Okubala

13 Awo Yakuwa n’agamba Musa nti: 2 “Tuma abasajja bagende bakette ensi ya Kanani gye ŋŋenda okuwa Abayisirayiri. Ojja kutuma omusajja omu okuva mu buli kika kya bajjajjaabe, era buli omu ku bo alina okuba nga mwami+ mu kika kye.”+

3 Bw’atyo Musa n’abatuma okuva mu ddungu ly’e Palani+ nga Yakuwa bwe yalagira. Abasajja abo bonna baali bakulu b’Abayisirayiri. 4 Gano ge mannya gaabwe: mu kika kya Lewubeeni, Sammuwa mutabani wa Zakkuli; 5 mu kika kya Simiyoni, Safati mutabani wa Koli; 6 mu kika kya Yuda, Kalebu+ mutabani wa Yefune; 7 mu kika kya Isakaali, Igali mutabani wa Yusufu; 8 mu kika kya Efulayimu, Koseya+ mutabani wa Nuuni; 9 mukika kya Benyamini, Paluti mutabani wa Lafu; 10 mu kika kya Zebbulooni, Gadyeri mutabani wa Sodi; 11 mu kika kya Yusufu,+ Gadi mutabani wa Susi ow’omu kika kya Manase;+ 12 mu kika kya Ddaani, Ammiyeri mutabani wa Gemali; 13 mu kika kya Aseri, Sesula mutabani wa Mikayiri; 14 mu kika kya Nafutaali, Nakabi mutabani wa Vofesi; 15 mu kika kya Gaadi, Geweri mutabani wa Maki. 16 Ago ge mannya g’abasajja Musa be yatuma okuketta ensi. Koseya mutabani wa Nuuni, Musa yamutuuma Yoswa.*+

17 Musa bwe yali abatuma okuketta ensi ya Kanani yabagamba nti: “Mwambuke e Negebu, oluvannyuma mugende mu kitundu eky’ensozi.+ 18 Mulabe ensi bw’eri,+ n’abantu abagirimu, obanga ba maanyi oba banafu, obanga bangi oba batono, 19 era obanga ensi nnungi oba mbi, era obanga babeera mu bibuga ebiriko bbugwe oba ebitaliiko bbugwe. 20 Era mulabe obanga ensi ngimu* oba ya lunnyo,*+ obanga mulimu emiti oba temuli. Mube bavumu+ muleeteyo ku bibala by’omu nsi eyo.” Ekiseera ekyo kyali kiseera ezzabbibu+ we litandikira okwengera.

21 Bwe batyo ne bagenda ne baketta ensi okuviira ddala mu ddungu lya Zini+ okutuuka e Lekobu+ okumpi n’e Lebo-kamasi.*+ 22 Ne bagenda mu Negebu, ne batuuka e Kebbulooni,+ era eyo waaliyo Akimaani, Sesayi, ne Talumaayi,+ Abaanaki.+ Kebbulooni kyali kimaze emyaka musanvu nga kizimbiddwa, ne Zowani eky’e Misiri ne kiryoka kizimbibwa. 23 Bwe baatuuka mu Kiwonvu Esukoli+ ne batemayo ettabi nga liriko ekirimba kimu eky’ezzabbibu, nga kyetaagisa abasajja babiri okukisitulira ku muti. Baaleeta ne ku nkomamawanga ne ku bibala by’omutiini.+ 24 Ekifo ekyo baakituuma Ekiwonvu Esukoli*+ olw’ekirimba Abayisirayiri kye baatemayo.

25 Oluvannyuma lw’ennaku 40+ baakomawo nga bava okuketta ensi. 26 Bwe baakomawo ne bagenda eri Musa ne Alooni n’ekibiina kyonna eky’Abayisirayiri e Kadesi+ mu ddungu ly’e Palani. Ne bategeeza ekibiina kyonna bye baalaba era ne babalaga n’ebibala eby’omu nsi. 27 Ne bagamba Musa nti: “Twayingira mu nsi gye watutuma okugendamu, era mazima ddala ekulukuta amata n’omubisi gw’enjuki,+ era bino bye bibala byayo.+ 28 Naye abantu ababeera mu nsi eyo ba maanyi, n’ebibuga ebiriko bbugwe binene nnyo; era twalabayo n’Abaanaki.+ 29 Abamaleki+ babeera mu kitundu ky’e Negebu,+ Abakiiti n’Abayebusi+ n’Abaamoli+ babeera mu kitundu eky’ensozi, ate Abakanani+ babeera ku lubalama lw’ennyanja+ n’olw’Omugga Yoludaani.”

30 Kalebu n’agezaako okukkakkanya abantu nga bayimiridde mu maaso ga Musa, n’abagamba nti: “Tugende awatali kulwa; mu buli ngeri ensi tujja kugitwala kubanga tusobolera ddala okugiwangula.”+ 31 Naye abasajja abaagenda naye ne bagamba nti: “Tetusobola kulwanyisa bantu abo kubanga ba maanyi okutusinga.”+ 32 Ne beeyongera okwogera obubi+ ku nsi gye baali bava okuketta, nga bagamba Abayisirayiri nti: “Ensi gye twayitamu nga tugiketta erya abantu baayo, era abantu bonna be twalabayo bawagguufu nnyo.+ 33 Era twalabayo n’Abanefuli, abaana ba Anaki,+ abaasibuka mu* Banefuli. Tweraba nga tulinga amayanzi gye bali era nabo bwe batyo bwe baatulaba.”