MALAKAỊ

1 Ozi gbara ọkpụrụkpụ:

Okwu Jehova si n’ọnụ Malakaị* gwa Izrel:

2 Jehova kwuru, sị, “M hụrụ unu n’anya.+

Ma unu sịrị: ‘Olee otú i si hụ anyị n’anya?’”

Jehova kwukwara, sị, “Ọ̀ bụ na Ịsọ abụghị nwanne Jekọb?+ Ma ahụrụ m Jekọb n’anya, 3 kpọọ Ịsọ asị.+ M mere ka ugwu ya tọgbọrọ chakoo,+ hapụkwara nkịta ndị bi n’ala ịkpa ala o ketara.”+

4 Jehova nke ụsụụ ndị agha kwukwara, sị: “N’agbanyeghị na Ịdọm* na-asị, ‘A kụriela anyị, ma anyị ga-alọghachi rụghachi ebe dakpọsịrị adakpọsị.’ Ha ga-arụ ya, ma m ga-akwatu ya. A ga-akpọ ha ‘ala ajọ omume,’ kpọọkwa ha ‘ndị Jehova jụrụ ruo mgbe ebighị ebi.’+ 5 Anya unu ga-ahụ ya, unu ga-asịkwa: ‘Ka e too Jehova n’ala Izrel niile.’”

6 “‘Nwa na-asọpụrụ nna ya,+ onye na-eje ozi na-asọpụkwara nna ya ukwu. N’ihi ya, ọ bụrụ na m bụ nna,+ olee otú unu si na-asọpụrụ m?+ Ọ bụrụkwa na m bụ nna unu ukwu, olee egwu unu na-atụ m?’* Ọ bụ ihe Jehova nke ụsụụ ndị agha gwara unu ndị nchụàjà, ndị na-eleda aha m anya.+

“‘Ma unu sịrị: “Olee otú anyị si leda aha gị anya?”’

7 “‘Ọ bụ maka na unu na-achụ nri* rụrụ arụ n’àjà n’ebe ịchụàjà m.’

“‘Unu na-asịkwa: “Olee otú anyị si mee ka ị ghara ịdị nsọ?”’

“‘Ọ bụ maka na unu na-asị: “E kwesịrị ileda tebụl Jehova+ anya.” 8 Mgbe unu na-eji anụmanụ kpuru ìsì achụ àjà, unu na-asị: “E nweghị ihe o mere.” Mgbe unu na-ewetakwa anụmanụ dara ngwọrọ ma ọ bụ nke na-arịa ọrịa, unu na-asị: “E nweghị ihe o mere.”’”+

“Biko, werenụ ya gaa nye gọvanọ unu. Obi ọ̀ ga-adị ya mma? Ọ̀ ga-anabata unu nke ọma?” Ọ bụ ihe Jehova nke ụsụụ ndị agha kwuru.

9 “Ugbu a, biko, rịọnụ Chineke arịrịọ,* ka o wee meere anyị amara. Ebe unu ji ihe ndị ahụ na-achụ àjà, è nwere onye n’ime unu ọ ga-anabata nke ọma?” Ọ bụ ihe Jehova nke ụsụụ ndị agha kwuru.

10 “Ònye n’ime unu ga-ewepụta onwe ya ịna-emechi ọnụ ụzọ?*+ Unu anaghịdị amụnye ọkụ n’ebe ịchụàjà m n’anaghị ihe ọ bụla.+ Ihe unu anaghị amasị m, onyinye ọ bụla unu wetara anaghịkwa eme m obi ụtọ.”+ Ọ bụ ihe Jehova nke ụsụụ ndị agha kwuru.

11 “N’ihi na malite n’ebe ọwụwa anyanwụ ruo n’ebe ọdịda anyanwụ, a ga-asọpụrụ aha m ná mba niile.+ A ga na-achụ àjà n’ebe niile, a ga na-ewetakwa onyinye iji too aha m, bụ́ onyinye dị ọcha; n’ihi na a ga-asọpụrụ aha m ná mba niile.”+ Ọ bụ ihe Jehova nke ụsụụ ndị agha kwuru.

12 “Ma unu na-eme ka ọ ghara ịdị nsọ,*+ na-asị, ‘Tebụl Jehova rụrụ arụ, e kwesịkwara ileda mkpụrụ ya anya, ya bụ, nri ndị a na-edokwasị na ya.’+ 13 Unu na-asịkwa, ‘Ike ya agwụla anyị.’ Unu na-emikwara ya ọnụ.”* Ọ bụ ihe Jehova nke ụsụụ ndị agha kwuru. “Unu na-ewetakwa anụmanụ ndị e zuru ezu, ndị dara ngwọrọ, na ndị na-arịa ọrịa. N’eziokwu, unu na-enye ha n’onyinye. M̀ kwesịrị ịnara unu ha?”+ Ọ bụ ihe Jehova kwuru.

14 “Onye aghụghọ nke nwere anụmanụ ahụ́ dị mma bụ́ oké n’ìgwè anụ ya, ma ya ekwe nkwa ma jiri nke ahụ́ na-adịghị mma* chụọrọ Jehova àjà, a ga-abụ ya ọnụ. N’ihi na abụ m Eze ukwu,+ aha m ga-adịkwa egwu ná mba niile.”+ Ọ bụ ihe Jehova nke ụsụụ ndị agha kwuru.

2 “Ndị nchụàjà, ọ bụ unu ka m na-enye iwu a.+ 2 Ọ bụrụ na unu egeghị ntị, ọ bụrụkwa na e nweghị ihe unu ji ito aha m kpọrọ,* m ga-abụ unu ọnụ,+ m ga-emekwa ka ngọzi unu bụrụ ịbụ ọnụ.+ N’eziokwu, emeela m ka ngọzi unu bụrụ ịbụ ọnụ n’ihi na e nweghị ihe unu ji ya kpọrọ.” Ọ bụ ihe Jehova nke ụsụụ ndị agha kwuru.

3 “Lee, m ga-emebi mkpụrụ unu kụrụ akụ* n’ihi unu,+ m ga-efekwa unu nsị n’ihu, nsị anụmanụ unu ji chụọ àjà n’oge ememme unu. A ga-eburukwa unu tụba na ya.* 4 Unu ga-amatazi na m nyere unu iwu a ka ọgbụgba ndụ mụ na Livaị wee dịgide.”+ Ọ bụ ihe Jehova nke ụsụụ ndị agha kwuru.

5 “Ọgbụgba ndụ mụ na ya bụ nke ndụ na nke udo, nke m nyere ya, ka o wee tụọ egwu m.* Ọ tụrụ egwu m. N’eziokwu, ọ tụrụ egwu aha m. 6 Iwu* nke eziokwu dị n’ọnụ ya,+ e nweghịkwa okwu ọjọọ a hụrụ n’egbugbere ọnụ ya. Mụ na ya dị n’udo. Ọ kwụwara aka ya ọtọ,+ meekwa ka ọtụtụ ndị hapụ mmehie ha. 7 N’ihi na egbugbere ọnụ onye nchụàjà kwesịrị ịna-akụziri ndị mmadụ gbasara Chineke, ndị mmadụ kwesịkwara ịna-ajụta ya ihe iwu kwuru*+ maka na ọ bụ onye ozi Jehova nke ụsụụ ndị agha.

8 Jehova nke ụsụụ ndị agha kwuru, sị, “Ma unu ahapụla ụzọ ahụ. Unu emeela ka ọtụtụ ndị ghara ịna-edebe iwu.*+ Unu emebiela ọgbụgba ndụ Livaị.+ 9 N’ihi ya, m ga-eme ka ndị niile kpọọ unu asị ma leda unu anya n’ihi na unu esoghị ụzọ m, kama unu na-ele mmadụ anya n’ihu ma unu mewe ihe iwu kwuru.”+

10 “Ọ́ bụghị otu nna ka anyị niile nwere?+ Ọ́ bụghị otu Chineke kere anyị? Gịnịzi mere anyị ji na-aghọ ibe anyị aghụghọ,+ na-emebi ọgbụgba ndụ ndị nna nna anyị? 11 Juda aghọọla aghụghọ, e meekwala arụ n’Izrel nakwa na Jeruselem; n’ihi na Juda asọpụrụghị* Jehova+ onye hụrụ ihe dị nsọ n’anya. Juda lụkwara nwaanyị na-efe chi ndị mba ọzọ.*+ 12 Jehova ga-ebibi onye ọ bụla na-eme ihe a n’ụlọikwuu Jekọb, onye ọ sọkwara ya bụrụ,* n’agbanyeghị na ọ na-ewetara Jehova nke ụsụụ ndị agha onyinye.”+

13 “E nwekwara ihe ọzọ* unu na-eme nke mere ka anya mmiri, ibe ákwá, na ịsụ ude kpuchie ebe ịchụàjà Jehova, nke mere na ọ naghịzi anabata onyinye unu, ihe ọ bụla unu wetara anaghịkwa amasị ya.+ 14 Unu na-asịkwa, ‘Ọ̀ bụ n’ihi gịnị?’ Ọ bụ n’ihi na Jehova agbaala akaebe na ị ghọrọ nwunye ị lụrụ n’okorobịa aghụghọ, n’agbanyeghị na ọ bụ nwunye gị, bụrụkwa nwaanyị gị na ya gbara ndụ.+ 15 Ma, e nwere onye na-emeghị otú ahụ n’ihi na mmụọ nsọ ka dị n’ime ya. Gịnịkwa ka onye ahụ na-achọ? Ọ na-achọ ụmụ* ga-abụ nke Chineke. N’ihi ya, kpacharanụ anya gbasara ihe unu na-eche n’obi unu,* ka onye ọ bụla ghara ịghọ nwunye ọ lụrụ n’okorobịa aghụghọ. 16 N’ihi na m kpọrọ* ịgba alụkwaghịm asị.”+ Ọ bụ ihe Jehova bụ́ Chineke Izrel kwuru. “M kpọkwara onye na-arụ arụrụala* asị. Kpacharanụ anya gbasara ihe unu na-eche n’obi unu,* unu aghọkwala aghụghọ.”+ Ọ bụ ihe Jehova nke ụsụụ ndị agha kwuru.

17 “Ihe unu na-ekwu emeela ka ike unu gwụ Jehova.+ Ma, unu na-asị, ‘Olee otú anyị si mee ka ike anyị gwụ ya?’ Ọ bụ maka na unu na-asị, ‘Onye ọ bụla na-eme ihe ọjọọ dị mma n’anya Jehova, ihe onye ahụ na-amasịkwa ya,’+ ma ọ bụ na-asị, ‘Ebee ka Chineke onye na-ekpe ikpe ziri ezi nọ?’”

3 “Lee, m na-ezite onye ozi m, ọ ga-edozikwa ụzọ n’ihu m.+ Na mberede, ezigbo Onyenwe unu, onye unu na-achọ, ga-abịa n’ụlọ nsọ ya;+ onye ozi nke ọgbụgba ndụ ga-abịakwa, onye unu na-atụsi anya ya ike. Lee, ọ ga-abịa.” Ọ bụ ihe Jehova nke ụsụụ ndị agha kwuru.

2 “Ma ònye ga-edili ụbọchị ọ ga-abịa, ònye ga-eguzolikwa mgbe ọ ga-apụta? N’ihi na ọ ga-adị ka ọkụ onye na-anụcha ihe, dịkwa ka ncha+ nke ndị na-asụ ákwà. 3 Ọ ga-anọdụkwa ka onye na-anụcha ihe na onye na-asacha ọlaọcha.+ Ọ ga-asacha ụmụ Livaị. Ọ ga-anụcha ha ka ọlaedo, nụchaakwa ha ka ọlaọcha. Ha ga-abụzi ndị ezi omume ndị na-ewetara Jehova onyinye. 4 Onyinye Juda na Jeruselem na-eweta ga-adị Jehova mma, otú ọ dị ya n’oge ndị dị anya gara aga nakwa otú ọ dị ya n’oge ochie.+

5 “M ga-abịa ikpe unu ikpe. M ga-ama ndị a ikpe ọsọ ọsọ: ndị dibịa afa,+ di ma ọ bụ nwunye na-akwa iko, ndị na-aṅụ iyi ụgha,+ ndị na-aghọgbu onye ha goro ọrụ,+ ndị na-aghọgbu nwaanyị di ya nwụrụ, ndị na-aghọgbu nwa na-enweghị nna,*+ nakwa ndị na-ekweghị enyere onye mbịarambịa aka.*+ Ha anaghị atụ egwu m.” Ọ bụ ihe Jehova nke ụsụụ ndị agha kwuru.

6 “N’ihi na abụ m Jehova; anaghị m agbanwe agbanwe.*+ Unu bụ ụmụ Jekọb; unu anwụchabeghị. 7 Malite n’ụbọchị ndị nna nna unu, unu hapụrụ ntụziaka m, unu emeghịkwa ha.+ Lọghachikwutenụ m, m ga-alọghachikwutekwa unu.”+ Ọ bụ ihe Jehova nke ụsụụ ndị agha kwuru.

Ma, unu na-asị: “Olee otú o si bụrụ na anyị kwesịrị ịlọghachikwute gị?”

8 “Mmadụ efu ọ̀ ga-ezu Chineke ohi? Ma unu na-ezu m ohi.”

Unu na-asịkwa: “Olee otú anyị si zuo gị ohi?”

“Unu anaghị eweta otu ụzọ n’ụzọ iri nakwa onyinye dị iche iche. 9 Unu bụ ndị a bụrụ ọnụ* n’ihi na unu na-ezu m ohi. N’eziokwu, mba unu niile na-eme otú ahụ. 10 Webatanụ otu ụzọ n’ụzọ iri niile n’ụlọ nsọ m,*+ ka nri wee dịrị n’ụlọ nsọ m.+ Biko, nwaleenụ m n’ihe a, ka unu hụ ma ọ̀ bụ na mụ agaghị emeghe ọnụ ụzọ mmiri nke eluigwe+ ma wụsa unu ngọzi ruo mgbe ihe ọ bụla na-agaghị akọ unu.”+ Ọ bụ ihe Jehova nke ụsụụ ndị agha kwuru.

11 “M ga-abara ihe na-eripịa ihe* mba n’ihi unu. Ọ gaghị ebibi ihe ala unu mepụtara, osisi vaịn ndị dị n’ubi unu ga-amịkwa mkpụrụ.”+ Ọ bụ ihe Jehova nke ụsụụ ndị agha kwuru.

12 Jehova nke ụsụụ ndị agha kwuru, sị, “Mba niile ga-ekwu na unu bụ ndị obi ụtọ+ n’ihi na ala unu* ga-abụ ala obi ụtọ.”

13 Jehova kwuru, sị, “Okwu unu kwuru gbasara m dị njọ.”

Unu na-asịkwa: “Olee ihe ọjọọ anyị kwurịtara gbasara gị?”+

14 “Unu na-asị, ‘Ijere Chineke ozi abaghị uru.+ Olee uru anyị ritere na anyị nọ na-eme ihe ọ chọrọ ka anyị mee ma na-agbarụ ihu anyị iji gosi Jehova nke ụsụụ ndị agha na mmehie anyị wutere anyị? 15 Ugbu a, anyị chere na ọ bụ ndị mpako na-enwe obi ụtọ. Ihe na-agazikwara ndị na-eme ajọ omume.+ Ha na-anwa Chineke, ma o nweghị ihe na-eme ha.’”

16 N’oge ahụ, ndị na-atụ egwu Jehova nọ na-akparịta ụka, otu onye na ibe ya, Jehova nọkwa na-ege ntị ma na-anụ ihe ha na-ekwu. E wee nọrọ n’ihu Jehova dee aha+ ndị na-atụ egwu ya na ndị na-echebara aha ya echiche* n’akwụkwọ e dere aha ndị ọ ga-echeta.+

17 Jehova nke ụsụụ ndị agha kwuru, sị, “Ha ga-abụ nke m+ n’ụbọchị m ga-eme ka ha bụrụ ndị pụrụ iche.+ M ga-emetekwara ha ebere* otú nna si emetere nwa ya nke na-ejere ya ozi ebere.+ 18 Unu ga-ahụkwa ọzọ ihe dị iche n’onye ezi omume na onye ajọ omume,+ n’onye na-ejere Chineke ozi na onye na-anaghị ejere ya ozi.”

4 “N’ihi na, lee, ụbọchị nke na-ere ka oké ọkụ na-abịa.+ Ndị niile dị mpako na ndị niile na-eme ajọ omume ga-adị ka ahịhịa ọka. Ụbọchị ahụ nke na-abịa ga-erepịa ha ka ọkụ, ọ gaghịkwa erefọ mgbọrọgwụ ha ma ọ bụ alaka ha.” Ọ bụ ihe Jehova nke ụsụụ ndị agha kwuru. 2 “Ma anyanwụ ezi omume ga-achara unu ndị na-asọpụrụ* aha m, ìhè* ya ga-agwọkwa unu. Unu ga-awụgharịkwa ka ụmụ ehi gbara agba.”

3 Jehova nke ụsụụ ndị agha kwuru, sị, “Unu ga-azọgide ndị ajọ omume ụkwụ n’ihi na ha ga-adị ka ájá n’okpuru ọbụ ụkwụ unu n’ụbọchị m ga-eme ihe.”

4 “Chetanụ Iwu m nyere Mosis ohu m n’ugwu Horeb, ya bụ, ntụziaka na ihe ndị m kpebiri bụ́ ndị m nyere ndị Izrel niile iwu ka ha na-edebe.+

5 “Lee, m na-ezitere unu Ịlaịja onye amụma+ tupu oké ụbọchị Jehova, bụ́ ụbọchị dị egwu, abịa.+ 6 Ọ ga-eme ka obi ndị nna dịrị ka nke ụmụ,+ meekwa ka obi ụmụ dịrị ka nke ndị nna,* ka m wee ghara ịbịa tie ụwa ihe ma bibie ya.”

(Ebe a ka Akwụkwọ Nsọ Hibru na Arameik gwụrụ. Akwụkwọ Nsọ Grik nke Ndị Kraịst ga-amalitezi)