei te a ta du andi di Bëibel ta taki, nöö mi ta möön lesipeki ën. An ta dë u mi booko mi hedi, u di mi sabi taa a o du soni a wan bunu fasi.” w23.05 bld. 21 pal. 5

Dee Dju dee bi o toona go a Isaëli, bi musu ko dë „wan santa nasiön” da di Gadu u de (Deto. 7:6). Ma tökuseei de bi musu disa so soni u Jehovah sa wai ku de. De bi pai gaansë u dee Dju a Babilon, nöö de bi ko ta si soni kuma dee sëmbë u Babilon, söseei de bi ko guwenti di fasi fa dee sëmbë u Babilon bi ta libi. Sömëni jaa baka di dee Dju bi toona go a Isaëli, a bi bigi da Gaama Nehemia gaanfa seei, di a bi ko si taa so u dee mii di de bi pai a Isaëli an bi pena ta fan di töngö u dee Dju seei (Deto. 6:6, 7; Neh. 13:23, 24). Unfa dee mii dë bi o sa ko lobi Jehovah, söseei unfa de bi o sa dini ën ee de an bi ta fusutan Hebelejëntöngö? Wë biga a di töngö dë gaansë u di Wöutu u Gadu bi sikifi (Ësl. 10:3, 44). U ta si taa dee Dju bi abi hia soni u tooka. Ma a bi o möön kösökösö da de u de tooka dee soni aki a Isaëli, ka de bi ta seti di tuutuu biibi baka.​—Neh. 8:8, 9. w23.05 bld. 15 pal. 6-7

Aluwasi u kë du soni u dou di maaka fuu, söseei aluwasi u seti soni bunu fuu dou ën, tökuseei soni sa pasa di sa mbei a taanga da u fuu dou di maaka fuu. Dee soni dee ta miti „hiniwan fuu a wan juu di wa bi mëni” sa mbei wa feni di okasi fuu du dee soni dee u bi musu du u dou di maaka fuu (Peleik. 9:11). Soni sa miti u di sa mbei u fii bookosaka, söseei di sa mbei wa abi kaakiti tjika (Nöng. 24:10). U di u da zöndu libisëmbë mbei a sa pasa taa u du soni di sa mbei a möön taanga da u u dou di maaka di u kë dou (Lom. 7:23). Nasö a sa kan taa a ta taanga da u u di u wei (Mat. 26:43). Andi sa heepi u ee soni an ko pasa kumafa u bi mëni? Ee wan soni di ja bi mëni ko pasa, nöö di soni dë an kë taki taa i musu disa u mbei möiti u dou di maaka fii. Di Bëibel ta piki u taa fuka sa miti u baka-na-baka. Ma a ta lei u tu taa u sa mbei möiti go dou u du soni u dou di maaka fuu. Awa, te i ta mbei möiti u du soni u dou di maaka fii aluwasi soni ta taanga da i, nöö a di fasi dë i ta lei Jehovah taa i kë du soni u mbei hati fëën piizii. Jehovah musu u ta wai seei te a ta si fa i ta mbei möiti u dou di maaka fii! w23.05 bld. 30-31 pal. 14-15

Te wan njönku baaa ta du di pioniliwooko, nöö di soni dë ta heepi ën faa ko sa’ u wooko makandi ku hii pei sëmbë. A ta heepi ën tu faa ko sa’ u wooko a wan köni fasi ku di möni di a ta kisi (Fil. 4:11-13). Wan bunu fasi fa i sa seeka iseei u bigi du di hii-ten diniwooko, hën da te i ta du di heepi pioniliwooko, nöö di soni dë o heepi i u bigi du di kowoonu pioniliwooko. Di pioniliwooko sa jabi pasi da wan sëmbë faa sa wooko a Bëtëli, nasö faa ko dë wan sëmbë di ta heepi mbei kamian ka u ta dini Gadu. Hiniwan baaa musu abi di maaka u mbei möiti u ko dë wan gaanwomi u kemeente. Di Bëibel ta taki taa ee wan womi kë du di wooko dë, nöö „gaan bumbuu wooko a kë” (1 Tim. 3:1). Di fosu soni, hën da a musu ko dë wan dinai. Dee dinai ta heepi dee gaanwomi a sömëni tookatooka fasi. De ku dee gaanwomi tuu ta wooko makandi u heepi dee baaa ku dee sisa u de, söseei de ta peleiki fajafaja. w23.12 bld. 28 pal. 14-16

Könu Josia bi dë wan njönku kijoo di a bigi suku Jehovah baka. A bi kë ko sabi soni u Jehovah, söseei a bi kë du soni di ta kai ku ën. Ma soni an bi ta kösökösö da di könu aki. A bi njönku, ma a bi musu hopo du soni u tapa sëmbë u de an dini poipoi gadu a di köndë möön. Nöö di soni dë a bi du tu. Ufö Josia tapa 20 jaa, hën a bigi puu dee poipoi biibi a di köndë (2 Klon. 34:1, 2). Aluwasi fa i njönku, tökuseei i sa djeesi Josia. I sa du sö te i ta lei möön soni u Jehovah, söseei te i ta mbei möiti fii ko lobi dee fasi dee a abi. Di soni dë o da i taanga fii sa buta i libi nëën maun. Andi o tooka a di libi fii te i buta i libi nëën maun? Wan baaa de kai Luke bi dopu di a bi abi 14 jaa, nöö a bi taki taa: „Nöunöu di dini di mi musu dini Jehovah hën mi o ta kai möön gaan soni. Söseei mi o mbei möiti faa sa wai ku mi” (Maik. 12:30). Joo feni gaan bunu seei ee iseei du sö tu! w23.09 bld. 11 pal. 12-13

Di di apösutu Paulosu bi sikifi di biifi aki, di kemeente a Tesalonika an bi seti dou jaa jeti. A sa dë sö taa dee womi dee bi ta tei fesi an bi abi öndöfeni a di wooko, söseei a kan taa de bi ta mbei föutu. Ma tökuseei dee baaa ku dee sisa bi musu lesipeki de. Fa di gaan fuka dë zuntu aki, nöö a kan taa a o möön dë fanöudu fuu suku heepi a dee gaanwomi u di kemeente ka u dë. A sa pasa taa wa sa jei soni u dee baaa fuu dee dë a di hedi kantoo fuu, nasö dee baaa u di bëikantoo fuu. Fëën mbei a dë fanöudu fuu lei taa u lobi dee gaanwomi fuu, söseei taa u ta lesipeki de. Aluwasi andi ta pasa, boo dë ku limbolimbo fusutan go dou. Wa musu buta pakisei a dee föutu di dee baaa ta mbei, ma boo hoi a pakisei taa Jehovah buta Jesosi u tii dee gaanwomi aki. Leti kumafa wan felu kaapusa bi ta tjubi di hedi u wan sodati, sö nöö di biibi di u ta biibi taa Gadu o puu u a fuka a di ten di ta ko, ta heepi u fuu si soni a di soifi fasi. U ta fusutan taa dee soni u di goonliba aki da sösö soni (Fil. 3:8). Di biibi fuu ta heepi u fu wa fëëë, söseei a ta heepi u fuu taanpu gingin. w23.06 bld. 11-12 pal. 11-12

Dee sëmbë dee ta jei dee soni dee „di don mujëë” ta taki, musu luku ee de o haikëën nasö ee de an o haikëën. Soni dë di mbei u musu ta köni fu wa libi fanafiti a di së u manu ku mujëë soni. Di Bëibel ta piki u taa di „don mujëë” ta taki taa: „Fufuufufuu wata suti u bebe” (Nöng. 9:17). Andi da di „fufuufufuu wata” dë? Di Bëibel ta tei di duumi di wan womi ku wan mujëë di tööu ta duumi ku deseei, maaka ku wata (Nöng. 5:15-18). Wan womi ku wan mujëë di tööu sa duumi ku deseei. Ma na sö a dë ku di „fufuufufuu wata”, u di di soni dë sa kë taki taa wan womi ku wan mujëë duumi ku deseei, hii fa de an bi abi leti u du ën. Sëmbë lo’ u du di soni dë tjubitjubi, leti kumafa wan fufuuma seei ta fufuu soni tjubitjubi. Di „fufuufufuu wata” sa djei wan suti soni seei ee dee sëmbë dee libi fanafiti, ta si kuma sëmbë an o ko sabi andi de du. Ma de ta ganjan deseei, biga Jehovah ta si hii soni. Soni an dë di hogi möön di poi di u ku Jehovah sa poi. Di soni dë an „suti” seei.​—1 Kol. 6:9, 10. w23.06 bld. 22-23 pal. 7-9

Andi i musu du e i ko si taa ja ta begi ku hii i hati möön, nasö taa di peleikiwooko an ta suti da i möön? Ee sö a dë, nöö na si kuma di jeje u Jehovah an dë ku i möön. U di u da zöndu libisëmbë mbei a sa pasa so juu taa dee fii fuu ta tooka. Ee ja ta dë waiwai sö möön kuma fosu, nöö buta pakisei a di woto u apösutu Paulosu. Hii fa a bi ta mbei möiti u djeesi Masa Jesosi, tökuseei a bi sabi taa so juu an bi o ta abi peesa u du dee soni dee a bi musu du. Paulosu bi dë kabakaba u du di diniwooko fëën go dou, aluwasi ee an bi ta abi peesa u du ën. Sö nöö iseei an musu ta luku a di fasi fa i ta fii wanwan, nöö i du soni. I musu dë kabakaba u du soni a wan bunu fasi aluwasi ee ja ta fii u du ën. Di fasi fa i ta fii sa tooka baka wan pisi ten ee i ta mbei möiti hii juu u ta du soni a wan bunu fasi.​—1 Kol. 9:16. w24.03 bld. 11-12 pal. 12-13

Useei sa lei taa u lobi dee baaa ku dee sisa fuu te u ta tei de ko mati fuu (2 Kol. 6:11-13). Sömëni fuu dë a wan kemeente di abi baaa ku sisa di an dë kuma u, söseei di abi tookatooka fasi. U sa ko lobi de möön gaanfa, te u ta buta pakisei a dee bunu fasi di de abi. Te u ta mbei möiti fuu si woto sëmbë kumafa Jehovah ta si de, nöö u ta lei taa u lobi de. Lobi o dë fanöudu a di pisiten u di gaan fuka. Unfa Jehovah o tjubi u te di gaan fuka dou? Luku andi Jehovah bi piki dee sëmbë fëën u de du di sëmbë bi ko u ko feti ku Babilon. A bi taki taa: „Dee sëmbë u mi, un go a unu dendu wosu, nöö un tapa dee döö. Un tjubi unuseei wan kölö pisiten, u te di hatiboonu u mi ko saka” (Jes. 26:20). A kan taa woo abi u du di seei soni aki a di pisiten u di gaan fuka. w23.07 bld. 6-7 pal. 14-16

Be sëmbë sabi u kuma sëmbë di an ta suku fini a soni poi. Hakisi iseei taa: ’Sëmbë sabi mi kuma wan sëmbë di ta hoi pasensi da wotowan, di ta disa wotowan u de du soni a wan woto fasi, söseei di an ta suku fini a soni poi ö? Naa de ta si mi kuma wan sëmbë di na abi tjalihati u wotowan, kuma wan sëmbë di ta kë u soni pasa nömönömö kumafa a kë, nasö kuma wan sëmbë di an ta tei sëmbë fan? Möön woo ta mbei möiti fu wa ta suku fini a soni poi, möön a o ta dë u si taa u ta djeesi Jehovah ku Jesosi. A dë fanöudu fuu ta bia du soni woto fasi te soni tooka a di libi fuu. Te soni tooka a di libi fuu, nöö u sa ko abi bookohedi di wa bi ta mëni taa u bi o abi wan daka. A sa pasa taa u ko dë ku suwaki. Di tooka di möni soni nasö politiki soni sa tooka vou sö a di pisiwata ka u ta libi, sa mbei taa di libi ko möön taanga da u (Peleik. 9:11). A sa taanga da u tu ee di ölganisaasi u Jehovah hakisi u fuu du wan woto wooko. Woo sa bia du soni woto fasi ee u ta du fö soni. Dee fö soni dë da: Te u ta hoi a pakisei taa soni ko tooka a di libi fuu, te u ta buta mëni a di ten di ta ko, te u ta buta pakisei a hii dee bunu soni dee ta pasa a di libi fuu, ku te u ta du soni da wotowan. w23.07 bld. 21-22 pal. 7-8

Di tjabukama de kai Daniëli bi dë wan njönku kijoo di dee Babilon sëmbë bi kisi ën puu nëën köndë, tja go a katibo a Babilon. Ma a djei kuma dee sëmbë dee bi kisi ën tja go bi si wan soni nëën. De bi si „soni di di wojo ta si nöö” a kaba. De bi si taa Daniëli bi „hanse”, taa „na wan soni bi ta makei” ën, söseei taa dee sëmbë fëën bi dë heihei sëmbë (1 Sam. 16:7). Fëën mbei dee Babilon sëmbë bi lei ën soni faa bi sa wooko a di könu wosu (Dan. 1:3, 4, 6). Jehovah bi lobi Daniëli u di fasi fa a bi dë. Awa, a kan taa Daniëli bi zuntu ku söwan 20 jaa sö, nasö kandë a bi abi 20 jaa di Jehovah bi taki taa a bi ta du soni a wan leti fasi kuma Noa ku Jöpu. Ma dee womi aki de de bi dini Jehovah sömëni jaa longi (Ken. 5:32; 6:9, 10; Jöpu 42:16, 17; Eze. 14:14). Daniëli bi libi gaandi, nöö Jehovah bi lobi ën go dou fu te a dëdë.​—Dan. 10:11, 19. w23.08 bld. 2 pal. 1-2

Ee i kë bai wan wosu, a musu u dë sö taa iseei bi o kë go si ën fii sa waka luku ën, fii sa si dee kamba, söseei fii sa si unfa a bigi tjika ufö i bai ën. U sa du sö wan pei soni tu te u ta lesi di Bëibel, söseei te u ta öndösuku soni nëën. Ee u ta lesi ën valavala, nöö a kan taa wantu fanöudu soni nöö woo sabi. Dee soni dë da „dee goonsei pisi” u di Wöutu u Gadu (Heb. 5:12). Leti kumafa a dë fanöudu fii go a di wosu fii sa ko sabi möön soni fëën, sö nöö a dë fanöudu fii tei ten öndösuku di Bëibel fii sa ko fusutëën bumbuu. Wan bunu fasi fa u sa öndösuku soni a di Bëibel, hën da te u ta mbei möiti fuu ko fusutan unfa hii dee pisipisi fëën nama ku deseei. Pooba fii ko fusutan dee soni dee i ta biibi, söseei pooba fii ko fusutan faandi mbei i ta biibi de. Fuu sa fusutan di Wöutu u Gadu te dou, nöö a dë fanöudu fuu öndösuku so soni finifini. Di Apösutu Paulosu bi da dee baaa ku dee sisa fëën taanga u de öndösuku di Wöutu u Gadu finifini, sö taa de bi sa „ko fusutan fa dee soni u Gadu baai, fa de langa, fa de hei ku fa de fundu tjika”. A sö wan fasi de bi o sa ko dë gingin a di biibi (Ef. 3:14-19). Di soni dë useei musu du tu. w23.10 bld. 18 pal. 1-3

Di Bëibel ta taki soni u sömëni woto sëmbë di bi abi pasensi tu. Asa bunu fii öndösuku soni u dee sëmbë aki. Dafiti da wan u dee sëmbë dë, nöö a bi njönku seei di Jehovah bi salufu ën faa ko dë di njunjun könu u Isaëli, ma tökuseei a bi musu wakiti sömëni jaa ufö a toon könu. Simion ku Hana bi ta dini Jehovah ku hii de hati go dou, di de bi ta wakiti u di Mësiasi dou (Luk. 2:25, 36-38). Te i ta öndösuku soni u dee sëmbë aki, nöö mbei möiti fii feni di piki u dee hakisi aki: Andi bi heepi di sëmbë aki faa hoi pasensi? Un wini a bi feni u di a bi lei taa a abi pasensi? Unfa mi sa djeesi ën? I sa feni wini te lei soni u dee sëmbë dee an bi hoi pasensi tu (1 Sam. 13:8-14). I sa hakisi iseei taa: ’Andi bi mbei taa de an bi hoi pasensi? Unfa di soni dë bi mbei soni waka da de?’ w23.08 bld. 24-25 pal. 15

Apösutu Petuisi bi ta hoi hënseei a Jesosi. An bi mbei na wan soni tapëën faa waka a Jesosi baka. Wan daka, hën Jesosi bi taki wan soni di dee bakama fëën an bi fusutan (Joh. 6:68). Ka u de bi wakiti u jei möön fini u di woto, nasö ka u de bi hakisi Jesosi faa puu di woto da de, hën sömëni u de bia kaba dëën. Ma Petuisi hën an bi du sö, a bi hoi hënseei a Jesosi, hën a piki ën taa: „I nöö abi dee wöutu dee ta da sëmbë libi u teego.” Jesosi bi sabi taa Petuisi ku dee woto apösutu tuu bi o go disëën. Ma tökuseei Jesosi bi piki Petuisi taa a dë seiki taa a bi o toona ko, nöö a bi o hoi hënseei nëën go dou (Luk. 22:31, 32). Awa, Jesosi bi sabi taa di „hati . . . kë du kumafa a fiti, ma sinkii . . . an taanga sö” (Maik. 14:38). Fëën mbei Jesosi an bi disa Petuisi, baka di Petuisi bi fia taa an sabi ën. Baka di Jesosi weki ko a libi baka, hën a go miti Petuisi. An kan taa a bi go nëën di a bi dë hën wanwan a wan kamian (Maik. 16:7; Luk. 24:34; 1 Kol. 15:5). Di soni dë bi musu u da Petuisi taanga seei, biga a bi musu u ta tjali gaanfa jeti u di soni di a bi du! w23.09 bld. 22 pal. 9-10

Gadu ta da dee sëmbë dee ta biibi ën paadon. An ta mëni dee hogilibi u de na wan pikisö tësitësi möön seei (Ps. 32:1, 2). A ta si dee lö sëmbë dë kuma sëmbë di dë söndö föutu, söseei di ta du soni a wan leti fasi, u di de abi biibi. Abahamu, Dafiti ku wanlö woto dinima u Gadu bi dë zöndu libisëmbë jeti, di Gadu bi taki taa de ta du soni a wan leti fasi. Ma u di de bi abi biibi, mbei Gadu bi ta si de kuma sëmbë di dë söndö föutu, möönmöön te a bi tei de maaka ku dee sëmbë dee an bi ta dini ën (Ef. 2:12). A di biifi di apösutu Paulosu bi manda da dee baaa ku dee sisa u Loomë, a bi lei gbelingbelin taa ee wa abi biibi, nöö u ku Gadu an sa dë mati. Abahamu ku Dafiti bi dë Gadu mati, u di de bi ta biibi Gadu. U ku Gadu sa ko dë mati tu, ee u ta biibi ën. w23.12 bld. 3 pal. 6-7

A di ten aki hiniwan Keesitu sëmbë abi di gaandi u tja soni go da Jehovah. De sa du di soni aki te de ta tei di ten u de, di kaakiti u de, ku dee soni dee de abi u dini Jehovah. U sa lei taa u dë ku tangi a hati da di gaandi di u abi u dini Jehovah, te u ta dëën dee möön bunu soni dee u abi. Di apösutu Paulosu bi ta sikifi dee lasiti pisi u di biifi di a bi sikifi da dee Keesitu sëmbë dee bi ta fan Hebelejëntöngö, hën a bi taki soni u dee möön fanöudu soni di u musu ta du hiniwan juu a di dini di u ta dini Jehovah (Heb. 10:22-25). A bi taki soni u di begi di u musu ta begi Jehovah, di konda di u musu ta konda soni u di biibi fuu da wotowan, di hoi di u musu ta hoi komakandi, ku di da di u musu ta da useei taanga möön u „ta si taa di daka ta ko möön zuntu”. A di lasiti pisi u di buku Akoalimbo, di ëngëli u Jehovah ta taki taa: ’Gadu wanwan i musu begi!’ (Ako. 19:10; 22:9) Di ëngëli bi taki di soni aki tu pasi u lei fa a bi dë fanöudu tjika. Fëën mbei nöiti wa musu fëëkëtë dee soni dee u lei u di Wosu u Gadu di wa sa si ku wojo, söseei u musu tei ën u bigi taa u abi di gaandi u dini Masa Gaan Gadu! w23.10 bld. 29 pal. 17-18

Hii u tuu kë fuu ta „lobi useei” go dou. Ma tökuseei a bunu fuu hoi a pakisei taa Jesosi bi piki dee bakama fëën taa ’gaan së u sëmbë an o lobi de na de möön’ (Mat. 24:12). Jesosi an bi kë taki taa gaansë u dee bakama fëën an bi o ta lobi de na de möön. Ma tökuseei u musu ta köni taa wa ko dë kuma dee sëmbë u di goonliba aki di na ta lobi de na de. Fëën mbei a bunu fuu hakisi useei di fanöudu soni aki: „Wan fasi dë fa mi sa ko sabi ee di lobi di mi abi da dee baaa ku dee sisa u mi taanga tjika u?” Wan fasi fa u sa ko sabi ee u lobi de baaa ku dee sisa fuu tjika, da te u ta buta pakisei a di fasi fa u ta du soni te so soni ta pasa (2 Kol. 8:8). Apösutu Petuisi bi taki soni u di soni aki di abi taki taa: „Ma di gaan soni, hën da un musu ta lobi unu na unu makandi gaanfa. Biga ee i lobi wan sëmbë, nöö ee a ta du sömëni soni seei dee an ta kai, ma nöö ja o si de biga i lobi ën” (1 Pet. 4:8). Fëën mbei te wan baaa nasö wan sisa mbei wan föutu, nasö te a du wan soni ku u di hati u, nöö di fasi fa woo du soni o lei ee u lobi ën tjika. w23.11 bld. 10-11 pal. 12-13

Ee u ta lobi so u dee baaa ku sisa u di kemeente nöö, nöö hën da wa ta lobi u na u kumafa Jesosi piki u. A sa pasa taa u möön dë mati ku so u dee baaa ku dee sisa, leti kumafa Jesosi bi möön dë mati ku so u dee bakama fëën (Joh. 13:23; 20:2). Ma apösutu Petuisi bi mëni u taa u musu ta mbei möiti u lobi hii dee baaa ku dee sisa fuu, biga de da famii fuu (1 Pet. 2:17). Petuisi bi da u taanga fuu ’ta lobi useei möön taanga jeti, ku hii u hati’ (1 Pet. 1:22). A di pisi aki, dee wöutu „möön taanga” kë taki taa u musu lobi wan sëmbë, hii fa a ta taanga da u fuu du soni u lei taa u lobi ën. Ma unfa a dë ee wan baaa nasö wan sisa du wan soni ku u di hati u? U sa fii u du di seei soni ku ën baka, ka fuu lei taa u lobi ën. Ma Petuisi bi lei a Jesosi taa Gadu an lobi te sëmbë ta libi sö (Joh. 18:10, 11). Petuisi bi taki taa: „Ee wan sëmbë du hogi ku i, ja musu du hogi ku ën baka e. Ee wan sëmbë kosi i, disëën. Na toona kosi ën baka, ma begi Gadu dëën be a feni bunu” (1 Pet. 3:9). Te i abi di taanga lobi di u taki fëën aki, nöö joo ta libi suti ku wotowan. w23.09 bld. 29 pal. 9-11

A dë wan foombo soni seei u si fa wan mii ta göö hesihesi ko toon gaansëmbë. A ta dë kuma di mii an ta abi u du na wan soni faa sa göö. Ma ee u kë ko dë gaangaan sëmbë a di biibi, nöö u musu mbei möiti fëën (1 Kol. 13:11; Heb. 6:1). Fuu sa du di soni dë, nöö u ku Jehovah musu ko dë gaan mati. U abi di jeje fëën fanöudu u heepi u fuu ko abi dee fasi dee a lobi, fuu ko sa’ u du soni möön bunu, söseei fuu seeka useei da dee faantiwöutu dee u sa feni a di ten di ta ko (Nöng. 1:5). Di Jehovah mbei libisëmbë, hën a mbei wan womi ku wan mujëë (Ken. 1:27). A dë gbelingbelin u si taa womi ku mujëë tooka gaanfa seei a di fasi fa sinkii u de mbei. Boiti di dë, de tooka a sömëni fasi jeti. Jehovah da womi ku mujëë apaiti faantiwöutu, nöö fëën mbei de musu ko sa’ u du so soni u de sa tja dee faantiwöutu u de.​—Ken. 2:18. w23.12 bld. 18 pal. 1-2

Jesosi bi kë taa woto sëmbë bi musu ta kai hën Tata nëën në u? Wë aai. A kan taa so hedima u keiki bi ta biibi taa an dë wan lesipeki soni u kai Gadu nëën në. Ma Jesosi an bi ta mbei dee lei dee an bi ta kai ku di Wöutu u Gadu tapëën fa gafa di në fëën Tata. Pakisei di woto ka a bi puu wan taku jeje a wan womi liba a di pisiwata u Galasëni. Dee sëmbë u di pisiwata dë bi ko fëëë seei, hën de hakisi ën faa go, nöö fëën mbei an bi fika dë (Maik. 5:16, 17). Ma tökuseei Jesosi bi kë u dee sëmbë fu ala ko sabi di në u Jehovah tu. Fëën mbei a bi piki di womi di a bi heepi taa a bi musu piki sëmbë taa na hën Jesosi hën bi mbei a ko bunu baka, ma Jehovah hën bi mbei soni waka sö (Maik. 5:19). Di seei soni dë a kë fuu du tu. A kë fuu mbei sëmbë ko sabi di në fëën Tata a hii së u goonliba! (Mat. 24:14; 28:20) Te u ta du di soni dë, nöö woo mbei Jesosi di Könu fuu, wai ku u. w24.02 bld. 10 pal. 10

Di dë di u dë a di ölganisaasi u Jehovah a dee lasiti daka aki, da wan gaan bunu di u abi. Di libi a di goonliba aki ta ko möön taanga, ma Jehovah da u dee baaa ku dee sisa fuu u heepi u (Ps. 133:1). Jehovah ta heepi u fuu abi wan piizii wosudendu libi (Ef. 5:33–6:1). Boiti di dë, a ta da u di köni di u abi fanöudu fuu sa ta dë bööböö. U musu mbei möiti seei fuu sa ta dini Jehovah go dou. Faandi mbei u taki sö? Wë u di so juu sëmbë sa du soni nasö taki soni di sa hati u. Nasö dee föutu dee useei ta mbei sa mbei u fii bookosaka, möönmöön ee u ta mbei dee seei föutu nöömö. U musu hoi dou a di dini di u ta dini Jehovah te wan baaa nasö wan sisa du wan soni di hati u, te di sëmbë di u ku ën tööu du wan soni di hati u, söseei te useei mbei wan föutu. w24.03 bld. 14 pal. 1-2

So juu, joo ta jei woto u baaa ku sisa di bi seeka soni sö taa de bi sa du möön da Jehovah. Kandë de bi go a di Siköö da Könuköndë Peleikima, nasö kandë de bi go heepi a wan kamian ka möön peleikima bi dë fanöudu. Ee i abi di okasi u du möön da Jehovah, nöö a bunu seei. Dee dinima u Jehovah ta dë kabakaba u du möön a di dini di de ta dini ën (Tjab. 16:9). Ma e ja sa du möön da Jehovah nöunöu, nöö na pakisei taa dee sëmbë dee sa du möön soni dëën, bunu möön i. Di möön fanöudu soni, hën da hoi i musu hoi dou (Mat. 10:22). Hoi a pakisei taa Jehovah o wai ku i te i ta du andi i sa du dëën. U di a dë di möön bunu fasi fa i sa ta waka a Jesosi baka go dou, baka te i dopu.​—Ps. 26:1. w24.03 bld. 10 pal. 11

Di Tata fuu di dë a liba ala paamusi u taa a o da u paadon, ee u lei taa u ta tjali u dee zöndu dee u du (Ps. 86:5). Fëën mbei ee u lei taa a hati u tuutuu taa u bi du zöndu a di ten di pasa, nöö u sa dë seiki taa Jehovah da u paadon tuutuu, leti kumafa a paamusi u. Andi sa heepi u fu wa ta si kuma wa ta du soni tjika? Hoi a pakisei taa Jehovah ta fusutan u. Nöiti a ta hakisi u fuu du soni di wa sa du. A ta tei hiniwan soni di u ta du dëën u bigi, solanga u du ën a di möön bunu fasi fa u sa du ën. Buta pakisei tu a dee sëmbë fu awooten, dee bi dini Jehovah ku hii de hati. Pakisei soni u di apösutu Paulosu. A bi wooko taanga da Jehovah sömëni jaa longi. A bi nango a sömëni longi kamian, söseei a bi hopo sömëni njunjun kemeente. Bakaten soni bi ko mbei taa an bi sa peleiki kuma fosu möön. Ma a dë sö taa Jehovah an bi feni ën u bunu möön u di soni dë hedi ö? Wë nönö. A bi mbei möiti go dou u du andi sa du, hën Jehovah mbei a feni gaan bunu (Tjab. 28:30, 31). Wë sö nöö a dë taa so juu wa o sa du so soni da Jehovah. Ma Jehovah an ta luku a di soni dë. A ta luku di soni di mbei u ta dini ën. w24.03 bld. 27 pal. 7, 9

Di fasi fa Jesosi bi ta begi Jehovah, bi sa heepi dee bakama fëën u deseei ko sabi unfa de musu ta begi. Jesosi bi lo’ u begi te a bi ta du di diniwooko fëën. A bi ta seeka soni sö taa a bi sa begi, u di hii juu a bi ta abi sömëni soni u du, söseei u di sëmbë bi lo’ u go suku heepi nëën (Maik. 6:31, 45, 46). A bi ta hopo fuuku, sö taa a bi sa dë hën wanwan faa begi. Wan pasi a bi begi wan hii ndeti, u di a bi musu du wan fanöudu soni (Luk. 6:12, 13). Nöö a di ndeti ufö a dëdë, a bi begi sömëni pasi, u di a bi musu du wan gaan fanöudu soni (Mat. 26:39, 42, 44). Di woto u Jesosi ta lei u taa aluwasi ee u abi sömëni soni u du, tökuseei u musu ta seeka soni sö taa u sa ta begi. Leti kuma Jesosi, a o dë fuu suku wan ten fuu ta begi. Kandë a o dë fuu hopo fuuku mamate, nasö kandë a o dë fuu go kandi pikisö möön lati, fuu sa feni ten fuu begi. Te u ta mbei dee möiti dë, nöö u ta lei Jehovah taa u ta tei ën u bigi taa u sa ta begi ën. w23.05 bld. 3 pal. 4-5

Te i buta pakisei a di töngö di de bi sikifi di tëkisi u tide, nöö a ta lei taa Jehovah lobi dee salufuwan sö tee taa u sa tei ën maaka ku di fasi fa wata ta kule djulululu a wan dan. Dee salufuwan sabi taa ’Gadu lobi de’ (Jud. 1). Apösutu Jakobosi bi taki unfa de ta fii, di a bi taki taa: „Dee sëmbë o, de ta kai u Masa Gadu mii e. Nöö sö a dë. U da mii fëën tuu. Wë nöö ee u ta tja di në taa u da Gadu mii, nöö nëën da Masa Gadu lobi u te na soni nö?” (1 Joh. 3:1) Dee salufuwan nöö Jehovah lobi ö? Wë nönö. Jehovah lei taa a lobi hii u tuu. Andi da di möön gaan soni di ta lei taa Jehovah lobi sëmbë tuutuu? Di soni dë da di lusupaima. Sëmbë an bi du sö wan gaan soni wan daka u lei taa de lobi wotowan.​—Joh. 3:16; Lom. 5:8. w24.01 bld. 28 pal. 9-10

Di tëkisi aki ta taki u wan soni di bi heepi Dafiti fu an fëëë möön. Hii fa a bi sa lasi hën libi, tökuseei a bi ta kai pakisei a dee soni dee Jehovah bi o du dëën. Dafiti bi sabi taa Jehovah bi o heepi ën a di soifi ten. Jehovah bi taki taa Dafiti bi o toon könu u Isaëli (1 Sam. 16:1, 13). Dafiti bi dë seiki taa te Jehovah paamusi u wan soni, nöö a ta pasa tuutuu. Andi Jehovah paamusi taa a o du da i? Wa ta dë ku di mëni taa a o tjubi u u na wan hogi miti u. Ma hoi a pakisei taa a di njunjun goonliba Jehovah o puu hii dee fuka dee ta miti u a di ten aki (Jes. 25:7-9). Di Sëmbë di mbei u abi di makiti u weki dee sëmbë dee dëdë ko a libi baka, a abi di makiti u kula u, söseei a abi di makiti u puu dee fuka dee u ta tja.​—1 Joh. 4:4. w24.01 bld. 6 pal. 12-13

Pakisei di buta di i buta i libi a Jehovah maun, hën i dopu. I du dee soni dë, u di i bi kë dë a Jehovah së. Mëni andi bi heepi i fii bi ko dë seiki taa i feni di tuutuu lei. I bi lei soni u Jehovah, hën i ko lobi ën, i ko ta lesipeki ën, söseei i ko ta si ën kuma di Tata fii di dë a liba ala. I bi ko abi biibi, hën i bi kë du soni woto fasi. I bi disa dee soni dee Jehovah an lobi, hën i bigi du soni di ta kai ku ën. I bi wai seei di i bi ko si taa Jehovah Gadu bi da i paadon (Ps. 32:2). I bi ko nango a dee komakandi, hën i bigi konda dee soni dee i bi ta lei da wotowan. Bakaten i bi buta i libi a Gadu maun, hën i dopu. Nöunöu i ta waka a di pasi di ta mbei sëmbë feni libi, nöö ja kë na wan soni puu i a di pasi aki (Mat. 7:13,14). Ta mbei möiti fii hoi gingin a di biibi. Be ja disa Jehovah ku dee wëti fëën möönsö. w23.07 bld. 17 pal. 14; bld. 19 pal. 19

Di soni di o heepi i fii finga futu te tesi ta miti i, hën da te i ta pakisei di begi di i bi begi Jehovah buta i libi nëën maun. I bi o ta luku wan woto sëmbë mujëë nasö manu ku lobi wojo u? Wë nönö! I sabi kaa taa ja o du di soni dë. Fëën mbei an bi o dë wan köni soni fii da taku fii pasi u dee göö a i hati, fii musu go feni de puu bakaten. I musu ’kumutu disa di pasi u dee hogihati sëmbë’ (Nöng. 4:14, 15). Fëën mbei leti kuma Jesosi, i musu mbei möiti u finga futu da dee soni di i sabi taa sa mbei di Gadu di i buta i libi nëën maun, a feni i u bunu möön (Mat. 4:10; Joh. 8:29). Di fasi fa i ta du soni te tesi ta miti sa lei ee i de kabakaba u ta waka a Jesosi baka go dou. I sa dë seiki taa Jehovah o heepi i fii ta waka a Jesosi baka go dou. w24.03 bld. 9-10 pal. 8-10